သည်းထိတ်ရင်ဖိုကားများ

အံစာတုံးနှစ်တုံးလုံးမှာ တစ်မှတ်စီကျတာကို မြွေမျက်လုံးနှစ်လုံးနဲ့ တူလို့ Snake Eyes လို့ ခေါ်ကြပြီး ကံဆိုးမှုနဲ့လည်း တင်စားကြပါတယ်။ ဒီဇာတ်ကားမှာ Nicolas Cage က အကျင့်ပျက်ချစားမှု၊ ငွေညှစ်မှုနဲ့ ဖောက်ပြန်မှုတွေ ရှိနေတဲ့ ရဲသား ရစ်ချက်ဆန်တိုရိုအဖြစ် သရုပ်ဆောင်ထားပါတယ်။ ရစ်က လောင်းကစားလုပ်ဖို့နဲ့ ရာထူးတိုးဖို့အတွက် သူငယ်ချင်းရဲ့ အကြီးအကဲကို မျက်နှာလုပ်ဖို့ဆိုပြီး ဟဲဗီးဝိတ်ချန်ပီယံပွဲကို သွားခဲ့တယ်။ ဒါပေမဲ့ သူလောင်းထားတဲ့ဘက်က နိုင်ဖို့ သေချာနေရာက ရှုံးသွားသလို သူ အကူအညီတောင်းဖို့ ကြံထားတဲ့ အကြီးအကဲကလည်း ပွဲခင်းထဲမှာပဲ လုပ်ကြံခံလိုက်ရပါတယ်။

ကွိုင့်က မိသားစုစားဝတ်နေရေးအတွက် သင်္ဘောသီးထောင်းရောင်းပြီး ရှာဖွေကျွေးမွေးနေရသူပါ။ နေရာကောင်းကောင်းမှာ အိမ်သစ်လေးတစ်လုံးနဲ့ နေချင်ပေမယ့် ခင်ပွန်းဖြစ်သူ ဂိုက လောင်းကစားစွဲနေတာကြောင့် သူ ဘယ်လောက်ကြိုးစားကြိုးစား အရာမထင်ဖြစ်နေရတယ်။ တစ်နေ့တော့ အဝေးမှာနေတဲ့ သူဌေးဆွေမျိုး သခင်မကြီးထောင်းရမ်ဖိုင်ဆီက စာတစ်စောင်နဲ့ ရထားလက်မှတ်တွေ ရောက်လာပါတယ်။ သခင်မကြီးက နေမကောင်းဖြစ်နေပြီး ကွိုင့်ကို အမွေပေးချင်လို့ လာခေါ်တာပါ။ ကွိုင့်က သွားသင့်မသွားသင့် တွေဝေနေတုန်း ဂိုရဲ့အကြွေးရှင်တွေ လိုက်လာတော့ မိသားစုလိုက် သခင်မကြီးရဲ့ စံအိမ်ဆီ ထွက်လာရတော့တယ်။ ဆွေမျိုးတော်တယ်ဆိုတဲ့ သခင်မကြီးကို ကွိုင့်က ဘာလို့ မသိတာလဲ၊ အမွေကိုလည်း ဘာကြောင့် သူ့ကိုမှ ပေးချင်ရတာလဲဆိုတဲ့ မေးခွန်းတွေ ရှိနေပါတယ်။ ဒီစံအိမ်ကြီးထဲမှာ ဘာလျှို့ဝှက်ချက်တွေ ရှိနေမလဲဆိုတာကို ထိတ်လန့်စရာတွေနဲ့ ဟာသရောပြီး တင်ပြထားပါတယ်။ သခင်မကြီးထောင်းရမ်ဖိုင်အဖြစ် Noi Nuttanee၊ ကွိုင့်အဖြစ် Gwang Wanpiya၊ ဂိုအဖြစ် Kong Huayrai နဲ့ ကစ်ပ်အဖြစ် Fond Natticha တို့ ပါဝင်ထားကြပါတယ်။

ရဲတပ်သားသစ် တက်ခ် တာဝန်ကျနေတဲ့နေရာအနီးက ကုန်တိုက်တစ်ခုကို ယာကူဇာတွေ ဓားပြဝင်တိုက်ခဲ့ပါတယ်။ အဲဒီဓားပြမှုမှာ မိန်းကလေးသုံးယောက်နဲ့ ဝန်ထမ်းအမျိုးသမီးတစ်ယောက် အသတ်ခံလိုက်ရတယ်။ အဲဒီနောက် တက်ခ်က ကျူးလွန်သွားတဲ့ ယာကူဇာတွေနောက်ကို လိုက်ပြီး လက်စားချေဖို့ ကြိုးစားလာပါတယ်။ တစ်ဖက်မှာလည်း အင်အားကြီး ယာကူဇာဂိုဏ်းတစ်ခုကို ဖြိုချဖို့ သူ့ကို အသွင်ယူရဲအဖြစ် တာဝန်ပေးလိုက်တယ်။ ဒီလိုနဲ့ လက်စားချေဖို့ လိုက်နေတဲ့ တက်ခ်ဟာ ယာကူဇာဂိုဏ်းထဲကို အသွင်ယူဝင်ရောက်လာပါတော့တယ်။

