သည်းထိတ်ရင်ဖိုကားများ

Doc Alexander ဟာ အမေရိကန်အထူးတပ်ဖွဲ့က အထက်အရာရှိတစ်ယောက်ဖြစ်ပြီး Billie Riggs နဲ့ နှစ်ပေါင်းများစွာ လက်တွဲလုပ်ကိုင်လာခဲ့သူပါ။ Billie ကလည်း ထက်မြက်တဲ့ အမျိုးသမီးအရာရှိတစ်ယောက်ဖြစ်ပြီး လိင်တူချစ်သူဖြစ်ပါတယ်။ သူတို့နှစ်ယောက်ဟာ အမေရိကန်နဲ့ မက္ကဆီကိုမူးယစ်ဂိုဏ်း Cartel တို့ကြားက စီးပွားရေးအဆက်အသွယ်တွေ ပြေလည်နေအောင် အပေးအယူလုပ်ပြီး ထိန်းပေးနေကြတယ်။ ဒါပေမဲ့ သူတို့ရဲ့အသိအကျွမ်း Richard Jeffs မြို့တော်ဝန်ဖြစ်လာတဲ့နောက် အဲဒီအပေးအယူတွေကို မသိဘဲ Cartel ခေါင်းဆောင်ရဲ့ညီကို ကွပ်မျက်လိုက်ပါတယ်။ Doc နဲ့ Billie တို့က အခြေအနေကို ပြန်ထိန်းဖို့ ကြိုးစားကြပေမယ့် ကိစ္စတွေက ပိုရှုပ်ထွေးလာပြီး နောက်ဆုံးမှာ Doc ဟာ သမီးဖြစ်သူ Little Dixie ကို ကယ်တင်ဖို့ပါ လုပ်ရပါတော့တယ်။ Doc Alexander အဖြစ် Frank Grillo ပါဝင်သရုပ်ဆောင်ထားပါတယ်။

မေးစ်ဟာ တခြားဂြိုလ်တွေကို စူးစမ်းလေ့လာတာ၊ ရိက္ခာပို့တာတွေ လုပ်ရတဲ့ လခစားအာကာသယာဉ်မှူးတစ်ယောက်ပါ။ ပုံမှန်ဆို နှစ်ပတ်၊ တစ်လလောက်ပဲ ခရီးထွက်ရပေမယ့် ဒီတစ်ကြိမ်မှာ နှစ်နှစ်ကြာမယ့် ခရီးစဉ်တစ်ခုကို လက်ခံလိုက်တယ်။ ရောဂါခံစားနေရတဲ့ သမီးအတွက် ဆေးကုသစရိတ်လိုနေပြီး ဒီခရီးက လစာသုံးဆလောက် ရမှာကြောင့်ပါ။ လမ်းမှာတော့ သူ့ယာဉ်ဟာ ဂြိုဟ်သိမ်ဂြိုဟ်မွှားအပိုင်းအစတွေနဲ့ တိုက်မိပြီး အမည်မသိတဲ့ ဂြိုလ်တစ်ခုပေါ် ပျက်ကျသွားပါတယ်။ ပျက်ကျမှုကနေ အသက်ရှင်ကျန်ခဲ့တဲ့ မေးစ်ဟာ အိမ်ပြန်နိုင်ဖို့ အန္တရာယ်တွေကို ကျော်ဖြတ်နေရတယ်။ အဲဒီအချိန်မှာပဲ ဒီဂြိုလ်ပေါ်မှာ သူတစ်ယောက်တည်း ရှိနေတာမဟုတ်ကြောင်း သိလိုက်ရပါတယ်။ အဒမ်ဒရိုင်ဘာ ပါဝင်သရုပ်ဆောင်ထားတဲ့ သိပ္ပံစိတ်ကူးယဉ်အက်ရှင်ဇာတ်ကားဖြစ်ပြီး A Quiet Place ရဲ့ ဇာတ်ညွှန်းရေးဆရာ Scott Beck က ဒါရိုက်တာနဲ့ ဇာတ်ညွှန်းရေးဆရာအဖြစ် ပါဝင်ထားပါတယ်။

ခြေရာခံရာမှာ ကျွမ်းကျင်တဲ့ Bonham ဟာ FBI နဲ့ပူးပေါင်းပြီး လူတစ်ယောက်ကို လိုက်လံဖမ်းဆီးရပါတယ်။ သူဖမ်းရမယ့်သူက တခြားသူမဟုတ်ဘဲ သူ့ရဲ့အတော်ဆုံးတပည့် ဖြစ်နေတယ်။ ဆရာက ကိုယ့်တပည့်ကို ပြန်လိုက်ဖမ်းရတဲ့အကြောင်းကို ရှုပ်ထွေးတဲ့ဇာတ်ကွက်တွေ မများဘဲ အက်ရှင်နဲ့ သည်းထိတ်ရင်ဖိုပုံစံ တင်ဆက်ထားပါတယ်။ Bonham အဖြစ် Tommy Lee Jones က သရုပ်ဆောင်ထားပြီး Benecio del Toro လည်း အဓိကပါဝင်ထားပါတယ်။ The Exorcist နဲ့ Cruising တို့ကို ရိုက်ကူးခဲ့တဲ့ William Friedkin ရဲ့ လက်ရာပါ။

အစာဖြစ်တဲ့ ငါးတွေ ရှားပါးလာတဲ့အခါ ငါးမန်းတွေဟာ ရန်လိုလာပြီး ရေထဲဆင်းလာတဲ့ လူတွေကိုပါ စားလာကြပါတယ်။ တစ်နေ့မှာ ငါးဖမ်းခရီးထွက်လာတဲ့ စက်လှေတစ်စီးကို ငါးမန်းတွေ ဝင်ရောက်ရန်ပြုကြတယ်။ ရေလယ်ခေါင်မှာ ပိတ်မိသွားတဲ့ စက်လှေပေါ်က လူတွေဟာ အသက်ရှင်ဖို့အတွက် ကိုယ့်အသက်ကို စွန့်စားပြီး ငါးမန်းတွေကို ပြန်တိုက်ခိုက်ကြရတော့တယ်။

