အက်ရှင်ကားများ

KGF ပထမပိုင်းမှာ ရော့ကီရဲ့အင်အား ကြီးမားလာတာနဲ့အမျှ ရန်သူတွေကလည်း သူ့ကို အဓိကပစ်မှတ်ထားပြီး နှိမ်နင်းဖို့ ကြိုးစားလာကြပါတယ်။ ဒုတိယပိုင်းမှာတော့ ရော့ကီနဲ့ အပြိုင်ရင်ဆိုင်မယ့် ရန်သူတစ်ယောက် ထပ်ပေါ်လာတယ်။ နိုင်ငံရေးအရှုပ်အထွေးတွေပါ ပါဝင်လာတဲ့အခါ ရော့ကီ ရင်ဆိုင်ရမယ့်ကိစ္စတွေက ပိုများလာပါတယ်။

ထယ်ဂွန်းဟိုဟာ သွေးအေးပြီး ရက်စက်တတ်တဲ့ အကြွေးကောက်ခံရေးအေးဂျင့်တစ်ယောက်ပါ။ တစ်နေ့မှာတော့ သူ့မှာ အသည်းကင်ဆာ အလွန်ပြင်းထန်နေပြီဖြစ်ပြီး အသက်ရှင်ဖို့ သုံးလလောက်ပဲ ကျန်တော့ကြောင်း သိလိုက်ရတယ်။ အသည်းအစားထိုး ခွဲစိတ်နိုင်ဖို့အတွက် အလှူရှင်တစ်ယောက်ကို ဆယ်ရက်အတွင်း ရှာရပါတော့မယ်။ ကြံရာမရတဲ့အဆုံး သူ့သားလေး သေဆုံးခဲ့ချိန်က ကိုယ်အင်္ဂါလှူဒါန်းပေးခဲ့ဖူးတဲ့သူတွေကို ပြန်ရှာဖို့ ဆုံးဖြတ်လိုက်တယ်။ အဲဒီထဲက ချာဟာယွန်ဟာ သူ့ကို အသည်းလှူပေးနိုင်လောက်သူ ဖြစ်နေပေမယ့် နာမည်ကြီးလူလိမ်တစ်ယောက်လည်း ဖြစ်နေပါတယ်။ သူ ကျူးလွန်ထားတဲ့ ပြစ်မှုတွေကြောင့် အချုပ်ကျနေတာပါ။ ချာဟာယွန် ပြန်လွတ်ဖို့ ရက်အနည်းငယ်ပဲ ကျန်တော့ကြောင်း သိရတဲ့အခါ ထယ်ဂွန်းဟိုအတွက် မျှော်လင့်ချက်တစ်ခု ရလာတယ်။ သူ့ကို အသည်းလှူပေးဖို့ ချာဟာယွန်ကို ဘယ်လိုစည်းရုံးမလဲ၊ ချာဟာယွန် လုပ်ထားခဲ့တဲ့ အရှုပ်အရှင်းတွေကိုရော ဘယ်လိုဖြေရှင်းကြမလဲ။ အချိန်နည်းနည်းပဲ ကျန်တော့တဲ့ ထယ်ဂွန်းဟိုတစ်ယောက် အစားထိုးခွဲစိတ်မှုကို အောင်အောင်မြင်မြင် လုပ်နိုင်ပါ့မလား။

အနုမြူဗုံး ပေါက်ကွဲပြီးနောက် အရာရာ ပျက်စီးနေတဲ့အချိန်မှာ ပြည်သူတွေအတွက် မရှိမဖြစ်လိုအပ်တဲ့ ရေအရင်းအမြစ်တွေပါ ညစ်ညမ်းသွားပါတယ်။ သန့်စင်တဲ့ရေ ရှာပေးနိုင်တဲ့ အဖြူရောင်သူရိယအဖွဲ့ကို လူထုက အားပေးထောက်ခံလာကြတဲ့အခါ စစ်တပ်ဘက်မှာ တုန်လှုပ်လာတယ်။ အဲဒီနောက် အဖြူရောင်သူရိယအဖွဲ့ခေါင်းဆောင်ကို လုပ်ကြံလိုက်ကြပြီး သမ္မတကိုလည်း စွမ်းဆောင်ရည်မရှိဘူးဆိုတဲ့ အကြောင်းပြချက်နဲ့ ဖြုတ်ချကာ စစ်အာဏာသိမ်းဖို့ ပြင်ဆင်လာပါတယ်။ ရေသန့်ကိစ္စကြောင့် အဓိကရုဏ်းတွေ ဖြစ်လာပြီး အာဏာအတွက် အသက်ဆုံးရှုံးရသူတွေ များလာချိန်မှာ ဇာတ်လိုက်အမျိုးသမီးသုံးယောက်က ဒီအခြေအနေကို ဘယ်လို ရင်ဆိုင်ဖြေရှင်းကြမလဲဆိုတာ ဆက်ပြထားပါတယ်။ မီရှယ်ယို၊ မက်ဂီချောင်နဲ့ အန်နီတာမွိုင်တို့ ပါဝင်တဲ့ The Heroic Trio ရဲ့ ဒုတိယဇာတ်ကားပါ။ ပထမကားမှာ သုံးယောက် ဘယ်လိုဆုံပြီး ပူးပေါင်းမိကြသလဲဆိုတာကို အသားပေးခဲ့ပြီး ဒီတစ်ကားမှာတော့ ပိုခိုင်မာလာတဲ့ သူငယ်ချင်းသံယောဇဉ်နဲ့ တာဝန်ဝတ္တရားတွေကို အလေးပေးထားပါတယ်။ နှစ်ကားဆက်ကြည့်လို့ရသလို တစ်ကားချင်း ခွဲကြည့်လည်း နားလည်နိုင်ပါတယ်။

