Divya Das ပါဝင်သော ဇာတ်ကားများ

ပင်လယ်ထဲမှာ ရှစ်နှစ်ကြာ မျောနေခဲ့တဲ့ ပုလင်းတစ်လုံးထဲက စာတစ်စောင် Q ဌာနဆီ ရောက်လာပါတယ်။ အဲဒီစာက အဖမ်းခံထားရတဲ့ ကလေးတစ်ယောက် ရေးထားတာဖြစ်ပြီး သူ့ကို လာကယ်ပေးဖို့ အကူအညီတောင်းထားတာပါ။ ရေးခဲ့ချိန်ကနေ ရှစ်နှစ်ကြာသွားပြီဖြစ်တဲ့ ဒီစာရဲ့နောက်ကြောင်းကို Q ဌာနက လိုက်စုံစမ်းကြရတယ်။ တစ်ချိန်တည်းမှာပဲ နယ်ဘက်က ဘာသာရေးကိုင်းရှိုင်းတဲ့ လယ်သမားမိသားစုတစ်စုမှာလည်း ပြဿနာတစ်ခု ကြုံနေရပါတယ်။ ဒီဖြစ်ရပ်နှစ်ခု ဆက်စပ်နေသလား၊ နောက်ထပ် အမှုတွေ ရှိနေသေးသလားဆိုတာကို စုံစမ်းရင်း ပဟေဠိတွေ ပိုများလာတယ်။ ဘာသာရေးကိုင်းရှိုင်းတဲ့ ကလေးတွေကို ဘာကြောင့် ဖမ်းဆီးတာလဲ၊ သူတို့ကို ဘာတွေလုပ်ခဲ့တာလဲ၊ ဒီလိုလုပ်ရခြင်းရဲ့ နောက်ကွယ်မှာ ဘယ်လိုအတိတ်ဆိုးမျိုး ရှိနေမလဲဆိုတဲ့ မေးခွန်းတွေနဲ့အတူ ဉာဏ်များတဲ့ လူဆိုးတစ်ယောက်ကို ရင်ဆိုင်ကြရပါတယ်။ Q ဌာနရဲ့ တတိယအမှုတွဲဖြစ်တဲ့ ဒီကားမှာ ကားလ်က ခါတိုင်းထက်တောင် အခြေအနေဆိုးနေပုံရတယ်။ ဘာယုံကြည်မှုမှ မရှိတဲ့သူနဲ့ အာဆတ်တို့ကြား ယုံကြည်မှုအကြောင်း အငြင်းပွားနေကြသလို ဇာတ်လမ်းကလည်း ဘာသာရေးနဲ့ ယုံကြည်မှုတွေ အစွန်းရောက်သွားတဲ့အခါ ဖြစ်လာနိုင်တဲ့ ဆိုးကျိုးတွေကို မေးခွန်းထုတ်ထားပါတယ်။ Kon Tiki ရုပ်ရှင်မှာ သော်ရ်အဖြစ် သရုပ်ဆောင်ခဲ့တဲ့ မင်းသားလည်း ဒီကားမှာ ပါဝင်ထားပါတယ်။

Q ဌာနရဲ့ ဒုတိယအမှုတွဲမှာတော့ ပထမအမှုကို အောင်အောင်မြင်မြင် ဖော်ထုတ်နိုင်ခဲ့လို့ ဌာနကို ချီးကျူးနေကြချိန်ပါ။ ကားလ်နဲ့ အာဆတ်တို့အဖွဲ့ထဲကို ရိုစ့်ဆိုတဲ့ အတွင်းရေးမှူးအသစ်လည်း ရောက်လာပါတယ်။ တစ်နေ့ ဌာနပါတီကနေ ကားလ်ပြန်လာချိန်မှာ လူတစ်ယောက်က သူ့ဆီချဉ်းကပ်ပြီး အသတ်ခံရတဲ့ သားသမီးအမွှာနှစ်ယောက်ရဲ့အမှုကို ပို့ထားပေမယ့် ဘာကြောင့် မကြည့်ပေးတာလဲဆိုပြီး ဇွတ်မေးတယ်။ ကားလ်ကတော့ အဲဒီလူကို မောင်းထုတ်လိုက်ပါတယ်။ သိပ်မကြာခင်မှာပဲ အဲဒီလူ ကိုယ့်ကိုယ်ကိုယ် သတ်သေသွားကြောင်း ကားလ်ကြားလိုက်ရတယ်။ သူဟာ ရဲအရာရှိဟောင်းတစ်ယောက်ဖြစ်ပြီး လွန်ခဲ့တဲ့ အနှစ် ၂၀ လောက်က အသတ်ခံရတဲ့ သားနဲ့သမီးရဲ့အမှုကို စုံစမ်းခဲ့သူ၊ အခုတော့ အငြိမ်းစားယူထားသူဖြစ်ကြောင်း သိလာရပါတယ်။ ကားလ်ဆီပို့ဖို့ ပြင်ထားတဲ့ အထုပ်ကြီးတစ်ထုပ်ကိုပါ တွေ့လိုက်ရတဲ့နောက် ကားလ်က ဒီအမှုကို ပြန်လိုက်ဖို့ ဖြစ်လာတယ်။ စုံစမ်းလေလေ နှစ်လောင်းပြိုင်လူသတ်မှုက ပိုကြီးမားတဲ့ အဖြစ်အပျက်တွေထဲက အစိတ်အပိုင်းတစ်ခုသာ ဖြစ်နေကြောင်း သိလာရပြီး အနှစ် ၂၀ ကြာ ဖုံးကွယ်ထားတဲ့ ရက်စက်မှုတွေ ပေါ်လာပါတယ်။ ဂရစ်ဖင်ဟွန်းဘော်ဒါကျောင်းမှာ ဘာတွေဖြစ်ခဲ့တာလဲ၊ တနင်္ဂနွေနေ့က ဒီအမှုနဲ့ ဘယ်လိုပတ်သက်နေတာလဲ၊ ကင်မီဆိုတဲ့ ကောင်မလေးကရော ဘယ်သူလဲဆိုတဲ့ မေးခွန်းတွေကို ကားလ်၊ အာဆတ်နဲ့ ရိုစ့်တို့ သုံးယောက် လိုက်ဖြေရှင်းကြရတယ်။ ဒီတစ်ခါမှာ တရားခံကို အစကတည်းက ပြထားပြီး စုံထောက်တွေနဲ့ တစ်ဖက်နဲ့တစ်ဖက် ဘယ်လိုအကွက်ချကြမလဲဆိုတာကို ဇာတ်လမ်းဖွဲ့ထားပါတယ်။ လိင်ပိုင်းဆိုင်ရာ အကြမ်းဖက်မှုတွေနဲ့ အဲဒီဖြစ်ရပ်တွေကို ထင်ထင်ရှားရှား ပြသထားတဲ့အခန်းတွေ ပါဝင်ပါတယ်။

