သည်းထိတ်ရင်ဖိုကားများ

နစ်ဝိုင်းလ်ဟာ လပ်စ်ဗီးဂတ်ကနေ ထွက်သွားချင်ပေမယ့် မထွက်နိုင်သေးသူပါ။ ဒေါ်လာငါးသိန်းရရင် ငါးနှစ်လောက် လွတ်လွတ်လပ်လပ် ပျော်ပျော်ရွှင်ရွှင်နေဖို့ ဒီမြို့ကို စွန့်ခွာမယ်လို့ အမြဲပြောနေတတ်တယ်။ ဒါပေမယ့် လောင်းကစားထဲက မရုန်းထွက်နိုင်ဘဲ အလွတ်တမ်းသက်တော်စောင့် လုပ်လိုက်၊ လောင်းကစားလုပ်လိုက်နဲ့ ငွေကြေးမပြေလည်တဲ့ဘဝကို ဖြတ်သန်းနေရပါတယ်။ သူက အထူးအေးဂျင့်ဟောင်းတစ်ယောက်ဖြစ်ပြီး တိုက်ခိုက်ရေးမှာတော့ ကျွမ်းကျင်သူပါ။ တစ်နေ့မှာ သူ့သူငယ်ချင်း ဟော်လီဟာ ဂန်းစတားတစ်ယောက်ရဲ့ မုဒိမ်းကျင့်မှုနဲ့ ရိုက်နှက်နှိပ်စက်မှုကို ခံလိုက်ရတယ်။ ဟော်လီက လက်စားချေဖို့ နစ်ဆီ အကူအညီတောင်းလာပါတယ်။ Jason Statham သရုပ်ဆောင်ထားတဲ့ ဒီအက်ရှင်ကားမှာ နစ်တစ်ယောက် အဲဒီအကူအညီတောင်းခံမှုကို ဘယ်လိုတုံ့ပြန်မလဲဆိုတာ ဆက်ပြထားပါတယ်။

ခရစ်ဟာ မူးယစ်ဆေးနဲ့ ပိုက်ဆံအတုတွေ မှောင်ခိုကူးတဲ့လောကမှာ နာမည်ရှိခဲ့သူတစ်ယောက်ပါ။ ဒါပေမယ့် ဖခင် ထောင်ကျပြီး သူကိုယ်တိုင်လည်း သားနှစ်ယောက်ရလာချိန်မှာတော့ အဲဒီအလုပ်ကို အပြီးတိုင် စွန့်လိုက်တယ်။ လုံခြုံရေးအချက်ပေးစနစ်တွေ တပ်ဆင်တဲ့လုပ်ငန်းနဲ့ အသက်မွေးပြီး မိသားစုဘဝကို တည်ဆောက်ထားပါတယ်။ မှောင်ခိုလောကနဲ့ မပတ်သက်တော့ဘူးလို့ ထင်ထားပေမယ့် ယောက်ဖ အန်ဒီရဲ့ အလွဲတွေကြောင့် ခရစ်တစ်ယောက် အဲဒီလောကထဲ ပြန်ဝင်ရဖို့ ဖြစ်လာတယ်။ ဒီတစ်ကြိမ်မှာတော့ သူ့မိသားစုပါ အန္တရာယ်ရှိလာတာကြောင့် ခရစ် ဘယ်လိုနည်းလမ်းရှာပြီး ဖြေရှင်းမလဲဆိုတာ ဆက်ကြည့်ရမှာပါ။

နာမည်ကျော်ပုဂ္ဂိုလ်တွေရဲ့ ကိုယ်တွေ့မှတ်တမ်းတွေကို သူတို့ကိုယ်စား ရေးပေးနေတဲ့ ဂို့စ်ဆီ ငွေကြေးအများကြီးရမယ့် အလုပ်တစ်ခု ရောက်လာပါတယ်။ ဗြိတိန်ဝန်ကြီးချုပ်ဟောင်း အဒမ်လန်းရဲ့ ကိုယ်တွေ့မှတ်တမ်းကို ရေးပေးဖို့ပါ။ အရင်ရေးပေးနေတဲ့ မိုက်ခ်ဆိုသူ ရေနစ်သေဆုံးသွားလို့ သူ့နေရာမှာ ဂို့စ်ကို ငှားလိုက်တာဖြစ်ပါတယ်။ နိုင်ငံရေးအကြောင်း သိပ်မသိပေမယ့် ရမယ့်ငွေကြောင့် ဗြိတိန်သား ဂို့စ်က အမေရိကန်အထိ သွားပြီး အလုပ်လုပ်ဖို့ ပြင်ဆင်လိုက်တယ်။ သူ အလုပ်စတော့မယ့်အချိန်မှာပဲ အဒမ်လန်းနဲ့ပတ်သက်တဲ့ ကောလာဟလတွေ ထွက်လာပါတယ်။ အဒမ်လန်းဟာ စီအိုင်အေနဲ့ ပူးပေါင်းပြီး ပြည်သူတချို့ကို အကြမ်းဖက်သမားတွေလို့ စွပ်စွဲကာ ညှဉ်းပန်းနှိပ်စက်ခဲ့တယ်ဆိုတဲ့ သတင်းတွေပါ။ ကိုယ်တွေ့မှတ်တမ်း ရေးပေးဖို့ ရောက်လာတဲ့ ဂို့စ်ဟာ ဒီအကြောင်းတွေကြားမှာ အလုပ်ကို ဆက်လုပ်ရမလား၊ နောက်ဆုတ်ရမလား ဝေခွဲမရ ဖြစ်လာပါတယ်။

