အချစ်ဇာတ်လမ်းများ

Step Up 3D က ဇာတ်ကားတွဲရဲ့ တတိယမြောက်ကားဖြစ်ပြီး ဒုတိယကားကို ရိုက်ကူးခဲ့တဲ့ ဒါရိုက်တာ Jon M. Chu ကပဲ 3D နည်းပညာနဲ့ ဆက်ရိုက်ထားပါတယ်။ အရင်ကားထဲက ဇာတ်ကောင်တချို့ ပြန်ပါလာပြီး ဒီတစ်ခါ မုစ်က အဓိကနေရာကနေ ပါဝင်လာတယ်။ မုစ်ဟာ MSA အဖွဲ့နဲ့ အကပြိုင်ခဲ့ပြီးနောက် မိဘတွေကို နောက်ထပ်မကတော့ဘူးလို့ ကတိပေးထားပါတယ်။ အင်ဂျင်နီယာဘာသာရပ် သင်ဖို့ NYU ကို ရောက်လာပေမယ့် အကဝါသနာကို မစွန့်နိုင်ဘဲ ကပွဲတစ်ခုမှာ ဝင်ကမိတယ်။ အဲဒီကနေ ပြဿနာတက်တော့ လုခ်ဆိုတဲ့လူက သူ့ကို ကယ်ပေးလိုက်ပါတယ်။ လုခ်က အကပါရမီရှိသူတွေကို စုစည်းပြီး သူ့ဂိုထောင်မှာ အတူနေစေထားသူပါ။ သူတို့အဖွဲ့နဲ့ ဆုကြေးငွေ တစ်သိန်းရှိတဲ့ World Jam ပြိုင်ပွဲကို ဝင်ပြိုင်ချင်နေတယ်။ မုစ်နဲ့ ပြဿနာဖြစ်ခဲ့သူတွေကလည်း လုခ်တို့ရဲ့ ပြိုင်ဘက်တွေဖြစ်နေတာကြောင့် လုခ်က မုစ်ကိုပါ အဖွဲ့ထဲဝင်ဖို့ စည်းရုံးလိုက်ပါတယ်။ အဲဒီအချိန်မှာ နာတာလီဆိုတဲ့ လျှို့ဝှက်ဆန်းကြယ်တဲ့ ကောင်မလေးတစ်ယောက်လည်း အဖွဲ့ထဲ ရောက်လာတယ်။ ကျောင်းကိစ္စ၊ ကောင်မလေးကိစ္စတွေနဲ့ မုစ်တစ်ယောက် ပြိုင်ပွဲကို ကောင်းကောင်းဝင်ပြိုင်နိုင်ပါ့မလား။ လုခ်ကရော သူစုစည်းထားတဲ့လူတွေကို ဒီနေရာမှာ ဆက်နေခွင့်ရအောင် ဘယ်လိုအခက်အခဲတွေ ရင်ဆိုင်ရမလဲ။ အဖွဲ့ထဲကို ရောက်လာတဲ့ နာတာလီဟာ ဘယ်သူလဲဆိုတာလည်း တဖြည်းဖြည်း သိလာရမှာပါ။

Step Up 2: The Streets က ပထမကားထဲက တိုင်လာနဲ့ နိုရာတို့အကြောင်းကနေ တိုင်လာ့ညီမဝမ်းကွဲ အန်ဒီဘက်ကို ပြောင်းပြောထားပါတယ်။ တိုင်လာလည်း ဧည့်သည်သရုပ်ဆောင်အဖြစ် ပြန်ပါလာပြီး မုစ်ဆိုတဲ့ ဇာတ်ကောင်ကို ဒီကားမှာ စတွေ့ရမှာပါ။ Step Up ဇာတ်ကားတွဲမှာ ဟစ်ဟော့၊ ဖရီးစတိုင်နဲ့ လမ်းဘေးအကတွေကို လူငယ်တွေရဲ့ လွတ်လပ်မှုနဲ့ ရွေးချယ်မှုတွေ ဖော်ပြဖို့ အသုံးပြုထားသလို ဒီကားမှာလည်း အဲဒီအကတွေကို အခြေခံထားပါတယ်။ အန်ဒီက လမ်းဘေးဖရီးစတိုင်အကကို ကျောင်းလစ်ပြီး သွားကရလောက်အောင် ဝါသနာကြီးတဲ့ ကောင်မလေးပါ။ အမေက ကင်ဆာနဲ့ ဆုံးသွားလို့ အမေ့သူငယ်ချင်းရဲ့ အုပ်ထိန်းမှုအောက်မှာ နေနေရပေမယ့် ပြောစကားနားမထောင်ဘဲ ပြန်အာခံတတ်တယ်။ အုပ်ထိန်းသူက မထိန်းနိုင်တော့လို့ နယ်ပို့ဖို့ စီစဉ်လာတဲ့အခါ မယ်ရီလန်းအကကျောင်းတက်မယ်ဆိုရင်တော့ နယ်မပို့ဘူးဆိုတဲ့ အခြေအနေကြောင့် အန်ဒီလည်း မတက်ချင်တက်ချင်နဲ့ ကျောင်းတက်လိုက်ရပါတယ်။ ဒါပေမဲ့ သူ့မူလအကအဖွဲ့က လမ်းဘေးအကနဲ့ ဘဲလေးအက မတူဘူးဆိုပြီး သူကျောင်းတက်တာကို မကျေမနပ်ဖြစ်ကြရာက အဖွဲ့ထဲကနေ ထုတ်လိုက်ကြတယ်။ အန်ဒီကလည်း လက်ရှိကျောင်းထဲက အကပါရမီရှိသူတွေကို ရှာစုရင်း အဖွဲ့အသစ်ဖွဲ့လိုက်ပါတယ်။ သူတို့ရဲ့ရည်မှန်းချက်က The Streets လို့ခေါ်တဲ့ လမ်းမအကပြိုင်ပွဲမှာ ဝင်ပြိုင်ဖို့ပါ။ အဖွဲ့သစ်နဲ့ ပြိုင်ပွဲဝင်ဖို့ ကြိုးစားရင်း ဘယ်လိုအခက်အခဲတွေ ကြုံရမလဲဆိုတာ ဆက်ကြည့်ရမှာဖြစ်ပြီး မုစ်ရဲ့ မိုးရေထဲက အကခန်းနဲ့ ဇာတ်ဝင်တေး Low တို့လည်း

