အချစ်ဇာတ်လမ်းများ

အထက်တန်းကျောင်းသူတွေကြားမှာ ဖုန်းတစ်ခေါ်နဲ့ လိုချင်တဲ့ဆုတောင်း ပြည့်နိုင်တယ်ဆိုတဲ့ ကောလဟာလတစ်ခု ပျံ့နေပါတယ်။ ဖုန်းဆက်ရမယ့်သူက နတ်ဆိုးတစ်ပါးဖြစ်ပြီး ဆုတောင်းပြည့်ဖို့အတွက် ဖုန်းပြောတဲ့ကြာချိန်လောက် ကိုယ့်အသက်ထဲကနေ ဖဲ့ပေးရမယ်တဲ့။ ကြားရသလောက်တော့ အလဲအလှယ်က ရိုးရိုးလေးပါပဲ။ ဒါပေမယ့် နတ်ဆိုးက ဒီလောက်နဲ့တင် ကျေနပ်မှာလား။ ဆုတောင်းသူတွေကို ဘယ်လိုချုပ်ကိုင်သွားမလဲ၊ သူတို့ ဘယ်အတိုင်းအတာအထိ ခံစားကြရမလဲဆိုတဲ့ မေးခွန်းတွေနဲ့ ဆက်သွားတဲ့ ထိတ်လန့်စရာဇာတ်လမ်းပါ။

ဆန်ဖရန်စစ္စကိုမြို့က လူကုံထံမိသားစုရဲ့ တစ်ဦးတည်းသောသမီး အာဆယ်လာဟာ လူဝံတွေကို ကြည့်ချင်လို့ အာဖရိကတောထဲ ခရီးထွက်လာပါတယ်။ အဲဒီတောမှာ နေတဲ့ ဂျော့ကတော့ ငယ်ငယ်က လေယာဉ်ပျက်ကျရာကနေ တောထဲရောက်လာပြီး လူဝံထီးကြီးတစ်ကောင်ရဲ့ စောင့်ရှောက်မှုအောက်မှာ ကြီးပြင်းခဲ့သူပါ။ လူ့အသိုင်းအဝိုင်းနဲ့ ဝေးကွာနေခဲ့တဲ့ ဂျော့နဲ့ အာဆယ်လာတို့ အဲဒီမှာ ဆုံမိကြတယ်။ အာဆယ်လာက ဂျော့ကို ချစ်မိပြီး ခင်ပွန်းလောင်းကို စွန့်လွှတ်လိုက်ပါတယ်။ ဒါပေမယ့် သူတို့နှစ်ယောက်ရဲ့ အသိုင်းအဝိုင်းက ကွာခြားလွန်းတာကြောင့် အာဆယ်လာရဲ့ အမေက သဘောမတူဘူး။ တစ်ဖက်မှာလည်း ဂျော့ကို မွေးစားစောင့်ရှောက်ခဲ့တဲ့ လူဝံကြီးကို တရားမဝင်မုဆိုးနှစ်ယောက်က ဖမ်းခေါ်သွားကြပါတယ်။ အချစ်ရေးအခက်အခဲတွေနဲ့ တောတွင်းက အဖြစ်အပျက်တွေကို ဟာသတွေနဲ့ တွဲထားတဲ့ ဇာတ်လမ်းပါ။ George of the Jungle နှစ်ကားထဲက ၁၉၉၇ ခုနှစ်ထွက် ပထမကားဖြစ်ပြီး Brendan Fraser နဲ့ Leslie Mann တို့ ပါဝင်သရုပ်ဆောင်ထားပါတယ်။

ဇနီးသည် ဆုံးပါးသွားလို့ မုဆိုးဖိုဖြစ်ခါစ ဦးနှောက်ခွဲစိတ်ဆရာဝန်တစ်ယောက်ဟာ အမျိုးသမီးတစ်ယောက်ကို ကားနဲ့ တိုက်မိသွားပါတယ်။ ဦးခေါင်းဒဏ်ရာရသွားတဲ့ သူ့ကို ဆရာဝန်က ကိုယ်တိုင်တီထွင်ထားတဲ့ ခွဲစိတ်နည်းနဲ့ အသက်ကယ်ပေးလိုက်တယ်။ အမျိုးသမီး သတိပြန်ရလာတဲ့နောက်မှာတော့ သူ့စရိုက်အမှန်ကို မသိသေးဘဲ ချစ်မိသွားပြီး လက်ထပ်လိုက်ပါတယ်။ သူတို့နှစ်ယောက် ဩစတြီးယားနိုင်ငံကို ပျားရည်ဆမ်းခရီး ထွက်လာကြရင်း ဆရာဝန်က ထူးဆန်းတဲ့ ဆရာဝန်တစ်ဦးနဲ့ ဆုံမိတယ်။ စကားပြောမိရာကနေ ထူးခြားတဲ့ လူသတ်မှုတွေအကြောင်းနဲ့ အသတ်ခံလိုက်ရတဲ့ သူ့သူငယ်ချင်းဆရာဝန်အကြောင်းကို သိလာရသလို စကားပြောတတ်တဲ့ ဦးနှောက်တစ်လုံးနဲ့လည်း တွေ့သွားပါတယ်။ တစ်ဖက်မှာလည်း ဇနီးဖြစ်သူရဲ့ စရိုက်အမှန်ကို သိလာတဲ့အခါ သူ ဘယ်လိုဆက်ဖြေရှင်းမလဲဆိုတာကို ထေ့လုံးငေါ့လုံးတွေပါတဲ့ သိပ္ပံစိတ်ကူးယဉ်ဟာသအဖြစ် ရိုက်ထားတာပါ။ အဝတ်အစားမပါတဲ့ ပြကွက်တွေနဲ့ လိင်ပိုင်းဆိုင်ရာ စကားအသုံးအနှုန်းတွေ ပါဝင်တာကြောင့် ကလေးတွေအတွက် မသင့်တော်ပါဘူး။

