အချစ်ဇာတ်လမ်းများ

အီဗာဟာ ကွာရှင်းထားတာ ဆယ်နှစ်ရှိပြီဖြစ်တဲ့ သက်လတ်ပိုင်းအမျိုးသမီးတစ်ယောက်ပါ။ အနှိပ်ပညာနဲ့ အသက်မွေးနေပြီး သူ့သမီးကလည်း ကောလိပ်သွားတက်ရတော့မယ်။ အဲဘတ်ကတော့ ကွာရှင်းထားတာ လေးနှစ်လောက်ရှိပြီး သူ့မှာလည်း ကောလိပ်တက်တော့မယ့် သမီးတစ်ယောက် ရှိပါတယ်။ သူက ရိုးရာသမိုင်းစာကြည့်တိုက်မှာ တီဗီအစီအစဉ်တွေကို ထိန်းသိမ်းတဲ့အလုပ် လုပ်နေသူပါ။ ပါတီတစ်ခုမှာ ဆုံခဲ့ကြတဲ့ အီဗာနဲ့ အဲဘတ်တို့ဟာ နောက်ပိုင်းမှာ ချစ်သူတွေ ဖြစ်လာကြတယ်။ အဲဘတ်က ဝပေမယ့် အီဗာ့အတွက်တော့ ပြဿနာမရှိပါဘူး။ အီဗာမှာ အနှိပ်သွားပေးရင်း ခင်မင်လာတဲ့ မယ်ရီအန်းဆိုတဲ့ ကဗျာဆရာမသူငယ်ချင်းလည်း ရှိတယ်။ မယ်ရီအန်းကတော့ သူ့ယောက်ျား မကောင်းကြောင်း မကြာခဏ ပြောတတ်သူပါ။ တစ်နေ့မှာ ကိုယ့်ချစ်သူ အဲဘတ်ရဲ့ အရင်ဇနီးဟာ ကိုယ်နှိပ်ပေးနေကျ သူငယ်ချင်း မယ်ရီအန်းဖြစ်နေမှန်း အီဗာ သိလိုက်ရပါတယ်။ အိမ်ထောင်ကွဲပြီး သမီးကိုယ်စီရှိကြတဲ့ လူနှစ်ယောက်ရဲ့ အချစ်ရေးကို အခြေခံထားတဲ့ အချစ်ဟာသဒရာမာပါ။ အိမ်ထောင်ရေးအခက်အခဲတွေ၊ သားသမီးပြုစုပျိုးထောင်ရတာတွေ၊ လက်တွဲဖော်အပေါ်ထားတဲ့ သဘောထားတွေကို နေ့စဉ်ဘဝနဲ့နီးစပ်တဲ့ ပုံစံနဲ့ တင်ပြထားပါတယ်။ အီဗာနေရာမှာ Julia ပါဝင်ထားပြီး အဲဘတ်နေရာမှာတော့ Soprano စီးရီးရဲ့ Tony Soprano အဖြစ် သရုပ်ဆောင်ခဲ့တဲ့ James Gandofini က သဘောကောင်းပြီး ကြင်နာတတ်သူအဖြစ် ပါဝင်ထားပါတယ်။

Daisy ဟာ West High School မှာ အလုပ်လုပ်နေတဲ့ သာမန်စာကြည့်တိုက်မှူးတစ်ယောက်ပါ။ ကျောင်းက ထောက်ပံ့မှုမရှိတာ၊ ကလေးတွေက စိတ်မဝင်စားတာတွေကြောင့် ပန်းချီဆရာမက စာသင်နှစ်တစ်ဝက်မှာပဲ အလုပ်ထွက်သွားပါတယ်။ သင်ပေးမယ့်ဆရာမ မရှိတော့လို့ အခက်တွေ့နေတဲ့ ကလေးတွေကို ကူညီချင်တဲ့ Daisy ဟာ ပန်းချီမဆွဲတတ်ဘဲ ပန်းချီဆရာမနေရာကို ဝင်ယူလိုက်ရတော့တယ်။ ကိုယ်ပိုင်ဘဝမှာလည်း ဖိအားတွေများနေတဲ့ Daisy ရဲ့ဘဝထဲကို လွတ်လွတ်လပ်လပ် နေတတ်တဲ့ ဓာတ်ပုံဆရာ Jack Palmer ရောက်လာပါတယ်။ ဟာသဇာတ်ကားဖြစ်တဲ့ ဒီဇာတ်လမ်းက သူတို့တွေ့ဆုံလာတဲ့နောက် Daisy ဘာတွေဆက်ကြုံရမလဲဆိုတဲ့ဘက်ကို ဆက်သွားပါတယ်။

