အချစ်ဇာတ်လမ်းများ

၂၀၁၆ ခုနှစ်ထွက် Happy Bhag Jayegi ရဲ့ နောက်ဆက်တွဲဖြစ်ပြီး ပထမကားမှာ ပါကစ္စတန်မှာ ကြုံခဲ့ရတဲ့ အလွဲတွေကနေ ဒီတစ်ခါ တရုတ်ပြည်ဘက်ကို ရောက်လာပါတယ်။ ဇာတ်လမ်းထဲမှာ ဟတ်ပီးလို့ နာမည်တူတဲ့ ကောင်မလေးနှစ်ယောက်ရှိတယ်။ တစ်ယောက်က လူဆိုးဂိုဏ်း အလိုရှိနေတဲ့ ဟတ်ပီးဖြစ်ပြီး နောက်တစ်ယောက်က ရုက္ခဗေဒပညာရှင် ပရော်ဖက်ဆာ ဟတ်ပီးပါ။ တရုတ်လူဆိုးဂိုဏ်းက လေဆိပ်မှာ ပရော်ဖက်ဆာဟတ်ပီးကို လူမှားပြီး ဖမ်းသွားမိရာက ပြဿနာတွေ စတော့တာပါပဲ။ ပရော်ဖက်ဆာဟတ်ပီးက လိုက်ဖမ်းသူတွေလက်က အသက်လုပြေးနေရချိန်မှာ နောက်ဟတ်ပီးတစ်ယောက်ကတော့ ဘာဖြစ်နေမှန်းမသိဘဲ မိန့်ခွန်းတွေ ပြောနေပါတယ်။ နာမည်တူလို့ လူမှားသွားတဲ့ကိစ္စက အဲဒီမှာတင် မရပ်ဘဲ နောက်ထပ်အထင်လွဲမှုတွေ၊ အမှားတွေ တစ်ဆင့်ပြီးတစ်ဆင့် ဆက်ဖြစ်လာပါတော့တယ်။

အချစ်စစ်နဲ့ ဆုံတွေ့ခဲ့ပေမယ့် မမျှော်လင့်ထားတဲ့ ဘဝအပြောင်းအလဲကြောင့် အချစ်ရဆုံးသူကို ဆုံးရှုံးလိုက်ရတဲ့ အာဒီဟာ ဝမ်းနည်းမှုတွေကြားမှာ အလူးအလဲ ခံစားနေရပါတယ်။ တစ်နေ့မှာတော့ ချစ်ရတဲ့ နစ်ဒီရဲ့ဝိညာဉ်နဲ့ မထင်မှတ်ဘဲ စကားပြောနိုင်လာပြီး သူ့ဘဝကို ပြန်စနိုင်လာတယ်။ နစ်ဒီက အာဒီခံစားနေရတာကို မကြည့်ရက်လို့ ခဏပြန်လာခဲ့တာပါ။ ဒါပေမယ့် သူ့မှာ အချိန်အများကြီး မကျန်တော့ဘူး။ အာဒီ ရှေ့ဆက်ပျော်ရွှင်နိုင်ဖို့ နစ်ဒီ ဘာတွေလုပ်မလဲ၊ နစ်ဒီရဲ့ဝိညာဉ်ကလွဲရင် တခြားသူကို မျက်လုံးထဲမမြင်တဲ့ အာဒီကရော ဘယ်လိုရှေ့ဆက်မလဲ။ သူတို့ရဲ့အကြောင်းကို ပြောပြတဲ့ ဇာတ်လမ်းတစ်လျှောက်မှာ လွမ်းမောဖွယ်သီချင်းတွေကလည်း ဇာတ်ကောင်တွေရဲ့ ခံစားချက်တွေနဲ့အတူ ပါလာပါတယ်။

L မိသားစုက ခိုးမှုနဲ့ အသက်မွေးကြတဲ့ မိသားစုပါ။ အဲဒီမိသားစုရဲ့သမီး ဟနကတော့ သူခိုးမိသားစုဝင်ဖြစ်နေရတာကို မုန်းတီးနေသူဖြစ်ပါတယ်။ သူ့ချစ်သူ ခဇုက ရဲမိသားစုက ဆင်းသက်လာသူဖြစ်ပေမယ့် နှစ်ယောက်ကြားက အချစ်ကတော့ ခိုင်မြဲနေတယ်။ တစ်ရက်မှာ L မိသားစုဟာ တန်ဖိုးကြီးသရဖူတစ်ခုကို ခိုးဖို့ ကြိုးစားကြပါတယ်။ အဲဒီအချိန်မှာပဲ မိသားစုရဲ့အတိတ်က အရှုပ်အထွေးတွေ ပြန်ပေါ်လာပါတော့တယ်။ အက်ရှင်၊ မှုခင်းနဲ့ ဒရာမာကို ပေါင်းစပ်ထားတဲ့ ဂျပန်ရုပ်ရှင်ဖြစ်ပြီး ဆန်းဆန်းပြားပြား ဝတ်စုံတွေနဲ့ အသွင်ယူထားတဲ့ အခန်းတွေလည်း ပါဝင်ပါတယ်။ ရှေ့ဇာတ်လမ်းနဲ့ ဆက်စပ်နေတဲ့အချက်တွေကိုလည်း ဒီရုပ်ရှင်ထဲမှာ ပြန်ရှင်းပြထားပါတယ်။

တပ်ကြပ်အဖြစ် တာဝန်ထမ်းဆောင်နေတဲ့ ဒန်းရဲ့နေ့ရက်တွေက မနက်အလုပ်သွား၊ ညနေအိမ်ပြန်၊ အနားယူပြီး အိပ်လိုက်နဲ့ပဲ ကုန်ဆုံးနေပါတယ်။ ဒီလို နေ့တိုင်းပုံစံတူ ဖြတ်သန်းနေရတဲ့ သူ့ဘဝထဲကို တစ်နေ့မှာ အထက်တန်းကျောင်းသူအရွယ် ဖတ် ရောက်လာခဲ့တယ်။ ဒန်းက ဖတ်ထက် အသက်သုံးဆယ်ကျော် ကြီးသလို သူ့အဖေထက်တောင် အသက်ကြီးသူပါ။ တခြားသူတွေက ဒန်းရဲ့ရုပ်ရည်ကို အမျိုးမျိုးဝေဖန်ကြပေမယ့် ဖတ်အမြင်မှာတော့ သူက ရိုးရိုးလေးနဲ့ ခန့်နေတယ်။ နှစ်ယောက်သား ချစ်သူတွေဖြစ်လာတဲ့အခါ အသက်ကွာဟမှုများလွန်းတာကြောင့် အခက်အခဲတွေကို ရင်ဆိုင်လာရပါတယ်။ သူတို့ရဲ့အချစ်ရေးက ဒီအတားအဆီးတွေကြားမှာ ဘယ်လိုဆက်ဖြစ်မလဲ။ ဟာသနဲ့ အချစ်ဇာတ်လမ်းကို တွဲထားတဲ့ ဒီကားမှာ ဒန်းအဖြစ် ထိုင်းဟာသသရုပ်ဆောင် Phetthai Vongkumlao နဲ့ ဖတ်အဖြစ် Daraphak Thawinun တို့ ပါဝင်သရုပ်ဆောင်ထားပါတယ်။

