သည်းထိတ်ရင်ဖိုကားများ

အာရူလ်ဗာမာက စစ်မှုထမ်းအငြိမ်းစားတစ်ယောက်ဖြစ်ပြီး မှုခင်းအကြောင်းတွေ တင်ဆက်တဲ့ YouTuber လည်း ဖြစ်ပါတယ်။ နိုင်ငံအတွင်း ဖြစ်ပျက်သမျှကို သူ့အမြင်တွေနဲ့အတူ YouTube မှာ တင်ဆက်ပညာပေးနေသလို ရဲတွေရဲ့ အမှုစုံစမ်းမှုတွေမှာလည်း မကြာခဏ ဝင်ကူတတ်သူပါ။ တစ်နေ့တော့ သူ့တူမအရင်း ကိုယ့်ကိုယ်ကိုယ် သတ်သေသွားတယ်ဆိုတဲ့ သတင်းကို ကြားလိုက်ရတယ်။ အစမှာ ပေးစားတဲ့သူကို မလိုချင်လို့ ဒီလိုလုပ်သွားတာလို့ ယူဆခဲ့ကြပါတယ်။ ဒါပေမဲ့ တူမရဲ့ဖုန်း သူ့လက်ထဲရောက်လာပြီး WhatsApp ထဲက အကြောင်းအရာတွေကို သိလာတဲ့အခါ သေဆုံးမှုနောက်ကွယ်မှာ ထင်ထားသလောက် မရိုးရှင်းတဲ့ ကိစ္စတွေ ရှိနေပါတယ်။ ဒီမှုခင်းဇာတ်ကားကို Mohan G. Kshatriyan က ကိုယ်တိုင် ဇာတ်ညွှန်းရေး၊ ဒါရိုက်တာလုပ်ပြီး ထုတ်လုပ်ထားပါတယ်။

လွန်ခဲ့တဲ့နှစ်အနည်းငယ်က ရန်ကြွေးတစ်ခုကြောင့် ဗစ်တာဟာ အယ်လ်ဖွန်စေရဲ့ ဂိုဏ်းထဲကို အယောင်ဆောင်ဝင်ထားပါတယ်။ လမ်းတစ်ဖက်ခြမ်းမှာ နေပြီး သူ့ကို စောင့်ကြည့်နေတဲ့ ဘီးထရစ်စ်ဆိုတဲ့ ကောင်မလေးကတော့ သူကျူးလွန်တဲ့ မကောင်းမှုတစ်ခုကို မမျှော်လင့်ဘဲ မြင်သွားခဲ့တယ်။ ဗစ်တာက သူ့စိတ်ထဲ မတင်မကျဖြစ်နေရတဲ့ ကိစ္စတစ်ခုကို ဖြေရှင်းချင်လို့ ဘီးထရစ်စ်ကို ချဉ်းကပ်ပါတယ်။ ဘီးထရစ်စ်ဘက်ကလည်း သူလိုချင်တဲ့ လက်စားချေမှုကို ဗစ်တာက လုပ်ပေးနိုင်မလားဆိုတာ သိချင်နေတယ်။ ဒီလိုနဲ့ နှစ်ယောက်သား ချိန်းတွေ့ကြပြီး တစ်ယောက်ရဲ့ တကယ့်ရည်ရွယ်ချက်ကို တစ်ယောက် သိလာကြပါတယ်။ လက်စားချေချင်နေတဲ့ သူတို့နှစ်ယောက် အချင်းချင်း ကူညီနိုင်ကြမလား၊ ဗစ်တာကရော သူ့မိသားစုအတွက် လက်စားချေနိုင်ပါ့မလား။ ကြမ်းတမ်းတဲ့ ဗစ်တာနဲ့ သိမ်ငယ်နေရတဲ့ ဘီးထရစ်စ်တို့ကြားက သံယောဇဉ်ကလည်း သူတို့ရည်ရွယ်ချက်တွေကို အနှောင့်အယှက်ဖြစ်လာစေနိုင်မလားဆိုတာ ရှိနေပါတယ်။ လျှို့ဝှက်ဖုံးကွယ်ထားမှုတွေ၊ အားပြိုင်မှုတွေနဲ့ ဇာတ်ကွက်အလှည့်အပြောင်းတွေကို အက်ရှင်ခန်းတွေနဲ့ တွဲဖက်ထားတဲ့ ရာဇဝတ်မှုဒရာမာပါ။