ကားလ်က အရည်အချင်းရှိပေမယ့် ခေါင်းမာပြီး တစ်ဇွတ်ထိုးလုပ်တတ်တဲ့ စုံထောက်တစ်ယောက်ပါ။ လူတွေနဲ့လည်း အဆင်ပြေပြေ မပေါင်းသင်းတတ်ဘူး။ တစ်ရက်မှာတော့ သူ့ရဲ့ခေါင်းမာမှုကြောင့် တွဲဖက်တွေထဲက သေဆုံးသူနဲ့ မသန်စွမ်းဖြစ်သွားသူတွေ ရှိလာပြီး သူကိုယ်တိုင်လည်း Q ဌာနဆိုတဲ့ ဌာနအသစ်ဆီ ရာထူးချပြောင်းရွှေ့ခံလိုက်ရပါတယ်။ ဝန်ကြီးဌာနက အသစ်ဖွဲ့ထားတဲ့ Q ဌာနရဲ့အလုပ်က လွန်ခဲ့တဲ့ အနှစ် ၂၀ လောက်က ပိတ်သိမ်းထားတဲ့ အမှုတွေကို ပြန်စစ်ပြီး စာရင်းသွင်းဖို့ပါ။ အဲဒီမှာ ဝန်ထမ်းဆိုလို့ အရာရာကို အကောင်းမြင်တတ်တဲ့ အာဆတ်တစ်ယောက်ပဲ ရှိတယ်။ စိတ်တိုတတ်တဲ့ ကားလ်နဲ့ ပျော်ပျော်နေတတ်တဲ့ အာဆတ်တို့ အမှုဟောင်းတွေကို စစ်ကြရင်း လွန်ခဲ့တဲ့ ငါးနှစ်က အမှုတစ်ခုကို သတိထားမိသွားကြပါတယ်။ ကျန်းမာရေးနယ်ပယ်မှာ လုပ်ကိုင်တဲ့ အမျိုးသမီးတစ်ယောက် ဖယ်ရီသင်္ဘောပေါ်က ခုန်ချသေဆုံးခဲ့တယ်ဆိုတဲ့ အမှုပါ။ သူက စိတ်ကျန်းမာရေးမကောင်းတဲ့ မောင်ဖြစ်သူကို ပြုစုစောင့်ရှောက်နေသူဖြစ်ပြီး အမှုကိုတော့ ကိုယ့်ကိုယ်ကိုယ် သတ်သေမှုအဖြစ် ပိတ်ထားခဲ့တယ်။ ကားလ်နဲ့ အာဆတ်က မသင်္ကာတာကြောင့် အမှုပြန်ဖွင့်ပြီး လိုက်စုံစမ်းကြတဲ့အခါ နောက်ကွယ်မှာ ရှုပ်ထွေးနေတဲ့ အဖြစ်အပျက်တွေ ရှိနေကြောင်း တွေ့လာရပါတယ်။ ဒီဒိန်းမတ်စုံထောက်ဇာတ်ကားမှာ အမှုစုံစမ်းပုံနဲ့အတူ စိတ်တိုနေတတ်တဲ့ ကားလ်၊ သူ့ဘေးက လူပျော်အာဆတ်တို့ရဲ့ မတူညီတဲ့စရိုက်တွေကိုလည်း တွဲမြင်ရပါတယ်။ ကားလ်အဖြစ် ပါဝင်တဲ့မင်းသားက Tom Hanks ပါဝင်သရုပ်ဆောင်ထားတဲ့ Angels & Demons မှာလည်း ပါဝင်ခဲ့သူပါ။ ဒီကားနောက်မှာ သူတို့နှစ်ယောက်ရဲ့ အမှုတွေအကြောင်း နောက်ထပ်သုံးကား ဆက်ထွက်ထားပါတယ်။