Clem Bevans ပါဝင်သော ဇာတ်ကားများ

Harvey (1950) Classic Comedy ရုပ်ရှင်အမျိုးအစားတစ်ခုဖြစ်တဲ့ Harvey ကို ၁၉၅၀ ခုနှစ်မှာ Henry Koster က ရိုက်ကူးပြီး Mary Chase ရဲ့ ၁၉၄၄ ခုနှစ် ပူလစ်ဇာဆုရပြဇာတ်ကို မှီငြမ်းထားတာဖြစ်ပါတယ်။ ရုပ်ရှင်အနေနဲ့ကတော့ Fantasy နဲ့ Psychological Comedy ကို ရောနှောတင်ဆက်ထားတာဖြစ်ပါတယ်။ အဓိကဇာတ်ကောင် အဲဝုဒ်ဒေါက်ဟာ သူ့အစ်မဖြစ်သူ ဗီတာလူးဝိစ် နဲ့ တူမဖြစ်သူ မာတယ်မေတို့နဲ့အတူ အမေချန်ထားခဲ့တဲ့ အိမ်ကြီးမှာ အတူနေနေတာလည်း ဖြစ်ပါတယ်။ အဲဝုဒ်က ပတ်ဝန်းကျင်မှာ လူချစ်လူခင်များတဲ့သူ ဖြစ်ပေမယ့် သူတစ်ယောက်တည်းသာ မြင်ရတဲ့ ၆ ပေ အမြင့်ရှိတဲ့ ယုန်ဖြူကြီးတစ်ကောင်ကို သူငယ်ချင်းလုပ်ပေါင်းသင်းနေတဲ့ သူဖြစ်ပါတယ်။ သူ့ရဲ့ ယုန်ဖြူကြီး"Harvey" ကို တွေ့တဲ့သူတိုင်းနဲ့ မိတ်ဆက်၊ အရက်အတူတူသောက်ကြ၊ စကားဖောင်ဖွဲ့ကြ လုပ်နေပေမယ့် အများအမြင်မှာတော့ အဲဝုဒ်ဟာ တစ်ယောက်တည်းစကားပြောဆိုနေတတ်တဲ့ ယဉ်ယဉ်လေး ရူးသွပ်သွားသူတစ်ယောက် ဖြစ်နေပါတော့တယ်။ အဲဝုဒ်ရဲ့အကြောင်းကို ဖုံးဖိလေလေ၊ အလွဲလွဲအချော်ချော်တွေဖြစ်ပြီး သတင်းတွေသာပိုပြန့်လာတဲ့အတွက် ဗီတာလူးဝီစ်ဟာ မိသားစုရှေ့နေ ဂတ်ဖနီနဲ့ပူးပေါင်းပြီး အဲဝုဒ်ကို စိတ္တဇဆေးရုံပို့ဖို့ ကြံပါတော့တယ်။ အဲဝုဒ်ကလည်း ယုန်ဖြူကြီးကို မြင်နေရတာကလွဲရင် ပေါင်းတတ်သင်းတတ်ပြီး သိမ်မွေ့တဲ့ အမူအယာ၊ အပြောအဆိုတွေကြောင့် ရူးလို့ရူးနေမှန်းမသိကြဘဲ ဗီတာလူးဝိစ်သာ စိတ္တဇဆေးရုံမှာ သောင်တင်ခဲ့ပါတော့တယ်။ အဲဝုဒ်ကို ချောက်ချလေလေ၊ လုပ်တဲ့သူ ခံရလေလေ ဖြစ်ပြီးနောက်ပိုင်းမှာ သူ့ကိုပဲ "Harvey" ဆိုတဲ့ယုန်ဖြူကြီးက စောင့်ရှောက်နေသလား၊ သူပြောတဲ့ "Harvey" ကပဲ အဲဝုဒ်စိတ်ထင်တာသက်သက်မဟုတ်ဘဲ တကယ်ရှိနေတဲ့ ပုဂ္ဂိုလ်လားဆိုတဲ့ မေးခွန်းတွေက ဇာတ်လမ်းရှေ့ဆက်လာလေလေ ပရိသတ်စိတ်ထဲ ရောက်လာလေလေ ဖြစ်လာပါတယ်။ Comedy အမျိုးအစားဖြစ်ပေမယ့် ဇာတ်လမ်းရဲ့ Pacing ကငြိမ်ငြိမ့်လေးနဲ့ ပရိသတ်ကို ဆွဲဆောင်နိုင်တာမို့ Calming & Soothing Vibe ကို ပေးစွမ်းနိုင်တဲ့အဖြူအမည်းရုပ်ရှင်တစ်ကားကို ရှာဖွေနေသူများအတွက် "Harvey" ကို တင်ဆက်ပေးလိုက်ရပါတယ်။

