အချစ်ဇာတ်လမ်းများ

အဘီဟာ အားကိုးစရာမိသားစုမရှိတဲ့ တစ်ကောင်ကြွက်တစ်ယောက်ဖြစ်ပြီး ရည်မှန်းချက်တွေအပြည့်နဲ့ အမေရိကန်ကို ရောက်လာခဲ့ပါတယ်။ သူ့အိပ်မက်တွေကို အကောင်အထည်ဖော်ဖို့ ကြိုးစားပေမယ့် အောင်မြင်လာတဲ့အခါမှာတော့ တစ်ကိုယ်ကောင်းဆန်ပြီး မောက်မာလာတယ်။ ကိုယ့်ကို ကူညီပေးခဲ့သူတွေရဲ့ ကျေးဇူးကိုလည်း မေ့လာပါတော့တယ်။ အဲဒီလို ဘဝမေ့လုဆဲဆဲမှာ အဘီ အမြင်မှန်ပြန်ရလာပါတယ်။ သူ့ဘဝတက်လမ်းအတွက် ဖေးမပေးခဲ့သူတွေကို ပြန်သိမြင်လာတဲ့နောက် ဘဝကို လက်တွေ့ကျကျ ဘယ်လိုဆက်ဖြတ်သန်းမလဲ၊ ကျန်တဲ့ဘဝခရီးကို ဘယ်လို အဓိပ္ပာယ်ရှိအောင် နေသွားမလဲဆိုတာကို သူ့နောက်ကြောင်းတွေနဲ့အတူ ပြောပြထားပါတယ်။ နာဂချီတန်ယားအခီနယ်နီ ပါဝင်သရုပ်ဆောင်ထားတဲ့ ဒီတေလဂူ Drama ဇာတ်ကားမှာ လူတစ်ယောက်ရဲ့ အတက်အကျတွေကြား ကိုယ့်ကို ဖေးမသူနဲ့ ဆွဲချသူကို ခွဲခြားသိမြင်တတ်ဖို့ဆိုတဲ့ အကြောင်းကိုလည်း ဖော်ပြထားပါတယ်။

အိုဆယ်ယွန်းဟာ ခင်ပွန်းကို သစ္စာရှိရှိချစ်ပြီး သမီးလေးအတွက် အရာရာပေးဆပ်ရင်း မိသားစုကိုပဲ အချိန်ပေးလာခဲ့တဲ့ အမျိုးသမီးတစ်ယောက်ပါ။ တစ်နေ့မှာတော့ သူ အသက်ရှင်နေရမယ့်အချိန် သိပ်မကျန်တော့ဘူးဆိုတာ သိလိုက်ရတယ်။ အဲဒီအခါ တစ်သက်လုံး မိသားစုအတွက်ပဲ နေလာခဲ့တဲ့ ဆယ်ယွန်းက ခင်ပွန်းဆီ ထူးထူးခြားခြား တောင်းဆိုမှုတစ်ခု လုပ်လိုက်ပါတယ်။ သူ့အချစ်ဦးကို ရှာပေးဖို့ပါ။ ဇနီးရဲ့ နောက်ဆုံးဆန္ဒဆိုတော့ ခင်ပွန်းဖြစ်သူအတွက် ငြင်းဖို့လည်းခက်၊ လိုက်လျောဖို့လည်း မလွယ်ပါဘူး။ နောက်ဆုံးမှာတော့ ဇနီးမောင်နှံနှစ်ယောက် ဆယ်ယွန်းရဲ့အချစ်ဦးကို ရှာဖို့ ခရီးထွက်လာကြတယ်။ ချိုတစ်လှည့် ခါးတစ်လှည့် ကြုံရမယ့် ဒီခရီးမှာ အချစ်ဦးကို ပြန်ရှာတဲ့ကိစ္စက သူတို့ရဲ့ အိမ်ထောင်ရေးကို ထိခိုက်သွားစေမလား၊ ဒါမှမဟုတ် နှစ်ယောက်ကြားက သံယောဇဉ်ကို ပိုခိုင်မြဲလာစေမလား။ Drama၊ Romance နဲ့ Musical အမျိုးအစားတွေကို တွဲထားပြီး သီချင်းတွေနဲ့ ဟာသအခန်းတွေလည်း ပါဝင်ပါတယ်။ သရုပ်ဆောင်တွေထဲမှာ Seoul Vibe မှာ ပါဝင်ခဲ့တဲ့ Wanna One အဖွဲ့ဝင် Ong Seong Wu၊ 6/45 မှာ ယွန်းဟီးအဖြစ် သရုပ်ဆောင်ခဲ့တဲ့ Park Se Wan နဲ့ Park Yeong Gyu တို့ ပါဝင်ထားပါတယ်။

ဆိုဖီယာက လိင်မှုဆိုင်ရာကုထုံးမှာ ကျွမ်းကျင်တဲ့ ဆရာမတစ်ယောက်ပါ။ သူ့မှာ သိပ်ချစ်ရတဲ့ ခင်ပွန်း ရော့ဘ်ရှိပေမယ့် သူကိုယ်တိုင် တစ်ခါမှ လိင်ဆန္ဒပြီးမြောက်မှု မခံစားဖူးတဲ့ကိစ္စကိုတော့ အဖြေမရှာနိုင်သေးဘူး။ ရော့ဘ် စိတ်ထိခိုက်မှာကိုလည်း မလိုလား၊ အိမ်ထောင်ရေးကိုလည်း မပျက်စီးစေချင်တာကြောင့် ဒီအကြောင်းကို မပြောဘဲ ကြာကြာ မျိုသိပ်ထားခဲ့ပါတယ်။ ဂျိမ်းစ်နဲ့ ဂျမီကတော့ လိင်တူချစ်သူစုံတွဲဖြစ်ပြီး တခြားသူတွေနဲ့ပါ ဆက်ဆံခွင့်ရှိတဲ့ အချစ်ရေးပုံစံကို နှစ်ဦးသဘောတူ ရွေးချယ်ဖို့ ဆုံးဖြတ်ထားကြတယ်။ အဲဒီကိစ္စအတွက် ဆိုဖီယာဆီ အကြံဉာဏ်လာယူရင်း တစ်ယောက်အကြောင်း တစ်ယောက် ပိုသိလာကြပြီး အပြန်အလှန် ကူညီပေးဖြစ်လာပါတယ်။ နယူးယောက်မှာရှိတဲ့ Shortbus ဆိုတဲ့ သီးသန့်နေရာမှာ ဆုံကြဖို့ ဆိုဖီယာကို ဖိတ်ခေါ်လိုက်ကြတယ်။ အဲဒီနေရာက လိင်မှုဆိုင်ရာ တွေ့ဆုံမှုတွေ ပြုလုပ်ကြတဲ့ နေရာပါ။ လိင်စိတ်ခံယူမှု မတူကြတဲ့ လူတွေရဲ့အကြောင်းကို တွဲဖော်ပြထားပြီး ကိုယ့်ဆန္ဒအတိုင်း နေနိုင်ဖို့ ကြိုးစားခြင်းနဲ့ ဖုံးကွယ်ထားတဲ့ကိစ္စတွေကို ဘယ်လောက်ကြာကြာ ဖုံးထားနိုင်မလဲဆိုတာကို တင်ပြထားပါတယ်။ လိင်မှုဆိုင်ရာအခန်းတွေကို ဆင်ဆာမဖြတ်ဘဲ ပွင့်ပွင့်လင်းလင်း ဖော်ပြထားပါတယ်။