ရှရီနဲ့ ဆန်ဂျေးတို့က တစ်ယောက်ကိုတစ်ယောက် ချစ်လို့ လက်ထပ်ထားကြတဲ့ ဇနီးမောင်နှံပါ။ တစ်နေ့မှာတော့ ရှရီ့ကို သူတို့အိမ်ထဲမှာပဲ လည်လှီးသတ်ဖြတ်ခံထားရတာ တွေ့လိုက်ရတယ်။ အပြင်ကနေ ဖောက်ထွင်းဝင်ရောက်ထားတဲ့ လက္ခဏာမရှိတာကြောင့် အတွင်းလူတစ်ယောက်ရဲ့ လက်ချက်ဖြစ်မယ်လို့ ယူဆကြပါတယ်။ အင်စပက်တာဆပ်တရာကလည်း စုံစမ်းစစ်ဆေးမှုစကတည်းက ဆန်ဂျေးကို သံသယဝင်နေတယ်။ တစ်ခုပြီးတစ်ခု တွေ့လာတဲ့ သက်သေတွေကပါ ဆန်ဂျေးဘက်ကို ညွှန်နေတော့ သူ့အတွက် ပိုပြီးအကျပ်ရိုက်လာပါတယ်။ ချစ်ရတဲ့ဇနီး အသတ်ခံရလို့ စိတ်ထိခိုက်နေရတဲ့အပြင် လူသတ်မှုမှာ သူအပြစ်ကင်းကြောင်းလည်း သက်သေမပြနိုင်ဘူး။ ဆန်ဂျေးကပဲ ရှရီ့ကို သတ်ခဲ့တာလား၊ ဒါမှမဟုတ် သူကိုယ်တိုင်လည်း တစ်ယောက်ယောက်ရဲ့ ထောင်ချောက်ထဲ ရောက်နေတာလား။

နေသန်က သူငယ်ချင်းတွေနဲ့ ပျော်လိုက်ပါးလိုက်၊ မိဘတွေဆူတာ ခံလိုက်နဲ့ ဘဝကို အေးအေးဆေးဆေး ဖြတ်သန်းနေတဲ့ အထက်တန်းကျောင်းသားတစ်ယောက်ပါ။ ကျောင်းကပေးတဲ့ ပရောဂျက်အတွက် ဝက်ဘ်ဆိုက်တွေမှာ အချက်အလက်ရှာရင်း ပျောက်ဆုံးသူတွေကို ဖော်ပြထားတဲ့ ဝက်ဘ်ဆိုက်တစ်ခုထဲ ရောက်သွားတယ်။ အဲဒီမှာ သူနဲ့တူတဲ့ ကောင်လေးတစ်ယောက်ရဲ့ ဓာတ်ပုံကို တွေ့လိုက်ရပါတယ်။ ဓာတ်ပုံကို တွေ့ပြီးနောက် နေသန်ရဲ့ဘဝဟာ ရုတ်တရက် ကမောက်ကမ ဖြစ်လာတယ်။ အရင်လို ပျော်ပျော်နေလို့ မရတော့ဘဲ သူ့နောက်ကို လိုက်နေတဲ့ လူသတ်သမားတွေလက်ကနေ ထွက်ပြေးပုန်းရှောင်ရတဲ့အထိ ဖြစ်လာပါတယ်။ နေသန်အဖြစ် Twilight ထဲက Taylor Lautner သရုပ်ဆောင်ထားပြီး မင်းသမီးအဖြစ် Emily in Paris ထဲက Lily Collins ပါဝင်ထားပါတယ်။ အက်ရှင်၊ လျှို့ဝှက်ဆန်းကြယ်နဲ့ သည်းထိတ်ရင်ဖို အမျိုးအစားဖြစ်ပြီး ကြာချိန်က ၁ နာရီ ၄၆ မိနစ်ပါ။

အသက် ၁၂ နှစ်အရွယ် မက်ခ်ဟာ မကြာသေးခင်ကပဲ အမေဆုံးသွားတဲ့ ကလေးတစ်ယောက်ပါ။ အဖေက အလုပ်ကိစ္စနဲ့ ဂျပန်ကို သွားရမှာဖြစ်လို့ သူ့ကို ဦးလေးဝေါလေစ့်နဲ့ အဒေါ်ဆူဇန်တို့အိမ်မှာ ပို့ထားခဲ့တယ်။ အဲဒီမှာ မတွေ့ရတာကြာပြီဖြစ်တဲ့ ဝမ်းကွဲကောလင်းနဲ့ ဟင်နရီတို့နဲ့ အတူနေဖို့ ဖြစ်လာပါတယ်။ ဟင်နရီဟာ အစပိုင်းမှာတော့ အမူအကျင့်ကောင်းတဲ့ ကလေးတစ်ယောက်လိုပါပဲ။ ဒါပေမယ့် မကြာခင်မှာ သူ့ရဲ့ ရက်စက်တဲ့အပြုအမူတွေကို မက်ခ် တွေ့လာရတယ်။ ခွေးနဲ့ကြောင်တွေကို သတ်တာ၊ လမ်းပေါ်က ကားတွေ တိုက်မိအောင် အရုပ်ကြီး ပစ်ချတာမျိုးတွေ လုပ်လာသလို မက်ခ်ကိုပါ သူနဲ့အတူ ပါမိအောင် လှည့်စားတတ်ပါတယ်။ အတူနေရတဲ့ ဝမ်းကွဲရဲ့ ဒီအပြုအမူတွေကြားမှာ မက်ခ် ဘယ်လိုရင်ဆိုင်ရမလဲဆိုတာက ဇာတ်လမ်းရဲ့ အဓိကအခြေအနေပါ။ ၁၉၉၃ ခုနှစ်ထွက် The Good Son မှာ Home Alone ထဲက Macaulay Culkin နဲ့ The Lord of the Rings မှာ ဖရိုဒိုအဖြစ် ပါဝင်တဲ့ Elijah Wood တို့ ငယ်စဉ်က သရုပ်ဆောင်ထားပါတယ်။ ကလေးတွေကို အဓိကထားပေမယ့် ဇာတ်လမ်းကတော့ ထိတ်လန့်သည်းဖိုအမျိုးအစား ဖြစ်ပါတယ်။

