Animation

မီယာဟာ မိဘနှစ်ပါးလုံး မရှိတော့တဲ့ ၁၂ နှစ်အရွယ် လူသားကောင်မလေးပါ။ အဖေထားခဲ့တဲ့ မှော်ကာတွန်းစာအုပ်လေးကနေတစ်ဆင့် Unicorn တွေနဲ့ Elf တွေ နေထိုင်တဲ့ Centopia ကမ္ဘာဆီ အသွားအပြန် လုပ်နိုင်သူလည်း ဖြစ်ပါတယ်။ ဒီတစ်ခါမှာတော့ Centopia ကို မကောင်းဆိုးဝါး ဖားပြုတ်ကြီးရဲ့လက်ထဲက ကယ်တင်ဖို့ မီယာနဲ့ အဲဒီကမ္ဘာက သူငယ်ချင်းတွေ ပူးပေါင်းကြရပါတယ်။ Mia and Me ကာတွန်းစီးရီးကို ရုပ်ရှင်အဖြစ် ပြန်လည်ဖန်တီးထားတဲ့ ၂၀၂၂ ခုနှစ်ထွက် ကာတွန်းစွန့်စားခန်းဖြစ်ပြီး Centopia ကမ္ဘာကို အရောင်အသွေးစုံစုံလင်လင်နဲ့ ပုံဖော်ထားပါတယ်။

အက်ဘီနီဇာ စကရုချ်ဟာ ခရစ်စမတ်ကို မုန်းတီးပြီး ပျော်ပွဲရွှင်ပွဲတွေကိုလည်း ကြည့်မရတဲ့ လူ့ဂွစာကြီးတစ်ယောက်ပါ။ လောဘကြီးသလောက် အကြင်နာတရားလည်း ခေါင်းပါးတဲ့သူဖြစ်ပါတယ်။ ဒါပေမဲ့ ဒီနှစ် ခရစ်စမတ်မရောက်ခင် မနက်ခင်းတစ်ခုမှာ သူ့ဆီကို ဧည့်သည်သုံးယောက် ရောက်လာကြတယ်။ အဲဒီဧည့်သည်တွေကြောင့် စကရုချ်ရဲ့ဘဝ ဘယ်လိုပြောင်းလဲသွားမလဲဆိုတာကို ပြောပြထားတဲ့ ၂၀၂၂ ခုနှစ်ထွက် ခရစ်စမတ်အန်နီမေးရှင်းပါ။

ဇီဆိုတဲ့ ပုရွက်ဆိတ်လေးက သူ့ကိုလိုနီထဲက တခြားပုရွက်ဆိတ်တွေနဲ့ အတွေးအမြင်မတူသူပါ။ လက်ရှိနေရတဲ့နေရာမှာ မပျော်ဘဲ တခြားနေရာသစ်တစ်ခု ရှိလိမ့်မယ်လို့ ယုံကြည်နေတယ်။ သူငယ်ချင်းတွေနဲ့ စကားပြောရင်လည်း ဒီနေရာက သူနဲ့မကိုက်တဲ့အကြောင်း ညည်းတွားနေတတ်ပါတယ်။ တစ်နေ့ ဘယ်လာဆိုတဲ့ ပုရွက်ဆိတ်မင်းသမီးလေးနဲ့ တွေ့ဆုံပြီးနောက် ဇီရဲ့ဘဝ ပြောင်းလဲလာတယ်။ သူချစ်တဲ့ မင်းသမီးလေးနဲ့ နီးစပ်ဖို့ ဘယ်လိုကြိုးစားမလဲ၊ လမ်းမှာကြုံလာတဲ့ ပြဿနာတွေကို ရင်ဆိုင်နိုင်ပါ့မလား၊ သူတို့နှစ်ယောက် နီးစပ်ခွင့်ရပါ့မလားဆိုတာကို ဇာတ်လမ်းက ဆက်ပြထားပါတယ်။ ၁၉၉၀ ပြည့်နှစ်များက ထွက်ရှိခဲ့တဲ့ ဒီအန်နီမေးရှင်းကို Tim Johnson နဲ့ Eric Darnell တို့ ပူးတွဲရိုက်ကူးထားပြီး Sylvester Stallone နဲ့ Jennifer Lopez တို့ အသံသရုပ်ဆောင်အဖြစ် ပါဝင်ထားပါတယ်။

အမေဇုန်တောအုပ်ထဲက ရွာလေးတစ်ရွာမှာ နေတဲ့ အင်ဘိုဟာ အသက်ဆယ့်သုံးနှစ်ပဲ ရှိသေးပေမယ့် တစ်နေ့မှာ အတော်ဆုံးမုဆိုး ဖြစ်ချင်နေတဲ့ ကလေးမလေးပါ။ မိဘတွေ မရှိတော့သလို သူတို့ဘယ်သူတွေလဲဆိုတာကိုလည်း မသိခဲ့ရဘူး။ ရွာသူကြီးလင်မယားက သူ့ကိုမွေးစားထားပြီး သူတို့ရဲ့သမီးအရင်း ဇူမီနဲ့လည်း ညီအစ်မလို ခင်မင်နေကြပါတယ်။ တစ်နေ့မှာတော့ ရွာလေးကို ကျိန်စာတစ်ခု ကျရောက်လာပြီး ရွာသားအားလုံး ဒုက္ခရောက်လာကြတယ်။ အင်ဘိုက သူချစ်တဲ့သူတွေနဲ့ ရွာကို ကယ်တင်ဖို့ ကျိန်စာဖြေနည်းကို ရှာရသလို ဘယ်သူကျိန်စာတိုက်ခဲ့တာလဲဆိုတာကိုလည်း စုံစမ်းရပါတော့တယ်။ သူ့ရဲ့စွန့်စားခန်းကို အရောင်အသွေးစုံစုံနဲ့ တင်ဆက်ထားတဲ့ ကာတွန်းဖြစ်ပြီး ချစ်စရာတိရစ္ဆာန်လေးတွေလည်း ပါဝင်ပါတယ်။