အားလော့ဟာ တရားမဝင်အဖွဲ့အစည်းတစ်ခုထဲမှာ သတင်းပေးလုပ်နေသူပါ။ သူ့ရည်ရွယ်ချက်က နောက်ကွယ်က ကြိုးကိုင်နေသူတွေကို ဖော်ထုတ်ဖို့ဖြစ်ပေမယ့် အဖွဲ့ထဲမှာ နေရင်းနဲ့ အဖွဲ့သားတွေနဲ့ တဖြည်းဖြည်း ရင်းနှီးလာခဲ့တယ်။ အဲဒီနောက် အဖွဲ့ခေါင်းဆောင်အဖြစ် လျာထားခံရသူတွေထဲ သူပါဝင်လာတဲ့အခါ ရွေးချယ်ရခက်တဲ့ အခြေအနေကို ရောက်လာပါတယ်။ ကိုယ်ဖော်ထုတ်ချင်နေတဲ့ နောက်ကွယ်ကလူတွေနဲ့ အခုတော့ ကိုယ်တိုင် ပူးပေါင်းလုပ်ကိုင်ရတော့မယ့် အနေအထားပါ။ သာမန်ပြည်သူတစ်ယောက်အနေနဲ့ ပြည်သူ့အတွက် လုပ်တာပါလို့ ပြောရင်း စွန့်စားလာတဲ့ အားလော့ဟာ ဒီအဖွဲ့အစည်းကို ဘယ်လို ကိုင်တွယ်မလဲ။ ဟောင်ကောင်အစိုးရအဖွဲ့ရဲ့ နောက်ကွယ်က အကြောင်းတွေကိုပါ ထည့်သွင်းထားတဲ့ မှုခင်းအက်ရှင်ဇာတ်ကား ဖြစ်ပါတယ်။

အမေရိကန်နိုင်ငံမှာ ဇာတ်အိမ်တည်ထားတဲ့ ဒီသည်းထိတ်ရင်ဖိုကားမှာ ရိုးသားတဲ့ မိန်းမပျိုတစ်ယောက်ဟာ အသားအရောင်ခွဲခြားမှု၊ လိင်ခွဲခြားဆက်ဆံမှုနဲ့ အမြတ်ထုတ်မှုတွေ ပြည့်နေတဲ့လောကထဲ ရောက်လာပါတယ်။ နောက်တော့ သူ့လိုပဲ အလိုမတူဘဲ အမြတ်ထုတ်ခံခဲ့ရတဲ့ မိန်းကလေးတွေကို ဂိုဏ်းတစ်ခုမှာ သိကျွမ်းလာတယ်။ အမျိုးသားတွေ ကြီးစိုးနေတဲ့ ဒီလောကကို သူတို့ ဘယ်လိုတုံ့ပြန်ကြမလဲဆိုတဲ့ အကြောင်းကို အမျိုးသမီးဇာတ်ကောင်တွေ အဓိကထားပြီး ပြောပြထားတာပါ။ Vanessa Hudgens လည်း ပါဝင်ထားပါတယ်။ မိန်းကလေးတစ်ယောက် မူးနေချိန်မှာ မရုန်းနိုင်တာကို သဘောတူတယ်လို့ ယူဆလို့ရသလား၊ တစ်ဖက်လူအတွက် ရေရှည်ထိခိုက်မှုတွေ ကျန်နိုင်တဲ့ကိစ္စကို တစ်ညတာအဖြစ်ပဲ သဘောထားပြီး ထွက်သွားလို့ရသလားဆိုတဲ့ မေးခွန်းတွေကိုလည်း ဇာတ်လမ်းက ထုတ်ထားပါတယ်။ အလိုတူသဘောတူဖြစ်မှုနဲ့ အမြတ်ထုတ်မှုအကြောင်း ပြောဆိုထားသလို ကြမ်းတမ်းတဲ့စကားလုံးနဲ့ ဆဲဆိုမှုတွေလည်း ပါဝင်ပါတယ်။

အရှေ့တောင်အာရှမှာ မူးယစ်ဆေးအရောင်းအဝယ်တွေ များပြားနေချိန်၊ ဟိုင်ယာ့မြို့ရဲ့ မူးယစ်ဆေးဝါးတိုက်ဖျက်ရေးလုပ်ငန်းမှာ ပါဝင်နေတဲ့ ရဲတပ်ဖွဲ့ခေါင်းဆောင် ယွီဖန်ဟာ အဖွဲ့သားတွေနဲ့အတူ ပြည်ပကနေ မူးယစ်ဆေးမှောင်ခိုတင်သွင်းတဲ့ လမ်းကြောင်းတစ်ခုကို ခြေရာခံမိပါတယ်။ အဲဒီကနေ ပြည်တွင်းမှာ မှောင်ခိုဖြန့်ချိနေတဲ့ လီယုံကို သတိထားမိလာတယ်။ ယွီဖန်အဖြစ် Gao Jian က သရုပ်ဆောင်ထားပါတယ်။ ယွီဖန်တို့ဟာ လီယုံနောက်ကွယ်က အဝယ်တော်ကို ဖမ်းမိဖို့နဲ့ မူးယစ်ကုန်သွယ်လမ်းကြောင်းကို အမြစ်ပြတ်ရှင်းဖို့ စစ်ဆင်ရေး စတင်လိုက်ကြတယ်။ စစ်ဆင်ရေး အရှိန်မြင့်လာလေလေ ပေးဆပ်ရမှုတွေလည်း ပိုကြီးလာလေလေပါပဲ။ ဒီလုပ်ငန်းကို အကောင်အထည်ဖော်နိုင်ဖို့ ဘယ်သူတွေက ဘာတွေ စတေးရဦးမလဲ။

နော်ဝေးဗိုက်ကင်းတွေခေတ်မှာ ဘုရင်အာဗန်ဒေးရဲ့သားတော် အမ်လက်သ်ဟာ မင်းသားငယ်တစ်ပါးအဖြစ် နေထိုင်နေပါတယ်။ တစ်နေ့မှာတော့ ဘုရင်ရဲ့ညီ ဖီအိုနာက အစ်ကိုကို လုပ်ကြံပြီး ထီးနန်းသိမ်းလိုက်တယ်။ အမ်လက်သ်ရဲ့ မိခင်ကိုလည်း ဖမ်းဆီးထားပြီး မင်းသားငယ်ကိုပါ သတ်ဖို့ ကြိုးစားခဲ့ပါတယ်။ အမ်လက်သ်က ကံကောင်းလို့ လွတ်မြောက်သွားပေမယ့် သူ့ရှေ့မှာ လုပ်စရာတွေ ကျန်နေတယ်။ ဖခင်အတွက် လက်စားချေဖို့၊ မိခင်ကို ကယ်တင်ဖို့နဲ့ ထီးနန်းကို ပြန်ယူဖို့ ကြိုးစားလာပါတယ်။ မင်းသားအမ်လက်သ်ရဲ့ ဒဏ္ဍာရီဆိုတဲ့ ရှေးပုံပြင်ကို အခြေခံထားတာဖြစ်ပြီး နာမည်ကျော် ဗိုက်ကင်းစီးရီးနဲ့ ဆက်စပ်ထားတဲ့ ဇာတ်လမ်းတော့ မဟုတ်ပါဘူး။ အက်ရှင်တိုက်ခိုက်ခန်းတွေ၊ စွန့်စားခန်းတွေနဲ့ စိတ်ကူးယဉ်ဒရာမာကို ရောစပ်ထားပြီး အဖော်အချွတ်ဇာတ်ဝင်ခန်း အနည်းငယ်လည်း ပါဝင်ပါတယ်။

