အက်ရှင်ကားများ

Inside Men က ခရိုနီတွေနဲ့ နိုင်ငံရေးလောကထဲက အမတ်တွေရဲ့ ဆက်ဆံရေးကို အခြေခံထားတဲ့ Action၊ Crime၊ Drama ဇာတ်ကားပါ။ အမှုစစ်တွေနဲ့ မီဒီယာတွေကလည်း ဒီအသိုင်းအဝိုင်းမှာ အရေးပါတဲ့နေရာက ပါဝင်နေကြပြီး နောက်ကွယ်က အရှုပ်အထွေးတွေကို လိုက်ရှင်းပေးရတဲ့ လူမိုက်တွေရဲ့အကြောင်းကိုပါ တွဲဖော်ပြထားပါတယ်။ သုံးနာရီကြာ ဇာတ်လမ်းထဲမှာ ဇာတ်ကောင်များသလို တစ်ယောက်နဲ့တစ်ယောက် ပတ်သက်နေတဲ့ အကြောင်းအရာတွေလည်း များပါတယ်။ နာမည်ကြီး သရုပ်ဆောင်တွေ ပါဝင်ထားပြီး ဒီဇာတ်ကားက ဆု ၂၁ ဆု ရရှိခဲ့သလို Lee Byung-hun လည်း အကောင်းဆုံးအမျိုးသားသရုပ်ဆောင်ဆု ရရှိခဲ့ပါတယ်။

လိပ်နင်ဂျာညီအစ်ကိုလေးဦးက Shredder ကို နှိမ်နင်းပြီး နှစ်နှစ်အကြာမှာ ဇာတ်လမ်းကို ဆက်ထားပါတယ်။ အနာဂတ်ကနေ ပြန်ရောက်လာတဲ့ Casay Jones နဲ့ ပူးပေါင်းပြီး အစွမ်းထက်တဲ့ Krang ဂြိုဟ်သားတွေကို တားဆီးဖို့ ကြိုးစားကြရတယ်။ ဒီအန်နီမေးရှင်းရုပ်ရှင်က ၂၀၁၈ ခုနှစ်မှာ စတင်ခဲ့တဲ့ Nickelodeon ရဲ့ ပြန်လည်ဆန်းသစ်ထားသော တီဗီစီးရီးအဆက်ပါ။ ဒီဗားရှင်းမှာ မိသားစုအတွင်း ဆက်ဆံရေးနဲ့ ဇာတ်ကောင်တချို့ရဲ့ ပုံစံကို ပြောင်းလဲထားပြီး Leo က အစ်ကိုအကြီးဆုံး မဟုတ်တော့ဘဲ Ralph က အကြီးဆုံးဖြစ်နေပါတယ်။ ပေါ့ပါးတဲ့ အန်နီမေးရှင်းပုံစံနဲ့ အက်ရှင်ခန်းတွေကြားမှာ ညီအစ်ကိုတွေရဲ့ ဆက်ဆံရေးကိုပါ တွဲဖော်ပြထားပါတယ်။

ဂိုပီချန့် သရုပ်ဆောင်ထားတဲ့ ရှေ့နေက ပိုက်ဆံကိုပဲ အလေးထားသူပါ။ သူ့အဖေက အမှုတစ်ခုကြောင့် နာမည်ကျပြီး စိတ်ဓာတ်ကျနေချိန်မှာ ဒီအမှုကို သူ ဘယ်လိုပြန်အဖတ်ဆယ်မလဲဆိုတဲ့အကြောင်းနဲ့ ဇာတ်လမ်းကို ဆက်ထားပါတယ်။ Oxygen (2017) နဲ့ မြန်မာပရိသတ်တွေ ရင်းနှီးလာတဲ့ ဂိုပီချန့်နဲ့အတူ ရက်ရှီခန်နာလည်း တွဲဖက်ပါဝင်ထားတယ်။ ပိုက်ဆံကိုသာ ကြည့်တယ်ဆိုတဲ့ ရှေ့နေရဲ့ တကယ့်သဘောထားက ဘယ်လိုလဲ၊ ရက်ရှီခန်နာ သရုပ်ဆောင်ထားတဲ့ ဇာတ်ကောင်ကရော ဘယ်လိုလူလဲဆိုတာ ဆက်ဖော်ပြသွားပါတယ်။ ဘယ်သူတွေက မျက်နှာဖုံးစွပ်ထားကြတာလဲ၊ နောက်ကွယ်က လူမိုက်တွေကို ဘယ်သူက ထိန်းချုပ်နေတာလဲဆိုတဲ့ မေးခွန်းတွေလည်း ရှိနေတယ်။ ပေါ့ပေါ့ပါးပါး ဟာသနဲ့ စထားတဲ့ ဇာတ်လမ်းကနေ လူမှုအသိုင်းအဝိုင်းနဲ့ သက်ဆိုင်တဲ့ အယူအဆတွေနဲ့ လက်တွေ့ဘဝအကြောင်းတွေကိုပါ ဆက်ပြထားပါတယ်။

၂၀၂၀ ခုနှစ်က ထွက်ရှိခဲ့တဲ့ ပြင်သစ်အက်ရှင်ဇာတ်ကား Lost Bullet ရဲ့ အဆက်ပါ။ ပထမကားအပြီးမှာ ညီဖြစ်သူနဲ့ ဆရာကို ဆုံးရှုံးထားရတဲ့ Lino ဟာ လက်စားချေဖို့ ကြိုးစားနေပါတယ်။ ဒါပေမဲ့ သူရင်ဆိုင်နေရတဲ့ ရန်သူတွေက ရဲဌာနအတွင်းအထိ စိမ့်ဝင်နေကြတာမို့ တရားမျှတမှုရဖို့ အစွမ်းကုန် ရုန်းကန်ရတော့တယ်။ ပြင်းထန်တဲ့ အက်ရှင်ခန်းတွေနဲ့ သူ့ရဲ့ကြိုးပမ်းမှုကို ဆက်ပြထားပါတယ်။