လူသိနည်းတဲ့ နယ်မြို့လေးတစ်မြို့မှာ Russ ကြောင့် ရင်းနှီးမြှုပ်နှံငွေတွေ ဆုံးရှုံးထားရသူတွေ ရှိနေပါတယ်။ အဲဒီလူတွေက သူ့ကို မကျေနပ်ကြတော့ Russ လည်း ဘယ်သူ့ကို သတိထားရမလဲဆိုပြီး ကျီးလန့်စာစား နေနေရတယ်။ ဒီလိုအချိန်မှာပဲ သူ့ဘေးအိမ်က Delaine နဲ့ Carl တို့ သားအဖရဲ့အိမ် ဖောက်ထွင်းခံရပြီး အဖေဖြစ်သူ Carl အသတ်ခံလိုက်ရပါတယ်။ မူလကတည်းက ကိုယ့်အန္တရာယ်ကိုယ် စိုးရိမ်နေတဲ့ Russ က ဒီလူသတ်မှုဟာ သူ့ကို ပစ်မှတ်ထားရာက အိမ်မှားသွားတာများလားလို့ တွေးပြီး ပိုပူပန်လာတယ်။ ဒါပေမဲ့ မြို့သေးသေးလေးထဲမှာ လူသတ်မှုတွေ ဆက်တိုက်ဖြစ်လာတဲ့အခါ ကိစ္စက ဒီတစ်မှုတည်းနဲ့ ရပ်မနေတော့ပါဘူး။ Morgan Freeman က ရဲမှူး Thurmond အဖြစ် ပါဝင်ထားပြီး ကောင်းမှု၊ မကောင်းမှုနဲ့ သေပြီးနောက် ဘယ်ကိုရောက်မလဲဆိုတဲ့ အတွေးတွေကိုလည်း ဇာတ်လမ်းထဲမှာ ထည့်သွင်းထားပါတယ်။

ပြင်သစ်နိုင်ငံက မြို့ငယ်လေးတစ်မြို့မှာ မိသားစုတစ်စု အသတ်ခံရပြီး အသက်ငင်နေတဲ့ ကောင်လေးတစ်ယောက်ကိုတော့ ဆေးရုံအချိန်မီ ပို့နိုင်ခဲ့ပါတယ်။ အသက်ရှင်ခဲ့ပေမယ့် ကိုမာဝင်သွားတာကြောင့် သုံးနှစ်လောက် သတိလစ်နေခဲ့တယ်။ ပြန်နိုးလာတဲ့အခါမှာလည်း အိမ်မှာ ဘာတွေဖြစ်ခဲ့သလဲဆိုတာ သေချာမမှတ်မိတော့ပါဘူး။ ဒီလူသတ်မှုရဲ့ အမှန်တရားကို ဖော်ထုတ်ဖို့ သူကသာ မျှော်လင့်ချက်ဖြစ်နေတာကြောင့် စိတ်ပညာရှင် ဒေါက်တာအန်နာက သူ့မှတ်ဉာဏ်တွေ ပြန်ရလာအောင် ကူညီပေးပါတယ်။ စတင်မေးမြန်းရင်း သူ့အစ်မ လော်ရာ ပျောက်ဆုံးနေတာကို သတိထားမိလာကြတယ်။ လော်ရာ ဘယ်ရောက်နေတာလဲ၊ မိသားစုကို သတ်သွားသူက သူပဲဖြစ်နေမလား၊ လူသတ်သမားအစစ်ကို ရှာတွေ့နိုင်ပါ့မလားဆိုတဲ့ မေးခွန်းတွေ ပေါ်လာပါတယ်။ စိတ်ပညာဆိုင်ရာ မေးခွန်းတွေနဲ့ ကုသနည်းတွေကို အသုံးပြုပြီး အတိတ်ကို ပြန်ဖော်ထုတ်ရာမှာ ကောင်လေးရဲ့အတိတ်ကရော သူထင်ထားသလို ဖြစ်နေပါ့မလား။

နယူးယောက်မြို့က ရွှေ့ပြောင်းလုပ်သားတွေ နေထိုင်ရာ Hell's Kitchen ဆင်းရဲသားရပ်ကွက်မှာ သူငယ်ချင်းလေးယောက် ကြီးပြင်းလာကြပါတယ်။ ရပ်ကွက်ထဲမှာ ဆော့ကစား၊ ဘုရားကျောင်းတက်ပြီး အားရင် ဘုန်းတော်ကြီးအကူအဖြစ် ဝင်လုပ်ပေးကြတယ်။ ပိုက်ဆံရနိုင်တဲ့အခါ နာရေးတွေမှာလည်း ဝင်ကူကြပါတယ်။ ဆင်းရဲပေမယ့် ရှိတာလေးနဲ့ ပျော်ပျော်နေတတ်ကြပြီး သူငယ်ချင်းချင်း အလှည့်ကျ နောက်ပြောင်ကျီစယ်လေ့လည်း ရှိကြတယ်။ တစ်ခါမှာတော့ သူတို့အဖွဲ့လိုက် နောက်ပြောင်လိုက်တာကြောင့် မရည်ရွယ်ဘဲ လူတစ်ယောက် ပြင်းပြင်းထန်ထန် ဒဏ်ရာရသွားပါတယ်။ လေးယောက်လုံး လူငယ်ထိန်းသိမ်းရေးစခန်းကို အပို့ခံလိုက်ရပြီး အဲဒီမှာ အစောင့်တွေရဲ့ ညှဉ်းပန်းနှိပ်စက်မှုနဲ့ လိင်ပိုင်းဆိုင်ရာ အမြတ်ထုတ်မှုတွေကို ခံစားကြရတယ်။ စိတ်ရောကိုယ်ပါ ရခဲ့တဲ့ဒဏ်ရာတွေက သူတို့ကို နှစ်ရှည်လများ ခြောက်လှန့်နေပြီး ညဘက် မီးပိတ်အိပ်ဖို့တောင် မရဲကြတော့ပါဘူး။ နောက် ၁၃ နှစ်ကြာတဲ့အခါမှာတော့ သူတို့အတွက် လက်စားချေဖို့ အခွင့်အရေးတစ်ခု ပေါ်လာပါတယ်။ Robert De Niro၊ Kevin Bacon နဲ့ Brad Pitt တို့ အဓိကပါဝင်ထားပြီး Lorenzo Carcaterra ရဲ့ အရောင်းရဝတ္ထုကို အခြေခံထားပါတယ်။ စာအုပ်ထွက်စဉ်ကတည်းက ဇာတ်လမ်းဟာ အဖြစ်မှန်ဟုတ်မဟုတ် ဝေဖန်သူတွေနဲ့ သတင်းရေးသူတွေကြား အငြင်းပွားခဲ့ပြီး ရုပ်ရှင်ဖြစ်လာချိန်မှာလည်း ဆက်လက်ဂယက်ရိုက်ခဲ့တယ်။ စာရေးဆရာက အဖြစ်မှန်လို့ အတည်ပြုခဲ့ဖူးပေမယ့် သက်ဆိုင်ရာအဖွဲ့အစည်းတွေကတော့ ဒီလိုဖြစ်ရပ်မျိုး မ

