သည်းထိတ်ရင်ဖိုကားများ

ဟန်နာ၊ ဂျိန်းနဲ့ စကော့တို့ဟာ အချစ်ဆုံးသူငယ်ချင်းသုံးယောက်ပါ။ ကျောင်းသားအများကြီးထဲကနေ ဟန်နာ ပညာသင်ဆုရသွားတဲ့အခါ အဲဒီကိစ္စကို မကျေမနပ်ဖြစ်နေသူက အီလီဖြစ်ပါတယ်။ နောက်တော့ ဟန်နာရထားတဲ့ ပညာသင်ဆု ဆုံးရှုံးသွားအောင် ကြံစည်မှုတွေ ပေါ်လာတယ်။ အဲဒီနောက်ကွယ်မှာ ဘယ်သူရှိနေသလဲဆိုတာ အဖြေရှာကြရင်း သူငယ်ချင်းသုံးယောက်ကြားမှာလည်း ပဟေဠိဆန်တဲ့ အဖြစ်အပျက်တွေ ကြုံလာရပါတယ်။

ပြင်သစ်ပေါ်လီနီးစီးယားက ကျွန်းတစ်ကျွန်းမှာ အုပ်ချုပ်ရေးမှူးအဖြစ် တာဝန်ယူထားတဲ့ ဒီရိုလာဟာ အရည်အချင်းရှိသူတွေကို အခွင့်အရေးပေးပြီး အကူအညီလိုသူတွေကိုလည်း ကူညီတတ်သူပါ။ အေးအေးဆေးဆေးရှိတဲ့ ကျွန်းမြို့လေးမို့ ကြီးမားတဲ့ပြဿနာ ပေါ်လာလိမ့်မယ်လို့ ဘယ်သူမှ မထင်ထားကြဘူး။ ဒါပေမဲ့ ကျွန်းပေါ်မှာ နျူကလီးယားစမ်းသပ်မှု လုပ်တော့မယ်ဆိုတဲ့ သတင်းသဲ့သဲ့ ထွက်လာပါတယ်။ အဲဒီအချိန်မှာပဲ မြို့နားကို ရေတပ်သားတွေ ရုတ်တရက်ရောက်လာပြီး စစ်တပ်ရဲ့လှုပ်ရှားမှုတွေပါ တွေ့လာရတော့ ဒီရိုလာအတွက် ခေါင်းခဲစရာ ဖြစ်လာတယ်။ တစ်ဖက်မှာ အစိုးရအရာရှိကြီးတွေ၊ တစ်ဖက်မှာတော့ ဩဇာအာဏာမရှိတဲ့ ကျွန်းနေပြည်သူတွေ ရှိနေပါတယ်။ သူတို့ကြားက နိုင်ငံရေးအင်အားပြိုင်ဆိုင်မှုထဲ ဝင်ပါမိတဲ့ ဒီရိုလာဟာ အမှားမခံတဲ့ ဆုံးဖြတ်ချက်တွေ ချရတော့မယ်။ Albert Serra ရိုက်ကူးထားတဲ့ ဒီဇာတ်ကားမှာ နိုင်ငံရေးနောက်က အာဏာပြိုင်ဆိုင်မှုတွေနဲ့ အကျိုးအမြတ်အတွက်ဆို သူတစ်ပါး ဘာဖြစ်ဖြစ် ဂရုမစိုက်တော့တဲ့ လောဘစိတ်တွေကိုလည်း ဖော်ပြထားပါတယ်။

အေဘယ်ဟာ သားတစ်ယောက်၊ သမီးတစ်ယောက်ကို တစ်ဦးတည်း ပြုစုစောင့်ရှောက်နေတဲ့ လူမည်းရဲအရာရှိပါ။ စည်းကမ်းတင်းကျပ်ပြီး အပေါက်ဆိုးလွန်းလို့ သားနဲ့သမီးကတောင် သူ့ကို စိတ်ပျက်နေကြတယ်။ သူ့အိမ်ဘေးကို လူဖြူအမျိုးသား ခရစ်နဲ့ လူမည်းအမျိုးသမီး လီဆာတို့ လင်မယား ပြောင်းလာတဲ့အခါမှာတော့ အေဘယ်ရဲ့ အပြုအမူတွေ ပြောင်းလဲလာပါတယ်။ အေဘယ်က လူမည်းနဲ့လူဖြူ တွဲဖက်တဲ့ ဆက်ဆံရေးကို ခါးခါးသီးသီး မုန်းတီးသူဖြစ်နေတယ်။ ဒါကြောင့် ခရစ်နဲ့ လီဆာတို့ ပြောင်းသွားအောင် နည်းအမျိုးမျိုးနဲ့ ဒုက္ခပေးပါတော့တယ်။ အိမ်နီးချင်းလင်မယားအပေါ် သူ့ရဲ့ လူမျိုးရေးမုန်းတီးမှုက တဖြည်းဖြည်း ထိန်းမနိုင်သိမ်းမရ ဖြစ်လာတဲ့အကြောင်းကို Samuel L. Jackson နဲ့ Patrick Wilson တို့ ပါဝင်သရုပ်ဆောင်ထားပါတယ်။

ISIS ရဲ့ ကြီးစိုးမှုကြောင့် ဆီးရီးယားပြည်သူတွေ အကျပ်အတည်းကြုံပြီး အကူအညီလိုအပ်နေချိန်မှာ အီရန်လေယာဉ်မှူးနှစ်ယောက် ကယ်ဆယ်ရေးခရီး ထွက်လာကြပါတယ်။ သူတို့ရဲ့တာဝန်က Palmyra မြို့ထဲ ပိတ်မိနေတဲ့ ပြည်သူတွေကို လေယာဉ်နဲ့ ကယ်ထုတ်ဖို့ပါ။ မြို့ကနေ ပျံတက်လာတဲ့အချိန်အထိ ခရီးစဉ်က အဆင်ပြေနေပေမယ့် လေယာဉ်ပေါ်က ခရီးသည်တွေထဲမှာ မလိုလားအပ်တဲ့သူတွေ ပါလာပါတယ်။ ၂၀၁၈ ခုနှစ်ထွက် အီရန်အက်ရှင်ဇာတ်ကားဖြစ်ပြီး ကယ်ဆယ်ရေးခရီးအကြောင်းနဲ့အတူ ဘာသာရေးဆိုင်ရာ အယူအဆနဲ့ ယုံကြည်မှုတွေကိုလည်း ထည့်သွင်းထားတယ်။ ကိုးကွယ်ရာတူသူတွေကြားမှာတောင် အစွန်းရောက်ယုံကြည်မှုက ဘယ်လောက်အထိ ဒုက္ခပေးနိုင်သလဲဆိုတဲ့ မေးခွန်းကိုပါ ဖော်ပြထားပါတယ်။

