Tuesday Weld ပါဝင်သော ဇာတ်ကားများ

ဝီလီယံဖော်စတာက မကြာသေးခင်ကမှ အလုပ်ထုတ်ခံထားရတဲ့ ဒုံးကျည်အင်ဂျင်နီယာတစ်ယောက်ပါ။ ယာဉ်ကြောပိတ်တာ၊ လမ်းတွေညစ်ပတ်နေတာ၊ လူတွေရဲ့ ရိုင်းစိုင်းတဲ့ အပြုအမူနဲ့ ကွဲအက်နေတဲ့ ပလက်ဖောင်းတွေက သူ့အတွင်းမှာရှိတဲ့ ခံပြင်းဒေါသနဲ့ ခါးသီးမှုတွေကို ပိုဆိုးလာစေပါတယ်။ မတည်ငြိမ်တဲ့ သူ့အတွေးတွေနဲ့ ဒီအခြေအနေတွေ ပေါင်းမိတဲ့အခါ ဒေါသတွေ ပေါက်ကွဲထွက်လာပြီး ပြစ်မှုတွေ ဆက်တိုက်ကျူးလွန်မိတော့တယ်။ မိုက်ကယ်ဒေါက်ကလပ် ပါဝင်သရုပ်ဆောင်ထားတဲ့ မှုခင်းအက်ရှင်ဇာတ်ကားဖြစ်ပြီး ဝီလီယံရဲ့ လုပ်ရပ်တွေနဲ့အတူ အဲဒီခေတ်က လူမှုစနစ်ကိုပါ ထင်ဟပ်အောင် တင်ဆက်ထားပါတယ်။

သူများပြောတာ ကြားဖူးတာကတော့ ဒီရုပ်ရှင်ကို ဘယ်လိုရုပ်ရှင်မျိုးလဲဆိုတာ စကားနှစ်လုံးနဲ့ ခြုံလွှမ်းဖော်ပြရရင် ခမ်းနားထည်ဝါခြင်းနဲ့ ရင်သပ်ရှုမောဖွယ်ဖြစ်ခြင်းဆိုတဲ့ စကားလုံးနှစ်ခုကို ရွေးရလိမ့်မယ်တဲ့။ ကျွန်တော်တော့ အဲ့ဒီနှစ်ခုထက်ပို ဒီရုပ်ရှင်ရဲ့ အနှစ်သာရဖြစ်မယ်ထင်တဲ့ တတိယ စကားလုံးနဲ့ ဖော်ပြချင်တယ်။လွမ်းမောဖွယ်ကောင်းခြင်း။ Once upon A Time in Americaဟာ နာမည်နဲ့လိုက်အောင် လွမ်းမောဖွယ်အတိရှိနေတဲ့ ရုပ်ရှင်ပါပဲ။ ဘယ်လိုဇာတ်လမ်းအမျိုးအစားလဲပြောရရင်တော့ဂန်းရုပ်ရှင်ပါ။ အမေရိကရဲ့ လမ်းမပေါ်က ဘဝတွေအ‌ကြောင်းပါပဲ။ မူရင်းဝတ္တုဟာ တကယ့်အပြင်လောကက ဂန်းစတားတွေရဲ့ ကိုယ်တိုင်ရေးအတ္ထုပ္ပတိပါ။ ဖြစ်ရပ်အများစုက အဖြစ်မှန်‌တွေလို့ ဆိုလို့ရတယ်။ ဒီဝတ္တုကို စာရေးဆရာဟာ ထောင်ကျနေတုန်း ရေးခဲ့တယ်လည်း ပြောကြတယ်။ မူရင်းဝတ္တုရဲ့စာရေးဆရာဟာ ဒီရုပ်ရှင်ထဲက Robert De niroရဲ့ ကာရိုက်တာလို့ ဆိုကြတယ်။ ဟုတ်မှာပါ။ ဒီလေးနာရီကြာ ရုပ်ရှင်ကို ကျွန်တော်တော့ ရုပ်ရှင်တစ်ခုလို့ မခံစားခဲ့ရဘူး။ လူတစ်ယောက်ရဲ့ဘဝကို လေးနာရီအတွင်း ကြည့်နေရသလိုခံစားခဲ့ရတယ်။ ဂန်းစတားတစ်ယောက်ရဲ့တကယ့်ဘဝတစ်ခုကိုပေါ့။ ဂန်းကားချင်း ယှဉ်ကြည့်မယ်ဆိုရင် ယေဘုယျအမြင်အရတော့ ဒီရုပ်ရှင်ဟာ Godfatherတို့ Goodfellasတို့ထက် မညံ့ဘူး။ ပုဂ္ဂလိကအမြင်အရပြောရမယ်ဆိုရင်တော့ သူ့ရဲ့ လွမ်းမောဖွယ်ကောင်းခြင်းကြောင့် အဲ့ဒီနှစ်ကားလုံးထက် ပိုသဘောကျမိတယ်။ လွမ်းမောဖွယ်ကောင်းတယ်ဆိုတဲ့နေရာမှာ ဇာတ်အိမ်၊ တေးဂီတနဲ့ ရုပ်ရှင်ဓာတ်ပုံပညာတို့အပြင် ဂျနီဖာကွန်နယ်လီရဲ့ ကလေးဘဝက အလှအပကိုပါ ထည့်တွက်ရမယ်ထင်တယ်။ သူ့ဇာတ်ဝင်ခန်းကသိပ်မများပေမဲ့ သူ့ရဲ့ ချစ်စရာကောင်းလွန်းတဲ့ ငယ်ရုပ်ကလေးက ဒီဘက်ခေတ်က ကျွန်တော့်အတွက် ပိုလွမ်းမောဖွယ်ဖြစ်စေခဲ့တယ်။ လေးနာရီဆယ့်တစ်မိနစ်ကြာတဲ့ ဒီရုပ်ရှင်ကိုကြည့်ဖို့ စိတ်ထင့်ကောင်း ထင့်ပါလိမ့်မယ်။ ဒါပေမဲ့ ‌ပထမ၁၅မိနစ်ကိုကျော်လွန်ပြီးတဲ့အခါ မရပ်တမ်းဆက်ကြည့်ချင်လောက်အောင် Directorရဲ့ Storytellingဟာ သေ‌သပ်လှပတယ်။ အဲ့ဒီဘကိခေတ်ရုပ်ရှင်တွေမှာ ကျွန်တော်တော့ သိပ်မတွေ့ဖူးတဲ့ ပုံသဏ္ဍာန်မျိုးပဲ။ Poetic Cinemaဆိုတဲ့ ရုပ်ရှင်ဂရုထဲက ရုပ်ရှင်သမားတစ်ယောက်ကတော့ ဒီလိုပြောခဲ့ဖူးတယ်။ " ဇာတ်လမ်းရဲ့အဆုံးမှာ ဒီရုပ်ရှင်ရဲ့ ဒါရိုက်တာ Sergio Leoneကို ဘာလို့Geniusတစ်ယောက်လို့ သတ်မှတ်ခဲ့ကြလဲဆိုတာ ခင်ဗျားနားလည်သွားလိမ့်မယ်။ ပြီးတော့ သူ့ရုပ်ရှင်ဟာ ဘယ်လောက်အထိ ရင်သပ်ရှုမောဖွယ်ကောင်းလဲ ခင်ဗျားသိသွားလိမ့်မယ်။"တဲ့။ ပုဂ္ဂလိကအမြင်အရတော့ အကောင်းဆုံးဂန်းရုပ်ရှင်အဖြစ်ရော Robert De Niroရဲ့ အကောင်းဆုံးရုပ်ရှင်အဖြစ်ရော ကျွန်တော်တော့ သတ်မှတ်ထားတယ်။ Once upon A Timeဆိုတဲ့ စကားလုံးနဲ့ အလိုက်ဖက်ဆုံးရုပ်ရှင်လို့လည်း ဆိုချင်တယ်။ ( အညွှန်းရေးသားထားသူကတော့ WiRa Aung ပါ ) Quality__EXTENDED VERSION - 720p 5.1 IMDb Rating__8.4/10 Format__mp4 Duration__03:50:00 Type__Crime , Drama Subtitle__Myanmar Subtitle (Hardsub) Translated by WiRa Aung Encoded by Naing Aung Latt

I Walk the Line ( 1970 ) Madison Jonesရဲ့ An Exileဆိုတဲ့ ဝတ္ထုကို ပြန်ရိုက်ထားတဲ့ရုပ်ရှင်ပေါ့။ ရိုက်တဲ့ဒါရိုက်တာက ရုပ်ရှင်ပိုင်းမှာတော့ သိပ်ပြီး ထင်ထင်ပေါ်ပေါ်မဟုတ်ပေမဲ့ တီဗီရုပ်ရှင်ပိုင်းမှာတော့ အမ်မီသုံးဆုဆက်တိုက်ရပြီး စုစုပေါင်း၄ဆုရထားတဲ့ John Frankenheimer။ FRENCH CONNECTION 2နဲ့ Birdman of Alcatraz ကို ရိုက်ခဲ့တဲ့ ဒါရိုက်တာလည်းဟုတ်တယ်။ မင်းသားကတော့ American Film Instituteက စာရင်းလုပ်ထားတဲ့ ကလပ်စစ်ဟောလိဝုဒ်စီနီမာက အကြီးကျယ်ဆုံး မင်းသားတွေစာရင်းထဲ နံပါတ်၁၂ချိတ်ထားတဲ့ ဂရီဂိုရီပတ် ။ ဆိုပေမဲ့ ပြောဖို့လည်း မလိုပါဘူး။ သူ့နာမည်နဲ့တင် ဖြစ်နေပြီမလား။ Tuesday Weldကလည်း မာယာများတဲ့ဇာတ်ကောင်နေရာက လှလှပပ အသုံးတော်ခံထားတယ်။ ဒီကားက ဒီတိုင်း အစွန်အဖျားမြို့လေးတစ်မြို့မှာ အရက်ပုန်းချက်တဲ့ မိသားစုတစ်စုနဲ့ အဲဒီမိသားစုက ကလေးမလေးကို စွဲလမ်းမိသွားတဲ့ ရဲအရာရှိတစ်ယောက်ရဲ့ ဇာတ်လမ်းသက်သက်ပဲ။ ဒရာမာကိုမှ မှုခင်းပါးပါးစွတ်ထားမျိုး။ ဒါပေမဲ့ ဒီရုပ်ရှင်ရဲ့ တကယ့်ထူးခြားချက်က တစ်ကားလုံး Johnny Cashသီချင်းတွေ သုံးထားတာပဲ။ နာမည်ကိုက ဂျွန်နီကတ်ရှ်သီချင်းနာမည် I Walk the Line ကို ပေးထားတယ်။ ဂျွန်နီကတ်ရှ်ဖန်တွေတော့ တစ်ကားလုံး သူ့သီချင်းတွေ အပြည့်နားထောင်ရမယ့်ကားပဲ။ ရယ်ရတာက ဒီရုပ်ရှင်က ဖောက်ပြန်တဲ့ ဇာတ်လမ်းလို့ပြောရမယ်။ ဂျွန်နီကတ်ရှ်ရဲ့ I Walk the Lineသီချင်းရဲ့ နောက်ခံဇာတ်လမ်းကလည်း ဖောက်ပြန်တဲ့ ဇာတ်လမ်းပဲဆိုတော့ ရွဲ့ပြီးထည့်ထားသလားတောင် ထင်ရတာပါပဲ။ သီချင်းတွေရော သရုပ်ဆောင်တွေရော သိပ်ကောင်းတဲ့ ရုပ်ရှင်တစ်ကားပါပဲ။

The Wrong Man 1956 IMDB : 7.6 Rotten Tomatoes : 98 % Genre : Noir / Thriller Psycho, Vertigo တို့လို့ ဂန္ဓဝင်ရုပ်ရှင်တွေရဲ့ ပဲ့ကိုင်ရှင် ဂန္ဓဝင်ဒါရိုက်တာကြီး အဲဖရက်ဟစ်ကော့ခ်ျရဲ့ The Wrong Manဆိုတဲ့ Old But Gold ကားကောင်းလေးတစ်ကားကိုတင်ဆက်ပေးလိုက်ပါတယ်။ ဒီကားကို ဖြစ်ရပ်မှန်အပေါ် အခြေတည်ရိုက်ကူးထားပြီး ဒါရိုက်တာကြီး အဲဖရက်ဟစ်ကော့ချ်ကတော့ သူရိုက်ဖူးတဲ့ သည်းထိတ်ရင်ဖိုရုပ်ရှင်တွေထက်တောင် ဆန်းကြယ်တယ်လို့ ညွှန်းထားပါတယ်။ အာမခံရုံးကို ဓားပြတိုက်မှု ကျူးလွန်သူအဖြစ်စွပ်စွဲခံရတဲ့ အိမ်ထောင်သည်၊သားနှစ်ယောက်ဖခင် ခရစ္စတိုဖာဘလက်စတယ်ရိုဆိုသူကို အခြေခံထားပြီး အပြစ်မရှိကြောင်း သက်သေပြဖို့ကြိုစားရပုံကို ရိုက်ကူးထားပါတယ်။ ဒါပေမယ့် ဒီလိုပုံစံရုပ်ရှင်တွေနဲ့ မတူတာက မှားယွင်းဖမ်းဆီးခံရ နောက်ဆုံးမှာ အပြစ်မရှိကြောင်း သက်သေပြနိုင် ဆိုတာ မျိုးနဲ့ ဇာတ်သိမ်းထားတာ မဟုတ်ပဲ ဘလက်စတယ်ရိုရဲ့ မတရားဖမ်းဆီးရမှုက သူ့ရဲ့ဇနီးဖြစ်သူနဲ့ မိသားစုကို ရိုက်ခတ်ပုံတွေကို ရင်နှင့်ဖွယ်ကြည့်ရှူရမှာ ဖြစ်ပါတယ်။