သည်းထိတ်ရင်ဖိုကားများ

အိမ်ပေါ်က ဆင်းလာတဲ့ မိန်းကလေးတစ်ယောက်ကို ကူညီဖို့ ဝန်ကြီးတစ်ယောက်ရဲ့ အသိဆီ အကူအညီတောင်းရာက ဇာတ်လမ်းစပါတယ်။ ဝန်ကြီးကတစ်ဆင့် မိန်းကလေးကို ရဲစခန်းမှာ ခဏထိန်းထားပေးဖို့ စီစဉ်ပြီး ရဲတစ်ယောက်ကို သွားခေါ်ခိုင်းခဲ့တယ်။ ဒါပေမယ့် အဲဒီနောက်မှာ မိန်းကလေး ပျောက်သွားပါတော့တယ်။ သူ့ကို သွားခေါ်တဲ့ရဲကလည်း သူမသိကြောင်း အလီဘိုင်နဲ့ ချေပနိုင်နေတော့ ပျောက်ဆုံးမှုကို ဆက်စုံစမ်းကြရတယ်။ မိန်းကလေးရဲ့ နောက်ကြောင်းက ဘယ်လိုရှိသလဲ၊ ဘာဖြစ်ခဲ့တာလဲ၊ သူ့ကို ပြန်ရှာတွေ့နိုင်ပါ့မလားဆိုတာ ဖော်ထုတ်သွားတဲ့ ကန်နာဒါဘာသာစကားသုံး မှုခင်းစုံထောက်ကားပါ။ စုံစမ်းမှုတစ်လျှောက် မထင်ထားတဲ့ အလှည့်အပြောင်းတွေ ကြုံလာရပါတယ်။

ပါဗက်သီက ကျန်းမာရေးမကောင်းတဲ့ သားလေးဗီရာကို စောင့်ရှောက်နေရတဲ့ မုဆိုးမတစ်ယောက်ပါ။ ဗီရာဟာ ငယ်ငယ်ကတည်းက cystic fibrosis ရောဂါ ခံစားနေရပြီး သွားလေရာ အောက်စီဂျင်အိုး ယူသွားရတဲ့ကလေး ဖြစ်ပါတယ်။ သားကို ခွဲစိတ်ကုသပေးဖို့ ပါဗက်သီက ကုမ်ဘာတာကနေ ကိုချင်ကို ဘတ်စ်ကားနဲ့ ခေါ်သွားပါတယ်။ သူတို့စီးလာတဲ့ကားပေါ်မှာ အကျင့်ပျက်ရဲအရာရှိတစ်ယောက်၊ ခိုးရာလိုက်ဖို့ အခွင့်အရေးစောင့်နေတဲ့ စုံတွဲတစ်တွဲ၊ လွှတ်တော်အမတ်ဟောင်းတစ်ယောက်၊ ကားမောင်းသမားနဲ့ တခြားခရီးသည်တွေလည်း ပါလာကြတယ်။ လမ်းမှာ ယာဉ်တိုက်မှုကြီးတစ်ခု ဖြစ်ထားတာကြောင့် ကိုချင်ကို သွားနေကျလမ်း ပိတ်နေပါတယ်။ အချိန်မီရောက်ဖို့ ကားမောင်းသမားက တခြားလမ်းကို ရွေးလိုက်ပေမယ့် အဲဒီလမ်းမှာ မမျှော်လင့်တဲ့ ဘေးဆိုးနဲ့ ကြုံရတော့တယ်။ မြေပြိုမှုထဲ ပါသွားပြီး ဘတ်စ်ကားတစ်စီးလုံး သဲအောက်မှာ နစ်မြုပ်သွားတာပါ။ ပိတ်မိနေကြရတဲ့နောက် လူတွေရဲ့စိတ်ထဲက မကောင်းတဲ့ဘက်တွေပါ ပေါ်လာတဲ့အခါ ပါဗက်သီနဲ့ ဗီရာတို့ အချိန်မီ လွတ်မြောက်နိုင်ပါ့မလား၊ တခြားခရီးသည်တွေကရော ဘယ်လိုဖြစ်ကြမလဲဆိုတာ ရင်ဆိုင်ရတော့မှာ ဖြစ်ပါတယ်။ Nayanthara နဲ့ ကလေးသရုပ်ဆောင် Rithvik တို့ ပါဝင်ထားပြီး Disney+ Hotstar က ထုတ်လွှင့်တဲ့ တမီးလ်သည်းထိတ်ရင်ဖိုကားပါ။ မိခင်မေတ္တာနဲ့ အသက်ရှင်လွတ်မြောက်ရေးအကြောင်းကို တွဲဖော်ပြထားပြီး အစပိုင်းရိုက်ကွက်တွေကို နောက်ပိုင်းအဖြစ်အပျက်တွေနဲ့ ပြန်ချိတ်ဆက်ထားပါတယ်။

