အချစ်ဇာတ်လမ်းများ

လေယာဉ်မယ် အားနန်နဲ့ အင်္ဂလန်မှာ ပညာသင်ပြီး ပြန်လာတဲ့ ဆိုင်းမွန်တို့ဟာ ချစ်သူဖြစ်ပြီး တစ်နှစ်အကြာမှာ လက်ထပ်ဖို့ ဆုံးဖြတ်လိုက်ကြပါတယ်။ နှစ်ယောက်အတူ နေထိုင်ဖို့ ကိုယ်ပိုင်နေရာလေး ရှိချင်ကြတာပါ။ ဒါပေမယ့် သူတို့အတွက် အိမ်ထောင်ပြုခြင်းက ပျော်ရွှင်တဲ့ဇာတ်သိမ်း ဖြစ်မလာခဲ့ဘူး။ အတူနေထိုင်လာတဲ့အခါ အမြင်မတူညီမှုတွေကြောင့် ပြဿနာတွေ ဆက်တိုက်ဖြစ်လာပါတယ်။ တစ်ယောက်ကိုတစ်ယောက် အချစ်ဆုံးလို့ ထင်ခဲ့ကြသူနှစ်ယောက်ဟာ အနေနီးလာပေမယ့် စိတ်ချင်းတော့ ဝေးလာကြတယ်။ အချစ်တစ်ခုတည်းနဲ့ အိမ်ထောင်တစ်ခု တည်ဆောက်ဖို့ လုံလောက်ရဲ့လားဆိုတဲ့ အကြောင်းကို သူတို့ရဲ့ အိမ်ထောင်ရေးကနေ ပြထားပါတယ်။

ဂျေဆန်စတီဗင်ဟာ အဘိုးဆီက အမွေရပြီးနောက် တခြားမိသားစုဝင်တွေရဲ့ လောဘနဲ့ မလိုမုန်းထားမှုကြောင့် ဖြစ်လာတဲ့ တိုက်ခိုက်မှုတွေကို ကာကွယ်နေရပါတယ်။ ငွေကြေးအမွေ ရလာပေမယ့် သူ့ဘဝက အေးချမ်းမသွားဘဲ တစ်ဖက်မှာလည်း ချစ်သူနဲ့ ပြဿနာတွေ ပေါ်လာတယ်။ ဒီအခက်အခဲတွေကို ဖြေရှင်းဖို့ လမ်းစရှာရင်း အဘိုးရဲ့ နေ့စဉ်မှတ်တမ်းကို အားကိုးဖတ်ရှုဖို့ ဖြစ်လာပါတယ်။ ငွေရှိရုံနဲ့ ဘဝပြည့်စုံပြီလား၊ ဘဝရဲ့တန်ဖိုးကို ငွေကြေးတစ်ခုတည်းနဲ့ ဆုံးဖြတ်လို့ရသလားဆိုတဲ့ အကြောင်းကို ဂျေဆန်ရဲ့အဖြစ်နဲ့ တွဲတင်ပြထားပါတယ်။ အဘိုးဖြတ်သန်းခဲ့တဲ့ ဘဝမှတ်တမ်းထဲကနေ သူ့အတွက် ဘယ်လိုသင်ခန်းစာတွေ ရလာမလဲဆိုတာ ဆက်ကြည့်ရမှာပါ။ The Ultimate Gift၊ The Ultimate Life နဲ့ The Ultimate Legacy တို့ပါဝင်တဲ့ The Ultimate Trilogy ထဲက ရုပ်ရှင်တစ်ကားဖြစ်ပါတယ်။

ကျောင်းသူကျောင်းသားတွေ အချင်းချင်း ချစ်ကြိုက်တာနဲ့ အချစ်ရေးအပြုအမူတွေကို တားမြစ်ထားတဲ့ စည်းကမ်းတင်းကျပ်လှသူ ကျောင်းအုပ်ကြီးတစ်ယောက် ရှိပါတယ်။ သူ့သမီးက ကောင်လေးတစ်ယောက်နဲ့ ချစ်ကြိုက်နေကြောင်း သိသွားတဲ့အခါမှာတော့ အဲဒီတားမြစ်ချက်က သူ့မိသားစုအထိ ရောက်လာတယ်။ ချစ်သူနှစ်ယောက်ကို ခွဲဖို့လုပ်ကြတဲ့ အတ္တမာနတွေကြားမှာ သူတို့ရဲ့အချစ်ဇာတ်လမ်းဟာ ဝမ်းနည်းစရာ ဖြစ်ခဲ့ရပါတယ်။ နှစ်အနည်းငယ်ကြာတော့ အဲဒီကောင်လေးက ကျောင်းအုပ်ကြီးကို လက်စားချေဖို့ ဂီတဆရာအဖြစ် ကျောင်းကို ပြန်ရောက်လာပါတယ်။ အချစ်ကို အယုံအကြည်မရှိဘဲ စည်းကမ်းကိုပဲ အလေးထားတဲ့ ကျောင်းအုပ်ကြီးနဲ့ အချစ်ကို အပြည့်အဝယုံကြည်တဲ့ လူငယ်တို့ကြား အားပြိုင်မှုတွေ စလာတော့တယ်။ အမီတာဘချမ်း၊ ရှရွတ်ခန်းနဲ့ Aishwarya Rai တို့ ပါဝင်ထားတဲ့ ဂီတ၊ အချစ်နဲ့ ဒရာမာဇာတ်ကားဖြစ်ပြီး Mohabbatein ဆိုတဲ့ ဟင်ဒီခေါင်းစဉ်ကို မြန်မာလို အချစ်ပုံပြင်လို့ ပြန်ဆိုနိုင်ပါတယ်။

