သည်းထိတ်ရင်ဖိုကားများ

တောင်တက်သမား ကောင်မလေးတစ်ယောက်ဟာ အတူတောင်တက်ရင်း ခင်ပွန်းဖြစ်သူ ပြုတ်ကျဆုံးပါးသွားတဲ့နောက် စိတ်ဓာတ်ကျနေပါတယ်။ အရက်သောက်ပြီး အခန်းထဲမှာပဲ အောင်းနေတဲ့သူ့ကို အချစ်ဆုံးသူငယ်ချင်းက စိတ်ပြေလက်ပျောက်ဖြစ်အောင် အမြင့်တစ်ခု အတူတက်ဖို့ လာခေါ်တယ်။ သူတို့တက်မယ့်နေရာက ပေ ၂၀၀၀ လောက် မြင့်တဲ့ တီဗီတာဝါတစ်ခုပါ။ အစပိုင်းမှာ သံဘောင်တွေ ကာထားတဲ့ အတွင်းလှေကားကနေ တက်ရပေမယ့် ထိပ်ဆုံးတစ်ဆင့်မှာတော့ အကာအကွယ်မရှိတဲ့ လှေကားကို ဆက်တက်ရပါတယ်။ နှစ်ယောက်သား အခက်အခဲကြားက ထိပ်ကိုရောက်အောင် တက်ပြီး ဓာတ်ပုံတွေ ရိုက်ကြတယ်။ ပြန်ဆင်းမယ့်အချိန်ကျမှ သံလှေကားဟောင်းကြီး ကျွတ်ကျသွားတော့တာပါ။ တာဝါထိပ်မှာ ပိတ်မိသွားတဲ့ သူတို့နှစ်ယောက်အတွက် အောက်ပြန်ဆင်းဖို့ လမ်းမရှိတော့ဘူး။ ပတ်ဝန်းကျင်မှာ လူမရှိ၊ လာကယ်မယ့်သူမရှိတဲ့အပြင် ဖုန်းလိုင်းလည်း မမိပါဘူး။ ဒီအမြင့်ကြီးပေါ်ကနေ အသက်ရှင်လျက် ပြန်ဆင်းလာနိုင်ဖို့ ဘယ်လိုနည်းတွေ ကြံစည်ပြီး စွန့်စားကြရမလဲ။

9 Ways to Hell ဟာ Dante ရဲ့ Inferno ကို အခြေခံစိတ်ကူးယူပြီး ၂၀၂၂ ခုနှစ်မှာ ရိုက်ကူးထားတဲ့ ထိတ်လန့်ဇာတ်လမ်းစုပါ။ ဒါရိုက်တာ ကိုးယောက်က ဇာတ်လမ်းပိုင်း ကိုးပိုင်းကို ရိုက်ကူးထားပြီး တပ်မက်မှု၊ အစားကြူးမှု၊ လောဘတို့လို အကြောင်းအရာတွေ ပါဝင်ပါတယ်။ ဇာတ်လမ်းပိုင်းတွေမှာ ထိတ်လန့်စရာတွေနဲ့အတူ ဟာသနဲ့ ဒရာမာကိုပါ ရောစပ်ထားတယ်။ လူမျိုးရေးနဲ့ လူမှုရေးပြဿနာတွေကိုလည်း ထည့်သွင်းဖော်ပြထားပါတယ်။ မူရင်းအညွှန်းအရ LA Live Film Festival နဲ့ Independent Horror Movie Award တို့ကနေ ဆုငါးဆု ရရှိထားတဲ့ ဇာတ်ကားပါ။

မိဘတွေရဲ့ ကားမတော်တဆမှုကြောင့် စိတ်ဒဏ်ရာရနေတဲ့ မောင်လေးကို Tara က ပြုစုစောင့်ရှောက်နေရပါတယ်။ ဆေးရုံက ဆင်းလာပြီးနောက် အစ်မမှာ ချစ်သူရှိနေမှန်း သိသွားတဲ့အခါ မောင်လေးက Tara ဟာ သူ့ကို မချစ်တော့ဘူးလို့ ထင်သွားတယ်။ လက်ထပ်ခွင့်တောင်းတဲ့နေ့မှာပဲ မောင်လေးက ကိုယ့်အသက်ကိုယ် အဆုံးစီရင်သွားခဲ့ပါတယ်။ ဒီအဖြစ်အတွက် ကိုယ့်ကိုယ်ကိုယ် ခွင့်မလွှတ်နိုင်တဲ့ Tara ဟာ မောင်လေးကို နှုတ်ဆက်စကားပြောချင်တာကြောင့် နတ်ဆရာတစ်ယောက်ဆီ သွားခဲ့တယ်။ နတ်ဆရာနဲ့ ဝိညာဉ်ဆင့်ခေါ်ပြီး မောင်လေးရဲ့ဝိညာဉ်ကို အရုပ်တစ်ရုပ်ထဲ သွင်းလိုက်ပေမယ့် အဲဒီဝိညာဉ်မှာ မကောင်းဆိုးဝါးစွမ်းအင်ပါ ပါလာပါတယ်။ စိတ်ဒဏ်ရာရှိနေခဲ့တဲ့ မောင်လေးက သူ့အစ်မကို လုယူသွားမယ့်သူတွေကို အပြတ်ရှင်းဖို့ ကြိုးစားလာတော့တယ်။ အင်ဒိုနီးရှား အရုပ်သရဲဇာတ်ကားဖြစ်ပြီး Tara ဟာ သူချစ်တဲ့သူတွေကို ကာကွယ်နိုင်ပါ့မလား၊ မောင်လေးရဲ့ဝိညာဉ်ကို ပြန်နှင်ထုတ်နိုင်ပါ့မလားဆိုတဲ့ အခြေအနေတွေကို ရင်ဆိုင်ရပါတယ်။ မောင်လေးနဲ့ ချစ်သူကြားမှာလည်း သူ ဘယ်သူ့ကို ရွေးမလဲ။