အသက် ၃၃ နှစ်အရွယ် ဒင်ဒါဟာ ဟိုတယ်တစ်ခုလုံးကို စီမံခန့်ခွဲနေရတဲ့ ထက်မြက်တဲ့ မန်နေဂျာတစ်ယောက်ပါ။ တစ်ကိုယ်တည်းနေတဲ့ သူ့အတွက် အခက်တွေ့စေတာက အိမ်ထောင်ပြုဖို့ ဖိအားပေးနေတဲ့ မိဘနှစ်ပါးပဲ။ ရှေးရိုးစွဲတဲ့ မိဘတွေက မိန်းကလေးဆို အသက်နှစ်ဆယ်လောက်မှာ လက်ထပ်သင့်ပြီလို့ ယူဆထားကြပါတယ်။ မိဘတွေရဲ့ မင်္ဂလာနှစ်ပတ်လည်ပွဲကို စီစဉ်ပေးဖို့ ဒင်ဒါ့ကို တာဝန်ပေးတဲ့အခါ အမေက ကောင်လေးတစ်ယောက်တော့ အိမ်ခေါ်လာရမယ်လို့ပါ ပြောလာတယ်။ ဒင်ဒါလည်း ချစ်သူအဖြစ် ဟန်ဆောင်ပေးမယ့်သူကို ငှားဖို့ အကြံရသွားပါတယ်။ အဲဒီအလုပ်ကို လုပ်ပေးမယ့်သူက သရုပ်ဆောင်အလုပ်ကို စိတ်အားထက်သန်တဲ့ ဆာထရီယိုပါ။ အင်ဒိုနီးရှား အချစ်ဟာသဒရာမာဖြစ်တဲ့ ဒီဇာတ်လမ်းမှာ အဖြစ်သည်းတတ်တဲ့ မိဘနှစ်ပါးနဲ့ သရုပ်ဆောင်ဝါသနာကြီးတဲ့ ဟန်ဆောင်ချစ်သူတို့ကြား ဒင်ဒါ ဘာတွေကြုံရမလဲ။ လက်မထပ်သေးဘဲ နေချင်တဲ့ သူ့ဆန္ဒကရော အောင်မြင်ပါ့မလား၊ သူ့အတွက် ပျော်ရွှင်စရာအဆုံးသတ် ဖြစ်လာမလားဆိုတာ ဆက်ကြည့်ရမှာပါ။

Kaira က အရည်အချင်းရှိတဲ့ ရုပ်ရှင်ဓာတ်ပုံဆရာတစ်ယောက်ဖြစ်ပြီး အလုပ်မှာ အခုထက်ပိုအောင်မြင်ဖို့ ကြိုးစားနေသူပါ။ အချစ်ရေးမှာတော့ သူနဲ့ကိုက်ညီမယ့်သူကို ရှာနေတုန်း အသည်းကွဲခဲ့ရတယ်။ စိတ်ဓာတ်ကျပြီး ရည်မှန်းချက်ပါ ပျောက်နေတဲ့အချိန်မှာ Goa က စားသောက်ဆိုင်တစ်ဆိုင်အတွက် ကြော်ငြာရိုက်ပေးဖို့ မွေးရပ်မြေကို ပြန်လာရပါတယ်။ အဲဒီမှာ စိတ်ရောဂါအထူးကုဆရာဝန် Dr. Jehangir Khan ရဲ့ ဟောပြောမှုကို နားထောင်ဖြစ်ခဲ့တယ်။ နောက်တော့ ကိုယ့်မှာဖြစ်နေတဲ့ စိတ်ပျက်အားငယ်မှုတွေကို ဖြေရှင်းနိုင်ဖို့ Dr. Jug လို့လည်းခေါ်တဲ့ ဒီဆရာဝန်နဲ့ တွေ့ဆုံဖြစ်လာပါတယ်။ ဆရာဝန်က သမားရိုးကျမဟုတ်တဲ့ ကုသနည်းတွေနဲ့ Kaira ရဲ့ အတိတ်အကြောင်းတွေ၊ လက်ရှိကြုံနေရတဲ့ အခက်အခဲတွေကို တစ်ခုချင်း ဖြေရှင်းပေးဖို့ ကြိုးစားတယ်။ စိတ်ပညာနဲ့ဆိုင်တဲ့ အကြောင်းအရာတွေကို နားလည်လွယ်တဲ့ ဥပမာတွေနဲ့ ရှင်းပြရင်း ဘဝကို ဘယ်လိုရင်ဆိုင်မလဲဆိုတဲ့ အတွေးတွေကိုလည်း ပြောပြပေးပါတယ်။ Kaira အဖြစ် Alia Bhatt နဲ့ Dr. Jug အဖြစ် Shah Rukh Khan တို့ ပါဝင်ထားပြီး ဒါရိုက်တာကတော့ English Vinglish ကို ရိုက်ကူးခဲ့တဲ့ Gauri Shinde ပါ။ အမေရိကန်ရောက် အိန္ဒိယအမျိုးသမီးတစ်ယောက် အင်္ဂလိပ်စာသင်ယူတဲ့အကြောင်း ရိုက်ထားတဲ့ အဲဒီကားပြီးနောက် Dear Zindagi က သူမရဲ့ ဒုတိယမြောက်ရုပ်ရှင်ဖြစ်ပါတယ်။ ဒီတစ်ခါမှာလည်း အမျိုးသမီးဇာတ်ကောင်ကို အဓိကထားပြီး သူကြုံနေရတဲ့ အခက်အခဲတွေကနေ ဇာတ်လမ်းကို ဆက်ထားတယ်။ Goa မြို့က