ဂင်ဂျူရှစ်က ခရစ်ယာန်ဘာသာကို အလေးအနက် ယုံကြည်သက်ဝင်တဲ့ လူငယ်တစ်ယောက်ပါ။ သူ့ဘဝတစ်လျှောက်လုံး ဖာသာတစ်ဦးအဖြစ် ဖြတ်သန်းသွားဖို့ ရည်ရွယ်ထားတာကြောင့် ခရစ်ယာန်ကျောင်းတော်မှာ ကျင့်ဝတ်တွေကို သေချာလိုက်နာသလို စာလည်း ကြိုးကြိုးစားစား သင်ယူနေပါတယ်။ တစ်နေ့မှာတော့ သူနေတဲ့ကျောင်းတော်က ဖာသာကြီးရဲ့သမီးဟာ အမေရိကမှာ ကျောင်းတက်နေရင်း ကျောင်းပိတ်လို့ ပြန်ရောက်လာတယ်။ ကောင်မလေးက ခေတ်ဆန်တယ်၊ ပွင့်ပွင့်လင်းလင်း နေတတ်ပြီး အရာရာကိုလည်း စူးစမ်းချင်သူပါ။ ဘာသာရေးကိုသာ ပထမထားတဲ့ ရှေးရိုးစွဲ ဂျူရှစ်နဲ့ ဒီကောင်မလေး ဆုံမိတဲ့အခါ ဘာတွေဖြစ်လာမလဲဆိုတာကို အချစ်ဟာသဇာတ်လမ်းအဖြစ် ရိုက်ထားပါတယ်။

ကျောက်ရှင်းဟွေ့နဲ့ လင်ဟန့်ချုံးတို့က ငယ်ငယ်ကတည်းက သူငယ်ချင်းတွေဖြစ်ခဲ့ကြပြီး တစ်ယောက်ကိုတစ်ယောက် ရင်ခုန်ခဲ့ကြသူတွေပါ။ ဒါပေမဲ့ တစ်နေရာစီ ဝေးကွာနေရတာနဲ့ မိသားစုပြဿနာတွေကြောင့် သူတို့နှစ်ယောက် အကြိမ်ကြိမ် ခွဲခွာခဲ့ရပါတယ်။ ရှင်းဟွေ့တစ်ယောက် တွေဝေနေချိန်မှာ ဟန့်ချုံး အသံသွင်းထားတဲ့ ကက်ဆက်ခွေလေး သူ့ဆီ ရောက်လာတယ်။ အဲဒီခွေကို နားထောင်ပြီးနောက်မှာတော့ အတိတ်က အမှတ်တရတွေကို ပြန်လိုက်ရင်း သူချစ်ရသူကို ရှာဖို့ တစ်ရက်တာခရီး ထွက်လာပါတယ်။ ဒီခရီးမှာ ရှင်းဟွေ့တစ်ယောက် ဟန့်ချုံးကို ပြန်ရှာတွေ့နိုင်မလား။ သူတို့နှစ်ယောက်ရဲ့ အချစ်ကရော ကြားထဲက အခက်အခဲတွေကို ကျော်ဖြတ်နိုင်ပါ့မလား။

အက်ဘီဟာ ဖဲသမားအဖေရဲ့ အုပ်ထိန်းမှုအောက်မှာ ကြီးပြင်းလာခဲ့တဲ့ မိန်းကလေးပါ။ အမေကလည်း မိသားစုကို စွန့်ခွာသွားခဲ့တာကြောင့် သူ့ငယ်ဘဝက မသာယာခဲ့ဘူး။ ငယ်ငယ်ကတည်းက ပိုကာနဲ့ ရင်းနှီးလာပြီး ပါရမီထူးသူတစ်ယောက် ဖြစ်လာပေမယ့် အက်ဘီလိုချင်တာက အဖေ့လိုဘဝမျိုးမဟုတ်ဘဲ တည်ငြိမ်အေးချမ်းတဲ့ သာမန်ဘဝလေးပါ။ ဒါကြောင့် အဖေဆီကနေ ထွက်လာပြီး ပိုကာလောကမှာ Lucky 13 လို့ သိကြတဲ့ဘဝကို ချန်ထားကာ ကောလိပ်ကျောင်းသူတစ်ယောက်အဖြစ် အသစ်စဖို့ ကြိုးစားခဲ့တယ်။ ဒါပေမယ့် သူငယ်ချင်းကြောင့် ဖိုက်တာလေး ထရားဗစ်ရဲ့ လက်ဝှေ့ပွဲကို သွားကြည့်ဖြစ်တဲ့အခါ ထရားဗစ်က အက်ဘီကို သဘောကျသွားပါတယ်။ အက်ဘီကတော့ အေးအေးချမ်းချမ်း နေချင်တဲ့သူမို့ ပလေးဘွိုင်းလေး ထရားဗစ်ကို အပြင်းအထန်ငြင်းပြီး တည်ကြည်တဲ့ ဆရာဝန်လေး ပါကာကိုသာ လက်ခံဖို့ ကြိုးစားနေတယ်။ ထရားဗစ်ဘက်ကလည်း အလွယ်တကူ လက်လျှော့မယ့်သူ မဟုတ်ပါဘူး။ တစ်ယောက်ကလိုက်၊ တစ်ယောက်ကရှောင်နေကြတဲ့ သူတို့နှစ်ယောက်ကြားကို အလောင်းအစားတစ်ခု ဝင်လာတဲ့အခါ နာမည်တပ်ရခက်နေတဲ့ ဆက်ဆံရေးက ပိုပြီးပေါ်လွင်လာတယ်။ အရှုပ်အထွေးတွေကနေ လွတ်ချင်တဲ့ အက်ဘီဟာ ထရားဗစ်ကိုပဲ စွဲလမ်းမိလာသလို လူမသိစေချင်တဲ့ အတိတ်ကလည်း ပြန်ပြီး ဒုက္ခပေးလာပါတယ်။ ဒီအချစ်ရေးနဲ့ အတိတ်ကပြဿနာတွေကို အက်ဘီ ဘယ်လိုရင်ဆိုင်မလဲဆိုတာ ပေါ့ပေါ့ပါးပါး လူငယ်အချစ်ဇာတ်လမ်းအဖြစ် ဆက်ပြထားပါတယ်။

