သည်းထိတ်ရင်ဖိုကားများ

ကိုယ်တွင်းအင်္ဂါတွေ မှောင်ခိုရောင်းဝယ်နေတဲ့ အဖွဲ့တစ်ဖွဲ့ဟာ သူတို့အလုပ်ကိစ္စအတွက် သင်္ဘောနဲ့ တရုတ်ပြည်ကို ကူးဖို့ ထွက်လာကြပါတယ်။ အဲဒီခရီးမှာ တရုတ်ပြည်ကို အပန်းဖြေသွားမယ့် စုံတွဲတစ်တွဲလည်း ပါလာတယ်။ နောက်ထပ် သားအဖနှစ်ယောက်ကတော့ ဖခင်ဖြစ်သူ အစားထိုးခွဲစိတ်မှု ခံယူဖို့အတွက် တရုတ်ပြည်ကို သွားကြမှာပါ။ ရည်ရွယ်ချက်မတူတဲ့ ဒီလူတွေ သင်္ဘောတစ်စီးပေါ် ရောက်လာကြတဲ့အခါ မှောင်ခိုအဖွဲ့က ဘယ်သူ့ဆီကနေ ဘယ်အင်္ဂါအစိတ်အပိုင်းတွေကို ဘယ်လိုထုတ်ယူကြမလဲဆိုတာ စိုးရိမ်စရာ ဖြစ်လာပါတယ်။ အပန်းဖြေခရီးထွက်လာတဲ့ စုံတွဲနဲ့ ဆေးကုဖို့လာတဲ့ သားအဖတို့ကရော ဒီကိစ္စထဲ ဘယ်လိုပတ်သက်လာကြမလဲဆိုတာကို အခြေခံထားတဲ့ ၂၀၁၂ ခုနှစ်ထွက် ကိုရီးယားမှုခင်းသည်းထိတ်ရင်ဖို ဇာတ်ကားပါ။

စုန့်မင်းဆက်ကာလ စစ်သူကြီးယွဲ့ဖေး ကွယ်လွန်ပြီးနောက်မှာ ဇာတ်လမ်းစထားပါတယ်။ စုန့်နဲ့ ကျင်းတို့ စစ်ဖြစ်နေချိန်မှာ ရန်သူတွေ ကြောက်ရတဲ့ စစ်သူကြီးယွဲ့ဖေးဟာ အမတ်ချုပ်ချင်ဟွေရဲ့ သစ္စာဖောက်မှုစွပ်စွဲချက်နဲ့ ကွပ်မျက်ခံခဲ့ရသူပါ။ သူ့မိခင်ကိုယ်တိုင် ကျောပေါ်မှာ ထိုးပေးထားတဲ့ နိုင်ငံအပေါ် သစ္စာစောင့်သိဖို့ ဆုံးမတဲ့ ဆေးမင်ကြောင်အတိုင်း သစ္စာရှိခဲ့သူဖြစ်ပြီး သူ့တပ်သားတွေကလည်း အဲဒီဆေးမင်ကြောင်ကို လိုက်ထိုးထားကြတယ်။ ပြည်သူတွေကတော့ ကျင်းနိုင်ငံနဲ့ ပူးပေါင်းနေတဲ့ သစ္စာဖောက်ဟာ ချင်ဟွေသာ ဖြစ်တယ်လို့ စွပ်စွဲကြပါတယ်။ ဒီနောက်ခံကို အခြေခံပြီး စိတ်ကူးယဉ်ဇာတ်ကောင်တွေနဲ့ ဇာတ်လမ်းဆက်ထားတာပါ။ ချင်ဟွေက နယ်စပ်တပ်စခန်းတစ်ခုမှာ ကျင်းသံတမန်တွေနဲ့ တွေ့ဖို့ ရောက်လာချိန်မှာပဲ ကျင်းသံအမတ်တစ်ယောက် လုပ်ကြံခံလိုက်ရတယ်။ သံအမတ်သေဆုံးသွားသလို သူယူလာတဲ့ စာလွှာလည်း ပျောက်သွားပါတယ်။ ဒီအမှုထဲမှာ တူဝရီးတော်စပ်ကြတဲ့ သာမန်စစ်သည် ကျန်းတနဲ့ တပ်မှူးချုပ် စွင်းကျွင်းတို့ပါ တရားခံအဖြစ် ဆွဲသွင်းခံလိုက်ရတယ်။ လျှို့ဝှက်ချက်တွေပါတဲ့ စာတစ်စောင်ကြောင့် လူတွေ တစ်ယောက်ပြီးတစ်ယောက် သေဒဏ်ပေးခံနေရတဲ့ကြားက သူတို့နှစ်ယောက်ဟာ အမှန်တရားကို ရှာပြီး အားလုံးအတွက် လက်စားချေဖို့ ကြိုးစားလာကြပါတယ်။ ကျန်းတက လောင်းကစားလုပ်၊ ပျော်ပါးရင်း သာမန်ပြည်သူအဖြစ် နေခဲ့ရာက စစ်တပ်ထဲ ဝင်လာသူပါ။ ကိုယ့်ကိုယ်ကိုယ် အရေးမပါတဲ့လူလို့ ယူဆပြီး သေရမှာကို ကြောက်ပေမယ့် ယုံကြည်ထားတဲ့အ

အဒမ်ဟာ အထူးတပ်ဖွဲ့ဝင်အဖြစ် လုပ်သက်နှစ် ၂၀ ရှိပြီး ပေးအပ်လာတဲ့တာဝန်တွေကို ကျေပွန်အောင် ထမ်းဆောင်နိုင်သူပါ။ ပြင်သစ်မှာ အကြမ်းဖက်တိုက်ခိုက်မှုတွေ ဖြစ်လာတဲ့အခါ အထက်အရာရှိတွေက သူ့ကို တာဝန်အသစ်တစ်ခု ပေးလိုက်ပါတယ်။ အကြမ်းဖက်သမားတွေနဲ့ အဆက်အသွယ်ရှိတဲ့ လူဆိုးဂိုဏ်းထဲ အသွင်ယူဝင်ရောက်ပြီး စုံစမ်းထောက်လှမ်းကာ အကြမ်းဖက်သမားကို ဖမ်းဆီးပေးဖို့ပါ။ ဒီတာဝန်အတွက် အဒမ်က လူဆိုးဂိုဏ်းရဲ့ ယုံကြည်မှုရအောင် နေထိုင်ရပါတယ်။ ပစ်ခတ်တိုက်ခိုက်မှုတွေကြားမှာ ဇာတ်လမ်းအလှည့်အပြောင်းတစ်ခုလည်း ရှိနေပြီး ဘယ်သူက လူကောင်း၊ ဘယ်သူက လူဆိုးလဲဆိုတဲ့ အမြင်ကို ပြန်စဉ်းစားစေပါတယ်။

