အက်ရှင်ကားများ

ဂျူအီးဝူနဲ့ ဂျူဝေါဝူတို့ဟာ အမြွှာညီအစ်ကိုတွေပါ။ ခရစ္စမတ်မနက်မှာ ညီဖြစ်သူ ဝေါဝူကို သေဆုံးလျက် တွေ့ရှိခဲ့ရပြီး သူ့အမှုကို မတော်တဆမှုအဖြစ် သတ်မှတ်ကာ ပိတ်လိုက်ကြတယ်။ ဒါပေမယ့် အစ်ကိုဖြစ်သူ အီးဝူကတော့ အဲဒီဆုံးဖြတ်ချက်ကို လက်မခံနိုင်ပါဘူး။ ညီရဲ့သေဆုံးမှုကို ကိုယ်တိုင်စုံစမ်းပြီး ပါဝင်ပတ်သက်သူတွေနဲ့ ဖုံးကွယ်ပေးသူအားလုံးကို လက်စားချေဖို့ အီးဝူ ဆုံးဖြတ်လိုက်တယ်။ သူ့လက်ထဲမှာရှိတဲ့ သဲလွန်စက ဝေါဝူနဲ့ နောက်ဆုံးဖုန်းပြောခဲ့တုန်းက ကြားလိုက်ရတဲ့ အသံတစ်ခုတည်းပါ။ အဲဒီအသံကို အားကိုးပြီး တရားခံကို ရှာဖွေနေရာကနေ လူငယ်ထိန်းသိမ်းရေးစခန်းထဲကို ရည်ရွယ်ချက်ရှိရှိ ဝင်သွားခဲ့ပါတယ်။ GOT7 အဖွဲ့ဝင် Park Jin-young က ဒီသည်းထိတ်ရင်ဖိုဇာတ်ကားမှာ စရိုက်မတူတဲ့ အမြွှာညီအစ်ကိုနှစ်ယောက်အဖြစ် နှစ်ကိုယ်ခွဲ သရုပ်ဆောင်ထားပါတယ်။

ဂျပန်ကျူးကျော်စစ်ကို ရင်ဆိုင်ခဲ့တဲ့ ဂျိုဆွန်းရေတပ်စစ်သူကြီး လီဆွန်းရှင်းဟာ စစ်ပရိယာယ်ကြွယ်ဝတဲ့ နည်းဗျူဟာမှူးအဖြစ် ထင်ရှားသူပါ။ Hansan: Rising Dragon က သူ ဦးဆောင်ခဲ့တဲ့ သမိုင်းဝင် ဟာဆန်းဒိုတိုက်ပွဲကို အခြေခံပြီး ပင်လယ်ပြင်မှာ ဂျပန်ရေတပ်ကို ဘယ်လိုဗျူဟာတွေနဲ့ ရင်ဆိုင်ခဲ့သလဲဆိုတာ ပုံဖော်ထားပါတယ်။ တိုက်ပွဲအတွင်း ကိုရီးယားရဲ့ လိပ်သင်္ဘောတွေ ဘယ်လိုအရေးပါခဲ့သလဲဆိုတာနဲ့အတူ နိုင်ငံရေး၊ စစ်ရေး လှည့်ကွက်တွေလည်း ပါဝင်တယ်။ The Admiral: Roaring Current နဲ့ War of the Arrows တို့ကို ရိုက်ကူးခဲ့တဲ့ ဒါရိုက်တာ Kim Han-min ရဲ့ လက်ရာဖြစ်ပါတယ်။ လီဆွန်းရှင်းအဖြစ် Park Hae Il က သရုပ်ဆောင်ထားပြီး Kim Hyung Gi၊ Byun Yo Han၊ Taec Yeon နဲ့ Gong Myung တို့လည်း တွဲဖက်ပါဝင်ထားကြပါတယ်။

စမီရ်နဲ့ နရ်ဂစ်တို့ ဇနီးမောင်နှံဟာ ကြုံခဲ့ရတဲ့ ဒုက္ခတွေကို ကျော်လွန်ပြီး ဘဝကို အေးအေးချမ်းချမ်း ပြန်အခြေချဖို့ ကြိုးစားနေကြပါတယ်။ ဒါပေမယ့် နိုင်ငံရပ်ခြားမှာ ရောင်းစားခံရပြီး အကြိမ်ကြိမ် လိင်ပိုင်းဆိုင်ရာ အကြမ်းဖက်ခံခဲ့ရတဲ့ နရ်ဂစ်အတွက် အတိတ်က စိတ်ဒဏ်ရာတွေဟာ နေ့စဉ်ဘဝမှာ ဆက်ပြီး ဖိစီးနေတုန်းပါ။ သူတို့နှစ်ယောက်ကြား ပြန်လည်နီးကပ်လာစေဖို့ စမီရ်က နန်ဒီနီဆိုတဲ့ ငါးနှစ်အရွယ် မိန်းကလေးကို မွေးစားလိုက်တယ်။ ကလေးလေးနဲ့အတူ သံယောဇဉ်တွယ်ပြီး မိသားစုဘဝကို စတင်တည်ဆောက်နေချိန်မှာပဲ နန်ဒီနီ ပြန်ပေးဆွဲခံလိုက်ရပါတယ်။ အဲဒီနောက် ဆက်ဖြစ်လာတဲ့ ရုန်းရင်းဆန်ခတ်အဖြစ်တွေကြားမှာ သမီးအပေါ်ထားတဲ့ စမီရ်ရဲ့မေတ္တာနဲ့ လက်စားချေလိုစိတ်က ဘယ်လောက်အထိ ပြင်းထန်လာမလဲ။ ၂၀၂၀ ဝန်းကျင်က ထွက်ခဲ့တဲ့ ပထမဇာတ်ကားရဲ့ အဆက်ဖြစ်ပြီး ဒီတစ်ခါမှာလည်း စမီရ် ရင်ဆိုင်ရတဲ့ အဖြစ်အပျက်တွေနဲ့အတူ အကြမ်းစားအက်ရှင်ခန်းတွေ ပါဝင်ပါတယ်။