Teen Wolf: The Movie က ၂၀၁၁ ကနေ ၂၀၁၇ အထိ ထုတ်လွှင့်ခဲ့တဲ့ Teen Wolf စီးရီးရဲ့ နောက်ဆက်တွဲရုပ်ရှင်ပါ။ ဘီကွန်ဟေးလ်မြို့က သမန်းဝံပုလွေ စကော့ မက်ကောဟာ စီးရီးအဆုံးမှာ ဝံပုလွေအုပ်ရဲ့ အယ်ဖာခေါင်းဆောင် ဖြစ်လာခဲ့ပါတယ်။ သူ့အမေက သူနာပြုဖြစ်ပြီး ချစ်သူ အလီဆန်အားဂျန့်ကတော့ သမန်းဝံပုလွေမုဆိုးမျိုးရိုးက ဆင်းသက်လာသူပါ။ အလီဆန်ဟာ စီးရီးထဲမှာ သေဆုံးသွားခဲ့ပြီး ဖြစ်ပါတယ်။ စကော့ရဲ့ အချစ်ဆုံးသူငယ်ချင်း စတလင်းစကီးခေါ် စတိုင်းက သမန်းဝံပုလွေတွေကို အမြဲကူညီပေးခဲ့တဲ့ ဉာဏ်ကောင်းသူဖြစ်ပြီး နောက်ပိုင်း FBI ထဲ ရောက်သွားပါတယ်။ သူ့အဖေက ရဲမှူးပါ။ စတိုင်းရဲ့ ချစ်သူ လစ်ဒီယာကတော့ သေခြင်းကို မြင်နိုင်ပြီး အသံလှိုင်းနဲ့ တိုက်ခိုက်နိုင်တဲ့ ဘန်းရှီးတစ်ယောက် ဖြစ်ပါတယ်။ စကော့ရဲ့ နောက်ထပ်အရင်းနှီးဆုံးမိတ်ဆွေ ဒဲရက်ဟေးလ်ကလည်း သမန်းဝံပုလွေဖြစ်ပြီး အီလိုင်ဆိုတဲ့ သားတစ်ယောက် ရှိပါတယ်။ မာလီရာတိတ်က သမန်းမြေခွေး၊ ရဲတပ်သား ပဲရစ်ရှ်က ငရဲခွေးဖြစ်ပြီး လစ်ဒီယာရဲ့ သူငယ်ချင်း ဂျက်ဆန်ဝစ်မောကတော့ ကာနီမာဆိုတဲ့ မှော်သတ္တဝါပါ။ စကော့က သမန်းဝံပုလွေအဖြစ် ပြောင်းပေးခဲ့တဲ့ လီယမ်လည်း ပါဝင်လာပါတယ်။ ရုပ်ရှင်အစမှာ သူတို့တွေဟာ အရွယ်ရောက်လာကြပြီး တခြားနေရာတွေမှာ ကိုယ့်အလုပ်နဲ့ကိုယ် အခြေကျနေကြပါပြီ။ ဒါပေမယ့် သူတို့အားလုံးကို လက်စားချေချင်တဲ့ ရန်သူဟောင်းတစ်ယောက်က အစွမ်းထက်တဲ့ ဂျပန်နတ်ဘုရားမိစ္ဆာ နိုဂစ်ဆူနဲကို လွှတ်ပေးပြီး တိုက်ခိုက်ခိုင်းလာတယ်။ တစ်ယောက်ခ

Libiwala နယ်မြေမှာ မူးယစ်ဆေးဝါးသုံးစွဲမှုတွေ ကျယ်ပြန့်လာပြီး အာဏာပိုင်တွေကလည်း စိုက်ပျိုးမှုကို လက်ဝါးကြီးအုပ်ကာ တရားဝင်စိုက်ပျိုးနိုင်တဲ့အထိ တိုးချဲ့လာကြပါတယ်။ ပြည်သူတွေ ဘေးကင်းဖို့ နေရာအသီးသီးက လှုပ်ရှားဆောင်ရွက်မှုတွေ ရှိလာသလို ဆန္ဒပြပွဲတွေလည်း ဆက်တိုက် ဖြစ်လာတယ်။ အဲဒီအချိန်မှာ အမျိုးသမီးစနိုက်ပါသမား အန်းန၊ အေးဂျင့် အားထိုက်နဲ့ ဒေါက်တာဖန်းတို့ဟာ တာဝန်တစ်ခုကို အတူထမ်းဆောင်ဖို့ အကြောင်းဖန်လာပါတယ်။ တာဝန်ကို ဆောင်ရွက်ရင်း လုပ်ကြံသတ်ဖြတ်မှုတစ်ခုရဲ့ နောက်ကွယ်က အမှန်တရားကို သိလာကြပြီး ဒုစရိုက်လောကထဲ ပိုပြီး နက်နက်ရှိုင်းရှိုင်း ဝင်ရောက်သွားကြတယ်။ မူးယစ်ဆေးနွံထဲက အပြစ်မဲ့ပြည်သူတွေကို ကယ်နိုင်ပါ့မလား၊ လက်ခံထားတဲ့ တာဝန်ကို အဆုံးအထိ ထမ်းဆောင်နိုင်ပါ့မလား၊ သူတို့ကိုယ်တိုင်ရော ဒီဒုစရိုက်လောကထဲက ပြန်ရုန်းထွက်နိုင်ကြမလားဆိုတဲ့ မေးခွန်းတွေကို ဆက်လိုက်ရမှာပါ။