ကမ္ဘာကို ဖျက်ဆီးဖို့ ကြိုးစားနေတဲ့ အကြမ်းဖက်သမားတွေကို တားဆီးဖို့ နစ်ခ်ဟာ အသေဖမ်းဝရမ်းနဲ့ တာဝန်ပေးခံရပါတယ်။ အဲဒီမစ်ရှင်မှာပဲ သူနဲ့ နှစ်ပေါင်းများစွာ ကွာဝေးနေခဲ့တဲ့ သားဖြစ်သူ အန်တိုနီနဲ့ ပူးပေါင်းရဖို့ ဖြစ်လာတယ်။ အန်တိုနီက မူးယစ်ရဲတစ်ယောက် ဖြစ်နေပါပြီ။ သားအဖနှစ်ယောက်ဟာ အကြမ်းဖက်သမားတွေရဲ့ အကြံကို တားဆီးဖို့ အတူလုပ်ဆောင်ကြရသလို သူတို့ကြားမှာ နားလည်မှုလွဲနေတာတွေလည်း ရှိနေပါတယ်။ ဒီအလွဲတွေကို ဘယ်လိုဖြေရှင်းကြမလဲ၊ ပေးအပ်ထားတဲ့ မစ်ရှင်ကိုရော ဘယ်လိုအကြံအစည်တွေနဲ့ ရင်ဆိုင်ကြမလဲဆိုတာကို တင်ဆက်ထားတဲ့ အက်ရှင်သည်းထိတ်ရင်ဖိုဇာတ်ကားပါ။

ရဲအရာရှိတစ်ယောက်ဟာ ရာထူးတိုးပြောင်းရွှေ့မှုနဲ့ ပူနေးမြို့ကနေ မွန်ဘိုင်းကို တာဝန်ကျလာပါတယ်။ သူရောက်လာတဲ့မြို့မှာတော့ လူမိုက်ဂိုဏ်းတွေက နေရာအသီးသီးကို ကြီးစိုးထားကြတယ်။ နိုင်ငံရေးသမားတွေနဲ့ စီးပွားရေးသမားတွေကလည်း လူမိုက်တွေနဲ့ ပေါင်းပြီး မတရားလုပ်နေကြပါတယ်။ ရဲတွေမှာ လုပ်ပိုင်ခွင့်ရှိတယ်ဆိုပေမယ့် စနစ်ဆိုးကြောင့် လက်တွေ့မှာ လှုပ်ရှားရခက်နေတယ်။ အင်အားကြီးသူတွေ ကြီးစိုးတဲ့အောက်မှာ သူတို့ကိုယ်တိုင်လည်း ကြောက်ကြောက်လန့်လန့် နေကြရပါတယ်။ အဲဒီအခြေအနေကို ပြောင်းလဲဖို့ အသစ်ရောက်လာတဲ့အရာရှိနဲ့ သူ့အဖွဲ့က ကြိုးစားလာချိန်မှာ လူမိုက်ဂိုဏ်းတွေဘက်ကလည်း ဒီရဲတွေကို ရှင်းထုတ်ဖို့ ကြံလာကြတယ်။ ရာဇဝတ်မှုကျူးလွန်သူတွေ အပြစ်ပေးခံရမလား၊ ငွေကြေးနဲ့ အာဏာရှိသူတွေကပဲ ဆက်အနိုင်ရနေဦးမလားဆိုတာ ရင်ဆိုင်ရတော့မှာပါ။ အရှေးကူမား၊ ဆူနီးရှက်တီး၊ အစ်ရဖန်းခန်း၊ ဂျက်ကီရှရော့ဖ်၊ ရဗီနားတန်ဒန်နဲ့ လာရာဒက်သားတို့ အဓိကပါဝင်သရုပ်ဆောင်ထားပါတယ်။

နန်ဒီဆိုတဲ့ ကောင်မလေးတစ်ယောက် အသတ်ခံရတဲ့အမှုနဲ့ ဇာတ်လမ်းစထားတဲ့ ကန်နန်ဒါးဘာသာစကားပြော မှုခင်းစုံထောက်ကားပါ။ လူသတ်သမားရဲ့ လုပ်ပုံက ထူးဆန်းနေတယ်။ နစ်နာသူကို ခေါင်းတည့်တည့် ရိုက်ပြီးတာတောင် မေ့ဆေးထပ်သုံးပြီး ပြန်ပေးဆွဲသွားပါတယ်။ နာရီပေါင်းများစွာ နှိပ်စက်ပြီးမှ သတ်ပစ်ကာ အိမ်တစ်အိမ်ရှေ့မှာ အလောင်းကို လာစွန့်ပစ်သွားတယ်။ နောက်ထပ်လူသတ်မှုတွေလည်း ဆက်ဖြစ်လာပါတယ်။ အသတ်ခံရသူတွေဟာ ဆရာဝန်တွေဖြစ်နေသလို အလောင်းလာစွန့်ပစ်တဲ့အိမ်တွေကလည်း ဆရာဝန်တွေရဲ့အိမ်တွေ ဖြစ်နေတယ်။ ဒီအမှုတွေကို ကျူးလွန်နေတဲ့ တရားခံက ဘယ်သူဖြစ်မလဲ။

