အက်ရှင်ကားများ

Jason Statham သရုပ်ဆောင်ထားတဲ့ ဘစ်ရှော့ဟာ အလုပ်တစ်ခုလုပ်တိုင်း စက်တစ်လုံးလို တိကျသေချာအောင် အကွက်ချတတ်တဲ့ ကြေးစားလူသတ်သမားပါ။ သူ့အလုပ်က ပစ်မှတ်ကို သတ်ပစ်ရုံနဲ့ မပြီးဘူး။ လူသတ်မှုလို့ မထင်ရအောင် မတော်တဆဖြစ်သွားသလို၊ အခန့်မသင့်လို့ သေဆုံးသွားသလိုမျိုး ဖန်တီးပေးရတာပါ။ နေရာတိုင်းမှာ သေချာစီစဉ်ပြီး လှုပ်ရှားတတ်တဲ့ ဘစ်ရှော့ကိုမှ လာရှုပ်ကြတဲ့သူတွေ ရှိလာပါတယ်။ ဒီလိုလူတစ်ယောက်နဲ့ ထိပ်တိုက်တွေ့တဲ့အခါ သူတို့ ဘယ်လိုဒုက္ခရောက်ကြမလဲဆိုတာကို အက်ရှင်၊ မှုခင်းနဲ့ သည်းထိတ်ရင်ဖိုပုံစံ ရိုက်ကူးထားပါတယ်။

နိတ်ဒန်နီယယ်ဟာ သမီးနှစ်ယောက်နဲ့အတူ တောင်အာဖရိကကို အလည်အပတ် ထွက်လာပါတယ်။ ဒီခရီးကို ဖိတ်ခေါ်သူက သူ့မိတ်ဆွေဟောင်း မာတင်ပါ။ မာတင်ဟာ နိတ်နဲ့ သူ့ဇနီးတို့ကို အောင်သွယ်ပေးခဲ့သူလည်း ဖြစ်တယ်။ သူတို့ဟာ နိတ်ရဲ့ဇနီး ကြီးပြင်းခဲ့တဲ့ ရွာလေးဆီ ခရီးဆက်ကြရင်း တားမြစ်နယ်မြေတစ်ခုကို ဖြတ်သန်းမိတဲ့အခါ ခြင်္သေ့ကြီးတစ်ကောင်နဲ့ ရင်ဆိုင်လိုက်ရပါတယ်။ ဒီခြင်္သေ့ဟာ တွေ့သမျှလူတွေကို သဲသဲမဲမဲ လိုက်သတ်နေတဲ့အကောင်ပါ။ သူ့အုပ်စုတစ်စုလုံးကို တရားမဝင်မုဆိုးတွေက သတ်ပစ်ခဲ့လို့ လူတွေကို ရန်ပြုနေတာ ဖြစ်ပါတယ်။ အလည်အပတ်ခရီးကနေ ခြင်္သေ့ရန်ကြား အသက်ရှင်ဖို့ ရုန်းကန်ရတဲ့ခရီး ဖြစ်သွားပုံကို အာဖရိကတောရိုင်းနောက်ခံနဲ့ ရိုက်ကူးထားပြီး Suicide Squad မှာ Bloodsport အဖြစ် သရုပ်ဆောင်ခဲ့တဲ့ Elba ပါဝင်ထားပါတယ်။

Mortal Kombat ပွဲတွေပြီးဆုံးပြီး အတော်ဝေးကွာတဲ့ အနာဂတ်တစ်ချိန်မှာ ကမ္ဘာတစ်ဝန်းဟာ သေရွာပြန်တွေရဲ့ ဖျက်ဆီးမှုကြောင့် စွန့်ပစ်မြေတွေ ဖြစ်နေပါပြီ။ နဂါးနက်အဖွဲ့ရဲ့ ဘုရင်ဖြစ်လာတဲ့ Kano ကလည်း အဲဒီနေရာတွေမှာ ထင်တိုင်းကြဲပြီး တစ်နေရာပြီးတစ်နေရာ သိမ်းပိုက်နေတယ်။ Sub-zero လို့ သိကြတဲ့ Kuai Liang ကတော့ လူသူမသိတဲ့ အဘိုးကြီးတစ်ယောက်အဖြစ် ဇာတ်မြှုပ်နေပါတယ်။ တစ်နေ့မှာ ပြိုင်ဘက်ကင်းစစ်သည်တော်ဖြစ်ဖို့ ရည်မှန်းထားတဲ့ Kenshi ဟာ မြို့လေးတစ်မြို့ကို ရောက်လာပြီး Kano ရဲ့လူတွေကို ပညာပေးလိုက်တယ်။ ဒီလုပ်ရပ်ကြောင့် Kano နဲ့ နဂါးနက်အဖွဲ့ကို ရင်ဆိုင်ရတော့မယ့် Kenshi ဘာဆက်ဖြစ်မလဲ၊ Kuai Liang က ဒီပြဿနာထဲ ဘယ်လိုပါဝင်လာမလဲ။ သူ အခုလို ဇာတ်မြှုပ်နေရတဲ့ အကြောင်းရင်းကလည်း မေးခွန်းတစ်ခုပါပဲ။ Scorpion ရဲ့ဇာတ်လမ်းနဲ့ စတင်ခဲ့တဲ့ Mortal Kombat Legends အန်နီမေးရှင်းဇာတ်ကားတွေရဲ့ တတိယကားဖြစ်ပြီး ဒီတစ်ခါမှာ Sub-zero နဲ့ မျက်ကန်းဓားသမား Kenshi တို့အကြောင်းကို ပြထားပါတယ်။ MK 11 ထဲက ဇာတ်ကြောင်းတချို့ကိုလည်း ယူသုံးထားတယ်။ သွေးထွက်သံယိုပြကွက်တွေ ပါဝင်တဲ့အတွက် ကလေးသူငယ်တွေ ကြည့်ဖို့ မသင့်တော်ပါဘူး။