ယွန်းဟီးဟာ စိတ်ကူးယဉ်ပြီး fanfic ရေးတဲ့နေရာမှာ ကျွမ်းကျင်ပေမယ့် လက်တွေ့မှာတော့ ရည်းစားတစ်ခါမှ မထားဖူးသူပါ။ အချစ်ရေးအတွေ့အကြုံမရှိဘဲ အချစ်ဝတ္ထုတွေရေးနေရတဲ့ သူ့ကို အယ်ဒီတာက လူကြီးဖတ် R-rated ဇာတ်လမ်းပါ ရေးခိုင်းလာတော့ အခက်တွေ့ရပါတော့တယ်။ စိတ်ကူးနဲ့ပဲ ရေးကြည့်ပေမယ့် အလုပ်က မတွင်ဘူးဖြစ်နေတယ်။ ဒါနဲ့ ယွန်းဟီးတစ်ယောက် ပထမဆုံးအတွေ့အကြုံကို ရှာဖို့ ဖြစ်လာပါတယ်။ တစ်ဖက်မှာလည်း စိတ်ထဲကနေ တိတ်တိတ်လေး သဘောကျနေတဲ့ အစ်ကိုကြီးကို လက်မလွှတ်ချင်ဘူး။ သူ ဘယ်လိုရွေးချယ်မလဲ၊ အတွေ့အကြုံကို ဘယ်လိုရှာမလဲဆိုတာနဲ့အတူ သူငယ်ချင်းဆက်ဆံရေးတွေကိုပါ တွေ့ရမယ့် အချစ်ဟာသဇာတ်လမ်းပါ။

အသက် ၂၉ နှစ်အရွယ် အင်ဆူရွန်းဟာ ကိုယ့်မွေးရပ်မြို့လေးနဲ့ သဘာဝတရားကို ချစ်မြတ်နိုးသူပါ။ သင်္ခါရတရားကို နားလည်ထားတဲ့ ရင့်ကျက်သူတစ်ယောက်ဖြစ်ပြီး သူ့နောက်မှာတော့ အသက် ၂၆ နှစ်အရွယ် ဂျွန်းလေးက အမြဲတကောက်ကောက် လိုက်နေတတ်ပါတယ်။ ဇာတ်လမ်းက ဒီနှစ်ယောက်ကြားက အချစ်အကြောင်းကို အလှည့်အပြောင်းတွေနဲ့ ပြောပြထားတာပါ။ ၂၀၁၇ ခုနှစ်မှာ ထွက်ရှိခဲ့တဲ့ ကိုရီးယား အချစ်နဲ့မိသားစုဒရာမာကားဖြစ်ပြီး အင်ဆူရွန်းအဖြစ် အဆိုတော်၊ သရုပ်ဆောင် BoA နဲ့ ဂျွန်းလေးအဖြစ် Lee Hak Joo တို့ ပါဝင်ထားပါတယ်။

