အက်ရှင်ကားများ

တိုင်လာဟာ စစ်ပြန်ကြေးစားစစ်သားတစ်ယောက်ဖြစ်ပြီး အိန္ဒိယက ဘိန်းဘုရင်တစ်ယောက်ရဲ့ ကလေးကို ကယ်ထုတ်ပေးဖို့ အလုပ်လက်ခံလိုက်ပါတယ်။ ကလေးကို ဖမ်းထားသူကလည်း ပြိုင်ဘက်ဘိန်းဘုရင်တစ်ယောက် ဖြစ်နေတယ်။ အဲဒီလူက ရဲတွေရဲ့အကူအညီနဲ့ တစ်မြို့လုံးကို ပိတ်ဆို့ပြီး တိုင်လာနဲ့ ကလေးကို ဖမ်းဖို့ ကြိုးစားလာပါတယ်။ ကလေးကို မြို့ထဲကနေ ကယ်ထုတ်နိုင်ဖို့ တိုင်လာဟာ တစ်မြို့လုံးနဲ့ တစ်ယောက် ရင်ဆိုင်တိုက်ခိုက်ရတော့တယ်။ ခရစ် ဟမ်းဆွာ့ ပါဝင်သရုပ်ဆောင်ထားပြီး အနီးကပ်တိုက်ခိုက်ခန်းတွေနဲ့ သေနတ်ပစ်ခန်းတွေကို အသားပေးထားတဲ့ အက်ရှင်ဇာတ်ကားပါ။

ရဲတပ်သားလေး ရှီဗာက လူနာတင်ကားကို လမ်းပေးဖို့အတွက် ဝန်ကြီးချုပ်ရဲ့ကားကိုတောင် တားရဲတဲ့သူပါ။ သူ့အကြောင်းကို အချစ်ရေးနဲ့ အမှန်တရားကြားမှာ ဗျာများရတဲ့ ရဲတပ်သားတစ်ယောက်ရဲ့ဇာတ်လမ်းအဖြစ် ပြောပြထားပါတယ်။ အမှန်တရားဘက်က ရပ်တည်တဲ့အခါ တစ်ယောက်တည်း ရင်ဆိုင်ရသလို ဖြစ်တတ်ပုံ၊ ရာဇဝတ်မှုကျူးလွန်သူတွေက အဆက်အသွယ်နဲ့ အကာအကွယ်ယူပြီး ဥပဒေလက်တစ်လုံးခြား လုပ်တတ်ပုံတွေကိုလည်း ဖော်ပြထားတယ်။ အာဏာရှိသူတွေနဲ့ နီးစပ်မှုကို အားကိုးပြီး ဆန့်ကျင်သူတွေကို ဖိနှိပ်တာမျိုးတွေကြားမှာ အက်ရှင်ခန်းတွေ၊ ဒရာမာနဲ့ တရားခွင်အကြောင်းတွေကို တွဲထားတဲ့ အိန္ဒိယရဲမှုခင်းဇာတ်ကားပါ။ Laal Singh Chaddha ထဲက ဘာလာရာဂျူးအဖြစ် ပါဝင်ခဲ့တဲ့ သရုပ်ဆောင်က ခေါင်းဆောင်အဖြစ် သရုပ်ဆောင်ထားပါတယ်။

အမေရိကန်တပ်တွေ အာဖဂန်ကနေ ဆုတ်ခွာသွားပြီး တာလီဘန်တွေ ကြီးစိုးနေတဲ့ကာလမှာ ဇာတ်လမ်းစထားပါတယ်။ အီရန်နဲ့ အနောက်နိုင်ငံတွေကြား အနုမြူလက်နက်လျှော့ချရေး သဘောတူညီချက်ရဖို့ ကြိုးစားနေကြချိန်လည်း ဖြစ်တယ်။ စစ်ပြန်တစ်ယောက်ဖြစ်တဲ့ တွမ်ဟားရစ်က အမ်အိုင်-၆ အဖွဲ့ဝင်ဟောင်းဖြစ်ပြီး အခုတော့ စီအိုင်အေအတွက် အငှားအေးဂျင့်အဖြစ် လုပ်နေပါတယ်။ သူ့တာဝန်က အီရန်နိုင်ငံထဲ အသွင်ယူဝင်ရောက်ပြီး အနုမြူဓာတ်ပေါင်းဖိုတွေကို လျှို့ဝှက်ဖျက်ဆီးဖို့ပါ။ နောက်ဆုံးစစ်ဆင်ရေးတစ်ခု စခါနီးမှာတော့ ပင်တဂွန်ကနေ သတင်းပေါက်ကြားသွားပြီး တွမ်ရဲ့နာမည်နဲ့ ဓာတ်ပုံက အီရန်နဲ့ အာဖဂန်တစ်ဝန်း ပျံ့သွားပါတယ်။ တာလီဘန်၊ အိုင်းစစ်၊ အီရန်နဲ့ အယ်ကိုင်ဒါ စတဲ့ဘက်အသီးသီးက သူ့ကို လိုက်ဖမ်းဖို့ ကြိုးစားလာကြတယ်။ တွမ်နဲ့ စကားပြန် မိုဟာမက်တို့နှစ်ယောက်ဟာ အသက်ရှင်လွတ်မြောက်ဖို့ တိုက်ခိုက်ရင်း ထွက်ပြေးကြရတော့မှာပါ။ ဂျရက်ဘတ်တလာ ပါဝင်သရုပ်ဆောင်ထားပြီး Angel Has Fallen နဲ့ Greenland တို့ကို ရိုက်ကူးခဲ့တဲ့ Ric Roman Waugh က ဒါရိုက်တာအဖြစ် ရိုက်ကူးထားပါတယ်။

