သည်းထိတ်ရင်ဖိုကားများ

၁၉၇၁ ခုနှစ်မှာ ဒီဘီကူးပါးဆိုသူဟာ ငွေတွေယူပြီး လေထီးနဲ့ ခုန်ချသွားရာက အစအနပျောက်သွားခဲ့ပါတယ်။ အက်ဖ်ဘီအိုင်တောင် ရှာမတွေ့ခဲ့သလို သေသလား၊ ရှင်သလားဆိုတာလည်း မသိရတဲ့ အဖြစ်အပျက်ပါ။ ဒီရုပ်ရှင်ထဲက ငယ်သူငယ်ချင်းလေးယောက်ကတော့ အဲဒီအကြောင်းကို စိတ်ဝင်စားပြီး ကူးပါးခုန်ချခဲ့တဲ့နေရာကို လိုက်ရှာချင်ခဲ့ကြတယ်။ အသက်ကြီးလာတော့ တစ်ယောက်တစ်နေရာစီ ကိုယ့်အလုပ်နဲ့ကိုယ် ဖြစ်နေကြပါတယ်။ သူငယ်ချင်းတစ်ယောက် မတော်တဆမှုနဲ့ ဆုံးသွားတဲ့အခါမှ ကျန်သုံးယောက် ပြန်ဆုံဖြစ်ကြတယ်။ ဂျယ်ရီက ဘဝကို ငြီးငွေ့နေပြီး ချစ်သူနဲ့လည်း အဆင်မပြေဘူး။ ဒန်နိုက ဆရာဝန်ဖြစ်ပေမယ့် အလွန်ကြောက်တတ်၊ ရှက်တတ်ပြီး ချစ်သူမရှိသေးသူပါ။ တွန်မီကတော့ ဘဝကို ပရမ်းပတာ ဖြတ်သန်းနေတဲ့ လူဆိုးလူပေတစ်ယောက်ပေါ့။ သူငယ်ချင်းရဲ့ ဈာပနကို လာရင်း ငယ်ငယ်က နေခဲ့ကြတဲ့ သစ်ပင်အိမ်လေးထဲ ဝင်ကြည့်မိကြတယ်။ အဲဒီမှာ ဆုံးသွားတဲ့သူငယ်ချင်းက ကူးပါးနဲ့ သူ့ပိုက်ဆံတွေကို ရှာတွေ့နိုင်ဖို့ သဲလွန်စတွေ၊ မြေပုံတွေ စုထားတာ တွေ့သွားပါတယ်။ သူတို့အတူ ခရီးထွက်ကြဖို့ပါ စီစဉ်ထားခဲ့တာကို သိလိုက်ရတော့ ကျန်တဲ့သုံးယောက်က သူ့ဆန္ဒကို ဖြည့်ပေးဖို့ ဆုံးဖြတ်လိုက်ကြတယ်။ ဒီလိုနဲ့ ငယ်ဘဝက စိတ်ကူးခဲ့တဲ့ ပိုက်ဆံရှာခရီးကို ထွက်လာကြပြီး လမ်းတစ်လျှောက် အလွဲအချော်တွေ၊ ပေါက်ကရအဖြစ်တွေကြားမှာ စွန့်စားကြရပါတော့တယ်။

ဆာဂျင် နစ်ခေးရှာမာဟာ ကလင်းမ်ဆိုတဲ့ ကောင်လေးကို ကယ်တင်ဖို့ အမှုလိုက်ရင်း ခြေထောက်တစ်ဖက် ဆုံးရှုံးသွားပါတယ်။ ကောင်လေးကိုလည်း မကယ်လိုက်နိုင်ခဲ့ဘူး။ အဲဒီဖြစ်ရပ်နောက်မှာ သူ့ဘဝနဲ့ အလုပ်ဂုဏ်သိက္ခာပါ ထိခိုက်သွားပြီး အရက်ကို အားကိုးရင်း အရက်စွဲလာတယ်။ ကလင်းမ်သေဆုံးတာ သူ့ကြောင့်ဆိုတဲ့ အပြစ်တင်မှုတွေကလည်း ရှိနေပါတယ်။ အလုပ်ကလူတွေကြားမှာ သူပြောတဲ့စကားတွေ အရာမရောက်တော့သလို အရင်က မဖော်ထုတ်နိုင်ခဲ့တဲ့ အမှုကိုပါ ပြန်အစဖော်ပြီး ဝေဖန်ကြတယ်။ ကိုယ်ခန္ဓာရော စိတ်ရော ထိခိုက်နေရတဲ့အပြင် ဂုဏ်သိက္ခာပါ ဆုံးရှုံးထားတဲ့ နစ်ခေးတစ်ယောက် ဒီအခြေအနေကနေ ဘယ်လိုပြန်ရုန်းထမလဲ။ အတိတ်ကအမှုနဲ့ ကလင်းမ်ရဲ့အမှုတို့မှာလည်း အမှန်တရား ပေါ်လာဦးမလားဆိုတာကို ဆက်ပြထားပါတယ်။ နစ်ခေးရှာမာအဖြစ် Randeep Hooda သရုပ်ဆောင်ထားပြီး Sapna Pabbi နဲ့ Adil Hussain တို့လည်း ပါဝင်ထားပါတယ်။

