အက်ရှင်ကားများ

ရှဇမ်းရဲ့ ဒုတိယမြောက်ရုပ်ရှင်က ပထမကားအဖြစ်အပျက်တွေရဲ့ အဆက်ဖြစ်ပြီး ဒီတစ်ခါမှာတော့ ဂရိနတ်ဘုရားတွေနဲ့ ရင်ဆိုင်ရပါတယ်။ ရှဇမ်းတို့ကို စွမ်းအားပေးခဲ့တဲ့ မှော်တောင်ဝှေးဟာ ဂရိနတ်ဘုရားတွေရဲ့ အစွမ်းတွေကို ခိုးယူထားတဲ့အရာဖြစ်သလို နတ်ဘုရားလောကမှာ မှော်အစွမ်းတွေ မရှိတော့အောင် လုပ်ထားတဲ့အရာလည်း ဖြစ်နေတယ်။ ပထမကားမှာ ဘီလီဘတ်ဆန်က တောင်ဝှေးကို ချိုးပစ်လိုက်ပြီးနောက် နတ်ဘုရားတွေ ကမ္ဘာပေါ် ဆင်းလာနိုင်သွားပါတယ်။ သူတို့ရဲ့အစွမ်းတွေကို ပြန်ယူဖို့ ရောက်လာတဲ့အခါ ရှဇမ်းတို့နဲ့ ထိပ်တိုက်တွေ့ကြတော့တယ်။ လူကြီးရှဇမ်းအဖြစ် Zachary Levi၊ ကလေးဇာတ်ကောင်အဖြစ် Asher Angel နဲ့ စူပါဟီးရိုးဇာတ်ကောင်အဖြစ် Grace Caroline Currey တို့ ပါဝင်ထားပါတယ်။ ပထမကားထက် ဟာသပိုများပြီး မိသားစုအကြောင်းကိုပါ ထည့်ပြောထားတဲ့ ပေါ့ပေါ့ပါးပါး စွန့်စားခန်းဇာတ်ကားပါ။

ခြေရာခံရာမှာ ကျွမ်းကျင်တဲ့ Bonham ဟာ FBI နဲ့ပူးပေါင်းပြီး လူတစ်ယောက်ကို လိုက်လံဖမ်းဆီးရပါတယ်။ သူဖမ်းရမယ့်သူက တခြားသူမဟုတ်ဘဲ သူ့ရဲ့အတော်ဆုံးတပည့် ဖြစ်နေတယ်။ ဆရာက ကိုယ့်တပည့်ကို ပြန်လိုက်ဖမ်းရတဲ့အကြောင်းကို ရှုပ်ထွေးတဲ့ဇာတ်ကွက်တွေ မများဘဲ အက်ရှင်နဲ့ သည်းထိတ်ရင်ဖိုပုံစံ တင်ဆက်ထားပါတယ်။ Bonham အဖြစ် Tommy Lee Jones က သရုပ်ဆောင်ထားပြီး Benecio del Toro လည်း အဓိကပါဝင်ထားပါတယ်။ The Exorcist နဲ့ Cruising တို့ကို ရိုက်ကူးခဲ့တဲ့ William Friedkin ရဲ့ လက်ရာပါ။

အစာဖြစ်တဲ့ ငါးတွေ ရှားပါးလာတဲ့အခါ ငါးမန်းတွေဟာ ရန်လိုလာပြီး ရေထဲဆင်းလာတဲ့ လူတွေကိုပါ စားလာကြပါတယ်။ တစ်နေ့မှာ ငါးဖမ်းခရီးထွက်လာတဲ့ စက်လှေတစ်စီးကို ငါးမန်းတွေ ဝင်ရောက်ရန်ပြုကြတယ်။ ရေလယ်ခေါင်မှာ ပိတ်မိသွားတဲ့ စက်လှေပေါ်က လူတွေဟာ အသက်ရှင်ဖို့အတွက် ကိုယ့်အသက်ကို စွန့်စားပြီး ငါးမန်းတွေကို ပြန်တိုက်ခိုက်ကြရတော့တယ်။

ဒုတိယကမ္ဘာစစ်အတွင်း နော်ဝေးနိုင်ငံမှာ ဗြိတိန်နဲ့ ဂျာမန်လေယာဉ်တွေ တိုက်ခိုက်ကြရင်း ဂျာမန်ဗုံးကျဲလေယာဉ်တစ်စီး နှင်းဖုံးနေတဲ့ လွင်ပြင်ထဲ ပျက်ကျသွားပါတယ်။ သူတို့ပစ်ချခဲ့တဲ့ ဗြိတိန်လေယာဉ်ကလည်း အနီးအနားမှာပဲ ပျက်ကျသွားတယ်။ အသက်ရှင်ကျန်ခဲ့တဲ့ လေယာဉ်မှူးတွေနဲ့ လေတပ်သားတွေဟာ နှင်းတောထဲမှာ ခိုလှုံစရာနေရာ ရှာရင်း အမဲလိုက်တဲလေးတစ်လုံးမှာ ဆုံမိကြပါတယ်။ အဲဒီမှာ ဂျာမန်တွေက ဗြိတိန်လေသူရဲတွေကို စစ်သုံ့ပန်းအဖြစ် ဖမ်းထားလိုက်တယ်။ လူသူနဲ့ဝေးတဲ့ နှင်းတောထဲ တစ်နေရာတည်း ရောက်နေကြတဲ့ ရန်သူနှစ်ဖက်ကြား ဘာတွေဖြစ်လာမလဲ၊ ဒီလိုအခြေအနေမှာ ရန်သူတွေက မိတ်ဆွေဖြစ်လာနိုင်မလားဆိုတဲ့ မေးခွန်းနဲ့ ဇာတ်လမ်းကို ဆက်ထားပါတယ်။ နော်ဝေးမှာ ဖြစ်ပွားခဲ့တဲ့ ဖြစ်ရပ်မှန်ကို အခြေခံထားပြီး Rupert Grint ပါဝင်သရုပ်ဆောင်ထားပါတယ်။ တိုက်ခိုက်ခန်းတွေထက် ဇာတ်လမ်းကို ဖြည်းဖြည်းချင်း ဆက်သွားတဲ့ စစ်ပွဲနောက်ခံကားပါ။