ဓားပြမှုတစ်ခုမှာ မိသားစုတစ်စုလုံး ရက်ရက်စက်စက် အသတ်ခံလိုက်ရပြီးနောက် ကလေးမလေးရဲ့ဝိညာဉ်ဟာ မကျွတ်မလွတ်ဘဲ သူပိုင်တဲ့ အရုပ်လေးမှာ စွဲကပ်နေပါတယ်။ အနီးနားကလူတွေက အဲဒီအရုပ်သရဲကို ကြောက်ကြလို့ သူနေဖို့ဆိုပြီး သစ်ပင်တစ်ပင်မှာ အရုပ်ကို ချိတ်ဆွဲပေးထားကြတယ်။ ဒန်နီရယ်နဲ့ အန်ယာတို့ လင်မယားကတော့ ဒန်နီရယ် ရာထူးတိုးလာလို့ တခြားမြို့ကနေ ပြောင်းလာကြသူတွေပါ။ ဒန်နီရယ်ဟာ သရဲတစ္ဆေကို မယုံတဲ့သူဖြစ်ပြီး သူ့ဆောက်လုပ်ရေးလုပ်ငန်းခွင်ထဲက အရုပ်သရဲနေတဲ့ သစ်ပင်ကို လှဲခိုင်းလိုက်ပါတယ်။ အဲဒီနောက် အရုပ်သရဲဟာ သူတို့အိမ်အထိ လိုက်လာပါတော့တယ်။ ၂၀၁၆ ခုနှစ်မှာ ထွက်ရှိခဲ့တဲ့ The Doll ဇာတ်ကားတွေရဲ့ ပထမဆုံးကားမှာ အရုပ်သရဲ လိုက်လာရတာ သစ်ပင်ကို လှဲလိုက်လို့လား၊ တခြားအကြောင်းတစ်ခု ရှိနေသေးလားဆိုတာကို ဆက်ပြထားပါတယ်။ ဒန်နီရယ်နဲ့ အန်ယာတို့ကရော အဲဒီအရုပ်သရဲလက်က လွတ်မြောက်နိုင်ကြပါ့မလား။

Maira နဲ့ Aldo တို့ လင်မယားဟာ သမီးလေး Kayla၊ အိမ်အကူ Yani တို့နဲ့အတူ ပျော်ပျော်ရွှင်ရွှင် နေထိုင်ကြပါတယ်။ ဒါပေမဲ့ တစ်နေ့မှာ ကားမတော်တဆမှုဖြစ်ပြီး Kayla ဆုံးသွားတဲ့အခါ မိသားစုရဲ့ဘဝ ပြောင်းလဲသွားတယ်။ သမီးကို ဆုံးရှုံးလိုက်ရတဲ့ Maira လည်း စိတ်ကျရောဂါ ခံစားလာရပါတယ်။ တစ်နေ့တော့ Maira ရဲ့သူငယ်ချင်း Elsa ရောက်လာတယ်။ Maira စိတ်သက်သာရာရဖို့အတွက် သမီးလေးအကြိုက်ဆုံး အရုပ်ကိုသုံးပြီး ဝိညာဉ်ခေါ်ဖို့ လုပ်ကြပါတယ်။ ၂၀၁၆ ခုနှစ်က ထွက်ခဲ့တဲ့ The Doll ရဲ့အဆက်ဖြစ်တဲ့ ဒီဇာတ်ကားမှာ အဲဒီလို ဝိညာဉ်ခေါ်ဖို့ ကြိုးစားရာက ဘာတွေ ဆက်ကြုံရမလဲဆိုတာကို ပြထားပါတယ်။

နာမည်ကြီး ဆေးလိပ်ကုမ္ပဏီခုနစ်ခုထဲက ကုမ္ပဏီတစ်ခုမှာ ဆေးရွက်ကြီးသုတေသနလုပ်နေတဲ့ ဒေါက်တာတစ်ယောက် ရှိပါတယ်။ စမ်းသပ်စစ်ဆေးချက်တွေကနေ တွေ့လာတဲ့ နီကိုတင်းရဲ့ဆိုးကျိုးတွေကို သူက အထက်လူကြီးဆီ တင်ပြခဲ့တယ်။ ဆေးလိပ်ကုမ္ပဏီတွေကလည်း သူတို့ထုတ်ကုန်တွေဟာ ဘေးဥပဒ်ဖြစ်စေနိုင်တာကို သိထားပေမယ့် အဲဒီအချက်တွေကို လျှို့ဝှက်ထားကြပါတယ်။ နောက်ပိုင်းမှာတော့ ဆိုးကျိုးတွေအကြောင်း တင်ပြခဲ့တဲ့ ဒေါက်တာဟာ အကြောင်းပြချက်မရှိဘဲ အလုပ်ထုတ်ခံလိုက်ရတယ်။ အလုပ်ပြုတ်သွားပြီးချိန်မှာ သူဟာ နာမည်ကြီး ရုပ်သံအစီအစဉ်တစ်ခုရဲ့ ပရိုဂျူဆာနဲ့ အဆက်အသွယ်ရလာပါတယ်။ ပရိုဂျူဆာက ဆေးလိပ်လုပ်ငန်းအတွင်း လျှို့ဝှက်ထားတဲ့ အချက်အလက်တွေအကြောင်း မေးမြန်းဖို့ သူ့ကို အစီအစဉ်မှာ ပါဝင်ပေးဖို့ ကမ်းလှမ်းလာတယ်။ The Insider ဟာ ဖြစ်ရပ်မှန်ကို အခြေခံထားတဲ့ ၁၉၉၉ ခုနှစ် ရုပ်ရှင်ဖြစ်ပြီး Russell Crowe နဲ့ Al Pacino တို့ အဓိက ပါဝင်သရုပ်ဆောင်ထားပါတယ်။ ဇာတ်ကောင်တွေနဲ့ စကားပြောခန်းတွေကို လက်တွေ့ဆန်တဲ့ပုံစံနဲ့ တင်ပြထားပြီး ပြသချိန်က နှစ်နာရီကျော် ကြာပါတယ်။ အစပိုင်းမှာ ဇာတ်ကြောင်းချိတ်ဆက်မှုတွေကို ဖြည်းဖြည်းချင်း လိုက်ကြည့်ရတဲ့ ဇာတ်ကားပါ။

ကပ္ပတိန်ဘီလီတိုင်နဲ့ တံငါသည်ငါးယောက်ဟာ အန်ဒရီရာဂေးလ်ဆိုတဲ့ ငါးဖမ်းလှေနဲ့ ပင်လယ်ထဲ ငါးဖမ်းထွက်လာကြပါတယ်။ ဒါပေမဲ့ ဒီခရီးမှာ သူတို့ကြုံလိုက်ရတာက နှစ်တစ်ရာမှာ တစ်ခါလောက်သာ ဖြစ်ခဲတဲ့ မုန်တိုင်းကြီးတစ်ခုပါ။ ငါးဖမ်းဖို့ ထွက်လာတဲ့ခရီးကနေ မုန်တိုင်းကြားမှာ အသက်လုပြီး ရုန်းကန်ရတဲ့အဖြစ်ကို ရောက်သွားကြတယ်။ ဒီမုန်တိုင်းဟာ သာမန်မုန်တိုင်းတွေနဲ့ ဘာကွာလို့ The Perfect Storm လို့ ခေါ်ရတာလဲ၊ ဘီလီတိုင်နဲ့ တံငါသည်တွေကရော ဒီမုန်တိုင်းထဲက လွတ်မြောက်နိုင်ကြပါ့မလား။ ဖြစ်ရပ်မှန်ကို အခြေခံထားတဲ့ သဘာဝဘေးအန္တရာယ်ဇာတ်ကားဖြစ်ပြီး George Clooney နဲ့ Mark Wahlberg တို့ ပါဝင်သရုပ်ဆောင်ထားကာ Wolfgang Peterson က ရိုက်ကူးထားပါတယ်။

