သည်းထိတ်ရင်ဖိုကားများ

ခရစ်စ်ပိုင်း သရုပ်ဆောင်ထားတဲ့ စစ်သားဟာ အထူးတပ်ဖွဲ့မှာ ထူးချွန်သူတစ်ယောက် ဖြစ်ခဲ့ပေမယ့် ဒူးဒဏ်ရာအတွက် ဆေးတွေသုံးခဲ့တာကြောင့် တပ်ကနေ အနားယူလိုက်ရပါတယ်။ တပ်ကထွက်ပြီးနောက် အလုပ်မရှိဘဲ အကြွေးတွေနဲ့ ပိနေတဲ့အတွက် ကြေးစားစစ်သားအလုပ်နဲ့ လုံခြုံရေးအလုပ်တွေ လိုက်လျှောက်ရင်း ငွေအများကြီးရမယ့် ကန်ထရိုက်တစ်ခုကို တွေ့သွားတယ်။ တာဝန်က နိုင်ငံတော်လုံခြုံရေးကို ကာကွယ်ဖို့ ဘာလင်က သိပ္ပံပညာရှင်တစ်ယောက် တီထွင်နေတဲ့ ဇီဝလက်နက်ကို သွားဖျက်ဆီးရမှာပါ။ တရားဝင်စာရင်းထဲမပါတဲ့ လျှို့ဝှက်စစ်ဆင်ရေးတစ်ခုလည်း ဖြစ်တယ်။ လွယ်မယ်ထင်ထားတဲ့ အဲဒီတာဝန်ကို အဖွဲ့နဲ့အတူ သွားလုပ်ကြတဲ့အခါ မထင်မှတ်ထားတဲ့ အခြေအနေတွေ ပေါ်လာပြီး စစ်ဆင်ရေးက ထင်သလောက် မလွယ်တော့ပါဘူး။

ဘီလီဟာ အသက်မွေးဝမ်းကျောင်းတက္ကသိုလ် ကျောင်းသားဟောင်းတစ်ယောက်ဖြစ်ပြီး အခုတော့ ဆယ်ကျော်သက်သမီးနဲ့ သားအဖနှစ်ယောက်တည်း နေနေရပါတယ်။ သားအဖဆက်ဆံရေးက သိပ်အဆင်မပြေပေမယ့် ကျောင်းသားလူဆိုးဂိုဏ်းတစ်ခုကြောင့် သမီးဖြစ်သူ ဒဏ်ရာရသွားတဲ့အခါ ဘီလီ့အတွက် သူနဲ့ သူ့သူငယ်ချင်းတွေရဲ့ အတိတ်ကို ပြန်သတိရစရာ ဖြစ်လာတယ်။ ၁၉၉၀ ဝန်းကျင်တုန်းက အသက်မွေးဝမ်းကျောင်းတက္ကသိုလ်တွေကို မျှော်လင့်ချက်နဲ့ အနာဂတ်မရှိတဲ့နေရာတွေလို့ သတ်မှတ်ကြတယ်။ အဲဒီအချိန်က ဘီလီဟာ အမေ နောက်အိမ်ထောင်ပြုထားပြီး ပထွေးရဲ့မုန်းတီးမှုကို ခံနေရသူပါ။ သူ့အတွက် စိတ်ထွက်ပေါက်ဆိုလို့ ရင်းနှီးတဲ့သူငယ်ချင်းတွေပဲ ရှိခဲ့တာကြောင့် ကျောင်းနေဖက်ရဲဘော်ရဲဘက်တွေကို ကာကွယ်ဖို့ ဘာမဆိုလုပ်ခဲ့တယ်။ အဲဒီလိုနဲ့ ပြဿနာမျိုးစုံထဲ ရောက်သွားခဲ့တဲ့ ကျောင်းသားဘဝအကြောင်းကို ဘီလီ့အမှတ်တရတွေကနေ ပြန်ပြောပြထားပါတယ်။ အသက်မွေးဝမ်းကျောင်းတက္ကသိုလ်လေးခုကြားက ပဋိပက္ခဖြစ်ရပ်မှန်တွေကို အခြေခံထားတဲ့ အက်ရှင်၊ မှုခင်းဒရာမာကားပါ။

ဆွန်းဟျွန်းဟာ စမတ်ဖုန်းပြုပြင်ရေး ဝန်ဆောင်မှုပေးတဲ့ ကုမ္ပဏီလေးတစ်ခု တည်ထောင်ထားပါတယ်။ တစ်နေ့မှာ အမျိုးသမီးတစ်ယောက် ဖုန်းပြင်ဖို့ ရောက်လာရာကနေ သူ့အတွက် ပြဿနာတွေ စလာတယ်။ ဖုန်းကို ပြုပြင်ပေးရင်း ဖျက်ထားတဲ့ ဓာတ်ပုံတွေနဲ့ အခြားဒေတာတွေကိုပါ သူ ပြန်ဖော်ပေးလိုက်မိတာပါ။ ပြန်ရလာတဲ့ ဒေတာတွေကို A Cut နဲ့ B Cut ဆိုပြီး ခွဲထားပါတယ်။ A Cut က လူတိုင်းကြည့်လို့ရတဲ့ အကြောင်းအရာတွေဖြစ်ပေမယ့် B Cut ကတော့ ကာယကံရှင်ပဲ သိသင့်တဲ့ လျှို့ဝှက်အချက်အလက်တွေပါ။ အဲဒီ B Cut ဒေတာတွေကနေ တောင်ကိုရီးယားက နာမည်ကျော်တစ်ယောက်ရဲ့ လူမှုရေးဖောက်ပြန်မှုတွေ ပေါ်လာပါတယ်။ ဆွန်းဟျွန်း ဖော်ထုတ်မိတဲ့သူတွေမှာ ဘယ်လိုနောက်ခံအင်အားတွေ ရှိနေကြသလဲ၊ ဒီအချက်အလက်တွေကြောင့် သူ့ဆီ ဘယ်လိုအန္တရာယ်တွေ ရောက်လာမလဲဆိုတာက မေးခွန်းဖြစ်လာတယ်။ ဖုံးကွယ်ချင်သူတွေနဲ့ ဖော်ထုတ်ချင်သူတွေကြားက အားပြိုင်မှုဟာ ဘယ်အထိ ရောက်သွားမလဲ။