Connie လက်ထပ်ပြီး မကြာခင်မှာပဲ ခင်ပွန်းဖြစ်သူဟာ ပထမကမ္ဘာစစ်ကြောင့် ခါးအောက်ပိုင်း အကြောသေသွားပါတယ်။ စစ်ပြီးတဲ့အခါ သူတို့ဟာ ခင်ပွန်းအမွေရထားတဲ့ Wragby အိမ်ကြီးဆီ ပြန်လာနေကြပြီး ကျောက်မီးသွေးမိုင်းတွင်းတွေကို ဦးစီးလုပ်ကိုင်ကြတယ်။ ခင်ပွန်းက လိင်ဆက်ဆံနိုင်စွမ်း မရှိတော့သလို Connie ကို ချစ်သူဇနီးမယားတစ်ယောက်အဖြစ် ဆက်ဆံတာထက် သူနာပြုတစ်ယောက်၊ အိမ်အကူတစ်ယောက်လို ပိုပြီး မှီခိုလာပါတယ်။ မြို့ကြီးကနေ ကျေးလက်ကို ရုတ်တရက်ပြောင်းလာရလို့ အသားမကျသေးတဲ့ Connie အတွက် ခင်ပွန်းရဲ့ အေးစက်လာတဲ့ ဆက်ဆံရေးနဲ့ မပြည့်ဝတဲ့ လိင်မှုဆန္ဒတွေကလည်း ဖိစီးနေတယ်။ Wragby အိမ်ကြီးဟာ သူ့အတွက် မှောင်မိုက်တိတ်ဆိတ်တဲ့ နေရာတစ်ခုလို ဖြစ်လာပါတယ်။ အိမ်တော်က မွေးမြူရေးအလုပ်သမား Oliver နဲ့ တွေ့လာချိန်မှာတော့ သူ့ဘဝထဲမှာ ပျောက်နေတဲ့ ခံစားချက်တွေ ပြန်နိုးထလာတယ်။ စိတ်အားလျော့နေတဲ့ Connie အတွက် Oliver ဟာ ပြန်အားကိုးတွယ်တာစရာ ဖြစ်လာပါတယ်။ ဒီ Netflix ဗားရှင်းမှာ The Crown Season 4 ရဲ့ ဒိုင်ယာနာအဖြစ် သရုပ်ဆောင်ခဲ့တဲ့ Emma Corrin ပါဝင်ထားပါတယ်။ မူရင်းဝတ္ထုက ၁၉၂၈ ခုနှစ်မှာ ထွက်ရှိခဲ့ပြီး အဲဒီခေတ်က ညစ်ညမ်းစာပေအဖြစ် သတ်မှတ်ကာ နိုင်ငံအတော်များများမှာ ပိတ်ပင်ခံခဲ့ရတယ်။ ရုပ်ရှင်နဲ့ ဇာတ်လမ်းတွဲအဖြစ်လည်း အကြိမ်ကြိမ် ပြန်ရိုက်ကူးထားပါတယ်။ ဒီကားရဲ့ ရင်းနှီးမှုအခန်းတွေကို သစ်ပင်တွေကြား၊ လယ်ကွင်းနဲ့ စမ်းချောင်းဘေးက သဘာဝမြင်ကွင်းတွေမှာ ရိုက်ကူးထားပြ

စိတ်ဝေဒနာအတိုင်ပင်ခံ ဘေးလ်ကာပါဟာ ကုသပေးနေဆဲ လူနာတစ်ယောက်ကို တုန်လှုပ်စရာအဖြစ်နဲ့ ဆုံးရှုံးလိုက်ရပြီး သူကိုယ်တိုင်ပါ စိတ်ဒဏ်ရာရသွားပါတယ်။ အဲဒီစိတ်ဒဏ်ရာကို ကုစားဖို့ စိတ်ကုဆရာဝန်ဖြစ်တဲ့ သူငယ်ချင်း ဘော့ဘ်မိုးရ် နေထိုင်ရာ လော့စ်အိန်ဂျလိစ်မြို့ကို ထွက်လာခဲ့တယ်။ မိုးရ်ကုသပေးနေတဲ့ မတူညီတဲ့ဝေဒနာရှင် ငါးယောက်ရဲ့ ဆွေးနွေးဝိုင်းမှာ ပါဝင်ရင်း ပြန်လည်နာလန်ထူဖို့ ကြိုးစားနေချိန်မှာပဲ မိုးရ် ရက်ရက်စက်စက် အသတ်ခံလိုက်ရပါတယ်။ တရားခံဟာ မိုးရ်ရဲ့ လူနာအဖွဲ့ထဲက တစ်ယောက်ယောက်ဖြစ်နိုင်တယ်လို့ ရဲတွေက သံသယရှိနေကြတယ်။ ဒါပေမဲ့ အဖွဲ့ဝင်တွေကိုယ်တိုင်လည်း ပစ်မှတ်ထားခံနေရသလို ဖြစ်လာပါတယ်။ ဒီအချိန်မှာပဲ ဘေးလ်ရဲ့ဘဝထဲကို လျှို့ဝှက်ဆန်းကြယ်တဲ့ မိန်းကလေးတစ်ယောက် ဝင်လာပြီး သူလည်း တဖြည်းဖြည်း ငြိတွယ်လာတယ်။ သူတို့အဖွဲ့ကြုံနေရတဲ့ အဖြစ်ဆိုးတွေနဲ့ ဒီမိန်းကလေးကြား တိုက်ရိုက်ဆက်စပ်မှုရှိနေတာကို ဘေးလ် သတိထားမိလာပေမဲ့ အဖြစ်မှန်က သူထင်ထားတာထက် ပိုရှုပ်ထွေးနေပါတယ်။ ဒါရိုက်တာ Richard Rush ရိုက်ကူးထားပြီး ဘရုစ်ဝီလီစ်နဲ့ The Lover မှာ တိုနီလျောင်ခဖိုင်နဲ့ တွဲဖက်သရုပ်ဆောင်ခဲ့တဲ့ မင်းသမီးတို့ ပါဝင်ထားပါတယ်။ လိင်မှုအကြောင်းအရာတွေနဲ့ လူသတ်မှုပဟေဠိကို ရောစပ်ထားတဲ့ ဇာတ်ကားပါ။