ဘော်ဘီဂရင်းဟာ နယူးယောက်က နာမည်ကြီး အဒ်ကာဘီဘားကို ကြီးကြပ်ရသူပါ။ ချစ်သူအမန်ဒါနဲ့ အချိန်ဖြုန်း၊ အရင်းနှီးဆုံးသူငယ်ချင်း ဂျန်ဘိုနဲ့ ပါတီတက်ရင်း ဘဝကို ပေါ့ပေါ့ပါးပါး ဖြတ်သန်းနေတယ်။ ရုရှားလူမျိုး ဘားပိုင်ရှင် မစ္စတာဘူရှိုင်းရာ့ဗ်နဲ့လည်း မိသားစုလို ရင်းနှီးပြီး ပိုင်ရှင်က သူ့လုပ်ရည်ကိုင်ရည်ကို သဘောကျထားပါတယ်။ ဘူရှိုင်းရာ့ဗ်က လုပ်ငန်းတိုးချဲ့ဖို့ စဉ်းစားနေသလို ဘော်ဘီကလည်း ဘားလုပ်ငန်းကို မန်ဟတ်တန်ဘက်အထိ ချဲ့ချင်နေတယ်။ အရာရာ အဆင်ပြေနေသလို ရှိနေချိန်မှာပဲ မိသားစုဘက်က ပြဿနာတစ်ခု သူ့ဆီ ရောက်လာပါတယ်။ တကယ်တော့ ဘော်ဘီရဲ့ မူလမျိုးရိုးနာမည်က ဂရင်းမဟုတ်ဘဲ ရူဇင်စကီပါ။ သူ့အဖေဟာ မြို့ရဲ့ရဲချုပ်ညွှန်ကြားရေးမှူးဖြစ်ပြီး အစ်ကိုကလည်း ရဲအရာရှိတစ်ယောက် ဖြစ်ပါတယ်။ မူးယစ်ဆေးဝါးနှိမ်နင်းရေး တာဝန်ယူနေတဲ့ အစ်ကိုဟာ ရုရှားမူးယစ်ဂိုဏ်းတစ်ဖွဲ့နဲ့ ထိပ်တိုက်တွေ့ပြီး လုပ်ကြံခံရတယ်။ အဲဒီအဖွဲ့က အဖေ့ကိုပါ လုပ်ကြံဖို့ ကြံနေကြောင်း ဘော်ဘီ သိလာတဲ့အခါ ရဲဌာနနဲ့ ပူးပေါင်းဖို့ ဖြစ်လာပါတယ်။ ပျော်ပျော်နေခဲ့တဲ့ ဘော်ဘီတစ်ယောက် မူးယစ်ဆေးဝါးအမှု ပေါ်ပေါက်အောင် ကိုယ်တိုင် ဘယ်လိုလုပ်ဆောင်မလဲဆိုတာ ဆက်ကြည့်ရမှာပါ။

လူငယ်လေးယောက်ဟာ ADHD ကုသရာမှာ သုံးတဲ့၊ ဆရာဝန်ညွှန်ကြားချက်ရှိမှ သောက်ရတဲ့ဆေးတစ်မျိုးကို စမ်းသုံးကြပါတယ်။ အဲဒီထဲက အေဗာက ပညာသင်ဆုရဖို့ စာမှာ ပိုအာရုံစိုက်နိုင်အောင် စသုံးခဲ့ရာကနေ ဆေးစွဲသွားတယ်။ ဒါတွေကို မသိတဲ့ အမေကတော့ သမီးအလိမ္မာလေးအတွက် အမြဲဂုဏ်ယူနေခဲ့ပါတယ်။ တစ်နေ့မှာ ရဲစခန်းက ဆက်သွယ်လာပြီး အေဗာဟာ သူငယ်ချင်းကို ကားနဲ့တိုက်ကာ ထွက်ပြေးနေကြောင်း ပြောလာတယ်။ အမေဖြစ်သူက ဘယ်လိုမှ မယုံနိုင်ဘူး။ သက်သေတွေ ရဲလက်ထဲ အရင်မရောက်အောင် ကြိုးစားရင်း အမှုမှန်ကို ကိုယ်တိုင်ဖော်ထုတ်ဖို့ လိုက်စုံစမ်းပါတော့တယ်။ အေဗာရဲ့ကားကို ရှာတွေ့တဲ့အခါ ရှေ့ပိုင်းမှာ လူကိုတိုက်ထားသလို အခြေအနေမျိုး ရှိနေတော့ သူ့အပေါ် သံသယက ပိုခိုင်မာလာတယ်။ ဒါပေမဲ့ သမီးဟာ ရာဇဝတ်ကောင်မဟုတ်ဘူးလို့ အခိုင်အမာယုံကြည်နေတဲ့ အမေက ရဲတွေနဲ့အပြိုင် အမှုကိုလိုက်ရင်း အေဗာကို ရှာနေဆဲပါ။ တကယ်ပဲ အေဗာက ဆေးအရှိန်ကြောင့် သူငယ်ချင်းကို ကားနဲ့တိုက်ခဲ့တာလား၊ အမေထင်သလို နောက်ကွယ်မှာ တခြားအကြောင်းတွေ ရှိနေဦးမလား။

