ပီတာပန်က အရွယ်ရောက်လာတာကို မလိုချင်ဘဲ ကလေးတစ်သိုက်နဲ့အတူ နဲဗားလန်းမှာ နေထိုင်တဲ့ကောင်လေးပါ။ သူ့ရန်သူက ကပ္ပတိန်ဟုခ်ဖြစ်ပြီး တစ်နေ့မှာတော့ ကလေးတွေရဲ့ မိခင်အဖြစ် နေပေးဖို့ ဝင်ဒီ့ကို လာခေါ်ပါတယ်။ ဒါက J.M. Barrie ဖန်တီးခဲ့ပြီး ပြဇာတ်ကနေ ရုပ်ရှင်တွေအထိ အကြိမ်ကြိမ် ပြန်လည်တင်ဆက်ခဲ့ကြတဲ့ ပီတာပန်ဇာတ်လမ်းတွေရဲ့ အခြေခံအကြောင်းပါ။ Peter Pan & Wendy မှာတော့ ပီတာပန်ကို လူဆိုးအဖြစ်လည်း မပုံဖော်ထားသလို သူရဲကောင်းတစ်ယောက်အဖြစ်လည်း မတင်ပြထားပါဘူး။ ဝင်ဒီ့ဘက်ကို ပိုအသားပေးပြီး အရင်ဇာတ်ကားတွေမှာ မပါခဲ့တဲ့ ဇာတ်လမ်းကွက်လပ်တွေကိုလည်း ဖြည့်ထားပါတယ်။ ဝင်ဒီ့ဇာတ်လမ်းကို ကြည့်ရင် လူကြီးလောကထဲ ဝင်ရတော့မယ့် ကလေးတစ်ယောက်ရဲ့ ကြောက်စိတ်နဲ့ မကြီးပြင်းချင်စိတ်ကို တွေ့ရပါတယ်။ နဲဗားလန်းဆိုတဲ့ အယူအဆကိုလည်း အဲဒီစိတ်တွေနဲ့ ဆက်စပ်တင်ပြထားတာပါ။ အရင်က ရိုက်ကူးခဲ့တဲ့လက်ရာတွေရှိပြီးသားမို့ ဒီတစ်ကြိမ် ပြန်လည်တင်ဆက်မှုအပေါ်မှာလည်း ချီးကျူးသံနဲ့ ဝေဖန်သံ နှစ်မျိုးစလုံး ရှိနေပါတယ်။
ဇာတ်ကားကြည့်ရန်