အာဘူဂျာဆိုတဲ့ ဘိုးတော်ဟာ ဘာသာရေးကို အကြောင်းပြပြီး လူတွေကို လှည့်စားအုပ်ချုပ်နေသူတစ်ယောက်ပါ။ သူ့ဂိုဏ်းထဲ မဝင်သူ၊ သူ့ဆုံးမစကားနဲ့ လမ်းစဉ်ကို မလိုက်နာသူဆိုရင် တပည့်တွေနဲ့ နှိပ်စက်ခိုင်းတယ်။ အဲဒီလိုဖိနှိပ်ရုံတင်မကဘဲ အောက်လမ်းပညာနဲ့လည်း တိုက်ခိုက်တတ်ပါသေးတယ်။ တစ်နေ့မှာတော့ အာဘူဂျာနဲ့ သမာသမတ်ရှိတဲ့ တရားပြဆရာ အဒမ်တို့ ထိပ်တိုက်တွေ့ဖို့ အကြောင်းဖန်လာပါတယ်။ အဒမ်နဲ့ အာဘူဂျာတို့ရဲ့ ရင်ဆိုင်မှုကို ဘာသာရေးနောက်ခံ၊ အောက်လမ်းပညာနဲ့ သရဲခြောက်လှန့်မှုတွေနဲ့ တွဲဖော်ပြထားတဲ့ မလေးရှားသရဲကားပါ။ ပထမ Munafik ကို ၂၀၁၆ ခုနှစ်မှာ ရိုက်ကူးခဲ့ပြီး ဒီကားက ဒုတိယကားဖြစ်ပါတယ်။

ပိုပွိုင်းဟာ နာမည်ကြီးလောင်းကစားဝိုင်းတစ်ခုမှာ သက်တော်စောင့်လုပ်ပါတယ်။ အိမ်ထောင်ကျပြီးပေမဲ့ မိဘတွေနဲ့အတူနေပြီး သားတစ်ယောက်အနေနဲ့ တာဝန်ကျေချင်သူပါ။ တစ်ဖက်မှာတော့ တွေ့ရာလူနဲ့ ဖောက်ပြန်တတ်တဲ့ အရှုပ်အရှင်းများသူလည်း ဖြစ်နေတယ်။ တစ်နေ့ လောင်းကစားဝိုင်းမှာ ဖဲလိမ်ရိုက်တဲ့ပြဿနာတက်ရာက သူတို့အဖွဲ့ လူတစ်ယောက်ကို သတ်မိသွားပါတယ်။ သေသွားသူက ဩဇာကြီးသူတစ်ယောက်ရဲ့သားဖြစ်နေတာ သိလိုက်ရတော့ ပြဿနာက ပိုကြီးလာတယ်။ ငွေပေးပြီး ဖြေရှင်းနိုင်ဖို့ အရာရှိတစ်ယောက်ဆီ အကူအညီတောင်းတဲ့အခါ ဆယ်သန်းတောင်းပါတယ်။ ညှိနှိုင်းပြီး ငါးသန်းနဲ့ သဘောတူလိုက်ကြပေမဲ့ ငွေရှာဖို့ အချိန်က သိပ်မရဘူး။ လိုအပ်တဲ့ငွေကို ရတဲ့နည်းနဲ့ ရှာဖို့ ကြိုးစားကြရင်း အဖွဲ့ထဲမှာလည်း စည်းလုံးမှု ပျက်လာတယ်။ တစ်ချိန်တည်းမှာ သူတို့ရဲ့ မိသားစုပြဿနာတွေကပါ တဖြည်းဖြည်း ကြီးထွားလာပါတယ်။ Vince Rillon၊ Angeli Khang နဲ့ Jela Cuenca တို့ ပါဝင်ထားတဲ့ ဖိလစ်ပိုင်ဇာတ်ကားဖြစ်ပြီး လောင်းကစား၊ အက်ရှင်နဲ့ လိင်ပိုင်းဆိုင်ရာပြကွက်တွေ ပါဝင်ပါတယ်။ BDSM အပါအဝင် အရွယ်ရောက်သူတွေအတွက် ပြကွက်တွေ ပါတာကြောင့် အသက် ၁၈ နှစ်မပြည့်သူတွေအတွက် မသင့်တော်ပါဘူး။

ဝေလ်နဲ့ လီဆာစပန်းတို့ ဇနီးမောင်နှံဟာ အိမ်ထောင်ရေးအဆင်မပြေ ဖြစ်နေကြပါတယ်။ လီဆာက ခဏခွဲနေချင်တယ်လို့ တောင်းဆိုလာတော့ ဝေလ်က မခွဲချင်ပေမဲ့ တခြားမြို့မှာရှိတဲ့ သူ့မိဘအိမ်ဆီ လိုက်ပို့ဖို့ ထွက်လာခဲ့တယ်။ လမ်းမှာ လောင်စာဆီဝင်ဖြည့်နေတုန်း လီဆာ ရုတ်တရက် ပျောက်သွားပါတယ်။ ဝေလ်လည်း အပူတပြင်းရှာပေမဲ့ မတွေ့တဲ့အဆုံး ရဲကို အကြောင်းကြားလိုက်ရတယ်။ လီဆာ မပျောက်ခင် နောက်ဆုံးစကားပြောခဲ့သူက အထက်တန်းကျောင်းနေဘက် နက်ကယ်စ်ဖြစ်နေတယ်ဆိုတဲ့ သဲလွန်စတစ်ခု ရလာပါတယ်။ လီဆာမှာ အရင်က ဖောက်ပြန်ခဲ့ဖူးတာကြောင့် ခင်ပွန်းရဲ့ လက်တုံ့ပြန်မှုကို ခံလိုက်ရတာလား၊ ဒါမှမဟုတ် နောက်တစ်ကြိမ် သစ္စာဖောက်ပြီး ထွက်သွားတာလားဆိုတာ ရဲတွေကလည်း ဝေခွဲမရကြဘူး။ ဝေလ်ကတော့ သူမလုပ်ခဲ့ဘူးလို့ အကြိမ်ကြိမ် ငြင်းနေပါတယ်။ သူ့ဇနီးကို အသက်ရှင်လျက် ပြန်တွေ့နိုင်မလား၊ လီဆာပျောက်ဆုံးမှုရဲ့ နောက်ကွယ်မှာ ဘာတွေရှိနေလဲဆိုတာကို လိုက်ရှာရမယ့် Gerard Butler ပါဝင်သရုပ်ဆောင်ထားတဲ့ ဇာတ်ကားပါ။