တချို့ရုပ်ရှင်တွေက ဘယ်လောက်ပဲ နှစ်တွေဟောင်းသွားပါစေ ကြည့်ပြီးသွားတိုင်း ရင်ထဲမှာ လွမ်းမောစရာ ခံစားချက်တစ်ခုခုကို အမြဲချန်ထားရစ်ခဲ့တတ်ပါတယ်။ ဒါရိုက်တာ Clarence Brown ရိုက်ကူးခဲ့တဲ့ The Yearling (၁၉၄၆) ဆိုတာ အဲဒီလို ဂန္ထဝင်မြောက် ဇာတ်ကားမျိုးပါ။ ဒီရုပ်ရှင်ဟာ ကလေးဘဝရဲ့ အပြစ်ကင်းစင်မှုကနေ ကြမ်းတမ်းတဲ့ လက်တွေ့ဘဝထဲကို အကူးအပြောင်းမှာ ဘယ်လောက်တောင် နာကျင်ရသလဲဆိုတာကို အပီပြင်ဆုံး တင်ဆက်ထားနိုင်ပါတယ်။ ဇာတ်လမ်းနောက်ခံကတော့ အမေရိကန်ပြည်တွင်းစစ်အပြီး ဖလော်ရီဒါပြည်နယ်က တောအုပ်ထဲမှာ အခြေချနေထိုင်တဲ့ ဘက်စတာ (Baxter) မိသားစုအကြောင်းပါ။ ဖခင်ဖြစ်သူ ပန်နီ (Gregory Peck) နဲ့ မိခင်ဖြစ်သူ အော်ရာ (Jane Wyman) တို့ဟာ ကြမ်းတမ်းတဲ့ သဘာဝတရားကြားမှာ အသက်ရှင်သန်ဖို့ ခက်ခက်ခဲခဲ ရုန်းကန်နေရပါတယ်။ သူတို့ရဲ့ တစ်ဦးတည်းသော သားလေး ဂျိုဒီ (Claude Jarman Jr.) ဟာ အဖော်မရှိဘဲ အထီးကျန်နေတဲ့ ကလေးလေးပါ။ တစ်နေ့မှာတော့ ဂျိုဒီဟာ မိဘမဲ့ သမင်ပေါက်လေးတစ်ကောင်ကို တွေ့သွားပြီး "ဖလက်ဂ်" (Flag) လို့ နာမည်ပေးကာ အိမ်ကို ခေါ်လာပြီး မွေးစားပါတော့တယ်။ ဂျိုဒီနဲ့ သမင်လေးတို့ရဲ့ သံယောဇဉ်က တကယ့်ကို ကြည်နူးစရာပါ။ ဒါပေမယ့် အချိန်တွေကြာလာပြီး သမင်လေး ကြီးလာတဲ့အခါမှာတော့ မိသားစု စိုက်ပျိုးထားတဲ့ ကောက်ပဲသီးနှံတွေကို စတင် ဖျက်ဆီးပါတော့တယ်။ ဒီအချိန်မှာတော့ အသက်ရှင်သန်ရေးအတွက် ရုန်းကန်နေရတဲ့ မိသားစုနဲ့ ချစ်ရတဲ့ အိမ်မွေးတိရစ္ဆာန်လေးကြားမှာ ရွေးချယ်ရတဲ့အခါ ဂျိုဒီလေးအတွက် တကယ့်ကို နာကျင်စရာ အချိုးအကွေ့တစ်ခု ဖြစ်လာပါတော့တယ်။ Gregory Peck က သားဖြစ်သူကို