ရှနာယားဟာ ဒီနှစ်ရဲ့ အကောင်းဆုံးအမျိုးသမီးဇာတ်ဆောင်ဆုကို အရမ်းလိုချင်နေတဲ့ မင်းသမီးတစ်ယောက်ပါ။ နာမည်ကျော်ရုပ်ရှင်ဒါရိုက်တာ အာဒိသယနဲ့လည်း တိတ်တိတ်ပုန်း တွဲနေပါတယ်။ သူ့အတွက်ပဲလို့ မျှော်လင့်ထားတဲ့ဆုကို တက်သစ်စမင်းသမီး ဆန်ဂျနားက ရသွားတဲ့အခါ ရှနာယား မခံမရပ်နိုင်ဖြစ်လာတယ်။ လိုချင်တဲ့ဆုကို လက်လွတ်လိုက်ရလို့ စိတ်ဆင်းရဲရသလို ကိုယ့်ထက်နောက်မှပေါ်လာသူက ကျော်တက်သွားတာကိုလည်း ခံပြင်းနေပါတယ်။ အဲဒီခံစားချက်တွေက အာဃာတအဖြစ် ပြောင်းလာပြီး နောက်ဆုံးမှာ နတ်ဆိုးနဲ့ အပေးအယူလုပ်ကာ ဆန်ဂျနားကို ဒုက္ခပေးလာတော့တယ်။ အင်မရန်းဟက်ရှမီ၊ ဗီပါရှားဗာဆူးနဲ့ အေရှားဂုပ်သားတို့ အဓိကပါဝင်ထားပါတယ်။ ထုတ်လုပ်စရိတ် ရူပီသန်း ၂၅၀ သုံးထားပြီး ရုံဝင်ငွေ ရူပီသန်း ၉၇၀ ရရှိခဲ့တယ်လို့ မူရင်းမှာ ဖော်ပြထားသလို ကမ္ဘာတစ်ဝန်းဝင်ငွေကိုလည်း အမေရိကန်ဒေါ်လာ ၁၂ သန်းလို့ ဖော်ပြထားပါတယ်။

REC ရုပ်ရှင်လေးကားထဲက ဒုတိယကားဖြစ်ပြီး ရှေ့ကားရဲ့အဖြစ်အပျက်တွေကို ဆက်ထားပါတယ်။ ဒါရိုက်တာ Paco Plaza နဲ့ Jaume Balaguero တို့ပဲ ပြန်ရိုက်ကူးထားတာပါ။ ကူးစက်ရောဂါပြန့်နေတဲ့ တိုက်တစ်လုံးထဲကို မီးသတ်သမားတွေ၊ ရဲတွေနဲ့ ကျန်းမာရေးဝန်ထမ်းတွေ ဝင်သွားကြတယ်။ နှစ်နာရီလောက်ကြာတဲ့အခါ သူတို့နဲ့ အဆက်အသွယ်ပြတ်သွားတာကြောင့် နောက်ထပ် SWAT အဖွဲ့တစ်ဖွဲ့နဲ့ ဆရာဝန်တစ်ယောက်ကို ထပ်လွှတ်လိုက်ရပါတယ်။ ဆရာဝန်က ဖြေဆေးဖော်ဖို့ ကူးစက်မှုရဲ့ပင်ရင်းဖြစ်တဲ့ Medeiros ဆိုတဲ့ မိန်းကလေးရဲ့ မူရင်းသွေးကို ရှာဖွေရင်း ရှေ့ကားက အန်ဟယ်လာဗီဒယ်နဲ့ ဆုံမိလာတယ်။ ကူးစက်မှုက ဘယ်ကစခဲ့တာလဲ၊ အန်ဟယ်လာက ဒီလောက်ကြာအောင် ဘယ်လိုအသက်ရှင်နေနိုင်ခဲ့တာလဲဆိုတဲ့ မေးခွန်းတွေနဲ့အတူ သူတို့လိုအပ်နေတဲ့ သွေးကို ရှာတွေ့နိုင်မလားဆိုတာ ဆက်ကြည့်ရမှာပါ။ သွေးထွက်သံယိုမြင်ကွင်းတွေနဲ့ ရိုင်းစိုင်းတဲ့စကားပြောခန်းတွေ ပါဝင်ပါတယ်။

ဓာတ်ပုံပညာသင်နေတဲ့ ဒန်မှာ ထူးချွန်တဲ့ကျောင်းသားတစ်ယောက်ဖြစ်ဖို့နဲ့ နယူးယောက်အထိ သွားနိုင်ဖို့ အိပ်မက်ရှိပါတယ်။ သူက ဆရာအိမ်းဆီမှာ တပည့်ခံပြီး ပရောဂျက်တစ်ခု လုပ်ဖြစ်ခဲ့တယ်။ သူ့စာတမ်းကို အကောင်းဆုံးပြုစုနိုင်အောင် ဆရာက SLR ကင်မရာတစ်လုံး ပေးလိုက်ပြီး ၁၄ ရက်အတွင်း လူခုနစ်ဦးရဲ့ ဓာတ်ပုံကို ရိုက်ရမှာပါ။ ဆရာ့ကင်မရာနဲ့ အလုပ်စလုပ်ခဲ့တဲ့ ဒန်ဟာ ခြောက်ပုံမြောက် ရိုက်ပြီးချိန်မှာတော့ ထူးဆန်းတဲ့ဖြစ်ရပ်ဆိုးတစ်ခုကို သိလာရတယ်။ ဒါကို အဆုံးသတ်နိုင်ဖို့ သူငယ်ချင်းတွေဖြစ်တဲ့ နမ်၊ ဂရိတ်တို့နဲ့ ပူးပေါင်းကြိုးစားကြပါတယ်။ သူတို့သိလိုက်ရတဲ့ ဖြစ်ရပ်ဆိုးက ဘာလဲ၊ ခုနစ်ဦးမြောက်ရဲ့ပုံကို ရိုက်မိရင် ဘာဆက်ဖြစ်နိုင်မလဲ။ ဒီအဖြစ်တွေကြားမှာ ဒန်ရဲ့အိပ်မက်တွေကရော အကောင်အထည်ပေါ်လာနိုင်ပါ့မလား။