အင်းဆက်တွေကြားမှာ တချို့က ပျော်ပျော်ရွှင်ရွှင်နေရပြီး တချို့က ချောင်ထဲမှာ နေရတာ၊ အမှိုက်သိမ်းနေရတာတွေကို ကျိုင်းကောင် Red က မကျေနပ်ပါဘူး။ ဒီမညီမျှမှုတွေကို ပြောင်းလဲချင်ပေမယ့် တရားမျှတမှုရဖို့ နည်းလမ်းမှားကို ရွေးထားတဲ့ ရာဇဝတ်ကောင်တစ်ယောက် ဖြစ်နေပါတယ်။ စုံထောက် Sun က Red ရဲ့ကျိုင်းအုပ်ကို နှိမ်နင်းဖမ်းဆီးရာမှာ စက်ရုံကြီးတစ်ခုလုံး ပေါက်ကွဲသွားတာကြောင့် ရာထူးတိုးရမယ့်အစား အလုပ်ကနေ နားခံလိုက်ရတယ်။ စိတ်ညစ်နေတဲ့ Sun က New York ကို အပန်းဖြေခရီးထွက်ဖို့ လုပ်ပေမယ့် သူ့နောက် တကောက်ကောက်လိုက်နေတဲ့ ပရိသတ်တစ်ယောက် ဝင်ရှုပ်လို့ လေယာဉ်လွတ်သွားပါတယ်။ နောက်တော့ သူငယ်ချင်းတစ်ယောက်ရဲ့ အကူအညီနဲ့ San Francisco သွားမယ့် လေယာဉ်ကို တက်ခွင့်ရသွားတယ်။ အဲဒီလေယာဉ်ပေါ်မှာ လက်သည်မပေါ်တဲ့ လူသတ်မှုတစ်ခု ဖြစ်လာတော့ Sun အတွက် နာမည်ကောင်းပြန်ရနိုင်မယ့် အခွင့်အရေး ပေါ်လာပါတယ်။ ဒါပေမယ့် သေဆုံးသူက Red ရဲ့ သိပ္ပံပညာရှင်ဟောင်းဖြစ်နေပြီး သံသယရှိသူတွေလည်း များနေတာကြောင့် အမှုက ထင်သလောက် မရိုးရှင်းပါဘူး။ လေယာဉ်ပေါ် ခိုးလိုက်လာသူတွေထဲမှာ Sun ကို လေးစားတဲ့ စုံထောက်ဝါသနာရှင် ပင့်ကူမလေးအပြင် အန္တရာယ်ရှိတဲ့ အင်းဆက်တွေလည်း ပါနေသေးတယ်။ Sun ရင်ဆိုင်ရတဲ့ ဒီအမှုကို ဟာသဇာတ်ဝင်ခန်းတွေနဲ့ အလှည့်အပြောင်းတွေကြားကနေ စုံစမ်းဖော်ထုတ်သွားရမှာပါ။

Short Peace ဟာ Studio Sunrise ရဲ့ အန်နီမေးရှင်းဇာတ်လမ်းတို လေးပုဒ်ကို စုစည်းထားတဲ့ ဇာတ်ကားပါ။ အဲဒီထဲက သုံးပုဒ်က ဂျပန်ရှေးဟောင်းပုံပြင်တွေကို အခြေခံထားပြီး နောက်ဆုံးတစ်ပုဒ်ကတော့ ကမ္ဘာပျက်ခေတ်မှာ ဖြစ်ပွားတဲ့ စစ်ပွဲအကြောင်း ဖြစ်ပါတယ်။ ရှေးဟောင်းပုံပြင်သုံးပုဒ်က ဆုခုမိုဂါမိ (ရှေးပစ္စည်းဝိညာဉ်)၊ ဟိနော့ယောဂျင်း (မီးသတိပေး) နဲ့ ဂမ်ဘိုတို့ပါ။ ဇာတ်လမ်းတစ်ပုဒ်ချင်းစီမှာ အန်နီမေးရှင်းပုံဖော်ဟန် မတူကြလို့ ဒဏ္ဍာရီပုံပြင်တွေကနေ စစ်ပွဲဇာတ်လမ်းအထိ ကွဲပြားတဲ့ ရုပ်ပုံဟန်တွေနဲ့ ကြည့်ရမှာပါ။

Rango ဆိုတဲ့ ပုတ်သင်လေးဟာ သူရဲကောင်းဖြစ်ချင်တဲ့ စိတ်ကူးယဉ်သမားတစ်ကောင်ပါ။ သူရဲကောင်းတစ်ယောက်လို မင်းသမီးလေးကို ကယ်တင်ရဖို့က သူ့ရဲ့အကြီးမားဆုံး မျှော်လင့်ချက်ပေါ့။ တစ်နေ့မှာတော့ မမျှော်လင့်တဲ့ ဖြစ်ရပ်တစ်ခုကြောင့် သဲကန္တာရထဲ သောင်တင်သွားပြီး ရေပြတ်လပ်နေတဲ့ မြို့ငယ်လေးတစ်မြို့ကို ရောက်လာတယ်။ တကယ်တမ်း အစွမ်းအစမရှိသေးပေမယ့် အပြောကောင်းတဲ့ Rango ဟာ မြို့ခံတွေ အထင်ကြီးယုံကြည်လာအောင် လုပ်နိုင်ခဲ့ပါတယ်။ မြို့ကို ဒုက္ခပေးနေတဲ့ ငှက်ကြီးကိုလည်း အလွဲလွဲအချော်ချော်နဲ့ ရှင်းပစ်နိုင်သွားတော့ မြို့ခံတွေက သူ့ကို ပိုပြီး အထင်ကြီးလာကြတယ်။ သူတို့မြို့ရဲ့ဒုက္ခတွေကို ဖြေရှင်းပေးနိုင်မယ့် သူရဲကောင်းအဖြစ်ပါ အားကိုးလာကြတော့တာပါ။ ဒီလိုနဲ့ Rango ဟာ လိုချင်ခဲ့တဲ့ သူရဲကောင်းအမည်ကို ရလာပေမယ့် အဲဒီနာမည်နဲ့ထိုက်တန်အောင် ကြိုးစားရာမှာ ပြဿနာတွေ တစ်ခုပြီးတစ်ခု ကြုံလာရတယ်။ သူရဲကောင်းဟန်ဆောင်နေမှန်း မြို့ခံတွေ သိသွားရင် ဘယ်လိုဖြစ်မလဲ၊ သူကိုယ်တိုင်ကရော သူရဲကောင်းဆိုတဲ့ အဓိပ္ပာယ်ကို နားလည်လာနိုင်မလားဆိုတာ သူ့ရှေ့မှာ ရှိနေပါတယ်။