Spoiler Alert မှာ The Big Bang Theory ထဲက မင်းသား Jim Parson က လိင်တူချစ်သူ အမျိုးသားမိုက်ကယ်အဖြစ် ပါဝင်ထားပါတယ်။ ဖြစ်ရပ်မှန်ကို အခြေခံရေးသားထားတဲ့ ဝတ္ထုတစ်ပုဒ်ကို ရုပ်ရှင်အဖြစ် ပြန်ရိုက်ထားတာဖြစ်ပြီး အချစ်အပေါ် လူတွေ အဓိပ္ပါယ်ဖွင့်ဆိုပုံနဲ့ မသေချာမှုတွေကို ပြောထားတဲ့ ဟာသဒရာမာပါ။ အချစ်ဆိုတာ စွန့်လွှတ်အနစ်နာခံတာလား၊ ရယူပိုင်ဆိုင်ချင်တာလား။ ကျားမ၊ အသက်အရွယ်၊ အသားအရောင် မတူကြသူတွေကြားမှာ အချစ်ကို မြင်ပုံချင်းလည်း ကွာနိုင်ပါတယ်။ မိဘနဲ့တောင် စိတ်အခန့်မသင့်လို့ စကားများတတ်ကြတဲ့အခါ သွေးသားမတော်စပ်တဲ့ လူတစ်ယောက်နဲ့ အချစ်တစ်ခုတည်းကြောင့် နှစ်ရှည်လများ အတူရှိနေနိုင်မလားဆိုတာ စဉ်းစားစရာပါ။ တကယ်ချစ်သူဆိုတာ ဘဝရဲ့အခက်ခဲဆုံးအချိန်မှာတောင် ကိုယ့်အနားက ထွက်မသွားသူလို့ ပြောကြပေမယ့် အဲဒီအချိန် တကယ်ရောက်လာရင်ရော သေချာနိုင်ပါ့မလား။ ကိုယ့်အတွက် သင့်တော်တဲ့သူကို တွေ့ခွင့်ရခဲ့ရင်တောင် တွေ့ဆုံတဲ့အချိန်ကပါ သင့်တော်နေမလားဆိုတဲ့ မေးခွန်းတွေကို မိုက်ကယ်ရဲ့အကြောင်းကနေတစ်ဆင့် တင်ပြထားပါတယ်။

အေးချမ်းတဲ့ ရွာငယ်လေးတစ်ရွာမှာ ခြင်းတောင်းယက်ရောင်းပြီး အသက်မွေးကြတဲ့ သားအဖနှစ်ယောက် ရှိပါတယ်။ မျက်စိမမြင်တဲ့ အဖေက ကိုယ့်အလုပ်ကိုယ်လုပ်ပြီး အေးအေးဆေးဆေး နေချင်ပေမယ့် သားကတော့ တစ်နေ့နေ့မှာ လူတွေကို ကယ်တင်ပေးနိုင်တဲ့ လူစွမ်းကောင်းတစ်ယောက် ဖြစ်လာဖို့ အိပ်မက်မက်နေတယ်။ အဖေလည်း သားဖြစ်သူ ပေါက်ကရတွေလုပ်ပြီး ဒုက္ခမရောက်အောင် တားနေရသလို သစ်ပင်ကြီးတစ်ပင်ဆီမှာလည်း အမြဲဆုတောင်းပေးနေရပါတယ်။ သားရဲ့အိပ်မက်က အကြောင်းမဲ့တော့ မဟုတ်ပါဘူး။ သူ့ခန္ဓာကိုယ်ထဲမှာ ကိုယ်ယောင်ဖျောက်နိုင်တဲ့ စွမ်းအင်တစ်မျိုး ရှိနေပြီး ဒီအစွမ်းနဲ့ လူစွမ်းကောင်းဖြစ်နိုင်မယ်လို့ ယုံကြည်နေတာပါ။ ခက်တာက ကိုယ်ယောင်ဖျောက်ဖို့ ကြိုးစားတိုင်း အောင်မြင်တာမဟုတ်ဘဲ တစ်ခါရလိုက်၊ တစ်ခါမရလိုက် ဖြစ်နေတယ်။ ဒီလိုအစွမ်းမျိုးနဲ့ သူ့အိပ်မက်ကို ဘယ်လိုအကောင်အထည်ဖော်မလဲ။ လူသားတစ်ယောက်ဖြစ်တဲ့ သူ့ဆီကို ဒီစွမ်းအင် ဘယ်လိုရောက်လာသလဲဆိုတာလည်း မေးစရာဖြစ်နေပါတယ်။

ပထမကမ္ဘာစစ် ဖြစ်နေတဲ့ ၁၉၁၆ ခုနှစ်မှာ အမေရိကန်က စစ်ထဲ မဝင်သေးပါဘူး။ ဒါပေမယ့် စစ်တိုက်ချင်၊ လေယာဉ်မောင်းချင်ကြတဲ့ အမေရိကန်လူငယ်တချို့ကတော့ စစ်ပညာသင်ပေးမယ့် ပြင်သစ်နိုင်ငံဆီ သွားပြီး စစ်ထဲ ဝင်ကြပါတယ်။ Flyboys ဟာ အဲဒီကာလက ဖြစ်ရပ်မှန်ကို အခြေခံရိုက်ကူးထားတဲ့ ဇာတ်ကားပါ။ အကြောင်းအမျိုးမျိုးနဲ့ ရောက်လာကြတဲ့ သူတို့အတွက် လေယာဉ်နဲ့ တာဝန်ထွက်ရတိုင်း အသက်ပြန်ပါလာမလားဆိုတာ မသေချာဘူး။ ကျဆုံးသူတွေ များလာတာနဲ့အမျှ သေဆုံးသတင်းတွေကလည်း ကြားနေကျ ဖြစ်လာတယ်။ မနေ့က အတူရှိခဲ့သူ ဒီနေ့ကျဆုံးသွားတဲ့အခါ လက်စားချေဖို့ အချိန်စောင့်ရင်း အရက်နဲ့ ဖြေသိမ့်သူတွေ ရှိသလို နောက်လူတွေကို ကာကွယ်ဖို့ အသက်စတေးသူတွေလည်း ရှိပါတယ်။ သူတို့ရဲ့ စစ်တွင်းဘဝနဲ့အတူ ကောင်းကင်ပေါ်မှာ လေယာဉ်အချင်းချင်း ရင်ဆိုင်တိုက်ခိုက်ကြတဲ့ တိုက်ပွဲတွေကိုလည်း ပြထားပါတယ်။

