ဇာတ်ကား / 1957The Bridge on the River KwaiThe Bridge on the River Kwai (1957)
IMDb - 8.1/10 Rotten - 95%
Won 7 Oscars. Another 23 wins & 7 nominations
ဒုတိယကမ္ဘာစစ်အတွင်း.......ဗမာပြည်တစ်နေရာတွင် အခြေစိုက်ထားသော ဂျပန်စစ်အကျဉ်းစခန်းတစ်ခုသို့ British စစ်သုံ့ပန်းတစ်အုပ်စုတို့ ရောက်ရှိလာခဲ့သည်။ ဂျပန်စစ်အကျဉ်းစခန်းကိုဦးစီးသူက Colonel Saito။ British စစ်သုံ့ပန်းများကို ဦးစီးလာသူက Colonel Nicholson။ Colonel Nicholson နှင့်တပ်သားများသည် အကျဉ်းစခန်းသို့စဝင်လာကတည်းက စစ်ချီတေးတစ်ခုကို သံပြိုင်လေချွန်၍ဝင်လာကြသည်။ ဒါဟာ Colonel Nicholson ဘယ်လောက်အထိ Formality, Discipline ကိုအရေးပေးသလဲဆိုတာကိုပေါ်လွင်စေသည်။ Nicholson သည် သည်အကျဉ်းစခန်းမှာ ရောက်ရှိနှင့်ပြီးသော Commander Shears အပါအဝင် အခြားသုံ့ပန်းများအတွက်တော့ အထူးအဆန်းပြုံးချင်စရာဖြစ်နေခဲ့၏။ သူတို့ရောက်နေသည့် နေရာ၊ လုပ်ရမည့်အလုပ်တွေက ဒါမျိုးတွေနှင့်မှ မသက်ဆိုင်တာကိုး။ Commander Shears ဆိုသူက အမေရိကန်စစ်တပ်ကဖြစ်သည်။ သူက ပထမဆုံးရက်ကတည်းက Nicholson တို့ကို သည်စခန်းကြီး၏ ကြမ်းကြုတ်မှုတွေအကြောင်း သတိပေးဖို့ကြိုးစားခဲ့သည်။ သည်စခန်းမှာ ခြံစည်းရိုးခတ်စရာမလို၊ ကင်းတဲချစရာမလို။ တောအထပ်ထပ်၊ တောင်အစွယ်စွယ်ကာရံထားခြင်းက ထွက်ပြေးလွတ်မြောက်ဖို့ကို အကောင်းဆုံးတားမြစ်ထား၏။ Shears ကတော့ ထွက်ပြေးရန် အချိန်အခါကောင်းနှင့် အဖော်ကောင်းတို့ကိုစောင့်နေသူဖြစ်သည်။ ထွက်ပြေးလျှင် လွတ်မြောက်ရန်ရာခိုင်နှုန်း ၁ ရာခိုင်နှုန်းပဲရှိသည်ဆိုဦးတော့ သည်စခန်းမှာ ဆက်နေလျှင် ရှင်သန်လွတ်မြောက်နိုင်မည့် သုည ရာခိုင်နှုန်းထက်တော့များသေးသည်ဟု သူကဆိုသည်။ Nicholson ကတော့ သဘောမတူ။ သည်စခန်းမှာပဲ ကျိုးနွံစွာနေပြီး British စစ်သားကောင်းတို့၏ ဂုဏ်ရည်ကိုပြသမည်ဟု ကြုံးဝါးသည်။