ပထမကမ္ဘာစစ်အတွင်း အင်္ဂလိပ်နဲ့ အမေရိကန် မဟာမိတ်တပ်သားတွေဟာ ဂျာမန်တွေ စွန့်ပစ်သွားတဲ့ ဘန်ကာတစ်ခုထဲမှာ ပိတ်မိသွားကြပါတယ်။ အဲဒီမှာ သူတို့ရင်ဆိုင်နေရတာက ဘာမှန်းမသိရတဲ့ အရာတစ်ခုပါ။ အထက်အရာရှိတွေကြား ညှိနှိုင်းမှု အဆင်ပြေနေပေမယ့် အောက်ခြေတပ်သားတွေကြားမှာတော့ ပဋိပက္ခတွေ ရှိနေကြတယ်။ ဘန်ကာထဲက ထွက်မရတဲ့အခါ တပ်သားတွေ အချင်းချင်း မယုံသင်္ကာဖြစ်လာကြပါတယ်။ တကယ်ရင်ဆိုင်နေရတဲ့ အန္တရာယ်က ဘာလဲဆိုတာ မသိသေးဘဲ အသက်တွေ ဆုံးရှုံးနေရတယ်။ စစ်မြေပြင်တိုက်ခိုက်မှုတွေထက် ပိတ်မိနေတဲ့လူတွေကြားက သံသယနဲ့ ထိတ်လန့်မှုတွေကို အဓိကထား ရိုက်ကူးထားပါတယ်။

၁၉၈၀ ပြည့်နှစ်ကာလတွေမှာ အိန္ဒိယတောင်ပိုင်း၌ အစိုးရကို ဆန့်ကျင်တဲ့ တမီလ်ပျောက်ကျားတပ်ဖွဲ့တစ်ခု စတင်ဖွဲ့စည်းလာပါတယ်။ တမီလ်ပြည်သူတွေ ကန့်ကွက်နေတဲ့ကြားက အစိုးရဟာ တောင်တန်းဒေသတစ်ခုမှာ မိုင်းတွင်းတူးဖို့ ခွင့်ပြုပေးလိုက်တယ်။ အဲဒီကစပြီး ဒေသတွင်း ပဋိပက္ခတွေ ဖြစ်လာကာ အခြေအနေ ပိုတင်းမာလာပါတယ်။ အစိုးရက မိုင်းတွင်းလုံခြုံရေးအတွက်ဆိုပြီး အထူးရဲတပ်ဖွဲ့တစ်ခု ထပ်မံချထားလိုက်ပေမယ့် ရဲတပ်ဖွဲ့ရဲ့ မသမာမှုတွေကြောင့် ဒေသခံတွေနဲ့ ပဋိပက္ခက ပိုဆိုးလာတယ်။ ပြဿနာကို ပြေလည်အောင် မဖြေရှင်းနိုင်တဲ့အပြင် ရွာသားတွေနဲ့ ပျောက်ကျားအဖွဲ့ဝင်တွေကို ရှာဖွေဖမ်းဆီးပြီး အရေးယူဒဏ်ခတ်တာတွေ လုပ်လာကြပါတယ်။ ဗီဂျေးစည်သူပတီ ပါဝင်သရုပ်ဆောင်ထားတဲ့ တမီလ်အက်ရှင်ဇာတ်ကားဖြစ်ပြီး ဇာတ်လမ်းဇာတ်ကွက်ကို စိတ်ကူးနဲ့ ဖန်တီးထားတာပါ။

စတေဖနဲစ်ဟာ အသင့်စားငါးဘူး ထုတ်တဲ့စက်ရုံမှာ အလုပ်လုပ်နေတဲ့ အမျိုးသမီးတစ်ယောက်ပါ။ သူ့ချစ်သူအမျိုးသမီးက ထောင်ငါးနှစ်ကျနေပြီး သတ်မှတ်ရက်ထက် စောစောလွတ်လာဖို့ နှစ်ယောက်သား ကြိုးစားနေကြတယ်။ ဒီကြားထဲမှာ အိမ်ရှင်က သူ့သမီးပြန်လာတော့မှာမို့ စတေဖနဲစ်ကို အိမ်ကနေ ဖယ်ပေးဖို့ ပြောလာပါတယ်။ အခက်အခဲတွေ တစ်ခုပြီးတစ်ခု ကြုံလာချိန်မှာ စတေဖနဲစ်ဟာ ကလေးဘဝကတည်းက ကွဲကွာနေခဲ့တဲ့ ဖခင်ကို ဆက်သွယ်လိုက်တယ်။ အဆက်အသွယ်ရသွားတော့ သူရှိတဲ့မြို့ဆီ သွားတွေ့ပါတယ်။ သူ့ဖခင်ဟာ စီးပွားရေးလုပ်ငန်းအများကြီးပိုင်တဲ့ သူဌေးကြီးဖြစ်ပြီး နောက်အိမ်ထောင်နဲ့ သမီးတို့အတူ နေနေသူပါ။ စတေဖနဲစ်ကိုလည်း အိမ်ကြီးဆီ ခေါ်သွားပြီး မိသားစုနဲ့ တွေ့ပေးတယ်။ ဒါပေမယ့် အဖေတူအမေကွဲညီမ ဂျော့ရှ်က စတေဖနဲစ်ကို မယုံပါဘူး။ ငွေလိုချင်လို့ သမီးအဖြစ် အယောင်ဆောင်ပြီး ချဉ်းကပ်လာတယ်လို့ ထင်နေတယ်။ အဲဒီမိသားစုထဲမှာလည်း ဆက်ဆံရေးတွေက အဆင်မပြေကြပါဘူး။ သူဌေးကြီးက ဂျော့ရှ် သူ့လုပ်ငန်းတွေကို ဦးစီးပြီး ပြောင်းလဲပစ်မှာကို မကြိုက်တာကြောင့် စတေဖနဲစ်ကို အရေးပေးလာပါတယ်။ အမွေရဖို့ ကြံစည်မှုတွေကြားမှာ စတေဖနဲစ်လို့ အားလုံးသိထားတဲ့ အမျိုးသမီးရဲ့ဘဝကိုပါ မေးခွန်းထုတ်စရာတွေ ပေါ်လာတယ်။ သူက ဘယ်သူလဲ၊ သူပြောသလို သူဌေးကြီးရဲ့ သမီးအရင်း ဟုတ်ပါ့မလား၊ နောက်ဆုံး အမွေတွေကို ဘယ်သူရသွားမလဲဆိုတာ တဖြည်းဖြည်း ဖော်ပြထားတဲ့ ပြင်သစ်လျှို့ဝှက်သည်းထိတ်ရင်ဖိုဇာတ်ကားပါ။

