သည်းထိတ်ရင်ဖိုကားများ

ကျောင်းဆရာ ဒိုယူဘင်းက သူတစ်ပါးရဲ့ ခွင့်ပြုချက်မရှိဘဲ လိင်ပိုင်းဆိုင်ရာ အမြတ်ထုတ်တဲ့ပုံတွေ ရိုက်ကူးခဲ့တဲ့ ကျောင်းသားနှစ်ယောက်ကို အပြစ်ပေးနေရာက ဇာတ်လမ်းစပါတယ်။ တစ်ယောက်က ဆရာတွေကြားမှာ ရိုးသားကြိုးစားသူ၊ ဆိုလ်းတက္ကသိုလ်တက်မယ့်သူလို့ နာမည်ကောင်းရနေတဲ့ အန်ဂျီဟိုပါ။ နောက်တစ်ယောက်ကတော့ ဒိုယူဘင်းရဲ့ ယောက်ဖဖြစ်လာမယ့် အင်ဆောင်းမင်း ဖြစ်ပါတယ်။ ဒိုယူဘင်းကိုယ်တိုင်ကလည်း မကြာခင် လက်ထပ်တော့မယ့်သူဖြစ်ပြီး သာယာတဲ့အိမ်ထောင်ရေးကို မျှော်လင့်နေတယ်။ ဒါပေမယ့် သူငယ်ချင်းကြောင့် ကလပ်ကို ရောက်သွားပြီး မိန်းကလေးနှစ်ယောက်နဲ့ ညတစ်ည ဖြတ်သန်းဖြစ်ခဲ့ပါတယ်။ နောက်တော့ အဲဒီညက အဖြစ်အပျက်တွေကို သူမမှတ်မိတော့ဘူး။ အဲဒီလို ဖြစ်နေချိန်မှာ တစ်စုံတစ်ယောက်ဆီက ဖုန်းဝင်လာပါတော့တယ်။

Tom Walker ဟာ စိတ်ရောဂါကုဆေးရုံမှာ နှစ်နှစ်ဆယ်ကြာ နေခဲ့ပြီးနောက် ပြန်လွတ်လာပါတယ်။ ဒါပေမယ့် လွတ်လွတ်လပ်လပ် သွားလာနိုင်ဖို့ ရက်သုံးဆယ် အကျယ်ချုပ်နေဖို့ လိုသေးတာကြောင့် မိဘတွေချန်ခဲ့တဲ့ အိမ်ကြီးမှာ တစ်ယောက်တည်း နေရတယ်။ မိဘတွေက သူတို့ငယ်ငယ်ကတည်းက ကွဲသွားခဲ့ပြီး အဖေကလည်း Tom ပြန်မလွတ်လာခင် ရက်ပိုင်းအလိုမှာ ကိုယ့်ကိုယ်ကိုယ် သတ်သေသွားခဲ့တာပါ။ အစ်ကို Alex ကတော့ ထောင်ထဲမှာ ရှိနေဆဲဖြစ်ပါတယ်။ အိမ်ကြီးထဲ တစ်ယောက်တည်း နေတုန်း Tom ဟာ အသံတွေကြားရတာ၊ ထူးဆန်းတဲ့ဖုန်းတွေ ဝင်လာတာနဲ့ ကြုံလာရတယ်။ မိန်းကလေးတစ်ယောက် ရေနစ်နေတဲ့ မြင်ကွင်းကိုလည်း မကြာခဏ မြင်နေရပါတယ်။ တစ်နေ့ မုန့်မှာစားရင်း မုန့်လာပို့တဲ့ Lynn ဆိုတဲ့ မိန်းကလေးကို သဘောကျသွားပေမယ့် သူ့ခံစားချက်ကို ဖွင့်ပြောဖို့ ကြိုးစားနေချိန်မှာပဲ ထောင်ထဲရှိနေရမယ့် အစ်ကို Alex ကို အိမ်ထဲမှာ စမြင်လာရတယ်။ သူကြုံနေရတာတွေက အရင်က စိတ်ဒဏ်ရာတွေကြောင့် ထင်ယောင်ထင်မှား ဖြစ်နေတာလား၊ အိမ်ကြီးမှာပဲ တကယ်ခြောက်လှန့်နေတာလား။ Lynn နဲ့ အဆင်ပြေနိုင်ပါ့မလားဆိုတဲ့ မေးခွန်းရှိသလို ရက်သုံးဆယ် အကျယ်ချုပ်ကာလကို အေးအေးဆေးဆေး ကျော်ဖြတ်နိုင်ပါ့မလားဆိုတာလည်း မသေချာသေးပါဘူး။

တာကစ္စတန်ကို အုပ်ချုပ်နေသူ သေဆုံးသွားတဲ့နောက် သူ့သားနှစ်ယောက်ထဲက အစ်ကိုဖြစ်သူဟာ ညီကိုဖမ်းထားပြီး နိုင်ငံကို သိမ်းယူလိုက်ပါတယ်။ နိုင်ငံတွင်း ဆူပူမှုတွေနဲ့ ဓာတ်ငွေ့သုံးတိုက်ခိုက်မှုတွေကိုပါ လုပ်နေတဲ့ သူ့ကြောင့် လူတွေ ဒုက္ခရောက်နေကြတယ်။ ဒီအဖြစ်တွေကို မြင်တဲ့အခါ Ryan Reynolds သရုပ်ဆောင်ထားတဲ့ ဇာတ်ကောင်က ကူညီကယ်တင်ချင်လာပြီး လူတွေစုကာ ဖမ်းခံထားရတဲ့ ညီဖြစ်သူကို ကယ်ထုတ်ဖို့ စီစဉ်ပါတော့တယ်။ သူဖွဲ့ထားတဲ့အဖွဲ့မှာ စည်းမျဉ်းတစ်ခု ရှိပါတယ်။ အဖွဲ့ဝင်တွေဟာ တစ်ယောက်ဘယ်သူဆိုတာ တစ်ယောက်မသိရဘူး။ နာမည်ကိုတောင် အချင်းချင်း မသိကြတဲ့သူတွေ ပူးပေါင်းပြီး ဒီကယ်ဆယ်ရေးကို လုပ်ကြရမှာပါ။ Transformers ဇာတ်ကားတွေရဲ့ ဒါရိုက်တာ Michael Bay ရိုက်ကူးထားပြီး အက်ရှင်ခန်းတွေနဲ့အတူ ဟာသလေးတွေလည်း ရောပါနေပါတယ်။