V/H/S/99 က သရဲနဲ့ ဝိညာဉ်ဆိုင်ရာ ထိတ်လန့်စရာဇာတ်လမ်းတို ငါးပုဒ်ကို စုစည်းထားတဲ့ ရုပ်ရှင်ပါ။ အင်တာနက်နဲ့ YouTube ပေါ်မှာ တွေ့ရတတ်တဲ့ ဖြစ်ရပ်မှန်မှတ်တမ်းဗီဒီယိုတွေလို ပုံစံမျိုးနဲ့ ရိုက်ကူးထားပါတယ်။ တစ်ကားလုံးကိုလည်း Vlog ရိုက်နေသူရဲ့ ကင်မရာကနေ မြင်ရသလို POV ပုံစံနဲ့ တင်ဆက်ထားတာပါ။ ပါဝင်တဲ့ဇာတ်လမ်းငါးပုဒ်ရဲ့ အကြောင်းအရာတွေက မကျွတ်လွတ်သေးတဲ့ တီးဝိုင်းအဖွဲ့၊ ဂူတီလီဒဏ္ဍာရီ၊ သေမင်းကစားပွဲ၊ ဘေးအိမ်က မက်ဒူဆာနဲ့ ငရဲသို့ အလည်တစ်ခေါက်တို့ ဖြစ်ပါတယ်။

အန်နာဖရစ်ဟာ ရုပ်ရည်နဲ့ ကိုယ်ခန္ဓာအလှကြောင့် လူအများကို ဆွဲဆောင်နိုင်တဲ့ နာမည်ကျော်မင်းသမီးတစ်ယောက်ပါ။ သူ သေဆုံးသွားတယ်ဆိုပြီး ခန္ဓာကိုယ်ကို ရေခဲတိုက်မှာ ထားထားချိန်မှာ လူငယ်သုံးယောက် ခိုးဝင်လာကြပါတယ်။ အန်နာ့ကို တွေ့လိုက်ရတဲ့ သူတို့ဟာ လိင်စိတ်ဆန္ဒနောက်လိုက်ပြီး သူ့ခန္ဓာကိုယ်ကို လိင်ပိုင်းဆိုင်ရာ ကျူးလွန်ကြတယ်။ ဒါပေမဲ့ သူတို့မသိထားတာက အန်နာဟာ တကယ်သေဆုံးနေတာ မဟုတ်ဘဲ ခဏတာ မျောနေခဲ့တာပါ။ အန်နာ ပြန်သတိရလာချိန်မှာတော့ ရေခဲတိုက်ထဲက အခြေအနေဟာ သူတို့ မမျှော်လင့်ထားသလို ပြောင်းလဲသွားပါတော့တယ်။ ၂၀၁၅ ခုနှစ်ထွက် ဒရာမာနဲ့ သည်းထိတ်ရင်ဖိုဇာတ်ကားပါ။

ရိန်းဖို့ဒ်ဟာ ဖခင်နဲ့ နာမည်ကျော်မုဆိုးမိတ်ဆွေတစ်စုတို့နဲ့အတူ ကိုဒီယက်ဝက်ဝံတွေကို အမဲလိုက်ဖို့ ကိုဒီယက်ကျွန်းဆီ ရေကြောင်းခရီးထွက်လာပါတယ်။ လမ်းမှာ သင်္ဘောပျက်သွားတာကြောင့် ကျွန်းတစ်ကျွန်းပေါ် ရောက်သွားကြတယ်။ အဲဒီကျွန်းက သင်္ဘောတွေ မကြာခဏပျက်တတ်တဲ့နေရာလို့ နာမည်ရထားပြီး ဂျာမန်စစ်ပြန်တစ်ယောက်နဲ့ သူ့တပည့် နေထိုင်နေကြပါတယ်။ ဂျာမန်စစ်ပြန်ကလည်း အမဲလိုက်ဝါသနာပါသူဖြစ်ပြီး ကမ္ဘာပေါ်မှာ အမဲလိုက်ရအခက်ဆုံး သားကောင်ကို ဒီကျွန်းမှာ လိုက်ဖို့ ရိန်းဖို့ဒ်တို့ကို ဖိတ်ခေါ်တယ်။ ဘယ်လိုသားကောင်မျိုးလဲဆိုတာ ရိပ်မိလာတဲ့အခါ သူတို့က ငြင်းလိုက်ကြပါတယ်။ ဒါပေမဲ့ ငြင်းရုံနဲ့ လွတ်မြောက်သွားတာမျိုး မဟုတ်ဘဲ ရိန်းဖို့ဒ်ဟာ သုံးရက်ကြာမယ့် အမဲလိုက်ကစားပွဲထဲ အတင်းအကျပ် ပါဝင်ရတော့တယ်။

