အချစ်ဇာတ်လမ်းများ

ဂီအန်ဟာ မိန်းကလေးတွေနဲ့ ပတ်သက်ပြီး အတွေ့အကြုံမရှိသေးတဲ့ ရိုးရိုးသားသား လူပျိုတစ်ယောက်ပါ။ ကြီးတော် စီစဉ်ပေးထားတဲ့ ဘလိုင်းဒိတ်ကို သွားမယ့်လမ်းမှာ အရက်မူးပြီး လူတွေကို လိုက်ရစ်နေတဲ့ ဆစ်စီဆိုတဲ့ ကောင်မလေးနဲ့ မထင်မှတ်ဘဲ ဆုံမိတယ်။ ဒီလိုစတွေ့ခဲ့တဲ့ ကောင်မလေးက ဂီအန်ရဲ့ အချစ်ဦးဖြစ်လာပြီး သူကတော့ ဆစ်စီကို “မိထူးဆန်း” လို့ ချစ်စနိုးနာမည်ပေးထားပါတယ်။ သူတို့နှစ်ယောက်ကြားက အချစ်ဇာတ်လမ်းကို ဂီအန်ရဲ့ ရှုထောင့်ကနေ ပြောပြထားတာပါ။ ဒီအင်ဒိုနီးရှား ဟာသအချစ်ဇာတ်ကားဟာ Jun Ji-hyun နဲ့ Cha Tae-hyun တို့ ပါဝင်ထားတဲ့ ကိုရီးယားရုပ်ရှင် My Sassy Girl ကို ပြန်လည်ရိုက်ကူးထားတာ ဖြစ်ပါတယ်။ မူရင်းဇာတ်လမ်းကို တရုတ်၊ ဂျပန်၊ ထိုင်းတို့လို အာရှနိုင်ငံတွေအပြင် ဟောလီးဝုဒ်မှာပါ ပုံစံအမျိုးမျိုးနဲ့ ပြန်လည်ရိုက်ကူးခဲ့ကြပါတယ်။

ဖရန့်ခ်နဲ့ ဂျက်ခ် ဘိတ်ကာတို့ ညီအစ်ကိုနှစ်ယောက်ဟာ အပန်းဖြေတည်းခိုခန်းတွေနဲ့ စားသောက်ဆိုင်တွေမှာ လှည့်လည်ဖျော်ဖြေလာတာ ၁၅ နှစ်ကျော်ရှိပြီဖြစ်တဲ့ ပရော်ဖက်ရှင်နယ် စန္ဒရားပညာရှင်တွေပါ။ ဒါပေမဲ့ အချိန်ကြာလာတာနဲ့အမျှ သူတို့ပွဲကို လာကြည့်သူတွေ နည်းလာတော့ အရင်ပုံစံအတိုင်းပဲ ဆက်ဖျော်ဖြေနေလို့ မဖြစ်တော့ဘူးဆိုတာ သဘောပေါက်လာကြတယ်။ ပရိသတ်တွေကို ပြန်ဆွဲဆောင်နိုင်ဖို့ အမျိုးသမီးအဆိုတော်တစ်ယောက် ခေါ်ဖို့ ဆုံးဖြတ်ပြီး လူရွေးပွဲလုပ်ကြပါတယ်။ အဲဒီကနေ ဆူစီ ဒိုင်းမွန်းဆိုတဲ့ အဆိုတော်ကို ရွေးချယ်လိုက်ကြတယ်။ သုံးယောက်အတူ လှည့်လည်ဖျော်ဖြေကြရင်း တစ်ယောက်နဲ့တစ်ယောက်ကြား မကျေနပ်မှုတွေ ရှိလာတဲ့အခါ သူတို့ရဲ့ တွဲဖက်ဖျော်ဖြေမှုက ဘယ်လိုဆက်ဖြစ်သွားမလဲ။ ၁၉၈၉ ခုနှစ်က ရိုက်ကူးထားတဲ့ ဂီတဒရာမာရုပ်ရှင်ဖြစ်ပြီး အော်စကာဆု လေးဆုအတွက် ဆန်ခါတင်ဝင်ခဲ့ပါတယ်။ အသံပိုင်းအတွက်လည်း ဆုရရှိထားတဲ့ ဇာတ်ကားပါ။

ဂျွန်နီက မိန်းကလေးတွေကြားမှာ ရေပန်းစားပြီး အပတ်တိုင်း နိုက်ကလပ်သွားလေ့ရှိတဲ့ လူငယ်တစ်ယောက်ပါ။ ကလပ်မှာ တွေ့တဲ့ မိန်းကလေးတွေနဲ့ ရင်းနှီးပြီး လိင်ဆက်ဆံမှုတွေ ရှိပေမယ့် သူ့အတွက်တော့ စိတ်ကျေနပ်မှုက အပြည့်အဝ မရဘူး။ သူတွဲတဲ့ မိန်းကလေးတွေရဲ့ ရုပ်ရည်အသွင်အပြင်ကို အပြစ်ပြောစရာ မရှိပေမယ့် သူကြည့်နေကျ အပြာကားတွေနဲ့ ယှဉ်မိပြီး တစ်ခုခုလိုနေသလို ခံစားနေရပါတယ်။ အဲဒီလိုနဲ့ ကလပ်မှာ ဘာဘရာဆူဂါမန်ဆိုတဲ့ ဆွဲဆောင်မှုရှိတဲ့ မိန်းကလေးတစ်ယောက်နဲ့ တွေ့လာတယ်။ ဘာဘရာနဲ့ တွေ့ဆုံမှုက ဂျွန်နီကို သူစွဲလမ်းနေတဲ့ အပြာကားတွေဆီကနေ ရုန်းထွက်နိုင်စေမလားဆိုတာ ဆက်ကြည့်ရမှာပါ။ Joseph Gordon-Levitt၊ Scarlett Johansson နဲ့ Julianne Moore တို့ ပါဝင်ထားတဲ့ ဒီဇာတ်ကားက အပြာကားစွဲလမ်းမှုနဲ့ လက်တွေ့ဆက်ဆံရေးကို စိတ်ကူးယဉ်ဇာတ်ကွက်တွေနဲ့ နှိုင်းယှဉ်မိတဲ့အခါ ဖြစ်လာနိုင်တဲ့ ပြဿနာတွေကို ဟာသနှောပြီး တင်ပြထားပါတယ်။ အရွယ်ရောက်သူတွေအတွက် လိင်ပိုင်းဆိုင်ရာအခန်းတွေနဲ့ ကြမ်းတမ်းတဲ့ စကားအသုံးအနှုန်းတွေ ပါဝင်တယ်။ လိင်ဆက်ဆံရေးမှာ ကိုယ့်ဆန္ဒတစ်ခုတည်း ပြည့်ဝဖို့ထက် နှစ်ဦးကြား အပေးအယူမျှတဖို့ လိုအပ်တယ်ဆိုတဲ့ အကြောင်းကိုလည်း ပြောထားပါတယ်။