ပြဿနာက နောက်တစ်ရက်မှာ စသည်။ သည်စခန်းရှိ စစ်သုံ့ပန်းများ၏ တာဝန်က ဗမာနှင့် ထိုင်းကိုဆက်သွယ်မည့် သေမင်းတမန်ရထားလမ်းကြီး၏ တစ်စိတ်တစ်ပိုင်းအဖြစ် Kwai မြစ်ကိုဖြတ်ကျော်ကာ တံတားတည်ဆောက်ရန်ဖြစ်၏။ သည်တံတားကြီးက ဂျပန်တို့ကို စစ်ရေးအရ ကောင်းကျိုးအများကြီးပြုမည်ဖြစ်သည်။ Colonel Saito က စစ်သုံ့ပန်းအားလုံးကို အလုပ်ကြမ်းလုပ်စေဖို့ အမိန့်ပေးရာ Nicholson က Geneva convention အရ စစ်အရာရှိများကို အလုပ်ကြမ်းစေခိုင်းပိုင်ခွင့်မရှိဟု စောဒကတက်ပါတော့သည်။ ရလဒ်အနေနှင့် Saito က Nicholson ထုတ်ပြသော Geneva convention စာအုပ်ကြီးနှင့် သူ့ကိုပါးချလိုက်ပါသည်။ အလုပ်လုပ်ရန်ငြင်းဆန်သော Nicholson နှင့် အရာရှိ ၇ ယောက်ခန့်တို့ကိုလည်း နေပူထဲ တစ်နေကုန်မတ်တပ်ရပ်စေခဲ့ပါသည်။ နောက်တစ်နေ့မှာလည်း ဆက်လက်ငြင်းဆန်နေခဲ့သော Nicholson တို့ကို iron box ဟုခေါ်သည့် သွပ်ကာ တဲကျဉ်းကျဉ်းလေးထဲ ပိတ်လှောင်ထားလိုက်၏။
ထိုကိစ္စများဖြစ်ပွားနေချိန်တွင် Shears သည် အဖော်နှစ်ယောက်တို့နှင့်အတူ အကျဉ်းစခန်းမှ ထွက်ပြေးခဲ့ပါသည်။ အဖော်နှစ်ယောက်သေဆုံးသွားပေမယ့် Shears ကတော့ ခက်ခက်ခဲခဲနှင့်လွတ်မြောက်နိုင်ခဲ့ပါသည်။
ခေါင်းဆောင်မပါသော British စစ်သားများ၏ ကရော်ကမယ်၊ လျော့တိလျော့ရဲအလုပ်လုပ်ပုံတွေကြောင့် တံတားကြီးက တိုးတက်မှုအလွန်နှေးကွေးနေခဲ့ရပါသည်။ ဂျပန်အင်ဂျင်နီယာများ၏ မကျွမ်းကျင်မှုကြောင့်လည်း ပါပါသည်။ တံတားကြီးသာ အချိန်မီမပြီးခဲ့လျှင် Saito အနေဖြင့် ကိုယ့်ကိုကိုယ် အဆုံးစီရင်ရမည်ဖြစ်၏။ ထို့ကြောင့် Saito အနေဖြင့် Nicholson ကိုစိတ်ဓာတ်ပိုင်းအရ အနိုင်ပေးလိုက်ရပြီး အပြစ်ပေးခံထားရသော British officers များကိုလွတ်ပေးလိုက်ရပါတော့သည်။ Nicholson ကလည်း သည်တံတားကြီးကို အပြီးတည်ဆောက်ပေးခြင်းအားဖြင့် british စစ်သားများ၏ စွမ်းဆောင်ရည်၊ စိတ်ဓာတ်မာကြောမှုတို့ကို သိစေမည်ဟူသော ရည်ရွယ်ချက်ဖြင့် အင်တိုက်အားတိုက် ပါဝင်တည်ဆောက်ပေးဖို့ သဘောတူလိုက်သည်။ ဂျပန်အင်ဂျင်နီယာများရွေးချယ်ထားခဲ့သောနေရာက မြေပျော့သောကြောင့် တံတားထောက်တိုင်တွေကိုခိုင်မြဲစေမှာမဟုတ်သည့်အတွက် Nicholson က အခြားတစ်နေရာတွင် တံတားကိုအစအဆုံးပြန်ဆောက်ရမည်ဟုဆိုသည်။ ဘာမှမကြံတတ်တော့သော Saito လည်း သဘောတူလိုက်ရုံမှတပါး...........