MIT ကျောင်းသားသုံးယောက်ဖြစ်တဲ့ နစ်၊ ဟေလေနဲ့ ဂျိုနာတို့ဟာ ကျောင်းရဲ့ ကွန်ရက်ဆာဗာကို ဟက်ခ်သွားတဲ့ နော်မတ်ဆိုသူကို ကိုယ့်နည်းကိုယ့်ဟန်နဲ့ လိုက်ရှာနေကြပါတယ်။ တစ်နေ့မှာ နော်မတ်ရဲ့ IP လိပ်စာကို ရလာတော့ အဲဒီလိပ်စာညွှန်တဲ့ နီဗားဒါးသဲကန္တာရထဲက နေရာတစ်ခုဆီ ဟက်ကာကို ဖမ်းဖို့ ထွက်လာကြတယ်။ ဒါပေမဲ့ လိပ်စာအတိုင်း ရောက်သွားတဲ့အချိန်မှ သူတို့ကို ထောင်ချောက်ဆင်ထားမှန်း သိလိုက်ရပါတယ်။ ဟက်ကာကို လိုက်ရှာရာကနေ မမျှော်လင့်ထားတဲ့ လျှို့ဝှက်ဆန်းကြယ်မှုတွေနဲ့ ကိုယ်တိုင်ရင်ဆိုင်ရတော့တာပါ။ ၂၀၁၄ ခုနှစ်ထွက် သိပ္ပံစိတ်ကူးယဉ်သည်းထိတ်ရင်ဖိုဇာတ်ကားဖြစ်ပြီး DC's Titans မှာ ဒစ်ဂရေဆင်အဖြစ် ပါဝင်တဲ့ Brenton Thwaites နဲ့ Ready Player One ထဲက Olivia Cooke တို့ အဓိကသရုပ်ဆောင်ထားပါတယ်။

ကလဲရ် ကုဘစ်ဟာ အရည်အချင်းရှိတဲ့ ရှေ့နေတစ်ယောက်ဖြစ်ပြီး ခင်ပွန်းတွမ်နဲ့အတူ အေးအတူပူအမျှ နေထိုင်နေသူပါ။ တစ်နေ့မှာတော့ အမေရိကန်စစ်တပ်က တွမ်ကို ရုတ်တရက် ဖမ်းဆီးသွားတယ်။ စစ်တပ်ဘက်က ပြောလာတာက သူဟာ တွမ် ကုဘစ်မဟုတ်ဘဲ ရွန် ချက်မန်းဆိုတဲ့ တပ်ပြေးတစ်ယောက်ဖြစ်နေတယ်ဆိုတာပါပဲ။ လူအစုလိုက်အပြုံလိုက် သတ်ဖြတ်မှုနဲ့ပါ စွပ်စွဲခံထားရပြီး သေဒဏ်အထိ ကျခံရနိုင်တဲ့အခြေအနေ ဖြစ်နေပါတယ်။ ခင်ပွန်းအပေါ် စွပ်စွဲချက်တွေဟာ မမှန်မကန်ဖြစ်နေတယ်လို့ သိလာရတဲ့ ကလဲရ်က အမှုကို ဝင်ရောက်ရင်ဆိုင်ဖို့ ဆုံးဖြတ်လိုက်တယ်။ စစ်တပ်က ခင်ပွန်းအတွက် နာမည်မထင်ရှားတဲ့ ရှေ့နေတစ်ယောက်ကိုသာ စီစဉ်ပေးထားတာကြောင့် စစ်မှုထမ်းဟောင်း ချာလီရဲ့ အကူအညီနဲ့ စစ်တပ်ကို တရားရေးအရ ရင်ဆိုင်ရပါတော့တယ်။ ကလဲရ်အဖြစ် Ashley Jadd၊ ချာလီအဖြစ် Morgan Freeman တို့ ပါဝင်ထားပါတယ်။ အာဏာသုံးမှုနဲ့ မမှန်မကန်လုပ်ရပ်တွေကြားမှာ အမှန်တရား ဖုံးကွယ်ခံရပုံကို တရားရင်ဆိုင်ရတဲ့အကြောင်းနဲ့ တွဲဖော်ပြထားတဲ့ မှုခင်းဒရာမာပါ။

LGBTQ+ လူငယ်တစ်စုရှိနေတဲ့ conversion camp တစ်ခုကို ဇာတ်အိမ်တည်ထားတဲ့ ၂၀၂၂ ခုနှစ်ထွက် သည်းထိတ်ရင်ဖိုဇာတ်ကားပါ။ ဒီစခန်းက လူငယ်တွေရဲ့ လိင်စိတ်တိမ်းညွတ်မှုကို ပြောင်းလဲပေးဖို့ ရည်ရွယ်ထားတဲ့နေရာဖြစ်ပါတယ်။ လျှို့ဝှက်ဆန်းကြယ်မှုနဲ့ ထိတ်လန့်စရာတွေကို တွဲဖက်ထားပြီး ရက်ရက်စက်စက် သတ်ဖြတ်တဲ့အခန်းတွေထက် ဇာတ်လမ်းအဖြစ်အပျက်တွေကို ပိုအလေးပေးထားပါတယ်။

အလုပ်အကိုင်အခွင့်အလမ်းများတဲ့ မွန်ဘိုင်းမြို့ရဲ့ ရထားဘူတာမှာ မိန်းကလေးတွေ ဆက်တိုက်အသတ်ခံနေရပါတယ်။ လူသတ်သမားက မိန်းကလေးတွေရဲ့ လှပတဲ့ခြေထောက်တွေကို အလွန်အမင်းစွဲလမ်းနေသူဖြစ်ပြီး ဘူတာရဲ့ လူပြတ်တဲ့နေရာတွေမှာ အကွက်ချပြီး သတ်ဖြတ်နေတာပါ။ အလောင်းတွေကိုလည်း ခြေထောက်ဖြတ်ထားပြီး ခရီးဆောင်အိတ်ထဲထည့်ကာ ပြန်လာစွန့်ပစ်လေ့ရှိတယ်။ လူသတ်မှုတွေ ဆက်တိုက်ဖြစ်နေတဲ့အတွက် မြို့မှာ နေထိုင်သူတွေလည်း မလုံမခြုံဖြစ်လာကြပါတယ်။ ဒီအမှုတွေကို ဖော်ထုတ်ဖို့ CBI စုံထောက်ဗီဝမ်နဲ့ သူ့အဖွဲ့က စုံစမ်းရတော့တယ်။ လူသတ်သမားကို သူတို့ ဘယ်လိုခြေရာခံဖမ်းဆီးမလဲဆိုတာ လိုက်ကြည့်ရမယ့် မှုခင်းသည်းထိတ်ရင်ဖိုဇာတ်ကားပါ။