ပိုးဟပ်ကိုကြောက်တာ၊ အမှောင်ကိုကြောက်တာ၊ လူတွေနဲ့ ပြောဆိုဆက်ဆံရမှာ ကြောက်တာလို လူတိုင်းမှာ အကြောက်တရား ကိုယ်စီရှိကြပါတယ်။ တချို့အတွက် သာမန်ကြောက်ရွံ့မှုလောက်ပဲ ဖြစ်ပေမဲ့ တချို့ကတော့ အလွန်အမင်း စိတ်ချောက်ချားထိတ်လန့်ကြတယ်။ အဲဒီလို ထိတ်လန့်မှုတွေရဲ့ နောက်ကွယ်မှာ ဘယ်လိုစိတ်ဒဏ်ရာနဲ့ အကြောင်းရင်းတွေရှိသလဲဆိုတာကို ကျောင်းသားသုံးယောက်က ကျောင်းသုတေသနစာတမ်းအတွက် လေ့လာဖို့ စီစဉ်ကြပါတယ်။ သူတို့သုံးယောက်မှာလည်း စိတ်ဒဏ်ရာကိုယ်စီ ရှိနေကြတယ်။ တခြားသူတွေရဲ့ အကြောက်တရား၊ ထိတ်လန့်မှုနဲ့ ကြုံခဲ့ရတဲ့အတွေ့အကြုံတွေကို မေးမြန်းပြီး ဗီဒီယိုရိုက်ကူးကြပါတယ်။ ဒါပေမဲ့ သူတို့ထဲကတစ်ယောက်က ကိုယ့်အကြောက်တရားကို ကျော်လွှားဖို့ တခြားသူတွေရဲ့ ထိတ်လန့်မှုကို အလွဲသုံးစားလုပ်လာတော့တယ်။ အခုတ်အထစ်နဲ့ အကြမ်းဖက်ပြကွက်တွေ ပါဝင်တဲ့ ထိတ်လန့်သည်းဖိုဇာတ်ကားပါ။

မြို့လေးတစ်မြို့နားက စိမ့်တောကြီးထဲမှာ မိသားစုအနည်းငယ် နေထိုင်ကြပါတယ်။ နောက်တော့ အဲဒီမိသားစုတွေ တစ်စတစ်စ ပြောင်းရွှေ့သွားကြပြီး ကောင်မလေးတစ်ယောက်နဲ့ သူ့အဖေပဲ ကျန်ခဲ့တယ်။ ကောင်မလေးက မြို့ပေါ်ကျောင်းမှာ တက်ကြည့်ပေမယ့် တခြားကလေးတွေက စိမ့်တောထဲနေသူဆိုပြီး နှိမ်ကြလို့ ကျောင်းကနေ ထွက်ပြေးလာခဲ့ပါတယ်။ စာရေးစာဖတ်လည်း မတတ်ခဲ့ဘူး။ နောက်ဆုံး အဖေပါ ထွက်သွားတဲ့အခါ သူတစ်ယောက်တည်း ယောက်သွားတွေ တူးရောင်းပြီး အသက်မွေးခဲ့ရတယ်။ ဆင်းရဲနွမ်းပါးတဲ့ သူ့ကို မြို့ကလူတွေကလည်း အကောင်းမမြင်ကြပါဘူး။ ကောင်မလေး အရွယ်ရောက်လာချိန်မှာ စိမ့်တောထဲက မျှော်စင်တစ်ခုမှာ လူတစ်ယောက် သေဆုံးနေတာကို တွေ့ရပြီး ရဲတွေ စုံစမ်းကြပါတယ်။ မြို့ကလူတွေကတော့ သူ့ကိုပဲ တရားခံလို့ စွပ်စွဲကြတယ်။ သေဆုံးသူနဲ့ သူက ပတ်သက်ဖူးသလို တခြားအချက်အလက်တချို့လည်း ရှိနေတဲ့အတွက် ရဲတွေက သူ့ကို ဖမ်းဆီးလိုက်ပါတယ်။ တစ်မြို့လုံးမှာ သူ့အပေါ် ကောင်းပေးတဲ့သူ လေးယောက်ပဲရှိပြီး အဲဒီထဲက အဘိုးကြီးတစ်ယောက်က သူ့အတွက် ရှေ့နေလိုက်ပေးတယ်။ ဇာတ်လမ်းကို လက်ရှိအမှုစစ်ဆေးနေတာနဲ့ ကောင်မလေးရဲ့ အတိတ်ဘဝကို အလှည့်ကျ ပြသတဲ့ပုံစံနဲ့ ဆက်ထားပါတယ်။ အဖေနဲ့ပတ်သက်တဲ့ အခန်းတွေမှာလည်း ပြဿနာတွေ မပြတ်ဖြစ်နေတဲ့ မိသားစုဘဝကို တွေ့ရမှာပါ။ အမှုရဲ့ အဖြေကို ရှာရင်း ကောင်မလေး ဖြတ်သန်းခဲ့ရတဲ့ အခက်အခဲတွေကိုပါ သိလာရပြီး နိမိတ်ပုံဆန်တဲ့ နောက်ခံပြောစကားတွေထဲမှာလည်း အဖြစ်အပျက်တချို့ကို နားလည်စေမယ့် အကြောင်း