Despicable Me ထဲက မီနီယံလေးတွေကို သီးသန့်အဓိကထားတဲ့ ဟာသကာတွန်းဇာတ်လမ်းတိုတွေ စုစည်းထားတာပါ။ Minion and Puppy လို အရင်ကရှိခဲ့တဲ့ ဇာတ်လမ်းတွေအပြင် ဇာတ်လမ်းအသစ်တွေလည်း ပါဝင်ပြီး မီနီယံလေးတွေရဲ့ ရယ်စရာအဖြစ်အပျက်မျိုးစုံကို ဇာတ်လမ်းတိုတစ်ပုဒ်ချင်းစီနဲ့ ပြောပြထားပါတယ်။

ကာရာဇောအဲလ်လို့ခေါ်တဲ့ စူပါဂဲလ်ဟာ ခရစ်ပတွန်ဂြိုဟ် ပျက်စီးသွားပြီးနောက် ကမ္ဘာဂြိုဟ်ဆီ ရောက်လာပါတယ်။ ဒါပေမယ့် အိမ်အသစ်၊ ဂြိုဟ်အသစ်မှာ အသားမကျနိုင်သေးဘဲ မိခင်နဲ့ မွေးရပ်ဂြိုဟ်ကို လွမ်းနေတာကြောင့် မပျော်ရွှင်နိုင်ဘူး။ သူ့စွမ်းအားတွေကိုလည်း ကောင်းကောင်းမထိန်းနိုင်သေးတော့ ကမ္ဘာသားတွေရဲ့ အိုးအိမ်တွေ ပျက်စီးကုန်ပြီး သူ့ကို မကြည်ဖြူသူတွေ ရှိလာတယ်။ ဒါကြောင့် ကမ္ဘာကနေ ထွက်သွားဖို့တောင် စဉ်းစားနေပါတယ်။ အဲဒီအချိန်မှာ ဝမ်းကွဲအစ်ကို စူပါမန်းက သူ့ကို အချိန်စက်လုံးနဲ့ ၃၁ ရာစုက ကမ္ဘာဂြိုဟ်ဆီ ခေါ်သွားတယ်။ လီဂျင်တပ်လို့ခေါ်တဲ့ စူပါဟီးရိုးအဖွဲ့အစည်းရဲ့ အကယ်ဒမီမှာ စွမ်းအားတွေကို ထိန်းချုပ်တတ်လာအောင် လေ့ကျင့်ဖို့ပါ။ အဲဒီမှာ သူနဲ့ရွယ်တူ လူငယ်ဟီးရိုးတွေကို တွေ့ရပြီး အဆင်ပြေမယ်ကြံကာမှ ပြဿနာအသစ်တစ်ခု ပေါ်လာပါတယ်။ သူတို့ရဲ့အစွမ်းနဲ့ မမျှလောက်အောင် ဉာဏ်များတဲ့ ဗီလိန်အဖွဲ့တစ်ဖွဲ့က လီဂျင်တပ်ဆီက ပစ္စည်းတစ်ခုကို ခိုးယူပြီး ဆိုးဝါးတဲ့အစီအစဉ်တစ်ခုကို အကောင်အထည်ဖော်လာတယ်။ စူပါဂဲလ်နဲ့ လူငယ်ဟီးရိုးတစ်သိုက်လည်း အဲဒီအဖွဲ့ကို တားဆီးဖို့ ကြိုးစားကြရပါတော့တယ်။

လမ်းပျောက်နေတဲ့ ကောင်လေးတစ်ယောက်ဟာ ကိတ်မုန့်ကြိုက်တဲ့ ပွေးတစ်ကောင်နဲ့ ဆုံမိပါတယ်။ အဲဒီနောက် စကားနည်းတဲ့ မြေခွေးတစ်ကောင်၊ ဆွတ်ဆွတ်ဖြူတဲ့ မြင်းတစ်ကောင်တို့နဲ့ပါ တွေ့ဆုံကြပြီး ကောင်လေးလိုချင်တဲ့ အိမ်ကို အတူလိုက်ရှာပေးကြတယ်။ ဇာတ်ကောင်လေးယောက်နဲ့ ပြောပြထားတဲ့ ၃၄ မိနစ်ကြာ မိသားစုကြည့် ကာတွန်းဇာတ်လမ်းတိုလေးပါ။ သူတို့ရဲ့စကားဝိုင်းထဲမှာ “မင်းပြောဖူးသမျှထဲ အရဲရင့်ဆုံးစကားက ဘာလဲ” ဆိုတဲ့ မေးခွန်းအတွက် အဖြေက “ကူညီပါ” တဲ့။ ကိုယ်တစ်ယောက်တည်း မလုပ်နိုင်တဲ့အခါ အကူအညီတောင်းတာဟာ အရှုံးပေးတာမဟုတ်ဘူးဆိုတဲ့ အတွေးကို ဒီစကားလေးကနေ ပြောထားပါတယ်။ ရှက်စိတ်၊ မာနတွေနဲ့ အကူအညီမတောင်းဘဲ ပေတေနေမိတာကိုလည်း ပြန်တွေးမိစေတယ်။ လမ်းပျောက်တယ်ဆိုတာ ထိုင်နေမိလို့ပဲ ဖြစ်တာမဟုတ်ပါဘူး။ မရပ်မနား ရှေ့ဆက်ကြိုးစားနေရင်းနဲ့လည်း လမ်းပျောက်နိုင်တယ်။ ကိုယ်လမ်းပျောက်နေမှန်း ကိုယ်သိဖို့ဆိုတဲ့ အတွေးကိုလည်း ကောင်လေးနဲ့ အဖော်သုံးယောက်ရဲ့ အိမ်ရှာခရီးနဲ့အတူ တွေးကြည့်နိုင်ပါတယ်။