၂၀၂၀ ခုနှစ်က Becky ရဲ့ အဆက်မှာ ဘက်ကီက မိဘမဲ့ဘဝနဲ့ နေထိုင်နေရပါပြီ။ အရင်ကားမှာ အဖေ့ကို သတ်သွားသူလေးယောက်ကို လက်စားချေခဲ့တဲ့သူ့ကို မွေးစားဖို့ လူတွေရှိပေမယ့် ဘက်ကီကတော့ ခွေးလေး ဒီယေးဂိုကို ခေါ်ပြီး တစ်အိမ်ပြီးတစ်အိမ်ကနေ ထွက်ပြေးနေတယ်။ တစ်နေ့မှာ အယ်လီနာဆိုတဲ့ အဘွားကြီးတစ်ယောက်က သူ့ကို လမ်းကြုံကားတင်ခေါ်ပေးရာကနေ ဘက်ကီနဲ့ ဒီယေးဂိုတို့ အယ်လီနာဆီမှာပဲ နေဖြစ်သွားကြပါတယ်။ ဒါပေမဲ့ ဘက်ကီကြောင့် အယ်လီနာ အသတ်ခံလိုက်ရတဲ့အခါ သူ့ရဲ့လက်စားချေမှုက ပြန်စလာတော့တယ်။ အသက် ၁၃ နှစ်တုန်းက ဘက်ကီနဲ့ အခု ၁၆ နှစ်အရွယ် ဘက်ကီတို့ ဘယ်လောက်ကွာခြားလာမလဲ၊ သစ္စာရှိတဲ့ ဒီယေးဂိုကရော ဒီတစ်ခေါက်မှာ သူ့ကို ဘယ်လိုကူညီပေးဦးမလဲဆိုတာ ဆက်ကြည့်ရမှာပါ။ ရက်စက်တဲ့ လူသတ်မှုတွေနဲ့ သွေးထွက်သံယိုအခန်းတွေ ပါဝင်တဲ့ အက်ရှင်ထိတ်လန့်သည်းဖိုကားဖြစ်ပါတယ်။

လူတွေကို ဖုတ်ကောင်အဖြစ် ပြောင်းလဲသွားစေတဲ့ ရောဂါပိုးတစ်မျိုး ပျံ့နှံ့လာပြီး ကမ္ဘာတစ်ဝန်း အခြေအနေတွေ အချိန်တိုအတွင်း ဆိုးရွားသွားပါတယ်။ ကူးစက်ခံရသူဟာ စက္ကန့်ပိုင်းအတွင်း ပြောင်းလဲသွားသလို ပိုးပြန့်ပွားနှုန်းကလည်း မြန်လွန်းတာကြောင့် လူထောင်ချီ၊ သိန်းချီကို အချိန်ခဏအတွင်း ကူးစက်နိုင်နေတယ်။ နိုင်ငံတစ်နိုင်ငံပြီးတစ်နိုင်ငံ လူတွေ မျိုးတုံးသွားနိုင်တဲ့အထိ အန္တရာယ်ကြီးလာပါတယ်။ ဒီလိုအခြေအနေမှာ Brad Pitt သရုပ်ဆောင်ထားတဲ့ ဇာတ်ကောင်နဲ့ သူ့အဖွဲ့ဟာ ရောဂါရဲ့ဇစ်မြစ်နဲ့ ပိုးအမျိုးအစားကို ဖော်ထုတ်နိုင်ဖို့ ကြိုးစားကြရတယ်။ ကာကွယ်ဆေး ထုတ်နိုင်မယ့်နည်းကိုလည်း ရှာဖွေရဦးမှာပါ။ Max Brooks ရဲ့ World War Z ဝတ္ထုကို အခြေခံထားပြီး ၂၀၁၃ ခုနှစ် ဇွန်လမှာ ရုံတင်ခဲ့တဲ့ ထိတ်လန့်သည်းဖိုရုပ်ရှင်ဖြစ်ပါတယ်။

အမ်မလာဟာ ၂၀၁၈ ခုနှစ် ရေဘေးတုန်းက အင်တိုက်အားတိုက် ကူညီခဲ့လို့ သူရဲကောင်းမလေးလို့တောင် ခေါ်ဝေါ်ခံရတဲ့ ဆရာဝန်တစ်ယောက်ပါ။ နေ့ဘက်မှာ အလုပ်တွေနဲ့ ပုံမှန်ဖြတ်သန်းနေပေမယ့် ည ၁၁ နာရီထိုးတာနဲ့ သူတစ်ယောက်တည်းသိတဲ့ ခြောက်လှန့်မှုကို ရင်ဆိုင်ရတယ်။ ဘယ်အချိန် ဘယ်နေရာက ရိုက်ထားမှန်းမသိတဲ့ သူ့ရဲ့ကိုယ်ခန္ဓာပုံတွေ၊ မသင့်တော်တဲ့ ရှုထောင့်ကနေ ရိုက်ထားတဲ့ဓာတ်ပုံတွေနဲ့ ရိုင်းစိုင်းတဲ့စာတွေ အဆက်မပြတ် ရောက်လာတာပါ။ ဒီလိုနှောင့်ယှက်စာတွေနဲ့ပဲ သူ့ညတွေကို ဖြတ်သန်းနေရပါတယ်။ တစ်ဖက်မှာလည်း သူ့လက်ပေါ်မှာ ကြီးပြင်းလာပြီး ဆရာဝန်ဖြစ်ဖို့ ကြိုးစားနေတဲ့ မိန်းကလေးတစ်ယောက် ရှိတယ်။ အဲဒီကောင်မလေးဟာ ပြည့်တန်ဆာလုပ်ငန်း နှိမ်နင်းရေးအတွက် ဖမ်းဆီးနေတဲ့ လူအုပ်ကြားမှာ ရောပါသွားပြီး အဖမ်းခံလိုက်ရပါတယ်။ အဲဒီကနေ သူ့နောက်ကြောင်းတွေကိုပါ ဖော်ထုတ်ခံရပြီး လူသိရှင်ကြား အရှက်ခွဲခံရတော့တယ်။ ဒီကိစ္စကို သတင်းထောက်သူငယ်ချင်းနဲ့ ပူးပေါင်းဖြေရှင်းရင်း မမျှော်လင့်ထားတဲ့ အဖြစ်တွေ ထပ်ပေါ်လာတဲ့အခါ ဘယ်လိုရင်ဆိုင်ဖြေရှင်းကြမလဲ။

