သည်းထိတ်ရင်ဖိုကားများ

Christoph Waltz သရုပ်ဆောင်ထားတဲ့ ဆုကြေးစားဟာ အလိုရှိနေတဲ့ လူဆိုးတွေကို ဖမ်းဆီးတာ၊ သတ်ဖြတ်တာတွေနဲ့ ဆုကြေးယူပြီး အသက်မွေးသူပါ။ တစ်နေ့မှာ သူဌေးတစ်ယောက်က သူ့ဇနီးကို ပြန်ခေါ်ပေးဖို့ အလုပ်အပ်လာတယ်။ သူဌေးပြောပြချက်အရ တပ်ပြေးတစ်ယောက်က ဇနီးကို ပြန်ပေးဆွဲပြီး နယ်စပ်တစ်ဖက်ဆီ ခေါ်သွားကာ ပြန်ပေးငွေ တောင်းထားတာပါ။ ဆုကြေးစားနဲ့အတူ တပ်ပြေးရှိတဲ့နေရာကို သိထားတဲ့ သူ့သူငယ်ချင်းတစ်ယောက်ကိုလည်း အဖော်ထည့်ပေးလိုက်ပါတယ်။ ဟိုဘက်ကို ရောက်တော့ တပ်ပြေးက မြို့တစ်မြို့လုံးကို ချုပ်ကိုင်ထားတဲ့ လူဆိုးတွေနဲ့ အပေးအယူလုပ်ထားတာကြောင့် လူပြန်ခေါ်ရမယ့်အလုပ်က ထင်သလောက် မလွယ်တော့ဘူး။ သေနတ်တွေနဲ့ ဖြေရှင်းရတဲ့ ပြဿနာတွေထဲ ပါဝင်လာရပါတယ်။ Christoph Waltz နဲ့ Willem Dafoe တို့ ပါဝင်တဲ့ ဒီကောင်းဘွိုင်သည်းထိတ်ရင်ဖိုကားကို ၇၉ ကြိမ်မြောက် ဗင်းနစ်ရုပ်ရှင်ပွဲတော်မှာလည်း ပြသခဲ့ပါတယ်။

စတီဗန်ကင်းရဲ့ ဝတ္ထုတိုတစ်ပုဒ်ကို ပြန်လည်ရိုက်ကူးထားတဲ့ ဟော်ရာရုပ်ရှင်ပါ။ မစ္စတာဟာရီဂန်ရဲ့ ဖုန်းကို အကြောင်းပြုပြီး တမလွန်ဘဝ၊ သဘာဝလွန်ဖြစ်ရပ်တွေနဲ့ သို့လောသို့လော တွေးစရာတွေကို ရေးဖွဲ့ထားပါတယ်။

ချေ့စ်နဲ့ လိန်းတို့က သမီးရည်းစားစုံတွဲပါ။ ချေ့စ်က ခရီပါဆိုတဲ့ သတ္တဝါ ဒီလောကမှာ တကယ်ရှိတယ်လို့ ယုံကြည်ပေမယ့် လိန်းကတော့ လူတွေ လုပ်ကြံပြောဆိုထားတဲ့ ပုံပြင်တစ်ခုလို့ပဲ ထင်ထားပါတယ်။ တစ်နေ့မှာ ချေ့စ်က လိန်းကို Horror Hound ပွဲတော်ဆီ ခေါ်သွားခဲ့တယ်။ အဲဒီကို ရောက်တဲ့အခါ လိန်းရဲ့စိတ်ထဲမှာ မမျှော်လင့်ထားတဲ့ သေခြင်းတရားနဲ့ဆိုင်တဲ့ အနိဋ္ဌာရုံတွေ ပေါ်လာပါတော့တယ်။ ဒီမြင်ကွင်းတွေ ဘာကြောင့်ပေါ်လာတာလဲ၊ ခရီပါနဲ့ ဘယ်လိုဆက်နွယ်နေတာလဲဆိုတာ သူမ နားမလည်နိုင်သေးပါဘူး။ ၂၃ နှစ်မှာ တစ်ကြိမ်ပေါ်လာပြီး လူတွေကို အစုလိုက်အပြုံလိုက် သတ်တတ်တယ်ဆိုတဲ့ ဒဏ္ဍာရီလာ ခရီပါကရော တကယ်ရှိနေတာလား။

မိုဆူးလ်က တိုက်ပွဲတစ်ပွဲမှာ စစ်သား ဂျိတ်နဲ့ သူ့အရာရှိ တွမ်မေဆင်တို့ အသက်ဘေးကနေ လက်မတင် လွတ်မြောက်လာခဲ့ကြပါတယ်။ ငါးနှစ်အကြာမှာတော့ ဂျိတ်ဟာ အိမ်ပြန်ရောက်နေပြီး ဦးလေး အာလ်ရဲ့ဆိုင်မှာ ကားပြင်သမားအဖြစ် အလုပ်လုပ်နေတယ်။ ဇနီး အက်ရှ်၊ သား ဝက်စ်တို့နဲ့အတူ ပျော်ပျော်ရွှင်ရွှင် နေထိုင်နေခဲ့တာပါ။ တစ်နေ့မှာ လူရမ်းကားတစ်သိုက်က ဦးလေးကို နှောင့်ယှက်ပြီး ငွေညှစ်လာလို့ ဂျိတ် ဝင်တားခဲ့တယ်။ သူတို့ကို အနိုင်ယူလိုက်နိုင်ပေမယ့် လူရမ်းကားတွေက မိသားစုအသက်အန္တရာယ်နဲ့ ခြိမ်းခြောက်သွားကြပါတယ်။ နောက်တော့ ဂျိတ် မထင်မှတ်ထားတဲ့အချိန်မှာ သူ့ဇနီးနဲ့ သားကို သတ်ပြီး လက်တုံ့ပြန်လိုက်ကြတယ်။ မိသားစုကို ဆုံးရှုံးလိုက်ရတဲ့ ဂျိတ်က သူတို့အပေါ် ဘယ်လိုလက်စားချေမလဲ။ ဘဝတစ်ခုလုံး ပြောင်းပြန်လှန်သွားတဲ့နောက် Section Eight ဆိုတဲ့ လျှို့ဝှက်အဖွဲ့အစည်းထဲ ဘယ်လိုရောက်သွားပြီး လုပ်ကြံသတ်ဖြတ်သူ ဖြစ်လာမလဲဆိုတာကို ဆက်ပြထားတဲ့ အက်ရှင်ဇာတ်ကားပါ။