နားလည်ပေးနိုင်တဲ့ ဖခင်ကောင်းတစ်ယောက်အနေနဲ့ သရုပ်ဆောင်သွားတာ အရမ်းကို အေးချမ်းပါတယ်။ မိခင်နေရာက Jane Wyman ကတော့ သားသမီးတွေကို ဆုံးရှုံးဖူးတဲ့ ဒဏ်ရာကြောင့် သားကျန်အပေါ် သံယောဇဉ် အပြည့်အဝမပြရဲတဲ့ မိခင်တစ်ယောက်ရဲ့ စိတ်ခံစားချက်ကို အကောင်းဆုံး ဖော်ပြသွားနိုင်ပါတယ်။ အထူးခြားဆုံးကတော့ ဂျိုဒီနေရာက သရုပ်ဆောင်တဲ့ ကလေးသရုပ်ဆောင် Claude Jarman Jr. ပါပဲ။ တိရစ္ဆာန်လေးတစ်ကောင်အပေါ် ထားရှိတဲ့ သူရဲ့ ဖြူစင်တဲ့ မေတ္တာနဲ့ နောက်ဆုံးမှာ ကြုံတွေ့ရတဲ့ ဝမ်းနည်းကြေကွဲမှုတွေကို ပရိသတ်တွေပါ မျက်ရည်ကျရတဲ့အထိ သဘာဝကျကျ သရုပ်ဆောင်သွားပါတယ်။ ၁၉၄၆ ခုနှစ်က ရိုက်ကူးထားတာဖြစ်ပေမယ့် အဲဒီခေတ်က အသုံးပြုခဲ့တဲ့ Technicolor ကင်မရာရိုက်ချက်တွေက သဘာဝတောတောင် အလှတရားနဲ့ တိရစ္ဆာန်လေးတွေရဲ့ လှုပ်ရှားမှုတွေကို အရမ်းကို အသက်ဝင်လှပစွာ မှတ်တမ်းတင်ထားနိုင်ပါတယ်။ ဒီကားက ကလေးတစ်ယောက်နဲ့ သမင်လေးတစ်ကောင်အကြောင်း သက်သက်မဟုတ်ပါဘူး။ "ကြီးပြင်းလာရခြင်း" ဆိုတဲ့ အရာဟာ တစ်ခါတစ်ရံမှာ ကိုယ်အချစ်ရဆုံး အရာတွေကို စွန့်လွှတ်လိုက်ရတာမျိုး၊ ဘဝရဲ့ ခါးသီးတဲ့ လက်တွေ့တရားတွေကို လက်ခံရတာမျိုး ဖြစ်တယ်ဆိုတာကို နက်နက်ရှိုင်းရှိုင်း ပြသသွားတာပါ။ တိရစ္ဆာန်လေးတွေကို ချစ်တတ်တဲ့သူတွေ၊ မိသားစု မေတ္တာဖွဲ့ ဇာတ်လမ်းကောင်းတွေကို နှစ်သက်သူတွေနဲ့ ဂန္ထဝင်ရုပ်ရှင်တွေကို ခုံမင်သူတိုင်း မဖြစ်မနေ ကြည့်သင့်တဲ့ ကားကောင်းတစ်ကားပါ။ တစ်ခု သတိပေးချင်တာကတော့ ဒီကားကို ကြည့်မယ်ဆိုရင် ဘေးနားမှာ တစ်ရှူးဘူးလေး တစ်ဘူးလောက်တော့ ဆောင်ထားဖို့ အကြံပေးပါရစေ။ မျက်ရည်မကျဘဲ ကြည့်နိုင်ဖို့ဆိုတာ တော်တော်လေးကို ခဲယဉ်းလို့ပါ။ File size… 2.45 GB / 1.16 GB Quality… Blu - Ray 1080p/ 720p Format… mp4 Duration…. 2h 8m Genre ..... Drama , Family , Western Subtitle…. Myanmar Subtitle (Hard Sub)