အက်ရှင်ကားများ

လူမိုက်တစ်ယောက်ကို ဖမ်းလိုက်တာကြောင့် ဂိုဏ်းစတားတွေက ရဲစခန်းတစ်ခုလုံးကို မီးရှို့ဖျက်ဆီးလိုက်ကြပါတယ်။ ဒီလိုသောင်းကျန်းနေတဲ့ လူမိုက်တွေကို ရှင်းလင်းဖို့ အထက်အရာရှိတွေက ဘာဟ်ဂတ်ဘတ်ခ်ရှီကို တာဝန်ပေးလိုက်တယ်။ သူက တိုက်ပွဲပေါင်းများစွာကို အောင်နိုင်ခဲ့သူဖြစ်ပြီး နိုင်ငံတော်အလံကလွဲရင် ဘယ်သူ့ကိုမှ ဦးမညွှတ်ခဲ့သူပါ။ ဘာဟ်ဂတ်ဘတ်ခ်ရှီဟာ လူမိုက်တွေ ကြီးစိုးနေတဲ့မြို့ကို ရောက်လာပြီး သူတို့အားလုံးကို စုဝေးခိုင်းလိုက်ပါတယ်။ အဲဒီနောက် သူ့အာဏာကို ပြဖို့ သူဖြတ်သန်းခဲ့တဲ့ အတိတ်အကြောင်းကို ပြန်ပြောပြတယ်။ ၁၉၄၂ ခုနှစ်ကနေ ၁၉၈၆ ခုနှစ်အထိ၊ အိန္ဒိယလွတ်လပ်ရေး မရခင်ကာလကစတဲ့ အဖြစ်အပျက်တွေကို နောက်ကြောင်းပြန်ပြကွက်တွေနဲ့ တင်ဆက်ထားပါတယ်။ Shriya Saran က တော်ဝင်မင်းသမီးအဖြစ် ပါဝင်ထားပြီး Kiccha Sudeep လည်း သရုပ်ဆောင်ထားပါတယ်။

အေဒင်နဲ့ ဝုဒ်ရိုးတို့ သူငယ်ချင်းနှစ်ယောက်က ကမ္ဘာပျက်မယ့်အချိန်ကို စိတ်ကူးယဉ်ရင်း မီးသေနတ်တွေ ဖန်တီးလိုက်၊ ကားတွေ တည်ဆောက်လိုက်နဲ့ ဘဝကို ပေါ့ပေါ့ပါးပါး ဖြတ်သန်းနေကြသူတွေပါ။ တစ်ည ဘားမှာ မိုင်လီဆိုတဲ့ မိန်းကလေးနဲ့ ဆုံတော့ ဝုဒ်ရိုးက သဘောကျသွားပြီး ချိန်းတွေ့ဖို့ ပြောဖြစ်ရာကနေ ချစ်သူတွေ ဖြစ်သွားကြတယ်။ ဒါပေမယ့် နှစ်ယောက်စလုံးမှာ ကိုယ့်ဘဝနဲ့ကိုယ် ရှိနေကြတော့ သူတို့အချစ်ရေးက အဆင်ပြေပြေ ရှေ့ဆက်ဖို့ ခက်နေပါတယ်။ ဒီဆက်ဆံရေး ဘယ်လိုအဆုံးသတ်မလဲဆိုတာနဲ့အတူ ဘဝမှာ ဆက်ရှင်သန်ဖို့ ဘာတွေကို ရွေးချယ်ပြီး ဘာတွေကို ချန်ထားရမလဲဆိုတဲ့ အတွေးကိုပါ ထည့်ထားတဲ့ ၂၀၁၁ ခုနှစ်ထွက် အင်ဒီရုပ်ရှင်ပါ။

Snag ဟာ ဩစတြေးလျလူမျိုး လုပ်ကြံသတ်ဖြတ်သူတစ်ယောက်ဖြစ်ပြီး မကောင်းမှုတွေနဲ့ ဝေးရာမှာ တစ်ယောက်တည်း သိုသိုသိပ်သိပ် ခြေရာဖျောက်နေပါတယ်။ တစ်နေ့တော့ မိတ်ဆွေဟောင်းတစ်ယောက်က သူရှိတဲ့နေရာကို ရောက်လာပြီး မထင်ထားတဲ့သတင်းတစ်ခု ပြောပြတယ်။ တစ်ချိန်က သူချစ်ခဲ့ပြီး သေဆုံးသွားပြီလို့ ထင်ထားတဲ့ မိန်းကလေးဟာ အသက်ရှင်နေသေးတယ်ဆိုတဲ့ သတင်းပါ။ ဒါပေမယ့် အဲဒီမိန်းကလေးကို Snag နဲ့ ရန်ငြိုးရှိဖူးသူက ဖမ်းဆီးထားတယ်။ သတင်းကြားလိုက်ရတဲ့ Snag ဟာ ခြေရာဖျောက်နေရာကနေ ထွက်လာပြီး ချစ်သူကို သွားကယ်ဖို့ ကြိုးစားပါတော့တယ်။

၁၉၈၀ ခုနှစ်၊ နယ်သာလန်ဘုရင်မ ဘီယက်ထရစ်ရဲ့ နန်းတက်ပွဲမတိုင်ခင် ရက်ပိုင်းမှာ ဇာတ်လမ်းစထားပါတယ်။ ကျေးလက်ဒေသကနေ အမ်စတာဒမ်ကို ပြောင်းလာတဲ့ စုံထောက် ယူရီယန်နယ်ကော့ဟာ အဲဒီမြို့မှာ မွေးဖွားကြီးပြင်းပြီး လူလည်ကျတဲ့ စုံထောက် တိုနီမွန်တိုင်းနဲ့ တွဲလုပ်ရတယ်။ ယူရီယန်က မြို့ကိုရောက်ခါစမှာပဲ လူဆိုးလိုက်ဖမ်းရင်း လူသေအလောင်းတစ်လောင်းကို တွေ့သွားပါတယ်။ အဲဒီအလောင်းကနေ နန်းတက်ပွဲကို တိုက်ခိုက်လာနိုင်တဲ့ သဲလွန်စတွေ ရလာတော့ နှစ်ယောက်သား စုံစမ်းရပါတော့တယ်။ တိုက်ခိုက်ဖို့ ကြံစည်နေသူတွေက ဘယ်သူတွေလဲ၊ သူတို့မသိရသေးတာတွေ ဘာတွေရှိနေသေးလဲ၊ နန်းတက်ပွဲမတိုင်ခင် အချိန်မီ တားနိုင်ပါ့မလားဆိုတာတွေကို အဖြေရှာကြရမှာပါ။