ကိုတီက မီနာရှီရ်ဆိုတဲ့ အမျိုးသမီးတစ်ယောက်ကို နှစ်ပေါင်းများစွာ သဘောကျနေတဲ့ လူရိုးတစ်ယောက်ပါ။ ဒါပေမယ့် မီနာရှီရ်ကို သဘောကျနေသူက သူတစ်ယောက်တည်း မဟုတ်ဘူး။ သူအလုပ်လုပ်ပေးနေရတဲ့ ကာရူနာကလည်း အဲဒီအမျိုးသမီးကိုပဲ ကြိုက်နေပါတယ်။ ကာရူနာဟာ မြို့ရဲ့ နိုင်ငံရေးနဲ့ စီးပွားရေးကို လက်ဝါးကြီးအုပ်ထားသူဖြစ်လို့ ကိုတီထက် အင်အားအများကြီး သာနေသူပါ။ အမျိုးသမီးတစ်ယောက်ကို အပြိုင်ကြိုက်မိကြရာကနေ ထိပ်တိုက်တွေ့လာတဲ့အခါ ကိုတီဟာ ကိုယ့်ထက် အင်အားကြီးတဲ့ ရန်သူကို ဘယ်လို ရင်ဆိုင်မလဲဆိုတာ ဇာတ်ကွက်အလှည့်အပြောင်းတွေနဲ့ ဆက်ပြထားပါတယ်။ ဒီဇာတ်ကားကို Anad Ravi ကိုယ်တိုင် ရေးသားထားပြီး ကိုတီအဖြစ်လည်း ပါဝင်သရုပ်ဆောင်ထားပါတယ်။

Hrithik Roshan နဲ့ Katrina Kaif တို့ အဓိကပါဝင်ထားတဲ့ Bang Bang! က ဟောလိဝုဒ်ရုပ်ရှင်တစ်ကားကို မှီငြမ်းထားတဲ့ ဘောလိဝုဒ်ဇာတ်ကားပါ။ နိုင်ငံအတော်များများမှာ လှည့်လည်ရိုက်ကူးထားပြီး ရှုခင်းတွေနဲ့အတူ အကပိုင်းကိုလည်း ထည့်သွင်းတင်ဆက်ထားပါတယ်။ အက်ရှင်၊ အချစ်နဲ့ စွန့်စားခန်းတွေကြားမှာ ဟာသတွေပါ ရောစပ်ထားပြီး ဇာတ်ကားအရှည်က နှစ်နာရီခွဲဝန်းကျင် ရှိပါတယ်။

ဘရက်ပစ် သရုပ်ဆောင်ထားတဲ့ ကြေးစားဟောင်းတစ်ယောက်ဟာ စိတ်ဒဏ်ရာတွေအတွက် ဆရာဝန်နဲ့ ပြသရင်း အလုပ်ကနေ အနားယူနေပါတယ်။ အလုပ်ပြန်လုပ်ဖို့ ဆုံးဖြတ်တဲ့အခါ လွယ်လွယ်ကူကူ အလုပ်လေးတစ်ခု ပေးဖို့ တောင်းဆိုလိုက်တယ်။ သူရလာတဲ့တာဝန်က ရထားပေါ်တက်ပြီး ပစ္စည်းတစ်ခုယူကာ ပြန်ဆင်းလာဖို့ပါပဲ။ ဒါပေမယ့် သူတက်လာတဲ့ ကျည်ဆံရထားပေါ်မှာ ဂျပန်ရဲ့အကြီးဆုံး ဂိုဏ်းခေါင်းဆောင်၊ လူသတ်သမားတွေနဲ့ ကြေးစားတွေက ကိုယ့်အကြောင်းနဲ့ကိုယ်၊ ကိုယ့်အကြံနဲ့ကိုယ် ရောက်နေကြတယ်။ လွယ်မယ်ထင်ထားတဲ့ အလုပ်ကနေ လူမျိုးစုံနဲ့ ရင်ဆိုင်ရတော့ပြီး အလွဲတွေကြားမှာ အသက်ရှင်ဖို့ ရုန်းကန်ရပါတော့တယ်။ အက်ရှင်နဲ့ ဟာသကို တွဲထားတဲ့ ရုပ်ရှင်ဖြစ်ပြီး Atomic Blond ကို ရိုက်ကူးခဲ့သလို John Wick မှာလည်း ထုတ်လုပ်သူအဖြစ် လုပ်ခဲ့တဲ့ David Leitch က ရိုက်ကူးထားပါတယ်။

Predator ရုပ်ရှင်စီးရီးထဲက ဒီဇာတ်ကားမှာတော့ လွန်ခဲ့တဲ့ နှစ် ၃၀၀ ကာလကို ပြန်ရောက်သွားပါတယ်။ အဲဒီခေတ်မှာ လူတွေကို အမဲလိုက်လာတဲ့ ပရက်ဒေတာဂြိုလ်သားနဲ့ ကိုမန်ချီလူမျိုးတွေ၊ ပြင်သစ်မုဆိုးတွေ ရင်ဆိုင်ကြရတာပါ။ သေနတ်တွေရှိတဲ့ခေတ်မှာတောင် အနိုင်နိုင်တိုက်ခိုက်ရတဲ့ ရန်သူကို အရင်ခေတ်က လူတွေ ဘယ်လိုရင်ဆိုင်ကြမလဲဆိုတာကို အက်ရှင်အသားပေးပြီး တင်ဆက်ထားပါတယ်။

Avengers: Endgame အပြီးမှာ သောရ်က Guardians of the Galaxy နဲ့အတူ အာကာသထဲ စွန့်စားခန်းထွက်လာခဲ့ပါတယ်။ Thor၊ Thor: Dark World နဲ့ Thor Ragnarok တို့နောက် စတုတ္ထမြောက် သောရ်ရုပ်ရှင်မှာတော့ သူရင်ဆိုင်ရမယ့်သူက နတ်ဘုရားသတ်သမား ဂေါရ်ပါ။ ဂေါရ်ဟာ အရင်က နတ်ဘုရားတွေကို ယုံကြည်ကိုးကွယ်ခဲ့သူတစ်ယောက် ဖြစ်ပါတယ်။ ဒါပေမယ့် သူတို့ဂြိုလ်မှာ အငတ်ဘေးဆိုက်ပြီး သမီးလေးပါ သေဆုံးသွားတာကို နတ်ဘုရားတွေက လျစ်လျူရှုပြီး ပျက်ရယ်ပြုခဲ့ကြတယ်။ အဲဒီနောက် ဂေါရ်က နတ်ဘုရားတွေကို မုန်းတီးသွားပြီး သူ့လက်ထဲကိုလည်း နတ်ဘုရားတွေကို သတ်နိုင်တဲ့ ရှေးဟောင်းလက်နက်၊ ကျိန်စာသင့် နက်ခရိုဓား ရောက်လာပါတယ်။ ဂေါရ်က အဲဒီဓားနဲ့ စကြဝဠာတစ်ခွင်က နတ်ဘုရားတွေကို လိုက်သတ်ရင်း နတ်ဘုရားအားလုံးကို တစ်ကြိမ်တည်းနဲ့ အပြီးသတ်နိုင်မယ့် နည်းလမ်းကို ရှာနေတယ်။ အဲဒီမှာ သောရ်နဲ့ ထိပ်တိုက်တွေ့လာပါတယ်။ သောရ်နဲ့အတူ မီအောရ်နာတူကို ကိုင်ဆောင်ထားတဲ့ ရည်းစားဟောင်း ဂျိန်းဖော်စတာနဲ့ ဖယ်ခရီတို့ပါ ပါဝင်တိုက်ခိုက်လာပြီး စကြဝဠာတစ်ခုလုံးက နတ်ဘုရားတွေကို ကယ်တင်ဖို့ ကြိုးစားကြရပါတယ်။