လူတွေက teleportation နည်းပညာနဲ့ တစ်နေရာကနေ တစ်နေရာကို ကူးပြောင်းခရီးသွားနေကြတဲ့ စိတ်ကူးယဉ်အနာဂတ်ကာလမှာ ဒုက္ခသည်တွေလည်း အဲဒီနည်းပညာကိုသုံးပြီး ယူကေ၊ ယူအက်စ်လို နိုင်ငံတွေထဲ တရားမဝင် ဝင်ရောက်နေကြပါတယ်။ ယူကေကို ဇာတ်အိမ်တည်ထားတဲ့ ဒီသိပ္ပံစိတ်ကူးယဉ်သည်းထိတ်ရင်ဖိုကားထဲက အန်ယာနဲ့ အက်ကတရီနာတို့လည်း ကိုယ့်နိုင်ငံကနေ ယူကေကို ထွက်ပြေးဖို့ ကြိုးစားနေသူတွေပါ။ တစ်ညမှာ အန်ယာရဲ့အဖေက သူတို့နေတဲ့အိမ်ကို ရောက်လာပြီး အန်ယာကို ပြန်ခေါ်ဖို့ ကြိုးစားရင်း အသတ်ခံလိုက်ရတယ်။ အဲဒီနောက် သူတို့နှစ်ယောက်ဟာ teleportation နည်းပညာနဲ့ ယူကေကိုပို့ပေးတဲ့ ပွဲစားဆီ ချက်ချင်းသွားပြီး အကူအညီတောင်းကြရပါတယ်။ ပွဲစားဆီရောက်သွားရာက ဘာတွေကြုံရမလဲ၊ သူတို့နှစ်ယောက် ယူကေမှာ ဘေးကင်းကင်း နေနိုင်ကြပါ့မလား။

အလုပ်ပြုတ်ထားတဲ့ ကျောင်းဆရာ ပတ်ဒရိုဟာ သွေးကင်ဆာဖြစ်နေတဲ့ သမီးကို ဆေးကုသပေးရင်း ငွေကြေးတဖြည်းဖြည်း ကျပ်တည်းလာပါတယ်။ ဆရာဝန်ဆီကနေ သမီးရဲ့အသက်ရှင်နိုင်ခြေ မကောင်းတာကို သိလိုက်ရတဲ့အခါ သမီးရဲ့ နောက်ဆုံးဆန္ဒတွေကို ဖြည့်ပေးဖို့ ဆုံးဖြတ်လိုက်တယ်။ အဲဒီဆန္ဒတွေထဲကတစ်ခုက anime ထဲက အင်္ကျီတစ်ထည်ကို လိုချင်တာပါ။ ဒါပေမဲ့ အင်္ကျီက ဈေးကြီးလွန်းလို့ အသိမိတ်ဆွေတွေဆီ အကူအညီတောင်းကြည့်ပေမယ့် အဆင်မပြေခဲ့ဘူး။ ကြံရာမရတဲ့အဆုံး ရတနာဆိုင်တစ်ဆိုင်ကို ဖောက်ဖို့ကြိုးစားရင်း ဘာဘာရာနဲ့ မထင်မှတ်ဘဲ ဆုံမိသွားပါတယ်။ ဘာဘာရာဟာ သံသယကြီးတဲ့ ခင်ပွန်းရဲ့ ထိန်းချုပ်မှုအောက်မှာ နေနေရသူပါ။ သူ့ခင်ပွန်းက စိတ်ရောဂါဆရာဝန်ဖြစ်ပြီး ငွေကြေးပြည့်စုံသူလည်း ဖြစ်တယ်။ အဲဒီညမှာ ဘာဘာရာနဲ့ ပတ်ဒရိုတို့ အတူအိပ်ဖြစ်ကြပြီး ပတ်ဒရိုက အဲဒီအကြောင်းကို မှတ်တမ်းယူထားလိုက်ပါတယ်။ နောက်တော့ အဲဒီမှတ်တမ်းကိုသုံးပြီး ဘာဘာရာဆီက ငွေညှစ်ဖို့ ခြိမ်းခြောက်လာတယ်။

ကိုဗစ်ကာလမှာ သွားလာဆက်သွယ်မှုတွေ ပြတ်တောက်ပြီး လူတွေ သီးခြားနေကြရတဲ့အချိန်၊ ချစ်သူရဲ့ပစ်ပယ်တာကိုပါ ခံထားရတဲ့ မိန်းကလေးတစ်ယောက်ဟာ သူငယ်ချင်းရဲ့အကူအညီနဲ့ ရှေးဟောင်းစာကြည့်တိုက်တစ်ခုမှာ စာသွားဖတ်ဖို့ အခွင့်အရေးရလာပါတယ်။ အဲဒီမှာ သူဖတ်မိသွားတာက စာကြည့်တိုက်စတည်ကတည်းက ရှိနေခဲ့တဲ့ နှစ်တစ်ရာကျော်သက်တမ်းရှိ ‘မဟူရာ ပုံပြင်များ’ ဆိုတဲ့ စာအုပ်ပါ။ အဲဒီပုံပြင်တွေထဲမှာ ဘယ်လိုအဖြစ်အပျက်တွေ ပါနေသလဲ၊ အပြင်လောကနဲ့ ဘယ်လိုဆက်စပ်နေသလဲ၊ စာဖတ်နေတဲ့ သူနဲ့ရော ဘာပတ်သက်မှုရှိနေနိုင်သလဲဆိုတဲ့ မေးခွန်းတွေကနေ ဇာတ်လမ်းဆက်သွားပါတယ်။ ကိုဗစ်ကာလရဲ့ အိပ်မက်ဆိုးလို အတွေ့အကြုံတွေကို ဟာသအနည်းငယ်နဲ့ ရောစပ်တင်ဆက်ထားပြီး Kajal Aggarwal၊ Regiana Cassandra နဲ့ ဘာဘူတို့ ပါဝင်သရုပ်ဆောင်ထားပါတယ်။