နက်ဇယ်အဖွဲ့တွေနဲ့ ဒေသအာဏာပိုင်တွေကြား တင်းမာမှုတွေ ဖြစ်နေချိန်မှာ လယ်သမားတွေကလည်း ကိုယ့်လယ်မှာကိုယ် အလုပ်သမားလို ပြန်လုပ်နေရပါတယ်။ လုပ်ခက နည်းလွန်းတော့ စားဝတ်နေရေးကျပ်တည်းပြီး လယ်ထဲတောင် ဆက်မဆင်းနိုင်ကြတော့ဘူး။ ပင်ပန်းဆင်းရဲမှုတွေကြားမှာ အသက်ဆုံးရှုံးရသူတွေလည်း ရှိလာတယ်။ အဲဒီအချိန်မှာ MRO အဖြစ် အသစ်ခန့်အပ်ခံရတဲ့ အမျိုးသမီးငယ် ရှရီရာက ကျေးရွာကို ရောက်လာပါတယ်။ သူက လယ်သမားတွေဘက်က ရပ်တည်ပြီး သူတို့ရဲ့အခက်အခဲတွေကို ဖြေရှင်းပေးဖို့ ကြိုးစားတော့တယ်။ ဒါပေမယ့် အဲဒီလိုလုပ်ဖို့ ဒေသအာဏာပိုင်တွေနဲ့ ရင်ဆိုင်ရမှာပါ။ ဇာတ်လမ်းကို ရှရီရာ၊ ဒေသအာဏာပိုင်တွေ၊ လယ်သမားတွေနဲ့ နက်ဇယ်အဖွဲ့တွေဆိုတဲ့ ရှုထောင့်လေးခုကနေ ပြထားပါတယ်။

၁၉၈၀ ကျော်ကာလက စူပါမန်းရုပ်ရှင်တွေရဲ့ နောက်ဆုံးအပိုင်းမှာတော့ စူပါမန်း အပိုင်း ၂ က အဖမ်းခံခဲ့ရတဲ့ လက်စ်လူသာ ထောင်ကနေ ပြန်လွတ်လာပါတယ်။ သူက စူပါမန်းကို ဖျက်ဆီးပြီး ကမ္ဘာကို အုပ်စိုးချင်တဲ့အတွက် စူပါမန်းရဲ့ ဆံချည်မျှင်ကနေ DNA ယူကာ နယူးကလီးယားမန်းကို ဖန်တီးလိုက်တယ်။ ဒါပေမယ့် သူဖန်တီးထားတဲ့ နယူးကလီးယားမန်းကို နောက်ပိုင်းမှာ သူကိုယ်တိုင်တောင် မထိန်းချုပ်နိုင်တော့ပါဘူး။ အဲဒီအခါ နယူးကလီးယားမန်းကို ရင်ဆိုင်တားဆီးဖို့က စူပါမန်းရဲ့ တာဝန်ဖြစ်လာပါတော့တယ်။

ခရစ်ရှနာဒါ့စ်ဟာ ငယ်ငယ်ကတည်းက မိခင်ကို ကင်ဆာရောဂါနဲ့ ဆုံးရှုံးခဲ့ရပြီး မိဘမဲ့ဂေဟာမှာ ကြီးပြင်းလာတဲ့ ကောင်လေးတစ်ယောက်ပါ။ ရိုးရိုးသားသား ကြိုးစားရှာဖွေနေပေမယ့် ဆင်းရဲတာကို အထင်သေးပြောဆိုတတ်သူတွေကြားမှာ နေရတာကြောင့် ချမ်းသာချင်စိတ် ပြင်းပြနေတယ်။ သူအလုပ်လုပ်တဲ့ ဟိုတယ်မှာ ဧည့်သည်တစ်ယောက်က နှိမ်ချပြောဆိုလိုက်တဲ့တစ်နေ့တော့ ဘယ်လောက်ပဲကုန်ကုန် ဒီဟိုတယ်မှာ တစ်ညလောက် ဂုဏ်ရှိရှိ ပျော်ပျော်နေမယ်ဆိုပြီး လစာတွေကို ပုံအောသုံးလိုက်ပါတယ်။ အဲဒီညမှာ ကီရ်သီးဆိုတဲ့ မိန်းကလေးနဲ့တွေ့ပြီး သူ့ကိုယ်သူ သူဌေးတစ်ယောက်လို့ လိမ်ပြောကာ အနားကပ်တော့တယ်။ ကိုယ်စားပွဲထိုးလုပ်နေတဲ့ ဟိုတယ်မှာပဲ အထူးဧည့်သည်တစ်ယောက်လို ဟန်ဆောင်နေတာဆိုတော့ ဒီလိမ်ဆင်ကို ဘယ်လောက်ကြာကြာ ဖုံးထားနိုင်ပါ့မလဲ။ တစ်ဖက်မှာလည်း ကုဋေတစ်သောင်းနဲ့ ဝန်ထမ်းထောင်ချီပြီး လည်ပတ်နေတဲ့ ကုမ္ပဏီကြီးတစ်ခုက ကင်ဆာကင်းစင်တဲ့ ကမ္ဘာဖြစ်လာဖို့ ရည်ရွယ်ထားတယ်။ ခရစ်ရှနာဒါ့စ်နဲ့ ဒီပရောဂျက် ဘယ်လိုပတ်သက်လာမလဲဆိုတာကတော့ ဆက်တွေ့ရမှာပါ။ Hit The First Case မူရင်းတေလဂူးကားမှာ ပါဝင်ခဲ့တဲ့ Vishwak Sen က ဒီကားကို ကိုယ်တိုင်ဇာတ်ညွှန်းရေး၊ ဒါရိုက်တာလုပ်ပြီး နှစ်ကိုယ်ခွဲ သရုပ်ဆောင်ထားတာဖြစ်လို့ နောက်ဇာတ်ကောင်တစ်ယောက်က ဘယ်လိုလူမျိုးလဲဆိုတာလည်း သိရဖို့ရှိနေပါတယ်။