တောင်အာဖရိကနိုင်ငံ ဂျိုဟန်ဘတ်မြို့ကို အခြေခံထားတဲ့ ဒီဇာတ်လမ်းက ယာဉ်တိုက်မှုတစ်ခုနဲ့ စပါတယ်။ လူဖြူလူမည်း ခွဲခြားမှုတွေ ရှိနေဆဲဖြစ်သလို မြို့ခံတွေကြားမှာ နိုင်ဂျီးရီးယားနဲ့ ဇင်ဘာဘွေနိုင်ငံသားတွေအပေါ် မကျေနပ်မှုတွေလည်း ရှိနေတဲ့အချိန်ပါ။ အဲဒီမြို့မှာ ကုမ္ပဏီလုံခြုံရေးခေါင်းဆောင် ဂျိုဟန်က ဘဏ္ဍာစီမံမှူးရာထူး တိုးရဖို့ ကြိုးစားနေပါတယ်။ အိမ်မှာတော့ သူ့ဇနီးနဲ့ သမီးနစ်ကီတို့ အမေရိကန်သွားမယ့်ကိစ္စအတွက် စကားများနေကြတယ်။ နစ်ကီက ဒီခရီးကို စိတ်မဝင်စားဘဲ ကျောင်းလစ်ပြီး လူမည်းချစ်သူ ဆီဆဲလ်နဲ့ ကလပ်တက်ဖို့၊ မူးယစ်ဆေးသုံးဖို့ပဲ စိတ်ရောက်နေပါတယ်။ တစ်ဖက်မှာ ဘရာဆိုးဆိုတဲ့ လူဆိုးဂိုဏ်းခေါင်းဆောင်တစ်ယောက် ရှိတယ်။ ဂိုဏ်းခေါင်းဆောင်အဖြစ် နေထိုင်နေသူဖြစ်ပေမယ့် မိခင်အပေါ် ချစ်ခင်တဲ့သားတစ်ယောက်လည်း ဖြစ်ပါတယ်။ သူ့ရဲ့ကျောင်းဆောက်တဲ့စီမံကိန်းအတွက် ငွေငါးသန်း မရှာပေးနိုင်ရင် စီမံကိန်းကို ပိတ်ပစ်မယ်လို့ မြို့တော်ဝန်က ခြိမ်းခြောက်လာတဲ့အခါ ဘရာဆိုးက နစ်ကီကို ပြန်ပေးဆွဲပြီး ငွေငါးသန်း တောင်းပါတော့တယ်။ အဲဒီအချိန်မှာပဲ နိုင်ငံခြားသားတွေကို ဆန့်ကျင်တဲ့ အဓိကရုဏ်းတွေ ဖြစ်ပေါ်လာတယ်။ မြို့ထဲမှာ ရုန်းရင်းဆန်ခတ်ဖြစ်နေချိန် သမီးကို ပြန်ရဖို့ ဂျိုဟန်တို့ ဇနီးမောင်နှံ ဘယ်လိုကြိုးစားကြမလဲဆိုတာကို ဆက်ပြထားတဲ့ မှုခင်းဒရာမာကားပါ။

ကောလိပ်ကျောင်းသားဘဝကတည်းက ခင်မင်လာကြတဲ့ သူငယ်ချင်း ၁၁ ယောက်ဟာ ဘဝကိုယ်စီနဲ့ နေထိုင်နေကြပေမယ့် အဆက်အသွယ်မပြတ်ဘဲ စည်းစည်းလုံးလုံး ရှိနေကြပါတယ်။ တစ်နေ့တော့ အဖွဲ့ထဲက သူငယ်ချင်းတစ်ယောက်ရဲ့ လူပျိုပါတီအတွက် အပန်းဖြေခြံတစ်ခုမှာ ပြန်ဆုံကြတယ်။ အဲဒီမှာ ဆော့ကစားနေကြရင်း ချန်ဒရာဆီလ်ဆိုတဲ့ အရက်သမားတစ်ယောက်နဲ့ တွေ့ပြီး ကတောက်ကဆ ဖြစ်ခဲ့ကြပါတယ်။ ညဘက် ပါတီလုပ်ကြတဲ့အခါ လျှို့ဝှက်ချက်ဖော်တဲ့ဂိမ်းတစ်ခု ကစားဖို့ စိတ်ကူးရသွားကြတယ်။ ဒါပေမယ့် တစ်ယောက်ရဲ့လျှို့ဝှက်ချက်ကို တစ်ယောက် သိလာကြတဲ့နောက် ပျော်စရာကနေ ရန်ပွဲဖြစ်သွားပြီး ကိုယ့်အခန်းကိုယ် ပြန်သွားကြပါတယ်။ အဲဒီညမှာပဲ သူငယ်ချင်း ၁၁ ယောက်ထဲက မိန်းကလေးတစ်ယောက် အသတ်ခံလိုက်ရတယ်။ ကျန်သူတွေက ချန်ဒရာဆီလ်ကို လူသတ်သမားလို့ ယုံကြည်နေကြပေမယ့် ဒီအမှုမှာ မပေါ်သေးတဲ့အကြောင်းတွေ ရှိနေပါသေးတယ်။ ချန်ဒရာဆီလ်ရဲ့ နောက်ကြောင်းအမှန်က ဘာလဲ၊ လူသတ်သမားက သူငယ်ချင်းအဖွဲ့ထဲကပဲ ဖြစ်နေမလားဆိုတာ ဆက်စုံစမ်းရတော့မှာပါ။ မိုဟမ်လယ် အဓိကပါဝင်သရုပ်ဆောင်ထားတဲ့ မာလာယာလမ်းရုပ်ရှင် ဖြစ်ပါတယ်။

မတူညီတဲ့ စိတ်ခံစားချက်တွေကို အခြေခံပြီး မိသားစုသုံးစုအကြောင်း တည်ဆောက်ထားတဲ့ အိန္ဒိယ လျှို့ဝှက်ဆန်းကြယ်သည်းဖိုဇာတ်ကားပါ။ ဒါရိုက်တာက လောဘ၊ ဒေါသ၊ မောဟတို့ထဲက ဒေါသနဲ့ နောက်ဆက်တွဲဆိုးကျိုးတွေကို အဓိကထား တင်ပြထားပါတယ်။ ဇာတ်လမ်းကို ရိုးရိုးရှင်းရှင်း အကျဉ်းချုပ်ပြောဖို့ခက်ပြီး ကြည့်သူရဲ့ ခံစားချက်အလိုက် အဓိပ္ပာယ်ကောက်ယူပုံ ကွဲပြားနိုင်တဲ့ တင်ဆက်ပုံမျိုးပါ။ ဒေါသနောက်မှာ ဘယ်လိုဆိုးကျိုးတွေ လိုက်လာနိုင်သလဲဆိုတဲ့ မေးခွန်းကို ဒီမိသားစုသုံးစုအကြောင်းကနေ ပြထားပါတယ်။