၁၉၄၅ ခုနှစ်မှာ အမေရိကန်စစ်လေယာဉ်တစ်စီး ဂျာမနီရဲ့ အမည်းရောင်တောအုပ်ထဲ ပျက်ကျသွားပါတယ်။ လေယာဉ်ပေါ်မှာ လျှို့ဝှက်ပစ္စည်းတစ်ခုပါနေလို့ ဆာဂျင်ဘရူဝါ ဦးဆောင်တဲ့ လူ ၁၂ ယောက်ပါ တပ်ဖွဲ့ကို လေယာဉ်ပျက်ဆီ သွားရောက်စုံစမ်းဖို့ တာဝန်ပေးလိုက်တယ်။ အဲဒီမှာ မေဂျာတစ်ယောက်ကလည်း သူ့လူ ဝပ်ရှ်ကို ခေါ်လာပြီး ပစ္စည်းပြန်ယူဖို့ဆိုကာ အမိန့်အာဏာနဲ့ တပ်ဖွဲ့ထဲ ထည့်ပေးလိုက်ပါတယ်။ ဒီလိုနဲ့ လူ ၁၃ ယောက်ဖြစ်သွားတဲ့ တပ်ဖွဲ့ဟာ တောအုပ်ထဲမှာ လေယာဉ်ပျက်ကို လိုက်ရှာကြတယ်။ ဒါပေမယ့် ဆာဂျင်ထင်ထားသလို သာမန်စစ်ဆင်ရေးတစ်ခု မဟုတ်တော့ဘဲ သဘာဝလွန်ဖြစ်ရပ်တွေကို ကြုံလာရပါတယ်။ တောထဲက သွေးစုပ်ခံထားရတဲ့ အလောင်းတွေက ဘာကြောင့် ဒီလိုဖြစ်နေတာလဲ၊ ထူးဆန်းတဲ့ အမျိုးသမီးတွေကရော ဘယ်သူတွေလဲ။ အမေရိကန်နဲ့ ဂျာမန်နှစ်ဖက်စလုံး လိုချင်နေတဲ့ လျှို့ဝှက်ပစ္စည်းက ဘာလဲဆိုတာ ရှာဖွေရင်း သူတို့အားလုံး တောထဲကနေ အသက်ရှင်လျက် ပြန်ထွက်နိုင်ပါ့မလားဆိုတာပါ ပူရလာတယ်။ အက်ရှင်နဲ့ ထိတ်လန့်သည်းဖိုအမျိုးအစား ရောစပ်ထားပြီး ဆာဂျင်ဘရူဝါနေရာမှာ Prison Break ထဲက T-Bag အဖြစ် သရုပ်ဆောင်ခဲ့သူ ပါဝင်ထားပါတယ်။

ရှေးခေတ်က သဘာဝလွန်ပစ္စည်းတွေကို လိုက်ရှာနေတဲ့ Lara Croft ဟာ အဲဒီပစ္စည်းတွေနဲ့ ကမ္ဘာကို ဒုက္ခပေးမယ့် လူဆိုးတွေနဲ့ အပြိုင် ရင်ဆိုင်ရပါတယ်။ ရှာဖွေစွန့်စားရတဲ့ခရီးတွေနဲ့ တိုက်ခိုက်ခန်းတွေကို စိတ်ကူးယဉ်ဆန်းကြယ်မှုတွေနဲ့ တွဲတင်ဆက်ထားတဲ့ အက်ရှင်စွန့်စားခန်းကားပါ။ ဂိမ်းထဲက Lara Croft ဇာတ်ကောင်ကို ရုပ်ရှင်အဖြစ် ပုံဖော်ထားတာဖြစ်ပြီး Angelina Jolie က သရုပ်ဆောင်ထားပါတယ်။ ဇာတ်ကွက်ထက် Lara ရဲ့ ရဲရင့်သွက်လက်တဲ့ဟန်နဲ့ တိုက်ခိုက်စွန့်စားနိုင်စွမ်းကို ပိုအလေးပေးထားတဲ့ တင်ဆက်ပုံမျိုး ဖြစ်ပါတယ်။