၁၉၈၃ ခုနှစ်ထွက် စူပါမန်း အပိုင်း ၃ မှာ စူပါမန်းရင်ဆိုင်ရသူတွေက စွမ်းအားကြီးတဲ့ ဂြိုဟ်သားတွေ၊ နတ်ဘုရားတွေမဟုတ်ဘဲ သာမန်လူတွေပါ။ ကွန်ပျူတာတွေ စခေတ်စားလာတဲ့ကာလမှာ ကွန်ပျူတာကျွမ်းကျင်သူ ဂက်စ်ဂေါ်မန်က သူ့အကြံအစည်အတွက် စူပါမန်းဟာ အတားအဆီးဖြစ်လာမယ်ဆိုတာ သိနေတယ်။ ဒါကြောင့် စူပါမန်းရဲ့အားနည်းချက်ဖြစ်တဲ့ ခရစ်ပတွန်ကျောက်ကို ပုံတူပွားပြီး အသုံးချဖို့ ကြံပါတယ်။ သူ့လှည့်ကွက်ကြောင့် စူပါမန်းဟာ မကောင်းတဲ့ဘက်ကို ပြောင်းလဲသွားပြီး လူတွေရဲ့ ယုံကြည်အားကိုးမှုလည်း ပျက်ပြားလာတယ်။ ဒီလိုနဲ့ စူပါမန်းတစ်ယောက် ဉာဏ်ကိုလွှာသုံးနေတဲ့ ဂက်စ်ဂေါ်မန်ကို ဘယ်လိုရင်ဆိုင်ကျော်လွှားမလဲဆိုတာ ဆက်ကြည့်ရမှာပါ။

၁၉၈၀ ခုနှစ်က Superman II ဟာ ပထမဇာတ်ကားနဲ့ ဆက်ထားတဲ့ အပိုင်းနှစ်ဖြစ်ပြီး Christopher Reeve က စူပါမန်းအဖြစ် ပါဝင်ထားပါတယ်။ ဂျင်နရယ်ဇော့ဒ်တို့ သုံးဦး ခရစ်ပတွန်ဂြိုဟ်ကနေ နှင်ထုတ်ခံထားရချိန်မှာ ကလာ့ခ်ကန့်ခ်လို့လည်း သိကြတဲ့ စူပါမန်းက ကမ္ဘာမြေပေါ်မှာ အခြေချနေပါပြီ။ လူသားတွေရဲ့ အာကာသနယ်မြေချဲ့ထွင်မှုကြောင့် ဇော့ဒ်တို့ကို ပိတ်လှောင်ထားတဲ့ ထောင်ရဲ့စွမ်းအား လျော့လာပြီး သူတို့ လွတ်မြောက်သွားကြပါတယ်။ အဲဒီနောက် ခရစ်ပတွန်ဂြိုဟ်သား စူပါမန်းကို လက်စားချေဖို့ ကမ္ဘာမြေကို အန္တရာယ်ပြုလာကြတယ်။ ထောင်ဖောက်ပြေးလာတဲ့ လက်စ်လူသာကလည်း သူတို့နဲ့ ပူးပေါင်းပြီး စူပါမန်းကို ဒူးထောက်ဖို့ အကျပ်ကိုင်လာပါတယ်။ ကမ္ဘာမြေကို ကယ်တင်ဖို့ စူပါမန်းက ဒီရန်သူတွေကို ရင်ဆိုင်ရတော့မှာပါ။ စူပါဟီးရိုးအက်ရှင်နဲ့အတူ ဟာသနဲ့ ဒရာမာအပိုင်းတွေကိုလည်း တွဲဖက်ထားပါတယ်။

မီးတောက်နေတဲ့ အရိုးခေါင်းနဲ့ ဆိုင်ကယ်စီးတဲ့ Marvel ဇာတ်ကောင် Ghost Rider တွေထဲမှာ ဂျော်နီဘလေ့ဇ်က ထင်ရှားသူတစ်ယောက်ပါ။ ၂၀၀၇ ခုနှစ်ထွက် ဒီဇာတ်ကားမှာ Nicolas Cage က ဂျော်နီအဖြစ် သရုပ်ဆောင်ထားပြီး သူ Ghost Rider ဖြစ်လာပုံကို အစကနေ ပြထားပါတယ်။ ကင်ဆာကြောင့် သေခါနီးဖြစ်နေတဲ့ အဖေကို ကယ်ဖို့ ဂျော်နီက ကိုယ့်ဝိညာဉ်ကို နတ်ဆိုးဆီ ရောင်းခဲ့တယ်။ နတ်ဆိုးက စာချုပ်အတိုင်း အဖေ့ရဲ့ကင်ဆာကို ကုပေးခဲ့ပေမယ့် ဂျော်နီမှာ နှောင်ကြိုးမရှိစေချင်တာကြောင့် အဖေ့ကို ချက်ချင်းပဲ သတ်ပစ်လိုက်ပါတယ်။ ပြီးတော့ လိုအပ်တဲ့အခါ ပြန်လာရှာမယ်လို့ ပြောပြီး ပျောက်သွားခဲ့တယ်။ အဖေ အချိန်မတိုင်ခင် သေဆုံးခဲ့ရတာ ကိုယ့်ကြောင့်လို့ ယူဆတဲ့ ဂျော်နီဟာ နောင်တနဲ့ ဆက်ရှင်သန်နေရပါတယ်။ သေသွားလည်း မထူးတော့ဘူးဆိုတဲ့ စိတ်နဲ့ အန္တရာယ်များတဲ့ စတန့်တွေ လုပ်ရင်း နာမည်ကြီးလာတယ်။ အရာရာ ပြန်အဆင်ပြေလာပြီလို့ ထင်ရတဲ့ တစ်နေ့မှာတော့ နတ်ဆိုးက သူ့ဆီ ပြန်ရောက်လာပါတယ်။

