သည်းထိတ်ရင်ဖိုကားများ

ဘူးလ်က သွေးအေးပြီး ရက်စက်တဲ့ ဂိုဏ်းစတားတစ်ယောက်ပါ။ သူ့သားကို ဆေးစွဲနေတဲ့ မိန်းမနဲ့ ခွဲထားဖို့ ကြိုးစားရာကနေ ဂိုဏ်းခေါင်းဆောင်လည်းဖြစ်၊ ယောက္ခမလည်းဖြစ်တဲ့သူနဲ့ ပြဿနာတက်လာပါတယ်။ နောက်ဆုံးမှာ ဘူးလ်ဟာ နှိပ်စက်ခံရပြီး ဝေဒနာခံစားရင်း သေသွားစေဖို့ ပစ်ထားခံလိုက်ရတယ်။ ဆယ်နှစ်ကြာတဲ့အခါ ဘူးလ်တစ်ယောက် မထင်မှတ်ဘဲ ပြန်ပေါ်လာပါတယ်။ သူ့သားကို ပြန်ခေါ်ဖို့နဲ့ သူ့အပေါ် သစ္စာဖောက်ခဲ့တဲ့ မိတ်ဆွေဟောင်းတွေကို လက်စားချေဖို့ ကြိုးစားလာတာပါ။ နဂိုကတည်းက ရက်စက်တဲ့သူတစ်ယောက် နာကျည်းချက်တွေနဲ့ ပြန်လာချိန်မှာ ဘယ်လိုနည်းတွေ သုံးလာမလဲ။ သားကို ပြန်ခေါ်ထားနိုင်ပါ့မလား၊ ယောက္ခမနဲ့ မိန်းမကရော သူ့ကို ဒီအတိုင်း လွှတ်ထားကြပါ့မလား။

ဒယ်ရန်နဲ့ စတိဗ်က ငယ်သူငယ်ချင်းတွေဖြစ်ပေမယ့် နေထိုင်ပုံရော ဝါသနာပါရာပါ မတူကြပါဘူး။ ဒယ်ရန်က မိဘစကားနားထောင်ပြီး ကျောင်းစာမှာလည်း ထူးချွန်တဲ့ ကောင်လေးပါ။ စတိဗ်ကတော့ မိဘမေတ္တာငတ်နေပြီး ခပ်ဆိုးဆိုးနေတတ်သူတစ်ယောက် ဖြစ်ပါတယ်။ ဒယ်ရန်က ပင့်ကူတွေကို စွဲလမ်းသလောက် စတိဗ်က ဗန်ပိုင်းယားတွေအကြောင်း အလွန်စိတ်ဝင်စားပါတယ်။ တစ်နေ့ သူတို့မြို့ကို နှစ်ငါးရာသက်တမ်းရှိတဲ့ လူထူးဆန်းတွေရဲ့ ဆပ်ကပ်အဖွဲ့ ရောက်လာတော့ နှစ်ယောက်သား စိတ်ဝင်တစား သွားကြည့်ကြတယ်။ အဲဒီဆပ်ကပ်အဖွဲ့ထဲမှာ ဗန်ပိုင်းယားတစ်ယောက်လည်း ပါနေပါတယ်။ ပင့်ကူတွေကို သဘောကျတဲ့ ဒယ်ရန်က အဲဒီဗန်ပိုင်းယားရဲ့ ပင့်ကူလေးကို မျက်စိကျသွားတဲ့အခါ သူတို့ရဲ့ ဆပ်ကပ်ကြည့်ခရီးကနေ ဘာတွေ ဆက်ဖြစ်လာမလဲ။

မီးသတ်သမား ဂေါ်ဒီဘရူအာဟာ ဇနီးနဲ့ ကလေးကို တွေ့ဖို့ သွားနေတုန်း ဗုံးပေါက်ကွဲမှုတစ်ခုကြောင့် သူတို့နှစ်ယောက်စလုံးကို ဆုံးရှုံးလိုက်ရပါတယ်။ ဗုံးခွဲသူဟာ ကိုလံဘီယာနိုင်ငံက ပြောက်ကျားတပ်သားတစ်ယောက်ဖြစ်ပြီး လွတ်မြောက်သွားတယ်လို့ သိရတဲ့အခါ ဂေါ်ဒီက နာကျည်းစိတ်နဲ့ နိုင်ငံကူးပြီး လိုက်ရှာဖို့ ဆုံးဖြတ်လိုက်တယ်။ ဇနီးနဲ့ ကလေးအတွက် လက်စားချေချင်တဲ့စိတ်နဲ့ သွားခဲ့တဲ့ ကိုလံဘီယာမှာတော့ ပြောက်ကျားတပ်တွေနဲ့ အစိုးရစစ်တပ်တွေကြား အန္တရာယ်တွေက စောင့်နေပါတယ်။ ဗုံးခွဲသူက ဘာကြောင့် ဒီလုပ်ရပ်ကို ကျူးလွန်ခဲ့တာလဲ၊ အမေရိကန်အစိုးရက ကိုလံဘီယာမှာ ဘာတွေ လုပ်ခဲ့တာလဲဆိုတဲ့ မေးခွန်းတွေနဲ့အတူ ဂေါ်ဒီရဲ့ ခရီးကို ဆက်ပြထားတဲ့ အာနိုးရဲ့ အက်ရှင်ဇာတ်ကားပါ။