ပူရူအင်ပါယာရဲ့ မင်းကြီးဒူရှန်တာဟာ ရဲစွမ်းသတ္တိရှိပြီး မင်းကျင့်တရားနဲ့အညီ တိုင်းပြည်ကို အုပ်ချုပ်သူပါ။ ရှာကွန်သာလာကတော့ ကံအကြောင်းမလှလို့ မိဘမဲ့ဖြစ်ခဲ့ပြီး ဂုရုကြီးရဲ့ မွေးစားသမီးအဖြစ် ကြီးပြင်းလာတဲ့ မိန်းကလေးတစ်ယောက် ဖြစ်ပါတယ်။ ဒီနှစ်ယောက် ဆုံတွေ့ပြီး ချစ်သူတွေ ဖြစ်လာကြပေမယ့် အတူရှိနေနိုင်တဲ့ အချိန်က မကြာခဲ့ပါဘူး။ ရန်သူတွေနဲ့ တိုင်းပြည်တာဝန်တွေ ရှိနေတဲ့ ဒူရှန်တာဟာ ရှာကွန်သာလာကို သူ့နေရပ်မှာ ထားခဲ့ပြီး တိုင်းပြည်ဆီ ခဏပြန်သွားရပါတယ်။ ရှာကွန်သာလာမှာလည်း အခက်အခဲတချို့ ကြုံလာရပြီး ဒူရှန်တာရဲ့ တိုင်းပြည်ကို လိုက်သွားဖို့ လုပ်လာတယ်။ ဒီခရီးကို အောင်အောင်မြင်မြင် သွားနိုင်ပါ့မလား၊ ကြုံလာတဲ့ အခက်အခဲတွေကို ဘယ်လိုဖြေရှင်းမလဲ၊ ဒူရှန်တာကရော ချစ်သူကို လက်ခံပါ့မလားဆိုတဲ့ မေးခွန်းတွေ ရှိနေပါတယ်။ Dev Mohan နဲ့ Samantha Ruth Prabhu တို့က ဒီရာဇဝင်နောက်ခံ အချစ်ဇာတ်လမ်းမှာ ပါဝင်သရုပ်ဆောင်ထားကြပါတယ်။

ပီတာနဲ့ ဒက်ဘီတို့က ငယ်သူငယ်ချင်းတွေပါ။ အကြောင်းတစ်ခုကြောင့် ဝေးသွားကြပေမယ့် အဆက်အသွယ်မပြတ်ကြသလို တစ်ယောက်အကြောင်းတစ်ယောက်လည်း နားလည်ကြတယ်။ ဒက်ဘီက ကလေးတစ်ယောက်ကို တစ်ယောက်တည်း ပြုစုပျိုးထောင်နေတဲ့ မိခင်ဖြစ်ပြီး ပီတာကတော့ လူလွတ်ပါ။ ကိုယ်သဘောကျတဲ့ မိန်းကလေးတွေနဲ့ တွဲဖြစ်ပေမယ့် သူ့အချစ်ရေးတွေက ခြောက်လတောင် မခံပါဘူး။ တစ်နေ့မှာ ဒက်ဘီက ရှေ့ရေးအတွက် ဒီဂရီတစ်ခုယူဖို့ အဝေးတစ်နေရာကို သွားဖို့ ဆုံးဖြတ်လိုက်တယ်။ သူမသွားနေတဲ့အချိန်အတွင်း ကလေးကို ပီတာက လာစောင့်ရှောက်ပေးဖို့ အကြောင်းဖန်လာပါတယ်။ ဒီအစီအစဉ်ကနေ ငယ်သူငယ်ချင်းနှစ်ယောက်ရဲ့ ဆက်ဆံရေး ဘယ်လိုဆက်ဖြစ်လာမလဲဆိုတာကို Reese Witherspoon နဲ့ Ashton Kutcher တို့ အဓိကသရုပ်ဆောင်ထားတဲ့ အချစ်ဟာသဇာတ်ကားမှာ တင်ပြထားပါတယ်။

ရှားမန်းဟာ ဉာဏ်ကောင်းပြီး ထူးချွန်တဲ့ သိပ္ပံပညာရှင်တစ်ယောက်ဖြစ်ပေမယ့် မျိုးရိုးကြောင့် အဝလွန်နေတာကို စိတ်ဓာတ်ကျနေသူပါ။ သူ့ပညာကို အသုံးချပြီး ဝစေတဲ့ဗီဇကို ပြောင်းလဲပေးနိုင်တဲ့ ဆေးရည်တစ်မျိုး ဖော်ထုတ်နိုင်ခဲ့ပါတယ်။ အဲဒီဆေးရည်ကို သုံးပြီး အရင်က မရခဲ့တဲ့ လေးစားမှုနဲ့ ချစ်ခြင်းမေတ္တာကို ရဖို့ ကြိုးစားလာတယ်။ ဒါပေမယ့် ဆေးရည်မှာ ဘေးထွက်ဆိုးကျိုးတွေ ရှိနေတာကြောင့် သူမျှော်လင့်ထားသလို မဖြစ်ဘဲ အလွဲလွဲအချော်ချော်တွေ ဖြစ်ကုန်ပါတယ်။ ၁၉၉၆ ခုနှစ်မှာ ထွက်ရှိခဲ့တဲ့ သိပ္ပံစိတ်ကူးယဉ် အချစ်ဟာသဇာတ်ကားဖြစ်ပြီး Eddie Murphy နဲ့အတူ Jada Pinkett၊ James Coburn နဲ့ Dave Chappelle တို့ ပါဝင်သရုပ်ဆောင်ထားပါတယ်။

တစ်ချိန်က ခင်မင်ရင်းနှီးခဲ့ကြတဲ့ သူငယ်ချင်းတစ်သိုက်ဟာ နှစ်ပေါင်းများစွာ ဝေးကွာနေရာကနေ တစ်နေ့မှာ ပြန်ဆုံကြပါတယ်။ ကျောင်းသားဘဝက အကြောင်းတွေ ပြန်ပြောရင်း ပျော်ခဲ့ရတဲ့အချိန်တွေကို အမှတ်ရကြတယ်။ ဒါပေမယ့် လက်ရှိဘဝအကြောင်းတွေ ဆက်ပြောလာတဲ့အခါ တစ်ယောက်စီမှာ အဆင်မပြေမှုတွေ ရှိနေကြမှန်း သိလာရပါတယ်။ အိမ်ထောင်ရေး၊ အချစ်ရေးနဲ့ အလုပ်အကိုင်ကိစ္စတွေကြောင့် သူတို့ဘဝတွေက ကျောင်းသားဘဝတုန်းကလို မပျော်ရွှင်နိုင်ကြတော့ဘူး။ ကိုယ့်အခက်အခဲနဲ့ကိုယ် ဖြစ်နေကြချိန်မှာ အရင်လို ဆက်ခင်မင်နိုင်ကြဦးမလား၊ ပြဿနာတွေကိုလည်း ရင့်ကျက်တဲ့လူကြီးတွေအနေနဲ့ ဘယ်လိုဖြေရှင်းကြမလဲ။ ဇာတ်လမ်းက သူတို့ရဲ့ ကျောင်းသားဘဝ ပျော်စရာအမှတ်တရတွေကို နောက်ကြောင်းပြန်ပြရင်း လက်ရှိကြုံနေရတဲ့ အခြေအနေတွေနဲ့ ယှဉ်ပြီး တင်ဆက်ထားပါတယ်။ ကန်နဒါသရုပ်ဆောင်တွေ ပါဝင်ထားတဲ့ ဇာတ်ကားပါ။