အိန္ဒိယနိုင်ငံသားတွေ အခွန်ဆောင်ရမယ့်နေ့ကို စောင့်နေတဲ့ ဟက်ကာတစ်ယောက် ရှိပါတယ်။ သူ့ရည်ရွယ်ချက်က အဲဒီနေ့မှာ လူတွေရဲ့အကောင့်တွေကို ဖောက်ဝင်ပြီး ငွေတွေကို အပိုင်စီးဖို့ပါ။ သူဟာ ဟက်ကာတစ်ယောက်ဖြစ်သလို ရက်စက်တဲ့ မျက်လှည့်ဆရာတစ်ယောက်လည်း ဖြစ်နေတယ်။ သူ့အစီအစဉ်ကို တားဖို့ ထောက်လှမ်းရေးဘက်က သူ့ထက်တောင် လက်စွမ်းသာတဲ့ ဟက်ကာတစ်ယောက်ကို တာဝန်ပေးလိုက်ပါတယ်။ တိုက်ဂါးရှရော့ဖ် သရုပ်ဆောင်ထားတဲ့ ဒီဟက်ကာက ရန်သူ့အဖွဲ့ထဲ ဝင်ရောက်ပြီး ဒေတာတွေကို ပြန်ဟက်ရမှာပါ။ အဲဒီတာဝန်ကို ထမ်းဆောင်ရင်း ကြုံလာမယ့် စွန့်စားခန်းတွေနဲ့ အက်ရှင်တွေကို အဓိကထား ရိုက်ကူးထားပါတယ်။ ၂၀၁၄ ခုနှစ်က ထွက်ခဲ့တဲ့ ပထမ Heropanti နဲ့ ဇာတ်လမ်းချိတ်ဆက်မှု မရှိတဲ့အတွက် ဒီကားကနေ စကြည့်လို့ရပါတယ်။ မင်းသမီးအဖြစ် Student of the Year 2 ထဲက တာရား ပါဝင်ထားပြီး သူမရဲ့ ဝတ်စားဆင်ယင်ပုံတွေကိုလည်း တွေ့ရမှာပါ။

Rambo မမွေးခင်ကတည်းက သူတို့မိသားစုဟာ ရွာထဲမှာ ကျိန်စာသင့်နေတဲ့မိသားစုလို့ နာမည်ကြီးနေပါတယ်။ ဒီမိသားစုဝင်တွေနဲ့ လက်ထပ်ရင် အိမ်ထောင်ဖက် အသက်ဆုံးရှုံးရတယ်ဆိုတဲ့ အယူအဆကြောင့် ဘယ်သူမှ သူတို့နဲ့ အိမ်ထောင်မပြုချင်ကြဘူး။ ဒါပေမယ့် Rambo ရဲ့အဖေကတော့ ချစ်သူဖြစ်တဲ့ အင်္ဂလိပ်စာဆရာမ Minah Kaif နဲ့ လက်ထပ်လိုက်ပြီး မွေးလာမယ့်ကလေးက မိသားစုဆီ ကံကောင်းခြင်းတွေ ယူဆောင်လာမယ်လို့ ပြောနေခဲ့တယ်။ Rambo မွေးတဲ့နေ့မှာပဲ အဖေက မတော်တဆမှုတစ်ခုနဲ့ ဆုံးပါးသွားပါတယ်။ မိခင်လည်း လေဖြတ်ပြီး သားဖြစ်သူကလွဲလို့ အရာအားလုံးကို မေ့သွားတယ်။ အများက “ဂြိုဟ်ဆိုးကောင်” လို့ ဝိုင်းခေါ်ကြတဲ့ကြားမှာ Rambo ဟာ သိမ်ငယ်နာကျင်မှုတွေနဲ့ ကြီးပြင်းလာခဲ့ရပါတယ်။ သူ့ကြောင့် အမေ့ဆီ ကံဆိုးမှုတွေ ထပ်ရောက်လာမှာစိုးလို့ အမေနဲ့ရွာကို စွန့်ခွာပြီး မြို့မှာ နေ့ရောညပါ အလုပ်ကြိုးစားလုပ်နေခဲ့တယ်။ မြို့မှာ Khatija နဲ့ Kanmani ဆိုတဲ့ မိန်းကလေးနှစ်ယောက်နဲ့ တွေ့လာတဲ့အခါတော့ သူ့ဘဝက ပြောင်းလဲလာပါတယ်။ နှစ်ယောက်စလုံးက သူ့ကို အလွန်ချစ်ကြပြီး တစ်သက်လုံး အပယ်ခံခဲ့ရတဲ့ Rambo အတွက် ဒီလိုချစ်ခြင်းကို တစ်ပြိုင်တည်းရလိုက်တာဟာ ဘဝက အခုမှ အသက်ဝင်လာသလိုပါပဲ။ သူကလည်း နှစ်ယောက်လုံးကို ညီတူညီမျှ ချစ်တယ်လို့ ဆိုနေတော့ ဒီသုံးယောက်ရဲ့ အချစ်ရေးက ဘယ်လိုအဆုံးသတ်သွားမလဲ။