Naruto ဟာ ၂၀၀၀ ခုနှစ်ဝန်းကျင်က One Piece၊ Bleach တို့နဲ့အတူ လူကြိုက်များခဲ့တဲ့ အန်နီမေးတစ်ခုပါ။ လက်မလျှော့ဖို့ အားပေးတဲ့ စကားတွေနဲ့ ဇာတ်ကောင်ရဲ့ လက်သုံးစကားတွေကို ပရိသတ်တွေ လိုက်ပြောကြတဲ့အထိ လူသိများခဲ့တယ်။ ဒီကားကတော့ Shippuden ရုပ်ရှင်တွေထဲက ပထမဆုံးကား ဖြစ်ပါတယ်။ Demon Country မှာ အနာဂတ်ကို ကြိုမြင်နိုင်တဲ့ နတ်ဆရာမတစ်ယောက် ရှိပါတယ်။ တစ်နေ့မှာ မသမာသူတွေကြောင့် ချိတ်ပိတ်ချုပ်နှောင်ထားတဲ့ မိစ္ဆာဘုရင် လွတ်မြောက်လာပြီး ကမ္ဘာကို အုပ်စိုးဖို့ လုပ်ဆောင်လာတယ်။ သူ့ကို တားဆီးနိုင်သူက နတ်ဆရာမတစ်ယောက်ပဲ ရှိတာကြောင့် နတ်ဆရာမကို ကာကွယ်ပေးဖို့ Naruto တို့ တာဝန်ယူရပါတယ်။ ဒါပေမယ့် နတ်ဆရာမက Naruto သေရတော့မယ်လို့ ဟောလိုက်တဲ့အခါ သူ့အတွက် ရင်ဆိုင်ရမယ့်အရာက မိစ္ဆာဘုရင်ရဲ့ အန္တရာယ်တစ်ခုတည်း မဟုတ်တော့ဘူး။ နတ်ဆရာမရဲ့ ဟောကိန်းတွေက အမြဲတမ်း မှန်နေမှာလား၊ Naruto ကရော ဟောကိန်းအတိုင်း တကယ်သေဆုံးရတော့မှာလား။

ဖင်းလို့ခေါ်တဲ့ ကိုယ်ပျောက်ဝိဉာဉ်လေးတွေဟာ အိမ်တိုင်းမှာ ရှိနေပြီး လူတွေကို ကူညီပေးကြပါတယ်။ သူတို့နေတဲ့အိမ် သာယာပျော်ရွှင်နေအောင် စောင့်ရှောက်ဖို့က သူတို့တာဝန်ပါ။ ဖင်းတွေက အဲဒီတာဝန်ကို ဆန့်ကျင်ဖို့ စိတ်ကူးတောင် မရှိကြပေမယ့် ဖင်းနစ်ကတော့ ခြွင်းချက်ဖြစ်နေတယ်။ သူ့အိမ်မှာ လူတွေ ဆက်မနေနိုင်အောင် တစ်ခုပြီးတစ်ခု လုပ်နေတော့ ဘက်ခ်မြို့ကလူတွေက အဲဒီအိမ်ကို သရဲအိမ်လို့ ခေါ်ကြပါတယ်။ တစ်နေ့မှာ ရုပ်ရှင်ရိုက်ဖို့ မိသားစုတစ်စု ဘက်ခ်မြို့ကို ရောက်လာတယ်။ သူတို့ရဲ့သမီး ခရစ်စတင်းက စုံထောက်ပညာကို စိတ်ဝင်စားပြီး ဉာဏ်လည်းထက်တဲ့ ကလေးမလေးပါ။ ဒါရိုက်တာက သူတို့မိသားစု ခဏနေဖို့ ဖင်းနစ်ရဲ့အိမ်ကို ငှားပေးလိုက်ပါတယ်။ ဒီလိုနဲ့ လူတွေလာနေတာကို မကြိုက်တဲ့ ဖင်းနစ်နဲ့ ကိစ္စတစ်ခုကို လက်တွေ့ကျကျ ဖြေရှင်းရမှ ကျေနပ်တဲ့ ခရစ်စတင်းတို့ တစ်အိမ်တည်းမှာ ထိပ်တိုက်တွေ့ကြတော့တယ်။

မာရီယိုနဲ့ လူဝီးဂျီတို့ဟာ ဘရွတ်ကလင်းမှာ လူတွေ အထင်သေးတာကို ခံနေရတဲ့ ရေပိုက်ပြင်သမား ညီအစ်ကိုနှစ်ယောက်ပါ။ တစ်နေ့မှာ ရေပိုက်တစ်ခုကနေ မှော်တိုင်းပြည်ထဲကို ရောက်သွားကြပါတယ်။ အဲဒီမှော်လောကမှာတော့ လူဆိုးဘုရင် ဘောင်ဆာက စူပါကြယ်ကြီးကို ပိုင်ဆိုင်ထားပြီး တိုင်းပြည်အားလုံးကို သိမ်းပိုက်ဖို့ ကြံစည်နေတယ်။ ဘောင်ဆာဟာ မှိုတိုင်းပြည်က မင်းသမီးလေး မက်မွန်သီးကို ချစ်နေတဲ့အတွက် သူနဲ့အတူ ကမ္ဘာကို သိမ်းပိုက်ဖို့ လက်ထပ်ခွင့် လာတောင်းပါတယ်။ မင်းသမီးက လက်မခံရင်တော့ မှိုတိုင်းပြည်ကို ဖျက်ဆီးပစ်မှာပါ။ ဒါကိုသိတဲ့ မင်းသမီးဟာ မာရီယိုနဲ့ ပူးပေါင်းပြီး ဒန်းကီးကောင်တို့ရဲ့တိုင်းပြည်ဆီ စစ်ကူတောင်းဖို့ သွားကြပါတယ်။ စူပါမာရီယိုဂိမ်းကို ကာတွန်းရုပ်ရှင်အဖြစ် ဖန်တီးထားတာဖြစ်ပြီး ဂိမ်းတွေထဲက ဇာတ်ကောင်တွေ၊ လက်နက်တွေ၊ တီးလုံးတွေနဲ့ နေရာတွေကို ပြန်လည်အသုံးပြုထားပါတယ်။ မာရီယိုအဖြစ် ခရစ်ပရက်၊ မင်းသမီးအဖြစ် အာညာတေလာဂျွိုင်း၊ လူဝီးဂျီအဖြစ် ချာလီဒေးနဲ့ ဘောင်ဆာအဖြစ် ဂျက်ဘလက်တို့ အသံသရုပ်ဆောင်ထားပါတယ်။