ချီကာဂိုတက္ကသိုလ်ကနေ ကျောင်းပြီးလို့ နယူးယောက်ကို သွားကြတဲ့လမ်းမှာ ဟယ်ရီနဲ့ ဆယ်လီ စတွေ့ကြပါတယ်။ အဲဒီတုန်းကတော့ တွေ့ဆုံရုံနဲ့ပဲ ပြီးသွားခဲ့တယ်။ နောက်တစ်ကြိမ် လေဆိပ်မှာ ပြန်ဆုံတော့ နှစ်ယောက်စလုံး အလုပ်အကိုင်ကိုယ်စီနဲ့ ဖြစ်နေကြပြီ။ တစ်ယောက်ကိုတစ်ယောက် မှတ်မိပြီး စကားပြောဖြစ်ကြပေမယ့် ဒီတစ်ခါလည်း သူတို့ကြားမှာ ဘာမှဆက်မဖြစ်ခဲ့ပါဘူး။ စာအုပ်ဆိုင်တစ်ဆိုင်မှာ ထပ်ဆုံကြတဲ့အချိန်မှာတော့ နှစ်ယောက်လုံးရဲ့ ဘဝက ပြောင်းလဲနေပါပြီ။ ဟယ်ရီက အိမ်ထောင်ကျခဲ့ပြီး ဇနီးဖြစ်သူရဲ့ စွန့်ခွာမှုကို ခံထားရသလို ဆယ်လီလည်း ရည်းစားနဲ့ ကွဲထားရတယ်။ အသည်းကွဲနေတဲ့သူနှစ်ယောက် ကိုယ့်ဘဝအကြောင်း သူ့ဘဝအကြောင်း ပြောဖြစ်ကြရင်း ဒီတစ်ခေါက်မှာတော့ သူငယ်ချင်းတွေ ဖြစ်လာကြပါတယ်။ အဲဒီကနေ သူငယ်ချင်းထက် ပိုတဲ့ဆက်ဆံရေးဆီ ရောက်လာတဲ့အခါ တစ်ယောက်အကြောင်းတစ်ယောက် သိနေကြပေမယ့် ပြဿနာတွေက ရှိနေဆဲပါ။ ဟယ်ရီနဲ့ ဆယ်လီက အမြင်မတူကြသလို ကိုယ့်အတ္တနဲ့ကိုယ် ငြင်းခုံတတ်ကြသူတွေပါ။ ဟယ်ရီက ယောက်ျားတစ်ယောက်ရဲ့ ရှုထောင့်ကနေ မြင်ပြီး ဆယ်လီကလည်း မိန်းမတစ်ယောက်ရဲ့ ရှုထောင့်ကနေ မြင်တယ်။ ဒါပေမယ့် တခြားသူတွေကို မပြောဖြစ်တဲ့အကြောင်းတွေပါ အချင်းချင်း ဖွင့်ပြောနိုင်ကြတယ်။ တစ်ယောက်အတွက်တစ်ယောက် အားကိုးစရာ ဖြစ်လာကြပေမယ့် ညှိယူလို့ရတဲ့ကိစ္စတွေရှိသလို ညှိမရတဲ့ ကွာခြားချက်တွေလည်း ရှိကြပါတယ်။ ဖြစ်ရပ်တွေ ဆက်တိုက်ဖြစ်နေတာထက် တွေ့ဆုံမှုတစ်ခုနဲ့တစ်ခုကြား အချိန်တွေ ခြားနေတဲ့ အခ

ဂျော့ဒရိုင်ယာဟာ ဘောလုံးလောကကနေ အနားယူထားတဲ့ နာမည်ကြီးကစားသမားတစ်ယောက်ပါ။ လက်ရှိမှာတော့ စီးပွားရေးလည်း အဆင်မပြေ၊ အိမ်ထောင်လည်းကွဲနေပြီး သားအတွက်တောင် အချိန်ပြည့် ရှိနေပေးနိုင်သူ မဟုတ်ပါဘူး။ အလုပ်ရှာနေတုန်း သားနဲ့တွေ့ဖို့ နယ်မြို့လေးတစ်မြို့ကို ရောက်လာရာက အခြေအနေအရ သားရဲ့ဘောလုံးနည်းပြ ဖြစ်သွားပါတယ်။ နာမည်ကြီးဘောလုံးသမားဖြစ်ခဲ့တဲ့ ဂျော့က ရောက်လေရာမှာ လူကြိုက်များသူပါ။ ဒီတစ်ခါလည်း ကလေးအမေသုံးယောက်နဲ့ လိမ်လိုက်လှည့်လိုက် ဆက်ဆံနေရင်း သားအပေါ် ဖခင်တာဝန်ကျေအောင် ဘယ်လိုလုပ်သွားမလဲဆိုတာကို အချစ်ရေး၊ ဟာသနဲ့ မိသားစုအကြောင်းတွေ ရောပြီး ပြထားပါတယ်။

မာနိုးဂ်ျနဲ့ နီရူးတို့ဟာ တစ်ချိန်က ချစ်သူတွေဖြစ်ခဲ့ကြပါတယ်။ ဒါပေမယ့် တစ်နေ့မှာ နီရူးက ချမ်းသာတဲ့သူတစ်ယောက်နဲ့ လက်ထပ်တော့မှာဖြစ်လို့ သူ့ကို မေ့လိုက်ဖို့ မာနိုးဂ်ျကို ပြောလာတယ်။ အဲဒီလိုနဲ့ ကွဲကွာသွားကြတဲ့ သူတို့နှစ်ယောက်ဟာ အချိန်အတော်ကြာမှ ပြန်ဆုံဖြစ်ကြပါတယ်။ ပြန်တွေ့ချိန်မှာ လွမ်းဆွတ်မှုတွေနဲ့အတူ နောင်တတွေလည်း ပါလာတယ်။ အခု သူတို့တစ်ယောက်စီရဲ့ဘဝက ဘယ်လိုဖြစ်နေပြီလဲ၊ ပြန်ပြောင်းလဲဖို့ အခွင့်အရေး ရှိသေးလား၊ ဒါမှမဟုတ် နောက်ကျသွားပြီလားဆိုတဲ့ မေးခွန်းတွေက ဒီတွေ့ဆုံမှုမှာ ရှိနေပါတယ်။ အက်ရှ်ဝါးရိယားရွိုင်နဲ့ အာဂျေးဒေ့ဗ်ဂန်းဒ်တို့ ပါဝင်ထားတဲ့ ဘောလိဝုဒ် အချစ်ဒရာမာဇာတ်ကားပါ။