၂၀၀၇ ခုနှစ်က Ghost Rider ဇာတ်ကားရဲ့အဆက်မှာ ဂျော်နီဘလေ့ဇ်ဟာ အရင်တိုက်ပွဲအပြီး သူဘယ်သူဆိုတာ ပေါ်သွားလို့ အောင်မြင်ကျော်ကြားခဲ့တဲ့ဘဝကို ချန်ထားခဲ့ပါတယ်။ ဆိုင်ကယ်တစ်စီးနဲ့ နှစ်ပေါင်းများစွာ လေလွင့်သွားလာရင်း ကိုယ့်အထဲက နတ်ဆိုးကျိန်စာကို ဖြေနိုင်မယ့် နည်းလမ်းကိုလည်း ရှာနေခဲ့တယ်။ တစ်နေ့မှာ အရက်သောက်တတ်တဲ့ ဘုန်းတော်ကြီး မော်ရူက သူ့ဆီ ရောက်လာပြီး ကလေးတစ်ယောက်ကို ကယ်ပေးဖို့ အကူအညီတောင်းပါတယ်။ အလဲအလှယ်အနေနဲ့ ဂျော်နီရဲ့ကျိန်စာကို ဖြေပေးမယ်လို့ ဆိုတယ်။ ကယ်ရမယ့်ကလေးကတော့ ဂျော်နီနဲ့ စာချုပ်ချုပ်ပြီး လှည့်စားခဲ့တဲ့ နတ်ဆိုးရဲ့သား ဖြစ်နေပါတယ်။ အဲဒီကလေးဟာလည်း အပေးအယူတစ်ခုကြောင့် သဘာဝလွန်ပုံစံနဲ့ မွေးဖွားလာသူဖြစ်ပြီး နတ်ဆိုးရဲ့အစွမ်းတွေကို ပိုင်ဆိုင်ထားတယ်။ ဂျော်နီဟာ ကလေးကို ကယ်တင်ပေးရင်း ကိုယ့်ကိုယ်ကိုယ်လည်း ကျိန်စာကနေ လွတ်မြောက်အောင် ကြိုးစားရတော့မှာပါ။ Ghost Rider အဖြစ် Nicolas Cage နဲ့ မော်ရူအဖြစ် Idris Elba တို့ သရုပ်ဆောင်ထားပါတယ်။

ဂျေလို သရုပ်ဆောင်ထားတဲ့ မိခင်ဟာ အာဖဂန်နဲ့ အီရန်မှာ စနိုက်ပါအဖြစ် စစ်ဆင်ရေးတွေ လုပ်ခဲ့ဖူးသူပါ။ စစ်တပ်က ထွက်လာပြီးနောက် ကျူးဘားနဲ့ မက္ကဆီကိုက လူဆိုးဂိုဏ်းတွေနဲ့ ပတ်သက်မိခဲ့ပါတယ်။ ဇာတ်ကားတစ်လျှောက်မှာတော့ သူ့နာမည်ကို မဖော်ပြထားပါဘူး။ ကိုယ်ဝန်ရလာတဲ့အခါ သူက လူဆိုးဂိုဏ်းတွေအကြောင်း ရဲဆီ သတင်းပေးပြီး အဲဒီလောကကနေ ရုန်းထွက်ဖို့ ကြိုးစားခဲ့တယ်။ ဒါပေမယ့် အတိတ်က ရန်သူတွေဟာ လျှို့ဝှက်ထားတဲ့ သူ့သမီးကို ရန်ပြုလာကြပါတယ်။ သမီးကို ကာကွယ်ဖို့အတွက် ပုန်းအောင်းနေရာကနေ ပြန်ထွက်လာပြီး ရန်သူဟောင်းတွေကို ရင်ဆိုင်ရတော့တာပါ။ Niki Caro ရိုက်ကူးထားတဲ့ အက်ရှင်သည်းထိတ်ရင်ဖိုဇာတ်ကား ဖြစ်ပါတယ်။

ဆေးတောင့်တစ်တောင့် သောက်လိုက်ရုံနဲ့ မနက်ဖြန်ကို တစ်နာရီတိတိ အချိန်ခုန်ကူးနိုင်မယ်ဆိုရင် ဘာလုပ်ကြမလဲ။ ဒီဇာတ်လမ်းထဲက Z+ ဆိုတဲ့ ဆေးတောင့်တွေက အဲဒီလိုလုပ်ပေးနိုင်ပါတယ်။ ခန္ဓာကိုယ်က လိုက်သွားတာမဟုတ်ဘဲ ဒီနေ့က ကိုယ့်အသိစိတ်နဲ့ မနက်ဖြန်က ကိုယ့်အသိစိတ်တို့ တစ်နာရီတိတိ နေရာလဲသွားကြတာပါ။ ဒါပေမယ့် သုံးစွဲပုံမမှန်ရင် စိတ်ဖောက်ပြန်တဲ့အထိ အန္တရာယ်ရှိပါတယ်။ လီ၊ မာတင်နဲ့ ဖင်းတို့ သုံးယောက်ကတော့ ဒီဆေးကို အချက်အလက်ခိုးယူဖို့ အသုံးချနေကြတယ်။ မနက်ဖြန်ကို ကြိုသွားပြီး အချက်အလက်တွေ ခိုးယူပေးနေရတဲ့ သူတို့နောက်ကွယ်မှာ ခိုင်းစေနေတဲ့ အဖွဲ့အစည်းကြီးတစ်ခုလည်း ရှိပါတယ်။ တစ်နေ့မှာ မစ်ရှင်တစ်ခုလုပ်ရင်း မာတင် သေဆုံးသွားတဲ့နောက် လီနဲ့ဖင်းတို့ ဒီအလုပ်ကို ရပ်လိုက်ကြတယ်။ ဒါပေမယ့် အလုပ်ပြန်လုပ်ရဖို့ အကြောင်းဖန်လာတဲ့အခါ သူတို့ဟာ အချိန်ကူးတဲ့အလုပ်ထဲ ပြန်ဝင်ရတော့မယ့် အခြေအနေနဲ့ ကြုံလာရပါတယ်။ Z+ ဆေးတောင့်တွေက ဘာတွေလဲ၊ သူတို့ကို ခိုင်းစေနေတဲ့ အဖွဲ့အစည်းကရော ဘယ်လိုအဖွဲ့လဲ။ လီတို့ဟာ ဒီမပြီးနိုင်တဲ့ သံသရာကို အဆုံးသတ်နိုင်ပါ့မလား။

