Suga ပါဝင်သော ဇာတ်ကားများ

BTS အဖွဲ့ဝင် SUGA ရဲ့ “D-DAY” အယ်လ်ဘမ်ဖန်တီးမှုခရီးစဉ်ကို မှတ်တမ်းတင်ထားတဲ့ ရုပ်ရှင်ပါ။ ဒီခရီးစဉ်မှာတော့ BTS အဖွဲ့ဝင်တစ်ယောက်အဖြစ်ထက် “AGUST D” ဆိုတဲ့ အမည်ခွဲနဲ့ ကိုယ့်ဂီတလမ်းကြောင်းပေါ် ရပ်တည်ဖို့ ကြိုးစားနေတဲ့ သူ့ဘဝတစ်ဖက်ကို တွေ့ရပါတယ်။ အယ်လ်ဘမ်ဖန်တီးနေစဉ် ကြုံရတဲ့ ရုန်းကန်မှုတွေနဲ့အတူ ဂီတအပေါ် သူဘယ်လိုမြင်သလဲ၊ ဘယ်လိုစိတ်ထားနဲ့ အလုပ်လုပ်သလဲဆိုတာကိုလည်း ဖော်ပြထားတယ်။ ခရီးတစ်လျှောက် နယ်ပယ်အသီးသီးက ဂီတပညာရှင်တွေနဲ့ တွေ့ဆုံပြီး အမြင်တွေ၊ အတွေးတွေ ဖလှယ်ပြောဆိုကြတာကိုလည်း မှတ်တမ်းထဲမှာ တွေ့ရပါတယ်။

ကိုဗစ်ကာလအတွင်း ဖျော်ဖြေပွဲတွေ နားထားခဲ့ရပြီးနောက် BTS ပြန်လည်ကျင်းပခဲ့တဲ့ Permission to Dance ဖျော်ဖြေပွဲတွေထဲက LA ပွဲကို မှတ်တမ်းတင်ထားတာပါ။ LA က ARMY ပရိသတ်များစွာနဲ့အတူ အဖွဲ့ဝင် ခုနစ်ယောက် စင်မြင့်ပေါ် ပြန်ဆုံကြတဲ့ပွဲ ဖြစ်ပါတယ်။ ဒီပွဲမှာ သီချင်းအများအပြား ဖျော်ဖြေခဲ့ကြသလို အမှတ်တရစကားတွေလည်း ပြောခဲ့ကြတယ်။ ဖျော်ဖြေမှုတွေအပြင် အဖွဲ့ဝင်တွေနဲ့ ပရိသတ်တွေ အတူမျှဝေခဲ့တဲ့ ပျော်ရွှင်စရာအခိုက်အတန့်တွေကိုလည်း တွေ့ရပါတယ်။