လေယာဉ်ကုမ္ပဏီတစ်ခု ပိုင်ဆိုင်တဲ့ တက်ဒ်ခရောဖော့ဟာ ထက်မြက်တဲ့လူတစ်ယောက်ပါ။ သူ့မှာ ငယ်ရွယ်ချောမောတဲ့ဇနီးရှိပြီး အဲဒီဇနီးက စုံထောက်တစ်ယောက်နဲ့ ဖောက်ပြန်နေကြောင်းလည်း သူသိထားတယ်။ တစ်ညမှာတော့ တက်ဒ်ဟာ ဇနီးကို သေနတ်နဲ့ ပစ်လိုက်ပါတယ်။ သူလုပ်ခဲ့တာကို ပေါ်ပေါ်တင်တင် ဝန်ခံပြီး သက်သေပြနိုင်ရင် ပြကြဖို့ပါ စိန်ခေါ်ထားတယ်။ တစ်ဖက်မှာ ဝီလီယမ်ဆိုတဲ့ လူငယ်ရှေ့နေတစ်ယောက်က နာမည်ကြီးရှေ့နေအဖွဲ့ဆီ ရောက်နေသူပါ။ အဲဒီဝီလီယမ်နဲ့ တက်ဒ်တို့ တရားခွင်မှာ ထိပ်တိုက်ရင်ဆိုင်ရတဲ့အခါ ကိုယ်လုပ်ခဲ့တာကို ဝန်ခံထားသူတစ်ယောက်ရဲ့ အမှုကို ဘယ်လိုသက်သေပြမလဲဆိုတာ လိုက်ကြည့်ရပါတယ်။ Anthony Hopkins နဲ့ Ryan Gosling တို့ အဓိကပါဝင်သရုပ်ဆောင်ထားတဲ့ မှုခင်း၊ သည်းထိတ်ရင်ဖိုဇာတ်ကားပါ။

ဘယ်ကရောက်လာမှန်းမသိတဲ့ ပေ ၃၀ ရှည် မိကျောင်းကြီးတစ်ကောင် ပေါ်လာပြီး လူတွေရဲ့အသက်ကို တဖြည်းဖြည်း ခြိမ်းခြောက်လာပါတယ်။ ဒီလောက်ကြီးမားတဲ့ မိကျောင်းမျိုး မျိုးတုန်းသွားပြီလို့ ယူဆထားကြတာကြောင့် နယူးယောက်က ကျောက်ဖြစ်ရုပ်ကြွင်းပညာရှင် ကယ်လီစကော့လည်း စူးစမ်းချင်စိတ်နဲ့ ရောက်လာတယ်။ ကယ်လီဟာ ဒေသခံတောခေါင်း၊ ရဲမှူးတို့နဲ့ ပူးပေါင်းပြီး မိကျောင်းကြီး ဘယ်ကရောက်လာတာလဲ၊ လူတွေကို ဘာကြောင့် ရန်ပြုနေတာလဲဆိုတာ အဖြေရှာကြပါတယ်။ တစ်ဖက်မှာလည်း လူတွေကို အန္တရာယ်ပေးနေတဲ့ ဒီသတ္တဝါကြီးကို နှိမ်နင်းဖို့ ကြိုးစားကြရတယ်။

ဘွတ်ဟာ ငယ်စဉ်ကတည်းက ကြမ်းတမ်းတဲ့ဘဝကို ဖြတ်သန်းလာရတဲ့ အမျိုးသမီးတစ်ယောက်ပါ။ စိတ်ဒဏ်ရာတွေကြောင့် တခြားသူတွေ မမြင်ရတာကို မြင်နေရသလို မကြားရတာတွေကိုလည်း ကြားနေရတယ်။ ဒီလိုအခြေအနေရှိနေပေမယ့် စားဝတ်နေရေးအတွက်တော့ အမေ့ဆီက လက်ဆင့်ကမ်းလာတဲ့ ခေါက်ဆွဲရောင်းတဲ့အလုပ်ကို ဆက်လုပ်နေရပါတယ်။ တစ်နေ့ ခေါက်ဆွဲလှည်းတွန်းပြီး ဈေးထွက်ရောင်းချိန်မှာ ကျောင်းသားအဓိကရုဏ်းနဲ့ တည့်တည့်တိုးမိတယ်။ ဖမ်းဆီးမခံရဖို့ ဆန္ဒပြသူကောင်လေးတစ်ယောက်နဲ့အတူ ထွက်ပြေးရပြီး လှည်းကိုတော့ ပစ်ထားခဲ့ရပါတယ်။ လှည်းပြန်ယူတဲ့အချိန်မှာ ပတ်ဝန်းကျင်တစ်ခုလုံးက ဖမ်းဆီးခံရသူတွေ၊ ဒဏ်ရာရနေတဲ့ ကျောင်းသားတွေနဲ့ အလောင်းတွေကြား ရောက်နေပြီ။ ဘွတ်လည်း အဲဒီမြင်ကွင်းတွေကို ဖြတ်ပြီး လှည်းနဲ့အတူ အိမ်ပြန်လာခဲ့တယ်။ အိမ်ရောက်တော့ လှည်းထဲက သွေးစိမ့်ထွက်နေတာကြောင့် ဖွင့်ကြည့်ရာက ကျောင်းသားတစ်ယောက်ရဲ့အလောင်းကို တွေ့သွားပါတယ်။ ဘွတ်ဟာ ကြံရာမရဖြစ်ပြီး အဲဒီအလောင်းက အသားကို သူရောင်းတဲ့ ခေါက်ဆွဲပြုတ်ထဲ ထည့်ရောင်းလိုက်တယ်။ နောက်ပိုင်း သူ့အသားလုံးခေါက်ဆွဲ နာမည်ရလာသလို ဆန္ဒပြတဲ့နေ့က အတူထွက်ပြေးခဲ့တဲ့ ကောင်လေးအပေါ်လည်း မေတ္တာရှိလာပါတယ်။ ဘဝကောင်းလာတော့မယ်လို့ ထင်မိချိန်မှာပဲ မမျှော်လင့်တဲ့ကိစ္စတွေ ကြုံလာရပြီး ဆိုင်မှာ အသားလုံးလုပ်ဖို့ ကုန်ကြမ်းလိုလာတဲ့အခါ ဘာဆက်ဖြစ်မလဲဆိုတာကလည်း စိုးရိမ်စရာဖြစ်လာတယ်။ ထိုင်းထိတ်လန့်ဇာတ်ကားဖြစ်ပြီး အသတ်အဖြတ်နဲ့ သွေးထွက်သံယိုပြကွက်တွေ များပါ