ဂရိနိုင်ငံ အေသင်မြို့ကနေ အမေရိကန်နိုင်ငံ ဝါရှင်တန်ဒီစီကို ပျံသန်းနေတဲ့ လေယာဉ်တစ်စီးကို လမ်းခုလတ်မှာ အကြမ်းဖက်သမားတွေ စီးနင်းပြန်ပေးဆွဲလိုက်ပါတယ်။ အရှေ့အလယ်ပိုင်းက ဒီအဖွဲ့ဟာ အမေရိကန်စစ်တပ် ဖမ်းဆီးထားတဲ့ သူတို့ခေါင်းဆောင်ကို ပြန်လွှတ်ပေးဖို့ တောင်းဆိုတယ်။ ဒါပေမဲ့ ထောက်လှမ်းရေးအရာရှိ ဒေးဗစ်ဂရန့်က သူတို့ရည်ရွယ်ချက်ဟာ ဒီတစ်ခုတည်း မဟုတ်နိုင်ဘူးလို့ သံသယရှိနေပါတယ်။ ဒေးဗစ်ဂရန့်ဟာ ဓားစာခံကယ်ဆယ်ရေးကို လုပ်ဆောင်မယ့် ဗိုလ်မှူးအော်စတင်ထရာဗစ်နဲ့ ပူးပေါင်းရတော့တယ်။ အကြမ်းဖက်သမားတွေရဲ့ နောက်ကွယ်ကရည်ရွယ်ချက်က ဘာဖြစ်မလဲ၊ လေယာဉ်ပေါ်က ဓားစာခံတွေကို ကယ်တင်ဖို့ ဘယ်လိုအသက်စွန့်ရမလဲဆိုတာကို ဆက်ထားတဲ့ အက်ရှင်ဇာတ်ကားပါ။ ၁၉၉၆ ခုနှစ်မှာ ပြသခဲ့ပြီး ဒေးဗစ်ဂရန့်အဖြစ် Kurt Russel၊ ဗိုလ်မှူးအော်စတင်ထရာဗစ်အဖြစ် Steven Seagal တို့ သရုပ်ဆောင်ထားပါတယ်။ John Leguizamo နဲ့ Halle Berry တို့လည်း ပါဝင်ထားကြပါတယ်။

ရဲလုပ်သက်ရင့်ပြီး လူဂွစာတစ်ယောက်လည်းဖြစ်တဲ့ အက်ဒီ ဒူဂန် (Richard Gere) ဟာ အငြိမ်းစားယူဖို့ ပြင်ဆင်နေပါတယ်။ အငြိမ်းစားယူဖို့ တစ်ပတ်ပဲလိုတော့တဲ့အချိန်မှာ ဌာနရဲ့အစီအစဉ်အသစ်အတွက် တာဝန်ပေးခံရပြီး ရဲတပ်သားသစ်တစ်ယောက်ကို လေ့ကျင့်ပေးဖို့ သူနဲ့အတူ လှည့်ကင်းခေါ်ထွက်ရတယ်။ ကလဲရန့်စ် (Don Cheadle) ကတော့ ရုံးမှာပဲ အလုပ်လုပ်ရတဲ့ ရာထူးမျိုးကို တိုးချင်လို့ တန်ဂိုဆိုတဲ့ နာမည်ဝှက်နဲ့ မူးယစ်ဆေးဝါးဂိုဏ်းတစ်ခုထဲ အသွင်ယူနေသူပါ။ ဒီအလုပ်ကြောင့် သူ့အိမ်ထောင်ရေးလည်း ပျက်ပြားသွားခဲ့တယ်။ ထောင်ထဲမှာ အသွင်ယူနေစဉ်က အသက်ကယ်ပေးခဲ့ဖူးတဲ့ မူးယစ်ဂိုဏ်းခေါင်းဆောင် ကတ်ဇ်ကိုတော့ သူက မိတ်ဆွေရင်းချာလို သဘောထားနေပါတယ်။ ဒါပေမယ့် တစ်နေ့မှာ အထက်လူကြီးတွေက ကတ်ဇ်ကို ထောင်ထဲပြန်ရောက်အောင် လုပ်ဖို့ သူ့ကို တာဝန်ပေးလာတယ်။ မူးယစ်ရဲတပ်ဖွဲ့ဝင် ဆဲလ် (Ethan Hawke) မှာလည်း မိသားစုအတွက် ပူပန်နေရတဲ့ကိစ္စရှိပါတယ်။ လက်ရှိနေတဲ့အိမ်မှာ မှိုပြဿနာရှိပြီး ကိုယ်ဝန်ဆောင်ဇနီးကို ထိခိုက်လာတာကြောင့် အိမ်အသစ်ဝယ်ဖို့ ငွေစုနေတာပါ။ ရဲဝန်ထမ်းလစာက နည်းသလို ငွေပေးချေရမယ့်ရက်ကလည်း နီးလာပြီး အိမ်ရောင်းမယ့်သူက တောက်လျှောက်ဖုန်းဆက်မေးနေတယ်။ နောက်ဆုံးတော့ ဆဲလ်ဟာ မူးယစ်ဆေးဝါးဂိုဏ်းတွေကို ဝင်စီးချိန်မှာ တွေ့ရတဲ့ငွေတွေကို ခိုးယူဖို့ ကြိုးစားလာပါတယ်။ ဌာနမတူ၊ အချင်းချင်းလည်း မသိကြတဲ့ ဘရွတ်ကလင်းက ရဲသုံးယောက်ရဲ့ တစ်ပတ်တာကို လိုက်ပြထားတဲ့ ဇာတ်လမ်းပါ။ ဆဲလ်က လိုနေတဲ့ငွေ