မြို့တော်ဝန်ရဲ့သမီး အဲလစ်ဇဘတ်သ်ဆွမ်း ငယ်ငယ်က သင်္ဘောပေါ်ကနေ ပင်လယ်ကို ငေးကြည့်နေတုန်း ရေထဲမှာ မျောပါလာတဲ့ ကောင်လေးတစ်ယောက်ကို တွေ့ခဲ့ပါတယ်။ အဲဒီကောင်လေး ဝေလ်တန်နာဟာ ကြီးပြင်းလာတဲ့အခါ သာမန်ပန်းပဲသမားတစ်ယောက် ဖြစ်လာပေမယ့် သူ့မှာ လူမသိတဲ့ နောက်ကြောင်းတစ်ခု ရှိနေတယ်။ တစ်နေ့မှာ ကပ္ပတိန်ဘာဘိုဇာက အဲလစ်ဇဘတ်သ်ကို ပြန်ပေးဆွဲသွားပါတယ်။ ဘာဘိုဇာဟာ ရတနာသိုက်တစ်ခုနဲ့ပတ်သက်ပြီး ကပ္ပတိန်ဂျက်စပဲရိုးနဲ့ သဘောထားကွဲခဲ့သူဖြစ်သလို ဂျက်ဆီက ပုလဲနက်သင်္ဘောကိုလည်း လုယူထားသူပါ။ ဒါပေမယ့် သူနဲ့ သူ့သင်္ဘောသားတွေမှာ ရှေးဟောင်းကျိန်စာတစ်ခု သင့်နေပြီး အသက်ရှင်တယ်လို့လည်း မဆိုနိုင်၊ သေဆုံးလို့လည်း မရတဲ့ဘဝကို ရောက်နေကြတယ်။ အဲဒီကျိန်စာပြယ်ဖို့ သွေးနဲ့ ယဇ်ပူဇော်ရမှာဖြစ်ပါတယ်။ ဘာဘိုဇာတို့ ကျိန်စာကို ဖျက်ဖို့ ကြိုးစားနေချိန်မှာပဲ ဂျက်နဲ့ ပြန်ဆုံကြပြီး ပုလဲနက်သင်္ဘောနဲ့ ရတနာသိုက်ကို ပတ်သက်နေတဲ့ သူတို့ရဲ့အရေးကိစ္စတွေ ပြန်ရှုပ်ထွေးလာပါတော့တယ်။

ဇာတ်လမ်းအစမှာ ဘော်ဘီဆိုတဲ့ လူငယ်တစ်ယောက်ဟာ မူးရူးသောက်စားပြီး မျက်ရည်တွေနဲ့ လီလီဆီ ဖုန်းဆက်ဖို့ ကြိုးစားနေပါတယ်။ လီလီက တစ်ချိန်က သူ့ဘဝထဲ ဝင်လာခဲ့ပြီး နောက်တော့ သူ့ကို ဝမ်းနည်းမှုတွေနဲ့ ချန်ထားခဲ့သူပါ။ သူ ဘာကြောင့် ထွက်သွားခဲ့တာလဲဆိုတာကနေ သူတို့နှစ်ယောက်ရဲ့အကြောင်းကို ဆက်ပြထားတယ်။ ဘော်ဘီဟာ စိတ်လိုက်မာန်ပါ လုပ်တတ်သူပါ။ ကျောင်းမှာလည်း ကျောင်းသားသမဂ္ဂဆိုတဲ့ နာမည်အောက်ကနေ ထင်ရာစိုင်းနေသူလို့ အများက မြင်ကြတယ်။ မကြာခဏ ရန်ဖြစ်တတ်ပြီး သောက်စားတတ်ပေမယ့် မိန်းကလေးတွေကိုတော့ ရိုသေတတ်သူပါ။ လီလီပြောခဲ့တဲ့စကားတွေထက် သူဘာမှ ပြန်မပြောနိုင်ခဲ့တာကို ပိုနာကျင်နေရတယ်။ ဒါပေမဲ့ လီလီမှာ သူ့ကြောင့် တစ်စုံတစ်ခုဖြစ်ခဲ့တာကိုတော့ ဘော်ဘီ မသိခဲ့ပါဘူး။ လီလီ ဘာဖြစ်ခဲ့တာလဲ၊ သူတို့နှစ်ယောက် ပြန်ဆုံဖြစ်ကြဦးမလား။ ဘော်ဘီနဲ့ သူ့ရန်ဘက် ဘူလီရဲ့ညီတို့ကြားက ပြဿနာကရော ပြီးသွားပြီလား။ Vijay Devarakonda နဲ့ Rashmika Mandanna တို့ ပါဝင်ထားတဲ့ အက်ရှင်အချစ်ဇာတ်ကားဖြစ်ပြီး ခေါင်းစဉ်ကတော့ ချစ်လှစွာသော သွေးသောက်ရဲဘော်လို့ အဓိပ္ပာယ်ရပါတယ်။

စမ်းသပ်မှုတစ်ခုကနေ ထွက်ပြေးလွတ်မြောက်လာတဲ့ ကောင်မလေးတစ်ယောက်ကို ကလေးဆုံးရှုံးထားတဲ့ လင်မယားနှစ်ယောက်က ခေါ်ယူမွေးစားလိုက်ပါတယ်။ ကောင်မလေးက အတိတ်မေ့နေတဲ့အတွက် အရင်က သူ့အကြောင်းတွေကို မမှတ်မိတော့ပါဘူး။ သူအရွယ်ရောက်လာချိန်မှာ မိသားစုစီးပွားရေးက အဆင်မပြေဖြစ်နေတယ်။ ဒါကြောင့် ဆုကြေးငွေအများကြီးရနိုင်တဲ့ သီချင်းဆိုပြိုင်ပွဲတစ်ခုကို ဝင်ပြိုင်ခဲ့ပါတယ်။ ပြိုင်ပွဲမှာ သူ့ရဲ့ထူးခြားချက်တစ်ခုကို ပြလိုက်ရာက လူအများ အံ့အားသင့်သွားကြပြီး သူ့အကြောင်း လူသိများလာတယ်။ အဲဒီနောက်မှာတော့ သူမမှတ်မိတော့တဲ့ အတိတ်က အရိပ်ဆိုးဟာ ပြန်လိုက်လာပါတော့တယ်။

