အက်ရှင်ကားများ

အဒဲဟာ ပြင်သစ်က နာမည်ကျော် ဆောင်းပါးရေးဆရာမတစ်ယောက်ဖြစ်ပြီး သူသိပ်ချစ်တဲ့ အမွှာညီမတစ်ယောက် ရှိပါတယ်။ အဒဲရဲ့ နမော်နမဲ့နိုင်မှုတစ်ခုကြောင့် ညီမဖြစ်သူဟာ ခေတ်ပေါ်ဆရာဝန်တွေ မကုသနိုင်တဲ့ ဝေဒနာရပြီး သေလုမျောပါး ဖြစ်နေတယ်။ ညီမကို ဒီအတိုင်း မကြည့်ရက်တော့တဲ့ အဒဲက ရှေးခေတ်မှော်ပညာနဲ့ ကယ်တင်ဖို့ နည်းလမ်းရှာရင်း အီဂျစ်က မံမီတွေနောက် လိုက်ပါတော့တယ်။ သူ့အကြံက မံမီတွေကို အသက်ပြန်သွင်းပြီး ညီမကို ကယ်ဖို့ပါ။ မံမီတွေ၊ ရှေးခေတ်ငှက်တွေနဲ့ မှော်ပညာတွေ ပါဝင်တဲ့ ဒီစွန့်စားခရီးမှာ အခက်အခဲတွေအပြင် အလွဲအချော်တွေလည်း ကြုံရတယ်။ အဒဲရဲ့အကြံ အောင်မြင်နိုင်မလားဆိုတာကို အတည်ပေါက် ဟာသတွေနဲ့ ဆက်ပြထားတဲ့ ပြင်သစ်စွန့်စားခန်းဟာသဇာတ်ကားပါ။

အန်ဂျလိုဟာ လက်ဝှေ့သမားကောင်းတစ်ယောက် ဖြစ်ချင်လွန်းလို့ ရှိသမျှပုံအောပြီး ကြိုးစားခဲ့သူပါ။ ဒါပေမယ့် စိတ်မထိန်းနိုင်လိုက်တဲ့ အခိုက်အတန့်တစ်ခုကြောင့် ထောင်ထဲမှာ ခြောက်နှစ်လောက် နေလိုက်ရပါတယ်။ အားသွန်ခွန်စိုက် ကြိုးစားခဲ့တဲ့ သူ့အိပ်မက်တွေလည်း အဲဒီမှာ ရပ်တန့်သွားခဲ့ရတယ်။ ထောင်က ပြန်ထွက်လာတော့ အန်ဂျလိုရဲ့ အသက်ကလည်း မငယ်တော့ပါဘူး။ အလွဲတွေပြည့်နေတဲ့ ဒုစရိုက်လောကထဲမှာ သူ့အိပ်မက်ကို ပြန်အကောင်အထည်ဖော်နိုင်ဦးမလားဆိုတာ မေးခွန်းဖြစ်လာတယ်။ သူ့ရဲ့လမ်းခရီးကို ဥပဒေမဲ့လက်ဝှေ့ပွဲတွေ၊ ပြင်သစ်ဒုစရိုက်လောကနဲ့ တွဲဖက်ပြထားတဲ့ အက်ရှင်ဒရာမာပါ။

ဂျူယောင်းဆူဟာ ဘုရားသခင်ကို နက်နက်ရှိုင်းရှိုင်း ယုံကြည်တဲ့ သင်းအုပ်ဆရာတစ်ယောက်ဖြစ်ပြီး ပျော်ရွှင်တဲ့ မိသားစုဘဝကို ပိုင်ဆိုင်ထားပါတယ်။ ဒါပေမယ့် သမီးဖြစ်သူ ဂျူဟယ်ရင်း ပြန်ပေးဆွဲခံလိုက်ရတဲ့နောက် သူ့ဘဝလည်း ပြောင်းလဲသွားတယ်။ သမီးကို ပြန်ရှာတွေ့ဖို့ နေ့ရောညပါ ဆုတောင်းရင်း ရှစ်နှစ်ကြာသွားပေမယ့် သမီးကို ပြန်မတွေ့ခဲ့ပါဘူး။ သမီးသေဆုံးသွားပြီလို့ ယုံကြည်ထားချိန်မှာတော့ ဂျူယောင်းဆူဆီ ဖုန်းတစ်ကောလ် ဝင်လာပါတယ်။ ဖုန်းဆက်လာသူက သမီးကို ပြန်လိုချင်ရင် ငွေသန်း ၄၀၀ ပေးရမယ်လို့ ခြိမ်းခြောက်လာတာပါ။ ရှစ်နှစ်လုံး ပျောက်ဆုံးနေတဲ့ သမီးအကြောင်း ပြန်ကြားရချိန်မှာ ဂျူယောင်းဆူတစ်ယောက် ဒီတောင်းဆိုမှုကို ဘယ်လိုရင်ဆိုင်မလဲဆိုတာနဲ့ ဇာတ်လမ်းဆက်သွားပါတယ်။ ၂၀၁၀ ခုနှစ်မှာ ထွက်ရှိခဲ့တဲ့ အက်ရှင်နဲ့ သည်းထိတ်ရင်ဖို ရောစပ်ထားတဲ့ ဒရာမာဇာတ်ကားပါ။