သဘင်ပညာသည် ရှစ်ကျားဟာ ရုပ်သေးရုပ်တွေကို စူးစမ်းလေ့လာရတာ နှစ်သက်သူပါ။ တစ်နေ့မှာ အကြောင်းတိုက်ဆိုင်လို့ ရုပ်သေးရုပ်တစ်ရုပ်ကို တွေ့သွားပြီး ရှားပါးတဲ့လက်မှုပညာနဲ့ ပြုလုပ်ထားတဲ့ လက်ရာကို သဘောကျတာကြောင့် အိမ်ယူလာခဲ့တယ်။ ဒါပေမယ့် ရုပ်သေးရုပ်ကို ယူလာတဲ့နေ့မှာပဲ ရှစ်ကျား သေဆုံးသွားပါတယ်။ ရဲတွေက သူ့သေဆုံးမှုကို ကိုယ့်ကိုယ်ကိုယ် အဆုံးစီရင်မှုအဖြစ် အမှုပိတ်ဖို့ လုပ်ကြပေမယ့် ဇနီးဖြစ်သူ ယွိပိကတော့ လက်မခံနိုင်ပါဘူး။ ခင်ပွန်းကို အလွန်ချစ်တဲ့ ယွိပိက အမှုမှန်ပေါ်အောင် စုံစမ်းပေးဖို့ စခန်းမှူးကို တောင်းဆိုတယ်။ စခန်းမှူးက မူလသတ်မှတ်ထားတဲ့အတိုင်းပဲ ဆက်သွားချင်နေပေမယ့် ယွိပိကို သနားသွားတဲ့ ရဲအရာရှိချောင်က အမှုကို လွှဲယူလိုက်ပါတယ်။ ချောင်နဲ့ ယွိပိတို့ ရှစ်ကျားရဲ့သေဆုံးမှုကို အတူလိုက်စုံစမ်းရင်း လွန်ခဲ့တဲ့ ဆယ်နှစ်က အရာရှိအိမ်တော်တစ်ခုမှာ ဖြစ်ခဲ့တဲ့အမှု ပြန်ပေါ်လာတယ်။ အဲဒီတုန်းက ရုပ်သေးရုပ်က လူသတ်တယ်ဆိုတဲ့ ပြောဆိုချက်ရှိခဲ့တာပါ။ လူတွေရဲ့ကြိုးဆွဲရာကို လှုပ်ရှားရတဲ့ ရုပ်သေးရုပ်က တကယ်ပဲ လူသတ်နိုင်သလား၊ ရှစ်ကျားရဲ့သေဆုံးမှုကရော အဲဒီအဖြစ်နဲ့ ပတ်သက်နေသလားဆိုတာ သူတို့ အဖြေရှာကြရတော့မယ်။

Bravo ရဲ့အလုပ်က မိန်းကလေးတွေကို ငွေကြေးတတ်နိုင်တဲ့ အမျိုးသားတွေနဲ့ ချိတ်ဆက်ပေးရတာပါ။ ဝင်ငွေကောင်းပေမယ့် အလုပ်ထဲမှာ သူ့အခက်အခဲနဲ့သူ ရှိနေတယ်။ Carla ဆိုတဲ့ အမျိုးသမီးနဲ့ တွေ့ဆုံပြီးနောက် သူ့ဘဝမှာ ဘာတွေ ဆက်ဖြစ်လာမလဲဆိုတာနဲ့အတူ ငယ်ဘဝက စိတ်ဒဏ်ရာတွေအကြောင်းလည်း ပါလာပါတယ်။ သူ့ကို လူသတ်မှုတစ်ခုထဲ အကွက်ချပြီး ချောက်တွန်းသူတွေက ဘယ်သူတွေလဲဆိုတာလည်း အဖြေရှာရဦးမှာပါ။ ဝတ္ထုတစ်ပုဒ်ကို ရုပ်ရှင်ပြန်ရိုက်ထားတဲ့ ဒီဒရမ်မာနဲ့ သည်းထိတ်ရင်ဖိုဇာတ်လမ်းမှာ Bravo ရဲ့အကြောင်းကို လှည့်ကွက်တွေနဲ့ တင်ပြထားပါတယ်။

ရာဇဝတ်သားတွေကို ထောင်ပြောင်းဖို့ သယ်ဆောင်လာတဲ့ကားဟာ လမ်းခရီးကြမ်းတမ်းတာကြောင့် မကြာခင် ပိတ်တော့မယ့် စခန်းအမှတ် ၁၃ မှာ ခရီးတစ်ထောက် နားဖို့ ဖြစ်လာပါတယ်။ အတိတ်က ဒဏ်ရာတွေကို မကျော်လွှားနိုင်သေးတဲ့ အဓိကဇာတ်ကောင်ဟာ အဲဒီရာဇဝတ်သားတွေနဲ့ ပူးပေါင်းရမယ့် အကြောင်း ပေါ်လာတယ်။ လူကောင်းနဲ့ လူဆိုးကြားက ကွာခြားချက်ဟာ တစ်ခါတလေ အလွန်ပါးလွှာတတ်ပုံကို အက်ရှင်နဲ့ သည်းထိတ်ရင်ဖိုဇာတ်လမ်းအဖြစ် တင်ပြထားပါတယ်။

နီဗားဒါးက အရက်ဆိုင်တစ်ခုမှာ လူတွေဟာ ပုံမှန်နေ့တွေလိုပဲ သောက်စားပျော်ပါးနေကြပါတယ်။ အဲဒီအချိန် ဟီးရိုးဆိုတဲ့လူ ရောက်လာပြီး ဆိုင်အပြင်မှာ မကောင်းဆိုးဝါးတွေ ရှိနေပြီလို့ သတိပေးလာတယ်။ အဲဒီအကောင်တွေက လှုပ်ရှားမှုမြန်သလို ရွံစရာအသွင်အပြင်ရှိပြီး အလွန်ဆာလောင်နေကြတာပါ။ မကောင်းဆိုးဝါးတွေ အရက်ဆိုင်ဆီ ရောက်လာတဲ့အခါ ဆိုင်ထဲကလူတွေဟာ အတူပူးပေါင်းပြီး ခုခံဖို့နဲ့ လွတ်မြောက်ဖို့ ကြိုးစားကြရပါတယ်။ ဇာတ်လမ်းတစ်ခုလုံးကို ဒီအရက်ဆိုင်အတွင်းမှာပဲ အခြေတည်ထားပြီး မမျှော်လင့်ထားတဲ့ အဖြစ်အပျက်တွေ ဆက်တိုက်ပေါ်လာတယ်။ အက်ရှင်၊ ဟာသနဲ့ ထိတ်လန့်စရာတွေ ရောထားတဲ့ R သတ်မှတ်ချက်ရ ဇာတ်ကားဖြစ်ပြီး သွေးထွက်သံယိုခန်းတွေ အများအပြား ပါဝင်ပါတယ်။