လူအများ သဘောကျနေကြပေမယ့် ဘယ်သူ့ကိုမှ စိတ်မဝင်စားတဲ့ မိန်းကလေးတစ်ယောက် ရှိပါတယ်။ သူမက ဂန်းစတားအသိုင်းအဝိုင်းထဲက ဖြစ်ပြီး အဲဒီအသိုင်းအဝိုင်းက ယောက်ျားတွေနဲ့ပဲ ပတ်သက်ခွင့်ရထားတာပါ။ ဒီလိုအခြေအနေမှာ အာယာ သရုပ်ဆောင်ထားတဲ့ ကာသာဘာရှာက ထောင်ကနေ အာမခံနဲ့ ထွက်လာပြီး သူမကို လာတွေ့ပါတယ်။ ကာသာဘာရှာကို သိသူတွေက သူ့ကိုကြောက်ကြသလို ရွာထဲမှာလည်း လူတိုင်းကြောက်ရတဲ့ ဂန်းစတားကြီးတစ်ယောက် ရှိနေတယ်။ အဲဒီနှစ်ယောက် ရင်ဆိုင်တွေ့ကြတဲ့အခါ တိုက်ခိုက်မှုတွေ ဖြစ်လာပါတယ်။ ၂၀၂၃ ခုနှစ်ထွက် အက်ရှင်ရုပ်ရှင်ဖြစ်ပြီး ဖိုက်တင်ခန်းတွေ အများအပြား ပါဝင်ထားပါတယ်။

လွန်ခဲ့တဲ့ ခုနစ်နှစ်က ဖြစ်ခဲ့တဲ့အမှုတစ်ခုကြောင့် သားတွေကို ဆုံးရှုံးခဲ့ရတဲ့ Samudharam မိသားစုနဲ့ အဲဒီသေဆုံးမှုမှာ တာဝန်ရှိနေတဲ့ PRV မိသားစုတို့ကြား ရန်ငြိုးရှိနေပါတယ်။ နှစ်ဖက်စလုံးက ငွေကြေးချမ်းသာပြီး နာမည်ရှိတဲ့ မိသားစုတွေဖြစ်တာကြောင့် သူတို့ရဲ့ပဋိပက္ခနဲ့အတူ ရွာလည်း နှစ်ခြမ်းကွဲနေခဲ့တယ်။ Arun Vijay သရုပ်ဆောင်ထားတဲ့ ရာဗီးက PRV မိသားစုရဲ့ အငယ်ဆုံးသားပါ။ ဖအေတူ မအေကွဲ အစ်ကိုတွေနဲ့ စရိုက်ချင်းကွာပြီး ကြင်နာတတ်တာကြောင့် လူချစ်လူခင်များတယ်။ တစ်ဖက်မိသားစုရဲ့ သားသေဆုံးမှုအတွက် တာဝန်ရှိတယ်လို့ ခံယူထားသူကလည်း သူတစ်ယောက်တည်းပါ။ အငယ်ဆုံးဖြစ်ပေမယ့် မိသားစုတစ်ခုလုံးကို ဆင်တစ်ကောင်လို ထမ်းပိုးကာကွယ်ပေးမယ်ဆိုတဲ့ ဇာတာကြောင့် ဖခင်က ရာဗီးကို အားကိုးထားပါတယ်။ နှစ်ဖက်မိသားစုကြားက ပဋိပက္ခတွေမှာ သူ့မိသားစုကို ဘယ်လိုကယ်တင်မလဲဆိုတာကို အက်ရှင်ခန်းတွေနဲ့အတူ ဆက်ပြထားပြီး အချစ်ဇာတ်လမ်းလည်း ပါဝင်ပါတယ်။ ဗီလိန်နေရာမှာတော့ KGF ထဲက ဗီလိန်သရုပ်ဆောင် ပါဝင်ထားပါတယ်။