နာမည်ကျော် မင်းသမီးနဲ့ အဆိုတော် ရေချယ်မဲရွန်ဆီကို အသက်အန္တရာယ် ခြိမ်းခြောက်စာတွေ ခပ်စိတ်စိတ် ရောက်လာပါတယ်။ ဒါကြောင့် နိုင်ငံတော်သမ္မတကိုတောင် ကာကွယ်ပေးခဲ့ဖူးတဲ့ သက်တော်စောင့် ဖရန့်ဖားမားကို ငှားရမ်းလိုက်ကြတယ်။ အန္တရာယ်တွေ ဝိုင်းနေတဲ့ ရေချယ်ကို ကာကွယ်ရင်း ဖရန့်တစ်ယောက် ဘယ်လိုအခက်အခဲတွေ ကြုံရမလဲ၊ နောက်ကွယ်က တရားခံအစစ်ကို ဘယ်လိုရှာဖွေမလဲဆိုတာနဲ့ ဇာတ်လမ်းဆက်သွားပါတယ်။ နာမည်ကျော်မင်းသမီးနဲ့ သူ့သက်တော်စောင့်တို့ကြားမှာ ဘယ်လိုအကြောင်းတွေ ဆက်ဖြစ်လာမလဲဆိုတာလည်း စောင့်ကြည့်ရမှာပါ။ ကီဗင်ကော်စတာနဲ့ ဝစ်နေးဟော်စတန်တို့ ပါဝင်ထားတဲ့ ဒီရုပ်ရှင်ဟာ ဒေါ်လာ ၂၅ သန်း ကုန်ကျခဲ့ပြီး ရုံဝင်ငွေ ဒေါ်လာ ၄၁၁ သန်းကျော် ရရှိခဲ့တဲ့ WB ရုပ်ရှင်ပါ။ ဒိုင်ယာလော့ဂ်တွေနဲ့ ဇာတ်ဝင်တေးတွေမှာ ခေတ်ဆန်မှုနဲ့ ဂန္တဝင်အငွေ့အသက်ကို တွဲဖက်ထားပါတယ်။

Garibong က အမှုကို ဖြေရှင်းခဲ့ပြီး လေးနှစ်အကြာမှာ စုံထောက် မာဆော့ဒိုတို့အဖွဲ့အတွက် နောက်ထပ်အမှုတစ်ခု ပေါ်လာပါတယ်။ တရားခံတစ်ဦးကို စုံစမ်းစစ်ဆေးဖို့ စုံထောက်မာဆော့ဒိုနဲ့ အဖွဲ့ခေါင်းဆောင် ဂျောင်အီမန်တို့ ဗီယက်နမ်ကို သွားကြရာက ရောက်ပြီးမကြာခင်မှာပဲ ထူးဆန်းတဲ့ ကွင်းဆက်လူသတ်မှုတစ်ခုကို အဖြေရှာဖို့ ဖြစ်လာတယ်။ ကိုရီးယား ထိပ်တန်းစီးပွားရေးလုပ်ငန်းရှင်တစ်ယောက်ရဲ့ သားကိုတောင် ပြန်ပေးဆွဲသတ်ဖြတ်ခဲ့တဲ့ လူသတ်သမား ဂန်ဟယ်ဆန်းနောက်ကို သူတို့ လိုက်ကြရပါတယ်။ ဖမ်းမမိဘဲ အကြိမ်ကြိမ် လွတ်ထွက်နေတဲ့ ဂန်ဟယ်ဆန်းကို စုံထောက်မာတို့အဖွဲ့ ဘယ်လိုလိုက်ဖမ်းမလဲ၊ တရားဥပဒေအရ အရေးယူနိုင်အောင် ဖမ်းဆီးပေးနိုင်ပါ့မလားဆိုတာ ဆက်ကြည့်ရမှာပါ။ Ma Dong-Seok နဲ့ Son Seok-Koo တို့ ပါဝင်ထားတဲ့ မှုခင်းအက်ရှင်ဇာတ်ကားဖြစ်ပြီး The Outlaws ရဲ့ ဒုတိယကားပါ။

ဒီဇာတ်လမ်းထဲက ဆန်တာကလော့စ်ဟာ ဆန်တာမဖြစ်ခင်က တိုက်ခိုက်သတ်ဖြတ်ရာမှာ ကြမ်းတမ်းတဲ့ စစ်သည်တော်တစ်ယောက် ဖြစ်ခဲ့ပါတယ်။ နှစ်ပေါင်းများစွာ ခရစ္စမတ်လက်ဆောင်တွေ ပေးလာပြီးနောက် လူတွေ တဖြည်းဖြည်း လောဘကြီးလာတာကို တွေ့ရင်း ကမ္ဘာကြီးနဲ့ သူ့အလုပ်ကိုပါ စိတ်ကုန်လာတယ်။ အိမ်တစ်အိမ်ထဲ ဝင်လိုက်ရင် နို့နဲ့ ကွတ်ကီးအစား အရက်ပုလင်းကို ရှာသောက်နေပြီး ခရစ္စမတ်ရဲ့ ကောင်းခြင်းတွေကိုလည်း မယုံကြည်တော့ပါဘူး။ ဒါပေမဲ့ တာဝန်ရှိနေသေးတာမို့ လိမ္မာတဲ့ကလေးစာရင်းထဲက ထရူဒီဆိုတဲ့ ကလေးမလေးဆီ လက်ဆောင်ပေးဖို့ ရောက်လာပါတယ်။ ထရူဒီ့မိသားစုက သန်းကြွယ်သူဌေးတွေဖြစ်ပြီး ခရစ္စမတ်မှာ ဆုံကြတိုင်း ကိုယ့်အတွက် ဘာအမြတ်ထုတ်ရမလဲ တွေးနေကြသူတွေပါ။ အဲဒီခရစ္စမတ်ညမှာပဲ လက်နက်ကိုင်တစ်ဖွဲ့က သူတို့စံအိမ်ကို ဝင်စီးပြီး အလုံခန်းထဲက ဒေါ်လာသန်း ၃၀၀ ကို ဖောက်ယူဖို့ ကြိုးစားလာတယ်။ မူးမူးနဲ့ အိမ်ထဲပိတ်မိနေတဲ့ ဆန်တာလည်း ဓားပြတစ်ဖွဲ့လုံးကို ရင်ဆိုင်ရပါတော့တယ်။ Dead Snow နဲ့ Hansel & Gretel: Witch Hunters တို့ကို ရိုက်ကူးခဲ့တဲ့ Tommy Wirkola ရဲ့ အက်ရှင်ဟာသကားဖြစ်ပြီး David Harbour က ဆန်တာအဖြစ် သရုပ်ဆောင်ထားပါတယ်။ အဆဲအဆိုနဲ့ ကြမ်းတမ်းတဲ့ အသတ်အဖြတ်ခန်းတွေ ပါဝင်တဲ့ လူကြီးကြည့် ခရစ္စမတ်ဇာတ်ကားပါ။