တက္ကစီမောင်းသူ Jerry က နိုင်ငံထဲမှာ ဖြစ်ပျက်နေသမျှကို လိုက်ကြည့်ပြီး နောက်ကွယ်မှာ ဘယ်သူတွေ ကြိုးကိုင်နေတယ်၊ ဘယ်အဖွဲ့က လုပ်တာဖြစ်မယ်ဆိုတဲ့ ကိုယ်ပိုင်သီအိုရီတွေ ထုတ်လေ့ရှိပါတယ်။ အလုပ်ကြောင့် လူအများကြီးနဲ့ တွေ့ရတော့ တွေ့သမျှလူကိုလည်း သူ့အတွေးတွေ လိုက်ပြောတတ်တယ်။ ပြောသမျှက ယုံရခက်လွန်းလို့ သူ့ကို အရူးတစ်ယောက်လို ထင်ကြတာပါ။ ဒါပေမယ့် သူပြောခဲ့တဲ့အထဲက တစ်ခုက မှန်သွားပြီး အဖွဲ့အစည်းတစ်ခုက သူ့နောက်ကို လိုက်ဖမ်းလာပါတယ်။ Jerry ကိုယ်တိုင်ကတော့ သီအိုရီတွေ အများကြီး ထုတ်ထားမိလို့ ဘယ်တစ်ခုကြောင့် အခုလို လိုက်ဖမ်းခံနေရသလဲဆိုတာ မသိတော့ဘူး။ Jerry မှာ အရူးအမူးစွဲလမ်းနေတဲ့ Alice ဆိုတဲ့ ကောင်မလေးတစ်ယောက်လည်း ရှိပါတယ်။ သူ့ကိုလိုက်ဖမ်းနေတဲ့ အဖွဲ့အစည်းနဲ့ Alice ကြား ဘယ်လိုဆက်စပ်မှုတွေ ရှိမလဲ၊ Jerry ရဲ့စွဲလမ်းမှုကရော Alice ကို အန္တရာယ်ဖြစ်စေနိုင်မလားဆိုတာ ဆက်ကြည့်ရမှာပါ။ Julia Roberts နဲ့ Mel Gibson တို့ ပါဝင်ထားပြီး အက်ရှင်၊ နိုင်ငံရေးလျှို့ဝှက်မှုခင်းနဲ့ အချစ်ရေးတို့ကို တွဲဖက်ထားတဲ့ ဇာတ်ကားဖြစ်ပါတယ်။

အာရှတစ်လွှားမှာ သတ်ဖြတ်၊ အကြမ်းဖက်၊ လုယက်နေတဲ့ အာဏာရူး General Bison ဟာ မဟာမိတ်အဖွဲ့က စေတနာ့ဝန်ထမ်း ၆၀ ကျော်ကို ပြန်ပေးဆွဲလိုက်ပါတယ်။ ပြန်လွှတ်ပေးဖို့ ငွေ ၂၀ ဘီလီယံ တောင်းလာတဲ့အခါ Col. Guile တို့ မဟာမိတ်တပ်တွေ ဝင်ရောက်တိုက်ခိုက်ဖို့ ဖြစ်လာတယ်။ Guile အဖြစ် ဗန်ဒိန်းက သရုပ်ဆောင်ထားပါတယ်။ ဘိုင်ဆန်ကို တုံ့ပြန်ဖို့ ပြင်ဆင်နေကြတာ မဟာမိတ်တပ်တွေပဲ မဟုတ်ပါဘူး။ သူ့လက်ချက်ကြောင့် ဒုက္ခရောက်ခဲ့ရသူတွေကလည်း လက်စားချေဖို့ ကြံစည်လာကြပါတယ်။

ဝါလေနဲ့ အာကင်းတို့ အမြွှာညီအစ်ကိုနှစ်ယောက်ဟာ ငယ်ငယ်က နှစ်သစ်ကူးညတစ်ညမှာ ဓားပြတိုက်ခံရပြီး မိဘနှစ်ပါးလုံးကို ဆုံးရှုံးခဲ့ရပါတယ်။ နေ့ချင်းညချင်း မိဘမဲ့ဖြစ်သွားတဲ့ သူတို့ဟာ မိဘမဲ့ဂေဟာကို ရောက်ခဲ့ကြပြီး လီဂိုပြည်နယ်ရဲ့ လမ်းမတွေပေါ်မှာ အသက်ရှင်ရပ်တည်ဖို့ ကြိုးစားရင်း ကြီးပြင်းလာခဲ့ကြတယ်။ အရွယ်ရောက်လာတော့ ညီအစ်ကိုနှစ်ယောက် ရွေးတဲ့လမ်းတွေက ဆန့်ကျင်ဘက်ဖြစ်သွားပါတယ်။ ဝါလေက ရဲအရာရှိဖြစ်လာပေမယ့် အာကင်းကတော့ ထောင်ထဲဝင်လိုက် ထွက်လိုက်နဲ့ ဒုစရိုက်သမားတစ်ယောက် ဖြစ်လာခဲ့တယ်။ တစ်ယောက်နဲ့တစ်ယောက်လည်း ကြည့်မရကြတော့ပါဘူး။ ဒီလိုနဲ့ ဝါလေလိုက်နေတဲ့ ရာဇဝတ်မှုတစ်ခုမှာ အာကင်းက တရားခံတွေထဲ ပါနေမှန်း သိလိုက်ရပါတယ်။ အာကင်း ဘယ်လိုဖြစ်ပြီး ဒီရာဇဝတ်မှုထဲ ပါသွားတာလဲ။ ဝါလေကရော အလုပ်တာဝန်နဲ့ ညီအစ်ကိုသံယောဇဉ်ကြား ဘယ်ဘက်ကို ရွေးမလဲ။ နှစ်ယောက် ထိပ်တိုက်တွေ့ကြတဲ့အခါ အပြင်းအထန် ရင်ဆိုင်ကြဦးမလား၊ သွေးသားချင်းဖြစ်နေတာကြောင့် အလျှော့ပေးကြမလားဆိုတာကို ၂၀၂၂ ခုနှစ်ထွက် နိုင်ဂျီးရီးယား မှုခင်းအက်ရှင်ဇာတ်ကားမှာ ဆက်ကြည့်ရမှာပါ။