Channing Tatum နဲ့ Jenna Dewan တို့ ပါဝင်ထားတဲ့ Step Up ဟာ အကကိုအခြေခံထားတဲ့ လူငယ်ဇာတ်ကားတွဲရဲ့ ပထမဆုံးကားပါ။ ဇာတ်လမ်းက မယ်ရီလန်းအနုပညာကျောင်းမှာ တက်နေတဲ့ နိုရာနဲ့ လမ်းပေါ်မှာ သူငယ်ချင်းတွေနဲ့ အချိန်ကုန်နေတတ်တဲ့ တိုင်လာတို့အကြောင်း ဖြစ်ပါတယ်။ နိုရာက အကအတွက် သူ့ဘဝကို ရင်းနှီးမြှုပ်နှံထားတဲ့ ကျောင်းသူတစ်ယောက်ဖြစ်ပြီး သူ့အတွက် အလွန်အရေးပါတဲ့ ကျောင်းရဲ့ Senior Showcase မှာ အကောင်းဆုံး ဖျော်ဖြေနိုင်ဖို့ ပြင်ဆင်နေတယ်။ တိုင်လာကလည်း အကပါရမီရှိပေမယ့် သူငယ်ချင်းတွေနဲ့ လျှောက်လည်ပျော်ပါးနေတဲ့ သာမန်လူငယ်လေးတစ်ယောက်ပါ။ တစ်နေ့ သူတို့အုပ်စု မယ်ရီလန်းကျောင်းထဲ ခိုးဝင်ပြီး ကျောင်းပိုင်ပစ္စည်းတွေကို ဖျက်ဆီးမိရာက တိုင်လာဟာ တရားရုံးက ချမှတ်တဲ့ ပြစ်ဒဏ်အဖြစ် အဲဒီကျောင်းမှာ လူမှုအကျိုးပြုအလုပ် နာရီ ၂၀၀ လုပ်ရပါတော့တယ်။ ကျောင်းပြုပြင်သန့်ရှင်းရေး လုပ်ရင်း တိုင်လာက စိတ်ပါလက်ပါ အကလေ့ကျင့်နေတဲ့ နိုရာကို မကြာခဏ ကြည့်နေတတ်တယ်။ နိုရာဘက်မှာတော့ အတူလေ့ကျင့်ဖို့ လူစားထိုးတစ်ယောက် လိုနေပေမယ့် သင့်တော်သူ ရှာမတွေ့ဖြစ်နေပါတယ်။ နောက်ဆုံး အဲဒီနေရာကို တိုင်လာ ဝင်ကူပေးရာက သူတို့နှစ်ယောက် အတူအကလေ့ကျင့်ဖြစ်လာကြတယ်။

မူးယစ်ရာဇာ စစ်ဒါးသ်ဟာ မွမ်ဘိုင်းကနေ လွတ်ထွက်လာပြီး ဟိုက်ဒရာဘတ်ကတစ်ဆင့် စင်ကာပူကို ထွက်ပြေးဖို့ ကြိုးစားနေပါတယ်။ ဒီအချိန်မှာ အာဂျွန်ကတော့ အိမ်ထောင်ကျခါစ တက္ကစီမောင်းသမားတစ်ယောက်ပါ။ ဘွဲ့ရထားပေမယ့် သူ့မိန်းမကို ကားစီးစေချင်လို့ တက္ကစီမောင်းတာလို့ ပြောတတ်တယ်။ ရထားတဲ့ဘွဲ့နဲ့ အလုပ်ဝင်ရင် ဆိုင်ကယ်ဝယ်ဖို့တောင် မလွယ်ဘူးဆိုတာက သူ့အကြောင်းပြချက်ပါ။ တစ်နေ့ တက္ကစီမောင်းပြီး အိမ်ပြန်လာတဲ့လမ်းမှာ လမ်းကြုံလို့ လူနှစ်ယောက်ကို တင်ခေါ်လာခဲ့တယ်။ အဲဒီနှစ်ယောက်က မူးယစ်ဂိုဏ်းနဲ့ ပတ်သက်နေသူတွေ ဖြစ်နေပါတယ်။ လမ်းမှာ အာဂျွန်ပြောပြခဲ့တာတွေကြောင့် သူ့အကြောင်းကိုလည်း သိထားကြတယ်။ နောက်တော့ သူ့ဇနီးကို ပြန်ပေးဆွဲပြီး အာဂျွန်ကို သူတို့ခိုင်းတဲ့အတိုင်း လုပ်ဖို့ အကျပ်ကိုင်လာကြပါတယ်။

အကူစားဖိုမှူးမလေး Anna ဟာ ဟင်းချက်အစီအစဉ်တစ်ခု ရိုက်ကူးဖို့ ပေါ်တူဂီကို ရောက်လာပါတယ်။ ဒါပေမဲ့ အစီအစဉ်ကို ဦးဆောင်နေတဲ့ နာမည်ကြီးစားဖိုမှူးက ရုတ်တရက် ထွက်သွားတော့ အကူအဖြစ် လိုက်လာတဲ့ သူမကိုယ်တိုင် ရှေ့ထွက်ပြီး ဦးဆောင်ရဖို့ ဖြစ်လာတယ်။ Anna အတွက် ရိုက်ကူးရေးအဖွဲ့ထဲက သူငယ်ချင်းကင်မရာမန်းကောင်လေးက အကူအညီပေးသလို ပေါ်တူဂီမှာ ဆုံတွေ့ရတဲ့ ဈေးပိုင်ရှင်အမျိုးသားတစ်ယောက်ကလည်း သူမရဲ့အလုပ်မှာ ကူညီပေးပါတယ်။ အလုပ်ကိစ္စနဲ့ ပတ်သက်လာတဲ့ ဒီလူနှစ်ယောက်ထဲက တစ်ယောက်ကတော့ Anna ရဲ့အချစ်ရေးထဲကိုပါ ဝင်ရောက်လာဦးမှာပါ။

လင်ဟိန်ယွီက ဆေးပညာမေဂျာမှာ မာစတာတက်နေတဲ့ ကျောင်းသားတစ်ယောက်ပါ။ ဖြောင့်မတ်ပြီး စာတော်လို့ ဆရာက အလေးထားသလို သူငယ်ချင်းတွေကလည်း ချစ်ခင်ကြတယ်။ ရှန့်ယန်ကတော့ မိသားစုအခြေအနေကောင်းပြီး ပန်းချီမှာ ပါရမီရှိတဲ့ ပန်းချီမေဂျာကျောင်းသူပါ။ သူတို့နှစ်ယောက်ဟာ ငယ်ငယ်ကတည်းက သိကျွမ်းခဲ့ပေမယ့် အကြောင်းအမျိုးမျိုးကြောင့် တစ်ကြိမ်ခွဲခွာခဲ့ရဖူးတယ်။ တက္ကသိုလ်တက်နေတဲ့ သာမန်နေ့တစ်နေ့မှာ သူတို့ ပြန်ဆုံကြပါတယ်။ တစ်ယောက်ကိုတစ်ယောက် နှစ်သက်နေကြတဲ့အတွက် ကိုယ့်ခံစားချက်ကို ဖွင့်ပြောပြီး ချစ်သူတွေ ဖြစ်လာကြတယ်။ ကျောင်းဝတ်စုံဝတ်တဲ့ဘဝကနေ မင်္ဂလာဝတ်စုံဝတ်ရတဲ့နေ့အထိ အတူရှိဖို့လည်း စိတ်ကူးထားကြပါတယ်။ သူတို့စိတ်ကူးသလို လက်ထပ်တဲ့အထိ လက်တွဲနိုင်မလား၊ ဒါမှမဟုတ် ကိုယ့်လမ်းကိုယ်လျှောက်ရဦးမလား။