၁၉၂၀ ခုနှစ်၊ အိန္ဒိယနိုင်ငံကို ဗြိတိသျှအစိုးရ အုပ်ချုပ်နေတဲ့အချိန်မှာ မြို့စားမင်းစကော့နဲ့ သူ့ဇနီးကတ်သရင်းတို့ အာသီလာဘတ်တောအုပ်ကို ရောက်လာကြပါတယ်။ အဲဒီမှာ မာလီဆိုတဲ့ ကလေးမလေးရဲ့ သီချင်းဆိုသံကို သဘောကျပြီး သူ့ကို မတရားဖမ်းဆီးခေါ်ဆောင်သွားကြတယ်။ မာလီရဲ့အစ်ကို ဘင်းကတော့ ညီမလေးကို ပြန်ကယ်ဖို့ အစွမ်းကုန်ကြိုးစားနေပါတယ်။ အဲဒီလို ကြိုးစားနေတုန်း ဘင်းဟာ ရာမာလို့ခေါ်တဲ့ ရမ်နဲ့ ဆုံလာတယ်။ နှစ်ယောက်သား အလုပ်အတူလုပ်ကြရင်း အရင်းနှီးဆုံးသူငယ်ချင်းတွေ ဖြစ်လာကြပေမယ့် ဘင်းမသိထားတဲ့အချက်တစ်ခု ရှိနေပါတယ်။ ရမ်ဟာ အင်္ဂလိပ်တွေအတွက် အလုပ်လုပ်ပေးနေတဲ့ ရဲအရာရှိတစ်ယောက်ပါ။ ကိုယ့်လူမျိုးကိုတောင် မညှာမတာ နှိပ်စက်သတ်ဖြတ်နိုင်သူဖြစ်သလို သူ့မှာ ဖုံးကွယ်ထားတဲ့ လျှို့ဝှက်ချက်တွေလည်း ရှိနေသေးတယ်။ Konidela Ram Charan Teja၊ Alia Bhatt နဲ့ မင်းသားကြီးအာဂျေးတို့ ပါဝင်ထားတဲ့ ဒီဇာတ်ကားမှာ ဗြိတိသျှအုပ်ချုပ်မှုအောက်က ရက်စက်မှုတွေနဲ့ အဖိနှိပ်ခံပြည်သူတွေရဲ့ ဘဝတွေကို တွဲဖော်ပြထားပါတယ်။ ဘင်းနဲ့ ရမ်တို့ရဲ့ ခင်မင်မှုက ဘယ်လိုဆက်ဖြစ်လာမလဲ။ Alia Bhatt သရုပ်ဆောင်ထားတဲ့ စီသာနဲ့ ရမ်ကြားမှာရော ဘယ်လိုဆက်နွယ်မှု ရှိနေသလဲ။

လူအများ ကြောက်လန့်ကြတဲ့ သတ္တဝါမျိုးစိတ်တွေကို လူဆိုးအဖွဲ့တစ်ဖွဲ့အဖြစ် ပုံဖော်ထားတဲ့ အန်နီမေးရှင်းကားပါ။ ဒီအဖွဲ့ လူကောင်းတွေ ပြန်ဖြစ်လာဖို့ ကူညီပေးနေတဲ့ ပူးကလေးတစ်ကောင်လည်း ရှိပါတယ်။ သူငယ်ချင်းစိတ်ဓာတ်နဲ့ အကောင်းအဆိုးကြား စိတ်လွန်ဆွဲရပုံတွေကို ဟာသတွေ၊ ဇာတ်လမ်းအလှည့်အပြောင်းတွေနဲ့ တွဲတင်ဆက်ထားပါတယ်။ ဇာတ်ကောင်တွေရဲ့ လှုပ်ရှားပုံနဲ့ အသံသရုပ်ဆောင်မှုအပြင် နောက်ခံသီချင်းတွေကိုပါ အသုံးပြုထားတဲ့ စွန့်စားခန်းဟာသကားဖြစ်ပါတယ်။

လော်ရက်တာဆိုတဲ့ စာရေးဆရာမဟာ ကောလိပ်ကျောင်းသူဘဝက ရှေးဟောင်းစာပေတွေ လေ့လာခဲ့သူပါ။ ရှေးသုတေသနပညာရှင်ဖြစ်တဲ့ ခင်ပွန်းဆုံးပါးသွားပြီးနောက် ရှေးဟောင်းသမိုင်းအကြောင်းတွေ ရေးသားထုတ်ဝေခဲ့ပေမယ့် လူကြိုက်မများခဲ့ဘူး။ ဒါနဲ့ သမိုင်းအကြောင်း နည်းနည်းကို အဖော်အချွတ်များတဲ့ အချစ်ဇာတ်လမ်းတွေနဲ့ ရောရေးလိုက်တော့မှ စာရေးဆရာမအဖြစ် အောင်မြင်လာပါတယ်။ သူ့စာအုပ်ထဲမှာ ပါတဲ့ သမိုင်းအချက်အလက်တချို့နဲ့ ရှေးဟောင်းစာပေဘာသာပြန်တွေဟာ အစစ်အမှန်တွေဆိုတာကို ရတနာသိုက်မုဆိုးတစ်ယောက်က သိသွားတယ်။ အဲဒီလူက လော်ရက်တာကို ဖမ်းခေါ်ပြီး ပျောက်ဆုံးနေတဲ့ ရှေးဟောင်းမြို့တော်ရဲ့ ရတနာတွေရှာဖို့ အသုံးချလာပါတယ်။ လော်ရက်တာကို တိတ်တခိုးချစ်နေတဲ့ စာအုပ်မျက်နှာဖုံးမော်ဒယ် အလန်ကလည်း သူ့ကိုကယ်ဖို့ နောက်ကနေ လိုက်လာတယ်။ ဒီလိုနဲ့ တောတွင်းစွန့်စားခန်းတွေနဲ့ ရတနာရှာဖွေမှုတွေကြားမှာ အလွဲတွေနဲ့ ရင်ဆိုင်ကြရပါတယ်။ ဟာသနဲ့ အချစ်ဇာတ်လမ်းရောထားတဲ့ ဒီစွန့်စားခန်းကားမှာ ဆန်ဒရာဘူးလော့၊ ချန်းနင်းတေတမ်၊ ဘရက်ပစ်နဲ့ ဒယ်နီရယ် ရက်ကလစ်ဖ်တို့ ပါဝင်သရုပ်ဆောင်ထားပါတယ်။

ဂိမ်းလောကက နာမည်ကြီးဖြူကောင်လေး ဆိုးနစ်ရဲ့ ဒုတိယရုပ်ရှင်မှာ ရန်သူဟောင်း ရိုဘော့နစ် ပြန်ရောက်လာပါတယ်။ ကမ္ဘာပေါ်ကနေ အခြားဂြိုဟ်တစ်ခုဆီ ကန်ထုတ်ခံထားရတဲ့ ရိုဘော့နစ်ဟာ ဒီတစ်ခါ တစ်ယောက်တည်း ပြန်လာတာမဟုတ်ဘဲ ဆိုးနစ်ကို တိုက်ခိုက်မယ့် ဂြိုဟ်သားလေး နက်ကယ်ကိုပါ ခေါ်လာတယ်။ ဆိုးနစ်ဘက်မှာလည်း သူ့ကိုလေးစားအားကျနေတဲ့ မြေခွေးလေး တေးလ်စ် ပါလာပါတယ်။ တစ်ဖက်နှစ်ယောက်စီဖြစ်လာတဲ့ ဒီတစ်ကြိမ်မှာ ဘယ်လိုရင်ဆိုင်တိုက်ခိုက်ကြမလဲဆိုတာ ဆက်ကြည့်ရမှာပါ။ ရိုဘော့နစ်အဖြစ်တော့ The Mask နဲ့ လူသိများတဲ့ ဂျင်မ်ကာရေးပဲ ပြန်လည်သရုပ်ဆောင်ထားပါတယ်။