ရာနာဒီယန်ဘုရင်ဟာ ချိုလာ၊ ကွန်ဂူ၊ ကာတာနာခါနဲ့ တခြားမျိုးနွယ်စုများစွာကို သွေးထွက်သံယို စစ်ဆင်တိုက်ခိုက်ပြီး အိန္ဒိယတောင်ပိုင်းကို နှစ်ပေါင်းများစွာ အုပ်စိုးထားပါတယ်။ သူ့ရဲ့ ကြီးမားတဲ့စစ်အင်အားကို ရင်ဆိုင်ပြီး အာဏာလုယူဖို့ ကြံနေသူကတော့ ကိုသီပါ။ ကိုသီဟာ ရာနာဒီယန်ရဲ့ ချေမှုန်းမှုကြောင့် ကုန်းတွင်းပိုင်းကို ထွက်ပြေးခဲ့ရတဲ့ အီနာ့စ်မျိုးနွယ်စုကနေ မွေးဖွားလာသူဖြစ်ပါတယ်။ မျိုးနွယ်စုအင်အား၊ စစ်အင်အား အားကိုးစရာမရှိပေမယ့် ရဲရင့်ပြီး အကြောက်အလန့်မရှိသူပါ။ သူက ချိုလာတွေနဲ့ ပူးပေါင်းပြီး ပန်ဒီယန်တိုင်းပြည်ထဲမှာ သူလျှိုလုပ်ရင်း တိုက်ခိုက်နိုင်ဖို့ အစီအစဉ်တကျ ပြင်ဆင်လာတယ်။ ထောင်ချီတဲ့ စစ်တပ်ကို ရာဂဏန်းလောက်သာရှိတဲ့ တပ်ဖွဲ့နဲ့ ရင်ဆိုင်မယ့် ကိုသီရဲ့အကြံ အောင်မြင်နိုင်ပါ့မလား။ စစ်ပွဲတွေကြားမှာ ဘာတွေ ဆက်ဖြစ်လာပြီး နောက်ဆုံး ထီးနန်းကို ဘယ်သူ သိမ်းယူနိုင်မလဲဆိုတာ တင်ပြထားတဲ့ အိန္ဒိယသမိုင်းနောက်ခံ ရုပ်ရှင်ဖြစ်ပါတယ်။

ဒူအန်ဟာ Makyong ရိုးရာအကအနုပညာရှင်တစ်ယောက်ပါ။ ရန်ပွဲတစ်ခုမှာ ဝင်ပါမိလို့ မိဘတွေက သူ့ကို ကွာလာလမ်ပူဆီ ပို့လိုက်ကြပါတယ်။ မြို့ကြီးမှာ သူငယ်ချင်းတွေနဲ့ အလုပ်မျိုးစုံ လုပ်နေရပေမယ့် သူ့စိတ်ကတော့ Makyong အကဆီမှာပဲ ရှိနေတုန်းပါ။ တစ်နေ့မှာ Makyong အကအကြောင်း သုတေသနလုပ်ချင်တယ်ဆိုတဲ့ မိန်းကလေးတစ်ယောက် ဒူအန်ဆီ ရောက်လာပါတယ်။ ဒါပေမယ့် သူ့နောက်ကွယ်မှာ ဖုံးကွယ်ထားတဲ့အကြောင်းတွေ အများကြီးရှိနေတယ်။ အဲဒီလျှို့ဝှက်ချက်တွေကို ဒူအန်တို့ ဘယ်လိုဖော်ထုတ်ဖြေရှင်းကြမလဲ၊ မိန်းကလေးရောက်လာပြီးနောက် ဘာတွေ ဆက်ဖြစ်လာမလဲဆိုတာ လိုက်ကြည့်ရမှာပါ။

အန်ဂဲလ်ဟာ ဘဝကို ရိုးရိုးသားသား ကြိုးစားဖြတ်သန်းနေသူတစ်ယောက်ပါ။ ဒါပေမယ့် ကောင်မလေးကိစ္စနဲ့ ပိုလီဆိုသူနဲ့ အချင်းများမိရာကနေ ဒုစရိုက်လောကထဲ တဖြည်းဖြည်း ခြေကျွံလာပါတယ်။ ပိုလီက အန်ဂဲလ်ရဲ့ အစွမ်းအစကို မြင်ပြီး သူ့လောကထဲ ခေါ်သွင်းခဲ့ပေမယ့် နောက်ပိုင်းမှာ အန်ဂဲလ်က သူ့ထက်တောင် လက်စောင်းထက်လာတယ်။ အန်ဂဲလ်ကလည်း အထက်တန်းကျောင်းတုန်းက ငယ်ချစ် ဆိုးကို အသုံးချပြီး သူ့အဖေ ရိုဟီလီယိုဆီ ချဉ်းကပ်လာပါတယ်။ သူမုန်းတဲ့ ဆင်ခြေဖုံးဘဝကနေ လွတ်ပြီး အထက်တန်းစားဘဝကို ရောက်ချင်နေတာပါ။ အဲဒီရည်မှန်းချက်အတွက် ဆရာဖြစ်ခဲ့ဖူးတဲ့ ရိုဟီလီယိုနဲ့ အချစ်ပြိုင်ဘက် ပိုလီတို့ကို ဘယ်လိုကျော်တက်ဖို့ ကြိုးစားမလဲ၊ လောဘနဲ့ ရွေးတဲ့ဖြတ်လမ်းတွေမှာ ဘာအခက်အခဲတွေ ကြုံလာပြီး အောင်မြင်နိုင်ပါ့မလားဆိုတာကို ဆက်ပြထားတဲ့ စပိန်အက်ရှင်နဲ့ မှုခင်းဇာတ်လမ်း ဖြစ်ပါတယ်။