ရှေ့နေနက်ဒ်ရာဆင်းက အကျင့်ပျက်ခြစားမှုတွေ မရှားတဲ့မြို့မှာ အခွင့်အရေးရရင် လိမ္မာပါးနပ်သလို အကွက်ဆင်ပြီး လူလွတ်ဘဝကို ပျော်ပျော်ပါးပါး ဖြတ်သန်းနေသူပါ။ တစ်ညမှာ မတ်တီဝေါ်ကာဆိုတဲ့ အမျိုးသမီးနဲ့ ဆုံမိရာက သူ့ကို စွဲလမ်းသွားတယ်။ မတ်တီမှာ အိမ်ထောင်ရှိပေမဲ့ နက်ဒ်က လက်မလျှော့ဘဲ လိုက်ခဲ့သလို ခင်ပွန်းအပေါ် မကျေနပ်ချက်ရှိနေတဲ့ မတ်တီကလည်း သူ့ကို လက်ခံလိုက်ပါတယ်။ နှစ်ယောက်သား မတ်တီ့ခင်ပွန်းမသိအောင် တွေ့ဆုံနေကြရာက ပိုကြီးတဲ့ ပြစ်မှုတစ်ခုကို ကျူးလွန်ဖို့ စိတ်ကူးလာကြတယ်။ ငွေကြေးချမ်းသာတဲ့ မတ်တီ့ခင်ပွန်းကို လုပ်ကြံပြီး ကျန်ရစ်မယ့်အမွေတွေကို သူတို့နှစ်ယောက် သိမ်းယူဖို့ပါ။ ဒါပေမဲ့ အစီအစဉ်ကို အကောင်အထည်ဖော်ရင်း ကြုံလာရတာတွေက ထင်ထားသလို ဖြစ်မလာတော့ဘူး။ နက်ဒ်လည်း ကိုယ်ယုံကြည်မိသူကြောင့်ပဲ ဒုက္ခရောက်တော့မလားဆိုပြီး တုန်လှုပ်စပြုလာပါတယ်။ William Hurt ပါဝင်သရုပ်ဆောင်ထားတဲ့ ဒီကားက လိင်မှုအကြောင်းအရာတွေပါတဲ့ Neo-Noir ရာဇဝတ်မှုဇာတ်ကားပါ။

အီလာက သူ့အပေါ် အေးစက်နေတဲ့ ခင်ပွန်းအတွက် ထမင်းချိုင့် ပြင်ဆင်ပေးနေတဲ့ အိမ်ထောင်ရှင်မတစ်ယောက်ပါ။ တစ်နေ့မှာ သူပို့လိုက်တဲ့ ထမင်းချိုင့်က ခင်ပွန်းဆီမရောက်ဘဲ တခြားသူတစ်ယောက်ဆီ မှားရောက်သွားပါတယ်။ အဲဒီလို လက်ခံရရှိသွားသူကတော့ တစ်ယောက်တည်းနေတဲ့ ဖာနန်ဒက်ပါ။ တစ်ခါမှ မတွေ့ဖူးကြတဲ့ သူတို့နှစ်ယောက်ဟာ ထမင်းချိုင့်ထဲမှာ စာလေးတွေ ထည့်ပို့ရင်း အဆက်အသွယ်ရလာကြတယ်။ အစမှာတော့ ဟင်းက ဆားငန်တယ်၊ အစပ်များတယ်ဆိုတဲ့ အကြောင်းလောက်ပဲ ပြောဖြစ်ကြပေမယ့် နောက်ပိုင်းမှာ ကိုယ့်ခံစားချက်တွေ၊ အမှတ်တရတွေကိုပါ ဖွင့်ပြောနိုင်တဲ့အထိ ရင်းနှီးလာကြပါတယ်။ စာတွေကနေတစ်ဆင့် တွယ်တာလာကြတဲ့ သူတို့ကြားမှာ ထုတ်မပြောဖြစ်တဲ့ ချစ်ခြင်းမေတ္တာလည်း ရှိလာတယ်။ Irrfan Khan ပါဝင်ထားတဲ့ ဒီရုပ်ရှင်က သာမန်ဘဝထဲက အဖြစ်အပျက်လေးတွေကို အခြေခံပြီး လူတစ်ယောက်မှာ ချစ်ပေးချင်စိတ်ရော အချစ်ခံချင်စိတ်ပါ ရှိတတ်ပုံကို ဖော်ပြထားပါတယ်။ မေတ္တာကို ဖွင့်ဟပုံ အမျိုးမျိုးရှိတဲ့အကြောင်းကိုလည်း သူတို့ပို့တဲ့ စာတွေနဲ့ ဆက်ပြောထားတာပါ။