ဘုရင်မအုပ်ချုပ်ပြီး အမျိုးသမီးတွေ အာဏာလွှမ်းမိုးထားတဲ့ခေတ်မှာ ဇာတ်လမ်းစပါတယ်။ တတိယမင်းသမီး လန်ရှီဟာ ဘုရင်မကြီး အချစ်ရဆုံးနဲ့ အားအထားရဆုံး သမီးတော်ပါ။ ဒေသတစ်ခုကို စုန်းမနက်ဂိုဏ်းရဲ့ရန်ကနေ ကယ်တင်ပေးရင်း ဒေသခံ ဇာတ်နိမ့်အမျိုးသားတစ်ယောက်ကို သူသတိထားမိသွားတယ်။ အဲဒီနောက် စစ်သူကြီးရာထူးကို အမျိုးသမီးအစား အမျိုးသားတစ်ယောက် တာဝန်ယူရင် ဘယ်လိုနေမလဲလို့ စတွေးမိလာပါတယ်။ တစ်ဖက်မှာလည်း မင်းသမီးကယ်တင်ပေးခဲ့တဲ့ ချောင်ရှန်းက သူ့နောက်ကို လိုက်လာတယ်။ မြင်မြင်ချင်း ချစ်မိတာလား၊ ဒုက္ခရောက်နေချိန်မှာ ကယ်တင်ပေးခဲ့သူမို့ တွယ်တာမိတာလားဆိုတာတော့ မသေချာပါဘူး။ ချောင်ရှန်းဟာ မင်းသမီးစီးလာတဲ့ မြင်းနောက်ကနေ မြို့တော်အထိ တောက်လျှောက် လိုက်သွားပါတယ်။ လေ့ကျင့်ရေးကျောင်းက ရွေးချယ်ခံရတဲ့ အမျိုးသားတွေဟာ မင်းမျိုးနွယ်တွေကို ခစားခွင့်ရတယ်ဆိုတာ သိထားလို့ ကျောင်းဝင်ခွင့်ရဖို့ပါ ကြိုးစားတယ်။ နောက်တော့ တင်းယွမ်လို့ခေါ်တဲ့ ပထမတန်းစားခစားသူအဖြစ် ရွေးချယ်ခံရပြီး သူ့နှလုံးသားထဲက မင်းသမီးကို တွေ့ဖို့ နန်းတော်မှာ ခစားခွင့်ရလာပါတယ်။ နန်းတော်ထဲမှာ သူတို့ တကယ်ပြန်ဆုံကြမလား၊ ဆုံဖြစ်ခဲ့ရင်လည်း အမျိုးသမီးတွေ ကြီးစိုးထားတဲ့လောကမှာ သူတို့အချစ်လမ်းက ဖြောင့်ဖြူးနိုင်ပါ့မလား။

၁၉၃၀ ပြည့်နှစ် ရှန်ဟိုင်းမြို့ဟာ ကြီးပွားချမ်းသာချင်သူတွေ မျှော်လင့်ချက်နဲ့ ရောက်လာကြတဲ့မြို့ပါ။ လူတန်းစားအမျိုးမျိုး စုနေကြပြီး ခေတ်မီတိုးတက်နေပေမယ့် ဒုစရိုက်မှုနဲ့ ခေါင်းပုံဖြတ်မှုတွေလည်း များနေတယ်။ အောင်မြင်သွားသူတွေရှိသလို လက်လျှော့ရသူတွေ၊ အသက်ဆုံးရှုံးရသူတွေလည်း ရှိနေပါတယ်။ မာဝေကျင်းဆိုတဲ့ လူငယ်လေးလည်း ကြီးပွားချင်လို့ ရှန်ဟိုင်းကို ရောက်လာသူတစ်ယောက်ပါ။ ကြုံရာအလုပ်တွေ ဝင်လုပ်နေရင်း မြို့ရဲ့ နာမည်ကြီးဂိုဏ်းခေါင်းဆောင် လောင်ကျဲနဲ့ ဆုံမိတယ်။ ဂိုဏ်းပေါင်းစုံရဲ့ ဘုံရန်သူဖြစ်နေတဲ့ လောင်ကျဲက ကွန်ဖူးပညာထူးချွန်တဲ့ မာဝေကျင်းကို တပည့်အဖြစ် လက်ခံလိုက်ပါတယ်။ အဲဒီနောက် မာဝေကျင်းနဲ့ လောင်ကျဲတို့ဟာ ရန်သူတွေကို အတူရင်ဆိုင်ရင်း ရှန်ဟိုင်းမှာ ကိုယ်စီမျှော်လင့်ထားတဲ့ အိပ်မက်တွေ မပျက်စီးအောင် ကြိုးစားကြရတယ်။ ဂိုဏ်းတွေရဲ့ ပိုင်နက်လုပွဲတွေကြားက ကွန်ဖူးတိုက်ခိုက်ခန်းတွေကို အဓိကထားတဲ့ ၂၀၁၄ ခုနှစ်ထွက် တရုတ်အက်ရှင်ကားဖြစ်ပြီး Sammo Hung လည်း ပါဝင်သရုပ်ဆောင်ထားပါတယ်။