အလုပ်ကို သေချာမလုပ်ဘဲ လိမ်လည်လှည့်စားနေကြတဲ့ ရဲစခန်းတစ်ခုမှာ ဘယ်သူ့ကိုမှ မကြောက်ဘဲ မှန်မှန်ကန်ကန်လုပ်တဲ့ ရဲအရာရှိတစ်ယောက်လည်း ရှိနေပါတယ်။ အဲဒီစခန်းကို ရာဟူလန်၊ အတိုကောက် ရာဟူးလို့ခေါ်တဲ့ ရဲဝန်ထမ်းအသစ်လေးက SI ရာထူးနဲ့ ရောက်လာတယ်။ တစ်နေ့ ဘတ်စ်ကားစီးရင်း ရာဟူးရဲ့ ပစ်စတို အခိုးခံလိုက်ရပါတယ်။ သူက အထက်ကို မတင်ပြဘဲ ကိုယ့်ဘာသာ လိုက်ရှာဖမ်းဖို့ ကြိုးစားတယ်။ ပျောက်သွားတဲ့ သေနတ်နောက်ကို လိုက်ရင်းနဲ့ပဲ COVID ကာလအတွင်း ဖြစ်ပွားခဲ့တဲ့ ဒုစရိုက်မှုတွေကို တစ်ခုပြီးတစ်ခု တွေ့လာပါတော့တယ်။ Shane Nigam၊ Shine Tom Chacko၊ Jean Lal နဲ့ Gayathrie တို့ အဓိကပါဝင်ထားတဲ့ မလယာလမ် မှုခင်းသည်းထိတ်ရင်ဖိုဇာတ်ကားဖြစ်ပါတယ်။ ဇာတ်လမ်းကို ရှုပ်ထွေးလွန်းအောင် ဖွဲ့ထားတာမျိုးမဟုတ်ဘဲ စုံစမ်းမှုနဲ့အတူ အလှည့်အပြောင်းတွေကို တစ်ဆင့်ချင်း ဖော်ပြသွားပါတယ်။

ဂန်ဟျောင်းဆိုးဟာ ကောလိပ်က သရုပ်ဆောင်ဘွဲ့ရထားပေမယ့် သာမန်အလုပ်တစ်ခုနဲ့ ပင်ပင်ပန်းပန်း ရုန်းကန်နေရသူပါ။ ချမ်းချမ်းသာသာ နေချင်တဲ့ဆန္ဒရှိတဲ့ သူဟာ တစ်နေ့ စီနီယာအစ်ကိုတစ်ယောက်ရဲ့ စည်းရုံးမှုကြောင့် စတော့ရှယ်ယာလောကထဲ ရောက်သွားပါတယ်။ အဲဒီနောက် အမြတ်ရလိုက်၊ အရှုံးပေါ်လိုက်နဲ့ စတော့လောကမှာ ကျင်လည်လာခဲ့တာ ငါးနှစ်ကြာသွားတယ်။ တစ်ခါမှာတော့ ဟျောင်းဆိုးဟာ ဟွမ်ဂျောင်ဂူ အကွက်ချစီစဉ်ထားတဲ့ စတော့အကြံအဖန်တစ်ခုကို မထင်မှတ်ဘဲ ဝင်နှောင့်ယှက်မိပါတော့တယ်။ ဟွမ်ဂျောင်ဂူက DSG ရင်းနှီးမြှုပ်နှံမှုနဲ့ ပိုင်ဆိုင်မှုလုပ်ငန်းရဲ့ ဥက္ကဋ္ဌဖြစ်သလို လူမိုက်ဂိုဏ်းခေါင်းဆောင်လည်း ဖြစ်နေတယ်။ ကိုရီးယားစတော့ရှယ်ယာလောကထဲက စီးပွားရေးအရှုပ်အထွေးတွေ၊ အကြံအဖန်လုပ်ပြီး အကျိုးအမြတ်ယူဖို့ ကြိုးစားနေတဲ့ သူဌေးတွေနဲ့ အချောင်အမြတ်ရချင်သူတွေကြားမှာ ဟျောင်းဆိုး ဝင်ပါမိသွားတာပါ။ သူ့အစီအစဉ်ကို နှောင့်ယှက်မိသူဟာ ဘယ်သူလဲဆိုတာ ဥက္ကဋ္ဌဟွမ် သိသွားတဲ့အခါ ဟျောင်းဆိုး ဘာတွေကြုံရတော့မလဲ။

မိုးသည်းသည်း ဆက်တိုက်ရွာနေတာကြောင့် ဟန့်တင်ဘာ့မြို့လေးက ဆည်ကြီးကို ရေဖွင့်ချနေရပြီး မြို့ခံတွေကိုလည်း ဘေးလွတ်ရာ ရွှေ့ပြောင်းခိုင်းထားရပါတယ်။ ဒီအချိန်မှာ ဘဏ်ကလည်း မြို့ထဲက ဘဏ်ခွဲမှာရှိတဲ့ ဒေါ်လာသုံးသန်းကို တခြားနေရာ ရွှေ့ဖို့လုပ်တယ်။ ငွေတွေကို သယ်သွားရမယ့် ကျည်ကာကားကို တွမ်နဲ့ သူ့ဦးလေး ချာလီတို့ မောင်းလာကြပါတယ်။ ရေက မြန်မြန်တက်လာပြီး လမ်းတွေပါ မြုပ်ကုန်လို့ သူတို့ကားဟာ မြို့အထွက်မှာတင် ပိတ်မိသွားတယ်။ အကူအညီခေါ်နေတုန်း ဒေါ်လာသုံးသန်း ရွှေ့မယ့်သတင်းကို အတိအကျရထားတဲ့ ဂျင်မ်တို့အဖွဲ့ ရောက်လာပြီး ငွေတွေကို လုဖို့ ကြိုးစားပါတော့တယ်။ ရေဘေးကြားမှာ တွမ်က ငွေတွေကို ကာကွယ်နိုင်ပါ့မလား၊ ဂျင်မ်တို့ကပဲ လက်ဦးသွားမလား။ မော်ဂန် ဖရီးမန်း ပါဝင်ထားတဲ့ ဒီအက်ရှင်ဇာတ်ကားမှာ အန္တရာယ်နဲ့ ငွေကြေးကြားက လူတွေရဲ့ ပြောင်းလဲလွယ်တဲ့စိတ်ကိုလည်း တွေ့ရပါတယ်။