ဂျက်စပဲရိုး အရင်တုန်းက လှည့်ကွက်သုံးခဲ့တဲ့ လုပ်ရပ်တစ်ခုကြောင့် ကျိန်စာမိနေတဲ့ ကပ္ပတိန်တစ်ယောက်က သူ့ကိုသတ်ဖို့ လိုက်ရှာလာပါတယ်။ အဲဒီသူကတော့ ဆိုင်းလင့်န်မေရီသင်္ဘောရဲ့ ကပ္ပတိန် ဆလာဇာပါ။ သူဦးဆောင်လာတဲ့ သင်္ဘောသားတွေကလည်း စာနာစိတ်မရှိကြဘူး။ ဒီတစ်ကြိမ်မှာ ဆလာဇာက အထာနပ်နေပြီမို့ ဂျက်အနေနဲ့ အရင်လို လှည့်ကွက်သုံးပြီး ဖြေရှင်းလို့ မရတော့ပါဘူး။ ဆလာဇာကို အနိုင်ယူနိုင်မယ့် တစ်ခုတည်းသောလက်နက်ကို ရှာဖို့ ဖြစ်လာတယ်။ အဲဒါက သမုဒ္ဒရာခုနစ်စင်းလုံးကို ပိုင်စိုးတဲ့ နတ်ဘုရားပိုဆိုက်ဒန်ရဲ့ ခက်ရင်းခွပါ။

ကပ္ပတိန်ဘီလီတိုင်နဲ့ တံငါသည်ငါးယောက်ဟာ အန်ဒရီရာဂေးလ်ဆိုတဲ့ ငါးဖမ်းလှေနဲ့ ပင်လယ်ထဲ ငါးဖမ်းထွက်လာကြပါတယ်။ ဒါပေမဲ့ ဒီခရီးမှာ သူတို့ကြုံလိုက်ရတာက နှစ်တစ်ရာမှာ တစ်ခါလောက်သာ ဖြစ်ခဲတဲ့ မုန်တိုင်းကြီးတစ်ခုပါ။ ငါးဖမ်းဖို့ ထွက်လာတဲ့ခရီးကနေ မုန်တိုင်းကြားမှာ အသက်လုပြီး ရုန်းကန်ရတဲ့အဖြစ်ကို ရောက်သွားကြတယ်။ ဒီမုန်တိုင်းဟာ သာမန်မုန်တိုင်းတွေနဲ့ ဘာကွာလို့ The Perfect Storm လို့ ခေါ်ရတာလဲ၊ ဘီလီတိုင်နဲ့ တံငါသည်တွေကရော ဒီမုန်တိုင်းထဲက လွတ်မြောက်နိုင်ကြပါ့မလား။ ဖြစ်ရပ်မှန်ကို အခြေခံထားတဲ့ သဘာဝဘေးအန္တရာယ်ဇာတ်ကားဖြစ်ပြီး George Clooney နဲ့ Mark Wahlberg တို့ ပါဝင်သရုပ်ဆောင်ထားကာ Wolfgang Peterson က ရိုက်ကူးထားပါတယ်။

နာမည်ကျော် မင်းသမီးနဲ့ အဆိုတော် ရေချယ်မဲရွန်ဆီကို အသက်အန္တရာယ် ခြိမ်းခြောက်စာတွေ ခပ်စိတ်စိတ် ရောက်လာပါတယ်။ ဒါကြောင့် နိုင်ငံတော်သမ္မတကိုတောင် ကာကွယ်ပေးခဲ့ဖူးတဲ့ သက်တော်စောင့် ဖရန့်ဖားမားကို ငှားရမ်းလိုက်ကြတယ်။ အန္တရာယ်တွေ ဝိုင်းနေတဲ့ ရေချယ်ကို ကာကွယ်ရင်း ဖရန့်တစ်ယောက် ဘယ်လိုအခက်အခဲတွေ ကြုံရမလဲ၊ နောက်ကွယ်က တရားခံအစစ်ကို ဘယ်လိုရှာဖွေမလဲဆိုတာနဲ့ ဇာတ်လမ်းဆက်သွားပါတယ်။ နာမည်ကျော်မင်းသမီးနဲ့ သူ့သက်တော်စောင့်တို့ကြားမှာ ဘယ်လိုအကြောင်းတွေ ဆက်ဖြစ်လာမလဲဆိုတာလည်း စောင့်ကြည့်ရမှာပါ။ ကီဗင်ကော်စတာနဲ့ ဝစ်နေးဟော်စတန်တို့ ပါဝင်ထားတဲ့ ဒီရုပ်ရှင်ဟာ ဒေါ်လာ ၂၅ သန်း ကုန်ကျခဲ့ပြီး ရုံဝင်ငွေ ဒေါ်လာ ၄၁၁ သန်းကျော် ရရှိခဲ့တဲ့ WB ရုပ်ရှင်ပါ။ ဒိုင်ယာလော့ဂ်တွေနဲ့ ဇာတ်ဝင်တေးတွေမှာ ခေတ်ဆန်မှုနဲ့ ဂန္တဝင်အငွေ့အသက်ကို တွဲဖက်ထားပါတယ်။

Jurassic World ရဲ့ ပထမကားမှာ ပန်းခြံပျက်စီးသွားခဲ့ပြီး ဒုတိယကားမှာတော့ ဒိုင်နိုဆောတွေ ကမ္ဘာအနှံ့ ပျံ့နှံ့လာခဲ့ပါတယ်။ ဒီတတိယကားက ဒိုင်နိုဆောတွေနဲ့ ဒီအန်အေတူတဲ့ ဧရာမကျိုင်းကောင်တွေ ပေါ်လာပြီး လယ်ကွင်းတွေကို ဖျက်ဆီးနေတဲ့ ပြဿနာနဲ့ စထားပါတယ်။ အိုဝင်နဲ့ ကလယ်ရာတို့ကလည်း ချားလော့ရဲ့ ကလုန်းကောင်မလေး မေစီကို ကယ်တင်လာပြီး လူတွေနဲ့ဝေးတဲ့နေရာမှာ ဖွက်ထားကြတယ်။ ဒါပေမဲ့ မေစီကို လူတစ်စုက ဖမ်းခေါ်သွားသလို ရပ်ပ်တာမကြီး ဘလူးရဲ့ ကလေးကိုလည်း ဖမ်းသွားကြပါတယ်။ အိုဝင်တို့စုံတွဲက မေစီနဲ့ ဘလူးရဲ့ကလေးကို ကယ်ဖို့ လိုက်လာကြတယ်။ တစ်ဖက်မှာလည်း သိပ္ပံပညာရှင် သူငယ်ချင်းနှစ်ယောက်က ကျိုင်းကောင်တွေကို မျိုးဗီဇပြောင်းထားတဲ့ တရားခံကို ရှာနေကြပါတယ်။ သူတို့ ပူးပေါင်းမိလာတဲ့အခါ စွန့်စားခရီးကို အတူဆက်ကြရပါတော့တယ်။