ကပ်ရောဂါကြောင့် လူတွေ အိမ်ကနေပဲ Zoom နဲ့ ဆက်သွယ်ကြရတဲ့ ပုံစံကို အသုံးပြုပြီး Zero Contact ရဲ့ ဇာတ်လမ်းကို ပြထားပါတယ်။ လူအများက ရူးကြောင်ကြောင်လို့ သတ်မှတ်ထားတဲ့ ပါရမီရှင် ဖင်န်နလေဟာ့ဒ်ဟာ ပရောဂျက်တစ်ခု စလုပ်ခါနီးမှာပဲ အလုပ်ထုတ်ခံလိုက်ရတယ်။ သူ မသေဆုံးခင်မှာ မပြီးပြတ်သေးတဲ့ ပရောဂျက်ကို ပြန်အသက်သွင်းဖို့ အယုံကြည်ရဆုံး လူငါးယောက်ကို အကြံပေးကတစ်ဆင့် စုစည်းခိုင်းပြီး မှာခဲ့ပါတယ်။ ကမ္ဘာကြီးကို ကယ်တင်ဖို့ ရည်ရွယ်ထားတဲ့ လျှို့ဝှက်ပရောဂျက်ဖြစ်တာကြောင့် အရေးပေါ်စုဖွဲ့ထားတဲ့ အဖွဲ့က ဆက်လုပ်ဖို့ ဖြစ်လာတယ်။ ဒါပေမယ့် သူတို့ကို တစ်ယောက်ယောက်က စောင့်ကြည့်နေတယ်ဆိုတာတော့ သတိမထားမိကြဘူး။ မသိလိုက်ခင်မှာပဲ အိမ်ထဲအထိ ဝင်ရောက်လာပြီး အဖွဲ့ဝင်တွေရဲ့ မိသားစုတွေကိုပါ ရန်ရှာလာပါတယ်။ ဖင်န်နလေ ချန်ထားခဲ့တဲ့ လျှို့ဝှက်ချက်တွေနဲ့ ပုစ္ဆာကို ဒီငါးယောက် အဖြေရှာနိုင်ကြမလား၊ အသက်ရှင်လျက်နဲ့ ပရောဂျက်ကို အဆုံးအထိ ဆက်လုပ်နိုင်ကြမလားဆိုတာကို ဆက်ကြည့်ရမှာပါ။

ဂျီအွန်းဟာ ငယ်ငယ်က ယာဉ်မတော်တဆမှုတစ်ခုမှာ မိဘတွေကို ဆုံးရှုံးခဲ့ရပြီး အဲဒီနောက် စကားမပြောနိုင်တော့တဲ့ မိန်းကလေးတစ်ယောက်ပါ။ ဒီအခက်အခဲကို ရင်ဆိုင်ကျော်လွှားပြီး ဂရပ်ဖစ်ဒီဇိုင်နာတစ်ယောက် ဖြစ်လာဖို့တော့ သူ အိပ်မက်မက်ထားပါတယ်။ တစ်နေ့ အိမ်အပြန်လမ်းမှာ လူစိမ်းသုံးယောက်ရဲ့ ပြန်ပေးဆွဲမှုနဲ့ အဓမ္မပြုကျင့်မှုကို ခံလိုက်ရတယ်။ အကူအညီရဖို့ ရဲစခန်းကို သွားတဲ့အခါမှာလည်း ရဲတွေက ကူညီပေးမယ့်အစား သူ့ကိုပဲ နှိမ့်ချဆက်ဆံကြပါတယ်။ အဲဒီနောက် ဂျီအွန်းဟာ ဘယ်သူ့ကိုမှ မယုံကြည်တော့ဘဲ ကိုယ့်ကိုယ်ကိုယ်ပဲ အားကိုးပြီး တိတ်တဆိတ် လက်စားချေဖို့ ကြိုးစားလာတယ်။ ရွေးချယ်စရာတွေ တဖြည်းဖြည်း ပျောက်ဆုံးပြီး ချောင်ပိတ်လာတဲ့သူတစ်ယောက် ဘယ်လိုတုံ့ပြန်မလဲဆိုတာကို ဒီမှုခင်းဒရာမာမှာ ဆက်ပြထားပါတယ်။

Jaron ရဲ့ပြောပြချက်မှာ သူ့ကို သက်သေထွက်ဆိုခိုင်းစဉ် ရှေ့နေက အရုပ်တစ်ရုပ်ပေးပြီး ဘယ်နေရာကို ထိကိုင်ခံခဲ့ရသလဲဆိုတာ ညွှန်ပြခိုင်းခဲ့ပါတယ်။ အရုပ်ရဲ့ ကိုယ်ရေးကိုယ်တာအစိတ်အပိုင်းနေရာက ဟောင်းနွမ်းစုတ်ပြတ်နေတာကို မြင်တော့ ဒီလိုညွှန်ပြခဲ့ရတဲ့ ကလေးဘယ်နှယောက် ရှိနေပြီလဲလို့ သူတွေးမိတယ်။ နောက်ဆုံးမှာတော့ သူကြုံခဲ့ရတာကို ဘယ်သူ့ကိုမှ မပြောဖြစ်တော့ပါဘူး။ On the Doll ဟာ လိင်လုပ်ငန်းနယ်ပယ်ထဲမှာ ကျင်လည်နေသူတွေရဲ့ ဘဝတွေကို ပုံဖော်ထားပါတယ်။ ငယ်စဉ်က လိင်ပိုင်းဆိုင်ရာအကြမ်းဖက်မှု ခံခဲ့ရတဲ့ ကလေးတွေအတွက် လုံလောက်တဲ့ ကာကွယ်မှုနဲ့ ရပ်တည်ပေးမှု မရှိတဲ့အခါ ဘာတွေဖြစ်လာနိုင်သလဲဆိုတာကို မေးခွန်းထုတ်ထားသလို လူအချင်းချင်း အနိုင်ကျင့်အသုံးချပြီး ငွေရှာနေသူတွေရဲ့ လုပ်ရပ်တွေကိုလည်း ဖော်ပြထားတယ်။ Brittany Snow၊ Josh Janowicz၊ Clayne Crawford နဲ့ Shanna Collins တို့ အဓိကပါဝင်သရုပ်ဆောင်ထားပြီး ကြမ်းတမ်းတဲ့ အသုံးအနှုန်းတွေလည်း ပါဝင်ပါတယ်။