ခရမ်းချဉ်သီးမင်းသားလေးနဲ့ ဆရာဝန်မလေးတို့ရဲ့ အချစ်ဇာတ်လမ်းအဆက်မှာ တက်တိုနဲ့ ပေါ်လာတို့ အမေဇုန်သစ်တောနောက်ခံနဲ့ ပြန်တွေ့ရပါတယ်။ ဒီတစ်ခါမှာတော့ သူတို့ရဲ့ အချစ်ရေးအခက်အခဲတွေနဲ့ တက်တို ရင့်ကျက်လာပုံကို ဆက်ပြထားတာပါ။ ပေါ်လာက အမေဇုန်တောမှာ လုပ်အားပေးဖို့ ထွက်သွားပြီးနောက် တက်တိုရဲ့အဖေက သူခွဲထွက်တည်ထောင်ထားတဲ့ ကုမ္ပဏီကို ဖျက်သိမ်းပြီး မူလဖရန်စကိုကုမ္ပဏီကိုပဲ လက်လွှဲယူဖို့ ဖိအားပေးလာပါတယ်။ ခရမ်းချဉ်သီးစိုက်ပျိုးသူ များလွန်းတဲ့ တောင်ပိုင်းမှာ သူ့ကုမ္ပဏီ ရပ်တည်ဖို့လည်း ခက်ခဲလာတယ်။ ဒါကြောင့် ကိုယ်ပိုင်ကုမ္ပဏီကို ကယ်တင်နိုင်ဖို့နဲ့ ပေါ်လာနဲ့လည်း အတူနေနိုင်ဖို့ ဘရာဇီးမြောက်ပိုင်း အမေဇုန်တောထဲမှာ ခရမ်းချဉ်သီးစိုက်ပျိုးရေးလုပ်ဖို့ ထွက်လာခဲ့ပါတယ်။ ပေါ်လာကတော့ သူ့အလုပ်မှာ တိုးတက်ချင်နေသူပါ။ တက်တိုက သူ့နောက်ကို အမြဲလိုက်နေသလို သူ့လုပ်ဖော်ကိုင်ဖက်နဲ့လည်း သဝန်တိုနေတာကြောင့် ပေါ်လာအတွက် စိတ်ရှုပ်စရာ ဖြစ်လာတယ်။ သူတို့နှစ်ယောက်ရဲ့ အချစ်ရေးအပြင် အမေဇုန်ရှုခင်းတွေ၊ တိုင်းရင်းသားတွေရဲ့ နေထိုင်မှုပုံစံတွေနဲ့ သဘာဝပတ်ဝန်းကျင်ထိန်းသိမ်းရေးအကြောင်းတွေကိုလည်း ဇာတ်လမ်းထဲမှာ ထည့်ထားပါတယ်။