Garibong က အမှုကို ဖြေရှင်းခဲ့ပြီး လေးနှစ်အကြာမှာ စုံထောက် မာဆော့ဒိုတို့အဖွဲ့အတွက် နောက်ထပ်အမှုတစ်ခု ပေါ်လာပါတယ်။ တရားခံတစ်ဦးကို စုံစမ်းစစ်ဆေးဖို့ စုံထောက်မာဆော့ဒိုနဲ့ အဖွဲ့ခေါင်းဆောင် ဂျောင်အီမန်တို့ ဗီယက်နမ်ကို သွားကြရာက ရောက်ပြီးမကြာခင်မှာပဲ ထူးဆန်းတဲ့ ကွင်းဆက်လူသတ်မှုတစ်ခုကို အဖြေရှာဖို့ ဖြစ်လာတယ်။ ကိုရီးယား ထိပ်တန်းစီးပွားရေးလုပ်ငန်းရှင်တစ်ယောက်ရဲ့ သားကိုတောင် ပြန်ပေးဆွဲသတ်ဖြတ်ခဲ့တဲ့ လူသတ်သမား ဂန်ဟယ်ဆန်းနောက်ကို သူတို့ လိုက်ကြရပါတယ်။ ဖမ်းမမိဘဲ အကြိမ်ကြိမ် လွတ်ထွက်နေတဲ့ ဂန်ဟယ်ဆန်းကို စုံထောက်မာတို့အဖွဲ့ ဘယ်လိုလိုက်ဖမ်းမလဲ၊ တရားဥပဒေအရ အရေးယူနိုင်အောင် ဖမ်းဆီးပေးနိုင်ပါ့မလားဆိုတာ ဆက်ကြည့်ရမှာပါ။ Ma Dong-Seok နဲ့ Son Seok-Koo တို့ ပါဝင်ထားတဲ့ မှုခင်းအက်ရှင်ဇာတ်ကားဖြစ်ပြီး The Outlaws ရဲ့ ဒုတိယကားပါ။

ဒီဇာတ်လမ်းထဲက ဆန်တာကလော့စ်ဟာ ဆန်တာမဖြစ်ခင်က တိုက်ခိုက်သတ်ဖြတ်ရာမှာ ကြမ်းတမ်းတဲ့ စစ်သည်တော်တစ်ယောက် ဖြစ်ခဲ့ပါတယ်။ နှစ်ပေါင်းများစွာ ခရစ္စမတ်လက်ဆောင်တွေ ပေးလာပြီးနောက် လူတွေ တဖြည်းဖြည်း လောဘကြီးလာတာကို တွေ့ရင်း ကမ္ဘာကြီးနဲ့ သူ့အလုပ်ကိုပါ စိတ်ကုန်လာတယ်။ အိမ်တစ်အိမ်ထဲ ဝင်လိုက်ရင် နို့နဲ့ ကွတ်ကီးအစား အရက်ပုလင်းကို ရှာသောက်နေပြီး ခရစ္စမတ်ရဲ့ ကောင်းခြင်းတွေကိုလည်း မယုံကြည်တော့ပါဘူး။ ဒါပေမဲ့ တာဝန်ရှိနေသေးတာမို့ လိမ္မာတဲ့ကလေးစာရင်းထဲက ထရူဒီဆိုတဲ့ ကလေးမလေးဆီ လက်ဆောင်ပေးဖို့ ရောက်လာပါတယ်။ ထရူဒီ့မိသားစုက သန်းကြွယ်သူဌေးတွေဖြစ်ပြီး ခရစ္စမတ်မှာ ဆုံကြတိုင်း ကိုယ့်အတွက် ဘာအမြတ်ထုတ်ရမလဲ တွေးနေကြသူတွေပါ။ အဲဒီခရစ္စမတ်ညမှာပဲ လက်နက်ကိုင်တစ်ဖွဲ့က သူတို့စံအိမ်ကို ဝင်စီးပြီး အလုံခန်းထဲက ဒေါ်လာသန်း ၃၀၀ ကို ဖောက်ယူဖို့ ကြိုးစားလာတယ်။ မူးမူးနဲ့ အိမ်ထဲပိတ်မိနေတဲ့ ဆန်တာလည်း ဓားပြတစ်ဖွဲ့လုံးကို ရင်ဆိုင်ရပါတော့တယ်။ Dead Snow နဲ့ Hansel & Gretel: Witch Hunters တို့ကို ရိုက်ကူးခဲ့တဲ့ Tommy Wirkola ရဲ့ အက်ရှင်ဟာသကားဖြစ်ပြီး David Harbour က ဆန်တာအဖြစ် သရုပ်ဆောင်ထားပါတယ်။ အဆဲအဆိုနဲ့ ကြမ်းတမ်းတဲ့ အသတ်အဖြတ်ခန်းတွေ ပါဝင်တဲ့ လူကြီးကြည့် ခရစ္စမတ်ဇာတ်ကားပါ။