ဒုတိယကမ္ဘာစစ် ပြီးခါနီးကာလမှာ ဇာတ်လမ်းစထားပါတယ်။ စစ်ရှုံးတော့မယ့်အခြေအနေကို မြင်လာတဲ့ ဟစ်တလာက နိုင်ငံထဲက လူငယ်တွေကို ပြည်သူ့စစ်အဖွဲ့တွေ ဖွဲ့ခိုင်းပြီး ကျူးကျော်လာသူတွေကို တတ်နိုင်သလောက် တိုက်ထုတ်ဖို့ အမိန့်ပေးထားတယ်။ နောက်ဆုံးမျှော်လင့်ချက်အဖြစ် နျူကလီးယားဗုံး တီထွင်ဖို့လည်း သိပ္ပံပညာရှင်တစ်ယောက်ကို ဖမ်းဆီးထားပါတယ်။ အဲဒီသိပ္ပံပညာရှင်ကို ကယ်ထုတ်ဖို့ စနိုက်ပါတစ်ယောက်၊ စစ်သူရဲကောင်းတစ်ယောက်၊ သိပ္ပံကျောင်းသားတစ်ယောက်နဲ့ ဗိုလ်ကြီးတစ်ယောက်တို့ ထွက်လာကြတယ်။ အသက်စွန့်ရနိုင်တဲ့ ကယ်ဆယ်ရေးတာဝန်ကို ထမ်းဆောင်ရမယ့်အထဲမှာ စစ်သူရဲကောင်းက အိမ်လွမ်းဝေဒနာ ခံစားနေရပြီး တွေ့သမျှ လူသေတွေကို သူ့သမီးအဖြစ် မြင်ယောင်နေပါတယ်။

အာဏာသိမ်းမှုတစ်ခု ဖြစ်ပွားပြီး မူးယစ်ရာဇာတွေဟာ အာဏာရှင်တွေရဲ့ ပစ်မှတ်ဖြစ်လာပါတယ်။ ကျွမ်းကျင်တဲ့ ကြေးစားတွေ စုထားတဲ့ ဘန်ဂီခွေးအများအဖွဲ့ကတော့ မက္ကဆီကိုနိုင်ငံသား မူးယစ်ရာဇာတစ်ယောက်ကို ဒါကာအထိ ဘေးကင်းကင်း ပို့ပေးဖို့ အခကြေးငွေနဲ့ တာဝန်လက်ခံလိုက်တယ်။ ခရီးလမ်းမှာ ဆီတိုင်ကီပေါက်သွားတာကြောင့် ဒါကာမရောက်ခင် ဆင်းသက်လိုက်ရပြီး ဝေးလံခေါင်သီတဲ့ ဆလုံးရွာစခန်းလေးဆီ ရောက်သွားကြပါတယ်။ ရွာသူကြီး အိုမာက ဖော်ဖော်ရွေရွေရှိပြီး အဲဒီမှာ တခြားဧည့်သည်တွေလည်း ရှိနေကြတယ်။ ဒါပေမဲ့ ဧည့်သည်တွေထဲက စကားမပြောနိုင်၊ နားမကြားတဲ့ မိန်းကလေးတစ်ယောက်က သူတို့ဘယ်သူတွေဆိုတာ သိနေပါတယ်။ အဲဒီအချိန်မှာပဲ ရဲအရာရှိတစ်ယောက်ပါ ရောက်လာတော့ သူတို့အတွက် နေရထိုင်ရ ပိုခက်လာပါတော့တယ်။

တိုဘီနဲ့ ဂျေးဟာ ဂရက်ဖတီဆွဲတဲ့ လူငယ်နှစ်ယောက်ပါ။ သူတို့က လမ်းမပေါ်မှာ ရေးဆွဲတာထက် အကျင့်ပျက်ခြစားနေတဲ့ သူဌေးတွေရဲ့အိမ်ထဲ ခိုးဝင်ပြီး ခြိမ်းခြောက်စာသဘောနဲ့ ဂရက်ဖတီတွေ ချန်ထားတတ်ကြတယ်။ အဲဒီနည်းနဲ့ စနစ်ဆိုးကို စတင်တိုက်ထုတ်နိုင်မယ်လို့ ယုံကြည်ထားကြသူတွေ ဖြစ်ပါတယ်။ အပြင်ပန်းမှာ လူကောင်းလိုနေပြီး နောက်ကွယ်မှာ အကျင့်ပျက်နေသူတွေကို ဖော်ထုတ်ဖို့ ကြိုးစားတဲ့ ဒီလူငယ်နှစ်ယောက် ရှေ့ဆက်ဘာတွေ ကြုံကြရမလဲဆိုတာကို ဇာတ်လမ်းက ဆက်ပြထားတယ်။ ဘာဘက်အန်ဗာရီ ရိုက်ကူးပြီး Netflix က ထွက်ရှိထားတဲ့ သည်းထိတ်ရင်ဖိုဇာတ်ကားဖြစ်ကာ နောက်ဘာဖြစ်မလဲဆိုတာ ခန့်မှန်းရခက်တဲ့ပုံစံနဲ့ ဇာတ်သိမ်းနားအထိ ဆွဲခေါ်သွားပါတယ်။