တွမ်ကတ်တလာဟာ ရဲအလုပ်ကနေ အနားယူပြီး သမီးလေးကို ထောက်ပံ့နိုင်ဖို့ မှုခင်းဖြစ်ပွားရာနေရာတွေမှာ သန့်ရှင်းရေးလုပ်တဲ့အလုပ်နဲ့ အသက်မွေးနေသူပါ။ တစ်နေ့တော့ လူမရှိတဲ့ အိမ်တစ်အိမ်မှာ သန့်ရှင်းရေးသွားလုပ်ခဲ့ရပြီး အဲဒီအိမ်မှာနေတဲ့ အန်းနော်ကပ်ရဲ့ခင်ပွန်း ထူးထူးဆန်းဆန်း ပျောက်ဆုံးနေကြောင်း သိလိုက်ရပါတယ်။ တည်ငြိမ်နေပြီဖြစ်တဲ့ တွမ်ရဲ့ဘဝလည်း အဲဒီကနေ အရှုပ်အထွေးတွေထဲ ပြန်ရောက်လာတော့တယ်။ အန်းရဲ့ခင်ပွန်းကို ရှာဖွေတဲ့အကြောင်းနဲ့အတူ တွမ်ရဲ့အတိတ်က အရှုပ်အထွေးတွေ၊ သူ့သူငယ်ချင်း အက်ဒီလော်ရန်ဇိုရဲ့ လျှို့ဝှက်ချက်တွေပါ ဆက်ပါလာပါတယ်။ တွမ်အဖြစ် Samuel L. Jackson၊ အန်းအဖြစ် Eva Mendes နဲ့ အက်ဒီအဖြစ် Ed Harris တို့ သရုပ်ဆောင်ထားပြီး ဒါရိုက်တာ Renny Harlin ရိုက်ကူးထားတဲ့ မှုခင်း၊ လျှို့ဝှက်ဆန်းကြယ်ဇာတ်ကားပါ။ သွေးထွက်သံယိုနဲ့ ရွံရှာစရာပြကွက်တွေလည်း ပါဝင်ပါတယ်။

ဘောပ့်အာတာဟာ မူးယစ်ဆေးအရောင်းအဝယ်လုပ်နေတဲ့ အဖွဲ့တစ်ဖွဲ့ကို စုံစမ်းဖို့ အသွင်ယူထားတဲ့ ရဲအရာရှိတစ်ယောက်ပါ။ အသွင်ယူထားတဲ့ဘဝနဲ့ ပီပြင်အောင် နေထိုင်ရင်းက သူကိုယ်တိုင် မူးယစ်ဆေးစွဲလာပါတော့တယ်။ ရဲဖြစ်ကြောင်း မပေါ်အောင် ဖုံးကွယ်ထားရသလို ဆေးစွဲနေတဲ့အခြေအနေနဲ့ မူးယစ်ဆေးတိုက်ဖျက်ရေးအလုပ်ကို ဘယ်လိုဆက်လုပ်မလဲဆိုတဲ့ အခက်အခဲလည်း ရှိလာတယ်။ သူ့အနားက ဂျင်ဘယ်ရစ်နဲ့ အာနီလက်မန်းတို့ရဲ့ အရှုပ်အထွေးတွေကလည်း ဇာတ်လမ်းထဲမှာ ပါလာပါတယ်။ ဒီဇာတ်ကားကို ဒါရိုက်တာ Richard Linklater က ရိုက်ကူးထားပြီး ဘောပ့်အာတာအဖြစ် Keanu Reeves၊ ဂျင်ဘယ်ရစ်အဖြစ် Robert Downey Jr. နဲ့ အာနီလက်မန်းအဖြစ် Woody Harrelson တို့ ပါဝင်ထားပါတယ်။ Winona Ryder လည်း အဓိကသရုပ်ဆောင်တစ်ဦးအဖြစ် ပါဝင်ထားတဲ့ သိပ္ပံစိတ်ကူးယဉ်၊ သည်းထိတ်ရင်ဖို အန်နီမေးရှင်းကားပါ။ တင်ဆက်ပုံကတော့ လူအစစ်တွေနဲ့ ဇာတ်ကားတစ်ကားလုံးကို အရင်ရိုက်ကူးပြီးမှ Interpolated Rotoscope နည်းပညာနဲ့ မူလရုပ်ပုံတွေကို ဖရိန်တစ်ခုချင်း ခြေရာကောက်ကာ အန်နီမေးရှင်းအဖြစ် ပြောင်းထားတာဖြစ်ပါတယ်။ ကြမ်းတမ်းတဲ့အပြောအဆိုတွေ၊ မူးယစ်ဆေးသုံးစွဲသူတွေရဲ့ နေထိုင်ပုံနဲ့ လိင်ဆက်ဆံခန်း ပါဝင်တာကြောင့် R အဆင့် သတ်မှတ်ထားပါတယ်။