ရီဒါဟာ ပြင်သစ်မှာ လက်ဝှေ့အားကစားရုံ ဖွင့်ထားသူတစ်ယောက်ပါ။ သူ့ညီ ဘရာဟင်းကတော့ နာမည်ကြီးမင်းသားတစ်ယောက်လို ဝတ်စားပြင်ဆင်တတ်တဲ့ Influencer တစ်ယောက်ဖြစ်တယ်။ ဘရာဟင်းက ကိုလမ်ဘီယာနိုင်ငံ မက်ဒလင်းမြို့ကို သွားလည်ရင်း မူးယစ်ဂိုဏ်းတစ်ခုရဲ့ ပြန်ပေးဆွဲခြင်းကို ခံလိုက်ရပါတယ်။ ဒီအကြောင်းသိသွားတဲ့ ရီဒါက ညီဖြစ်သူကို ဒီအတိုင်း ပစ်မထားနိုင်လို့ ကိုလမ်ဘီယာကို လိုက်သွားပြီး ကယ်ဖို့ ဆုံးဖြတ်တယ်။ ဒီလိုနဲ့ ရီဒါ၊ စတန်နဲ့ ရှာဖိခ်ဆိုတဲ့ အရပ်ပုတဲ့အမျိုးသားတို့ မက်ဒလင်းမြို့မှာ ဘရာဟင်းကို ကယ်ဖို့ စွန့်စားကြပါတော့တယ်။ ဒီဟာသအက်ရှင်ဇာတ်ကားမှာ Frank Gastambide နဲ့ Ramzy Bedia တို့ တွဲဖက်သရုပ်ဆောင်ထားပြီး Mike Tyson လည်း ပါဝင်ထားပါတယ်။

၁၉၆၆ ခုနှစ် ဩဂုတ်လမှာ ဗီယက်နမ်နိုင်ငံ၊ လောင်းတန်က ရော်ဘာစိုက်ခင်းတစ်ခုအတွင်း တိုက်ပွဲတစ်ပွဲ ဖြစ်ပွားခဲ့ပါတယ်။ တစ်ဖက်မှာ ဩစတြေးလျနဲ့ နယူးဇီလန်က တိုက်ပွဲအတွေ့အကြုံ နုနယ်သေးတဲ့ လူငယ်စစ်သား ၁၀၈ ယောက်၊ တစ်ဖက်မှာတော့ အတွေ့အကြုံရှိတဲ့ မြောက်ဗီယက်နမ်နဲ့ ဗီယက်ကောင်းစစ်သား ၂၅၀၀ တို့ ရင်ဆိုင်ကြရတာပါ။ မိုးတွေရွာနေတဲ့ကြားက တိုက်ပွဲဝင်နေရင်း လက်နက်ခဲယမ်းတွေပါ ကုန်သွားတဲ့အခါ လူငယ်စစ်သားတွေအတွက် အသက်ရှင်ကျန်ဖို့ ပိုခက်လာပါတယ်။ နယ်မြေကိုလည်း တစ်ဖက်က ပိုကျွမ်းကျင်နေတော့ သူတို့လက်ထဲ မကျရောက်ဖို့နဲ့ ကိုယ့်အသက်ကို ဆက်ထိန်းထားနိုင်ဖို့ ဒီစစ်သားတွေ ဘယ်လို ရုန်းကန်ကြမလဲ။

အန်ဂျလို လဲဒါဟာ တစ်ချိန်က နာမည်ကြီးခဲ့တဲ့ ကြေးစားလူသတ်သမားတစ်ယောက်ပါ။ အခုတော့ အသက်ကြီးလာတဲ့အပြင် အယ်လ်ဇိုင်းမားရောဂါဒဏ်ကို ခံနေရလို့ အနားယူဖို့ စဉ်းစားနေပြီ။ မှတ်ဉာဏ်တွေ လျော့ပါးလာတဲ့ အခြေအနေနဲ့အတူ သူ့အလုပ်ကို ဆက်လုပ်ဖို့ကလည်း ခက်လာပါတယ်။ အနားမယူခင် ဘယ်လ်ဂျီယံနိုင်ငံကို သွားပြီး လူသတ်ပေးဖို့ အလုပ်တစ်ခု ရောက်လာတယ်။ နောက်ဆုံးတစ်ခေါက်အနေနဲ့ လုပ်ပေးဖို့ တောင်းဆိုတာကြောင့် အန်ဂျလိုက လက်ခံလိုက်ပါတယ်။ လူသတ်သမားဆိုပေမယ့် အန်ဂျလိုမှာ သူ့စည်းမျဉ်းနဲ့သူ ရှိတယ်။ အသက် ၁၃ နှစ်အောက် ကလေးတွေကို မသတ်သလို ကလေးတွေအပေါ် လိင်ပိုင်းဆိုင်ရာ ဖိနှိပ်တာနဲ့ အကြမ်းဖက်တာတွေကိုလည်း လက်မခံပါဘူး။ ဒါပေမယ့် နောက်ဆုံးအလုပ်ဆိုပြီး လက်ခံလိုက်တဲ့အမှုမှာ ကလေးတစ်ယောက်ကို သတ်ပေးရမယ့် အခြေအနေ ဖြစ်လာတယ်။ အလုပ်အပ်သူတွေကလည်း ဘယ်လ်ဂျီယံမှာ အာဏာရှိတဲ့ ထိပ်တန်းနိုင်ငံရေးသမားမိသားစု ဖြစ်နေပါတယ်။ အန်ဂျလိုက သူ့စည်းမျဉ်းကို ဖောက်ဖျက်မလား၊ ဒီအလုပ်ကို ဘယ်လိုဆက်လုပ်မလဲဆိုတာအပြင် ရောဂါဒဏ်နဲ့ လူသတ်သမားဘဝကို ဘယ်လိုရင်ဆိုင်မလဲဆိုတာပါ ဆက်ပြထားပါတယ်။ ၂၀၀၃ ခုနှစ်က ထွက်ရှိခဲ့တဲ့ ဒတ်ခ်ျဘာသာစကားပြော အက်ရှင်၊ မှုခင်းဒရာမာ ရုပ်ရှင်ပါ။