Kiyoshi Kurosawa ရိုက်ကူးထားတဲ့ ဒီထိတ်လန့်ပဟေဠိဇာတ်ကားမှာ ကမ်းစပ်မြို့တစ်မြို့က စုံထောက်တစ်ယောက်ဟာ လူသတ်မှုတွေကို လိုက်စုံစမ်းနေပါတယ်။ ငလျင်လှုပ်ပြီးတဲ့တစ်နေ့မှာ အပျက်အစီးတွေကြားက အမျိုးသမီးအလောင်းတစ်လောင်းကို တွေ့လာတယ်။ ဆားငန်ရေထဲ နှစ်သတ်ပြီးမှ လာစွန့်ပစ်ထားပုံရတာကြောင့် ဆက်စုံစမ်းပေမယ့် သဲလွန်စတွေက သူ့ကိုယ်သူပဲ တရားခံအဖြစ် ညွှန်နေပါတယ်။ သူကလည်း ဘာမှမမှတ်မိတော့ အကျပ်ရိုက်နေတယ်။ မကြာခင် အသတ်ခံထားရတဲ့ ကျောင်းသားတစ်ယောက်ရဲ့အလောင်း ထပ်ပေါ်လာပါတယ်။ စစ်ဆေးကြည့်တဲ့အခါ ဆားငန်ရေတွေ တွေ့ရပြန်သလို ကြိုးနဲ့ ချည်နှောင်ခံထားရပုံလည်း ရနေတယ်။ ဒါကြောင့် ဒီအမှုတွေဟာ ကွင်းဆက်လူသတ်သမားတစ်ယောက်ရဲ့ လက်ချက်ဖြစ်နိုင်တယ်လို့ ယူဆလာရပါတယ်။ အမှုတွေကို လိုက်နေချိန်မှာပဲ ဝတ်စုံနီဝတ်ထားတဲ့ သရဲမတစ်ယောက်က စုံထောက်နားကို မကြာခဏရောက်လာပြီး နှောင့်ယှက်နေတယ်။ ဒီသရဲမနဲ့ လူသတ်မှုတွေကြား ဘယ်လိုပတ်သက်နေသလဲ၊ ဘာကြောင့် သူ့ကိုပဲ လိုက်နှောင့်ယှက်နေသလဲဆိုတာကို စုံထောက်တစ်ယောက် အဖြေရှာရပါတော့တယ်။

Frank and Penelope ဟာ Ridley Scott ရဲ့ Thelma & Louise အငွေ့အသက်ယူထားပြီး အဓိကဇာတ်ကောင်နှစ်ယောက်ရဲ့ နာမည်ကို ခေါင်းစဉ်ပေးထားတဲ့ ပဟေဠိသည်းထိတ်ရင်ဖိုဇာတ်ကားပါ။ ဇာတ်ကောင်ကိုယ်တိုင်ကလည်း Thelma & Louise ထဲကအတိုင်း လိုက်လုပ်ချင်နေသူ ဖြစ်ပါတယ်။ ဇာတ်လမ်းအစမှာ အမျိုးသားတစ်ယောက်ဟာ ဇနီးဖောက်ပြန်နေတာကို ပက်ပင်းတွေ့လိုက်ရတယ်။ အဲဒီနောက် ကားလျှောက်မောင်းရင်း ချောက်ထဲကို မောင်းချဖို့အထိ စိတ်ကူးထားပါတယ်။ ကလပ်တစ်ခုကို ရောက်သွားတဲ့အခါ အဖော်အချွတ်မယ်တစ်ယောက်ကို စိတ်ယိုင်သွားပြီး သူ့ကို ကယ်ထုတ်လာခဲ့တယ်။ နှစ်ယောက်သား ကားနဲ့ ဆက်လျှောက်သွားကြရင်း လျှို့ဝှက်ဆန်းကြယ်တဲ့ ဂိုဏ်းတစ်ဂိုဏ်းနဲ့ တွေ့ကြပါတော့တယ်။ ဇာတ်လမ်းကို အစကတည်းက စာအုပ်တစ်အုပ် ဖတ်ပြနေတဲ့ပုံစံနဲ့ တင်ပြထားတာကြောင့် ဖြစ်ပျက်ပြီးသားအကြောင်းကို နားထောင်နေရပေမယ့် အဖြေကိုတော့ ချက်ချင်းမသိရပါဘူး။ လိင်မှုဆိုင်ရာအခန်းတွေ များများပါဝင်တဲ့ ဇာတ်ကားလည်း ဖြစ်ပါတယ်။

ချီလီပါလ်မာက တရားမဝင် အတိုးကြီးကြီးနဲ့ ငွေချေးတဲ့လုပ်ငန်းမှာ အကြွေးလိုက်တောင်းပေးရသူပါ။ လိုအပ်ရင် ဂိုဏ်းစတားဆန်ဆန် လုပ်တတ်ပြီး သူတောင်းလို့ မရတဲ့အကြွေး မရှိသလောက်ပဲ။ သွေးအေးတယ်၊ သတ္တိရှိတယ်၊ ဆဲတာတောင် ရည်ရည်မွန်မွန် ဆဲတတ်သူ။ သူ့ဆီက “ကျုပ်ကိုကြည့်စမ်းပါ” ဆိုတဲ့စကား ထွက်လာပြီဆိုရင် တစ်ဖက်လူက သူလိုချင်တာကို လိုက်လျောရဖို့ များနေပြီ။ ဒီစကားကလည်း ရုပ်ရှင်တစ်လျှောက် သူပြောနေကျစကားပါ။ ချီလီက အကြွေးတောင်းသမားဖြစ်ပေမယ့် ရုပ်ရှင်ဝါသနာအိုးလည်း ဖြစ်နေတယ်။ တစ်နေ့ အကြွေးမဆပ်ဘဲ ထွက်ပြေးသွားသူနောက် လိုက်ရင်း လော့စ်အိန်ဂျလိစ်အထိ ရောက်လာပါတယ်။ ငွေချေး၊ အကြွေးတောင်းတဲ့အလုပ်ကို စိတ်ကုန်နေပြီဖြစ်တဲ့ ချီလီက ရုပ်ရှင်တစ်ကားလောက် ထုတ်လုပ်ကြည့်ရင် ကောင်းမလားလို့ စိတ်ကူးပေါက်ရာက ဟောလီးဝုဒ်က လူတွေနဲ့ ပတ်သက်မိတော့တာပါ။ သူလိုက်ရှာနေတဲ့ လီယိုက လေယာဉ်ပျက်ကျတဲ့အထဲ မပါဘဲ ပါသွားသလို ဟန်ဆောင်ပြီး လေကြောင်းလိုင်းရဲ့ အာမခံငွေကို လိမ်ယူထွက်ပြေးလာသူ။ ချီလီတို့ဆီမှာလည်း အကြွေးကျန်နေတယ်။ ဒါရိုက်တာ ဟယ်ရီကတော့ ဇာတ်ညွှန်းကောင်းတစ်ပုဒ် တွေ့ထားပေမယ့် ဝယ်ဖို့ငွေ မတတ်နိုင်ဘူး။ ထုတ်လုပ်သူတွေပေးထားတဲ့ငွေနဲ့ ဘောလုံးပွဲလောင်းပြီး အမြတ်ရဖို့ ကြံမိရာက ရှုံးသွားလို့ အခက်တွေ့နေပါတယ်။ တစ်ဖက်မှာလည်း ဇိမ်ခံကားအငှားလုပ်ငန်းကို ဗန်းပြပြီး မူးယစ်ဆေးရောင်းနေတဲ့ လူဆိုးတစ်စုက ရုပ်ရှင်လုပ်ငန်းထဲ ဝင်ချင်နေကြတယ်။ အရည်အချင်းရှိပေမယ့် သရဲကားတွေမှာပ