အသက်အရွယ်ကြီးလာတဲ့ ဟိဒဲတိုရဟာ သားသုံးယောက်ကို အမွေခွဲပေးဖို့ စီစဉ်လိုက်ပါတယ်။ ဒါပေမယ့် သားအငယ်ဆုံး စဘုရိုက သူ့ကို ကန့်ကွက်ပြောဆိုလာတဲ့အခါ အမွေဖြတ်ပြီး စွန့်လွှတ်လိုက်တယ်။ စဘုရိုဘက်က ဝင်ပြောပေးတဲ့ သစ္စာရှိအမတ်ကိုပါ ပြည်နှင်ဒဏ်ပေးပြီး ကျန်တဲ့သားနှစ်ယောက်ကိုပဲ မြှောက်စားလိုက်ပါတယ်။ ကူရိုဆာဝါရဲ့ Ran ဟာ ရှိတ်စပီးယားရဲ့ King Lear ပြဇာတ်ကို အခြေခံထားပေမယ့် ဇာတ်ကောင်တွေရဲ့ အတိတ်ကိုပါ တဖြည်းဖြည်း ဖော်ပြသွားပါတယ်။ ဟိဒဲတိုရနဲ့ တခြားဇာတ်ကောင်တွေရဲ့ လုပ်ရပ်တွေကို သူတို့ဖြတ်သန်းလာခဲ့တဲ့ ဘဝတွေနဲ့ တွဲပြီး မြင်ရမှာပါ။ မူရင်းစာရေးသူကတော့ လီယာမင်းကြီးနဲ့ယှဉ်ရင် ဟိဒဲတိုရကြုံရတဲ့ ဝေဒနာတွေဟာ သူ့အတိတ်နဲ့ ပိုဆက်စပ်နေတယ်လို့ သုံးသပ်ထားပါတယ်။ တစ်ဖက်မှာလည်း ကိုယ်မထိုက်တန်တဲ့ ဝေဒနာတွေကို ခံစားရသူတွေအကြောင်း ဇာတ်ကောင်အသစ်တွေကနေ ထည့်ပြထားပါတယ်။ ဒီရုပ်ရှင်ကို ရိုက်ဖို့ ပထမဆုံးအကြံရခဲ့တာကတော့ King Lear ကြောင့် မဟုတ်ပါဘူး။ ၁၉၇၅ လောက်မှာ ကူရိုဆာဝါဟာ စစ်နယ်ရှင်တွေ အပြိုင်အဆိုင် အားပြိုင်နေတဲ့ စင်းဂိုခုခေတ်က မိုရိမိုတိုနာရိအကြောင်း ဖတ်မိခဲ့တယ်။ မိုတိုနာရိမှာ လိမ္မာပြီး သစ္စာရှိတဲ့ သားသုံးယောက်ရှိတာကြောင့် သားကောင်းတွေရဲ့ဖခင်အဖြစ် ကျော်ကြားခဲ့ပါတယ်။ အဲဒီသားတွေ မလိမ္မာခဲ့ရင် ဘယ်လိုဖြစ်မလဲလို့ စိတ်ကူးကြည့်ရာကနေ Ran အတွက် အကြံပေါ်လာတာပါ။ အစပိုင်းမှာ King Lear ကို သုံးဖို့ မရည်ရွယ်ခဲ့ပေမယ့် နောက်ပိုင်းမှာ ဇာတ်လမ်းနှစ်ခု

အသက် ၁၉ နှစ်အရွယ် ဂျက်စီ ရိုင်ယန်ဝှိုက်ဟာ ပြစ်မှုတစ်ခုကြောင့် ထောင်ထဲကို ပထမဆုံး ရောက်လာပါတယ်။ ထောင်ထဲမှာ ဆပ်ပြာတုံးပြုတ်ကျရင်တောင် မကောက်ရဲလောက်အောင် ကြောက်ရွံ့နေရတဲ့ သူဟာ ရာဇဝတ်မှုတွေကို ကျွမ်းကျွမ်းကျင်ကျင် စီစဉ်တတ်ပြီး စစ်တုရင်မှာလည်း ပညာရှင်တစ်ဦးဖြစ်တဲ့ ဘရန်ဒန်နဲ့ ဆုံမိတယ်။ ငယ်ငယ်ရွယ်ရွယ်နဲ့ စစ်တုရင်ကစားကွက်တွေကို ကျွမ်းကျင်တဲ့ ဂျက်စီကို ဘရန်ဒန်က သဘောကျသွားပါတယ်။ အဲဒီကနေ သူတို့နှစ်ယောက် ပူးပေါင်းပြီး ထောင်အပြင်မှာ အပြစ်အနာအဆာမရှိတဲ့ ရာဇဝတ်မှုတစ်ခု ကျူးလွန်ဖို့ ကြိုးစားကြတယ်။ ဒါပေမယ့် ကြံစည်ထားသလို လုပ်နိုင်ဖို့က မလွယ်ဘဲ အခက်အခဲတွေ၊ လှည့်ကွက်တွေနဲ့ အခြေအနေအပြောင်းအလဲတွေကို ရင်ဆိုင်ကြရပါတယ်။

Miller ဟာ ဘယ်သော့မဆို ဖွင့်နိုင်တဲ့ သော့ပြင်သမားတစ်ယောက်ပါ။ ငွေနောက်လိုက်ရင်း အကျင့်ပျက်ရဲတစ်ယောက်နဲ့ ပေါင်းပြီး ဖောက်ထွင်းမှုကျူးလွန်ခဲ့ပေမယ့် အဲဒီရဲရဲ့ သစ္စာဖောက်မှုကို ခံလိုက်ရတယ်။ အဲဒီအဖြစ်အပျက်ကြောင့် အခင်ဆုံးသူငယ်ချင်းကို ဆုံးရှုံးခဲ့ရသလို သူကိုယ်တိုင်လည်း ထောင်ကျသွားပါတယ်။ ထောင်ကပြန်ထွက်လာတော့ Miller က ဘဝသစ်ပြန်စချင်နေပြီ။ ဇနီးဟောင်းနဲ့ သမီးအပေါ် ပျက်ကွက်ခဲ့တာတွေကို ပြန်ပေးဆပ်ဖို့ပဲ စိတ်ကူးထားပါတယ်။ ဒါပေမဲ့ သူ့ကြောင့် သေဆုံးခဲ့ရတဲ့ သူငယ်ချင်းရဲ့ညီမက အကူအညီလာတောင်းတယ်။ သူ့အစ်ကိုအတွက် ပြန်ပေးဆပ်ချင်ရင် Miller တတ်ထားတဲ့ စောရပညာကို သုံးပြီး သူမကို ဒုက္ခတွင်းကနေ ကယ်ထုတ်ပေးဖို့ ပြောလာတာပါ။ ဘဝသစ်စဖို့ ရည်ရွယ်ထားတဲ့ Miller တစ်ယောက် ဒုစရိုက်မှုတွေ ပြန်ကျူးလွန်ဦးမှာလား။