FBI စုံထောက် ဝေလ်ဂရေဟမ်ဟာ ကွင်းဆက်လူသတ်မှုတစ်ခုကို စုံစမ်းခဲ့ပြီးနောက် ကြုံခဲ့ရတဲ့ ဆိုးကျိုးတွေကြောင့် မိသားစုနဲ့အတူ ကမ်းခြေအိမ်လေးမှာ အေးအေးဆေးဆေး နေနေသူပါ။ တစ်နေ့တော့ သူငယ်ချင်းတစ်ယောက် ရောက်လာပြီး မိသားစုလိုက် သတ်ဖြတ်နေတဲ့ ကွင်းဆက်လူသတ်သမားကို ကူညီစုံစမ်းပေးဖို့ အကူအညီတောင်းလာပါတယ်။ ဂရေဟမ်က ဒီလူသတ်မှုတွေကို ဘယ်လိုစုံစမ်းဖော်ထုတ်မလဲ၊ လူသတ်သမားကရော ဘယ်လိုပိပိရိရိ ရှောင်တိမ်းမလဲဆိုတာကို ဇာတ်လမ်းက ဆက်ပြထားပါတယ်။ ဉာဏ်ကောင်းတဲ့ လူသတ်သမားတွေနဲ့ FBI စုံထောက်တွေကြားက အားပြိုင်မှုကို အခြေခံထားတဲ့ မှုခင်းသည်းထိတ်ရင်ဖိုကားပါ။

၁၉၉၇ ခုနှစ်က ထွက်ရှိခဲ့တဲ့ I Know What You Did Last Summer ရဲ့ နောက်ဆက်တွဲဇာတ်လမ်းပါ။ ကောလိပ်ကျောင်းသူ ဂျူလီဟာ သူ့သူငယ်ချင်းတွေကို သတ်ခဲ့တဲ့ လူသတ်သမားကို မတော်တဆ သတ်မိခဲ့ပြီးနောက် တစ်နှစ်ကြာတဲ့အထိ အိပ်မက်ဆိုးတွေ မက်နေတုန်းပါပဲ။ နေ့စဉ်ဘဝမှာလည်း အရာရာကို ထိတ်လန့်နေဆဲဖြစ်ပါတယ်။ တစ်နေ့မှာ သူ့အခင်ဆုံးသူငယ်ချင်းလည်းဖြစ်၊ အခန်းဖော်လည်းဖြစ်တဲ့ ကာလာက ရေဒီယိုအစီအစဉ်တစ်ခုကနေ ဘဟားမားအပန်းဖြေခရီးလက်မှတ် လေးစောင် ရလာတယ်။ ဒါနဲ့ ဂျူလီ၊ ကာလာ၊ ကာလာ့ရည်းစား တိုင်လာနဲ့ ဂျူလီ့ကို တစ်ဖက်သတ်သဘောကျနေတဲ့ သူငယ်ချင်း ဝယ်လ်တို့ ဇူလိုင်လေးရက် ပိတ်ရက်အတွက် ခရီးထွက်လာကြပါတယ်။ ကျွန်းပေါ်ရောက်ပြီးနောက် ဂျူလီက မူမမှန်တာတွေကို သတိထားမိလာသလို ခြိမ်းခြောက်စာတွေလည်း ရလာတယ်။ သူသတ်မိခဲ့တယ်လို့ ထင်ထားတဲ့ လူသတ်သမား ဘန်ဝဲလေ့စ်ဟာ အသက်ရှင်နေသေးမှန်း သိလိုက်ရချိန်မှာတော့ မုန်တိုင်းကြောင့် ကျွန်းကို လှေအဝင်အထွက်လည်း မရှိတော့ပါဘူး။ ကျွန်းပေါ်မှာ ပိတ်မိနေတဲ့ သူတို့လေးယောက် လူသတ်သမားလက်က လွတ်နိုင်ပါ့မလား။

၁၈၄၀ ပြည့်နှစ်မှာ မေရီဆိုတဲ့ ကောင်မလေးတစ်ယောက် အဖမ်းခံရပြီး သူ့အကြောင်းကို နောက်ကြောင်းပြန်ပြောပြရာကနေ ဇာတ်လမ်းစပါတယ်။ မေရီဟာ မိန်းကလေးချင်း စိတ်ဝင်စားသူဖြစ်ပြီး သူတို့အိမ်က အိမ်ဖော်မလေးနဲ့ ချစ်ကြိုက်နေပါတယ်။ ဒါပေမဲ့ ဘာသာရေးအလွန်ကိုင်းရှိုင်းတဲ့ မေရီ့မိဘတွေက ဒီအချစ်ရေးကို လက်မခံဘဲ သူတို့နှစ်ယောက်ကို ခွဲဖို့ ကြိုးစားကြတယ်။ မေရီတို့နှစ်ယောက် ဒီအတားအဆီးတွေကို ဘယ်လိုကျော်ဖြတ်ကြမလဲဆိုတဲ့ ဇာတ်လမ်းထဲမှာ မထင်မှတ်တဲ့ သရဲခြောက်ခန်းတွေလည်း ပါလာပါတယ်။