နိုင်ငံမတူ၊ စရိုက်မတူတဲ့ လူခုနစ်ယောက်ဟာ လေယာဉ်ပေါ်ကနေ လေထီးတွေနဲ့ ပစ်ချခံလိုက်ရပြီး တောနက်ကြီးတစ်ခုထဲ ရောက်သွားကြပါတယ်။ သူတို့ရောက်နေတဲ့နေရာက သာမန်တောတစ်တောတော့ မဟုတ်ဘူး။ ဂြိုလ်သားတွေ အမဲလိုက်တဲ့ ကစားကွင်းကြီး ဖြစ်နေပါတယ်။ သူရဲကောင်းဘွဲ့ရဖို့ လူတွေနဲ့ တခြားဂြိုလ်က သတ္တဝါတွေကို ဖမ်းခေါ်လာပြီး ဒီနေရာမှာ အမဲလိုက်ကြတာပါ။ ပထမ Predator ဇာတ်ကားမှာ အမဲလိုက်တဲ့ ဂြိုလ်သားတစ်ယောက်ပဲ ရှိခဲ့ပေမယ့် ဒီတစ်ခါတော့ အများကြီး ဖြစ်လာတယ်။ ထောင်ချောက်တွေကြားမှာ ဒီလူတွေ ဘယ်လိုရင်ဆိုင်ကြမလဲ၊ လူသားတွေနဲ့ ဂြိုလ်သားတွေကြားမှာ ဘယ်သူက မုဆိုးဖြစ်ပြီး ဘယ်သူက သားကောင်ဖြစ်သွားမလဲဆိုတာ ဆက်ကြည့်ရမှာပါ။

ကာနတကအတွင်းက ကမာရုတူးဆိုတဲ့ ရွာလေးဟာ တောအုပ်ကြီးအလယ်မှာ တည်ရှိပါတယ်။ ဆန်းကြယ်တဲ့ဖြစ်ရပ်တွေနဲ့ နတ်ဆိုးတွေ သောင်းကျန်းနေတယ်ဆိုတဲ့ သတင်းတွေကြောင့်လည်း နာမည်ထွက်နေတဲ့ ရွာပါ။ အဲဒီရွာက ဘိုးဘွားပိုင်အိမ်တစ်အိမ်မှာ မိသားစုတစ်စု မင်္ဂလာပွဲလာကျင်းပကြပေမယ့် ပွဲက အထမမြောက်ခဲ့ဘူး။ အိမ်ထဲမှာ အရာရှိတစ်ယောက်ရဲ့ ခေါင်းပြတ်နေတဲ့အလောင်းကို တွေ့လိုက်ကြရပါတယ်။ ရွာထဲမှာ ကလေးသူငယ်တွေလည်း အသတ်ခံနေရတာကြောင့် ဒီဖြစ်ရပ်တွေရဲ့နောက်ကွယ်မှာ ဘာရှိနေသလဲဆိုတာ မေးခွန်းဖြစ်လာတယ်။ ရွာက တကယ်ပဲ ကျိန်စာသင့်နေတာလား၊ နတ်ဆိုးတွေကြောင့်လား၊ အဖြစ်မှန်က ဘာလဲ။ Dabangg 3 မှာ ဗီလိန်အဖြစ် ပါဝင်ခဲ့တဲ့ ကန်နန်းဒါးမင်းသား ကစ်ချားဆူဒီပါးနဲ့ ဂျက်စီတို့ ပါဝင်သရုပ်ဆောင်ထားပါတယ်။

ဗီဂျေးဒေဗရာကွန်ဒါက ဟင်ဒီဘာသာစကားပြော ရုပ်ရှင်ဘက်ကို စတင်ဝင်ရောက်လာတဲ့ ဒီဇာတ်ကားမှာ အာနန်ယားပန်ဒေးနဲ့ တွဲဖက်သရုပ်ဆောင်ထားပါတယ်။ ဗီဂျေး သရုပ်ဆောင်တဲ့ လူငယ်ဟာ စကားထစ်တတ်ပြီး ဆင်းရဲတဲ့မိသားစုက လာသူပါ။ အဖေဆုံးသွားတဲ့နောက် အမေနဲ့အတူ လမ်းဘေးလက်ဖက်ရည်ဆိုင်လေး ဖွင့်ပြီး အသက်မွေးနေကြတယ်။ သားအမိနှစ်ယောက်ရဲ့ ရည်မှန်းချက်က ကွယ်လွန်သွားတဲ့ ဖခင်ရဲ့ဆန္ဒအတိုင်း သူ့ကို MMA ချန်ပီယံတစ်ယောက် ဖြစ်လာစေဖို့ပါ။ အာနန်ယား သရုပ်ဆောင်တဲ့ မိန်းကလေးကတော့ ချမ်းသာတဲ့မိသားစုကနေ ဆင်းသက်လာပြီး ကိုယ်လုပ်ချင်သမျှ စိတ်ကြိုက်လုပ်ခွင့်ရနေသူ ဖြစ်ပါတယ်။ ဘဝအခြေအနေမတူတဲ့ ဒီနှစ်ယောက် ချစ်မိသွားတဲ့အခါ သူတို့ကြား ဘာတွေဖြစ်လာမလဲ။ တစ်ဖက်မှာလည်း လူငယ်လေးရဲ့ MMA ဖိုက်တာဖြစ်ချင်တဲ့ ဆန္ဒက ပြည့်လာပါ့မလားဆိုတာ ဆက်ကြည့်ရမှာပါ။ ဇာတ်လမ်းထဲမှာ ထိုးသတ်ယှဉ်ပြိုင်တဲ့ အခန်းတွေကိုလည်း များများ ထည့်သွင်းထားပါတယ်။

စစ်ပွဲတွေ မရပ်မနားဖြစ်ပြီး ပြည်သူအများအပြား အိုးမဲ့အိမ်မဲ့ဖြစ်နေတဲ့ တရုတ်ပြည်မှာ ဆရာကြီးကွမ်းဆိုတဲ့ သူရဲကောင်းတစ်ယောက် ရှိပါတယ်။ သူက ထူးဆန်းတဲ့ မျိုးနွယ်က မွေးဖွားလာသူဖြစ်ပြီး ရက်စက်ယုတ်မာတဲ့ ပြစ်မှုကျူးလွန်သူတွေကို မုန်းတီးသူပါ။ သူ့တပည့် ယဲ့ဖေးကတော့ ခေါင်းတလားဆိုင်ဖွင့်ထားသလို ဒုက္ခသည်စခန်းမှာ သေဆုံးသူတွေရဲ့ အလောင်းတွေကို ကောက်ယူသိမ်းဆည်းပေးတဲ့အလုပ်လည်း လုပ်ပေးနေတယ်။ တစ်နေ့မှာ ယဲ့ဖေးရောင်းတဲ့ ခေါင်းတလားအတွင်း လူသေအလောင်းတစ်လောင်း တွေ့သွားတာကြောင့် လူသတ်ပြီး အလောင်းဖျောက်မှုနဲ့ အဖမ်းခံလိုက်ရပါတယ်။ တပည့်ဖြစ်သူ လုပ်ကြံခံရတဲ့အမှုရဲ့ အမှန်တရားကို ဖော်ထုတ်ဖို့ ဆရာကြီးကွမ်းက ကြိုးစားလာတယ်။ ခေါင်းတလားထဲက အလောင်းဟာ ဘယ်လိုဇာတ်ကြောင်းရှိသလဲ၊ ဒီလုပ်ကြံမှုနောက်မှာ ဘယ်လို ထူးဆန်းကြောက်မက်ဖွယ် ကိစ္စတွေ ရှိနေသလဲဆိုတာ ရှာဖွေရမှာပါ။ ဒီအမှုအပြင် တခြားထူးဆန်းတဲ့ အမှုတွေကိုပါ ရင်ဆိုင်လာရတဲ့အခါ ဆရာတပည့်တွေ ဘယ်လိုဖြေရှင်းကြမလဲဆိုတာ ဆက်တွေ့ရမှာဖြစ်ပါတယ်။