Hrithik Roshan နဲ့ Katrina Kaif တို့ အဓိကပါဝင်ထားတဲ့ Bang Bang! က ဟောလိဝုဒ်ရုပ်ရှင်တစ်ကားကို မှီငြမ်းထားတဲ့ ဘောလိဝုဒ်ဇာတ်ကားပါ။ နိုင်ငံအတော်များများမှာ လှည့်လည်ရိုက်ကူးထားပြီး ရှုခင်းတွေနဲ့အတူ အကပိုင်းကိုလည်း ထည့်သွင်းတင်ဆက်ထားပါတယ်။ အက်ရှင်၊ အချစ်နဲ့ စွန့်စားခန်းတွေကြားမှာ ဟာသတွေပါ ရောစပ်ထားပြီး ဇာတ်ကားအရှည်က နှစ်နာရီခွဲဝန်းကျင် ရှိပါတယ်။

ဒေ့ဗ်ဟာ တစ်ချိန်က ဘတ်စကတ်ဘောလက်ရွေးစင်တစ်ယောက် ဖြစ်ခဲ့ပြီး ချစ်သူမာရီကို လက်ထပ်ထားကာ ပျော်ရွှင်တဲ့ အိမ်ထောင်ရေးကို ပိုင်ဆိုင်ခဲ့ပါတယ်။ ဒါပေမယ့် ဒူးဒဏ်ရာကြောင့် အနားယူလိုက်ရတဲ့နောက် သူလုပ်တဲ့စီးပွားရေးတွေက ကိုဗစ်ကြောင့် တစ်ခုပြီးတစ်ခု အရှုံးပေါ်လာတယ်။ မာရီလည်း ကိုယ်ဝန်ပျက်ကျခဲ့ပြီး သူတို့ရဲ့အိမ်ထောင်ရေးမှာ အခက်အခဲတွေ စလာပါတယ်။ ဒေ့ဗ်ကိုယ်တိုင်က ဒူးဒဏ်ရာအတွက် သောက်နေရတဲ့ဆေးတွေကို စွဲလမ်းသလို ဖြစ်နေတယ်။ ဇနီးသည်နဲ့ကြားက မပြည့်ဝတဲ့ဆန္ဒတွေအတွက် သူ့ကို အရူးအမူးစွဲလမ်းတဲ့ ပရိသတ်ဟောင်း လီလာဆီမှာ ထွက်ပေါက်ရှာမိတဲ့နောက် ပြဿနာတွေ ပိုများလာပါတယ်။ ဒေ့ဗ်က လီလာကို ကိုယ်လိုသလို အသုံးချပြီး ပစ်ထားလိုက်ပေမယ့် လီလာက ငြိမ်မနေခဲ့ပါဘူး။ မာရီဆီကတစ်ဆင့် သူတို့အိမ်ထောင်ရေးထဲကို ပြန်ဝင်လာပြီး ဒီတစ်ကြိမ်မှာတော့ မာရီရဲ့ချစ်သူ ဖြစ်လာတာပါ။ ဒေ့ဗ်နဲ့ မာရီတို့က လီလာနဲ့အတူ သုံးယောက်သား ဆက်ဆံရေးတစ်ခုကို လက်ခံနိုင်မယ့် အခြေအနေရောက်လာပေမယ့် ဘယ်လိုပြဿနာတွေ ထပ်ကြုံရဦးမလဲ။ မာရီက ဒေ့ဗ်နဲ့ လီလာကြား ဘယ်သူ့ကို ရွေးမလဲ၊ လီလာကရော ဘယ်သူ့ကို ရွေးမှာလဲ။ ဒေ့ဗ်ကိုယ်တိုင်လည်း နှစ်ယောက်လုံးနဲ့ ဆက်ဆံရေးကို ထိန်းထားနိုင်ပါ့မလား။ Angeli Khang နဲ့ Hugas ထဲမှာ ပါဝင်ခဲ့တဲ့ Aj Raval တို့ သရုပ်ဆောင်ထားတဲ့ ဒရာမာရုပ်ရှင်ပါ။

လူအများ သဘောကျနေကြပေမယ့် ဘယ်သူ့ကိုမှ စိတ်မဝင်စားတဲ့ မိန်းကလေးတစ်ယောက် ရှိပါတယ်။ သူမက ဂန်းစတားအသိုင်းအဝိုင်းထဲက ဖြစ်ပြီး အဲဒီအသိုင်းအဝိုင်းက ယောက်ျားတွေနဲ့ပဲ ပတ်သက်ခွင့်ရထားတာပါ။ ဒီလိုအခြေအနေမှာ အာယာ သရုပ်ဆောင်ထားတဲ့ ကာသာဘာရှာက ထောင်ကနေ အာမခံနဲ့ ထွက်လာပြီး သူမကို လာတွေ့ပါတယ်။ ကာသာဘာရှာကို သိသူတွေက သူ့ကိုကြောက်ကြသလို ရွာထဲမှာလည်း လူတိုင်းကြောက်ရတဲ့ ဂန်းစတားကြီးတစ်ယောက် ရှိနေတယ်။ အဲဒီနှစ်ယောက် ရင်ဆိုင်တွေ့ကြတဲ့အခါ တိုက်ခိုက်မှုတွေ ဖြစ်လာပါတယ်။ ၂၀၂၃ ခုနှစ်ထွက် အက်ရှင်ရုပ်ရှင်ဖြစ်ပြီး ဖိုက်တင်ခန်းတွေ အများအပြား ပါဝင်ထားပါတယ်။

ဂူလူဘိုင်က ဘယ်သူပဲ အကူအညီတောင်းတောင်း ငြင်းလေ့မရှိသူပါ။ ကူညီပေးရင်း ကိုယ့်အတွက် ထိခိုက်နစ်နာရမယ်ဆိုရင်တောင် ကူညီတတ်တယ်။ တစ်ဖက်မှာတော့ မိခင်မရှိတော့တဲ့ သိပ္ပံပညာရှင်ရဲ့သား မတ်ဒီက အဖေဟာ သူ့ကို မချစ်ဘူးလို့ ထင်နေပါတယ်။ ဒါကြောင့် မွေးနေ့မှာ အဖေ့အချစ်ကို စမ်းကြည့်ဖို့ သူငယ်ချင်းတွေကို သူ့အား ပြန်ပေးဆွဲခိုင်းလိုက်တယ်။ မက်တီလ်ဒါကတော့ ဖခင်ရဲ့မျက်နှာကို နောက်ဆုံးအကြိမ် ကြည့်ရဖို့ ပြန်လာသူပါ။ အဖေတူအမေကွဲ အစ်ကိုတွေက သူ့ကို နောက်အိမ်ထောင်က ကလေးဆိုပြီး ခါးခါးသီးသီး ဆက်ဆံကြတယ်။ အမွေတွေကို အပိုင်သိမ်းချင်လို့ သူ့ကို ပြန်ပေးဆွဲခိုင်းဖို့ပါ ကြံစည်ထားကြပါတယ်။ ပြန်ပေးဆွဲရမယ့်သူရဲ့ပုံကို ပြတဲ့အချိန် နားလည်မှုလွဲသွားရာက မတ်ဒီနဲ့ မက်တီလ်ဒါကို လူမှားပြီး ပြန်ပေးဆွဲမိတဲ့အဖြစ် ရောက်သွားတယ်။ ဒီအရှုပ်အထွေးကို ဘယ်လိုဖြေရှင်းကြမလဲ၊ အမြဲကူညီတတ်တဲ့ ဂူလူဘိုင်ကရော ဘယ်လို ဝင်ပါလာမလဲ။