ကိုဗစ်ဖြစ်နေတဲ့ကာလမှာ ပါကာနဲ့ မီရီဆိုတဲ့ သူငယ်ချင်းမိန်းကလေးနှစ်ယောက်ဟာ ကွာရန်တင်းဝင်ဖို့ ပါကာ့မိသားစုပိုင် အိမ်ကြီးဆီ သွားနေကြပါတယ်။ ရေကန်နားမှာရှိတဲ့ အဲဒီအိမ်က လူသူကင်းမဲ့ပြီး ပတ်ဝန်းကျင်မှာလည်း ဘယ်သူမှ နေထိုင်မနေကြပါဘူး။ ဒါပေမယ့် မမျှော်လင့်ထားတဲ့ ဧည့်သည်တွေ ရောက်လာပြီး သူတို့ကို သတ်ဖို့ ကြိုးစားလာကြတယ်။ အနီးအနားမှာ အကူအညီတောင်းစရာ လူမရှိတဲ့အချိန် မိန်းကလေးနှစ်ယောက် လူသတ်သမားတွေကို ဘယ်လိုရင်ဆိုင်ကြမလဲ၊ သူတို့ကို ဘာကြောင့် ပစ်မှတ်ထားနေတာလဲဆိုတာကနေ ဇာတ်လမ်းဆက်သွားပါတယ်။ Horror/Thriller ဇာတ်ကားဖြစ်ပြီး Teenwolf ထဲမှာ Liam အဖြစ် သရုပ်ဆောင်ခဲ့တဲ့ Dylan Sprayberry လည်း ပါဝင်ထားပါတယ်။

အန်နာလို့လည်း ခေါ်တဲ့ အန်ညာဟာ ခင်ပွန်းနဲ့အတူ ပြင်သစ်စားသောက်ဆိုင်တစ်ဆိုင် ပူးတွဲပိုင်ဆိုင်ထားတဲ့ စားဖိုမှူးတစ်ယောက်ပါ။ မီးဖိုချောင်ထဲမှာ တစ်ခါတလေ ဒေါသပေါက်ကွဲတတ်လို့ ခင်ပွန်းကတော့ သူ့ကို ယုတ္တိမတန်သူလို့ မြင်ထားတယ်။ ဒါပေမယ့် အန်ညာမှာ ခင်ပွန်းမသိတဲ့ အတိတ်တစ်ခု ရှိနေပါတယ်။ သူဟာ ရုရှားစပိုင်ဘဝကနေ ထွက်ပြေးလာပြီး ကိုယ်ယောင်ဖျောက်နေသူပါ။ ဆိုင်ဖွင့်ပွဲညမှာ ခင်ပွန်းက သူ့ကို ဂုဏ်ပြုချင်လို့ ဆိုင်အကြောင်းကို သတင်းစာထဲ ထည့်ပေးလိုက်တယ်။ အဲဒီကနေ အန်ညာ ဖုံးကွယ်ထားတဲ့ အတိတ်က ပြန်လိုက်လာသလို ခင်ပွန်းရဲ့ အကြွေးပြဿနာတွေလည်း တစ်ညတည်းမှာပဲ ပေါ်လာပါတော့တယ်။ အန်ညာတစ်ယောက် ဆိုင်ထဲမှာ တပ်စွဲပြီး စားသောက်ဆိုင်နဲ့ ကိုယ့်အသက်ကို ကာကွယ်ဖို့ ရင်ဆိုင်ရပုံကို အက်ရှင်နဲ့ ဟာသရောပြီး ရိုက်ထားပါတယ်။

လုခ်ဟာ ရွက်လှေတွေကို ကမ္ဘာအနှံ့ လိုက်ပို့ပေးရတဲ့အလုပ်နဲ့ အသက်မွေးသူပါ။ ရွက်လှေတစ်စင်းကို မပို့ခင် အားလပ်ရက်အပန်းဖြေဖို့ ရောက်လာတဲ့ သူငယ်ချင်းတွေကို လှေအပျော်စီးဖို့ ခေါ်ထားပါတယ်။ ဒါပေမယ့် ကျွန်းတစ်ကျွန်းဆီ သွားပြီးအပြန်မှာ လှေက သန္တာကျောက်တန်းနဲ့ တိုက်မိပြီး ပက်လက်လန်သွားတယ်။ ပတ်ပတ်လည်မှာ ရေပြင်ပဲရှိပြီး သူတို့တက်နေတဲ့ လှေကလည်း တဖြည်းဖြည်း မြုပ်လာနိုင်ပါတယ်။ လုခ်တို့အတွက် ကယ်ဆယ်မယ့်သူ ရောက်လာတဲ့အထိ လှေပေါ်ကပဲ စောင့်နေမလား၊ ဆယ်မိုင်အကွာက ကျွန်းလေးတစ်ကျွန်းဆီ ရေကူးသွားမလားဆိုတာ ဆုံးဖြတ်ရတော့မှာပါ။