လူသိများတဲ့ ချစ်သူနှစ်ယောက်ဖြစ်တဲ့ အယ်လိုင်ယာ့နဲ့ ရို့စ်တို့ကြားမှာ ကြီးကြီးမားမား ပြဿနာလို့ မဆိုသာပေမယ့် အဆင်မပြေမှုလေးတွေ ရှိနေပါတယ်။ ဒါကြောင့် သူတို့ဆက်ဆံရေးအတွက် ကုထုံးဆရာဝန်တစ်ယောက်ဆီ တိုင်ပင်ဆွေးနွေးဖို့ ဆုံးဖြတ်ခဲ့ကြတယ်။ သူတို့သွားတွေ့မယ့်သူက ဒေါက်တာဖရော့စ်ပါ။ သူ့ဆီမှာ ကုသမှုခံယူဖို့ တန်းစီစောင့်ရတဲ့အထိ နာမည်ကြီးတဲ့ ကုထုံးဆရာဝန်ဖြစ်ပြီး ဒီတစ်ခါတော့ သူကိုယ်တိုင် ဖိတ်ခေါ်ထားတာကြောင့် နှစ်ယောက်သား ထွက်လာခဲ့ကြပါတယ်။ ဒါပေမယ့် လမ်းမှာ ထူးဆန်းတဲ့လူတစ်ယောက်နဲ့ ဆုံပြီးနောက် အယ်လိုင်ယာ့က ထူးထူးဆန်းဆန်း အိပ်မက်တွေ စမက်လာပါတော့တယ်။ ၂၀၂၂ ခုနှစ်ထွက် ထိတ်လန့်သည်းဖိုကားဖြစ်ပြီး လျှို့ဝှက်ဆန်းကြယ်တဲ့ ဇာတ်လမ်းပုံစံနဲ့ ရိုက်ကူးထားပါတယ်။

ဟောင်ကောင်မှာ တူးမြောင်းလုပ်ငန်း လုပ်နေတဲ့ စီးပွားရေးလုပ်ငန်းရှင်တစ်ယောက်ရဲ့ ပိုင်ဆိုင်မှုတွေကို သူ့လုပ်ဖော်ကိုင်ဖက်က လိုချင်နေပါတယ်။ ဒါကြောင့် ဟောင်ကောင်က လူဆိုးဂိုဏ်းတစ်ဂိုဏ်းကို အကူအညီတောင်းပြီး လုပ်ငန်းရှင်နဲ့ သူ့မိသားစုကို သတ်ဖို့ စီစဉ်ခဲ့တယ်။ ဒါပေမယ့် လုပ်ငန်းရှင်ရဲ့ အမြွှာသားလေးနှစ်ယောက်ကတော့ အသက်မသေဘဲ လွတ်မြောက်သွားခဲ့ပါတယ်။ နှစ်ဆယ့်ငါးနှစ်ကြာတဲ့အခါ အဲဒီညီအစ်ကိုနှစ်ယောက် ပြန်ဆုံကြပြီး ဖခင်အတွက် လက်စားချေဖို့ ကြိုးစားလာကြတယ်။ ညီအစ်ကိုဖြစ်ပေမယ့် တစ်ယောက်က အပျော့၊ တစ်ယောက်က အမာဆိုသလို စရိုက်ချင်း မတူကြပါဘူး။ ဒီဇာတ်ကောင်နှစ်ယောက်စလုံးကို ဗန်ဒိန်းက နှစ်ကိုယ်ခွဲသရုပ်ဆောင်ထားပြီး သူကိုယ်တိုင်တတ်ကျွမ်းတဲ့ ကိုယ်ခံပညာနဲ့ အက်ရှင်ခန်းတွေကို သရုပ်ဖော်ထားပါတယ်။