ဒွန်နဲ့ ဗင့်စ်ဆိုတဲ့ မီးသတ်သမားနှစ်ယောက်ဟာ မီးလောင်နေတဲ့ တိုက်ခန်းတစ်ခုမှာ ကယ်ဆယ်ရေးလုပ်ရင်း သေခါနီးအဖိုးကြီးတစ်ယောက်ဆီက ရတနာမြေပုံတစ်ခု ရလာကြပါတယ်။ စုံစမ်းကြည့်တော့ အဲဒီအဖိုးကြီးဟာ လွန်ခဲ့တဲ့နှစ်ငါးဆယ်က ဘုရားကျောင်းတစ်ခုကို ဓားပြတိုက်ခဲ့သူဖြစ်ပြီး ဒေါ်လာသန်းချီတန်တဲ့ ရွှေထည်ပစ္စည်းတွေကို ဖွက်ထားခဲ့တာပါ။ ဒွန်နဲ့ ဗင့်စ်လည်း မြေပုံကို ယုံတစ်ဝက် မယုံတစ်ဝက်နဲ့ ရွှေတွေရှိတယ်ဆိုတဲ့ အဆောက်အဦးဟောင်းကြီးဆီ သွားကြတယ်။ သူတို့မသိတာက မူးယစ်ဆေးရောင်းတဲ့ လူမဲဂိုဏ်းတစ်ဂိုဏ်းဟာ ဂိုဏ်းထဲက သစ္စာဖောက်တစ်ယောက်ကို ရှင်းပစ်ဖို့ အဲဒီနေရာကိုပဲ ရွေးထားတာပါ။ ရွှေရှာဖို့လာတဲ့ မီးသတ်သမားနှစ်ယောက်က မမျှော်လင့်ဘဲ လူသတ်မှုရဲ့ မျက်မြင်သက်သေတွေ ဖြစ်သွားကြတယ်။ ဂိုဏ်းသားတွေကလည်း သူတို့ကို ဖော်ထုတ်နိုင်တဲ့ သက်သေနှစ်ယောက်ကို အပျောက်ရှင်းဖို့ ကြိုးစားလာတော့ ဒွန်နဲ့ ဗင့်စ်တို့ အဆောက်အဦးဟောင်းကြီးထဲမှာ အသက်ရှင်ဖို့ ရုန်းကန်ကြရပါတော့တယ်။

အီလိုင်တို့မိသားစုဟာ ကန်တက်ကီနယ်မြေက မြို့ငယ်လေးတစ်မြို့ကို ပြောင်းလာကြပါတယ်။ သူတို့နေမယ့်အိမ်ရှိတဲ့ ခြံကြီးက အမေရိကန်ပြည်တွင်းစစ်နဲ့ ပတ်သက်တဲ့ နောက်ခံရှိပြီး လူမည်းကျွန်များစွာ ကြိုးပေးခံခဲ့ရတဲ့ နေရာလည်း ဖြစ်နေတယ်။ အီလိုင်က အထီးကျန်တဲ့အခါတိုင်း တောထဲ သွားလေ့ရှိပါတယ်။ သူ့အနားမှာ မကြာခဏရှိနေတဲ့ အမန်ဒါဆိုတဲ့ မိန်းကလေးနဲ့လည်း ရင်းနှီးလာတယ်။ ဒါပေမယ့် အမန်ဒါရဲ့ နောက်ကြောင်းမှာ အီလိုင် မသိသေးတဲ့အဖြစ်တွေ ရှိနေပြီး အဲဒီအကြောင်းတွေကို သိလာတဲ့အခါ ဘာတွေ ဆက်ဖြစ်လာမလဲဆိုတဲ့ လျှို့ဝှက်ဆန်းကြယ် ထိတ်လန့်ဇာတ်လမ်းပါ။

ကမ္ဘာတစ်ဝန်း ဗိုင်းရပ်စ်ကပ်ရောဂါ ပျံ့နှံ့လာပြီး လူဦးရေလည်း လျော့နည်းသွားပါတယ်။ လူချင်းထိတွေ့တာနဲ့ ကူးစက်ပြီး အချိန်တိုအတွင်း အသက်ဆုံးရှုံးစေတဲ့ ရောဂါမို့ တစ်ယောက်နဲ့တစ်ယောက် ထိတွေ့ခွင့်လည်း မရှိတော့ဘူး။ ဒီရောဂါကို ခုခံနိုင်သူကတော့ ဒေးဗစ်ဆိုတဲ့ လူတစ်ယောက်တည်း ရှိပါတယ်။ အစိုးရအဖွဲ့က ဒေးဗစ်ကို လူသူကင်းတဲ့ အိမ်ကြီးတစ်လုံးမှာ သီးသန့်ထားပြီး နေ့စဉ် သွေးဖောက်ထုတ်ခိုင်းတယ်။ ဇနီးဖြစ်သူ ဆမ်ကလည်း ဒီစမ်းသပ်မှုမှာ အလုပ်လုပ်နေတာကြောင့် ဒေးဗစ်က ယုံယုံကြည်ကြည်နဲ့ သွေးပေးနေခဲ့ပါတယ်။ ဒါပေမယ့် လက်တွေ့အခြေအနေက သူထင်ထားသလို မဟုတ်ကြောင်း သိလာတဲ့အခါ ဒေးဗစ်တစ်ယောက် ဘာတွေ ဆက်ရင်ဆိုင်ရမလဲ။