သေဒဏ်ချခံထားရတဲ့ အကျဉ်းသားတချို့ဟာ လွတ်ငြိမ်းချမ်းသာခွင့်ရဖို့ မျှော်လင့်ချက်နဲ့ စပိုက်ဒါဟက်ဆိုတဲ့ ဆေးဝါးထိန်းချုပ်ရေးအစီအစဉ်မှာ စေတနာ့ဝန်ထမ်းအဖြစ် ပါဝင်ကြပါတယ်။ ဒီအစီအစဉ်ကို ဦးဆောင်နေသူကတော့ Chris Hemsworth သရုပ်ဆောင်ထားတဲ့ စတိဗ် အက်ဘနက်စ်ကိပါ။ အကျဉ်းသားတွေရဲ့ စိတ်ခံစားချက်တွေကို ထိန်းချုပ်လေ့လာရင်း N-40 ဆိုတဲ့ ပီယဆေးဝါးအသစ်ကို တီထွင်နေကြတာ ဖြစ်ပါတယ်။ လွတ်ငြိမ်းချမ်းသာခွင့်အတွက် ပါဝင်လာကြပေမယ့် စပိုက်ဒါဟက်အကျဉ်းထောင်ရှိရာ ကျွန်းပေါ်မှာ သူတို့ မမျှော်လင့်ထားတဲ့ အဖြစ်အပျက်တွေ စောင့်နေပါတယ်။ Miles Teller လည်း ပါဝင်သရုပ်ဆောင်ထားတဲ့ Netflix ရဲ့ အက်ရှင်၊ မှုခင်းနဲ့ ဒရာမာဇာတ်ကားပါ။

Central University မှာ ပါမောက္ခအဖြစ် စာသင်ပေးနေတဲ့ ဆရာမ Saba Mariyam ဟာ ညတစ်ည ကျောင်းကအပြန်မှာ အဓမ္မပြုကျင့်ခံရပြီး မီးရှို့သတ်ဖြတ်ခံလိုက်ရပါတယ်။ စာသင်ရတာကို နှစ်သက်ပြီး ကျောင်းသားတွေကလည်း ချစ်ခင်ကြတဲ့ ဆရာမအတွက် ဝမ်းနည်းခြင်းအထိမ်းအမှတ် ပြုလုပ်ကြရာမှာ ပြောရေးဆိုခွင့်ရှိသူတစ်ယောက်ရဲ့ စကားအမှားကြောင့် ကျောင်းတွင်းဆန္ဒပြပွဲ စတင်ဖြစ်ပေါ်လာတယ်။ ရဲတွေက ကျောင်းထဲအထိ ဝင်ရောက်ရိုက်နှက်ထိန်းချုပ်တဲ့နောက် ဆန္ဒပြမှုဟာ တစ်နိုင်ငံလုံးက ကျောင်းသားတွေ ပါဝင်လာတဲ့ အရေးတော်ပုံအဖြစ် ကျယ်ပြန့်သွားပါတယ်။ ဒီအဖြစ်အပျက်တွေကို အစပြုစေခဲ့တဲ့ ဆရာမသတ်ခံရမှုနောက်ကွယ်မှာ နိုင်ငံရေးအကြောင်းတွေပါ ရှိနေနိုင်မလားဆိုတဲ့ မေးခွန်းလည်း ပေါ်လာတယ်။ ကျောင်းသားတွေနဲ့ ရဲတွေကြားက အဓိကရုဏ်း ဘယ်လောက်အထိ ပြင်းထန်လာမလဲ၊ ဆရာမကို သတ်ခဲ့တဲ့ တရားခံက ဘယ်သူလဲဆိုတာ ဆက်ဖော်ထုတ်သွားတဲ့ မလယာလမ်ဘာသာစကားပြော အိန္ဒိယဇာတ်ကားပါ။

အမေရိကန်သူ ဂျူလီယာဟာ ခင်ပွန်းနဲ့အတူ ရိုမေးနီးယားကို ပြောင်းရွှေ့လာပါတယ်။ ရိုမေးနီးယားစကား မပြောတတ်တာကြောင့် တိုင်းတစ်ပါးကို ရောက်ခါစမှာ အတော်လေး အထီးကျန်နေရတယ်။ အဲဒီကြားထဲ သူ့ကို စောင့်ကြည့်နေတဲ့ လူတစ်ယောက်လည်း ရှိနေပြန်ပါတယ်။ ဂျူလီယာက ဒီအကြောင်းကို ခင်ပွန်းကို ပြောပြပေမဲ့ အလုပ်များနေတဲ့ ခင်ပွန်းက သူ့စကားကို မယုံပါဘူး။ သူ့ကို စောင့်ကြည့်နေသူက ဘယ်လိုလူမျိုးလဲ၊ ဘာရည်ရွယ်ချက်ရှိနေတာလဲ၊ ဂျူလီယာအတွက် အန္တရာယ်ရှိနိုင်မလားဆိုတဲ့ မေးခွန်းတွေကြားမှာ သူ ဘာတွေဆက်ကြုံရမလဲဆိုတာကို လိုက်ကြည့်ရမှာပါ။

ဖိလစ်ပိုင်ရဲ့ မြေအောက်ကြေးစားလက်ဝှေ့လောကမှာ ကျင်လည်နေတဲ့ ဖိုက်တာတစ်ယောက်ဟာ ကိုရီးယားလူမျိုးဖခင်နဲ့ ဖိလစ်ပိုင်လူမျိုးမိခင်တို့က မွေးဖွားလာသူပါ။ လက်ရှိမှာ မိခင်နဲ့အတူ နေထိုင်ပြီး ကျန်းမာရေးမကောင်းတဲ့ မိခင်အတွက် ကြုံရာကြိုးဝိုင်းမှာ လက်ဝှေ့ထိုးရင်း ပိုက်ဆံရှာနေရတယ်။ သူဖြစ်ချင်တာက ကိုရီးယားမှာရှိတဲ့ ဖခင်ကို ရှာတွေ့ပြီး မိသားစုအတူ ပျော်ပျော်ရွှင်ရွှင် နေထိုင်နိုင်ဖို့ပါ။ တစ်နေ့မှာ အဖေဘက်ကလူတွေက သူ့ကို ရှာတွေ့သွားပြီး ကိုရီးယားကို လိုက်ခဲ့ဖို့ ခေါ်လာကြပါတယ်။ ဖခင်နဲ့တွေ့ရတော့မယ်ဆိုပြီး ထွက်လာတဲ့ခရီးမှာတော့ မမျှော်လင့်ဘဲ ကြေးစားလူသတ်သမားအများအပြားက သူ့နောက်ကို လိုက်လာကြတယ်။ Kim Seon-Ho ကို လက်မရွံ့တဲ့ ကြေးစားလူသတ်သမားဟန်ပန်နဲ့ တွေ့ရမယ့် အက်ရှင်ဒရာမာဖြစ်ပြီး ကြမ်းတမ်းတဲ့ သတ်ဖြတ်ခန်းတွေ ပါဝင်ပါတယ်။