ရထားဘူတာတစ်ခုမှာ ထူးဆန်းတဲ့လူနှစ်ယောက်က တစ်စုံတစ်ယောက်ကို လုပ်ကြံသတ်ဖြတ်ခိုင်းဖို့ ကြုံရာလူတစ်ယောက်ကို ရွေးနေကြပါတယ်။ အဲဒီအချိန်မှာ ဇနီးနဲ့ ကွာရှင်းပြတ်စဲလုနီးပါးဖြစ်နေတဲ့ မစ္စတာဝက်ဆန်ဟာ သမီးလေးလက်ကို ဆွဲပြီး ဘူတာထဲ ဝင်လာတယ်။ သူတို့ထဲက တစ်ယောက်က ဝက်ဆန်ကို သူတို့အစီအစဉ်အတွက် သင့်တော်တဲ့သူလို့ သတ်မှတ်လိုက်ပါတယ်။ ဒီလိုနဲ့ ဝက်ဆန်ဟာ သမီးလေးကို အကြောင်းပြု ခြိမ်းခြောက်အကျပ်ကိုင်ခံရပြီး ကယ်လီဖိုးနီးယားပြည်နယ် အုပ်ချုပ်ရေးမှူးကို လုပ်ကြံဖို့ စေခိုင်းခံရတော့တယ်။ သတ်မှတ်ထားတဲ့ အချိန်အတွင်းမှာ လူသုံးယောက်ရဲ့ဘဝ ဘယ်လိုပြောင်းလဲသွားမလဲ၊ သမီးအတွက်ပါ စိုးရိမ်နေရတဲ့ ဝက်ဆန်က မှန်ကန်တဲ့ ဆုံးဖြတ်ချက်တွေ ချနိုင်ပါ့မလားဆိုတာကို အခြေခံထားတဲ့ မှုခင်းနဲ့ အက်ရှင်ပါဝင်သော သည်းထိတ်ရင်ဖိုဇာတ်ကားပါ။

လူငယ်လေးတစ်ယောက်ဟာ အဘိုးကြီးတစ်ဦးနဲ့ ဆုံမိပြီး သူခေါ်တဲ့နောက်ကို လိုက်သွားရာက ထူးဆန်းတာတွေ တစ်ခုပြီးတစ်ခု မြင်လာရပါတယ်။ မမြင်သင့်တဲ့ ဘဝတွေကိုပါ မြင်နေရပြီး အိမ်ပြန်ချင်တဲ့အခါလည်း ပြန်လို့မရဘဲ ပိတ်မိနေတော့တယ်။ ဒီအဘိုးကြီးက ဘယ်က ရောက်လာတာလဲ၊ သူမြင်နေရတာတွေက ဘယ်က စခဲ့တာလဲဆိုတာကိုလည်း မသိရသေးဘူး။ အိမ်ပြန်မရဖြစ်နေရတဲ့ အကြောင်းရင်းအပါအဝင် ပဟေဠိတွေကို ဖော်ထုတ်ပြီး အိမ်ပြန်နိုင်မလားဆိုတဲ့ သည်းထိတ်ရင်ဖို ဒရမ်မာဇာတ်လမ်းပါ။

ဟယ်လန်ဟာ သမီးဖြစ်သူ လော်ရာကို ကောလိပ်မှာ သွားကြိုပြီး မြောက်ပိုင်းက သူတို့ရဲ့ သစ်သားအိမ်လေးဆီ သွားဖို့ စီစဉ်ထားပါတယ်။ ဒါပေမယ့် မြောက်ပိုင်းမှာ နှင်းမုန်တိုင်း ပြင်းထန်နေပြီး ရာသီဥတုနဲ့ လမ်းအခြေအနေတွေက အတော်ဆိုးနေတယ်။ လမ်းမှာတော့ ကားကြုံစီးချင်တဲ့ ကာလီဆိုတဲ့ အမျိုးသမီးနဲ့ တွေ့ပါတယ်။ ပုံမှန်ဆို ကားကြုံတင်ပေးလေ့မရှိတဲ့ ဟယ်လန်က တစ်ယောက်တည်းဖြစ်နေတဲ့ ကာလီကို မိန်းမချင်း ကိုယ်ချင်းစာပြီး ခေါ်တင်လိုက်တယ်။ သူမသိတာက ကာလီဟာ တစ်ယောက်တည်း မဟုတ်ဘူးဆိုတာပါ။ သမီးကို ကြိုပြီး ကာလီနဲ့အတူ ခေါင်ဖျားတဲ့ မြောက်ပိုင်းဆီ ခရီးဆက်တဲ့အချိန်ကနေ ဇာတ်လမ်းစပါတယ်။