ခရစ္စမတ်အကြိုညမှာ မာရီတို့အိမ်ကို သတင်းဆိုးတစ်ခု ရောက်လာပါတယ်။ ကွယ်လွန်သွားတဲ့ မာရီရဲ့အဖေက မစ္စတာရက်တာဆီမှာ ဒေါ်လာတစ်သိန်း အကြွေးတင်နေခဲ့တာပါ။ အကြွေးမဆပ်နိုင်ရင် မာရီက သူ့ဇနီးဖြစ်ရမယ်လို့ မစ္စတာရက်တာက ပြောလာတယ်။ သူနဲ့လက်ထပ်ဖို့ စဉ်းစားစေချင်တာကြောင့် နော့ခရက်ကာဆိုတဲ့ အရုပ်လေးတစ်ရုပ်ကိုလည်း မာရီ့ကို လက်ဆောင်ပေးခဲ့ပါတယ်။ ဒီသတင်းကြောင့် စိတ်ပျက်ဝမ်းနည်းသွားတဲ့ မာရီဟာ အပူအပင်ကင်းခဲ့တဲ့ ကလေးဘဝကို ပြန်တမ်းတရင်း သီချင်းတစ်ပုဒ် ညည်းဆိုလိုက်တယ်။ သီချင်းဆိုပြီးတာနဲ့ မှော်ပညာတစ်ခု အသက်ဝင်လာပြီး မာရီရဲ့ကိုယ်က အလွန်သေးငယ်သွားပါတယ်။ တစ်ချိန်တည်းမှာပဲ သူ့အရုပ်တွေနဲ့ နော့ခရက်ကာလည်း အသက်ဝင်လာကြတယ်။ မာရီ့ကို နဂိုအတိုင်း ပြန်ဖြစ်အောင် ကြိုးစားကြရင်း နော့ခရက်ကာဟာ ကျိန်စာကြောင့် အရုပ်ဖြစ်သွားတဲ့ မင်းသားဂျော့ချ်မှန်း သိလာကြပါတယ်။ မာရီ၊ မင်းသားဂျော့ချ်နဲ့ အရုပ်လေးတွေဟာ ကျိန်စာပြယ်ဖို့ နည်းလမ်းရှာကြရတော့တယ်။ သူတို့ရဲ့ မှော်ဆန်တဲ့အဖြစ်အပျက်တွေကို ဟာသနဲ့ အချစ်ဇာတ်လမ်း ရောစပ်ထားတဲ့ မိသားစုကြည့် ကာတွန်းဇာတ်ကားပါ။

အီတလီအင်ဂျင်နီယာ Umberto Nobile ဟာ တစ်နေ့ အပြင်ထွက်ရင်း Titina ဆိုတဲ့ ခွေးလေးတစ်ကောင်ကို ကောက်ရခဲ့ပါတယ်။ နောက်တစ်နေ့မှာတော့ ဝင်ရိုးစွန်းဒေသတွေကို စူးစမ်းလေ့လာသူ Roald Armendson ဆီက ဖုန်းဝင်လာတယ်။ မြောက်ဝင်ရိုးစွန်းကို သွားဖို့ လေသင်္ဘောတစ်စင်း ဆောက်ပေးစေချင်လို့ ဆက်သွယ်လာတာပါ။ Nobile အတွက်က လေသင်္ဘောဆောက်ပေးရုံတင် မဟုတ်ဘဲ အဲဒီခရီးကိုပါ အတူလိုက်ခွင့်ရမှာဆိုတော့ အလွန်ဝမ်းသာသွားတယ်။ လေသင်္ဘော ဆောက်လုပ်ပြီးစီးတဲ့အခါ Armendson နဲ့အတူ မြောက်ဝင်ရိုးစွန်းဆီ ထွက်ခွာကြပြီး Titina လေးလည်း လိုက်ပါလာပါတယ်။ ဒီခရီးက လူနှစ်ယောက်ကို ဘယ်လောက်ရင်းနှီးလာစေမလဲဆိုတာနဲ့အတူ သူတို့ကြားက ခွေးလေး Titina ကိုပါ တွေ့ရမယ့် မိသားစုကြည့် စွန့်စားခန်းကာတွန်းကားပါ။