Anatomy of Time (2021) နာမည်နဲ့လိုက်အောင်ကိုပဲ ဒီကားရဲ့ အချိန်စဉ်တွေက ဟိုတစ်စ ဒီတစ်စဆိုသလိုဖြစ်နေတယ်။ အဖြစ်အပျက်စဉ်အလိုက်တော့မဟုတ်ဘူး ဒါပေမဲ့ အချိန်ကာလအားဖြင့်တော့ ၂ခုကို သုံးထားတယ်။ မိန်းမတစ်ယောက်ရဲ့ အပျိုဘဝနဲ့ အဘွားကြီးဖြစ်သွားတဲ့အချိန်ပေါ့။ ဒီနေရာမှာ သူက ဒီအမျိုးသမီးရဲ့ ငယ်ဘဝကို ပုံဖော်တဲ့နေရာမှာ အရောင်တွေစိုစိုပြည်ပြည်သုံးထားသလို ခန္ဓာလှုပ်ရှားပုံဖော်မှုတွေကအစ ရမ္မက်နဲ့သိချင်စိတ်ကို မြင်နေရတယ်။ တော်တော်လေးသိသိသာသာပါပဲ။ ဒါတော့ ဒီထိုင်းဒါရိုက်တာရဲ့ အားသာချက်လို့ပြောရမလား မင်းသမီးရဲ့သရုပ်ဆောင်စွမ်းကိုပဲ ချီးကျူးရမလားပါပဲ။ နောက် သူ့အဖေက နာရီပြင်ဆရာဖြစ်သလို ဒီကားရဲ့ အပြတွေရဲ့ ဖြည့်စွက်မှုတစ်ခုလိုဖြစ်နေတဲ့ အရှေ့တိုင်းဖလော်တွေကို ပြောသွားတဲ့လူပေါ့။ ဒီဇာတ်ကောင်ကို တည်ဆောက်ထားတာ တော်တော်ဝေဝါးပေမဲ့ သူ့ထည့်ချင်တဲ့အဖြည့်တစ်ခုနဲ့ ပဟေဠိတစ်ခုကို ထည့်ပေးနိုင်တဲ့ ဇာတ်ကောင်လို့မြင်ရတယ်။ နောက်ထပ်မြင်ရတဲ့ ဇာတ်ကောင်က မင်းသမီးရဲ့ ယောက်ျားဖြစ်လာမယ့်သူတစ်ဖြစ်လဲ ဖြစ်နေတဲ့သူတစ်ဖြစ်လဲ စစ်ခေါင်းဆောင်တစ်ယောက်။ သူလည်းမထူးဘူးပြောရမလိုလိုပဲ ။ သူ့မကောင်းမှုတွေများတာကို သိရပေမဲ့ အဲဒီမကောင်းမှုတွေက ဘယ်လောက်ထိတာသွားသလဲတော့ ရေရေရာရာပြမသွားဘူး။ ဒါတော့ သူ့အပြအပိုင်းပေါ့။ သူ့ခေတ်က ထိုင်းနိုင်ငံရဲ့ အာဏာရှင်စနစ်နဲ့ ကွန်မြူနစ်သူပုန်တွေကြားက တင်းမာမှုတွေရှိခဲ့တဲ့ ဆိုးဆိုးရွားရွားခေတ်တစ်ခုမှာတည်ထားတယ်။ တိုင်းပ

ထုတ်လုပ်သူလည်းဖြစ်၊ ဒါရိုက်တာလည်းဖြစ်တဲ့ ရုပ်ရှင်သမားတစ်ယောက်ဟာ နာမည်ကြီးမင်းသားတွေ၊ ဒါရိုက်တာတွေနဲ့ ရုပ်ရှင်တွေ ထုတ်နေပေမယ့် ကားတိုင်း အရှုံးပေါ်နေလို့ စိတ်ညစ်နေပါတယ်။ သူလိုချင်တာက ရုံတင်ဝင်ငွေ အများကြီးရပြီး သာမန်သရုပ်ဆောင်နဲ့ ဒါရိုက်တာကိုတောင် နာမည်ကျော်ဖြစ်သွားစေနိုင်မယ့် ဇာတ်လမ်းတစ်ပုဒ်ပါ။ အဲဒီအချိန်မှာ မတော်တဆမှုတစ်ခုကနေ ရလာတဲ့ ဇာတ်ညွှန်းတစ်ပုဒ်ကို ဖတ်မိသွားတယ်။ ဇာတ်ညွှန်းရေးသူက တံငါရွာလေးတစ်ရွာမှာနေတဲ့ ရာဂျူးပါ။ ရုပ်ရှင်ဇာတ်ညွှန်းတွေကို အလွန်ဝါသနာပါလွန်းလို့ ကိုယ့်ဘဝကိုယ် ရုပ်ရှင်ဆန်အောင် တမင်ဖန်တီးနေထိုင်ပြီး အဲဒီအကြောင်းတွေကို ကိုယ်တိုင်ရေးအတ္ထုပ္ပတ္တိအဖြစ် ရေးထားတာဖြစ်ပါတယ်။ တစ်နေ့မှာ သူအကြိုက်ဆုံး ဒါရိုက်တာကိုယ်တိုင် ဒီဇာတ်ညွှန်းကို ရိုက်ကူးပေးဖို့လည်း အိပ်မက်မက်ထားတယ်။ အဖေရဲ့ အားပေးထောက်ခံမှုနဲ့ ဇာတ်ညွှန်းရေးနေတဲ့ ရာဂျူးဟာ အဖေဆုံးသွားတဲ့အခါ ညီမနဲ့အတူ ဒီဇာတ်ညွှန်းကို ပြီးဆုံးအောင် ရေးနိုင်ပါ့မလား။ လက်တွေ့ဘဝကို ရုပ်ရှင်တစ်ကားလို ဖြစ်အောင် ဖန်တီးနေတတ်တဲ့ သူ့အတွက် အိပ်မက်ကို အကောင်အထည်ဖော်နိုင်မယ့် အခွင့်အရေး ရလာမလား။

ကောင်မလေးတစ်ယောက်နဲ့ ယောက်ျားတစ်ယောက် တိုက်ခန်းပေါ်ကို အတူတက်လာတဲ့ မြင်ကွင်းနဲ့ ဇာတ်လမ်းစထားပါတယ်။ ယောက်ျားဖြစ်သူက ရိုင်းရိုင်းစိုင်းစိုင်း ဆက်ဆံနေပြီး ကောင်မလေးကတော့ မလိုက်ချင်ပေမယ့် ခေါ်ရာကို လိုက်လာရပုံပါပဲ။ သူ့နာမည်က ဆာဝါဖြစ်ပြီး သေးသေးသွယ်သွယ် အသွင်အပြင်နောက်က သူ့ဘဝဟာ ထင်ထားတာထက် ကြမ်းတမ်းခဲ့ပါတယ်။ ဆာဝါ ငယ်ငယ်ကတည်းက မိဘနှစ်ပါး ရက်ရက်စက်စက် အသတ်ခံခဲ့ရတာကြောင့် သူဟာ လက်စားချေဖို့ အမြဲစဉ်းစားနေသူပါ။ သူ့မိဘတွေကို ဘယ်သူသတ်ခဲ့တာလဲ၊ ဘာကြောင့် အသတ်ခံခဲ့ရတာလဲဆိုတာကို စုံစမ်းရာမှာ Samuel L. Jackson သရုပ်ဆောင်ထားတဲ့သူက တစ်ဖက်ကနေ ကူညီပေးနေပါတယ်။ ဆာဝါရဲ့ လက်စားချေမယ့် အစီအစဉ်တွေ အောင်မြင်နိုင်ပါ့မလား။ မိဘတွေ အသတ်ခံခဲ့ရတဲ့ အကြောင်းရင်းကို သိလာရတဲ့အခါ သူ့အပေါ် ဘယ်လိုသက်ရောက်လာနိုင်မလဲ။

