အက်ရှင်ကားများ

နီကိုလက်ကေ့ဂျ်က ဒီဇာတ်ကားမှာ သူ့နာမည်နဲ့ပဲ မင်းသားတစ်ယောက်အဖြစ် သရုပ်ဆောင်ထားပါတယ်။ ဇာတ်လမ်းထဲက နစ်ခ်ကေ့ဂျ်ဟာ အကြွေးတွေထူနေပြီး ရုပ်ရှင်ရိုက်ခွင့်ရဖို့လည်း ခက်ခက်ခဲခဲ ကြိုးစားနေရသူပါ။ ဇနီးနဲ့ ကွာရှင်းထားသလို ကလေးနဲ့လည်း အဆင်မပြေဖြစ်နေတယ်။ ဒီလိုအချိန်မှာ သူဌေးတစ်ယောက်က သူ့မွေးနေ့ပါတီကို တက်ရောက်ပေးရုံနဲ့ ဒေါ်လာတစ်သန်းပေးမယ်လို့ ကမ်းလှမ်းလာပါတယ်။ ရွေးစရာမရှိတော့တဲ့ နစ်ခ်က ပေဒရိုပက်စ်ကယ် သရုပ်ဆောင်ထားတဲ့ ဟာဗီဆိုသူ သူဌေးဆီ သွားလိုက်တယ်။ မွေးနေ့ပွဲတက်ဖို့ လာခဲ့ရာက မထင်မှတ်ဘဲ စီအိုင်အေနဲ့ လူဆိုးဂိုဏ်းတို့ရဲ့ အရှုပ်အထွေးတွေကြား ညပ်မိပြီး စွန့်စားခန်းတွေ ကြုံရပါတော့တယ်။

မာသီက သိပ္ပံနည်းကျ ပစ္စည်းတွေ တီထွင်ဖန်တီးရတာကို ဝါသနာပါတဲ့ လူငယ်တစ်ယောက်ပါ။ ကိုယ့်ဖန်တီးမှုတွေကို အသိအမှတ်ပြုခံရဖို့ နေ့တိုင်းကြိုးစားနေပေမယ့် အငြင်းခံရတာ များလွန်းလို့ အဲဒီအဖြစ်နဲ့တောင် အသားကျနေပြီ။ အိပ်မက်ကြီးကြီးရှိသလို မတရားတာမြင်ရင် ငြိမ်မနေနိုင်ဘဲ လူတွေကို ကူညီအကျိုးပြုပေးတတ်သူလည်း ဖြစ်ပါတယ်။ သူ့အကြောင်းနဲ့အပြိုင် နောက်တစ်ဖက်မှာတော့ လူခြောက်ယောက်အဖွဲ့က အစီအစဉ်တွေ အသေအချာချပြီး လက်ဝတ်ရတနာဆိုင်တွေကို လိုက်ဖောက်နေကြတယ်။ သူတို့က စိန်တွေကိုပဲ သီးသန့်ခိုးယူနေကြတာပါ။ ဒီလူခြောက်ယောက်နဲ့ မာသီ ဘယ်လိုတွေ့ဆုံကြမလဲ၊ တွေ့ဆုံမိရာက ဘယ်လိုအကျိုးဆက်တွေ ဖြစ်လာမလဲဆိုတာကို ဇာတ်အိမ်နှစ်ခု အပြိုင်တည်ပြီး ပြောပြထားပါတယ်။ အက်ရှင်နဲ့ ဒရာမာ ရောစပ်ထားတဲ့ တမီးလ်ဇာတ်ကားဖြစ်ပြီး ဇာတ်ကားအစကတည်းက သီချင်းမြူးမြူးတွေလည်း ပါဝင်ပါတယ်။

မှုခင်းစာရင်းကိုင် ဂျင်မီရူးဒေါ့ဖ်ဟာ ဆုံးသွားတဲ့ အစ်ကိုရဲ့ အရိုးပြာကို ရေမျှောဖို့ ကမ်းခြေဆီ ထွက်လာရင်း လမ်းဘေးစတိုးဆိုင်တစ်ဆိုင်မှာ မုန့်ဝင်ဝယ်ပါတယ်။ အဲဒီမှာ ကောင်တာက ကောင်မလေးက သူ့ကိုတော့ ဘာမှမလုပ်ဘဲ ဆိုင်ထဲဝင်လာတဲ့ တခြားလူအားလုံးကို သေနတ်နဲ့ပစ်၊ ဓားနဲ့ပေါက်ပြီး သတ်လိုက်တာကို တွေ့လိုက်ရတယ်။ ဂျင်မီလည်း ဘာလုပ်ရမှန်းမသိ ဖြစ်သွားပြီး ကျသင့်ငွေကို ကောင်တာပေါ်တင်လို့ ဆိုင်ထဲက ပြန်ထွက်လာခဲ့ပါတယ်။ ကားပေါ်တက်ပြီး မောင်းထွက်လာပေမယ့် ခုနက ကောင်မလေးက သူ့ကားထဲ လိုက်ပါလာနှင့်နေပြီ။ သူ့နာမည်က နတ်တာရှာဖြစ်ပြီး ကိုယ်တူစိတ်ကွဲရောဂါ DID ခံစားနေရတဲ့ ကြေးစားတစ်ယောက်ပါ။ နတ်နဲ့ တာရှာဆိုတဲ့ စိတ်နှစ်ခုရှိပြီး တာရှာက ပြဿနာတွေရှာသမျှ ဉာဏ်ကောင်းတဲ့ နတ်က လိုက်ရှင်းနေရတယ်။ အခုလည်း ဒုစရိုက်သမားအလုပ်ရှင်ဆီက ပိုက်ဆံခိုးလာလို့ သူ့ကို အဖွဲ့လိုက် လိုက်သတ်နေကြတာ ဖြစ်ပါတယ်။ အစ်ကို့အရိုးပြာ ရေမျှောဖို့ ထွက်လာတဲ့ ဂျင်မီရဲ့ ခရီးထဲကို နတ်တာရှာ အမှတ်မထင် ဝင်လာတဲ့အခါ ဘာတွေ ဆက်ဖြစ်ကြဦးမလဲ။ နောက်ကလိုက်နေတဲ့ လူသတ်သမားတွေရန်ကနေရော လွတ်အောင် ရှောင်နိုင်ကြပါ့မလားဆိုတာကို ဟာသနှောထားတဲ့ အက်ရှင်ဇာတ်လမ်းအဖြစ် ဆက်ထားပါတယ်။