ကိုအင်ဘာတိုး၊ ပိုတာနာက စာတိုက်ရုံးအုပ်ကြီး ဗန်ကတ်ဟာ ရိုးသားပြီး စည်းကမ်းကြီးသူတစ်ယောက်ပါ။ သူ့သားကတော့ အိန္ဒိယမှာ ကိုယ်ပိုင်ကွန်ပျူတာဆော့ဝဲလုပ်ငန်း စတင်ချင်နေလို့ ဘဏ်ချေးငွေလျှောက်ဖို့ ပြင်ဆင်နေပါတယ်။ သားအဖနှစ်ယောက် ကိုယ့်ဘဝကို အေးအေးဆေးဆေး ဖြတ်သန်းနေရာက စာတိုက်ငွေတွေ ပျောက်သွားတဲ့အခါ ပြဿနာကြီးတစ်ခုနဲ့ ရင်ဆိုင်ရတော့တယ်။ ပျောက်သွားတဲ့ငွေတွေကို နှစ်ရက်အတွင်း ပြန်ထားရမှာဖြစ်ပါတယ်။ ဘယ်သူက ငွေတွေခိုးသွားတာလဲ၊ သားအဖနှစ်ယောက် ပြန်ရှာတွေ့နိုင်မလား၊ သတ်မှတ်ချိန်အတွင်း ငွေပြန်ထားနိုင်ပါ့မလားဆိုတာကို စုံထောက်ဇာတ်လမ်းဆန်ဆန် ရိုက်ကူးထားတာပါ။ ၂၀၂၂ ခုနှစ်ထွက် တောင်ပိုင်းရုပ်ရှင်ဖြစ်ပြီး အကတွေနဲ့ အလွန်အကျွံသရုပ်ဆောင်မှုတွေ မပါဘဲ ရိုးသားမှုနဲ့ မရိုးသားမှုတို့ အားပြိုင်ပုံကို တင်ပြထားပါတယ်။

အီရန်ဘရက်ကယ်က သေမိန့်ကျခံထားရတဲ့ ရာဇဝတ်သားဆယ်ယောက်ကို ကျွန်းတစ်ခုပေါ်မှာ ထားပြီး နောက်ဆုံးအသက်ရှင်ကျန်သူကို ငွေကြေးနဲ့ လွတ်မြောက်ခွင့်ပေးမယ့် အစီအစဉ်တစ်ခု ဖန်တီးပါတယ်။ အသက်ရှင်ဖို့ အချင်းချင်း သတ်ဖြတ်ရမယ့် ဒီသတ်ကွင်းကို အင်တာနက်ပေါ်က Reality Show အဖြစ် ထုတ်လွှင့်ဖို့ လုပ်တာပါ။ ဒါပေမယ့် ရွေးချယ်ထားသူတွေထဲက အဓိကလူတစ်ယောက် အသတ်ခံလိုက်ရတဲ့အခါ အယ်ဆယ်ဗာဒေါက ထောင်တစ်ခုမှာ သေမိန့်စောင့်နေတဲ့ ဂျက်ကွန်ရက်ဒ်ကို ရှာတွေ့သွားပါတယ်။ ဂျက်ကတော့ နောက်ကြောင်းကို စုံစမ်းလို့မရတဲ့ ပဟေဠိဆန်သူတစ်ယောက်ပါ။ ဒီဇာတ်ကောင်နေရာမှာ WWE နာမည်ကြီး နပန်းသမား “Stone Cold” Steve Austin ပါဝင်သရုပ်ဆောင်ထားပါတယ်။

နစ်ခ်တို့ ညီအစ်မသုံးယောက်ထဲမှာ နစ်ခ်နဲ့ ကတ်က ရေငုပ်ရတာကို ဝါသနာပါကြပါတယ်။ တစ်နေ့မှာ ကတ်ဟာ သူ့ကို နှိပ်စက်တတ်တဲ့ ယောက်ျားလက်ချက်နဲ့ သေဆုံးသွားတယ်။ အဲဒီဖြစ်ရပ်ကြောင့် စိတ်ဒဏ်ရာရသွားတဲ့ နစ်ခ်လည်း ပြည်ပကို ထွက်သွားပါတော့တယ်။ ကိုးလကြာပြီးနောက် နစ်ခ်တို့ ကျန်တဲ့ညီအစ်မနှစ်ယောက်နဲ့ သူငယ်ချင်းတွေ ပြန်ဆုံကြပြီး အရင်လို စိတ်ပြေလက်ပျောက် လှေလှော်ရေငုပ်ဖို့ ခရီးထွက်လာကြပါတယ်။ ပင်လယ်ထဲမှာ လှေငယ်ကိုယ်စီနဲ့ ရေငုပ်လိုက်၊ ငါးဖမ်းလိုက် လုပ်နေကြတုန်း ရေပြင်ပေါ်မှာ အနက်ရောင်ဆူးတောင်တစ်ခု ထွက်လာတာကို တွေ့လိုက်ကြရတယ်။ The Reef: Stalked ဟာ The Reef (2010) ရဲ့ အဆက်ဖြစ်ပေမယ့် ဇာတ်လမ်းပိုင်းမှာတော့ အချိတ်အဆက်မရှိပါဘူး။

မြူခိုးရွာမှာ နဂါးဘုရင်ကို မျိုးရိုးစဉ်ဆက် နှစ်ပေါင်းထောင်ချီ ကိုးကွယ်လာခဲ့ကြပြီး သူ့ကောင်းချီးနဲ့ စောင့်ရှောက်မှုကို ရရှိထားတယ်လို့ ယုံကြည်ကြပါတယ်။ တစ်ရက်မှာတော့ ရွာထဲက လူတစ်ယောက် ထူးထူးဆန်းဆန်း သေဆုံးသွားတယ်။ နဂါးဘုရင်ကို အပြစ်ပြုမိလို့ ဒဏ်ခတ်ခံရတာလို့ ပြောဆိုကြပေမယ့် ဒီလိုအစွဲအလမ်းတွေကို မယုံတဲ့ ဝမ်ကျဲက အမှန်တရားကို ရှာဖို့ ကြိုးစားပါတယ်။ အဲဒီအချိန်မှာပဲ သူ့မွေးစားအဖေပါ ထူးဆန်းစွာ သေဆုံးသွားပြန်တယ်။ နောက်တော့ ရွာကို ဗီဇပြောင်း မကောင်းဆိုးဝါးသတ္တဝါတွေ ဝင်တိုက်ခိုက်လာပြီး သေဆုံးသူတွေ တစ်နေ့ထက်တစ်နေ့ များလာပါတယ်။ အယူသီးတဲ့ ရွာသားတွေက ဒီပြဿနာကို ဘယ်လိုဖြေရှင်းကြမလဲ။ ဝမ်ကျဲတို့ကရော ဒီသတ္တဝါတွေကို ဘယ်လိုရင်ဆိုင်ပြီး ရွာကို ကပ်ဘေးကနေ ကယ်တင်နိုင်ကြမလဲ။

