Terry Funk ပါဝင်သော ဇာတ်ကားများ

ဒေါလ်တန်ဟာ လုံခြုံရေးအလုပ်မှာ အရည်အချင်းရှိသူတစ်ယောက်ဖြစ်လို့ မစ်ဆိုရီက ဒါဘယ်ဒုစ်ဆိုတဲ့ ဘားမှာ အလုပ်လုပ်ဖို့ ကမ်းလှမ်းခံရပါတယ်။ ဒီဘားက အရက်သမားတွေ၊ လူဆိုးတွေ ရမ်းကားနေတဲ့ နေရာတင်မကဘဲ မြို့ကို လက်ဝါးကြီးအုပ်ထားတဲ့ ဘရတ်ဝက်စ်လေနဲ့ သူ့လူတွေပါ ထင်သလို သောင်းကျန်းနေတဲ့နေရာ ဖြစ်နေတယ်။ ဒေါလ်တန်က သူတို့ကို ဘားထဲကနေ ရှင်းထုတ်လိုက်တဲ့အခါ ဘရတ်ကလည်း သူ့စီးပွားရေးကို ကာကွယ်ဖို့ နည်းမျိုးစုံနဲ့ ပြန်အနိုင်ကျင့်လာပါတယ်။ မြို့သားတွေကတော့ ဘရတ်ရဲ့အောက်မှာ နေရပြီး သူမထင်ရင် မထင်သလို နှိပ်စက်ခံနေရတာကြောင့် ပြန်မတော်လှန်ရဲကြဘူး။ အဲဒီအခြေအနေမှာ ဒေါလ်တန်တစ်ယောက်တည်း ဘရတ်ကို ရင်ဆိုင်ရတော့တယ်။ သူက ဘရတ်ကို အနိုင်ယူပြီး မြို့သားတွေကို ကယ်တင်နိုင်မလား၊ ဒါမှမဟုတ် ရှုံးနိမ့်ပြီး မြို့ကနေ ထွက်သွားရမလား။

လင်ကွန်းဟော့ခ်ဟာ ယောက္ခမရဲ့စနက်ကြောင့် ဇနီးနဲ့ကွာရှင်းပြီး သားလေးကိုပါ ခွဲထားခဲ့ရသူပါ။ နှစ်တွေကြာလာတဲ့အခါ နှလုံးရောဂါခံစားနေရတဲ့ မိုက်ကယ့်အမေက သူ့မှာ နေရမယ့်အချိန် သိပ်မကျန်တော့ကြောင်း သိလာတယ်။ ဒါကြောင့် လင်ကွန်းကို ပြန်ဆက်သွယ်ပြီး မိုက်ကယ် သင်တန်းကျောင်းဆင်းတဲ့နေ့မှာ သွားကြိုပေးဖို့ တောင်းဆိုလိုက်ပါတယ်။ မိုက်ကယ်ကတော့ အဖေ ဘာကြောင့်ထွက်သွားခဲ့ရသလဲဆိုတာ မသိတဲ့အတွက် ပြန်တွေ့ချိန်မှာ မကြည်ဖြူပါဘူး။ ကုန်ကားနဲ့ အိမ်ပြန်ကြတဲ့ သုံးရက်ခရီးတစ်လျှောက်မှာ သားက အဖေ့ကို ဆရာလုပ်လိုက်၊ သြဝါဒပေးလိုက်နဲ့ သားအဖနှစ်ယောက် ဘုကလန့်တိုက်နေကြတယ်။ အဲဒီလို အတူခရီးသွားရင်းနဲ့ပဲ သူတို့ကြားမှာ တဖြည်းဖြည်း ရင်းနှီးမှု ပြန်ရှိလာပါတယ်။ စတားလုန်းစ် ပါဝင်ထားတဲ့ ဒီဇာတ်ကားက လက်လှဲအားကစားနောက်ခံနဲ့ သားအဖနှစ်ယောက် ပြန်ဆုံကြတဲ့အကြောင်းကို ရိုက်ကူးထားတာပါ။ အိမ်အပြန်ခရီးအပြီးမှာ သူတို့အတွက် ဘာတွေစောင့်နေမလဲ၊ မိုက်ကယ့်အဘိုးက ဘယ်လိုထပ်ပြီး နှောင့်ယှက်ဦးမလဲဆိုတာကို လက်လှဲပြိုင်ပွဲတွေနဲ့အတူ ဆက်ပြထားပါတယ်။