ပေါလ် ရှာပတ်ဆန်ဟာ CIA ကနေ အငြိမ်းစားယူထားတဲ့ အေးဂျင့်တစ်ယောက်ပါ။ အမေရိကန်နဲ့ ရုရှားတို့ကြား ဆက်ဆံရေးတင်းမာနေချိန်မှာ ရုရှားနဲ့ ပတ်သက်မှုရှိတဲ့ အမေရိကန်လွှတ်တော်အမတ်တစ်ယောက် လုပ်ကြံသတ်ဖြတ်ခံရတယ်။ သတ်ဖြတ်ပုံက လွန်ခဲ့တဲ့ နှစ် ၂၀ တုန်းက ပေါလ် ဖမ်းဆီးမရခဲ့တဲ့ ဆိုဗီယက်လူသတ်သမား ကက်ရှီးယပ်စ်ရဲ့ လက်ချက်နဲ့ ဆင်တူနေပါတယ်။ ဒီအမှုကို ဖြေရှင်းဖို့ ပေါလ်ဟာ ကက်ရှီးယပ်စ်အမှုကို အထူးလေ့လာထားတဲ့ FBI အေးဂျင့် ဘန် ဂီရီနဲ့ လက်တွဲရပါတော့တယ်။ နှစ်ယောက်သား စုံစမ်းရင်း တွေ့လာတဲ့ လျှို့ဝှက်ချက်တွေကြောင့် တစ်ယောက်ကိုတစ်ယောက် သံသယဝင်လာကြတယ်။ ပေါလ်နဲ့ ကက်ရှီးယပ်စ်ကြားမှာ ဘယ်လိုအတိတ်တွေ ရှိခဲ့သလဲ၊ ဘန်ကရော ကက်ရှီးယပ်စ်အကြောင်းကို ဘာကြောင့် ဒီလောက်စွဲလမ်းနေရတာလဲ။ သူတို့နှစ်ယောက် ဖုံးကွယ်ထားတဲ့အရာတွေနဲ့ တရားခံအစစ် ဘယ်သူလဲဆိုတဲ့ မေးခွန်းတွေကို Richard Gere ပါဝင်ထားတဲ့ ဒီအက်ရှင်မှုခင်းဇာတ်ကားမှာ ဆက်ဖော်ပြထားပါတယ်။

ခရီးသည်လေယာဉ်တစ်စီးကို အကြမ်းဖက်သမားတွေ စီးနင်းထိန်းချုပ်ထားပြီး လေယာဉ်ပေါ်မှာ လောင်စာက ၉၇ မိနစ်စာပဲ ကျန်တော့တယ်။ ဒါပေမယ့် သူတို့ဘက်က ဘာတောင်းဆိုချက်မှ မပေးလာသလို ဆက်သွယ်တာလည်း မရှိတဲ့အတွက် ဘာရည်ရွယ်ချက်နဲ့ ပြန်ပေးဆွဲထားကြတာလဲဆိုတာ မသိရဘူး။ မြေပြင်ကနေ ဒီကိစ္စကို ကိုင်တွယ်နေတဲ့ NSA ဒါရိုက်တာနဲ့ လက်ထောက်ဒါရိုက်တာတို့ကြားမှာလည်း သဘောထားကွဲလွဲနေကြပါတယ်။ ခရီးသည်တွေအတွက် မျှော်လင့်စရာတစ်ခုက အကြမ်းဖက်သမားတွေကြားမှာ အသွင်ယူဝင်ရောက်ထားတဲ့ အေးဂျင့်တစ်ယောက် ရှိနေတာပါ။ ဒါပေမယ့် သူတစ်ယောက်တည်းနဲ့ ကျန်တဲ့သူအားလုံးကို ရင်ဆိုင်ဖို့က မလွယ်ဘူး။ လောင်စာကုန်ဖို့ အချိန်နီးလာနေချိန်မှာ အကြမ်းဖက်သမားတွေရဲ့ ရည်ရွယ်ချက်က ဘာလဲ၊ ကျန်တဲ့ ၉၇ မိနစ်အတွင်း ဒီပြဿနာတွေကို ဖြေရှင်းနိုင်ပါ့မလား၊ ခရီးသည်တွေကရော ဘယ်လိုကြမ္မာမျိုး ကြုံရမလဲ။

မြေခွေးမိစ္ဆာမလေး ယင်းနင်ဟာ မွေးစားအမေနဲ့အတူ မြို့အပြင်တစ်နေရာမှာ အပူအပင်ကင်းကင်း နေထိုင်လာခဲ့ပါတယ်။ တစ်နေ့ လူ့ပြည်က ရှန့်ယွမ်ပွဲတော်ကို သွားလည်တဲ့လမ်းမှာ ဝမ်ကျီဖူဆိုတဲ့ ပညာရှိတစ်ယောက်နဲ့ ဆုံမိတယ်။ ဝမ်ကျီဖူက ယင်းနင်ကို မြင်မြင်ချင်း ချစ်သွားပြီး မစားနိုင်မသောက်နိုင် ဖြစ်နေတော့တာပါ။ နောက်တော့ တိုက်တိုက်ဆိုင်ဆိုင် သူမနေတဲ့နေရာကို ရှာတွေ့သွားပြီး လက်ထပ်ခွင့်တောင်းကာ အိမ်ကို ခေါ်လာပါတယ်။ ဝမ်ကျီဖူတို့က ပညာတတ်မိသားစုဖြစ်တာကြောင့် သူ့အမေ သခင်မဝမ်ဟာ လွတ်လပ်သွက်လက်တဲ့ ယင်းနင်ကို သဘောမကျပါဘူး။ ယင်းနင်က မြေခွေးမိစ္ဆာဖြစ်မှန်း သိသွားတဲ့အခါမှာတော့ သားဖြစ်သူနဲ့ ခွဲဖို့ ကြိုးစားပါတော့တယ်။ ယင်းနင်ဟာ သူ့အပေါ် အထင်အမြင်လွဲမှားနေတာတွေကို ဘယ်လိုဖြေရှင်းမလဲ၊ သူ့မိဘအရင်းတွေကရော ဘယ်သူတွေလဲဆိုတဲ့ မေးခွန်းတွေနဲ့ ဆက်သွားတဲ့ တရုတ်ဒဏ္ဍာရီကို အခြေခံထားတဲ့ ဇာတ်လမ်းပါ။