တရှုံနဲ့ အော့ရှုံ ကာတွန်းဇာတ်လမ်းတွဲကို အင်္ဂလိပ်စကားပြောနဲ့ ပြန်တွေ့ရမယ့် ဒီကားမှာ ဝက်ဝံနှစ်ကောင်ကို ဘရမ်ဘဲလ်နဲ့ ဘရိုင်ရာလို့ ခေါ်ထားပါတယ်။ သူတို့နေတဲ့ တောအုပ်ထဲကို တစ်နေ့မှာ ကောင်းကင်ပေါ်က သတ္တုကုဗတုံးတစ်တုံး ကျလာတယ်။ အဲဒီကုဗတုံးရဲ့ ပင်မစွမ်းအားက စိတ်ထားကောင်းပြီး နူးညံ့တဲ့ ဘရမ်ဘဲလ်ရဲ့ ဦးနှောက်နဲ့ ပေါင်းစည်းသွားပါတယ်။ ကုဗတုံးဟာ ရွိုင်တန်လို့ခေါ်တဲ့ ကြောင်မျိုးနွယ်စု စီးလာတဲ့ အာကာသယာဉ်ကို ရှာနိုင်ဖို့ အဓိကသော့ချက် ဖြစ်နေတယ်။ အစားစားဖို့ပဲ စိတ်ရှိတဲ့ ဘရမ်ဘဲလ်ခမျာ အခုတော့ အာကာသယာဉ်အုပ်စုတွေ၊ ဂြိုလ်သားတွေနဲ့ ရင်ဆိုင်ရတော့မှာပါ။ အလွဲတွေနဲ့ ဟာသကြားမှာ ပညာပေးအကြောင်းအရာတွေလည်း ပါပြီး ဘရမ်ဘဲလ်တစ်ယောက် ဒီကိစ္စတွေကြား ဘယ်လိုအခက်တွေ့ဦးမလဲဆိုတာ ဆက်ကြည့်ရမှာပါ။

စင်ဘာဟာ အရွယ်ရောက်လာပြီး ဘုရင်အဖြစ် သူ့အုပ်စုကို တာဝန်ယူနေပါပြီ။ သူ့အရိုက်အရာကို ဆက်ခံမယ့် သမီးလေးခီယာရာလည်း ရှိနေပြီဖြစ်ပါတယ်။ အဖေနဲ့တူတဲ့ ခီယာရာက ကြီးလာတာနဲ့အမျှ အရာရာကို စူးစမ်းချင်နေတော့ စင်ဘာမှာ သမီးအတွက် စိတ်ပူနေရတယ်။ တစ်ဖက်မှာတော့ နယ်နှင်ခံထားရတဲ့အုပ်စုက ခြင်္သေ့မဇီရာဟာ စကားရဲ့အရိုက်အရာကို ဆက်ခံဖို့ ကိုဘူးကို ပျိုးထောင်နေပါတယ်။ လက်စားချေလိုတဲ့စိတ်နဲ့ ကိုဘူးကို အပြင်းအထန်လေ့ကျင့်ပေးပြီး စင်ဘာကို အလစ်ချောင်းလုပ်ကြံဖို့ အသုံးချဖို့ ကြံထားတာပါ။ အဲဒီအစီအစဉ်အရ စင်ဘာနဲ့ နီးစပ်နိုင်ဖို့ ကိုဘူးက ခီယာရာကို အရင်ချဉ်းကပ်ရတယ်။ ဒါပေမဲ့ အသုံးချဖို့ စခဲ့တဲ့ဆက်ဆံရေးကနေ သူတို့နှစ်ယောက် တကယ်ချစ်မိသွားကြပါတယ်။ အမုန်းတွေ၊ လှည့်စားမှုတွေနဲ့ သစ္စာဖောက်မှုတွေ ရှိနေတဲ့ အုပ်စုနှစ်ခုကြားမှာ ဒီချစ်သူနှစ်ယောက်ရဲ့လမ်းက ဖြောင့်ဖြူးနိုင်ပါ့မလား။ အတူပေါင်းစည်းဖို့ ဘာတွေကို ရင်ဆိုင်ရဦးမလဲ၊ မူဖာဆာပြောခဲ့သလို အားလုံးတစ်သားတည်း ဖြစ်လာနိုင်ပါ့မလား။

စင်ဘာရဲ့ သူငယ်ချင်းတွေဖြစ်တဲ့ တီမုန်နဲ့ ပွန်ဘာတို့အကြောင်းကို ပြောပြထားတဲ့ ဒီဇာတ်လမ်းက တီမုန်ရဲ့ မြွေပါအုပ်စုမှာ စပါတယ်။ အင်အားကြီးတဲ့ သားရဲတွေရဲ့ ရန်ကို အမြဲပူနေရတဲ့ သူတို့ဟာ ခွေးအတွေ လာစားမှာကို ကာကွယ်ဖို့ နေ့တိုင်း တွင်းတူးနေကြရတယ်။ တီမုန်ကတော့ တွင်းတူးလိုက်၊ ပုန်းလိုက်နဲ့ နေရတဲ့ ဒီဘဝကို မနှစ်သက်ပါဘူး။ အများနဲ့ အတွေးမတူတဲ့ တီမုန်ဟာ အုပ်စုထဲမှာလည်း အဆင်မပြေဖြစ်လာတယ်။ အပြင်လောကမှာ သူနဲ့ ကိုက်ညီမယ့် နေရာတစ်ခုတော့ ရှိရမယ်လို့ ယုံကြည်တာကြောင့် တစ်နေ့မှာ အမေနဲ့ အဖော်မြွေပါတွေကို ထားခဲ့ပြီး ခရီးထွက်လာပါတယ်။ ဒါပေမဲ့ ဘယ်သွားရမယ်၊ ဘာလုပ်ရမယ်မှန်း မသိတော့လို့ ငိုနေတုန်း ပညာရှိမျောက်ကြီးတစ်ကောင်နဲ့ ဆုံမိတယ်။ မျောက်ကြီးက တီမုန်ရှာနေတာဟာ ဟာကူနာမာထာထာလို့ခေါ်တဲ့ အပူအပင်ကင်းတဲ့ဘဝပဲလို့ လမ်းစပေးလိုက်ပါတယ်။ အဲဒီဘဝကို တွေ့ချင်ရင် မြင်နေရတဲ့အရာထက် ကျော်ပြီး ကြည့်တတ်ဖို့လည်း အကြံပေးတယ်။ အပူအပင်ကင်းရာကို ရှာဖို့ ထွက်လာတဲ့ တီမုန်ဟာ လမ်းမှာ ဘယ်သူတွေနဲ့ ဆုံမလဲ၊ ဘယ်လိုအန္တရာယ်တွေ ကြုံရမလဲ၊ သူစိတ်ကူးထားတဲ့ ဘဝကိုရော ရှာတွေ့နိုင်ပါ့မလား။