လပ်ခ်နောင်းရဲတပ်ဖွဲ့က ရိုးသားတဲ့ ရဲအရာရှိ ဗစ်ကရမ်ဟာ လူဆိုးဂိုဏ်းသား ဗေဒါကို ရှာဖွေရှင်းလင်းဖို့ တာဝန်ယူထားပါတယ်။ ဒါပေမယ့် ဗေဒါက ရဲဆီ ကိုယ်တိုင်လာအဖမ်းခံပြီး ဗစ်ကရမ်ကို ဇာတ်လမ်းတွေ စပြောပြတဲ့အခါ အကောင်းနဲ့အဆိုးကို ခွဲခြားဖို့ မလွယ်တော့ပါဘူး။ ဗစ်ကရမ်က ကိုယ့်ကိုယ်ကိုယ် မျှတပြီး တရားနည်းလမ်းကျသူလို့ ယုံကြည်ထားပေမယ့် ဗေဒါကတော့ သူ့ရဲ့မှန်ကန်တယ်ဆိုတဲ့ ယုံကြည်ချက်ကို မေးခွန်းထုတ်လာတယ်။ ဗစ်ကရမ်ဟာ သူထင်ထားသလို တကယ်ပဲ တရားမျှတသူတစ်ယောက် ဖြစ်ရဲ့လား။

ပြင်းထန်တဲ့ ကားမတော်တဆမှုတစ်ခုနောက်မှာ ရလာတဲ့ စိတ်ဒဏ်ရာတွေကို ကျော်ဖြတ်နေရတဲ့ သားအမိနှစ်ယောက် ရှိပါတယ်။ နောက်တစ်ဖက်မှာလည်း အလုပ်ထဲမှာပဲ အချိန်ကုန်နေတဲ့ အဖေနဲ့ သူ့ဆီက အချိန်မရတဲ့ သမီးတစ်ယောက်တို့ ရှိနေကြတယ်။ မြေအောက်အမြန်ရထားတွေကို အလိုအလျောက်စနစ်နဲ့ ထိန်းချုပ်မောင်းနှင်နေရာက စနစ်ဟောင်းမှာ ချို့ယွင်းချက်တွေ ပေါ်လာပါတယ်။ ရထားတွေ ဘူတာမရောက်ခင် ရပ်သွားတာမျိုးတွေ ဖြစ်လာလို့ ပြန်ပြင်ဖို့ ကြိုးစားနေတုန်း ညပိုင်းနောက်ဆုံးရထားတစ်စီးက ပုံမှန်လမ်းကြောင်းကနေ လွဲထွက်ပြီး အသုံးမပြုတော့တဲ့ ရထားလမ်းထဲ ရောက်သွားခဲ့တယ်။ အဲဒီမြေအောက်လှိုဏ်ခေါင်းထဲမှာ ဘာက စောင့်ကြိုနေမလဲ။ မြေပြင်က ဗဟိုဌာနကရော ရထားပေါ်ကလူတွေကို ဘယ်လိုကယ်တင်ပေးနိုင်မလဲ။ အန္တရာယ်နဲ့ ရင်ဆိုင်လာရချိန်မှာ မိခင်တစ်ယောက်က သားကို ဘယ်လိုကာကွယ်ပေးမလဲဆိုတာ ဆက်တွေ့ရမှာပါ။ စင်္ကာပူဒါရိုက်တာ JD Chua ရိုက်ကူးပြီး ထိုင်ဝမ်ထုတ်လုပ်ရေးကုမ္ပဏီနဲ့ ပူးပေါင်းထုတ်လုပ်ထားတဲ့ ထူးဆန်းသတ္တဝါအကြောင်း သည်းထိတ်ရင်ဖိုဇာတ်ကား ဖြစ်ပါတယ်။

နေမင်းကြီး ပေါက်ကွဲပြန့်ကားလာတဲ့ Solar Crisis ကြောင့် နောက်နှစ်ပေါင်း ၃၀၀ မှာ ကမ္ဘာပျက်စီးတော့မယ့် အခြေအနေကို ရောက်နေပါတယ်။ ကမ္ဘာ့နိုင်ငံတွေ အတူအဖြေရှာကြရင်း နောက်ဆုံးမှာ ကမ္ဘာကို လက်ရှိနေအဖွဲ့အစည်းကနေ သယ်ထုတ်ပြီး တခြားနေအဖွဲ့အစည်းတစ်ခုဆီ ရွှေ့ဖို့ ဆုံးဖြတ်လိုက်ကြတယ်။ အဲဒီအတွက် ကမ္ဘာ့အင်ဂျင်ပေါင်း ၁၀,၀၀၀ တည်ဆောက်ပြီး ခရီးသွားကမ္ဘာစီမံကိန်းကို စတင်ကြပါတယ်။ ဒီခရီးက နှစ်ပေါင်း ၂,၅၀၀ ကြာမြင့်မှာဖြစ်ပြီး အဆင့်များစွာ ဖြတ်သန်းရဦးမှာပါ။ လရဲ့ဆွဲအားကနေ လွတ်ဖို့ လကိုတွန်းထုတ်မယ့် အစီအစဉ်ရှိသလို အရံအစီအစဉ်အဖြစ် လကိုဖောက်ခွဲဖို့လည်း ထည့်သွင်းထားပါတယ်။ ကမ္ဘာကို ရွှေ့ဖို့ လုပ်ဆောင်နေကြချိန်မှာပဲ ဒီစီမံကိန်းကို ဆန့်ကျင်တဲ့ အဖွဲ့တစ်ဖွဲ့က တိုက်ခိုက်လာတယ်။ သူတို့က လူတွေကို ဒစ်ဂျစ်တယ်သက်ရှိတွေအဖြစ် ဆက်ရှင်သန်စေချင်ကြတာပါ။ ဒါကြောင့် စီမံကိန်းကို အကောင်အထည်ဖော်နေသူတွေဟာ အာကာသခရီးအတွက် အခက်အခဲတွေအပြင် ဒီတိုက်ခိုက်မှုတွေကိုပါ ရင်ဆိုင်ကြရပါတယ်။ ဝတ္ထုကို အခြေခံထားတဲ့ တရုတ်သိပ္ပံစိတ်ကူးယဉ် အာကာသစွန့်စားခန်းရုပ်ရှင်ဖြစ်ပြီး ပြသချိန် သုံးနာရီခန့် ရှိပါတယ်။ အဓိကသရုပ်ဆောင်အဖြစ် ဝူကျင်း ပါဝင်ထားပါတယ်။