အဂျူးဟာ မြို့လေးတစ်မြို့မှာ လူတကာရဲ့ အထင်ကြီးအားကျမှုကို ရထားတဲ့သူပါ။ ဒါပေမယ့် အဲဒီလို လေးစားခံရအောင် သူက အလိမ်အညာတွေနဲ့ ကိုယ့်ပုံရိပ်ကို တည်ဆောက်ထားခဲ့တာဖြစ်တယ်။ လက်ထပ်မယ့်အချိန်မှာတောင် သတို့သမီးလောင်းကို ကိုယ့်ပုံစံအမှန် မပြခဲ့ဘဲ မုသားတွေနဲ့ပဲ ဆက်ဆံခဲ့ပါတယ်။ လူအထင်ကြီးခံချင်တဲ့ အဂျူးက ဇနီးသည်ရဲ့ရောဂါကြောင့် လူပုံအလယ်မှာ အရှက်ကွဲရလိမ့်မယ်လို့ တွေးနေတယ်။ ဒါကြောင့် ဘယ်ကိုပဲသွားသွား ဇနီးကို ခေါ်မသွားခဲ့ဘူး။ သူများတွေ ကိုယ့်ကို ဘယ်လိုမြင်မလဲဆိုတာကိုပဲ ဂရုစိုက်နေတဲ့ အဂျူးနဲ့ သူ့ဇနီးတို့ကြားက ဆက်ဆံရေးဟာ ဘယ်လိုဆက်ဖြစ်လာမလဲ။ ကိုယ့်ပုံစံအမှန်ကို ဖုံးကွယ်ပြီး လူအထင်ကြီးအောင် နေထိုင်ချင်တဲ့စိတ်အကြောင်းကို တင်ပြထားတဲ့ ၂၀၂၃ ခုနှစ်ထွက် ဟင်ဒီစကားပြော ဘောလိဝုဒ်ဇာတ်ကားဖြစ်ပြီး ဗာရွန်းနဲ့ ဂျန်ဗီကပူးရ်တို့ အဓိကပါဝင်သရုပ်ဆောင်ထားပါတယ်။

ဥရောပမှာ ဇာတ်အိမ်တည်ထားတဲ့ ဒီအချစ်ဇာတ်လမ်းမှာ Prerana က သက်သေအထောက်အထားရှိတဲ့ လက်တွေ့အချက်အလက်တွေကိုပဲ ယုံကြည်တဲ့ ဆရာဝန်မလေးပါ။ Aditaya ကတော့ ဟောသမျှ မလွဲဖူးလို့ “ဗေဒင်လက္ခဏာလောကရဲ့ အိုင်းစတိုင်း” ဆိုပြီး ကျော်ကြားနေတဲ့ လက္ခဏာဆရာတစ်ယောက် ဖြစ်ပါတယ်။ ယုံကြည်ချက်ချင်း လုံးဝမတူတဲ့ သူတို့နှစ်ယောက် ကပွဲတစ်ခုမှာ မမျှော်လင့်ဘဲ ဆုံမိကြပြီး Aditaya က Prerana ကို ချစ်မိသွားတယ်။ ဒါပေမဲ့ Prerana မှာ ရှားပါးပြီး ကုသဖို့ နည်းလမ်းမရှိသေးတဲ့ အကျိတ်ရောဂါတစ်မျိုး ဖြစ်နေပါတယ်။ အသက်ရှင်ဖို့ လပိုင်းသာ ကျန်တော့တဲ့ Prerana နဲ့ ကိုယ့်လက္ခဏာမှာ အချစ်ရေးလမ်းကြောင်း လုံးဝမပါတဲ့ Aditaya တို့ အတူတူ ရှေ့ဆက်နိုင်ကြမလားဆိုတာကို ဇာတ်လမ်းက မေးထားတယ်။ Baahubali နဲ့ လူသိများတဲ့ Prabhas က အဓိကဇာတ်ဆောင်အဖြစ် ပါဝင်ထားပါတယ်။ ဇာတ်ဝင်တေးတွေကို တယ်လဂူနဲ့ ဟိန္ဒီ နှစ်မျိုး ဖန်တီးထားပြီး Aditaya ဇာတ်ကောင်ကိုတော့ ဥရောပက နာမည်ကြီးလက္ခဏာဆရာ Cheiro ကို အခြေခံစိတ်ကူးယူထားပါတယ်။

မိဂတ်ဒ်က အချစ်ရေးကြောင့် စိတ်နာခဲ့ဖူးတဲ့ လူပျိုကြီးတစ်ယောက်ပါ။ ကလေးတွေကိုတော့ ချစ်တတ်တာကြောင့် မွေးစားသားနှစ်ယောက်နဲ့ ပျော်ပျော်နေဖြစ်နေတယ်။ အဲဒီလိုနေရင်း ဘရစ်ရှတီနဲ့ ဆုံလာတဲ့အခါ အချစ်ကို ကြောက်နေသေးတဲ့ သူ့ဘဝက ပြောင်းလဲလာပါတယ်။ အခက်အခဲက ဘရစ်ရှတီမှာ ရှုဗစ်ဒ်ဆိုတဲ့ တွဲနေတဲ့သူ ရှိပြီးသားဖြစ်နေတာပါ။ မိဂတ်ဒ်ကိုယ်တိုင်ကလည်း ချစ်ရေးဆိုဖို့ မရဲဘူး။ တစ်ဖက်မှာ ဘရစ်ရှတီက အရာရာကို ပေါ့ပေါ့ပျက်ပျက် သဘောထားတဲ့ ရှုဗစ်ဒ်ကို တဖြည်းဖြည်း စိတ်ကွက်လာတယ်။ ဒါပေမဲ့ သူနဲ့ ရှုဗစ်ဒ်က နိုင်ငံခြားမှာ အခြေချဖို့ စီစဉ်ထားပြီးသား ဖြစ်နေပါတယ်။ သွားလာခွင့်ဗီဇာပါ ကျလာတဲ့အချိန်မှာ မိဂတ်ဒ်နဲ့ ဘရစ်ရှတီတို့ ခွဲခွာသွားကြရမလား၊ ဆက်ဆံရေးက ဘယ်လိုဖြစ်လာမလဲဆိုတာကို ဆက်ထားတဲ့ အချစ်ဟာသဇာတ်ကားပါ။ သူတို့နှစ်ယောက်ကြားမှာ အသက်အရွယ်ကွာဟမှုလည်း ရှိနေပါတယ်။