ပဲရစ်မြို့က သူဌေးမတစ်ယောက်ရဲ့အိမ်မှာ သူသိပ်ချစ်တဲ့ ကြောင်လေးလေးကောင် ရှိပါတယ်။ ကြောင်အမေ ဒက်ချက်စ်နဲ့ သားနှစ်ကောင် ဘာလီရော့စ်၊ ထိုလုစ်၊ သမီးလေး မယ်ရီတို့ပါ။ သူဌေးမက ကြောင်လေးတွေကို ချစ်လွန်းတာကြောင့် သူ့အမွေတွေကို သူတို့အတွက် ပေးထားဖို့ ဆုံးဖြတ်လိုက်တယ်။ ဒီအကြောင်းကို သိသွားတဲ့ အစေခံကတော့ မကျေမနပ် ဖြစ်သွားပါတယ်။ ကြောင်လေးတွေ အမွေရသွားမှာကို မလိုလားဘဲ သူတစ်ယောက်တည်း ရချင်တဲ့လောဘနဲ့ ကြောင်လေးတွေ အိမ်မှာမရှိတော့အောင် အကောက်ကြံပါတော့တယ်။ Disney ရဲ့ ဒီဟာသကာတွန်းမှာ ကြောင်မိသားစုလေး အဲဒီအကြံအစည်ကြောင့် ဘာတွေကြုံရမလဲဆိုတာကို ဆက်တွေ့ရမှာပါ။

Tell It Like a Woman ဟာ အမျိုးသမီးတွေအကြောင်းကို အမျိုးသမီးဒါရိုက်တာတွေက ပြောပြထားတဲ့ ဇာတ်လမ်းတိုခုနစ်ပုဒ် စုစည်းထားတာပါ။ ကမ္ဘာတစ်ဝန်းက ဒါရိုက်တာတွေ ပူးပေါင်းပြီး ဂျပန်၊ အီတလီ၊ အိန္ဒိယနဲ့ အမေရိကန်တို့မှာ ရိုက်ကူးထားသလို အဲဒီနိုင်ငံတွေက မင်းသမီးတွေလည်း ပါဝင်ထားပါတယ်။ အမျိုးသမီးတွေရဲ့အကြောင်း ဖြစ်ပေမယ့် သူတို့ဘဝကို နားလည်ခံစားလိုသူအားလုံးအတွက် ရည်ရွယ်ထားတဲ့ ဇာတ်ကားပါ။ နိုင်ငံမတူ၊ လူမှုအလွှာမတူတဲ့ အမျိုးသမီးတွေဟာ ဘဝအခက်အခဲတွေကို ကိုယ့်နည်းကိုယ့်ဟန်နဲ့ ရင်ဆိုင်နေကြရတယ်။ သဘာဝအရ ကြုံတွေ့ရတဲ့ဒုက္ခတွေရှိသလို အမျိုးသမီးဖြစ်နေလို့ ခံရတဲ့ဒဏ်တွေလည်း ရှိပါတယ်။ အဲဒီအခက်အခဲတွေကို သူတို့ ဘယ်လိုကျော်လွှားကြသလဲဆိုတာ ဇာတ်လမ်းတိုတစ်ပုဒ်စီနဲ့ ဖော်ပြထားပြီး ဖြစ်ရပ်မှန်ကို အခြေခံထားတဲ့ ဇာတ်လမ်းတွေလည်း ပါဝင်ပါတယ်။ ဇာတ်လမ်းတစ်ပုဒ်နဲ့တစ်ပုဒ် အကူးအပြောင်းက တချို့နေရာတွေမှာ ရုတ်တရက်ဖြစ်နေတတ်ပေမယ့် တစ်ပုဒ်စီမှာ ပြောချင်တဲ့အကြောင်းအရာ ရှိပါတယ်။ ဘယ်ဇာတ်လမ်းကို ပိုနားလည်စာနာမိမလဲဆိုတာကတော့ ကြည့်သူတစ်ယောက်ချင်းစီရဲ့ ဘဝအတွေ့အကြုံပေါ်လည်း မူတည်နိုင်ပါတယ်။ ဘောလိဝုဒ်မင်းသမီး ဂျက်ကလင်း ပါဝင်ထားတဲ့ နောက်ဆုံးဇာတ်လမ်းတိုထဲက “Applause” သီချင်းဟာ အော်စကာရဲ့ Best Original Song ဆုအတွက် ဆန်ကာတင်စာရင်းဝင်ခဲ့ပါတယ်။

Koyomi ဟာ အလယ်တန်းကျောင်းသားဘဝမှာ အပြိုင်ကမ္ဘာတစ်ခုဆီ ကူးပြောင်းမိခဲ့ပါတယ်။ အထက်တန်းကျောင်းသား ဖြစ်လာချိန်မှာတော့ Kazune ဆိုတဲ့ မိန်းကလေးတစ်ယောက်က သူ့ကို လူမှားပြီး နှုတ်ဆက်လာတယ်။ အဲဒီတွေ့ဆုံမှုကနေ ရိုးရှင်းမယ့်ပုံပေါ်တဲ့ အချစ်ဇာတ်လမ်းတစ်ပုဒ် စတင်လာပါတယ်။ အပြိုင်ကမ္ဘာတွေအကြောင်းကို နောက်ခံထားပေမယ့် ဇာတ်လမ်းက Koyomi ရဲ့ အချစ်ရေးကို အဓိကထားပြီး ရယ်စရာနဲ့ ဝမ်းနည်းစရာတွေ ရောယှက်တင်ဆက်ထားတာပါ။ ဒီအချစ်ဇာတ်လမ်းကို သာယာတဲ့ဇာတ်လမ်းလို့ ခံစားရမလား၊ ဝမ်းနည်းစရာလို့ မြင်မလားဆိုတာကတော့ ကြည့်သူရဲ့အမြင်ပေါ် မူတည်နေပါတယ်။ ၂၀၁၆ ခုနှစ်မှာ ထွက်ရှိခဲ့တဲ့ Yomoji Otono ရဲ့ ဝတ္ထုနှစ်ပုဒ်ကို ပြန်ရိုက်ထားတဲ့ အန်နီမေးရှင်းရုပ်ရှင်နှစ်ကားထဲက တစ်ကားဖြစ်ပြီး နောက်တစ်ကားက To Me, the One Who Loved You ပါ။ ဇာတ်လမ်းနှစ်ခုကို အစကတည်းက ပြထားပေမယ့် ဆက်စပ်တင်ဆက်ပုံက ငြင်သာတာကြောင့် နောက်ပိုင်းမှ သတိထားမိနိုင်တဲ့ ဖွဲ့စည်းပုံကို သုံးထားပါတယ်။