ဂရိနိုင်ငံ အေသင်မြို့ကနေ အမေရိကန်နိုင်ငံ ဝါရှင်တန်ဒီစီကို ပျံသန်းနေတဲ့ လေယာဉ်တစ်စီးကို လမ်းခုလတ်မှာ အကြမ်းဖက်သမားတွေ စီးနင်းပြန်ပေးဆွဲလိုက်ပါတယ်။ အရှေ့အလယ်ပိုင်းက ဒီအဖွဲ့ဟာ အမေရိကန်စစ်တပ် ဖမ်းဆီးထားတဲ့ သူတို့ခေါင်းဆောင်ကို ပြန်လွှတ်ပေးဖို့ တောင်းဆိုတယ်။ ဒါပေမဲ့ ထောက်လှမ်းရေးအရာရှိ ဒေးဗစ်ဂရန့်က သူတို့ရည်ရွယ်ချက်ဟာ ဒီတစ်ခုတည်း မဟုတ်နိုင်ဘူးလို့ သံသယရှိနေပါတယ်။ ဒေးဗစ်ဂရန့်ဟာ ဓားစာခံကယ်ဆယ်ရေးကို လုပ်ဆောင်မယ့် ဗိုလ်မှူးအော်စတင်ထရာဗစ်နဲ့ ပူးပေါင်းရတော့တယ်။ အကြမ်းဖက်သမားတွေရဲ့ နောက်ကွယ်ကရည်ရွယ်ချက်က ဘာဖြစ်မလဲ၊ လေယာဉ်ပေါ်က ဓားစာခံတွေကို ကယ်တင်ဖို့ ဘယ်လိုအသက်စွန့်ရမလဲဆိုတာကို ဆက်ထားတဲ့ အက်ရှင်ဇာတ်ကားပါ။ ၁၉၉၆ ခုနှစ်မှာ ပြသခဲ့ပြီး ဒေးဗစ်ဂရန့်အဖြစ် Kurt Russel၊ ဗိုလ်မှူးအော်စတင်ထရာဗစ်အဖြစ် Steven Seagal တို့ သရုပ်ဆောင်ထားပါတယ်။ John Leguizamo နဲ့ Halle Berry တို့လည်း ပါဝင်ထားကြပါတယ်။

အမေရိကန်နဲ့ မက်ဆီကိုနယ်စပ်က မက်ဆီကိုဂိုဏ်းတစ်ခုရဲ့စခန်းထဲကို အမျိုးသားတစ်ယောက် တစ်ကိုယ်တော်ဝင်တိုက်ပြီး သူ့တူမကို ကယ်ထုတ်ရာက ဇာတ်လမ်းစပါတယ်။ သူ့အစ်မရဲ့ နောက်အိမ်ထောင်ဘက်က မူးယစ်ဆေးဝါးကိစ္စတွေနဲ့ ပတ်သက်နေသူဖြစ်ပြီး ပြဿနာတစ်ခု ရှုပ်ထားခဲ့တာကြောင့် တူမဖြစ်သူ ပြန်ပေးဆွဲခံခဲ့ရတာပါ။ တူမကို ကယ်ထုတ်လာနိုင်ပေမဲ့ အန္တရာယ်က မပြီးသေးဘူး။ ဂိုဏ်းခေါင်းဆောင်ဟာ အမေရိကန်ဘက်က ရဲတွေကိုပါ သူ့အလိုကျ ခိုင်းနိုင်သူဖြစ်နေပါတယ်။ အကျင့်ပျက်ရဲတွေကို အရင်လွှတ်ပြီး သူတို့မိသားစုတစ်စုလုံးကို ဖမ်းထားခိုင်းတယ်။ ပြီးမှ သူကိုယ်တိုင် လိုက်လာပြီး စီရင်မယ်လို့ ကြိမ်းဝါးထားတာကြောင့် အစ်မနဲ့တူမကို ကာကွယ်ဖို့ မူးယစ်ဂိုဏ်းနဲ့ ရဲတွေကိုပါ ရင်ဆိုင်ရတော့တာပါ။ ဂိုဏ်းခေါင်းဆောင်က ဘာကြောင့် ဒီလောက်အထိ အတင်းလိုက်ဖမ်းချင်နေတာလဲ၊ ကယ်ထုတ်လာသူရဲ့ နောက်ကြောင်းမှာရော ဘာတွေရှိခဲ့သလဲ။ ရန်သူအများကြားကနေ တစ်ယောက်တည်း တိုက်ခိုက်ပြီး လွတ်မြောက်နိုင်မလားဆိုတာကို Scott Adkins ပါဝင်သရုပ်ဆောင်ထားတဲ့ ၂၀၁၅ ခုနှစ် အက်ရှင်ဇာတ်ကားမှာ ဆက်ကြည့်ရမှာပါ။

ဒုတိယကမ္ဘာစစ်အတွင်း မျိုးချစ်စိတ်ရှိတဲ့ ပြည်သူတစ်စုက ဂျပန်ဆန့်ကျင်ရေး တော်လှန်ရေးအဖွဲ့တစ်ခု ဖွဲ့စည်းခဲ့ကြပါတယ်။ ဂျပန်တွေ ပုလဲဆိပ်ကမ်းကို တိုက်ခိုက်ပြီးတဲ့နောက် ရုပ်သေးအစိုးရဖြစ်တဲ့ ဝမ်းအစိုးရဟာ အမေရိကန်မဟာမိတ်တပ်ကို စစ်ကြေညာပြီး ဂျပန်ဘက်က ရပ်တည်ခဲ့တယ်။ အဲဒီနောက် ဂျပန်တွေက ရှန်ဟိုင်းတစ်နယ်လုံးကို သိမ်းပိုက်လိုက်ပါတယ်။ စစ်ရေးအခြေအနေတွေ ပြောင်းလာတာနဲ့အမျှ တရုတ်နိုင်ငံလည်း ခံစစ်အနေအထားကို ပြောင်းသွားရတယ်။ Hidden Blade က အဲဒီကာလမှာ ဂျပန်ကိုတော်လှန်ပြီး နိုင်ငံကို ကာကွယ်ဖို့ လှုပ်ရှားကြတဲ့ တရုတ်ကွန်မြူနစ်အဖွဲ့ဝင်တွေရဲ့အကြောင်းကို ရိုက်ကူးထားတာပါ။ Tony Leung နဲ့ Wang Yi bo တို့ ပါဝင်သရုပ်ဆောင်ထားပါတယ်။