ကာရီ ပျောက်ဆုံးသွားပြီးနောက် ဒေ့နဲ့ သူ့ရည်းစားဟောင်း လစ်ဇ်တို့ဟာ ကာရီဆီကနေ ခြိမ်းခြောက်နှောင့်ယှက်တဲ့ မက်ဆေ့ချ်တွေကို ဆက်တိုက် လက်ခံရရှိနေကြပါတယ်။ လူက ပျောက်နေချိန်မှာ ဒီစာတွေက ဘယ်လိုရောက်လာသလဲဆိုတာနဲ့အတူ ကာရီပျောက်ဆုံးမှုကို ရဲတွေ လိုက်လံစုံစမ်းကြတော့တာပါ။ ၂၀၁၂ ကနေ ၂၀၁၇ အတွင်းက လူပျောက်မှုခင်းဖြစ်ရပ်မှန်ကို အခြေခံပြီး ရိုက်ကူးထားတဲ့ သည်းထိတ်ရင်ဖိုဒရမ်မာ ဖြစ်ပါတယ်။

မစ်ရှဲလ်ဟာ အာဖဂန်နစ္စတန်မှာ စစ်မှုထမ်းခဲ့ပြီး အခုတော့ မာစီဆေးရုံမှာ ဆရာဝန်လုပ်ရင်း သားလေးနဲ့အတူ အေးအေးချမ်းချမ်း နေနေသူပါ။ တစ်နေ့ ကွင်းဂိုဏ်းက ရိုင်ယန်ကို FBI က ဖမ်းမိပြီး ဂိုဏ်းသားတွေက ပြန်ကယ်ဖို့ ကြိုးစားကြရာကနေ သေနတ်ဒဏ်ရာရထားတဲ့ လူနာတွေ ဆေးရုံကို ရောက်လာကြပါတယ်။ ရိုင်ယန်ရဲ့အစ်ကို ရှောန်၊ ဖခင် ပက်ဒီနဲ့ ဂိုဏ်းသားတွေက သူ့ကို ကယ်ထုတ်ဖို့ ဆေးရုံကို ရောက်လာပြီး တစ်ရုံလုံးကို ဓားစာခံလုပ်လိုက်ကြတယ်။ မစ်ရှဲလ်ရဲ့သား ဘော်ဘီပါ အဖမ်းခံလိုက်ရတဲ့အခါ သားကို ကယ်ဖို့ စစ်မှုထမ်းဟောင်း ဆရာဝန်မက သေနတ်ပြန်ကိုင်ရပါတော့တယ်။ ဆေးရုံထဲက ဓားစာခံအခြေအနေကို အခြေခံထားတဲ့ အက်ရှင်ကားဖြစ်ပြီး Jon Voight လည်း ပါဝင်ထားပါတယ်။

ဆိုးသွမ်းရက်စက်တဲ့ ဝိညာဉ်တွေကို ရည်ရွယ်ချက်တစ်ခုနဲ့ လိုက်ဖမ်းနေသူတစ်ယောက်ရဲ့အိမ်ကို မိသားစုတစ်စု အမွေဆက်ခံဖို့ ရောက်လာကြပါတယ်။ သူတို့အတွက် အမွေရမယ့်အိမ်က ကြောက်စရာအဖြစ်ဆိုးတွေ ကြုံရမယ့်နေရာ ဖြစ်လာတော့တာပါ။ အိမ်နဲ့ အဲဒီဝိညာဉ်တွေကို အခြေခံထားတဲ့ ၂၀၀၁ ခုနှစ်ထွက် စိတ်ကူးယဉ်သရဲကား ဖြစ်ပါတယ်။

ကိုဗစ်ကာလ လော့ခ်ဒေါင်းကြောင့် လူအများ အိမ်ထဲမှာပဲ နေနေရချိန်မှာ ဆေးဝါးပို့ဆောင်ရေးသမား ရာဂူကတော့ အလုပ်များနေပါတယ်။ လူတွေ သွားလာလို့မရတဲ့အချိန်မှာ သူက ဆေးတွေပို့ဖို့ ထွက်ခွင့်ရနေသူပါ။ အဲဒီအခြေအနေကို မသမာသူတွေ သတိထားမိသွားပြီး အခွင့်ကောင်းယူဖို့ ကြိုးစားလာကြတယ်။ တစ်နေ့ ပါဆယ်တစ်ထုပ်ပို့ပေးဖို့ ဖုန်းဝင်လာတဲ့အခါ ရာဂူအတွက် သာမန်ပို့ဆောင်ရေးအလုပ်တစ်ခု မဟုတ်တော့ပါဘူး။ အဲဒီပါဆယ်ကြောင့် သူ့အသက်ကိုပါ ခြိမ်းခြောက်လာတဲ့အခြေအနေနဲ့ ရင်ဆိုင်ရပါတော့တယ်။