ချမ်းသာတဲ့ သူငယ်ချင်းတစ်စုဟာ လူသူနဲ့ဝေးတဲ့ စံအိမ်ကြီးတစ်ခုမှာ ပါတီလုပ်ကြပါတယ်။ တစ်ယောက်နဲ့တစ်ယောက်ကြားမှာ နောက်ကြောင်းကိုယ်စီ ရှိနေကြတဲ့ သူတို့ဟာ ပျော်ပါးရင်း ဆော့နေကျ Bodies Bodies Bodies ဆိုတဲ့ဂိမ်းကို စကစားကြတယ်။ ဂိမ်းထဲမှာ မဲပေါက်တဲ့သူက လူသတ်သမားလုပ်ရပါတယ်။ မီးခဏပိတ်ထားချိန် တစ်ယောက်ယောက်ရဲ့ကျောကို ထိလိုက်ရင် အဲဒီလူက သေချင်ယောင်ဆောင်ပေးရပြီး အလောင်းကို စတွေ့သူက အော်အသိပေးရတယ်။ အဲဒီအခါမှ အားလုံးပြန်စုကြပြီး မေးခွန်းတွေမေးရင်း လူသတ်သမား ဘယ်သူလဲဆိုတာ အဖြေရှာကြရတာပါ။ ဒါပေမယ့် မုန်တိုင်းဝင်လာပြီး မိုးသည်းထန်ရာက မီးတကယ်ပျက်သွားပါတယ်။ သိပ်မကြာခင်မှာပဲ သူတို့တွေ့လိုက်ရတာက သေချင်ယောင်ဆောင်နေသူ မဟုတ်တော့ဘဲ အလောင်းအစစ်တစ်လောင်း ဖြစ်နေတယ်။ တရားခံကို လိုက်ရှာနေကြရင်း နောက်ထပ်တစ်ယောက်ပြီးတစ်ယောက် သေဆုံးလာတဲ့အခါ ကစားပွဲကနေ စခဲ့တဲ့ညဟာ ဟာသနဲ့ ထိတ်လန့်စရာတွေ ရောနေတဲ့ အခြေအနေတစ်ခု ဖြစ်လာပါတော့တယ်။

တိုရိုတိုမိနဲ့ တိုခုဂဝတို့ခေတ်မှာ စစ်ကို ဘယ်သူနိုင်နိုင် သတ်ဖြတ်မှုတွေ ဆက်ရှိနေဦးမယ်လို့ ယူဆတဲ့ လုပ်ကြံရေးအဖွဲ့တစ်ဖွဲ့ ပေါ်လာပါတယ်။ သူတို့ရဲ့ရည်ရွယ်ချက်က စစ်ပွဲတွေ မရှည်ကြာစေဖို့ တိုရိုတိုမိရဲ့ မဟာမိတ်စစ်နယ်ရှင် သုံးယောက်ကို လုပ်ကြံဖို့ပါ။ အုပ်ချုပ်ရေးအဖွဲ့ကို ဆန့်ကျင်တဲ့ ခေါင်းဆောင်တစ်ယောက်က ကလေးတချို့ကို နှစ်ပေါင်းများစွာ ဓားသိုင်းသင်ပေးပြီး ဒီတာဝန်အတွက် ပျိုးထောင်ထားခဲ့တယ်။ ကလေးတွေ အရွယ်ရောက်ပြီး ပညာစုံလာတဲ့အခါ ကိုယ်ရောစိတ်ပါ မာကျောဖို့၊ ပေးအပ်တဲ့တာဝန်ကို မပျက်မကွက် လိုက်နာဖို့ ရက်စက်တဲ့ နောက်ဆုံးသင်ခန်းစာတစ်ခုကို ရင်ဆိုင်ကြရပါတယ်။ အချင်းချင်း ပြန်သတ်ခိုင်းပြီး အသက်ရှင်ကျန်သူတွေကိုပဲ ရွေးချယ်တဲ့ လေ့ကျင့်မှုပါ။ အဲဒီထဲက လွတ်မြောက်လာသူတစ်ယောက်ကတော့ အာဇုမိဆိုတဲ့ နင်ဂျာမလေး ဖြစ်ပါတယ်။ အာဇုမိဟာ အပြင်ပန်းမှာ နူးညံ့ပျော့ပျောင်းပုံပေါက်ပေမယ့် စိတ်ဓာတ်ခိုင်မာပြီး လူသတ်ရတဲ့အခါ လက်မတွန့်သူပါ။ လေ့ကျင့်ရေးပြီးဆုံးတဲ့နောက် သူတို့ဟာ စစ်ကိုတားဖို့ စစ်နယ်ရှင်တွေကို လိုက်လံလုပ်ကြံကြရပါတယ်။ မန်ဂါကို အခြေခံထားတဲ့ ဒီဂျပန်သမိုင်းနောက်ခံ ဆာမူရိုင်းကားမှာ ဓားခုတ်ခန်းနဲ့ တိုက်ခိုက်ခန်းတွေ အများအပြား ပါဝင်ပြီး ဒုတိယကားကလည်း ပထမကားရဲ့အဖြစ်အပျက်တွေကို တစ်ဆက်တည်း ဆက်ထားပါတယ်။