ဂက်ဘ်ဟာ ခြောက်နှစ်ကျော် တွဲလာတဲ့ ရည်းစားနဲ့ မကြာခင် လက်ထပ်တော့မယ့် မိန်းကလေးပါ။ ဒါပေမယ့် သူငယ်ချင်းရဲ့ မင်္ဂလာပွဲညမှာ အရက်မူးပြီး ဒို့စ်ဆိုတဲ့ ကောင်လေးတစ်ယောက်နဲ့ လက်ထပ်စာချုပ်မှာ လက်မှတ်ထိုးမိခဲ့တယ်။ နှစ်ယောက်စလုံး ဒီအဖြစ်ကို မမှတ်မိကြသလို အဲဒီစာချုပ်က တရားဝင်နေမယ်လို့လည်း မထင်ခဲ့ကြပါဘူး။ ရည်းစားနဲ့ မင်္ဂလာဆောင်ဖို့ ပြင်ဆင်နေတုန်း စာချုပ်က ဂက်ဘ်ဆီ ရောက်လာတော့မှ ပြဿနာစတော့တယ်။ ဂက်ဘ်က ဒို့စ်ကို လိုက်ရှာပြီး အကြောင်းစုံရှင်းပြကာ ကွာရှင်းပေးဖို့ တောင်းဆိုပါတယ်။ ဒါပေမယ့် သူတို့အတွက် ကွာရှင်းခွင့်ရဖို့က မလွယ်ဘူး။ အဲဒီလိုနဲ့ ကွာရှင်းခွင့်တောင်းတဲ့အခါ သက်သေအဖြစ် တင်ပြနိုင်မယ့် အကြောင်းပြချက်တွေကို ဖန်တီးရင်း နှစ်ယောက်သား တဖြည်းဖြည်း နီးစပ်လာကြတယ်။ ဒို့စ်က ဂက်ဘ်ကို ချစ်မိလာတဲ့အခါ ဂက်ဘ်ဘက်ကရော နှစ်ရှည်တွဲလာတဲ့ ရည်းစားကို စွန့်လွှတ်နိုင်မလား။ သူ့ရည်းစားက လက်ထပ်စာချုပ်အကြောင်း သိသွားမလား၊ စီစဉ်ထားတဲ့ မင်္ဂလာပွဲကရော ဖြစ်လာနိုင်ဦးမလားဆိုတာ ဆက်ကြည့်ရမှာပါ။ KathNiel လို့ ချစ်စနိုးခေါ်ကြတဲ့ Kathryn Bernardo နဲ့ Daniel Padilla တို့ ပါဝင်ထားတဲ့ ဖိလစ်ပိုင်အချစ်ဇာတ်ကား ဖြစ်ပါတယ်။

ဗစ်တိုးရီးယားခေတ် အင်္ဂလန်ရဲ့ စာရေးဆရာ ချားလ်စ် ဒစ်ကန်စ်ဟာ ဝတ္ထုတွေ၊ ပြဇာတ်တွေနဲ့ အသက်ဝင်တဲ့ ဇာတ်ကောင်တွေကြောင့် လူသိများသူပါ။ ဒီဇာတ်လမ်းမှာတော့ သူ့ဘဝထဲ ဝင်ရောက်လာတဲ့ တက်သစ်စ ပြဇာတ်မင်းသမီး အယ်လန် တာနန်နဲ့ သူ့အကြောင်းကို ပြောပြထားပါတယ်။ နယ်လီလို့လည်း ခေါ်ကြတဲ့ အယ်လန်ဟာ သူ့စာအုပ်တွေကို နှစ်သက်သလို သူ့အမြင်တွေကို နားလည်ပြီး သူ့ကိုလည်း တခြားသူတွေနဲ့မတူတဲ့ အမြင်နဲ့ မြင်ပေးနိုင်သူပါ။ ချားလ်စ်က ဒီမိန်းကလေးကို ချစ်မိသွားပြီး နယ်လီဘက်ကလည်း တဖြည်းဖြည်း သံယောဇဉ်ရှိလာတယ်။ ဒါပေမယ့် ချားလ်စ်မှာ မပျော်ရွှင်ရတဲ့ အိမ်ထောင်တစ်ခု ရှိနေပြီးသားပါ။ နယ်လီနဲ့ ပေါင်းစည်းဖို့အတွက် အစဉ်အလာတွေ၊ ပတ်ဝန်းကျင်ရဲ့ အနှောင့်အယှက်တွေနဲ့ အတားအဆီးများစွာကို ရင်ဆိုင်ရတော့တယ်။ ဝတ္ထုတွေထဲမှာ ရေးဖွဲ့ထားတဲ့ အချစ်နဲ့ လက်တွေ့ဘဝက အချစ်တို့ ဘယ်လောက်ကွာခြားမလဲ၊ နှစ်ယောက်သား ဒီအခက်အခဲတွေကြား ဘယ်အထိ လက်တွဲသွားနိုင်မလဲဆိုတဲ့ အချစ်ဒရာမာပါ။