ရာသီခွင်နတ်မင်း ၁၂ ပါးထဲမှာ ဩဇာအကြီးဆုံးဖြစ်တဲ့ နဂါးမင်း ပျောက်ဆုံးသွားပါတယ်။ နဂါးမင်း ပျောက်နေတဲ့ နှစ်ပေါင်း ၅၀၀ လောက်အတွင်း လူ့လောကမှာလည်း ကပ်ဘေးတွေ တစ်ခုပြီးတစ်ခု ဖြစ်လာခဲ့တယ်။ နဂါးနဲ့ ဇာမဏီက တစ်ယောက်ကိုတစ်ယောက် သဘောကျနေကြသူတွေဖြစ်ပြီး ဇာမဏီကို လိုက်ရှာရာကနေ နဂါးမင်းပါ ပျောက်သွားခဲ့တာပါ။ အစွမ်းထက်ပြီး အားအင်ကြီးမားတဲ့ နဂါးနဲ့ ဇာမဏီတို့ ပျောက်ဆုံးနေရတဲ့ နောက်ကွယ်မှာတော့ ပိုးဟပ်တစ်ကောင် ရှိနေပါတယ်။ ရာသီခွင်နတ်မင်းတွေကို အနှောင့်အယှက်ပေးပြီး နေရာအပြောင်းအလဲလုပ်ချင်နေတဲ့ ပိုးဟပ်က ဘယ်လိုအကွက်ဆင်ထားတာလဲ၊ ရာသီခွင်တိရစ္ဆာန်တွေကရော ဘယ်လိုကာကွယ်ကြမလဲဆိုတာကို ဆက်ပြထားပါတယ်။ တရုတ်ရာသီခွင်ဒဏ္ဍာရီကို အခြေခံထားတဲ့ ကာတွန်းကားဖြစ်ပြီး ဟာသတွေနဲ့အတူ ပညာပေးအကြောင်းအရာတွေလည်း ထည့်ထားပါတယ်။

မစ်ကီ၊ ဒေါ်နယ်နဲ့ ဂူဖီတို့ သုံးယောက်ဟာ ငယ်ငယ်ကတည်းက စစ်သည်တော်ဖြစ်ချင်တဲ့ အိပ်မက်ရှိခဲ့ကြပါတယ်။ တစ်နေ့မှာတော့ သူတို့စိတ်ကူးထားတဲ့အတိုင်း တကယ်ဖြစ်လာနိုင်မယ့် အခွင့်အရေးတစ်ခု ပေါ်လာပြီး စွန့်စားခန်းတွေ စတင်လာပါတော့တယ်။ နာမည်ကြီး The Three Musketeers ဇာတ်လမ်းကို မစ်ကီတို့သုံးယောက်နဲ့ ပြန်လည်တင်ဆက်ထားတဲ့ ဟာသစွန့်စားခန်း ကာတွန်းရုပ်ရှင်ပါ။ မီနီ၊ ဒေစီ၊ နွားမလေး ကလာရာဘလ်၊ ပီဒ်နဲ့ ပလူတိုတို့လည်း ပါဝင်ထားကြပါတယ်။

ကာဇမ ဂျင်၊ ခဇုယနဲ့ မီရှီမာ ဟဲဟချိတို့ သားအဖ၊ မြေးအဘိုးသုံးယောက်ရဲ့ အားပြိုင်မှုကြားမှာ ဟဲဟချိရဲ့ စမ်းသပ်မှုကနေ အသက်ရှင်ကျန်ခဲ့တဲ့ ကျောင်းသားတစ်ယောက်ဟာ အရေးပါတဲ့သူ ဖြစ်လာပါတယ်။ ဂျင်နဲ့ ခဇုယတို့က ရည်ရွယ်ချက်ကိုယ်စီနဲ့ သူလျှိုတွေ လွှတ်ပြီး အဲဒီကျောင်းသားကို လိုက်ရှာကြတယ်။ ကျိုတိုမြို့က ကျောင်းတစ်ကျောင်းမှာ သူ့ကို ရှာတွေ့ပြီး အနီးကပ်ထောက်လှမ်းကြရာက သူတို့မထင်ထားတဲ့ ကစားပွဲတစ်ခုထဲ ဝင်မိနေကြောင်း သိလာရပါတယ်။ ဒီကျောင်းသားကို သူတို့ဘာကြောင့် လိုချင်ကြတာလဲ၊ နောက်ကွယ်မှာ ဘယ်လိုလှည့်ကွက်တွေ ရှိနေသလဲဆိုတာကို တိုက်ခိုက်ခန်းတွေနဲ့အတူ ဆက်ဖော်ပြသွားပါတယ်။ ၂၀၁၁ ခုနှစ်ထွက် ဒီအက်ရှင်သိပ္ပံစိတ်ကူးယဉ်အန်နီမေးရှင်းဟာ Bandai Namco ရဲ့ Tekken တိုက်ခိုက်ရေးဂိမ်းကို အခြေခံထားတာပါ။ Tekken က Street Fighter နဲ့ KOF တို့လိုပဲ ဂိမ်းတွဲတွေနဲ့ အန်နီမေးရှင်းတွေ ထွက်ရှိထားတဲ့ စီးရီးတစ်ခုဖြစ်ပြီး ဒီဇာတ်ကားမှာတော့ Final Fantasy စတိုင် အန်နီမေးရှင်းပုံစံနဲ့ ပြင်းထန်တဲ့ တိုက်ခိုက်ခန်းတွေကို အသုံးပြုထားပါတယ်။