ဖိလစ်ပိုင်ရဲ့ မြေအောက်ကြေးစားလက်ဝှေ့လောကမှာ ကျင်လည်နေတဲ့ ဖိုက်တာတစ်ယောက်ဟာ ကိုရီးယားလူမျိုးဖခင်နဲ့ ဖိလစ်ပိုင်လူမျိုးမိခင်တို့က မွေးဖွားလာသူပါ။ လက်ရှိမှာ မိခင်နဲ့အတူ နေထိုင်ပြီး ကျန်းမာရေးမကောင်းတဲ့ မိခင်အတွက် ကြုံရာကြိုးဝိုင်းမှာ လက်ဝှေ့ထိုးရင်း ပိုက်ဆံရှာနေရတယ်။ သူဖြစ်ချင်တာက ကိုရီးယားမှာရှိတဲ့ ဖခင်ကို ရှာတွေ့ပြီး မိသားစုအတူ ပျော်ပျော်ရွှင်ရွှင် နေထိုင်နိုင်ဖို့ပါ။ တစ်နေ့မှာ အဖေဘက်ကလူတွေက သူ့ကို ရှာတွေ့သွားပြီး ကိုရီးယားကို လိုက်ခဲ့ဖို့ ခေါ်လာကြပါတယ်။ ဖခင်နဲ့တွေ့ရတော့မယ်ဆိုပြီး ထွက်လာတဲ့ခရီးမှာတော့ မမျှော်လင့်ဘဲ ကြေးစားလူသတ်သမားအများအပြားက သူ့နောက်ကို လိုက်လာကြတယ်။ Kim Seon-Ho ကို လက်မရွံ့တဲ့ ကြေးစားလူသတ်သမားဟန်ပန်နဲ့ တွေ့ရမယ့် အက်ရှင်ဒရာမာဖြစ်ပြီး ကြမ်းတမ်းတဲ့ သတ်ဖြတ်ခန်းတွေ ပါဝင်ပါတယ်။

ဘဏ်ဓားပြတိုက်ပြီး ထွက်ပြေးလာတဲ့ ညီအစ်ကိုနှစ်ယောက်ရဲ့ လူနာတင်ကားပေါ်မှာ သေနတ်မှန်ထားတဲ့ ရဲတစ်ယောက်နဲ့ အရေးပေါ်ဆေးအကူ မိန်းကလေးတစ်ယောက် ဓားစာခံအဖြစ် ပါလာပါတယ်။ ဓားစာခံတွေ ရှိနေတာကြောင့် ရဲတွေနဲ့ အက်ဖ်ဘီအိုင်က ချက်ချင်းဝင်စီးဖို့ မလွယ်ဘဲ နောက်ကနေ ကပ်လိုက်ရင်း ညှိနှိုင်းနေကြရတယ်။ ညီအစ်ကိုနှစ်ယောက်ကလည်း လူနာတင်ကားဖြစ်နေတာကို အခွင့်ကောင်းယူပြီး တစ်မြို့လုံးပတ်မောင်းရင်း လွတ်မြောက်ဖို့ အကြံမျိုးစုံ ထုတ်ကြပါတယ်။ ထရန်စဖော်မာဇာတ်ကားတွေနဲ့ လူသိများတဲ့ ဒါရိုက်တာ မိုက်ကယ်ဘေး ရိုက်ကူးထားပြီး ဂျိတ် ဂျီလင်ဟော ခေါင်းဆောင်ပါဝင်တဲ့ မှုခင်းအက်ရှင်ဒရာမာပါ။

ပစိဖိတ်သမုဒ္ဒရာထဲမှာ စစ်ရေးလေ့ကျင့်နေတဲ့ တောင်ကိုရီးယားရေတပ်ရဲ့ ရေငုပ်သင်္ဘောတစ်စီးဟာ အချိန်အတော်ကြာ လေ့ကျင့်မှုတွေ လုပ်ပြီးနောက် ကိုရီးယားကျွန်းဆွယ်ဘက်ကို ပြန်လာခဲ့ပါတယ်။ အပြန်ခရီးမှာ မုန်တိုင်းပြင်းပြင်းနဲ့ ကြုံနေရတဲ့အပြင် အမည်မသိ ချေမှုန်းရေးသင်္ဘောတစ်စီးကပါ တော်ပီဒိုကြီးတစ်လုံးနဲ့ ပစ်ခတ်တိုက်ခိုက်လာတယ်။ မမျှော်လင့်ထားတဲ့ တိုက်ခိုက်မှုဖြစ်သလို တန်ပြန်တိုက်ခိုက်ဖို့ လက်နက်တွေကိုလည်း စစ်ရေးလေ့ကျင့်မှုမှာ သုံးခဲ့ပြီးပါပြီ။ ဒါကြောင့် ရေငုပ်သင်္ဘောပေါ်က လူတွေဟာ တော်ပီဒိုထိမှန်မယ့်အန္တရာယ်ကနေ အသည်းအသန် လွတ်အောင် ရုန်းကြရပါတော့တယ်။ Kim Rae Won နဲ့ Lee Jong Suk တို့ အဓိကပါဝင်ထားတဲ့ အက်ရှင်ဇာတ်ကားပါ။