ရဲမေဒိုင်ယာနာဟာ တစ်ခါအာရုံစိုက်မိတဲ့အမှုကို လက်လွှတ်မပေးတတ်လို့ ရန်သူတွေက စုန်းမလို့တောင် ခေါ်ကြသူပါ။ သူဖမ်းမိလိုက်တဲ့ သန်းတစ်ထောင်တန် ကိုကင်းတွေရဲ့ပိုင်ရှင်ကတော့ အလွန်ကြီးမားတဲ့ ဂိုဏ်းတစ်ဂိုဏ်း ဖြစ်နေပါတယ်။ အလုပ်လုပ်ပုံ ပိရိလွန်းလို့ အဖမ်းမခံခဲ့ရတဲ့ ဒီဂိုဏ်းဟာ အခုလို အကြီးအကျယ် ဆုံးရှုံးလိုက်ရတဲ့အခါ ဒိုင်ယာနာ့ကို အငြိုးထားပြီး လိုက်ရှာတော့တယ်။ တစ်ဖက်မှာ ဘိုလာဆိုတဲ့လူက အမှုတစ်ခုကြောင့် ထောင်ဆယ်နှစ်ကျခဲ့ပြီး အခုမှ ပြန်လွတ်လာသူပါ။ သူဘယ်သူလဲ၊ ဘယ်ကလာသလဲဆိုတာကို ထောင်သားအချင်းချင်းတောင် မသိကြဘူး။ သူ့အကြောင်းသိသူတွေအတွက်လည်း အသက်ရှင်ဖို့ မလွယ်ဘူးလို့ ဆိုကြပါတယ်။ အပြင်မှာ ငြိမ်သက်နေပေမယ့် အတွင်းမှာ မုန်တိုင်းထန်နေတဲ့သူမို့ ဘိုလာ့ကို သမုဒ္ဒရာနဲ့ ခိုင်းနှိုင်းကြတယ်။ ထောင်ကထွက်လာတဲ့ ဘိုလာဟာ ကိုကင်းပိုင်ရှင်ကို စုံစမ်းနေတဲ့ ဒိုင်ယာနာနဲ့ တွေ့ဆုံဖို့ အကြောင်းဖန်လာပါတယ်။ ဂိုဏ်းကလည်း ဒိုင်ယာနာ့ကို အသေရရ အရှင်ရရ ဖမ်းဖို့ လိုက်နေတဲ့အခါ သူတို့နှစ်ယောက် ပူးပေါင်းပြီး ဘယ်လိုရင်ဆိုင်ကြမလဲဆိုတာ ဆက်ပြထားပါတယ်။ ဘိုလာအဖြစ် အဂျေးနဲ့ ဒိုင်ယာနာအဖြစ် တာဘူးတို့ သရုပ်ဆောင်ထားပါတယ်။

Tell It Like a Woman ဟာ အမျိုးသမီးတွေအကြောင်းကို အမျိုးသမီးဒါရိုက်တာတွေက ပြောပြထားတဲ့ ဇာတ်လမ်းတိုခုနစ်ပုဒ် စုစည်းထားတာပါ။ ကမ္ဘာတစ်ဝန်းက ဒါရိုက်တာတွေ ပူးပေါင်းပြီး ဂျပန်၊ အီတလီ၊ အိန္ဒိယနဲ့ အမေရိကန်တို့မှာ ရိုက်ကူးထားသလို အဲဒီနိုင်ငံတွေက မင်းသမီးတွေလည်း ပါဝင်ထားပါတယ်။ အမျိုးသမီးတွေရဲ့အကြောင်း ဖြစ်ပေမယ့် သူတို့ဘဝကို နားလည်ခံစားလိုသူအားလုံးအတွက် ရည်ရွယ်ထားတဲ့ ဇာတ်ကားပါ။ နိုင်ငံမတူ၊ လူမှုအလွှာမတူတဲ့ အမျိုးသမီးတွေဟာ ဘဝအခက်အခဲတွေကို ကိုယ့်နည်းကိုယ့်ဟန်နဲ့ ရင်ဆိုင်နေကြရတယ်။ သဘာဝအရ ကြုံတွေ့ရတဲ့ဒုက္ခတွေရှိသလို အမျိုးသမီးဖြစ်နေလို့ ခံရတဲ့ဒဏ်တွေလည်း ရှိပါတယ်။ အဲဒီအခက်အခဲတွေကို သူတို့ ဘယ်လိုကျော်လွှားကြသလဲဆိုတာ ဇာတ်လမ်းတိုတစ်ပုဒ်စီနဲ့ ဖော်ပြထားပြီး ဖြစ်ရပ်မှန်ကို အခြေခံထားတဲ့ ဇာတ်လမ်းတွေလည်း ပါဝင်ပါတယ်။ ဇာတ်လမ်းတစ်ပုဒ်နဲ့တစ်ပုဒ် အကူးအပြောင်းက တချို့နေရာတွေမှာ ရုတ်တရက်ဖြစ်နေတတ်ပေမယ့် တစ်ပုဒ်စီမှာ ပြောချင်တဲ့အကြောင်းအရာ ရှိပါတယ်။ ဘယ်ဇာတ်လမ်းကို ပိုနားလည်စာနာမိမလဲဆိုတာကတော့ ကြည့်သူတစ်ယောက်ချင်းစီရဲ့ ဘဝအတွေ့အကြုံပေါ်လည်း မူတည်နိုင်ပါတယ်။ ဘောလိဝုဒ်မင်းသမီး ဂျက်ကလင်း ပါဝင်ထားတဲ့ နောက်ဆုံးဇာတ်လမ်းတိုထဲက “Applause” သီချင်းဟာ အော်စကာရဲ့ Best Original Song ဆုအတွက် ဆန်ကာတင်စာရင်းဝင်ခဲ့ပါတယ်။