ဂျက်စပဲရိုးနဲ့ လူမှားခံရတဲ့ ဂစ်ဘ်ကို ကြိုးပေးတော့မယ့်အချိန်မှာ ဂျက်က ဝင်ကယ်ပေးလိုက်ရပါတယ်။ အဲဒီနောက် သူတို့နှစ်ယောက်ဟာ ကိုယ့်အတွက်တော့ အဆင်ပြေနေတဲ့ ဘာဘိုဆာဆီ ရောက်သွားကြပြန်တယ်။ ဒါပေမဲ့ အဲဒီမှာ ဂစ်ဘ်ပဲ ကျန်ခဲ့ပါတယ်။ ဂျက်ကတော့ အချစ်ဟောင်း အန်ဂျလီကာကြောင့် မုတ်ဆိတ်နက်ဆီ ရောက်သွားပြီး ထာဝရသက်ရှည်ရေပန်းကို ရှာဖို့ ကြိုးစားရပြန်တယ်။ ဒီရှာဖွေရေးမှာ စပိန်တွေက သူတို့ထက် ခြေတစ်လှမ်းသာနေပြီဖြစ်ပါတယ်။

Mary Kom ဟာ အိန္ဒိယရဲ့ အမျိုးသမီးလက်ဝှေ့သမား မေရီကွန်းရဲ့ ဘဝကို အခြေခံထားပြီး ပရီယန်ကာချိုပရာက မေရီအဖြစ် သရုပ်ဆောင်ထားပါတယ်။ ဇာတ်လမ်းအစမှာ မေရီဟာ ရွာလေးတစ်ရွာက ဆတ်ဆတ်ထိမခံ ကျောင်းသူတစ်ယောက်ပါ။ ကျောင်းက ယောက်ျားလေးတွေနဲ့လည်း သူတင်ကိုယ်တင် ထိုးကြိတ်ရန်ဖြစ်တတ်တယ်။ တစ်နေ့ ရန်ဖြစ်ရင်း မြို့က လက်ဝှေ့ရုံထဲ ရောက်သွားရာက လက်ဝှေ့ပညာကို စသင်ဖြစ်ပါတယ်။ လက်ရဲဇက်ရဲရှိပြီး လက်ဝှေ့ကို စိတ်ဝင်စားတဲ့ မေရီက လက်ဝှေ့ရုံမှာ ထင်ရှားလာသလို ပြည်နယ်အဆင့် ပြိုင်ပွဲတွေအထိ တဖြည်းဖြည်း တက်လှမ်းလာတယ်။ မိသားစုရဲ့ စားဝတ်နေရေးကလည်း မပြေလည်တော့ တစ်ခါတလေ မြေဝိုင်းလက်ဝှေ့ပွဲတွေမှာ ယောက်ျားတွေနဲ့ ဝင်ထိုးတဲ့အထိ စွန့်စားတတ်ပါတယ်။ နိုင်ငံအဆင့်ကနေ အိုလံပစ်အဆင့်အထိ ရောက်လာတဲ့ သူ့ဘဝမှာ လက်ဝှေ့က အရေးကြီးတဲ့နေရာကို ယူထားတယ်။ ဒါပေမဲ့ အိမ်ထောင်ကျပြီးတဲ့နောက် သူ့ရဲ့ အားကစားတက်လမ်းနဲ့ အောင်မြင်မှုတွေ ဆုံးရှုံးရတော့မလို ဖြစ်လာပါတယ်။ အမြွှာကလေးနှစ်ယောက်ရဲ့ မိခင်ဖြစ်လာတဲ့ မေရီကို သူ့ခင်ပွန်းက လက်ဝှေ့ပြန်ထိုးနိုင်ဖို့ ကိုယ်ကျိုးစွန့်ပြီး ပံ့ပိုးပေးတယ်။ ကစားသမားဘဝ ခေတ္တပြတ်တောက်ခဲ့သူအနေနဲ့ ပြန်စဖို့က မလွယ်ကူဘဲ စိတ်ဓာတ်ကျစရာတွေနဲ့ အခက်အခဲတွေကို ရင်ဆိုင်ကြိုးစားရပါတယ်။

ပြင်သစ်နိုင်ငံက လမန်းစ်ကားပြိုင်ပွဲဟာ ပြိုင်ကားထုတ်လုပ်သူတွေအတွက် ကိုယ့်ကားရဲ့ အရည်အသွေးကို သက်သေပြရတဲ့ အရေးကြီးပြိုင်ပွဲတစ်ခုပါ။ ပတ်လမ်းပေါ်မှာ ၂၄ နာရီတိတိ မောင်းနှင်ယှဉ်ပြိုင်ကြရပြီး တစ်နာရီ မိုင် ၂၀၀ ဝန်းကျင် အမြန်နှုန်းနဲ့ တစ်ပတ်ပြီးတစ်ပတ် ပတ်နေရတယ်။ အမြန်နှုန်းတင်မက ခံနိုင်ရည်နဲ့ စိတ်ချရမှုကိုပါ စမ်းသပ်ရသလို အသက်အန္တရာယ်လည်း များပါတယ်။ ဒီပြိုင်ပွဲမှာ ခြောက်နှစ်ဆက် ဗိုလ်စွဲထားတဲ့ ဖရာရီက အဲဒီအချိန် ပြိုင်ကားလောကရဲ့ အင်အားကြီးကုမ္ပဏီ ဖြစ်နေတယ်။ ဖို့ဒ်က အီတလီကားကုမ္ပဏီ ဖရာရီကို ဝယ်ယူဖို့ ကြိုးစားတဲ့အခါ ပိုင်ရှင်အန်ဇိုက စော်ကားတဲ့စကားတွေနဲ့ ငြင်းပယ်လိုက်ပါတယ်။ အဲဒီနောက် ဒုတိယမြောက် ဟင်နရီဖို့ဒ်ဟာ ငွေအမြောက်အမြားသုံးပြီး ကျွမ်းကျင်သူတွေကို စုစည်းကာ လမန်းစ်မှာ ဖရာရီကို အနိုင်ယူနိုင်မယ့် ပြိုင်ကားတစ်စီး တည်ဆောက်ဖို့ ဆုံးဖြတ်လိုက်တယ်။ ဒီတာဝန်ကို လမန်းစ်မှာ အနိုင်ရဖူးတဲ့ ကယ်ရိုးရှဲလ်ဘီနဲ့ သူ့မိတ်ဆွေ ကင်မိုင်းစ်တို့က ယူကြရပါတယ်။ ကင်မိုင်းစ်ကတော့ လူတွေနဲ့ အလွယ်တကူ အဆင်ပြေတတ်သူမျိုး မဟုတ်ဘူး။ ဖြစ်နိုင်ခြေနည်းတဲ့ ဒီရည်မှန်းချက်အတွက် နှစ်ယောက်သား ဖို့ဒ်ပြိုင်ကားကို ကိုယ်တိုင်တည်ဆောက်ပြီး ဖရာရီကို ယှဉ်ပြိုင်အနိုင်ယူဖို့ ကြိုးစားကြတယ်။ မက်ဒေမွန်နဲ့ ခရစ်ရှန်ဘေးတို့ ပါဝင်သရုပ်ဆောင်ထားပါတယ်။