မော်ရိုကိုနိုင်ငံက ဈေးတစ်ခုမှာ Halim နဲ့ Mina တို့ ဇနီးမောင်နှံဟာ Caftan လို့ခေါ်တဲ့ ရိုးရာဝတ်စုံတွေ ချုပ်တဲ့ဆိုင် ဖွင့်ထားကြပါတယ်။ Caftan ဆိုတာ ပိုးစ၊ ဖဲစတွေပေါ်မှာ ရွှေချည်ကို အနုစိတ်ထိုးထားပြီး မင်္ဂလာပွဲလို အထူးအခမ်းအနားတွေမှာ အမျိုးသမီးတွေ ဝတ်ကြတဲ့ ဝတ်ရုံတစ်မျိုးပါ။ ရွှေချည်ထိုးတာကနေ အနားကွပ်တာအထိ လက်နဲ့ အသေးစိတ်လုပ်ရတဲ့အတွက် အချိန်ပေးရသလို လက်လည်းဝင်ပါတယ်။ စက်နဲ့ချုပ်တဲ့သူတွေ ရှိလာပေမယ့် Halim ကတော့ လက်မှုပညာကို တန်ဖိုးထားပြီး လက်နဲ့ပဲ အနုစိတ်ချုပ်နေဆဲပါ။ ဒါကြောင့် သူတို့ဆိုင်က အပ်ထည်တွေဟာ သူများဆိုင်ထက် အချိန်ပိုကြာပြီး နောက်ကျလေ့ရှိတယ်။ အချိန်မီပြီးဖို့ တပည့်တွေခေါ်သင်ပေးပေမယ့် ရောက်လာလိုက်၊ ထွက်သွားလိုက်နဲ့ အဆင်မပြေဖြစ်နေကြပါတယ်။ Youssef ဆိုတဲ့ လူငယ်တပည့်တစ်ယောက် ရောက်လာတဲ့အခါတော့ ဇနီးမောင်နှံနှစ်ယောက်ရဲ့ ဆက်ဆံရေးမှာ အပြောင်းအလဲတွေ ဖြစ်လာတယ်။ Halim ဖုံးကွယ်ထားတဲ့အရာတွေလည်း တဖြည်းဖြည်း ပေါ်လာပြီး တစ်ချိန်တည်းမှာပဲ Mina ရဲ့ ကျန်းမာရေးကလည်း တစ်စတစ်စ ယိုယွင်းလာပါတယ်။

၁၉၅၀ ခုနှစ်ထွက် Disney ကာတွန်းကား Cinderella မှာ စင်ဒရဲလားဟာ မိထွေးနဲ့ မိထွေးရဲ့ သမီးနှစ်ယောက်အတွက် အစေခံတစ်ယောက်လို အလုပ်လုပ်ပေးနေရသူပါ။ သူတို့ရဲ့ အနိုင်ကျင့်မှုကို ခံနေရပေမယ့် အဝေးက နန်းတော်ကြီးကို လှမ်းကြည့်ရင်း တော်ဝင်ကပွဲ တက်ခွင့်ရဖို့တော့ စိတ်ကူးယဉ်နေတတ်ပါတယ်။ ဒီဆန္ဒလေး ပြည့်လာဖို့ သူ့သူငယ်ချင်း ကြွက်ကလေးတွေက ဘယ်လိုကူညီကြမလဲ၊ မိထွေးကြီးကရော ဘယ်လိုနှောင့်ယှက်ဦးမလဲဆိုတာက စင်ဒရဲလားရဲ့ ကပွဲသွားချင်တဲ့ အိပ်မက်နဲ့အတူ ဆက်ပါလာပါတယ်။ အစောင့်အရှောက် နတ်သမီးဖွားဖွားရဲ့ အကူအညီကလည်း သူ့အတွက် ဘယ်လိုအပြောင်းအလဲတွေ ဖြစ်လာစေမလဲဆိုတာ ပါဝင်တဲ့ မိသားစုကြည့် စိတ်ကူးယဉ်ကာတွန်းကားပါ။

၂၀၀၂ ခုနှစ်ထွက် Cinderella II မှာတော့ ကြွက်ကလေးတွေက ပုံပြင်သုံးပုဒ်ကို ပြောပြကြပါတယ်။ ပထမပုံပြင်က မင်းသမီးဖြစ်လာပြီးနောက် ရဲတိုက်ကို ပထမဆုံးရောက်လာတဲ့ စင်ဒရဲလားအကြောင်းပါ။ ဘဝသစ်မှာ အခက်အခဲလေးတွေ ကြုံရသလို ရဲတိုက်ရဲ့ အစဉ်အလာနဲ့ ဓလေ့ထုံးတမ်းတွေကိုလည်း လိုက်နာရပါတယ်။ အဲဒီထုံးတမ်းတွေကို စင်ဒရဲလားက သူ့ကိုယ်ပိုင်ပုံစံနဲ့ ဘယ်လိုပြောင်းလဲသွားသလဲဆိုတာ ပြောပြထားတယ်။ ဒုတိယပုံပြင်မှာတော့ ဂျက်ခ်ဂျက်ခ်လေးရဲ့ လူသားဖြစ်ချင်တဲ့ဆန္ဒ ပြည့်သွားပါတယ်။ ဒါပေမယ့် လူဖြစ်လာတဲ့နောက်မှာ သူမထင်ထားတဲ့ အလွဲတွေနဲ့ ကြုံရတော့တယ်။ ကြွက်တစ်ကောင်အဖြစ် နေရတာနဲ့ လူတစ်ယောက်အဖြစ် နေရတာ ဘယ်ဘဝက သူ့အတွက် ပိုကောင်းမလဲဆိုတာကို အဲဒီအတွေ့အကြုံတွေကနေ သိလာရမှာပါ။ နောက်ဆုံးပုံပြင်ကတော့ အန်နာစတေးရှားရဲ့ အချစ်ရေးအကြောင်း ဖြစ်ပါတယ်။ အချစ်စစ်ကို တွေ့ပြီး ပျော်ရွှင်ရဖို့ဆိုတဲ့ သူ့အိပ်မက် အကောင်အထည်ပေါ်လာအောင် စင်ဒရဲလားနဲ့ ကြွက်ကလေးတွေ ဘယ်လိုကူညီကြမလဲဆိုတာ ဆက်ပြောပြထားပါတယ်။