ဟိုက်ဒရာဘတ်ရဲဌာနက ရဲမှူးချုပ် မိုဟန်နဲ့ ဒုတိယရဲမှူးချုပ်တွေဖြစ်တဲ့ အာဂျွန်၊ အာဟန်တို့ဟာ တစ်ဌာနတည်းမှာ တာဝန်ထမ်းဆောင်နေကြတဲ့ ရင်းနှီးတဲ့မိတ်ဆွေတွေပါ။ တစ်ရက်မှာတော့ နိုင်ငံတော်ဂုဏ်ပြုဆုပေးပွဲမှာ အာဟန် ဆုလက်ခံပြီး မိန့်ခွန်းပြောနေတုန်း စနိုက်ပါနဲ့ လုပ်ကြံခံလိုက်ရပါတယ်။ မိုဟန်နဲ့ အာဂျွန်လည်း သူတို့မိတ်ဆွေကို သတ်သွားတဲ့တရားခံ ဖော်ထုတ်နိုင်ဖို့ အသည်းအသန် ကြိုးစားကြတယ်။ တစ်ညမှာ အာဂျွန်က အမှုမှန်ကို သိသွားပေမယ့် ကားတိမ်းမှောက်မှုဖြစ်ပြီး အတိတ်မေ့သွားပါတယ်။ ဒါကြောင့် မိုဟန်ရဲ့ လမ်းညွှန်မှုနဲ့အတူ သိထားပြီးသားအမှုကို အစကနေ ပြန်စုံစမ်းရတော့တယ်။ အာဂျွန်က ရက်ပိုင်းအတွင်း မွန်ဘိုင်းမြို့ကို ပြောင်းရတော့မှာမို့ အချိန်လည်း မများတော့ပါဘူး။ သူ့မိတ်ဆွေကို သတ်သွားသူ ဘယ်သူလဲဆိုတာ ပြန်ဖော်ထုတ်ပြီး အချိန်မီ ဖမ်းနိုင်ပါ့မလား။ တယ်လဂူဇာတ်ကား Hunt မှာ အာဂျွန်အဖြစ် Sudheer Babu က သရုပ်ဆောင်ထားပြီး ဇာတ်ကောင်အများကြီးထက် အမှုစုံစမ်းမှုနဲ့ ဇာတ်လမ်းအလှည့်အပြောင်းတွေကို အဓိကထား ရိုက်ကူးထားပါတယ်။

ကိုဗစ်ကပ်ဘေးကို ရင်ဆိုင်ခဲ့ရပြီးနောက် ကမ္ဘာတစ်ဝန်းမှာ နောက်ထပ်မမျှော်လင့်ထားတဲ့ ဖြစ်ရပ်တစ်ခု ပေါ်လာပါတယ်။ လူသန်းနဲ့ချီပြီး တစ်ချိန်တည်း ရုတ်တရက်ပျောက်ကွယ်သွားကြတာပါ။ ကျန်ရစ်သူတွေ ကြောက်လန့်စိုးရိမ်နေကြသလို အကြမ်းဖက်မှုတွေနဲ့ မကောင်းမှုတွေလည်း နေရာအနှံ့မှာ ပိုများလာတယ်။ ဒီအခြေအနေမှာ ကုလသမဂ္ဂခေါင်းဆောင် နစ်ကိုလိုင်း ကာပေသီယန်က ကမ္ဘာ့နိုင်ငံတွေကို တစ်နိုင်ငံတည်းအဖြစ် စုစည်းဖို့ ပြောလာပါတယ်။ ဒီလိုစုစည်းပြီး ကပ်ဘေးနဲ့ ဆင်းရဲမွဲတေမှုတွေကနေ လွတ်မြောက်အောင် ကြိုးစားရမယ်ဆိုတဲ့ သူ့စကားကို လူအများက သဘောကျထောက်ခံကြတယ်။ ဒါပေမဲ့ သူပြောသလို တစ်နိုင်ငံတည်းဖြစ်သွားရင် ကပ်ဘေးကနေ တကယ်လွတ်မြောက်နိုင်မှာလား။ သူ့ရည်ရွယ်ချက်တွေက စစ်မှန်ရဲ့လား၊ ဒါမှမဟုတ် ကမ္ဘာကြီးကို နောက်ဆုံးနေ့ရက်တွေဆီ ဆွဲခေါ်သွားမှာလားဆိုတာကတော့ မေးခွန်းထုတ်စရာ ဖြစ်လာပါတယ်။ ၂၀၂၃ ခုနှစ်ထွက် ဒီအက်ရှင်၊ ဒရာမာနဲ့ လျှို့ဝှက်ဆန်းကြယ်ဇာတ်ကားဟာ Tim LaHaye နဲ့ Jerry B. Jenkins တို့ရဲ့ ဝတ္ထုစီးရီးကို အခြေခံထားတဲ့ Left Behind ရုပ်ရှင်စီးရီးထဲက တစ်ကားပါ။

ဆမ်ချီလ်ဒါးစ်ဟာ ထောင်ထဲဝင်လိုက် ထွက်လိုက်ဖြစ်နေတဲ့ လူဆိုးဂိုဏ်းဝင်တစ်ယောက်ပါ။ နောက်တစ်ကြိမ် ထောင်ကပြန်ထွက်လာတဲ့အခါ ဇနီးဖြစ်သူက ဘုရားသခင်ကို ယုံကြည်ကိုးစားပြီး အတိတ်ကအပြစ်တွေကို ဆေးကြောရင်း ဘဝသစ်စနေပြီလို့ ပြောလာတယ်။ ချီလ်ဒါးစ်ကိုလည်း အရင်လိုမနေတော့ဖို့ တိုက်တွန်းပေမယ့် သူကတော့ အကျင့်ဟောင်းတွေအတိုင်း ဆက်ဆိုးမိုက်နေဆဲပါ။ ဒါပေမယ့် မထင်မှတ်ဘဲ ဘုရားကျောင်းကို လိုက်သွားဖြစ်တဲ့နောက်မှာ သူ့လုပ်ရပ်တွေအတွက် နောင်တရလာပြီး ဘဝကို ပြန်ပြင်ချင်လာတယ်။ အဲဒီကနေ အာဖရိကကို သွားပြီး ပရဟိတလုပ်ငန်းတွေ စလုပ်ဖြစ်လာပါတယ်။ အတိတ်ကလုပ်ရပ်တွေကြောင့် သူ့ကို အထင်သေးနေသူတွေကြားမှာ ဒီလုပ်ငန်းတွေ အောင်မြင်နိုင်ပါ့မလား၊ စေတနာနဲ့ လုပ်ပေးသမျှကရော ချောချောမွေ့မွေ့ ဖြစ်ပါ့မလားဆိုတာ ကြုံရဦးမှာပါ။ ဒီဇာတ်ကားကို အပြင်မှာ တကယ်ရှိတဲ့ ဆမ်ချီလ်ဒါးစ်ရဲ့ စာအုပ်ကို အခြေခံပြီး ရိုက်ကူးထားပါတယ်။