ဘန်ဂျမင်းက မကြာခင် အယ်လ်အေမှာ အပြာရုပ်ရှင်သရုပ်ဆောင်အဖြစ် အလုပ်သွားလုပ်တော့မှာပါ။ မသွားခင် အချစ်ဆုံးသူငယ်ချင်း ဒွန်းနဲ့ နှုတ်ဆက်ပွဲလုပ်ကြပြီး အပြန်မှာတော့ ဒွန်းရဲ့ တရားမဝင်ပစ္စည်းတချို့ ကယ်လီဖိုးနီးယားဘက်ကို ပို့ပေးမယ့်အစီအစဉ်ထဲ သူပါ ဝင်ပါမိသွားပါတယ်။ သူတို့ သယ်ပေးရတဲ့ပစ္စည်းတွေက မူးယစ်ဆေးမဟုတ်ဘူးဆိုတော့ ဘာတွေများလဲ၊ ဒွန်းကရော ဘာကြောင့် ဒီလိုအလုပ်ကို ရွေးခဲ့တာလဲဆိုတဲ့ မေးခွန်းတွေ ရှိလာတယ်။ ဒီပစ္စည်းတွေကို သယ်ရင်း သူတို့နှစ်ယောက် ဘာတွေကြုံရမလဲဆိုတာကို သည်းထိတ်ရင်ဖို ပုံစံနဲ့ ရိုက်ထားပါတယ်။ တစ်ဖက်မှာလည်း ဒွန်းနဲ့ ဘန်ဂျမင်းတို့ဟာ တစ်ယောက်ကိုတစ်ယောက် ချစ်နေကြပေမယ့် ဖွင့်မပြောကြသေးတဲ့ ယောက်ျားလေးနှစ်ယောက်ပါ။ ၂၀၂၂ ခုနှစ်ထွက် ထိတ်လန့်သည်းဖိုဇာတ်ကားဖြစ်ပြီး ရိုင်းစိုင်းတဲ့စကားလုံးတွေနဲ့ ဝတ်လစ်စလစ်အခန်းတွေ ပါဝင်ပါတယ်။

ရာ့ဂ်ျကူးမားရဲ့ အမေဟာ မတော်တဆမှုတစ်ခုကြောင့် မျက်နှာပုံပန်းပျက်သွားပြီး စိတ်ကျရောဂါနဲ့ ဆုံးသွားခဲ့ပါတယ်။ အမေ့ကို မကယ်နိုင်ခဲ့တဲ့အဖြစ်ကြောင့် ရာ့ဂ်ျက ပလတ်စတစ်ဆာဂျရီဆရာဝန်တစ်ယောက် ဖြစ်လာခဲ့တာပါ။ တစ်နေ့မှာတော့ အောင်သွယ်တော်ရဲ့ ချိတ်ဆက်ပေးမှုကနေ မဟာသီဆိုတဲ့ ကောင်မလေးနဲ့ တွေ့ပြီး ချစ်ကြိုက်သွားပါတယ်။ တစ်ဖက်မှာလည်း ရာ့ဂ်ျကို ငယ်ငယ်ကတည်းက သဘောကျနေတဲ့ မာယာဆိုတဲ့ ကောင်မလေးတစ်ယောက် ရှိနေတယ်။ မာယာဟာ မတော်တဆမှုတစ်ခု ကြုံရပြီး သေမင်းနဲ့ လွန်ဆွဲနေရတဲ့အခါ ရာ့ဂ်ျ၊ မဟာသီနဲ့ မာယာတို့ရဲ့ သုံးပွင့်ဆိုင်အချစ်ရေး ဘယ်လိုဆက်ဖြစ်မလဲဆိုတာ မေးစရာဖြစ်လာပါတယ်။ အစမှာ ကြည်နူးစရာအချစ်ဇာတ်လမ်းအဖြစ် စထားပြီး နောက်ပိုင်းမှာတော့ သူတို့သုံးယောက်ရဲ့အကြောင်းက တဖြည်းဖြည်း ပြင်းထန်လာပါတယ်။