အာသာဝဏီနတ်မင်းရဲ့ တန်ခိုးကြောင့် သိဒ္ဓိဝင်နေတဲ့ နတ်ဆင်းတုနှစ်ခုရှိပါတယ်။ အဲဒီထဲက တစ်ခုဟာ နတ်ဆိုးတစ်ကောင်ကြောင့် ကျိန်စာသင့်ပြီး အပမှီသွားတယ်။ ဆင်းတုတွေရှိတဲ့ရွာမှာလည်း အငတ်ဘေးကျ၊ ကပ်ဆိုက်ပြီး နောက်ဆုံး ရွာပျက်သွားခဲ့ပါတယ်။ အဲဒီနောက် ဆင်းတုနှစ်ခုလည်း ပျောက်ကွယ်သွားတယ်။ တစ်ဖက်မှာတော့ လူသေဖူးတဲ့နေရာ၊ အဖြစ်ဆိုးတွေ ကြုံဖူးတဲ့နေရာနဲ့ အိမ်အိုအိမ်ဟောင်းတွေကို လိုက်ပြီး မှတ်တမ်းဗီဒီယိုရိုက်နေတဲ့ YouTuber အဖွဲ့တစ်ဖွဲ့ရှိပါတယ်။ သူတို့ဟာ သရဲခြောက်တယ်လို့ နာမည်ကြီးတဲ့ အိမ်အိုကြီးတစ်အိမ်ကို မှတ်တမ်းတင်ဖို့ သွားကြရင်း တစ်ယောက်ပြီးတစ်ယောက် အဖြစ်ဆိုးတွေနဲ့ ကြုံလာရတယ်။ ဒီအဖြစ်အပျက်တွေနောက်မှာ ဘာတွေရှိနေတာလဲ၊ သူတို့ ဘာကြောင့် ဒီလိုကြုံနေကြရတာလဲဆိုတာကို ဆက်လက်ရှာဖွေရမယ့် အိန္ဒိယသရဲဇာတ်ကားပါ။

ကိုရီးယား အမျိုးသားထောက်လှမ်းရေးရုံးရဲ့ နိုင်ငံခြားဌာနခွဲတစ်ခုမှာ Kang-in က ဌာနမှူးအဖြစ် တာဝန်ယူထားပါတယ်။ သူဟာ အကောင်းဆုံးအေးဂျင့်တွေကို စုဖွဲ့ထားတဲ့ Black Team ကို ဦးဆောင်ပြီး လျှို့ဝှက်မစ်ရှင်တွေ ဆောင်ရွက်နေသူပါ။ လိုချင်တာရဖို့ဆို ညှာတာမှုမရှိဘဲ ရက်စက်တတ်လို့ လူတွေကိုဝါးမျိုတဲ့ ဝိညာဉ်လို့ အဓိပ္ပာယ်ရတဲ့ “Yaksha” ဆိုတဲ့ နာမည်ဆိုးနဲ့ ကျော်ကြားနေတယ်။ တစ်နေ့မှာတော့ ဌာနချုပ်က Black Team ကို စစ်ဆေးဖို့ အမှုစစ် Ji Hoon ကို စေလွှတ်လိုက်ပါတယ်။ အဲဒီမှာ သူတို့ဆောင်ရွက်ရမယ့် စစ်ဆင်ရေးအစစ်က အရှေ့အာရှတစ်ခွင်လုံးကို လှုပ်ခတ်သွားစေနိုင်တဲ့ အမှုတစ်ခုနဲ့ ပတ်သက်နေကြောင်း သိလာကြတယ်။ Sol Kyung-gu၊ Park Hae-soo နဲ့ Hiroyuki Ikeuchi တို့ ပါဝင်ထားတဲ့ မှုခင်းအက်ရှင်ဇာတ်ကားဖြစ်ပါတယ်။