စိတ်ရောဂါကုဆရာဝန် ဆမ်ဖော်စတာဆီကို စိတ်ဓာတ်ကျရောဂါ ခံစားနေရတဲ့ အနုပညာကျောင်းသား ဟင်နရီ ရောက်လာပါတယ်။ ဟင်နရီနဲ့ပတ်သက်တဲ့ အခြေအနေတွေက တစ်ခုပြီးတစ်ခု ထူးဆန်းနေတယ်။ အနာဂတ်ကို ကြိုပြောနိုင်တာမျိုး ရှိသလို ဆမ်နဲ့ တခြားသူတွေရဲ့ အကြောင်းတချို့ကိုလည်း ဘယ်သူမှ မပြောပြဘဲ သိနေပါတယ်။ သုံးရက်အတွင်း ကိုယ့်ကိုယ်ကိုယ် အဆုံးစီရင်တော့မယ်လို့ ဟင်နရီက ပြောလာတဲ့အခါ ဆမ်ဟာ သူ့ကို ကယ်တင်ဖို့ ကြိုးစားရတော့တယ်။ ဟင်နရီရဲ့ အတွေးကမ္ဘာထဲက အတုအယောင်တွေကနေ ဆွဲထုတ်ဖို့ ကြိုးစားနေရင်း ဆမ်ကိုယ်တိုင်လည်း ကိုယ့်ဖြစ်တည်မှုဟာ အစစ်အမှန် ဟုတ်ရဲ့လားလို့ သံသယဝင်လာပါတယ်။ ဘာက တကယ်ဖြစ်နေတာလဲ၊ ဘာက စိတ်ရဲ့လှည့်စားမှုလဲဆိုတာ ဝေခွဲရခက်လာတဲ့ကြားမှာ ဟင်နရီ့ကို သူ ကယ်တင်နိုင်ပါ့မလား။ Ryan Gosling နဲ့ Ewan McGregor တို့ ပါဝင်ထားတဲ့ လျှို့ဝှက်သည်းဖို ဒရာမာကားပါ။

ခရစ်တော်ကို ဆန့်ကျင်တဲ့ Antichrist ဖြစ်သူ ဒေမီယံ လူ့လောကထဲ ရောက်လာပုံကို အစပြုထားတဲ့ သည်းထိတ်ရင်ဖိုကားပါ။ စေတန်ရဲ့သား ဒေမီယံဟာ ယေဝါဖန်ဆင်းထားတဲ့ နိုင်ငံတော်ကို ဖြိုဖျက်ဖို့ လူ့အသွင်နဲ့ ရောက်လာတာဖြစ်ပြီး လူကုံထံတစ်ယောက်ဖြစ်တဲ့ သွန်းရဲ့သားနေရာကို ဝင်ယူထားပါတယ်။ သွန်းရဲ့ စည်းစိမ်ကို အသုံးချပြီး လောကကို စေတန်လိုချင်တဲ့ပုံစံ ပြောင်းပစ်ဖို့ဆိုတဲ့ ရည်ရွယ်ချက်နဲ့ ဒေမီယံရဲ့အစကို တင်ဆက်ထားတာပါ။ သွန်းအဖြစ် Gregory Peck၊ သူ့ဇနီးအဖြစ် Lee Remick နဲ့ ဒေမီယံအဖြစ် Harvey Spencer Stephens တို့ ပါဝင်သရုပ်ဆောင်ထားပါတယ်။ Gregory Peck ကတော့ To Kill a Mockingbird၊ Roman Holiday နဲ့ Cape Fear တို့နဲ့ လူသိများခဲ့သူပါ။ ရုပ်ရှင်ကို လန်ဒန်မှာ အဓိကရိုက်ကူးခဲ့ပြီး ရောမနဲ့ ဂျေရုဆလင်တို့မှာလည်း ရိုက်ကူးထားပါတယ်။ ရုပ်ပုံတင်ဆက်မှုနဲ့ အသံအသုံးအနှုန်းကို အလေးထားထားပြီး ရုတ်တရက် လန့်အောင်လုပ်တဲ့အခန်းတွေကို အလွန်အကျွံ မသုံးထားပါဘူး။ ဇာတ်ဝင်ခန်းတွေထဲမှာ ပဟေဠိတွေ ချန်ထားရင်း လိုအပ်တဲ့နေရာတွေမှာ အသံနဲ့ ထိတ်လန့်မှုကို ပံ့ပိုးပေးထားတယ်။ ဂီတပိုင်းအတွက် အော်စကာဆုရခဲ့ပြီး Jerry Goldsmith ရေးစပ်တဲ့ ဇာတ်ဝင်သီချင်း “Ave Satani” လည်း လူသိများခဲ့ပါတယ်။

ဒေါလ်တန်ဟာ လုံခြုံရေးအလုပ်မှာ အရည်အချင်းရှိသူတစ်ယောက်ဖြစ်လို့ မစ်ဆိုရီက ဒါဘယ်ဒုစ်ဆိုတဲ့ ဘားမှာ အလုပ်လုပ်ဖို့ ကမ်းလှမ်းခံရပါတယ်။ ဒီဘားက အရက်သမားတွေ၊ လူဆိုးတွေ ရမ်းကားနေတဲ့ နေရာတင်မကဘဲ မြို့ကို လက်ဝါးကြီးအုပ်ထားတဲ့ ဘရတ်ဝက်စ်လေနဲ့ သူ့လူတွေပါ ထင်သလို သောင်းကျန်းနေတဲ့နေရာ ဖြစ်နေတယ်။ ဒေါလ်တန်က သူတို့ကို ဘားထဲကနေ ရှင်းထုတ်လိုက်တဲ့အခါ ဘရတ်ကလည်း သူ့စီးပွားရေးကို ကာကွယ်ဖို့ နည်းမျိုးစုံနဲ့ ပြန်အနိုင်ကျင့်လာပါတယ်။ မြို့သားတွေကတော့ ဘရတ်ရဲ့အောက်မှာ နေရပြီး သူမထင်ရင် မထင်သလို နှိပ်စက်ခံနေရတာကြောင့် ပြန်မတော်လှန်ရဲကြဘူး။ အဲဒီအခြေအနေမှာ ဒေါလ်တန်တစ်ယောက်တည်း ဘရတ်ကို ရင်ဆိုင်ရတော့တယ်။ သူက ဘရတ်ကို အနိုင်ယူပြီး မြို့သားတွေကို ကယ်တင်နိုင်မလား၊ ဒါမှမဟုတ် ရှုံးနိမ့်ပြီး မြို့ကနေ ထွက်သွားရမလား။