ခုတ်အီနွန်ရွာက ခေါင်းပြတ်သရဲမ သေဆုံးသွားပြီး ၂၂ နှစ်အကြာမှာ နွိုင်းမှာ ဆောင်ဆိုတဲ့ သမီးလေးတစ်ယောက် ရှိနေပါပြီ။ ဆောင်က ငယ်ငယ်ကတည်းက ခေါင်းပြတ်သရဲမ ဖြစ်နေသူပါ။ သူ့အခြေအနေကို ထိန်းချုပ်နိုင်ဖို့ နွိုင်းနဲ့ ဖာသာဩဂတ်စ်တင်တို့က ဆေးဖက်ဝင်အပင်တွေကို သုံးပြီး ဆေးတွေ ဖန်တီးပေးထားကြတယ်။ ဖာသာရဲ့ မွေးစားသား ခလောက်ကတော့ သူ့ကိုယ်ထဲမှာ ထူးခြားတဲ့အရာတစ်ခုခု ရှိနေသူပါ။ တစ်နေ့မှာ ခလောက်နဲ့ ဆောင်တို့ တွေ့ဆုံပြီး သူငယ်ချင်းတွေ ဖြစ်လာကြတယ်။ အချိန်ကြာလာတာနဲ့ သံယောဇဉ်တွယ်ပြီး တစ်ယောက်ကိုတစ်ယောက် ချစ်မိသွားကြပါတယ်။ ဒါပေမဲ့ ခေါင်းပြတ်သရဲမအကြောင်း ကောလာဟလတွေ ထွက်လာတဲ့နောက် သူ့ကို ဖမ်းချင်တဲ့ နိုင်ငံခြားသားတစ်ဖွဲ့ ပေါ်လာတယ်။ သူတို့ ဖမ်းမိသွားမလား၊ ခလောက်နဲ့ ဆောင်တို့ရဲ့ အချစ်ရေးကရော ဘယ်လိုဆက်ဖြစ်မလဲဆိုတာ ဆက်ကြည့်ရမှာပါ။ ခလောက်အဖြစ် JJ Krissanapoom Pibulsonggram နဲ့ ဆောင်အဖြစ် Ninky Chanya McClory တို့ သရုပ်ဆောင်ထားပါတယ်။

Lust Stories 2 ကတော့ ၂၀၁၈ ခုနှစ်မှာ ထွက်ခဲ့တဲ့ Emmy ဆန်ခါတင် Lust Stories ရဲ့ ဒုတိယမြောက်ရုပ်ရှင်ပါ။ Netflix က ထုတ်လွှင့်ထားပြီး တမန်နားဘာတီယာ၊ ကားဂျိုးနဲ့ မရူနားလ်ထာကုရ်တို့ ပါဝင်သရုပ်ဆောင်ထားကြပါတယ်။ အရင်ကားလိုပဲ ဒါရိုက်တာလေးဦးက မတူညီတဲ့ ဇာတ်လမ်းတိုလေးပုဒ်ကို အမျိုးသမီးတွေ အဓိကနေရာကနေ တင်ဆက်ထားတာပါ။ ဇာတ်လမ်းတွေက အမျိုးသမီးတွေရဲ့ လိင်မှုဆိုင်ရာခံစားချက်နဲ့ စိတ်နေစိတ်ထားတွေကို အာရုံစိုက်ထားပါတယ်။ လက်တွဲဖော်အမျိုးသားတွေ မသိကြတဲ့အကြောင်းတွေ၊ အမျိုးသမီးတွေ ကိုယ်တိုင်တောင် သတိမထားမိတဲ့ ကိုယ့်စိတ်အကြောင်းတွေကို ပုံဖော်ထားတယ်။ အိမ်ထောင်ရေးမှာ လိင်စိတ်တစ်ခုတည်းကို အဓိကထားတာထက် အချစ်နဲ့ လိင်မှုဘဝ နှစ်မျိုးလုံး အတူရှိဖို့လိုတယ်ဆိုတဲ့အမြင်ကို ဇာတ်လမ်းတစ်ပုဒ်ချင်းစီကနေ တင်ပြထားပါတယ်။ လိင်မှုဆိုင်ရာ အသိပညာပေးသဘော ပါဝင်ပြီး ၁၈ နှစ်အထက်အတွက် သတ်မှတ်ထားတဲ့ ရုပ်ရှင်ပါ။