တရန်းဟာ ဆရ်ဂမ်ကို ငယ်ငယ်ကတည်းက တိတ်တခိုးချစ်နေခဲ့သူပါ။ သူတို့မိဘတွေကလည်း ရင်းနှီးကြလို့ ကလေးနှစ်ယောက်ကို ငယ်စဉ်ကတည်းက သဘောတူထားကြတယ်။ ဒါပေမယ့် တရန်းရဲ့မိဘတွေ ဆုံးပါးသွားပြီးနောက် သူလည်း ဆရ်ဂမ်နဲ့ ငယ်ငယ်ကတည်းက ကွေကွင်းခဲ့ရပါတယ်။ သူတို့ပြန်ဆုံကြပြီး သိပ်မကြာခင်မှာပဲ လူသတ်မှုတစ်ခု ဖြစ်သွားတယ်။ ရဲတွေက တရန်းကို လက်ပူးလက်ကြပ်မိထားတာကြောင့် လူသတ်တရားခံလို့ ယူဆထားပေမယ့် သူကတော့ လူမသတ်ခဲ့ဘူးလို့ ငြင်းနေပါတယ်။ ဆရ်ဂမ်ကလည်း တရန်းဟာ လူသတ်သမား မဖြစ်နိုင်ဘူးလို့ ယုံကြည်ပြီး နာမည်ကျော်ရှေ့နေ ရာဂျ်ဆီ အကူအညီတောင်းလိုက်တယ်။ ဆရ်ဂမ်ကို သဘောကျနေတဲ့ ရာဂျ်က အမှုလိုက်ပေးဖို့ လက်ခံလိုက်ပါတယ်။ တရန်းက တကယ်ပဲ လူသတ်သမားလား၊ အမှုနောက်ကွယ်မှာ ဘာတွေရှိနေသလဲဆိုတာကို အချစ်အပေါ် စွဲလမ်းရူးသွပ်မှုတွေနဲ့အတူ တင်ပြထားတဲ့ မှုခင်းလျှို့ဝှက်ဆန်းကြယ်ဇာတ်ကားပါ။ အဂျေး၊ အရှေးခန်နာနဲ့ Urmila Matondkar တို့ ပါဝင်သရုပ်ဆောင်ထားပါတယ်။

သမိုင်းဆရာတစ်ယောက်ဟာ အိမ်ထောင်ကွဲပြီးနောက် ဘဝကို ခက်ခက်ခဲခဲ ဖြတ်သန်းနေရပါတယ်။ အလုပ်ကို စိတ်မပါပေမယ့် တခြားရွေးစရာလည်း မရှိဘူး။ တခြားလူနဲ့ရှိနေပြီဖြစ်တဲ့ ဇနီးဟောင်းကို ပြန်လွမ်းမိတဲ့ညတွေ ရှိသလို သူချစ်တဲ့ သမီးလေးကိုလည်း အုပ်ထိန်းခွင့် မရထားပါဘူး။ ကမ္ဘာ့ကပ်ရောဂါကြောင့် ကျောင်းတွေ၊ အလုပ်တွေ ပိတ်ပြီး နေရာအနှံ့ ခြောက်ကပ်နေချိန်မှာ ကျောင်းသားတစ်စုကလည်း အိမ်မှာနေရတာ ပျင်းနေကြတယ်။ သူတို့က Zoom မှာ တွေ့ဆုံရင်း သမိုင်းဆရာအကြောင်း အတင်းပြောပြီး အပျင်းဖြေနေကြပါတယ်။ အဲဒီကနေ အတူပျော်စရာတစ်ခု လုပ်ဖို့ စိတ်ကူးရသွားကြပေမယ့် သူတို့ရဲ့ အပျော်က အပျက်ဘက်ကို ဦးတည်သွားပါတော့တယ်။ ၂၀၂၂ ခုနှစ်ထွက် ထိတ်လန့်သည်းဖိုဇာတ်ကားဖြစ်ပြီး ကိုယ့်အမြင်မှာ တရားမျှတတယ်လို့ ယူဆတဲ့အရာက တခြားသူတွေအတွက် အဲဒီလိုမဟုတ်နိုင်တဲ့အကြောင်းကို ထည့်သွင်းထားပါတယ်။

ဗာတီမောမြို့က ဂျက်မော်ရစ်စင်ဟာ မီးသတ်သမားတစ်ယောက်ပါ။ သူ့ဘဝကို အခြေခံထားတဲ့ ဒီဇာတ်ကားမှာ မီးသတ်သမားတွေရဲ့ နေထိုင်မှု၊ လူမှုရေးပြဿနာတွေနဲ့ အသက်စွန့်ကယ်တင်ရတဲ့ အလုပ်အကြောင်းကို ရိုက်ပြထားပါတယ်။ ကိုယ့်အသက်ကို စွန့်စားပြီး သူတစ်ပါးကို ကယ်တင်ပေးကြပေမယ့် အသိအမှတ်ပြုမှု နည်းပါးတတ်တဲ့ မီးသတ်သမားတွေအပေါ် အာရုံစိုက်ထားတာပါ။ Joaquin Phoenix ပါဝင်သရုပ်ဆောင်ထားတဲ့ ၂၀၀၄ ခုနှစ် ရုပ်ရှင်ဖြစ်ပြီး အက်ရှင်၊ ဒရမ်မာနဲ့ သည်းထိတ်ရင်ဖို အမျိုးအစားတွေ ပါဝင်ပါတယ်။ ဝင်ငွေပိုင်းမှာလည်း အောင်မြင်ခဲ့ပြီး ကမ္ဘာတစ်ဝန်းမှာ သန်းတစ်ရာကျော် ပြန်လည်ရရှိခဲ့ပါတယ်။