ငယ်သူငယ်ချင်းဖြစ်တဲ့ ကောင်လေးနဲ့ ကောင်မလေးဟာ တစ်ယောက်နဲ့တစ်ယောက် သံယောဇဉ်ရှိကြပါတယ်။ ကောင်မလေးက သူငယ်ချင်းအဖြစ်ပဲ သဘောထားပေမယ့် ကောင်လေးကတော့ ဒီထက်ပိုပြီး နီးစပ်ချင်နေတယ်။ ဖွင့်ပြောလိုက်ရင်လည်း ကောင်မလေး စိတ်ဆိုးသွားမှာကြောက်တော့ ကိုယ့်စိတ်ကိုယ်မျိုသိပ်နေရတာပေါ့။ အဲဒီအချိန်မှာ သူ့သူငယ်ချင်းတစ်ယောက်က ကောင်မလေးကို သဘောကျနေကြောင်း လာပြောပြီး အကူအညီတောင်းလာပါတယ်။ ကောင်မလေး ဘာကြိုက်တတ်သလဲဆိုတာ ပြောပြပေးဖို့နဲ့ သူပေးတဲ့အကြံအတိုင်း လုပ်မယ်ဆိုပြီး အပူကပ်လာတာပါ။ ငြင်းဖို့လည်းခက်၊ ကူညီပေးချင်စိတ်လည်း မရှိတဲ့ကောင်လေးက ကောင်မလေး မကြိုက်လောက်တဲ့ အကြံတွေကို တမင်ပေးလိုက်တယ်။ ဒါပေမယ့် သူတွက်ထားသလို ဖြစ်မလာဘဲ အဲဒီအကြံတွေအတိုင်း လုပ်တဲ့သူငယ်ချင်းကို ကောင်မလေးက ပြန်သဘောကျသွားတဲ့အခါ ကောင်လေးအတွက် ပိုပြီးအခက်တွေ့ရပါတော့တယ်။

ဆာဟာဟာ မွေးရာပါရောဂါကြောင့် အိမ်နဲ့ဆေးရုံကလွဲလို့ တခြားနေရာတွေကို လွတ်လွတ်လပ်လပ် သွားလာပျော်ပါးခွင့်မရတဲ့ မိန်းကလေးတစ်ယောက်ပါ။ သူ့အတွေးနဲ့ စိတ်ကူးတွေကို မျှဝေနိုင်ပြီး သူ့ကို နားလည်ပေးမယ့် လက်တွဲဖော်တစ်ယောက် ရှိလာဖို့ တောင့်တနေတယ်။ အမ်ဂျေကတော့ လွတ်လွတ်လပ်လပ် သွားလာပျော်ပါးတတ်ပြီး ဘဝကို ပျော်ပျော်နေတတ်သူပါ။ တစ်ခါတစ်ရံ ခိုးမှုအသေးစားတွေပါ ကျူးလွန်တတ်တယ်။ နေချင်သလိုနေပြီး သွားချင်ရာသွားနေတဲ့ အမ်ဂျေနဲ့ အိမ်၊ ဆေးရုံကြားမှာပဲ အချိန်ကုန်နေရတဲ့ ဆာဟာတို့ ဘယ်လိုတွေ့ဆုံပြီး ချစ်မိကြမလဲ။ တစ်ယောက်အတွက်တစ်ယောက် အသက်ပေးနိုင်လောက်အောင် ချစ်ကြသူနှစ်ဦးရဲ့ အချစ်ဇာတ်လမ်းပါ။

မိန်းကလေးတစ်ယောက်ဟာ သူ့ချစ်သူနဲ့ ကိုယ်ဝန်ရလာတဲ့အခါ ဖျက်ချဖို့ ပြောခံခဲ့ရပေမယ့် ကလေးကို မွေးဖို့ပဲ ဆုံးဖြတ်ခဲ့ပါတယ်။ ကျောင်းလည်းထွက်လိုက်ရပြီး ကလေးအတွက် ကိုယ့်အားကိုယ်ကိုး ရုန်းကန်ရှာဖွေနေရတယ်။ ဒီနောက်ကြောင်းတွေကို ဇာတ်ဝင်ခန်းတွေနဲ့ တိုက်ရိုက်ပြထားတာမဟုတ်ဘဲ စကားပြောခန်းတွေနဲ့ သူ့လက်ရှိဘဝအခြေအနေကနေ သိလာရတာပါ။ အီရန်မှာ နေထိုင်တဲ့ ဒီမိန်းကလေးဟာ ကလေးရှိနေတဲ့အကြောင်းကို မိဘတွေကို အသိပေးလို့မရသလို ပတ်ဝန်းကျင်ရဲ့ အပြစ်တင်မှုကိုလည်း ခံနေရပါတယ်။ အဲဒီကြားထဲ မိဘတွေက သူ့ဆီ တစ်ရက်လာလည်မယ်ဆိုတော့ ကလေးကို ခဏထိန်းပေးမယ့်သူ ရှာရတော့တယ်။ တစ်ရက်လေးအတွက် အကူအညီတောင်းရတာပေမယ့် သူ့အတွက်တော့ မလွယ်ပါဘူး။ ဇာတ်လမ်းတစ်လျှောက်လုံးမှာ သူ့ကလေးကို တစ်ရက်တာ ထိန်းပေးဖို့ အသိမိတ်ဆွေတွေဆီ လှည့်လည်အကူအညီတောင်းနေရတဲ့ မိခင်တစ်ယောက်နောက်ကို လိုက်ကြည့်ရပါတယ်။ ငြင်းပယ်သူတွေက ဘာအကြောင်းပြချက်တွေ ပေးကြမလဲ၊ ကူညီမယ့်သူ ရှာတွေ့ပါ့မလား။ ကလေးငယ်ကို သူစိမ်းတစ်ယောက်လက်ထဲ ထားခဲ့ရမယ်ဆိုရင် မိခင်တစ်ယောက်အနေနဲ့ ဘယ်လိုခံစားရမလဲဆိုတာကိုလည်း တွေးမိစေတယ်။ တစ်ရက်တာအတွင်း ဇာတ်အိမ်တည်ထားတဲ့ ဒီအီရန်ဒရာမာမှာ ဖိနှိပ်ကန့်သတ်မှုတွေကြားက အမျိုးသမီးတစ်ယောက်ရဲ့ အခက်အခဲနဲ့ သူများအတွက် အသေးအဖွဲလို့ ထင်ရတဲ့ကိစ္စတစ်ခုက သူ့ဘဝကို ဘယ်လောက်ထိ ထိခိုက်စေနိုင်သလဲဆိုတာ ပြထားပါတယ်။