ဒေါက်တာ Alex Cross ဟာ စိတ်ပညာရှင်တစ်ယောက်ဖြစ်သလို ရဲစုံထောက်တစ်ယောက်လည်း ဖြစ်ပါတယ်။ ကိုယ်ဝန်ရှိနေတဲ့ ဇနီး မာရီယာနဲ့အတူ ဒီထရွိုက်မြို့မှာ နေထိုင်နေတဲ့သူ့ကို အက်ဖ်ဘီအိုင်က ဝါရှင်တန်ဒီစီ ဌာနချုပ်မှာ တာဝန်ထမ်းဆောင်ဖို့ ကမ်းလှမ်းလာတယ်။ ဒီကမ်းလှမ်းချက်ကို လက်ခံသင့်မသင့် စဉ်းစားနေတုန်း လူချမ်းသာအမျိုးသမီးတစ်ဦး နှိပ်စက်သတ်ဖြတ်ခံရတဲ့အမှု ပေါ်လာပါတယ်။ လူသတ်သမားက အမျိုးသမီးကိုသာမက သက်တော်စောင့်တွေကိုပါ တစ်ယောက်တည်း သတ်ဖြတ်သွားပြီး အခင်းဖြစ်ရာနေရာမှာ ပန်းချီတစ်ပုံ ရေးဆွဲချန်ထားခဲ့တယ်။ ဒီလူဟာ နောက်ထပ် ကွင်းဆက်လူသတ်မှုတွေ ကျူးလွန်ဖို့ ရှိနေကြောင်း Alex သိလာတဲ့အခါ နှစ်ယောက်ကြား အားပြိုင်မှု စတင်လာပါတယ်။ လူသတ်သမားက သူ့မိသားစုကိုပါ ထိပါးဖို့ ကြိုးစားလာတော့ Alex အနေနဲ့ ဘယ်လိုတုံ့ပြန်မလဲ၊ စနစ်တကျ လေ့ကျင့်ထားတဲ့ ဒီလူကို ရင်ဆိုင်နိုင်ပါ့မလား။ ဂျိမ်းစ်ပီတာဆင်ရဲ့ Cross ဝတ္ထုတွေကို အခြေခံရိုက်ကူးထားတဲ့ အက်ရှင်သည်းထိတ်ရင်ဖိုဇာတ်ကားဖြစ်ပြီး Alex Cross ဇာတ်ကောင်ကို Morgan Freeman ကလည်း သရုပ်ဆောင်ဖူးပါတယ်။

ကီးလ်နဲ့ ဟာလီတို့ဟာ အွန်လိုင်းမှာ ဆုံတွေ့ပြီး ချစ်သူတွေ ဖြစ်လာကြပါတယ်။ တစ်ရက်မှာ ဟာလီက ကီးလ်ဆီ လာတွေ့ရင်း မကောင်းသတင်းတွေ ထွက်နေတဲ့ သူ့မိသားစုစံအိမ်ကို လိုက်လာခဲ့တယ်။ အဲဒီစံအိမ်မှာ ကီးလ်ရဲ့ မိဘနှစ်ပါးစလုံး ကိုယ့်ကိုယ်ကို သေကြောင်းကြံခဲ့ကြပြီး အိမ်ဝန်းထဲမှာပဲ မြှုပ်နှံထားတယ်လို့ ဆိုကြပါတယ်။ ရောက်ပြီး နောက်တစ်နေ့မှာ ဟာလီဟာ ဝုန်းခနဲ အသံကျယ်ကြီးတစ်ခု ကြားလိုက်ရပြီး ကီးလ်ကို သွေးအိုင်ထဲမှာ လဲကျသေဆုံးနေတာ တွေ့လိုက်ရတယ်။ အကူအညီတောင်းဖို့ ၉၁၁ ကို ဖုန်းဆက်လိုက်ချိန်မှာပဲ ဂိမ်းစပြီဆိုတဲ့ အသံ ထွက်လာပါတယ်။ မျက်နှာဖုံးစွပ်ထားတဲ့ လူတွေလည်း ရောက်လာပြီး သူ့ကို သတ်ဖို့ လိုက်ကြတော့တယ်။ အနိုင်ရသူတစ်ယောက်ပဲ အသက်ရှင်ခွင့်ရမယ့် ဒီဂိမ်းကနေ ဟာလီ လွတ်မြောက်နိုင်ပါ့မလား။