ဗီယက်နမ်စစ်ပွဲအတွင်း အမေရိကန်စစ်သားတွေရှိတဲ့ တပ်စခန်းငယ်တစ်ခု ရုတ်တရက် ခြုံခိုတိုက်ခိုက်ခံရပါတယ်။ အဲဒီစခန်းက စစ်သားတွေဟာ မြေအောက်လိုဏ်ခေါင်းတွေထဲမှာ အရေးကြီးတဲ့ စစ်ဆင်ရေးတစ်ခုကို လုပ်ဆောင်ကြရတယ်။ ဖြစ်ရပ်မှန်ကို အခြေခံထားတဲ့ စစ်အက်ရှင်ဇာတ်ကားဖြစ်ပြီး သူတို့ရဲ့ လိုဏ်ခေါင်းတွင်းစစ်ဆင်ရေးကို လိုက်ပြထားပါတယ်။

မက်ဆာဒိုးနီးယားဘုရင် အလက်ဇန်းဒါးရဲ့ ဘဝကို ငယ်စဉ်ကနေ အင်ပါယာတည်ဆောက်တဲ့ကာလအထိ ပုံဖော်ထားတဲ့ ဇာတ်ကားပါ။ ဘီစီ ၃၅၆ ကနေ ၃၂၃ အတွင်း အသက်ရှင်ခဲ့တဲ့ သူ့အကြောင်းမှာ စစ်ပွဲနဲ့ နယ်မြေသိမ်းပိုက်မှုတွေအပြင် မိသားစုအတွင်း ဆက်ဆံရေးတွေ၊ ငယ်ပေါင်းမိတ်ဆွေတွေ၊ ချစ်သူတွေနဲ့ ယဉ်ကျေးမှုမတူတဲ့ လူမျိုးတွေကြား သူနေထိုင်အုပ်ချုပ်ခဲ့ပုံတွေပါ ပါဝင်ပါတယ်။ သူ့ဖခင် ဖိလစ်က လူမျိုးစုတွေကို စုစည်းပြီး ဂရိလူမျိုးစုတွေကို အောင်နိုင်ခဲ့သူပါ။ ဥရောပကနေ အာရှဘက်ကို ဆက်ချဲ့ပြီး ပါရှန်းအင်ပါယာကို သိမ်းပိုက်ဖို့လည်း ရည်ရွယ်ထားတယ်။ အလက်ဇန်းဒါးအတွက် ဒီအခြေအနေက အစကောင်းတစ်ခု ဖြစ်ပေမယ့် ထီးနန်းဆက်ခံရမယ့်လမ်းကတော့ ဖြောင့်ဖြူးနေတာ မဟုတ်ပါဘူး။ ဖခင်က နောက်အိမ်ထောင်ပြုပြီး သားတစ်ယောက် ထပ်ရလာတဲ့အခါ နန်းဆက်ခံရေးအတွက် ပြိုင်ဆိုင်စရာ ပေါ်လာပါတယ်။ ဖိလစ် လုပ်ကြံခံရပြီးနောက် အလက်ဇန်းဒါး ဘုရင်ဖြစ်လာတယ်။ အဲဒီနောက် ဖခင်ရည်ရွယ်ခဲ့တဲ့ ပါရှန်းဘက်ကို စစ်ချီပြီး ဘုရင်ဒရိုင်းရပ်စ်နဲ့ ရင်ဆိုင်ကာ ဘေဘီလုံကို သိမ်းပိုက်ခဲ့ပါတယ်။ သူ့ရဲ့စစ်ဆင်ရေးတွေမှာ အားထားရသူတွေကတော့ ငယ်ပေါင်းမိတ်ဆွေတွေဖြစ်တဲ့ ဟက်ဖိုက်စတီရန်၊ ပထောလမီ၊ ကတ်ဆန်းဒါ၊ နီရားကတ်စ်နဲ့ ကရားတို့စ်တို့ပါ။ သူတို့ရဲ့ စစ်ရေးစွမ်းရည်နဲ့ သူ့အပေါ် သစ္စာရှိတဲ့ စစ်တပ်ကို အားပြုပြီး အလက်ဇန်းဒါးဟာ အီဂျစ်နဲ့ ပါရှန်းကနေ အိန္ဒိယအထိ နယ်မြေချဲ့ထွင်လာပါတယ်။ ကိုယ်ရေးဘဝဘက်မှာတော့ မိခင်ရဲ့ လောဘနဲ့ ရက်စက်မှုတွေကို

ပါမောက္ခလန်ဂ်ဒန်ဟာ ခေါင်းမှာ ဒဏ်ရာကြီးရထားပြီး ဆေးရုံတစ်ခုမှာ နိုးလာပါတယ်။ သူ့မှတ်ဉာဏ်တွေ ပျောက်ဆုံးနေပြီး မီးလောင်နေတဲ့ ကမ္ဘာကြီးရဲ့ မြင်ကွင်းကလွဲလို့ ဘာကိုမှ သတိမရတော့ဘူး။ ဘာကြောင့် ဆေးရုံရောက်နေတာလဲ၊ အဲဒီမတိုင်ခင် ဘာတွေလုပ်ခဲ့သလဲဆိုတာကိုလည်း မမှတ်မိတော့ပါဘူး။ အတိတ်ကို ပြန်သတိရဖို့ ကြိုးစားနေတုန်းမှာပဲ သူ့ကိုသတ်ဖို့ ကြိုးစားသူတွေအပြင် အစိုးရအဖွဲ့တွေကပါ သူ့နောက်ကို အသည်းအသန် လိုက်နေကြောင်း သိလာရတယ်။ လက်ထဲမှာလည်း ငရဲရဲ့မြေပုံနဲ့ ပဟေဠိတစ်ခု ရှိနေတော့ သူဘာတွေ လုပ်မိခဲ့သလဲဆိုတာ ပိုပြီးသိချင်လာစရာပါ။ လူသတ်သမားတွေလက်ကနေ ထွက်ပြေးရင်း မှတ်ဉာဏ်တွေ တဖြည်းဖြည်း ပြန်ပေါ်လာပြီး သဲလွန်စတွေနောက်ကို လိုက်ကြည့်တဲ့အခါ ဒီပဟေဠိဟာ သူ့တစ်ယောက်တည်းနဲ့ ပတ်သက်နေတာ မဟုတ်တော့ဘူး။ ကမ္ဘာကြီးရဲ့ သေရေးရှင်ရေးပါ မူတည်နေတဲ့အရာ ဖြစ်နေပါတယ်။ Dan Brown ရဲ့ Inferno ဝတ္ထုကို ရုပ်ရှင်အဖြစ် ပြန်ရိုက်ထားပြီး Robert Langdon အဖြစ် Tom Hanks က ဆက်လက်ပါဝင်ထားပါတယ်။ The Da Vinci Code (2006) နဲ့ Angels & Demons (2009) တို့ရဲ့ နောက်ဆက်တွဲဇာတ်ကားပါ။