WandaVision ဇာတ်လမ်းတွဲအပြီးကနေ ဆက်ထားတဲ့ ဒီဇာတ်လမ်းမှာ စကားလက်ဝစ်ချ်၊ ကြက်သွေးရောင်စုန်းမ ဖြစ်လာတဲ့ ဝန်ဒါက တစ်ယောက်တည်း နေထိုင်နေပါတယ်။ တစ်ဖက်မှာ ဒေါက်တာစထရိန့်ဂျ်ဟာ အပြိုင်စကြဝဠာတွေကြား ကူးသန်းနိုင်ဖို့ ပေါ်တယ်တံခါး ဖွင့်ပေးနိုင်စွမ်းရှိတဲ့ အမေရိကချားဗက်စ်ဆိုတဲ့ ကလေးမလေးနဲ့ တွေ့ဆုံလာတယ်။ ကလေးမလေးကို နတ်ဆိုးတစ်ကောင် လိုက်ဖမ်းနေကြောင်း သိလိုက်ရတဲ့အခါ ဒေါက်တာစထရိန့်ဂျ်က ဝန်ဒါမက်ဆီမော့ဖ်ဆီ အကူအညီတောင်းဖို့ ရောက်လာပါတယ်။ အဲဒီကနေ အပြိုင်စကြဝဠာတွေတစ်လျှောက် ရန်သူတွေနဲ့ ရင်ဆိုင်ရတဲ့ တိုက်ပွဲတွေ စတင်လာတော့တယ်။

စစ်ပွဲကို မိတ်ဆွေ၊ တပ်စုကို မိသားစုအဖြစ်ပဲ သဘောထားဖို့ သင်ကြားခံထားရတဲ့ စစ်သားတွေဟာ ငယ်စဉ်ကတည်းက လက်မရွံ့တပ်သားတွေ ဖြစ်လာအောင် လေ့ကျင့်ပျိုးထောင်ခံခဲ့ကြရပါတယ်။ ဒါပေမဲ့ အချိန်ကြာလာလို့ သူတို့ အသက်ကြီးလာတဲ့အခါ ကာနယ်မက်ကမ်က မျိုးရိုးဗီဇပြုပြင်ပြီး မွေးထုတ်ထားတဲ့ စက်ရုပ်ဆန်ဆန် စစ်သားသစ်တွေနဲ့ အစားထိုးဖို့ လုပ်လာတယ်။ တပ်သားဟောင်းတွေထဲမှာ အထူးချွန်ဆုံးတစ်ယောက်ဖြစ်တဲ့ တော့ဒ်လည်း ဒီလိုအစားထိုးမှုအတွင်း စွန့်ပစ်ခံလိုက်ရပါတယ်။ သူရောက်သွားတဲ့ ဖုန်းဆိုးမြေမှာ နေထိုင်သူတွေက တော့ဒ်ကို စောင့်ရှောက်ပေးကြတယ်။ သူတို့နဲ့နေရင်း အမိန့်နာခံရတာထက် ပိုတဲ့အရာတွေ ဘဝမှာ ရှိသေးမှန်း တော့ဒ် သိလာရပါတယ်။ ဒါပေမဲ့ တပ်စုက မျိုးရိုးဗီဇပြုပြင်ထားတဲ့ တပ်သားသစ်တွေကို စမ်းသပ်ဖို့ အဲဒီစွန့်ပစ်မြေကိုပဲ ရွေးလိုက်တဲ့အခါ သူ့ကို စောင့်ရှောက်ခဲ့သူတွေ အန္တရာယ်နဲ့ ရင်ဆိုင်လာရတယ်။ သူတို့ကို ကာကွယ်ဖို့ တော့ဒ်တစ်ယောက် တပ်တစ်တပ်လုံးကို ပြန်ရင်ဆိုင်ရတဲ့ ၁၉၉၈ ခုနှစ်ထွက် သိပ္ပံစိတ်ကူးယဉ် အက်ရှင်ကားပါ။

ဒေါလ်တန်ဟာ လုံခြုံရေးအလုပ်မှာ အရည်အချင်းရှိသူတစ်ယောက်ဖြစ်လို့ မစ်ဆိုရီက ဒါဘယ်ဒုစ်ဆိုတဲ့ ဘားမှာ အလုပ်လုပ်ဖို့ ကမ်းလှမ်းခံရပါတယ်။ ဒီဘားက အရက်သမားတွေ၊ လူဆိုးတွေ ရမ်းကားနေတဲ့ နေရာတင်မကဘဲ မြို့ကို လက်ဝါးကြီးအုပ်ထားတဲ့ ဘရတ်ဝက်စ်လေနဲ့ သူ့လူတွေပါ ထင်သလို သောင်းကျန်းနေတဲ့နေရာ ဖြစ်နေတယ်။ ဒေါလ်တန်က သူတို့ကို ဘားထဲကနေ ရှင်းထုတ်လိုက်တဲ့အခါ ဘရတ်ကလည်း သူ့စီးပွားရေးကို ကာကွယ်ဖို့ နည်းမျိုးစုံနဲ့ ပြန်အနိုင်ကျင့်လာပါတယ်။ မြို့သားတွေကတော့ ဘရတ်ရဲ့အောက်မှာ နေရပြီး သူမထင်ရင် မထင်သလို နှိပ်စက်ခံနေရတာကြောင့် ပြန်မတော်လှန်ရဲကြဘူး။ အဲဒီအခြေအနေမှာ ဒေါလ်တန်တစ်ယောက်တည်း ဘရတ်ကို ရင်ဆိုင်ရတော့တယ်။ သူက ဘရတ်ကို အနိုင်ယူပြီး မြို့သားတွေကို ကယ်တင်နိုင်မလား၊ ဒါမှမဟုတ် ရှုံးနိမ့်ပြီး မြို့ကနေ ထွက်သွားရမလား။