အမေရိကန်နိုင်ငံမှာ ဒုတိယပြည်တွင်းစစ် ဖြစ်လာခဲ့ရင်ဆိုတဲ့ စိတ်ကူးနဲ့ ဇာတ်အိမ်တည်ထားပါတယ်။ ဒီဇာတ်လမ်းထဲက အမေရိကန်အစိုးရဟာ ဖက်ဆစ်ဆန်လာပြီး အစိုးရဆန့်ကျင်သူတွေကို နှိမ်နင်းဖို့ ကိုယ့်လွှတ်တော်အဆောက်အဦးကို ကိုယ်တိုင်ဗုံးခွဲလိုက်တယ်။ ပြီးတော့ ဆန့်ကျင်သူတွေလက်ချက်လို့ စွပ်စွဲကာ လိုက်လံဖမ်းဆီးပါတော့တယ်။ ဒီလိုနဲ့ အစိုးရကို ဆန့်ကျင်သူတွေ တောထဲကို ထွက်ပြေးခိုလှုံကြရတယ်။ မတရားတဲ့အစိုးရကို ဆန့်ကျင်ရင်း တောကြီးမျက်မည်းထဲ ရောက်လာသူတွေရဲ့ အဖြစ်အပျက်တွေနဲ့ တောတွင်းမှာ ပေါ်လာတဲ့ လူ့သဘောသဘာဝတွေကို ရိုက်ကူးထားတဲ့ သည်းထိတ်ရင်ဖိုဇာတ်ကားပါ။

ဘဏ်ဓားပြတိုက်ပြီး ထွက်ပြေးလာတဲ့ ညီအစ်ကိုနှစ်ယောက်ရဲ့ လူနာတင်ကားပေါ်မှာ သေနတ်မှန်ထားတဲ့ ရဲတစ်ယောက်နဲ့ အရေးပေါ်ဆေးအကူ မိန်းကလေးတစ်ယောက် ဓားစာခံအဖြစ် ပါလာပါတယ်။ ဓားစာခံတွေ ရှိနေတာကြောင့် ရဲတွေနဲ့ အက်ဖ်ဘီအိုင်က ချက်ချင်းဝင်စီးဖို့ မလွယ်ဘဲ နောက်ကနေ ကပ်လိုက်ရင်း ညှိနှိုင်းနေကြရတယ်။ ညီအစ်ကိုနှစ်ယောက်ကလည်း လူနာတင်ကားဖြစ်နေတာကို အခွင့်ကောင်းယူပြီး တစ်မြို့လုံးပတ်မောင်းရင်း လွတ်မြောက်ဖို့ အကြံမျိုးစုံ ထုတ်ကြပါတယ်။ ထရန်စဖော်မာဇာတ်ကားတွေနဲ့ လူသိများတဲ့ ဒါရိုက်တာ မိုက်ကယ်ဘေး ရိုက်ကူးထားပြီး ဂျိတ် ဂျီလင်ဟော ခေါင်းဆောင်ပါဝင်တဲ့ မှုခင်းအက်ရှင်ဒရာမာပါ။

ပစိဖိတ်သမုဒ္ဒရာထဲမှာ စစ်ရေးလေ့ကျင့်နေတဲ့ တောင်ကိုရီးယားရေတပ်ရဲ့ ရေငုပ်သင်္ဘောတစ်စီးဟာ အချိန်အတော်ကြာ လေ့ကျင့်မှုတွေ လုပ်ပြီးနောက် ကိုရီးယားကျွန်းဆွယ်ဘက်ကို ပြန်လာခဲ့ပါတယ်။ အပြန်ခရီးမှာ မုန်တိုင်းပြင်းပြင်းနဲ့ ကြုံနေရတဲ့အပြင် အမည်မသိ ချေမှုန်းရေးသင်္ဘောတစ်စီးကပါ တော်ပီဒိုကြီးတစ်လုံးနဲ့ ပစ်ခတ်တိုက်ခိုက်လာတယ်။ မမျှော်လင့်ထားတဲ့ တိုက်ခိုက်မှုဖြစ်သလို တန်ပြန်တိုက်ခိုက်ဖို့ လက်နက်တွေကိုလည်း စစ်ရေးလေ့ကျင့်မှုမှာ သုံးခဲ့ပြီးပါပြီ။ ဒါကြောင့် ရေငုပ်သင်္ဘောပေါ်က လူတွေဟာ တော်ပီဒိုထိမှန်မယ့်အန္တရာယ်ကနေ အသည်းအသန် လွတ်အောင် ရုန်းကြရပါတော့တယ်။ Kim Rae Won နဲ့ Lee Jong Suk တို့ အဓိကပါဝင်ထားတဲ့ အက်ရှင်ဇာတ်ကားပါ။