John Robie ဟာ The Cat လို့ နာမည်ကြီးခဲ့တဲ့ ရတနာသူခိုးတစ်ယောက်ဖြစ်ပေမဲ့ အခုတော့ အနားယူထားပါပြီ။ ဒါပေမဲ့ သူ့နည်းလမ်းတွေကို တုပထားတဲ့ ရတနာခိုးမှုတွေ ပေါ်လာတဲ့အခါ ရဲတွေအပါအဝင် သူနဲ့နီးစပ်တဲ့သူတွေကပါ The Cat ပြန်လှုပ်ရှားနေပြီလို့ ထင်ကြတယ်။ သူမကျူးလွန်ထားတဲ့ ခိုးမှုတွေအတွက် အပြစ်ကင်းကြောင်း ပြနိုင်ဖို့ Robie ကိုယ်တိုင် တကယ့်သူခိုးနောက်ကို လိုက်ရှာရပါတော့တယ်။ အရင်က ဒီအလုပ်လုပ်ခဲ့ဖူးတာကြောင့် သူခိုးတွေရဲ့ အလေ့အထနဲ့ လှုပ်ရှားပုံကို သူသိထားပါတယ်။ ဒါပေမဲ့ ကိုယ့်ကိုယ်ကိုယ် သံသယဝင်နေကြသူတွေကြားမှာ သူခိုးဖမ်းဖို့က မလွယ်လှဘူး။ လိုက်ရှာနေစဉ် ဘယ်လိုပြဿနာတွေကို ဖြေရှင်းရမလဲ၊ အချစ်နဲ့ရော ဘယ်လိုဆုံတွေ့လာမလဲဆိုတာကိုပါ ဇာတ်လမ်းထဲမှာ တွဲပြထားပါတယ်။ ၁၉၅၅ ခုနှစ်က ထွက်ရှိတဲ့ To Catch a Thief ကို Alfred Hitchcock ရိုက်ကူးထားပြီး Cary Grant နဲ့ အော်စကာဆုရ မင်းသမီး Grace Kelly တို့ ပါဝင်ထားပါတယ်။ ပြဇာတ်ဆန်တဲ့ တင်ဆက်ပုံ၊ အတက်အကျရှိတဲ့ ဇာတ်လမ်းနဲ့ နောက်ခံတေးဂီတတွေကြားမှာ သည်းထိတ်ရင်ဖိုမှုနဲ့ ပေါ့ပါးတဲ့အရသာကို ရောစပ်ထားပါတယ်။

Dear Friend က သူငယ်ချင်းတစ်သိုက်ရဲ့ အတူသွား၊ အတူစားရင်း ဖြတ်သန်းကြတဲ့ နေ့ရက်တွေအကြောင်း ရိုက်ထားတဲ့ မလையாளဘာသာစကားပြော အိန္ဒိယဇာတ်ကားပါ။ သူငယ်ချင်းတွေကြားက ချစ်ခင်မှု၊ ပျော်ရွှင်မှုနဲ့ တစ်ယောက်အပေါ်တစ်ယောက် ထားရှိတဲ့ ခံစားချက်တွေကို တွေ့ရမှာဖြစ်ပြီး သူငယ်ချင်းအဖြစ်ကနေ ချစ်သူဖြစ်လာမယ့်သူတွေများ ရှိမလားဆိုတာလည်း စောင့်ကြည့်ရပါတယ်။ ဒါပေမဲ့ သူတို့အတူရှိတဲ့ အချိန်တွေကိုပဲ ပြထားတဲ့ဇာတ်လမ်းတော့ မဟုတ်ပါဘူး။ ဟာသနဲ့ ဒရာမာအပြင် သည်းထိတ်ရင်ဖိုအမျိုးအစားလည်း ဖြစ်တာကြောင့် ဒီသူငယ်ချင်းတစ်သိုက်ကြားမှာ ဘယ်လိုခြောက်ခြားစရာတွေ ဖြစ်လာမလဲဆိုတဲ့ မေးခွန်းရှိနေပါတယ်။

လီဂျီအာက ဘယ်အပြစ်မဆို ဆယ့်ငါးနှစ်ကြာရင် အပြစ်ကြေတယ်လို့ စာအုပ်ထဲမှာ ဖတ်ဖူးကြောင်း ကင်ယိုဟန်ကို ပြောပြီး နောက်ဆယ့်ငါးနှစ်ကြာမှ ပြန်တွေ့ကြဖို့ ကတိထားခဲ့ပါတယ်။ သူတို့နှစ်ယောက်ရဲ့ ကလေးဘဝမှာတော့ ရှုပ်ထွေးနာကျင်စရာတွေ ရှိခဲ့တယ်။ တစ်ညမှာ ကင်ယိုဟန်ရဲ့အဖေ အသတ်ခံရပြီး လီဂျီအာရဲ့အမေက အဓိကသံသယရှိသူ ဖြစ်လာပါတယ်။ အဲဒီအချိန်မှာပဲ ကင်ယိုဟန်ရဲ့အမေနဲ့ အလုပ်သမား ကန်ဂျယ်ဒိုတို့ကြား ဖောက်ပြန်တဲ့ဆက်ဆံရေးလည်း ရှိနေတယ်။ ဒီဆက်ဆံရေးအရှုပ်အထွေးတွေကြားက လူသတ်မှုကို စုံထောက်ဟန်ဒုန်ဆူက စုံစမ်းရပါတယ်။ စုံစမ်းနေတုန်း လီဂျီအာရဲ့အမေ ကိုယ့်ကိုယ်ကို အဆုံးစီရင်သွားတော့ အမှုကို ပိတ်လိုက်ကြတယ်။ ဒါပေမယ့် အမှုပိတ်ပြီးမှ မသင်္ကာစရာတွေ ထပ်တွေ့လာတဲ့ စုံထောက်ဟန်က ဆက်လိုက်ခဲ့ရာမှာ ဆုံးရှုံးမှုကြီးတစ်ခုနဲ့ ကြုံရတယ်။ ဘယ်လောက်ကြိုးစားကြိုးစား အဖြေမရခဲ့ဘဲ အမှုက ပဟေဠိအဖြစ် ကျန်နေခဲ့ပါတယ်။ ဆယ့်လေးနှစ်အကြာမှာတော့ အဲဒီလူသတ်မှုနဲ့ ဆက်နွှယ်နေတဲ့ ကန်ဂျယ်ဒို သေဆုံးသွားရာက အမှုဟောင်း ပြန်ပေါ်လာတယ်။ လက်လျှော့ထားခဲ့တဲ့ စုံထောက်ဟန် ဒီတစ်ကြိမ်မှာ အမှုကို ဖြေရှင်းပြီး တရားခံဖမ်းနိုင်မလား။ ဆယ့်ငါးနှစ်ပြည့်ရင် ပြန်တွေ့ဖို့ ကတိထားတဲ့ လီဂျီအာနဲ့ ကင်ယိုဟန်တို့ရော ကတိအတိုင်း ပြန်ဆုံနိုင်ကြပါ့မလား။ Son Ye Jin၊ Lee Min-jung၊ Han Suk-kyu နဲ့ Go Soo တို့ ပါဝင်ထားတဲ့ လျှို့ဝှက်ဆန်းကြယ်မှု၊ အချစ်နဲ့ သည်းထိတ်ရင်ဖို ရောစပ်ထားတဲ့ ဇာတ်ကားပါ။ အဝတ်မပါသော မြင်