စင်ဒရဲလားနဲ့ မင်းသားလေးတို့ ပျော်ပျော်ရွှင်ရွှင် ပေါင်းဖက်နေထိုင်ကြပြီဆိုတဲ့ နေရာကနေ ဒီတတိယမြောက် စင်ဒရဲလားကာတွန်းဇာတ်ကားက ဆက်ထားပါတယ်။ သူတို့ရဲ့ဘဝ အေးချမ်းနေချိန်မှာပဲ နတ်သမီးဖွားဖွားရဲ့ မှော်တုတ်တံဟာ မိထွေးကြီးလက်ထဲ ရောက်သွားတယ်။ စွမ်းအားကြီးတဲ့ မှော်တုတ်တံကို မိထွေးကြီး ပိုင်သွားတဲ့အခါ စင်ဒရဲလားတို့အတွက် ဒုက္ခတွေ ပြန်စလာတော့တာပါ။ မိထွေးကြီးက ဒီမှော်အစွမ်းကို ဘယ်လိုအသုံးချမလဲ၊ စင်ဒရဲလားတို့ ဘယ်လိုအခက်အခဲတွေ ရင်ဆိုင်ရမလဲဆိုတာကနေ ဇာတ်လမ်းဆက်သွားပါတယ်။ အရင်က ကူညီခဲ့တဲ့ ကြွက်ကလေးတွေကရော ဒီတစ်ခါ ဘယ်လိုလက်တွဲကူညီကြဦးမလဲ။ စင်ဒရဲလားနဲ့ မင်းသားလေးတို့ရဲ့ အချစ်စစ်က ဒီအခက်အခဲတွေကြားမှာ ဘယ်လောက်အထိ အားဖြစ်ပေးနိုင်မလဲဆိုတာလည်း ပါဝင်ပါတယ်။

အသက် ၂၆ နှစ်အရွယ် လူဝီဆာကလတ်ခ်ဟာ စားပွဲထိုးအလုပ် ပြုတ်သွားတဲ့အခါ အိမ်ကမိဘတွေနဲ့ ညီမသားအမိကို ထောက်ပံ့ဖို့ အလုပ်သစ် အသည်းအသန်ရှာရပါတယ်။ ဒီလိုနဲ့ ဝီလ်ထရေးနာဆိုတဲ့ အမျိုးသားကို စောင့်ရှောက်ပေးရမယ့်အလုပ်ကို လက်ခံလိုက်တယ်။ လွန်ခဲ့တဲ့ နှစ်နှစ်က မော်တော်ဆိုင်ကယ်မတော်တဆမှုကြောင့် ကိုယ်ခန္ဓာအများစု မလှုပ်ရှားနိုင်တော့တဲ့ ဝီလ်ဟာ အရင်က အောင်မြင်တဲ့ ဘဏ်လုပ်ငန်းရှင်တစ်ယောက် ဖြစ်ခဲ့သူပါ။ ဝတ်စားဆင်ယင်ပုံ ထူးခြားပြီး ပေါ့ပေါ့ပါးပါးနေတတ်တဲ့ လူဝီဆာနဲ့ အရာရာကို စိတ်အလိုမကျဘဲ ဒေါသထွက်နေတတ်တဲ့ ဝီလ်တို့ စစချင်းမှာတော့ အဆင်မပြေကြဘူး။ ကိုယ့်မြို့လေးပြင်ပကို မသွားဖူးသေးတဲ့ လူဝီဆာရဲ့ဘဝကို ဝီလ်က အားမရသလို၊ အားလုံးဝိုင်းဂရုစိုက်ပေးနေရက်နဲ့ ဘာကြောင့် ဒီလောက်စိတ်ဆိုးနေရသလဲဆိုတာကို လူဝီဆာကလည်း နားမလည်နိုင်ပါဘူး။ အချိန်ကြာလာတော့ နှစ်ယောက်သား သံယောဇဉ်တွယ်လာပြီး လူဝီဆာရဲ့ အမြင်တွေလည်း ပြောင်းလဲလာတယ်။ သူ့ကို ဘာကြောင့် ခြောက်လပဲ ငှားထားသလဲဆိုတာ သိလိုက်ရတဲ့အခါ ဝီလ်ရဲ့စိတ်ကို လူဝီဆာ ပြောင်းလဲပေးနိုင်ပါ့မလားဆိုတာက ဆက်ကြည့်စရာ ဖြစ်လာပါတယ်။ Jojo Moyes ရဲ့ဝတ္ထုကို ပြန်ရိုက်ထားပြီး လူဝီဆာအဖြစ် Emilia Clarke၊ ဝီလ်အဖြစ် Sam Claflin တို့ သရုပ်ဆောင်ထားတဲ့ အချစ်ဒရမ်မာကား ဖြစ်ပါတယ်။