ဂျင်ဟာ အိမ်စောင့်အလုပ်လုပ်တဲ့ အသက်ကြီးကြီး အမျိုးသမီးတစ်ယောက်ပါ။ တစ်နေ့မှာ စတန်းဒစ်ကေ့လင်မယားရဲ့ ဝေါဒန်အိမ်ကြီးကို စောင့်ရှောက်ဖို့ အလုပ်ရလာပါတယ်။ လှပတဲ့အိမ်ကြီးနဲ့ ကျယ်ဝန်းတဲ့ခြံထဲမှာ နေရင်း ဂျင်က အဲဒီနေရာကို ကိုယ့်အိမ်လို သဘောထားလာပြီး သူ့စိတ်ကြိုက် စီမံနေထိုင်လာတယ်။ တစ်ရက်တော့ မိုက်ကယ်နဲ့ စတပ်ဖ်ဆိုတဲ့ စုံတွဲ အိမ်ကိုရောက်လာပါတယ်။ စတပ်ဖ်က ကိုယ်ဝန်သည်ဖြစ်ပြီး ဂျင်နဲ့ မိုက်ကယ် စကားပြောနေတုန်းမှာပဲ ကလေးမွေးဖို့ ဖြစ်လာလို့ ဂျင်က မွေးပေးခဲ့ရတယ်။ စုံတွဲနှစ်ယောက်နဲ့ ကိုယ်တိုင်မွေးပေးခဲ့တဲ့ ကလေးကို သံယောဇဉ်တွယ်သွားတဲ့ ဂျင်ဟာ သူတို့ကို အိမ်ကြီးမှာပဲ နေဖို့ ပြောလိုက်ပါတယ်။ အဲဒီနောက် ဝေါဒန်အိမ်ကြီးမှာ နေထိုင်ကြတဲ့ သူတို့လေးယောက်ရဲ့ဘဝမှာ ပြဿနာတွေ စလာတော့တယ်။ ၂၀၀၇ ခုနှစ်ထွက် ဒရာမာနဲ့ သည်းထိတ်ရင်ဖိုရုပ်ရှင်ဖြစ်ပြီး စာရေးဆရာ Morag Joss ရဲ့ CWA Silver Dagger ဆုရ Half Broken Things စာအုပ်ကို ပြန်လည်ရိုက်ကူးထားတာပါ။

သားဖွားဆရာမအမေ၊ အရက်သမားအဖေနဲ့ အရာရာကို အဆိုးမြင်တတ်တဲ့ သမီးတို့ နေထိုင်တဲ့အိမ်ကို လူတစ်ယောက် ရောက်လာပါတယ်။ သူယူလာတဲ့စကားက ကြွယ်ဝခြင်းနတ်ဘုရားက သူတို့ဆီ ကြွယ်ဝမှုတွေ ပို့လိုက်ပြီဆိုတာပါ။ အဲဒီစကားအဆုံးမှာပဲ ငွေထုပ်ပိုက်ထားတဲ့ လူတစ်ယောက် တကယ်ရောက်လာတဲ့အခါ မိသားစုရဲ့ အခြေအနေတွေ ပြောင်းလဲလာတော့တယ်။ လိုချင်တာကို များများနဲ့ မြန်မြန်ရဖို့ အဆင်အခြင်မဲ့ လုပ်မိရင် ရှိပြီးသားပါ ဆုံးရှုံးရနိုင်တယ်ဆိုတဲ့ ပုံပြင်သင်ခန်းစာမျိုးကို အခြေခံထားပါတယ်။ လက်ရှိဖြစ်ရပ်တွေ၊ ပုံပြင်နဲ့ ဘာသာရေးအယူအဆတွေကို လျှို့ဝှက်ဆန်းကြယ်တဲ့ ဇာတ်လမ်းအဖြစ် ချိတ်ဆက်ထားပြီး မထင်မှတ်တဲ့ ဇာတ်ကွက်အလှည့်အပြောင်းတွေလည်း ပါဝင်ပါတယ်။

ငယ်စဉ်ကတည်းက နှစ်ပေါင်းများစွာ ပြုစုစောင့်ရှောက်ပေးခဲ့တဲ့ မိခင်ဟာ မတော်တဆမှုတစ်ခုကြောင့် အိပ်ရာထဲ လဲသွားပါတယ်။ နည်းမျိုးစုံနဲ့ ကုသပေမယ့်လည်း နလန်မထူလာဘူး။ အဲဒီအချိန်မှာ ဘုန်းတော်ကြီးတစ်ပါး ရောက်လာပြီး ဗီဂျေးကို သူတောင်းစားစစ်စစ်တစ်ယောက်လို ၄၈ ရက် နေထိုင်နိုင်ရင် မိခင် ပြန်နေကောင်းလာမယ်လို့ ပြောပါတယ်။ စီးပွားရေးကိစ္စတွေ အကုန်ထားခဲ့ပြီး သူတောင်းစားဘဝနဲ့ ၄၈ ရက် နေနိုင်ပါ့မလား။ နေနိုင်ခဲ့ရင်ရော ဘုန်းတော်ကြီးပြောသလို အမေက တကယ်ပြန်နေကောင်းလာမှာလား။ မိခင်ရဲ့ ကျေးဇူးနဲ့ သားဖြစ်သူရဲ့ သိတတ်မှုကို အခြေခံထားတဲ့ ဒီဇာတ်လမ်းမှာ သူတောင်းစားဘဝအတွက် လိုအပ်တဲ့ အသိပညာနဲ့ ဆောင်ရန်၊ ရှောင်ရန်တွေကိုလည်း ထည့်သွင်းထားပါတယ်။ “သူတောင်းစား” လို့ အဓိပ္ပာယ်ရတဲ့ Pichaikkaran ဟာ ၂၀၁၆ ခုနှစ်ထွက် ဇာတ်ကားဖြစ်ပြီး ၂၀၂၃ ခုနှစ်ထွက် Pichaikkaran 2 ရဲ့ ရှေ့ကကားပါ။ နှစ်ကားစလုံးမှာ ဗီဂျေး ပါဝင်သရုပ်ဆောင်ထားပေမယ့် ဇာတ်လမ်းချင်း ဆက်စပ်မှုမရှိပါဘူး။ ရုံတင်ချိန်မှာ ဝင်ငွေ ၄၂ ကုဋေကျော် ရရှိခဲ့ပါတယ်။