ရူ့သ်နဲ့ ဟယ်ရီက တောအုပ်တစ်ခုထဲကို စခန်းချခရီးထွက်လာကြတဲ့ ချစ်သူစုံတွဲပါ။ ဟယ်ရီက ဒီခရီးအတွက် စိတ်အားထက်သန်နေပေမယ့် ရူ့သ်ကတော့ သိပ်သွားချင်လှတာ မဟုတ်ဘူး။ ဒါပေမယ့် ချစ်သူက သွားချင်လွန်းနေတာကြောင့် ကျောပိုးအိတ်တစ်လုံးနဲ့ လိုက်လာခဲ့ပါတယ်။ ဟယ်ရီ့မှာ ရူ့သ်ကို တောထဲခေါ်လာရတဲ့ ရည်ရွယ်ချက်တစ်ခု ရှိနေတယ်။ သူက ဒီခရီးမှာ လက်ထပ်ခွင့်တောင်းချင်တာပါ။ ငယ်စဉ်က ရခဲ့တဲ့ စိတ်ဒဏ်ရာတွေရှိနေတဲ့ ရူ့သ်ကတော့ ငြင်းလိုက်ပြီး နှစ်ယောက်ကြား ဆက်ဆံရေးလည်း အက်ကြောင်းထင်သွားပါတယ်။ အဲဒီကြားမှာ ရူ့သ်က တောထဲ ခဏပျောက်သွားခဲ့သေးတယ်။ သူ့အတွက် ဘာတွေဖြစ်ခဲ့တာလဲ၊ သူတို့နှစ်ယောက်ရဲ့ ဆက်ဆံရေးကရော အရင်လို ပြန်အဆင်ပြေနိုင်ပါ့မလား။

New Mexico မှာ ပလိပ်ရောဂါတစ်မျိုး ပြန့်ပွားလာတဲ့အခါ ကူးစက်နယ်မြေကို သုတေသနလုပ်နိုင်ဖို့ Greg Rourke နဲ့ သူ့အဖော်တွေ နယ်မြေရှင်းလင်းရေးအတွက် ရောက်လာကြပါတယ်။ ဒါပေမယ့် အဖော်တွေပါ ရောဂါကူးစက်ခံလိုက်ရပြီး Greg တစ်ယောက်တည်းသာ လွတ်မြောက်လာခဲ့တယ်။ ခြောက်လအကြာမှာတော့ Greg ဟာ ပုံမှန်အတိုင်း ဘားတစ်ခုမှာ သူငယ်ချင်းတွေနဲ့ အရက်သောက်ပြီး အိမ်ပြန်လာခဲ့ပါတယ်။ နောက်တစ်နေ့ မိုးလင်းတဲ့အခါ ကမ္ဘာကြီးက ငရဲဘုံလို ပြောင်းလဲနေပြီး သူကတော့ အသက်ရှင်လျက် တိုက်ခန်းထဲမှာ ပိတ်မိနေတယ်။ ဘာကြောင့် သူတစ်ယောက်တည်း အသက်ရှင်ကျန်နေတာလဲ၊ သူ့မိတ်ဆွေတွေက ဘာကြောင့် မကောင်းဆိုးဝါးတွေ ဖြစ်သွားကြတာလဲဆိုတဲ့ မေးခွန်းတွေ ပေါ်လာပါတယ်။ မကောင်းဆိုးဝါးတွေကလည်း သူ့မိတ်ဆွေတွေလို ဟန်ဆောင်ပြီး ဘာအတွက် ချဉ်းကပ်လာကြတာလဲ။ ဒီအခြေအနေကြားကနေ Greg တစ်ယောက် တိုက်ခန်းအပြင်ကို လွတ်မြောက်နိုင်ပါ့မလား။

ဂျိုဒီ ဓားပြတိုက်ခံနေရချိန်မှာ ဝင်ဒီက ဝင်ကယ်ပေးရာက သူတို့နှစ်ယောက် စသိကျွမ်းခဲ့ကြပါတယ်။ လူတစ်ယောက်ရဲ့အသက်ကို တစ်ခါကယ်ပြီးရင် တစ်သက်လုံး တာဝန်ယူရတယ်ဆိုတဲ့ အယူအဆကို လက်ကိုင်ထားတဲ့ ဝင်ဒီက ဂျိုဒီ့ကို နောက်ပိုင်းမှာလည်း အစစအရာရာ ကူညီပေးတယ်။ ဂျိုဒီကလည်း ကျေးဇူးတုံ့ပြန်တဲ့အနေနဲ့ ဝင်ဒီ့ကို အလုပ်ပေးပြီး နေစရာပါ ရှာပေးခဲ့ပါတယ်။ အဲဒီနောက် ဂျိုဒီ့ရဲ့ သတို့သားလောင်း ဖောက်ပြန်နေတာကို ဝင်ဒီ သိသွားတယ်။ ပေါ့ပေါ့ပါးပါး နေတတ်တဲ့ ဂျိုဒီ့သူငယ်ချင်းကလည်း ဂျိုဒီ့အတွက် အကျိုးမရှိဘူးလို့ မြင်လာတဲ့အခါ ဝင်ဒီ ဘယ်လိုကာကွယ်ပေးဖို့ ကြိုးစားမလဲ။ သူတို့နှစ်ယောက်ကြားမှာ ဘယ်သူက ဘယ်သူ့ကို ကယ်တင်ပေးနေတာလဲဆိုတဲ့ မေးခွန်းကို လှည့်ကွက်တွေနဲ့ ဆက်ပြထားပါတယ်။