ရုပ်ရှင်ကို ဝါသနာကြီးတဲ့ လူငယ်တစ်ယောက်ဟာ သူ့ရဲ့ ပွဲဦးထွက်ဇာတ်ကားအတွက် ဂိုဏ်းစတားတစ်ယောက်ရဲ့ ဘဝအကြောင်းကို ရိုက်ကူးဖို့ စိတ်ကူးထားပါတယ်။ ဒီလိုနဲ့ ရက်စက်ကြမ်းတမ်းတဲ့ ဂန္ဒလကွန်ဒါဂန္နီချ်အကြောင်း ရိုက်ဖို့ အကြောင်းဖန်လာတယ်။ သူနဲ့ သူငယ်ချင်းဖြစ်သူတို့ နှစ်ယောက်သား အသက်အန္တရာယ်ရှိနိုင်တဲ့ကြားက ဂန္နီချ်ရဲ့ ဘဝဇာတ်ကြောင်းကို သိရဖို့ ကြိုးစားကြပါတယ်။ ဒါပေမယ့် ဂန္နီချ်က သူ့အကြောင်း ရုပ်ရှင်ရိုက်ဖို့ သဘောတူပါ့မလား။ ဒီလူဆိုးရဲ့ နောက်ကြောင်းမှာ ဘာတွေရှိပြီး ဘယ်လိုအဖြစ်အပျက်တွေ ကြုံခဲ့ရသလဲဆိုတာကိုလည်း သိရဦးမှာပါ။ အချစ်ရေးကိုတောင် ဘေးဖယ်ပြီး ပွဲဦးထွက်ဇာတ်ကားအတွက် အာရုံစိုက်နေတဲ့ ဒါရိုက်တာလူငယ်ရဲ့ ကြိုးစားမှုကရော အောင်မြင်လာနိုင်မလား။

Beth ဟာ သူငယ်ချင်း Kate ရဲ့ ဖိတ်ခေါ်မှုနဲ့ ပိတ်ရက်အပန်းဖြေဖို့ ခရိုအေးရှားကို ရောက်လာပါတယ်။ Beth က ကလေးတစ်ယောက်အမေ အိမ်ထောင်ရှင်မဖြစ်ပြီး Kate ကတော့ ခင်ပွန်းနဲ့ ကွဲထားသူပါ။ သူငယ်ချင်းတွေဖြစ်ပေမယ့် တစ်ယောက်က အေးအေးဆေးဆေးနေတတ်ပြီး နောက်တစ်ယောက်က လူတွေနဲ့ ရောရောနှောနှော ပျော်ပျော်ပါးပါးနေတတ်လို့ စရိုက်ချင်းတော့ အတော်ကွာကြတယ်။ Kate က Beth ကို ပျော်စေချင်လို့ စားသောက်ဆိုင်မှာ ထမင်းလိုက်ကျွေးပြီး ကလပ်ကိုပါ ခေါ်သွားပါတယ်။ ကလပ်မှာ သောက်စားမူးပြီး နောက်မနက် တည်းခိုခန်းထဲ Beth ပြန်နိုးလာတဲ့အခါ Kate က မရှိတော့ဘူး။ စာမပို့၊ အကြောင်းမကြားဘဲ ပျောက်နေတဲ့ သူငယ်ချင်းကို Beth လိုက်ရှာရပါတော့တယ်။ Kate တကယ်ပဲ ပျောက်ဆုံးသွားတာလား၊ ဒါမှမဟုတ် အရင်ကလို Beth ကို ဘာမှမပြောဘဲ ထွက်သွားပြန်တာလား။

ယောက်ျားငါးယောက်နဲ့ မိန်းမတစ်ယောက်ဟာ ဘယ်လိုရောက်လာမှန်းမသိဘဲ ကုဗတုံးပုံစံ သံအချုပ်ခန်းတစ်ခုထဲမှာ ပိတ်မိနေကြပါတယ်။ ခြောက်ယောက်စလုံးက တစ်ယောက်ကိုတစ်ယောက် တစ်ခါမှတောင် မမြင်ဖူးကြတဲ့ သူစိမ်းတွေပါ။ သူတို့တစ်ဦးချင်းစီရဲ့ နောက်ကြောင်းကလည်း ရိုးရိုးရှင်းရှင်း မရှိကြဘူး။ အခန်းက လုံးဝအလုံပိတ်ထားတာတော့ မဟုတ်ပါဘူး။ ဘေးလေးဖက်၊ အပေါ်နဲ့ အောက်မှာ ကပ်လျက်အခန်းတွေဆီ ကူးသွားလို့ရတဲ့ အပေါက်တွေ ရှိနေတယ်။ သူတို့ရောက်နေတဲ့ နေရာဟာ ဒီလိုအခန်းငယ်တွေ အများကြီးကို စုစည်းပြီး ဧရာမကုဗတုံးကြီးတစ်ခုလို တည်ဆောက်ထားတဲ့ ထူးဆန်းတဲ့အဆောက်အအုံပါ။ အခန်းတစ်ခန်းကနေ ထွက်ဖို့ ရွေးစရာအပေါက် ခြောက်ပေါက်ရှိပေမယ့် ကိုယ်ကူးလိုက်တဲ့အခန်း မှားသွားရင် အသက်ဆုံးရှုံးနိုင်တဲ့ ထောင်ချောက်တွေနဲ့ တိုးနိုင်ပါတယ်။ ဘယ်အပေါက်က အန္တရာယ်ကင်းတဲ့အခန်းဆီ ရောက်မလဲ၊ အဲဒီကနေ အဓိကထွက်ပေါက်အထိ ဘယ်လိုဆက်သွားကြမလဲ။ ဒီလူခြောက်ယောက်ထဲက ဘယ်သူတွေ အသက်ရှင်လွတ်မြောက်နိုင်မလဲဆိုတာကလည်း မသေချာသေးပါဘူး။