စင်ဘာဟာ အရွယ်ရောက်လာပြီး ဘုရင်အဖြစ် သူ့အုပ်စုကို တာဝန်ယူနေပါပြီ။ သူ့အရိုက်အရာကို ဆက်ခံမယ့် သမီးလေးခီယာရာလည်း ရှိနေပြီဖြစ်ပါတယ်။ အဖေနဲ့တူတဲ့ ခီယာရာက ကြီးလာတာနဲ့အမျှ အရာရာကို စူးစမ်းချင်နေတော့ စင်ဘာမှာ သမီးအတွက် စိတ်ပူနေရတယ်။ တစ်ဖက်မှာတော့ နယ်နှင်ခံထားရတဲ့အုပ်စုက ခြင်္သေ့မဇီရာဟာ စကားရဲ့အရိုက်အရာကို ဆက်ခံဖို့ ကိုဘူးကို ပျိုးထောင်နေပါတယ်။ လက်စားချေလိုတဲ့စိတ်နဲ့ ကိုဘူးကို အပြင်းအထန်လေ့ကျင့်ပေးပြီး စင်ဘာကို အလစ်ချောင်းလုပ်ကြံဖို့ အသုံးချဖို့ ကြံထားတာပါ။ အဲဒီအစီအစဉ်အရ စင်ဘာနဲ့ နီးစပ်နိုင်ဖို့ ကိုဘူးက ခီယာရာကို အရင်ချဉ်းကပ်ရတယ်။ ဒါပေမဲ့ အသုံးချဖို့ စခဲ့တဲ့ဆက်ဆံရေးကနေ သူတို့နှစ်ယောက် တကယ်ချစ်မိသွားကြပါတယ်။ အမုန်းတွေ၊ လှည့်စားမှုတွေနဲ့ သစ္စာဖောက်မှုတွေ ရှိနေတဲ့ အုပ်စုနှစ်ခုကြားမှာ ဒီချစ်သူနှစ်ယောက်ရဲ့လမ်းက ဖြောင့်ဖြူးနိုင်ပါ့မလား။ အတူပေါင်းစည်းဖို့ ဘာတွေကို ရင်ဆိုင်ရဦးမလဲ၊ မူဖာဆာပြောခဲ့သလို အားလုံးတစ်သားတည်း ဖြစ်လာနိုင်ပါ့မလား။

ကျင်းယွိမြို့၊ ဟုန်အိမ်တော်က သခင်လေးဟုန်ရိဟာ ငယ်ငယ်ကတည်းက အမေကို ဆုံးရှုံးခဲ့ရပြီး အိမ်တော်သားတွေရဲ့ အနိုင်ကျင့်မှုကို ခံနေရသူပါ။ အမေ့အတွက် မျက်နှာရစေချင်တဲ့စိတ်နဲ့ မြို့တော်မှာ စာမေးပွဲသွားဖြေနိုင်ဖို့ ကြိုးစားနေပါတယ်။ ဒါပေမဲ့ စာမေးပွဲမတိုင်ခင်ညမှာ ထူးဆန်းတဲ့ မိန်းကလေးတွေ ရောက်လာပြီး ချွင်ဟူမျိုးနွယ်ဆီမှာ စာသင်ပေးဖို့ သူ့ကို ဖိတ်ခေါ်ကြတယ်။ အဲဒီနောက် အရှုပ်အထွေးတွေကြား ရောက်သွားတဲ့ ဟုန်ရိဟာ လိုက်လံဖမ်းဆီးတာကိုပါ ခံရပါတယ်။ အခက်အခဲတွေကို ဖြတ်သန်းရင်း ကြုံနေရသမျှဟာ သူ့ဘဝအမှန်နဲ့ ဆက်နွယ်နေကြောင်း သိလာတယ်။ သူ့ဘဝရဲ့ နောက်ကွယ်မှာ ဘာတွေရှိနေတာလဲ၊ ချွင်ဟူမျိုးနွယ်နဲ့ သူ့ကြားမှာရော ဘယ်လိုပတ်သက်မှု ရှိနေတာလဲ။