ကလစ်ဖ်နဲ့ ဆစ်ဒနီတို့ ကြင်စဦးဇနီးမောင်နှံက ဟာဝိုင်အီကို ဟန်းနီးမွန်းခရီး ထွက်လာကြပါတယ်။ တောလမ်းတွေ လျှောက်မယ်၊ တောင်တက်မယ်၊ ကမ်းခြေတွေကို သွားမယ်ဆိုပြီး ဟာဝိုင်အီက ကျွန်းတွေအားလုံးကို လှည့်လည်ဖို့ စီစဉ်ထားကြတာပါ။ ဒါပေမယ့် နောက်ထပ်ကျွန်းတစ်ကျွန်းကို ရောက်တဲ့အခါ အဲဒီမှာ လူသတ်မှုတွေ ဖြစ်နေကြောင်း သိလိုက်ရတယ်။ ပျော်ပျော်ရွှင်ရွှင် ဖြတ်သန်းဖို့ မျှော်လင့်ထားတဲ့ ဟန်းနီးမွန်းခရီးမှာ ဒုက္ခအမျိုးမျိုးနဲ့ ကြုံလာကြတဲ့ ဒီလင်မယား ဘယ်လိုဖြေရှင်းကြမလဲဆိုတာ ဆက်ကြည့်ရမှာပါ။

ဂျင်မ်ဟော်လီစ်ဟာ ချီကာဂိုကနေ ဆန်ဒရေဂိုကို ကားတစ်စီးပို့ပေးဖို့ မောင်းလာရင်း လမ်းမှာ ကားတားစီးတဲ့ ဂျွန်ရိုင်ဒါကို တင်ခေါ်လာခဲ့ပါတယ်။ ဒါပေမယ့် သူကူညီလိုက်တဲ့သူက ကိုယ့်ကိုယ်ကိုယ် လူသတ်သမားလို့ ပြောလာပြီး ဂျင်မ်ကိုပါ သတ်ဖို့ ကြိုးစားပါတော့တယ်။ ရိုင်ဒါ့လက်ကနေ ကပ်သီးလေးလွတ်လာတဲ့ ဂျင်မ်ဟာ ဒီလူနဲ့ ဘယ်တော့မှ ထပ်မတွေ့ရဖို့ပဲ မျှော်လင့်ခဲ့တယ်။ ဒါပေမယ့် ရိုင်ဒါက မိသားစုတစ်စုကို သတ်ပစ်ခဲ့တာ တွေ့လိုက်ရတဲ့နောက်မှာတော့ ယာဉ်ရပ်နားစခန်းက စားသောက်ဆိုင်မှာ အလုပ်လုပ်တဲ့ စားပွဲထိုးမလေး နက်ရှ်ရဲ့ အကူအညီနဲ့ သူ့ကိုဖမ်းဖို့ လိုက်ကြိုးစားကြပါတယ်။ အဲဒီနောက်မှာ ကားတွေနဲ့ အပြင်းအထန်လိုက်လံမှုတွေ၊ ရက်စက်တဲ့ လူသတ်မှုတွေကြား ဂျင်မ်နဲ့ ရိုင်ဒါတို့ ထပ်ပြီး ရင်ဆိုင်ကြရပါတော့တယ်။

အရာရှိကြီး ဟယ်ရီရှန်နွန်ရဲ့သားဟာ မာဖီးယားဂိုဏ်းတစ်ခုနဲ့ ပတ်သက်တဲ့အမှုမှာ မျက်မြင်သက်သေကို ကာကွယ်ပေးရင်း သေဆုံးသွားခဲ့ပါတယ်။ သားအတွက် လက်စားခြေချင်နေတဲ့ ဟယ်ရီနဲ့ လက်တွဲမိလာသူကတော့ အာနိုး သရုပ်ဆောင်ထားတဲ့ နယ်ထိန်း ကာမင်စကီပါ။ ကာမင်စကီဟာ ကလေးသူငယ်မုဒိမ်းမှုက တရားခံကို ကြမ်းကြမ်းတမ်းတမ်း ဖမ်းဆီးခဲ့လို့ ရာထူးချခံထားရသူဖြစ်ပါတယ်။ နယ်မြို့လေးတစ်မြို့မှာ အရက်စွဲနေတဲ့ ဇနီးနဲ့အတူ နေထိုင်ရင်း စိတ်ဓာတ်ကျနေတဲ့သူ့အတွက် ဟယ်ရီနဲ့ ပူးပေါင်းမှုက ချီကာဂိုမြို့ရဲ့ အကြီးဆုံးမာဖီးယားဂိုဏ်းကို ရင်ဆိုင်ရမယ့် အလုပ်ဖြစ်လာတယ်။ အရာရှိတွေကိုတောင် သူတို့ဘက်ပါအောင် လုပ်ထားနိုင်တဲ့ ဒီဂိုဏ်းကို အတွင်းကနေ ဖျက်ဆီးဖို့ သူလျှိုအဖြစ် ဝင်ရောက်ကြိုးစားကြပုံကို ရိုက်ထားတဲ့ ၁၉၈၀ ပြည့်နှစ်များက အက်ရှင်ဇာတ်ကားပါ။