လွန်ခဲ့တဲ့ ဆယ်နှစ်လောက်က တွေ့ဆုံပြီး အချင်းချင်း ချစ်ခဲ့ကြတဲ့ အသက်ပိုကြီးတဲ့ အမျိုးသမီးတစ်ယောက်နဲ့ လူငယ်တစ်ယောက်ရဲ့ ပိုလန်အချစ်ဇာတ်ကားပါ။ နှစ်ယောက်သား အနာဂတ်အတွက် စိတ်ကူးယဉ်ခဲ့ကြပေမယ့် မပေါင်းဖက်ခဲ့ရဘူး။ အခုချိန်မှာတော့ အမျိုးသမီးက သမီးနှစ်ယောက်ရှိတဲ့ အိမ်ထောင်သည်တစ်ယောက် ဖြစ်နေပါပြီ။ လူငယ်က တခြားနိုင်ငံကနေ ပြန်လာပြီး အလုပ်လျှောက်တဲ့နေရာဟာ သူ့ချစ်သူဟောင်းရှိတဲ့ ဌာနဖြစ်နေပါတယ်။ အမျိုးသမီးဘက်မှာလည်း ခင်ပွန်းနဲ့ ကတောက်ကဆတွေရှိပြီး အိမ်ထောင်ရေးက မသာယာဘူး။ ကိုယ်လိုချင်တဲ့အရာတွေ၊ ဆန္ဒတွေ မပြည့်ဝဘဲ နေနေရချိန်မှာ နှစ်တွေကြာသွားလည်း သူ့ကိုပဲ ချစ်နေသေးတဲ့ လူငယ်နဲ့ ပြန်တွေ့လာတာပါ။ အဲဒီအချိန်မှာ ခင်ပွန်းဖြစ်သူက သူ့ကို မတိုင်ပင်ဘဲ အိုင်းစ်လန်းကို တစ်လကြာ အပန်းဖြေခရီး ထွက်သွားပါတယ်။ စိတ်ထဲမှာ မကျေနပ်မှုတွေ ရှိနေတဲ့ အမျိုးသမီးနဲ့ ချစ်သူဟောင်းတို့ကြားက ခံစားချက်တွေ ပြန်ပြင်းထန်လာပြီး ထိန်းသိမ်းမရတော့တဲ့အထိ ဖြစ်လာတယ်။ သူတို့နှစ်ယောက် ဆန္ဒကို ထိန်းချုပ်ကြမလား၊ မိသားစုတာဝန်တွေကို စွန့်ပြီး ဆက်သွားကြမလား၊ ဒီဆက်ဆံရေးက ပျော်ရွှင်မှုဖြစ်လာမလား၊ ဝမ်းနည်းစရာဖြစ်လာမလားဆိုတာကတော့ ရှေ့ဆက်ရင်ဆိုင်ရဦးမှာပါ။ အိပ်ရာပေါ်က အခန်းတွေနဲ့ ကိုယ်ခန္ဓာဖော်ပြမှုအချို့လည်း ပါဝင်ပါတယ်။

ချုံနွယ်တွေက လျှောက်လမ်းကိုတောင် ဖုံးနေတဲ့ ခြံကြီးတစ်ခြံထဲမှာ နွယ်တွေ ရစ်ပတ်နေတဲ့ အိမ်အိုကြီးနဲ့ ရေတွင်းပျက်တစ်လုံး ရှိပါတယ်။ ဒီခြံမှာ အခြောက်အလှန့်ကြမ်းတယ်လို့ နာမည်ထွက်နေလို့ မြို့ထဲကလူတွေက နေ့ခင်းဘက်တောင် ခြံရှေ့က မဖြတ်ရဲကြဘူး။ အရင်က ခြံပိုင်ရှင်ရဲ့သမီးဟာ အချစ်ကို ဆုံးရှုံးခဲ့ရလို့ ရေတွင်းထဲ ခုန်ချပြီး သေဆုံးသွားခဲ့တယ်။ အဲဒီနောက် ယောက်ျားတွေကို မုန်းတီးတဲ့ သရဲအဖြစ် ခြံကိုစောင့်နေပြီး တွေ့သမျှလူတွေကို ခြောက်လှန့်တယ်လို့ ဆိုကြပါတယ်။ ဒီအကြောင်းတွေကို မသိဘဲ ခြံကို ငှားမိသွားသူကတော့ စာရေးဆရာပေါက်စတစ်ယောက်ပါ။ ဈေးသက်သာတာနဲ့ နှစ်လစာငွေကြိုချေပြီး ငှားလိုက်မိတယ်။ သူ ဒီခြံမှာနေတယ်လို့ မိတ်ဆက်လိုက်တိုင်း လူတွေက ကြောက်လန့်ကုန်ကြပြီး သူကိုယ်တိုင်လည်း ချောက်ချားစရာတွေကို တဖြည်းဖြည်း ကြုံလာရပါတယ်။ တခြားနေရာကို ပြောင်းငှားဖို့လည်း ပိုက်ဆံမရှိတဲ့အခါ ဒီခြံထဲက မမြင်ရတဲ့သူနဲ့ ဘယ်လိုဆက်နေသွားရမလဲဆိုတာကို ကြည့်ရမှာပါ။

ငယ်စဉ်ကတည်းက ကြမ်းတမ်းခက်ခဲတဲ့ဘဝကို ဖြတ်သန်းခဲ့ရတဲ့ အမျိုးသမီးတစ်ယောက်ဟာ စိတ်ဒဏ်ရာတွေ ရခဲ့ပြီး စိတ်ကျန်းမာရေးဝေဒနာကို ခံစားနေရပါတယ်။ တစ်ခါတလေ ကလ်ပနား၊ တစ်ခါတလေ လိုင်လာအဖြစ် ပြောင်းလဲနေတဲ့ သူ့အခြေအနေကြားမှာ တခြားသူတွေ ပြုသမျှကိုလည်း ခံနေရတယ်။ သူ့ဘဝထဲ ချဉ်းကပ်ဝင်လာသူတွေကလည်း လူကောင်းတွေ မဟုတ်ကြပါဘူး။ သူ့ကို ရိုးရိုးသားသားချစ်ပြီး စောင့်ရှောက်ပေးနိုင်မယ့်သူ ပေါ်လာနိုင်မလား၊ ဒီလိုကြမ်းတမ်းတဲ့ဘဝကို ဘယ်လိုအဖြစ်အပျက်တွေကြားကနေ ဖြတ်သန်းရမလဲဆိုတာကို ပြောပြထားပါတယ်။

အပြစ်မရှိဘဲ မှားယွင်းစွပ်စွဲခံရလို့ ထောင်ကျနေတဲ့ Lim Su-In ဟာ သူ့အဖြစ်ကို မခံမရပ်နိုင်ဖြစ်နေပါတယ်။ ထောင်ကလွတ်ဖို့ ကြိုးစားနေတဲ့ သူ့အတွက် «AIDS ဖြစ်နေတဲ့ ထောင်သားတွေကို ချက်ချင်းလွှတ်ပေးတယ်» ဆိုတဲ့ ထောင်တွင်းကောလာဟလက လွတ်မြောက်ရာလမ်းတစ်ခုလို ဖြစ်လာတယ်။ အဲဒီထောင်မှာ HIV ပိုးရှိတဲ့အတွက် တခြားသူတွေရဲ့ ရှောင်ဖယ်မှုကို ခံနေရတဲ့ Byung Sang ဆိုသူလည်း ရှိပါတယ်။ သူက နယ်လှည့်မျက်လှည့်ဆရာတစ်ယောက်ဖြစ်ပြီး ချစ်သူကောင်မလေးရဲ့ အပြစ်ကို အစားဝင်ခံပေးလို့ ထောင်ကျနေတာပါ။ Su-In က ပိုးကူးခံရရင် ထောင်ကထွက်ရမယ်လို့ ယူဆပြီး Byung Sang နဲ့ ရင်းနှီးအောင် ကြိုးစားတော့တယ်။ ဒါပေမယ့် ပိုးကူးစက်ခံရပြီးမှ ကြားထားတဲ့သတင်းက မမှန်မှန်း သိလိုက်ရပါတယ်။ Su-In ကတော့ လက်မလျှော့ဘဲ လွတ်မြောက်ဖို့ နောက်နည်းလမ်းတစ်ခု ထပ်ရှာနေတုန်း Byung Sang က အကူအညီတောင်းလာတယ်။ ထောင်ကထွက်နိုင်ခဲ့ရင် Mia ဆိုတဲ့ ကောင်မလေးကို သွားကြည့်ပေးဖို့ပါ။