ကားပြိုင်သမား လင်ချွမ်က သူ့ပြိုင်ဘက် လျန်ဇီကို တိတ်တခိုး သဘောကျနေသူပါ။ ပြိုင်ပွဲတစ်ခုမှာ လျန်ဇီနောက်ကို လိုက်ရင်း သဲကန္တာရထဲ ရောက်လာခဲ့တယ်။ ညနက်ပိုင်း သူတို့စခန်းချနားနေတဲ့နေရာကို သတ္တဝါကြီးတစ်ကောင် ဝင်တိုက်ခိုက်တဲ့အခါ လင်ချွမ်တို့အဖွဲ့ အသက်လုပြီး ထွက်ပြေးကြရပေမဲ့ လျန်ဇီကတော့ ဘယ်ရောက်သွားမှန်း မသိတော့ပါဘူး။ လျန်ဇီကို ရှာဖို့ ခရီးဆက်လာရင်း စွန့်ပစ်စက်ရုံတစ်ခုနားကို ရောက်လာကြတယ်။ အဲဒီနေရာမှာ ရှားပါးတွင်းထွက်ပစ္စည်းတွေ တူးယူချင်တဲ့ စီးပွားရေးသမား စုန်းကွမ်တို့အုပ်စုလည်း ရှိနေပါတယ်။ ညရောက်လာတော့ အုပ်စုနှစ်စုလုံး မြွေဆိုးကြီးတစ်ကောင်နဲ့ ရင်ဆိုင်ရပြီး စက်ရုံထဲမှာ ပိတ်မိသွားကြတယ်။ ဝေးလံခေါင်ဖျားတဲ့ လူသူမရှိရာအရပ်မှာ ရောက်နေကြတဲ့ သူတို့အတွက် မြွေဆိုးအန္တရာယ်ကနေ အသက်ရှင်လွတ်မြောက်ဖို့ ဘယ်လိုရင်ဆိုင်တိုက်ခိုက်ကြမလဲဆိုတာ ဆက်ကြည့်ရမှာပါ။

Tiger Cage ရဲ့ အဆက်ဖြစ်တဲ့ Tiger Cage II က ဟောင်ကောင်စုံထောက်ရဲတွေနဲ့ လူဆိုးဂိုဏ်းတွေကြားက စွန့်စားခန်းတွေကို ရိုက်ကူးထားတဲ့ အက်ရှင်ဇာတ်ကားပါ။ In the Line of Duty ဇာတ်ကားတွေလို ဟောင်ကောင်ရဲအက်ရှင်ပုံစံဖြစ်ပြီး အချစ်ရေးနဲ့ ဟာသအလွဲတွေလည်း ရောပါပါတယ်။ Donnie Yen ကို ငယ်ရွယ်တဲ့အချိန်က ခပ်ဂျစ်ဂျစ်ဟန်ပန်နဲ့ တွေ့ရမှာဖြစ်ပြီး Rosamund Kwan၊ Cynthia Khan နဲ့ David Wu တို့လည်း ပါဝင်ထားကြပါတယ်။ Rosamund Kwan ကတော့ ဂျက်လီ၊ ဂျက်ကီချန်း၊ စတီဖင်ချောင်တို့နဲ့လည်း ဇာတ်ကားတွေ တွဲရိုက်ခဲ့ဖူးသူပါ။

ရုပ်ရှင်ကို ဝါသနာကြီးတဲ့ လူငယ်တစ်ယောက်ဟာ သူ့ရဲ့ ပွဲဦးထွက်ဇာတ်ကားအတွက် ဂိုဏ်းစတားတစ်ယောက်ရဲ့ ဘဝအကြောင်းကို ရိုက်ကူးဖို့ စိတ်ကူးထားပါတယ်။ ဒီလိုနဲ့ ရက်စက်ကြမ်းတမ်းတဲ့ ဂန္ဒလကွန်ဒါဂန္နီချ်အကြောင်း ရိုက်ဖို့ အကြောင်းဖန်လာတယ်။ သူနဲ့ သူငယ်ချင်းဖြစ်သူတို့ နှစ်ယောက်သား အသက်အန္တရာယ်ရှိနိုင်တဲ့ကြားက ဂန္နီချ်ရဲ့ ဘဝဇာတ်ကြောင်းကို သိရဖို့ ကြိုးစားကြပါတယ်။ ဒါပေမယ့် ဂန္နီချ်က သူ့အကြောင်း ရုပ်ရှင်ရိုက်ဖို့ သဘောတူပါ့မလား။ ဒီလူဆိုးရဲ့ နောက်ကြောင်းမှာ ဘာတွေရှိပြီး ဘယ်လိုအဖြစ်အပျက်တွေ ကြုံခဲ့ရသလဲဆိုတာကိုလည်း သိရဦးမှာပါ။ အချစ်ရေးကိုတောင် ဘေးဖယ်ပြီး ပွဲဦးထွက်ဇာတ်ကားအတွက် အာရုံစိုက်နေတဲ့ ဒါရိုက်တာလူငယ်ရဲ့ ကြိုးစားမှုကရော အောင်မြင်လာနိုင်မလား။

ကျောင်းတွင်းလူသတ်မှုကြောင့် ထောင်ကျခဲ့တဲ့ ဘောစ့်ကို ဖခင်ဖြစ်သူက သားတစ်ယောက်လို မဆက်ဆံတော့ပါဘူး။ ပြစ်ဒဏ်ကျခံပြီး ထောင်ကထွက်လာတဲ့နောက် ဘောစ့်ဟာ ဂိုဏ်းစတားတစ်ယောက် ဖြစ်လာပေမယ့် အကူအညီလိုနေသူတွေကို လိုက်ကူပေးရင်း နေထိုင်နေပါတယ်။ တစ်နေ့မှာ ဆက်ယာကန့်ဆိုသူက လူတစ်ယောက်ကို သတ်ပေးဖို့ ဘောစ့်နဲ့ စာချုပ်ချုပ်လာတယ်။ ပစ်မှတ်ဖြစ်နေသူကတော့ ဘောစ့်ရဲ့ညီ ရှိဗ့်ပါ။ ရှိဗ့်ဟာ ရဲမှူးအက်ရှုမန်ရဲ့ညီမနဲ့ ချစ်ကြိုက်နေပြီး အက်ရှုမန်က သူတို့အချစ်ရေးကို သဘောမတူဘူး။ အဲဒီအတွက် အက်ရှုမန် ဘယ်လိုလုပ်ကြံလာမလဲဆိုတာနဲ့အတူ ဘောစ့်ဟာ ဖခင်နဲ့အဆင်မပြေတဲ့ကြားက မိသားစုကို ကာကွယ်ပေးဖို့ ကြိုးစားရပါတော့တယ်။ အက်ရှုမန်ရဲ့ရန်ကို ဘောစ့် ဘယ်လိုရင်ဆိုင်မလဲဆိုတာအပြင် သူထောင်ကျခဲ့ရတဲ့ ကျောင်းတွင်းလူသတ်မှုနောက်ကွယ်မှာ ဖုံးကွယ်ထားတဲ့အကြောင်းတွေကလည်း ရှိနေပါတယ်။ ဘောစ့်အဖြစ် Akshay Kumar သရုပ်ဆောင်ထားပြီး အတိုက်အခိုက်နဲ့ ဟာသကို တွဲဖက်ထားတဲ့ ဇာတ်ကားပါ။