လျှို့ဝှက်အမှုစစ် ချန်အန်းဟာ လူတွေကြား ပါးစပ်ရာဇဝင်တစ်ပုဒ်လို ပျံ့နေတဲ့ ဆံဖြူရှင်မိစ္ဆာမ လျန်နီရှန်းအကြောင်း စုံစမ်းဖို့ တာဝန်နဲ့ ရောက်လာပါတယ်။ စုံစမ်းရင်း လျန်နီရှန်းတစ်ယောက်အကြောင်းထက် ပိုရှုပ်ထွေးတဲ့ကိစ္စတွေကို တွေ့လာရတယ်။ သိုင်းလောကထဲက ဂိုဏ်းတွေရဲ့ အချင်းချင်းဆက်နွယ်မှုတွေအပြင် လျန်နီရှန်းကို အယောင်ဆောင်ပြီး နောက်ကွယ်ကနေ ချောက်တွန်းနေတဲ့ တခြားဂိုဏ်းတစ်ခုရှိနေတာကိုပါ သိလာရပါတယ်။ လျန်နီရှန်းကတော့ ကိုယ်ယုံကြည်ချစ်မိတဲ့သူရဲ့ ရက်စက်တဲ့သစ္စာဖောက်မှုကို ခံခဲ့ရပြီးနောက် အချစ်ကို မယုံတော့သူပါ။ ချန်အန်းမှာလည်း နာကျင်ခဲ့ရတဲ့ အချစ်အတိတ်တစ်ခုရှိလို့ နောက်တစ်ကြိမ်ချစ်မိမှာကို ကြောက်နေတယ်။ အတိတ်ဒဏ်ရာကိုယ်စီနဲ့ ဒီနှစ်ယောက် ဆုံလာတဲ့အခါ ချစ်စိတ်အသစ် ပြန်ပေါ်လာနိုင်မလား။ မကုစားနိုင်သေးတဲ့ဒဏ်ရာတွေကြောင့် အလွမ်းနဲ့ပဲ အဆုံးသတ်မလား၊ ဒါမှမဟုတ် နောက်ထပ်နာကျင်စရာတစ်ခုနဲ့ ကြုံရဦးမလားဆိုတာ ဆက်ကြည့်ရမှာပါ။

သူငယ်ချင်းတစ်စု ကမ်းခြေကို အပန်းဖြေခရီးထွက်လာပြီး မူးရူးပျော်ပါးကြရာက ဇာတ်လမ်းစပါတယ်။ ပျော်နေကြတဲ့အရှိန်နဲ့ ရှေ့နောက်မဆင်ခြင်ဘဲ စပိဘုတ်တွေပေါ်တက်ပြီး ပင်လယ်ထဲ ထွက်လာကြတယ်။ ကမ်းနဲ့ အတော်ဝေးတဲ့နေရာမှာ မတော်တဆမှုဖြစ်သွားတဲ့အခါ ပျော်စရာခရီးကနေ အသက်ရှင်ဖို့ ရုန်းကန်ရတဲ့အဖြစ်ကို ရောက်သွားကြပါတယ်။ ပင်လယ်ထဲမှာ အခက်တွေ့နေတုန်း ငါးမန်းဖြူကြီးတစ်ကောင်ပါ ရောက်လာတော့ သူတို့အတွက် ပိုဆိုးသွားတယ်။ ကမ်းနဲ့လည်းဝေး၊ ငါးမန်းရန်ကလည်း ရှောင်ရမယ့်အခြေအနေမှာ အသက်ဘေးက လွတ်ဖို့ ကြိုးစားကြရပါတယ်။ ၂၀၂၂ ခုနှစ်ထွက် ဒီဇာတ်ကားက ကမ်းခြေခရီးနဲ့ ငါးမန်းအန္တရာယ်ကို တွဲထားတဲ့ ရင်းနှီးပြီးသားဇာတ်အိမ်မျိုးပါ။ ဇာတ်လမ်းက ရိုးရှင်းပြီး ခန့်မှန်းရလွယ်ပေမယ့် ငါးမန်းရုတ်တရက်ပေါ်လာတဲ့အခန်းတွေနဲ့ အသက်ရှင်ဖို့ ကြိုးစားရတဲ့အခန်းတွေကို အဓိကထားထားပါတယ်။ ကြာချိန်က တစ်နာရီခွဲခန့်ရှိတဲ့ အသက်လုရုန်းကန်မှု သည်းထိတ်ရင်ဖိုကားတစ်ကားပါ။

မာရီဟာ အထက်လူကြီးနဲ့ အဆင်မပြေဖြစ်ပြီး အလုပ်ထွက်လာခဲ့ပါတယ်။ ဇနီးဖြစ်သူ ပွန်နီက ပြန်တောင်းပန်ကြည့်ဖို့ တိုက်တွန်းပေမယ့် အခြေအနေက ပြေလည်မသွားဘဲ မာရီက အထက်လူကြီးရဲ့မျက်နှာကို တံတွေးနဲ့ ထွေးလိုက်မိတယ်။ အဲဒီကနေ ရန်ငြိုးထားခံရပြီး သူတို့မိသားစုအပေါ် ရက်ရက်စက်စက် လက်တုံ့ပြန်လာကြပါတော့တယ်။ ပွန်နီကို မုဒိမ်းကျင့်ခဲ့ကြသလို သူ့ခင်ပွန်းနဲ့ သမီးကိုလည်း အရှင်လတ်လတ် မီးရှို့သတ်ခဲ့ကြတယ်။ ပွန်နီကိုယ်တိုင် ရဲမေတစ်ယောက်ဖြစ်ပေမယ့် ရဲဌာနက သူ့ဘက်မှာ မရပ်တည်ပေးခဲ့ပါဘူး။ အဖြစ်မှန်ပေါ်သွားရင် ဌာနသိက္ခာကျမယ်ဆိုပြီး ဖုံးဖိထားဖို့ပဲ ခိုင်းခဲ့တယ်။ ရာထူး၊ ငွေကြေးနဲ့ အင်အားအထောက်အပံ့ မရှိတဲ့ ပွန်နီဟာ ဘက်ပေါင်းစုံက ဖိအားတွေကိုပါ ခံလာရပါတယ်။ နောက်ဆုံး ရာထူးကြီးသူတစ်ယောက်ရဲ့ အကူအညီနဲ့ ကျူးလွန်သူတွေ လွတ်သွားတဲ့အခါ ပွန်နီ ဘယ်လိုလက်စားချေမလဲ၊ အမှန်တရားကရော အနိုင်ရနိုင်ပါ့မလား။ ဇာတ်ကားမှာ သွေးထွက်သံယိုနဲ့ ရက်စက်တဲ့ သတ်ဖြတ်ခန်းတွေ ပါဝင်ပါတယ်။