စင်ဘာရဲ့ သူငယ်ချင်းတွေဖြစ်တဲ့ တီမုန်နဲ့ ပွန်ဘာတို့အကြောင်းကို ပြောပြထားတဲ့ ဒီဇာတ်လမ်းက တီမုန်ရဲ့ မြွေပါအုပ်စုမှာ စပါတယ်။ အင်အားကြီးတဲ့ သားရဲတွေရဲ့ ရန်ကို အမြဲပူနေရတဲ့ သူတို့ဟာ ခွေးအတွေ လာစားမှာကို ကာကွယ်ဖို့ နေ့တိုင်း တွင်းတူးနေကြရတယ်။ တီမုန်ကတော့ တွင်းတူးလိုက်၊ ပုန်းလိုက်နဲ့ နေရတဲ့ ဒီဘဝကို မနှစ်သက်ပါဘူး။ အများနဲ့ အတွေးမတူတဲ့ တီမုန်ဟာ အုပ်စုထဲမှာလည်း အဆင်မပြေဖြစ်လာတယ်။ အပြင်လောကမှာ သူနဲ့ ကိုက်ညီမယ့် နေရာတစ်ခုတော့ ရှိရမယ်လို့ ယုံကြည်တာကြောင့် တစ်နေ့မှာ အမေနဲ့ အဖော်မြွေပါတွေကို ထားခဲ့ပြီး ခရီးထွက်လာပါတယ်။ ဒါပေမဲ့ ဘယ်သွားရမယ်၊ ဘာလုပ်ရမယ်မှန်း မသိတော့လို့ ငိုနေတုန်း ပညာရှိမျောက်ကြီးတစ်ကောင်နဲ့ ဆုံမိတယ်။ မျောက်ကြီးက တီမုန်ရှာနေတာဟာ ဟာကူနာမာထာထာလို့ခေါ်တဲ့ အပူအပင်ကင်းတဲ့ဘဝပဲလို့ လမ်းစပေးလိုက်ပါတယ်။ အဲဒီဘဝကို တွေ့ချင်ရင် မြင်နေရတဲ့အရာထက် ကျော်ပြီး ကြည့်တတ်ဖို့လည်း အကြံပေးတယ်။ အပူအပင်ကင်းရာကို ရှာဖို့ ထွက်လာတဲ့ တီမုန်ဟာ လမ်းမှာ ဘယ်သူတွေနဲ့ ဆုံမလဲ၊ ဘယ်လိုအန္တရာယ်တွေ ကြုံရမလဲ၊ သူစိတ်ကူးထားတဲ့ ဘဝကိုရော ရှာတွေ့နိုင်ပါ့မလား။

ရှေးဟောင်းပစ္စည်းတွေ ရှာဖွေရတာကို နှစ်သက်တဲ့ မောကျင်းအဖွဲ့ဝင် ဟူပါးယီးတို့ဟာ ကောင်းချင်းအုတ်ဂူမှာ စွန့်စားခဲ့ကြပြီးနောက် အဖွဲ့ကွဲသွားကြပါတယ်။ နောက်တော့ အမေရိကန်ပါမောက္ခချိန်က နန်းဟိုင်းရဲ့ သန္တာကျောက်တန်းမှာရှိတဲ့ ချင်ဝမ်အရိုးမှန်ကို ရှာဖို့ သူတို့အဖွဲ့ကို ဖိတ်ခေါ်လာတယ်။ ကောင်းချင်းအုတ်ဂူမှာ ကျိန်စာမိခဲ့တဲ့ ဟူပါးယီးက အစမှာ မလိုက်ဖို့ ငြင်းထားပါတယ်။ ဒါပေမဲ့ အဖွဲ့ဝင်တွေကြောင့် နောက်ဆုံးတော့ ခရီးမှာ လိုက်ပါဖြစ်သွားတယ်။ နန်းဟိုင်းပင်လယ်ကို သွားကြစဉ် နှင်းမိုးတွေ ကျလာသလို ထူးဆန်းတဲ့အရာတွေနဲ့ ဖြစ်ရပ်တွေကလည်း တစ်ခုပြီးတစ်ခု ပေါ်လာပါတယ်။ Pan YueMing နဲ့ Zhang YuQi တို့ ပါဝင်သရုပ်ဆောင်ထားတဲ့ အက်ရှင်စွန့်စားခန်းဇာတ်ကားပါ။ မောကျင်းအဖွဲ့က ရှေ့မှာကြုံရမယ့် အခက်အခဲတွေကို ကျော်ဖြတ်နိုင်မလား၊ ရတနာကို ဆယ်ယူနိုင်မလား၊ ဒါမှမဟုတ် အဲဒီနေရာမှာပဲ အသက်ဆုံးရှုံးကြရမလားဆိုတာ ဆက်ကြည့်ရမှာပါ။

ကျားဖောင်က သူ့စားသောက်ဆိုင်လေးကို တိုးချဲ့ချင်လို့ ငွေတိုးချေးလုပ်ငန်းတစ်ခုဆီက ငွေချေးလိုက်ပါတယ်။ ဒါပေမဲ့ အဲဒီလုပ်ငန်းဟာ ဘယ်ကရလာမှန်းမသိတဲ့ ငွေတွေနဲ့ လည်ပတ်နေပြီး ချေးယူသူတွေ ရုန်းမထွက်နိုင်အောင် အတိုးပေါ်အတိုးဆင့်တဲ့ လှည့်ကွက်တွေ ဆင်ထားတာပါ။ ကျားဖောင်လည်း အကြွေးတွေ ပိလာရာကနေ အသက်အန္တရာယ်ရှိတဲ့အထိ ရောက်လာတယ်။ အဲဒီအချိန်မှာ ဟောင်ကောင်ဘားတစ်ခုမှာ အလုပ်လုပ်တဲ့ ဟောက်ဇီက လမ်းခွဲကြေး သုံးသိန်းရထားပြီး ကြီးပွားဖို့ စိတ်ကူးနဲ့ ကျားဖောင်ဆီ ရောက်လာပါတယ်။ ကျားဖောင်က သူ့ကို လုပ်ငန်းအဖော်အဖြစ် လိုလိုလားလား ကြိုဆိုတော့ ဟောက်ဇီလည်း ဝမ်းသာသွားတယ်။ ဒါပေမဲ့ ကျားဖောင်က စားသောက်ဆိုင်ကို သူ့ဆီလွှဲပြီး ထွက်ပြေးသွားတဲ့အခါ ငွေတိုးချေးသူတွေကို ပြန်ဆပ်ရမယ့်သူက ဟောက်ဇီ ဖြစ်သွားပါပြီ။ နေ့ချင်းညချင်း ဆိုင်ရှင်ဘဝကနေ အကြွေးထူသူဖြစ်သွားတဲ့ ဟောက်ဇီဟာ အတိတ်မေ့နေတဲ့ လူနာတစ်ယောက်နဲ့ ဆုံမိပါတယ်။ ကျားဖောင်ရော တကယ် လွတ်အောင် ပြေးနိုင်မှာလား။ ဟောက်ဇီကရော ဒီအကြွေးတွေကြားက ဘယ်လို ရုန်းထွက်မလဲ၊ ဒါမှမဟုတ် ကျားဖောင်လိုပဲ တခြားတစ်ယောက်ဆီ အကြွေးလွှဲပေးဖို့ လုပ်မလား။