ဖုန်းကို အိတ်ထဲထည့်ထားရင်း မသိလိုက်ဘဲ တခြားသူဆီ ဖုန်းခေါ်မိသွားတာကို pocket dial လို့ ခေါ်ကြပါတယ်။ စတေစီဆိုတဲ့ အမျိုးသမီးတစ်ယောက်ကတော့ ခင်ပွန်းရဲ့ဖုန်းကနေ အဲဒီလို မတော်တဆ ဝင်လာတဲ့ ဖုန်းကို ကိုင်မိရာက လူသတ်မှုတစ်ခုကို မထင်မှတ်ဘဲ ကြားလိုက်ရပါတယ်။ သူကြားလိုက်ရတဲ့ လူသတ်မှုဟာ ခင်ပွန်းနဲ့ ဘယ်လိုပတ်သက်နေမလဲ၊ အမှန်တရားကို သူတို့ ဘယ်လိုဖော်ထုတ်ကြမလဲဆိုတာကို လိုက်ပြထားတဲ့ မှုခင်းနဲ့ လျှို့ဝှက်ဆန်းကြယ် သည်းထိတ်ရင်ဖိုဇာတ်ကားပါ။

အောင်မြင်ပြီး အလွန်ချမ်းသာတဲ့ စီးပွားရေးသမား Robert ဟာ အပြင်ကကြည့်ရင် အိမ်ထောင်ရှင်ကောင်း၊ ခင်ပွန်းကောင်းတစ်ယောက်လိုပါပဲ။ တကယ်တော့ ဇနီးကို ချစ်ဟန်ဆောင်နေပြီး နောက်ကွယ်မှာ မိန်းကလေးတွေနဲ့ တစ်ယောက်ပြီးတစ်ယောက် တွဲနေသူပါ။ ဒါ့အပြင် မိသားစုကို ဖုံးကွယ်ထားတဲ့ လျှို့ဝှက်ချက်တစ်ခုလည်း ရှိနေသေးတယ်။ အဲဒီလျှို့ဝှက်ချက် မပေါက်ကြားခင် ကုမ္ပဏီကို ရောင်းပစ်ဖို့ Robert ကြိုးစားနေပါတယ်။ အဲဒီအချိန်မှာပဲ ချစ်သူမိန်းကလေးနဲ့ ကားပတ်စီးရင်း မတော်တဆမှုဖြစ်ပြီး မိန်းကလေး သေဆုံးသွားတယ်။ ပြဿနာတွေ တစ်ခုပြီးတစ်ခု ဆုံလာတဲ့အခါ Robert ဘယ်လိုဖြေရှင်းဖို့ ကြိုးစားမလဲဆိုတာကို ဆက်ပြထားပါတယ်။ Pretty Woman ထဲက မင်းသား Richard Gere ပါဝင်သရုပ်ဆောင်ထားတဲ့ ဒရာမာနဲ့ သည်းထိတ်ရင်ဖိုဇာတ်ကားပါ။

Jill ဟာ လွန်ခဲ့တဲ့ နှစ်နှစ်လောက်က ပြန်ပေးဆွဲခံခဲ့ရတဲ့ အတွေ့အကြုံကြောင့် စိတ်ဒဏ်ရာရနေသူပါ။ သူဘယ်လိုပဲ ပြောပြပေမယ့် ရဲတွေကတော့ သူ့စကားကို မယုံကြဘူး။ တစ်နေ့မှာ ညီမလေး Molly ပျောက်သွားတဲ့အခါ ရဲတွေဆီက အကူအညီတောင်းလို့ မရတာကြောင့် ကိုယ်တိုင်လိုက်ရှာဖို့ ဆုံးဖြတ်လိုက်ပါတယ်။ Molly ကို သူသံသယရှိနေသူက တကယ်ပဲ ဖမ်းသွားတာလားဆိုတာ မသေချာသေးသလို ညီမကို ပြန်ရှာတွေ့နိုင်မလားဆိုတာလည်း ရှိနေတယ်။ Amanda Seyfried က Jill အဖြစ် ပါဝင်သရုပ်ဆောင်ထားတဲ့ အက်ရှင်နဲ့ လျှို့ဝှက်ဆန်းကြယ်မှု ရောစပ်ထားတဲ့ သည်းထိတ်ရင်ဖိုဇာတ်ကားပါ။