ကွင်းဆက်လူသတ်သမား ဝီလီဟာ ကစားကွင်းတစ်ခုတည်ထောင်ပြီး သူ့အဖွဲ့နဲ့အတူ အဲဒီကိုလာတဲ့ ကလေးတွေနဲ့ မိဘတွေကို သတ်ဖြတ်ခဲ့ပါတယ်။ လူပျောက်မှုတွေ များလာလို့ ရဲတွေ လာစစ်ဆေးချိန်မှာတော့ သူတို့ဟာ စေတန်ကို ပူဇော်တဲ့အစီအရင်တစ်ခုလုပ်ပြီး ကိုယ့်စိတ်နဲ့ဝိညာဉ်ကို ကစားကွင်းထဲက အရုပ်တွေဆီ ပြောင်းထည့်လိုက်ကြတယ်။ မြို့ခံတွေက အဲဒီအရုပ်တွေ သူတို့ကို မသတ်ဖို့အတွက် ခရီးသွားတွေ ပို့ပေးမယ်လို့ အပေးအယူလုပ်ထားကြပါတယ်။ ခရီးသွားတွေ ကစားကွင်းဆီ မဖြစ်မနေရောက်သွားအောင်လည်း နည်းမျိုးစုံနဲ့ ကြံစည်ပို့ဆောင်ပေးနေကြတယ်။ တစ်နေ့မှာတော့ Nicolas Cage သရုပ်ဆောင်ထားတဲ့လူတစ်ယောက် အဲဒီမြို့ကို ကားတစ်စီးနဲ့ ရောက်လာပါတယ်။ ၂၀၂၁ ခုနှစ်ထွက် ဒီရုပ်ရှင်မှာ အက်ရှင်၊ ဟာသနဲ့ ထိတ်လန့်စရာတွေ ရောစပ်ထားပါတယ်။ National Treasure၊ Lord of War၊ The Rock တို့အပြင် Leaving Las Vegas၊ City of Angels နဲ့ Wild at Heart တို့မှာ ပါဝင်ခဲ့တဲ့ Cage ရဲ့ နောက်ပိုင်းလက်ရာတစ်ခုပါ။ အဲဒီကာလမှာ သူပါဝင်ခဲ့တဲ့ ရုပ်ရှင်တွေထဲမှာ Pig နဲ့ Sion Sono ရိုက်ကူးတဲ့ Prisoners of the Ghostland တို့လည်း ရှိပါတယ်။

သိုင်းလောကရဲ့ တောင်ပိုင်းနဲ့ မြောက်ပိုင်းမှာ ယဲ့အိမ်နဲ့ လျောင်အိမ်တို့ နာမည်ကြီးကြပါတယ်။ ယဲ့အိမ်ရဲ့ တတိယသခင်လေး ယဲ့ဝေက မွေးရာပါပါရမီရှိပြီး ခုနစ်နှစ်သားကတည်းက ကိုယ်ပိုင်သိုင်းကွက် ထွင်နိုင်ခဲ့သူပါ။ တောင်ပိုင်းမှာ သူ့ဩဇာက ဘယ်လောက်ကြီးလဲဆိုရင် သူခွင့်မပြုဘဲ သူရဲကောင်းလို့တောင် အမည်မခံနိုင်ကြဘူးလို့ ဆိုပါတယ်။ တောင်ပိုင်းသိုင်းပြိုင်ပွဲမှာတော့ မြောက်ပိုင်းက သခင်မလေး လျောင်ရှီးနဲ့ တွေ့ဆုံဖို့ အကြောင်းဖန်လာတယ်။ တစ်ယောက်ကိုတစ်ယောက် ကယ်တင်ပေးရတဲ့ အဖြစ်တွေကြားကနေ ယဲ့ဝေဟာ သူ့သိုင်းပညာအားလုံးကို ဆုံးရှုံးသွားပါတော့တယ်။ နာမည်နဲ့ ဩဇာကြီးခဲ့တဲ့ ယဲ့ဝေအတွက် သိုင်းမရှိတော့တဲ့ဘဝကို ဘယ်လိုဖြတ်သန်းမလဲဆိုတာ ရင်ဆိုင်ရတော့မယ်။ အရင်က သူအပြစ်လုပ်ခဲ့ဖူးတဲ့ သိုင်းလောကသားတွေကရော အခုလိုအချိန်မှာ သူနဲ့ ဘယ်လိုစာရင်းရှင်းလာကြမလဲ။ သိုင်းတိုက်ခိုက်ခန်းတွေနဲ့ ကွန်ပျူတာအထူးပြုလုပ်ချက်တွေကြားမှာ ကိုယ်အဆင်ပြေနေကျဘဝကနေ ထွက်လာရတဲ့ ဓားသမားတစ်ယောက်ရဲ့ ဘဝအပေါ်နားလည်လာပုံကို ပုံဖော်ထားပါတယ်။

ရာဂျက်စ်သန်နယ်စပ်နားက မူနာဘာအိုရွာလေးမှာ အင်စပတ်တာ ဆူရေခါဆင်း တာဝန်ထမ်းဆောင်လာတာ ကြာပါပြီ။ လပိုင်းအတွင်း အငြိမ်းစားယူတော့မယ့် သူ့အတွက် ဒီနယ်မြေလေးက ရန်ပွဲလောက်သာရှိပြီး အမှုအခင်းကြီးကြီးမားမား မဖြစ်တတ်တဲ့ အေးချမ်းတဲ့နေရာပါ။ ဒါပေမယ့် တစ်နေ့မှာ ဂိုဏ်းတစ်ခုက အိမ်တစ်အိမ်ကို ဝင်လုကာ အိမ်သားတွေကို သတ်ဖြတ်ပြီး ပစ္စည်းဥစ္စာတွေ ယူသွားကြပါတယ်။ နောက်တစ်နေ့မှာပဲ ဆူဗာဆိုတဲ့ ရွာသားတစ်ယောက်လည်း ရက်ရက်စက်စက် နှိပ်စက်သတ်ဖြတ်ခံရပြန်တယ်။ ဆူရေခါဆင်းက ဒီအမှုတွေကို စုံစမ်းနေချိန်မှာ ဆစ်ဒါဆိုတဲ့ ရှေးဟောင်းပစ္စည်းရောင်းဝယ်သူတစ်ယောက် ရွာကို ရောက်လာပါတယ်။ သူလာရတဲ့အကြောင်းက အလုပ်သမားရှာဖို့ပါ။ တစ်ဖက်မှာလည်း လူသတ်မှုတွေကို ဖြေရှင်းဖို့ အထက်က ဖိအားပေးနေတဲ့အတွက် ဆူရေခါဆင်းက ဆက်လက်စုံစမ်းရင်း အမှုတွေဟာ မူးယစ်မှောင်ခိုရောင်းဝယ်မှုနဲ့ ပတ်သက်နေမှန်း သိလာရတယ်။ ရွာကိုရောက်လာတဲ့ မျက်နှာစိမ်းဆစ်ဒါကရော ဒီအမှုတွေနဲ့ ပတ်သက်နေမလား။ အငြိမ်းစားယူခါနီး ဆူရေခါဆင်းတစ်ယောက် လူသတ်မှုတွေရဲ့ တရားခံနဲ့ နောက်ကွယ်က အကြောင်းရင်းမှန်ကို ဖော်ထုတ်နိုင်ပါ့မလား။