ဟွမ်ဂယောင်မင်းတို့ကျောင်းမှာ အားကြီးသူတွေက အားနည်းသူတွေကို အနိုင်ကျင့်နေကြပါတယ်။ အငိုသန်သူလို့ အခေါ်ခံရတဲ့ ဟွမ်ဂယောင်မင်းကတော့ အဲဒီအနိုင်ကျင့်မှုတွေကို အောင့်အီးသည်းခံနေရသူပါ။ သူနဲ့ မူလတန်းကတည်းက ကျောင်းနေဖက်ဖြစ်လာတဲ့ ဂျောင်ဂျုံဆော့ရှိသလို သူတို့ကြားကို လောကကြီးကို အရွဲ့တိုက်တတ်တဲ့ ဂင်ချောလ်ဆိုတဲ့ ကောင်လေးတစ်ယောက်လည်း ရောက်လာပါတယ်။ ဒီကောင်လေးသုံးယောက်ဟာ ကိုယ်တိုင်ခံနေရတဲ့ အနိုင်ကျင့်မှုတွေအပြင် တခြားသူတွေ ကြုံနေရတာတွေကိုပါ ဖြေရှင်းဖို့ ကြိုးစားကြတယ်။ သူတို့ ဘယ်လိုရင်ဆိုင်ကြမလဲ၊ အဲဒီကိစ္စတွေက သူတို့ဘဝကို ဘယ်လိုရိုက်ခတ်လာမလဲဆိုတာကို ဇာတ်လမ်းမှာ ဆက်ပြထားပါတယ်။ ၂၀၁၁ ခုနှစ်ထွက် ဒီကိုရီးယားအန်နီမေးရှင်းဟာ စိတ်ပိုင်းဆိုင်ရာဖိအားတွေကို အလေးထားတဲ့ ဒရာမာ၊ သည်းထိတ်ရင်ဖိုဇာတ်ကားပါ။ ရင့်သီးတဲ့စကားအသုံးအနှုန်းတွေ၊ ထိတ်လန့်စရာအကြောင်းအရာတွေနဲ့ ကိုယ့်ကိုယ်ကိုယ် သတ်သေမှုဆိုင်ရာ အကြောင်းအရာတွေ ပါဝင်ပါတယ်။ ဒီဇာတ်ကားကို အခြေခံပြီး ၂၀၂၂ ခုနှစ်မှာ စီးရီးအဖြစ်လည်း ပြန်လည်ဖန်တီးထားပါတယ်။

ကျောင်းပြန်ပေးဆွဲခံရတဲ့ ဖြစ်ရပ်ဆိုးတစ်ခုအပြီးမှာ Ghost Team အထူးတပ်ဖွဲ့ဝင်တွေ ခြေရာဖျောက်ခဲ့ကြရပါတယ်။ ရဲမှူးကြီး အော်လ်စတန်ကတော့ ရာထူးမှာ ဆက်ရှိနေခဲ့တယ်။ အဲဒီဖြစ်ရပ်ကနေ ဆယ့်ရှစ်လအကြာမှာ Ghost Team အဖွဲ့ဝင်ဟောင်း ကော်နာကော်နယ်လီဟာ ရဲတပ်ဖွဲ့ဝင်အဖြစ် ဆက်လက်အလုပ်လုပ်နေပါတယ်။ တစ်နေ့မှာ ကော်နာက သူ့အကျဉ်းသားတစ်ယောက်နောက်ကို လိုက်ဖမ်းနေတဲ့ ဂိုဏ်းသားတစ်ယောက်ကို သတ်မိသွားတယ်။ သေသွားသူက မြို့ရဲ့နာမည်ကြီး မူးယစ်ရာဇာတစ်ယောက်ရဲ့လူ ဖြစ်နေတော့ ကော်နာလည်း အန္တရာယ်နဲ့ ရင်ဆိုင်ရပါတော့တယ်။ မူးယစ်ရာဇာကို သူဘယ်လိုပြန်ပေးဆပ်ရမလဲ၊ အဲဒီအန္တရာယ်ကနေ လွတ်အောင် ရှောင်နိုင်ပါ့မလားဆိုတာကို ဆက်ထားတဲ့ အက်ရှင်ဇာတ်ကားဖြစ်ပြီး Bruce Willis လည်း ပါဝင်သရုပ်ဆောင်ထားပါတယ်။

အထက်တန်းကျောင်းသားဘဝကတည်းက ပြစ်မှုမှတ်တမ်းတွေ တသီတတန်းရှိခဲ့တဲ့ အမျိုးသားတစ်ယောက်ဟာ အခုတော့ သားဖြစ်သူနဲ့အတူ အိမ်ကောင်းကောင်းမှာ နေနိုင်ဖို့ ကြုံရာအလုပ်တွေ လုပ်နေပါတယ်။ နေ့စားအငှားကားလည်း မောင်းရင်း တစ်နေ့မှာ ပိုက်ဆံပေါပြီး လေဆိပ်ကို အမြန်သွားချင်နေတဲ့ ခရီးသည်တစ်ယောက်နဲ့ ဆုံမိတယ်။ ဒါပေမယ့် အဲဒီခရီးသည် အသတ်ခံလိုက်ရပြီး လူသတ်သမားကို မသိရသေးခင်မှာပဲ ကားမောင်းသူဆီ အပြစ်ပုံကျလာပါတယ်။ ကိုယ်မကျူးလွန်ခဲ့တဲ့ ပြစ်မှုအတွက် ဝရမ်းပြေးဖြစ်သွားတဲ့သူဟာ ထွက်ပြေးရင်းနဲ့ပဲ အမှုအမှန်ပေါ်လာဖို့ စုံစမ်းရတယ်။ အရင်က လေလွင့်နေခဲ့စဉ် တတ်ထားတဲ့ နည်းမျိုးစုံကို အသုံးချပြီး နောက်ကလိုက်နေတဲ့ နိုင်ငံရေးအဖွဲ့အစည်းတွေ၊ လူဆိုးတွေနဲ့ ရဲတွေကို လှည့်စားရှောင်တိမ်းနေရပါတယ်။ အမှုနဲ့ပတ်သက်သူတွေ တစ်ယောက်ပြီးတစ်ယောက် အသတ်ခံလာရပြီး အကြောင်းအရာတွေကို ဆက်စပ်မိခါနီးမှာ သားဖြစ်သူကပါ တရားခံကို ဖမ်းဖို့ ဝင်ကူလာတယ်။ နိုင်ငံရေးနဲ့ လုံခြုံရေးဆိုင်ရာ အရှုပ်အထွေးတွေကြားက တရားခံအစစ်ဟာ ဘယ်သူလဲ၊ သားအဖနှစ်ယောက် အမှန်တရားကို ဖော်ထုတ်နိုင်မလားဆိုတဲ့ ဇာတ်လမ်းထဲမှာ သားအဖမေတ္တာနဲ့ ဟာသအခန်းတွေလည်း ပါဝင်ပါတယ်။