မိဘနှစ်ပါး ဆုံးပါးသွားပြီးနောက် ဂန်းဟာ အဘိုးအဘွားရဲ့ အုပ်ထိန်းမှုအောက်မှာ နေရင်း ညီငယ်တွေကို စောင့်ရှောက်နေပါတယ်။ ကျောင်းမှာ ညီဖြစ်သူ ဂိုင်းကို အနိုင်ကျင့်သူတွေနဲ့ မကြာခဏ ရန်ဖြစ်ရာက နောက်ဆုံး ကျောင်းထုတ်ခံလိုက်ရတယ်။ ဒါကြောင့် စာသင်နှစ်တစ်ဝက်မှာပဲ အစိုးရအထက်တန်းကျောင်းတစ်ကျောင်းကို ပြောင်းလာခဲ့ရပါတယ်။ ပတ်ဝန်းကျင်အသစ်မှာလည်း ဂန်းက သူငယ်ချင်းမရှိပါဘူး။ သူငယ်ချင်း မလိုအပ်ဘူးလို့ အမြဲပြောပြီး ထောင့်မကျိုးတတ်တဲ့ သူ့ကို အပေါင်းအသင်းလုပ်ချင်သူလည်း နည်းတယ်။ ဒါပေမယ့် အတန်းခေါင်းဆောင် ပင့်ဆိုတဲ့ ကောင်မလေးနဲ့တော့ နောက်ဆုံးမှာ သူငယ်ချင်း ဖြစ်လာခဲ့ပါတယ်။ အတန်းထဲက ဂါနဲ့ သူ့သူငယ်ချင်းတွေကတော့ ဂန်းကို ကြည့်မရလို့ တွေ့တဲ့နေရာတိုင်းမှာ ရန်စနေကြတယ်။ မထင်မှတ်ထားတဲ့ အခြေအနေတစ်ခုမှာတော့ အဲဒီမတည့်သူတွေကပဲ ဂန်းနဲ့ ရင်းနှီးသွားကြပါတယ်။ ရန်သူများတဲ့ ဂန်းတစ်ယောက် သူငယ်ချင်းတွေရလာတဲ့နောက် သူတို့နဲ့အတူ ဘယ်လိုဆိုးကြဦးမလဲ၊ ဘယ်လိုကိစ္စတွေ ဆက်ကြုံရမလဲဆိုတာကို သူတို့ရဲ့ ခင်မင်မှုစတင်ရာကနေ ပြထားတဲ့ ထိုင်းအက်ရှင်ဒရာမာပါ။ ဖြစ်ရပ်မှန်တစ်ခုကို အခြေခံရိုက်ကူးထားပါတယ်။

အထက်အရာရှိတစ်ယောက်က လူကုန်ကူးသူနဲ့ ပူးပေါင်းပြီး အကျင့်ပျက်ခြစားနေတာကို ဖော်ထုတ်ဖို့ ကြိုးစားခဲ့တဲ့ အထူးအေးဂျင့်တွေဟာ တာဝန်ကနေ ဆိုင်းငံ့ခံလိုက်ရပါတယ်။ အထက်လူကြီးတွေရဲ့ ထောက်ခံမှုမရတော့ပေမယ့် သူတို့က ဒီကိစ္စကို လက်လျှော့ဖို့ စိတ်ကူးမရှိကြဘူး။ မှန်တာကို ဖော်ထုတ်ဖို့အတွက် သူတို့ရဲ့ တိုက်ခိုက်ရေးကျွမ်းကျင်တဲ့ မိတ်ဆွေတွေနဲ့ စုပေါင်းပြီး ဆက်လှုပ်ရှားကြပါတယ်။ အဓိကဇာတ်ကောင် စနိုက်ပါသမားကိုတော့ ရုပ်ရှင်ထဲက စကားအရ ကမ္ဘာပေါ်မှာ အတော်ဆုံးလို့ ညွှန်းထားတယ်။ ဂျပန်မင်းသမီးတစ်ယောက်ကလည်း လုပ်ကြံရေးသမားအဖြစ် ပါဝင်ထားပြီး သူတို့ရဲ့လှုပ်ရှားမှုတွေကြားမှာ အက်ရှင်ခန်းတွေနဲ့ ဇာတ်လမ်းအလှည့်အပြောင်းတွေ တွေ့ရမှာပါ။

ဂယ်ရီဟာ ဘရော့ဒ်ဝေးက ပြဇာတ်သရုပ်ဆောင်တစ်ယောက်ပါ။ တစ်နေ့မှာ Team America လို့ခေါ်တဲ့ နိုင်ငံတကာရဲတပ်ဖွဲ့ကို ညွှန်ကြားနေသူ စပေါ့စ်ဝုဒ်က သူ့ဆီ ချဉ်းကပ်လာပါတယ်။ ဂယ်ရီကို ပေးချင်တဲ့တာဝန်က အရှေ့အလယ်ပိုင်းသားတစ်ယောက်အဖြစ် ဟန်ဆောင်ပြီး အကြမ်းဖက်သမားတွေဆီက သတင်းနှိုက်ထုတ်ပေးဖို့ပါ။ ပြဇာတ်သရုပ်ဆောင်တစ်ယောက်အနေနဲ့ ဒီတာဝန်ကို လုပ်ရတဲ့အခါ ဂယ်ရီ ဘယ်လိုအလွဲတွေနဲ့ ကြုံရမလဲဆိုတာ ရုပ်သေးရုပ်တွေသုံးပြီး တင်ဆက်ထားပါတယ်။ အက်ရှင်နဲ့ ဟာသကို ရောစပ်ထားတဲ့ သရော်ဇာတ်ကားဖြစ်ပြီး ရိုင်းပျစော်ကားတဲ့ ဟာသအသုံးအနှုန်းတွေလည်း ပါဝင်ပါတယ်။