ရာသီဥတုလေ့လာဆန်းစစ်သူ မိုနာဟာ မုန်တိုင်းကြားမှာ ရာလန်ဆိုတဲ့ ကောင်လေးနဲ့ တွေ့ခဲ့ပါတယ်။ ဟိန္ဒိစကား သိပ်မပြောတတ်တဲ့သူ့ကို စကားနည်းသူလို့ ထင်မိပြီး မြင်မြင်ချင်းချစ်မိရာက နှစ်ယောက်သား လက်ထပ်လိုက်ကြတယ်။ အတူနေကြာလာပြီး ရာလန် ဘာသာစကား ကျွမ်းကျင်လာတော့မှ မိုနာ ထင်ထားသလို မဟုတ်မှန်း သိလာရပါတယ်။ ရာလန်က တွေ့သမျှကို မေးခွန်းထုတ်ပြီး ရေပက်မဝင်အောင် စကားပြောတတ်သူပါ။ စကားရပ်ဖို့ ပြောလိုက်တိုင်းလည်း စကားပြောတာဟာ အသက်ရှူနေရတာနဲ့ အတူတူပဲလို့ ပြန်ပြောလေ့ရှိတယ်။ အချက်အပြုတ်လည်း ဝါသနာပါလို့ တွေ့သမျှကို ချက်ပြုတ်စမ်းသပ်ပြီး မိုနာ့ကို ကျွေးနေပြန်ပါတယ်။ နောက်ဆုံး သည်းမခံနိုင်တော့တဲ့ မိုနာဟာ အလုပ်က သူငယ်ချင်းတွေနဲ့ တိုင်ပင်ပြီး ကွာရှင်းဖို့ နည်းလမ်းရှာတော့တယ်။ ရာလန် စိတ်ဆိုးလာအောင်လုပ်ပြီး ကွာရှင်းမယ်ဆိုတဲ့ အစီအစဉ်က အောင်မြင်မလား၊ ပိုပြီး အလွဲလွဲအချော်ချော် ဖြစ်သွားမလား မသိသေးတဲ့အချိန်မှာပဲ မိုနာတို့ကုမ္ပဏီမှာ တစ်နှစ်ကြာ ခရီးထွက်ရမယ့် ပရောဂျက်တစ်ခု ပေါ်လာပါတယ်။

ရှန့်ဝေရှင်းက အစားအသောက်ဆို သိပ်ကြိုက်တဲ့ ကျောင်းသူတစ်ယောက်ပါ။ သူ့သူငယ်ချင်းကို ပိုးပန်းတဲ့သူက လာပို့ပေးတဲ့ မနက်စာကိုတောင် သူက အကုန်စားပစ်တတ်တယ်။ အစားအသောက်ရှိမှ ဘဝက အဓိပ္ပါယ်ရှိတယ်လို့ သတ်မှတ်ထားတဲ့ ရှန့်ဝေရှင်းတစ်ယောက် နောက် ၁၅ နှစ်ကြာရင် ကိုယ် ဘယ်လိုဖြစ်နေမလဲဆိုတာကိုလည်း စဉ်းစားနေပါတယ်။ နောက် ၁၅ နှစ်မှာ အောင်မြင်နေမလား၊ အခုထက် ပိုဝလာမလား၊ လက်ရှိချစ်သူနဲ့ပဲ ဆက်တွဲနေဖြစ်မလားဆိုတဲ့ အနာဂတ်အကြောင်း မေးခွန်းတွေက ဒီထိုင်ဝမ်ကျောင်းသားဇာတ်ကားရဲ့ အဓိကအတွေးပါ။ မသိနိုင်သေးတဲ့ အနာဂတ်ကို တွေးနေတဲ့ ဆယ်ကျော်သက်အရွယ် ခံစားချက်တွေကို အချစ်နဲ့ လူငယ်ဘဝဒရာမာတို့ ရောပြီး ပုံဖော်ထားပါတယ်။

ရေဗက်ကာဟာ အဖိုးရှိတဲ့ ကမ်းခြေက အိမ်လေးမှာ ခဏလာနေတုန်း တွမ်မီဆိုတဲ့ ကောင်လေးနဲ့ ရင်းနှီးသွားပါတယ်။ နှစ်ယောက်စလုံး ကလေးတွေပဲ ရှိသေးပေမယ့် တစ်ယောက်ကိုတစ်ယောက် သံယောဇဉ်တွယ်ခဲ့ကြတယ်။ နောက်တော့ ရေဗက်ကာက အမေအလုပ်လုပ်နေတဲ့ ဂျပန်ကို လိုက်သွားရတာကြောင့် ခွဲခွာခဲ့ကြရပါတယ်။ ၁၂ နှစ်လောက် ကြာပြီးတဲ့အခါ ရေဗက်ကာဟာ တွမ်မီရှိတဲ့ ကမ်းခြေကို ပြန်လာတယ်။ ငယ်ငယ်က သံယောဇဉ်တွေကနေ နှစ်ယောက်သား ချစ်သူတွေ ဖြစ်လာကြပေမယ့် တစ်ရက်မှာတော့ တွမ်မီ ကားတိုက်ခံရပြီး သေဆုံးသွားပါတယ်။ လူသားကို ပုံတူပွားနိုင်တဲ့အထိ နည်းပညာတိုးတက်နေတဲ့အချိန်ဖြစ်လို့ ရေဗက်ကာက တွမ်မီရဲ့ DNA ကိုယူပြီး သူကိုယ်တိုင် ကိုယ်ဝန်ဆောင်ဖို့ စဉ်းစားလာတယ်။ အဲဒီစိတ်ကူးကို တွမ်မီရဲ့ မိဘတွေနဲ့ သွားတိုင်ပင်ပါတယ်။