စထရေးဟာ လမ်းဘေးတိုက်ခိုက်ရေးပြိုင်ပွဲတွေမှာ နာမည်ရနေတဲ့ ဖိုက်တာတစ်ယောက်ပါ။ မိုင်ယာမီကို အုပ်စိုးထားတဲ့ မြေအောက်အဖွဲ့ရဲ့ခေါင်းဆောင် အက်စတယ်က သူ့လိုလူမျိုးကို ရှာနေရာက ပြိုင်ပွဲတစ်ခုမှာ တွေ့သွားပြီး အလုပ်ခန့်လိုက်ပါတယ်။ စထရေးကို သင်ကြားပေးရမယ့်သူက အက်စတယ်ရဲ့လူယုံ ကူဒါဖြစ်တယ်။ ကူဒါက ထောင်ကနေ ပြန်လွတ်လာသူဖြစ်ပြီး မကြာခင် ဆယ့်ခြောက်နှစ်ပြည့်တော့မယ့် လိုလာဆိုတဲ့ သမီးတစ်ယောက် ရှိပါတယ်။ လိုလာကတော့ အဖေထောင်ကျနေခဲ့လို့ သူ့အပေါ် တာဝန်မကျေခဲ့တာတွေကို စိတ်ခုနေတယ်။ တစ်နေ့ မြို့ထဲသွားရင်း ကူဒါဟာ အလစ်သုတ်တာကို ဆိုင်ရှင်မိသွားလို့ ပြဿနာတက်နေတဲ့ ကောင်မလေးတစ်ယောက်ကို ဝင်ကူပေးခဲ့ပါတယ်။ အဲဒီကနေ ခင်မင်သွားပြီး ခိုကိုးရာမဲ့နေတဲ့ ကောင်မလေးအတွက် စားစရာနဲ့ နေစရာပါ စီစဉ်ပေးရင်း သမီးတစ်ယောက်လို သံယောဇဉ်တွယ်လာတယ်။ ဒါပေမယ့် တစ်နေ့မှာ ကောင်မလေး ပျောက်သွားပါတော့တယ်။ ကူဒါနဲ့ စထရေးတို့ လိုက်ရှာကြရင်း မထင်မှတ်ဘဲ တွေ့လာတဲ့ သဲလွန်စတစ်ခုကနေ ကောင်မလေးရှိတဲ့နေရာကို သိသွားကြတယ်။ သူ့ကို ဘယ်သူတွေ ဖမ်းထားတာလဲ၊ ကူဒါနဲ့ စထရေးတို့ ဘယ်လိုကယ်တင်ကြမလဲဆိုတာအပြင် ကူဒါအနေနဲ့ သမီးအရင်း လိုလာအတွက် ဘာတွေလုပ်ပေးနိုင်ဦးမလဲဆိုတာကိုလည်း ဆက်ပြထားတဲ့ အက်ရှင်မှုခင်းဒရာမာပါ။

မာတင်ဟာ စားနပ်ရိက္ခာအစီအစဉ်တစ်ခု စတင်ဖို့အတွက် ဂါဗင်ဆိုတဲ့ ဧည့်လမ်းညွှန်ရဲ့အကူအညီနဲ့ ရစ်တောင်တန်းဆီ သွားမလို့ပါ။ ဒါပေမယ့် ကားပေါ်တက်ရုံပဲ ရှိသေးချိန်မှာ နှစ်ယောက်လုံး ဖမ်းခေါ်သွားခံလိုက်ရပါတယ်။ ဘယ်သူတွေက ဘာကြောင့် ဖမ်းသွားတာလဲဆိုတာ မသိရသေးဘဲ ဇာတ်လမ်းက အဲဒီနေရာက စထားတာပါ။ ဖမ်းဆီးခံထားရစဉ်မှာ မာတင်ဟာ သူ့ရည်းစားအကြောင်း ထပ်ခါထပ်ခါ မေးမြန်းခံရပြီး လက်ချောင်းတွေကိုလည်း တစ်ချောင်းပြီးတစ်ချောင်း ဖြတ်တောက်ခံရပါတယ်။ ဖမ်းထားသူတွေက ဖြတ်ထားတဲ့ လက်ချောင်းတွေကို ရေခဲနဲ့ သိမ်းထားပြီး သူတို့လိုချင်တဲ့အဖြေရရင် ပြန်ဆက်ပေးမယ်လို့ ဆိုကြတယ်။ အဲဒီဖမ်းဆီးခံရတဲ့ ကာလအတွင်း အရှေ့နဲ့အနောက်ကြားက အယူဝါဒတွေ၊ နိုင်ထက်စီးနင်းပြုမှုတွေနဲ့ မတူညီတဲ့ နိုင်ငံရေးအမြင်တွေကို ဆွေးနွေးပြောဆိုထားတဲ့ ဒရာမာ၊ သည်းထိတ်ရင်ဖိုဇာတ်ကားပါ။

၂၀၅၄ ခုနှစ်မှာ အမေရိကန်ဖယ်ဒရယ်အစိုးရဟာ Precrime လို့ခေါ်တဲ့ မှုခင်းကြိုတင်တားဆီးရေးအဖွဲ့ကို နိုင်ငံတော်အဆင့် ဖွဲ့စည်းဖို့ ကြိုးစားနေပါတယ်။ ဒီအဖွဲ့က လူသတ်မှုတွေ မဖြစ်ခင် ကြိုတင်တားဆီးပေးတဲ့ အထူးရဲတပ်ဖွဲ့ပါ။ မျိုးဗီဇမွမ်းမံထားတဲ့ လူသားတွေဖြစ်တဲ့ precogs တွေက မှုခင်းဖြစ်မယ့် နေရာ၊ အချိန်နဲ့ ပါဝင်မယ့်လူတွေကို အတိအကျ ဟောကိန်းထုတ်ပေးတယ်။ အဲဒီအချက်အလက်တွေအတိုင်း precops လို့ခေါ်တဲ့ အထူးရဲတွေက အချိန်မီ သွားရောက်ဝန်းရံပြီး တားဆီးကြတာပါ။ အထူးရဲအဖွဲ့မှူး ဂျွန်အန်ဒါတန်ဟာ အိမ်ထောင်ကွဲထားပြီး မကြာသေးခင်က သားဖြစ်သူ ပျောက်ဆုံးသွားခဲ့သူပါ။ တာဝန်နဲ့ စစ်ဆင်ရေးတွေမှာ ကျေပွန်ပေမယ့် သားပျောက်သွားတဲ့ စိတ်ဒဏ်ရာကို ကုစားရင်း ဆေးစွဲနေပါတယ်။ သူ့နေရာမှာ တွမ်ခရုစ်က သရုပ်ဆောင်ထားတယ်။ Precrime ဟာ ကိုလံဘီယာခရိုင်မှာ စမ်းသပ်လည်ပတ်နေဆဲဖြစ်လို့ နိုင်ငံတော်အဆင့် တရားဝင်ဖွဲ့စည်းနိုင်ရေးအတွက် ဖယ်ဒရယ်အရာရှိတွေရဲ့ စစ်ဆေးမှုကို ခံနေရပါတယ်။ အထူးတာဝန်နဲ့ ရောက်လာတဲ့ ဖယ်ဒရယ်အေးဂျင့် ဒန်နီဝစ်တ်ဝါကလည်း မာန်တကြွကြွရှိသူမို့ အန်ဒါတန်တို့နဲ့ ထိပ်တိုက်တွေ့လာတယ်။ တစ်နေ့မှာ လူသတ်မှုတစ်ခုကို တားဆီးဖို့ precogs တွေ ခန့်မှန်းပေးလိုက်တဲ့ လူသတ်သမားအမည်ပါ ဘောလုံးအနီကို အန်ဒါတန် ကြည့်လိုက်မိပါတယ်။ အဲဒီအပေါ်မှာ ရေးထားတာက သူ့နာမည်ဖြစ်နေတာပါ။ Precrime ရဲ့ဟာကွက်ကို စောင့်ကြည့်နေပြီး သူ့ကိုလည်း မကြည်တဲ့ ဝစ်တ်ဝါက ထောင်ချောက်ဆင်တာလို့ အန်ဒါတန်