Bridget Jones ရဲ့ တတိယမြောက်ကားဟာ ဒုတိယကားထွက်ပြီး ဆယ်နှစ်လောက်အကြာ ၂၀၁၆ ခုနှစ်မှာ ထွက်လာတာပါ။ ဒီတစ်ခါမှာ ဒယ်နီရယ်ဇာတ်ကောင် မပါလာတော့ဘဲ နောက်ထပ်အမျိုးသားဇာတ်ကောင်တစ်ယောက် ပါလာပါတယ်။ ဘရစ်ဂျစ်နဲ့ မာ့ခ်တို့ကလည်း သဘောထားမတိုက်ဆိုင်ကြတာကြောင့် လမ်းခွဲထားကြပြီ။ မာ့ခ်ဟာ တခြားတစ်ယောက်နဲ့ အိမ်ထောင်ပြုပြီး ကွာရှင်းထားသလို ဘရစ်ဂျစ်ကတော့ သူငယ်ချင်းတွေ မိသားစုကိုယ်စီနဲ့ ဖြစ်နေချိန်မှာ တစ်ကိုယ်တည်း အလုပ်ပဲလုပ်နေခဲ့ပါတယ်။ အလုပ်ကသူငယ်ချင်း တိုက်တွန်းလို့ ဂီတပွဲတစ်ခုကို သွားရင်း အမှတ်မထင်ဆုံတဲ့ အမျိုးသားတစ်ယောက်နဲ့ အတူအိပ်ဖြစ်သွားတယ်။ နောက်တော့ သူငယ်ချင်းရဲ့ကလေး ကင်ပွန်းတပ်ပွဲမှာ မာ့ခ်နဲ့အတူ ခေါင်းကိုင်မိဘတွေအဖြစ် ပါဝင်ရင်း သူတို့နှစ်ယောက်လည်း ပြန်အဆင်ပြေသွားပါတယ်။ ဒါပေမဲ့ သုံးခဲ့တဲ့ အကာအကွယ်ပစ္စည်းတွေက သက်တမ်းလွန်နေတဲ့အတွက် ဘရစ်ဂျစ်မှာ ကိုယ်ဝန်ရှိလာပြီး ကလေးရဲ့ဖခင်က ဘယ်သူလဲဆိုတာ မသိတော့ဘူး။ ဂီတပွဲမှာဆုံခဲ့တဲ့ အမျိုးသားကလည်း မီလီယံနာသူဌေးတစ်ယောက် ဖြစ်နေပါတယ်။ ကိုယ်ဝန်အကြောင်း သိသွားကြတဲ့အခါ နှစ်ယောက်လုံးက ဘရစ်ဂျစ်နဲ့ ကလေးကို အပြိုင်ဂရုစိုက်လာကြတယ်။ မာ့ခ်ကတော့ အလုပ်များလို့ ဘရစ်ဂျစ်လိုအပ်တဲ့အချိန် မရောက်လာနိုင်တာတွေရှိပြီး ကတောက်ကဆ ဖြစ်ရပြန်ပါတယ်။ DNA စစ်တဲ့အခါ ကလေးရဲ့ဖခင်က ဘယ်သူဖြစ်နေမလဲ၊ ဘရစ်ဂျစ်ကရော ဘယ်သူ့ကိုရွေးမလဲ၊ သူချစ်တဲ့သူနဲ့ ကလေးရဲ့ဖခင်က တစ်ယောက်တည်းဖြစ်နေမလားဆိုတဲ့ မေးခွန်းတွေကြားမှာ ဟာ

သစ္စာဖောက်ခံထားရတာကို သိလိုက်ရတဲ့ Carlinhos ဟာ ခရစ္စမတ်မှာ အဖော်ရဖို့ ပျော်ပျော်နေတတ်တဲ့ သူစိမ်းတစ်ယောက်ကို ခေါ်လာပါတယ်။ ဒါပေမဲ့ Graça ဆိုတဲ့ အဲဒီအမျိုးသမီးက ထင်ထားတာထက် ကဲလွန်းသူဖြစ်နေပြီး အစဉ်အလာတွေကို လိုက်နာတဲ့ သူ့မိသားစုအိမ်တစ်ခုလုံးကို ကမောက်ကမဖြစ်သွားစေနိုင်သူ ဖြစ်နေတော့တယ်။

အီဗန်ဆိုတဲ့ ကောင်လေးတစ်ယောက်ဟာ ကိုယ့်ကိုယ်ကိုယ် ပြန်ရှာဖွေဖို့ အီတလီကို ခရီးထွက်လာပါတယ်။ အဲဒီမှာ လျှို့ဝှက်ဆန်းကြယ်တဲ့ ကောင်မလေး လူးဝစ်နဲ့ တွေ့ဆုံပြီး သူတို့နှစ်ယောက်ရဲ့ ဇာတ်လမ်း စလာတယ်။ နယ်မြို့လေးရဲ့ ရှုခင်းတွေကြားမှာ သူတို့ရဲ့ဆက်ဆံရေး တဖြည်းဖြည်း ပြောင်းလဲလာပုံကို ပြထားပါတယ်။ လူးဝစ်မှာတော့ လျှို့ဝှက်ချက်ကြီးတစ်ခု ရှိနေတယ်။ အီဗန်က အဲဒီအကြောင်းကို သိသွားတဲ့အခါ သူတို့နှစ်ယောက်ကြား ဘာတွေဆက်ဖြစ်လာမလဲဆိုတာကို အချစ်ဇာတ်လမ်းနဲ့ ထိတ်လန့်စရာတွေ ရောစပ်ပြီး ဆက်ထားပါတယ်။

ပလတ်စတစ်ဆာဂျရီပညာရှင် ဒန်နီယယ်မက်ကာဘီးဟာ လက်ထပ်ခါနီးမှာ ဇနီးလောင်းက သူ့မကောင်းကြောင်း ပြောနေတာကို ကြားလိုက်ရပြီး မင်္ဂလာပွဲပျက်ခဲ့သူပါ။ အဲဒီအဖြစ်ကြောင့် စိတ်ဒဏ်ရာရခဲ့ပေမယ့် လက်ထပ်လက်စွပ်ကိုတော့ မစွန့်ပစ်ခဲ့ဘူး။ နောက်ပိုင်းမှာ အဲဒီလက်စွပ်ကိုပြပြီး မိန်းမရဲ့နှိပ်စက်မှု ခံနေရသူလို ဟန်ဆောင်ကာ ကောင်မလေးတွေဆီက သနားစိတ်ကို ရယူနေတော့တယ်။ တစ်နေ့ သူတကယ်သဘောကျတဲ့ ကောင်မလေးတစ်ယောက်နဲ့ တွေ့လာပေမယ့် လက်စွပ်အကြောင်းကို အမှန်အတိုင်း မပြောချင်တဲ့အခါ နောက်ထပ်အလိမ်အညာတွေ ဆင်ရပြန်ပါတယ်။ ဒီတစ်ခါတော့ သူ့လက်ထောက်နဲ့ လက်ထောက်ရဲ့သားသမီးတွေကိုပါ ကူလိမ်ပေးဖို့ ဆွဲထည့်လိုက်တယ်။ အဲဒီသားအမိတွေကလည်း အခွင့်အရေးရတုန်း ဝင်မွှေကြတော့ ဒန်နီရဲ့ပြဿနာတွေ ပိုကြီးလာပါတယ်။ သူသဘောကျတဲ့ ကောင်မလေးနဲ့ အဆင်ပြေမလား၊ အလိမ်အညာတွေပဲ ပေါ်သွားမလားဆိုတာ ဆက်တွေ့ရမှာပါ။ ၂၀၁၁ ခုနှစ်ထွက် အချစ်ဟာသဇာတ်ကားဖြစ်ပြီး Adam Sandler၊ Jennifer Aniston နဲ့ Brooklyn Decker တို့ ပါဝင်သရုပ်ဆောင်ထားပါတယ်။