စာရေးဆရာအဖြစ် ရပ်တည်နိုင်ဖို့ ရုန်းကန်နေရတဲ့ လူငယ်တစ်ယောက်ဟာ ကိုယ်တိုင်မရေးခဲ့တဲ့ စာမူတစ်ပုဒ်နဲ့ အကြီးအကျယ် အောင်မြင်သွားပါတယ်။ ဒါပေမယ့် အောင်မြင်မှုရပြီးတဲ့နောက်မှာတော့ ကိုယ်ကျင့်တရားနဲ့ ပတ်သက်တဲ့ ရွေးချယ်မှုတွေကို ရင်ဆိုင်လာရတယ်။ Bradley Cooper က ဒီလူငယ်စာရေးဆရာအဖြစ် သရုပ်ဆောင်ထားပြီး ဇာတ်ကောင်ရဲ့ အတွင်းစိတ်က ရုန်းကန်မှုတွေနဲ့ စိတ်ပိုင်းဆိုင်ရာ ပြင်းပြင်းထန်ထန် ခံစားနေရပုံတွေကို ပုံဖော်ထားပါတယ်။

မိန်းကလေးတွေကို မြေအောက်အချုပ်ခန်းထဲ ဖမ်းထားပြီး တစ်ယောက်နဲ့တစ်ယောက် လက်ဗလာနဲ့ သေတဲ့အထိ တိုက်ခိုက်ခိုင်းနေကြပါတယ်။ သူတို့ဟာ အချင်းချင်း သိတောင်မသိကြဘဲ အသက်လုပြီး တိုက်ခိုက်ရသူတွေပါ။ ဒီသတ်ပွဲတွေကို ကြည့်ချင်တဲ့ လူချမ်းသာတွေရှိတာကြောင့် အဖွဲ့အစည်းတစ်ခုက စီစဉ်ပေးနေတာဖြစ်ပါတယ်။ ဖမ်းဆီးခံမိန်းကလေးတွေ အပြန်အလှန် တိုက်ခိုက်သတ်ဖြတ်ကြရပုံကို သွေးထွက်သံယိုဇာတ်ဝင်ခန်းတွေနဲ့ ပြထားတဲ့ အက်ရှင်နဲ့ ထိတ်လန့်မှုရောစပ်ထားတဲ့ ဇာတ်ကားပါ။

သားကို တစ်ယောက်တည်း ပြုစုစောင့်ရှောက်နေရတဲ့ ဟော်လီဟာ သားဖြစ်သူရဲ့ ဆေးဖိုးဝါးခအတွက် တရားမဝင်ကားပြိုင်ပွဲတွေမှာ ဝင်ပြိုင်ပြီး ဝင်ငွေရှာနေရပါတယ်။ ငယ်ငယ်ကတည်းက ကားမောင်းပါရမီရှိတဲ့သူမက အပိုဝင်ငွေရဖို့ ဆေးပစ္စည်းမှောင်ခိုသယ်တဲ့ကားကို မောင်းပေးဖို့ပါ သဘောတူလိုက်တယ်။ အဲဒီကနေ ရာဇဝတ်လောကထဲ တဖြည်းဖြည်း ခြေချမိသွားပါတယ်။ ဒီအချိန်မှာပဲ အလုပ်ကို အားစိုက်လုပ်တတ်တဲ့ FBI အေးဂျင့်တစ်ယောက်က ဟော်လီကို သတိထားမိလာတယ်။ သားအတွက် ငွေရှာဖို့လုပ်ရင်း ရွေးချယ်ခဲ့တဲ့အလုပ်တွေကြောင့် ဟော်လီတို့သားအမိဟာ အန္တရာယ်နဲ့ ရင်ဆိုင်ရတော့မှာပါ။

ခရူးဆိတ်ခေတ်ကို နောက်ခံထားတဲ့ ဂျာမန်သည်းထိတ်ရင်ဖိုဇာတ်ကားဖြစ်ပြီး စိတ်ကူးယဉ်ဆန်တဲ့ အကြောင်းအရာတွေနဲ့ လျှို့ဝှက်ဆန်းကြယ်မှုတွေကို တွဲဖက်တင်ဆက်ထားပါတယ်။ အဲဒီခေတ်က လူတွေရဲ့အယူသီးမှု၊ နေထိုင်ပြုမူပုံတွေအပြင် အာဏာကို လက်ကိုင်ထားသူတွေ ထင်ရာစိုင်းတတ်ပုံကိုလည်း ထည့်သွင်းထားပါတယ်။

သူငယ်ချင်းမိသားစုနှစ်စုဟာ မြို့ပြနဲ့ဝေးတဲ့ အပန်းဖြေစခန်းတစ်ခုက သစ်သားအိမ်ငယ်တွေမှာ ပိတ်ရက်ကို အေးအေးဆေးဆေး ဖြတ်သန်းဖို့ ရောက်လာကြပါတယ်။ တောတောင်သဘာဝကြားမှာ အနားယူဖို့လာခဲ့ကြပေမယ့် အနီးအနားက တောအုပ်ထဲ ခြေလျင်ခရီးထွက်ရာကနေ ကပ်ဆိုးတစ်ခု သူတို့နဲ့အတူ ပါလာတော့တယ်။ နတ်ဆိုးက အရင်ဆုံး ကလေးနှစ်ယောက်ဆီ ဝင်ကပ်လာတာပါ။ အဲဒီနောက် ကလေးတွေက သူတို့ရဲ့မိဘတွေဖြစ်တဲ့ အယ်လီနဲ့ သောမတ်စ်၊ သူငယ်ချင်းလင်မယား မာဂရက်နဲ့ ဘန်တို့ကို ဒုက္ခပေးလာကြတယ်။ ကလေးတွေဆီမှာ တစ်ခုခု လွဲနေပြီလို့ သတိထားမိလာချိန်ကစပြီး အနားယူဖို့လာခဲ့တဲ့ မိသားစုနှစ်စုလုံး ကြောက်စရာအဖြစ်တွေနဲ့ ရင်ဆိုင်ရတော့တာပါ။