ဟာရီကာဟာ စိတ်ဓာတ်ကျပြီး ကိုယ့်အသက်ကိုယ် အဆုံးစီရင်ဖို့အထိ တွေးနေတဲ့ မိန်းကလေးတစ်ယောက်ပါ။ အဲဒီလိုအချိန်မှာ အကြောင်းတစ်ခုကြောင့် ဘားတစ်ခုကို သွားဖြစ်ရင်း ဟာရှာဆိုတဲ့ ကောင်လေးနဲ့ တွေ့ခဲ့တယ်။ နှစ်ယောက်သား ကိုယ့်ဘဝအကြောင်းတွေ အပြန်အလှန် ပြောပြကြရာက ဟာရီကာရဲ့ နောက်ကြောင်းကို သိလာရပါတယ်။ အရင်က ဟာရီကာဟာ ကိုယ့်ကိုယ်ကိုယ် ယုံကြည်မှုရှိပြီး စွန့်စားလိုစိတ်လည်း ပြည့်နေတဲ့ လူငယ်တစ်ယောက်။ အတန်းဖော်တစ်ယောက်နဲ့ ကုမ္ပဏီတည်ထောင်ခဲ့သလို အတူလုပ်ကိုင်ရင်း နှစ်ယောက်သား ချစ်သူတွေပါ ဖြစ်လာခဲ့ကြတယ်။ အချစ်ရေးရော အနာဂတ်အတွက်ပါ အဆင်ပြေနေရာက မမျှော်လင့်ထားတဲ့ အဖြစ်ဆိုးတစ်ခုနဲ့ ကြုံလိုက်ရတာပါ။ ဟာရီကာ ဘာတွေကြုံခဲ့ရပြီး ဘယ်လိုရင်ဆိုင်မလဲ။ သူရင်ဖွင့်သမျှကို စိတ်ရှည်ရှည်နားထောင်ပေးနေတဲ့ ဟာရှာမှာရော ဘယ်လိုနောက်ကြောင်းတွေ ရှိနေမလဲ၊ သူ့အနားကို ဘာရည်ရွယ်ချက်နဲ့ ရောက်လာတာလဲဆိုတဲ့ မေးခွန်းတွေလည်း ရှိနေပါတယ်။ Deepak Kolipaka ရိုက်ကူးထားတဲ့ တေလဂူအချစ်ဇာတ်ကားဖြစ်ပြီး Gourish Yeleti နဲ့ Roshni Sahota တို့ အဓိကသရုပ်ဆောင်ထားပါတယ်။ Roshni Sahota ကတော့ “လေဆန်တိုးမယ့်မညှိုးပန်း” ထဲမှာ စောမြရဲ့ညီမအဖြစ် ပါဝင်ခဲ့သူပါ။

မီဆိုနဲ့ ဟာအွန်းတို့ဟာ ငယ်ငယ်ကတည်းက ဆယ်ကျော်သက်အရွယ်အထိ အတူကြီးပြင်းလာကြတဲ့ အချစ်ဆုံးသူငယ်ချင်းနှစ်ယောက်ပါ။ တစ်ယောက်မရှိရင် တစ်ယောက်မနေနိုင်လောက်အောင် ရင်းနှီးကြပြီး အတောက်ပဆုံးဖြစ်ခဲ့တဲ့ ၁၇ နှစ်အရွယ်ကိုလည်း အတူဖြတ်သန်းခဲ့ကြတယ်။ ဒါပေမဲ့ ၂၇ နှစ်အရွယ်မှာတော့ အဲဒီအချိန်တွေကို လွမ်းနေရပြီဆိုတဲ့ စကားနဲ့ သူတို့နှစ်ယောက်ရဲ့အကြောင်းကို မိတ်ဆက်ထားပါတယ်။ သူတို့ရဲ့ဘဝထဲကို ဟန်ဂျင်ဝူးဆိုတဲ့ ကောင်လေးတစ်ယောက် ဝင်လာတဲ့အခါ သုံးပွင့်ဆိုင်အချစ်ဇာတ်လမ်း ဖြစ်လာတော့မယ်။ ငယ်သူငယ်ချင်းနှစ်ယောက်ရဲ့ သံယောဇဉ်နဲ့ အချစ်ရေးကို အေးအေးဆေးဆေး ပြောပြထားတဲ့ ဒရာမာဇာတ်ကားပါ။ တရုတ်ရုပ်ရှင် Soulmate ကို ပြန်လည်ရိုက်ကူးထားပြီး Our Beloved Summer ထဲက Kim Dami၊ Our Blooming Youth ထဲက Jeon SoNee နဲ့ 20th Century Girl ထဲက Byun WooSeok တို့ အဓိကပါဝင်ထားပါတယ်။