စီးပွားပျက်ကပ်ကာလမှာ အလုပ်အကိုင်မရှိဘဲ နေနေတဲ့ ကာဂဲယာမာဟာ သူတို့ရပ်ကွက်ကို စောင့်ရှောက်ပေးတဲ့ ယာကူဇာဂိုဏ်းခေါင်းဆောင် ဆရာကြီးကို အားကျနေပါတယ်။ ဆရာကြီးက လူဆိုးဂိုဏ်းခေါင်းဆောင်ဖြစ်ပေမယ့် မြို့သားတွေကို ကာကွယ်ပေးလို့ လူတွေက သူရဲကောင်းတစ်ယောက်လို ချစ်ခင်ကြတယ်။ ကာဂဲယာမာလည်း သူ့နောက်လိုက်လုပ်ရင်း ယာကူဇာတစ်ယောက် ဖြစ်လာပါတယ်။ တစ်နေ့မှာ ဆရာကြီးရဲ့ အရင်အဖွဲ့ကလူတွေ ရောက်လာပြီး သူ့ကို ပြန်လိုက်ခဲ့ဖို့ ခေါ်ကြတယ်။ မလိုက်ဘူးလို့ ငြင်းလိုက်ရာက အသတ်ခံရတဲ့အထိ ဖြစ်သွားပါတယ်။ ကာဂဲယာမာက အစွမ်းကုန်ကယ်ဖို့ ကြိုးစားပေမယ့် သူ့ခွန်အားနဲ့ မတတ်နိုင်ခဲ့ဘူး။ သေခါနီးမှာ ဆရာကြီးက သူ့ရဲ့သွေးစုပ်ဖုတ်ကောင်သွေးကို ကာဂဲယာမာဆီ လက်ဆင့်ကမ်းပေးခဲ့တယ်။ ဒီဇာတ်လမ်းထဲက သွေးစုပ်ဖုတ်ကောင်တွေကတော့ သာမန်နဲ့ မတူပါဘူး။ သွေးစုပ်ခံလိုက်ရတဲ့ မြို့သားတွေဟာ သွေးစုပ်ဖုတ်ကောင်ဖြစ်သွားရုံမက ယာကူဇာတွေပါ ဖြစ်လာကြတယ်။ ကာဂဲယာမာကလည်း အသစ်ရလာတဲ့စွမ်းအားတွေကို အသားကျအောင်၊ ထိန်းချုပ်နိုင်အောင် ကြိုးစားရင်း ဘယ်လိုလက်တုံ့ပြန်မလဲဆိုတာ ဆက်တွေ့ရမှာပါ။ Audition၊ Ichi the Killer နဲ့ Visitor Q တို့ကို ရိုက်ကူးခဲ့တဲ့ ဒါရိုက်တာ Takashi Miike ရဲ့ ၂၀၁၅ ခုနှစ်ထွက် အက်ရှင်၊ ဟာသ၊ ထိတ်လန့်ဇာတ်ကားဖြစ်ပါတယ်။

ကတ်ဒူဗာ ကူရီရာချန်ဟာ မဟုတ်မခံစိတ်ရှိပြီး အမှန်တရားဘက်က ရပ်တည်ပေးတတ်သူပါ။ “ကျား” လို့ အဓိပ္ပာယ်ရတဲ့အမည်ကို ပိုင်ဆိုင်ထားတဲ့ သူ့ကို ပါလာမြို့မှာ ကလေးကအစ လူကြီးအဆုံး သူရဲကောင်းတစ်ယောက်လို သိကြပါတယ်။ တစ်နေ့မှာ အကျင့်ပျက်ဖာသာတစ်ဦးကို ပညာပေးဖို့ အကြောင်းဖန်လာရင်း မြို့မှာ တာဝန်ကျနေတဲ့ ရဲအရာရှိ ဂျိုးဆက်ချန်ဒီနဲ့ အချင်းများသွားတယ်။ အဲဒီကစလို့ နှစ်ယောက်ကြား အငြိုးအတေးတွေ ပေါ်လာပါတယ်။ အငြိုးကြီးတဲ့ ဂျိုးဆက်က ကူရီရာချန်ကို ဘယ်လိုလက်စားချေမလဲ၊ ဒီပဋိပက္ခမှာ ဘယ်သူက အနိုင်ရမလဲဆိုတာနဲ့အတူ မတရားမှုတွေအတွက် အမှုမှန်ပေါ်လာနိုင်မလားဆိုတဲ့ မေးခွန်းလည်း ရှိနေတယ်။ Prithviraj Sukumaran နဲ့ Vivek Oberoi တို့ ပါဝင်သရုပ်ဆောင်ထားတဲ့ အက်ရှင်ဇာတ်ကားပါ။

ဗြိတိန်တော်ဝင်လေတပ်က ကပ္ပတိန်စင်ကလဲရားဟာ အာဖဂန်မှာ တာဝန်ထမ်းဆောင်နေစဉ် သောင်းကျန်းသူတွေရဲ့ ဒုံးကျည်ထိမှန်ပြီး လေယာဉ်ပျက်ကျသွားပါတယ်။ အဖမ်းမခံရအောင် ထွက်ပြေးရင်း ဘန်ကာကြီးတစ်ခုထဲ ရောက်သွားပေမယ့် အဲဒီနေရာမှာလည်း မကောင်းဆိုးဝါးတွေ ရှိနေတယ်။ သူ့နောက်ကို လိုက်လာတဲ့ သောင်းကျန်းသူတွေကို မကောင်းဆိုးဝါးတွေက သတ်ပစ်လိုက်ပြီး စင်ကလဲရားလည်း အသက်လုထွက်ပြေးခဲ့ရပါတယ်။ အဲဒီကနေ လွတ်လာတဲ့ စင်ကလဲရားဟာ ကူးပါးအသေခံတပ်ရင်းစခန်းကို ရောက်သွားတယ်။ သူတွေ့ခဲ့ရတာတွေကို ပြောပြပေမယ့် စခန်းကလူတွေက မယုံကြပါဘူး။ ဒါပေမယ့် အဲဒီညမှာပဲ မကောင်းဆိုးဝါးတွေ စခန်းထဲရောက်လာပြီး စစ်သားတွေကို သတ်ဖြတ်ကြတဲ့အခါ သူ့စကားကို လက်ခံလာကြရပါတယ်။ ကိုယ်တိုင်ကြုံလိုက်ရတဲ့ စစ်သားတွေဟာ ဘန်ကာနဲ့ အဲဒီထဲက မကောင်းဆိုးဝါးတွေကို အမြစ်ဖြတ်ချေမှုန်းဖို့ ကြိုးစားကြပါတော့တယ်။