ညီအစ်ကိုနှစ်ယောက် တောထဲမှာ ဆော့ကစားနေတုန်း ရှေ့နေတစ်ယောက် သေကြောင်းကြံတဲ့အမှုကို မျက်မြင်တွေ့လိုက်ကြပါတယ်။ ဒီရှေ့နေ သေဆုံးမှုက လွှတ်တော်အမတ်တစ်ယောက် ပျောက်ဆုံးနေတဲ့အမှုနဲ့ ဆက်စပ်နေတော့ သူမသေခင် နောက်ဆုံးတွေ့လိုက်ရတဲ့ ကလေးနှစ်ယောက်ထဲက အကြီးဖြစ်သူ Mark ဟာ မီဒီယာတွေနဲ့ မာဖီးယားအဖွဲ့ရဲ့ ပစ်မှတ်ဖြစ်လာတယ်။ အမတ်ပျောက်ဆုံးမှုကို လိုက်နေတဲ့ ရှေ့နေကြီး Roy ကလည်း Mark ဆီက အချက်အလက်တွေ ရဖို့ မေးမြန်းဖိအားပေးနေပါတယ်။ တစ်ဖက်မှာတော့ မာဖီးယားတွေက မပြောသင့်တာတွေ ပြောမိရင် အသတ်ခံရမယ်လို့ ခြိမ်းခြောက်ထားကြတယ်။ ဒီလိုအကျပ်အတည်းတွေကြားက လွတ်နိုင်ဖို့ လည်လည်ဝယ်ဝယ်ရှိတဲ့ Mark ဟာ ရှေ့နေတစ်ယောက် ငှားလိုက်ပါတယ်။ Mark နဲ့ ရှေ့နေတွေကြား ဘာတွေ ဆက်ဖြစ်မလဲ၊ မာဖီးယားတွေရဲ့ ရန်ကနေ ဘယ်လိုရှောင်နိုင်မလဲ၊ သူသိထားတဲ့အကြောင်းတွေက အမတ်ပျောက်ဆုံးမှုနဲ့ ဘယ်လိုဆက်စပ်နေသလဲဆိုတဲ့ မေးခွန်းတွေနဲ့ ဇာတ်လမ်းကို ဆက်ထားပါတယ်။ Tommy Lee Jones ပါဝင်သရုပ်ဆောင်ထားတဲ့ မှုခင်းဒရာမာဇာတ်ကားပါ။

မတော်တဆမှုတစ်ခုက မိသားစုသုံးစုရဲ့ဘဝကို ဆက်စပ်သွားစေပါတယ်။ မတော်တဆမှုကို ကြုံရတဲ့ မိသားစု၊ အဲဒီအမှုကို ဖြစ်စေခဲ့သူနဲ့ သေဆုံးသွားသူရဲ့ နှလုံးကို ရရှိလိုက်သူတို့ပါ။ 21 Grams ဟာ သေခြင်းနဲ့ နီးကပ်နေသူ၊ အပြစ်ရှိသူနဲ့ ကျန်ရစ်သူတို့ဆီမှာ လူတစ်ယောက် ဆုံးပါးသွားခြင်းက ဘယ်လိုဝန်ထုပ်ဝန်ပိုးတွေ၊ အပြစ်ရှိစိတ်တွေ ချန်ထားခဲ့သလဲဆိုတာကို ပြထားပါတယ်။ ဇာတ်ကားအမည်က ၁၉၀၇ ခုနှစ်မှာ Duncan MacDougall ထုတ်ဝေခဲ့တဲ့ “The 21 Grams Experiment” ဆိုတဲ့ စာတမ်းနဲ့ ဆက်စပ်နေပါတယ်။ သူတင်ပြခဲ့တဲ့ သီအိုရီအရ လူ့ဝိညာဉ်မှာ အလေးချိန်ရှိပြီး လူသေဆုံးပြီးချင်း အလေးချိန် ၂၁ ဂရမ် လျော့သွားတယ်လို့ ဆိုပါတယ်။ ရုပ်ရှင်ကတော့ အဲဒီ ၂၁ ဂရမ်ဆိုတဲ့ အယူအဆကနေ ဆုံးရှုံးမှုအကြောင်း မေးခွန်းထုတ်ထားတာပါ။ လူတစ်ယောက် ဆုံးပါးချိန်မှာ ဘာတွေ ဆုံးရှုံးသွားသလဲ၊ ကျန်ရစ်သူတွေကရော အဲဒီဆုံးရှုံးမှုကို ဘယ်လောက်အထိ ခံစားကြရသလဲဆိုတာကို ဇာတ်ကောင်တွေရဲ့ ဘဝတွေကနေ ပြောထားပါတယ်။ ဒါရိုက်တာ Alejandro G. Iñárritu က အဖြစ်အပျက်တွေကို အချိန်အစဉ်အလိုက် မဟုတ်ဘဲ ရှေ့နောက်ပြောင်းပြီး တင်ပြထားတယ်။ အစပိုင်းမှာ ဘယ်သူက ဘယ်မိသားစုနဲ့ ဆက်နွယ်နေသလဲဆိုတာ ရောထွေးနေနိုင်ပေမယ့် ဇာတ်လမ်းဆက်သွားတာနဲ့ အဖြစ်အပျက်တွေကို တဖြည်းဖြည်း ဆက်စပ်မိလာပါတယ်။ Sean Penn၊ Benicio Del Toro နဲ့ Naomi Watts တို့ ပါဝင်သရုပ်ဆောင်ထားပါတယ်။ ဒီဇာတ်ကားက သေခြင်းကို အခြေခံထားတဲ့ Alejandro ရဲ့ Death Trilogy