Future Cops က Terminator ဆန်တဲ့ ပုံစံထဲမှာ Dragon Balls၊ Street Fighters နဲ့ Fantastic Four ထဲက Reed Richards၊ Hulk တို့လို ဇာတ်ကောင်ပုံစံတွေကို ရောစပ်ကာ ပေါက်ကရဟာသတွေ ထည့်ရိုက်ထားတဲ့ အက်ရှင်သိပ္ပံစိတ်ကူးယဉ်ကားပါ။ သရုပ်ဆောင်တွေထဲမှာ အန်ဒီလောင်၊ အာရွန်ကော့နဲ့ ဂျက်ကီချောင်တို့ ပါဝင်ပြီး လီယွန်လိုင်ကိုတော့ နာမည်နဲ့ပဲ ထည့်သွင်းထားပါတယ်။ သူတို့အပြင် Simon Yam၊ ငါးကလေးမင်းသားလို့ လူသိများတဲ့ Dicky Cheung၊ သိုင်းကားပရိသတ်တွေနဲ့ ရင်းနှီးတဲ့ Ekin Cheng၊ Chingmy Yau နဲ့ Charlie Yeung တို့လည်း ပါဝင်ထားကြတယ်။ ဟောင်ကောင်သရုပ်ဆောင်တွေ အများအပြားကို တစ်ကားတည်းမှာ စုမြင်ရမှာပါ။ ဒါရိုက်တာကတော့ ဝမ်ကျင်းဖြစ်ပြီး စတီဖင်ချောင်ရဲ့ ဇာတ်ကားအတော်များများကိုလည်း ရိုက်ကူးဖူးသူပါ။ ဒီကားမှာလည်း အလွဲအချော်တွေ၊ ဗရုတ်ကျတဲ့ အပြုအမူတွေကို ရှေ့တန်းတင်ထားပြီး ဇာတ်ကောင်ပုံစံအမျိုးမျိုးကို ဟာသအဖြစ် ရောနှောအသုံးပြုထားပါတယ်။

အေးအေးချမ်းချမ်း နေလာကြတဲ့ သဲကန္တာရထဲက ကျေးရွာလေးတစ်ရွာဆီ ဗီဇပြောင်းသားရဲတွေ ရောက်လာရာက ဇာတ်လမ်းစပါတယ်။ ရွာမှာ နေသူအများစုက မုဆိုးအလုပ်နဲ့ အသက်မွေးကြသူတွေပါ။ သားရဲတွေ ရောက်လာတဲ့နောက် ရွာသူရွာသားတွေ ထူးဆန်းတဲ့ ရောဂါတစ်မျိုး ခံစားလာရပြီး တစ်ယောက်ပြီးတစ်ယောက် အသက်ဆုံးရှုံးလာကြတယ်။ အဲဒီအခါ ယင်းဇီဆိုတဲ့ မိန်းမပျိုလေးက မုဆိုးအပေါင်းအပါတွေနဲ့အတူ ရွာကိုကယ်ဖို့ မူလဗီဇပြောင်းဖြေဆေးရည် ရှာပုံတော်ထွက်လာပါတယ်။ ဒါပေမယ့် လိုချင်တဲ့ ဖြေဆေးရည်ကို ရဖို့ဆိုရင် ဗီဇပြောင်းသားရဲတွေရဲ့ ခေါင်းဆောင် မိခင်သားရဲကြီးကို ဖမ်းရမယ့် အခြေအနေနဲ့ ကြုံလာရတယ်။ အသံကြားနိုင်စွမ်းနဲ့ အနံ့ခံနိုင်စွမ်း ကောင်းလှတဲ့ သားရဲတွေကို သူတို့အဖွဲ့ ရင်ဆိုင်နိုင်ပါ့မလား၊ ရောဂါဘေးကျနေတဲ့ ရွာကိုရော ကယ်တင်နိုင်ပါ့မလား။

ငယ်ငယ်ကတည်းက လူဆိုးတစ်ယောက်ရဲ့ လက်သပ်မွေးတာကို ခံခဲ့ရတဲ့ မိဘမဲ့ကလေးသုံးယောက်ဟာ ကြီးလာတော့ နာမည်ကျော်သူခိုးတွေ ဖြစ်လာကြပါတယ်။ သူတို့ပစ်မှတ်ထားတာက ဈေးကြီးတဲ့ အနုပညာပစ္စည်းတွေပါ။ လတ်စလီချောင် သရုပ်ဆောင်တဲ့သူက စွန့်စားလုပ်တတ်ပြီး ချောင်ယွန်ဖတ် သရုပ်ဆောင်တဲ့သူကတော့ စွန့်စားရဲသလို ဉာဏ်လည်းကောင်းတယ်။ သူတို့နှစ်ယောက်နဲ့အတူ အမျိုးသမီးတစ်ယောက်ပါဝင်တဲ့ သုံးယောက်အဖွဲ့နဲ့ ဇာတ်လမ်းကို ဆက်ထားပါတယ်။ တစ်နေ့မှာ ခိုးယူဖို့ အတော်ခက်တဲ့ ပန်းချီကားတစ်ချပ်ကို သွားခိုးရင်း ချောင်ယွန်ဖတ်ရဲ့ဇာတ်ကောင်ဟာ မသန်စွမ်းဖြစ်သွားတယ်။ အဲဒီနောက် သူတို့ကို မွေးစားခဲ့တဲ့ဖခင်နဲ့ အတိုက်အခံဖြစ်လာကြပြီး အမှန်နဲ့အမှားကြားမှာ ရွေးချယ်လျှောက်လှမ်းကြရပါတယ်။ ဂျွန်ဝူးရိုက်ကူးထားတဲ့ ဒီကားမှာ သူနဲ့ လက်တွဲလာခဲ့တဲ့ ချောင်ယွန်ဖတ်နဲ့ လတ်စလီချောင်တို့ ပါဝင်ထားပါတယ်။ Heroic Bloodshed ဟန်တွေ ပါသလို ဟာသလည်း ရောထားတာကြောင့် ဂျွန်ဝူးရဲ့ တခြားဟောင်ကောင်အက်ရှင်ကားတွေနဲ့ အနည်းငယ်ကွဲပြားပါတယ်။ ချောင်ယွန်ဖတ်ရဲ့ဇာတ်ကောင်က တိုက်ခိုက်နေရင်း ဟာသပြောတာ၊ ရယ်စရာလုပ်တာတွေလည်း ပါဝင်ပါတယ်။