မျက်နှာဖုံးတပ်ပြီး ဓားရှည်တစ်ချောင်း ကိုင်ထားတဲ့ မိုက်ကယ်မိုင်ယာစ်ဟာ Halloween ရုပ်ရှင်တွေရဲ့ အမှတ်ရစရာပုံရိပ်ပါ။ စုစုပေါင်း ၁၃ ကားအထိ ရှိလာတဲ့ ဒီထိတ်လန့်ရုပ်ရှင်တွဲထဲက Halloween Ends ကတော့ ၂၀၂၂ ခုနှစ်ထွက် ဇာတ်ကားဖြစ်ပါတယ်။ ဒီတစ်ခါမှာ မိုက်ကယ်မိုင်ယာစ်လက်က လွတ်မြောက်ခဲ့တဲ့ မြေးအဘွားနှစ်ယောက်နဲ့ တစ်မြို့လုံးက မုန်းတီးနေကြတဲ့ ကောင်လေးတစ်ယောက်အကြောင်းကို အခြေခံထားတယ်။ လှည့်ကွက်တွေနဲ့ ရက်စက်ကြမ်းတမ်းတဲ့ မြင်ကွင်းတွေ ပါဝင်ပြီး ၂၀၁၈ နဲ့ ၂၀၂၁ ခုနှစ် Halloween ဇာတ်ကားတွေနဲ့ ဆက်စပ်နေပါတယ်။

စိတ်ဓာတ်မြှင့်တင်ရေး တရားဟောတဲ့ လူတစ်ယောက်က ပိရမစ်လိမ်လည်မှုနည်းနဲ့ အတန်းတွေ ဖွင့်ထားပါတယ်။ လူသစ်တွေ ခေါ်လာအောင် မက်လုံးပေးထားပြီး ဝင်လာမိတဲ့သူတွေ ပြန်ထွက်မရအောင်လည်း အကြပ်ကိုင်ထားတယ်။ ဇာတ်လမ်းအစမှာ ဘာတွေဖြစ်နေတာလဲဆိုတာ ချက်ချင်းမရှင်းပြဘဲ အဖြစ်အပျက်တွေကို တဖြည်းဖြည်း ဖော်ပြသွားပါတယ်။ အကြောင်းစုံ ပိုသိလာလေလေ နောက်ကွယ်မှာ ဘယ်သူလုပ်နေတာလဲဆိုတဲ့ သံသယလည်း ပြောင်းလာစေတဲ့ လျှို့ဝှက်သည်းဖိုဇာတ်ကားပါ။ ဘတ်ဂျက်နည်းတဲ့ တီဗီရုပ်ရှင်ဖြစ်ပြီး ရိုက်ကူးတင်ဆက်ပုံကို ရိုးရိုးရှင်းရှင်းထားကာ ဇာတ်ညွှန်းနဲ့ သိချင်စိတ်ကို ဆွဲခေါ်သွားပါတယ်။ သရုပ်ဆောင်တွေကလည်း ရှုပ်ထွေးမှုသိပ်မရှိတဲ့ ဇာတ်ရုပ်တွေကို လိုက်ဖက်အောင် သရုပ်ဆောင်ထားပါတယ်။

I Spit on Your Grave ရဲ့ တတိယမြောက်ဇာတ်ကားမှာ ဂျနီဖာဟေးစ်ဟာ အရင်က အုပ်စုဖွဲ့ မုဒိမ်းကျင့်ခံခဲ့ရတဲ့ အမှတ်တရဆိုးတွေရဲ့ ခြောက်လှန့်မှုကို ခံနေရဆဲပါ။ နာမည်နဲ့ နေထိုင်ရာမြို့တွေ ပြောင်းပြီး ဘဝအသစ်စဖို့ ကြိုးစားပေမယ့် အတိတ်ကနေ ရုန်းထွက်ဖို့ မလွယ်ကူသေးဘူး။ စိတ်ကျန်းမာရေးဆရာဝန်ရဲ့ အကြံပေးချက်အရ အုပ်စုလိုက် စိတ်ကုထုံးခံယူတဲ့အဖွဲ့ထဲ ဝင်ခဲ့ရာက စိတ်သဘောထားချင်းတူတဲ့ မာလာနဲ့ သူငယ်ချင်းဖြစ်လာပါတယ်။ ဒါပေမယ့် တစ်နေ့မှာ မာလာ အသတ်ခံရပြီး လူသတ်သမားက တရားသေလွတ်သွားတဲ့အခါ ဂျနီဖာက တရားမျှတမှုကို ကိုယ်တိုင်ရှာဖို့ ဆုံးဖြတ်လိုက်တယ်။ သူ့ပတ်ဝန်းကျင်မှာလည်း မုဒိမ်းမှုတွေ ပိုများလာတဲ့အခါ ဘယ်လိုလက်စားချေဖို့ ကြိုးစားမလဲဆိုတာ ဆက်တွေ့ရမှာပါ။ ထိတ်လန့်သည်းဖိုဇာတ်ကားဖြစ်ပြီး သတ်ဖြတ်မှုနဲ့ သွေးထွက်သံယို မြင်ကွင်းတွေ ပါဝင်ပါတယ်။