Shears က အကျဉ်းစခန်းမှထွက်ပြေးလွတ်မြောက်လာပြီးသည့်နောက် မိခင်တပ်ဆီလည်းမပြန်ဘဲ အေးဆေးအနားယူနေခဲ့သည်။ သို့သော်.....British စစ်တပ်က ဂျပန်တို့၏ စစ်ရေးအချက်အခြာဖြစ်သော Kwai မြစ်ပေါ်ကတံတားကြီးကို ဖောက်ခွဲဖျက်ဆီးရန် ရည်ရွယ်ချက်ဖြင့် Shears အား သူခက်ခက်ခဲခဲလွတ်မြောက်လာပြီးသည့် ငရဲခံတွင်းဝအတွင်း နောက်တစ်ကြိမ်သက်ဆင်းရန် အကူအညီတောင်းခံလာခဲ့သည့်အခါ...................
David Lean ဆိုတာ ရုပ်ရှင်လောကတစ်ခုလုံးက လေးစားဦးညွှတ်ကြရတဲ့ ဂန္တဝင်ဒါရိုက်တာကြီးပါပဲ။ သူရဲ့လက်ရာတစ်ခုဖြစ်တဲ့ ဒီဇာတ်ကားဟာလည်း ကမ္ဘာ့အကောင်းဆုံးရုပ်ရှင်ဇာတ်ကားတွေထဲက တစ်ကားပဲဖြစ်ပါတယ်။ တကယ်ကိုကြီးကျယ်ခန်းနားတဲ့ setting ကြီးတွေဆောက်(ဇာတ်ကားရိုက်ဖို့ တကယ့်တံတားကြီးကိုဆောက်ခဲ့ပါတယ်။)၊ လူအင်အားများစွာသုံးခဲ့တဲ့ဒီဇာတ်ကားကြီးဟာ Best picture, best director, best actor တို့အပါအဝင် အော်စကာ ၇ ဆုကိုထိုက်ထိုက်တန်တန်ရရှိခဲ့တဲ့ဇာတ်ကားလည်းဖြစ်ပါတယ်။ သရုပ်ဆောင်တွေအဖြစ်တော့ William Holden,
Alec Guinness, Jack Hawkins, Sessue Hayakawa တို့ပါဝင်ပါတယ်။
ဒီကားရိုက်ကူးခဲ့ရတာနဲ့ပတ်သက်ပြီး ထူးထူးခြားခြားဖြစ်ခဲ့ရတာလေးတွေကိုပြောပြချင်ပါတယ်။ ဒီကားဟာ ပြင်သစ်ဝတ္ထုတစ်ခုကိုအခြေခံတာပါ။ သေမင်းတမန်ရထားလမ်းစတဲ့ မှန်ကန်တဲ့ historical facts တွေအပေါ်အခြေခံခဲ့ပေမယ့် ဇာတ်လမ်းကတော့ စိတ်ကူးယဉ်ဖန်တီးထားတာဖြစ်ပါတယ်။ သေမင်းတမန်ရထားလမ်းလို့ဘာကြောင့်အမည်တွင်သလဲဆိုတာ လူတိုင်းသိကြမှာပါ။ သည်ရထားလမ်းကြီးဖောက်လုပ်တဲ့လုပ်ငန်းစဉ်တစ်လျှောက် စစ်သုံ့ပန်း 13000 ကျော်၊ ပြည်သူ 80000 နဲ့ 100000 ကြားသေဆုံးခဲ့ရတယ်လို့ဆိုပါတယ်။ ဒါကြောင့် ဒီကားထဲမှာဖော်ပြခဲ့တဲ့ ခက်ခဲကြမ်းတမ်းမှုတွေဟာ အပြင်မှာဖြစ်ပျက်ခဲ့တာထက် လျော့နေတယ်လို့ ဆိုကြပါတယ်။