မာသီဆိုတဲ့လူဟာ သင်္ချာသဘောတရားတွေနဲ့ အတွက်အချက်တွေကို သုံးပြီး ပြစ်မှုကျူးလွန်သူပါ။ သူပစ်မှတ်ထားသူတွေက ကမ္ဘာတစ်ဝန်းက ရာထူးကြီးသူတွေ၊ အရေးပါတဲ့ပုဂ္ဂိုလ်တွေနဲ့ နိုင်ငံရေးသမားတွေဖြစ်ပြီး အဲဒီလူတွေကို လုပ်ကြံသတ်ဖြတ်နေတာ ဖြစ်ပါတယ်။ သူ့ကို ဖမ်းဆီးဖို့အတွက် နိုင်ငံတကာရဲအရာရှိတစ်ယောက်က သင်္ချာပါရမီရှင် ကောင်မလေးတစ်ယောက်ရဲ့ အကူအညီကို ယူရမှာပါ။ မာသီက သင်္ချာဗျူဟာတွေကို ဘယ်လိုသုံးပြီး ပြစ်မှုကျူးလွန်သလဲ၊ သူဟာ တရားခံအစစ် ဟုတ်ရဲ့လား၊ ဒီအမှုတွေနောက်မှာ ဘယ်လိုအရှုပ်အထွေးတွေ ရှိနေသလဲဆိုတဲ့ မေးခွန်းတွေ ရှိလာတယ်။ နိုင်ငံတကာက အရေးပါတဲ့သူတွေကိုမှ ဘာကြောင့် ရွေးပြီး လုပ်ကြံနေတာလဲဆိုတာကိုလည်း ဖော်ထုတ်ရဦးမှာပါ။ Vikram ပါဝင်သရုပ်ဆောင်ထားတဲ့ ရာဇဝတ်မှုနဲ့ အက်ရှင်ဇာတ်ကား ဖြစ်ပါတယ်။

Drishyam မှာ ဖြစ်ပျက်ခဲ့တဲ့ကိစ္စတွေအပြီး ခုနစ်နှစ်အကြာမှာ ဗီဂျေးဟာ ရုပ်ရှင်ရုံပိုင်ရှင်တစ်ယောက် ဖြစ်နေပါပြီ။ သူတို့ကြုံခဲ့ရတဲ့ဖြစ်ရပ်ကို ရုပ်ရှင်ပြန်ရိုက်ဖို့ အိမ်ဝန်းတစ်စိတ်တစ်ပိုင်းကိုတောင် ရောင်းပြီး ရင်းနှီးမြှုပ်နှံထားတယ်။ ဒါပေမယ့် တစ်နှစ်ကြာတဲ့အထိ ရုပ်ရှင်က အကောင်အထည်မပေါ်သေးပါဘူး။ သူ့ဇာတ်လမ်းကို လူအများက သဘောကျပေမယ့် ဇာတ်သိမ်းကိုတော့ အားမရကြဘူး။ တစ်ဖက်မှာလည်း သားဖြစ်သူအတွက် ခုနစ်နှစ်ကြာတဲ့အထိ အခဲမကျေနိုင်သေးတဲ့ မီရာဟာ အိန္ဒိယကို ပြန်ရောက်လာပါတယ်။ သားရဲ့ဝိညာဉ် အေးချမ်းစေချင်လို့ အလောင်းရှိတဲ့နေရာကို မေးပေမယ့် ဗီဂျေးက မပြောပြခဲ့ဘူး။ ရဲအရာရှိတစ်ယောက်အဖြစ် ထက်မြက်ခဲ့တဲ့ မီရာက သားအတွက် တရားမျှတမှုကို ဘယ်လိုပြန်ရှာမလဲ။ ဒီတစ်ခေါက် ဗီဂျေးရင်ဆိုင်ရမယ့်သူက စစ်တုရင်ကိုတောင် စိတ်ထဲမှာ ကစားပြီး အနိုင်ယူနိုင်လောက်အောင် ဉာဏ်ကောင်းတဲ့ ပြည်နယ်ညွှန်ကြားရေးမှူးတစ်ယောက်ပါ။ ဗီဂျေးက ဒီအခြေအနေကို ဘယ်လိုဉာဏ်သုံးပြီး ကျော်လွှားမလဲ၊ သူကြုံရမယ့်ဖြစ်ရပ်တွေကရော လူအများကျေနပ်နိုင်မယ့် ဇာတ်သိမ်းတစ်ခုဆီ ရောက်သွားနိုင်မလားဆိုတဲ့ မေးခွန်းတွေ ရှိနေပါတယ်။ ဒီဟင်ဒီဇာတ်ကားဟာ Drishyam (2015) ရဲ့အဆက် ဖြစ်ပါတယ်။ မူရင်းကတော့ မင်းသား မိုဟာလာ ပါဝင်ထားတဲ့ မလယာလမ်စကားပြော Drishyam (2013) ဖြစ်ပြီး အဲဒီဇာတ်လမ်းကို အဂျေးနဲ့ ဟင်ဒီဘာသာ ပြန်လည်ရိုက်ကူးခဲ့တာပါ။ မူရင်းဘက်က ၂၀၂၁ ခုနှစ်မှာ ဒုတိယကား ထွက်ရှိခဲ့ပြီး ဟင်ဒီဘက်ကလည်း