အမ်မာဘလဲရ်နဲ့ ဂျက်စီတို့ဟာ ငယ်ငယ်ရွယ်ရွယ်မှာပဲ ဆုံတွေ့ပြီး လက်တွဲခဲ့ကြသူတွေပါ။ ဂျက်စီက မှတ်တမ်းရုပ်ရှင်တွေ ရိုက်ရတာကို နှစ်သက်ပြီး အမ်မာကတော့ ခရီးသွားဘလော့ဂ်တွေ ရေးရတာကို ဝါသနာပါတယ်။ စိတ်တူကိုယ်တူရှိကြတဲ့ သူတို့နှစ်ယောက်ရဲ့ ဘဝထဲမှာ ဂျက်စီ ပျောက်ဆုံးသွားတဲ့အခါ အမ်မာက သူ့ကို ထာဝရဆုံးရှုံးလိုက်ရပြီလို့ ထင်ခဲ့တယ်။ ဆမ်လီကတော့ အမ်မာရဲ့ ကျောင်းနေဖက် အခင်ဆုံးသူငယ်ချင်းပါ။ အမ်မာကို အရင်ဆုံးတွေ့ပြီး ချစ်နေခဲ့ပေမယ့် ဖွင့်မပြောဖြစ်ခဲ့လို့ တစ်ဖက်သတ်အချစ်နဲ့ပဲ ရပ်နေခဲ့ရသူ ဖြစ်ပါတယ်။ နောက်တော့ ဆမ်နဲ့ အမ်မာ ပြန်ဆုံကြတယ်။ ဂျက်စီမရှိတော့တာ သုံးနှစ်ကြာလာတဲ့အချိန်မှာ အမ်မာလည်း ဆုံးရှုံးမှုကို လက်ခံပြီး နောက်တစ်ကြိမ် ချစ်ဖို့ ဆုံးဖြတ်လိုက်ပါတယ်။ တကယ်တော့ ဂျက်စီဟာ မသေဆုံးဘဲ လူသူမရှိတဲ့ ကျွန်းတစ်ကျွန်းမှာ သောင်တင်နေခဲ့တာပါ။ အမ်မာကို ပြန်တွေ့ရမယ်ဆိုတဲ့ မျှော်လင့်ချက်နဲ့ လေးနှစ်လုံး အသက်ရှင်ဖို့ ကြိုးစားခဲ့ပေမယ့် ပြန်ရောက်လာချိန်မှာတော့ သူ့ဇနီးမှာ စေ့စပ်ထားသူ ရှိနေပြီ။ ထာဝရပျောက်ဆုံးသွားပြီလို့ ထင်ထားတဲ့ ခင်ပွန်းနဲ့ ဘဝကို ပြန်စဖို့ ရွေးချယ်ထားတဲ့ ချစ်သူတို့ကြား အမ်မာ ဘယ်လိုဆုံးဖြတ်မလဲ။ Luke Bracey နဲ့ Simu Liu တို့ အဓိကပါဝင်ထားတဲ့ အချစ်ဟာသဇာတ်ကားဖြစ်ပြီး ဇာတ်ဝင်တေးတွေလည်း ထည့်သွင်းထားပါတယ်။

အသက် ၃၉ နှစ်အရွယ် မာယာဟာ လူတွေနဲ့ သိပ်ရောနှောလေ့မရှိဘဲ ကိုယ့်ဘဝကို အေးအေးဆေးဆေး ဖြတ်သန်းနေသူပါ။ အတက်အကျ အပြောင်းအလဲတွေ နည်းလာတဲ့ အသက်အရွယ်ကို ရောက်နေပြီဖြစ်လို့ အခြေတကျရှိတဲ့ မိသားစုဘဝတစ်ခု တည်ထောင်ချင်နေတယ်။ အဲဒီအချိန်မှာပဲ သူ့ထက် အသက်ထက်ဝက်ကျော် ငယ်တဲ့ ကောင်လေးတစ်ယောက် သူ့ဘဝထဲ ဝင်လာပါတယ်။ ကောင်လေးရဲ့ တွေးခေါ်ပုံ၊ ရည်မှန်းချက်နဲ့ မျှော်လင့်ချက်တွေက မာယာကို သူငယ်ရွယ်စဉ်က ဘဝကို ပြန်သတိရစေတယ်။ ဒီကောင်လေးဟာ သူလိုချင်တဲ့ တည်ငြိမ်တဲ့ဘဝကို မပေးနိုင်ပေမဲ့ မာယာကတော့ သူ့ကို ဂရုစိုက်ပြီး ကူညီပေးချင်လာခဲ့တယ်။ အဲဒီစိတ်ကနေ တကယ်ချစ်မိသွားမလား၊ ဒါမှမဟုတ် အရင်လိုပဲ အချစ်မရှိဘဲ အတိတ်အကြောင်းတွေထဲ နစ်မြောရင်း ကျန်တဲ့ဘဝကို ဖြတ်သန်းသွားမလား။