အသက်ရှစ်နှစ်အရွယ် ဗစ်ကီဟာ ရေကူးနည်းပြအမေနဲ့ မီးသတ်သမားအဖေတို့နဲ့ အတူနေပါတယ်။ အမေနဲ့ အလွန်ရင်းနှီးပြီး အမေမှအမေ ဖြစ်နေတဲ့ ကလေးပေမယ့် အမေမသိထားတဲ့ အကြောင်းနှစ်ခု ရှိတယ်။ တစ်ခုက ကျောင်းမှာ အလှောင်ခံနေရတာဖြစ်ပြီး နောက်တစ်ခုကတော့ ထူးခြားတဲ့ စွမ်းအားတစ်ခု ပိုင်ဆိုင်ထားတာပါ။ ဗစ်ကီက အနံ့တွေကို ခွဲခြားစုဆောင်းနိုင်ပြီး သူရွေးချယ်လိုက်တဲ့ အနံ့ကနေ ကာလတစ်ခုကို ပြန်ပုံဖော်နိုင်တယ်။ ရနံ့ထဲက အမှတ်တရတွေကို ပြန်ထုတ်ကြည့်နိုင်တဲ့ စွမ်းရည်မျိုးလို့ ဆိုနိုင်ပါတယ်။ တစ်နေ့မှာတော့ အဖေရဲ့ညီမဖြစ်သူ ရောက်လာတယ်။ ဗစ်ကီအတွက်တော့ ဒီအဒေါ်ရှိမှန်းတောင် အရင်က မသိခဲ့ပါဘူး။ အဒေါ်ရောက်လာပြီးနောက် ဗစ်ကီဟာ ရနံ့တွေကတစ်ဆင့် အမေရဲ့အတိတ်ထဲက အမှတ်တရတွေကို ထိတွေ့မိလာပါတယ်။ အဲဒီထဲမှာ လွမ်းဆွတ်စရာတွေရှိသလို ပြန်မဖော်သင့်တဲ့ အမှောင်ဘက်ခြမ်းလည်း ရှိနေတယ်။ ဒီဇာတ်ကားမှာ Blue Is the Warmest Colour ထဲက မင်းသမီး Adèle Exarchopoulos ပါဝင်သရုပ်ဆောင်ထားပါတယ်။

လူစီသွန်မဆင်ဟာ ကိုယ်ပိုင်စုံစမ်းရေးကုမ္ပဏီတစ်ခု ဖွင့်ထားပြီး အိမ်ထောင်ရေးဖောက်ပြန်မှုတွေကို လိုက်လံစုံစမ်းပေးနေသူပါ။ ငယ်ငယ်တုန်းက သူ့အဖေဟာ အတွင်းရေးမှူးနဲ့ ဖောက်ပြန်ပြီး သူ့အမေကို စွန့်ပစ်ထွက်သွားခဲ့တယ်။ အဲဒီအတွေ့အကြုံကြောင့်ပဲ လူစီက ဒီအလုပ်ကို ရွေးလုပ်ဖြစ်ခဲ့တာပါ။ အလုပ်ထဲမှာလည်း သစ္စာမဲ့မှုတွေကို နေ့တိုင်းတွေ့နေရတော့ လူစီဟာ ရည်းစားမထားဘဲ နေခဲ့သလို တစ်ယောက်ယောက်ကို ယုံကြည်တာကိုတောင် အားနည်းချက်တစ်ခုလို့ မြင်နေပါတယ်။ တစ်နေ့မှာ ကလိုက်ကက်ဆယ်ဆိုတဲ့ အမျိုးသားတစ်ယောက် ရောက်လာပြီး သူ့ဇနီး ဖောက်ပြန်နေတယ်လို့ သံသယရှိတဲ့အတွက် စုံစမ်းပေးဖို့ အလုပ်အပ်လာတယ်။ အမှုကို လိုက်စုံစမ်းရင်း လူစီနဲ့ ကလိုက်တို့ကြားမှာပါ ဖောက်ပြန်တဲ့ဆက်ဆံရေး ဖြစ်လာပါတယ်။ အဲဒီကနေ ဘယ်လိုလူသေဆုံးမှုတွေ ကြုံလာရမလဲဆိုတာကို အလှည့်အပြောင်းတွေနဲ့ ဆက်ပြထားတဲ့ သည်းထိတ်ရင်ဖိုဇာတ်ကားပါ။

စိတ်ပညာရှင်လည်းဖြစ်၊ စုံထောက်လည်းဖြစ်တဲ့ ဒေါက်တာအဲလက်စ်ခရော့စ်ဟာ စစ်ဆင်ရေးတစ်ခုမှာ တွဲဖက်ကို ဆုံးရှုံးခဲ့ရပြီးနောက် ကိုယ့်ကိုယ်ကိုယ် ခွင့်မလွှတ်နိုင် ဖြစ်နေပါတယ်။ အဲဒီကတည်းက ဘဝကို ရည်ရွယ်ချက်မရှိဘဲ ဖြတ်သန်းနေခဲ့တာပါ။ ရှစ်လအကြာမှာတော့ ပြည်နယ်လွှတ်တော်အမတ် ဟန့်ခ်ရို့စ်ရဲ့ သမီးလေးရို့စ် ပြန်ပေးဆွဲခံလိုက်ရတယ်။ ကိုယ်ပိုင်ကျောင်းတစ်ခုမှာ ကျောင်းတက်နေတဲ့ ကလေးမလေးဟာ Secret Service ရဲ့ စောင့်ရှောက်မှုအောက်မှာ ရှိနေရင်းနဲ့ပဲ ပြန်ပေးဆွဲခံခဲ့ရတာ ဖြစ်ပါတယ်။ ပြန်ပေးသမားက အဲလက်စ်ဆီ ဖုန်းဆက်ပြီး သူ့ကစားပွဲထဲ ဝင်ပါဖို့ ခေါ်လာတော့တယ်။ အဲလက်စ်အနေနဲ့ ပြန်ပေးသမားရဲ့ ကစားပွဲကို အနိုင်ယူနိုင်မလား၊ ရို့စ်ကိုရော ကယ်ထုတ်နိုင်ပါ့မလား၊ အမှုနောက်လိုက်ရင်း ဘယ်လိုအန္တရာယ်နဲ့ အလှည့်အပြောင်းတွေ ကြုံရမလဲဆိုတာ ဆက်တွေ့ရမှာပါ။ ၂၀၀၁ ခုနှစ်မှာ ထွက်ရှိခဲ့ပြီး မော်ဂန်ဖရီးမန်းက အဲလက်စ်ခရော့စ်အဖြစ် သရုပ်ဆောင်ထားပါတယ်။