Wi-Fi တစ်ခုကနေ စတင်ခဲ့တဲ့ Raquel နဲ့ Ares တို့ရဲ့ အချစ်ရေးကို Through My Window ရဲ့ ဒုတိယကားမှာ ဆက်ပြထားပါတယ်။ အစပိုင်းက ပျော်ရွှင်ခဲ့ကြပေမယ့် အချိန်ကြာလာတာနဲ့အမျှ သူတို့နှစ်ယောက်လည်း စိန်ခေါ်မှုတွေကို ရင်ဆိုင်လာရတယ်။ Raquel ရဲ့ ဖျောင်းဖျမှုကြောင့် Ares က ဆွီဒင်နိုင်ငံ၊ စတော့ဟုမ်းမြို့မှာ ဆေးကျောင်းသွားတက်ပါတယ်။ အထက်တန်းကျောင်းဘဝကနေ တက္ကသိုလ်ဘဝကို ကူးပြောင်းရတာအပြင် နိုင်ငံခြားမှာပါ သွားနေရတဲ့အတွက် သူ့အတွက် လိုက်လျောညီထွေဖြစ်ဖို့ မလွယ်ပါဘူး။ တစ်ဖက်မှာလည်း Raquel နဲ့ အဝေးကနေ ချစ်ကြရတဲ့အခြေအနေကို ဖြတ်သန်းနေရတယ်။ ကျောင်းပိတ်ရက်မှာ Ares အိမ်ပြန်လာတဲ့အခါ သူတို့ကြားက ဝေးကွာမှုဟာ အချစ်ရေးအတွက် စမ်းသပ်မှုတစ်ခု ဖြစ်လာပါတယ်။ ပြန်တွေ့ရတဲ့အချိန်မှာ သူတို့နှစ်ယောက် ဘယ်လိုဆက်ဖြစ်ကြမလဲဆိုတာကို ပုံဖော်ထားတဲ့ လူငယ်အချစ်ဒရာမာပါ။ လိင်ဆက်ဆံမှုအခန်းများစွာ ပါဝင်တာကြောင့် မိသားစုနဲ့အတူ ကြည့်ဖို့တော့ မသင့်တော်ပါဘူး။

မက်ဒီက အူဘာတက္ကစီမောင်းပြီး အသက်မွေးနေသူပါ။ အိမ်အခွန်မဆောင်နိုင်လို့ ကားအသိမ်းခံလိုက်ရတဲ့အပြင် မကြာခင် အိမ်ကိုပါ ဆုံးရှုံးရနိုင်တဲ့အခြေအနေ ရောက်နေပါတယ်။ အမေ့ဆီက အမွေရထားတဲ့အိမ်လေးကို လက်မလွှတ်ချင်တာကြောင့် အလုပ်ပြန်လုပ်နိုင်ဖို့ ကားတစ်စီးရမယ့်နည်းကို အသည်းအသန် ရှာနေရတယ်။ အဲဒီအချိန်မှာ သူဌေးလင်မယားတစ်တွဲရဲ့ အင်တာနက်ကြော်ငြာကို မက်ဒီ တွေ့သွားပါတယ်။ သူတို့ရဲ့ အသက် ၁၉ နှစ်အရွယ် အိမ်တွင်းပုန်းသားလေးကို လောကကြီးအကြောင်း ပိုနားလည်လာအောင် တွဲပေးမယ့်မိန်းကလေးတစ်ယောက် ရှာနေတာပါ။ အဲဒီအတွက် ကားတစ်စီးပေးမယ်ဆိုတော့ မက်ဒီအတွက် အခွင့်အရေးဖြစ်လာတယ်။ ဒါနဲ့ သူ့ထက် ၁၅ နှစ်လောက်ငယ်တဲ့ ကျောင်းသားလေးကို ဒီသဘောတူညီချက်အကြောင်း မသိစေဘဲ ရည်းစားဖြစ်အောင် ကြိုးစားပါတော့တယ်။ အသက်အရွယ်ကွာတဲ့ သူတို့နှစ်ယောက်ကြား ဘယ်လိုအလွဲတွေ ကြုံလာမလဲဆိုတာ ဆက်ကြည့်ရမှာပါ။ Jennifer Lawrence နဲ့ Andrew Barth Feldman တို့ ပါဝင်ထားတဲ့ အချစ်ဟာသကားဖြစ်ပြီး အဝတ်မပါသောအခန်းတွေနဲ့ ကြမ်းတမ်းတဲ့အသုံးအနှုန်းတွေကြောင့် R အဆင့် သတ်မှတ်ထားပါတယ်။

Sahra နဲ့ Deniz တို့ဟာ ငယ်သူငယ်ချင်းတွေဖြစ်ပြီး သူတို့ရဲ့အဘွားနှစ်ယောက်ကလည်း သူငယ်ချင်းတွေပါ။ အဘွားတွေက မြေးနှစ်ယောက်ကို ဖူးစာဆုံစေချင်လို့ အကြောင်းပြချက်တွေဖန်တီးပြီး နယ်ကို ပြန်ခေါ်လိုက်ကြတယ်။ ဒါပေမဲ့ ပြန်ဆုံလာတဲ့ Sahra နဲ့ Deniz တို့ကတော့ တစ်ယောက်မျက်နှာတစ်ယောက်တောင် မမြင်ချင်လောက်အောင် မုန်းနေကြပါတယ်။ အဘွားနှစ်ယောက်က နီးစပ်အောင် ကြံပေးလေလေ အလွဲအချော်တွေဖြစ်လေလေနဲ့ ရုံးရောက်ဂတ်ရောက်အထိ ဖြစ်ကုန်ကြတယ်။ ဒီနှစ်ယောက်ကြားမှာ ဘယ်လိုရန်ငြိုးတွေရှိနေတာလဲ၊ အဘွားတွေ မျှော်လင့်သလို ပြန်ပြေလည်နိုင်ကြမလားဆိုတာကို ရှုခင်းလှလှနဲ့ အရောင်အသွေးစုံစုံကြားမှာ ပြောပြထားတဲ့ တူရကီအချစ်ဇာတ်ကားပါ။