ကျောင်းပြန်ပေးဆွဲခံရတဲ့ ဖြစ်ရပ်ဆိုးတစ်ခုအပြီးမှာ Ghost Team အထူးတပ်ဖွဲ့ဝင်တွေ ခြေရာဖျောက်ခဲ့ကြရပါတယ်။ ရဲမှူးကြီး အော်လ်စတန်ကတော့ ရာထူးမှာ ဆက်ရှိနေခဲ့တယ်။ အဲဒီဖြစ်ရပ်ကနေ ဆယ့်ရှစ်လအကြာမှာ Ghost Team အဖွဲ့ဝင်ဟောင်း ကော်နာကော်နယ်လီဟာ ရဲတပ်ဖွဲ့ဝင်အဖြစ် ဆက်လက်အလုပ်လုပ်နေပါတယ်။ တစ်နေ့မှာ ကော်နာက သူ့အကျဉ်းသားတစ်ယောက်နောက်ကို လိုက်ဖမ်းနေတဲ့ ဂိုဏ်းသားတစ်ယောက်ကို သတ်မိသွားတယ်။ သေသွားသူက မြို့ရဲ့နာမည်ကြီး မူးယစ်ရာဇာတစ်ယောက်ရဲ့လူ ဖြစ်နေတော့ ကော်နာလည်း အန္တရာယ်နဲ့ ရင်ဆိုင်ရပါတော့တယ်။ မူးယစ်ရာဇာကို သူဘယ်လိုပြန်ပေးဆပ်ရမလဲ၊ အဲဒီအန္တရာယ်ကနေ လွတ်အောင် ရှောင်နိုင်ပါ့မလားဆိုတာကို ဆက်ထားတဲ့ အက်ရှင်ဇာတ်ကားဖြစ်ပြီး Bruce Willis လည်း ပါဝင်သရုပ်ဆောင်ထားပါတယ်။

အထက်တန်းကျောင်းသားဘဝကတည်းက ပြစ်မှုမှတ်တမ်းတွေ တသီတတန်းရှိခဲ့တဲ့ အမျိုးသားတစ်ယောက်ဟာ အခုတော့ သားဖြစ်သူနဲ့အတူ အိမ်ကောင်းကောင်းမှာ နေနိုင်ဖို့ ကြုံရာအလုပ်တွေ လုပ်နေပါတယ်။ နေ့စားအငှားကားလည်း မောင်းရင်း တစ်နေ့မှာ ပိုက်ဆံပေါပြီး လေဆိပ်ကို အမြန်သွားချင်နေတဲ့ ခရီးသည်တစ်ယောက်နဲ့ ဆုံမိတယ်။ ဒါပေမယ့် အဲဒီခရီးသည် အသတ်ခံလိုက်ရပြီး လူသတ်သမားကို မသိရသေးခင်မှာပဲ ကားမောင်းသူဆီ အပြစ်ပုံကျလာပါတယ်။ ကိုယ်မကျူးလွန်ခဲ့တဲ့ ပြစ်မှုအတွက် ဝရမ်းပြေးဖြစ်သွားတဲ့သူဟာ ထွက်ပြေးရင်းနဲ့ပဲ အမှုအမှန်ပေါ်လာဖို့ စုံစမ်းရတယ်။ အရင်က လေလွင့်နေခဲ့စဉ် တတ်ထားတဲ့ နည်းမျိုးစုံကို အသုံးချပြီး နောက်ကလိုက်နေတဲ့ နိုင်ငံရေးအဖွဲ့အစည်းတွေ၊ လူဆိုးတွေနဲ့ ရဲတွေကို လှည့်စားရှောင်တိမ်းနေရပါတယ်။ အမှုနဲ့ပတ်သက်သူတွေ တစ်ယောက်ပြီးတစ်ယောက် အသတ်ခံလာရပြီး အကြောင်းအရာတွေကို ဆက်စပ်မိခါနီးမှာ သားဖြစ်သူကပါ တရားခံကို ဖမ်းဖို့ ဝင်ကူလာတယ်။ နိုင်ငံရေးနဲ့ လုံခြုံရေးဆိုင်ရာ အရှုပ်အထွေးတွေကြားက တရားခံအစစ်ဟာ ဘယ်သူလဲ၊ သားအဖနှစ်ယောက် အမှန်တရားကို ဖော်ထုတ်နိုင်မလားဆိုတဲ့ ဇာတ်လမ်းထဲမှာ သားအဖမေတ္တာနဲ့ ဟာသအခန်းတွေလည်း ပါဝင်ပါတယ်။