မြေအောက်မှာ ရတနာတွေဖွက်ထားရင် ခိုးယူခံရနိုင်တာကြောင့် ယိ၊ ကျန်း၊ တင်း ဆိုတဲ့ မျိုးနွယ်သုံးစုရဲ့ အကူအညီနဲ့ ရေအောက်မှာ ရတနာသိုက်တွေ တည်ပြီး မြှုပ်နှံကြပါတယ်။ ဒီမျိုးနွယ်တွေထဲမှာ ရေအောက်မှာ အသက်ရှူနိုင်ပြီး စိတ်ကြိုက်သွားလာနိုင်တဲ့ ထူးခြားသူတွေ ရှိနေတယ်။ သူတို့ကို ရေသရဲလို့ ခေါ်ကြပါတယ်။ ယိဆာ့ဆိုတဲ့ ကောင်မလေးကတော့ ထူးဆန်းတဲ့ရောဂါတစ်ခုကို ကုသဖို့ ကြိုးစားနေသူပါ။ တစ်ချိန်တည်းမှာပဲ သူငယ်ငယ်တုန်းက သူတို့မျိုးနွယ်တစ်စုလုံး မျိုးတုံးလုနီးပါး ဖြစ်ခဲ့ရတဲ့ ဖြစ်ရပ်ရဲ့အမှန်တရားကိုလည်း ဖော်ထုတ်ဖို့ ကြိုးစားနေပါတယ်။

ရထားဘူတာရုံမှာ အလုပ်လုပ်တဲ့ Lucy ဟာ ဘူတာကို ရထားလာစီးနေကျ အမျိုးသားတစ်ယောက်ကို တိတ်တိတ်လေး သဘောကျနေပါတယ်။ သူ့ဘက်ကသာ ကြိတ်ကြွေနေရပေမယ့် ဟိုဘက်ကတော့ Lucy ရှိနေမှန်းတောင် မသိပါဘူး။ တစ်နေ့မှာ အဲဒီအမျိုးသားဟာ လူရမ်းကားတွေကြောင့် ပလက်ဖောင်းပေါ်ကနေ ရထားသံလမ်းပေါ် ပြုတ်ကျသွားတော့ Lucy က ကယ်တင်ပြီး ဆေးရုံပို့ပေးလိုက်တယ်။ သူက ကိုမာဝင်နေပြီး မိသားစုဝင်တွေ ဆေးရုံရောက်လာတဲ့အခါ Lucy ကို သူတို့ရဲ့ချွေးမလောင်းလို့ အထင်မှားသွားကြပါတယ်။ Lucy မှာလည်း အဖြစ်မှန်ကို ရှင်းပြချိန်မရလိုက်ဘဲ ကိုယ်တိတ်တိတ်လေး သဘောကျနေသူရဲ့ မိသားစုကြားမှာ မထင်မှတ်ထားတဲ့ အခြေအနေတစ်ခုနဲ့ ကြုံလာရတော့တယ်။ Sandra Bullock ပါဝင်သရုပ်ဆောင်ထားတဲ့ အချစ်ဟာသဇာတ်ကားပါ။

လန်ဒန်မြို့တောင်ဘက်ခြမ်းက လမ်းမတွေပေါ်မှာ အသည်းကွဲနေတဲ့ ဒွန်မ်နဲ့ လမ်းခွဲပြီးစ ရာ့စ်တို့ ဆုံကြပါတယ်။ ဒွန်မ်က ရှက်တတ်သူဖြစ်ပြီး ရာ့စ်ကတော့ တက်တက်ကြွကြွ နေတတ်သူပါ။ အကျင့်စရိုက်ချင်း မတူကြပေမယ့် အချစ်ရေးမှာ နာကျင်ထားကြတဲ့ သူတို့နှစ်ယောက်ဟာ အချင်းချင်း နှစ်သိမ့်ပေးရင်း၊ ကြုံနေရတဲ့ အခက်အခဲတွေကို ကူညီဖြေရှင်းပေးရင်း နီးစပ်လာကြတယ်။ အဲဒီလို နားလည်မှုရလာရာကနေ တစ်ယောက်အပေါ်တစ်ယောက် ချစ်စိတ်ဝင်လာကြပုံကို ဟာသတွေ၊ အလွဲတွေနဲ့ တွဲဖော်ထားတဲ့ အချစ်ဟာသဇာတ်ကားပါ။ တစ်ချိန်ချိန်၊ တစ်နေရာရာမှာ ကိုယ်နဲ့ လိုက်ဖက်မယ့်သူကို တွေ့နိုင်သေးတယ်ဆိုတဲ့ မျှော်လင့်ချက်လေးလည်း ပေးထားပါတယ်။