Paradise Alley (1978) မင်းသားကြီး စတားလုံးရဲ့ ထူးခြားတဲ့ မှတ်တိုင်တစ်ခုဖြစ်တဲ့ Sports Drama ကားကောင်းတစ်ကား ဖြစ်ပါတယ်။ ဘာလို့လဲဆိုတော့ ဒီဇာတ်ကားဟာ Stallone က မင်းသားအဖြစ် သရုပ်ဆောင်ရုံတင်မကဘဲ သူ့ရဲ့ ဘဝသက်တမ်းတစ်လျှောက်မှာ ပထမဆုံးအကြိမ်အဖြစ် ဇာတ်ညွှန်းရေးပြီး ကိုယ်တိုင်ဒါရိုက်တာအဖြစ် ရိုက်ကူးခဲ့တဲ့ ရုပ်ရှင်ကားဖြစ်လို့ပါပဲ။ "၁၉၄၀ ပြည့်လွန်နှစ်များက နယူးယောက်ဆင်းရဲသားရပ်ကွက်က ညီအစ်ကိုသုံးယောက်ရဲ့ နပန်းကစားပွဲအိပ်မက်" ဇာတ်လမ်းကတော့ ၁၉၄၀ ခုနှစ်များက နယူးယောက်မြို့ရဲ့ ဆင်းရဲသားရပ်ကွက်ဖြစ်တဲ့ Hell's Kitchen မှာ အခြေခံထားပါတယ်။ ကာဗိုနီ လို့ခေါ်တဲ့ အီတလီ-အမေရိကန် ညီအစ်ကို သုံးယောက်ဟာ ဒီဆင်းရဲတွင်းကနေ လွတ်မြောက်ဖို့ နည်းလမ်းအမျိုးမျိုးနဲ့ ကြိုးစားနေကြသူတွေ ဖြစ်ပါတယ်။ Cosmo (Sylvester Stallone): အပြောကောင်း၊ အကြံကောင်းပြီး ပိုက်ဆံအလွယ်ရမယ့် လမ်းကို အမြဲရှာနေတဲ့ လူလည်.. Lenny (Armand Assante): ဒုတိယကမ္ဘာစစ်ကနေ ဒဏ်ရာနဲ့ ပြန်လာပြီး လူနာတင်ကားမောင်းကာ ဘဝကို အေးအေးဆေးဆေး ဖြတ်သန်းချင်တဲ့ ဝါရင့်အကိုကြီး Victor (Lee Canalito): ဖြူစင်ရိုးသားပြီး ခန္ဓာကိုယ်သန်မာထွားကြိုင်းတဲ့ အငယ်ဆုံး ညီလေး တစ်နေ့မှာတော့ Cosmo ဟာ "Paradise Alley" လို့ခေါ်တဲ့ မြေအောက်နပန်းကလပ်တစ်ခုက ကစားပွဲတွေမှာ ဆုကြေးငွေအမြောက်အမြား ရနိုင်တာကို တွေ့သွားပြီး၊ သူ့ရဲ့ ညီအစ်ကိုတွေကို စည်းရုံးကာ ညီဖြစ်သူ Victor ကို နပန်းသမားအဖြစ် ပြုစုပျိုးထောင်ပါတော့တယ်။ Cosmo ရဲ့ လူသိအောင် ကြော်ငြာနိုင်တဲ့ အရည်အချင်း။ Lenny ရဲ့ ဗျူဟာမြောက် လှည့်ကွက်တွေနဲ့ ညီအစ်ကိုသုံးယောက် ပေါင်းစည်းပြီး... ဆင်းရဲတွင်းက ရုန်းထွက်မလဲဆိုတာကို ရိုက်ပြထားပါတယ်။