Decision to Leave ဟာ ပတ်ချန်းဝု ရိုက်ကူးပြီး ထျန်းဝေ အဓိကပါဝင်သရုပ်ဆောင်ထားတဲ့ ရုပ်ရှင်ပါ။ အချစ်ဇာတ်လမ်းနဲ့ သည်းထိတ်ရင်ဖိုအကြောင်းအရာကို စုံထောက်ဇာတ်လမ်းပုံစံနဲ့ တွဲဖက်တင်ဆက်ထားပါတယ်။ Old Boy နဲ့ လူသိများတဲ့ ပတ်ချန်းဝုဟာ ဒီရုပ်ရှင်နဲ့ ကိန်းရုပ်ရှင်ပွဲတော်မှာ အကောင်းဆုံးဒါရိုက်တာဆု ရရှိခဲ့ပါတယ်။

ဒယ်ဗာလန်ကာဆိုတဲ့ မြို့လေးကို ဘာဆီရက်ဒီနဲ့ ဆစ်ဟပ်ပါဆိုတဲ့ ဂန်းစတားနှစ်ယောက်က အုပ်စိုးထားပါတယ်။ သူတို့ရဲ့ဆရာကြီးဖြစ်တဲ့ ဥပဒေအရာရှိ ဆီဗာရက်ဒီ ကွယ်လွန်သွားပြီးနောက် နှစ်ယောက်စလုံးက နိုင်ငံရေးအာဏာရဖို့ အပြိုင်ကြိုးစားလာကြတယ်။ မြို့ခံတွေက သူတို့ကို မုန်းလည်းမုန်း၊ ကြောက်လည်းကြောက်ကြပေမယ့် ဘယ်သူမှ ပြန်မလှန်ရဲကြဘူး။ ဂန်ဂါရာဂျူးကတော့ အဲဒီမြို့မှာ သူငယ်ချင်းတွေနဲ့ ပေါက်ကရတွေလုပ်ရင်း နေတတ်တဲ့ လူငယ်တစ်ယောက်ပါ။ ဥမာဒေဝီဆိုတဲ့ ရဲမေလေး ရောက်လာတဲ့အခါ သူငယ်ချင်းတွေရဲ့အကူအညီနဲ့ သူက လိုက်ပိုးပါတော့တယ်။ တစ်နေ့မှာတော့ သူ့အဖေကို စော်ကားတဲ့ ဆစ်ဟပ်ပါရဲ့လူတွေကို ဂန်ဂါရာဂျူးက ရိုက်နှက်လိုက်တယ်။ အဲဒီကနေ ဂန်းစတားတွေလက်အောက်မှာ ဖိနှိပ်ခံနေရတဲ့ မြို့ခံတွေက အုံကြွလာပြီး သူ့ကို ဂန်းစတားတွေထက်တောင် အစွမ်းရှိသူလို့ ထင်ကာ ထောက်ခံမြှောက်စားကြပါတော့တယ်။ မြို့ခံတွေသာမက ချစ်သူရဲမေလေးကပါ သူ့ကို ဆရာ့ဆရာကြီးလို့ ထင်နေချိန်မှာ ဂန်ဂါရာဂျူးဟာ ဂန်းစတားနှစ်ဖွဲ့ရဲ့ အာဏာလုပွဲကြားကို ရောက်သွားပါတယ်။ ဒီအခြေအနေကို သူဘယ်လိုကိုင်တွယ်မလဲဆိုတာနဲ့အတူ သူငယ်ချင်းတွေရဲ့ ကူညီပံ့ပိုးမှုတွေကို ဟာသရောပြီး ပြထားတယ်။ တစ်ဖက်မှာလည်း အာဏာရှင်တွေလက်အောက်က မြို့ခံတွေရဲ့ဘဝနဲ့ သူတို့ကြုံရတဲ့ ရက်စက်မှုတွေကို ဖော်ပြထားပါတယ်။

The Next 365 Days ကတော့ 365 Days ဇာတ်ကားတွဲရဲ့ တတိယမြောက်ကားပါ။ ဒုတိယကားမှာ မပြီးပြတ်ခဲ့တဲ့ မာစီမို၊ လော်ရာနဲ့ နာရှိုတို့ရဲ့ သုံးပွင့်ဆိုင်အချစ်ရေးကို ဒီကားမှာ ဆက်ပြထားပါတယ်။ သူတို့သုံးယောက်ရဲ့ ဆက်ဆံရေး ဘယ်လိုရှေ့ဆက်သွားမလဲဆိုတာကနေ ဇာတ်လမ်းကို ဆက်ထားတာပါ။ ဒရာမာနဲ့ အချစ်ဇာတ်လမ်းအမျိုးအစားဖြစ်ပြီး အရင်ကားတွေလိုပဲ ပြင်းပြတဲ့ အချစ်ခန်း၊ အနမ်းခန်းတွေကို သီချင်းငြိမ့်ငြိမ့်တွေနဲ့ တွဲဖက်တင်ဆက်ထားပါတယ်။