ဟက်ဟာ ဘားတစ်ခုမှာ မီနာဆိုတဲ့ အမျိုးသမီးငယ်နဲ့ တွေ့ပြီး သူ့ကို အိမ်ပြန်ပို့ပေးခဲ့ပါတယ်။ မီနာနေတဲ့အိမ်က သာမန်အိမ်မျိုးမဟုတ်ဘဲ ရဲတိုက်ကြီးတစ်ခု ဖြစ်နေတယ်။ ရဲတိုက်ကို ရောက်သွားတဲ့အခါ ဟက်က မီနာနဲ့ နီးစပ်ခွင့်ရဖို့ နည်းအမျိုးမျိုးနဲ့ ကြိုးစားပါတော့တယ်။ သူ့အကြံ အောင်မြင်ပါ့မလား၊ မီနာကရော သူ့ကို ဘယ်လိုခေါင်းစားအောင် လုပ်မလဲဆိုတာနဲ့အတူ ရဲတိုက်ကြီးမှာ ဘာလျှို့ဝှက်ချက်ရှိနေလဲဆိုတဲ့ မေးခွန်းကလည်း ရှိနေပါတယ်။ အဓိကသရုပ်ဆောင်နှစ်ယောက်နဲ့ အရန်မင်းသမီးနှစ်ယောက်သာ ပါဝင်တဲ့ ဒီဇာတ်ကားမှာ ထိတ်လန့်မှု၊ လျှို့ဝှက်ဆန်းကြယ်မှုနဲ့ ဟာသတို့ကို ရောစပ်ထားပါတယ်။

ဘဲလေးအကသင်တန်းဆရာမ ရှာလိုတေးဟာ ငယ်ငယ်ကတည်းက မိတကွဲဖတကွဲ ကြီးပြင်းလာခဲ့ရသူပါ။ အရက်သမားဖြစ်တဲ့အဖေက ဆေးရုံတက်နေရပြီး အမေကလည်း စာပေပိုင်းမှာပဲ စိတ်ဝင်စားနေတယ်။ ရှာလိုတေးက သူငယ်ချင်း မာတေးနဲ့အတူ နေလေ့ရှိပြီး မာတေးရဲ့အစ်ကိုနဲ့လည်း ချစ်သူတွေဖြစ်နေပါတယ်။ ရှာလိုတေးမှာလည်း အစ်ကိုတစ်ယောက်ရှိပေမဲ့ မိဘတွေကွဲသွားကတည်းက မောင်နှမနှစ်ယောက် မတွေ့ဖြစ်ကြတာ ကြာနေပြီ။ အစ်ကိုက သူတို့ကို အရမ်းမုန်းနေပေမဲ့ ရှာလိုတေးကတော့ သူ့အိမ်ကို မကြာခဏ သွားချောင်းကြည့်နေတတ်တယ်။ နောက်ပိုင်း အစ်ကို့ဇနီးရဲ့ နားချမှုကြောင့် မောင်နှမနှစ်ယောက် အတူသွားလာစားသောက်ဖြစ်လာကြပါတယ်။ အဲဒီလို ပြန်ရင်းနှီးလာရင်း သူတို့ကြားက ဆက်ဆံရေးဟာ မောင်နှမသံယောဇဉ်ထက် ကျော်လွန်သွားတဲ့အခါမှာတော့ အခြေအနေက ရှုပ်ထွေးလာတယ်။

ပိုကောင်းတဲ့ဘဝတစ်ခု ရချင်တဲ့ ရုရှားအမျိုးသမီးတစ်ယောက်ဟာ နိုင်ငံခြားပြန်သူငယ်ချင်းရဲ့ အလုပ်ကောင်းကောင်းရမယ်ဆိုတဲ့စကားကို ယုံပြီး လန်ဒန်ကို လိုက်လာခဲ့ပါတယ်။ ဒါပေမဲ့ တစ်နေ့မှာတော့ လန်ဒန်က ဆေးရုံတစ်ရုံမှာ ကလေးမွေးရင်း အသက်ဆုံးရှုံးသွားခဲ့တယ်။ သူ့ကို ကလေးမွေးပေးခဲ့တဲ့ သားဖွားဆရာမက ရုရှားဘာသာနဲ့ ရေးထားတဲ့ ဒိုင်ယာရီတစ်အုပ်ကို မထင်မှတ်ဘဲ တွေ့သွားပါတယ်။ သေဆုံးသူရဲ့မိသားစုကို ဆက်သွယ်ပေးချင်တာကြောင့် ဒိုင်ယာရီကို ဘာသာပြန်ပေးနိုင်မယ့်သူ လိုက်ရှာရာက ဒီသေဆုံးမှုနောက်ကွယ်မှာ လူဆိုးဂိုဏ်းတစ်ဂိုဏ်းနဲ့ ပတ်သက်နေကြောင်း ပေါ်လာတယ်။ အဲဒီဂိုဏ်းက ပြည့်တန်ဆာလုပ်ငန်းနဲ့ လူကုန်ကူးမှုတွေ လုပ်ကိုင်နေပြီး အာဏာပိုင်တွေ အသည်းအသန်လိုက်ဖမ်းနေတဲ့ နာမည်ကြီးဂိုဏ်းတစ်ဂိုဏ်းပါ။ သေဆုံးသွားတဲ့အမျိုးသမီးက ဒီဂိုဏ်းနဲ့ ဘယ်လိုပတ်သက်ခဲ့တာလဲ။ မိသားစုကို ရှာပေးဖို့ ကြိုးစားနေတဲ့ သားဖွားဆရာမကရော ဘယ်လိုအန္တရာယ်တွေ ကြုံလာရမလဲ၊ အဖြစ်မှန်ကို ဖော်ထုတ်နိုင်ပါ့မလား။