ဟာမိနဲ့ အိုင်ရှာ၊ ယာဂုနဲ့ အမ်ရီတာဆိုတဲ့ နှစ်တွဲရဲ့အကြောင်းကို အပြိုင်တင်ဆက်ထားတဲ့ ဇာတ်လမ်းပါ။ အာလ်ယာအက်ဖ်နဲ့ ကာရန်မဲဟ်သာတို့ ပါဝင်သရုပ်ဆောင်ထားပါတယ်။ ဟာမိနဲ့ အိုင်ရှာတို့ရဲ့ ဆက်ဆံရေးက ဘားတစ်ခုမှာ တွေ့ဆုံရာကနေ စတင်လာမှာဖြစ်ပြီး ယာဂုနဲ့ အမ်ရီတာကတော့ ဟိုလီပွဲကို အကြောင်းပြုပြီး တွေ့ဆုံကြရမှာပါ။ ဇာတ်လမ်းကို ဒီနှစ်တွဲကြား တစ်ပိုင်းစီ အလှည့်ကျပြသွားပါတယ်။

ဒိုင်ဗင်အားကစားမယ် မာရီနာဟာ နားထဲမှာ အသံတွေ အဆက်မပြတ်ကြားနေရတဲ့ နားအူဝေဒနာကို ခံစားနေရပါတယ်။ ဒီဝေဒနာကို Tinnitus လို့ခေါ်ပြီး ဇာတ်ကားထဲမှာ မာရီနာတစ်ယောက်တည်းရဲ့ အတွေ့အကြုံအပြင် သူ့လိုခံစားနေရတဲ့ တခြားသူတွေရဲ့အကြောင်းကိုလည်း ပြထားပါတယ်။ နောက်ဆုံး မာရီနာဟာ သည်းမခံနိုင်တော့တဲ့အတွက် ဒိုင်ဗင်အားကစားကို စွန့်လွှတ်ပြီး နားအူဝေဒနာကို ကုသဖို့ပဲ အာရုံစိုက်လိုက်ရတယ်။ ဒါပေမယ့် ကိုယ်ဝါသနာပါတဲ့ အားကစားကို အပြီးတိုင်လက်လွှတ်ဖို့ မလွယ်တာကြောင့် ဒိုင်ဗင်ပြန်လုပ်နိုင်ဖို့ ကြိုးစားလာပါတယ်။ သူချစ်တဲ့အားကစားကို ဆက်လုပ်နိုင်ဦးမလား၊ နားအူဝေဒနာကရော ဘယ်လောက်အထိ ဆိုးရွားနေလဲဆိုတာကို ဇာတ်လမ်းတစ်လျှောက် ပြထားတယ်။ ဘရာဇီးလ်ရုပ်ရှင်ဖြစ်ပြီး ရိုက်ကွက်တွေနဲ့အတူ အသံပိုင်းကိုလည်း အလေးထားထားပါတယ်။ ဇာတ်ကောင်တွေ ခံစားနေရတဲ့ နားအူသံတွေကိုပါ ထည့်သွင်းအသုံးပြုထားတာကြောင့် မာရီနာရဲ့ဝေဒနာကို အသံကနေတစ်ဆင့်ပါ သိသာစေပါတယ်။

အသက်ရှစ်နှစ်အရွယ် ဗစ်ကီဟာ ရေကူးနည်းပြအမေနဲ့ မီးသတ်သမားအဖေတို့နဲ့ အတူနေပါတယ်။ အမေနဲ့ အလွန်ရင်းနှီးပြီး အမေမှအမေ ဖြစ်နေတဲ့ ကလေးပေမယ့် အမေမသိထားတဲ့ အကြောင်းနှစ်ခု ရှိတယ်။ တစ်ခုက ကျောင်းမှာ အလှောင်ခံနေရတာဖြစ်ပြီး နောက်တစ်ခုကတော့ ထူးခြားတဲ့ စွမ်းအားတစ်ခု ပိုင်ဆိုင်ထားတာပါ။ ဗစ်ကီက အနံ့တွေကို ခွဲခြားစုဆောင်းနိုင်ပြီး သူရွေးချယ်လိုက်တဲ့ အနံ့ကနေ ကာလတစ်ခုကို ပြန်ပုံဖော်နိုင်တယ်။ ရနံ့ထဲက အမှတ်တရတွေကို ပြန်ထုတ်ကြည့်နိုင်တဲ့ စွမ်းရည်မျိုးလို့ ဆိုနိုင်ပါတယ်။ တစ်နေ့မှာတော့ အဖေရဲ့ညီမဖြစ်သူ ရောက်လာတယ်။ ဗစ်ကီအတွက်တော့ ဒီအဒေါ်ရှိမှန်းတောင် အရင်က မသိခဲ့ပါဘူး။ အဒေါ်ရောက်လာပြီးနောက် ဗစ်ကီဟာ ရနံ့တွေကတစ်ဆင့် အမေရဲ့အတိတ်ထဲက အမှတ်တရတွေကို ထိတွေ့မိလာပါတယ်။ အဲဒီထဲမှာ လွမ်းဆွတ်စရာတွေရှိသလို ပြန်မဖော်သင့်တဲ့ အမှောင်ဘက်ခြမ်းလည်း ရှိနေတယ်။ ဒီဇာတ်ကားမှာ Blue Is the Warmest Colour ထဲက မင်းသမီး Adèle Exarchopoulos ပါဝင်သရုပ်ဆောင်ထားပါတယ်။