နာဇီလက်အောက် ကျရောက်နေတဲ့ နော်ဝေနိုင်ငံ လွတ်မြောက်ရေးအတွက် မက်စ်မာနက်စ် ကြိုးပမ်းခဲ့ပုံကို ရိုက်ကူးထားတဲ့ ဇာတ်ကားပါ။ သူဟာ နော်ဝေလွတ်မြောက်ရေးကို ဦးဆောင်ခဲ့သူတွေထဲက တစ်ယောက်ဖြစ်ပြီး ဗြိတိန်နဲ့ နော်ဝေနိုင်ငံတို့က ချီးမြှင့်တဲ့ အမြင့်ဆုံးဆုတံဆိပ်တွေ ရရှိခဲ့သူလည်း ဖြစ်ပါတယ်။ နာဇီတွေ နော်ဝေကို သိမ်းပိုက်လိုက်တဲ့သတင်းကြားတာနဲ့ မက်စ်ဟာ နော်ဝေကို ပြန်လာခဲ့တယ်။ အဲဒီမှာ ဂျာမနီရဲ့ ဂက်စတာပိုရဲတပ်ဖွဲ့က အုပ်ချုပ်နေပြီး မက်စ်တို့ဘက်မှာတော့ လူအင်အား မလုံလောက်ပါဘူး။ ဒါကြောင့် မြေအောက်စစ်ဆင်ရေးလုပ်ဖို့ ပြင်ဆင်ကြပြီး စကော့တလန်မှာ စစ်သင်တန်းသွားတက်ကာ အမိမြေကို ပြန်ရဖို့ ကြိုးစားကြပါတယ်။ လှုပ်ရှားမှုတွေ လုပ်ဆောင်ရင်း ဂက်စတာပိုရဲ့ ချောင်ပိတ်ဖမ်းဆီးမှုတွေကို အကြိမ်ကြိမ် ရင်ဆိုင်ရတယ်။ အဲဒီလို ဖမ်းဆီးမှုတွေကြားမှာ သူတို့ရဲ့စစ်ဆင်ရေးတွေကို ဘယ်လို ဆက်အကောင်အထည်ဖော်ကြမလဲဆိုတာ ပြထားပါတယ်။

တာဇံဟာ ဂျိန်းနဲ့လက်ထပ်ပြီး မိဘတွေရဲ့အမွေကို ဆက်ခံကာ အင်္ဂလန်မှာ ဂျွန် ကလေတန်အဖြစ် နေထိုင်နေပါပြီ။ တောထဲကဘဝနဲ့ ဝေးကွာပြီး လူကြီးလူကောင်းတစ်ယောက်အဖြစ် နေထိုင်နေချိန်မှာပဲ ဘာလင်ကွန်ဖရင့်အပြီး ကွန်ဂိုနယ်ကို သိမ်းပိုက်ထားတဲ့ ဘယ်ဂျီယံဘုရင် လီယိုပိုးဒ်က ဒေဝါလီခံရလုနီးပါး အခြေအနေကနေ လွတ်မြောက်ဖို့ နည်းလမ်းရှာနေပါတယ်။ တာဇံနဲ့ ဂျိန်းတို့ ကြီးပြင်းခဲ့ရာ အာဖရိက ဘွန်မာကို ပြန်လာကြတဲ့အခါ ဘုရင့်လူယုံ ရွမ်ရဲ့ အကြံအစည်ထဲမှာ ကြားညပ်သွားပြီး ဂျိန်းလည်း ဖမ်းဆီးခေါ်ဆောင်ခံလိုက်ရတယ်။ ဂျိန်းကို ပြန်ကယ်ဖို့အတွက် တာဇံဟာ သူ့ရဲ့မူလဗီဇနဲ့ စွမ်းအားတွေကို ပြန်အသုံးချပြီး ထောင်နဲ့ချီတဲ့ စစ်တပ်ကို ရင်ဆိုင်ဖို့ ကြိုးစားလာပါတယ်။ သူ့ရှေ့မှာ ရွမ်ရဲ့စစ်သားတွေသာမက ရန်သူဟောင်း မ်ဘွန်ဂါလည်း ရှိနေတယ်။ တစ်ချိန်က သူနဲ့အတူရှိခဲ့တဲ့ လူဝံအုပ်စုတွေကပါ သူ့ကို စွန့်ခွာသွားသူအဖြစ် သတ်မှတ်ထားတာကြောင့် သူတို့ကြားမှာလည်း ရုန်းကန်ရဦးမှာပါ။

ရာဇဝတ်သားတွေကို ထောင်ပြောင်းဖို့ သယ်ဆောင်လာတဲ့ကားဟာ လမ်းခရီးကြမ်းတမ်းတာကြောင့် မကြာခင် ပိတ်တော့မယ့် စခန်းအမှတ် ၁၃ မှာ ခရီးတစ်ထောက် နားဖို့ ဖြစ်လာပါတယ်။ အတိတ်က ဒဏ်ရာတွေကို မကျော်လွှားနိုင်သေးတဲ့ အဓိကဇာတ်ကောင်ဟာ အဲဒီရာဇဝတ်သားတွေနဲ့ ပူးပေါင်းရမယ့် အကြောင်း ပေါ်လာတယ်။ လူကောင်းနဲ့ လူဆိုးကြားက ကွာခြားချက်ဟာ တစ်ခါတလေ အလွန်ပါးလွှာတတ်ပုံကို အက်ရှင်နဲ့ သည်းထိတ်ရင်ဖိုဇာတ်လမ်းအဖြစ် တင်ပြထားပါတယ်။