ပေါလ်နဲ့ သူ့မိသားစုဟာ အလုပ်ကိစ္စလုပ်ရင်း အပန်းဖြေဖို့ မက္ကဆီကန်ကမ်းခြေဒေသကို ရောက်လာကြပါတယ်။ အဲဒီဒေသက တံငါသည်တွေရဲ့ ဒဏ္ဍာရီမှာတော့ မက်ဂါလိုဒွန်ငါးမန်းကြီးတွေကို နတ်ဘုရားရဲ့ အမျက်ဒေါသကြောင့် ဆင့်ခေါ်ခံရတဲ့ မိစ္ဆာတွေဆိုပြီး ယုံကြည်ကြတယ်။ ပေါလ်တို့မိသားစုကလည်း ဧရာမငါးမန်းကြီးတစ်ကောင်ရဲ့ အန္တရာယ်နဲ့ တည့်တည့်တိုးရပါတော့တယ်။ ကိုယ့်မိသားစု အသက်ရှင်လွတ်မြောက်ဖို့ ရုန်းကန်ရသလို ငါးမန်းကြီးက ဒေသခံတွေ ပြောသလို နတ်ဘုရားနဲ့ တကယ်ပတ်သက်နေသလားဆိုတဲ့ မေးခွန်းလည်း ရှိနေပါတယ်။ ငါးမန်းအန္တရာယ်ကြားက လွတ်မြောက်ရေးကို ဒေသခံဒဏ္ဍာရီနဲ့ တွဲဖက်ထားတဲ့ သည်းထိတ်ရင်ဖိုဇာတ်ကား ဖြစ်ပါတယ်။

မက်ဒီဆင်က လူသိသိပ်မများသေးတဲ့ ဆိုရှယ်မီဒီယာအင်ဖလူယန်ဆာတစ်ယောက်ပါ။ အလည်အပတ်ခရီးထွက်ရင်း ကြော်ငြာပစ္စည်းတွေအတွက် ဗီဒီယိုတွေရိုက်ဖို့ ထိုင်းနိုင်ငံကို ရောက်လာပါတယ်။ အချစ်ရေးမပြေလည်တာနဲ့ အလုပ်အကိုင်မအောင်မြင်သေးတာကြောင့် စိတ်ဖိစီးနေချိန်မှာ CW လို့ခေါ်တဲ့ မိန်းကလေးတစ်ယောက်နဲ့ ဆုံမိသွားတယ်။ CW က ဖော်ရွေပြီး မက်ဒီဆင်ကို အများကြီး ကူညီပေးတဲ့ မိတ်ဆွေဖြစ်လာပါတယ်။ ဒါပေမယ့် ထိုင်းနိုင်ငံကနေ ပြန်ခါနီးမှာ မက်ဒီဆင်ရဲ့ ပတ်စ်ပို့ အခိုးခံလိုက်ရပြီး ထူးဆန်းတဲ့ဖြစ်ရပ်တွေ ဆက်တိုက်ပေါ်လာတော့တယ်။ ခရီးစဉ်အတွင်းက မိတ်ဆွေသစ်နဲ့ ပျောက်သွားတဲ့ ပတ်စ်ပို့အကြောင်းကနေ စထားတဲ့ လျှို့ဝှက်ဆန်းကြယ်သည်းထိတ်ရင်ဖိုကားပါ။

မြို့ငယ်လေးတစ်မြို့က သင်းအုပ်ဆရာ မာရှယ်ရဲ့ဇနီးဟာ ထရွိုင်ပါကာကြောင့် မတော်တဆ အသက်ဆုံးရှုံးသွားခဲ့ပါတယ်။ မာရှယ်ကတော့ ထရွိုင်ကို ခွင့်လွှတ်ပေးခဲ့ရုံမက တရားရုံးမှာ ပြစ်ဒဏ်လျှော့ပေါ့ပေးဖို့ပါ ကာကွယ်ထွက်ဆိုပေးခဲ့တယ်။ သားဖြစ်သူ ဆမ်မြူရယ်ကတော့ မိခင်တစ်ယောက်လုံးကို ဆုံးရှုံးထားရချိန်မှာ ဖခင်က ဘာကြောင့် ဒီလောက်ခွင့်လွှတ်နိုင်ရသလဲဆိုတာ နားမလည်နိုင်ဖြစ်နေပါတယ်။ ထရွိုင် ထောင်ကလွတ်လာပြီး သူတို့သားအဖရှေ့ ပြန်ရောက်လာတဲ့အခါ သုံးယောက်ကြားက ဆက်ဆံရေးကို ရင်ဆိုင်ရတော့မှာပါ။ ထရွိုင်က ကိုယ့်လုပ်ရပ်အတွက် ဘယ်လိုပေးဆပ်မလဲ၊ ဆမ်မြူရယ်ကရော ဖခင်လို ခွင့်လွှတ်နိုင်ပါ့မလားဆိုတဲ့ မေးခွန်းတွေနဲ့အတူ ဆုံးရှုံးမှုနဲ့ ခွင့်လွှတ်ခြင်းအကြောင်းကို ပြောထားတဲ့ ဇာတ်ကား ဖြစ်ပါတယ်။

အလောင်းဆယ်သူ ယန်ဟွမ်နဲ့ သူ့ဆရာ လောင်ကျန်းတို့ ထျန်းဆွေရွာကို အလောင်းဆယ်ဖို့ ရောက်လာကြပေမယ့် မြစ်ထဲမှာ ဘယ်လိုရှာရှာ မတွေ့ကြဘူး။ ရွာသားတွေကတော့ သေဆုံးသူလင်ယွိကို မြစ်နတ်ရဲ့ သတို့သမီးအဖြစ် ရွေးချယ်လိုက်လို့ မြစ်ထဲကျသွားတာလို့ ပြောနေကြပါတယ်။ လင်ယွိရဲ့သူငယ်ချင်း သတင်းထောက်လင်ယောင်ကတော့ အဲဒီအယူအဆကို လက်မခံဘူး။ ယန်ဟွမ်နဲ့ လင်ယောင်တို့ ပူးပေါင်းစုံစမ်းရင်း လွန်ခဲ့တဲ့ နှစ်ပေါင်း ၂၀ လောက်က သူတို့ဖခင်တွေ ကျူးလွန်ခဲ့တဲ့ ပြစ်မှုတစ်ခုအကြောင်း သိလာကြပါတယ်။ ရွာထဲမှာလည်း လူတွေ တစ်ယောက်ပြီးတစ်ယောက် သေဆုံးလာတော့ တရားခံကို ရှာဖို့နဲ့ အတိတ်က မတရားမှုကို ဖော်ထုတ်ဖို့ နှစ်ယောက်သား ဆက်ကြိုးစားရတော့မှာပါ။