တောရန့်ဟာ တော်ဝင်လေတပ်မှာ တာဝန်ထမ်းဆောင်ခဲ့ဖူးတဲ့ စစ်သားဟောင်းတစ်ယောက်ဖြစ်ပြီး အခုတော့ ပုဂ္ဂလိကခရီးသည်တင်လေကြောင်းလိုင်းမှာ လေယာဉ်မှူးလုပ်နေပါတယ်။ နှစ်သစ်ကူးအကြိုညမှာ သမီးဆီမပြန်ခင် တိုကျိုကို ခရီးစဉ်တစ်ခေါက် ပျံသန်းပေးရဖို့ ရှိနေတယ်။ ဒါပေမဲ့ တိုကျိုကိုသွားတဲ့လမ်းမှာ မုန်တိုင်းမိပြီး ကျွန်းတစ်ကျပေါ်ကို အရေးပေါ်ထိုးဆင်းလိုက်ရပါတယ်။ အဲဒီမှာ လက်နက်ကိုင်ပြန်ပေးသမားတွေနဲ့ ထပ်ရင်ဆိုင်ရတော့တယ်။ Gerard Butler ပါဝင်သရုပ်ဆောင်ထားတဲ့ အက်ရှင်နဲ့ သည်းထိတ်ရင်ဖိုဇာတ်ကားပါ။

ဒုတိယကမ္ဘာစစ်အတွင်း ကြုံခဲ့ရတဲ့အဖြစ်တွေကြောင့် စိတ်ဒဏ်ရာရနေတဲ့ ဘုန်းတော်ကြီး လန်ကက်စတာ မာရင်ဟာ ဘုရားကျောင်းတာဝန်တွေကနေ ခေတ္တအနားယူပြီး ဗြိတိသျှအုပ်ချုပ်မှုအောက်က အရှေ့အာဖရိကမှာ ရှေးဟောင်းသုတေသန တူးဖော်ရေးလုပ်နေပါတယ်။ အဲဒီမှာ ရှေးဟောင်းဘိုင်ဇန်တိုင်း ဘုရားကျောင်းတစ်ကျောင်းကို တူးဖော်တွေ့ရှိခဲ့တယ်။ ဒီဘုရားကျောင်းဟာ အောက်က မြေအောက်သင်္ချိုင်းခန်းထဲရှိ မကောင်းဆိုးဝါးကို ဖိနှိပ်ထားဖို့ ဆောက်ပြီးပြီးချင်း မြေဖုံးမြှုပ်ခဲ့တာလို့ ယူဆထားကြပါတယ်။ ဒေသခံတွေက ဘုရားကျောင်းကို ပြန်ဖော်လိုက်တာကြောင့် နတ်ဆိုးတစ်ကောင် လွတ်ထွက်လာပြီလို့ အခိုင်အမာယုံကြည်ကြပြီး ဗြိတိသျှတပ်သားတွေနဲ့ အကြမ်းဖက်ပဋိပက္ခတွေ ဖြစ်လာတယ်။ ရွာကလည်း အချိန်တိုအတွင်း ဖရိုဖရဲနဲ့ စစ်ပွဲအခြေအနေထဲ ရောက်လာပါတယ်။ မာရင်ကတော့ သူနဲ့နီးစပ်သူတစ်ယောက်ကို ပူးကပ်နေတဲ့ နတ်ဆိုးကို ရင်ဆိုင်ရတော့မှာပါ။

တွမ်မီ၊ ကီချီနဲ့ သာဒုံတို့ဟာ သူငယ်ချင်းသုံးယောက်ပါ။ တစ်နေ့မှာ သူတို့ဆီ ထီလက်မှတ်တစ်စောင် ရောက်လာတယ်။ အဲဒီလက်မှတ်နဲ့အတူ သူတို့တစ်ယောက်ချင်းစီရဲ့ စိတ်ထဲမှာ လောဘက တဖြည်းဖြည်း ဝင်လာပါတော့တယ်။ Greed က လောဘကို အဓိကထားတဲ့ သည်းထိတ်ရင်ဖိုဇာတ်ကားဖြစ်ပြီး ထီလက်မှတ်တစ်စောင်ကနေ စလာတဲ့ လောဘစိတ်က ဒီသူငယ်ချင်းသုံးယောက်ကို ဘယ်လိုဝါးမြိုသွားမလဲဆိုတာ ဆက်ပြထားပါတယ်။

ငယ်သူငယ်ချင်းနှစ်ယောက်ဟာ အစ္စရေးနိုင်ငံက လူထူထပ်တဲ့ တဲလ်အာဗစ်မြို့မှာ အသေခံဗုံးခွဲဖို့ စည်းရုံးခံထားရပါတယ်။ Paradise Now က သူတို့နှစ်ယောက်ရဲ့ နှစ်ရက်တာအကြောင်းကို သူတို့ဘက်ကအမြင်နဲ့ ပြထားတဲ့ ရုပ်ရှင်ပါ။ တစ်သက်လုံး အဖိနှိပ်ခံအဖြစ် နေခဲ့ရတယ်လို့ ခံစားကြရပြီး ကိုယ့်မြေမှာ နေရင်းနဲ့ပဲ အကျဉ်းသားတွေလို ဖြစ်နေတယ်ဆိုတဲ့ အတွေးက သူတို့ရဲ့ခံယူချက်ထဲမှာ ရှိနေတယ်။ “တန်းတူ ရှင်သန်ခွင့်မရှိဘူးဆိုရင် အနည်းဆုံးတော့ တန်းတူ သေရမယ်” ဆိုတဲ့ စကားကလည်း အသေခံဗုံးခွဲဖို့ ကြံရွယ်နေသူတစ်ဦးဆီက ထွက်လာတာပါ။ အစ္စရေးနဲ့ ပါလက်စတိုင်းပဋိပက္ခ နောက်ခံမှာ သူတို့ ဘာကိုယုံကြည်ကြသလဲ၊ ဘယ်လိုခံစားနေကြသလဲ၊ နောက်ဆုံးနေ့လို့ သတ်မှတ်ထားတဲ့အချိန်မှာ သူတို့နဲ့အတူ ဘယ်သူတွေ ရှိနေကြသလဲဆိုတာကို ဇာတ်လမ်းက အလေးထားပါတယ်။ ဇာတ်ကားထဲက ပါလက်စတိုင်းတွေက အစ္စရေးတွေကို “အခြေချနေထိုင်သူတွေ” လို့ ခေါ်ဝေါ်ကြတာလည်း တွေ့ရတယ်။ လူသတ်မှုဖြစ်တဲ့ အသေခံဖောက်ခွဲရေးအကြောင်းကို ကိုင်တွယ်ရင်း အရှေ့အလယ်ပိုင်းပဋိပက္ခအတွင်းက လူတွေရဲ့အမြင်နဲ့ ခံစားချက်တွေကို ပြထားပါတယ်။ ဒီရုပ်ရှင်ဟာ အော်စကာဆုအတွက် ပထမဆုံးတင်သွင်းခံရတဲ့ ပါလက်စတိုင်းရုပ်ရှင်ဖြစ်ပြီး ရွှေကမ္ဘာလုံးဆုနဲ့ ဘာလင်ရုပ်ရှင်ပွဲတော်က ဆုသုံးဆုလည်း ရရှိထားပါတယ်။