တယ်ဂျူဟာ ပျော်ရွှင်တဲ့ မိသားစုမှာ ကြီးပြင်းလာခဲ့ပေမယ့် အကြောင်းတချို့ကြောင့် မိသားစုနဲ့ ဝေးကွာနေတဲ့ ကောင်မလေးတစ်ယောက်ပါ။ ယောက်ျားတွေနဲ့ အချစ်ကို စိတ်နာနေပြီး ကိုယ့်ဘဝကိုလည်း ဂရုမစိုက်တော့ဘဲ အရက်နွံထဲ နစ်နေခဲ့တယ်။ သူ့ကို အကြိုအပို့လုပ်ပေးနေတဲ့ တက္ကစီသမားကတော့ ဗီဗစ်လို့ခေါ်ပါတယ်။ တစ်ရက်မှာ ဗီဗစ်က တယ်ဂျူကို ဘဝပျက်သွားနိုင်တဲ့ အခြေအနေတစ်ခုကနေ ကယ်တင်ပေးလိုက်တယ်။ အဲဒီနောက် နှစ်ယောက်သား စကားလက်ဆုံကျကြရင်း တယ်ဂျူက သူ့ရဲ့ ပျော်ရွှင်ခဲ့ဖူးတဲ့ မိသားစုအကြောင်းနဲ့ အတိတ်ကို ပြောပြလာပါတယ်။ ဒါပေမယ့် နောက်ကြောင်းရှိနေတာ တယ်ဂျူတစ်ယောက်တည်း မဟုတ်ပါဘူး။ ဗီဗစ်မှာလည်း သူ့ဘဝအကြောင်း ရှိနေသေးတော့ သူတို့နှစ်ယောက် ဘယ်လိုပတ်သက်လာကြမလဲဆိုတာကို အလှည့်အပြောင်းတွေနဲ့ ဆက်ပြထားတဲ့ တေလဂူ အချစ်ဟာသဇာတ်ကားပါ။

အောင်မြင်ကျော်ကြားနေတဲ့ စာရေးဆရာတစ်ယောက်ဟာ ခရစ္စမတ်အားလပ်ရက်မှာ သူငယ်ငယ်က ကြီးပြင်းခဲ့တဲ့အိမ်ကို ပြန်သွားဖို့ အကြောင်းဖန်လာပါတယ်။ အဲဒီအချိန်မှာ ဘာသာပြန်ဆရာမတစ်ယောက်ကလည်း နာမည်တောင် မသိခဲ့ရတဲ့ သူ့မွေးအမေကို လိုက်ရှာနေတယ်။ မမျှော်လင့်ဘဲ တွေ့ဆုံလာကြတဲ့ သူတို့နှစ်ယောက်ကြားမှာ ဆက်နွှယ်မှုတစ်ခုလည်း ရှိနေပါတယ်။ ကိုယ်စီအတိတ်တွေကို ပြန်ရင်ဆိုင်ပြီး စိတ်ဒဏ်ရာတွေ ကုစားနိုင်ဖို့ ကြိုးစားကြတဲ့ သူတို့ကို ဆုံစည်းစေခဲ့တာက ဒိုင်ယာရီစာအုပ်လေးတစ်အုပ်ပါ။ နှင်းတွေဖွေးနေတဲ့ ဆောင်းရာသီမြင်ကွင်းတွေနဲ့ ခရစ္စမတ်အပြင်အဆင်တွေကြားမှာ သူတို့နှစ်ယောက်ရဲ့ အတိတ်အကြောင်းကို အေးအေးဆေးဆေး ပြောပြသွားပါတယ်။

An Autumn's Tale ဟာ Mabel Cheung ရဲ့ ရွှေ့ပြောင်းအခြေချသူတွေအကြောင်း ရိုက်ကူးထားတဲ့ သုံးကားတွဲထဲက ဒုတိယရုပ်ရှင်ဖြစ်ပြီး ချောင်ယွန်ဖတ်နဲ့ Cherie Chung တို့ အဓိက ပါဝင်ထားတဲ့ အချစ်ဒရာမာပါ။ ဇာတ်လမ်းတစ်ခုလုံးကို အမေရိကန်မှာ အခြေခံထားပြီး မန်ဟက်တန်တံတား၊ ဘရွတ်ကလင်းတံတား၊ ဝီလီယမ်ဘာ့ချ်တံတားနဲ့ နယူးယောက်တရုတ်တန်းတို့မှာ ရိုက်ကူးထားပါတယ်။ မြို့ရှုခင်းတွေကြားက ချောင်ယွန်ဖတ်ရဲ့ ဖိုသီဖတ်သီပုံစံကို တွဲဖက်ရိုက်ပြထားတဲ့ ဇာတ်ဝင်ခန်းတွေကို မူရင်းမှာ အထူးဖော်ပြထားတယ်။ Hong Kong Film Awards ရဲ့ Best 100 Chinese Motion Pictures စာရင်းမှာ အဆင့် ၄၉ ရထားပြီး အကောင်းဆုံးရုပ်ရှင်၊ အကောင်းဆုံးရုပ်ရှင်ဓာတ်ပုံနဲ့ အကောင်းဆုံးဇာတ်ညွှန်းဆုတွေ ရရှိထားပါတယ်။ အဲဒီစာရင်းမှာ သူ့အထက်က အချစ်ဇာတ်ကားတွေအဖြစ် မူရင်းက နှိုင်းယှဉ်ထားတဲ့ Comrades: Almost a Love Story၊ Chungking Express နဲ့ Days of Being Wild တို့ထက် စောထွက်ခဲ့တဲ့ကားလည်း ဖြစ်ပါတယ်။ ချောင်ယွန်ဖတ်က ဒီကားမှာ ခပ်ပေပေပုံစံနဲ့ သရုပ်ဆောင်ထားပြီး သူနဲ့ ဇာတ်ကားအများအပြား တွဲဖက်ရိုက်ကူးဖူးတဲ့ Cherie Chung လည်း ပါဝင်ထားတယ်။ Cherie Chung ဟာ Fatal Love နဲ့ Once a Thief တို့မှာလည်း အဓိကဇာတ်ကောင်အဖြစ် ပါဝင်ခဲ့သူဖြစ်ပြီး ဒီကားအတွက် သရုပ်ဆောင်ဆု ဆန်ခါတင်စာရင်း ဝင်ခဲ့ပါတယ်။