ကွန်ပျူတာကျွမ်းကျင်သူတစ်ယောက်နဲ့ စက်ယန္တရားကျွမ်းကျင်သူ ဂျက်စတာတို့ ပူးပေါင်းပြီး အစိုးရပိုင် ဒေါ်လာသန်း ၄၀ ကျော်တန်ဖိုးရှိတဲ့ ရွှေတွေကို ဖောက်ထွင်းယူခဲ့ကြပါတယ်။ ဂျက်စတာက သေနတ်မယူဖို့၊ လူမသတ်ဖို့ ကြိုပြောထားပေမယ့် တစ်ဖက်လူက အစောင့်တွေကို သတ်လိုက်တယ်။ အဲဒီနောက် ဂျက်စတာဟာ ရွှေတွေယူပြီး တစ်ယောက်တည်း ထွက်ပြေးသွားကာ တစ်နေရာမှာ ဖွက်ထားပြီး ထောင်ထဲဝင်နေလိုက်ပါတယ်။ ပုဇွန်ခိုးလို့ ဖမ်းခံရတဲ့ အယ်ဗင်ကတော့ ဂျက်စတာနဲ့ ထောင်အခန်းတူ ကျသွားတယ်။ နှလုံးမကောင်းတော့တဲ့ ဂျက်စတာက ရွှေဖွက်ထားတဲ့နေရာကို သူ့ဇနီးအား ပြောပေးဖို့ အယ်ဗင့်ကို မှာခဲ့ပြီး ထောင်ထဲမှာပဲ သေဆုံးသွားပါတယ်။ ဒီတော့ အစိုးရပိုင်ရွှေတွေကို ပြန်ရချင်တဲ့ ဘဏ္ဍာရေးထောက်လှမ်းရေးမှူးနဲ့ ရွှေတွေယူပြေးသွားတဲ့အပေါ် မကျေနပ်ဖြစ်နေတဲ့ ကွန်ပျူတာသမား လူသတ်သမားတို့ရဲ့ အာရုံက အယ်ဗင့်ဆီ ရောက်လာတော့တယ်။ ထောက်လှမ်းရေးမှူးက အယ်ဗင် မသိအောင် သူ့မေးရိုးအောက်မှာ ခြေရာခံစက် ထည့်ပေးပြီး ထောင်က လွှတ်လိုက်ပါတယ်။ အယ်ဗင့်ကို ငါးစာလုပ်ပြီး ပုန်းနေတဲ့ လူသတ်သမားကို ထွက်လာအောင် မျှားဖို့ပါ။ အစိုးရဘက်က သူ့ကိုသုံးပြီး လူဆိုးဖမ်းဖို့ ကြံနေသလို လူသတ်သမားကလည်း သူ့ဆီကနေ ရွှေတွေရဖို့ ကြိုးစားနေတယ်။ Jamie Foxx သရုပ်ဆောင်ထားတဲ့ အယ်ဗင်ကတော့ နှစ်ဖက်ကြား ညပ်နေပြီး ဒီအရှုပ်အထွေးတွေထဲက ဘယ်လိုရုန်းထွက်မလဲဆိုတာ ဟာသတွေနဲ့အတူ ဆက်ကြည့်ရမှာပါ။

ဆိုဖီယာဟာ လေယာဉ်ပျက်ကျမှုတွေကို စစ်ဆေးရတဲ့အေးဂျင့်တစ်ယောက်ဖြစ်ပြီး လတ်တလောမှာတော့ ရာထူးကနေ ရပ်နားခံထားရပါတယ်။ အားလပ်နေတဲ့အချိန်မှာ အစ်ကိုနဲ့အတူ လေယာဉ်စီးဖို့ စီစဉ်ခဲ့ပေမယ့် လေယာဉ်ထွက်ခါနီးမှာ ပျက်ကျမှာကို စိုးရိမ်လာလို့ သူက ဆင်းနေခဲ့တယ်။ အစ်ကိုကတော့ အဲဒီလေယာဉ်နဲ့ပဲ ပါသွားပါတယ်။ နောက်တော့ သူစိုးရိမ်ခဲ့တဲ့အတိုင်း လေယာဉ်ပျက်ကျသွားတယ်။ ရာထူးရပ်နားခံထားရပေမယ့် ဒီဖြစ်ရပ်ကို မစုံစမ်းဘဲ မနေနိုင်တဲ့ ဆိုဖီယာက ကိုယ့်ဘာသာ လိုက်လံစစ်ဆေးပါတော့တယ်။ စုံစမ်းနေရင်း အခက်အခဲတွေကို ဘယ်လိုရင်ဆိုင်ရမလဲ၊ တွေ့ထားတဲ့သဲလွန်စအများကြီးထဲက ဘယ်ဟာတွေက တကယ်ခိုင်လုံသလဲဆိုတာ မေးခွန်းထုတ်စရာဖြစ်လာပါတယ်။ ဒီလေယာဉ်ပျက်ကျမှုနောက်ကွယ်က အမှန်တရားကို သူဖော်ထုတ်နိုင်ပါ့မလား။