အိမ်တစ်အိမ်ထဲမှာ အလောင်းတွေ့ရာက လူသတ်မှုတစ်ခုကို စုံစမ်းကြပါတယ်။ အမှုကို တာဝန်ယူတဲ့ အမျိုးသမီးစုံထောက်က လူသတ်သမား ဝင်ထွက်သွားတဲ့လမ်းနဲ့ အခင်းဖြစ်ပုံကို သဲလွန်စတွေကနေ ဆက်စပ်ကြည့်ပြီး ပတ်ဝန်းကျင်ကလူတွေကို စစ်မေးတယ်။ အဲဒီနောက် သံသယရှိသူတစ်ယောက်ကို ဖမ်းမိလာပါတယ်။ ဒါပေမယ့် အဖမ်းခံရသူနဲ့ ရုပ်ချင်းခွဲမရအောင်တူတဲ့ နောက်တစ်ယောက် ရဲစခန်းကို ရောက်လာတော့ အမှုက ပိုရှုပ်သွားတယ်။ ဒီနှစ်ယောက်က ဘယ်လိုပတ်သက်နေကြသလဲ၊ တကယ်သတ်ခဲ့သူက ဘယ်သူလဲဆိုတာကို အတိတ်အကြောင်းတွေ ပြန်လိုက်ရင်း ဖော်ထုတ်ကြရပါတယ်။ အဒီတရာကပူးရ်၊ မရူနယ်သာကာနဲ့ ဗီဒီကာပင်တိုတို့ အဓိကပါဝင်ထားတဲ့ စုံထောက်ဇာတ်ကားပါ။

ရှာရွန်ဆက်တာဟာ ခင်ပွန်း မာ့ခ် ရုံးကအပြန်မှာ သေဆုံးသွားတဲ့အတွက် ပူဆွေးနေရပါတယ်။ အဲဒီအချိန်မှာ ဂျိုခရူဇော့ဆိုတဲ့ အမျိုးသမီးက ခင်ပွန်းရဲ့သေဆုံးမှုဟာ ပုံမှန်မဟုတ်ဘူးလို့ လာပြောတယ်။ အဲဒီစကားကြောင့် ရှာရွန်တို့ အစအနတွေကို လိုက်ရှာကြရာက မမျှော်လင့်ထားတဲ့အရာတွေ ပေါ်လာပါတယ်။ ခင်ပွန်းသေဆုံးမှုရဲ့ အကြောင်းရင်းကို စူးစမ်းသွားတဲ့ မှုခင်းသည်းထိတ်ရင်ဖိုကားဖြစ်ပြီး Javicia Leslie၊ John Cassini နဲ့ Pascale Hutton တို့ ပါဝင်ထားကြပါတယ်။

ကားမတော်တဆမှုအပြီး ရဲအုပ်တစ်ယောက်ဟာ ဇနီးနဲ့ သမီးလေးကို ဆေးရုံတင်ပေးခဲ့ပါတယ်။ ဒါပေမယ့် နာရီအနည်းငယ်ကြာပြီး နောက်တစ်မနက်မှာတော့ သူတို့နှစ်ယောက် ဆေးရုံကို ရောက်မလာဖူးဘူးလို့ ပြောနေကြတယ်။ ကိုယ်တိုင် ပို့ခဲ့တာကို ရှင်းရှင်းလင်းလင်း မှတ်မိနေတဲ့သူအတွက် ဒါက လက်ခံဖို့ခက်တဲ့ ကိစ္စပါ။ သူ့ဦးခေါင်းဒဏ်ရာကြောင့် မှတ်ဉာဏ်လွဲနေသလား၊ လူနာရှင်တွေကို တွေ့ခွင့်မပေးတဲ့ ဆေးရုံကြီးထဲမှာ တစ်ခုခု ဖုံးကွယ်ထားသလားဆိုပြီး သံသယတွေ များလာတယ်။ တစ်ဖက်မှာလည်း သူနဲ့ ရန်ဘက်ဖြစ်နေတဲ့ မူးယစ်ရာဇာက သူ့ဇနီးရဲ့ဖခင်ဖြစ်နေတာကြောင့် အဲဒီဘက်ကိုလည်း စဉ်းစားမိပြန်တယ်။ ဇနီးနဲ့သမီး ဘယ်ရောက်သွားလဲဆိုတာကို လိုက်ရှာရင်း ကိုယ့်မှတ်ဉာဏ်နဲ့ ပတ်ဝန်းကျင်က အပြောတွေအကြား အဖြေထုတ်ရတဲ့ မှုခင်းဇာတ်လမ်းပါ။