Suite Française ဟာ စစ်အတွင်းမှာ ရန်သူဘက်အသီးသီးက ဖြစ်နေကြပြီး တာဝန်ဝတ္တရားတွေကြား ခြားနားနေတဲ့ ချစ်သူနှစ်ဦးအကြောင်းကို ရိုက်ကူးထားတဲ့ အချစ်စစ်ကားပါ။ အချစ်နဲ့အမုန်း ရောထွေးနေတဲ့ကြားက တစ်ယောက်အပေါ်တစ်ယောက် စိတ်တိမ်းညွှတ်လာမှုတွေကို အခြေခံထားပါတယ်။ ဒီရုပ်ရှင်ဖြစ်လာဖို့ မူရင်းဝတ္ထု ဖြတ်သန်းခဲ့ရတဲ့ခရီးကလည်း ရှည်လျားခဲ့တယ်။ စာရေးဆရာမ Irène Némirovsky ဟာ ဒုတိယကမ္ဘာစစ်အတွင်း ဒီဝတ္ထုကို ရေးသားခဲ့ပေမဲ့ ၂၀၀၄ ခုနှစ်ရောက်မှ ထုတ်ဝေနိုင်ခဲ့တာပါ။ ဂျူးလူမျိုးဖြစ်တဲ့ သူမကို ၁၉၄၂ ခုနှစ်မှာ ဂျာမန်တပ်တွေက ဖမ်းဆီးခဲ့ပြီး Auschwitz ချွေးတပ်စခန်းမှာ တခြားဂျူးလူမျိုးတွေနဲ့အတူ သတ်ဖြတ်ခဲ့ကြပါတယ်။ နှစ်ပေါင်း ၆၀ လောက်ကြာမှ သမီးဖြစ်သူက မိခင်ရဲ့မှတ်စုစာအုပ်ထဲမှာ ရေးထားတဲ့ ဝတ္ထုနှစ်ပုဒ်ကို တွေ့ရှိခဲ့တယ်။ အဲဒီနှစ်ပုဒ်ကို ပေါင်းစည်းရာက Suite Française ဆိုတဲ့ ဝတ္ထုဖြစ်လာပြီး နောက်ပိုင်းမှာ ရုပ်ရှင်အဖြစ် ရိုက်ကူးခဲ့တာပါ။ စာရေးဆရာမက မူလမှာ အပိုင်းငါးပိုင်းအဖြစ် ရေးဖို့ မှတ်စုတွေ ပြုစုထားခဲ့ပေမဲ့ နှစ်ပိုင်းကိုသာ အချောသတ်နိုင်ခဲ့တယ်။ ကျန်သုံးပိုင်းကတော့ သူမရဲ့မှတ်စုစာအုပ်ထဲက မှတ်တမ်းတွေအဖြစ်ပဲ ကျန်ရစ်ခဲ့ပါတယ်။

Toru ဟာ သူငယ်ချင်း အနိုင်ကျင့်ခံနေရတာကနေ ကယ်တင်ပေးဖို့ အတန်းဖော်ကောင်မလေး Hino ကို ချစ်ကြိုက်နေကြောင်း ဟန်ဆောင်ဖွင့်ပြောခဲ့ရပါတယ်။ Hino ကလည်း သူ့ကို ရည်းစားအဖြစ် လက်ခံလိုက်ပေမယ့် လိုက်နာရမယ့် စည်းကမ်းသုံးချက် သတ်မှတ်ပေးတယ်။ အဲဒီထဲက တစ်ချက်ကတော့ တကယ်ချစ်သွားလို့ မရဘူးဆိုတာပါပဲ။ Hino မှာလည်း သူ့အခက်အခဲနဲ့သူ ရှိနေပါတယ်။ ကားမတော်တဆမှုတစ်ခုကြောင့် မှတ်ဉာဏ်အသစ်တွေကို မထိန်းသိမ်းနိုင်တော့ဘဲ အိပ်ပျော်သွားတာနဲ့ အဲဒီနေ့က မှတ်ဉာဏ်တွေ ပျောက်သွားတတ်သူပါ။ ဒီလိုအခြေအနေမှာ သူတို့နှစ်ယောက်ရဲ့ ဟန်ဆောင်အချစ်ရေး စတင်လာပါတယ်။ ၂၀၁၆ ခုနှစ်က Tomorrow I Will Date With Yesterday’s You ကို ရိုက်ကူးခဲ့တဲ့ ဒါရိုက်တာတစ်ဦးတည်းရဲ့ လက်ရာဖြစ်ပြီး ကြည်နူးမှုနဲ့ လွမ်းဆွေးမှု ရောယှက်နေတဲ့ အချစ်ဇာတ်လမ်းပါ။

နော်ဝေးနိုင်ငံက မင်းသမီးလေး မာဂရက်သီဟာ ဆယ်ကျော်သက်တစ်ယောက်ပေမယ့် တော်ဝင်မိသားစုမှာ မွေးဖွားလာတဲ့အတွက် သူများတွေလို လွတ်လွတ်လပ်လပ် နေလို့မရပါဘူး။ လူထုရှေ့မှာ ကိုယ့်အပြုအမူကို အမြဲစောင့်ထိန်းနေရပြီး မိသားစုရေးကိစ္စတွေအပြင် ဆယ်ကျော်သက်အရွယ်ရဲ့ ပြဿနာတွေကိုလည်း ရင်ဆိုင်နေရတယ်။ လူမမြင်တဲ့နေရာမှာ ပြောစကားနားမထောင်ဘဲ အရက်သောက်၊ ဆေးသုံးနေချိန်တွေမှာတော့ သူ့အတွက် လွတ်လပ်မှုရသလို ခံစားရပါတယ်။ တစ်နေ့မှာ သူငယ်ချင်းဖြစ်သူ ဂူ့စတက်က မာဂရက်သီ ဆေးသုံးနေတဲ့ပုံကို ဗီဒီယိုရိုက်သွားတယ်။ ဖျက်ပေးဖို့ ပြောပေမယ့် ဂူ့စတက်ဆီက ရေရာတဲ့အဖြေ မရပါဘူး။ ဒီဗီဒီယိုအတွက် စိတ်ပူနေရချိန်မှာပဲ ဒိန်းမတ်နိုင်ငံက မင်းသားလေး အလက်ဇန်းဒါးဟာ သူနဲ့တွေ့ဆုံဖို့ ရောက်လာပါတယ်။ မာဂရက်သီတစ်ယောက် ဒီကိစ္စကို မပေါက်ကြားအောင် ဖြေရှင်းနိုင်မလား၊ ကြုံလာတဲ့အကြပ်အတည်းကို ဘယ်လိုရင်ဆိုင်မလဲဆိုတာကို ဆက်ထားတဲ့ ဒရာမာအချစ်ဇာတ်ကားပါ။

Virgil Oldman ဟာ ရှေးဟောင်းပစ္စည်းတွေကို တန်ဖိုးဖြတ်ရာမှာ ကျွမ်းကျင်တဲ့ လေလံပစ်သူတစ်ယောက်ပါ။ ငယ်သူငယ်ချင်း Billy Whistler နဲ့ ပူးပေါင်းပြီး တန်ဖိုးကြီးပန်းချီကားတွေကို ဈေးသက်သက်သာသာနဲ့ ရအောင် တစ်ဖက်လှည့် ဝယ်ယူလေ့ရှိတယ်။ အဲဒီပန်းချီကားတွေကို သူ့အိမ်ထဲက လျှို့ဝှက်ခန်းမှာ တန်ဖိုးထား သိမ်းဆည်းထားပါတယ်။ နှစ်ပေါင်းများစွာ အလုပ်ထဲမှာပဲ အချိန်ကုန်ခဲ့တဲ့ လူပျိုကြီး Oldman ဟာ အလွန်ချမ်းသာလာပေမယ့် အချစ်ကိုတော့ တစ်ခါမှ မကြုံဖူးသေးဘူး။ တစ်နေ့ Claire Ibbetson ဆိုတဲ့ အမျိုးသမီးငယ်တစ်ယောက်က သူမ အမွေရထားတဲ့ စံအိမ်ထဲက ရှေးဟောင်းပစ္စည်းတွေကို လေလံတင်ရောင်းဖို့ ဆက်သွယ်လာပါတယ်။ ထူးဆန်းတာက အချိန်အတော်ကြာတဲ့အထိ Oldman ဟာ သူမကို လူချင်းမတွေ့ရတာပါပဲ။ ဒါကြောင့်ပဲ သူမအကြောင်း ပိုစိတ်ဝင်စားလာမိတယ်။ Claire အပေါ် ခံစားနေရတာတွေကို လူငယ်မိတ်ဆွေ အင်ဂျင်နီယာ Robert ဆီမှာ သူ ရင်ဖွင့်ပါတယ်။ အချစ်ရေးမှာ အတွေ့အကြုံရှိတဲ့ Robert ရဲ့ အကြံပေးမှုနဲ့ Claire ကို တွေ့ခွင့်ရဖို့ Oldman ကြိုးစားပါတော့တယ်။