အိုလံပစ်ပွဲကျင်းပခဲ့တဲ့ ၁၉၈၈ ခုနှစ်ကို နောက်ခံထားတဲ့ ဇာတ်လမ်းပါ။ ကားမောင်းကျွမ်းကျင်တဲ့ လူငယ်တစ်စုဟာ ရန်ပုံငွေအလွဲသုံးစားလုပ်မှုတစ်ခုကို ဖော်ထုတ်ဖို့ အသွင်ယူပြီး စုံစမ်းရေးမှာ ပူးပေါင်းပါဝင်လာကြပါတယ်။ အဲဒီစုံစမ်းမှုကို အက်ရှင်၊ ဟာသနဲ့ မှုခင်းအကြောင်းအရာတွေ ရောစပ်တင်ဆက်ထားပါတယ်။ ယူအာအင်နဲ့အတူ Mouse ထဲက ဘတ်ဂျူဟျွန်း၊ Reply 1988 ထဲက ဂိုဂယောင်းဖြို၊ Winner အဖွဲ့က မင်ဟိုတို့ ပါဝင်သရုပ်ဆောင်ထားပါတယ်။ It's Okay to Not Be Okay မှာ အော်တစ်ဇင်ရှိတဲ့ အစ်ကိုဖြစ်သူအဖြစ် သရုပ်ဆောင်ခဲ့တဲ့ အိုဂျောင်းဆယ်နဲ့ Prison Playbook ထဲမှာ မူးယစ်ဆေးသုံးစွဲသူအဖြစ် ပါဝင်ခဲ့တဲ့ အီဂယူဟျောင်းတို့လည်း ဒီကားမှာ ပါဝင်ထားကြပါတယ်။

အိန္ဒိယတောင်ပိုင်း တမီးလ်နန်ဒူးမှာ ကြက်တိုက်တဲ့ဓလေ့ဟာ ရှေးကတည်းက ရှိခဲ့ပါတယ်။ မာဒူရိုင်နယ်က တိုက်ကြက်တွေကို လေ့ကျင့်ပေးသူ ပက်တရာကာရန်နဲ့ စုံစမ်းရေးရဲအရာရှိ ရာသင်နာဆာမီတို့ကလည်း ကြက်တိုက်ပွဲတွေမှာ အပြင်းအထန် အပြိုင်အဆိုင်ဖြစ်နေကြသူတွေပါ။ ပက်တရာကာရန်ရဲ့ ကျွမ်းကျင်မှုကြောင့် ရာသင်နာဆာမီက တစ်ခါမှ အနိုင်မရခဲ့ဘူး။ သူ့အမေ မသေခင်မှာ ပက်တရာကာရန်ကို နိုင်ချင်တဲ့ ရာသင်နာဆာမီက နည်းမျိုးစုံနဲ့ ကြိုးစားနေပါတယ်။ ပက်တရာကာရန်ရဲ့အုပ်စုထဲမှာတော့ ကာရူပူနဲ့ ဒူရေယန်က သူအနှစ်သက်ဆုံးလူတွေပါ။ ကာရူပူဟာ တိုက်ကြက်တွေ မွေးမြူထိန်းကျောင်းရာမှာ ပါရမီရှိသူဖြစ်ပြီး အီရာနီဆိုတဲ့ မိန်းကလေးကို ချစ်မိနေတယ်။ အီရာနီကတော့ သူ့ကို တကယ်ချစ်လို့မဟုတ်ဘဲ တခြားတစ်ယောက်ကို ရှင်းထုတ်ချင်တာကြောင့် ချစ်တယ်လို့ လိမ်ပြောထားပါတယ်။ ဒီအချစ်ရေးကြောင့် ကာရူပူ ရင်ကွဲရမလား၊ အီရာနီကရော နောက်ပိုင်းမှာ သူ့ကို တကယ်ချစ်လာမလားဆိုတာ မသေချာသေးပါဘူး။ တစ်ဖက်မှာလည်း ပက်တရာကာရန်နဲ့ ရာသင်နာဆာမီတို့ရဲ့ ပြိုင်ဆိုင်မှုက ဘယ်လိုဆက်ဖြစ်လာမလဲဆိုတာ ရှိနေတယ်။ ရိုးရာကြက်တိုက်ပွဲတွေကနေ လူတွေရဲ့ ရှုပ်ထွေးတဲ့ဘဝနဲ့ ဆက်ဆံရေးတွေဆီ ဇာတ်လမ်းကို ချဲ့ပြထားပါတယ်။

ဂရန်နိုက်မြို့မှာ တစ်ချိန်က အင်အားအလွန်ကြီးတဲ့ အမွှာညီအစ်ကိုနှစ်ယောက် ရှိခဲ့ဖူးပါတယ်။ သူတို့ရဲ့အားကြောင့် မြို့ခံတွေ ထိခိုက်ရတာမျိုးရှိခဲ့တော့ လူတွေက ညီအစ်ကိုနှစ်ယောက်ကို ကြောက်လာကြတယ်။ နောက်ဆုံး သူတို့အိပ်နေချိန်မှာ အိမ်ကို မီးတင်ရှို့လိုက်ကြလို့ မိဘနှစ်ပါး သေဆုံးသွားပေမယ့် ညီအစ်ကိုနှစ်ယောက်ကတော့ ဒဏ်ရာတောင်မရဘဲ လွတ်လာခဲ့ပါတယ်။ အဲဒီနောက် အစ်ကိုက ဆမယ်ရီတန်ဆိုတဲ့ နာမည်နဲ့ လူတွေကို ကယ်တင်တဲ့ သူရဲကောင်းဖြစ်လာတယ်။ ညီဖြစ်သူကတော့ နဲမီးစစ်ဆိုတဲ့ နာမည်နဲ့ တစ်မြို့လုံးကို မီးလောင်တိုက်သွင်းဖို့ ကြိုးစားလာပါတယ်။ လမ်းကွဲသွားတဲ့ ညီအစ်ကိုနှစ်ယောက် အကြီးအကျယ် တိုက်ခိုက်ကြပြီးနောက် နှစ်ယောက်လုံး ပျောက်ဆုံးသွားခဲ့တယ်။ နှစ်ပေါင်းများစွာ ကြာလာချိန်မှာတော့ ဒီစွမ်းအားရှင်နှစ်ယောက်နဲ့ ပတ်သက်တဲ့အကြောင်းတွေ ပြန်ပေါ်လာပါတယ်။ စတားလုံး ပါဝင်သရုပ်ဆောင်ထားတဲ့ စူပါဟီးရိုးအက်ရှင်ဇာတ်ကားဖြစ်ပြီး ဒရာမာနဲ့ စိတ်ကူးယဉ်အကြောင်းအရာတွေလည်း ရောစပ်ထားပါတယ်။

