Patrick Cameron ပါဝင်သော ဇာတ်ကားများ

အသက်အရွယ်၊ အသားအရောင်နဲ့ တွေးခေါ်ပုံကအစ မတူကြတဲ့ ရဲအရာရှိ ရစ်ဂ်နဲ့ မားတာချ်တို့ ဒီတစ်ခါလည်း ရှုပ်ထွေးတဲ့အမှုတွေကို အတူကိုင်တွယ်ကြရပါတယ်။ အလုပ်လုပ်တဲ့အခါ အတွဲညီကြသလို အတည်ပေါက်နဲ့ အလွဲတွေဖြစ်တတ်တဲ့ သူတို့နှစ်ယောက်ရဲ့ ဆက်ဆံရေးက ဒီဒုတိယကားမှာ ပိုပြီးခိုင်မာလာပါတယ်။ ၁၉၈၇ ခုနှစ်မှာ ထွက်ခဲ့တဲ့ ပထမကားအပြီး နှစ်နှစ်အကြာမှာ ထွက်လာတဲ့ နောက်ဆက်တွဲဖြစ်ပြီး အက်ရှင်နဲ့ ဟာသကို ရောထားပါတယ်။ ပထမကားမှာ မပြောပြခဲ့တဲ့ ရစ်ဂ်ရဲ့ ဇနီးဖြစ်သူ ဘာကြောင့်သေဆုံးခဲ့ရသလဲဆိုတဲ့ အကြောင်းကိုလည်း ဒီတစ်ကားမှာ သိရမှာပါ။

ရဲအရာရှိ ရော်ဂျာက ဘဝကို အေးအေးချမ်းချမ်း ဖြတ်သန်းနေသူပါ။ အသက် ၅၀ ပြည့်မွေးနေ့ကို မိသားစုနဲ့ ပျော်ပျော်ရွှင်ရွှင် ကုန်ဆုံးပြီး ခါတိုင်းလို အလုပ်သွားတဲ့အခါမှာတော့ သတင်းဆိုးတစ်ခု ကြားလိုက်ရတယ်။ စစ်ပွဲမှာ အတူတိုက်ခဲ့ဖူးပြီး သူ့အသက်ကိုပါ ကယ်ခဲ့တဲ့ သူငယ်ချင်းဟောင်းရဲ့သမီး တိုက်ပေါ်က ခုန်ချသွားတဲ့အမှုပါ။ အဲဒီသူငယ်ချင်းနဲ့ ရော်ဂျာ အဆက်အသွယ်ပြတ်နေတာလည်း ၁၂ နှစ် ရှိနေပြီဖြစ်ပါတယ်။ ဒီအမှုကို အတူလိုက်ဖို့ ရလာတဲ့ တွဲဖက်အသစ်က မာတင်ရစ်ဂ်ဆိုတဲ့ လူငယ်ရဲအရာရှိပါ။ အရင်က အထူးတပ်ဖွဲ့ဝင်ဖြစ်ခဲ့ပြီး အရည်အချင်းရှိပေမယ့် ချစ်ရတဲ့ဇနီး မကြာသေးခင်က ဆုံးပါးသွားလို့ စိတ်မတည်မငြိမ် ဖြစ်နေတယ်။ ကိုယ့်အသက်ကို အဆုံးစီရင်ဖို့တောင် ကြိုးစားနေသူပါ။ ကမူးရှူးထိုးနဲ့ စိတ်ထင်သလို လုပ်တတ်တဲ့ ရစ်ဂ်နဲ့ အေးအေးဆေးဆေး နေချင်တဲ့ ရော်ဂျာတို့ဟာ စရိုက်ချင်း ဆန့်ကျင်နေပေမယ့် ဒီအမှုမှာတော့ တွဲပြီး အလုပ်လုပ်ကြရပါတယ်။ Mel Gibson ငယ်စဉ်က ပါဝင်သရုပ်ဆောင်ခဲ့တဲ့ အက်ရှင်၊ မှုခင်းနဲ့ သည်းထိတ်ရင်ဖို ရုပ်ရှင်ဖြစ်ပါတယ်။ သူဟာ Braveheart၊ Conspiracy Theory တို့မှာ သရုပ်ဆောင်ခဲ့သလို Hacksaw Ridge ကိုလည်း ဒါရိုက်တာအဖြစ် ရိုက်ကူးခဲ့သူပါ။

Goon Docks မှာနေတဲ့ မိုက်ကီ၊ ဘရန်း၊ မောက်ပ်၊ ချန့်ခ်နဲ့ ဒေတာတို့ သူငယ်ချင်းတစ်သိုက်ကို “ဂူနီ” လို့ ခေါ်ကြပါတယ်။ အပေါင်ငွေ ဆက်မသွင်းနိုင်တော့လို့ သူတို့အိမ်တွေ အသိမ်းခံရတော့မယ့်အချိန်မှာ နောက်ဆုံးအတူရှိခွင့်ရမယ့်နေ့ကို ဖြတ်သန်းဖို့ မိုက်ကီနဲ့ ဘရန်း ညီအစ်ကိုရဲ့အိမ်မှာ စုနေကြတယ်။ အိမ်ထပ်ခိုးပေါ်က မိုက်ကီ့အဖေရဲ့ ပစ္စည်းတွေကို မွှေနှောက်ကြရင်း နာမည်ကြီးပင်လယ်ဓားပြ မျက်လုံးတစ်လုံး ဝီလီရဲ့ ရတနာမြေပုံကို တွေ့သွားကြပါတယ်။ ဒီမြေပုံနောက်ကို လိုက်ဖို့ ကလေးတစ်သိုက်က အစ်ကိုကြီးဘရန်းကို တစ်ပတ်ရိုက်ပြီး အိမ်မှာထားခဲ့ကြတယ်။ ဒါပေမဲ့ မြေပုံမှာညွှန်ထားတဲ့နေရာက နာမည်ကြီး ရာဇဝတ်မိသားစုဖြစ်တဲ့ ဖရာတဲလိစ်တို့ ပုန်းနေရာ ဖြစ်နေပါတယ်။ ရတနာရှာဖို့ ထွက်လာကြတဲ့ ဂူနီတွေဟာ ဖရာတဲလိစ်မိသားစုကို ရှောင်ရသလို ဝီလီထားခဲ့တဲ့ ထောင်ချောက်တွေကိုလည်း ကျော်ဖြတ်ကြရတော့တယ်။ ရတနာတွေက တကယ်ရှိမှာလား၊ ရှိခဲ့ရင်ရော သူတို့လက်ထဲ ရောက်နိုင်ပါ့မလား။ ဖရာတဲလိစ်တွေ လက်ထဲမမိအောင် ရှောင်ရင်း သူတို့ရဲ့အိမ်တွေကိုပါ ကယ်တင်နိုင်မလားဆိုတာ ဆက်တွေ့ရမှာပါ။ ၁၉၈၅ ခုနှစ်က ထွက်ရှိခဲ့တဲ့ ဒီမိသားစုစွန့်စားခန်းဟာသကားဟာ Steven Spielberg ရေးသားထားတဲ့ ဇာတ်လမ်းကို ရိုက်ကူးထားတာဖြစ်ပြီး Ke Huy Quan ငယ်စဉ်က ပါဝင်သရုပ်ဆောင်ခဲ့ပါတယ်။ သူဟာ နောက်ပိုင်း Everything Everywhere All At Once နဲ့ အမျိုးသားဇာတ်ပို့ အော်စကာဆု ရရှိခဲ့သူပါ။