အိုဝါရီစီရင်စုရဲ့ အရှင် အိုဒါနိုဘူနဂနဲ့ မီနိုစီရင်စုက မင်းသမီးနိုဟီမဲတို့ရဲ့ လက်ထပ်ပွဲကနေ ဇာတ်လမ်းစထားပါတယ်။ နိုင်ငံရေးအကြောင်းတွေကြောင့် လက်ထပ်လိုက်ရတဲ့ ဒီနှစ်ယောက်က စရိုက်ရော အတွေးအခေါ်ပါ မတူကြဘူး။ နိုဘူနဂက အိုဝါရီရဲ့အရူးလို့ နာမည်ပြောင်ရတဲ့အထိ ပေါကြောင်ကြောင်နေတတ်ပြီး နိုဟီမဲကတော့ ထက်မြက်တဲ့ မင်းသမီးတစ်ပါးပါ။ တစ်နယ်စီ ကွဲပြားနေတဲ့ ဂျပန်ပြည်ရဲ့ နိုင်ငံရေးနောက်ခံမှာ သဘောချင်းမတူတဲ့ ဒီလင်မယား ဘယ်လိုရှေ့ဆက်ကြမလဲဆိုတာကို တင်ဆက်ထားပါတယ်။ Otomo Keishi ရိုက်ကူးထားတဲ့ သမိုင်းနောက်ခံ အချစ်ဒရမ်မာကား ဖြစ်ပါတယ်။

ဂျိုရယ်နဲ့ ဂျန်နီတို့ဟာ တစ်ယောက်ကိုတစ်ယောက် သိပ်ချစ်ကြတဲ့ လူငယ်စုံတွဲပါ။ ဂျိုရယ်က ကိုယ့်အိပ်မက်ကို အကောင်အထည်ဖော်ဖို့ ကြိုးစားနေသူဖြစ်ပြီး ဂျန်နီကတော့ ကိုရီးယားကားတွေကို ရူးသွပ်တဲ့ မိန်းကလေးတစ်ယောက်ပေါ့။ နှစ်ယောက်သားရဲ့ နေ့စဉ်ဘဝမှာ အချစ်နဲ့ ကြည်နူးစရာတွေ ရှိနေပေမယ့် ဂျန်နီ့မွေးနေ့ကစပြီး မထင်ထားတဲ့ ပြဿနာတစ်ခု ပေါ်လာပါတယ်။ အဲဒီဖြစ်ရပ်က သူတို့နှစ်ယောက်ကို ဘယ်လိုပြောင်းလဲစေမလဲ၊ နှစ်ယောက်သား ဘယ်လိုရင်ဆိုင်ကြမလဲဆိုတာကို ဟာသနှောပြီး ဆက်ပြထားတာပါ။ လူငယ်ချစ်သူတွေကြားက အခြေအနေတွေကို အခြေခံထားတဲ့ မလယာလမ်အချစ်ဟာသကားဖြစ်ပြီး Anikha Surendran ပါဝင်သရုပ်ဆောင်ထားပါတယ်။

ဆာဝါကို ကူရိုနုမာဟာ ဆံပင်ရှည်ချထားပြီး ရှက်ကြောက်တတ်တဲ့ မိန်းကလေးပါ။ Ring ထဲက သရဲမဆာဒါကိုနဲ့ တူတယ်ဆိုပြီး ငယ်ငယ်ကတည်းက အတန်းဖော်တွေက ဝေးဝေးရှောင်ကြတယ်။ အထက်တန်းရောက်လာတဲ့အထိ အဲဒီလိုပဲ ဖြစ်နေပေမယ့် အတန်းထဲမှာ လူချစ်လူခင်များတဲ့ ကာဇဲဟာယာကတော့ ဆာဝါကိုကို သူများတွေလို မဆက်ဆံဘဲ အမြဲဂရုစိုက်ကြင်နာပေးပါတယ်။ သူ့ကြောင့် ဆာဝါကိုမှာ သူငယ်ချင်းတွေ ရလာပြီး လိုချင်ခဲ့တဲ့ ကျောင်းသားဘဝလေးကို တဖြည်းဖြည်း ပိုင်ဆိုင်လာတယ်။ နှစ်ယောက်ကြားမှာ ခံစားချက်တွေ ကြီးထွားလာပေမယ့် တစ်ယောက်ကိုတစ်ယောက် ဖွင့်ပြောနိုင်ဖို့တော့ လိုနေသေးတာပါ။ လူငယ်တွေရဲ့ ခင်မင်မှုနဲ့ အချစ်စိတ်ကို အခြေခံထားတဲ့ Kimi ni Todoke ရဲ့ ၂၀၁၀ လူသရုပ်ဆောင်ရုပ်ရှင်ဖြစ်ပြီး Mikako Tabe နဲ့ Haruma Miura တို့ ပါဝင်ထားကြပါတယ်။