ဗင့်စ်က စိုက်ပျိုးသူတွေဆီက ဆေးခြောက်ဝယ်ပြီး မှာထားတဲ့သူတွေဆီ လိုက်ပို့ရောင်းချရင်း အလုပ်ဖြစ်နေတဲ့သူပါ။ ဒါပေမဲ့ ကယ်လီဖိုးနီးယားမှာ ဆေးခြောက်ကို တရားဝင်ခွင့်ပြုလိုက်တဲ့အခါ သူ့လို အရောင်းအဝယ်သမားတွေအတွက် ပြဿနာရှိလာတယ်။ လုပ်ငန်းလိုင်စင်လည်း မရတော့ အရာရှိတွေကို လာဘ်ထိုးပြီး ခိုးရောင်းနေရတဲ့ ဗင့်စ်ဟာ ဒီအလုပ်ကို ရေရှည်ဆက်လုပ်လို့ မရတော့ဘူးဆိုတာ နားလည်လာပါတယ်။ ဒါနဲ့ နောက်ဆုံးအရောင်းအဝယ်တစ်ကြိမ်လုပ်ဖို့ သူငယ်ချင်းနဲ့အတူ ပိုက်ဆံချေးပြီး ဆေးဝယ်လိုက်ကြတယ်။ ဒါပေမဲ့ အလိမ်ခံလိုက်ရပြီး ပစ္စည်းတွေပါ ဆုံးရှုံးသွားတဲ့အပြင် အကြွေးရှင်ကပါ သူတို့နှစ်ယောက်နောက်ကို လိုက်ဖမ်းလာပါတယ်။ ရဲတိုင်လို့လည်း မဖြစ်တဲ့အခြေအနေမှာ ဗင့်စ်တို့ ဘယ်လိုဖြေရှင်းကြမလဲဆိုတာကို ဆက်ပြထားတဲ့ ရာဇဝတ်မှုနဲ့ သည်းထိတ်ရင်ဖိုဇာတ်ကားပါ။ လိင်ဆက်ဆံမှုနဲ့ အဝတ်အစားမပါတဲ့ ဇာတ်ဝင်ခန်းတချို့ ပါဝင်ပါတယ်။

ကမ္ဘာမြေပေါ်ကို ဂြိုဟ်သားတွေ ကျူးကျော်လာတဲ့အခါ အမေရိကန်စစ်တပ်က ပြန်လည်ခုခံတိုက်ခိုက်ရပါတယ်။ ဒါပေမဲ့ ရင်ဆိုင်နေရတဲ့ ရန်သူက သာမန်ထက်လွန်ကဲတဲ့ သတ္တဝါတွေဖြစ်နေတော့ ခေတ်မီလက်နက်တွေ တပ်ဆင်ထားတဲ့ စစ်တပ်တောင် ဆုံးရှုံးမှုတွေ များလာတယ်။ စစ်ပွဲကြားမှာ ပြည်သူတွေ ထိခိုက်ကြရသလို သူတို့ကို ကာကွယ်ဖို့ တာဝန်ယူထားတဲ့ စစ်သားတွေလည်း အသက်နဲ့ရင်းပြီး တိုက်နေကြရပါတယ်။ အဲဒီအချိန်မှာ တပ်စုတစ်စုဟာ အန္တရာယ်ကြားက ပြည်သူတွေကို ကယ်ထုတ်ဖို့ အမိန့်ရလာတယ်။ ကယ်ဆယ်ရေးအတွက် သွားကြပေမယ့် သူတို့ကိုယ်တိုင်ပါ ရန်သူရဲ့ သတ်ကွင်းထဲမှာ ပိတ်မိသွားပါတယ်။ ဘာအမျိုးအစားမှန်း မသိရတဲ့ ဒီသတ္တဝါတွေက ကျည်ဆန်အချက်ပေါင်းများစွာ ထိတာတောင် မသေကြဘူး။ ကိုယ်တိုင်လည်း ပိတ်မိနေတဲ့ တပ်စုလေးက ပြည်သူတွေကို အသက်ရှင်လျက် ကယ်ထုတ်နိုင်ပါ့မလား၊ ဒီတိုက်ပွဲမှာ ဘယ်လောက်အထိ ပေးဆပ်ရဦးမလဲဆိုတာ ဆက်ကြည့်ရမှာပါ။