လူမသိစေချင်တဲ့ သာယာမှုတွေကို ရှာဖို့ လူငါးယောက်က ထပ်ခိုးခန်းတစ်ခန်းကို မျှဝေသုံးနေကြပါတယ်။ အခန်းကို ဖွင့်နိုင်တဲ့သော့က ငါးချောင်းရှိပြီး တစ်ယောက်ကို တစ်ချောင်းစီ ကိုင်ထားကြတယ်။ ဇာတ်လမ်းစချိန်မှာတော့ အဲဒီအခန်းထဲကို ဘယ်လိုရောက်နေမှန်းမသိတဲ့ အလောင်းတစ်လောင်း ရှိနေပါတယ်။ လူရှေ့မှာ မပြကြတဲ့အခြမ်းကို ဆိတ်ကွယ်ရာမှာ ထုတ်ပြတတ်တဲ့ လူ့သဘာဝကို ဒီလူငါးယောက်ရဲ့အကြောင်းနဲ့ တွဲဖော်ပြထားတာပါ။ အိမ်ထောင်ရေးနဲ့ လိင်ဆန္ဒအကြောင်းတွေ ပါဝင်သလို အကျပ်အတည်းကြားက ဉာဏ်ကစားမှု၊ လှည့်စားမှုတွေကိုလည်း လျှို့ဝှက်ဆန်းကြယ် မှုခင်းပုံစံနဲ့ တင်ဆက်ထားပါတယ်။

ဘက်နဲ့ ဒန်တို့ဟာ အယ်လီရော့ဆိုတဲ့ သားတစ်ယောက်ရှိပြီး နှစ်တွေကြာလာတဲ့အထိ ချစ်ခင်နေကြတဲ့ လင်မယားပါ။ ဘက်က စာရေးဆရာမ၊ ဒန်က ကုထုံးဆရာဝန်ဖြစ်ပြီး ဘက်ရဲ့ညီမ ဆာရာကတော့ အိမ်တွင်းအလှဆင်တဲ့အလုပ် လုပ်ပါတယ်။ ဘက်ရဲ့ အရင်စာအုပ်တစ်အုပ်က နာမည်ရခဲ့ပေမယ့် နောက်တစ်အုပ် ထုတ်ဖို့ပြင်တဲ့အခါ အေးဂျင့်က သဘောမကျဘူး။ ဒန်ကတော့ စာအုပ်ကို ကြိုက်တယ်လို့ ပြောပြီး ဘက်ကလည်း ခင်ပွန်းပြောတာကို ယုံထားပါတယ်။ ဒန်ကိုယ်တိုင်လည်း အလုပ်မှာ အဆင်မပြေတာတွေ ကြုံနေရတယ်။ ဆာရာတို့လင်မယားမှာလည်း အလုပ်နဲ့ပတ်သက်လို့ စိတ်မောစရာတွေ ရှိနေပြီး ပြဇာတ်သရုပ်ဆောင်ဖြစ်တဲ့ ဆာရာ့ခင်ပွန်း မက်က အလုပ်ပြုတ်သွားပါတယ်။ တစ်ရက်မှာ ဒန်နဲ့ မက်တို့ ဈေးဝယ်ရင်း စကားပြောနေကြတာကို ဘက် မထင်မှတ်ဘဲ ကြားလိုက်ရတယ်။ ဒန်က သူ့စာအုပ်ကို တကယ်တော့ မကြိုက်ဘူးလို့ ပြောနေတာပါ။ ခင်ပွန်းအပေါ် နှစ်ပေါင်းများစွာထားခဲ့တဲ့ ယုံကြည်မှုတွေ ပျောက်သွားသလို ဘက် ခံစားလိုက်ရပါတယ်။ ချစ်ရတဲ့သူကို စိတ်သက်သာစေချင်လို့ ပြောတဲ့ မုသားက အမှန်တရားပေါ်လာချိန်မှာ နာကျင်စရာဖြစ်သွားနိုင်တယ်။ ဒီလိုမုသားမျိုးကို ခွင့်လွှတ်သင့်သလားဆိုတဲ့ မေးခွန်းကို လင်မယားနှစ်ယောက်ရဲ့ အဖြစ်ကနေတစ်ဆင့် တင်ပြထားတဲ့ A24 ရဲ့ ဟာသဒရာမာဇာတ်ကားပါ။

ဘန်းပလာမာမှာ Tee Rifle ဟာ နာမည်ကြီး ကြေးစားလူသတ်သမားတစ်ယောက်ပါ။ အလုပ်မှာ ကျွမ်းကျင်ပေမယ့် ပန်းသေနေတဲ့ ပြဿနာကြောင့် သူ့ကိုယ်သူတော့ လူဖြစ်ရှုံးနေသူလို့ သတ်မှတ်ထားတယ်။ တစ်နေ့မှာ Chris ဆိုတဲ့ မိန်းမလှလေးကို တွေ့ပြီး မြင်မြင်ချင်း ချစ်မိသွားပါတယ်။ Chris ကတော့ သူ့အဖေကို သတ်သွားသူကို လက်စားချေချင်နေသူပါ။ Chris ကို ချစ်မိသွားတဲ့ Tee Rifle က ကြေးစားလူသတ်သမားအလုပ်ကို လုပ်နေရင်း သူ့ရဲ့ လိင်စွမ်းဆောင်ရည် ပြန်ကောင်းလာဖို့ နည်းမျိုးစုံနဲ့ ကြိုးစားပါတော့တယ်။ အချစ်ကပဲ သူ့အတွက် အားဆေးဖြစ်လာမလားဆိုတဲ့အကြောင်းကို အက်ရှင်နဲ့ ဟာသရောပြီး တင်ဆက်ထားပါတယ်။