ကာသစ်ဟာ အစိုးရစီမံကိန်းငယ်တွေမှာ ရင်းနှီးမြှုပ်နှံလေ့ရှိတဲ့ ကန်ထရိုက်တာတစ်ယောက်ပါ။ သူ့မှာ လည်လည်ဝယ်ဝယ်ရှိတဲ့ သမီးလေး ကန်မနီနဲ့ သူ့ကို နားလည်အားပေးတဲ့ ဇနီး ကန်နာမာတို့ ရှိပါတယ်။ ငွေရေးကြေးရေးအခက်အခဲတွေ ဝိုင်းနေချိန်မှာ ဇနီးရဲ့အားပေးမှုကြောင့် စိတ်သက်သာရာရခဲ့သလို ချေးထားတဲ့ငွေတွေ ပြန်ရလာတဲ့အခါ အခြေအနေ ပြေလည်လာခဲ့တယ်။ အဲဒီနောက် မိသားစုအတွက် စိတ်ကူးထားတဲ့အိမ်ကို ဝယ်ဖို့ မက်ဒူရိုင်းကနေ ကိုဒိုင်ကန်နယ်ဆီ သွားကြည့်ကြပါတယ်။ သူတို့ကြည့်မယ့်အိမ်ကြီးက သရဲခြောက်တယ်လို့ နာမည်ကြီးပြီး ပွဲစားတွေတောင် အနားမကပ်ရဲတဲ့အိမ်ပါ။ ဒါပေမယ့် ပွဲစားတစ်ယောက်ရဲ့ လှည့်ဖြားရောင်းချမှုကြောင့် ကာသစ်တို့မိသားစု အဲဒီအိမ်ဆီ ရောက်လာခဲ့ကြတယ်။ အိမ်ကိုရောက်ချိန်မှာ သမီးလေး ကန်မနီ မကြာခဏ ပျောက်ပျောက်သွားတာကစပြီး ထူးဆန်းတဲ့ သဘာဝလွန်ဖြစ်ရပ်တွေ ဆက်တိုက်ကြုံလာရပါတယ်။ လူတွေပြောနေသလို ဒီအိမ်က တကယ်ပဲ သရဲခြောက်နေတာလား၊ အရင်ပိုင်ရှင်တွေက ဘယ်သူတွေလဲ၊ ဒီအိမ်မှာ ဘယ်လိုအတိတ်တွေ ရှိခဲ့တာလဲဆိုတဲ့ မေးခွန်းတွေ ပေါ်လာပါတော့တယ်။

ရောဘတ် ပတ်တီဆန် ပါဝင်သရုပ်ဆောင်ထားတဲ့ The Batman က စုံထောက်ဇာတ်လမ်းပုံစံနဲ့ ပဟေဠိတွေကို အခြေခံထားပါတယ်။ အဓိကဗီလိန်က ရစ်ဒလာဖြစ်ပြီး Catwoman ကိုလည်း ဒီဇာတ်ကားမှာ မိတ်ဆက်ထားတယ်။ မှုခင်းနဲ့ ပဟေဠိတွေကြားမှာ အက်ရှင်နဲ့ ဒရာမာကို တွဲဖက်ထားတဲ့ ဇာတ်လမ်းပါ။

DOA လို့ခေါ်တဲ့ ကိုယ်ခံပညာပြိုင်ပွဲတစ်ခုက ကမ္ဘာတစ်ဝန်းက အတော်ဆုံး ကိုယ်ခံပညာရှင်တွေကို ဖိတ်ခေါ်လိုက်ပါတယ်။ ပြိုင်ပွဲကို စိတ်ဝင်စားကြတဲ့ တိုက်ခိုက်ရေးသမားတွေ အသီးသီး လာရောက်ယှဉ်ပြိုင်ကြပေမယ့် အဲဒီပြိုင်ပွဲထဲမှာ မူမမှန်တာတွေ ရှိနေတယ်။ လာပြိုင်တဲ့ အမျိုးသမီးတိုက်ခိုက်ရေးသမား လေးယောက်က ဒီမူမမှန်မှုတွေကို သတိထားမိပြီး ဖော်ထုတ်လာကြတဲ့အခါ ဘာတွေဆက်ဖြစ်မလဲဆိုတာကို ပြထားပါတယ်။ ၂၀၀၆ ခုနှစ်ထွက် ဒီဇာတ်ကားမှာ အမျိုးသမီးတွေရဲ့ တိုက်ခိုက်ရေးခန်းတွေကို အသားပေးထားပြီး ရဲတွေဝင်ဖမ်းချိန် အဝတ်အစားဝတ်နေရင်း လျှပ်တပြက်ပြန်တိုက်ခိုက်တဲ့ အခန်းမျိုးလည်း ပါဝင်ပါတယ်။

ဂျက်ဟာ ရှေ့တန်းမှာ ပစ္စတိုနဲ့ အနီးကပ်ပစ်ခတ်ခံခဲ့ရတဲ့ စစ်သားတစ်ယောက်ပါ။ အသက်မသေခဲ့ပေမယ့် ဒဏ်ရာရဲ့နောက်ဆက်တွဲအဖြစ် သတိမေ့တတ်လာပြီး အာရုံကြောဝေဒနာပါ ခံစားရတာကြောင့် ပင်စင်ပေးခံလိုက်ရတယ်။ ကျောပိုးအိတ်တစ်လုံးလွယ်ပြီး လမ်းမကြီးအတိုင်း လမ်းလျှောက်ပြန်လာခဲ့တဲ့ သူ့အတွက် နောက်တစ်ကြိမ် သတိရလာချိန်မှာတော့ အခြေအနေက လုံးဝပြောင်းနေပါပြီ။ ဂျက်ဟာ ရဲအရာရှိတစ်ယောက်ကို သတ်မှုနဲ့ တရားရုံးမှာ ရင်ဆိုင်နေရတယ်။ တရားသူကြီးက စစ်မေးပေမယ့် ဖြစ်ခဲ့သမျှကို ဘာမှမမှတ်မိတဲ့အတွက် သူဖြေနိုင်တာက မသိပါဘူးဆိုတာပဲ။ စိတ်ကူးယဉ်၊ ဒရာမာနဲ့ လျှို့ဝှက်ဆန်းကြယ်မှုတွေ ရောစပ်ထားတဲ့ ဒီဇာတ်ကားမှာ Adrian Brody၊ Keira Knightly နဲ့ Daniel Craig တို့ ပါဝင်သရုပ်ဆောင်ထားပါတယ်။