၁၉၈၂ ခုနှစ်မှာ မက်ဒရစ်မြို့က စုံစမ်းရေးမှူး အန်ဒရက်စ်ဟာ ပင်လယ်ဆိပ်ကမ်းမြို့လေးတစ်မြို့ဆီ ပြောင်းရွှေ့လာပါတယ်။ သူက ဘိုအာဒါဆိုတဲ့ ရဲတစ်ယောက်ရဲ့နေရာကို အစားဝင်လာတာဖြစ်ပြီး ကိုလမ်ဘိုဆိုတဲ့ တွဲဖက်တစ်ယောက်နဲ့ အလုပ်လုပ်ရတယ်။ မြို့ထဲက ဂျာမန်တွေရဲ့ လာဘ်ထိုးမှုတွေနဲ့ ကြုံလာရချိန်မှာ သူ့ဘဝလည်း အပြောင်းအလဲတွေ ဖြစ်လာပါတယ်။ နာဇီတွေရဲ့ လူမျိုးတုံးသတ်ဖြတ်မှုတွေ၊ မူးယစ်ဆေးမှုတွေကို သိလာရတဲ့အပြင် သူအစားဝင်ခဲ့တဲ့ ဘိုအာဒါရဲ့သေဆုံးမှုမှာလည်း ထူးခြားတဲ့အချက်တွေ ရှိနေတာကို အန်ဒရက်စ် သတိထားမိလာတယ်။ သာမန်သေဆုံးမှုတစ်ခု မဟုတ်နိုင်တာကြောင့် အမှုကို ပြန်စစ်ဆေးဖို့ ကြိုးစားပါတော့တယ်။ စပိန်စကားပြော မှုခင်းဇာတ်ကားဖြစ်ပြီး ၁၉၈၀ ပြည့်နှစ်အစောပိုင်းက နာဇီဂျာမန်တွေရဲ့ စီးပွားရေးလက်ဝါးကြီးအုပ်မှု၊ အကြမ်းဖက်ဒုစရိုက်မှုတွေနဲ့ ဒီမိုကရေစီရဖို့ ကြိုးပမ်းရတဲ့ကာလကို နောက်ခံထားပါတယ်။ Ricardo Gómez၊ Vicky Luengo နဲ့ Pere Ponce တို့ အဓိကပါဝင်သရုပ်ဆောင်ထားပါတယ်။

ဂျွန်ကတ်တာဟာ အတိတ်က အမှားတစ်ခုကြောင့် ရဲအလုပ်ကနေ အနားယူပြီး လေကြောင်းလုံခြုံရေး သရုပ်ပြနည်းပြအဖြစ် အလုပ်လုပ်နေသူပါ။ တစ်နေ့မှာ နိုင်ငံတကာလေကြောင်းလိုင်းကြီးတစ်ခုရဲ့ လုံခြုံရေးအရာရှိအဖြစ် ခန့်အပ်ခံရတာကြောင့် လော့စ်အန်ဂျလိစ်ကို ခရီးထွက်လာခဲ့ပါတယ်။ တိုက်တိုက်ဆိုင်ဆိုင်ပဲ သူစီးလာတဲ့လေယာဉ်ပေါ်မှာ ဗုံးဖောက်ခွဲမှုများစွာ ကျူးလွန်ထားတဲ့ အကြမ်းဖက်သမား ချားစ်ရိန်းလည်း ပါလာတယ်။ FBI ရဲ့ ဖမ်းဆီးမှုကို ခံထားရတဲ့ ချားစ်ရိန်းကို အေးဂျင့်နှစ်ယောက်က လော့စ်အန်ဂျလိစ်ဆီ ခေါ်ဆောင်လာတာပါ။ ဒါပေမယ့် ချားစ်ရိန်းက ကြိုတင်အချိန်းအချက်တွေနဲ့ အတူပါလာတဲ့ အေးဂျင့်နှစ်ယောက်ကို သတ်ပြီး လေယာဉ်ကို ပြန်ပေးဆွဲလိုက်ပါတယ်။ လုံခြုံရေးအရာရှိအဖြစ် အလုပ်စဝင်ခါစ ဂျွန်ကတ်တာလည်း လေယာဉ်ပေါ်မှာပဲ အကြမ်းဖက်သမားနဲ့ ရင်ဆိုင်ရပါတော့တယ်။ ၁၉၉၂ ခုနှစ်ထွက် အက်ရှင်မှုခင်းဇာတ်ကားဖြစ်ပြီး ဂျွန်ကတ်တာနေရာမှာ Wesley Snipes က သရုပ်ဆောင်ထားပါတယ်။

ဟင်နရီဘိတ်ကာက နာမည်ကျော် ရာဇဝတ်သားတစ်ယောက်ပါ။ နာမည်ကြီးသလို ရန်သူလည်းများပြီး သူ့ပိုင်ဆိုင်မှုတွေကို မျက်စိကျနေသူတွေကလည်း မနည်းဘူး။ သူ့မှာ ဆမ်ဘတ်ဆိုတဲ့ ရုပ်ချင်းချွတ်စွပ်တူတဲ့ ညီတစ်ယောက်ရှိတာကြောင့် ရန်သူတွေက ညီအစ်ကိုနှစ်ယောက်ကို လူမှားတတ်ကြပါတယ်။ ညီအစ်ကိုကြားမှာလည်း ရှင်းမရတဲ့ကိစ္စတစ်ခု ပေါ်လာပြီး တစ်ယောက်နဲ့တစ်ယောက် သတ်ဖြတ်ဖို့အထိ ဖြစ်လာခဲ့တယ်။ နောက်ဆုံး တစ်ယောက်က သေဆုံးပြီး တစ်ယောက်က ထောင်ကျသွားပါတယ်။ နှစ်အတော်ကြာလို့ သူတို့ရဲ့သားတွေ အရွယ်ရောက်လာချိန်မှာ ထောင်ကျနေသူလည်း ပြန်လွတ်လာတယ်။ ညီအစ်ကိုနှစ်ယောက်ကြားက ဇာတ်ရှုပ်ဟာ သားတွေလက်ထက်မှာ ဘယ်လိုဆက်ဖြစ်လာမလဲဆိုတာကို ဆက်ပြထားပါတယ်။ ဇာတ်လမ်းအလှည့်အပြောင်းတွေပါတဲ့ သည်းထိတ်ရင်ဖို မှုခင်းကားဖြစ်ပြီး ရှိတ်စပီးယားရဲ့ “ဗင်းနစ်မြို့က ကုန်သည်” အငွေ့အသက်တချို့ကို ထည့်ထားသလို ရှိတ်စပီးယားစာသားနဲ့ အဆုံးသတ်ထားပါတယ်။

