Jordan Drake ပါဝင်သော ဇာတ်ကားများ

June and John (2025) ဂန္တ၀င်ပြင်သစ်ရုပ်ရှင် Léon: The Professional , Lucyတို့လိုကားတွေကိုဖန်တီးခဲ့တဲ့ ဒါရိုက်တာကြီးLuc Bessonရဲ့ ထုံးစံအတိုင်း မိန်းကလေးဇာတ်ကောင်ကို အဓိက ဦးတည်ပြီးရိုက်ပြထားတဲ့ ခပ်မိုက်မိုက်ဇာတ်လမ်းတစ်ပုဒ်ဖြစ်ပါတယ် နေ့စဉ်ဘဝကို တစ်သမတ်တည်း၊ ပျင်းရိငြီးငွေ့ဖွယ် အလုပ်အကိုင်တွေကြားထဲမှာပဲ ဖြတ်သန်းနေရတဲ့ သာမန်၀န်ထမ်းတစ်ယောက်ဖြစ်တဲ့ ဂျွန်" အကြောင်းကနေ စတင်ထားပါတယ်။ သူ့ရဲ့ဘဝဟာ ဘာလှုပ်ခတ်မှုမှမရှိဘဲ အေးစက်နေခဲ့တာပါ။ ဒါပေမဲ့ တစ်နေ့မှာတော့...ထူးဆန်းတဲ့ မိန်းကလေး "ဂျွန်း က သူ့ရဲ့အမြင်အာရုံထဲကို ရုတ်တရက် ရောက်ရှိလာပြီး ဂျွန်ရဲ့ စိတ်အာရုံတစ်ခုလုံးကို ဖမ်းစားသွားပါတော့တယ် ဂျွန်ဟာ ဂျွန်းရဲ့ ထူးခြားတဲ့ ဆွဲဆောင်မှုတွေနောက်ကို အရူးအမူး လိုက်ပါရင်း... သူတို့နှစ်ဦးကြားထဲမှာ ပြင်းထန် လှတဲ့ အချစ်ဇာတ်လမ်း တစ်ခု စတင်ဖြစ်ပေါ်လာခဲ့ပါတယ်။ ဒါပေမဲ့ ဂျွန်းရဲ့နောက်ကွယ်မှာ ဂျွန်မသိသေးတဲ့ လျှို့ဝှက်ချက်တွေ၊ အန္တရာယ်တွေ ရှိနေခဲ့တာပါ။ ဒီအချစ်ကပဲ ဂျွန်ကို သူ့ရဲ့ပျင်းစရာ‌ကောင်းတဲ့ဘ၀က‌နေ ဘာဖြစ်လာမလဲဆိုတာ ကြိုတင်ခန့်မှန်းလို့မရနိုင်တဲ့ စွန့်စားခန်း အလှည့်အပြောင်း ခရီးကြမ်းကြီးတစ်ခုထဲကို ဆွဲသွင်းသွားပါတော့တယ်။ ဂျွန်တစ်ယောက် ဂျွန်းကို ကာကွယ်ရင်းနဲ့ အဆိုပါ အန္တရာယ်တွေကြားထဲကနေ ဘယ်လိုမျိုး အသက်လု ရုန်းကန်ရမလဲဆိုတာကို ရင်ခုန်စွာနဲ့ကြည့်ရမယ့်ကားဖြစ်ပါတယ်။

အသက်ငါးဆယ်ကျော်အရွယ် ကမ်မရွန်ဟာ ကလေးတွေအတွက် အာကာသသိပ္ပံအစီအစဉ် တင်ဆက်ပေးနေတဲ့ နက္ခတ္တဗေဒပညာရှင်တစ်ယောက်ပါ။ ငယ်ငယ်ကတည်းက သိပ္ပံပညာကို ဝါသနာပါပြီး အာကာသယာဉ်မှူး ဖြစ်ချင်ခဲ့ပေမယ့် လက်ရှိမှာတော့ တီဗီတင်ဆက်သူအဖြစ်ပဲ အလုပ်လုပ်နေရတယ်။ သူ့အစီအစဉ်က သိပ်မအောင်မြင်ဘဲ ညသန်းခေါင်အချိန်မှာပဲ ထုတ်လွှင့်ခွင့်ရနေရာက နောက်ဆုံး သူ့နေရာကိုပါ တခြားလူတစ်ယောက် ဝင်လာပါတယ်။ အစားဝင်လာတဲ့ ကန့်က ထူးချွန်ပြီး ဆုရထားတဲ့ အာကာသယာဉ်မှူးတစ်ယောက်ဖြစ်သလို ကမ်မရွန်ဖြစ်ချင်ခဲ့သမျှကို ပိုင်ဆိုင်ထားသူပါ။ အလုပ်မှာ အဆင်မပြေတဲ့အပြင် မိသားစုနဲ့လည်း ကတောက်ကဆတွေ ဖြစ်နေတဲ့ ကမ်မရွန်ဟာ ကိုယ့်အစွမ်းအစကို သက်သေပြပြီး ငယ်ဘဝအိပ်မက်ကို အကောင်အထည်ဖော်ချင်လာတယ်။ အဲဒီအချိန်မှာပဲ ရုရှားက ဒုံးကျည်အစိတ်အပိုင်းတစ်ခု သူတို့အိမ်နောက်ဖေးခြံထဲ ပျက်ကျလာပါတယ်။ ဒီကိစ္စကြောင့် အိမ်က အစိုးရရဲ့ လုပ်ပိုင်ခွင့်အောက် ရောက်သွားပြီး လုပ်ငန်းတွေ မပြီးမချင်း နေခွင့်မရတော့လို့ မိသားစုလိုက် တခြားအိမ်မှာ ခဏပြောင်းနေရတယ်။ အဲဒီရပ်ကွက်မှာ သူ့သမီးကလည်း သူတို့လို အိမ်ပြောင်းလာတဲ့ ကျောင်းသားသစ်ကောင်လေးတစ်ယောက်နဲ့ တွေ့ပြီး သူငယ်ချင်းဖြစ်လာပါတယ်။ ကမ်မရွန်ကတော့ ပျက်ကျလာတဲ့ ဒုံးကျည်အစိတ်အပိုင်းကို သုံးပြီး ကိုယ်ပိုင်ဒုံးကျည်တစ်စင်း ဆောက်ဖို့ လုံးပန်းနေတယ်။ ဇနီးဖြစ်သူ အီရင်က အစမှာ သဘောမတူလို့ စကားများကြပေမယ့် နောက်တော့ သူလည်း အတူဝင်ပြီး တည်ဆောက်ပေးလာပါတယ်။