တာ့ပ်ဆီးက ဂိုင်သရီးနဲ့ ဂေါ်တမီဆိုတဲ့ အမြွှာညီအစ်မနှစ်ယောက်အဖြစ် သရုပ်ဆောင်ထားပါတယ်။ တစ်ရက်မှာ ဂိုင်သရီးဟာ ညီမလေးဂေါ်တမီ တစ်ခုခုဖြစ်နေတယ်ဆိုတဲ့ အိပ်မက်ဆိုး မက်ခဲ့တယ်။ ဒါနဲ့ ခင်ပွန်းဖြစ်သူကို ခေါ်ပြီး ညီမအိမ်ကို သွားကြည့်တော့ ဂေါ်တမီ ကြိုးဆွဲချလျက် သေဆုံးနေတာကို တွေ့လိုက်ရပါတယ်။ ရဲတွေရဲ့ စုံစမ်းချက်အရ ဂေါ်တမီဟာ ကိုယ့်ကိုယ်ကိုယ် အဆုံးစီရင်ခဲ့တာလို့ ဆိုပေမယ့် ဂိုင်သရီးက လက်မခံနိုင်ဘူး။ ညီမသေဆုံးမှုရဲ့ အဖြစ်မှန်ကို ကိုယ်တိုင်လိုက်စုံစမ်းရင်း သူ့နောက်ကို လူတစ်ယောက် အမြဲလိုလို လိုက်နေသလို ခံစားလာရတယ်။ ဒါပေမယ့် အဲဒီလူကိုတော့ ဘယ်သူမှ မမြင်ကြပါဘူး။ စုံစမ်းနေရင်းနဲ့ပဲ ဂိုင်သရီးရဲ့ အသက်အန္တရာယ်ကိုပါ ထိပါးလာပါတယ်။

ဟော်ပါက ပျော်ပျော်ပါးပါးနဲ့ ပေါက်ကရလုပ်ရင်း နေတတ်တဲ့ အမေရိကန်လူငယ်တစ်ယောက်ပါ။ ရေတပ်ဗိုလ်ချုပ်တစ်ယောက်ရဲ့ သမီးကို သဘောကျမိပြီးနောက် အစ်ကိုဖြစ်သူရဲ့ တိုက်တွန်းမှုနဲ့ ရေတပ်ထဲ ဝင်လာခဲ့တယ်။ ရေတပ်အရာရှိတစ်ယောက် ဖြစ်လာတဲ့အခါ နှစ်စဉ်ကျင်းပတဲ့ နိုင်ငံပေါင်းစုံ ရေတပ်လေ့ကျင့်ရေးမှာ ပါဝင်ဖို့ တာဝန်ပေးခံရပါတယ်။ လေ့ကျင့်ရေးလုပ်နေတုန်း သူတို့အနီးမှာ မမျှော်လင့်ထားတဲ့ ယာဉ်ပျံကြီးတွေ ပေါ်လာတယ်။ အဲဒီယာဉ်တွေက လေ့ကျင့်ရေးအစီအစဉ်ထဲကလည်း မဟုတ်သလို သူတို့ထင်ထားတဲ့ မြောက်ကိုရီးယားဘက်ကလည်း မဟုတ်ပါဘူး။ ပိုထူးဆန်းတာက ယာဉ်တွေနားမှာ ရေတပ်ရဲ့ ရေဒါတွေ အလုပ်မလုပ်တော့တာပါပဲ။ ပြင်ပနဲ့ အဆက်အသွယ်ပြတ်နေတဲ့ ဟော်ပါတို့ဟာ အဲဒီယာဉ်ပျံတွေနဲ့ ရေပြင်ပေါ်မှာ အပြန်အလှန် တိုက်ခိုက်ကြရပါတော့တယ်။ ယာဉ်တွေထဲမှာ ဘယ်သူတွေပါလာပြီး ကမ္ဘာမြေပေါ်ကို ဘယ်လိုရောက်လာကြတာလဲဆိုတာတော့ မသိရသေးပါဘူး။ ၂၀၁၂ ခုနှစ်ထွက် သိပ္ပံစိတ်ကူးယဉ် အက်ရှင်နဲ့ စွန့်စားခန်းရုပ်ရှင်ဖြစ်ပြီး Taylor Kitsch၊ Rihanna၊ Liam Neeson နဲ့ Brooklyn Decker တို့ ပါဝင်သရုပ်ဆောင်ထားပါတယ်။ ရုံတင်ဝင်ငွေ အမေရိကန်ဒေါ်လာ ၃၀၃ သန်း ရရှိခဲ့ပါတယ်။

အမျိုးသမီးတစ်ယောက်မှာ စိတ်နဲ့ အရာဝတ္ထုတွေကို ထိန်းချုပ်နိုင်တဲ့ အစွမ်းရှိပေမယ့် သူကိုယ်တိုင်တော့ ဒါကို မသိထားပါဘူး။ သူ့ကို အခန်းတစ်ခန်းထဲ ထည့်ထားပြီး စမ်းသပ်မှုအမျိုးမျိုး လုပ်လာကြတယ်။ ခိုင်းတာကို မလုပ်နိုင်ရင် သူ့သမီးကို သတ်ပစ်မယ်ဆိုတဲ့ ခြိမ်းခြောက်မှုနဲ့အတူ ဒီစမ်းသပ်မှုတွေကို ရင်ဆိုင်ရပါတယ်။ ထိုင်ခုံမှာ သံကြိုးနဲ့ချည်ထားပြီး ခဲတံချိုးခိုင်းတာမျိုးကစလို့ သူ့အစွမ်းကို စမ်းကြတယ်။ စမ်းသပ်ခံရလေလေ သူ့စွမ်းအားက ပိုကြီးလာလေလေ ဖြစ်နေပါတယ်။ အဲဒီအစွမ်း အမြင့်ဆုံးအဆင့်ကို ရောက်လာတဲ့အခါ ဘာဆက်ဖြစ်မလဲဆိုတာကို သည်းထိတ်ရင်ဖိုပုံစံနဲ့ ဆက်ထားတဲ့ သိပ္ပံစိတ်ကူးယဉ်ဇာတ်ကားပါ။