ဇာတ်လမ်းအစမှာ Rei Nagasawa က Nanae Tsujimura ရဲ့ခင်ပွန်းကို သူ့ခန္ဓာကိုယ်နဲ့ ဆွဲဆောင်လှည့်စားပြီး သတ်ဖြတ်လိုက်ပါတယ်။ Rei နဲ့ Nanae တို့ကတော့ မတွေ့ဖြစ်ကြဘဲ အဆက်အသွယ်ပြတ်နေတာ ဆယ်နှစ်လောက် ရှိနေပါပြီ။ တစ်နေ့ Nanae က Rei ကို ပြန်ဆက်သွယ်ပြီး တွေ့ဆုံခဲ့တာပါ။ သူတို့ရဲ့ပတ်သက်မှုက အထက်တန်းကျောင်းဘဝမှာ စခဲ့ပေမဲ့ လိင်တူချစ်သူရည်းစားတွေ ဖြစ်ခဲ့ကြတာတော့ မဟုတ်ပါဘူး။ တစ်ယောက်နဲ့တစ်ယောက် ငယ်သံယောဇဉ်တွေ ရှိနေကြတဲ့ သူတို့ ဘာကြောင့် ဝေးကွာသွားခဲ့ကြသလဲ၊ ဘယ်လိုဘဝနောက်ခံတွေ ရှိခဲ့ကြသလဲ၊ Rei က Nanae ရဲ့ခင်ပွန်းကို ဘာကြောင့် သတ်ခဲ့သလဲဆိုတာကို တဖြည်းဖြည်း ဖော်ပြထားပါတယ်။ လူသတ်မှုဖြစ်ပြီးနောက် သူတို့နှစ်ယောက် ထွက်ပြေးလွတ်မြောက်နိုင်ပါ့မလားဆိုတာလည်း ဆက်ကြည့်ရမှာပါ။ အမျိုးသမီးချင်း ချစ်သူတစ်ယောက်က သူချစ်ရသူအပေါ် ပေးဆပ်အနစ်နာခံတဲ့အကြောင်းကို အဓိကထားပြီး ၃၆၀ ဒီဂရီ လှည့်ရိုက်ထားတဲ့အခန်းတွေ၊ ဇာတ်ကောင်နောက်ကနေ လိုက်ကြည့်နေရသလို ရိုက်ထားတဲ့အခန်းတွေ ပါဝင်ပါတယ်။ ခံစားချက်တွေကို စကားနဲ့မပြောဘဲ မျက်လုံးအမူအရာတွေနဲ့ ဖော်ပြထားတာတွေလည်း ရှိပါတယ်။ လိင်ပိုင်းဆိုင်ရာ မြင်ကွင်းတွေကို ထင်ထင်ရှားရှား ဖော်ပြထားလို့ မိသားစုနဲ့အတူ ကြည့်ဖို့တော့ မသင့်တော်ပါဘူး။

Darkness Fall ဆိုတဲ့ မြို့လေးမှာ မတ်တေလ်ဒါဆိုတဲ့ အမျိုးသမီးတစ်ယောက်ကို ကလေးတွေက ချစ်ခင်ကြပါတယ်။ ဒါပေမဲ့ တစ်နေ့ သူ့အိမ်မီးလောင်တဲ့အခါ မျက်နှာမှာပါ မီးလောင်ဒဏ်ရာ ရသွားခဲ့တယ်။ နောက်ပိုင်း မြို့မှာ ကလေးနှစ်ယောက် ပျောက်ဆုံးသွားတော့ မြို့ခံတွေက မတ်တေလ်ဒါကို ကလေးတွေသတ်တဲ့သူလို့ မှားယွင်းစွပ်စွဲပြီး သတ်ပစ်လိုက်ကြပါတယ်။ မသေခင်မှာ မတ်တေလ်ဒါက သူ့မျက်နှာကို မြင်သူမှန်သမျှ လက်စားချေမယ်ဆိုပြီး မြို့ကို ကျိန်စာတိုက်သွားခဲ့တယ်။ နှစ်ပေါင်းများစွာ ကြာလာတဲ့အခါ ကိုင်းလ်ဆိုတဲ့ ကလေးလေးနဲ့အတူ အဲဒီကျိန်စာ ပြန်အသက်ဝင်လာပါတယ်။ ၂၀၀၃ ခုနှစ်ထွက် ဒီသရဲကားမှာ ကိုင်းလ်တစ်ယောက် ကျိန်စာကို ဘယ်လိုရင်ဆိုင်မလဲဆိုတာ ဆက်ပြထားပါတယ်။

သရဲခြောက်တယ်လို့ နာမည်ကြီးတဲ့ အိမ်နံပါတ် ၈၁ ဟာ ကိုလိုနီခေတ်တုန်းက ဂုဏ်သတင်းကြီးတဲ့ ဗိုလ်မှူးတစ်ယောက်ရဲ့ အိမ်တော်ဖြစ်ခဲ့ပါတယ်။ အခုတော့ အပျက်အစီးတွေကြားမှာ ကြည့်လိုက်တာနဲ့ ခြောက်ခြားစရာကောင်းတဲ့ အိမ်ကြီးတစ်လုံး ဖြစ်နေပါပြီ။ အဲဒီအိမ်ကို ပြုပြင်ဖို့ ရောက်လာတဲ့ အင်ဂျင်နီယာအဖွဲ့က ခြံဝန်းကို ရှင်းလင်းနေတုန်း အရိုးစုတစ်စု တွေ့သွားပါတယ်။ အိမ်ကြီးရဲ့ ရာဇဝင်ကို သိထားတဲ့ အလုပ်သမားတွေက အလုပ်ထွက်သွားကြလို့ အဖွဲ့ခေါင်းဆောင်တစ်ယောက်ပဲ ကျန်ခဲ့တော့တယ်။ သူက အိမ်မှာနေပြီး လုပ်ငန်းဆက်လုပ်ဖို့ ပြင်ဆင်ရာက ကျောချမ်းစရာအဖြစ်အပျက်တွေ ဆက်တိုက်ကြုံလာရပါတယ်။ အိမ်မှာကပ်တွယ်နေတဲ့ မကျွတ်မလွတ်တဲ့သရဲက ဘယ်လိုအရိပ်အယောင်တွေ ပြလာမလဲ၊ သူ့ကို ဘယ်လိုခြောက်လှန့်မလဲဆိုတာ ဆက်တွေ့ရမှာပါ။ ပထမကားကို ၂၀၁၄ ခုနှစ်မှာ ထွက်ရှိခဲ့ပြီး ဒီဒုတိယကားကတော့ ၂၀၁၇ ခုနှစ်မှာ ထွက်ရှိခဲ့ပါတယ်။