Bruce Wayne ဟာ ငယ်ငယ်က လင်းနို့တွေကို ကြောက်တတ်တဲ့ကလေးတစ်ယောက်ပါ။ သူ့မိဘတွေဖြစ်တဲ့ Thomas Wayne နဲ့ Martha Wayne တို့က Wayne Enterprises ကို ပိုင်ဆိုင်တဲ့ သန်းကြွယ်သူဌေးတွေ ဖြစ်ပါတယ်။ တစ်နေ့ ကပွဲသွားကြည့်ရာမှာ Bruce ကြောက်လာလို့ မိသားစုလိုက် စောစောပြန်ခဲ့ကြတယ်။ အပြန်လမ်းမှာ Joe Chill ဆိုသူက ဓားပြတိုက်ပြီး သူ့မိဘနှစ်ပါးကို သတ်သွားခဲ့တာကြောင့် Bruce ဟာ ဝိန်းမိသားစုရဲ့ အိမ်တော်ထိန်း Alfred Pennyworth ရဲ့ လက်ပေါ်မှာ ကြီးပြင်းလာခဲ့ရပါတယ်။ မိဘတွေကို ဆုံးရှုံးခဲ့ရတဲ့ Bruce က ဒုစရိုက်လောကကို ချေမှုန်းဖို့ ရည်ရွယ်ပြီး မြေအောက်လောကထဲ ကိုယ်တိုင်ဝင်ရောက်သွားတယ်။ အဲဒီမှာ အရိပ်အဖွဲ့ရဲ့ခေါင်းဆောင် Ra’s al Ghul နဲ့ တွေ့ပြီး ပညာသင်ယူခဲ့ပါတယ်။ လူတစ်ယောက်ဖြစ်တဲ့ Bruce Wayne အနေနဲ့ အမြဲရှိနေနိုင်မှာ မဟုတ်လို့ တစ်ချိန်က ကိုယ်ကြောက်ခဲ့တဲ့ လင်းနို့ကို သင်္ကေတအဖြစ် ရွေးချယ်လိုက်တယ်။ နောက်ပိုင်း အရိပ်အဖွဲ့ရဲ့ လုပ်ရပ်တွေကို နားလည်လာတဲ့အခါမှာတော့ ကိုယ့်မြို့ကို ကာကွယ်ဖို့ ရင်ဆိုင်ရပါတော့တယ်။ Batman မှာ ထူးခြားတဲ့ သဘာဝလွန်စွမ်းအားမရှိဘဲ တိုက်ခိုက်ရေးစွမ်းရည်၊ ဉာဏ်ရည်နဲ့ နည်းဗျူဟာတွေကို အားကိုးရပါတယ်။ သူ့ဘေးမှာ အိမ်တော်ထိန်းနဲ့ လူယုံဖြစ်တဲ့ Alfred Pennyworth၊ နည်းပညာပိုင်း ကူညီပေးတဲ့ Lucius Fox၊ ငယ်သူငယ်ချင်း Rachel Dawes နဲ့ နောင်မှာ ရဲမင်းကြီးဖြစ်လာမယ့် James Gordon တို့ ရှိနေကြတယ်။ DC Comics ဇာတ်ကောင်ကို

ဒယ်ဗာလန်ကာဆိုတဲ့ မြို့လေးကို ဘာဆီရက်ဒီနဲ့ ဆစ်ဟပ်ပါဆိုတဲ့ ဂန်းစတားနှစ်ယောက်က အုပ်စိုးထားပါတယ်။ သူတို့ရဲ့ဆရာကြီးဖြစ်တဲ့ ဥပဒေအရာရှိ ဆီဗာရက်ဒီ ကွယ်လွန်သွားပြီးနောက် နှစ်ယောက်စလုံးက နိုင်ငံရေးအာဏာရဖို့ အပြိုင်ကြိုးစားလာကြတယ်။ မြို့ခံတွေက သူတို့ကို မုန်းလည်းမုန်း၊ ကြောက်လည်းကြောက်ကြပေမယ့် ဘယ်သူမှ ပြန်မလှန်ရဲကြဘူး။ ဂန်ဂါရာဂျူးကတော့ အဲဒီမြို့မှာ သူငယ်ချင်းတွေနဲ့ ပေါက်ကရတွေလုပ်ရင်း နေတတ်တဲ့ လူငယ်တစ်ယောက်ပါ။ ဥမာဒေဝီဆိုတဲ့ ရဲမေလေး ရောက်လာတဲ့အခါ သူငယ်ချင်းတွေရဲ့အကူအညီနဲ့ သူက လိုက်ပိုးပါတော့တယ်။ တစ်နေ့မှာတော့ သူ့အဖေကို စော်ကားတဲ့ ဆစ်ဟပ်ပါရဲ့လူတွေကို ဂန်ဂါရာဂျူးက ရိုက်နှက်လိုက်တယ်။ အဲဒီကနေ ဂန်းစတားတွေလက်အောက်မှာ ဖိနှိပ်ခံနေရတဲ့ မြို့ခံတွေက အုံကြွလာပြီး သူ့ကို ဂန်းစတားတွေထက်တောင် အစွမ်းရှိသူလို့ ထင်ကာ ထောက်ခံမြှောက်စားကြပါတော့တယ်။ မြို့ခံတွေသာမက ချစ်သူရဲမေလေးကပါ သူ့ကို ဆရာ့ဆရာကြီးလို့ ထင်နေချိန်မှာ ဂန်ဂါရာဂျူးဟာ ဂန်းစတားနှစ်ဖွဲ့ရဲ့ အာဏာလုပွဲကြားကို ရောက်သွားပါတယ်။ ဒီအခြေအနေကို သူဘယ်လိုကိုင်တွယ်မလဲဆိုတာနဲ့အတူ သူငယ်ချင်းတွေရဲ့ ကူညီပံ့ပိုးမှုတွေကို ဟာသရောပြီး ပြထားတယ်။ တစ်ဖက်မှာလည်း အာဏာရှင်တွေလက်အောက်က မြို့ခံတွေရဲ့ဘဝနဲ့ သူတို့ကြုံရတဲ့ ရက်စက်မှုတွေကို ဖော်ပြထားပါတယ်။