ဘဲလ်သံ ကလင်ကလင်မြည်တဲ့ စက်ဘီးကလေးနဲ့ ဖြတ်သန်းခဲ့တဲ့ လူငယ်ဘဝမှာ ကောင်လေးတစ်ယောက်ဟာ ဝေဝေရီရီမျက်ဝန်းလေးတွေရှိတဲ့ ကောင်မလေးကို ချစ်မိခဲ့ပါတယ်။ အတူကျောင်းသွားရတဲ့ သူမကို ငေးကြည့်နေရတာက သူ့အတွက် ပျော်စရာဖြစ်သလို ဝေးသွားရမယ်ဆိုတဲ့ အတွေးကိုလည်း ကြောက်နေခဲ့တယ်။ အချစ်အကြောင်း သိပ်နားမလည်သေးတဲ့အရွယ်မှာ သူမဟာ သူသိပ်မြတ်နိုးရသူ ဖြစ်လာခဲ့တာပါ။ အချိန်ကြာလာတော့ ကောင်မလေးရဲ့ လိုချင်တောင့်တမှုတွေ ပြောင်းလဲလာပါတယ်။ တစ်ချိန်က သူမမက်မောခဲ့တဲ့အရာတွေဟာ အလွယ်တကူ ရနိုင်လာပေမယ့် အခုတမ်းတနေတဲ့အရာတွေကတော့ ကောင်လေး လက်လှမ်းမမီနိုင်တဲ့အရာတွေ ဖြစ်နေပြန်တယ်။ သူ့ဘက်က ချစ်နေဆဲဖြစ်ပေမယ့် နှစ်ယောက်ရဲ့ စိတ်ဆန္ဒတွေက တစ်ထပ်တည်း မကျတော့ပါဘူး။ ကလေးဘဝက အတူဆော့ကစားခဲ့တဲ့ အမှတ်တရတွေ၊ ကျောင်းသွားဖော်ဘဝနဲ့ နှင်းဆီခြုံတောထဲက သူမရဲ့ပုံရိပ်တွေဟာ ကောင်လေးအတွက် မမေ့နိုင်တဲ့အရာတွေ ဖြစ်နေတယ်။ သူများတွေက လူအလို့ သတ်မှတ်ကြရင်တောင် သူမကို ဆက်ချစ်နေချင်တဲ့ စိတ်ကတော့ မပြောင်းလဲသေးပါဘူး။

တိုရိုတိုမိနဲ့ တိုခုဂဝတို့ခေတ်မှာ စစ်ကို ဘယ်သူနိုင်နိုင် သတ်ဖြတ်မှုတွေ ဆက်ရှိနေဦးမယ်လို့ ယူဆတဲ့ လုပ်ကြံရေးအဖွဲ့တစ်ဖွဲ့ ပေါ်လာပါတယ်။ သူတို့ရဲ့ရည်ရွယ်ချက်က စစ်ပွဲတွေ မရှည်ကြာစေဖို့ တိုရိုတိုမိရဲ့ မဟာမိတ်စစ်နယ်ရှင် သုံးယောက်ကို လုပ်ကြံဖို့ပါ။ အုပ်ချုပ်ရေးအဖွဲ့ကို ဆန့်ကျင်တဲ့ ခေါင်းဆောင်တစ်ယောက်က ကလေးတချို့ကို နှစ်ပေါင်းများစွာ ဓားသိုင်းသင်ပေးပြီး ဒီတာဝန်အတွက် ပျိုးထောင်ထားခဲ့တယ်။ ကလေးတွေ အရွယ်ရောက်ပြီး ပညာစုံလာတဲ့အခါ ကိုယ်ရောစိတ်ပါ မာကျောဖို့၊ ပေးအပ်တဲ့တာဝန်ကို မပျက်မကွက် လိုက်နာဖို့ ရက်စက်တဲ့ နောက်ဆုံးသင်ခန်းစာတစ်ခုကို ရင်ဆိုင်ကြရပါတယ်။ အချင်းချင်း ပြန်သတ်ခိုင်းပြီး အသက်ရှင်ကျန်သူတွေကိုပဲ ရွေးချယ်တဲ့ လေ့ကျင့်မှုပါ။ အဲဒီထဲက လွတ်မြောက်လာသူတစ်ယောက်ကတော့ အာဇုမိဆိုတဲ့ နင်ဂျာမလေး ဖြစ်ပါတယ်။ အာဇုမိဟာ အပြင်ပန်းမှာ နူးညံ့ပျော့ပျောင်းပုံပေါက်ပေမယ့် စိတ်ဓာတ်ခိုင်မာပြီး လူသတ်ရတဲ့အခါ လက်မတွန့်သူပါ။ လေ့ကျင့်ရေးပြီးဆုံးတဲ့နောက် သူတို့ဟာ စစ်ကိုတားဖို့ စစ်နယ်ရှင်တွေကို လိုက်လံလုပ်ကြံကြရပါတယ်။ မန်ဂါကို အခြေခံထားတဲ့ ဒီဂျပန်သမိုင်းနောက်ခံ ဆာမူရိုင်းကားမှာ ဓားခုတ်ခန်းနဲ့ တိုက်ခိုက်ခန်းတွေ အများအပြား ပါဝင်ပြီး ဒုတိယကားကလည်း ပထမကားရဲ့အဖြစ်အပျက်တွေကို တစ်ဆက်တည်း ဆက်ထားပါတယ်။

ကိစ္စတစ်ခုကြောင့် မိသားစုကို အရှက်ရစေခဲ့တဲ့ မီယာဟာ ဖခင်က ချီးမွှမ်းရတဲ့ သမီးတစ်ယောက် ပြန်ဖြစ်ချင်နေပါတယ်။ ကိုယ့်ဘဝကို ပြန်တည်ဆောက်ဖို့ ကြိုးစားချင်တဲ့စိတ်နဲ့ စပိန်နိုင်ငံ ဘာစီလိုနာမြို့ကို အလုပ်ရှာဖို့ စွန့်စားထွက်လာခဲ့တယ်။ အယ်လီကတော့ သူ့ပယောဂကြောင့် ချစ်သူသေဆုံးခဲ့ရတယ်ဆိုတဲ့ နောင်တနဲ့ နေနေရသူပါ။ ချစ်သူရဲ့ဆန္ဒကို ဖြည့်ဆည်းပေးဖို့ ကာတွန်းနဲ့ ရုပ်ရှင်တွေ ဖန်တီးချင်တဲ့ ကိုယ့်ဝါသနာကို စွန့်ပြီး ဘာစီလိုနာမှာ ဗိသုကာပညာ သင်ယူနေပါတယ်။ အဲဒီမှာပဲ မီယာနဲ့ တွေ့ဆုံခဲ့တာပါ။ မီယာက အယ်လီရဲ့ချစ်သူဟောင်း စီလင်းနဲ့ ရုပ်ချင်းခွဲမရအောင် တူနေတယ်။ အယ်လီဟာ ဘာစီလိုနာမှာ မီယာကို ကူညီစောင့်ရှောက်ပေးရင်း နှစ်ယောက်ကြား ချစ်ခြင်းမေတ္တာ ဖြစ်ပေါ်လာပါတယ်။ Kathryn Bernardo နဲ့ Daniel Padilla တို့ ပါဝင်တဲ့ ဒီအချစ်ဇာတ်လမ်းမှာ လူတိုင်း အချစ်ခံရဖို့ ထိုက်တန်သလား၊ အမှားတစ်ခုအတွက် တစ်သက်လုံး ပေးဆပ်နေရမလား၊ လဲကျခဲ့ရာကနေ ပြန်ထဖို့ ဘယ်လိုခွန်အားတွေ ရနိုင်မလဲဆိုတဲ့ မေးခွန်းတွေကိုလည်း ထည့်သွင်းထားပါတယ်။