အသက် ၆၁ နှစ်အရွယ် Lee Soon Chul ဟာ အငြိမ်းစား အစိုးရဝန်ထမ်းတစ်ယောက်ပါ။ ဇနီးဆုံးသွားပြီးနောက် တစ်ယောက်တည်း ဆက်မနေချင်တော့လို့ ကိုယ့်အသက်ကို အဆုံးစီရင်ဖို့အထိ စိတ်ကူးနေခဲ့တယ်။ တစ်နေ့မှာတော့ ဆေးလ်ဗားမန်းဆိုတဲ့ အမြန်ချောပို့စင်တာကို စိတ်ဝင်စားသွားပြီး စိတ်ပြေလက်ပျောက် အလုပ်လုပ်ကြည့်ဖို့ သွားလျှောက်ခဲ့ပါတယ်။ ဒီစင်တာက အလုပ်ရှာရခက်တဲ့ အသက် ၆၀ ဝန်းကျင် လူကြီးတွေကို ချောပို့အလုပ် ပေးတဲ့နေရာပါ။ Lee Soon Chul က အလုပ်ရပေမယ့် စာချုပ်ချုပ်တဲ့အခါ ငွေကြိုသွင်းရမယ့်အချက်ကို သဘောမကျလို့ မလုပ်ဖြစ်ခဲ့ဘူး။ ဒါပေမဲ့ သိချင်တာရှိရင် မနေနိုင်တဲ့သူဆိုတော့ အဲဒီက ချောပို့သမားတစ်ယောက်ကို ငွေတစ်သောင်းပေးပြီး ပစ္စည်းပို့တဲ့နောက် တောက်လျှောက် လိုက်ကြည့်ခဲ့ပါတယ်။ ဒီလိုနဲ့ သိချင်စိတ်ပြင်းပြပြီး ဘာမဆို ဝင်ပါချင်တဲ့ Lee Soon Chul နဲ့ အသက်ကြီးနေပြီဖြစ်ပေမယ့် ဝင်ငွေအတွက် အလုပ်လုပ်နေရသေးတဲ့ ချောပို့သမားတို့ အတူသွားလာဖြစ်ကြတယ်။ ပစ္စည်းတွေ လိုက်ပို့ရင်း သူတို့နှစ်ယောက် ကြုံရတဲ့ ပြဿနာနဲ့ အဖြစ်အပျက်တွေကို ဆက်ပြထားတဲ့ ဒရာမာဇာတ်ကားပါ။

အီလိုင်တို့မိသားစုဟာ ကန်တက်ကီနယ်မြေက မြို့ငယ်လေးတစ်မြို့ကို ပြောင်းလာကြပါတယ်။ သူတို့နေမယ့်အိမ်ရှိတဲ့ ခြံကြီးက အမေရိကန်ပြည်တွင်းစစ်နဲ့ ပတ်သက်တဲ့ နောက်ခံရှိပြီး လူမည်းကျွန်များစွာ ကြိုးပေးခံခဲ့ရတဲ့ နေရာလည်း ဖြစ်နေတယ်။ အီလိုင်က အထီးကျန်တဲ့အခါတိုင်း တောထဲ သွားလေ့ရှိပါတယ်။ သူ့အနားမှာ မကြာခဏရှိနေတဲ့ အမန်ဒါဆိုတဲ့ မိန်းကလေးနဲ့လည်း ရင်းနှီးလာတယ်။ ဒါပေမယ့် အမန်ဒါရဲ့ နောက်ကြောင်းမှာ အီလိုင် မသိသေးတဲ့အဖြစ်တွေ ရှိနေပြီး အဲဒီအကြောင်းတွေကို သိလာတဲ့အခါ ဘာတွေ ဆက်ဖြစ်လာမလဲဆိုတဲ့ လျှို့ဝှက်ဆန်းကြယ် ထိတ်လန့်ဇာတ်လမ်းပါ။

ဝဒ်ဟာ သည်းထိတ်ရင်ဖိုဇာတ်ကားတွေအတွက် ဇာတ်ညွှန်းရေးနေတဲ့ စာရေးဆရာတစ်ယောက်ပါ။ အလုပ်မှာ ကြိုးစားနေတဲ့သူဟာ ဘန်ကောက်ကအိမ်ကို ရောင်းပြီး ဇနီးကိုလည်း သူအလုပ်လုပ်နေတဲ့ မြို့လေးဆီ ခေါ်လာခဲ့ပါတယ်။ တစ်နေ့ အလုပ်သွားရာလမ်းမှာ ဝဒ်ရဲ့ကားက လူတစ်ယောက်ကို အရှိန်ပြင်းပြင်းနဲ့ ဝင်တိုက်မိတယ်။ တိုက်မိသူ အသက်ရှင်သေးလား၊ သေသွားပြီလားဆိုတာတောင် မသိရသေးပေမယ့် ပြစ်မှုရင်ဆိုင်ရမှာကို ကြောက်တာကြောင့် အဲဒီလူကို အိမ်သယ်လာခဲ့ပါတယ်။

မင့်ဂ်နဲ့ နတ်တ်တို့ဟာ နှစ်ယောက်စလုံး စကားမပြောတတ်ကြပေမယ့် တစ်ယောက်ကိုတစ်ယောက် သိပ်ချစ်ကြတဲ့ စုံတွဲပါ။ မင့်ဂ်က ကျေးလက်ကနေ တက်လာသူဖြစ်ပြီး နတ်တ်ကတော့ ချမ်းသာတဲ့မိသားစုက ဖြစ်ပါတယ်။ နောက်ခံချင်း မတူကြပေမယ့် အဲဒီကွာခြားမှုတွေကြောင့် သူတို့ရဲ့အချစ်ကို လက်မလျှော့ဘဲ ဘဝတစ်ခု အတူထူထောင်လိုက်ကြတယ်။ မိသားစုဝင်တွေ တိုးလာချိန်မှာတော့ သူတို့နှစ်ယောက်ဆီ အခက်အခဲတွေလည်း ရောက်လာပါတယ်။ တချို့ပြဿနာတွေက တဖြည်းဖြည်းချင်း ဖိစီးလာသလို တချို့ကတော့ ရုတ်တရက် ရင်ဆိုင်ရတာမျိုးပါ။ ဒီလိုအခြေအနေတွေကြားမှာ အရင်ကလို ပျော်ရွှင်မှုတွေ ရှိနိုင်ဦးမလား၊ အချစ်နဲ့ နားလည်မှုမှာ ဘယ်အရာက ပိုအရေးကြီးလာမလဲဆိုတာကို သူတို့ရဲ့ အိမ်ထောင်ရေးကနေ ပြထားပါတယ်။ ဖိလစ်ပိုင် အချစ်ဒရာမာဇာတ်ကားဖြစ်ပြီး ကျေးလက်ဒေသတွေမှာ အများစု ရိုက်ကူးထားလို့ သဘာဝရှုခင်းတွေကိုလည်း တွေ့ရပါတယ်။ စကားမပြောတတ်သူတွေကို အလေးထားပြီး နားလည်ပေးတဲ့ ပတ်ဝန်းကျင်အကြောင်းလည်း ထည့်သွင်းဖော်ပြထားပါတယ်။

Balada Si Roy (2022) File Size :(2.2GB)& (912MB) Quality :WEB-DL1080P,720p Format…mp4 Duration…01:24:00 Genre : Action, Romance , Drama Subtitle : Myanmar Subtitle (Hard Sub) Translated by Ko Myo Encoded by Phyo Pyae

ကိုဗစ်ကပ်ရောဂါကြောင့် ကျောင်းတွေ၊ အလုပ်တွေ ပိတ်ပြီး လော့ဒေါင်းဝင်ကြရတဲ့အချိန်မှာ လူတွေရဲ့ နေ့စဉ်ဘဝလည်း ပြောင်းလဲသွားပါတယ်။ ကျောင်းသားတွေက အွန်လိုင်းကနေ စာသင်ကြရသလို ဝန်ထမ်းတွေကလည်း အိမ်ကနေ အလုပ်လုပ်ကြရတယ်။ လူချင်းတွေ့ဆုံဖို့ ခက်ခဲလာတဲ့အတွက် ဖုန်းနဲ့ အခြားစက်ပစ္စည်းတွေကတစ်ဆင့် စတင်လာတဲ့ ဆက်ဆံရေးတွေလည်း ရှိလာခဲ့ပါတယ်။ တချို့အတွက် ချစ်ရသူကို ဆုံးရှုံးရတဲ့ကာလဖြစ်သလို တချို့အတွက်တော့ ချစ်ရသူနဲ့ ဆုံတွေ့ရတဲ့အချိန် ဖြစ်ခဲ့တယ်။ ဘိုလန်လီကလည်း သူကြုံခဲ့ရတဲ့ ကိုဗစ်ကာလအကြောင်းကို ပြန်ပြောပြပါတယ်။ အထီးကျန်ရမှာကို ကြောက်တဲ့သူ့အတွက် ချစ်သူက ကပ်ရောဂါကို ရှေ့တန်းကနေ ရင်ဆိုင်ရမယ့် ဆရာဝန်တစ်ယောက် ဖြစ်နေတယ်။ အဲဒီအပြင် ချစ်သူရဲ့ မထင်မှတ်ထားတဲ့ ဖောက်ပြန်မှုတွေကိုပါ ကြုံရတဲ့အခါ ဒီအခြေအနေကနေ ရုန်းထွက်ဖို့ ဘယ်လိုကြိုးစားမလဲဆိုတာ ဖြစ်လာပါတယ်။ အချစ်စစ်ကို ဘယ်လိုရှာတွေ့မလဲ၊ လော့ဒေါင်းကာလအတွင်း ကိုယ့်ဘဝအတွက် တက်လမ်းတစ်ခု ရှာနိုင်ပါ့မလားဆိုတဲ့ မေးခွန်းတွေနဲ့အတူ ဘိုလန်လီရဲ့အကြောင်းကို အချစ်ဟာသပုံစံနဲ့ တင်ဆက်ထားပါတယ်။

ယဉ်ကျေးမှုတော်လှန်ရေးကာလက တရုတ်ပြည်ရဲ့ ရွာလေးတစ်ရွာမှာ ဇာတ်လမ်းကို အခြေခံထားပါတယ်။ ခေတ်ကာလရဲ့ အပြောင်းအလဲတွေက ရွာသူရွာသားတွေရဲ့ ဘဝအပေါ် ဘယ်လိုရိုက်ခတ်လာသလဲဆိုတာကို အမျိုးသမီးဇာတ်ကောင်ကို အဓိကထားပြီး ပြောပြထားတာပါ။ သမိုင်းနောက်ခံနဲ့အတူ လူမှုဘဝနဲ့ အချစ်အကြောင်းကိုပါ တွဲဖက်တင်ဆက်ထားပါတယ်။ နာမည်တူဝတ္ထုကို ဒါရိုက်တာ Xie Jin က ရုပ်ရှင်အဖြစ် ပြန်လည်ရိုက်ကူးထားပြီး Wen Jiang ပါဝင်သရုပ်ဆောင်ထားပါတယ်။ မူရင်းအညွှန်းမှာတော့ ဇာတ်လမ်းတင်ဆက်ပုံကို ကျန်းရိမူရဲ့ ရုပ်ရှင်တွေနဲ့ ဆင်တူတယ်လို့ သုံးသပ်ထားပြီး ဇာတ်ကားအရှည်ကတော့ ပိုရှည်တယ်လို့ ဆိုထားပါတယ်။

ကာမဆန္ဒနဲ့ လောဘနောက်လိုက်ကြတဲ့ လူတွေအကြောင်းကို အပိုင်းသုံးပိုင်းခွဲပြီး တင်ဆက်ထားတဲ့ ဇာတ်ကားပါ။ တစ်ပိုင်းချင်းစီမှာ ပါဝင်သူတွေရဲ့ အလှအပကို အလေးထားရိုက်ကူးထားပြီး အဝတ်အစားမဲ့ပြကွက်တွေလည်း အများအပြား ပါဝင်ပါတယ်။