မင်ဂျွန်းက အချစ်စစ်ရှိတယ်လို့ ယုံကြည်ပြီး ချစ်မိပြီဆိုရင် အကုန်ပေးဆပ်တတ်တဲ့ မိန်းကလေးပါ။ သူကပဲ ဖုန်းအရင်ခေါ်၊ သူကပဲ ပြေးတွေ့နဲ့ ကိုယ့်မာနကို ထည့်မတွက်တတ်ပေမယ့် တွဲခဲ့သမျှ ရည်းစားတွေကတော့ သူ့ကို ထားခဲ့ကြတာချည်းပဲ။ လက်ရှိချစ်သူရဲ့ သစ္စာဖောက်စွန့်ပစ်မှုကို ခံလိုက်ရတဲ့အချိန်မှာပဲ သူတို့ကုမ္ပဏီကို သူဌေးအသစ် ရော်ဘင် ရောက်လာပါတယ်။ ရော်ဘင်က မင်ဂျွန်းရဲ့ အဲဒီလိုချစ်တတ်ပုံကို သဘောမကျဘူး။ နှစ်ယောက်တွေ့တိုင်း စကားနိုင်လုကြရင်း ရော်ဘင်ပြောလိုက်တဲ့ စကားတစ်ခွန်းက မင်ဂျွန်းကို အထိနာစေခဲ့တယ်။ ဒီလိုနဲ့ သူဌေးကြီးရဲ့စိတ်ကို ဖမ်းစားပြမယ်ဆိုပြီး မင်ဂျွန်းက စိန်ခေါ်လိုက်ရာကနေ သူတို့နှစ်ယောက်ရဲ့ အချစ်ဇာတ်လမ်း စလာပါတယ်။ Uhm Jung Hwa နဲ့ Daniel Henney တို့ အဓိကပါဝင်ထားကြပါတယ်။

ဖခင်ဆုံးသွားတဲ့နောက် ဒေးလ်ဟာ ကုမ္ပဏီကို ကယ်တင်ဖို့နဲ့ အဖေ့အိပ်မက်ကို အကောင်အထည်ဖော်ဖို့ နိုင်ငံတကာ ကားပြိုင်ပွဲတစ်ခုမှာ ဝင်ပြိုင်လိုက်ပါတယ်။ ဒါပေမယ့် ဒီပြိုင်ပွဲက လမ်းပေါ်မှာ မောင်းရတဲ့ ပြိုင်ပွဲမျိုး မဟုတ်ဘူး။ ကန္တာရထဲမှာ ရက်ရှည်မောင်းရမှာဖြစ်ပြီး ပြိုင်ပွဲပြီးအောင် မောင်းနိုင်ဖို့တင် အန္တရာယ်တွေကို ဖြတ်ရတော့တယ်။ ဒေးလ်ဟာ ကန္တာရခရီးမှာ ဘာတွေနဲ့ ကြုံရမလဲ၊ အဖေ့ရည်မှန်းချက်ကို ပြည့်မြောက်အောင် လုပ်နိုင်မလားဆိုတာကို စွန့်စားခန်းနဲ့ အချစ်ဇာတ်လမ်း တွဲပြီး ပြထားပါတယ်။ ၁၉၈၃ ခုနှစ်က ထွက်ခဲ့တဲ့ ဒီဇာတ်ကားမှာ Brooke Shields နဲ့ Lambert Wilson တို့ ပါဝင်ထားကြပါတယ်။