၂၀၁၇ ခုနှစ်ထွက် အက်ရှင်ဇာတ်ကား PSV Garuda Vega ထဲက ဆီခါဟာ ဥပဒေကိုလေးစားပြီး အလုပ်တာဝန်ကို အလေးထားတဲ့ အရာရှိတစ်ယောက်ပါ။ အလုပ်အပေါ် အာရုံစိုက်လွန်းတာကြောင့် ဇနီးဖြစ်သူ ဆွာတိနဲ့ အိမ်ထောင်ရေးက ပြိုကွဲလုနီးပါး ဖြစ်နေပါတယ်။ နောက်ဆုံးမှာ မိသားစုကိုပဲ ရွေးချယ်ပြီး အလုပ်ထွက်ဖို့ ဆုံးဖြတ်လိုက်ပေမယ့် ထွက်ခါနီးမှာ လူသတ်မှုတစ်ခု ပေါ်လာတာကြောင့် သူ့ဆုံးဖြတ်ချက်ကို ရွှေ့ဆိုင်းလိုက်ရတယ်။ အမှုကို လိုက်စုံစမ်းရင်း ဆက်တိုက်ပေါ်လာတဲ့ သဲလွန်စတွေက သူ့ကို နိုင်ငံရေးလှည့်ကွက်တွေကြား ဆွဲခေါ်သွားပါတယ်။ တစ်ဖက်မှာလည်း နီရာဂျန်ဆိုတဲ့ လူငယ်ဟက်ကာတစ်ယောက်ဟာ သူ့လက်ထဲက အချက်အလက်တချို့ကြောင့် လူတစ်စုရဲ့ လိုက်သတ်ခြင်းကို ခံနေရတယ်။ ထွက်ပြေးရင်း ဆီခါနဲ့ မတော်တဆ ဆုံမိတဲ့အခါ သူတို့နှစ်ယောက်ရဲ့ ရန်သူက တစ်ယောက်တည်းဖြစ်နေကြောင်း သိလာရပါတယ်။ မထင်ထားသူတွေပါ ပါဝင်ပတ်သက်နေတဲ့ ဒီကိစ္စကို နှစ်ယောက်သား ဘယ်လိုရင်ဆိုင်ဖြေရှင်းကြမလဲဆိုတာ ဇာတ်ကွက်အလှည့်အပြောင်းတွေနဲ့ ဆက်သွားပါတယ်။

စစ်မြေပြင်က ပြန်လာသူတွေရဲ့ စိတ်ဒဏ်ရာနဲ့ PTSD ကို ကုသပေးဖို့ဆိုပြီး Stalking Fields လို့ခေါ်တဲ့ အမဲလိုက်အစီအစဉ်တစ်ခု ပေါ်လာပါတယ်။ ဒီအစီအစဉ်မှာ စစ်ပြန်တွေ အမဲလိုက်ရမယ့်သူတွေက တိရစ္ဆာန်တွေ မဟုတ်ပါဘူး။ ရာဇဝတ်မှုကျူးလွန်ထားသူတွေနဲ့ ဘဝရှေ့ရေးပျောက်နေသူတွေကို ပြန်ပေးဆွဲပြီး အမဲလိုက်ကွင်းထဲ လွှတ်ပေးထားတာပါ။ နောက်ဆုံးကျန်ရစ်သူကို ဒေါ်လာငါးသိန်းနဲ့ ဘဝအသစ်စဖို့ အခွင့်အရေးပေးမယ်လို့လည်း ကမ်းလှမ်းထားတယ်။ အမဲလိုက်သူတွေထဲမှာ အာဖဂန်စစ်မြေပြင်၌ လူနှစ်ရာကျော်ကို သတ်ခဲ့တဲ့ စစ်ပြန် ဝုဒ်မန်းလည်း ပါဝင်ပါတယ်။ သူဦးဆောင်တဲ့အဖွဲ့က အမဲလိုက်ရင်း သားကောင်အဖြစ် လွှတ်ထားတဲ့ ရာဇဝတ်သားတွေကို ရင်ဆိုင်ရသလို အချင်းချင်း သစ္စာဖောက်မှုတွေနဲ့ပါ ကြုံလာရတယ်။ ဝုဒ်မန်းတို့အဖွဲ့ ဒီအခြေအနေတွေကို ဘယ်လိုကျော်ဖြတ်ကြမလဲဆိုတာ ဆက်တွေ့ရမှာပါ။

၂၀၁၉ ခုနှစ်က Fury ရဲ့ ရှေ့ကအကြောင်းတွေကို ပြန်ပြောထားတဲ့ Furies ဟာ ဗီယက်နမ် အမျိုးသမီးအက်ရှင်ဇာတ်ကားတစ်ကားပါ။ ဘီဆိုတဲ့ ကောင်မလေးဟာ လိင်အလုပ်သမတစ်ယောက်ရဲ့ သမီးဖြစ်ပြီး မိန်းမတွေကို လိင်ကျွန်လို သဘောထားတဲ့ ယောက်ျားတွေကြားမှာ ခက်ခဲစွာ ကြီးပြင်းလာခဲ့ရတယ်။ ရက်စက်တဲ့လူတစ်ယောက်ရဲ့ လက်ချက်ကြောင့် အမေနဲ့ အိမ်ကိုပါ ဆုံးရှုံးလိုက်ရတဲ့နောက် သူ့မှာ နေစရာမရှိတော့ဘဲ လမ်းပေါ်ရောက်လာပါတယ်။ လမ်းပေါ်မှာလည်း လူတစ်စုရဲ့ လိင်အကြမ်းဖက်မှုကို ခံရလုဆဲဆဲအချိန် ဂျက်ကွာလင်က သူ့ကို ကယ်တင်ပေးခဲ့တယ်။ ဂျက်ကွာလင်နဲ့အတူ လိုက်သွားရာက ဘဝတူမိန်းကလေးနှစ်ယောက်ဖြစ်တဲ့ ဟုန်နဲ့ ထန်တို့ကို တွေ့ပြီး ခင်မင်လာပါတယ်။ သူတို့နဲ့ဆုံပြီးမှ ဘီအတွက် မျှော်လင့်ချက်တချို့ ပြန်ရှိလာခဲ့တာပါ။ ဂျက်ကွာလင်ရဲ့ လေ့ကျင့်သင်ကြားပေးမှုကို ခံယူရင်း မိန်းကလေးတွေကို ရောင်းစားနေတဲ့ လူမိုက်ဂိုဏ်းနဲ့ သူတို့သုံးယောက် ရင်ဆိုင်ရဖို့ ဖြစ်လာတယ်။ ကိုယ်ယုံကြည်ရာအတွက် အသက်ကိုပါ စွန့်ဖို့ပြင်ထားကြပေမယ့် သူတို့ရွေးချယ်မယ့် လမ်းတိုင်းမှာ ပေးဆပ်ရမယ့် တန်ကြေးတွေ ရှိနေပါတယ်။