စတရစ်ကလာရောဂါဆိုး ပြန့်နှံ့လာတဲ့အခါ ကလေးငယ်များစွာ သေဆုံးခဲ့ရပါတယ်။ ရောဂါကို တားဆီးဖို့ ပိုးမွှားဗေဒပညာရှင် ဆူဆန်က ခြနဲ့ ဓားခုတ်ကောင်တို့ရဲ့ မျိုးရိုးဗီဇကို အသုံးပြုပြီး ဂျူးဒတ်စ်လို့ခေါ်တဲ့ ပိုးကောင်တစ်မျိုး ဖန်တီးလိုက်တယ်။ ဒီပိုးတွေကို လအနည်းငယ်ပဲ အသက်ရှင်နိုင်အောင် ဖန်တီးထားတာပါ။ ဒါပေမယ့် နောက်သုံးနှစ်အတွင်းမှာ ဂျူးဒတ်စ်တွေရဲ့ မျိုးပွားနှုန်းက အလွန်မြန်လာပြီး မျိုးရိုးဗီဇမှာလည်း ကြီးမားတဲ့ ပြောင်းလဲမှုတွေ ဖြစ်လာပါတယ်။ မူလက လက်တစ်ဆုပ်စာပဲရှိတဲ့ ပိုးတွေ ဘယ်လိုပုံစံအထိ ပြောင်းသွားမလဲ၊ ဆူဆန်နဲ့ ပီတာက ဒါကို ဘယ်လိုသိရှိပြီး ထိန်းချုပ်နှိမ်နင်းကြမလဲဆိုတာ ဆက်ထားတဲ့ သိပ္ပံထိတ်လန့်ဇာတ်ကားပါ။ လူသားတွေအတွက် အကျိုးရှိဖို့ လုပ်ခဲ့တဲ့ တီထွင်မှုတစ်ခုမှာ မမျှော်လင့်ထားတဲ့ ဆိုးကျိုးတွေ ရှိလာနိုင်ပုံကို ပြထားပါတယ်။ Guillermo del Toro ကိုယ်တိုင် ဇာတ်ညွှန်းရေးသားရိုက်ကူးထားတဲ့ ဒုတိယမြောက် ဇာတ်ကားရှည် ဖြစ်ပါတယ်။ မူရင်းအညွှန်းမှာ ရိုက်ကူးစဉ် ထုတ်လုပ်သူ Harvey Weinstein၊ Bob Weinstein တို့နဲ့ ဖန်တီးမှုအမြင်အပေါ် အငြင်းပွားမှုတွေရှိခဲ့ကြောင်း ဖော်ပြထားပြီး ရုံတင်ဗားရှင်းနောက်မှာ del Toro က Director’s Cut ကို ပြန်ထုတ်ခဲ့တယ်လို့ ဆိုထားပါတယ်။ ဒီအညွှန်းကလည်း အဲဒီ Director’s Cut ဗားရှင်းကို ရည်ညွှန်းထားတာပါ။

ဒေါက်တာ စထရောက်စ်ဟာ ထူးချွန်တဲ့ စိတ်ဆရာဝန်တစ်ယောက်ဖြစ်ပြီး သူ့သုတေသနစီမံကိန်းအတွက် ရန်ပုံငွေထောက်ပံ့မယ့်သူကို ရှာနေပါတယ်။ အဖွဲ့အစည်းတစ်ခုက ထောက်ပံ့ပေးဖို့ ကမ်းလှမ်းလာတဲ့အခါ သူလုပ်ချင်တဲ့ သုတေသနကို စတင်နိုင်ခဲ့တယ်။ ဒါပေမယ့် အဲဒီအဖွဲ့အစည်းရဲ့ နောက်ကွယ်က ရည်ရွယ်ချက်ကိုတော့ သူမသိခဲ့ပါဘူး။ စီမံကိန်းကို ဆုံးခန်းတိုင်အောင် သုတေသနဆက်လုပ်ရင်း နိုင်ငံရေးနဲ့ သူ့အလုပ်ကြားမှာ ရှုပ်ထွေးမှုတွေ ပေါ်လာပါတော့တယ်။ ဇာတ်လမ်းက စီအိုင်အေရဲ့ လျှို့ဝှက်စီမံကိန်း MK Ultra ကို ဖြစ်ရပ်မှန်တွေနဲ့ ရောယှက်ပုံဖော်ထားတာပါ။ ဒီစီမံကိန်းမှာ လူတွေရဲ့စိတ်ကို ထိန်းချုပ်နိုင်ဖို့ အမေရိကန်နိုင်ငံသားတွေကို သူတို့မသိဘဲ LSD ဆေးခတ်ပြီး စမ်းသပ်မှုတွေနဲ့ ညှဉ်းပန်းနှိပ်စက်မှုတွေ လုပ်ခဲ့ပါတယ်။ ၁၉၅၃ ကနေ ၁၉၇၃ အထိ ကြာမြင့်ခဲ့ပြီး ၁၉၇၅ ခုနှစ်မှာ တရားဝင်စုံစမ်းစစ်ဆေးမှုတွေနဲ့အတူ ဖော်ထုတ်ခံခဲ့ရတဲ့ စီမံကိန်းအကြောင်းကို နောက်ခံထားတဲ့ သည်းထိတ်ရင်ဖိုဇာတ်ကား ဖြစ်ပါတယ်။