ရာဂျူးဟာ ကိုယ်မှန်တယ်ထင်ရင် ဘယ်သူ့ကိုမှ ဂရုမစိုက်ဘဲ ခပ်မိုက်မိုက်နေတတ်သူပါ။ မလုပ်ရဲတာရယ်လို့လည်း မရှိသလောက်ပဲ။ ဇာတ်လမ်းအစမှာတော့ သူဟာ လူသတ်မှုနဲ့ ထောင်ကျနေပြီး ထောင်ထဲရောက်တာ တစ်ရက်တောင်မပြည့်ခင် ရဲအရာရှိတစ်ယောက်ကို ရိုက်လွှတ်လိုက်ပါတယ်။ အဲဒီနောက် ထောင်ထဲမှာ နာမည်ကြီးလာပြီး တခြားအကျဉ်းသားတွေ လေးစားရသူ ဖြစ်လာတယ်။ အသက်ငယ်ငယ်နဲ့ လူသတ်မှုကြောင့် ထောင်ထဲရောက်လာတဲ့ ရာဂျူးအတွက် အချစ်နဲ့စစ်ဆိုတာ ဘယ်လိုအဓိပ္ပာယ်ရှိနေမလဲ။ ဒီတေလဂူဇာတ်ကားမှာ ရာဂျူးက အကျဉ်းသားတွေကို သူ့နောက်ကြောင်း ပြန်ပြောပြရာကနေ ဇာတ်လမ်းကို ဆက်သွားပါတယ်။

ပေါ်ပြူလိုင်ရာဆိုတဲ့ နာမည်ကြီးပြဇာတ်ရုံမှာ လျှို့ဝှက်ဆန်းကြယ်တဲ့ အဖြစ်အပျက်တွေ မကြာခဏ ဖြစ်တတ်ပါတယ်။ ဒါကြောင့် ပြဇာတ်ရုံထဲမှာ ဝိညာဉ်တစ်ခုရှိတယ်လို့ လူအများက ယုံကြည်နေကြတယ်။ တစ်နေ့မှာ အသံမြင့်အဆိုရှင် ကာလော့တာက စိတ်အလိုမကျဖြစ်ပြီး ရုတ်တရက် ထွက်သွားတာကြောင့် ညပွဲအတွက် ခရစ္စတင်းဒါယဲရ်ဆိုတဲ့ မိန်းကလေးငယ်ကို အစားထိုးသီဆိုခိုင်းလိုက်ရပါတယ်။ ခရစ္စတင်းဟာ အကအဖွဲ့က မိန်းကလေးဖြစ်ပေမယ့် ကာလော့တာထက်တောင် ကောင်းကောင်းဆိုနိုင်လို့ အားလုံး အံ့အားသင့်သွားကြတယ်။ သူ့ကို သီချင်းဆိုသင်ပေးနေသူကတော့ ပြဇာတ်ရုံကြီးရဲ့ ဝိညာဉ်ပါ။ ခရစ္စတင်းက သူ့ဆရာရဲ့အသံကိုပဲ ကြားဖူးပြီး လူကို တစ်ခါမှ မမြင်ဖူးပါဘူး။ ဒါပေမယ့် အသံကနေတစ်ဆင့်ပဲ လေးစားချစ်ခင်နေပြီး သူ့ရဲ့ တေးသွားတမန်တော်လို့ မှတ်ယူထားတယ်။ အဲဒီလိုနဲ့ ခရစ္စတင်းရဲ့ ငယ်ချစ်ဦး ရာအိုးလ် ပြဇာတ်ရုံကို ရောက်လာပါတယ်။ သီချင်းတွေနဲ့ ဇာတ်လမ်းကို ဆက်ပြောပြသွားတဲ့ ဒီအချစ်ဒရာမာမှာ ခရစ္စတင်းဟာ ငယ်ကတည်းက ချစ်မြတ်နိုးခဲ့သူ ရာအိုးလ်ကို ရွေးမလား၊ သီချင်းဆိုတတ်အောင် သင်ပေးခဲ့ပြီး အမြဲလေးစားခဲ့ရတဲ့ ဆရာကိုပဲ ရွေးမလား။

၂၀၀၉ ခုနှစ်မှာ အသက် ၂၈ နှစ်အရွယ် လီဇီဝေဟာ အအေးအဖျော်ဆိုင်တစ်ခုမှာ အလုပ်လုပ်နေတဲ့ အသက် ၁၇ နှစ်အရွယ် ဟွမ်ယွီရွှမ်းနဲ့ တွေ့ဆုံခဲ့ပါတယ်။ စတွေ့တဲ့အချိန်မှာပဲ နှစ်ယောက်စလုံးက တစ်ယောက်ကိုတစ်ယောက် ဟိုးအရင်ကတည်းက သိကျွမ်းခဲ့ဖူးသလို ထူးထူးဆန်းဆန်း ခံစားမိကြတယ်။ နောက်ပိုင်းမှာ ပိုရင်းနှီးလာကြပြီး ၂၀၁၀ ခုနှစ်ရဲ့ နောက်ဆုံးရက်၊ နှစ်သစ်ကူးညမှာတော့ ချစ်သူတွေ ဖြစ်လာခဲ့ပါတယ်။ အရာရာ အဆင်ပြေနေခဲ့ပေမယ့် ၂၀၁၇ ခုနှစ်ရောက်တဲ့အခါ အပြောင်းအလဲတွေ စလာတယ်။ ဟွမ်ယွီရွှမ်းဟာ ချစ်ရသူ လီဇီဝေကို ဆုံးရှုံးလိုက်ရပြီးနောက် အတိတ်ကို ပြောင်းလဲနိုင်ဖို့ အခွင့်အရေးတစ်ခု ကြုံလာပါတယ်။ လီဇီဝေကို ကယ်တင်ဖို့ အတိတ်ဆီ ပြန်သွားပေမယ့် အတိတ်နဲ့ အနာဂတ်ကြားက ရောယှက်ရိုက်ခတ်မှုတွေကိုပါ ရင်ဆိုင်ရတော့တယ်။ အတိတ်ကို ပြန်ရောက်နိုင်တာနဲ့ ဖြစ်ခဲ့သမျှကိုပါ ပြန်ပြင်နိုင်မှာလား။ အတိတ်၊ ပစ္စုပ္ပန်နဲ့ အနာဂတ်ကြားက ရှုပ်ထွေးမှုတွေကို ဟွမ်ယွီရွှမ်း ဘယ်လိုရင်ဆိုင်မလဲ၊ သူချစ်ရသူနဲ့ရော ပြန်ပေါင်းစည်းနိုင်ပါ့မလား။