တစ်ချိန်က သိပ်ချစ်ခဲ့ကြတဲ့ လင်မယားနှစ်ယောက်ဟာ အချိန်ကြာလာတော့ တစ်ယောက်ကိုတစ်ယောက် ငြီးငွေ့ပြီး အပြစ်မြင်လာကြပါတယ်။ ဇနီးက ခင်ပွန်းကို ပျင်းစရာကောင်းသူလို့ မြင်နေသလို ခင်ပွန်းကလည်း ဇနီးဟာ သူ့ကို အလေးမထားတော့ဘူး၊ မချစ်တော့ဘူးလို့ ခံစားနေရတယ်။ လွတ်လွတ်လပ်လပ်နေတတ်တဲ့ ဇနီးက အိမ်ထောင်မရှိသလို နေထိုင်လာတဲ့အခါ ချစ်နေသေးတဲ့ ခင်ပွန်းမှာ သဝန်တိုစိတ်တွေ ဝင်လာပါတယ်။ ဒီအိမ်ထောင်ရေးက ဇနီးနဲ့ရင်းနှီးတဲ့ မိတ်ဆွေတစ်ယောက် ပျောက်ဆုံးသွားရာက ပိုရှုပ်ထွေးလာတယ်။ ခင်ပွန်းဖြစ်သူက အဲဒီလူကို သူသတ်လိုက်သလိုလို အပေါင်းအသင်းတွေနဲ့ ဇနီးရဲ့မိတ်ဆွေသစ်တွေကြားမှာ ဂုဏ်ယူပြီး လျှောက်ပြောနေတော့ လူတွေက သူ့ကို သံသယဝင်လာကြပါတယ်။ တစ်နေ့ သူတို့အိမ်မှာ ပါတီလုပ်နေချိန် ဇနီးရဲ့မိတ်ဆွေသစ်တစ်ယောက် ရေကူးကန်ထဲမှာ သေဆုံးသွားပြန်တယ်။ Ben Affleck နဲ့ Ana de Armas တို့ အဓိကပါဝင်ထားတဲ့ ဒီသည်းထိတ်ရင်ဖိုဇာတ်ကားမှာ လိင်ပိုင်းဆိုင်ရာနဲ့ ကြမ်းတမ်းတဲ့ ဇာတ်ကွက်တွေ ပါဝင်ပါတယ်။

Iran-Contra အရေးအခင်းကာလကို အခြေခံထားတဲ့ ဒီဇာတ်လမ်းမှာ Mel Gibson က အမေရိကန်ကာကွယ်ရေးဌာနရဲ့ ကန်ထရိုက်တာတစ်ယောက်အဖြစ် သရုပ်ဆောင်ထားပါတယ်။ ပနားမားအခြေစိုက် အမေရိကန်ခံတပ်ကနေ စီအိုင်အေအကူအညီနဲ့ Contra တွေဘက်ကို လက်နက်ထောက်ပံ့နေကြပေမယ့် ထုတ်ပြန်ချက်တစ်ခုကြောင့် ဆက်ထောက်ပံ့လို့ မရတော့ဘူး။ ဒါကြောင့် တခြားနည်းလမ်း ရှာကြရပါတယ်။ ဒီအစီအစဉ်ရဲ့ ပထမဆုံးတာဝန်က ဆိုဗီယက်ရဟတ်ယာဉ်တစ်စင်း ဝယ်ပြီး တစ်ဖက်ဆီ ပို့ပေးဖို့ပါ။ တာဝန်ယူဖို့ ရွေးချယ်ခံရသူက တပ်ဖွဲ့ဝင်ဟောင်း ဂျိမ်းစ်ဘက်ကာ။ သူက ခေါင်းမာပြီး ထင်ရာစိုင်းတတ်လို့ တာဝန်ပေးသူတွေက စိတ်မချကြပေမယ့် ဒီအလုပ်အတွက် အသင့်တော်ဆုံးလူဖြစ်နေတာကြောင့် ပနားမားကို လွှတ်လိုက်ကြတယ်။ တာဝန်ထမ်းဆောင်နေတုန်း ဘက်ကာဟာ ပနားမားကို အမေရိကန်ကျူးကျော်တဲ့ကိစ္စထဲပါ ဝင်ပါမိသွားပါတယ်။ အဲဒီအခြေအနေမှာ သူဘာတွေဆက်ကြုံရမလဲ၊ ရဟတ်ယာဉ်ပို့ဆောင်ရေးတာဝန်ကရော အောင်မြင်နိုင်မလားဆိုတာကို ဆက်ပြထားတဲ့ အက်ရှင်သည်းထိတ်ရင်ဖိုဇာတ်ကားပါ။