အာဂျွန်တို့မိသားစုဟာ ငွေကြေးမပြေလည်တဲ့ကြားက ညီမငယ်ရမ်ယာရဲ့ မင်္ဂလာပွဲအတွက် အိမ်ကိုပေါင်ပြီး ပိုက်ဆံချေးထားရပါတယ်။ အပြန်လမ်းမှာတော့ စာရွက်စာတမ်းနဲ့ ကိုယ်ရေးအချက်အလက်တွေ မပါလို့ဆိုပြီး ရဲတွေက သံသယဝင်ကာ ပါလာတဲ့ပစ္စည်းတွေကို တစ်ညသိမ်းထားလိုက်တယ်။ နောက်နေ့ စာရွက်စာတမ်းပြပြီး ပြန်လာထုတ်ဖို့ ပြောလိုက်တာပါ။ အာဂျွန် ရဲစခန်းကို သွားထုတ်တဲ့အခါ ပေးထားတဲ့ငွေ သိန်းနှစ်ဆယ်အစား ငါးသိန်းပဲ ပြန်ရပါတော့တယ်။ ဒီငွေမရှိရင် ညီမလေးရဲ့မင်္ဂလာပွဲ ပျက်တော့မှာမို့ သူလည်း ဘာလုပ်ရမှန်းမသိ ဖြစ်သွားတယ်။ ပျောက်နေတဲ့ငွေတွေ ဘယ်ရောက်သွားတာလဲ။ သူသံသယရှိသလို ရဲတွေက ကြားထဲကနေ အစဖျောက်ယူထားတာလား။ မိဘနှစ်ပါးကိုလည်း ဖြစ်ကြောင်းကုန်စင် ဖွင့်မပြောနိုင်သလို ညီမရဲ့မင်္ဂလာပွဲကိုလည်း အပျက်မခံနိုင်တဲ့ အာဂျွန်ဟာ ပြဿနာပြေလည်ဖို့ လုပ်မိလုပ်ရာတွေ လုပ်လာပါတယ်။ သွေးထွက်သံယိုတွေ မပါဘဲ လူငယ်တစ်ယောက်နဲ့ ရဲတစ်ယောက်ကြားက ပဋိပက္ခကို သဲလွန်စတွေတစ်ဆင့်ချင်း ဖော်ရင်း ပြထားတဲ့ မှုခင်းဇာတ်ကားပါ။

ပြည်တွင်းစစ်ကနေ စတင်လာတဲ့ စစ်ပွဲတစ်ခုအတွင်းမှာ မိခင်တစ်ယောက်ဟာ သမီးဖြစ်သူကို ဆုံးရှုံးထားပါတယ်။ သူမက သေနတ်ပစ်ကျွမ်းကျင်သလို ရေခဲပြင်စကိတ်စီးရာမှာလည်း ကျွမ်းကျင်သူပါ။ တစ်နေ့မှာ အစိုးရက သူမကို တခြားလူတချို့နဲ့အတူ ဆင့်ခေါ်ပြီး တာဝန်တစ်ခု ပေးအပ်လာပါတယ်။ သူမတို့ကို ပေးတဲ့တာဝန်က ဘာလဲ၊ ခက်ခဲလှတဲ့ ဒီတာဝန်ကို သူမ ထမ်းဆောင်နိုင်ပါ့မလားဆိုတာကို ဇာတ်လမ်းက ဆက်ပြထားတယ်။ ၂၀၂၂ ခုနှစ်ထွက် ဆွီဒင်ရုပ်ရှင်ဖြစ်ပြီး စစ်ပွဲနောက်ခံမှာ အက်ရှင်နဲ့ ဒရာမာကို တွဲတင်ဆက်ထားပါတယ်။

ယယ်ဆိုတဲ့ တိုင်းရင်းဆေးသမားတော်လေးဟာ ရိုးသားဖြူစင်ပြီး ဇနီးနဲ့အတူ ပျော်ပျော်ရွှင်ရွှင် နေထိုင်သူပါ။ လူနာတွေကိုလည်း အခမဲ့ဆေးကုသပေးလေ့ရှိတယ်။ ဒါပေမယ့် လုန်ထလောက်ဆိုတဲ့လူက ယယ်ရဲ့ဇနီးကို လိုချင်နေပြီး ယယ်ကို အဝေးရောက်သွားအောင် အကြောင်းအမျိုးမျိုးဖန်ဖို့ ကြံစည်နေပါတယ်။ တစ်နေ့မှာ လုန်ထလောက်က ဗမာစစ်သူကြီးနေမျိုးရဲ့ခေါင်းကို သွားဖြတ်ယူလာဖို့ ယယ်ကို အပေးအယူလုပ်လာတယ်။ ခေါင်းကို မပုပ်မသိုးဘဲ ယူလာနိုင်ရင် အကြွေးတွေ ကျေအောင်လုပ်ပေးမယ့်အပြင် ဆုငွေပါပေးမယ်ဆိုပြီး မြူဆွယ်တာပါ။ ယယ်ကလည်း အကြွေးကျေချင်သလို ဇနီးအတွက် ရင်းနှီးမြှုပ်နှံဖို့ ငွေလေးရှိစေချင်တာနဲ့ လက်ခံလိုက်ပါတယ်။ လူနာတွေကို ဆေးကုသပေးနေတဲ့ သမားတော်တစ်ယောက်အတွက် ဒီအလုပ်က ဘယ်လိုအခက်အခဲတွေ ရှိလာမလဲ၊ စစ်သူကြီးရဲ့ခေါင်းကို သတ်မှတ်ထားတဲ့အတိုင်း ယူလာနိုင်ပါ့မလားဆိုတာ ဆက်တွေ့ရမှာပါ။ ထိုင်းလူရွှင်တော်များစွာ ပါဝင်ထားပြီး အက်ရှင်နဲ့ စွန့်စားခန်းတွေကို ဟာသနှောပြီး တင်ဆက်ထားပါတယ်။

အေးချမ်းတဲ့ ရွာငယ်လေးတစ်ရွာမှာ ခြင်းတောင်းယက်ရောင်းပြီး အသက်မွေးကြတဲ့ သားအဖနှစ်ယောက် ရှိပါတယ်။ မျက်စိမမြင်တဲ့ အဖေက ကိုယ့်အလုပ်ကိုယ်လုပ်ပြီး အေးအေးဆေးဆေး နေချင်ပေမယ့် သားကတော့ တစ်နေ့နေ့မှာ လူတွေကို ကယ်တင်ပေးနိုင်တဲ့ လူစွမ်းကောင်းတစ်ယောက် ဖြစ်လာဖို့ အိပ်မက်မက်နေတယ်။ အဖေလည်း သားဖြစ်သူ ပေါက်ကရတွေလုပ်ပြီး ဒုက္ခမရောက်အောင် တားနေရသလို သစ်ပင်ကြီးတစ်ပင်ဆီမှာလည်း အမြဲဆုတောင်းပေးနေရပါတယ်။ သားရဲ့အိပ်မက်က အကြောင်းမဲ့တော့ မဟုတ်ပါဘူး။ သူ့ခန္ဓာကိုယ်ထဲမှာ ကိုယ်ယောင်ဖျောက်နိုင်တဲ့ စွမ်းအင်တစ်မျိုး ရှိနေပြီး ဒီအစွမ်းနဲ့ လူစွမ်းကောင်းဖြစ်နိုင်မယ်လို့ ယုံကြည်နေတာပါ။ ခက်တာက ကိုယ်ယောင်ဖျောက်ဖို့ ကြိုးစားတိုင်း အောင်မြင်တာမဟုတ်ဘဲ တစ်ခါရလိုက်၊ တစ်ခါမရလိုက် ဖြစ်နေတယ်။ ဒီလိုအစွမ်းမျိုးနဲ့ သူ့အိပ်မက်ကို ဘယ်လိုအကောင်အထည်ဖော်မလဲ။ လူသားတစ်ယောက်ဖြစ်တဲ့ သူ့ဆီကို ဒီစွမ်းအင် ဘယ်လိုရောက်လာသလဲဆိုတာလည်း မေးစရာဖြစ်နေပါတယ်။