အန်ဒီဟာ ဘွဲ့ရပြီးနောက် နယူးယော့ခ်မှာ အလုပ်သင်ဆင်းခဲ့ပေမယ့် ချစ်သူနဲ့နီးချင်လို့ ဘော့စတွန်ကို ပြောင်းလာပါတယ်။ မြို့သစ်မှာ အလုပ်ရှာနေရင်း လျှောက်ထားတဲ့နေရာအများစုကလည်း မခန့်ကြဘူး။ အသိမိတ်ဆွေမရှိသေးတာကြောင့် Be Friend ဆိုတဲ့အက်ပ်ကို စမ်းသုံးကြည့်ရာက မြို့ခံကောင်မလေး ဖာရာနဲ့တွေ့ပြီး ရင်းနှီးသွားကြပါတယ်။ တစ်နေ့တော့ ဖာရာခေါ်တဲ့ ကလပ်ကို အန်ဒီ လိုက်သွားဖြစ်တယ်။ အဲဒီမှာ ဖာရာရဲ့ချစ်သူ အီသန်နဲ့ သူ့သူငယ်ချင်းတွေဟာ ကလပ်ကိုလာတဲ့ မိန်းကလေးတွေကို ဆေးခတ်ပြီး ကိုယ်ထိလက်ရောက် ကျူးလွန်နေကြတာကို သိသွားပါတယ်။ မိတ်ဆွေအသစ်ရပြီလို့ ထင်ထားရာကနေ အန်ဒီ ဘယ်လိုအရှုပ်အထွေးထဲ ဝင်ပါမိနေပြီလဲ။ အီသန်တို့ရဲ့လုပ်ရပ်တွေကို တားဆီးနိုင်ပါ့မလား၊ သူကိုယ်တိုင်လည်း ပြဿနာတွေကြုံလာရမလားဆိုတာ ဆက်တွေ့ရမှာပါ။

တစ်ချိန်က အယ်လ်အေပီဒီရဲ့ မူးယစ်ရဲတပ်ဖွဲ့မှာ ပါဝင်ခဲ့တဲ့သူတစ်ယောက်ဟာ ငါးနှစ်ကြာပြီးနောက် ဆွန်မာတန်ဆိုတဲ့ နယ်စပ်မြို့လေးမှာ နယ်ထိန်းအဖြစ် အေးအေးချမ်းချမ်း နေထိုင်နေပါတယ်။ အာနိုးသရုပ်ဆောင်ထားတဲ့ ဒီနယ်ထိန်းရဲ့ဘဝက ဒုစရိုက်သမား ဂါဘရီယယ်ကောတက်စ် ထွက်ပြေးလာချိန်မှာ ပြောင်းလဲသွားတော့တယ်။ ကောတက်စ်ဟာ အက်ဖ်ဘီအိုင်လက်ထဲကနေ လွတ်လာပြီး သူ့အဖွဲ့သားတွေနဲ့အတူ ဆွန်မာတန်ဘက်ကို ဦးတည်လာနေပါတယ်။ နယ်ထိန်းလည်း အေးအေးဆေးဆေးနေလို့ မရတော့ဘဲ သူတို့ကို တားဆီးဖို့ ကြိုးစားရတော့တယ်။ တစ်ဖက်မှာ လက်နက်အပြည့်အစုံနဲ့ လူအင်အားများတဲ့အဖွဲ့ရှိနေပြီး ဒီဘက်မှာတော့ နယ်ထိန်းရဲအနည်းငယ်ပဲ ရှိပါတယ်။ ဒီလူနည်းစုနဲ့ ကောတက်စ်တို့ကို ဘယ်လိုတားဆီးကြမလဲဆိုတာ ဇာတ်လမ်းမှာ ဆက်ပြထားပါတယ်။ ဒီကားဟာ ကိုရီးယားဒါရိုက်တာ Kim Jee Woon ရဲ့ ပထမဆုံးအမေရိကန်ရုပ်ရှင်ဖြစ်ပြီး အာနိုးအတွက်လည်း Terminator 3 နောက်ပိုင်း အဓိကဇာတ်ဆောင်အဖြစ် ပြန်ပါဝင်လာတဲ့ကားပါ။

မူးယစ်ဆေးဝါးတိုက်ဖျက်ရေး အထူးတပ်ဖွဲ့ခေါင်းဆောင် ဘရစ်ချာနဲ့ သူ့အဖွဲ့ဟာ မူးယစ်ဂိုဏ်းတစ်ခုရဲ့စခန်းကို ဝင်စီးကြပါတယ်။ အဲဒီမှာ ဖမ်းဆီးရမိတဲ့ ငွေပုံကြီးထဲက ဒေါ်လာဆယ်သန်းကို ခိုးယူပြီး ဖွက်ထားခဲ့ကြတယ်။ တိုက်ခိုက်မှုတွေပြီးလို့ ငွေပြန်ယူဖို့ သွားတဲ့အခါမှာတော့ ဖွက်ထားတဲ့ငွေတွေ ပျောက်နေပြီး တစ်ဖွဲ့လုံးလည်း ခိုးမှုနဲ့ စစ်ဆေးခံရပါတော့တယ်။ ခြောက်လကြာ စစ်ဆေးပေမယ့် မသင်္ကာစရာမတွေ့တာကြောင့် သူတို့ ပြန်တာဝန်ထမ်းဆောင်ခွင့်ရလာပါတယ်။ ဒါပေမယ့် အဲဒီနောက်မှာ အဖွဲ့ဝင်တွေ တစ်ယောက်ပြီးတစ်ယောက် ရက်ရက်စက်စက် အသတ်ခံလာရတယ်။ စစ်ဆေးရေးမှူးအမျိုးသမီးတစ်ယောက်နဲ့ ပူးပေါင်းပြီး တရားခံကို လိုက်ရှာကြရင်း သံသယရှိသူတွေ တွေ့လာပေမယ့် အဖွဲ့ထဲမှာလည်း သေဆုံးသူတွေ ဆက်တိုးနေပါတယ်။ ဘရစ်ချာရဲ့ဇနီး အသတ်ခံခဲ့ရတဲ့အတိတ်နဲ့ လက်ရှိအဖွဲ့သားတွေ ကြုံနေရတဲ့ပြဿနာတွေကြားကနေ လူသတ်သမားကို ရှာဖော်ရမှာပါ။ အာနိုးက ဘရစ်ချာအဖြစ် ဦးဆောင်ပါဝင်ပြီး Sam Worthington လည်း သရုပ်ဆောင်ထားပါတယ်။