တွန်မ်က မိသားစုကို သိပ်ချစ်တဲ့ အိမ်ထောင်ဦးစီးတစ်ယောက်ပါ။ သားသမီးတွေကို ဂရုစိုက်သလို ဇနီးကိုလည်း ချစ်ခင်ယုယဖို့ မမေ့တတ်ဘူး။ ဒီလိုနေထိုင်လာတဲ့ တွန်မ်ဟာ တစ်နေ့မှာတော့ မထင်မှတ်ဘဲ တစ်နိုင်ငံလုံးက သိတဲ့ သူရဲကောင်းတစ်ယောက် ဖြစ်သွားပါတယ်။ သူ့အတွက်တော့ ဒီကျော်ကြားမှုက စိတ်ချမ်းသာစရာ မဟုတ်ပါဘူး။ အစကတည်းက လူသိများလာတာကို မနှစ်သက်ခဲ့တဲ့အပြင် နောက်ဆက်တွဲပြဿနာတွေကလည်း သူတို့မိသားစုဘဝတစ်ခုလုံးကို ကြီးကြီးမားမား ထိခိုက်လာတယ်။ လျှို့ဝှက်ချက်တွေကြားမှာ တွန်မ်တို့မိသားစု ဒီပြဿနာတွေကို ဘယ်လိုရင်ဆိုင်ကြမလဲ၊ အခြေအနေတွေ ဘယ်လောက်အထိ ကြမ်းတမ်းလာမလဲဆိုတာကို ဆက်ပြထားတဲ့ မှုခင်းသည်းထိတ်ရင်ဖိုဇာတ်လမ်းပါ။

ရိုင်နိုက ငယ်ငယ်ကတည်းက အနိုင်ကျင့်ခံရတာကို မုန်းတီးခဲ့တဲ့ လူငယ်တစ်ယောက်ပါ။ ဒါပေမယ့် အရွယ်ရောက်လာတာနဲ့အမျှ သူကိုယ်တိုင် လူမိုက်လောကထဲကို ရောက်မှန်းမသိ ရောက်သွားတယ်။ အင်အားကြီးသူက အားနည်းသူကို ဖိနှိပ်တဲ့ ဒီလောကမှာ နေရာရဖို့ ရုန်းကန်ရင်း ရိုင်နိုရဲ့စိတ်ကလည်း တဖြည်းဖြည်း ရက်စက်လာပါတယ်။ ဘဝရဲ့ကြမ်းတမ်းမှုတွေကို ခံနိုင်ဖို့ အရေထူအောင် နေလာခဲ့ရတဲ့ ရိုင်နိုရဲ့ရင်ထဲမှာ ဖြူစင်တဲ့စိတ် ကျန်နေသေးရဲ့လား၊ သူရွေးလျှောက်လာတဲ့လမ်းက ကောင်းတဲ့အဆုံးသတ်ဆီ ရောက်မလား၊ ဆိုးတဲ့ဘက်ကိုပဲ ဦးတည်သွားမလားဆိုတဲ့ မေးခွန်းတွေနဲ့ ဇာတ်လမ်းကို ဆက်ထားပါတယ်။ ၂၀၂၁ ခုနှစ်ထွက် ရုရှားစကားပြော ယူကရိန်းမှုခင်းဒရာမာဖြစ်ပြီး ဇာတ်ရှိန်မြန်တဲ့ပုံစံနဲ့ တင်ဆက်ထားတာပါ။

ဒန်က ချစ်သူရပြီးနောက် သူငယ်ချင်းတွေကို အရင်လောက် အချိန်မပေးတော့ဘဲ ချစ်သူကိုပဲ ဦးစားပေးနေပါတယ်။ သူ့ချစ်သူ ပါကားကလည်း ယောက်ျားလေးသူငယ်ချင်းတွေ သီးသန့်အချိန်ဖြုန်းချင်တာကို နားမလည်ဘဲ ဒန်နဲ့အတူ နေရဖို့ နှင်းလျှောစီးခရီးကို လိုက်လာတယ်။ ဂျိုးကတော့ ချစ်သူနှစ်ယောက်ကြား ပိုနေတဲ့လူ ဖြစ်ချင်ဖြစ်ပါစေ၊ ငယ်သူငယ်ချင်းနဲ့ အရင်လို အမှတ်တရတစ်ခု ပြန်ဖန်တီးချင်နေသူပါ။ ဒီလို ရည်ရွယ်ချက်ကိုယ်စီနဲ့ သူတို့သုံးယောက် Mt. Holliston တောင်ပေါ်ကို နှင်းလျှောစီးဖို့ ရောက်လာကြပါတယ်။ သုံးယောက်ကြားက ကတောက်ကဆတွေရှိနေတဲ့ ဒီခရီးမှာ မထင်မှတ်တဲ့ အလှည့်အပြောင်းတွေနဲ့ အန္တရာယ်တွေပါ ကြုံလာရပြီး ရေခဲတောင်ပေါ်မှာ အသက်ရှင်ဖို့ ရုန်းကန်ကြရတော့တယ်။

ရဲတပ်ဖွဲ့ဝင်တစ်ယောက်ကို လူဆိုးဂိုဏ်းသားတစ်ယောက်က သတ်လိုက်တဲ့နောက် ကျန်တဲ့လုပ်ဖော်ကိုင်ဖက်တွေက သူ့အတွက် လက်စားချေဖို့ ထွက်လာကြပါတယ်။ သူတို့လိုက်ရှာနေတဲ့လူ ရှိရာ မြို့ပြင်က စွန့်ပစ်တိုက်တစ်လုံးဆီ ရောက်သွားကြပေမယ့် မကြာခင်မှာပဲ ဇွန်ဘီတွေပါ ရောက်လာတော့တယ်။ လက်စားချေဖို့ လာခဲ့တဲ့ရဲတွေ၊ လူဆိုးဂိုဏ်းနဲ့ ဇွန်ဘီတွေ တစ်နေရာတည်းမှာ ဆုံသွားရာက အန္တရာယ်တွေကြား ရင်ဆိုင်ကြရတဲ့ ဇာတ်လမ်းပါ။ ၂၀၀၉ ခုနှစ်က ထွက်ရှိခဲ့တဲ့ ပြင်သစ် အက်ရှင်၊ ထိတ်လန့်ဇာတ်ကားဖြစ်ပါတယ်။