ငယ်စဉ်ကတည်းက စိတ်ဒဏ်ရာတွေ ခံစားခဲ့ရတဲ့ အမျိုးသမီးတစ်ယောက်ဟာ စိတ်ကျရောဂါနဲ့ ရုန်းကန်နေရပါတယ်။ ချစ်ရတဲ့ခင်ပွန်း ထောင်ကျသွားတဲ့နောက် ရောဂါပိုဆိုးလာပြီး ကိုယ့်ကိုယ်ကို အဆုံးစီရင်ဖို့ ကြိုးစားမိတယ်။ အသက်ရှင်ခဲ့ပေမယ့် ဆေးရုံတက်ရပြီး အဲဒီမှာ စိတ်ရောဂါကုဆရာဝန် ဒေါက်တာဘန်နဲ့ တွေ့ဆုံလာပါတယ်။ ဒေါက်တာဘန်က သူ့ကို စမ်းသပ်နေဆဲဆေးတစ်မျိုး သောက်ခိုင်းလိုက်တယ်။ အဲဒီဆေးနောက်မှာ ဘာတွေဖြစ်လာမလဲ၊ ဘေးထွက်ဆိုးကျိုးတွေနဲ့ ဆရာဝန်က ဘယ်လိုပတ်သက်နေသလဲဆိုတာက ဇာတ်လမ်းရဲ့ အဓိကမေးခွန်း ဖြစ်လာပါတယ်။ လျှို့ဝှက်ချက်တွေ တစ်ခုပြီးတစ်ခု ပေါ်လာတဲ့ မှုခင်းဒရာမာဖြစ်ပြီး Jude Law နဲ့ Channing Tatum တို့ ပါဝင်ထားပါတယ်။

အိမ်ဖောက်ထွင်းအကြမ်းဖက်မှုတစ်ခုမှာ အမျိုးသမီးနှစ်ယောက် သေဆုံးသွားပေမယ့် အဲဗာကတော့ အသက်ရှင်ကျန်ခဲ့ပါတယ်။ အဲဒီဖြစ်ရပ်နောက်ပိုင်းမှာ စိတ်ဒဏ်ရာနဲ့ သံသယလွန်ကဲမှုတွေ ခံစားနေရလို့ ကုသမှုခံယူနေရတယ်။ ခင်ပွန်း မီဂေးလ်က သူ့ကို ပတ်ဝန်းကျင်သစ်မှာ အနားယူနိုင်အောင် ကယ်လီဖိုးနီးယားက အိမ်တစ်လုံးဆီ ခေါ်လာပါတယ်။ အိမ်ကြီးက ကျယ်ဝန်းခမ်းနားပြီး ခေတ်မီပစ္စည်းတွေ တပ်ဆင်ထားတယ်။ အထူးသဖြင့် Diablo Controls ရဲ့ အဆင့်မြင့် AI လုံခြုံရေးစနစ်က အိမ်ဖောက်ထွင်းခံရဖူးတဲ့ အဲဗာအတွက် စိတ်ချရမယ်လို့ မီဂေးလ်က ယူဆထားပါတယ်။ အရင်နေခဲ့တဲ့ မိသားစု ပျောက်ဆုံးသွားတာက စိတ်ထဲ မတင်မကျဖြစ်စရာပေမယ့် ဒီအိမ်ကိုပဲ ငှားဖြစ်သွားကြတယ်။ ပြောင်းလာတဲ့ ပထမညမှာပဲ မီဂေးလ်က အလုပ်ကိစ္စနဲ့ မြို့ဟောင်းဆီ ပြန်သွားရတော့ အဲဗာဟာ သုံးထပ်အိမ်ကြီးထဲမှာ တစ်ယောက်တည်း ကျန်ခဲ့ပါတယ်။ သူ့ကို ကာကွယ်ပေးမယ်ထင်ထားတဲ့ စနစ်ကြားမှာ ဘာတွေနဲ့ ရင်ဆိုင်ရမလဲဆိုတဲ့ သည်းထိတ်ရင်ဖိုကားပါ။