လင်ယွဲ့ကျန်းဟာ ကျောင်းက ရုပ်ချောတဲ့ကောင်လေး ကျန်းရှီးဟောင်ကို အရူးအမူး သဘောကျနေပါတယ်။ သူစွန့်ပစ်ထားတဲ့ စာအုပ်၊ ဘောလုံးနဲ့ အသုံးအဆောင်တွေကိုတောင် အမှိုက်ပုံးထဲက ကောက်ယူပြီး အိမ်မှာ စုထားတတ်တယ်။ ဒါပေမယ့် သူငယ်ချင်းဖြစ်ချင်တယ်ဆိုတာကိုတောင် မပြောရဲဘဲ တစ်ယောက်တည်း ကြိတ်ချစ်နေရတာပါ။ ဒီလိုနဲ့ အချစ်ဆုံးသူငယ်ချင်း မုန့်ခယ်ရုံဆီ အကူအညီတောင်းလိုက်ပါတယ်။ မုန့်ခယ်ရုံက ကြားကနေ အောင်သွယ်ပေးရင်း ကျန်းရှီးဟောင်နဲ့ လင်ယွဲ့ကျန်းတို့ကြားမှာ ဗျာများလာရတယ်။ တစ်နေ့မှာတော့ “ကျွန်မကို မနမ်းချင်ဘူးလား” လို့ အရဲစွန့်မေးလိုက်သူက မုန့်ခယ်ရုံ ဖြစ်နေပါတယ်။ ဒီစကားနောက်မှာ သူတို့သုံးယောက်ကြား ဘာတွေဆက်ဖြစ်လာမလဲဆိုတာကို သဘာဝကျတဲ့ ရိုက်ချက်တွေနဲ့ ပုံဖော်ထားတဲ့ ထိုင်ဝမ် LGBT အချစ်ဒရာမာကားပါ။

Michiyo ဟာ ခင်ပွန်းမရှိတော့တဲ့နောက် သမီးလေးကို လိုလေသေးမရှိအောင် ပြုစုစောင့်ရှောက်ရင်း တစ်ကိုယ်တော်မိခင်အဖြစ် ဆယ်နှစ်ကြာ နေထိုင်လာသူပါ။ တစ်နေ့မှာ အမျိုးသားတစ်ယောက်ရဲ့ မကောင်းကြံမှုကို ခံရပြီးနောက် သူဖိနှိပ်ထားခဲ့တဲ့ လိင်ဆန္ဒတွေ ပြန်ပေါ်လာပါတယ်။ အဲဒီနောက် သမီးနဲ့လည်း ကတောက်ကဆတွေ ဖြစ်လာတယ်။ ထိန်းသိမ်းလာခဲ့တဲ့ ဂုဏ်သိက္ခာနဲ့ ဟိတ်ဟန်တွေကြားမှာ ကိုယ့်ဆန္ဒကို ဖုံးကွယ်ဖို့ ခက်လာတဲ့ Michiyo တစ်ယောက် ဘယ်လိုဆက်ဖြစ်မလဲဆိုတာကို ပြထားတဲ့ အရွယ်ရောက်သူများအတွက် ဇာတ်ကားပါ။

အယ်လီဟာ အလုပ်ကိုပဲ အာရုံစိုက်ပြီး ကြိုးစားတတ်တဲ့ အစီအစဉ်တင်ဆက်သူတစ်ယောက်ပါ။ ဒီအလုပ်ကို ရွေးချယ်ခဲ့တာကြောင့် ချစ်သူရှောင်နဲ့လည်း လမ်းခွဲခဲ့ရတယ်။ သူလုပ်ချင်တဲ့ ရှိုးကို သုံးနှစ်လောက် လုပ်ပြီးချိန်မှာတော့ အခြေအနေမကောင်းလို့ ရှိုးရပ်နားခံလိုက်ရပါတယ်။ စိတ်ဓာတ်ကျနေတဲ့ အယ်လီလည်း မိခင်ရှိရာ နယ်မြို့လေးဆီ ပြန်လာခဲ့တယ်။ မြို့ကိုရောက်တဲ့နေ့မှာပဲ ရည်းစားဟောင်းရှောင်နဲ့ မထင်မှတ်ဘဲ ပြန်ဆုံပါတယ်။ အချစ်ဟောင်းကို ပြန်စဖို့ စိတ်ကူးမိချိန်မှာ ရှောင်က မကြာခင် မင်္ဂလာဆောင်တော့မယ်ဆိုတာ သိလိုက်ရတယ်။ အဲဒီကနေ ရည်းစားဟောင်းရဲ့ မင်္ဂလာဆောင်ကို ဝင်ရှုပ်မိတဲ့ အယ်လီရဲ့အကြောင်း ဆက်ဖြစ်လာပါတယ်။ အသည်းကွဲခြင်း၊ လက်ခံပေးရခြင်းနဲ့ အသစ်ပြန်စခြင်းတို့ကို အချစ်ဟာသနဲ့ တွဲပြထားသလို အတိတ်ကို လက်ရှိဘဝထဲ ပြန်ယူလာတဲ့အခါ ဖြစ်လာနိုင်တဲ့ ရှုပ်ထွေးမှုတွေနဲ့ ကိုယ့်ကိုယ်ကို လက်ခံတတ်ဖို့အကြောင်းကိုလည်း ထည့်ပြောထားတယ်။ အယ်လီအဖြစ် သရုပ်ဆောင်ထားတဲ့ Alison Brie နဲ့ ခင်ပွန်းဖြစ်သူ Dave Franco တို့ ပူးတွဲဇာတ်ညွှန်းရေးထားပြီး Dave Franco ကပဲ ဒါရိုက်တာအဖြစ် ရိုက်ကူးထားပါတယ်။