မူးယစ်ဆေးဖြတ်ပြီး မရိန်းတပ်သားဖြစ်လာတဲ့ လူငယ်တစ်ယောက်ဟာ တပ်ထဲဝင်ပြီးတာတောင် အရင်ကအကြွေးတွေ မကျေသေးလို့ အခက်တွေ့နေပါတယ်။ သူ့မိသားစုက မျိုးဆက်သုံးဆက်လုံး မရိန်းတပ်သားတွေဖြစ်ပြီး အဖေကလည်း တာဝန်ထမ်းဆောင်ရင်း ရန်သူကြောင့် ဒဏ်ရာရတာ ဒါမှမဟုတ် ကျဆုံးတာအတွက် ပေးအပ်တဲ့ Purple Hearts ဆုကို ရထားသူပါ။ ဆေးရောင်းသူက အကြွေးလာတောင်းနေတော့ မိသားစုကို ရန်ရှာမှာစိုးပြီး ပြန်ဆပ်နေပေမယ့် သူ့မှာ ငွေမလောက်ဘူး။ တစ်ဖက်မှာလည်း ဂီတကို ဝါသနာပါတဲ့ အဆိုတော်မလေးတစ်ယောက်ဟာ ဆီးချိုရောဂါအတွက် အင်ဆူလင်ဝယ်ဖို့ ငွေအခက်အခဲ ဖြစ်နေပါတယ်။ ကျန်းမာရေးအာမခံက သူလိုအပ်တဲ့ ဆေးပမာဏအတွက် မကာမိသလို ကိုယ့်ငွေနဲ့ ထပ်ဝယ်ဖို့လည်း မတတ်နိုင်တော့ဘူး။ တစ်ညမှာ မရိန်းတပ်သားတွေ သူအလုပ်လုပ်တဲ့ဘားကို ပွဲလာလုပ်ကြရင်း တပ်သားတစ်ယောက်ရဲ့ ဇနီးဆိုရင် ကျန်းမာရေးအာမခံ အပြည့်အဝရတယ်ဆိုတာ သိလိုက်ရပါတယ်။ ဒါနဲ့ မရိန်းတပ်သားတစ်ယောက်ကို လက်ထပ်ဖို့ စဉ်းစားလာတယ်။ အကြွေးဆပ်ဖို့ ငွေလိုနေတဲ့ တပ်သားနဲ့ ဆေးဖိုးအတွက် အခက်တွေ့နေတဲ့ အဆိုတော်မလေးတို့ဟာ အကျိုးခံစားခွင့်တွေရဖို့ အယောင်ဆောင် လက်ထပ်လိုက်ကြပါတယ်။ ကောင်မလေးက ဆေးဖိုးရပြီး တပ်သားက ထောက်ပံ့ကြေးရမယ့် ဒီအစီအစဉ်ကနေ သူတို့နှစ်ယောက်ရဲ့ အချစ်ဇာတ်လမ်း ဘယ်လိုဆက်ဖြစ်လာမလဲဆိုတာ ပြထားတာပါ။ Tess Wakefield ရဲ့ ဝတ္ထုကို ပြန်လည်ရိုက်ကူးထားပြီး Sofia Carson က အဆိုတော်မလေးအဖြစ် ပါဝင်ထားပါတယ်။ သီချင်းတွေလည်း အများအပြား ပါဝင်တဲ့ ဂီတနဲ့ အချစ်ဒရာမာဇာတ်ကားပါ။