Jim Chim ပါဝင်သော ဇာတ်ကားများ

ကမ္ဘာအနှံ့ လေယာဉ်မောင်းရတဲ့ ကပ္ပတိန်ကူးဟာ လေယာဉ်ကို ရူးသွပ်သလို မိန်းကလေးတွေနဲ့လည်း ပွေရှုပ်တတ်သူပါ။ သူဌေးရဲ့ဇနီးနဲ့ ပတ်သက်မိတာကို သူဌေးသိသွားတဲ့အခါ အလုပ်ထွက်ဖို့ အပြောခံလိုက်ရတယ်။ ဒါပေမဲ့ နောက်ဆုံးအကြိမ် လေယာဉ်မောင်းတဲ့ခရီးမှာတောင် လေယာဉ်မယ်တွေနဲ့ ပျော်ပါးနေတုန်းပါပဲ။ အဲဒီအချိန် လေယာဉ်က သံလိုက်စက်ကွင်းတစ်ခုထဲ ဝင်သွားပြီး ၂၀၁၄ ခုနှစ်ကနေ မင်မင်းဆက်ခေတ်ဆီ ရုတ်တရက် ရောက်သွားပါတယ်။ ခေတ်ဟောင်းကို ရောက်သွားလည်း ကပ္ပတိန်ကူးရဲ့အကျင့်က မပြောင်းပါဘူး။ မိန်းကလေးတွေကို လိုက်ပိုးရင်း မင်မင်းဆက်သမိုင်းရဲ့ အရေးပါတဲ့ဖြစ်ရပ်တစ်ခုထဲ ဝင်ပါမိသွားပါတော့တယ်။ အရွယ်ရောက်သူတွေအတွက် ဟာသဇာတ်ကားဖြစ်ပြီး ရှောင်လင်ဘောလုံးကားထဲက ဖက်တီးလို့ လူသိများတဲ့ သရုပ်ဆောင်လည်း ပါဝင်ထားပါတယ်။ ဒါရိုက်တာကတော့ Sex and Zen ကို ရိုက်ကူးခဲ့သူပါ။

အမေဇုန်ပြည်မှာ အမျိုးသားတွေကို စိတ်နာနေတဲ့ ဘုရင်မကြီးတစ်ပါးက အာဏာနဲ့ မှော်အစွမ်းကို သုံးပြီး တိုင်းပြည်ကို ထိန်းချုပ်ထားပါတယ်။ အမျိုးသမီးတွေက အမျိုးသားတွေကို ဖိနှိပ်ထားကြပြီး အမျိုးသားတွေဟာ ငွေနဲ့ ဝယ်ရောင်းခံရတဲ့ ကျွန်တွေလို နေကြရတယ်။ ဒီဘုရင်မကို နှိမ်နင်းနိုင်တဲ့ တစ်ခုတည်းသောနည်းက ကြယ်တာရာသူရဲကောင်းတစ်ဦးဟာ Excalibur ဓားကို ကိုင်ဆောင်ပြီး သူ့ကို သတ်ပစ်ဖို့ပါပဲ။ သူ့ကို ချေမှုန်းနိုင်သူ ရှိနေမှန်း သိထားတဲ့ ဘုရင်မကလည်း သူရဲကောင်းအလောင်းအလျာကို ရှာဖို့ တိုင်းပြည်ထဲက အမျိုးသားတွေကို လိုက်ဖမ်းနေပါတယ်။ ဒါပေမဲ့ သူရှာနေတဲ့သူက အကြောင်းအမျိုးမျိုးနဲ့ လွတ်မြောက်နေဆဲပါ။ အဲဒီသူရဲကောင်းဟာ ဘယ်သူလဲ၊ Excalibur ဓားကို ဘယ်လို ရှာတွေ့နိုင်မလဲဆိုတဲ့ ဓားရှာပုံတော်နဲ့ ဘုရင်မကို ရင်ဆိုင်ရမယ့်အကြောင်းကို ဟာသနှောပြီး ပြထားပါတယ်။ ပထမကားက သရုပ်ဆောင်တွေ ပြန်ပါလာပေမယ့် ဒီတစ်ခါ ဇာတ်ကြောင်းကတော့ လုံးဝကွဲပါတယ်။ သရုပ်ဆောင်အသစ်တွေလည်း ထပ်ပါလာပြီး ပထမကားမှာ ပါခဲ့တဲ့ Jackie Chan အပြင် Ip Man အဖြစ် လူသိများတဲ့ Donnie Yen ကိုလည်း ဧည့်သည်သရုပ်ဆောင်အဖြစ် တွေ့ရမှာပါ။