လူဖြူကောင်လေးနဲ့ လူမဲမိန်းကလေးတစ်ယောက်တို့ ချစ်ကြပေမယ့် လက်ထပ်ဖို့အရေးမှာ နှစ်ဖက်မိသားစုကြောင့် အဆင်မပြေမှုတွေ ကြုံလာရပါတယ်။ မိန်းကလေးရဲ့ဖခင်က သမီးအတွက် စိတ်ပူပြီး လူဖြူကောင်လေးကို လိုက်ညစ်တတ်တယ်။ ကောင်လေးရဲ့မိခင်ကတော့ သားရဲ့ချစ်သူကို လက်ခံကြောင်း ပြချင်လွန်းနေသူပါ။ လူမဲဖြစ်နေတာဟာ မဆန်းဘူးဆိုတာကို ခဏခဏထုတ်ပြောရင်း သဘာဝမကျတဲ့ အခြေအနေတွေ ဖြစ်သွားစေပါတယ်။ တစ်ဖက်က အတိုက်အခံလုပ်နေသလို နောက်တစ်ဖက်ကလည်း လက်ခံပေးချင်လွန်းရာက အလွဲတွေဖြစ်နေတော့ ဒီစုံတွဲအတွက် မင်္ဂလာပွဲ ကျင်းပနိုင်ပါ့မလားဆိုတာအထိ စိတ်ပူရလာတယ်။ မတူညီတဲ့ အသိုင်းအဝိုင်းနှစ်ခုကြားက သူတို့အကြောင်းကို ပြောပြထားတဲ့ အချစ်ဟာသဇာတ်ကားဖြစ်ပြီး Jonah Hill၊ Eddie Murphy၊ The X-Files စီးရီးမှ David Duchovny နဲ့ Molly Gordon တို့ ပါဝင်သရုပ်ဆောင်ထားပါတယ်။

ရီသိက်တို့ မိသားစုက ယောက်ျားတွေဟာ ချမ်းသာပေမယ့် ငွေသုံးဖို့ဆို အင်မတန် လက်တွန့်ကြသူတွေပါ။ အဘိုးကနေ မြေးအထိ ရည်းစားထားတာကအစ ကုန်ကျစရိတ်တွက်နေကြပြီး တစ်ပြားတစ်ချပ်ကိုပါ နှမြောတတ်ကြတယ်။ ဒီလို ကပ်စေးနှဲလွန်းတဲ့အဖြစ်ကို မိသားစုထဲက အမျိုးသမီးတွေ သည်းမခံနိုင်တော့တဲ့တစ်နေ့မှာ ကွာရှင်းခွင့်တောင်းကြပါတော့တယ်။ ရီသိက်ကိုယ်တိုင်လည်း ကပ်စေးနှဲသူဖြစ်ပေမယ့် သူအိမ်ထောင်ကျတဲ့ မိန်းကလေးကတော့ အကောင်းဆုံးဆိုတာတွေကိုမှ ကြိုက်ပြီး ငွေသုံးကြမ်းသူပါ။ အကျင့်ချင်း ဆန့်ကျင်ဘက်ဖြစ်နေတဲ့ ဇနီးမောင်နှံနှစ်ယောက်ကြားမှာ ဇနီးဖြစ်သူရဲ့ လျှို့ဝှက်ချက်တွေလည်း ရှိနေသေးတယ်။ သူတို့နှစ်ယောက် ဘယ်လိုဖူးစာဆုံခဲ့ကြတာလဲ၊ ဇနီးမှာ ဘာတွေဖုံးကွယ်ထားတာလဲ၊ မိသားစုကို ပျက်ကွက်မိနေတဲ့ ယောက်ျားတွေကရော သင်ခန်းစာရကြမလားဆိုတာကို ဟာသနဲ့ ပြောပြထားပါတယ်။ Sehar Shehnaz ပါဝင်သရုပ်ဆောင်ထားတဲ့ ဇာတ်ကားပါ။

နယူးယော့ခ်ရဲ့ သစ်ရွက်တွေ အဝါရောင်ပြောင်းပြီး ကြွေကျလာတဲ့ ဆောင်းဦးမှာ ဒီအချစ်ဇာတ်လမ်း စတင်ပါတယ်။ Bill က အသက်လေးဆယ့်ရှစ်နှစ် ရှိနေပြီဖြစ်ပေမယ့် လူပျိုကြီးဖြစ်နေဆဲပါ။ ဘဝတစ်လျှောက် မိန်းကလေးတွေနဲ့ အချစ်ရေးကို အပျော်သဘောပဲ သဘောထားလာခဲ့သူလည်း ဖြစ်တယ်။ တစ်နေ့မှာ သူ့ရည်းစားဟောင်းရဲ့သမီးက သူဖွင့်ထားတဲ့ စားသောက်ဆိုင်မှာ မွေးနေ့ပွဲ လာကျင်းပပါတယ်။ အဲဒီမှာ နှစ်ယောက် အကြည့်ချင်းဆုံမိရာကနေ အသက်ကွာဟတဲ့ အချစ်ရေးတစ်ခု စတင်လာတယ်။ ဒါပေမယ့် အရင်ကတည်းက စွဲလာတဲ့ Bill ရဲ့အကျင့်တွေက အလွယ်တကူ ပြောင်းနိုင်ပါ့မလား။ ဆောင်းဦးမှာ စခဲ့တဲ့ သူတို့အချစ်ကလည်း ရွက်ကြွေတွေလိုပဲ အဆုံးသတ်သွားမလားဆိုတာ စောင့်ကြည့်ရမှာပါ။