ကီနူးရိဗ် ကိုယ်တိုင် ဒါရိုက်တာလုပ်ပြီး ဗီလိန်အဖြစ်ပါ သရုပ်ဆောင်ထားတဲ့ ဒီဇာတ်ကားက ထိုက်ချိသိုင်းကို အခြေခံထားပါတယ်။ မာကျောမှုကို ပျော့ပျောင်းမှုနဲ့ ထိန်းချုပ်တဲ့ ကိုယ်ခံပညာကို သင်ယူနေသူ တိုက်ဂါးကတော့ သူ့ပညာနဲ့သူ လမ်းကြောင်းမှန်ပေါ် ရောက်ဖို့ ကြိုးစားနေရဆဲပါ။ တစ်ဖက်မှာ ကီနူးရိဗ် သရုပ်ဆောင်ထားတဲ့လူက ဟောင်ကောင်မှာ လုံခြုံရေးကုမ္ပဏီကို ဟန်ပြလုပ်ပြီး မြေအောက်တိုက်ခိုက်ပွဲတွေ ကျင်းပနေသူပါ။ သူ့တိုက်ခိုက်ရေးသမားကို အားမရလို့ သတ်ပစ်လိုက်ပြီး လူသစ်ရှာနေချိန်မှာ တိုက်ဂါးရဲ့အရည်အချင်းကို သဘောကျသွားတယ်။ သူ့အတွက် တိုက်ခိုက်ပေးဖို့ ဖိတ်ခေါ်ပေမဲ့ ကိုယ်ခံပညာဟာ ငွေရှာဖို့မဟုတ်ဘူးဆိုပြီး တိုက်ဂါးက ငြင်းလိုက်ပါတယ်။ ဒီမြေအောက်ပွဲတွေ ကျင်းပနေသူကို ဖမ်းဖို့ ကြိုးစားနေတဲ့ ရဲမေတွေလည်း ရှိနေတယ်။ ဒါပေမဲ့ တိုက်ဂါးရဲ့ဆရာနေတဲ့ ဘုရားကျောင်းအတွက် ငွေအများကြီး လိုအပ်လာတော့ သူငြင်းထားတဲ့ကမ်းလှမ်းချက်ကို ပြန်စဉ်းစားရမယ့် အခြေအနေဖြစ်လာပါတယ်။ ဒီတိုက်ခိုက်ရေးလောကထဲ ဝင်လိုက်ရင် တိုက်ဂါး ဘာတွေကြုံရမလဲ၊ သူ့ကို ဖိတ်ခေါ်သူရဲ့ တကယ့်ရည်ရွယ်ချက်ကရော ဘာဖြစ်နေမလဲ။

ကြေးစားတပ်ဖွဲ့တစ်ဖွဲ့ဟာ ပြန်ပေးဆွဲခံထားရတဲ့ ဇီဝလက်နက်ပညာရှင် ပါမောက္ခနန်စီကို ကယ်တင်ဖို့ တာဝန်ရလာပါတယ်။ ကယ်တင်ရေးလုပ်နေချိန်မှာ ပြန်ပေးသမားတွေရဲ့ ထောင်ချောက်ထဲ ဝင်မိပြီး အဖွဲ့သားတွေ သေဆုံးသွားကြတယ်။ အဲဒီမြင်ကွင်းကို ကိုယ်တိုင်မြင်ခဲ့ရတဲ့ အဖွဲ့ဝင် ယွီဝေကတော့ သူတို့ကို ဘယ်သူသတ်သွားတာလဲဆိုတဲ့ အရိပ်အယောင်တောင် မတွေ့လိုက်ရဘူး။ ဒီဖြစ်ရပ်ကြောင့် သူ့စိတ်ထဲမှာ နာကြည်းမှုနဲ့ မုန်းတီးမှုတွေကို လွှတ်မချနိုင်ဘဲ ကျန်နေခဲ့ပါတယ်။ တစ်နေ့မှာ ယွီဝေကိုယ်တိုင်လည်း ထူးဆန်းတဲ့ သေနတ်ပစ်ချက်တစ်ချက်ကြောင့် သေဆုံးသွားတယ်။ ဒါပေမယ့် အဲဒီနောက် အပြိုင်ကမ္ဘာတစ်ခုထဲ ရောက်သွားသလိုမျိုး လွန်ခဲ့တဲ့ ၁၀ နှစ်၊ အဖွဲ့သားတွေ သေဆုံးခဲ့တဲ့အချိန်ကို ပြန်ရောက်လာပါတယ်။ အဖွဲ့သားတွေကို ကယ်တင်ဖို့ သူအသည်းအသန် ကြိုးစားပေမယ့် မကယ်နိုင်ဘဲ အဲဒီရက်စက်တဲ့မြင်ကွင်းကိုပဲ အကြိမ်ကြိမ် ပြန်ကြုံနေရတယ်။ ဒီဖြစ်ရပ်တွေ ဘာကြောင့်ဖြစ်နေတာလဲ၊ ယွီဝေကရော ထပ်ခါထပ်ခါ ကြုံနေရတဲ့အဖြစ်ကနေ လွတ်မြောက်နိုင်ပါ့မလား။

အာဖဂန်နစ္စတန်ကို ခရီးသွားကြတဲ့ ကိုရီးယားလူမျိုး ၂၃ ဦးဟာ တာလီဘန်လက်နက်ကိုင်တွေရဲ့ ဖမ်းဆီးမှုကို ခံရပြီး ဓားစာခံတွေ ဖြစ်သွားကြပါတယ်။ သူတို့ကို ကယ်တင်ဖို့ သံတမန်တစ်ဦးနဲ့ NIS အေးဂျင့်တစ်ဦးတို့ ကြိုးစားကြတဲ့အကြောင်းကို ဇာတ်လမ်းဖွဲ့ထားတာပါ။ ကယ်တင်ရေးအကြောင်းနဲ့အတူ အာဖဂန်နစ္စတန်မှာ ဖြစ်ပွားနေတဲ့ လက်နက်ကိုင်ပဋိပက္ခတွေ၊ သံတမန်ရေးရာ ရှုပ်ထွေးမှုတွေကိုလည်း ပြထားပါတယ်။ အာဖဂန်ဒေသရဲ့ ဘာသာရေးယုံကြည်ချက်တွေနဲ့ လူမျိုးရေးအစွဲအလမ်းတွေကိုပါ ထည့်သွင်းတင်ပြထားပြီး Hyun Bin၊ Hwang JungMin နဲ့ Kang Ki-Young တို့ ပါဝင်သရုပ်ဆောင်ထားပါတယ်။