ဘီမူပန်းချီပြခန်းရဲ့ ဥက္ကဋ္ဌ ဘယ်ထယ်ဂျင်းဟာ ပန်းချီအတုတွေကို လူထုရှေ့ ပြသပြီး မူရင်းတွေကို နိုင်ငံခြားဆီ မှောင်ခိုရောင်းစားနေသူပါ။ တစ်နေ့မှာ ဂျိုဆွန်းခေတ်က ရေးဆွဲခဲ့တဲ့ နှစ်လေးရာသက်တမ်းရှိ ဗြောဂန်ဒိုပန်းချီကား သူ့လက်ထဲ ရောက်လာတယ်။ ဒီပန်းချီကိုလည်း ဂျပန်မှာ ဈေးကောင်းကောင်းနဲ့ ရောင်းဖို့ စီစဉ်ထားပေမယ့် မရောင်းခင် ပြန်လည်မွမ်းမံဖို့ လိုနေပါတယ်။ ဒါကြောင့် ပန်းချီပုံတူရေးဆွဲရာမှာ ကျွမ်းကျင်တဲ့ အီဂန်ဂျွန်ကို ဆက်သွယ်လိုက်တယ်။ အီဂန်ဂျွန်ကလည်း မိဘမဲ့ဘဝနဲ့ ကြီးပြင်းခဲ့ရာ ချမ်းဒုန်ဘုရားကျောင်းနဲ့ ဆိုင်တဲ့ ဂန်ဟွာဗြောင်ဖွန်းပန်းချီကို ရှာဖွေနေသူပါ။ ပန်းချီတစ်ချပ်ကို ရောင်းချချင်သူနဲ့ နောက်တစ်ချပ်ကို ရှာနေသူတို့ တွေ့ဆုံလာရာက အကျိုးစီးပွားနဲ့ အကြံအစည်တွေ ဘယ်လိုပတ်သက်နေသလဲဆိုတာကို ဆက်ပြထားပါတယ်။ ဂင်ရယ်ဝန်နဲ့ အွန်းဂျောင်ဟွာတို့ ပါဝင်ထားတဲ့ ဒီဇာတ်ကားမှာ ပန်းချီအနုပညာကို အသုံးချပြီး စီးပွားရှာနေတဲ့ လောကအကြောင်းကို မြင်ရမှာပါ။

ခရစ်ရှန်လာဖဲယတ်ဟာ အာဖဂန်နစ္စတန် ရှေ့တန်းကနေ အသက်ရှင်ပြီး ပြန်လာနိုင်ခဲ့ပေမယ့် စစ်ပွဲကို စိတ်ထဲကနေ ထုတ်မပစ်နိုင်သေးပါဘူး။ ရဲဘော်တွေ သေဆုံးဒဏ်ရာရခဲ့ကြပြီး ကိုယ်က အသက်ရှင်ကျန်ခဲ့တဲ့အတွက် အပြစ်ရှိစိတ်နဲ့ နေနေရတယ်။ စူပါမားကတ်မှာ အလုပ်လုပ်ရင်း သာမန်အရပ်သားတစ်ယောက်လို နေဖို့ ကြိုးစားပေမယ့် အသားမကျနိုင်ဘူး။ မွန်နီးယားကလည်း တိုက်ခိုက်မှုမှာ ခြေထောက်ဒဏ်ရာရထားသူပါ။ ဘိန်းမှောင်ခိုလုပ်ရင်း အကြွေးတင်နေတဲ့သူ့အတွက် အခက်အခဲတစ်ခု ထပ်ရှိနေတယ်။ ဘိန်းတွေကို သိမ်းထားတဲ့ ရဲဘော်က စစ်ပွဲကရခဲ့တဲ့ စိတ်ဒဏ်ရာကြောင့် အရင်ဖြစ်ရပ်တွေကို မမှတ်မိတော့ပါဘူး။ သူတို့ရဲ့ ပြဿနာတွေကို လိုက်ဖြေရှင်းရင်း စစ်မြေပြင်မှာ ဖြစ်ခဲ့တာတွေကိုပါ ပြန်စူးစမ်းလာကြရတယ်။ တိုက်ပွဲပြကွက်ထက် စစ်ပွဲပြီးသွားတဲ့နောက် စစ်သားတွေ နေ့စဉ်ဘဝဆီ ပြန်ဝင်ဖို့ ရုန်းကန်ရပုံကို အဓိကပြထားတဲ့ ဒရာမာပါ။

မာ့ခ်ပက်ဆန်ဟာ အမျိုးသမီးငယ်တွေကို လူကုန်ကူးနေတဲ့ Godzilla မာဖီးယားဂိုဏ်းကို ရှင်းလင်းနိုင်ခဲ့တဲ့ အေးဂျင့်တစ်ယောက်ပါ။ လူအများအတွက် သူရဲကောင်းဖြစ်လာပေမယ့် တစ်ဖက်ဂိုဏ်းရဲ့ လက်စားချေမှုကြောင့် ဇနီးကို ဆုံးရှုံးလိုက်ရတယ်။ ဖခင်ရဲ့အလုပ်ကြောင့် အမြဲသတိထားနေရတာကို မနှစ်သက်တဲ့ သမီး အလီရှာကလည်း အမေဆုံးသွားတဲ့နောက် အဖေ့ကို မုန်းလာပါတယ်။ မိသားစုထက် သူရဲကောင်းဖြစ်ဖို့ကိုပဲ ရွေးလိုက်တယ်လို့ သူမြင်နေတာပါ။ မာ့ခ်က အလုပ်ထွက်ပြီး သမီးနဲ့ နားလည်မှု ပြန်တည်ဆောက်ဖို့ ကြိုးစားတယ်။ ဒါပေမယ့် ဇနီးကို သတ်ခဲ့တဲ့ လူသတ်သမားက ကျန်နေတဲ့ သမီးကိုပါ ပစ်မှတ်ထားလာတော့ အေးအေးချမ်းချမ်း နေလို့မရတော့ဘူး။ Louis Mandylor ပါဝင်ထားတဲ့ ဒီအက်ရှင်ကားမှာ မာ့ခ်က သမီးကို ကာကွယ်ရသလို သားအဖကြားက အကွာအဝေးကိုလည်း ပြန်ကျဉ်းလာအောင် လုပ်ရပါတယ်။