ပင်လယ်ကမ်းစပ်ရွာတစ်ရွာမှာ မာရာကာ၊ နေယာ၊ မီနွန်နဲ့ ဘုန်းတော်ကြီးတို့ရဲ့ မိသားစုလေးစုဟာ အခက်အခဲရှိရင် အချင်းချင်းကူညီရင်း နေထိုင်လာကြပါတယ်။ သူတို့မိသားစုတွေက သားလေးယောက်ကလည်း ငယ်ငယ်ကတည်းက အတူကစားလာတဲ့ သူငယ်ချင်းတွေပါ။ မာရာကာမိသားစုမှာ ဘိုးဘွားပိုင်မြေ ရှစ်ဧကရှိပြီး မြေဝယ်ဖို့ ကမ်းလှမ်းလာတဲ့အခါ ကျန်မိသားစုသုံးစုရဲ့ တိုက်တွန်းမှုနဲ့ ရောင်းချလိုက်ပါတယ်။ အဲဒီနောက် မာရာကာမိသားစုရဲ့ အခြေအနေက ဆိုးရွားသွားပေမယ့် တစ်ဖက်လှည့်နဲ့ မြေကိုဝယ်ခဲ့တဲ့ နေယာမိသားစုကတော့ ချမ်းသာလာခဲ့တယ်။ ဒီမြေနေရာမှာ အပန်းဖြေစခန်းဆောက်ဖို့ လုပ်ကြရင်း သားလေးယောက် ပြန်ဆုံကြတဲ့အခါ မထင်မှတ်ထားတဲ့ ထူးဆန်းမှုတွေကို ကြုံလာကြရပါတယ်။ Prithviraj Sukumaran ပါဝင်သရုပ်ဆောင်ထားတဲ့ ၂၀၂၂ ခုနှစ်ထွက် မာလာယာလမ်စကားပြော ဒရာမာ၊ သည်းထိတ်ရင်ဖိုဇာတ်ကားပါ။

မာချာလာမြို့မှာ ရာဂျာပါဆိုတဲ့ လူမိုက်ကြီးက နှစ်ပေါင်းသုံးဆယ်ကြာ အုပ်စိုးနေပြီး ရွေးကောက်ပွဲတောင် ကျင်းပခွင့်မပေးပါဘူး။ သူ့ကို အတိုက်အခံလုပ်တဲ့ ပါတီတွေ ဖျက်ဆီးခံရသလို ဆန့်ကျင်သူတွေလည်း အသက်ဆုံးရှုံးကြရတယ်။ ဆိဒ်ဒူကတော့ ဘယ်သူဘာပြောပြော ကိုယ့်စိတ်ထဲရှိတာ၊ ကိုယ်မှန်တယ်ထင်တာကိုပဲ လုပ်တတ်တဲ့ လူငယ်တစ်ယောက်ပါ။ အစိုးရအရာရှိဝန်ထမ်းစာမေးပွဲ ဖြေထားပြီး ဘယ်နေရာမှာ တာဝန်ကျမလဲဆိုတာ စောင့်နေသူဖြစ်ပါတယ်။ မထင်မှတ်ဘဲ မာချာလာမြို့မှာ တာဝန်ကျလာတဲ့အခါ နှစ်ပေါင်းသုံးဆယ် အာဏာချုပ်ကိုင်ထားတဲ့ ရာဂျာပါနဲ့ ထိပ်တိုက်တွေ့ဖို့ ဖြစ်လာပါတော့တယ်။ ဒီဇာတ်ကားမှာ Check (2021) ထဲက နီတင်နဲ့ Uppena (2021) ထဲက ကရီတီးရှက်တီးတို့ ပါဝင်သရုပ်ဆောင်ထားပါတယ်။

အမန်းနဲ့ မီရားတို့ လင်မယားဟာ သားဖြစ်သူ ယာဉ်မတော်တဆမှုကြောင့် ဆုံးသွားတဲ့နောက် ဝမ်းနည်းပူဆွေးမှုတွေကြားမှာ နေနေရပါတယ်။ တစ်ချိန်က နာမည်ကြီးအဆိုတော်ဖြစ်ခဲ့တဲ့ အမန်းက သားဆုံးရှုံးရတဲ့ဒဏ်ကို မခံနိုင်ဘဲ အရက်နွံထဲ နစ်သွားတယ်။ စာရေးဆရာမဖြစ်တဲ့ မီရားကတော့ ကိုယ့်နာကျင်မှုကို ဘေးဖယ်ထားပြီး မိသားစုအဆင်ပြေဖို့ ကြိုးစားနေပါတယ်။ တစ်နေ့မှာ မီရားဆီ ကိုယ်ရေးအတ္ထုပ္ပတ္တိရေးပေးရမယ့် အလုပ်တစ်ခု ကမ်းလှမ်းလာတယ်။ အခကြေးငွေလည်း များများရမယ့်အလုပ်ပါ။ ဒါပေမဲ့ သူမသိထားတာက အလုပ်ကမ်းလှမ်းသူဟာ မကောင်းဆိုးဝါးတစ်ကောင် ဖြစ်နေတဲ့အချက်ပါပဲ။ ဒီလိုနဲ့ မီရားဟာ နတ်ဆိုးရဲ့ ကျော့ကွင်းထဲ ပိတ်မိသွားပြီး ရုန်းမထွက်နိုင်တဲ့ အခြေအနေကို ရောက်လာပါတယ်။ Judaa Hoke Bhi ဟာ Raaz (2002) ကို ရိုက်ကူးခဲ့တဲ့ ဒါရိုက်တာရဲ့ ဟင်ဒီထိတ်လန့်သည်းဖိုဇာတ်ကားပါ။