မိုဟန်ဂန်ဒီအတွက်တော့ ငွေဟာ ဘုရားသခင်လိုပဲ အရေးပါသလို အသက်ရှူဖို့လိုတဲ့ အောက်စီဂျင်လိုလည်း ဖြစ်နေပါတယ်။ ဇနီးချီထရာနဲ့ ယောက္ခမတွေ အသတ်ခံရတဲ့အမှုကြောင့် အဖမ်းခံထားရတဲ့ သူဟာ ပြစ်မှုလေ့လာရေးကျောင်းသူ ပူဂျာနဲ့ တွေ့ဆုံလာတယ်။ ဂန်ဒီပြောပြတဲ့ ဇာတ်ကြောင်းကို နားထောင်ပြီး ပူဂျာက သနားသွားတာကြောင့် အရာရှိကြီးဖြစ်တဲ့ သူ့အဖေရဲ့အကူအညီကို ယူကာ တရားမဝင်တဲ့နည်းနဲ့ ဂန်ဒီကို အာမခံထုတ်ပေးလိုက်ပါတယ်။ ဂန်ဒီ လွတ်သွားပြီးမှ CBI အရာရှိ အာဂျွန်ရဲ့ပြောပြချက်အရ သူဟာ အိန္ဒိယရဲတွေ အလိုရှိဆုံး ရာဇဝင်လူဆိုးဖြစ်နေကြောင်း ပူဂျာ သိလိုက်ရတယ်။ ဉာဏ်ကောင်းလွန်းတဲ့ ဂန်ဒီက ပူဂျာ့ကို ပြောပြသွားတာ ဘယ်သူ့ဇာတ်ကြောင်းလဲ၊ အဲဒီနောက်ကွယ်မှာ ဘာတွေရှိနေလဲ။ တစ်ဖက်မှာလည်း ဂန်ဒီနဲ့ သူ့အပေါင်းအပါတွေက သူတို့လိုချင်တဲ့ ငွေတွေကို ဘယ်လိုရအောင် ယူကြမလဲဆိုတာ ဆက်တွေ့ရမှာပါ။

အမေရိကန် FBI အဖွဲ့ဟာ ရုရှားဗိုလ်ကြီး ခိုစလိုဗာနဲ့အတူ ရုရှားမူးယစ်ဂိုဏ်းတစ်ခုကို ဝင်စီးရာမှာ မာဖီးယားခေါင်းဆောင် တဲရက်ရဲ့ညီကို မတော်တဆ ပစ်သတ်မိသွားပါတယ်။ တဲရက်က အမေရိကန်တွေကို လက်စားချေဖို့ FBI ဒါရိုက်တာ ဘရောင်းကို လုပ်ကြံသတ်ဖြတ်မယ်လို့ ဆုံးဖြတ်လိုက်တယ်။ အဲဒီအလုပ်အတွက် “ဝံပုလွေငယ်” လို့ခေါ်တဲ့ ကြေးစားလူသတ်သမားကို ငှားရမ်းလိုက်ပါတယ်။ ဝံပုလွေငယ်ဟာ လုပ်ကြံသတ်ဖြတ်မှုတွေ အများကြီး ကျူးလွန်ခဲ့ဖူးပေမယ့် သူ့ရုပ်ကို မြင်ဖူးသူတောင် အနည်းငယ်ပဲ ရှိတယ်။ ဒီလို လူသိနည်းပြီး လုပ်ကြံရေးမှာ ကျွမ်းကျင်သူတစ်ယောက် FBI ဒါရိုက်တာကို ပစ်မှတ်ထားလာတဲ့အကြောင်းကို Bruce Willis နဲ့ Richard Gere တို့ ပါဝင်သရုပ်ဆောင်ထားပါတယ်။

ဆတ်ရာဟာ စိတ်ကူးအိပ်မက်တွေ အများကြီးရှိတဲ့ အစားအစာပို့သမား လူငယ်တစ်ယောက်ပါ။ အလုပ်ကြိုးစားသလို မိခင်အပေါ်လည်း သိတတ်တယ်။ သူ့မှာ တစ်ဖက်သတ် သဘောကျနေတဲ့ ကောင်မလေးတစ်ယောက်ရှိပြီး အစားအစာပို့တဲ့အလုပ် ပြီးတိုင်း သူမကို သွားခိုးကြည့်နေကျပါ။ ဒါပေမယ့် တစ်နေ့မှာ သူမကျူးလွန်ခဲ့တဲ့အမှုနဲ့ ချောက်ချခံရပြီး ထောင်ကျသွားပါတယ်။ အဲဒီအပြင် သူအလွန်ချစ်တဲ့ မိခင်ကိုပါ ဆုံးရှုံးလိုက်ရတယ်။ ရိုးရိုးသားသား အလုပ်လုပ်နေတဲ့ ဆတ်ရာဆီ ဒီအဖြစ်ဆိုးတွေ ဘယ်လိုရောက်လာခဲ့တာလဲ၊ သူ့ဘဝကို ပျက်စီးအောင်လုပ်ခဲ့သူတွေကို ဘယ်လို လက်စားပြန်ချေမလဲဆိုတာကနေ ဇာတ်လမ်းဆက်သွားတဲ့ အက်ရှင်သည်းထိတ်ရင်ဖိုကားပါ။

ပိုရပ်စ်ဟာ လက်ထောက်စုံထောက် ဖြစ်ချင်နေတဲ့ လူငယ်တစ်ယောက်ပါ။ မတရားတာကြုံရင် ငြိမ်ခံနေတတ်သူလည်း မဟုတ်ဘူး။ ဖခင်ရှိရာ ရဲဌာနမှာသာမက အပြင်မှာပါ လူချမ်းသာတွေ အာဏာအလွဲသုံးစားလုပ်နေတာကို သူမြင်တွေ့နေရပါတယ်။ လူချမ်းသာတွေဆိုတော့ ကိုယ်တွေ ဘာလုပ်နိုင်မှာလဲဆိုပြီး လက်လျှော့လိုက်ကြတဲ့အခါ ပြစ်မှုကျူးလွန်သူတွေကို ကာကွယ်ပေးနေသူတွေကလည်း ရှိနေတယ်။ ဒီလိုအခြေအနေမှာ အလယ်အလတ်တန်းစား မိသားစုကလာတဲ့ ပိုရပ်စ်က အာဏာအလွဲသုံးစားမှုတွေကို မေးခွန်းထုတ်လာပါတယ်။ အဲဒီနောက် သူဘာတွေ ရင်ဆိုင်ရမလဲဆိုတာကို Vishal ပါဝင်သရုပ်ဆောင်ထားတဲ့ ဒီတမီးလ်ဇာတ်ကားမှာ ဆက်ပြထားပါတယ်။