Naruto ဟာ Raikage ကို လုပ်ကြံဖို့ ကြိုးစားခဲ့တယ်ဆိုတဲ့အမှုနဲ့ ထောင်ကျသွားပါတယ်။ သူရောက်သွားတဲ့နေရာက ရွာပေါင်းစုံက အဆိုးဆုံးနင်ဂျာတွေကို ဖမ်းဆီးထားတဲ့ ထောင်ပါ။ ဒါပေမယ့် အဲဒီထောင်ထဲမှာ ထောင်သားတွေအပြင် လျှို့ဝှက်ချက်ကြီးတစ်ခုပါ ရှိနေပြီး Naruto လည်း အဲဒီကိစ္စထဲ ပါဝင်ပတ်သက်မိလာပါတော့တယ်။ စကားပြောနားချရာမှာ ကျွမ်းကျင်တဲ့ Naruto တစ်ယောက် ထောင်မှူးတွေကို နားချပြီး ထောင်ထဲက ပြန်ထွက်နိုင်ပါ့မလား။ အက်ရှင်နဲ့ စိတ်ကူးယဉ်အကြောင်းအရာတွေ ပါဝင်တဲ့ ဒီအန်နီမေးရှင်းကားဟာ Naruto Shippuden ရုပ်ရှင်တွေထဲက ပဉ္စမမြောက်ကားဖြစ်ပါတယ်။ Naruto ဟာ ၂၀၀၀ ပြည့်နှစ်ဝန်းကျင်မှာ One Piece၊ Bleach တို့နဲ့အတူ လူသိများခဲ့တဲ့ အန်နီမေးတစ်ခုပါ။ လက်မလျှော့ဖို့ အားပေးတဲ့ စကားတွေနဲ့ နင်ဂျာလမ်းစဉ်အပေါ် ယုံကြည်ချက်တွေက ပရိသတ်တွေကြား ရေပန်းစားခဲ့ပါတယ်။ ရုပ်ရှင်တွေအနေနဲ့ ငယ်စဉ်ဘဝအကြောင်း သုံးကားနဲ့ လူငယ်ဘဝကို ဆက်ပြတဲ့ Shippuden ခုနစ်ကား ထွက်ရှိထားပါတယ်။

ရှေးဟောင်းလူမျိုးစုတစ်ခုဖြစ်တဲ့ Dark Elves တွေ ပြန်လည်နိုးထလာချိန်မှာ စကြဝဠာအတွက် အန္တရာယ်တစ်ခု ပေါ်လာပါတယ်။ သူတို့ရဲ့ခေါင်းဆောင် Malekith က Aether လို့ခေါ်တဲ့ Reality Stone ကို အသုံးပြုပြီး စကြဝဠာတစ်ခုလုံးကို အမှောင်ထုနဲ့ ဖုံးလွှမ်းဖို့ ကြံစည်နေတာပါ။ သောဟာ ဒီအန္တရာယ်ကို တားဆီးဖို့ သူ့ညီ လိုကီနဲ့ ပူးပေါင်းပြီး စစ်ပွဲကို ရင်ဆိုင်ဖို့ ပြင်ဆင်ရပါတော့တယ်။ သောနဲ့ လိုကီတို့ရဲ့ ဆက်ဆံရေးကို ဗဟိုပြုပြီး ဆက်ပြောထားတဲ့ ဒီဇာတ်ကားဟာ MCU Phase 2 ရဲ့ ဒုတိယမြောက်ကားပါ။ သောရဲ့အကြောင်းကို ဆက်လက်တင်ဆက်ရင်း Infinity Stones နဲ့ စကြဝဠာကို ခြိမ်းခြောက်လာတဲ့ အန္တရာယ်တွေကိုလည်း မိတ်ဆက်ထားပါတယ်။ ထုတ်လုပ်ရေးကုန်ကျစရိတ် ဒေါ်လာသန်း ၁၅၀ မှ ၂၇၂.၁ သန်းအတွင်း ရှိခဲ့ပြီး ရုံဝင်ငွေ ဒေါ်လာ ၆၄၄.၈ သန်း ရရှိခဲ့ပါတယ်။

ဆိုကိုဗီးယားစစ်ပွဲအပြီး နှစ်နှစ်အကြာမှာ သောဟာ မီးမိစ္ဆာဆာတာရဲ့ ဖမ်းဆီးတာကို ခံထားရပါတယ်။ ဆာတာက သောရဲ့ဖခင် အိုဒင်ဟာ အက်စ်ဂါ့တ်မှာ ကြာကြာနေရတော့မှာ မဟုတ်ကြောင်းနဲ့ အရာအားလုံးကို သူ့မီးလျှံတွေနဲ့ ဖျက်ဆီးပစ်မယ့်အကြောင်း ပြောလာတယ်။ သောကတော့ ဆာတာကို အနိုင်ယူပြီး အက်စ်ဂါ့တ်ကို ပြန်ရောက်လာခဲ့ပါတယ်။ အဲဒီနောက် မွေးစားညီအစ်ကို လိုကီရဲ့အကူအညီနဲ့ ဖခင်ကို ရှာဖွေရင်း ကမ္ဘာမြေပေါ်က နော်ဝေးမှာ ရှိနေကြောင်း သိလာရတယ်။ သူတို့နှစ်ယောက် လိုက်သွားပေမယ့် အိုဒင်ကတော့ မရှိတော့ပါဘူး။ တစ်ဖက်မှာလည်း နှစ်ပေါင်းများစွာ အကျဉ်းကျနေခဲ့တဲ့ အိုဒင်ရဲ့သမီးဦး ဟီလာ ပေါ်လာပြီး အက်စ်ဂါ့တ်အတွက် ရန်သူဖြစ်လာပါတယ်။ ဟီလာဟာ သောရဲ့လက်စွဲတော်တူကို ဖျက်ဆီးလိုက်သလို သောနဲ့ လိုကီကိုလည်း အာကာသထဲရောက်အောင် ပို့ပြီး အပြတ်ရှင်းဖို့ ကြိုးစားတယ်။ အက်စ်ဂါ့တ်ကို ရောက်သွားတဲ့အခါမှာတော့ စစ်တပ်တွေကို ဖျက်ဆီးပြီး အရင်က သူနဲ့အတူ တိုက်ခိုက်ခဲ့ဖူးတဲ့ သေဆုံးသူကို ပြန်ရှင်စေကာ လက်အောက်ခံအဖြစ် အသုံးချပါတော့တယ်။ သောတစ်ယောက် ဟီလာကို တားဆီးပြီး အက်စ်ဂါ့တ်ကို ကာကွယ်နိုင်ပါ့မလား။ ဒီကားဟာ ၂၀၁၁ နဲ့ ၂၀၁၃ ခုနှစ်တွေမှာ ထွက်ခဲ့တဲ့ Thor ဇာတ်ကားတွေရဲ့ တတိယမြောက်အဆက်ဖြစ်ပြီး တိုက်ကာ ဝိတ်တီက ရိုက်ကူးထားပါတယ်။ ခရစ္စဟမ်းစ်ဝေါ့သ်၊ အန်တိုနီဟော့ပ်ကင်းစ်၊ ဘန်နီဒစ်ကန်ဘာဘက်ချ်၊ ကိတ်ဘလန်ချက်နဲ့ ကန်လန်စီဘရောင်းတို့ ပါဝင်ထားပြီး သိပ္ပံစိတ်ကူးယဉ်၊ စွန့်စားခန်း၊ ဟာသနဲ့ အက်ရှင