လူတန်းစားအမျိုးမျိုးက ခရီးသည်တွေ လိုက်ပါလာတဲ့ ရထားတစ်စီးဟာ အေးအေးဆေးဆေး ခုတ်မောင်းနေပါတယ်။ ခရီးသည်တွေလည်း စကားတပြောပြောနဲ့ လိုက်လာကြတုန်း တစ်နေရာမှာ ရထားက အကြောင်းမသိဘဲ ရပ်သွားတယ်။ ရထားထဲကနေ ထွက်ဖို့ ကြိုးစားကြရင်း ရုန်းရင်းဆန်ခတ် ဖြစ်လာပြီးမှ ရထားလမ်းမှာ မြေပြိုနေတာကို သိလိုက်ကြပါတယ်။ ဘေးလွတ်မယ့်နေရာမှာ ဆင်းနေကြပေမယ့် ကင်းခြေများအကောင်ရေ ထောင်ချီ ဝိုင်းလာတော့ ရထားပေါ် ပြန်တက်ရုံပဲ ရှိတော့တယ်။ ဒါပေမယ့် ရထားက ဝန်မမျှတော့ဘဲ မြေပြိုနေတဲ့ တွင်းနက်ကြီးထဲ ထိုးကျသွားပါတယ်။ အောက်မှာလည်း ကင်းခြေများတွေ အမြောက်အများ ရှိနေတဲ့အတွက် ခရီးသည်တွေဟာ ခြေဦးတည့်ရာ ထွက်ပြေးကြရပြန်တယ်။ ဘယ်နေရာရောက်နေမှန်း မသိတော့တဲ့ သူတို့ကို ကယ်ဆယ်ရေးအဖွဲ့တွေ ရှာတွေ့နိုင်ပါ့မလား။ သူတို့ကိုယ်တိုင်ရော ကင်းခြေများတွေ ပြည့်နေတဲ့ ဝင်္ကပါထဲကနေ လွတ်အောင် ပြေးနိုင်ကြမလား။ ကင်းခြေများတွေရဲ့ အန္တရာယ်ကြားမှာ ရှင်သန်ဖို့ ရုန်းကန်ကြရင်း ဘေးကြုံလာချိန် လူတွေရဲ့ သဘောသဘာဝကိုပါ မြင်ရမယ့် ဇာတ်လမ်းပါ။

ပထမကမ္ဘာစစ် ဖြစ်နေတဲ့ ၁၉၁၆ ခုနှစ်မှာ အမေရိကန်က စစ်ထဲ မဝင်သေးပါဘူး။ ဒါပေမယ့် စစ်တိုက်ချင်၊ လေယာဉ်မောင်းချင်ကြတဲ့ အမေရိကန်လူငယ်တချို့ကတော့ စစ်ပညာသင်ပေးမယ့် ပြင်သစ်နိုင်ငံဆီ သွားပြီး စစ်ထဲ ဝင်ကြပါတယ်။ Flyboys ဟာ အဲဒီကာလက ဖြစ်ရပ်မှန်ကို အခြေခံရိုက်ကူးထားတဲ့ ဇာတ်ကားပါ။ အကြောင်းအမျိုးမျိုးနဲ့ ရောက်လာကြတဲ့ သူတို့အတွက် လေယာဉ်နဲ့ တာဝန်ထွက်ရတိုင်း အသက်ပြန်ပါလာမလားဆိုတာ မသေချာဘူး။ ကျဆုံးသူတွေ များလာတာနဲ့အမျှ သေဆုံးသတင်းတွေကလည်း ကြားနေကျ ဖြစ်လာတယ်။ မနေ့က အတူရှိခဲ့သူ ဒီနေ့ကျဆုံးသွားတဲ့အခါ လက်စားချေဖို့ အချိန်စောင့်ရင်း အရက်နဲ့ ဖြေသိမ့်သူတွေ ရှိသလို နောက်လူတွေကို ကာကွယ်ဖို့ အသက်စတေးသူတွေလည်း ရှိပါတယ်။ သူတို့ရဲ့ စစ်တွင်းဘဝနဲ့အတူ ကောင်းကင်ပေါ်မှာ လေယာဉ်အချင်းချင်း ရင်ဆိုင်တိုက်ခိုက်ကြတဲ့ တိုက်ပွဲတွေကိုလည်း ပြထားပါတယ်။

ပရမ်းပတာဖြစ်နေတဲ့ ခေတ်ကာလမှာ ချီကျွင်းယွမ်ဟာ လီဟန့်ဂူဆိုတဲ့နေရာက ထိပ်တန်းလူသတ်သမားတစ်ယောက်အဖြစ် ရပ်တည်နေပါတယ်။ သူ့ရင်ထဲမှာလည်း မုန်းတီးမှုတွေ အပြည့်ပါပဲ။ ငယ်စဉ်က ရှေးဟောင်းကြေးပြားမြေပုံတစ်ခုကြောင့် သူ့မိသားစုအပါအဝင် ချီမျိုးနွယ်စုတစ်ခုလုံး အသတ်ခံခဲ့ရတာပါ။ လှည့်ကွက်အမျိုးမျိုးနဲ့ အကွက်ချခံနေရတဲ့ ချီကျွင်းယွမ်က အဲဒီမြေပုံရဲ့နောက်ကြောင်းကို လိုက်စုံစမ်းလာပါတယ်။ မြေပုံနောက်ကွယ်မှာ ဘယ်လိုအမှန်တရားတွေ ရှိနေမလဲဆိုတာကို သိုင်းလောကအကြောင်းနဲ့အတူ ဆက်ပြထားတယ်။ ဒီကားမှာ တိမ်လွှာနဂါးသူရဲကောင်းများထဲက ချောင်ဖုန်းအဖြစ် လူသိများတဲ့ Hu Jun၊ ပိုးမင်းသားလို့ သိကြတဲ့ Norman Chui နဲ့ Prince of Lan Ling မှာ အဓိကသရုပ်ဆောင်ခဲ့တဲ့ William Feng တို့ ပါဝင်ထားပါတယ်။

