ချစ်သူနဲ့ ချိန်းတွေ့နေတုန်း မျက်နှာဖုံးတပ်ထားတဲ့ လူတစ်ယောက် ရောက်လာပြီး သူ့ကောင်လေးကို ဓားနဲ့ထိုးသတ်သွားခဲ့တယ်။ ဒီဆုံးရှုံးမှုကို မဖြေဆည်နိုင်တဲ့ အဓိကဇာတ်ကောင်ဟာ အတိတ်ကို ပြန်ပြင်ဖို့ ကြိုးစားပါတော့တယ်။ သူရွေးတဲ့နည်းကတော့ စိတ်နဲ့ အချိန်ခရီးသွားဖို့ပါ။ သူယုံကြည်တာက လူတစ်ယောက်ဟာ ကိုယ့်အဖြစ်ကို ကောင်းကောင်းသိမြင်နိုင်ရင် ကိုယ်နေထိုင်တဲ့ အရှိတရားကိုလည်း စိတ်ကြိုက်ထိန်းချုပ်နိုင်မယ်ဆိုတာပါပဲ။ ကိုယ့်ကိုယ်ကိုယ် မြင်တဲ့အမြင် ပြောင်းသွားတဲ့အခါ ကိုယ်တိုင်လည်း ပြောင်းလဲသွားသလို အတိတ်ကအဖြစ်အပျက်တစ်ခုကို တခြားပုံစံနဲ့ လက်ခံလိုက်နိုင်ရင် အတိတ်ကို ပြင်နိုင်မယ်လို့ သူယူဆထားတယ်။ အဲဒီပြောင်းလဲမှုက လက်ရှိအခြေအနေကိုပါ သက်ရောက်လာမယ်လို့ ယုံကြည်တာကြောင့် စိတ်နဲ့ အချိန်ခရီးသွားနိုင်မယ့် စက်တစ်မျိုးကို တီထွင်ပြီး အတိတ်က သူ့မှတ်ဉာဏ်တွေကို ပြင်ဆင်ဖို့ ကြိုးစားပါတယ်။ တစ်နာရီကျော်ကြာတဲ့ ဒီရုပ်ရှင်မှာ နေရာသုံးနေရာကို အလှည့်ကျပြသပြီး ပစ္စုပ္ပန်ကို အဖြူအမဲ၊ အတိတ်ကိုတော့ အရောင်နဲ့ တင်ဆက်ထားပါတယ်။ အချိန်ခရီးသွားခြင်းအပြင် ဖြစ်တည်မှု၊ အရှိတရားနဲ့ သိမြင်မှုအကြောင်းတွေကို ဆွေးနွေးထားပြီး ဖြစ်တည်မှုပဓာနဝါဒဆန်တဲ့ စကားပြောခန်းတွေလည်း ပါဝင်ပါတယ်။
ဇာတ်ကားကြည့်ရန်