ဟီဆုက ဘူဆန်မြို့၊ ခူအန်းမြို့နယ် ကမ်းခြေဘေးမှာရှိတဲ့ မန်လီဂျန်းဟိုတယ်မှာ မန်နေဂျာလုပ်လာတာ နှစ်ပေါင်းမနည်းတော့ပါဘူး။ ဟိုတယ်ပိုင်ရှင် သူဌေးဆွန်းကလည်း သူ့ကို ယုံကြည်ပြီး ကိစ္စတစ်ခုခုရှိတိုင်း အကြံဉာဏ်ပေးတတ်ပါတယ်။ တစ်နေ့မှာတော့ လူသတ်မှုကျူးလွန်ပြီး ထွက်ပြေးသွားတဲ့ ယုံးဂန်း ပြန်ရောက်လာပြီး သောင်းကျန်းတော့တယ်။ ဒီကိစ္စနဲ့ ဟီဆု ခေါင်းစားနေရတုန်းမှာပဲ သူဌေးဆွန်းနဲ့ တခြားသူဌေးတစ်ဦးတို့ရဲ့ လူမိုက်ဂိုဏ်းရန်ပွဲကြား သူကိုယ်တိုင် ညပ်နေမှန်း သိလာရပါတယ်။ လူမိုက်ဂိုဏ်းတွေကြားက ရန်ပွဲတွေနဲ့ စီးပွားရေးဈေးကွက် အပြိုင်လုကြတဲ့အကြောင်းကို ဒရမ်မာနဲ့ ရောစပ်ရိုက်ကူးထားတဲ့ ကိုရီးယားအက်ရှင်ဇာတ်ကားပါ။

အော်လန်ဒိုက ဟက်ကာအဖြစ် ကျွမ်းကျင်တဲ့ IT သမားတစ်ယောက်ပါ။ အလုပ်တွေ အရမ်းများလို့ မိသားစုကို အချိန်မပေးနိုင်ဘဲ ဖြစ်နေတယ်။ တစ်နေ့ သူတို့မြို့မှာ ပေါက်ကွဲမှုတစ်ခု ဖြစ်သွားရာက ပြဿနာတွေ စရှုပ်လာပြီး သူအလုပ်လုပ်နေတဲ့ ကုမ္ပဏီကလည်း တစ်မြို့လုံးအတွက် အချက်အချာနေရာ ဖြစ်လာပါတယ်။ ဒီပြဿနာတွေနဲ့ အော်လန်ဒို ဘယ်လိုပတ်သက်နေတာလဲ၊ IT သမားတစ်ယောက်အနေနဲ့ ဘယ်လိုဖြေရှင်းနိုင်မလဲဆိုတာကို ဆက်ကြည့်ရမှာပါ။ ၂၀၂၂ ခုနှစ်ထွက် အက်ရှင်ရုပ်ရှင်ဖြစ်ပြီး Mad Max မင်းသား Mel Gibson လည်း ပါဝင်ထားပါတယ်။

Takumi Fujiwara ဟာ ကျောင်းတက်ရင်း အလုပ်နှစ်မျိုး လုပ်နေတဲ့ အထက်တန်းကျောင်းသားလေးပါ။ အခင်ဆုံးသူငယ်ချင်း Itsuki ရဲ့အဖေပိုင် ဓာတ်ဆီဆိုင်မှာ အချိန်ပိုင်းအလုပ်လုပ်သလို သူ့အဖေ Bunta Fujiwara လုပ်တဲ့ တို့ဟူးတွေကိုလည်း Akina တောင်ပေါ်က အပန်းဖြေစခန်းတွေဆီ ပို့ပေးရတယ်။ တို့ဟူးသွားပို့တိုင်း မောင်းရတဲ့ကားက အဖေ့ရဲ့ Toyota AE86 လေးပါ။ ကျောင်းမှာတော့ သူချစ်ရတဲ့ အတန်းဖော် Natsumi နဲ့ အချစ်ရေးလည်း ရှိနေပါတယ်။ တစ်ဖက်မှာ နာမည်ကြီးပြိုင်ကားသမား ဖြစ်ချင်ကြသူတွေက တစ်ယောက်နဲ့တစ်ယောက် စိန်ခေါ်ပြီး နေရာအနှံ့ ယှဉ်ပြိုင်နေကြတယ်။ အဲဒီလိုနဲ့ ပရော်ဖက်ရှင်နယ်ပြိုင်ကားသမား Ryosuke နဲ့ NightKids Racing Team က Takeshi တို့ဟာ Akina တောင်ခြေက Takumi တို့မြို့ကို ရောက်လာကြပါတယ်။ Takumi ရဲ့ငယ်သူငယ်ချင်း Itsuki ကတော့ ကိုယ့်ကိုယ်ကိုယ် Akina တောင်ရဲ့ ကားပြိုင်ဘုရင်လို့ ကြွေးကြော်နေသူပါ။ Takeshi က လာစိန်ခေါ်တော့ Itsuki တစ်ယောက် ရှုံးသွားတယ်။ ဒါပေမဲ့ Itsuki ကို အနိုင်ယူခဲ့တဲ့ Takeshi ရဲ့ GTR ဟာ Takumi အဖေပိုင် AE86 လေးကို ပြန်ရှုံးသွားပါတယ်။ ဒီသတင်း ပျံ့သွားတဲ့နောက် AE86 နဲ့ ယှဉ်ပြိုင်ချင်တဲ့ တခြားပရော်ဖက်ရှင်နယ်ပြိုင်ကားသမားတွေပါ မြို့ဆီ ရောက်လာကြတော့တယ်။ Initial D အန်နီမေးစီးရီးကို ရုပ်ရှင်အဖြစ် ပြန်ဖန်တီးထားတဲ့ ၂၀၀၅ ခုနှစ်ထွက် ကားဖြစ်ပြီး ထိုင်ဝမ်အဆိုတော်သရုပ်ဆောင် Jay Chou နဲ့အတူ Anthony Wong၊ Edison Chen တို့ ပါဝင်