ခွန်းလွန်တောင်ဟာ ကောင်းကင်ဘုံက နတ်ဘုရားတွေ ကျင့်ကြံအားထုတ်ရာနေရာဖြစ်ပြီး သာမန်မျက်စိနဲ့ မမြင်နိုင်ဘူးလို့ ဆိုကြပါတယ်။ ကောင်းကင်နဲ့ မြေကြီးရဲ့ ကျောရိုးလို့ တင်စားကြတဲ့ ဒီနေရာမှာ နတ်ဘုရားရာချီ တည်ဆောက်ထားတဲ့ ရတနာတိုက်နဲ့ ရှေးဟောင်းအုတ်ဂူအများအပြား ရှိတယ်လို့လည်း ဆိုကြတယ်။ ထျန်းကွမ်းစာအုပ်မှာတော့ တောင်တန်းတွေကြားက အထွတ်အမြတ်ရတနာတွေဆီ ကျောက်မင်က လမ်းပြလိမ့်မယ်လို့ ရေးထားပါတယ်။ ကျောက်မင်ဆိုတာ ရတနာတိုက်ရဲ့သော့ချက်လို့ လူသိများတဲ့ ရှေးဟောင်းကြေးမုံတစ်ချပ်ပါ။ ရတနာကို လောဘတက်ပြီး ခွန်းလွန်ဆီ သွားခဲ့တဲ့ သင်္ချိုင်းဂူဖောက်သမားတွေကတော့ ပြန်မလာနိုင်ဘဲ အထဲမှာ သေဆုံးကုန်ကြတယ်။ သားရဲတိရစ္ဆာန်တွေ၊ နက်လှတဲ့ ချောက်ကမ်းပါးတွေနဲ့ အလောင်းတွေ၊ အရိုးစုတွေ ပြန့်ကျဲနေတဲ့ ခွန်းလွန်ဟာ သွားသူတွေ ပြန်မလာတဲ့ နေရာအဖြစ် ကြောက်စရာဖြစ်နေပါတယ်။ ကျန်းဝမ်ဖုန်းကတော့ ကိုယ့်တိုင်းပြည်ရဲ့ အမွေအနှစ်တွေကို တိုင်းတစ်ပါးသားတွေ လက်ဝါးကြီးအုပ်မယ့်အရေးက ကာကွယ်ဖို့ ခွန်းလွန်ဆီ သွားရတော့တယ်။ နောက်ရည်ရွယ်ချက်တစ်ခုက လွန်ခဲ့တဲ့ ၁၇ နှစ်မှာ ခွန်းလွန်ကို သွားရင်း ပျောက်ဆုံးသွားတဲ့ သူ့အဖေအကြောင်း စုံစမ်းဖို့ပါ။ ဒါပေမယ့် အဲဒီကို ရောက်လာတာ သူတို့တစ်ဖွဲ့တည်း မဟုတ်ဘူး။ တိုင်းတစ်ပါးက အဖွဲ့တစ်ဖွဲ့နဲ့ ရင်ဆိုင်တွေ့ကြတဲ့အခါ အဲဒီအဖွဲ့ခေါင်းဆောင်က လွန်ခဲ့တဲ့ ၁၇ နှစ်တုန်းက သူ့အဖေနဲ့ အတူသွားခဲ့သူရဲ့ တပည့်ဖြစ်နေပါတယ်။

အိန္ဒိယနိုင်ငံသားတွေ အခွန်ဆောင်ရမယ့်နေ့ကို စောင့်နေတဲ့ ဟက်ကာတစ်ယောက် ရှိပါတယ်။ သူ့ရည်ရွယ်ချက်က အဲဒီနေ့မှာ လူတွေရဲ့အကောင့်တွေကို ဖောက်ဝင်ပြီး ငွေတွေကို အပိုင်စီးဖို့ပါ။ သူဟာ ဟက်ကာတစ်ယောက်ဖြစ်သလို ရက်စက်တဲ့ မျက်လှည့်ဆရာတစ်ယောက်လည်း ဖြစ်နေတယ်။ သူ့အစီအစဉ်ကို တားဖို့ ထောက်လှမ်းရေးဘက်က သူ့ထက်တောင် လက်စွမ်းသာတဲ့ ဟက်ကာတစ်ယောက်ကို တာဝန်ပေးလိုက်ပါတယ်။ တိုက်ဂါးရှရော့ဖ် သရုပ်ဆောင်ထားတဲ့ ဒီဟက်ကာက ရန်သူ့အဖွဲ့ထဲ ဝင်ရောက်ပြီး ဒေတာတွေကို ပြန်ဟက်ရမှာပါ။ အဲဒီတာဝန်ကို ထမ်းဆောင်ရင်း ကြုံလာမယ့် စွန့်စားခန်းတွေနဲ့ အက်ရှင်တွေကို အဓိကထား ရိုက်ကူးထားပါတယ်။ ၂၀၁၄ ခုနှစ်က ထွက်ခဲ့တဲ့ ပထမ Heropanti နဲ့ ဇာတ်လမ်းချိတ်ဆက်မှု မရှိတဲ့အတွက် ဒီကားကနေ စကြည့်လို့ရပါတယ်။ မင်းသမီးအဖြစ် Student of the Year 2 ထဲက တာရား ပါဝင်ထားပြီး သူမရဲ့ ဝတ်စားဆင်ယင်ပုံတွေကိုလည်း တွေ့ရမှာပါ။