အနာဂတ်ကာလမှာ သွေးစုပ်ဖုတ်ကောင်မျိုးနွယ်တွေ ကမ္ဘာတစ်ဝန်း ကြီးစိုးလာသလို သူတို့ကို နှိမ်နင်းတဲ့ အဖွဲ့အစည်းတွေလည်း အများအပြား ပေါ်လာပါတယ်။ ရိဗ်၊ သူ့ညီမ ဟယ်လန်နဲ့ တွဲဖက်ဖြစ်သူ ဂျစ်ပစီတို့ကလည်း သွေးစုပ်ကောင်မုဆိုးတွေပါ။ သူတို့နေထိုင်တဲ့ ဟောင်ကောင်ကို ဥရောပနွယ် သွေးစုပ်ကောင်တွေ ရုတ်တရက် ရောက်လာရာက ဇာတ်လမ်းစပါတယ်။ သူတို့ရောက်လာရတဲ့ အကြောင်းရင်းက သွေးစုပ်ကောင်တွေရဲ့ သမ္မာကျမ်းစာလို့ ဆိုနိုင်တဲ့ “Day For Night” စာအုပ်ကို ဂိုဏ်းတွေ အပြိုင်လုနေကြလို့ပါ။ စာအုပ်ထဲက အစွမ်းကို ရယူဖို့ မူလပိုင်ရှင် တော်ဝင်မိသားစုက မင်းသားခြောက်ပါးရဲ့ သွေးကို လိုအပ်နေတယ်။ အဲဒီထဲက ပဉ္စမမင်းသား ကာဇမ်လည်း ဟောင်ကောင်ကို ရောက်လာပြီး ဟယ်လန်နဲ့ ဆုံမိသွားပါတယ်။ စာအုပ်ရဲ့အစွမ်းကို လိုချင်နေတဲ့ ဥရောပနွယ် သွေးစုပ်ကောင်တွေနဲ့ တော်ဝင်မင်းသား၊ သွေးစုပ်ကောင်မုဆိုးတို့ ဘယ်လိုရင်ဆိုင်ကြမလဲ။ ၂၀၀၃ ခုနှစ်ထွက် ဟောင်ကောင်အက်ရှင်ဟာသဇာတ်ကားဖြစ်ပြီး Edison Chen က အဓိကပါဝင်ထားပါတယ်။ Jackie Chan နဲ့ Karen Mok တို့လည်း ဧည့်သည်သရုပ်ဆောင်အဖြစ် ပါဝင်ထားကြပါတယ်။

ဂျယ်ဂျူကျွန်းတောင်ပိုင်းမှာ ရေနံတူးဖော်နေကြရင်း ဂြိုဟ်သားတွေနဲ့ တွေ့ဆုံကြရတဲ့အကြောင်းကို ရိုက်ကူးထားတဲ့ အက်ရှင်သိပ္ပံစိတ်ကူးယဉ်ဇာတ်ကားပါ။ ဟာဂျီဝန်၊ အိုဂျီဟိုနဲ့ ချာရီယျွန်းတို့ ပါဝင်သရုပ်ဆောင်ထားပါတယ်။ ဒါရိုက်တာကတော့ May 18၊ Sinkhole နဲ့ The Tower တို့ကို ရိုက်ကူးခဲ့တဲ့ Ji-hoon Kim ဖြစ်ပါတယ်။ ဒီတစ်ခါမှာလည်း ရေနံတူးဖော်ရာကနေ မမျှော်လင့်ထားတဲ့ အခြေအနေတစ်ခုနဲ့ ကြုံလာရသူတွေရဲ့အကြောင်းကို တင်ဆက်ထားပါတယ်။

မြို့အစွန်က တောင်ကုန်းတွေကြားမှာ လျှို့ဝှက်မြွေမွေးမြူရေးစခန်းတစ်ခု ရှိပါတယ်။ အဲဒီမှာ မြွေတွေကို တရားမဝင်ဟော်မုန်းဆေးတွေ တိုက်ကျွေးထားတာကြောင့် တဖြည်းဖြည်း ဗီဇပြောင်းလာကြတယ်။ တစ်နေ့မှာတော့ မြွေတွေ လှောင်အိမ်ထဲကနေ လွတ်ထွက်သွားပါတယ်။ အနီးအနားက လေကြောင်းတက္ကသိုလ်မှာတော့ လေယာဉ်မယ်ကောလိပ်ကျောင်းသူတွေဟာ ကျောင်းဆင်းပွဲအတွက် ပြင်ဆင်နေကြတယ်။ အဲဒီအချိန်မှာ အလွန်ကြီးမားတဲ့ မြွေကြီးတစ်ကောင်နဲ့အတူ မြွေတွေ ရောက်လာပြီး ကျောင်းသူတွေကို တိုက်ခိုက်ပါတော့တယ်။ လေယာဉ်မယ်လောင်းတွေဟာ အသက်ဘေးလွတ်ဖို့ ပြေးလွှားကြရင်း မြွေကြီးကို ဘယ်လိုရင်ဆိုင်ကြမလဲ၊ ဒီအန္တရာယ်ကနေ လွတ်မြောက်နိုင်ပါ့မလား။