အမေရိကန်မှာရှိတဲ့ နျူကလီးယားဒုံးကျည်တွေကို ခိုးယူပြီး နိုင်ငံတစ်ဝက်လောက်ကို ဖျက်ဆီးဖို့ ရည်ရွယ်ထားတဲ့ လူတစ်စုဟာ ဗိုလ်ကြီးကောလင်းစ် တာဝန်ကျရာ စခန်းကို ဝင်စီးကြပါတယ်။ ဒီစခန်းက သာမန်တပ်စခန်းမဟုတ်ဘဲ ပစ်လွှတ်လာတဲ့ နျူကလီးယားဒုံးကျည်တွေကို ကြားဖြတ်ပစ်ချနိုင်တဲ့ လက်နက်တွေ ကျန်ရှိရာ တစ်ခုတည်းသော ရေလယ်စခန်းပါ။ အနိုင်ရနိုင်ခြေ အလွန်နည်းနေတဲ့အခြေအနေမှာ ကောလင်းစ်တစ်ယောက် စီးနင်းသူတွေနဲ့ ပူးပေါင်းသွားမလား၊ ဆက်ပြီး တိုက်ခိုက်မလားဆိုတဲ့ ရွေးချယ်မှုနဲ့ ရင်ဆိုင်နေရတယ်။ စခန်းကို ဝင်စီးတဲ့အဖြစ်အပျက်အတွင်း အက်ရှင်ခန်းတွေအပြင် စကားပြောခန်းတွေကိုလည်း အသားပေးထားပါတယ်။ လက်ယာစွန်းရောက် အမျိုးသားရေးအမြင်တွေ၊ အမျိုးသမီးတွေအပေါ် နိုင်ထက်စီးနင်းပြုမှုနဲ့ ရွှေ့ပြောင်းအခြေချလာသူတွေကို ခွဲခြားဆက်ဆံမှုတွေကိုပါ ဇာတ်လမ်းထဲမှာ ထည့်သွင်းထားတယ်။

ရမ်ဂျိုရီဟာ မျိုးရိုးစဉ်ဆက် လက်ဆင့်ကမ်းလာတဲ့ အာယုဗီဒပညာကို ကျွမ်းကျင်သူတစ်ယောက်ပါ။ စိတ်ထားကောင်းပြီး ကိုယ်ကျိုးမကြည့်တတ်တာကြောင့် တစ်ရွာလုံးက လေးစားကြတယ်။ သူ့ကို ပါရမီဖြည့်ပေးတဲ့ ဇနီး ဆူရီးလာနဲ့အတူ ဉာဏ်ကောင်းသလို အဆော့လည်းသန်တဲ့ ကာနာဆိုတဲ့ သားလေးတစ်ယောက် ရှိပါတယ်။ ရယ်ရှိုဒါကတော့ ရမ်ရဲ့ အချစ်ဆုံးညီမလေးပါ။ တစ်နေ့ ရယ်ရှိုဒါဟာ သူကိုယ်ဝန်ရှိနေတဲ့ သတင်းကောင်းကို အစ်ကို့ဆီ ပြောပြဖို့ အိမ်ပြန်လာခဲ့တယ်။ အစ်ကို့အိမ်ကအပြန် ဘုရားကျောင်းပွဲတော်ကို သွားဖို့ စီစဉ်ထားတာကို သိတော့ ကာနာကလည်း လိုက်ချင်လို့ အတင်းပူဆာပါတယ်။ တူလေးစိတ်ချမ်းသာအောင် ခေါ်သွားပေးရာကနေ အဖြစ်ဆိုးတွေ ကြုံလာရပြီး သားပျောက်ရှာရတဲ့ ဇာတ်လမ်းတစ်ခု ဖြစ်လာတယ်။ အာယုဗီဒပညာကို ထိန်းသိမ်းလာတဲ့ ဒီမိသားစုဟာ ထရီရှန်ကူဆိုတဲ့ ရတနာတစ်ပါးကိုလည်း စောင့်ရှောက်ရတဲ့ မျိုးနွယ်စု ဖြစ်နေပါတယ်။ ကာနာကို လိုက်ရှာကြတဲ့အကြောင်းက မှော်ပညာတွေနဲ့ ဘယ်လိုဆက်စပ်လာမလဲဆိုတာကို ကန်နာဒါစကားပြော ဒီဇာတ်ကားမှာ ဆက်ပြထားပါတယ်။