မိုက်ကယ်ဟာ ရှေ့နေတစ်ယောက် ဖြစ်လာရမယ့်သူပေမဲ့ မိသားစုဝင်တစ်ယောက် အသတ်ခံရတာကို လက်စားချေရင်း လူသတ်မှုကျူးလွန်မိခဲ့ပါတယ်။ ထောင်ကထွက်လာပြီးနောက်မှာတော့ မိသားစုနဲ့ တူ၊ တူမတွေကို ဦးဆောင်ရင်း အသက်မွေးဝမ်းကျောင်းပြုလာခဲ့တယ်။ လူတွေကြောက်ရတဲ့သူဖြစ်သလို မိသားစုဝင်တွေရဲ့ ချစ်ခင်လေးစားမှုကိုလည်း ရထားပေမဲ့ သူ့ကို မုန်းနေသူတွေကလည်း မိသားစုထဲမှာပဲ ရှိနေပါတယ်။ တူနှစ်ယောက်ဖြစ်တဲ့ ပေါလ်နဲ့ ပီတာက မိုက်ကယ်ဟာ သူတို့ဘဝကို အလွန်အကျွံ လွှမ်းမိုးချုပ်ကိုင်နေတယ်လို့ ခံစားနေကြတာပါ။ မိုက်ကယ်ပိုင်တဲ့ သိုလှောင်ရုံတစ်ခုကို နောက်တူတစ်ယောက်ဖြစ်တဲ့ အမ်မီဆီ လွှဲပေးလိုက်တဲ့အခါ သူတို့နှစ်ယောက် ပိုပြီးမကျေမနပ် ဖြစ်လာကြတယ်။ ဒီလိုနဲ့ ပေါလ်နဲ့ ပီတာတို့ မိုက်ကယ်ရဲ့ ရန်သူဟောင်းဆီ သွားတွေ့မိကြတဲ့အခါ ဘာတွေ ဆက်ဖြစ်လာမလဲ၊ မိုက်ကယ်ကို လက်စားချေဖို့အထိ ကြိုးစားကြမလားဆိုတာ ဆက်တွေ့ရမှာပါ။

သူငယ်ချင်းတစ်စုက သရဲကားတွေ ရိုက်ကူးလေ့ရှိတဲ့ နေရာတွေကို လိုက်လည်ချင်နေကြပါတယ်။ ဒီလိုနဲ့ Friday the 13th ရုပ်ရှင်ထဲကလို နေရာတစ်ခုဆီ သွားရောက်လည်ပတ်ကြရာက ဇာတ်လမ်းစထားတာပါ။ သရဲကားထဲကလို နေရာကို ကိုယ်တိုင်ရောက်သွားတဲ့ သူတို့ ဘာတွေကြုံရမလဲ၊ ဒုက္ခရောက်ကြမလား၊ လွတ်မြောက်နိုင်ကြမလားဆိုတာကို သည်းထိတ်ရင်ဖိုပုံစံနဲ့ ဆက်ပြထားပါတယ်။

ဟင်ဒူနဲ့ မွတ်စလင်တို့ကြား ပဋိပက္ခတွေ ဖြစ်ပွားနေတဲ့ ကက်ရှမီးဒေသမှာ စစ်သွေးကြွအုပ်စုတစ်စုက ဒေသကို ဖျက်ဆီးပြီး အမုန်းတရားတွေ ပိုပြန့်လာအောင် လျှို့ဝှက်ကြံစည်နေကြပါတယ်။ ရဲအရာရှိတစ်ယောက်က ဒီအစီအစဉ်ကို စုံစမ်းဖော်ထုတ်ဖို့ ကြိုးစားနေချိန်မှာပဲ အဲဒီအုပ်စုထဲကို မတော်တဆ ရောက်သွားသူက သူ့ရဲ့မွေးစားသား ဖြစ်နေပါတယ်။ အမုန်းတရားတွေ နောက်ခံထားတဲ့ အခြေအနေကြားမှာ သားအဖနှစ်ယောက် ထိပ်တိုက်တွေ့လာကြရတာပါ။ ဇာတ်လမ်းက အိန္ဒိယနဲ့ ပါကစ္စတန်ကြားက ပဋိပက္ခကို နောက်ခံထားပြီး ရင်ထဲမှာ အမုန်းတွေရှိနေတဲ့ လူငယ်တွေကို အစွန်းရောက်အုပ်စုတွေက ဘယ်လိုသိမ်းသွင်းကြသလဲဆိုတာကိုလည်း ဖော်ပြထားပါတယ်။ ကိုယ်ကျိုးအတွက် ဘာသာရေးကို အမည်ခံ၊ လုပ်ကြံထားတဲ့အကြောင်းတွေ ဖြန့်ပြီး လူငယ်တွေကို အသုံးချကြတဲ့အကြောင်း ပါဝင်ပါတယ်။ ရီသစ်ရိုရှန်းနဲ့ ဆန်ဂျေးဒသ်တို့ ပါဝင်သရုပ်ဆောင်ထားပါတယ်။

၂၀၀၉ ခုနှစ်က Haunted Universities ရဲ့ နောက်ဆက်တွဲဖြစ်တဲ့ ဒီကားမှာ တက္ကသိုလ်ကျောင်းသားတွေကြား ပြောလေ့ရှိတဲ့ သရဲဇာတ်လမ်းသုံးခုကို တင်ဆက်ထားပါတယ်။ ကျောင်းတက်နေရင်း သရဲတွေကို မြင်နေရတဲ့ သူငယ်ချင်းနှစ်ယောက်ရဲ့အကြောင်းနဲ့ အထိမ်းအမှတ်နေ့မှာ သေဆုံးခဲ့ပြီး စိတ်စွဲကျန်နေတဲ့ ဆေးကျောင်းသားတစ်ယောက်ရဲ့အကြောင်းတို့ ပါဝင်တယ်။ နောက်ထပ် ဇာတ်လမ်းတစ်ခုကတော့ သရဲရာဇဝင်တွေရှိတဲ့ အဆောက်အဦဟောင်းကြီးနဲ့ ဆက်နွယ်နေပါတယ်။ ကျောင်းမပြီးခဲ့ဘဲ သေဆုံးသွားတဲ့ စီနီယာ၊ နှလုံးဖောက်ပြီး သေဆုံးခဲ့တဲ့ ဆရာမနဲ့ ကချေသည်သရဲတို့အကြောင်း အဲဒီအဆောက်အဦမှာ ပြောစမှတ်ရှိနေကြတာပါ။ ဝိညာဉ်တွေရဲ့ စွဲလမ်းမှုတွေကို ကြောက်စရာ၊ သနားစရာအဖြစ်တွေအပြင် ဟာသပါ ရောနှောပြီး ပြထားပါတယ်။ ထျန်အဖြစ် James Teeradon၊ တျန်အဖြစ် Nana Sawanya၊ မေဆာအဖြစ် Music Praewa၊ တိုင်အဖြစ် Care Panisara၊ ဂေါပ့်အဖြစ် Kit Krit နဲ့ မင်အဖြစ် Belle Kemisara တို့ ပါဝင်သရုပ်ဆောင်ထားပါတယ်။