ဒီတလဂူးအချစ်ဒရာမာမှာ လူလေးယောက်ရဲ့ အချစ်ဇာတ်လမ်းနှစ်ခုကို ပြထားပါတယ်။ သူတို့ကြုံနေရတဲ့ ပြဿနာနှစ်ခုအတွက် အဖြေတစ်ခုနဲ့ ဖြစ်ရပ်တစ်ခု ရှိနေတယ်။ အဲဒီဖြစ်ရပ်ကြောင့် သူတို့ရဲ့ ပြဿနာတွေ ပြေလည်သွားနိုင်မလားဆိုတာကို ဆက်ကြည့်ရမှာပါ။ အချစ်ဇာတ်လမ်းတွေရဲ့ ကြည်နူးစရာအခိုက်အတန့်တွေနဲ့အတူ ဝမ်းနည်းစရာ ဒရာမာအပိုင်းတွေလည်း ပါဝင်ပါတယ်။ ကောလိပ်ကျောင်းသားဘဝကို ပြန်သတိရစေနိုင်တဲ့ ဇာတ်ဝင်ခန်းတွေကိုလည်း ထည့်သွင်းထားပါတယ်။

နွားနို့ကနေ ချိစ်ဖြစ်လာပြီး ချိစ်ကိတ်တစ်တုံးအဖြစ် တစ်ယောက်ယောက်ရဲ့လက်ထဲ ရောက်သွားတဲ့အထိ အဆင့်ဆင့်ကို မိန်းကလေးတွေကြားက အချစ်ဇာတ်လမ်းလေးပုဒ်နဲ့ ဆက်ပြထားပါတယ်။ အရောင်၊ အနံ့၊ အရသာ မတူတဲ့ ချိစ်တွေလိုပဲ အချစ်မှာလည်း ပုံစံအမျိုးမျိုး ရှိတယ်ဆိုတဲ့ အယူအဆနဲ့ တင်ဆက်ထားတာပါ။ ဇာတ်ကောင်ပရန်ရဲ့ စကားအရတော့ ချိစ်တစ်ခုဖြစ်လာဖို့ အဆင့်ဆင့် ကြိုးစားရသလို အချစ်အတွက်လည်း အလားတူ ကြိုးစားကြရပါတယ်တဲ့။ ပထမဇာတ်လမ်းမှာ နွားခြံပိုင်ရှင်မလေး ဖန်းနဲ့ သူငယ်ချင်းဖွန်တို့က အရည်အသွေးကောင်းတဲ့ နွားနို့ရဖို့ ရုန်းကန်ကြရတယ်။ ဒုတိယဇာတ်လမ်းကတော့ ချိစ်လုပ်နည်းသင်တန်းပိုင်ရှင်ရဲ့သမီး နောင်းနဲ့ အိမ်ကအခြေအနေတွေကို မခံနိုင်တော့လို့ နောင်းတို့ရဲ့ ဧည့်ရိပ်သာဆီ ရောက်လာတဲ့ အိုင်ရင်းတို့အကြောင်းပါ။ သူတို့နှစ်ယောက်ရဲ့ လက်ရာချိစ်က ဒီအဆင့်မှာ ပါဝင်လာပါတယ်။ ချိစ်တွေကို မြို့ပေါ်ပို့ရမယ့် တတိယအဆင့်မှာတော့ ပို့ဆောင်ရေးအလုပ်လုပ်တဲ့ ပရန်နဲ့ လမ်းကြုံလိုက်လာသူ မြူတို့ရဲ့ ခရီးကို တွေ့ရမယ်။ မြူက ပရန်တစ်ချိန်က မြတ်နိုးခဲ့ရသူဖြစ်ပြီး ခရီးရှည်တစ်လျှောက်မှာ အတိတ်ကအချစ်အကြောင်းတွေ ပြန်ပေါ်လာပါတယ်။ နောက်ဆုံးဇာတ်လမ်းမှာ မယ်ဂျီက ရလာတဲ့ချိစ်ကို ချိစ်ကိတ်အဖြစ် ပြုလုပ်ရင်း အိမ်နီးချင်း ကော်ဖီဆိုင်ပိုင်ရှင်မလေး ဖတ်ကို ချစ်ရေးဆိုဖို့ ရည်ရွယ်ထားတယ်။ ဒီ GL ဇာတ်လမ်းလေးပုဒ်မှာ ထိုင်းနိုင်ငံက BNK48 နဲ့ CGM48 အဖွဲ့ဝင်တွေ ပါဝင်သရုပ်ဆောင်ထားပါတယ်။