အသက်ကြီးနေပြီဖြစ်တဲ့ ကျောင်းဆရာတစ်ယောက်နဲ့ သူ့ဇနီးဟာ သားကို နိုင်ငံခြားပို့နိုင်ဖို့ အကြွေးယူခဲ့ကြပါတယ်။ နောက်တော့ အဲဒီအကြွေးတွေကြားမှာ လည်ပင်းနစ်ပြီး ဘဝအခြေအနေပါ ပျက်ယွင်းလာတဲ့အထိ ဒုက္ခရောက်နေကြတယ်။ ဒီလို ရုန်းကန်နေရတဲ့အချိန်မှာပဲ နောက်ထပ်ကံဆိုးမှုတွေက သူတို့ဆီ ရောက်လာပြန်ပါတယ်။ Vadh က အဲဒီဆရာအိုကြီးရဲ့ မွန်းကျပ်မှုနောက်ကို လိုက်ပြထားတဲ့ သည်းထိတ်ရင်ဖိုဇာတ်ကားပါ။ အကြွေးဝန်ပိနေတဲ့ လင်မယားနှစ်ယောက်ရဲ့ဘဝကနေ ဇာတ်ရှိန်တဖြည်းဖြည်း မြင့်လာပြီး ဆရာအိုကြီး ကြုံနေရတဲ့ ဖိအားတွေကို အနီးကပ်မြင်ရပါတယ်။

အောင်မြင်ကျော်ကြားတဲ့ ဓာတ်ပုံဆရာ ရစ်ကီဆီကို လူချမ်းသာတစ်ယောက်ဖြစ်တဲ့ ရာဂျ်က ထူးထူးခြားခြား ကမ်းလှမ်းချက်တစ်ခုနဲ့ ရောက်လာပါတယ်။ သူ့မိန်းမကို ရစ်ကီအပေါ် ချစ်လာအောင် စည်းရုံးပေးနိုင်ရင် ငွေသိန်း ၃၀ ပေးမယ်ဆိုတာပါ။ ရာဂျ်ရဲ့မိန်းမက နာမည်ကြီးမော်ဒယ် ရှီနားရွိုင်းဖြစ်ပြီး ရစ်ကီနဲ့ ကတောက်ကဆ ဖြစ်ခဲ့ဖူးသူလည်း ဖြစ်တယ်။ ရာဂျ်က အဲဒီအကြောင်းကို သိလျက်နဲ့ ရစ်ကီကို လာကမ်းလှမ်းတာပါ။ ရစ်ကီကလည်း မော်ဒယ်တွေနဲ့ ဓာတ်ပုံရိုက်တဲ့ အလုပ်ဆက်ဆံရေးထက် ကျော်လွန်ပြီး အိပ်ရာပေါ်အထိ ပတ်သက်လေ့ရှိသူတစ်ယောက်ဖြစ်တော့ ဒီကမ်းလှမ်းချက်ကို လက်ခံလိုက်တယ်။ ဒါပေမဲ့ ရာဂျ်က ကိုယ့်မိန်းမကို တခြားယောက်ျားတစ်ယောက် ချစ်လာအောင် ဘာကြောင့် လုပ်ခိုင်းရတာလဲ။ အရင်က အဆင်မပြေခဲ့တဲ့ ရစ်ကီနဲ့ ရှီနားတို့ကြားမှာရော ဘယ်လိုအခြေအနေတွေ ဖြစ်လာမလဲ။ အင်မရန်းဟက်ရှမီနဲ့ ဒီနိုမောရိယတို့ အဓိကပါဝင်ထားတဲ့ ဒီဇာတ်ကားမှာ ရာဂျ်ရဲ့ကမ်းလှမ်းချက်ကနေ ဇာတ်လမ်းအလှည့်အပြောင်းတွေ စလာပါတယ်။

မိန်းကလေးတစ်ယောက် ပျောက်ဆုံးနေပြီး သူနေခဲ့တဲ့အိမ်ကလည်း အနီးအနားမှာ သရဲခြောက်တယ်လို့ နာမည်ကြီးနေပါတယ်။ ပိုထူးဆန်းတာက သူ့ကို ရဲတပ်ဖွဲ့တင်မက နိုင်ငံရေးသမားတွေပါ အပူတပြင်း လိုက်ရှာနေကြတာပါ။ ဒါပေမယ့် လိုက်ရှာနေသူတွေကိုယ်တိုင်က ဘာကြောင့် ဒီမိန်းကလေးကို ရှာနေရသလဲဆိုတာ မသိကြဘူး။ ပျောက်ဆုံးနေတဲ့ မိန်းကလေး၊ သရဲခြောက်တယ်လို့ ပြောကြတဲ့အိမ်နဲ့ အကြောင်းရင်းမသိဘဲ ရှာဖွေနေကြသူတွေအကြောင်းကို တမီလ်ဇာတ်ကားတစ်ကားအဖြစ် တင်ပြထားပါတယ်။