ဂျက်စပဲရိုးဟာ အားလုံးအတွက် ပေးဆပ်ပြီး ဓားတစ်ချောင်းနဲ့ ကရာကန်ကြီးရဲ့ ပါးစပ်ထဲ ဝင်သွားခဲ့ပါတယ်။ အဲဒီနောက် ဝီလ်တန်နာနဲ့ အဲလိဇဘက်တို့က ကပ္ပတိန်ဘာဘိုဆာနဲ့ ပူးပေါင်းပြီး ဂျက်ကို ဒေဗီဂျုန်းဆီကနေ ကယ်ထုတ်ဖို့ ကြိုးစားကြရတယ်။ တစ်ဖက်မှာတော့ လော့ဒ်ဘက်ကပ်တ်က ဒေဗီဂျုန်းကို ထိန်းချုပ်ထားပြီး ပင်လယ်ပြင်တစ်ခွင်က သင်္ဘောတွေကို ဖျက်ဆီးခိုင်းနေပါတယ်။ ဒီအန္တရာယ်ကို ရင်ဆိုင်ရတဲ့အခါ ဝီလ်၊ အဲလိဇဘက်နဲ့ ဘာဘိုဆာတို့အပြင် ကပ္ပတိန်ဂျက်စပဲရိုးပါ တိုက်ပွဲထဲ ဝင်ပါလာရတော့တယ်။

ကပ္ပတိန်ဂျက်စပဲရိုးတစ်ယောက် အကြွေးဆပ်ရမယ့်အချိန် ရောက်ပြီလို့ အသိပေးခံလိုက်ရပါတယ်။ သူအကြွေးတင်နေသူကတော့ ငရဲက သင်္ဘောသားတွေနဲ့အတူ တစ္ဆေသင်္ဘောကို ရွက်လွှင့်နေတဲ့ ပင်လယ်သရဲကြီး ဒေဗီဂျုန်းပါ။ ဉာဏ်များတဲ့ဂျက်တောင် ပြေးလို့မလွတ်နိုင်တဲ့ အခြေအနေဖြစ်နေလို့ ကိုယ့်ကိုယ်ကိုယ် ကယ်တင်ဖို့ အကြံထုတ်ရပြန်ပါတယ်။ ဒီတစ်ခါတော့ ဝေလ်တန်နာနဲ့ အဲလစ်ဇဘတ်သ်ဆွမ်းတို့ရဲ့ အကူအညီကို မဖြစ်မနေ ယူရတော့မှာပါ။ သူတို့က ကြည်ကြည်ဖြူဖြူ ကူညီကြပါ့မလား၊ ဂျက်က ဘယ်လိုစည်းရုံးမလဲဆိုတဲ့အကြားမှာ အခက်အခဲတွေ၊ ဟာသအလွဲတွေနဲ့ တိုက်ခိုက်မှုတွေပါ ကြုံလာရပါတယ်။ ဂျက်အဓိက ရှာနေတာက ဒေဗီဂျုန်း ဖွက်ထားတဲ့ နှလုံးသားဖြစ်ပြီး ဒေဗီဂျုန်းမှာလည်း အချစ်ရေးနဲ့ပတ်သက်တဲ့ လျှို့ဝှက်ချက်တွေ ရှိနေပါသေးတယ်။ ဝေလ်တန်နာကလည်း ဂျက်နဲ့အတူ ထူးဆန်းပြီး ကြောက်စရာကောင်းတဲ့ စွန့်စားခန်းထဲ လိုက်ပါရပါတယ်။ ဒေဗီဂျုန်းရဲ့ တစ္ဆေသင်္ဘောကြီးပေါ်မှာ ဘာတွေရှိနေမလဲဆိုတာကလည်း သူတို့ခရီးမှာ စောင့်ကြိုနေတဲ့ မေးခွန်းတစ်ခုပါ။

အင်တာနက်ပေါ် ပျံ့နှံ့နေတဲ့ အကြမ်းဖက်ခြိမ်းခြောက်မှုတစ်ခုကို ကိုရီးယားအာဏာပိုင်တွေ စစ်ဆေးနေကြပါတယ်။ ဒါပေမယ့် သံသယရှိသူက အမေရိကကိုသွားတဲ့ လေယာဉ်ပေါ် လိုက်ပါသွားပြီဆိုတာကို နောက်ကျမှ သိလိုက်ရတယ်။ အဲဒီလေယာဉ်ပေါ်က ကျန်းကျန်းမာမာရှိနေတဲ့ ခရီးသည်တစ်ဦး အကြောင်းရင်းမသိဘဲ ကြောက်မက်ဖွယ် သေဆုံးသွားတဲ့အခါ လေယာဉ်ပေါ်မှာရော မြေပြင်မှာပါ ထိတ်လန့်ကုန်ကြပါတယ်။ လေယာဉ်ရဲ့လောင်စာဆီက တဖြည်းဖြည်း လျော့လာသလို နိုင်ငံတကာကလည်း အကူအညီပေးဖို့ ငြင်းပယ်နေကြပါတယ်။ ခရီးသည်တွေကို ကယ်တင်ဖို့ လေယာဉ်မှူးနဲ့ အဖွဲ့သားတွေဟာ သူတို့တစ်သက်မှာ တစ်ခါမှ မလုပ်ဖူးတဲ့ အရေးပေါ်လုပ်ဆောင်ချက်တစ်ခုကို လုပ်ရတော့မယ့် အခြေအနေ ရောက်လာပါတယ်။ Lee Byung Hun၊ Song Kang-ho၊ Im Si Wan နဲ့ Kim Nam Gil တို့ ပါဝင်ထားတဲ့ အက်ရှင်သဲထိတ်ရင်ဖိုဇာတ်ကားဖြစ်ပြီး ကိုဗစ်ကြောင့် ရုံတင်ရက်တွေ ရွှေ့ဆိုင်းခဲ့ရပါတယ်။