အယုဒ္ဓယခေတ်မှာ သေကွဲကွဲခဲ့ရတဲ့ ချစ်သူနှစ်ယောက်ဟာ နောက်ဘဝမှာ Bhop နဲ့ Gaysorn အဖြစ် လူပြန်ဝင်စားလာကြပါတယ်။ ဒါပေမယ့် အတိတ်ဘဝက ချစ်သူကို မှတ်မိနေသူက Bhop တစ်ယောက်တည်းပါ။ သူဟာ အဲဒီမိန်းကလေးကို အိပ်မက်ထဲမှာ ဆယ်နှစ်လုံးလုံး တွေ့နေခဲ့တာဖြစ်ပြီး အိပ်မက်ထဲကပုံစံနဲ့ တစ်ထပ်တည်းတူတဲ့ Gaysorn ကို တွေ့လိုက်ချိန်မှာတော့ အနောက်က တကောက်ကောက်လိုက်ရတဲ့အထိ အရူးအမူး ဖြစ်သွားတယ်။ Gaysorn ကတော့ ကံမကုန်လို့ ပြန်ဆုံရတယ်ဆိုတာမျိုးကို မယုံကြည်သူပါ။ သူစိတ်ဝင်စားနေတာက ခေတ်ဆန်တဲ့ ဗန်းစကားတွေ ညှပ်ပြောတတ်တဲ့ Mathus ဆိုတဲ့ ကောင်လေးဖြစ်ပါတယ်။ Mathus ရဲ့အကြောင်းကလည်း အယုဒ္ဓယခေတ် မှတ်တမ်းစာအုပ်ထဲက ရှေ့ဖြစ်ဟောတမ်းတွေနဲ့ တိုက်တိုက်ဆိုင်ဆိုင် ကိုက်ညီနေတယ်။ တကယ်တော့ Mathus ဟာ အနာဂတ်ကနေ အချိန်ခရီးသွားလာသူပါ။ ရှေးခေတ်ချစ်သူနှစ်ယောက်ကြား ဝင်ညပ်နေတဲ့အပြင် နန်းတွင်းပုန်ကန်မှု အရှုပ်တော်ပုံထဲကိုပါ ရောက်သွားပါတယ်။ သမိုင်းနောက်ခံ အချစ်ဟာသဇာတ်ကားဖြစ်ပြီး My Ambulance ဇာတ်ဝင်သီချင်း အဆိုတော် P'Paris လည်း ပါဝင်သရုပ်ဆောင်ထားပါတယ်။

Original Sin မှာ အလန်နဲ့ ဗားဂတ်တို့ ပြောကြတဲ့ စကားတစ်ခွန်းက အချစ်နဲ့ တဏှာကြားက ကွာခြားချက်ကို မေးထားပါတယ်။ ဗားဂတ် ခံစားနေရတာ အချစ်လား၊ တဏှာသက်သက်လားလို့ အလန်က မေးတဲ့အခါ ဗားဂတ်က အဲဒီနှစ်ခုမှာ ကွာခြားမှုရှိလို့လားလို့ ပြန်မေးတယ်။ အလန်ရဲ့အမြင်မှာ ချစ်တယ်ဆိုတာ ပေးပြီးရင်း ပေးချင်နေတာဖြစ်ပြီး တဏှာကတော့ ယူပြီးရင်း ယူချင်နေတာပါ။ ကိုယ်က ပေးချင်တာလား၊ ယူချင်တာလားဆိုတဲ့ မေးခွန်းကိုတော့ ဗားဂတ်က နှစ်ခုစလုံးလို့ ဖြေပါတယ်။ သူချစ်တဲ့သူကို အရာရာပေးချင်သလို အဲဒီလူဆီက အရာအားလုံးကိုလည်း ရချင်တယ်။ ဒီအဖြေကြားတော့ အလန်က သူ့ကို အချစ်မှာ အရှုံးသမားဖြစ်နေပြီလို့ ပြောလိုက်တယ်။ ဒီစကားဝိုင်းကတစ်ဆင့် အချစ်မှာ ရှုံးနိမ့်ရတဲ့ ခံစားချက်ကို မိတ်ဆက်ထားတာပါ။ ၂၀၀၁ ခုနှစ်ထွက် ဒီဇာတ်ကားမှာ Antonio Banderas နဲ့ Angelina Jolie တို့ အဓိကပါဝင်ထားပြီး အချစ်၊ ဒရာမာ၊ လျှို့ဝှက်ဆန်းကြယ်မှုနဲ့ သည်းထိတ်ရင်ဖိုအကြောင်းအရာတွေ ပါဝင်ပါတယ်။ ကိုယ်လုံးတီးပြကွက်တချို့ ပါဝင်တဲ့ R အဆင့်သတ်မှတ်ထားသော ဇာတ်ကားဖြစ်ပါတယ်။

စုမ်ဆိုတဲ့ ကောင်မလေးအတွက် ချစ်သူရွေးဖို့ ဆုံးဖြတ်ရခက်နေပါတယ်။ မြို့သားလေး ပလားက သူ့ကို မြင်မြင်ချင်း စွဲလမ်းသွားသူဖြစ်ပြီး ရွာမှာပဲ မွေးဖွားကြီးပြင်းလာတဲ့ သူငယ်ချင်း နွိုင်ကတော့ အရင်ကတည်းက သူ့ကို ချစ်နေခဲ့သူပါ။ စုမ်က ဒီနှစ်ယောက်ထဲက ဘယ်သူ့ကို ရွေးမလဲဆိုတဲ့ သုံးပွင့်ဆိုင်အချစ်အကြောင်းကို ဟာသနဲ့ ရောစပ်ထားပါတယ်။ သူတို့သုံးယောက်ရဲ့အကြောင်းကြားမှာ ဆရာတော်ချိုင်နဲ့ ကပ္ပိယနှစ်ယောက်တို့ရဲ့ အလွဲတွေကိုလည်း ထည့်ထားတယ်။ ဇာတ်လမ်းတစ်လျှောက် သီချင်းတွေနဲ့ ပုံဖော်ထားပြီး ဟာသသီချင်းတွေ၊ အဆွေးသီချင်းတွေပါ ပါဝင်ပါတယ်။ ၂၀၂၁ ခုနှစ်ထွက် ထိုင်းအချစ်ဟာသရုပ်ရှင်ဖြစ်ပြီး စုမ်အဖြစ် Oom Eisaya Hosuwon၊ နွိုင်အဖြစ် Tono Phakin Khamwilaisak နဲ့ ပလားအဖြစ် Toey Apiwat Boonanak တို့ သရုပ်ဆောင်ထားပါတယ်။ ဝါရင့်သရုပ်ဆောင်တွေလည်း ပါဝင်အားဖြည့်ထားကြပါတယ်။