ခယ်ထုံဟာ ဝေးလံခေါင်သီပြီး အန္တရာယ်များတဲ့ နေရာတွေကို ရွေးချယ်ကာ စေတနာ့ဝန်ထမ်းဆရာဝန်အဖြစ် လုပ်ကိုင်နေသူပါ။ တစ်ရက်မှာ ကလေးတွေကို ကယ်ဖို့ဆိုပြီး ရုတ်တရက် လိုက်သွားရာက Cooley ကို ရောက်သွားပါတယ်။ အဲဒီခရီးမှာ ခယ်ထုံဟာ သေဆုံးချိန်က ရုပ်အလောင်းတောင် အင်္ဂါမစုံခဲ့တဲ့ အဖေ့အကြောင်းကို တဖြည်းဖြည်း သိလာရတယ်။ အဖေ့နောက်ကွယ်က အကြောင်းတွေနဲ့ သေဆုံးခဲ့ရတဲ့ အကြောင်းရင်းကို သဘောပေါက်လာသလို လက်ရှိသူကြုံနေရတဲ့ မစ်ရှင်နဲ့ အဖွဲ့အစည်းအကြောင်းကိုလည်း တစ်စတစ်စ ဖော်ပြသွားတဲ့ စစ်ပွဲနဲ့ အက်ရှင်နောက်ခံ သည်းထိတ်ရင်ဖိုဇာတ်ကားပါ။

ကက်ဆီဟာ အမေဆုံးပါးသွားပြီးနောက် အဖေက နောက်အိမ်ထောင်ပြုလိုက်တာကို မကျေနပ်ဖြစ်နေတဲ့ ဆယ်ကျော်သက်တစ်ယောက်ပါ။ ပုန်ကန်တတ်လာတဲ့ သူနဲ့ မိထွေးတို့ အဆင်ပြေစေချင်လို့ အဖေဖြစ်သူက နှစ်ယောက်လုံးကို ခေါ်ပြီး တောမြို့လေးတစ်မြို့ဆီ ခရီးထွက်လာပါတယ်။ ဒါပေမဲ့ ကက်ဆီက ခရီးထွက်လာရတာကိုလည်း မကြိုက်တာကြောင့် စကားများကြပြီး တည်းခိုနေတဲ့အိမ်ကနေ ထွက်သွားတယ်။ မြို့ထဲက ဘားတစ်ခုမှာ ထိုင်နေတုန်း အန်နာနဲ့ တက်ကာတို့ကို တွေ့ပြီး စကားလက်ဆုံကျသွားပါတယ်။ ကက်ဆီက အဆောက်အဦးဟောင်းတွေ၊ စက်ရုံဟောင်းတွေကို လိုက်လည်ရတာ ဝါသနာပါတာမို့ မြို့မှာရှိတဲ့ အိမ်ဟောင်းတစ်လုံးဆီ လိုက်ပို့ပေးဖို့ သူတို့ကို ပြောလိုက်တယ်။ အဲဒီလိုနဲ့ လူသတ်မှုတွေ၊ လူဖမ်းဆီးမှုတွေ ဖြစ်ခဲ့တယ်လို့ ပါးစပ်ရာဇဝင်ရှိတဲ့ မက်ကင်လီအိမ်ဟောင်းဆီ ရောက်သွားကြပါတယ်။ အဲဒီအိမ်အကြောင်း ကြားထားရတာတွေက ကောလာဟလသက်သက် မဟုတ်မှန်း သိလိုက်ရတဲ့အခါ သူတို့ကိုယ်တိုင် အန္တရာယ်နဲ့ ကြုံရပါတော့တယ်။

ကတ်သလစ်ဘုရားကျောင်းက ဖွင့်လှစ်ပေးတဲ့ မိစ္ဆာနှင်သင်တန်းတွေမှာ အမျိုးသားဘုန်းတော်ကြီးတွေပဲ တက်ရောက်ခွင့်ရှိပါတယ်။ ဒါပေမဲ့ စစ္စတာအန်းကတော့ ဒီဘာသာရပ်ကို အထူးစိတ်ဝင်စားပြီး မိစ္ဆာနှင်ခွင့်ရတဲ့ ပထမဆုံးအမျိုးသမီး ဖြစ်လာဖို့ ကြိုးစားနေသူပါ။ နတ်ဆိုးနှင်တဲ့အကြောင်းကို ဘုရားကျောင်းရဲ့ အဖွဲ့အစည်းစနစ်နဲ့ ဆောင်ရွက်ပုံတွေကြားကနေ ပြထားတဲ့ ဇာတ်လမ်းဖြစ်ပါတယ်။ စစ္စတာအန်းရဲ့ အယူအဆက သမားရိုးကျနည်းလမ်းတွေနဲ့ ကွာနေတယ်။ သူက မိစ္ဆာကိုပဲ အာရုံစိုက်တာထက် ပူးကပ်ခံနေရတဲ့သူကို နားလည်အောင် ကြိုးစားဖို့ အားသန်ပါတယ်။ ရှေးရိုးနည်းလမ်းတွေကို လက်ခံသူတွေနဲ့ ကိုယ်ယုံကြည်ရာအတိုင်း လုပ်ချင်တဲ့ အန်းတို့ကြား အငြင်းပွားနေကြချိန်မှာပဲ ပုံမှန်နည်းတွေနဲ့ ဘယ်လိုမှ နှင်ထုတ်လို့မရတဲ့ နတ်ဆိုးပူးကပ်မှုတွေကို ကြုံလာရတယ်။ ဒီအခြေအနေကို သူတို့ ဘယ်လိုဆက်ရင်ဆိုင်ကြမလဲ။