ကယ်လက်ဘ်ဟာ ဖခင်နဲ့ ကြီးပြင်းလာတဲ့ ဆယ်ကျော်သက်တစ်ယောက်ပါ။ အရာရာကို မကောင်းမြင်တတ်ပြီး ကိုယ်လိုချင်တာကိုပဲ ရှေ့တန်းတင်တတ်တဲ့ သူ့မှာ ညစ်ကန်ကန်၊ ဂျစ်တစ်တစ် အမူအကျင့်တွေ ရှိတယ်။ အစ်ကိုဖြစ်သူ အာရွန်အပေါ်မှာလည်း မကျေနပ်စိတ် ရှိနေပါတယ်။ အမေသေဆုံးသွားပြီဆိုတဲ့စကားဟာ အမှန်မဟုတ်ကြောင်း အရွယ်ရောက်မှ မထင်မှတ်ဘဲ သိလိုက်ရတော့ ကယ်လက်ဘ်က အမေ့ကို သွားတွေ့ဖို့ ကြိုးစားလာတယ်။ တစ်ဖက်မှာလည်း ဖခင်ဆုံးရှုံးခဲ့တဲ့ ပိုက်ဆံတွေကို ကိုယ့်ဉာဏ်နဲ့ကိုယ် ပြန်ရှာပေးခဲ့ပေမယ့် ဖခင်ရဲ့ တင်းကျပ်တဲ့ အကျင့်တရားခံယူချက်နဲ့ သားရဲ့စိတ်ကို နားမလည်နိုင်မှုကြောင့် သူအကြီးအကျယ် ကြေကွဲရပါတယ်။ အပြင်ပန်းမှာ ခက်ထန်နေပေမယ့် သူ့ဘက်က ကြိုးစားပေးမှုနဲ့ နာကျင်ရမှုတွေကိုပါ တွေ့ရတဲ့ ဇာတ်ကောင်ပါ။ ဒီမိသားစုဒရာမာမှာ အပြစ်မကင်းတဲ့ အချစ်အကြောင်းလည်း ပါဝင်ပြီး ကယ်လက်ဘ်အဖြစ် ဂျိမ်းစ် ဒင်းက သရုပ်ဆောင်ထားပါတယ်။ သူ့ရဲ့သရုပ်ဆောင်ဟန်ကို ပြောရာမှာ စံထားသူအပေါ် စိတ်ပျက်ရတဲ့ လူငယ်တွေရဲ့ခံစားချက်နဲ့ လူမှုပတ်ဝန်းကျင်မှာ ဝင်မဆံ့သလိုဖြစ်နေမှုတွေကို ဖော်ပြနိုင်သူအဖြစ် မူရင်းက ရည်ညွှန်းထားတယ်။ ငယ်ရွယ်စဉ် ကားမတော်တဆမှုနဲ့ ကွယ်လွန်ခဲ့တဲ့ သူဟာ သေဆုံးပြီးနောက် အကယ်ဒမီဆုဆန်ကာတင်စာရင်းမှာ နှစ်ကြိမ် ပါဝင်ခဲ့ပါတယ်။

Trisha ဟာ ငယ်ငယ်ကတည်းက အမေရိကမှာ နေလာခဲ့ပြီး အဲဒီမှာပဲ ချစ်ရသူနဲ့တွေ့လို့ လက်ထပ်ဖို့ ဆုံးဖြတ်ထားသူပါ။ ဒါပေမဲ့ ချစ်သူဖောက်ပြန်သွားတဲ့အခါ သူမျှော်လင့်ထားတဲ့အတိုင်း မဖြစ်လာတော့ဘဲ အသည်းကွဲပြီး ဖိလစ်ပိုင်ကို အလည်ပြန်လာခဲ့တယ်။ ဘဝက ထင်သလိုမဖြစ်တော့တဲ့အတွက် ခဏလောက် လွတ်လွတ်လပ်လပ် နေလိုစိတ်နဲ့ နိုက်ကလပ်တစ်ခုကို သွားဖြစ်ပါတယ်။ အဲဒီမှာ ကချေသည်အဖြစ် အလုပ်လုပ်နေတဲ့ Gabo နဲ့ ဆုံမိကြတယ်။ ဘာဆိုဘာမှ မတူကြတဲ့ သူတို့နှစ်ယောက်ကြားက တွေ့ဆုံမှုဟာ ဘယ်လိုဆက်ဖြစ်လာမလဲဆိုတာကို ပြောပြမယ့် ဖိလစ်ပိုင် အချစ်ဟာသကားလေးပါ။

Rae Parker ဟာ အမျိုးသမီးတွေ တစ်ယောက်တည်း ခရီးထွက်စွန့်စားနိုင်ဖို့ ဆောင်းပါးတွေ ရေးပေးနေတဲ့ ဆောင်းပါးရှင်တစ်ယောက်ပါ။ သူရေးနေတဲ့အကြောင်းအရာတွေမှာ တောင်တက်ခရီးတွေ များလွန်းလာတော့ အယ်ဒီတာက ငြီးငွေ့စရာဖြစ်နေပြီလို့ ယူဆလာတယ်။ ဒါကြောင့် အသစ်အဆန်းတစ်ခု ရေးနိုင်ဖို့ Rae ကို မော်လ်ဒိုက်ကျွန်းတွေဆီ သွားခိုင်းလိုက်ပါတယ်။ ဒီခရီးမှာ Rae ဘယ်လိုစွန့်စားစရာတွေ ရှာတွေ့မလဲ၊ အဲဒီကလူတွေနဲ့ ဘယ်လိုခင်မင်လာမလဲ၊ ဘယ်လိုအလှအပတွေကို တွေ့ရမလဲဆိုတာ ဆက်ကြည့်ရမှာပါ။ မော်လ်ဒိုက်ရဲ့ ကျွန်းရှုခင်းတွေနဲ့အတူ အချစ်ဇာတ်ဝင်ခန်းလေးတွေပါ တွဲထားတဲ့ အချစ်ကားတစ်ကား ဖြစ်ပါတယ်။

၂၀၂၂ ခုနှစ်ထွက် တမီးလ်ရုပ်ရှင် Love Today က ချစ်သူနှစ်ယောက်ကြားက ယုံကြည်မှုကို ဖုန်းတစ်လုံးစီနဲ့ စမ်းသပ်ကြည့်တဲ့ ဇာတ်လမ်းပါ။ ချစ်သူတွေဟာ တွဲလာတာကြာရင် တစ်ယောက်အကြောင်းတစ်ယောက် ကောင်းကောင်းသိပြီ၊ လျှို့ဝှက်ချက်မရှိဘူး၊ အပြည့်အဝယုံတယ်လို့ ပြောတတ်ကြပါတယ်။ ဒါပေမယ့် ကိုယ့်ဖုန်းနဲ့ စကားဝှက်ကိုပါ တစ်ဖက်လူဆီ အပ်ရမယ်ဆိုရင် အဲဒီယုံကြည်မှုကို သက်သေပြရဲကြပါ့မလား။ ဒီဇာတ်လမ်းထဲက ချစ်သူနှစ်ဦးလည်း အချင်းချင်းချစ်ကြပြီး တစ်ယောက်အကြောင်းတစ်ယောက် သိကြတယ်ဆိုတာ သက်သေပြဖို့ ဖုန်းချင်းလဲသုံးခိုင်းခံရပါတယ်။ ဖုန်းကို လိုလိုလားလား လဲပေးနိုင်ကြမလား၊ ကိုယ့်ဖုန်းရဲ့ စကားဝှက်ကို တစ်ဖက်လူ မဖွင့်နိုင်အောင် ဘယ်လိုများ ကြံကြမလဲ။ ဖုန်းထဲကနေ ဘယ်လိုလျှို့ဝှက်ချက်တွေ တွေ့လာကြမလဲ၊ သိသွားတဲ့အခါမှာရော တစ်ယောက်ကိုတစ်ယောက် လက်ခံနိုင်ကြဦးမလား။