ဖရက်ဒီက အသက် ၂၈ နှစ်အထိ ရည်းစားမထားဖူးသေးတဲ့ သွားဆရာဝန်တစ်ယောက်ပါ။ မိဘမရှိတော့ဘဲ အဒေါ်နှစ်ယောက်ရဲ့ အုပ်ထိန်းမှုအောက်မှာ နေထိုင်နေရတယ်။ ရိုးအေးပြီး အူတူတူနိုင်တဲ့ သူ့ပုံစံကို မိန်းကလေးတွေက သဘောမကျကြတဲ့အတွက် အချစ်ကို ရှာဖွေရင်း အထီးကျန်နေခဲ့ပါတယ်။ ဒီလိုနဲ့ သူ့ဘဝထဲကို စိတ်လှုပ်ရှားရင်ခုန်စရာတွေ ယူလာပေးတဲ့ မိန်းကလေးတစ်ယောက် ရောက်လာတယ်။ အဲဒီမိန်းကလေးမှာ အိမ်ထောင်ရှိပေမယ့် ဖရက်ဒီက ချစ်မိသွားပြီး လက်ထပ်ဖို့အထိ စဉ်းစားကာ ချဉ်းကပ်ပါတော့တယ်။ မိန်းကလေးကလည်း ခင်ပွန်းရဲ့ အထက်စီးဆန်ဆန် ချုပ်ကိုင်မှုနဲ့ နှိပ်စက်မှုတွေကို ခံနေရသူပါ။ အချစ်ကို အခုမှတွေ့လာတဲ့ ဖရက်ဒီနဲ့ အိမ်ထောင်ရေးထဲမှာ နှိပ်စက်ခံနေရတဲ့ မိန်းကလေးတို့ ရှေ့ဆက် ဘယ်လိုဖြစ်ကြမလဲ။ လျှို့ဝှက်ဆန်းကြယ်မှုနဲ့ သည်းထိတ်ရင်ဖို လှည့်ကွက်တွေကြားမှာ သူတို့တွေ့ဆုံခဲ့ကြတာက ကံကြမ္မာကြောင့်လား၊ တစ်ယောက်ယောက်က ဖန်တီးထားတာလားဆိုတဲ့ မေးခွန်းလည်း ရှိနေပါတယ်။

ဆွစ်ဇာလန်ရဲ့ ရှုခင်းတွေကြားမှာ ဆွီဒင်အမျိုးသမီး ခြောက်ယောက်ရဲ့အကြောင်းကို တင်ဆက်ထားပါတယ်။ သူတို့ ရောက်လေရာမှာ တွေ့သမျှ အမျိုးသားတွေနဲ့ လိင်ပိုင်းဆိုင်ရာ အတွေ့အကြုံတွေ ရှာဖွေကြပုံကို ဇာတ်လမ်းဖွဲ့ထားပြီး လိင်အသားပေးဟာသနဲ့ အဖော်အချွတ်မြင်ကွင်းတွေ ပါဝင်ပါတယ်။

အမေရိကန် တိုက်လေယာဉ်သင်တန်းကျောင်းတစ်ခုကို နောက်ခံထားပြီး လေသူရဲတစ်ယောက်နဲ့ ဆရာမတစ်ယောက်တို့ရဲ့ အချစ်အကြောင်းကို ရိုက်ကူးထားပါတယ်။ တွမ်ခရုစ်နဲ့ Kelly McGillis တို့ ပါဝင်သရုပ်ဆောင်ထားပြီး မူရင်းအညွှန်းမှာတော့ Kelly McGillis ရဲ့ သရုပ်ဆောင်မှုက တွမ်ခရုစ်ရဲ့ သရုပ်ဆောင်မှုကို ပံ့ပိုးပေးနိုင်ခဲ့တယ်လို့ ဖော်ပြထားပါတယ်။ ၁၉၈၆ ခုနှစ်မှာ ထွက်ရှိခဲ့တဲ့ ဒီဇာတ်ကားရဲ့ အဆက် Top Gun: Maverick ကတော့ နှစ်သုံးဆယ်ကျော်အကြာ ၂၀၂၂ ခုနှစ်မှာ ထွက်ရှိခဲ့ပါတယ်။

365 Days ရဲ့ ဒုတိယကားမှာ လော်ရာဟာ ဥမင်လိုဏ်ခေါင်းထဲ ပြိုင်ဘက်မာဖီးယားဂိုဏ်းရဲ့ တိုက်ခိုက်မှုကို ခံခဲ့ရပြီး ကိုယ်ဝန်ပျက်ကျသွားတဲ့အခြေအနေကနေ ဇာတ်လမ်းစပါတယ်။ ဒီအကြောင်းကို မာစီမိုဆီ မပြောဘဲ ပုံမှန်ဘဝအတိုင်း ဆက်ဖြတ်သန်းဖို့ သူဆုံးဖြတ်ထားတယ်။ ဒါပေမယ့် မာစီမိုရဲ့ ပျောက်နေတဲ့ညီ ပြန်ပေါ်လာသလို ပြိုင်ဘက်မာဖီးယားဂိုဏ်းရဲ့ နှောင့်ယှက်တိုက်ခိုက်မှုတွေနဲ့လည်း ကြုံလာရပါတယ်။ ဒီအခြေအနေတွေကြားမှာ မာစီမိုနဲ့ လော်ရာတို့နှစ်ယောက် ဘယ်လိုကြံ့ကြံ့ခံ ဖြတ်သန်းကြမလဲ။ သူတို့နှစ်ယောက်အပြင် ပြိုင်ဘက်ဂိုဏ်းဘက်က ဇာတ်ကောင်အသစ်တွေလည်း ပါလာပြီး ပထမကားလိုပဲ အဝတ်အစားမပါဝင်တဲ့ အခန်းများနဲ့ ငြိမ့်ငြောင်းတဲ့ နောက်ခံတေးဂီတကို တွဲဖက်ထားပါတယ်။