ရတနာကုန်သည်လည်းဖြစ်၊ ငွေကြေးခဝါချသူလည်းဖြစ်တဲ့ မိုးဒိုင်းမွန်းဟာ သူငယ်ချင်း စကန့်နဲ့အတူ ငွေကြေးပမာဏကြီးတဲ့ အလုပ်တစ်ခုကို လက်ခံထားပါတယ်။ အလုပ်အပ်သူက စကန့်ရဲ့ဦးလေးပါ။ အလုပ်မပြီးသေးခင်မှာပဲ ဦးလေးက ပိုက်ဆံကို ခဏသိမ်းထားပြီး အလုပ်ကိုလည်း ဆိုင်းထားဖို့ ပြောလာတယ်။ စကန့်ကတော့ လက်ထဲရောက်နေတဲ့ ဦးလေးရဲ့ငွေကိုသုံးပြီး မူးယစ်ဆေးအရောင်းအဝယ် လုပ်ဖို့ ကြံလိုက်ပါတယ်။ အရောင်းအဝယ်လုပ်နေတုန်း ရဲတွေရောက်လာလို့ ထွက်ပြေးကြရာက ကားမတော်တဆမှု ဖြစ်သွားတယ်။ အဲဒီဖြစ်ရပ်ကြောင့် မိုး အတိတ်မေ့သွားပြီး သူတို့လုပ်ထားသမျှလည်း အလွဲလွဲအချော်ချော် ဖြစ်ကုန်တော့တာပါ။ Liam Hemsworth ပါဝင်သရုပ်ဆောင်ထားတဲ့ အက်ရှင်၊ မှုခင်းနဲ့ သည်းထိတ်ရင်ဖိုဇာတ်ကား ဖြစ်ပါတယ်။

ရာဂျူးဟာ ကိုယ်မှန်တယ်ထင်ရင် ဘယ်သူ့ကိုမှ ဂရုမစိုက်ဘဲ ခပ်မိုက်မိုက်နေတတ်သူပါ။ မလုပ်ရဲတာရယ်လို့လည်း မရှိသလောက်ပဲ။ ဇာတ်လမ်းအစမှာတော့ သူဟာ လူသတ်မှုနဲ့ ထောင်ကျနေပြီး ထောင်ထဲရောက်တာ တစ်ရက်တောင်မပြည့်ခင် ရဲအရာရှိတစ်ယောက်ကို ရိုက်လွှတ်လိုက်ပါတယ်။ အဲဒီနောက် ထောင်ထဲမှာ နာမည်ကြီးလာပြီး တခြားအကျဉ်းသားတွေ လေးစားရသူ ဖြစ်လာတယ်။ အသက်ငယ်ငယ်နဲ့ လူသတ်မှုကြောင့် ထောင်ထဲရောက်လာတဲ့ ရာဂျူးအတွက် အချစ်နဲ့စစ်ဆိုတာ ဘယ်လိုအဓိပ္ပာယ်ရှိနေမလဲ။ ဒီတေလဂူဇာတ်ကားမှာ ရာဂျူးက အကျဉ်းသားတွေကို သူ့နောက်ကြောင်း ပြန်ပြောပြရာကနေ ဇာတ်လမ်းကို ဆက်သွားပါတယ်။

အမေရိကန်တွေ ဖီလစ်ပိုင်ကို ကျူးကျော်တိုက်ခိုက်နေချိန်မှာ သမ္မတက အခြေအနေကို ဖြေရှင်းဖို့ အစည်းအဝေးခေါ်လိုက်ပါတယ်။ ဗိုလ်ချုပ်တွေ၊ ဗိုလ်မှူးတွေ၊ စီးပွားရေးလုပ်ငန်းရှင်တွေနဲ့ နိုင်ငံရေးသမားတွေကြားမှာ ဘယ်လိုတုံ့ပြန်သင့်သလဲဆိုတာကို အပြန်အလှန် ငြင်းခုံဆွေးနွေးကြတယ်။ ဗိုလ်ချုပ်လူနာက အမေရိကန်တွေ အင်အားနည်းနေတုန်း တိုက်ခိုက်ရမယ်၊ မဟုတ်ရင် တစ်နိုင်ငံလုံး ကျွန်ဘဝရောက်လိမ့်မယ်လို့ တင်ပြပါတယ်။ စီးပွားရေးသမားတွေကတော့ ကိုယ့်အကျိုးစီးပွား ထိခိုက်မှာစိုးလို့ ငြိမ်းချမ်းရေးကမ်းလှမ်းဖို့ပဲ လိုလားကြတယ်။ နောက်ဆုံးမှာ သမ္မတက ငြိမ်းချမ်းရေးကမ်းလှမ်းရင်း စစ်ရေးအတွက်ပါ ပြင်ဆင်ထားဖို့ ဆုံးဖြတ်လိုက်ပါတယ်။ အဲဒီအချိန်မှာပဲ အမေရိကန်တွေက မနီလာမြို့အပါအဝင် တခြားနေရာတွေကို သိမ်းယူလိုက်ကြတယ်။ ဖီလစ်ပိုင်ဘက်က အထိနာသွားတဲ့နောက် ဗိုလ်ချုပ်လူနာတို့ ဘယ်လိုတုံ့ပြန်ကြမလဲဆိုတာကို ဖြစ်ရပ်မှန်အခြေခံ ဇာတ်လမ်းအဖြစ် ဆက်ပြထားပါတယ်။