အမေရိကန်အစိုးရရဲ့ အဆင့်မြင့်အရာရှိတစ်ယောက်က လျှို့ဝှက်အဖွဲ့အစည်းတစ်ခု ဖွဲ့ထားပါတယ်။ အဲဒီအဖွဲ့က စစ်ပြန်တွေ၊ လူမိုက်တွေနဲ့ ဂန်းစတားတွေထဲက အသုံးချလို့ရမယ့်သူတွေကို ရှာဖွေစုဆောင်းပြီး နိုင်ငံအဆင့် လျှို့ဝှက်တာဝန်တွေ ပေးလေ့ရှိတယ်။ တရားဝင်စစ်တပ်ကို မသုံးဘဲ ကြေးစားတွေကို ခိုင်းရတဲ့အကြောင်းကတော့ အန္တရာယ်များတဲ့ အလုပ်တွေအတွက် သူတို့ကိုပဲ လက်မှာသွေးစွန်းခံစေပြီး အစိုးရနာမည် မပါစေချင်လို့ပါ။ Mel Gibson ပါဝင်ထားတဲ့ ဒီအက်ရှင်ဇာတ်ကားမှာ စပိုင်တွေနဲ့ အေးဂျင့်တွေရဲ့ လှည့်ကွက်တွေအပြင် ပစ်ခတ်ဖောက်ခွဲမှုတွေနဲ့ ဆက်သွားပါတယ်။

ဟန့်ကျန်းဆိုတဲ့ ဝေးလံခေါင်သီတဲ့ ရွာငယ်လေးမှာ ကလေးမီးမဖွားနိုင်ဖြစ်နေတဲ့ မိခင်တစ်ယောက်ကို နတ်ဆရာမတစ်ဦးက အောက်လမ်းပညာနဲ့ ကူညီပေးခဲ့ပါတယ်။ အဲဒီအဖြစ်အပျက်ကနေ ရှစ်နှစ်ကြာလာတဲ့အခါ ရွာထဲမှာ ထူးဆန်းတဲ့ သေဆုံးမှုတွေနဲ့ နားမလည်နိုင်တဲ့ အဖြစ်အပျက်တွေ ဆက်တိုက်ပေါ်လာတော့တယ်။ သော်ပေါင်လည်း ဇနီးသည်ကို ဆုံးရှုံးလိုက်ရပြီး သမီးငယ်လေးနဲ့အတူ မြို့ကို ပြောင်းနေခဲ့ပါတယ်။ တစ်နေ့ ရွာကိုပြန်လာချိန်မှာတော့ ထူးဆန်းတဲ့ အမျိုးသမီးတစ်ယောက်အကြောင်း သိလိုက်ရတာကနေ နောက်ကွယ်က အမှန်တရားကို ရှာဖွေဖို့ ဖြစ်လာတယ်။ ဘာကြောင့်ဖြစ်နေမှန်း မသိရတဲ့ ဒီကိစ္စတွေရဲ့ အဖြေကို သူရှာတွေ့ပါ့မလား၊ ကပ်ဆိုးကြုံနေရတဲ့ ရွာလေးကိုရော ကယ်တင်နိုင်ပါ့မလား။

ဆဋ္ဌမအာရုံကောင်းတဲ့ မိဘမဲ့ဂျက်ကီဟာ ဓားပြမှုတစ်ခုကို တားဆီးပေးရင်း လူသိများလာပါတယ်။ အဲဒီကနေ မိဘအရင်းတွေကို လိုက်ရှာဖို့ ကြိုးစားရာမှာ သူလျှိုတစ်ယောက် ဖြစ်လာပါတော့တယ်။ ကိုယ့်အတိတ်အကြောင်းကို ဖော်ထုတ်လေလေ လူဆိုးမျိုးစုံနဲ့ ပတ်သက်မိလေလေ ဖြစ်လာပြီး အရှုပ်အထွေးတွေထဲက လွတ်မြောက်ဖို့ စွန့်စားရပါတယ်။ ၂၀၀၁ ခုနှစ်မှာ ထွက်ရှိခဲ့တဲ့ ဂျက်ကီချမ်းရဲ့ အက်ရှင်ဟာသဇာတ်ကားဖြစ်ပြီး Vivian Hsu နဲ့ Min Kim တို့လည်း ပါဝင်သရုပ်ဆောင်ထားပါတယ်။

လန်ဒန်အိမ်ခြံမြေလောကကို လက်ထဲမှာ ချုပ်ကိုင်ထားတဲ့ လန်နီကိုးလ်ဟာ လောဘကြီးတဲ့ သူဌေးတစ်ယောက်ပါ။ ရုရှားသူဌေးတစ်ယောက်က သူ့ဆီ လုပ်ငန်းကိစ္စနဲ့ ဆက်သွယ်လာရာကနေ မထင်မှတ်တဲ့ တိုက်ဆိုင်မှုတွေ ဖြစ်လာပြီး ဝိုင်းဘန့်ချ်ဆိုတဲ့ ဒုစရိုက်အဖွဲ့ပါ သူတို့နှစ်ယောက်ကြားမှာ ပတ်သက်မိသွားပါတယ်။ Guy Ritchie ရိုက်ကူးထားတဲ့ ဒီဇာတ်ကားမှာ လန်ဒန်ဒုစရိုက်လောက၊ မူးယစ်ဆေးဝါးနဲ့ အိမ်ခြံမြေဥပဒေပိုင်း အကျင့်ပျက်ခြစားမှုတွေကို ဆက်စပ်တင်ပြထားပါတယ်။ တိုက်ဆိုင်မှုတွေက ဝိုင်းဘန့်ချ်ကို ဘယ်အထိ ဆွဲခေါ်သွားမလဲ၊ အကွက်ကျကျ ကောက်ကျစ်တတ်တဲ့ သူဌေးနှစ်ယောက်ကြားမှာ သူတို့ မြေစာပင်ဖြစ်သွားမလားဆိုတာ လိုက်ကြည့်ရမှာပါ။