မီလီဟာ မိဘတွေရဲ့ တစ်ဦးတည်းသောသမီးဖြစ်ပြီး ကိုယ့်ဘဝရည်မှန်းချက်အတွက် ကြိုးစားနေတဲ့ မိန်းကလေးတစ်ယောက်ပါ။ စားသောက်ဆိုင်တစ်ခုမှာလည်း အလုပ်လုပ်ရင်း မိဘတွေကို တတ်နိုင်သလောက် ကူညီပေးနေတယ်။ ဒါပေမယ့် တစ်နေ့မှာ သူအလုပ်လုပ်တဲ့ ဆိုင်ရဲ့အအေးခန်းထဲ တစ်ယောက်တည်း ပိတ်မိသွားပါတယ်။ အပူချိန် အနှုတ် ၁၈ ဒီဂရီရှိတဲ့ အအေးခန်းထဲမှာ မီလီဟာ တစ်ညလုံး ပိတ်မိနေခဲ့ရတယ်။ ဒီအခြေအနေကနေ လွတ်မြောက်ဖို့ သူဘယ်လိုကြိုးစားမလဲ၊ အသက်ရှင်လျက် ပြန်ထွက်လာနိုင်ပါ့မလားဆိုတာကို ဆက်ပြထားတဲ့ သည်းထိတ်ရင်ဖိုဒရာမာပါ။ ဂျန်ဗီးကပူးနဲ့ ဆန်နီကော်ရှားတို့ ပါဝင်သရုပ်ဆောင်ထားပါတယ်။

အန်ဂျလိုဟာ လက်ဝှေ့သမားကောင်းတစ်ယောက် ဖြစ်ချင်လွန်းလို့ ရှိသမျှပုံအောပြီး ကြိုးစားခဲ့သူပါ။ ဒါပေမယ့် စိတ်မထိန်းနိုင်လိုက်တဲ့ အခိုက်အတန့်တစ်ခုကြောင့် ထောင်ထဲမှာ ခြောက်နှစ်လောက် နေလိုက်ရပါတယ်။ အားသွန်ခွန်စိုက် ကြိုးစားခဲ့တဲ့ သူ့အိပ်မက်တွေလည်း အဲဒီမှာ ရပ်တန့်သွားခဲ့ရတယ်။ ထောင်က ပြန်ထွက်လာတော့ အန်ဂျလိုရဲ့ အသက်ကလည်း မငယ်တော့ပါဘူး။ အလွဲတွေပြည့်နေတဲ့ ဒုစရိုက်လောကထဲမှာ သူ့အိပ်မက်ကို ပြန်အကောင်အထည်ဖော်နိုင်ဦးမလားဆိုတာ မေးခွန်းဖြစ်လာတယ်။ သူ့ရဲ့လမ်းခရီးကို ဥပဒေမဲ့လက်ဝှေ့ပွဲတွေ၊ ပြင်သစ်ဒုစရိုက်လောကနဲ့ တွဲဖက်ပြထားတဲ့ အက်ရှင်ဒရာမာပါ။

ဂျူယောင်းဆူဟာ ဘုရားသခင်ကို နက်နက်ရှိုင်းရှိုင်း ယုံကြည်တဲ့ သင်းအုပ်ဆရာတစ်ယောက်ဖြစ်ပြီး ပျော်ရွှင်တဲ့ မိသားစုဘဝကို ပိုင်ဆိုင်ထားပါတယ်။ ဒါပေမယ့် သမီးဖြစ်သူ ဂျူဟယ်ရင်း ပြန်ပေးဆွဲခံလိုက်ရတဲ့နောက် သူ့ဘဝလည်း ပြောင်းလဲသွားတယ်။ သမီးကို ပြန်ရှာတွေ့ဖို့ နေ့ရောညပါ ဆုတောင်းရင်း ရှစ်နှစ်ကြာသွားပေမယ့် သမီးကို ပြန်မတွေ့ခဲ့ပါဘူး။ သမီးသေဆုံးသွားပြီလို့ ယုံကြည်ထားချိန်မှာတော့ ဂျူယောင်းဆူဆီ ဖုန်းတစ်ကောလ် ဝင်လာပါတယ်။ ဖုန်းဆက်လာသူက သမီးကို ပြန်လိုချင်ရင် ငွေသန်း ၄၀၀ ပေးရမယ်လို့ ခြိမ်းခြောက်လာတာပါ။ ရှစ်နှစ်လုံး ပျောက်ဆုံးနေတဲ့ သမီးအကြောင်း ပြန်ကြားရချိန်မှာ ဂျူယောင်းဆူတစ်ယောက် ဒီတောင်းဆိုမှုကို ဘယ်လိုရင်ဆိုင်မလဲဆိုတာနဲ့ ဇာတ်လမ်းဆက်သွားပါတယ်။ ၂၀၁၀ ခုနှစ်မှာ ထွက်ရှိခဲ့တဲ့ အက်ရှင်နဲ့ သည်းထိတ်ရင်ဖို ရောစပ်ထားတဲ့ ဒရာမာဇာတ်ကားပါ။