Russell Crowe၊ Kevin Spacey နဲ့ Guy Pearce တို့က စုံထောက်ရဲအရာရှိသုံးယောက်အဖြစ် ပါဝင်ထားပါတယ်။ ဇာတ်လမ်းအစမှာ သူတို့တစ်ယောက်ချင်းစီရဲ့ ခံယူချက်နဲ့ အလုပ်အပေါ်ထားတဲ့ သဘောထားကို တဖြည်းဖြည်း မိတ်ဆက်ပေးထားတယ်။ အဲဒီနောက် ဆိုင်တစ်ဆိုင်ထဲမှာ လူအများအပြား ရက်ရက်စက်စက် ပစ်သတ်ခံရတဲ့အမှုက သူတို့သုံးယောက်ဆီ ရောက်လာပါတယ်။ သေဆုံးသူတွေထဲမှာ ရဲစုံထောက်တစ်ယောက်လည်း ပါနေတယ်။ အမှုကို လိုက်ကြတဲ့ ရဲအရာရှိသုံးယောက်ရဲ့ အမြင်တွေကနေ ဖြစ်ပျက်သမျှကို သိလာရပြီး ဘယ်သူက သတ်ခဲ့တာလဲဆိုတာ လိုက်အဖြေရှာရမှာပါ။ အရေးပါတဲ့အကြောင်းအရာတွေနဲ့ ဇာတ်ကောင်တွေရဲ့အမည်တွေကို စကားပြောခန်းတွေထဲမှာ ထည့်ပြောထားတာကြောင့် နာမည်တွေကို မှတ်ထားရင် အမှုနောက်ကို လိုက်ရတာ ပိုလွယ်ပါလိမ့်မယ်။ မှုခင်း၊ ဒရာမာနဲ့ လျှို့ဝှက်ဆန်းကြယ်အမျိုးအစားဖြစ်ပြီး ဒီကားနဲ့ Kim Basinger ဟာ အော်စကာဇာတ်ပို့ဆု ရရှိခဲ့ပါတယ်။ ဇာတ်ကားကလည်း အကောင်းဆုံးရုပ်ရှင်ဇာတ်ညွှန်းဆု ရထားပါတယ်။

တိုနီဟာ ဆိုင်ကယ်မောင်းပြိုင်ပွဲတွေမှာ အလားအလာရှိပေမယ့် နေ့စဉ်ဘဝအတွက် ပင်ပင်ပန်းပန်း ရုန်းကန်နေရသူပါ။ အချိန်ပိုင်းအလုပ်လုပ်ရင်း ပရော်ဖက်ရှင်နယ် ဆိုင်ကယ်ပြိုင်သမားဖြစ်လာဖို့ လေ့ကျင့်နေချိန်မှာ သူ့အဆက်ဟောင်း လေလာက မူးယစ်ဆေးဝါးရောင်းဝယ်သူတစ်ယောက်ဆီ အကြွေးတင်သွားပါတယ်။ လေလာဟာ သူ့သားရဲ့မိခင်လည်း ဖြစ်နေတယ်။ လေလာက အကြွေးကို ဘယ်လိုမှ ပြန်မဆပ်နိုင်တော့လို့ ဘဝပျက်မယ့်အခြေအနေ မရောက်အောင် တိုနီက ဝင်ကူညီရပါတယ်။ ဒီကနေ မူးယစ်ဆေးဝါးရောင်းဝယ်တဲ့အလုပ်ထဲ သူပါ ပါဝင်ပတ်သက်သွားတယ်။ ဆိုင်ကယ်ပြိုင်သမားဖြစ်ဖို့ ကြိုးစားနေတဲ့ တိုနီရဲ့ဘဝကို ဒီအလုပ်က ဘယ်လိုရိုက်ခတ်လာမလဲဆိုတာ ပြထားတဲ့ ပြင်သစ်-ဘယ်လ်ဂျီယမ် အက်ရှင်၊ မှုခင်း၊ သည်းထိတ်ရင်ဖိုဇာတ်ကားပါ။

ရှေ့နေကန်နာဘီရန်ရဲ့ မိဘတွေက သားဖြစ်သူ လမ်းမှားမလျှောက်ဘူးလို့ အမြဲယုံကြည်ထားကြသူတွေပါ။ သားသဘောကျတဲ့ ကောင်မလေးကို တင်တောင်းလို့မရရင် ခိုးပြေးဖို့တောင် ဝိုင်းမြှောက်ပေးကြလို့ ဒီမိသားစုရဲ့အဖြစ်တွေက အလွဲအချော်တွေနဲ့ ရယ်စရာဖြစ်နေတတ်တယ်။ ဒါပေမယ့် ခိုးပြေးဖို့ စီစဉ်ထားတဲ့နေ့မှာ မထင်မှတ်တဲ့ကိစ္စတစ်ခု ပေါ်လာပါတယ်။ သူနဲ့ ခိုးပြေးမယ့်မိန်းကလေးရဲ့ သူငယ်ချင်း အန္တရာယ်ကြုံနေရတယ်ဆိုတဲ့ သတင်းရလာလို့ ကန်နာဘီရန်က သွားကယ်တင်ပါတယ်။ အဲဒီကနေ သိလာရတဲ့ အမှန်တရားတွေနောက်မှာ တစ်မြို့လုံးက မိန်းကလေးတွေကို အသုံးချပြီး အကျပ်ကိုင်ခြိမ်းခြောက်တဲ့ ကိစ္စအထိ ရောက်လာတယ်။ နောက်ကွယ်က အကျပ်ကိုင်နေသူဟာ သူအလွယ်တကူ ရင်ဆိုင်နိုင်တဲ့လူ မဟုတ်တဲ့အခါ ကန်နာဘီရန် ဘယ်လိုလှည့်ကွက်တွေနဲ့ တုံ့ပြန်မလဲဆိုတာ ဆက်တွေ့ရမှာပါ။