မာနာဝမ်ဆိုတဲ့ ရေအောက်သုတေသနအဖွဲ့ဟာ မျိုးစိတ်အသစ်တွေကို ရှာဖွေလေ့လာဖို့ ရေငုပ်ယာဉ်ငယ်တစ်စင်းနဲ့ လေ့လာရေးအဖွဲ့ကို ရေအောက်အနက်ဆုံး ကြမ်းပြင်ဆီ စေလွှတ်လိုက်ပါတယ်။ အဲဒီနေရာဟာ ရှေးကျတဲ့ သတ္တဝါကြီးတွေ ကျက်စားရာဒေသဖြစ်ပြီး ရေငုပ်ယာဉ်က အမျိုးအမည်မသိ သတ္တဝါတချို့ရဲ့ တိုက်ခိုက်မှုကို ခံလိုက်ရတယ်။ အဲဒီနောက် လေ့လာရေးစခန်းနဲ့ အဆက်အသွယ် ပြတ်တောက်သွားပါတယ်။ ယာဉ်ထဲကလူတွေကို ကယ်ဖို့ ရေအောက်ကယ်ဆယ်ရေး ကျွမ်းကျင်သူ ဂျိုးနက်စ်ကို သွားအကူအညီတောင်းကြရတယ်။ ဂျိုးနက်စ်က လူတွေနဲ့ အဆက်အသွယ်ဖြတ်ပြီး ထိုင်းနိုင်ငံမှာ အနားယူနေသူပါ။ အစမှာ ပိုက်ဆံဘယ်လောက်ပေးပေး မလိုက်ဘူးလို့ ငြင်းပေမယ့် အဆက်အသွယ်ပြတ်နေတဲ့ ရေငုပ်ယာဉ်ထဲမှာ သူ့အရင်လက်တွဲဖော်ပါ ပါနေမှန်း သိလိုက်ရတော့ ကယ်ဆယ်ရေးလုပ်ဖို့ လိုက်သွားပါတယ်။ ကမ္ဘာ့အကြီးဆုံး ငါးမန်းမျိုးနွယ်ဖြစ်တဲ့ Megalodon က ရေအောက်လေ့လာရေးစခန်းကို တိုက်ခိုက်တဲ့ ဒီသည်းထိတ်ရင်ဖိုဇာတ်ကားမှာ Jason Statham နဲ့ Li Bingbing တို့ ပါဝင်ထားပါတယ်။ ဂျိုးနက်စ်အနေနဲ့ ပင်လယ်ကြမ်းပြင်မှာ ဒုက္ခရောက်နေသူတွေကို ဘယ်လိုကယ်တင်မလဲ၊ ရေအောက်မှာ မမြင်ရသေးတဲ့ သတ္တဝါကြီးတွေကရော ဘာတွေဖြစ်မလဲဆိုတာကို ဆက်လိုက်ရမှာပါ။

တိုင်းပြည် ကမောက်ကမဖြစ်တဲ့အချိန် အခြေအနေကို ထိန်းချုပ်နိုင်ဖို့ အာဏာတည်တဲ့ ဓားရှည်တစ်ချောင်းကို ခေတ်အဆက်ဆက် ထိန်းသိမ်းလာကြပါတယ်။ ဒီဓားရဲ့အရှင်သခင်အဖြစ် ဆက်ခံမယ့်သူကိုလည်း စနစ်တကျ စစ်ဆေးရွေးချယ်ကြတာမို့ ဓားပိုင်ရှင်ဖြစ်ဖို့ မလွယ်ပါဘူး။ ယွီတရုန်ဆိုတဲ့ ကောင်လေးကတော့ စစ်ဆေးမှုအဆင့်ဆင့်ကို ဖြတ်ကျော်နိုင်ခဲ့ပြီး ဓားပိုင်ရှင်အသစ် ဖြစ်လာပါတယ်။ ဒါပေမယ့် ဓားကိုလိုချင်နေတဲ့ ဓားပြတွေနဲ့ ကျူးကျော်သူတွေကြောင့် ယွီတရုန်ဟာ သူတန်ဖိုးထားရသူတွေကို ဆုံးရှုံးရတယ်။ ဒီဓားနဲ့ပတ်သက်ပြီး လူအများအပြား သေကြေနေရတဲ့ကိစ္စကို ဓားပိုင်ရှင်အသစ် ယွီတရုန်တစ်ယောက် ဘယ်လိုဖြေရှင်းမလဲဆိုတဲ့ ဇာတ်လမ်းပါ။ သည်းထိတ်ရင်ဖို ဒရာမာအမျိုးအစားဖြစ်ပြီး ကြာချိန် တစ်နာရီ ဆယ်မိနစ်ရှိပါတယ်။

Violet နဲ့ Daisy တို့က ဆယ်ကျော်သက်အရွယ် ကြေးစားလူသတ်သမားနှစ်ယောက်ပါ။ တစ်နေ့မှာ လူတစ်ယောက်ကို ရှင်းပစ်ဖို့ အလုပ်ရလာလို့ အဲဒီလူရဲ့အိမ်ကို သွားကြတယ်။ အိမ်ကိုရောက်တော့ သူတို့သတ်ရမယ့်သူဟာ ကြင်နာတတ်တဲ့ ကင်ဆာရောဂါသည်တစ်ယောက် ဖြစ်နေတာကို တွေ့လိုက်ရပါတယ်။ သူတို့ရဲ့အလုပ် မပြီးပြတ်သေးခင်မှာပဲ အဲဒီလူကို သတ်ဖို့ နောက်အဖွဲ့တစ်ဖွဲ့ပါ ရောက်လာတဲ့အတွက် နှစ်ယောက်သား အခက်တွေ့ကြရတော့တယ်။ အက်ရှင်နဲ့ ရာဇဝတ်မှုတွေကို ဟာသနှောထားတဲ့ ဒီဇာတ်လမ်းမှာ သေနတ်ပစ်ခတ်မှုတွေ၊ လူသတ်မှုတွေအပြင် သူငယ်ချင်းနဲ့ မိသားစုကြားက သံယောဇဉ်တွေ၊ သေခြင်းတရားအကြောင်းကိုလည်း ထည့်သွင်းထားပါတယ်။

အာဖဂန်စစ်ပွဲကနေ ပြန်လာတဲ့ ရောဘတ်မဲလ်လာဟာ လန်ဒန်တောင်ပိုင်းက သူ့အိမ်ကို ပြန်ရောက်လာပါတယ်။ အဲဒီနေရာက ဂိုဏ်းသမားတွေ အများစု အခြေချနေတဲ့ ရပ်ကွက်ဖြစ်ပြီး မူးယစ်ရာဇာ ဂျုံးစ်ကလည်း သူ့လက်အောက်မှာ အလုပ်လုပ်ဖို့ ရောဘတ်ကို ကမ်းလှမ်းလာတယ်။ ရောဘတ်ကတော့ အဲဒီအလုပ်ကို လက်မခံခဲ့ပါဘူး။ အလုပ်မရှိသေးတဲ့ ရောဘတ်ကို သူငယ်ချင်းတစ်ယောက်က လူသိမခံတဲ့ အစိုးရပိုင်းဆိုင်ရာ အလုပ်တစ်ခုနဲ့ မိတ်ဆက်ပေးလိုက်တယ်။ အလုပ်ဝင်လုပ်ပြီးမှ သူလုပ်ရမယ့်ကိစ္စတွေဟာ အကြမ်းဖက်သမားတွေနဲ့ ထပ်ပြီး ပတ်သက်နေမှန်း သိလာရပါတယ်။ အစိုးရပိုင်းနဲ့ အကြမ်းဖက်သမားတွေကြားက ကူးလူးဆက်သွယ်မှုတွေကို ပုံဖော်ထားတဲ့ ဗြိတိန် အက်ရှင်၊ ရာဇဝတ်မှုနဲ့ သည်းထိတ်ရင်ဖိုဇာတ်ကားဖြစ်ပြီး ကြာချိန် တစ်နာရီခွဲရှိပါတယ်။