ကူကလင်စကီးဟာ ပြင်ပလောကမှာ တကယ်ရှိခဲ့တဲ့ ကြေးစားလူသတ်သမားဖြစ်ပြီး သူ့အကြောင်းကို အခြေခံရိုက်ကူးထားတဲ့ မှုခင်းအတ္ထုပ္ပတ္တိဇာတ်ကားပါ။ လူပေါင်းတစ်ရာလောက်ကို သတ်ခဲ့သူလို့ ဖော်ပြထားတဲ့ သူဟာ မာဖီးယားဂိုဏ်းတွေအတွက် အခကြေးငွေယူပြီး လူသတ်ပေးတယ်။ မကြောက်မရွံ့နဲ့ သွေးအေးအေး သတ်ဖြတ်တတ်တာကြောင့် ရေခဲလူသား၊ Iceman လို့ အမည်ရထားပါတယ်။ ဇာတ်လမ်းက သူ့ရဲ့ ရက်စက်တဲ့ဘက်ကိုသာမက မိသားစုကို တန်ဖိုးထားပြီး ကြင်နာတတ်တဲ့ဘက်ကိုလည်း ပြထားတယ်။ ကလေးတွေနဲ့ မိန်းကလေးတွေကိုတော့ ဘယ်လိုအခြေအနေမှာမဆို မသတ်သူအဖြစ် ဖော်ပြထားပါတယ်။ လောကဓံနဲ့ အကြင်နာမဲ့တဲ့ လူကြီးတချို့ကြောင့် ကြေးစားလူသတ်သမားဘဝကို ရောက်သွားပုံ၊ သူ့ဘဝရဲ့ အနိမ့်အမြင့်တွေကို ကြမ်းတမ်းတဲ့အဖြစ်အပျက်တွေနဲ့ နူးညံ့တဲ့အခိုက်အတန့်တွေ တွဲဖက်တင်ဆက်ထားပြီး Michael Shannon နဲ့ Chris Evans တို့ ဦးဆောင်ပါဝင်ထားပါတယ်။

ဝါရန်ဂယ်မြို့မှာ ပြန်ပေးဆွဲမှုတွေ ဆက်တိုက်ဖြစ်နေပြီး ပျောက်ဆုံးသွားသူတွေက အသက်ရှစ်နှစ်အရွယ် မိန်းကလေးတွေချည်း ဖြစ်နေပါတယ်။ အဲဒီမြို့ကို မိသားစုနဲ့အတူ ပြောင်းလာတဲ့ စီအိုင်ရဲအရာရှိ ကီရှိုးက ဒီအမှုတွေကို စုံစမ်းရတော့တယ်။ ဒါပေမဲ့ ပြန်ပေးဆွဲခံရတဲ့ ကလေးအရေအတွက်က တဖြည်းဖြည်း ပိုများလာပြီး အလောင်းတွေပါ တွေ့လာရပါတယ်။ ရင်ခွဲစစ်ဆေးတဲ့အခါ နှလုံးတွေကိုပဲ ထုတ်ယူထားတာ တွေ့ရလို့ ကီရှိုးက ကိုယ်တွင်းအင်္ဂါမှောင်ခိုမှုနဲ့များ ပတ်သက်နေမလားဆိုပြီး သံသယဝင်လာတယ်။ ပြန်ပေးဆွဲသူတွေရဲ့ နောက်ကွယ်မှာ ဘာရှိနေတာလဲ၊ မြို့ကကလေးတွေကို ဒီအန္တရာယ်ကနေ သူကာကွယ်ပေးနိုင်ပါ့မလားဆိုတာကို ဇာတ်လမ်းအလယ်ပိုင်းက မမျှော်လင့်ထားတဲ့ အလှည့်အပြောင်းတွေနဲ့ ဆက်ပြထားတဲ့ Telugu မှုခင်းရုပ်ရှင်ပါ။

အန်တာရာတို့မိသားစု ပြောင်းလာတဲ့အိမ်မှာ အရင်က အာနေးဆိုတဲ့ ကောင်လေးတစ်ယောက် နေခဲ့ဖူးတယ်။ အာနေးက ဘေးအိမ်က လင်မယားနှစ်ယောက် ရန်ဖြစ်နေတဲ့နေရာကို သွားရင်း ကားတိုက်ခံရပြီး သေဆုံးခဲ့တာပါ။ အဲဒီအဖြစ်အပျက်ကို သိထားတဲ့ အန်တာရာက တစ်နေ့မှာတော့ အတိတ်က အာနေးနဲ့ တီဗွီကနေတစ်ဆင့် ဆက်သွယ်မိသွားပါတယ်။ လက်ရှိအချိန်မှာ နေနေတဲ့ အန်တာရာဟာ အာနေးမသေဆုံးအောင် အနာဂတ်ဘက်ကနေ ကူညီဖို့ ကြိုးစားတော့တယ်။ အတိတ်ကလူတစ်ယောက်ကို ဘယ်လိုကူညီရမလဲ၊ အာနေးကို တကယ်ကယ်နိုင်ပါ့မလား။ ကံကြမ္မာကို ပြောင်းလဲလိုက်ရင် သူတို့အတွက် ဘာတွေဖြစ်လာမလဲဆိုတဲ့ မေးခွန်းတွေနဲ့ ဆက်သွားတဲ့ အပြိုင်ကမ္ဘာပုံစံ ဇာတ်လမ်းဖြစ်ပြီး အန်တာရာအဖြစ် တာ့ပ်ဆီးပန်းနုက သရုပ်ဆောင်ထားပါတယ်။