မြို့လေးတစ်မြို့မှာ သေနတ်အတုတွေနဲ့ ပစ်ခတ်ကစားတဲ့ ပွဲတစ်ခု ကျင်းပနေတုန်း လူတစ်ယောက် ကျည်အစစ်မှန်ပြီး သေဆုံးသွားပါတယ်။ အလောင်းက ရဲစခန်းနှစ်ခုရဲ့ အရေးပိုင်နယ်မြေကြားမှာ ရှိနေတော့ ဘယ်စခန်းက အမှုကို တာဝန်ယူရမလဲဆိုတာ အငြင်းပွားစရာ ဖြစ်လာတယ်။ နောက်တော့ နှစ်ဖက်စခန်းက ပူးပေါင်းစုံစမ်းဖို့ ဖြစ်လာပါတယ်။ သေဆုံးသူဟာ မြို့ခံဂိုဏ်းခေါင်းဆောင်ကြီးရဲ့ ရှေ့နေဖြစ်နေတဲ့အတွက် မြို့ခံလူမိုက်တွေဘက်ကနေ စပြီး စုံစမ်းကြတယ်။ အမှုနောက်ကို လိုက်ရင်း နိုင်ငံရေးသမားတွေနဲ့ပါ ဆက်နွှယ်လာသလို နောက်ထပ်လူတွေလည်း တစ်ယောက်ပြီးတစ်ယောက် သေဆုံးလာပါတယ်။ သံသယရှိသူတွေ များလာတဲ့ကြားက ဘယ်သူ့မှာ တာဝန်ရှိသလဲဆိုတာ တစ်ယောက်ချင်း စိစစ်ဖော်ထုတ်ရတော့တယ်။ ၂၀၁၇ ခုနှစ်က County Line နဲ့ တိုက်ရိုက်ဆက်ထားတဲ့ အဆက်ကားဖြစ်ပြီး အရာရှိ ကလင့်သရုန်း အနားယူသွားပြီးနောက် အရာရှိအသစ် ရောက်လာတဲ့အချိန်ကို ဇာတ်အိမ်တည်ထားပါတယ်။ မြို့ခံဂိုဏ်းတွေနဲ့ ရဲအရာရှိတွေကြားက အရှုပ်အထွေးတွေကို စုံထောက်အက်ရှင်ပုံစံနဲ့ ဆက်ပြထားတာပါ။

အဂျူးဟာ မြို့လေးတစ်မြို့မှာ လူတကာရဲ့ အထင်ကြီးအားကျမှုကို ရထားတဲ့သူပါ။ ဒါပေမယ့် အဲဒီလို လေးစားခံရအောင် သူက အလိမ်အညာတွေနဲ့ ကိုယ့်ပုံရိပ်ကို တည်ဆောက်ထားခဲ့တာဖြစ်တယ်။ လက်ထပ်မယ့်အချိန်မှာတောင် သတို့သမီးလောင်းကို ကိုယ့်ပုံစံအမှန် မပြခဲ့ဘဲ မုသားတွေနဲ့ပဲ ဆက်ဆံခဲ့ပါတယ်။ လူအထင်ကြီးခံချင်တဲ့ အဂျူးက ဇနီးသည်ရဲ့ရောဂါကြောင့် လူပုံအလယ်မှာ အရှက်ကွဲရလိမ့်မယ်လို့ တွေးနေတယ်။ ဒါကြောင့် ဘယ်ကိုပဲသွားသွား ဇနီးကို ခေါ်မသွားခဲ့ဘူး။ သူများတွေ ကိုယ့်ကို ဘယ်လိုမြင်မလဲဆိုတာကိုပဲ ဂရုစိုက်နေတဲ့ အဂျူးနဲ့ သူ့ဇနီးတို့ကြားက ဆက်ဆံရေးဟာ ဘယ်လိုဆက်ဖြစ်လာမလဲ။ ကိုယ့်ပုံစံအမှန်ကို ဖုံးကွယ်ပြီး လူအထင်ကြီးအောင် နေထိုင်ချင်တဲ့စိတ်အကြောင်းကို တင်ပြထားတဲ့ ၂၀၂၃ ခုနှစ်ထွက် ဟင်ဒီစကားပြော ဘောလိဝုဒ်ဇာတ်ကားဖြစ်ပြီး ဗာရွန်းနဲ့ ဂျန်ဗီကပူးရ်တို့ အဓိကပါဝင်သရုပ်ဆောင်ထားပါတယ်။

နယူးယောက်က စုံထောက် မက်စ်ပိန်းရဲ့ ဇနီးမီရှဲလ်နဲ့ မွေးကင်းစကလေးဟာ တစ်နေ့မှာ ဓားပြတစ်စုရဲ့ ရက်စက်စွာသတ်ဖြတ်ခြင်းကို ခံလိုက်ရပါတယ်။ တရားခံတွေ လွတ်မြောက်သွားပြီး ဘယ်လောက်စုံစမ်းစုံစမ်း အမှုမှန်က မပေါ်လာဘူး။ မိသားစုကို ဆုံးရှုံးထားရလို့ စိတ်ဆင်းရဲနေတဲ့ မက်စ်ဟာ အမှုစာရင်းသွင်းရတဲ့ စာရေးသာသာရာထူးအထိလည်း ချခံလိုက်ရတယ်။ ဒါပေမယ့် မက်စ်က လက်မလျှော့ဘဲ ဆက်စုံစမ်းနေပါတယ်။ အဲဒီလို စုံစမ်းရင်း မထင်မှတ်ထားတဲ့ ထူးဆန်းမှုတွေနဲ့ ရင်ဆိုင်လာရတဲ့အခါ သူ့ဇနီးနဲ့ကလေးကို သတ်ခဲ့သူတွေကို ကိုယ်တိုင်တရားစီရင်နိုင်ပါ့မလား။ ဗီဒီယိုဂိမ်းကို အခြေခံရိုက်ကူးထားတဲ့ ဒီဇာတ်ကားမှာ Mark Wahlberg နဲ့ Mila Kunis တို့ ပါဝင်သရုပ်ဆောင်ထားပါတယ်။