စုံထောက်ဂိုနဲ့ သူ့အဖွဲ့ဟာ အမှုလိုက်တိုင်း အလွဲလွဲအချော်ချော် ဖြစ်တတ်ကြပါတယ်။ ဂိုကိုယ်တိုင်လည်း ရာထူးမတိုးဘဲ အဖွဲ့ခေါင်းဆောင်နေရာမှာပဲ ရှိနေတုန်းပါ။ တစ်နေ့မှာတော့ သူတို့အဖွဲ့ မူးယစ်ရာဇာ လီမွန်ဘယ်ကို ဖမ်းဆီးဖို့ တာဝန်ယူရလာပါတယ်။ လီမွန်ဘယ်ကို အနီးကပ်စောင့်ကြည့်နိုင်ဖို့ ကြက်ကြော်ဆိုင်တစ်ဆိုင်မှာ နေရာယူထားပေမယ့် အဲဒီဆိုင်က ရောင်းထုတ်ရတော့မယ့် အခြေအနေ ဖြစ်လာပါတယ်။ အမှုလိုက်နေတုန်း ဆိုင်ကိစ္စပါ ကြုံလာတဲ့အခါ သူတို့ဘယ်လို ဆက်လုပ်ကြမလဲ၊ အလွဲတွေကြားကနေ လီမွန်ဘယ်ကို ဖမ်းနိုင်ပါ့မလားဆိုတာကို ပြထားတဲ့ ၂၀၁၉ ခုနှစ်ထွက် ကိုရီးယား အက်ရှင်ဟာသ စုံထောက်ဇာတ်ကားပါ။

၁၉၉၅ ခုနှစ်မှာ အန်ဒီဆိုတဲ့ကောင်လေးဟာ ဘက်ဇ်လိုက်ရီးယားအရုပ်ကို မွေးနေ့လက်ဆောင်ရခဲ့ပါတယ်။ အဲဒီအရုပ်က အန်ဒီအရမ်းကြိုက်တဲ့ ရုပ်ရှင်ထဲက ဇာတ်ကောင်ကို ပုံစံယူထားတာပါ။ Lightyear ကတော့ Toy Story ထဲက အရုပ်တွေရဲ့အကြောင်းကို ဆက်ပြတာမဟုတ်ဘဲ အန်ဒီကြိုက်ခဲ့တဲ့ အဲဒီရုပ်ရှင်ရဲ့ဇာတ်လမ်းကို ပြထားတာဖြစ်ပါတယ်။ ဘက်ဇ်လိုက်ရီးယားဟာ ကြယ်တာရာစခန်းကြီးရဲ့ လေ့လာရေးအဖွဲ့မှာ ပါဝင်တဲ့ ကပ္ပတိန်အဆင့် အာကာသရိန်းဂျားတစ်ဦးပါ။ ထူးဆန်းတဲ့ ဂြိုဟ်တစ်ခုပေါ်ကို သွားလေ့လာရင်း ဂြိုဟ်သားတွေနဲ့ တိုက်ပွဲဖြစ်ကြရာက သူတို့ရဲ့ယာဉ် ပျက်ကျသွားပြီး အလင်းအလျင်နဲ့ မောင်းနှင်နိုင်တဲ့စနစ်ပါ ပျက်စီးသွားပါတယ်။ အိမ်ပြန်လို့ မရတော့တဲ့အတွက် အဖွဲ့သားတွေဟာ အဲဒီဂြိုဟ်ပေါ်မှာ အသက်ရှင်နေထိုင်နိုင်ဖို့ ကြိုးစားကြရပါတယ်။ ဘက်ဇ်ကတော့ ယာဉ်ကို အလင်းအလျင်နဲ့ ပြန်မောင်းနိုင်အောင် ပြုပြင်ပြီး အားလုံးကို အိမ်ပြန်ပို့ပေးဖို့ စွန့်စားရပါတော့တယ်။

ရှေးခေတ်အိန္ဒိယရဲ့ ထင်ရှားတဲ့ စစ်သူကြီး Samrat Prithviraj Chauhan အကြောင်းကို အခြေခံထားတဲ့ ရာဇဝင်ဇာတ်ကားဖြစ်ပြီး အာရှေးကူမား ပါဝင်သရုပ်ဆောင်ထားပါတယ်။ ပရစ်ထဗီရာဂ်ျဟာ ရန်သူတွေကို မကြောက်မရွံ့ ရင်ဆိုင်တတ်ပြီး အခက်အခဲကြုံတိုင်း နောက်မဆုတ်တတ်သူပါ။ တစ်နေ့မှာ ကန်နူးဂ်ျတိုင်းပြည်ရဲ့ဘုရင်က ပူဇော်ပွဲတက်ရောက်ဖို့ ဖိတ်ကြားလွှာကို ပရစ်ထဗီရာဂ်ျတို့နေတဲ့ ဒေလီမြို့ဆီ ပို့လာပါတယ်။ ဒီဖိတ်ကြားလွှာက ဘယ်လိုဖိတ်ကြားချက်မျိုးလဲ၊ ပရစ်ထဗီရာဂ်ျကရော ဘယ်လိုတုံ့ပြန်ဖြေရှင်းမလဲဆိုတာကနေ ဇာတ်လမ်းဆက်သွားပါတယ်။