အမာရီရဲ့ မွေးနေ့အတွက် သူ့ချစ်သူ Q က အစီအစဉ်တွေ အပြည့်ဆွဲထားပါတယ်။ မွေးနေ့မှာ သူငယ်ချင်းတွေနဲ့ ပါတီလုပ်မယ်၊ နောက်နေ့မှာလည်း ခရီးထွက်မယ်ဆိုပြီး စီစဉ်ထားတာပါ။ ဒါပေမယ့် အနီးအနားမှာ ပေါက်ကွဲမှုတစ်ခု ဖြစ်သွားပြီး အပြင်မထွက်ရအမိန့် ထုတ်လိုက်တဲ့အခါ အစီအစဉ်အားလုံး ပျက်သွားလို့ Q တစ်ယောက် စိတ်ပျက်သွားတယ်။ နှစ်ယောက်တည်း အတူရှိနေကြရတဲ့ ဒီအချိန်ဟာ အရင်လို မခိုင်မြဲတော့တဲ့ သူတို့ဆက်ဆံရေးအကြောင်း ပြောဖြစ်ဖို့ အခွင့်အရေး ဖြစ်လာပါတယ်။ မွေးနေ့ပွဲနဲ့ ခရီးစဉ်အစား သူတို့ကြားက အထစ်အငေါ့တွေကို အချိန်ယူပြီး ဆွေးနွေးတိုင်ပင်ကြရတဲ့အကြောင်းကို အေးအေးဆေးဆေး တင်ဆက်ထားတဲ့ BL ဒရာမာပါ။

အကိုကြီးဂျန်းမှာ သွေးမတော်ပေမယ့် အရင်းအချာလို ချစ်ရတဲ့ ညီသုံးယောက် ရှိပါတယ်။ မိဘမဲ့ဂေဟာ မီးလောင်တုန်းက သူမွေးစားခဲ့တဲ့ ကလေးတွေပါ။ ညီတွေနဲ့ သံယောဇဉ်ပြတ်သွားမှာကို မလိုလားလို့ အကိုကြီးက အိမ်ထောင်မပြုဘဲ လူပျိုကြီးအဖြစ် နေလာခဲ့တယ်။ ညီသုံးယောက်ကတော့ အကိုကြီးမသိအောင် ချစ်သူကိုယ်စီ ရှိနေကြပါတယ်။ အကိုကြီးကိုလည်း ချစ်၊ ချစ်သူတွေနဲ့လည်း မခွဲနိုင်ကြတဲ့ ညီတွေက အကိုကြီးကိုပါ ချစ်သူရအောင် အောင်သွယ်ပေးဖို့ ကြံကြတယ်။ အရင်ချစ်သူကို ပြန်ခေါ်လာပေးဖို့ မွမ်ဘိုင်းအထိ သွားရှာကြပေမယ့် ဟိုမှာက အိမ်ထောင်ကျပြီး ကလေးတစ်ယောက်တောင် ရနေပြီ။ ဒါနဲ့ပဲ အရင်ချစ်သူနဲ့ နာမည်တူတဲ့ အမျိုးသမီးတစ်ယောက်ကို ခေါ်လာပြီး ဝိုင်းအောင်သွယ်ပေးကြတဲ့အခါ ညီအစ်ကိုတွေကြား ဘာအလွဲတွေ ဆက်ဖြစ်လာမလဲဆိုတာကို အချစ်၊ အက်ရှင်၊ ဒရာမာနဲ့ သီချင်းတွေ ရောစပ်တင်ဆက်ထားပါတယ်။ အကိုကြီး ဘိုင်ဂျန်းအဖြစ် စလ်မာန်ခန်းက ဦးဆောင်ပါဝင်ထားပြီး ပူဂျား၊ ဆစ်ဒါးသ်နီဂဟမ်နဲ့ ဝရ်နာလီ ဘတ်နာဂရ်တို့လည်း သရုပ်ဆောင်ထားပါတယ်။ တမီးလ်သရုပ်ဆောင် ဂျဂါပသီဘာဘူကတော့ ကိုဒါသီ နာဂေးရှ်ဝရ်အဖြစ် ပါဝင်ထားပါတယ်။

Naima ဟာ ပါရဂူဘွဲ့အတွက် Nashville မြို့က အာဖရိကန်အမေရိကန်ဂီတပြတိုက်မှာ အလုပ်သင်လာဆင်းပါတယ်။ အဲဒီမှာ စေတနာ့ဝန်ထမ်းလုပ်နေတဲ့ Damian နဲ့ တွေ့ပြီးနောက် ကွယ်လွန်သွားတဲ့ သူ့အဘွားရဲ့ လူသိမခံခဲ့တဲ့ အတိတ်အကြောင်းကို အစဖော်မိလာတယ်။ Naima က အဘွားပါဝင်ခဲ့ဖူးတဲ့ မိန်းကလေးဂီတအဖွဲ့အကြောင်းကို ဖော်ထုတ်ပြီး ပါရဂူဘွဲ့စာတမ်း ပြုစုဖို့ ကြိုးစားပါတယ်။ အကြောင်းတစ်ခုကို လိုက်ရှာရင်း နောက်တစ်ခုပါ ဆက်ပေါ်လာတဲ့အခါ တည်ငြိမ်နေတဲ့ အခြေအနေတွေကိုပါ လှုပ်ခတ်စေမယ့် ကိစ္စတွေနဲ့ ကြုံလာရတယ်။ ၂၀၂၃ ခုနှစ်ထွက် ဒီဇာတ်ကားကို Nashville မြို့က အာဖရိကန်အမေရိကန်ဂီတပြတိုက်မှာ အခြေပြုရိုက်ကူးထားပြီး မြူးကြွတဲ့ သီချင်းမျိုးစုံ ပါဝင်ပါတယ်။