လက်ထောက်ရှေ့နေ Darcy Young ဟာ ညီမလေး Brea ရဲ့စေ့စပ်ပွဲအတွက် နယ်မြို့လေးတစ်မြို့ကို ရောက်လာပါတယ်။ အဲဒီမှာ ညီမရဲ့သတို့သားလောင်း Thomas Schure နဲ့ မိတ်ဆက်ရပေမယ့် သူ့ရဲ့ထူးခြားတဲ့အပြုအမူတွေကြောင့် Darcy စိတ်ထဲ သံသယဝင်လာတယ်။ ရှေ့နေတစ်ယောက်ဖြစ်တဲ့ Darcy က Thomas ရဲ့နောက်ကြောင်းကို လိုက်စုံစမ်းတော့ သူဟာ မိသားစုအတွက် အန္တရာယ်ရှိသူဖြစ်နေကြောင်း သိလာရပါတယ်။ ညီမလေး လက်ထပ်တော့မယ့်သူရဲ့အကြောင်း သိလိုက်ရချိန်မှာ Darcy ဘယ်လိုဆက်လုပ်မလဲဆိုတာကနေ ဇာတ်လမ်းဆက်သွားပါတယ်။

သုံးပွင့်ဆိုင်အချစ်ရေးထဲက စိတ်ကစဉ့်ကလျားဖြစ်နေတဲ့ ကောင်မလေးတစ်ယောက်ဟာ တစ်နေ့ နိုးလာတော့ သူချစ်ရတဲ့လူကို ဘေးမှာ သေဆုံးလျက် တွေ့လိုက်ရပါတယ်။ ဘယ်သူသတ်သွားတာလဲ မသိသလို ကိုယ်တိုင် သတ်မိခဲ့တာလားဆိုတာကိုလည်း မသိဘူး။ ဖြစ်ခဲ့သမျှကို ရှင်းရှင်းလင်းလင်း မသိနိုင်တဲ့အတွက် ရဲတိုင်ဖို့လည်း အခက်တွေ့နေပြီး သူ့အချစ်ရေးထဲက နောက်ကောင်လေးဆီ ဖုန်းဆက်လိုက်တယ်။ သူ့အတွက်ဆို ဘာမဆိုလုပ်ပေးဖို့ အသင့်ရှိတဲ့ ကောင်လေးက အလောင်းဖျောက်ပေးပါတယ်။ အဲဒီနောက် နှစ်ယောက်သား နေရာသစ်တစ်ခုမှာ ဘဝပြန်စဖို့ ကားတစ်စီးနဲ့ အဝေးပြေးလမ်းအတိုင်း ထွက်လာကြတယ်။ လမ်းရောက်မှ ကောင်မလေးရဲ့ စိတ်ရောဂါအတွက် သောက်နေကျဆေးတွေ အခင်းဖြစ်တဲ့နေရာမှာ ကျန်ခဲ့မှန်း သိလိုက်ရတာပါ။ ကောင်လေးက စွန့်စားပြီး ဆေးပြန်ယူပေးတဲ့အခါ ဖျောက်ထားခဲ့တဲ့အလောင်းဟာ မူလနေရာမှာ ပြန်ရောက်နေတာကို တွေ့လိုက်ရပါတယ်။ သူတို့ရဲ့အချစ်နဲ့ ဒီအခက်အခဲကို ကျော်ဖြတ်နိုင်ကြမလား၊ ကျူးလွန်ထားတဲ့အပြစ်ကပဲ သူတို့နောက် ဆက်လိုက်နေမလားဆိုတဲ့ မေးခွန်းတွေကြားမှာ ဇာတ်လမ်းက ဆက်သွားပါတယ်။

အထူးလျှို့ဝှက်တပ်ဖွဲ့ဝင်ဟောင်း အဲလက်စ်ဟာ ထောင်ကျနေတဲ့ သားဖြစ်သူကို လာတွေ့ချိန်မှာ ထောင်အပိုင်စီးခံရတဲ့ ဖြစ်ရပ်နဲ့ ကြုံလိုက်ရပါတယ်။ အကျဉ်းသားတစ်ယောက်က အရာရှိတွေကို လုပ်ကြံပြီး ထောင်ကို စီးနင်းလိုက်တာကြောင့် အဲလက်စ်လည်း အထဲမှာ ပိတ်မိသွားတယ်။ သားဖြစ်သူကို ကယ်ထုတ်ဖို့ ကြိုးစားရင်း အဲလက်စ်ဟာ အထူးတပ်ဖွဲ့ဝင်ဘဝက တိုက်ခိုက်ရေးအတွေ့အကြုံတွေကို ပြန်အသုံးချရပါတော့တယ်။ သူရင်ဆိုင်ရသူက ထောင်ကျနေတဲ့ကြားက လုံခြုံရေးတွေကို ကိုယ့်ဘက်ပါအောင် လုပ်ထားနိုင်ပြီး ထောင်တစ်ခုလုံးကို အပိုင်စီးနိုင်တဲ့အထိ ဉာဏ်များတဲ့ ရာဇဝတ်သားတစ်ယောက်ပါ။

ဂျနီဖာဟာ ကုမ္ပဏီကြီးတစ်ခုမှာ ကွန်ပျူတာပရိုဂရမ်မာအဖြစ် အလုပ်လုပ်နေရာက အထက်လူကြီးနဲ့ အဆင်မပြေဖြစ်ပြီး အလုပ်ပြုတ်သွားပါတယ်။ နောက်အလုပ်လည်း ရှာမရ၊ အိမ်လခပေးဖို့ ငွေကလည်း အသည်းအသန်လိုနေချိန်မှာ ဘယ်သူမှန်းမသိတဲ့ လူတစ်ယောက်ဆီက ဖုန်းဝင်လာတယ်။ သူက တခြားသူရဲ့ ရုံးခန်းထဲ ခိုးဝင်ပြီး ဒေတာယူပေးရမယ့် တစ်မနက်စာအလုပ်အတွက် ဒေါ်လာငါးသန်းပေးမယ်လို့ ကမ်းလှမ်းလာတာပါ။ ငွေလိုနေပေမဲ့ တရားမဝင်တဲ့အလုပ်ဖြစ်လို့ ဂျနီဖာက လက်ခံဖို့ တွန့်ဆုတ်နေခဲ့တယ်။ ဒါပေမဲ့ အလုပ်ကမ်းလှမ်းသူက အကျပ်ကိုင်ခြိမ်းခြောက်လာတော့ လက်ခံလိုက်ရပါတယ်။ ကုမ္ပဏီထဲ ခိုးဝင်ဖို့ လုပ်တဲ့အခါမှာလည်း ထင်ထားတဲ့အတိုင်း ဖြစ်မလာဘဲ အလွဲလွဲအချော်ချော်တွေ ကြုံရတော့တယ်။ ဒေတာခိုးယူရင်း အဲဒီကုမ္ပဏီထဲမှာ ဖူးစာဖက်နဲ့ပါ ဆုံတွေ့လာဦးမှာပါ။