အဖေက သူအကြိုက်ဆုံးဖိုက်တာရဲ့နာမည်ကို ယူပြီး တီလူးလို့ မှည့်ပေးခဲ့ပေမယ့် တီလူးကတော့ ကိုယ့်ကိုယ်ကိုယ် ဒီဂျေတီလူးလို့ ခေါ်ထားပါတယ်။ အလုပ်အကိုင် ရေရေရာရာမရှိဘဲ စိတ်ကူးပေါက်ရာ လိုက်လုပ်တတ်သူပါ။ ဖိုက်တာလုပ်မယ်ဆိုပြီး စမ်းကြည့်ပေမယ့် တစ်လလောက်အကြာ မျက်နှာအထိုးခံရတော့ လက်လျှော့လိုက်တယ်။ စီးပွားရေးလုပ်ပြန်တော့လည်း အရှုံးပေါ်ပြီး နောက်ဆုံးမှာ ဆာရိပထမဆုံးဝတ်ဆင်ပွဲ၊ ဘိုနာလုပွဲလို ပွဲတွေမှာ ဒီဂျေလိုက်လုပ်နေပါတော့တယ်။ ဒီလိုနဲ့ ကလပ်တစ်ခုမှာ သူသဘောကျတဲ့ ရာဒိယာဆိုတဲ့ မိန်းကလေးနဲ့ ဆုံခဲ့တယ်။ နောက်တော့ တီလူးဟာ သူ့ဘဝကို ပြောင်းလဲသွားစေနိုင်တဲ့ မမျှော်လင့်ထားသော ကိစ္စကြီးတစ်ခုနဲ့ ကြုံလာရပါတယ်။ အဲဒီကိစ္စက ဘာဖြစ်မလဲ၊ စိတ်ထဲပေါ်ရာ လိုက်လုပ်နေတဲ့ တီလူးတစ်ယောက် ဘယ်လိုအဖြစ်တွေ ကြုံရဦးမလဲဆိုတာကို ဟာသနှောပြီး ဆက်ထားပါတယ်။

တက္ကဆက်စ်က လူသူအရောက်အပေါက်နည်းတဲ့ ကွင်းပြင်တစ်နေရာမှာ ဟီဝစ်မိသားစုဟာ စိုက်ပျိုးမွေးမြူရေးလုပ်ရင်း နေထိုင်ကြပါတယ်။ စီးပွားရေးကျဆင်းမှုနဲ့ အစာရေစာရှားပါးမှုကြောင့် တခြားသူတွေ ပြောင်းရွှေ့ကုန်ကြပေမယ့် သူတို့ကတော့ ဆက်နေခဲ့ကြတယ်။ ဆင်းရဲဒုက္ခတွေကြားမှာ မိသားစုဝင်တွေရဲ့ စိတ်အခြေအနေကလည်း ဆိုးဆိုးဝါးဝါး ထိခိုက်နေပါတယ်။ တစ်နေ့မှာ သူတို့ရဲ့မွေးစားသား တွမ်မီက သူအလုပ်လုပ်နေတဲ့ သားသတ်ရုံပိုင်ရှင်ကို သတ်လိုက်တယ်။ အဲဒီဖြစ်ရပ်ကနေ ဟီဝစ်မိသားစုရဲ့ ရက်စက်တဲ့ လူသတ်မှုတွေ စတင်လာပါတယ်။ ဒီကားက ဟီဝစ်မိသားစုရဲ့ အစပြုဇာတ်လမ်းဖြစ်ပြီး လူ့အရေပြားမျက်နှာဖုံးတပ်ထားတဲ့ ချိန်းဆောလူသတ်သမား ဘယ်လိုပေါ်ပေါက်လာသလဲဆိုတာနဲ့ ကျန်မိသားစုဝင်တွေအကြောင်းကို ပြထားတာပါ။ ဗီယက်နမ်စစ်ပွဲဆီ စေလွှတ်ခံရတဲ့ အမေရိကန်စစ်သား ညီအစ်ကိုနှစ်ယောက်နဲ့ သူတို့ရဲ့ချစ်သူနှစ်ယောက်ဟာ တက္ကဆက်စ်ကို ဖြတ်သန်းသွားရင်း ဟီဝစ်မိသားစုနဲ့ ဆုံမိကြပါတယ်။ သူတို့ရဲ့လမ်းခရီးကနေ ဟီဝစ်မိသားစုရဲ့ လူသတ်မှုတွေနဲ့ ဆက်စပ်သွားတဲ့ ထိတ်လန့်ဖွယ်ဇာတ်လမ်းဖြစ်ပြီး အကြမ်းဖက်ပြကွက်တွေ ပါဝင်ပါတယ်။

မိသားစုဝင်တစ်ယောက် ဆုံးပါးသွားပြီးနောက် စိတ်ကျဝေဒနာခံစားနေရတဲ့ သားအမိနှစ်ယောက်ဟာ ပုံမှန်မဟုတ်တဲ့ ဖြစ်ရပ်တွေကိုပါ ကြုံလာရပါတယ်။ ဇာတ်လမ်းအစမှာ သူတို့နှစ်ယောက်ကြားက ဆက်ဆံရေးနဲ့ မိသားစုဝင်တစ်ယောက်ကို ဆုံးရှုံးရတဲ့အခြေအနေကို အရင်ပြထားပြီး အဲဒီကနေ ထိတ်လန့်စရာဖြစ်ရပ်တွေဆီ တဖြည်းဖြည်း ရောက်လာတာပါ။ အိန္ဒိယတောင်ပိုင်းရုပ်ရှင်ဖြစ်တဲ့ ဒီကားက စိတ်ပိုင်းဆိုင်ရာ သည်းထိတ်ရင်ဖိုမှုနဲ့ သရဲခြောက်တဲ့အကြောင်းကို တွဲဖက်ထားပါတယ်။ အစပိုင်းမှာ သရဲခြောက်တဲ့အခန်းတွေ မများသေးဘဲ သားအမိနှစ်ယောက်ရဲ့ အခြေအနေကို အခြေခံပြီး ဇာတ်လမ်းဆက်ထားတယ်။ သူတို့ကြုံနေရတဲ့ ပဟေဠိတွေနဲ့အတူ မြှုပ်ကွက်တွေ၊ မထင်မှတ်တဲ့ အလှည့်အပြောင်းတွေလည်း ပါဝင်ပါတယ်။