ဆင်းတုတော်တွေ မကြာခဏ ပျောက်ဆုံးနေတဲ့ မြို့တစ်မြို့ကို ရသေ့တစ်ပါး ရောက်လာပါတယ်။ သူရောက်လာချိန်မှာပဲ ဆင်းတုတော်သူခိုးလို့ စွပ်စွဲခံရတာကြောင့် တရားခွင်မှာ ကိုယ်တိုင်ရှေ့နေလုပ်ပြီး ဖြေရှင်းဖို့ ဖြစ်လာတယ်။ တစ်ဖက်မှာလည်း ဘုရင်က တော်ကောက်ခဲ့တဲ့ မိန်းကလေးတစ်ယောက်ရဲ့ တိုင်ကြားချက်ကို အပြန်အလှန် လျှောက်လဲကြပါတယ်။ တရားခွင်က လျှောက်လဲချက်တွေကတစ်ဆင့် ဖြစ်ခဲ့သမျှကို ပြန်ရိုက်ပြရင်း ဇာတ်ကြောင်းဆက်သွားတဲ့ ပုံစံပါ။ အချိန်ခရီးသွားအကြောင်း၊ ဟာသနဲ့ လူ့စရိုက်ကို သရော်ထားတာတွေလည်း ပါဝင်ပြီး Nivin Pauly နဲ့ Shanvi Srivastava တို့ သရုပ်ဆောင်ထားပါတယ်။

နီဗားဒါးက အရက်ဆိုင်တစ်ခုမှာ လူတွေဟာ ပုံမှန်နေ့တွေလိုပဲ သောက်စားပျော်ပါးနေကြပါတယ်။ အဲဒီအချိန် ဟီးရိုးဆိုတဲ့လူ ရောက်လာပြီး ဆိုင်အပြင်မှာ မကောင်းဆိုးဝါးတွေ ရှိနေပြီလို့ သတိပေးလာတယ်။ အဲဒီအကောင်တွေက လှုပ်ရှားမှုမြန်သလို ရွံစရာအသွင်အပြင်ရှိပြီး အလွန်ဆာလောင်နေကြတာပါ။ မကောင်းဆိုးဝါးတွေ အရက်ဆိုင်ဆီ ရောက်လာတဲ့အခါ ဆိုင်ထဲကလူတွေဟာ အတူပူးပေါင်းပြီး ခုခံဖို့နဲ့ လွတ်မြောက်ဖို့ ကြိုးစားကြရပါတယ်။ ဇာတ်လမ်းတစ်ခုလုံးကို ဒီအရက်ဆိုင်အတွင်းမှာပဲ အခြေတည်ထားပြီး မမျှော်လင့်ထားတဲ့ အဖြစ်အပျက်တွေ ဆက်တိုက်ပေါ်လာတယ်။ အက်ရှင်၊ ဟာသနဲ့ ထိတ်လန့်စရာတွေ ရောထားတဲ့ R သတ်မှတ်ချက်ရ ဇာတ်ကားဖြစ်ပြီး သွေးထွက်သံယိုခန်းတွေ အများအပြား ပါဝင်ပါတယ်။

အလယ်ခေတ်က လူတစ်ယောက် တောအုပ်ထဲက ပြေးထွက်လာပြီး ကားလမ်းအလယ်မှာ သေဆုံးသွားရာက ဇာတ်လမ်းစပါတယ်။ အိုင်တီစီက ဒီသေဆုံးမှုကို မတော်တဆမှုတစ်ခုအဖြစ် ဖန်တီးလိုက်တယ်။ တစ်ဖက်မှာတော့ ပရော်ဖက်ဆာ ဂျွန်စတန်နဲ့ သူ့ရဲ့ရှေးဟောင်းတူးဖော်ရေးအဖွဲ့ဟာ အလယ်ခေတ် ပြင်သစ်နဲ့ အင်္ဂလိပ်တို့ တိုက်ပွဲဖြစ်ခဲ့တဲ့နေရာမှာ တူးဖော်မှုတွေ လုပ်နေကြပါတယ်။ တစ်နေ့မှာ ကိတ်နဲ့ မရက်တို့က ပရော်ဖက်ဆာရဲ့ မျက်မှန်နဲ့ သူ့လက်ရေးနဲ့ ရေးထားတဲ့ အကူအညီတောင်းစာကို ထူးထူးဆန်းဆန်း တွေ့ရှိသွားတယ်။ တွေ့ထားတဲ့ပစ္စည်းတွေကို ကာဗွန်သက်တမ်းစစ်ကြည့်တော့ နှစ်ပေါင်းခြောက်ရာလောက် ရှိနေပြီဆိုတာ သိလိုက်ရပါတယ်။ ပရော်ဖက်ဆာရဲ့သား ခရစ်နဲ့ အဖွဲ့သားတွေဟာ သူ့အဖေ ဘာဖြစ်သွားတာလဲဆိုတာ သိဖို့ အိုင်တီစီဆီ သွားကြတယ်။ ဒီနေ့ခေတ်နဲ့ အလယ်ခေတ်ကြား အသွားအပြန်ခရီးမှာ ခရစ်က သူ့အဖေကို ရှာတွေ့ပြီး ကယ်တင်နိုင်ပါ့မလား။ ခရစ်အဖြစ် Fast and Furious မင်းသား Paul Walker က သရုပ်ဆောင်ထားပါတယ်။

Endgame တိုက်ပွဲကြီးအပြီးမှာ စကော့၊ ဟုပ်၊ ကတ်စီ၊ ဟင်နရီနဲ့ ဂျဲနက်တို့ မိသားစုဟာ အေးအေးချမ်းချမ်း နေနေကြပါတယ်။ ဒါပေမဲ့ မတော်တဆမှုတစ်ခုကြောင့် ကွမ်တမ်လောကထဲကို ရောက်သွားကြပြီး ကွန်ကရာ ခန်းဆိုတဲ့ ရန်သူနဲ့ ရင်ဆိုင်ရပါတော့တယ်။ ခန်းက အချိန်ခရီးသွားနိုင်သလို နည်းပညာအသစ်အဆန်းတွေကိုလည်း တီထွင်နိုင်သူပါ။ အဗန်ဂျာတွေကို သတ်နိုင်လောက်အောင် စွမ်းအားကြီးပြီး ကမ္ဘာတွေ၊ အချိန်စီးကြောင်းတွေနဲ့ အပြိုင်စကြဝဠာတွေကို ဖြတ်သန်းသွားလာရင်း ကမ္ဘာတွေကို ဖျက်ဆီးသိမ်းပိုက်နေတယ်။ ကွမ်တမ်လောကထဲ ရောက်နေတဲ့ စကော့တို့မိသားစုက ဒီရန်သူကို ဘယ်လိုရင်ဆိုင်ကြမလဲ။