အသက်နှစ်ဆယ့်ခုနစ်နှစ်အရွယ် ဂရေ့စ်ဟာ လူ့စွမ်းအားအရင်းအမြစ်ဆိုင်ရာ အကြံပေးအဖြစ် အလုပ်လုပ်နေသူပါ။ လူတွေနဲ့ ရောရောနှောနှော နေလေ့မရှိသလို အချစ်ရေးမှာလည်း မျှော်လင့်ချက်နဲ့ စံနှုန်းတွေ မြင့်လွန်းတဲ့သူဖြစ်ပြီး အလုပ်မှာရော အချစ်ရေးမှာပါ အဆင်မပြေဖြစ်နေပါတယ်။ တစ်နေ့ အလုပ်မှာ အဆင်မပြေခဲ့တဲ့အပြင် အချစ်ရေးရှုပ်တတ်တဲ့ အခန်းဖော်သူငယ်ချင်းကြောင့် အိမ်ကိုလည်း ပြန်လို့မရသေးဘဲ ဘာလုပ်ရမလဲ မသိဖြစ်နေတယ်။ အဲဒီအချိန်မှာ အသင်းကနေ ထုတ်ခံရလို့ စိတ်ဓာတ်ကျပြီး ဘားမှာ လာထိုင်နေတဲ့ ကာတာနဲ့ တွေ့သွားပါတယ်။ ပထမဆုံးတွေ့ကြတဲ့ လူနှစ်ယောက်ဆိုပေမယ့် တစ်ယောက်ကိုတစ်ယောက် နားလည်ပေးနိုင်ပြီး အပြန်အလှန် ကူညီပေးကြရာက သံယောဇဉ်တွေ ဖြစ်လာတယ်။ ဂရေ့စ် အမြဲစိတ်ကူးယဉ်ခဲ့တဲ့ ပြည့်စုံတဲ့အချစ်ရေးကို ကာတာနဲ့ ဘယ်လိုရှာတွေ့လာမလဲဆိုတာ ဆက်ပြထားတဲ့ အချစ်ဒရမ်မာပါ။

ဆေးရုံတစ်ခုမှာ သားယောက်ျားလေး မွေးလို့ ပျော်နေကြတဲ့ မိသားစုနှစ်စု ရှိပါတယ်။ ကလေးနှစ်ယောက်က တစ်နေ့တည်း၊ တစ်ချိန်တည်း မွေးလာကြပေမယ့် ကြီးပြင်းရမယ့်ဘဝတွေက မတူကြဘူး။ တစ်ယောက်က ချမ်းသာတဲ့မိသားစုမှာ လိုလေသေးမရှိ နေရမှာဖြစ်ပြီး နောက်တစ်ယောက်ကတော့ ရုန်းကန်ရမယ့်ဘဝမှာ နေရမှာပါ။ ဘီလျံနာမိသားစုဆီမှာ အလုပ်လုပ်တဲ့ ဗယ်မီကီက အဲဒီအခြေအနေကို ပြောင်းပစ်လိုက်ပါတယ်။ သူ့သားကို ဘုရင်တစ်ပါးလို နေစေချင်ပြီး အလုပ်ရှင်ရဲ့သားကိုတော့ သူ့လို ရုန်းကန်ရတဲ့ဘဝမျိုး ကြုံစေချင်တာကြောင့် ကလေးနှစ်ယောက်ကို လဲပစ်လိုက်တယ်။ သူ့လက်ထဲမှာ ကြီးပြင်းလာတဲ့ ဘန်တူကို အမုန်းနဲ့ လျစ်လျူရှုမှုတွေပဲ ပေးခဲ့ပေမယ့် ချမ်းသာတဲ့အိမ်မှာ အလိုလိုက်ခံနေရတဲ့ သားအရင်း ရာ့ဂျ်ကိုတော့ ကျေနပ်ပီတိနဲ့ ကြည့်နေခဲ့ပါတယ်။ Kartik Aaryan နဲ့ Kriti Sanon တို့ ပါဝင်ထားတဲ့ ဒီဇာတ်ကားမှာ မွေးကတည်းက ဘဝချင်းလဲခံထားရတဲ့ သူတို့နှစ်ယောက် ဘာတွေ ဆက်ကြုံရမလဲ၊ ကိုယ့်ဘဝအမှန်ကိုရော သိသွားကြမလားဆိုတာ ဆက်ပြထားပါတယ်။

အလုပ်လက်မဲ့ဖြစ်နေတဲ့ ဂါအီဟာ ပြင်သစ်နိုင်ငံက နျူကလီးယားလျှပ်စစ်ဓာတ်အားပေးစက်ရုံတစ်ရုံမှာ အလုပ်လျှောက်ပါတယ်။ အလုပ်မဝင်ခင် လေ့ကျင့်ရေးဆင်းရတာကြောင့် လူငယ်တချို့ကို အတွေ့အကြုံရှိတဲ့ ဝန်ထမ်းတွေနဲ့ တွဲပေးထားတယ်။ တိုနီနဲ့ တခြားအကြီးတန်းဝန်ထမ်းတွေက သူတို့ကို ကြီးကြပ်ပေးပြီး လေ့ကျင့်မှုနဲ့ စမ်းသပ်မှုတွေကို အောင်အောင်မြင်မြင် ဖြတ်ကျော်နိုင်ဖို့ ကူညီပေးကြပါတယ်။ ဓာတ်ရောင်ခြည်သင့်နိုင်တဲ့ အန္တရာယ်ရှိလို့ ဂါအီရဲ့အစ်မ မာမီကတော့ ဒီအလုပ်ကို မလုပ်စေချင်ဘူး။ ဂါအီက ဝင်ငွေရတဲ့အတွက် ဆက်လုပ်ဖို့ ဆုံးဖြတ်ထားတယ်။ စက်ရုံမှာ အလုပ်လုပ်နေရင်း တိုနီရဲ့ဇနီးလောင်း ကာရိုးနဲ့ ချစ်မိသွားပါတယ်။ Léa Seydoux ပါဝင်သရုပ်ဆောင်ထားတဲ့ အချစ်ဒရမ်မာဇာတ်ကားပါ။