Clay ဟာ ကျန်းမာရေးစောင့်ရှောက်မှုနယ်ပယ်ကို ပြောင်းလဲပေးနိုင်တဲ့ နည်းပညာကို တီထွင်ခဲ့သူပါ။ ဉာဏ်ထက်မြက်တဲ့ နည်းပညာရှင်တစ်ယောက်ဖြစ်ပေမယ့် သူ့မှတ်ဉာဏ်တွေထဲမှာ သူကိုယ်တိုင် ပိတ်မိနေသလို ခံစားရတဲ့ စိတ်ရောဂါတစ်မျိုးကို ခံစားနေရပါတယ်။ သူ့ကို ဒီအခြေအနေရောက်စေခဲ့တာ ဘယ်လိုစိတ်ဒဏ်ရာတွေလဲ၊ ဘယ်သူကြောင့် ဒီလိုဖြစ်ခဲ့ရတာလဲဆိုတာ မေးစရာတွေ ရှိနေတယ်။ Clay နောက်ထပ် ဘာတွေကြုံရဦးမလဲ၊ ကိုယ့်စိတ်ထဲမှာကိုယ် ပိတ်မိနေတဲ့ဘဝကနေ လွတ်မြောက်နိုင်မလားဆိုတာကို ဆက်ပြထားတဲ့ ၂၀၂၂ ခုနှစ်ထွက် သည်းထိတ်ရင်ဖိုဇာတ်ကားပါ။

အသက်အန္တရာယ်ရှိနေတဲ့ သမီးလေးကို ဆေးကုသပေးဖို့ ငွေရှာရမယ့် ဖခင်တစ်ယောက်ရဲ့အကြောင်းပါ။ အောင်မြင်မယ်လို့ ထင်ထားတဲ့ အစီအစဉ်တွေ အကြောင်းအမျိုးမျိုးကြောင့် မအောင်မြင်ဘဲ ဖြစ်နေတဲ့ကြားက သူကတော့ ပြန်ကြိုးစားနေတယ်။ သမီးလေးအတွက် ကုသစရိတ်လိုနေတာကြောင့် လက်လျှော့နေလို့ မရပါဘူး။ သူနဲ့ သူငယ်ချင်းတစ်သိုက်ဟာ သေသေချာချာ အစီအစဉ်ဆွဲပြီး ဘဏ်တစ်ခုကို ဓားပြတိုက်ကြပါတယ်။ ဒီလောက်ပြင်ဆင်ထားတဲ့ ဘဏ်ဓားပြမှု အောင်မြင်ပါ့မလားဆိုတာအပြင် သူနဲ့ ရည်းစားဟောင်းကြားက အခြေအနေကိုလည်း ဆက်တွေ့ရမှာပါ။ သမီးလေး အသက်ရှင်နိုင်မလားဆိုတဲ့ မေးခွန်းလည်း ရှိနေသေးတဲ့ ၂၀၂၂ ခုနှစ်ထွက် အက်ရှင်၊ မှုခင်း၊ သည်းထိတ်ရင်ဖိုဇာတ်ကားဖြစ်ပါတယ်။

ဘတ်ဒီအစ်စရယ်ဆိုတဲ့ ဖျော်ဖြေရေးသမားက မာဖီးယားဂိုဏ်းခေါင်းဆောင်ကို သစ္စာဖောက်မိရာက သူ့နှလုံးကို ရယူပေးနိုင်သူအတွက် ဆုကြေးတစ်မီလီယံ ထုတ်ခံလိုက်ရပါတယ်။ ဆုကြေးလိုချင်တဲ့ ကြေးစားလူသတ်သမားတွေက သူ့နောက်ကို လိုက်လာကြသလို FBI ဘက်ကလည်း သူ့ကို အရှင်ရဖို့ လိုနေတယ်။ မာဖီးယားခေါင်းဆောင်ရဲ့ လျှို့ဝှက်ချက်တွေကို သိရဖို့နဲ့ သက်သေထွက်ဆိုပေးဖို့အတွက် အစ်စရယ်ကို ကာကွယ်ရမယ့်တာဝန်က အေးဂျင့်မက်စ်နာနဲ့ ကော်ရတ်သာတို့ဆီ ရောက်လာပါတယ်။ လူသတ်သမားခုနစ်ယောက်ရဲ့ လက်ကနေ အစ်စရယ်ကို မသေအောင် အေးဂျင့်နှစ်ယောက်က ကြိုးစားကာကွယ်ကြရတယ်။ ဒီကြားထဲ ဆွီဒင်လူမျိုးဆိုတဲ့ ထူးဆန်းတဲ့ဇာတ်ကောင်ကလည်း ဘယ်လိုပတ်သက်နေသလဲဆိုတာ မေးစရာဖြစ်လာပါတယ်။ FBI အတွင်းက အရှုပ်အရှင်းတွေ တဖြည်းဖြည်းပေါ်လာတဲ့အခါ မာဖီးယားတွေနဲ့ ဘယ်လိုဆက်နွယ်နေသလဲ၊ ဘာလျှို့ဝှက်ချက်တွေ ရှိနေသလဲဆိုတာကိုပါ ဖော်ထုတ်ရတော့မှာပါ။ Ryan Reynolds နဲ့ Ben Affleck တို့ ပါဝင်ထားတဲ့ အက်ရှင်၊ မှုခင်းဇာတ်ကားဖြစ်ပါတယ်။