ရှန်နုံရတနာသေတ္တာဟာ “ထာဝရရှင်သန်ခြင်းရဲ့ တံခါးဝ” လို့ ဒဏ္ဍာရီတွင်နေတဲ့ အမတဆေးနဲ့ ဆက်နွှယ်နေပါတယ်။ ဒီလျှို့ဝှက်ချက်ကို သိသူက အနည်းငယ်ပဲရှိပြီး အဲဒီထဲက မုဖုန်းချန်ဆိုသူက ရတနာကို လက်ဝယ်ရဖို့ ကြိုးစားလာတယ်။ ရှေးဟောင်းဒဏ္ဍာရီနဲ့ လျှို့ဝှက်ချက်တွေကို ထိန်းသိမ်းတဲ့ ယန်ဟွမ်ခန်းမက မော့ရွှမ်နဲ့ ချန်ရွှင်တို့လည်း ရတနာကို မသမာသူတွေလက်ထဲ မရောက်အောင် အမြန်ရှာဖွေနေကြပါတယ်။ ရတနာသေတ္တာကတော့ စစ်ဦးစီးချုပ် ကျန်းချန်ဇစ်လက်ထဲ ရောက်နေပြီးသားပါ။ ဒါပေမဲ့ သူက ကိုယ့်လက်ထဲရှိတဲ့ပစ္စည်း ဘာလဲဆိုတာ မသိဘူး။ ရတနာကို လိုချင်သူတွေ ပစ်မှတ်ထားလာချိန်မှာ ကျန်းချန်ဇစ်၊ ချန်ရွှင်နဲ့ မော့ရွှမ်တို့ သုံးယောက် ဆက်ပြီး ဘယ်လိုရှာဖွေကြမလဲ။ ပုံရိပ်ယောင်တွေ ပြည့်နေတဲ့ နယ်နိမိတ်ထဲမှာ သူတို့သုံးယောက်ကိုယ်တိုင်ကရော အစစ်အမှန်တွေ ဖြစ်ပါ့မလား။ ရှန်နုံရတနာသေတ္တာနဲ့ အမတဆေးနောက်ကွယ်မှာ ဘာတွေရှိနေပြီး အန္တရာယ်တွေကြားက အမတဆေးဟာ နောက်ဆုံး ဘယ်သူ့လက်ထဲ ရောက်သွားမလဲဆိုတာ မသိရသေးပါဘူး။

Sam နဲ့ Gary တို့မောင်နှမဟာ နပန်းသတ်တာ၊ တိုက်ခိုက်ရတာတွေကို သဘောကျကြပြီး မြို့ထဲက ပြဿနာရှာတတ်တဲ့ ဆယ်ကျော်သက်အဖွဲ့နဲ့လည်း မတည့်ကြပါဘူး။ ဒါပေမယ့် အဲဒီအဖွဲ့ရဲ့ခေါင်းဆောင် Billy က Sam ကို ချစ်ချင်ယောင်ဆောင်ပြီး ချဉ်းကပ်လာတယ်။ သူ့ရည်ရွယ်ချက်က Sam တို့မိဘတွေ ခရီးသွားတုန်း သူတို့အိမ်မှာ ပါတီလုပ်ခွင့်ရဖို့ပါ။ Sam က Billy ကို သဘောကျသွားပြီး အိမ်မှာ ပါတီလုပ်ခွင့် ပေးလိုက်ပါတယ်။ Gary ကတော့ သူ့အစ်မနဲ့ သူ့ကြားကို Billy ဝင်လာတယ်လို့ ခံစားရပြီး လက်စားချေဖို့ ချောင်းနေတယ်။ ပါတီလုပ်တဲ့ညမှာ Billy ရဲ့ သရုပ်မှန်ပေါ်လာလို့ ပြဿနာတွေတက်နေတုန်း ဂြိုလ်သားတွေ ရောက်လာပြီး လူတွေကို တိုက်ခိုက်ပါတော့တယ်။ Billy ကြောင့် အဆင်မပြေဖြစ်ခဲ့ကြတဲ့ Sam နဲ့ Gary တို့မောင်နှမဟာ Gary ရဲ့သူငယ်ချင်းတွေနဲ့အတူ ဂြိုလ်သားတွေကို ရင်ဆိုင်ကြရတော့တယ်။ ကလေးတွေနဲ့ ဂြိုလ်သားတွေကြားက တိုက်ပွဲကို အခြေခံထားတဲ့ သိပ္ပံစိတ်ကူးယဉ် ထိတ်လန့်ဇာတ်ကားပါ။