လွန်ခဲ့တဲ့ နှစ်တစ်ထောင်က ဗိုက်ကင်းအကြီးအကဲ ဂတ်ဘရန်ဟာ သင်္ဘောအစင်း ၂၀ နဲ့ နော်မန်ဒီကို ဓားပြတိုက်ဖို့ ထွက်လာခဲ့တယ်။ ဘုရားကျောင်းတစ်ကျောင်းမှာ လျှို့ဝှက်ခန်းတစ်ခု တွေ့တဲ့အခါ ဘုန်းတော်ကြီးတွေက အထဲမဝင်ဖို့ တောင်းပန်ကြပေမယ့် ဗိုက်ကင်းတွေက နားမထောင်ခဲ့ကြဘူး။ အဲဒီကနေ ငရဲခွေးကြီးတစ်ကောင် လွတ်မြောက်လာပြီး အပြန်ခရီးမှာပါ သူတို့နဲ့ လိုက်လာခဲ့ပါတယ်။ သင်္ဘော နော်ဝေကို မဆိုက်ခင် ဗိုက်ကင်းအားလုံး သေဆုံးသွားကြပြီး အဲဒီသတ္တဝါတစ်ကောင်ပဲ ကုန်းပေါ်ရောက်ကာ နော်ဒစ်ဆိုတဲ့ တောနက်ထဲ ဝင်သွားခဲ့တယ်လို့ ဆိုပါတယ်။ လက်ရှိအချိန်မှာတော့ လစ်ဗ်နဲ့ သာလာတို့ သားအမိဟာ နီဘိုမြို့ကို မကြာသေးခင်ကမှ ပြောင်းလာကြသူတွေပါ။ အဖေဆုံးပြီးနောက် ပထွေးနဲ့ နေနေရတဲ့ သာလာက မြို့သစ်မှာ စိတ်ပြေလက်ပျောက်ဖြစ်ဖို့ ဂျိုးနက်စ်ဆိုတဲ့ ကောင်လေးနဲ့ မိတ်ဆွေဖွဲ့မိတယ်။ တစ်နေ့မှာ လူငယ်တွေက ပင်လယ်အော်တစ်နေရာမှာ စခန်းချပြီး သောက်စားပျော်ပါးနေကြပါတယ်။ ဒါပေမယ့် ပင်လယ်အော်နားက တောထဲမှာ မထင်မှတ်တဲ့ မတော်တဆမှုတစ်ခု ဖြစ်ပွားပြီး အယ်လင်ဆိုတဲ့ မိန်းကလေး သေဆုံးသွားတယ်။ အဲဒီနောက် ရဲတွေတောင် အဖြေရှာမရတဲ့ ပဟေဠိဆန်ဆန် အဖြစ်အပျက်တွေ ဆက်တိုက်ပေါ်လာပါတော့တယ်။

အန်တိုနီယို ပိုဟူဟာ စွမ်းအားကြီးတဲ့ နတ်ဆရာတစ်ယောက်ဖြစ်ပြီး အာဂျင်တီးနားတောအုပ်ထဲမှာ အပနှင်ရင်း အင်အားကြီး နတ်ဆိုးတစ်ကောင်နဲ့ ရင်ဆိုင်ခဲ့ရပါတယ်။ သူချစ်တဲ့ အမန်ဒါနဲ့ အယ်လေနာဆိုတဲ့ သမီးလေးတစ်ယောက် ရခဲ့ပေမယ့် အဲဒီနတ်ဆိုးကြောင့်ပဲ အမန်ဒါ့ကို ဆုံးရှုံးလိုက်ရတယ်။ အဲဒီနောက် သမီးကို သူတစ်ယောက်တည်း စောင့်ရှောက်လာခဲ့တာပါ။ သားအဖနှစ်ယောက် တောထဲကနေ မြို့ပေါ်ကို ပြောင်းလာကြပေမယ့် အန်တိုနီယိုရဲ့အလုပ်ကြောင့် သမီးနဲ့ ဆက်ဆံရေး အဆင်မပြေဖြစ်လာပါတယ်။ နောက်တော့ အပနှင်ရာမှာ အမှားအယွင်းဖြစ်ပြီး လူသေသွားခဲ့လို့ သူကိုယ်တိုင်လည်း စိတ်ကျန်းမာရေးဆေးရုံကို ရောက်သွားတယ်။ သူ ဆေးရုံမှာရှိနေတုန်း အရင်နတ်ဆိုးက ပြန်ပေါ်လာပြီး အယ်လေနာ့ကို ဒုက္ခပေးရုံမက အသက်ကိုပါ ရန်ရှာလာပါတယ်။ ကိုယ်တိုင်က ဆေးရုံထဲ ရောက်နေတဲ့ အန်တိုနီယိုအနေနဲ့ သမီးကို ဘယ်လိုကာကွယ်မလဲဆိုတာ ဆက်တွေ့ရမှာပါ။ ၂၀၂၂ ခုနှစ်က ထွက်ရှိတဲ့ စပိန်စကားပြော စိတ်ကူးယဉ်သရဲကားဖြစ်ပြီး မိစ္ဆာတွေ၊ နတ်ဆိုးတွေ၊ အပနှင်တဲ့အကြောင်းတွေအပြင် လက်တွေ့ဖန်တီးထားတဲ့ အထူးပြုလုပ်ချက်တွေကိုလည်း အသုံးပြုထားပါတယ်။