အစိုးရအရာရှိတွေကို ပစ်မှတ်ထားပြီး ဆက်တိုက်သတ်ဖြတ်နေတဲ့ မျက်နှာဖုံးစွပ်အဖွဲ့တစ်ဖွဲ့ ရှိနေပါတယ်။ သူတို့က လူသတ်ပြီးတိုင်း ခြေရာလက်ရာနဲ့ သဲလွန်စ မကျန်အောင် လုပ်နိုင်တဲ့အပြင် သတ်ဖြတ်မှုကို ဗီဒီယိုရိုက်ပြီး ရဲဌာနဆီ ပို့တဲ့အထိ ရဲတင်းကြတယ်။ ရဲဌာနက ဒီအမှုကို မကိုင်တွယ်နိုင်တော့တဲ့အခါ ဘလက်စကွက်ဒ်ဆိုတဲ့အဖွဲ့ကို တာဝန်လွှဲပေးလိုက်ပါတယ်။ ဒီအဖွဲ့ကလည်း မဖြေရှင်းနိုင်တဲ့အမှု မရှိသလောက်ပဲလို့ နာမည်ကြီးပြီး ဉာဏ်ထက်တဲ့အဖွဲ့ပါ။ ခြေရာမချန်တဲ့ လူသတ်အဖွဲ့ကို သူတို့လိုက်စုံစမ်းရာက နှစ်ဖွဲ့ကြား အကွက်ချင်းပြိုင်ဆိုင်မှုတွေနဲ့ မမျှော်လင့်ထားတဲ့ လှည့်ကွက်တွေ ပေါ်လာပါတယ်။ ကမာလ်ဟာစန်း၊ ဗီဂျေးစည်သူပတီ၊ ဖဟဒ်ဖာဆစ်လ်နဲ့ ဆူရီးယားတို့ ပါဝင်သရုပ်ဆောင်ထားတဲ့ အက်ရှင်ဇာတ်ကားဖြစ်ပါတယ်။ ဇာတ်ကောင်တချို့ကတော့ Kaithi (2019) ထဲက ဇာတ်ကောင်တွေ ဖြစ်ကြပါတယ်။

ထူးခြားတဲ့ လူသားမျိုးစိတ်သစ်တစ်ခု ဖန်တီးဖို့ စမ်းသပ်ကြရာက ပြဿနာတွေ ဖြစ်လာပါတယ်။ စမ်းသပ်ခံလူသားတွေကို ရှင်းလင်းပစ်ပေမယ့် အဲဒီအထဲက မိန်းကလေးတစ်ယောက်တော့ လွတ်မြောက်သွားခဲ့တယ်။ သွေးသံရဲရဲနဲ့ လျှောက်သွားနေတဲ့ သူမကို KyungHee က အမှတ်မထင် တွေ့မိပြီးနောက် ကာကွယ်ပေးဖို့ ကြိုးစားရပါတော့တယ်။ လူသားမျိုးစိတ်အသစ်တစ်ခုလို ဖြစ်နေတဲ့ ဒီမိန်းကလေးမှာ ဘယ်လိုစွမ်းအားတွေ ရှိနေသလဲ။ ဒီစမ်းသပ်မှုကို ဘယ်သူတွေက ဘာရည်ရွယ်ချက်နဲ့ လုပ်ခဲ့ကြတာလဲ။ အဲဒီမေးခွန်းတွေနဲ့အတူ သဘာဝလွန်ဖြစ်ရပ်တွေ၊ သွေးထွက်သံယို ထိတ်လန့်စရာခန်းတွေနဲ့ အက်ရှင်ခန်းတွေကို ဆက်တွေ့ရမှာပါ။ Kim Dami နဲ့ Choi Woo-Shik တို့ ပါဝင်ခဲ့တဲ့ The Witch: The Subversion ရဲ့ အဆက်ဖြစ်ပါတယ်။ ဒီအပိုင်းမှာ Lee Jong-Suk နဲ့ Extraordinary Attorney Woo ထဲက Park Eun Bin တို့ ပါဝင်ထားပြီး Park Eun Bin က KyungHee အဖြစ် သရုပ်ဆောင်ထားပါတယ်။ ပထမပိုင်းက သရုပ်ဆောင်အတော်များများလည်း ပြန်ပါဝင်ထားကြပါတယ်။

၁၉၈၀ ပြည့်နှစ်တွေက ရန်ဂက်စ်တလန်ဆိုတဲ့ ရွာလေးမှာ ချစ်တီးဘာဘူဟာ လယ်တွေကို ရေသွင်းတဲ့အလုပ် လုပ်နေပါတယ်။ သူက မွေးရာပါ နားလေးပေမယ့် မဟုတ်မခံတတ်တဲ့သူပါ။ မျက်စိရှေ့မှာ မတရားတာတွေ့ရင် ဝင်ရင်ဆိုင်ဖို့ နှစ်ခါစဉ်းစားနေတတ်သူ မဟုတ်ဘူး။ ရွာထဲမှာတော့ ရွာသားတွေကို ငွေချေးပြီး အတိုးအဆမတန်ယူကာ ခေါင်းပုံဖြတ်နေတဲ့ အဖွဲ့တစ်ဖွဲ့ရှိပါတယ်။ အဲဒီအဖွဲ့ကို နောက်ကွယ်က ချုပ်ကိုင်ထားသူက နှစ်သုံးဆယ်ဆက်တိုက် သူကြီးဖြစ်နေတဲ့သူပါ။ သူနဲ့ ထိပ်တိုက်တွေ့သူတွေ အသက်ဆုံးရှုံးရလေ့ရှိတာကြောင့် ရွာသားတွေက ကြောက်ပြီး မရင်ဆိုင်ရဲကြဘူး။ ဒါပေမဲ့ ဒူဘိုင်းကနေ ပြန်လာတဲ့ ပညာတတ် ကူမာရ်ဘာဘူကတော့ ဒီအဖွဲ့ကို ရင်ဆိုင်ပြီး သူကြီးနေရာ ဝင်ပြိုင်မယ်လို့ စိန်ခေါ်လိုက်ပါတယ်။ ကူမာရ်ဟာ ချစ်တီးဘာဘူရဲ့ အစ်ကိုပါ။ မတရားမှုကို ဆန့်ကျင်ရင်း သူကြီးအဖွဲ့နဲ့ ထိပ်တိုက်တွေ့လာတဲ့ အစ်ကိုကို ချစ်တီးဘာဘူ ဘယ်လိုကာကွယ်ပေးမလဲဆိုတာ ဆက်တွေ့ရမှာပါ။ ရမ်ချရန်း ပါဝင်သရုပ်ဆောင်ထားပြီး အက်ရှင်ခန်းတွေနဲ့ သီချင်းတွေလည်း ပါဝင်ပါတယ်။