ကန်နာကာ ထောင်ကထွက်လာချိန်ကနေ ဇာတ်လမ်းစပါတယ်။ သူနဲ့ သူ့အဖေ Vedha တို့ရဲ့ မျက်နှာမှာ အပြုံးအရယ်မရှိဘဲ ကိုယ့်ပန်းတိုင်ဆီ ရောက်ဖို့ပဲ အာရုံစိုက်နေကြတယ်။ ဒီသားအဖကို တစ်မြို့လုံး မသိသူမရှိသလို နာမည်ကြားရုံနဲ့တင် ကြောက်ကြပါတယ်။ သူတို့နောက်ကို လိုက်နေတဲ့ ရဲမေရာမာကလည်း အသေရရ အရှင်ရရ ဖမ်းဖို့ ကြိုးစားနေတယ်။ အရင်က Vedha ဟာ လူချစ်လူခင်ပေါပြီး လူအများက ခေါင်းဆောင်တင်ချင်ကြတဲ့သူပါ။ ချစ်ရတဲ့ဇနီးနဲ့ သမီးလေးအတူ အပူအပင်ကင်းကင်း နေထိုင်ခဲ့ပေမယ့် မိသားစုထဲ ဝင်လာတဲ့ အဖြစ်ဆိုးတစ်ခုကြောင့် အရာရာ ပြောင်းလဲသွားခဲ့ပါတယ်။ နူးညံ့တဲ့ သမီးလေး ထောင်ကျရတဲ့အထိ ဘာတွေဖြစ်ခဲ့သလဲ၊ အဲဒီအတိတ်က သားအဖနှစ်ယောက်ရဲ့ လက်ရှိဘဝနဲ့ ဘယ်လိုဆက်နွယ်နေသလဲဆိုတာ တဖြည်းဖြည်း သိရမှာပါ။ Shiva Rajkumar က Vedha အဖြစ် သရုပ်ဆောင်ထားပါတယ်။ သားအဖနှစ်ယောက် ရာမာ့လက်ကနေ လက်တစ်လုံးခြား လွတ်သွားတတ်သလို ရဲဘက်ကလည်း သူတို့ကို ဖမ်းမိဖို့ အစွမ်းကုန် လိုက်လံကြိုးစားနေပါတယ်။

စိတ်ပညာရှင်လည်းဖြစ်၊ စုံထောက်လည်းဖြစ်တဲ့ ဒေါက်တာအဲလက်စ်ခရော့စ်ဟာ စစ်ဆင်ရေးတစ်ခုမှာ တွဲဖက်ကို ဆုံးရှုံးခဲ့ရပြီးနောက် ကိုယ့်ကိုယ်ကိုယ် ခွင့်မလွှတ်နိုင် ဖြစ်နေပါတယ်။ အဲဒီကတည်းက ဘဝကို ရည်ရွယ်ချက်မရှိဘဲ ဖြတ်သန်းနေခဲ့တာပါ။ ရှစ်လအကြာမှာတော့ ပြည်နယ်လွှတ်တော်အမတ် ဟန့်ခ်ရို့စ်ရဲ့ သမီးလေးရို့စ် ပြန်ပေးဆွဲခံလိုက်ရတယ်။ ကိုယ်ပိုင်ကျောင်းတစ်ခုမှာ ကျောင်းတက်နေတဲ့ ကလေးမလေးဟာ Secret Service ရဲ့ စောင့်ရှောက်မှုအောက်မှာ ရှိနေရင်းနဲ့ပဲ ပြန်ပေးဆွဲခံခဲ့ရတာ ဖြစ်ပါတယ်။ ပြန်ပေးသမားက အဲလက်စ်ဆီ ဖုန်းဆက်ပြီး သူ့ကစားပွဲထဲ ဝင်ပါဖို့ ခေါ်လာတော့တယ်။ အဲလက်စ်အနေနဲ့ ပြန်ပေးသမားရဲ့ ကစားပွဲကို အနိုင်ယူနိုင်မလား၊ ရို့စ်ကိုရော ကယ်ထုတ်နိုင်ပါ့မလား၊ အမှုနောက်လိုက်ရင်း ဘယ်လိုအန္တရာယ်နဲ့ အလှည့်အပြောင်းတွေ ကြုံရမလဲဆိုတာ ဆက်တွေ့ရမှာပါ။ ၂၀၀၁ ခုနှစ်မှာ ထွက်ရှိခဲ့ပြီး မော်ဂန်ဖရီးမန်းက အဲလက်စ်ခရော့စ်အဖြစ် သရုပ်ဆောင်ထားပါတယ်။

ဧကရာဇ်ရဲ့ အတိုင်ပင်ခံ ဂီးဇာမော့တ်ဟာ အာဏာကို ကိုယ်ကျိုးအတွက် အသုံးချနေသူပါ။ သူက သူကောင်းမျိုးတွေဆီက လက်ဆောင်ပဏ္ဏာတွေ အတင်းတောင်းယူသလို ပြည်သူတွေဆီကလည်း အခွန်တွေ အဆမတန် ကောက်ခံနေတယ်။ သူကောင်းမျိုးတွေကတော့ ဂီးဇာမော့တ်နဲ့ အဆင်ပြေမှ အခွင့်အရေးရမှာမို့ ဒီမတရားမှုတွေကို မြင်လျက်နဲ့ ငြိမ်နေကြပါတယ်။ တစ်နေ့မှာ လော့ဒ်ဘားတော့ခ်ကို အကြောင်းပြချက်တစ်ခုနဲ့ မြို့တော်ဆီ ဆင့်ခေါ်ပြီး လာဘ်တောင်းလာပါတယ်။ ဘားတော့ခ်ကတော့ ခေါင်းငုံ့မခံဘဲ တောင်းဆိုချက်တွေကို ပြောင်ပြောင်တင်းတင်း ငြင်းပယ်လိုက်တယ်။ ဒီလိုခုခံလိုက်တဲ့အတွက် သူ့အသက်ကိုပါ ပေးရမယ့် ပြစ်ဒဏ်နဲ့ ရင်ဆိုင်ရပါတော့တယ်။ ဘားတော့ခ်ရဲ့ တပ်မှူးရေဒင်နဲ့ နောက်လိုက်တွေက သခင့်နာမည်ကို ပြန်အဖတ်ဆယ်ဖို့ ဘာတွေလုပ်ကြမလဲ၊ မတရားမှုကိုရော အောင်အောင်မြင်မြင် တွန်းလှန်နိုင်ကြပါ့မလား။ မြင်းစီးစစ်သည်တွေရဲ့ တာဝန်နဲ့ သစ္စာတရားအကြောင်းကို စကားပြောခန်းတွေနဲ့အတူ ပုံဖော်ထားတဲ့ ဇာတ်ကားပါ။