ဒွန်တို့ မိသားစုဆီကို ဒီတစ်ခါ လက်စားချေဖို့ ရောက်လာသူက သူတို့ရှင်းပစ်ခဲ့တဲ့ မူးယစ်ရာဇာ ရေးယက်စ်ရဲ့သား ဒန်တေပါ။ ဒန်တေက ဒွန့်ကို တန်းသတ်ပစ်ဖို့ထက် သူမသေခင်မှာ သူ့မိသားစုနဲ့ သူပိုင်ဆိုင်သမျှကို အရင်ဖျက်ဆီးချင်နေတယ်။ အဲဒီအတွက် အကွက်ချစီစဉ်ပြီး ထောင်ချောက်တွေကို တစ်ဆင့်ပြီးတစ်ဆင့် ဆင်ထားပါတယ်။ ဒွန်တို့မိသားစု အတူတကွ ရင်ဆိုင်ပြီး ဒီထောင်ချောက်တွေကို ဘယ်လိုကျော်ဖြတ်ကြမလဲဆိုတဲ့ အက်ရှင်ဇာတ်လမ်းပါ။ Fast X ကို Hulk၊ Now You See Me နဲ့ Transporter တို့ ရိုက်ကူးခဲ့တဲ့ Louis Leterrier က ဒါရိုက်တာလုပ်ထားပါတယ်။ ဗန်ဒီဇယ်၊ ဂျွန်စီနာတို့နဲ့အတူ Tokyo Drift ထဲက Sung Kang ကလည်း Han အဖြစ် ပြန်ပါဝင်လာတယ်။ ပထမဇာတ်ကားကတည်းက ပါလာတဲ့ သရုပ်ဆောင်တွေထဲမှာ ဗန်ဒီဇယ်၊ Michelle Rodriguez နဲ့ Jordana Brewster တို့ ပါဝင်ထားသလို တခြားဧည့်သည်သရုပ်ဆောင်တွေလည်း ပါပါတယ်။

ဖရန့်ခ် မက်ဂွိုင်းယားက ကမ္ဘာပေါ်မှာ အလေးစားခံရတဲ့ ဂူတွင်းရေငုပ်သမားတစ်ယောက်ပါ။ သားဖြစ်သူ ဂျော့ရှ်နဲ့အတူ အက်ဆာလာလိုဏ်ဂူကြီးရဲ့ ဂူလမ်းကြောင်းတွေနဲ့ မြစ်တွေကို လေ့လာဖို့ ရောက်နေကြတယ်။ သားအဖနှစ်ယောက်ကြား ကတောက်ကဆဖြစ်နေချိန်မှာပဲ မုန်တိုင်းတစ်ခု ဝင်လာပါတယ်။ မုန်တိုင်းကြောင့် မြေပြင်အောက် မီတာ ၂၀၀၀ မှာရှိတဲ့ အခြေစိုက်စခန်းထဲ ပိတ်မိသွားကြတယ်။ ဂူထဲကို ရေတွေ အလုံးအရင်းနဲ့ စီးဝင်လာတော့ ဖရန့်ခ်တို့အဖွဲ့ အသက်ရှင်ဖို့ လမ်းရှာရပါတော့တယ်။ ရေနစ်မသေဘဲ မြေပြင်ပေါ် ပြန်ရောက်နိုင်ဖို့ ကြိုးစားရင်း သူတို့ရဲ့ တစ်ခုတည်းသော မျှော်လင့်ချက်ဖြစ်တဲ့ ပင်လယ်ဆီကို ရောက်ဖို့ အတားအဆီးတွေကို ဘယ်လိုကျော်ဖြတ်ကြမလဲဆိုတာ ဆက်တွေ့ရမှာပါ။

ကိုဗစ်ကာလအတွင်း ဇာတ်အိမ်တည်ထားတဲ့ Bloody Daddy မှာ ရှာဟစ်ဒ်ကပူးရ်က မူးယစ်ထိန်းချုပ်ရေးဌာနဝန်ထမ်း ဆူမေးရ်အဖြစ် ပါဝင်ထားပါတယ်။ ဆူမေးရ်က ဇနီးနဲ့ကွဲနေပြီး သားနဲ့အတူ နေပေမယ့် သားအဖနှစ်ယောက်လည်း သိပ်အဆင်မပြေကြပါဘူး။ တစ်ရက်မှာ အလုပ်တူသူငယ်ချင်းတစ်ယောက်နဲ့အတူ မူးယစ်ဂိုဏ်းတစ်ခုရဲ့ ကိုကင်းသယ်လာတဲ့ကားကို ဖြတ်လုလိုက်တယ်။ အဲဒီနောက် ဂိုဏ်းခေါင်းဆောင်က ဆူမေးရ်ရဲ့သားကို ပြန်ပေးဆွဲပြီး သူယူသွားတဲ့ ကိုကင်းအိတ်နဲ့ ပြန်လဲဖို့ တောင်းဆိုလာပါတယ်။ သားကို ပြန်ကယ်ဖို့ လုပ်နေရတဲ့အချိန်မှာ အဂတိတိုက်ဖျက်ရေးဌာနက အရာရှိ အာဒီတီကလည်း ဆူမေးရ်ကို မသင်္ကာလို့ နောက်ကနေ လိုက်စုံစမ်းနေတယ်။ အတူလုပ်ခဲ့တဲ့ သူငယ်ချင်းကပါ သစ္စာဖောက်သွားတော့ ဆူမေးရ်တစ်ယောက် သားကို ကယ်နိုင်ပါ့မလား၊ သူကိုယ်တိုင်ပဲ ရဲတွေရဲ့ ဖမ်းဆီးမှုကို ခံရမလားဆိုတဲ့ အခြေအနေထဲ ရောက်လာပါတယ်။