ဒေဘီကာတို့ဟာ နော်ဝေးမှာ နေထိုင်နေတဲ့ အိန္ဒိယမိသားစုတစ်စုပါ။ ခင်ပွန်းက အလုပ်လုပ်ပြီး ဝင်ငွေရှာပေးသလို ဒေဘီကာက အိမ်မှုကိစ္စတွေနဲ့ ကလေးနှစ်ယောက်ကို ပြုစုစောင့်ရှောက်ရပါတယ်။ နိုင်ငံရပ်ခြားမှာ အိမ်အလုပ်နဲ့ ကလေးကိစ္စတွေကို တစ်ယောက်တည်း မနိုင်မနင်း လုပ်နေရတဲ့ သူ့အခြေအနေကို နော်ဝေးအရာရှိတွေက အထင်လွဲသွားကြတယ်။ အဲဒီနောက် ဒေဘီကာတို့ဇနီးမောင်နှံမှာ ကလေးတွေကို စောင့်ရှောက်နိုင်စွမ်းမရှိဘူးဆိုတဲ့ အကြောင်းပြချက်နဲ့ ကလေးနှစ်ယောက်ကို အတင်းခေါ်ဆောင်သွားကြပါတယ်။ သားသမီးတွေနဲ့ ခွဲခွာလိုက်ရတဲ့ သာမန်မိခင်တစ်ယောက်ဟာ နိုင်ငံတစ်နိုင်ငံရဲ့ ဥပဒေနဲ့ ရင်ဆိုင်ရပါတော့တယ်။ ရာနီး အဓိကသရုပ်ဆောင်ထားပြီး အိန္ဒိယမိခင်တစ်ယောက်ရဲ့ ဖြစ်ရပ်မှန်ကို အခြေခံထားတဲ့ ဇာတ်လမ်းပါ။

နှုတ်ခမ်းမွှေး မရိတ်ဘဲထားလာတာ ကြာပြီဖြစ်တဲ့ အမျိုးသားတစ်ယောက်ဟာ တစ်နေ့မှာ ရိတ်လိုက်ပြီး ဇနီးနဲ့အတူ မိတ်ဆွေတွေရဲ့ ကလေးမွေးနေ့ပွဲကို သွားပါတယ်။ သူ့အသွင် ပြောင်းသွားတာကို ဇနီးအပါအဝင် ဘယ်သူကမှ သတိမထားမိကြဘူး။ အပြန်မှာတော့ အားလုံးက သူ့ကို ဝိုင်းနောက်နေကြတာလားဆိုပြီး ဒေါသထွက်လာပါတယ်။ ဇနီးရဲ့အဖြေက သူထင်ထားသလို မဟုတ်ဘူး။ သူ့မှာ အရင်ကတည်းက နှုတ်ခမ်းမွှေး မရှိခဲ့ဖူးဘူးလို့ ပြောလာတာပါ။ ကိုယ့်မှာ ရှိခဲ့တယ်လို့ မှတ်မိနေတဲ့အရာကို အနီးဆုံးလူကပါ ငြင်းနေတော့ သူလည်း လက်ခံဖို့ ခက်နေတယ်။ ဒါနဲ့ သူ့ဘဝထဲက တခြားလူတွေကို လိုက်မေးပြီး သူ့နှုတ်ခမ်းမွှေး ပျောက်သွားတာ သတိထားမိကြသလားဆိုတာ စမ်းကြည့်ပါတယ်။ မေးလေလေ အရင်ကတည်းက မရှိခဲ့သလို ဖြစ်လာလေလေဆိုပေမယ့် သူ့အတွက်တော့ ရှိခဲ့တာလား၊ မရှိခဲ့တာလား မသေချာနိုင်သေးပါဘူး။ ပြင်သစ်ဒါရိုက်တာ Emmanuel Carrère ရိုက်ကူးထားတဲ့ လျှို့ဝှက်ဆန်းကြယ် စိတ်ပိုင်းဆိုင်ရာဒရာမာဖြစ်ပြီး Vincent Lindon နဲ့ Emmanuelle Devos တို့ ပါဝင်သရုပ်ဆောင်ထားပါတယ်။ Vincent Lindon က ကိန်းရုပ်ရှင်ပွဲတော်မှာ မင်းသားဆုရထားသူဖြစ်ပြီး Emmanuelle Devos ကတော့ César အကောင်းဆုံးမင်းသမီးဆု ရထားသူပါ။

ကီချူးနဲ့ ကလျာနီတို့စုံတွဲက နိုင်ငံခြားမှာ အခြေချချင်ကြပေမယ့် လက်ထဲမှာ ငွေမရှိကြဘူး။ အဲဒီအချိန်မှာ ကီချူးရဲ့ဦးလေး အဆက်အသွယ်နဲ့ အဖွဲ့တစ်ဖွဲ့က သူ့ကို အလုပ်အပ်လာပါတယ်။ လုပ်ပေးရမှာက အတိတ်မေ့နေတဲ့ လူတစ်ယောက်ကို မှတ်ဉာဏ်ပြန်ရအောင် ကူညီပေးဖို့ပါ။ လူတွေနဲ့ ပေါင်းသင်းဆက်ဆံရာမှာ ကျွမ်းကျင်တဲ့ ကီချူးရဲ့ ဖော်ရွေမှုကို အသုံးချပြီး အဲဒီလူရဲ့အတိတ်ကို ပြန်ဖော်ချင်ကြတာဖြစ်ပါတယ်။ အတိတ်မေ့နေသူက ဒေးဗစ်လို့ခေါ်ပြီး တစ်ချိန်က ရွှေမှောင်ခိုဂိုဏ်းခေါင်းဆောင်ရဲ့ ညာလက်ရုံးဖြစ်ခဲ့သူပါ။ မတော်တဆမှုတစ်ခုကြောင့် မှတ်ဉာဏ်ပျောက်သွားတဲ့အခါ ကုဋေသုံးဆယ်လောက် တန်ဖိုးရှိတဲ့ ရွှေတွေထားရာနေရာကိုပါ မေ့သွားခဲ့တယ်။ အဲဒီရွှေတွေကို လိုချင်နေတဲ့ လူတစ်စုကြားမှာ ကီချူးက ဒေးဗစ်ရဲ့မှတ်ဉာဏ် ပြန်ရလာအောင် ကြိုးစားပေးရင်း အရှုပ်အထွေးတွေနဲ့ ကြုံရပါတော့တယ်။ Eesha Rebba ပါဝင်သရုပ်ဆောင်ထားပါတယ်။