စကားမပြောတတ်တဲ့ ကျောင်းသူလေး ရှောင်မန့်ဟာ အဖေရှိရာရွာကို ပြန်လာပြီး သိပ်မကြာခင် သေဆုံးသွားပါတယ်။ ကိုယ့်ကိုယ်ကိုယ် သတ်သေခဲ့တယ်လို့ ယူဆထားကြပေမယ့် အရုပ်ကိုပွေ့လျက် မြစ်ထဲမှာ သေဆုံးနေခဲ့တဲ့ သူ့အဖြစ်က မေးခွန်းတွေ ရှိနေတယ်။ သမီးကို အချစ်ကြီးတဲ့အဖေကတော့ သူ့ဝိညာဉ်ကို အရုပ်ထဲထည့်ဖို့ ပူဇော်ပွဲတစ်ခု လုပ်ပါတော့တယ်။ အဲဒီပွဲမှာ အလောင်းစစ်ဆေးသူနှစ်ဦးနဲ့ ဦးလေးကျိုတို့ သေဆုံးသွားပြီးနောက် ရှောင်မန့်ရဲ့ဝိညာဉ်ပါတဲ့အရုပ်က လူသတ်နေတယ်ဆိုတဲ့ သတင်း တစ်ရွာလုံး ပျံ့သွားပါတယ်။ ဒီအချိန်မှာ ရှောင်မန့်ရဲ့သူငယ်ချင်း ချန်းချန်းက ဆရာတစ်ယောက်၊ သူငယ်ချင်းသုံးယောက်နဲ့အတူ ယွမ်ယောင်ရွာကို ရှုခင်းလေ့လာဖို့ ရောက်လာတယ်။ တကယ်တော့ ချန်းချန်းလာရတဲ့ ရည်ရွယ်ချက်က သူငယ်ချင်းသေဆုံးရတဲ့ အကြောင်းရင်းကို စုံစမ်းပြီး ကလဲ့စားချေဖို့ပါ။ သူတို့အဖွဲ့ဟာ သရဲခြောက်တယ်လို့ နာမည်ထွက်နေတဲ့ ဟွမ်အိမ်မှာ တည်းခိုရဖို့ ဖြစ်လာပြီး ထူးဆန်းတဲ့ကိစ္စတွေ ဆက်တိုက်ကြုံရသလို အန္တရာယ်တွေထဲလည်း ရောက်လာကြပါတယ်။ ပြဇာတ်အဖွဲ့ခေါင်းဆောင်ရဲ့သမီး ရှောင်မန့်က တကယ်ပဲ ကိုယ့်ကိုယ်ကိုယ် သတ်သေခဲ့တာလား၊ သူ့သေဆုံးမှုနောက်မှာ အကြံအစည်တစ်ခု ရှိနေတာလား၊ တရားခံအစစ်ကရော ဘယ်သူလဲ။

ရာဇဝတ်မှုတွေ ထူပြောနေတဲ့ ဒက်ထရွိုက်မြို့ရဲ့ ရဲဌာနကို မာဖီဆိုတဲ့ ရဲတစ်ယောက် တာဝန်ပြောင်းလာပါတယ်။ သူက ရဲမေ လူးဝစ်နဲ့ တွဲဖက်တာဝန်ထမ်းဆောင်ရင်း လူဆိုးဂိုဏ်းတစ်ဂိုဏ်းကို လိုက်ဖမ်းခဲ့တယ်။ ဒါပေမယ့် မာဖီဟာ အဲဒီလူဆိုးတွေလက်ထဲမှာ ရက်ရက်စက်စက် အသတ်ခံလိုက်ရပါတယ်။ တစ်ဖက်မှာတော့ OCP ဆိုတဲ့ အဖွဲ့အစည်းက ဒယ်တာမြို့သစ် တည်ဆောက်ဖို့ ဒက်ထရွိုက်အစိုးရနဲ့ စာချုပ်ချုပ်ထားပါတယ်။ သူတို့က ရဲတွေနေရာမှာ အစားထိုးသုံးဖို့ စက်ပစ္စည်းတစ်ခု တီထွင်ခဲ့ပေမယ့် ပရိုဂရမ်အမှားကြောင့် အဆင်မပြေဖြစ်ခဲ့တယ်။ အဲဒီနောက် စမ်းသပ်မှုအသစ်အတွက် သေဆုံးသွားတဲ့ မာဖီရဲ့ ခန္ဓာကိုယ်ကို အသုံးချပြီး စက်ရုပ်ရဲအဖြစ် ပြန်အသက်သွင်းလိုက်ပါတယ်။ စက်ရုပ်ရဲဖြစ်လာတဲ့ မာဖီက ဒက်ထရွိုက်မြို့အတွက် အထောက်အကူ ဖြစ်လာနိုင်မလား။ သူ့ကို သတ်ခဲ့တဲ့ လူဆိုးတွေကို ပြန်လက်စားချေမလားဆိုတာအပြင် ဒီတီထွင်မှုကို ဖျက်ဆီးချင်တဲ့သူတွေ ရှိလာဦးမလားဆိုတဲ့ မေးခွန်းတွေလည်း ရှိနေပါတယ်။