ထူးဆန်းတဲ့ ဗိုင်းရပ်စ်တစ်မျိုး ပျံ့နှံ့လာပြီး ကမ္ဘာပေါ်က လူကြီးတွေအားလုံး သေဆုံးသွားတဲ့အခါ အရွယ်မရောက်သေးတဲ့ ကလေးတွေပဲ ကျန်ရစ်ခဲ့ပါတယ်။ The Park က ဒီကပ်ရောဂါဖြစ်နေတဲ့ကာလကို နောက်ခံထားတဲ့ ဇာတ်ကားပါ။ အဓိကဇာတ်ကောင် သုံးယောက်ကတော့ စွန့်ပစ်ထားတဲ့ ကစားကွင်းတစ်ခုကို ပြန်လည်အသက်သွင်းဖို့ ကြိုးစားနေကြတယ်။ သူတို့ကိုယ်တိုင်လည်း ဒီကပ်ရောဂါကနေ လွတ်မြောက်နိုင်ပါ့မလားဆိုတဲ့ မေးခွန်း ရှိနေပါတယ်။ ဇာတ်လမ်းမှာ အက်ရှင်၊ ဒရာမာ၊ သိပ္ပံစိတ်ကူးယဉ်နဲ့ ထိတ်လန့်သည်းဖိုအကြောင်းအရာတွေ ရောစပ်ထားပါတယ်။

မကာအိုမှာ ဂိုဏ်းနှစ်ဂိုဏ်း အပြိုင်အဆိုင် လှုပ်ရှားနေကြပြီး သူတို့အထက်က လူတစ်ယောက်ကလည်း နှစ်ဖက်စလုံးကို ကြိုးကိုင်ကစားဖို့ လုပ်နေပါတယ်။ တိုနီလျောင် သရုပ်ဆောင်ထားတဲ့ ရဲမှူးကတော့ ဂိုဏ်းတစ်ဂိုဏ်းဘက်ကနေ ပါဝင်ပေးနေတဲ့ အကျင့်ပျက်ရဲတစ်ယောက်ပါ။ အဲဒီဂိုဏ်းက မကောင်းမှုလုပ်တိုင်း သူက ဝင်ရှင်းပေးနေကျ ဖြစ်ပါတယ်။ ဒီတစ်ခါလည်း ကိုယ်နဲ့အဆင်ပြေတဲ့ ဂိုဏ်းဘက်က ဝင်ပါရင်း ဂိုဏ်းနှစ်ဂိုဏ်းကို ကြိုးကိုင်နေသူရဲ့ အကွက်ထဲ သူပါ ရောက်သွားတယ်။ အဲဒီကနေ သူ့ဘဝရဲ့ အဆိုးဆုံးညကို ရင်ဆိုင်ရပါတော့တယ်။ ဇာတ်လမ်းတစ်ခုလုံးက ဒီတစ်ညအတွင်း ဖြစ်ပျက်သမျှကို လိုက်ပြထားတာပါ။ ၁၉၉၈ ခုနှစ် ဟောင်ကောင်အက်ရှင်မှုခင်းရုပ်ရှင်ဖြစ်ပြီး တိုနီလျောင်ချူဝေနဲ့ Sean Lau တို့ ပါဝင်သရုပ်ဆောင်ထားပါတယ်။ ဒါရိုက်တာအဖြစ် Patrick Yau ကို ဖော်ပြထားပြီး Johnnie To နဲ့ Wai Ka-fai တို့က ပူးတွဲထုတ်လုပ်ထားပါတယ်။

Henry Golding သရုပ်ဆောင်ထားတဲ့ မော်ဂန်ဟာ ကြေးစားလူသတ်သမားဘဝကနေ ထွက်ချင်နေသူပါ။ သူ့ဆရာအပြောအရ ဒီလောကက ထွက်ကြတဲ့ အကြောင်းရင်းက သုံးခုပဲရှိတယ်။ ဘုရားသခင်ကို ရှာတွေ့လို့၊ အမျိုးသမီးတစ်ယောက်ကြောင့်၊ ဒါမှမဟုတ် သေသွားလို့တဲ့။ မော်ဂန်ကတော့ အမျိုးသမီးတစ်ယောက်ကြောင့် အလုပ်ကို ရပ်ချင်နေတာပါ။ အဲဒီအချိန်မှာပဲ သူ့ဆီ အလုပ်တစ်ခု ရောက်လာပါတယ်။ လူခြောက်ယောက်ကို သတ်ပေးရမှာဖြစ်ပြီး တစ်ယောက်အတွက် ဒေါ်လာတစ်သန်းစီ ရမယ်။ မော်ဂန်က ဆုံးဖြတ်ချက်ကို မပြင်ဘဲ ဒီအလုပ်ကိုလည်း ငြင်းဖို့ တွေးထားတယ်။ ဒါပေမယ့် ပစ်မှတ်ခြောက်ယောက်က သာမန်လူတွေ မဟုတ်ဘဲ သူ့လို ကြေးစားလူသတ်သမားတွေ ဖြစ်နေပါတယ်။ သူတို့ဆီကိုလည်း အလားတူ အလုပ်ကမ်းလှမ်းထားတာကြောင့် ကြေးစားအချင်းချင်း လိုက်သတ်ကြရမယ့် အခြေအနေ ဖြစ်နေတယ်။ မော်ဂန်က လက်မခံချင်လည်း ကျန်တဲ့ခြောက်ယောက်က သူ့ကို လာသတ်ကြမှာပါ။ ဒါကြောင့် မဖြစ်မနေ ပြန်တိုက်ခိုက်ရင်း ဒီအလုပ်တွေရဲ့ နောက်ကွယ်မှာ ဘယ်သူရှိနေသလဲ၊ ဘာကြောင့် သူတို့ကို အချင်းချင်း သတ်ခိုင်းနေသလဲဆိုတာပါ လိုက်ဖော်ထုတ်ရပါတော့တယ်။