ယူဆိုတဲ့ကောင်လေးဟာ Ace rank အကောင့်တစ်ခု ပိုင်ဆိုင်ထားပြီး ဂိမ်းကို အလွန်အမင်း စွဲလမ်းနေသူပါ။ ဂိမ်းဆော့ပြီဆို ထမင်းမေ့ဟင်းမေ့ဖြစ်ရုံတင်မက အဖေနဲ့ ချစ်သူကိုပါ မေ့ထားတတ်တယ်။ တစ်နေ့မှာ သူနဲ့ ဂိမ်းတစ်ပွဲတည်းမှာ ဆုံခဲ့တဲ့အကောင့်တစ်ခုက ဂိမ်းဆော့ရင်း ပိုက်ဆံရှာနိုင်မယ့်အကြောင်း စာပို့လာပါတယ်။ ယူလည်း သံသယရှိပေမယ့် စိတ်ဝင်စားလာတယ်။ အဲဒီအလုပ်က ဂိမ်းစည်းမျဉ်းတွေနဲ့ ဆန့်ကျင်နေတဲ့ rank တင်ပေးရတဲ့အလုပ်ပါ။ ဂိမ်းဆော့ရင်း ဝင်ငွေရမယ့် ဒီအလုပ်ရဲ့နောက်ကွယ်မှာ ဘာတွေရှိနေမလဲ။ ထိုင်းအက်ရှင်မှုခင်းဒရာမာဖြစ်ပြီး လောဘပိုကြီးလာကြတဲ့ လူတွေရဲ့ အငြိုးအာဃာတတွေနဲ့ ဆက်ဆံရေးတွေ ပျက်စီးရတဲ့အထိ အလွန်အမင်း စွဲလမ်းကြပုံကို ဆက်ပြထားပါတယ်။

အိမ်ခြံမြေသူဌေးကြီး ဒေမီယန်ဟေးလ်ဟာ ငွေကြေးအလွန်ချမ်းသာပေမယ့် ကင်ဆာနောက်ဆုံးအဆင့် ရောက်နေပြီး နောက်ထပ်ခြောက်လတောင် အသက်ရှင်ဖို့ မရှိတော့ပါဘူး။ အဲဒီအချိန်မှာ သူ့အသိစိတ်ကို တခြားခန္ဓာကိုယ်တစ်ခုထဲ ပြောင်းထည့်ပြီး ဆက်အသက်ရှင်နိုင်မယ်ဆိုတဲ့ «အရေခွံလဲခြင်း» အစီအစဉ်ကို လက်ခံလိုက်ပါတယ်။ ဒီလိုနဲ့ အက်ဒ်ဝပ်ကစ်ဒ်နာဆိုတဲ့ နာမည်အသစ်ကိုယူပြီး ဘဝအသစ်မှာ ပျော်ပျော်ရွှင်ရွှင် နေထိုင်လာတယ်။ ဒါပေမယ့် ထင်ယောင်ထင်မှားဖြစ်မှုတွေကနေတစ်ဆင့် သူယူထားတဲ့ခန္ဓာကိုယ်ဟာ ဓာတ်ခွဲခန်းမှာ ဖန်တီးထားတာမဟုတ်ဘဲ တကယ့်လူတစ်ယောက်ရဲ့ ခန္ဓာကိုယ်ဖြစ်နေမှန်း သိလာရပါတယ်။ အဲဒီနောက် ဖုံးကွယ်ထားတဲ့အကြောင်းတွေကို လိုက်စုံစမ်းရင်း ဘယ်လိုအန္တရာယ်တွေ ရင်ဆိုင်ရမလဲဆိုတာကို ဆက်ပြထားတယ်။ Ryan Reynolds ပါဝင်သရုပ်ဆောင်ထားတဲ့ ၂၀၁၅ ခုနှစ်ထွက် သိပ္ပံစိတ်ကူးယဉ် အက်ရှင်ဇာတ်ကားပါ။

ဆေးရုံတစ်ခုမှာ သားယောက်ျားလေး မွေးလို့ ပျော်နေကြတဲ့ မိသားစုနှစ်စု ရှိပါတယ်။ ကလေးနှစ်ယောက်က တစ်နေ့တည်း၊ တစ်ချိန်တည်း မွေးလာကြပေမယ့် ကြီးပြင်းရမယ့်ဘဝတွေက မတူကြဘူး။ တစ်ယောက်က ချမ်းသာတဲ့မိသားစုမှာ လိုလေသေးမရှိ နေရမှာဖြစ်ပြီး နောက်တစ်ယောက်ကတော့ ရုန်းကန်ရမယ့်ဘဝမှာ နေရမှာပါ။ ဘီလျံနာမိသားစုဆီမှာ အလုပ်လုပ်တဲ့ ဗယ်မီကီက အဲဒီအခြေအနေကို ပြောင်းပစ်လိုက်ပါတယ်။ သူ့သားကို ဘုရင်တစ်ပါးလို နေစေချင်ပြီး အလုပ်ရှင်ရဲ့သားကိုတော့ သူ့လို ရုန်းကန်ရတဲ့ဘဝမျိုး ကြုံစေချင်တာကြောင့် ကလေးနှစ်ယောက်ကို လဲပစ်လိုက်တယ်။ သူ့လက်ထဲမှာ ကြီးပြင်းလာတဲ့ ဘန်တူကို အမုန်းနဲ့ လျစ်လျူရှုမှုတွေပဲ ပေးခဲ့ပေမယ့် ချမ်းသာတဲ့အိမ်မှာ အလိုလိုက်ခံနေရတဲ့ သားအရင်း ရာ့ဂျ်ကိုတော့ ကျေနပ်ပီတိနဲ့ ကြည့်နေခဲ့ပါတယ်။ Kartik Aaryan နဲ့ Kriti Sanon တို့ ပါဝင်ထားတဲ့ ဒီဇာတ်ကားမှာ မွေးကတည်းက ဘဝချင်းလဲခံထားရတဲ့ သူတို့နှစ်ယောက် ဘာတွေ ဆက်ကြုံရမလဲ၊ ကိုယ့်ဘဝအမှန်ကိုရော သိသွားကြမလားဆိုတာ ဆက်ပြထားပါတယ်။