Road to Ninja ဟာ Naruto Shippuden ရုပ်ရှင်တွေထဲက ဆဋ္ဌမမြောက်ကားပါ။ Naruto ဟာ One Piece၊ Bleach တို့နဲ့အတူ ၂၀၀၀ ပြည့်နှစ်ဝန်းကျင်က လူသိများခဲ့တဲ့ အန်နီမေးသုံးခုထဲမှာ ပါဝင်ပြီး အရှုံးမပေးဖို့ အားပေးတဲ့ စကားတွေနဲ့လည်း ပရိသတ်တွေကြား ရင်းနှီးခဲ့ပါတယ်။ ရုပ်ရှင်တွေအနေနဲ့ Naruto ရဲ့ ကလေးဘဝအကြောင်း သုံးကားနဲ့ Shippuden လူငယ်ဘဝအကြောင်း ခုနစ်ကား ထွက်ရှိထားပါတယ်။ ဒီဇာတ်လမ်းမှာတော့ Konoha ရွာကို Akatsuki ကြေးစားအဖွဲ့က ဝင်တိုက်ခိုက်လာတယ်။ ထူးဆန်းတာက Naruto တို့ သုတ်သင်ခဲ့ပြီးသား အဖွဲ့ဝင်ဟောင်းတွေပါ ပြန်ပေါ်လာတာပါ။ Naruto တို့ ပြန်လည်ခုခံလိုက်တဲ့အတွက် Akatsuki အဖွဲ့ ထွက်သွားပေမယ့် ညဘက် Naruto နဲ့ Sakura နှစ်ယောက်တည်း ရှိနေချိန်မှာ Madara ပေါ်လာပါတယ်။ Madara က သူတို့ကို တခြားကမ္ဘာဆီ ပို့လိုက်တယ်။ အဲဒီမှာတော့ သေဆုံးခဲ့သူတွေ အသက်ရှင်နေကြပြီး Naruto ရဲ့ မိဘတွေလည်း ရှိနေဆဲပါ။ မိဘတွေနဲ့အတူ ရှိခွင့်ရချိန်မှာ Naruto ခံစားရတဲ့ စိတ်ခံစားချက်တွေကိုလည်း ဇာတ်လမ်းထဲမှာ ဖော်ပြထားပါတယ်။

အမ်အိုင်ဘီက ဂြိုဟ်သားတွေရဲ့ရန်ကို ကာကွယ်ဖို့ ဖွဲ့စည်းထားတဲ့ လျှို့ဝှက်အဖွဲ့ပါ။ လူတွေရဲ့ မှတ်ဉာဏ်ကို ဖျောက်ပစ်နိုင်တဲ့ ကင်မရာလို ကိရိယာတွေကိုလည်း အသုံးပြုကြတယ်။ ဒီအဖွဲ့ထဲက အေးဂျင့်အိတ်ချ်ဟာ အတော်ဆုံးအေးဂျင့်တွေထဲက တစ်ယောက်ဖြစ်ပြီး ကမ္ဘာကြီးကို ကယ်တင်ခဲ့ဖူးသူပါ။ အေးဂျင့်အမ်ကတော့ အမ်အိုင်ဘီကို မတွေ့တွေ့အောင် ရှာဖွေခဲ့ပြီး အဖွဲ့ဝင်ဖြစ်ဖို့ အစမ်းခန့်ကာလကို ဖြတ်သန်းနေသူ ဖြစ်ပါတယ်။ အိတ်ချ်နဲ့ အမ်တို့နှစ်ယောက် တွဲပြီး တာဝန်တစ်ခုကို ထမ်းဆောင်ကြရတယ်။ အစမှာ အရေးသိပ်မကြီးဘူးလို့ ထင်ရတဲ့ အဲဒီတာဝန်က ရုတ်တရက် ကမ္ဘာကြီးပျက်စီးနိုင်တဲ့ အန္တရာယ်အဖြစ် ပြောင်းလဲသွားပါတော့တယ်။

ရဲတပ်သားသစ် တက်ခ် တာဝန်ကျနေတဲ့နေရာအနီးက ကုန်တိုက်တစ်ခုကို ယာကူဇာတွေ ဓားပြဝင်တိုက်ခဲ့ပါတယ်။ အဲဒီဓားပြမှုမှာ မိန်းကလေးသုံးယောက်နဲ့ ဝန်ထမ်းအမျိုးသမီးတစ်ယောက် အသတ်ခံလိုက်ရတယ်။ အဲဒီနောက် တက်ခ်က ကျူးလွန်သွားတဲ့ ယာကူဇာတွေနောက်ကို လိုက်ပြီး လက်စားချေဖို့ ကြိုးစားလာပါတယ်။ တစ်ဖက်မှာလည်း အင်အားကြီး ယာကူဇာဂိုဏ်းတစ်ခုကို ဖြိုချဖို့ သူ့ကို အသွင်ယူရဲအဖြစ် တာဝန်ပေးလိုက်တယ်။ ဒီလိုနဲ့ လက်စားချေဖို့ လိုက်နေတဲ့ တက်ခ်ဟာ ယာကူဇာဂိုဏ်းထဲကို အသွင်ယူဝင်ရောက်လာပါတော့တယ်။