အန်ဂဲလ်ဟာ ဘဝကို ရိုးရိုးသားသား ကြိုးစားဖြတ်သန်းနေသူတစ်ယောက်ပါ။ ဒါပေမယ့် ကောင်မလေးကိစ္စနဲ့ ပိုလီဆိုသူနဲ့ အချင်းများမိရာကနေ ဒုစရိုက်လောကထဲ တဖြည်းဖြည်း ခြေကျွံလာပါတယ်။ ပိုလီက အန်ဂဲလ်ရဲ့ အစွမ်းအစကို မြင်ပြီး သူ့လောကထဲ ခေါ်သွင်းခဲ့ပေမယ့် နောက်ပိုင်းမှာ အန်ဂဲလ်က သူ့ထက်တောင် လက်စောင်းထက်လာတယ်။ အန်ဂဲလ်ကလည်း အထက်တန်းကျောင်းတုန်းက ငယ်ချစ် ဆိုးကို အသုံးချပြီး သူ့အဖေ ရိုဟီလီယိုဆီ ချဉ်းကပ်လာပါတယ်။ သူမုန်းတဲ့ ဆင်ခြေဖုံးဘဝကနေ လွတ်ပြီး အထက်တန်းစားဘဝကို ရောက်ချင်နေတာပါ။ အဲဒီရည်မှန်းချက်အတွက် ဆရာဖြစ်ခဲ့ဖူးတဲ့ ရိုဟီလီယိုနဲ့ အချစ်ပြိုင်ဘက် ပိုလီတို့ကို ဘယ်လိုကျော်တက်ဖို့ ကြိုးစားမလဲ၊ လောဘနဲ့ ရွေးတဲ့ဖြတ်လမ်းတွေမှာ ဘာအခက်အခဲတွေ ကြုံလာပြီး အောင်မြင်နိုင်ပါ့မလားဆိုတာကို ဆက်ပြထားတဲ့ စပိန်အက်ရှင်နဲ့ မှုခင်းဇာတ်လမ်း ဖြစ်ပါတယ်။

တစ်နှစ်ပတ်လုံး မြူတွေ အုံ့ဆိုင်းနေတဲ့ ကျွန်းတစ်ကျွန်းမှာ လူတချို့ နေထိုင်ကြပါတယ်။ ကျွန်းလုံခြုံဖို့ဆိုရင် ဘာမဆိုလုပ်တတ်တဲ့ ရွာသူကြီးကို ကျွန်းသားတွေက ကြောက်ကြရတယ်။ အဲဒီကျွန်းမှာနေတဲ့ ဟယ်ဂျောင်ကတော့ ဘာစားစား ဗိုက်ဆာနေပြီး ကိုယ်ခန္ဓာလည်း နာကျင်နေတာကြောင့် နတ်ဆရာမတစ်ယောက်ဆီမှာ ကုသမှုခံယူနေရပါတယ်။ တစ်နေ့မှာ နတ်ဆရာမက ဟယ်ဂျောင်ရဲ့ နာကျင်မှုကို ကုသဖို့ ကုန်းမြေပေါ်က လူတစ်ယောက်လိုတယ်လို့ ပြောပြီး သူ့အစ်ကိုကို သွားခေါ်ခိုင်းတယ်။ တစ်ဖက်မှာလည်း အလုပ်ပြုတ်ထားတဲ့ ဂျောင်ဟျော့ဟာ အလုပ်အကိုင်ရှာဖွေရေးအေဂျင်စီကနေတစ်ဆင့် အလုပ်ရှာရင်း အဲဒီကျွန်းမှာ အလုပ်လုပ်ဖို့ ဖြစ်လာပါတယ်။ ကျွန်းပေါ်ရောက်သွားတဲ့အခါ သူမျှော်လင့်မထားတဲ့ ထူးဆန်းမှုတွေ အများကြီးကို တွေ့လာရတယ်။ ဒီလျှို့ဝှက်ဆန်းကြယ်သည်းဖိုဇာတ်ကားကို ဒါရိုက်တာ Yoon San က ရိုက်ကူးထားပြီး Kim Ho chang၊ Choi Ryung၊ Sok Bo Bae၊ Kang You-ra နဲ့ Taewoong တို့ ပါဝင်သရုပ်ဆောင်ထားပါတယ်။

အသက် ၁၉ နှစ်အရွယ် ဂျက်စီ ရိုင်ယန်ဝှိုက်ဟာ ပြစ်မှုတစ်ခုကြောင့် ထောင်ထဲကို ပထမဆုံး ရောက်လာပါတယ်။ ထောင်ထဲမှာ ဆပ်ပြာတုံးပြုတ်ကျရင်တောင် မကောက်ရဲလောက်အောင် ကြောက်ရွံ့နေရတဲ့ သူဟာ ရာဇဝတ်မှုတွေကို ကျွမ်းကျွမ်းကျင်ကျင် စီစဉ်တတ်ပြီး စစ်တုရင်မှာလည်း ပညာရှင်တစ်ဦးဖြစ်တဲ့ ဘရန်ဒန်နဲ့ ဆုံမိတယ်။ ငယ်ငယ်ရွယ်ရွယ်နဲ့ စစ်တုရင်ကစားကွက်တွေကို ကျွမ်းကျင်တဲ့ ဂျက်စီကို ဘရန်ဒန်က သဘောကျသွားပါတယ်။ အဲဒီကနေ သူတို့နှစ်ယောက် ပူးပေါင်းပြီး ထောင်အပြင်မှာ အပြစ်အနာအဆာမရှိတဲ့ ရာဇဝတ်မှုတစ်ခု ကျူးလွန်ဖို့ ကြိုးစားကြတယ်။ ဒါပေမယ့် ကြံစည်ထားသလို လုပ်နိုင်ဖို့က မလွယ်ဘဲ အခက်အခဲတွေ၊ လှည့်ကွက်တွေနဲ့ အခြေအနေအပြောင်းအလဲတွေကို ရင်ဆိုင်ကြရပါတယ်။