ဆိုနီယာက အလုပ်ကိုပဲ အာရုံစိုက်တတ်တဲ့ ဗုံးရှင်းလင်းရေးကျွမ်းကျင်သူတစ်ယောက်ပါ။ ပြင်သစ်အခြေစိုက် ဒီမင်တာ မိုင်းရှင်းလင်းရေးလုပ်ငန်းမှာ ဖရက်နဲ့ အတူအလုပ်လုပ်ရင်း ချစ်သူတွေ ဖြစ်လာခဲ့ကြတယ်။ ဆိုနီယာက အလုပ်ကို ဦးစားပေးလွန်းပေမယ့် သူတို့နှစ်ယောက်ကြား အပေးအယူမျှကြပြီး အရင်လက်တွဲဖော်တွေနဲ့ ရထားတဲ့ ကိုယ်စီသားသမီးတွေနဲ့အတူ မိသားစုတစ်ခုလို နေထိုင်နေကြပါတယ်။ တစ်နေ့မှာတော့ ဒီမင်တာကုမ္ပဏီအပေါ် ရန်ကြွေးရှိသူတစ်ယောက်က လက်စားချေဖို့ ဆိုနီယာရဲ့ကားမှာ ဗုံးထောင်လိုက်တယ်။ ဆိုနီယာနဲ့ ကလေးနှစ်ယောက်ဟာ ကားထဲက ထွက်လို့မရတော့ဘဲ ပိတ်မိသွားကြပါတယ်။ သူတို့အဖွဲ့သားတွေ ဗုံးဖြုတ်နိုင်ဖို့ အပူတပြင်း ကြိုးစားနေချိန်မှာပဲ ဒီဖြစ်ရပ်ဟာ ယူကရိန်းမှာ ဒီမင်တာကုမ္ပဏီ လုပ်ဆောင်ခဲ့ဖူးတဲ့ မစ်ရှင်ဟောင်းတစ်ခုနဲ့ ပတ်သက်နေနိုင်ကြောင်း သိလာကြတယ်။ အဲဒီကနေ ကုမ္ပဏီတွင်း ခြစားမှုတွေ တဖြည်းဖြည်း ပေါ်လာပြီး အဖွဲ့သားအချင်းချင်းကြားမှာပါ အကြိတ်အခဲတွေ ဖြစ်လာပါတယ်။ ချိန်ကိုက်ဗုံးကိုလည်း တားဆီးဖို့ ခက်လာတာကြောင့် သူတို့ဘဝတွေကို တစ်သက်စာ သက်ရောက်စေနိုင်တဲ့ ဆုံးဖြတ်ချက်တွေ ချရတော့မယ့်အထိ အခြေအနေက ရောက်လာတယ်။ ပြင်သစ်က ဒီသည်းထိတ်ရင်ဖိုဇာတ်ကားဟာ ဘတ်ဂျက်အကြီးစား မဟုတ်ပေမယ့် ဗုံးရှင်းလင်းရေးနဲ့ အကြမ်းဖက်မှုဆိုင်ရာ မြင်ကွင်းတွေကို အများအားဖြင့် လက်တွေ့ဆန်ဆန် ပုံဖော်ထားပါတယ်။

ခရစ္စတင်းဟာ အလုပ်များတဲ့ ဖက်ရှင်ဒီဇိုင်နာတစ်ယောက်ဖြစ်ပြီး ခင်ပွန်းဖီးလစ်၊ သမီးလေးဘော့ဘ်တို့နဲ့ အတူနေပါတယ်။ အပြင်ကကြည့်ရင် အစစအရာရာ အဆင်ပြေနေသလို ထင်ရပေမယ့် သူ့မှာ စိတ်ကယောင်ကတမ်းဖြစ်ပြီး အရမ်းမေ့တတ်တဲ့ ရောဂါဆန်းတစ်မျိုး ရှိနေတယ်။ သူတို့အိမ်ကို ဒိုင်ယာနာဆိုတဲ့ ဖိလစ်ပိုင်သူ ရောက်လာတဲ့အခါမှာတော့ သံသယဖြစ်စရာ အပြုအမူတွေကို တွေ့လာရပါတယ်။ ဒိုင်ယာနာက ခရစ္စတင်းအတွက် မိတ်ဆွေဖြစ်လာမှာလား၊ ရန်သူလား။ ခရစ္စတင်းရဲ့ ရောဂါဆန်းနဲ့ သူ့ကြားမှာ ဆက်စပ်မှုရှိနေသလားဆိုတာ မသေချာသေးဘဲ ရှေ့မှာ ဘယ်လို မထင်မှတ်တဲ့ ထိတ်လန့်စရာတွေ ကြုံရဦးမလဲဆိုတာကို ဆက်လိုက်ရမယ့် စိတ်ပိုင်းဆိုင်ရာ သည်းထိတ်ရင်ဖိုဇာတ်လမ်းပါ။

ဆီဆယ်ဟာ ငယ်ငယ်က ကျောင်းမှာ ခပ်တုံးတုံး လူဝကြီးဆိုပြီး စနောက်အနိုင်ကျင့်ခံခဲ့ရသူပါ။ သူ့ကို “ငကြောက်ကောင်” လို့ ခေါ်ပြီး အနိုင်ကျင့်သူတွေထဲမှာ စပိတ်က ထိပ်ဆုံးက ပါခဲ့တယ်။ အခုတော့ စပိတ်က ဆဌမလမ်းလူမိုက်ဂိုဏ်းရဲ့ ခေါင်းဆောင်ဖြစ်နေပြီး ဆီဆယ်ကတော့ အဘွားဆုံးသွားတဲ့နောက် အိမ်မှာ တစ်ယောက်တည်း နေနေပါတယ်။ စပိတ်က ခွမ်တင်အပါအဝင် ဂိုဏ်းဝင်အသစ် လူငယ်သုံးယောက်ကို ဆီဆယ့်အိမ် ဓားပြဝင်တိုက်ဖို့ လွှတ်လိုက်တယ်။ လွယ်လွယ်နဲ့ ပြီးမယ့်အလုပ်လို့ တွက်ထားပေမယ့် အိမ်ထဲမှာ သူတို့ကို စောင့်နေတဲ့ အန္တရာယ်ကိုတော့ မသိကြဘူး။ ပစ္စည်းယူဖို့နေနေသာသာ မျက်နှာဖုံးစွပ် လူသတ်သမားတစ်ယောက်နဲ့ ထိပ်တိုက်တွေ့ပြီး ရှုံးတာနဲ့ အသတ်ခံရမယ့် ဂိမ်းတွေကို အသက်နဲ့ရင်း ကစားကြရတော့တယ်။ အဲဒီအချိန်မှာ ခွမ်တင့်အမေကလည်း သားကို စိတ်ပူလို့ စပိတ်နဲ့အတူ ဆီဆယ့်အိမ်ကို ရောက်လာပါတယ်။ ရောက်လာတဲ့သူတွေပါ အန္တရာယ်ကနေ လွတ်နိုင်ပါ့မလား၊ အိမ်ထဲက လူငယ်သုံးယောက်ရော အသက်ရှင်နိုင်ပါ့မလား။ အပြင်လူတွေသာမက အဘွားရဲ့ နှိပ်စက်မှုကိုပါ ခံခဲ့ရတဲ့ ဆီဆယ် ဘာဖြစ်သွားသလဲ၊ မျက်နှာဖုံးနောက်က လူသတ်သမားက ဘယ်သူလဲဆိုတဲ့ မေးခွန်းတွေကို ဟာသအနည်းငယ်နဲ့ သွေးထွက်သံယိုအခန်းတွေကြားမှာ ဆက်တွေ့ရမှာပါ။

