April Snow

ဇာတ်လမ်းအကြောင်း

တစ်ချိန်က ကိုယ့်အတွက် အသင့်လျော်ဆုံးလို့ ယုံကြည်ခဲ့တဲ့သူကို အခုတော့ ပြန်မေးခွန်းထုတ်မိလာတဲ့ ခံစားချက်နဲ့ April Snow ရဲ့ အညွှန်းကို စထားပါတယ်။ သူ့အတွက်ပဲ အချိန်ကုန်ခံပြီး လုပ်ပေးနေခဲ့တာက ငြီးငွေ့စရာ ဖြစ်နေခဲ့သလားဆိုတဲ့ အတွေးနဲ့အတူ အဲဒီလူကြောင့်ပဲ နောက်တစ်ယောက်နဲ့ ဆုံခွင့်ရခဲ့ကြောင်း ပြောထားတယ်။ အစကတည်းက ဒီလူနဲ့ တွေ့ခဲ့ရင် ကောင်းမှာပဲလို့ တွေးမိပေမယ့် နှစ်ယောက်သား ပေါင်းစပ်နိုင်ပါ့မလားဆိုတာတော့ မသေချာဘူး။ အညွှန်းထဲက နောက်ထပ်ရင်ဖွင့်စကားတွေမှာ အချစ်နဲ့ တွေ့ဆုံရတဲ့အချိန်အခါအကြောင်း ဆက်ပြောထားပါတယ်။ စောလွန်းတာ၊ နောက်ကျလွန်းတာတွေကြားမှာ မတူညီတဲ့လူနှစ်ယောက် ချစ်မိနိုင်ပေမယ့် ပြန်ဆုံခွင့်ရဖို့တော့ မျှော်လင့်ရဆဲပါ။ နွေဦးနဲ့ ဆောင်း၊ နွေဦးမှာ ကျလာမယ့်နှင်းတို့ကို တင်စားပြီး အချိန်အခါသင့်တဲ့နေ့မှာ ပြန်ဆုံနိုင်မလားဆိုတဲ့ မျှော်လင့်ချက်ကို ရေးထားတာပါ။ April Snow ကို ဒါရိုက်တာ Hur Jin-ho က ကိုယ်တိုင်ရေးသားရိုက်ကူးထားပြီး Bae Yong-joon နဲ့ Son Ye-jin တို့ ပါဝင်သရုပ်ဆောင်ထားပါတယ်။ Hur Jin-ho ရဲ့ အခြားလက်ရာတွေထဲမှာ Christmas in August၊ One Fine Spring Day နဲ့ The Last Princess တို့ရှိတယ်။ Bae Yong-joon ကို ဟေမန်ဆောင်းရဲ့ချစ်ပုံပြင်နဲ့ လူသိများခဲ့ပြီး Son Ye-jin ကတော့ The Classic၊ The Pirates နဲ့ 39 တို့မှာ ပါဝင်ခဲ့သူပါ။