ရှီဗာဟာ အသက်နှစ်ဆယ့်ငါးနှစ်အထိ အဖေ့ကို မှီခိုနေရတဲ့ အလုပ်လက်မဲ့တစ်ယောက်ပါ။ အလုပ်မရှိသေးပေမယ့် အိမ်ထောင်ကျသွားပြီးနောက်မှာလည်း ဇနီးရဲ့ဝင်ငွေနဲ့ပဲ ဆက်နေရတယ်။ ဇနီးကို မှီခိုနေရသူဆိုပြီး ပတ်ဝန်းကျင်က နှိမ်ချဆက်ဆံလာကြတဲ့အခါ ရှီဗာလည်း အလုပ်လက်မဲ့ဘဝကနေ လွတ်မြောက်ဖို့ ကြိုးစားလာပါတယ်။ ဒါပေမဲ့ အချိန်ကြာလာတော့ ဇနီးဖြစ်သူကပါ ငြိုငြင်ချင်လာတယ်။ ရှီဗာ အလုပ်ရသွားနိုင်ပါ့မလား၊ ဇနီးနဲ့ကြားမှာရော ဘာတွေ ဆက်ဖြစ်လာမလဲဆိုတာကို ဆက်ပြထားပါတယ်။ ချစ်သူတွေ အချင်းချင်းချစ်မိပြီးနောက် ကြုံလာရတဲ့ ပြဿနာတွေနဲ့ အဲဒီပြဿနာတွေကို ရင့်ရင့်ကျက်ကျက် စဉ်းစားဖြေရှင်းဖို့အကြောင်း ရေးထားတဲ့ အချစ်ဇာတ်လမ်းပါ။

ဗစ်တာနဲ့ မာဂေါ့တို့ဟာ ရှေ့နေရုံးတစ်ရုံးတည်းမှာ အလုပ်လုပ်ကြတဲ့ ရှေ့နေချစ်သူနှစ်ယောက်ပါ။ အတူတူ ပျော်ပျော်ရွှင်ရွှင်နေထိုင်ရင်း အိမ်ထောင်ပြုဖို့လည်း ကြိုးစားနေကြတယ်။ ဒါပေမဲ့ ရုံးမှာ ရာထူးအမြင့်ဆုံးသူ ရုတ်တရက်ဆုံးသွားပြီး လစ်လပ်သွားတဲ့နေရာအတွက် ယှဉ်ပြိုင်ကြတဲ့အခါ နောက်ဆုံးကျန်တဲ့ ပြိုင်ဘက်နှစ်ယောက်က သူတို့ချစ်သူနှစ်ဦး ဖြစ်နေပါတယ်။ ဇာတ်လမ်းက အဲဒီနေရာကနေ ဖြစ်နိုင်ခြေနှစ်မျိုးကို ယှဉ်ပြထားတယ်။ ဗစ်တာကို ရွေးလိုက်ရင် သူက အတွင်းရေးမှူးနဲ့ ဖောက်ပြန်သွားတဲ့ဘဝ၊ မာဂေါ့ကို ရွေးလိုက်ရင် သူက ဘော့စ်နဲ့ ဖောက်ပြန်သွားတဲ့ဘဝဆိုပြီး လမ်းခွဲနှစ်ခုနဲ့ ဆက်သွားတာပါ။ အခြေအနေတစ်မျိုးစီမှာ သူတို့နှစ်ယောက် ဘာကိုရွေးချယ်ကြမလဲ၊ သူတို့ဆက်ဆံရေး ဘယ်လိုအဆုံးသတ်မလဲဆိုတာကို ပြထားတဲ့ ဟာသဇာတ်ကားဖြစ်ပါတယ်။

ဟိမဝန္တာတောင်တန်းတစ်နေရာရဲ့ ကောင်းကင်မှာ ငှက်တစ်ကောင် ပျံသန်းနေပါတယ်။ သူ့ခြေသည်းတွေကြားမှာ သယ်လာတဲ့ ကျောက်ခဲကို လေပေါ်ကနေ ပစ်ချလိုက်တဲ့အခါ ဆိတ်တစ်ကောင်ရဲ့ ဦးခေါင်းပေါ် တည့်တည့်ကျပြီး ဆိတ်သေသွားတယ်။ Samsara ရဲ့ ဇာတ်လမ်းကို ဒီမြင်ကွင်းနဲ့ စထားပါတယ်။ တိဘက်ဗုဒ္ဓဘာသာကို အခြေခံထားပြီး ကိုယ်တော်တစ်ပါးရဲ့ သံသရာက လွတ်မြောက်ရာ၊ ဉာဏ်အလင်းရရာကို ရှာဖွေတဲ့ခရီးအကြောင်း ပြထားတာပါ။ အဲဒီနောက် ဘုန်းကြီးတစ်ဖွဲ့ဟာ ဂူထဲမှာ သုံးနှစ်ကြာ ကမ္မဋ္ဌာန်းထိုင်ခဲ့တဲ့ ကိုယ်တော်တစ်ပါးကို သွားပင့်ပြီး လားမားကျောင်းတော်ဆီ ပြန်ခေါ်လာကြပါတယ်။ မကြာခင်မှာပဲ ကိုယ်တော်ဟာ ရွာတစ်ရွာရဲ့ ကောက်ရိတ်သိမ်းပွဲကို သွားဖို့ အကြောင်းဖန်လာပြီး မိန်းမပျိုတစ်ယောက်နဲ့ ဆုံတွေ့ခဲ့တယ်။ အဲဒီညမှာ သူမရဲ့ အထိအတွေ့ကို အိပ်မက်မက်ခဲ့ပြီး ကျောင်းပြန်ရောက်တဲ့အထိ စိတ်ထဲက မပျောက်နိုင်ဖြစ်နေပါတယ်။ ကိုယ်တော်က ဗုဒ္ဓဟာ သက်တော် ၂၉ နှစ်မှ တောထွက်ခဲ့ကြောင်း၊ လောကီကို စွန့်လွှတ်နိုင်ဖို့ လောကီဘဝမှာ အရင်ကျင်လည်ဖူးဖို့ လိုမယ်ထင်ကြောင်း ဆရာဖြစ်သူကို လျှောက်ထားလာတယ်။ ဆရာကလည်း လောကီဘောင်ကို သွားဖို့ ခွင့်ပြုပေးခဲ့သလို ကိုယ်တော်မက်ခဲ့တာဟာ အိပ်မက်မဟုတ်ကြောင်း ပြောပြလိုက်ပါတယ်။ ဒီလိုနဲ့ ကိုယ်တော်ဟာ လူဝတ်လဲပြီး မိန်းမပျိုရှိရာ ရွာဆီ ထွက်လာခဲ့တယ်။ လောကီဘဝထဲ ရောက်လာတဲ့အခါ သူကြုံတွေ့ရတဲ့ တဏှာ၊ လောဘ၊ ဒေါသတွေအကြောင်းကို ဆက်ပြထားပါတယ်။ သူ့ဘဝထဲက အဖြစ်အပျက်တချို့ကို သိဒ္ဓတ