ငယ်ငယ်ကတည်းက လူဆိုးတစ်ယောက်ရဲ့ လက်သပ်မွေးတာကို ခံခဲ့ရတဲ့ မိဘမဲ့ကလေးသုံးယောက်ဟာ ကြီးလာတော့ နာမည်ကျော်သူခိုးတွေ ဖြစ်လာကြပါတယ်။ သူတို့ပစ်မှတ်ထားတာက ဈေးကြီးတဲ့ အနုပညာပစ္စည်းတွေပါ။ လတ်စလီချောင် သရုပ်ဆောင်တဲ့သူက စွန့်စားလုပ်တတ်ပြီး ချောင်ယွန်ဖတ် သရုပ်ဆောင်တဲ့သူကတော့ စွန့်စားရဲသလို ဉာဏ်လည်းကောင်းတယ်။ သူတို့နှစ်ယောက်နဲ့အတူ အမျိုးသမီးတစ်ယောက်ပါဝင်တဲ့ သုံးယောက်အဖွဲ့နဲ့ ဇာတ်လမ်းကို ဆက်ထားပါတယ်။ တစ်နေ့မှာ ခိုးယူဖို့ အတော်ခက်တဲ့ ပန်းချီကားတစ်ချပ်ကို သွားခိုးရင်း ချောင်ယွန်ဖတ်ရဲ့ဇာတ်ကောင်ဟာ မသန်စွမ်းဖြစ်သွားတယ်။ အဲဒီနောက် သူတို့ကို မွေးစားခဲ့တဲ့ဖခင်နဲ့ အတိုက်အခံဖြစ်လာကြပြီး အမှန်နဲ့အမှားကြားမှာ ရွေးချယ်လျှောက်လှမ်းကြရပါတယ်။ ဂျွန်ဝူးရိုက်ကူးထားတဲ့ ဒီကားမှာ သူနဲ့ လက်တွဲလာခဲ့တဲ့ ချောင်ယွန်ဖတ်နဲ့ လတ်စလီချောင်တို့ ပါဝင်ထားပါတယ်။ Heroic Bloodshed ဟန်တွေ ပါသလို ဟာသလည်း ရောထားတာကြောင့် ဂျွန်ဝူးရဲ့ တခြားဟောင်ကောင်အက်ရှင်ကားတွေနဲ့ အနည်းငယ်ကွဲပြားပါတယ်။ ချောင်ယွန်ဖတ်ရဲ့ဇာတ်ကောင်က တိုက်ခိုက်နေရင်း ဟာသပြောတာ၊ ရယ်စရာလုပ်တာတွေလည်း ပါဝင်ပါတယ်။

လန်ဒန်က ပြဇာတ်ရုံကြီးတစ်ခုမှာ အက်ဂ်သာခရစ္စတင်းရဲ့ ကြွက်ထောင်ချောက်ဆိုတဲ့ လူသတ်ပဟေဠိပြဇာတ်ကို ကပြနေပါတယ်။ ပြဇာတ်က အောင်မြင်လွန်းလို့ အကြိမ်တစ်ရာလောက် ပြန်လည်ကပြထားရတဲ့အထိပါပဲ။ အဲဒီပြဇာတ်ကို ရုပ်ရှင်အဖြစ် ရိုက်ကူးချင်တဲ့ အမေရိကန်ဒါရိုက်တာတစ်ယောက်နဲ့ ပရိုဂျူဆာတစ်ယောက်လည်း ပြဇာတ်ရုံကို ရောက်လာကြပါတယ်။ ပြဇာတ်စာရေးဆရာမ၊ ဇာတ်ညွှန်းဆရာ၊ မင်းသားနဲ့ လူမျိုးစုံ ရှိနေချိန်မှာ သူတို့ထဲက တစ်ယောက် အသတ်ခံလိုက်ရတယ်။ ဒီအမှုကို စုံထောက်ကြီး စတော့ပတ်နဲ့ ရဲမေ ကော့တာတို့ လာရောက်စုံစမ်းကြပါတယ်။ သံသယရှိသူတွေကြား လူသတ်သမားကို ရှာဖွေရင်း သူတို့နှစ်ယောက် ဘယ်လိုအလွဲတွေ ကြုံရဦးမလဲ။ လူသတ်ပဟေဠိထဲမှာ ဗြိတိန်ဟာသတွေ ရောစပ်ထားပြီး ဇာတ်ကောင်တွေရဲ့ ဗြိတိန်လေသံကိုလည်း ကြားရမယ့်ကားပါ။

Naruto ဟာ Raikage ကို လုပ်ကြံဖို့ ကြိုးစားခဲ့တယ်ဆိုတဲ့အမှုနဲ့ ထောင်ကျသွားပါတယ်။ သူရောက်သွားတဲ့နေရာက ရွာပေါင်းစုံက အဆိုးဆုံးနင်ဂျာတွေကို ဖမ်းဆီးထားတဲ့ ထောင်ပါ။ ဒါပေမယ့် အဲဒီထောင်ထဲမှာ ထောင်သားတွေအပြင် လျှို့ဝှက်ချက်ကြီးတစ်ခုပါ ရှိနေပြီး Naruto လည်း အဲဒီကိစ္စထဲ ပါဝင်ပတ်သက်မိလာပါတော့တယ်။ စကားပြောနားချရာမှာ ကျွမ်းကျင်တဲ့ Naruto တစ်ယောက် ထောင်မှူးတွေကို နားချပြီး ထောင်ထဲက ပြန်ထွက်နိုင်ပါ့မလား။ အက်ရှင်နဲ့ စိတ်ကူးယဉ်အကြောင်းအရာတွေ ပါဝင်တဲ့ ဒီအန်နီမေးရှင်းကားဟာ Naruto Shippuden ရုပ်ရှင်တွေထဲက ပဉ္စမမြောက်ကားဖြစ်ပါတယ်။ Naruto ဟာ ၂၀၀၀ ပြည့်နှစ်ဝန်းကျင်မှာ One Piece၊ Bleach တို့နဲ့အတူ လူသိများခဲ့တဲ့ အန်နီမေးတစ်ခုပါ။ လက်မလျှော့ဖို့ အားပေးတဲ့ စကားတွေနဲ့ နင်ဂျာလမ်းစဉ်အပေါ် ယုံကြည်ချက်တွေက ပရိသတ်တွေကြား ရေပန်းစားခဲ့ပါတယ်။ ရုပ်ရှင်တွေအနေနဲ့ ငယ်စဉ်ဘဝအကြောင်း သုံးကားနဲ့ လူငယ်ဘဝကို ဆက်ပြတဲ့ Shippuden ခုနစ်ကား ထွက်ရှိထားပါတယ်။