အာဂျွန်တို့မိသားစုဟာ ငွေကြေးမပြေလည်တဲ့ကြားက ညီမငယ်ရမ်ယာရဲ့ မင်္ဂလာပွဲအတွက် အိမ်ကိုပေါင်ပြီး ပိုက်ဆံချေးထားရပါတယ်။ အပြန်လမ်းမှာတော့ စာရွက်စာတမ်းနဲ့ ကိုယ်ရေးအချက်အလက်တွေ မပါလို့ဆိုပြီး ရဲတွေက သံသယဝင်ကာ ပါလာတဲ့ပစ္စည်းတွေကို တစ်ညသိမ်းထားလိုက်တယ်။ နောက်နေ့ စာရွက်စာတမ်းပြပြီး ပြန်လာထုတ်ဖို့ ပြောလိုက်တာပါ။ အာဂျွန် ရဲစခန်းကို သွားထုတ်တဲ့အခါ ပေးထားတဲ့ငွေ သိန်းနှစ်ဆယ်အစား ငါးသိန်းပဲ ပြန်ရပါတော့တယ်။ ဒီငွေမရှိရင် ညီမလေးရဲ့မင်္ဂလာပွဲ ပျက်တော့မှာမို့ သူလည်း ဘာလုပ်ရမှန်းမသိ ဖြစ်သွားတယ်။ ပျောက်နေတဲ့ငွေတွေ ဘယ်ရောက်သွားတာလဲ။ သူသံသယရှိသလို ရဲတွေက ကြားထဲကနေ အစဖျောက်ယူထားတာလား။ မိဘနှစ်ပါးကိုလည်း ဖြစ်ကြောင်းကုန်စင် ဖွင့်မပြောနိုင်သလို ညီမရဲ့မင်္ဂလာပွဲကိုလည်း အပျက်မခံနိုင်တဲ့ အာဂျွန်ဟာ ပြဿနာပြေလည်ဖို့ လုပ်မိလုပ်ရာတွေ လုပ်လာပါတယ်။ သွေးထွက်သံယိုတွေ မပါဘဲ လူငယ်တစ်ယောက်နဲ့ ရဲတစ်ယောက်ကြားက ပဋိပက္ခကို သဲလွန်စတွေတစ်ဆင့်ချင်း ဖော်ရင်း ပြထားတဲ့ မှုခင်းဇာတ်ကားပါ။

ပြည်တွင်းစစ်ကနေ စတင်လာတဲ့ စစ်ပွဲတစ်ခုအတွင်းမှာ မိခင်တစ်ယောက်ဟာ သမီးဖြစ်သူကို ဆုံးရှုံးထားပါတယ်။ သူမက သေနတ်ပစ်ကျွမ်းကျင်သလို ရေခဲပြင်စကိတ်စီးရာမှာလည်း ကျွမ်းကျင်သူပါ။ တစ်နေ့မှာ အစိုးရက သူမကို တခြားလူတချို့နဲ့အတူ ဆင့်ခေါ်ပြီး တာဝန်တစ်ခု ပေးအပ်လာပါတယ်။ သူမတို့ကို ပေးတဲ့တာဝန်က ဘာလဲ၊ ခက်ခဲလှတဲ့ ဒီတာဝန်ကို သူမ ထမ်းဆောင်နိုင်ပါ့မလားဆိုတာကို ဇာတ်လမ်းက ဆက်ပြထားတယ်။ ၂၀၂၂ ခုနှစ်ထွက် ဆွီဒင်ရုပ်ရှင်ဖြစ်ပြီး စစ်ပွဲနောက်ခံမှာ အက်ရှင်နဲ့ ဒရာမာကို တွဲတင်ဆက်ထားပါတယ်။

ဖူရွှိန်မြို့တော်မှာ ပျံ့နေတဲ့ ထူးဆန်းတဲ့အကြောင်းတစ်ခုကို စုံစမ်းဖို့ သတင်းသမားလုရှောင်ရှန်းဟာ စက္ကူအရုပ်ဆိုင်လေးတစ်ဆိုင်ကို ရောက်လာပါတယ်။ ဒီကိစ္စရဲ့အစက လွန်ခဲ့တဲ့ အနှစ်နှစ်ဆယ်ခန့်က ချောင်အိမ်တော်ရဲ့ မမလေးချောင်ယွမ်ယွမ် သေဆုံးခဲ့တာနဲ့ ဆက်နွယ်နေတယ်။ အဲဒီအချိန်က ချောင်အိမ်တော်ရဲ့ အိမ်တော်ထိန်းဟာ ချောင်ယွမ်ယွမ်ကို သင်္ဂြိုဟ်ဖို့အတွက် ဆိုင်ပိုင်ရှင်လျိုစန်းကို စက္ကူရုပ်တစ်ရုပ် လုပ်ခိုင်းခဲ့ပါတယ်။ လျိုစန်းက အရုပ်မှာ မျက်လုံးတပ်ပေးလိုက်တဲ့အခါ ချောင်အိမ်တော်သခင်ကြီးကို လက်စားချေဖို့ ကြောက်စရာကိစ္စတွေ ဖြစ်လာခဲ့တယ်။ သရဲတစ္ဆေနဲ့ပတ်သက်ရင် အယူမသီးတဲ့ လုရှောင်ရှန်းက ဒီအမှုကို ဆက်စုံစမ်းနေပါတယ်။ လွန်ခဲ့တဲ့နှစ်တွေက အဖြစ်အပျက်နဲ့ စက္ကူရုပ်ကြားမှာ ဘယ်လိုအမှန်တရား ဖုံးကွယ်နေသလဲဆိုတာ သူရှာဖွေနိုင်ပါ့မလား။