လန်ဒန်က တံတားအင်ဂျင်နီယာတစ်ယောက်ဟာ အာဖရိကတိုက်၊ ဆာဗိုမှာ တံတားတစ်စင်းကို ငါးလအတွင်း အပြီးဆောက်ဖို့ တာဝန်ပေးခံရပါတယ်။ အဲဒီကို ရောက်သွားတော့ အလုပ်သမားအချင်းချင်း မတည့်တာ၊ ဆေးရုံကောင်းကောင်းမရှိတာ စတဲ့အခက်အခဲတွေကို ရင်ဆိုင်ရတယ်။ အဲဒီထက် ပိုကြီးတဲ့ပြဿနာကတော့ ခြင်္သေ့တွေ လူလာဆွဲနေတဲ့ကိစ္စပါ။ အစပိုင်းမှာ သူက အပင်ပေါ်ကနေ ခြင်္သေ့တစ်ကောင်ကို ပစ်သတ်ပေးနိုင်ခဲ့လို့ အလုပ်သမားတွေလည်း စိတ်ချမ်းသာသွားကြပြီး တံတားဆောက်တဲ့အလုပ် ပြန်အဆင်ပြေလာတယ်။ ဒါပေမဲ့ နောက်ပိုင်းမှာ ခြင်္သေ့တွေ ပိုအတင့်ရဲလာပြီး လူတွေကို ပိုသတ်လာကြပါတယ်။ တံတားလည်း ဆက်မဆောက်နိုင်၊ ခြင်္သေ့တွေကိုလည်း မနှိမ်နင်းနိုင်ဖြစ်နေချိန်မှာ အာဖရိကလူမျိုးစုတွေနဲ့အတူ အမဲလိုက်လေ့ရှိတဲ့ နာမည်ကျော်မုဆိုးတစ်ယောက် ရောက်လာတယ်။ သူတို့နှစ်ယောက် ခြင်္သေ့တွေကို နှိမ်နင်းနိုင်ကြမလား၊ ကိုယ်စီရဲ့အိပ်မက်တွေကရော ပြည့်လာပါ့မလားဆိုတာကို ဆက်ကြည့်ရမှာပါ။ ဖြစ်ရပ်မှန်ကို အခြေခံထားတဲ့ ဒီစွန့်စားခန်းဒရမ်မာမှာ Val Kilmer နဲ့ Michael Douglas တို့ ပါဝင်သရုပ်ဆောင်ထားပါတယ်။

ဝက်ဆက်ဘုရင် အက်ဒ်ဝက် ကွယ်လွန်ပြီးနောက် သားဖြစ်သူ အဲသည်စတန် နန်းတက်လာပါတယ်။ သူဟာ ဖခင်ရဲ့ မပြီးပြတ်သေးတဲ့ ဆန္ဒဖြစ်တဲ့ အင်္ဂလန်ပြည်ကြီးကို တည်ထောင်နိုင်ဖို့ ဆက်ကြိုးစားနေတယ်။ ဒါပေမဲ့ ဘုရင်ဟောင်း မရှိတော့တဲ့အခါ အရင်က မဟာမိတ်ဖြစ်ခဲ့ကြတဲ့ နိုင်ငံတွေကလည်း ခွဲထွက်ဖို့ လှုပ်ရှားလာကြပါတယ်။ အူထရက်ရဲ့ အကူအညီနဲ့ မဟာမိတ်ဖွဲ့ထားခဲ့တဲ့ နော့သမ်းဘီးယား၊ ဝင်ချက်စတာ၊ စကော့တလန်နဲ့ ဝေလတို့ဟာ အခုတော့ ဝက်ဆက်ဘုရင်သစ်ကို တော်လှန်ဖို့ အချင်းချင်း ပူးပေါင်းလာကြတယ်။ ဒီအခြေအနေကို လက်ပိုက်ကြည့်မနေနိုင်တဲ့ ဘီဘာမ်ဘာ့ရဲ့ အူထရက်လည်း ဝင်ပါရပါတော့တယ်။ The Last Kingdom ဇာတ်လမ်းတွဲကို အဆုံးသတ်ပေးထားတဲ့ ဒီရုပ်ရှင်မှာ အူထရက်နဲ့ ဝက်ဆက်ပြည်ရဲ့ အနာဂတ် ဘယ်လိုဖြစ်သွားမလဲ၊ အင်္ဂလန်ပြည်ကြီးကိုရော တည်ထောင်နိုင်မလားဆိုတာ ဆက်ပြထားပါတယ်။

ဆယ်ကျော်သက်ကောင်လေး ဖွန်းဟိုဟာ ကိုယ်ခံပညာကို ကောင်းကောင်းတတ်မြောက်ထားပြီး အပိုမုန့်ဖိုးရဖို့ အွန်လိုင်းက တရားမဝင်ချန်နယ်တွေမှာ ပြိုင်ဘက်ရှာကာ စိန်ခေါ်ထိုးသတ်လေ့ရှိပါတယ်။ ဒါပေမဲ့ သူဝင်ထိုးနေတဲ့ အပျော်တမ်းပွဲတွေအပြင် ပိုကြမ်းတမ်းတဲ့ ထိုးသတ်ပွဲတွေလည်း ရှိနေတယ်။ အဲဒီပွဲတွေမှာတော့ အနိုင်အရှုံးတင်မကဘဲ ပြိုင်ဘက် သေဆုံးသွားတဲ့အထိ ဒါမှမဟုတ် မသန်စွမ်းဖြစ်သွားတဲ့အထိ ထိုးသတ်ကြတာပါ။ ထိုးသတ်ပွဲတွေကြောင့် လူသေမှုတွေ ဖြစ်လာတဲ့အခါ ဖွန်းဟိုရဲ့အစ်ကို ရဲအရာရှိက လိုက်စုံစမ်းပါတယ်။ အဲဒီလို စုံစမ်းရင်း တကယ့်သတ်ကွင်းက လူတွေအစား မုန့်ဖိုးရှာနေတဲ့ ကိုယ့်ညီကိုပဲ ဖမ်းမိသွားတော့တယ်။ ပြစ်မှုမှတ်တမ်း မဝင်ဖို့အတွက် ဖွန်းဟိုဟာ အစ်ကိုရဲ့ ဆုံးမဒဏ်ပေးမှုအောက်မှာ သက်ကြီးရွယ်အိုတွေကို ပရဟိတအနေနဲ့ လိုက်ကူညီပေးရပါတယ်။ တစ်နေ့မှာတော့ အစ်ကိုဖြစ်သူဟာ တရားမဝင်သတ်ကွင်းတစ်ခုကို စုံစမ်းရင်း အသက်အန္တရာယ်နဲ့ ကြုံလာရတယ်။ အစ်ကို သေလုဆဲဆဲဖြစ်နေချိန်မှာ ဖွန်းဟို ဘယ်လိုဆက်လုပ်မလဲဆိုတာကို ဟာသနဲ့ အက်ရှင်ရောစပ်ပြီး တင်ပြထားပါတယ်။