လိုကီဟာ အကျဉ်းကျနေရာကနေ အစားအစာလာပို့သူကို လှည့်စားပြီး ထွက်ပြေးလွတ်မြောက်လာပါတယ်။ လွတ်လာတာနဲ့ အိုဒင်ကို သတ်ပြီး Ragnarök ကို အစပျိုးဖို့ ကြံစည်တော့တယ်။ သူ့ရည်ရွယ်ချက် အောင်မြင်ဖို့အတွက် အကျဉ်းချခံထားရတဲ့ သူ့သားတစ်ဦးဖြစ်သူ ဧရာမဝံပုလွေကြီးကို လွှတ်ပေးဖို့ လိုနေပါတယ်။ အဲဒီဝံပုလွေ လွတ်လာရင် အိုဒင်နဲ့ လောကကိုးပါးသစ်ပင်ကို ဝါးမျိုပြီး လောကကိုးပါးလုံးကို ဖျက်ဆီးပစ်နိုင်တာပါ။ အိုဒင် အသက်ငင်နေချိန်မှာ သောရ် ပြန်ရောက်လာပြီး လိုကီကို တားဆီးဖို့ မှာကြားချက်ကို လက်ခံရပါတယ်။ ဒီလိုနဲ့ ဝံပုလွေကြီးကို ချုပ်နှောင်ထားတဲ့ မစ်ဂတ်လို့ခေါ်တဲ့ ကမ္ဘာဆီ လိုကီနဲ့ သောရ်တို့ ရှေ့ဆင့်နောက်ဆင့် ရောက်လာကြတယ်။ တစ်ချိန်တည်းမှာပဲ နှစ်ထောင်ပေါင်းများစွာ လူမတွေ့ခဲ့တဲ့ အဲဒီအကျဉ်းချရာနေရာကို ကမ္ဘာပေါ်က ရှေးဟောင်းသုတေသနသမားတွေ ရှာတွေ့သွားကြပါတယ်။ သူတို့ကတော့ ဗိုက်ကင်းသင်္ချိုင်းလို နေရာမျိုးလို့ ထင်နေကြတယ်။ လိုကီက ဝံပုလွေကို လွှတ်ပေးပြီး လောကကိုးပါးကို ဖျက်ဆီးဖို့ ကြိုးစားနေချိန်မှာ သောရ်က လူသားတွေနဲ့ ပူးပေါင်းပြီး ကမ္ဘာကို ကယ်တင်ဖို့ လုပ်ရပါတော့တယ်။

ညတစ်ညမှာ မူးယစ်ဆေးနဲ့ လက်နက်ခဲယမ်းတွေ မှောင်ခိုသယ်လာတဲ့ ဗင်ကားတစ်စီးကို အင်စပက်တာဘီဂျွိုင်းနဲ့အဖွဲ့က ဖမ်းမိပြီး ပစ္စည်းတွေ သိမ်းဆည်းလိုက်ပါတယ်။ အဲဒီနောက် ရဲအရာရှိတစ်ယောက်ရဲ့အိမ်မှာ နယ်ထဲက အရာရှိအရာခံ အားလုံးနီးပါး စုဝေးသောက်စားကြတယ်။ သိပ်မကြာခင်မှာပဲ ဘီဂျွိုင်းကလွဲလို့ ကျန်သူအားလုံး အရက်ထဲက မူးယစ်ဆေးကြောင့် သတိလစ်ကုန်ကြပါတယ်။ ဒါဟာ သိမ်းဆည်းခံလိုက်ရတဲ့ မှောင်ခိုပစ္စည်းပိုင်ရှင်တွေ စီစဉ်ထားတဲ့အကွက်ဆိုတာ ဘီဂျွိုင်း နားလည်လိုက်တယ်။ အရာရှိတွေကို တခြားနေရာဆီ ချက်ချင်းရွှေ့ပေးရတော့မယ့်အချိန်မှာ ဘီဂျွိုင်းက ညနေခင်းကမှ သူ့လက်အောက်က ရဲတချို့ ဖမ်းခေါ်လာတဲ့ ဒီလီကို အကူအညီယူဖို့ စီစဉ်ပါတယ်။ ဒီလီကို ကုန်တင်ကားမောင်းခိုင်းပြီး သတိလစ်နေတဲ့ အရာရှိတွေကို သယ်သွားစေချင်တာပါ။ ဒီလီကတော့ ထောင်ဆယ်နှစ်ကျပြီး လွတ်ငြိမ်းချမ်းသာခွင့်နဲ့ ပြန်လွတ်လာသူပါ။ မွေးကတည်းက ဆယ်နှစ်ကြာအောင် တစ်ခါမှ မမြင်ဖူးသေးတဲ့ သမီးလေးကို တွေ့ဖို့ မိဘမဲ့ကျောင်းဆီ သွားမလို့ဖြစ်နေတယ်။ ဒီအချိန်မှာ ကြုံလာတဲ့ ဘီဂျွိုင်းခိုင်းတဲ့အလုပ်ကို သူလုပ်နိုင်ပါ့မလား၊ စောင့်မျှော်ခဲ့ရတဲ့ သမီးနဲ့ရော တွေ့ခွင့်ရပါ့မလား။ Karthi ပါဝင်သရုပ်ဆောင်ထားတဲ့ အက်ရှင်၊ သည်းထိတ်ရင်ဖိုဇာတ်ကားဖြစ်ပြီး အက၊ သီချင်းနဲ့ မင်းသမီးဇာတ်ဆောင် မပါဝင်ပါဘူး။ ဒီဇာတ်ကားထဲက ဇာတ်ကောင်တွေဟာ Vikram (2022) မှာလည်း ပြန်လည်ပါဝင်လာပါတယ်။

ဘစ်ရှော့ပ်ဟာ သူလုပ်ကြံခဲ့တဲ့သူတွေကို လူသတ်ခံရတာလို့တောင် မထင်ရဘဲ မတော်တဆသေဆုံးသွားသလို ဖြစ်အောင် ဖန်တီးနိုင်တဲ့ လုပ်ကြံရေးသမားပါ။ တည်ငြိမ်ပြီး သွေးအေးသလို အလုပ်လုပ်ရာမှာလည်း တိကျရက်စက်တဲ့သူဖြစ်ပါတယ်။ အခုတော့ အဲဒီဘဝကနေ အနားယူပြီး ဘရာဇီးမှာ ကိုယ့်အကြောင်းကို ဖုံးကွယ်နေထိုင်နေတယ်။ ဒါပေမဲ့ သူ့ဆီ မိန်းကလေးတစ်ယောက် ရောက်လာပြီး သူ့အကြောင်းကို ဖော်ထုတ်သွားတဲ့အခါ ပုန်းရှောင်နေတဲ့ဘဝက အဆုံးသတ်သွားပါတယ်။ သူ့ကို ပြန်အသုံးချချင်နေတာက ငယ်ငယ်ကတည်းက ရန်စရှိခဲ့တဲ့ ခရိန်းပါ။ ခရိန်းက ဘစ်ရှော့ပ်ရဲ့ လုပ်ကြံရေးအရည်အချင်းကို သုံးပြီး သူ့ရန်သူတွေကို ရှင်းပစ်ချင်သလို အရင်က ရန်ငြိုးအတွက်လည်း လက်စားချေချင်နေတယ်။ ဒီနှစ်ယောက်ကြား ဘာမှမဆိုင်တဲ့ ဂျီနာပါ ညပ်ပါလာရာက တစ်ယောက်အကွက်ကို တစ်ယောက်ကျော်ဖို့ ဉာဏ်ချင်းပြိုင်ကြရပါတယ်။ The Mechanic (2011) ရဲ့ အဆက်ဖြစ်ပြီး ဘစ်ရှော့ပ်အဖြစ် Jason Statham သရုပ်ဆောင်ထားပါတယ်။ Jessica Alba နဲ့ Michelle Yeoh တို့လည်း ပါဝင်ထားကြပါတယ်။