အအိုအိဟာ ဘဝအခြေအနေကြောင့် ကျောင်းဆက်မတက်နိုင်တော့ဘဲ အသက်မပြည့်သေးခင်မှာပဲ ညကလပ်တစ်ခုမှာ အလုပ်လုပ်နေရပါတယ်။ ငယ်ငယ်နဲ့ အိမ်ထောင်ကျခဲ့ပြီး နှစ်နှစ်အရွယ် သားလေးတစ်ယောက်လည်း ရှိတယ်။ ခင်ပွန်း မာဆာယာကတော့ အလုပ်မလုပ်ဘဲ သူရှာလာသမျှကို သုံးဖြုန်းနေပြီး ငွေမပေးနိုင်တဲ့အခါ ကိုယ်ထိလက်ရောက် နှိပ်စက်တတ်သူပါ။ အသက်မပြည့်သူတွေကို အလုပ်ခန့်ထားတဲ့ ကလပ်တွေကို ရဲက ဝင်ဖမ်းပြီး ပိတ်သိမ်းလိုက်တော့ အအိုအိ အလုပ်လက်မဲ့ဖြစ်သွားတယ်။ တခြားကလပ်တွေကလည်း လက်မခံကြတော့ဘူး။ အဲဒီကြားမှာ မာဆာယာက ရန်ဖြစ်လို့ အချုပ်ထဲရောက်သွားပြီး လျော်ကြေးပေးဖို့ပါ ငွေလိုလာပါတယ်။ နေ့ပိုင်းအလုပ်ရဲ့ လစာလေးနဲ့ မလောက်ငတဲ့အခါ ဒိတ်လိုက်တဲ့ဝန်ဆောင်မှုကို ရွေးရတော့တယ်။ ငယ်ငယ်ရွယ်ရွယ်နဲ့ မိသားစုဝန်ကို ထမ်းနေရတဲ့ အအိုအိဟာ အဲဒီဆုံးဖြတ်ချက်ရဲ့ အကျိုးဆက်တွေကိုပါ ဆက်ရင်ဆိုင်ရမှာပါ။

သိကျွမ်းခွင့်ရတာ တစ်ပတ်လောက်ပဲ ရှိသေးတဲ့ လူတစ်ယောက်နဲ့ လက်ထပ်ဖို့ ဖြစ်လာရင် ဘယ်လိုနေမလဲ။ Sulaikha Manzil က အချိန်သိပ်မယူဘဲ အလောတကြီး စီစဉ်လိုက်တဲ့ မင်္ဂလာပွဲတစ်ခုအကြောင်းပါ။ မင်္ဂလာပွဲအတွက် ပြင်ဆင်ရတာတွေ ရှိသလို သတို့သားနဲ့ သတို့သမီးအတွက်လည်း တစ်ယောက်ကိုတစ်ယောက် သိကျွမ်းနားလည်ဖို့ လိုနေသေးတယ်။ မိသားစုတွေရဲ့ ကူညီမှုက တကယ်အဆင်ပြေစေမလား၊ ဖိအားပိုဖြစ်စေမလားဆိုတာလည်း ရှိသေးတယ်။ သူငယ်ချင်းတွေကရော ကူညီကြမလား၊ ဝိုင်းစနောက်ကြဦးမလားဆိုတာ ကြည့်ရမှာပါ။ မင်္ဂလာပွဲနီးလာတာနဲ့အမျှ ဒီနှစ်ယောက် အဆင်သင့်ဖြစ်လာကြမလား၊ အချစ်စိတ်ပါ ပေါက်ဖွားလာမလားဆိုတာကို မင်္ဂလာပွဲပြင်ဆင်မှုတွေကြားမှာ လိုက်ကြည့်ရမှာပါ။

အာလာဒင်ဆိုတဲ့ သူခိုးတစ်ယောက်ဟာ သာမန်မြို့သူအယောင်ဆောင်ပြီး မြို့ထဲထွက်လာတဲ့ မင်းသမီးလေးနဲ့ တွေ့ဆုံရင်း ချစ်မိသွားကြပါတယ်။ တစ်ယောက်က သူခိုး၊ တစ်ယောက်က မင်းသမီးဆိုတော့ နှစ်ယောက်သား နီးစပ်ဖို့က မလွယ်ဘူး။ အဲဒီအချိန် ဂျဖာက အာလာဒင်ကို ဖမ်းပြီး မီးခွက်တစ်လုံး ခိုးခိုင်းရာကနေ သူ့ဘဝမှာ မထင်ထားတဲ့ အပြောင်းအလဲတစ်ခု ဖြစ်လာပါတယ်။ မီးခွက်ထဲက မီးခွက်စောင့်ကြီးနဲ့ တွေ့ဆုံလိုက်ရတာပါ။ Disney က ၂၀၁၉ မှာ လူသရုပ်ဆောင်တွေနဲ့ ပြန်ရိုက်ထားတဲ့ Aladdin ဖြစ်ပြီး မီးခွက်စောင့်ကြီးအဖြစ် Will Smith ပါဝင်ထားပါတယ်။ ကာတွန်းထဲက ရင်းနှီးပြီးသား ဇာတ်လမ်းကို နောက်ခံတီးလုံးတွေနဲ့အတူ ပုံစံသစ်နဲ့ ပြန်တင်ဆက်ထားတာပါ။