မော်ဖင် ပါဝါရိန်းဂျားတွေရဲ့ နှစ် ၃၀ ပြည့် အထိမ်းအမှတ် အထူးရုပ်ရှင်မှာ မူရင်းသရုပ်ဆောင်တွေ ပြန်လည်ပါဝင်ထားပါတယ်။ ဇာတ်လမ်းက ဇော်ဒန်မရှိတော့တဲ့အချိန်၊ ရိန်းဂျားတွေရဲ့ ရန်သူဟောင်း ရီတာ ပြန်ပေါ်လာပြီး ရိန်းဂျားတစ်ယောက်ကို သတ်သွားရာက စပါတယ်။ ရိန်းဂျားတွေက ပြန်လွတ်လာတဲ့ ရီတာကို နှိမ်နင်းဖို့ လိုက်ရှာကြတယ်။ တစ်ဖက်မှာ ရီတာကလည်း ပိုကြီးတဲ့အကြံအစည်တစ်ခုနဲ့ ရိန်းဂျားတွေကို ပြန်တိုက်ခိုက်လာပါတယ်။

ရဲမှူးချုပ် Austin Carter နဲ့ သူ့လက်ထောက်ဟာ နာမည်ဆိုးနဲ့ကျော်ကြားတဲ့ Hellhound ဂိုဏ်းခေါင်းဆောင် Ethan Crawley ကို ဖမ်းမိပြီး တရားစီရင်ဖို့ San Antonia မြို့ဆီ ခေါ်လာကြပါတယ်။ လမ်းမှာ Blind Chapel ဆိုတဲ့မြို့ကို ဝင်နားရင်း Crawley ကို အဲဒီမြို့ရဲ့အကျဉ်းခန်းမှာ ခဏချုပ်ထားဖို့ စီစဉ်ကြတယ်။ ဒါပေမယ့် Hellhound ဂိုဏ်းဟာ လူသတ်ပြီး မြို့တွေကိုပါ မီးရှို့ဖျက်ဆီးတတ်တဲ့အတွက် မြို့တော်ဝန် Bowman က လက်မခံချင်ဘူး။ လက်ခံဖို့ပြောတဲ့ ရဲမှူး Vernon Kelly နဲ့ အငြင်းပွားကြပြီးမှ Crawley ကို ချုပ်ထားဖြစ်သွားပါတယ်။ အဲဒီမြို့မှာ သေနတ်ပစ်ကျွမ်းကျင်တဲ့ Ivan ဆိုသူလည်း ရှိနေတယ်။ သူ့သရုပ်မှန်ကိုတော့ ဘယ်သူမှ သေချာမသိကြဘူး။ Hellhound ဂိုဏ်းက သူတို့ခေါင်းဆောင်ကို ပြန်ခေါ်ဖို့ Blind Chapel ကို လာတိုက်ဖို့ ကြံနေတဲ့အခါ Vernon၊ Austin နဲ့ Ivan တို့ဟာ မြို့ကို ကာကွယ်ဖို့ ပြင်ဆင်ရပါတော့တယ်။ တစ်ချိန်တည်းမှာပဲ ဖမ်းထားတဲ့ Crawley လွတ်မသွားအောင်လည်း စောင့်ကြပ်ရဦးမှာပါ။

တစ်ညမှာ ဘုရင့်စစ်သည်တော်ဖြစ်ဖို့ အရူးအမူး စိတ်ကူးယဉ်နေတဲ့ ကောင်လေးတစ်ယောက်ဟာ သူအလေးစားဆုံး စစ်သည်တော် ဒါ့တညံရဲ့အခန်းထဲ ခိုးဝင်လာပါတယ်။ ဒါ့တညံဟာ ကျောထောက်နောက်ခံနဲ့ မျိုးရိုးအင်အားမရှိဘဲ ကိုယ့်အစွမ်းနဲ့ကိုယ် စစ်သည်တော်ခေါင်းဆောင်အထိ ဖြစ်လာခဲ့တယ်လို့ ကောင်လေးက ယုံကြည်ထားတယ်။ ဒါကြောင့် ဒါ့တညံကို တိုက်ရိုက်စိန်ခေါ်ပြီး လေ့ကျင့်ရေးဆင်းစရာမလိုဘဲ စစ်သည်တော်အဖွဲ့ထဲ တန်းဝင်ခွင့်ရဖို့ ကြံလာတာပါ။ သူရောက်လာတဲ့အချိန်မှာ ဒါ့တညံက ကိုယ်တွေ့မှတ်တမ်း ရေးနေတုန်းဖြစ်ပါတယ်။ ကိုယ့်ကိုအားကျပြီး ဖြတ်လမ်းကနေ စစ်သည်တော်ဖြစ်ချင်နေတဲ့ ကောင်လေးကိုတွေ့တော့ ထိုင်ခိုင်းပြီး သူ့ဘဝအကြောင်း ပြန်ပြောပြပါတော့တယ်။ အဲဒီစကားဝိုင်းကနေ ဒါ့တညံ စစ်သည်တော်ဖြစ်လာခဲ့ပုံကို နောက်ကြောင်းပြန်ထားပါတယ်။ ဒီဇာတ်ကားဟာ ပြင်သစ်စာရေးဆရာ အလက်ဇန်းဒါးဒူးမတ်ရဲ့ The Three Musketeers ကို မှီငြမ်းထားတာပါ။ ဒူးမတ်ဟာ The Count of Monte Cristo ကိုလည်း ရေးခဲ့သူဖြစ်ပါတယ်။ ဒါ့တညံဆိုတာ ဆရာကြီးပီမိုးနင်း ဘာသာပြန်ခဲ့တဲ့ “သူရဲကောင်းသုံးယောက်” ထဲက ဓားတညံပဲဖြစ်ပြီး ဆရာကြီးရွှေဥဒေါင်းလည်း ဒီလက်ရာကို ဘာသာပြန်ခဲ့ဖူးပါတယ်။