British မင်းသား Alec Guiness အပါအဝင် တော်တော်များများကတော့ ဒီဇာတ်ကားရဲ့ဇာတ်ညွှန်းဟာ Britain တွေကိုချိုးနှိမ်တယ်လို့ ယူဆကြပါတယ်။ ဒါ့အတွက် Alec Guiness နဲ့ David Lean တို့ဟာ ရိုက်ကွင်းပေါ်မှာ မကြာခဏ ကတောက်ကဆဖြစ်ခဲ့ကြရတယ်လို့ဆိုပါတယ်။ ပြီးသွားတော့လည်း သူတို့နှစ်ယောက်စလုံးအော်စကာရခဲ့ကြတာပါပဲ။ ဒီငြင်းခုန်မှုအတွက်တာဝန်ရှိတာကတော့ Colonel Nicholson နဲ့ Commander Shears ဆိုတဲ့ဇာတ်ကောင်တွေပါပဲ။ သူတို့ကိုယ်စီကို ကိုယ်စားပြုအနေနဲ့မြင်လိုက်ကြတဲ့အခါ အငြင်းပွာစရာတွေဖြစ်လာခဲ့တာပါ။ ကျွန်တော်ကတော့ Individual အနေနဲ့ပဲမြင်သင့်တယ်လို့ ထင်ပါတယ်။
ဒီဇာတ်ကားမှာပြောစမှတ်တွင်တာတစ်ခုက အကျဉ်းစခန်းကိုဝင်လာကြတဲ့စစ်သားများ စစ်ချီလေချွန်သံပါပဲ။ နောက်တစ်ချက်ကတော့ Iron Box ထဲမှာအပြစ်ပေးခံထားတာကနေ ထွက်လာပြီး Colonel Saito ရဲ့တဲဆီကို သွားတဲ့ Nicholson ရဲ့လမ်းလျှောက်ပုံပါပဲ။ တစ်နေကုန် ပူလောင်ပြင်းပြမှုကိုခံထားရတဲ့ Nicholson ရဲ့နွမ်းလျတဲ့လမ်းလျှောက်ပုံဟာ ပီပြင်လွန်းလို့ အားလုံးကချီးကျူးခဲ့ကြပါတယ်။ Alec Guiness ကဒီလမ်းလျှောက်ပုံကို Polio ရောဂါကနေ နာလန်ထစ သူ့သားရဲ့လမ်းလျှောက်ပုံကိုကြည့်ပြီးသင်ယူခဲ့တယ်လို့ ဆိုပါတယ်။
Producers, director တွေကိုခေါင်းနားပန်းကြီးစေခဲ့တဲ့အဖြစ်အပျက်ကတော့ လေယာဉ်နဲ့တင်ပို့လိုက်တဲ့ ဖလင်လိပ်တွေ လမ်းမှာပျောက်ဆုံးသွားခဲ့ခြင်းပါပဲ။ တစ်ကမ္ဘာလုံးကိုသူတို့ပိုက်စိပ်တိုက်ရှာခဲ့ပြီး တစ်ပတ်အကြာမှာတော့ Cairo လေဆိပ်မှာပြန်တွေ့ခဲ့ပါတယ်တဲ့။ ငွေကြေးများစွာ၊ အချိန်များစွာ၊ ခက်ခဲဆင်းရဲမှုများစွာရင်းနှီးခဲ့ရတဲ့ ဒီ ဖလင်တွေသာပျောက်သွားခဲ့ရင် မတွေးဝံ့စရာပါပဲ။
ဒီဇာတ်ကားကြီးဟာ ရုပ်ရှင်တစ်ကားရဲ့ ကြီးကျယ်ခန်းနားမှုတွေကို ဖမ်းဆုပ်ပြနိုင်ခဲ့တဲ့အပြင် ဇာတ်ကောင်တွေရဲ့ကြီးမားတဲ့အားပြိုင်မှုတွေကိုပါပြနိုင်ခဲ့ပါတယ်။ ဒီဇာတ်ကားရဲ့ character တွေဟာ အကုန်လုံးမှန်ကန်တဲ့သူမပါသလို၊ အကုန်လုံးမှားယွင်းနေတဲ့သူလည်းမပါပါဘူး။ အားလုံးကသူ့အမြင်နဲ့သူမှန်နေတော့ ဘယ်သူကသူရဲကောင်း၊ ဘယ်သူကဗီလိန် ခွဲပြောရခက်ပါတယ်။ ယုတ်စွအဆုံး ဖက်ဆစ် Colonel Saito ကိုတောင်မှ တာဝန်သိတတ်တဲ့သူအဖြစ်မြင်ကြည့်လို့ရပါတယ်။ Colonel Nicholson ဟာခေါင်းဆောင်ကောင်းပီသသူ၊ စည်းကမ်းသေဝပ်သူ၊ ကျင့်ဝတ်လိုက်နာသူလို့ ယေဘုယျရှုမြင်နိုင်ပေမယ့် သေသေချာချာကြည့်လိုက်ရင်တော့ အတ္တ၊ မောဟ၊ ခေါင်းမာမှုတွေအနည်းငယ်ရောစွက်နေတဲ့ စရိုက်ကိုမြင်ရပါမယ်။ ခေါင်းဆောင်တစ်ယောက်မှာ မရှိသင့်တာတွေပါ။ Shears ကတော့ typical American hero ပုံစံပါပဲ။ မလိုအပ်ဘဲ မစွန့်စားဘူး။ မိုက်ရူးရဲမဆန်ဘူး။ Flexible ဖြစ်တယ်။ ကိုယ့်အတွက်အသာရမယ့်နည်းလမ်းကိုတွက်ချက်တတ်တယ်။ ယေဘုယျကြည့်ရင်တော့ တစ်ကိုယ်ကောင်းဆန်သူလို့ထင်ရတယ်။ ဒါပေမယ့် အရေးကြုံလာတဲ့အခါ ကိုယ်ကျိုးစွန့်ဖို့လည်းဝန်မလေးဘူး။ ဇာတ်ညွှန်းက Britain တွေကိုနှိမ်တယ်ဆိုတာ မမှန်ရင်တောင် American တွေကိုနည်းနည်း အလေးပေးထားတယ်လို့တော့ ထင်လို့ရပါတယ်။
Nicholson, Shears, Saito...........သူတို့က သူရဲကောင်းတွေလား၊ ဗီလိန်တွေလား?
Kwai မြစ်ပေါ်ကတံတားကြီးကရော........အောင်မြင်မှုပြယုဂ်လား၊ စစ်ရဲ့ဘေးထွက်ဆိုးကျိုးလား?
~Miller~
P.S. ဇာတ်ကားအသစ်တွေ ဘယ်လိုဆန်းသစ်တဲ့နည်းပညာတွေနဲ့ပဲ ထွက်ရှိလာလာ ကြီးကျယ်ခန်းနားတဲ့ ဂန္တဝင်ရုပ်ရှင်ကြီးတွေဟာ ရုပ်ရှင်သမိုင်းမှာ အမြဲထင်ပေါ်နေမှာပါ။ မိတ်ဆွေတို့ကိုလည်း အဟောင်းထဲကအကောင်းတွေကိုပြန်လည်ခံစားနိုင်စေဖို့ ကြည့်ဖူးတဲ့ ဂန္တဝင်ဇာတ်ကားကြီးတွေကို အလျဉ်းသင့်သလို ပြန်ပြီး review လုပ်ပေးသွားပါမယ်။
(ရုပ်ရှင်အညွှန်းကို Movies-we watch,we feel. မှ ကူးယူဖော်ပြပါသည်။)
File size…(1.7 GB) and (1.2 GB)
Quality….Blu-Ray Rip 1080p and 720p
Format…mp4
Duration….02:47:00
Subtitle….Myanmar Subtitle (Hardsub)
Encoder….Nyeinsaeya Aung
Translated by Cherry Mon
ဇာတ်ကားကြည့်ရန် 