ကယ်ရန်ဟာ ဘိုးဘွားစောင့်ရှောက်ရေးစင်တာတစ်ခုမှာ စေတနာ့ဝန်ထမ်းအဖြစ် လုပ်နေပါတယ်။ အိမ်တစ်အိမ်ကို သွားရောက်စောင့်ရှောက်ပေးနေကျ ယိုကိုဆိုတဲ့ မိန်းကလေး အလုပ်ရောက်မလာတဲ့နေ့မှာ ကယ်ရန်က သူ့အစား အဲဒီအိမ်ကို သွားပေးလိုက်တယ်။ ရောက်သွားတော့ အိမ်မှာ အဘွားအိုတစ်ယောက်ပဲ ရှိနေပါတယ်။ အဘွားကို အဖော်လုပ်ပြီး လိုအပ်တာတွေ ကူညီပေးနေတုန်း ကယ်ရန်ဟာ အိမ်ထဲက ထူးဆန်းတဲ့အသံတွေကို ကြားလာရတယ်။ လိုက်ရှာကြည့်တဲ့အခါ ဗီရိုထဲမှာ ပိတ်မိနေတဲ့ ကလေးတစ်ယောက်ကို တွေ့သွားပါတယ်။ ကောင်လေးရဲ့ နာမည်က တိုရှိအိုပါ။ Takashi Shimizu ရိုက်ကူးထားတဲ့ ဒီဇာတ်ကားဟာ ၂၀၀၂ ခုနှစ်ထွက် ဂျပန်သရဲကား Ju-On ကို ဟောလိဝုဒ်မှာ ပြန်လည်ရိုက်ကူးထားတာဖြစ်ပြီး မူရင်းဇာတ်ကားတွေရဲ့ လမ်းကြောင်းအတိုင်း ဆက်တင်ပြထားပါတယ်။

အသက် ၁၂ နှစ်အရွယ် ရှားလာ့ထ်ဟာ ကျောင်းမှာ အမြဲအနိုင်ကျင့်ခံနေရတဲ့ ကလေးမလေးပါ။ သူ့ကို အနိုင်ကျင့်နေတဲ့ မိန်းကလေးက အားကစားမှာ ထူးချွန်ပြီး ဆရာတွေရဲ့ အချစ်တော်လည်း ဖြစ်နေတယ်။ ပြဿနာဖြစ်လာတိုင်း ဆရာတွေက ရှားလာ့ထ်ဘက်က ရပ်တည်မပေးတဲ့အပြင် မိဘတွေကပါ သူ့ကို ဆိုးတဲ့ကလေးလို့ မြင်နေကြပါတယ်။ ခြိမ်းခြောက်အနိုင်ကျင့်ခံနေရပေမယ့် ကိုယ့်ကိုပဲ အပြစ်မြင်နေကြတဲ့အခါ ရှားလာ့ထ်ရဲ့ စိတ်ဖိစီးမှုက ပိုများလာတယ်။ သူ ဒီအခြေအနေကို ဘယ်လိုရင်ဆိုင်မလဲ၊ မိသားစုကြားမှာရော ဘယ်လိုပြဿနာတွေ ဝင်လာမလဲဆိုတဲ့ အကြောင်းကို ကျောင်းတွင်းအနိုင်ကျင့်မှုကနေ လျှို့ဝှက်သည်းဖိုဘက် တဖြည်းဖြည်း ပြောင်းသွားတဲ့ ပုံစံနဲ့ တင်ပြထားပါတယ်။ ကလေးတစ်ယောက် အနိုင်ကျင့်ခံနေရတာကို သတိပြုမိဖို့နဲ့ ကာကွယ်ပေးဖို့ မိဘတွေရဲ့ တာဝန်ကိုလည်း ဒီဇာတ်လမ်းက သတိပေးထားတယ်။

IB 71 က ၁၉၇၁ ခုနှစ် အိန္ဒိယလေကြောင်းလိုင်း လေယာဉ်ပြန်ပေးဆွဲမှုကို အခြေခံထားပြီး ဗီရွတ် ပါဝင်သရုပ်ဆောင်ထားတဲ့ ရုပ်ရှင်ပါ။ အိန္ဒိယနဲ့ ပါကစ္စတန်တို့ နိုင်ငံနှစ်ခုအဖြစ် ကွဲသွားပြီးနောက်မှာလည်း တင်းမာမှုတွေ ဆက်ရှိနေပါတယ်။ တစ်ဖက်နဲ့တစ်ဖက် သူလျှိုတွေလွှတ်၊ သတင်းတွေစုရင်း အသာစီးရဖို့ အပြိုင်ကြိုးစားနေကြတယ်။ ဇာတ်လမ်းထဲမှာ အကြိမ်ကြိမ် စစ်ရှုံးထားတဲ့ ပါကစ္စတန်က တရုတ်နဲ့ပေါင်းပြီး စစ်ပွဲပြန်စဖို့ ပြင်ဆင်လာပါတယ်။ ပြည်တွင်းစစ်နဲ့ အလုပ်ရှုပ်နေမှာပဲလို့ လျှော့တွက်ထားတဲ့ အိန္ဒိယဘက်က ကျူးကျော်တိုက်ခိုက်တော့မယ့်သတင်း ရလာချိန်မှာ ကြိုတင်ပြင်ဆင်ဖို့ အချိန်သိပ်မကျန်တော့ဘူး။ အိန္ဒိယအတွက် ရွေးချယ်စရာနည်းလမ်းက တစ်ခုပဲ ကျန်နေပါတယ်။ ဒါပေမဲ့ အဲဒီနည်းလမ်းကလည်း အန္တရာယ်ကြီးလွန်းနေတယ်။ အချိန်အနည်းငယ်အတွင်း ဒီအခြေအနေကို ရင်ဆိုင်နိုင်ဖို့ ဘယ်လိုအစီအစဉ်တွေ ချမှတ်ပြီး နိုင်ငံရေးလှည့်ကွက်တွေကို ဘယ်လိုအသုံးချကြမလဲဆိုတာ ဆက်ပြထားပါတယ်။