၂၀၁၁ ခုနှစ်ထွက် Thor ဟာ Marvel Cinematic Universe ရဲ့ စတုတ္ထမြောက်ရုပ်ရှင်ဖြစ်ပြီး Chris Hemsworth သရုပ်ဆောင်တဲ့ မိုးကြိုးနတ်ဘုရား Thor ကို မိတ်ဆက်ထားပါတယ်။ လူသားစူပါဟီးရိုးတွေဆီကနေ နတ်ဘုရားတွေပါ ပါဝင်တဲ့အထိ MCU ရဲ့ဇာတ်လမ်းကမ္ဘာကို ချဲ့ထွင်ထားပြီး Loki ဇာတ်ကောင်ကိုလည်း ဒီကားမှာ တွေ့ရပါတယ်။ Thor ပါဝင်တဲ့ Phase One က MCU ရဲ့အစဖြစ်ပြီး ဇာတ်ကောင်တွေကို တစ်ဦးချင်းစီ မိတ်ဆက်တဲ့ ရုပ်ရှင်တွေနဲ့ စတင်ထားတာပါ။ ဒီအဆင့်မှာ Iron Man (2008)၊ The Incredible Hulk (2008)၊ Iron Man 2 (2010)၊ Thor (2011)၊ Captain America: The First Avenger (2011) နဲ့ The Avengers (2012) ဆိုပြီး ရုပ်ရှင်ခြောက်ကား ပါဝင်ပါတယ်။ Phase One၊ Two နဲ့ Three ကို The Infinity Saga လို့ စုပေါင်းခေါ်ပြီး Phase Four၊ Five နဲ့ Six ကိုတော့ The Multiverse Saga လို့ ခေါ်ကြပါတယ်။ မူရင်းမှာ ဖော်ပြထားတဲ့ ထုတ်လုပ်မှုအချက်အလက်အရ Thor ကို အမေရိကန်ဒေါ်လာ သန်း ၁၅၀ အကုန်အကျခံ ရိုက်ကူးခဲ့ပြီး ရုံဝင်ငွေ ဒေါ်လာ ၄၄၉.၃ သန်း ရရှိခဲ့ပါတယ်။

လီဆွန်းရှင်းဟာ ဂျိုဆွန်းတပ်မတော်မှာ အမှုထမ်းစဉ် အောင်ပွဲတွေရပြီး ထင်ရှားလာခဲ့သူပါ။ မူရင်းအညွှန်းမှာ ရှင်းပြထားတဲ့ နောက်ခံအရ သူဟာ ခြောက်လအတွင်း ရာထူးသုံးဆင့် တက်ခဲ့ပြီး ဂျပန်စစ်မင်း Toyotomi Hideyoshi ရဲ့ ကိုရီးယားကျူးကျော်စစ် စတင်ချိန်မှာ ရေတပ်သေနာပတိ ဖြစ်နေပါပြီ။ ဂျပန်တပ်တွေက ကုန်းမြေပေါ်မှာ အသာစီးရခဲ့ပေမယ့် လီဆွန်းရှင်း ဦးဆောင်တဲ့ ရေတပ်ကိုတော့ မလွှမ်းမိုးနိုင်ခဲ့ကြဘူး။ ဒါကြောင့် ဂျိုဆွန်းနန်းတွင်း မတည်ငြိမ်မှုကို အခွင့်ကောင်းယူပြီး သူလျှိုတွေ၊ သစ္စာဖောက်အမတ်တွေနဲ့ ပူးပေါင်းကာ ထောင်ချောက်ဆင်ကြပါတယ်။ ကိုရီးယားဘက် သစ္စာခံသလို ဟန်ဆောင်ထားတဲ့ ဂျပန်သူလျှိုက ရေတပ်သတင်းပို့လာတဲ့အခါ ဘုရင်ဆွန်းဂျိုက လီဆွန်းရှင်းကို သွားတိုက်ဖို့ အမိန့်ပေးတယ်။ ထောင်ချောက်ဖြစ်မှန်း ရိပ်မိလို့ အမိန့်ကို မလိုက်နာတဲ့ လီဆွန်းရှင်းဟာ ထီးနန်းကို လုပ်ကြံမယ့်သူအဖြစ် စွပ်စွဲခံလိုက်ရပါတယ်။ စစ်သည်တွေနဲ့ ပြည်သူတွေက သူ့ကို ကြည်ညိုကြတာကို မနာလိုသလို ထီးနန်းအတွက်ပါ စိတ်မချဖြစ်နေတဲ့ ဘုရင်က သူ့ကို ဖမ်းဆီး၊ ရာထူးချပြီး နှိပ်စက်စစ်မေးစေခဲ့တယ်။ အဲဒီနောက်ခံအဖြစ်အပျက်တွေကို ဇာတ်ကားထဲမှာ ပြထားတာတော့ မဟုတ်ပါဘူး။ ရုပ်ရှင်က လီဆွန်းရှင်းမရှိတော့တဲ့ ရေကြောင်းမှာ ဂျပန်တွေ အသာစီးရသွားပြီးနောက် ဘုရင်ဆွန်းဂျိုက သူ့ကို ပြန်တာဝန်ပေးတဲ့နေရာက စထားပါတယ်။ ဂျပန်ရေတပ်ကို ခုခံရမယ့် လီဆွန်းရှင်းဆီမှာ လက်ကျန်သင်္ဘော အနည်းငယ်ပဲ ရှိတော့တယ်။ ရေတပ်သားတ