အင်ယာက ဖက်ရှင်ကို ဝါသနာပါပြီး ပဲရစ်က ဖက်ရှင်ကောလိပ်တစ်ခုမှာ သွားတက်ချင်နေသူပါ။ ပါတီခေါင်းဆောင်တစ်ဦးဖြစ်တဲ့ သူ့အဖေကတော့ သမီးရဲ့အိပ်မက်ကို လုံးဝသဘောမကျဘဲ သူနဲ့အတူ စည်းရုံးရေးပဲ လိုက်ဆင်းစေချင်တယ်။ အဖေက ကာနေဗယ်ပွဲတော်ကိုလည်း မကြိုက်သူပါ။ တစ်ရက်မှာ ကောလိပ်တက်ခွင့်ရဖို့ကိစ္စနဲ့ အင်ယာ ရီယိုမြို့ကို သွားဖို့လိုလာတယ်။ အဲဒီကနေ ရီယိုရဲ့ နာမည်ကြီးဆမ်းဘားအကသင်တန်းကျောင်းဖြစ်တဲ့ ပိုတယ်လာကျောင်းအတွက် ကာနေဗယ်ဝတ်စုံတွေ ချုပ်ပေးရာမှာ ဝင်ကူဖို့ အကြောင်းဖန်လာပါတယ်။ ပွဲတော်အတွက် ပြင်ဆင်ရင်း သူဘယ်လိုမိတ်ဆွေအသစ်တွေနဲ့ တွေ့ရမလဲ၊ တက်ချင်နေတဲ့ကောလိပ်အတွက် လိုအပ်တဲ့အကူအညီကိုရော ရနိုင်ပါ့မလားဆိုတာ ဆက်ပြထားတာပါ။ ဇာတ်လမ်းရဲ့နောက်ခံဖြစ်တဲ့ ဘရာဇီးကာနေဗယ်က နှစ်စဉ် ငါးရက်တာကျင်းပတဲ့ ပွဲတော်ကြီးဖြစ်ပါတယ်။ ခရစ်တော်ရဲ့ ရက်လေးဆယ်ဥပုသ်မတိုင်ခင် စားသောက်ကခုန်ပြီး ဆင်နွှဲကြတာလို့ ဆိုပါတယ်။ အရောင်တောက်တောက်ဝတ်စုံတွေ၊ မျက်နှာဖုံးတွေနဲ့ အလှပြယာဉ်တွေကြား တီးမှုတ်ကခုန်ရင်း စီတန်းလှည့်လည်ကြပြီး ရီယိုမှာကျင်းပတဲ့ပွဲက အကြီးဆုံးပါ။ ပွဲတော်ကာလမှာ ရီယိုမြို့လမ်းတွေပေါ် လူနှစ်သိန်းခန့် ပါဝင်ဆင်နွှဲကြတယ်လို့ ဆိုထားပါတယ်။ ဒီဇာတ်ကားမှာ ရီယိုမြို့မြင်ကွင်းတွေနဲ့ ဘရာဇီးနိုင်ငံသားတွေ ပွဲတော်ဆင်နွှဲကြပုံကို ပေါ်တူဂီသီချင်းတွေနဲ့အတူ ရိုက်ကူးပြထားပါတယ်။

လျူကျင်း၊ ဖန်ရှင်းနဲ့ ရှမန်တို့ဟာ ကိုယ့်အိပ်မက်နဲ့ကိုယ် ချန်ဒူးကနေ ရှန်ဟိုင်းကို ပြောင်းလာကြတဲ့ ငယ်သူငယ်ချင်းသုံးယောက်ပါ။ မြို့ကြီးမှာ ဘဝသစ်စကြပေမယ့် အလုပ်နဲ့ အချစ်ရေးက သူတို့မျှော်လင့်ထားသလို အဆင်မပြေကြဘူး။ လျူကျင်းက စားသောက်ဆိုင်ဖွင့်ထားပြီး ဆိုင်မှာ အခက်အခဲတွေကြုံနေရတဲ့အပြင် ချစ်သူဖောက်ပြန်နေတာကိုလည်း သိလိုက်ရတယ်။ ဖန်ရှင်းကတော့ ရုပ်ရည်ချောမောသူဖြစ်ပေမယ့် ခင်ပွန်းနဲ့ ကွာရှင်းထားရပြီး ကိုယ်ဝန်နဲ့ ဖက်ရှင်လောကမှာ ရုန်းကန်နေရပါတယ်။ ရှမန်က အလုပ်မှာ ထက်မြက်ပြီး အောင်မြင်နေသူပါ။ ဒါပေမယ့် သူ့ရဲ့ထူးချွန်မှုက ချစ်သူကောင်လေးကို သိမ်ငယ်စေတဲ့အထိ ဖြစ်နေပြန်တယ်။ ဘဝအခြေအနေချင်း မတူကြတဲ့ သူတို့သုံးယောက်ဟာ အချစ်ရေးအရှုပ်အထွေးနဲ့ လုပ်ငန်းခွင်ဖိအားတွေကို ဘယ်လိုရင်ဆိုင်ကြမလဲ။ ပြဿနာတွေကြားမှာ တစ်ယောက်ကိုတစ်ယောက် ဖေးမရင်း ကိုယ့်ဘဝအတွက် အဓိပ္ပာယ်ရှိတဲ့အရာတွေကို ဘယ်လိုရှာတွေ့ကြမလဲဆိုတာ ဆက်ပြထားပါတယ်။ ၂၀၂၁ ခုနှစ်က စီးရီးရဲ့အဆက်အဖြစ် ရိုက်ကူးထားတဲ့ ၂၀၂၃ ခုနှစ်ထွက် တရုတ်အချစ်ဟာသရုပ်ရှင်ဖြစ်ပြီး Li Chun၊ Baby Zhang (Zhang Hanyun) နဲ့ Naomi Wang (Wang Ju) တို့ အဓိကပါဝင်ထားပါတယ်။ ခေတ်သစ်အမျိုးသမီးတွေရဲ့ နေ့စဉ်အခက်အခဲ၊ အချစ်ရေးနဲ့ သူငယ်ချင်းသံယောဇဉ်ကို ဟာသနဲ့ ဒရာမာရောပြီး ပေါ့ပေါ့ပါးပါး တင်ပြထားတာပါ။