Tott က ရုပ်ရည်ချောမောပေမယ့် မိဘအုပ်ထိန်းသူတွေနဲ့ အတူမနေခဲ့ရဘဲ ကိုယ့်ဘဝကိုယ် ရပ်တည်နေရတဲ့ လူငယ်တစ်ယောက်ပါ။ သူငယ်ချင်းတွေနဲ့ ဘဝကို ဖြတ်သန်းရင်း ရရာအလုပ်လုပ်ပြီး ဝင်ငွေရှာနေရတယ်။ သူ့ကို သဘောကျနေသူတွေရှိသလို သူကိုယ်တိုင် သဘောကျနေသူတွေလည်း ရှိနေပါတယ်။ အဲဒီအချစ်ရေးတွေကြားမှာ Tott တစ်ယောက် ဘယ်လိုအလွဲအချော်တွေ ကြုံရမလဲဆိုတာကို Nick Kunatip နဲ့ သူ့ရဲ့ဟာသတွဲဖက်တွေ ပါဝင်သရုပ်ဆောင်ထားတဲ့ ထိုင်းဟာသဇာတ်ကားပါ။

ဘလိတ်မီဒီယာကို ဦးဆောင်နေတဲ့ ပရက်စတန်ဘလိတ် ကွယ်လွန်သွားတဲ့အခါ သူချန်ခဲ့တဲ့ အမွေပစ္စည်းတွေနဲ့ ရှယ်ယာတွေကို ဆက်ခံမယ့်သူ လိုက်ရှာကြပါတယ်။ အဲဒီလိုရှာရင်း လူသိနည်းတဲ့ မြို့လေးတစ်မြို့မှာ နေထိုင်နေတဲ့ သူ့တူ လောင်းဖဲလိုးဒိစ်ကို တွေ့သွားကြတယ်။ ဒိစ်က ရိုးရိုးအေးအေးနေတတ်ပြီး သူများကို ကူညီချင်စိတ်အပြည့်ရှိတဲ့သူပါ။ အမွေဆိုင်ရာ စာရွက်စာတမ်းကိစ္စတွေ လုပ်ဖို့ နယူးယောက်ကို လိုက်လာရင်း မီဒီယာတစ်ခုက သတင်းထောက် ပန်ဒေါ်ဆန်နဲ့ တွေ့ဆုံလာပါတယ်။ ဒီတွေ့ဆုံမှုကနေ ဒိစ် ဘယ်လိုပြဿနာတွေ ကြုံရမလဲဆိုတာ ဆက်ပြထားတဲ့ အချစ်ဟာသဇာတ်လမ်းပါ။ ဒါရိုက်တာ Steven Brill ရိုက်ကူးထားပြီး ဒိစ်အဖြစ် Adam Sandler နဲ့ ပန်ဒေါ်ဆန်အဖြစ် Winona Ryder တို့ ပါဝင်သရုပ်ဆောင်ထားပါတယ်။

လက်က်ဇ်ဂေစီအင်ဂျင်နီယာကျောင်းနဲ့ ဘရာမာဆေးကျောင်းတို့က မျက်နှာချင်းဆိုင်မှာ ရှိပေမယ့် လုံးဝမတည့်ကြတဲ့ ကျောင်းနှစ်ကျောင်းပါ။ အင်ဂျင်နီယာကျောင်းဘက်မှာ ဗစ်ရှ်ဟွာက ခေါင်းဆောင်ဖြစ်ပြီး ဆေးကျောင်းဘက်မှာတော့ ဗစ်ခရမ်ရှိတယ်။ ကိုယ်ဘာဖြစ်ချင်မှန်းတောင် ရေရေရာရာမသိသေးတဲ့ ပထမနှစ်အင်ဂျင်နီယာကျောင်းသား အက်ရှ်ရှေက တစ်နေ့မှာ ဆေးကျောင်းထဲ မှားဝင်မိသွားပါတယ်။ အဲဒီမှာ ကာဗီရာကို သဘောကျသွားပြီး ရည်းစားစာပါ ပေးလိုက်တယ်။ ကာဗီရာက ဗစ်ခရမ်သဘောကျနေတဲ့ မိန်းကလေးဖြစ်သလို သူတို့နှစ်ယောက်လုံးကလည်း ဆေးကျောင်းမှာ စာအတော်ဆုံး၊ ကျောင်းဂုဏ်ဆောင် ကျောင်းသားတွေပါ။ ဗစ်ခရမ်က တခြားလူတွေ ကာဗီရာကို ကြည့်တာလေးတောင် သည်းမခံနိုင်တဲ့သူမျိုး။ ဒီကြားထဲ ရန်ဘက်အင်ဂျင်နီယာကျောင်းက ကောင်လေးကို ကာဗီရာက သဘောကျလာတဲ့အခါ ဘာတွေဖြစ်လာမလဲ။ အက်ရှ်ရှေကလည်း ကာဗီရာရဲ့အချစ်ကိုရဖို့ ဘယ်လိုကြိုးစားရမလဲ၊ ကျောင်းနှစ်ကျောင်းရဲ့ ရန်ငြိုးတွေကြားမှာ ဘယ်လိုအခက်အခဲတွေ ကြုံရမလဲဆိုတာ ဆက်တွေ့ရမှာပါ။