ချောင်နိုင်ငံရဲ့ လက်အောက်ခံဖြစ်နေတဲ့ ဂျိုဆွန်းမင်းဆက်၊ အင်ဂျိုဘုရင်လက်ထက်မှာ ဇာတ်လမ်းစထားပါတယ်။ ချောင်းဂယောင်းဆူဟာ ညီလေးရဲ့ ရောဂါကို ကုပေးချင်လို့ နန်းတွင်းသမားတော်လုပ်ဖို့ ဆုံးဖြတ်ခဲ့သူပါ။ အပ်စိုက်ကုသရာမှာ ကျွမ်းကျင်တဲ့ သူ့မှာ ထူးခြားချက်တစ်ခု ရှိပါတယ်။ အလင်းထဲမှာ မမြင်ရပေမဲ့ ညအမှောင်ထဲမှာတော့ ရှင်းရှင်းလင်းလင်း မြင်နိုင်တာပါ။ နန်းတွင်းမှာ မမြင်သလို၊ မကြားသလို နေရမယ်ဆိုတာ သိထားတဲ့ ဂယောင်းဆူက အဲဒီအကြောင်းကို ဖုံးကွယ်ထားခဲ့တယ်။ ဒါပေမဲ့ ချောင်နိုင်ငံမှာ ဓားစာခံအဖြစ် ရှစ်နှစ်ကြာ နေခဲ့ပြီး ပြန်ရောက်လာတဲ့ အိမ်ရှေ့စံ သေဆုံးသွားတဲ့အခါ သူက မျက်မြင်သက်သေအဖြစ် ထွက်ဆိုရဖို့ ဖြစ်လာပါတယ်။ လူတိုင်းက မျက်မမြင်လို့ သိထားသူရဲ့ ထွက်ဆိုချက်ကို ယုံကြည်ဖို့ ခက်နေတဲ့အပြင် အမြင်အာရုံအကြောင်း ဖုံးကွယ်ခဲ့တာက ဘုရင်ကို လိမ်ထားတဲ့ ပြစ်မှုလည်း ဖြစ်နေပြန်တယ်။ ဂယောင်းဆူက ဒီအကျပ်အတည်းကို ဘယ်လိုဖြေရှင်းသွားမလဲဆိုတာကို နန်းတွင်းရာဇဝတ်မှုနဲ့ တွဲဖော်ပြထားပါတယ်။ ဂယောင်းဆူအဖြစ် Ryu Joon Yeol နဲ့ အင်ဂျိုဘုရင်အဖြစ် Yu Hae Jin တို့ ပါဝင်သရုပ်ဆောင်ထားပါတယ်။

လွန်ခဲ့တဲ့ ရှစ်နှစ်က လေယာဉ်ပြန်ပေးဆွဲမှုတစ်ခုမှာ ဓားစာခံ ရာနဲ့ချီ သေဆုံးခဲ့ပါတယ်။ အကြမ်းဖက်မှုဆိုင်ရာ ထောက်လှမ်းရေးအေဂျင်စီအတွက် အရှက်တကွဲ ဖြစ်ခဲ့ရပြီး ပိတ်သိမ်းထားခဲ့တဲ့ အမှုတစ်ခုပါ။ အမှုနဲ့ ပတ်သက်ခဲ့သူတွေထဲမှာလည်း သေဆုံးသူတွေ ရှိသလို အငြိမ်းစားယူသွားသူတွေလည်း ရှိနေပြီဖြစ်ပါတယ်။ ရှစ်နှစ်ကြာတဲ့အခါ လေယာဉ်ပြန်ပေးဆွဲမှုရဲ့ ခေါင်းဆောင်ကို ဖမ်းမိခဲ့ပြီး ဒီအမှုမှာ ထောက်လှမ်းရေးအတွင်းလူတစ်ယောက် ပါဝင်နေကြောင်း သိလာရတယ်။ ဒါကြောင့် အေဂျင်စီက အတော်ဆုံး ထောက်လှမ်းရေးသမားကို တာဝန်ပေးပြီး သစ္စာဖောက်ဟာ ဘယ်သူလဲဆိုတာ ပြန်စုံစမ်းခိုင်းပါတယ်။ ခရစ္စပိုင်း ပါဝင်သရုပ်ဆောင်ထားတဲ့ စပိုင်ဇာတ်ကားဖြစ်ပြီး နှစ်တွေကြာအောင် ပိတ်ထားခဲ့တဲ့ အမှုကို ပြန်လည်ဖော်ထုတ်ရတဲ့အကြောင်းပါ။

သရဲခြောက်တဲ့ နန်းတော်တစ်ခုမှာ စိတ်ရောဂါဝေဒနာရှင်တစ်ယောက် ရှိနေပြီး ဆရာဝန်တစ်ယောက်က ဒီနေရာက အဖြစ်အပျက်တွေကို ကိုင်တွယ်ရဖို့ ဖြစ်လာပါတယ်။ ဘာသာတရားနဲ့ စိတ်ပညာကို အခြေခံထားတဲ့ ဇာတ်လမ်းဖြစ်လို့ ဝေဒနာရှင်အပြင် သရဲနဲ့ပတ်သက်တဲ့ ကိစ္စကိုပါ ဘာသာရေးအကူအညီယူပြီး ဆရာဝန်က ဘယ်လိုကုသဖြေရှင်းသွားမလဲဆိုတာ ဆက်ကြည့်ရမှာပါ။ ဇာတ်လမ်းအစပိုင်းမှာ ဟာသတွေ ပါဝင်ပြီး နောက်ပိုင်းမှာတော့ နန်းတော်ထဲက လျှို့ဝှက်ဆန်းကြယ်မှုတွေဘက်ကို ရောက်လာပါတယ်။ ဟာသ၊ ထိတ်လန့်စရာနဲ့ စိတ်ပညာဆိုင်ရာ အကြောင်းအရာတွေ ရောစပ်ထားတဲ့ ဇာတ်ကားပါ။