ဂရေ့စ်ဝုဒ်ဥယျာဉ်ကြီးမှာ အလုပ်လုပ်နေတဲ့ ဥယျာဉ်မှူးတစ်ယောက်ဟာ လူတွေနဲ့ သိပ်မရောနှောဘဲ ကိုယ့်အတွေးနဲ့ကိုယ် နေ့စဉ်ဘဝကို ဖြတ်သန်းနေပါတယ်။ လက်ရှိမှာ သာမန်ဥယျာဉ်မှူးတစ်ယောက်လို နေနေပေမယ့် သူ့မှာ အတိတ်က စိတ်ဒဏ်ရာတွေ၊ အိပ်မက်ဆိုးတွေနဲ့ နောင်တတွေ ကျန်နေသေးတယ်။ တစ်နေ့မှာတော့ ဥယျာဉ်ပိုင်ရှင် နော်မာရဲ့ မြေးတူမ မာယာက အလုပ်သင်အဖြစ် ရောက်လာပါတယ်။ မာယာနဲ့အတူ ပြဿနာတွေပါ ပါလာတဲ့အခါ ဒီဥယျာဉ်မှူး ဘယ်လိုတုံ့ပြန်မလဲဆိုတာ စိတ်ဝင်စားစရာ ဖြစ်လာတယ်။ ဂျိုဝယ်အက်ဂျာတန် သရုပ်ဆောင်ထားတဲ့ ဒီဇာတ်ကောင်ရဲ့ နေ့စဉ်ဘဝထဲမှာ ပန်းစိုက်ပျိုးတာနဲ့ ပန်းတွေအကြောင်း ဂျာနယ်မှာ ရေးမှတ်တာတွေ ရှိပါတယ်။ သူရေးထားတဲ့ ပန်းအကြောင်းတွေကို နားထောင်ရသလို ဥယျာဉ်ထဲက ပန်းပင်တွေနဲ့ ပန်းစိုက်နေတဲ့ မြင်ကွင်းတွေကိုလည်း တွေ့ရတယ်။ အတိတ်ရဲ့ဒဏ်ရာတွေ ပါဝင်နေတဲ့ ဒရာမာနဲ့ သည်းထိတ်ရင်ဖိုဇာတ်လမ်းကြားမှာ ပန်းတွေရဲ့အလှကို တွဲဖက်ရိုက်ပြထားတာပါ။ ဒီဇာတ်ကားကို ရိုက်ကူးသူက Taxi Driver ရဲ့ ဇာတ်ညွှန်းရေးဆရာ Paul Schrader ဖြစ်ပါတယ်။ လူ့အဖွဲ့အစည်းနဲ့ မအပ်စပ်သလို နေထိုင်ရင်း ကိုယ့်အတွေးတွေထဲမှာပဲ လည်ပတ်နေတဲ့ အထီးကျန်ဇာတ်ကောင်မျိုးကို အခြေခံထားတာက Taxi Driver ထဲက “God's Lonely Man” ဆိုတဲ့ အယူအဆနဲ့ ဆင်တူပါတယ်။ Paul Schrader ဟာ Mishima၊ Blue Collar နဲ့ First Reformed တို့ကိုလည်း ဒါရိုက်တာအဖြစ် ရိုက်ကူးခဲ့သူပါ။ ၂၀၂၂ ခုနှစ်ထွက် ဒီရုပ်ရှင်ဟာ ဗယ်လာဒိုလစ်ရုပ်ရှင်ပွဲတော်မှ

အိုင်းရစ်ဟာ ငွေရေးကြေးရေးအခက်အခဲတွေကြားကနေ နာမကျန်းဖြစ်နေတဲ့ မောင်လေးကို တစ်ယောက်တည်း ပြုစုစောင့်ရှောက်နေရသူပါ။ မောင်လေးအတွက် ရိုးတွင်းခြင်ဆီအစားထိုးကုသဖို့ ငွေလိုနေချိန်မှာ လန်ဘရစ်ခ်ဖောင်ဒေးရှင်းက ကူညီပေးနိုင်တယ်ဆိုပြီး ညစာစားပွဲတစ်ခုကို ဖိတ်ခေါ်လာပါတယ်။ ညစာစားပွဲကို ရောက်တော့ သူ့လိုပဲ ငွေကြေးအကျပ်အတည်းကြုံနေရတဲ့ နောက်ထပ်လူခုနစ်ယောက်ကို တွေ့ရတယ်။ အဲဒီမှာ လိုအပ်တဲ့ငွေကြေးအထောက်အပံ့ကို ရဖို့ ရက်စက်တဲ့ကစားပွဲတွေကို ဆက်တိုက်ကစားရမှာဖြစ်ပြီး နောက်ဆုံး အသက်ရှင်ကျန်သူတစ်ယောက်တည်းသာ ရနိုင်မယ်ဆိုတာ သိလိုက်ရပါတယ်။ ကလေးတွေကစားကြတဲ့ ရွေးချယ်စရာနှစ်ခုထဲက တစ်ခုကိုရွေးရတဲ့ “မင်းသာဆိုရင် ဘာလုပ်မလဲ” ကစားနည်းကို ဒီမှာတော့ လူတွေကို ဘေးကျပ်နံကျပ်ရောက်အောင် ဖန်တီးတဲ့ပုံစံနဲ့ အသုံးပြုထားတယ်။ အသက်ရှင်ဖို့ ရွေးချယ်ကြရတဲ့အခါ ကိုယ်ကျင့်တရား၊ သစ္စာဖောက်မှုနဲ့ တစ်ကိုယ်ကောင်းဆန်မှုတို့ ပေါ်လာကြပါတယ်။ ဘယ်သူက ကိုယ့်သိက္ခာကို စောင့်ထိန်းပြီး အနစ်နာခံမလဲ၊ ဘယ်သူက သူတစ်ပါးကို ချနင်းမလဲ၊ နောက်ဆုံးမှာ ဘယ်သူ အသက်ရှင်ကျန်မလဲဆိုတာကို ဆက်ကြည့်ရမှာပါ။

အက်ဘီဟာ ရာဇဝတ်မှုတွေကို စိစစ်ပြီး အကျဉ်းသားတွေကို စစ်မေးရတဲ့ စီအိုင်အေအေးဂျင့်တစ်ယောက်ပါ။ လျှို့ဝှက်အကျဉ်းထောင်တစ်ခုမှာ တာဝန်ထမ်းဆောင်ရင်း အရပ်သားဆေးရုံတစ်ရုံကို ဗုံးခွဲတိုက်ခိုက်ခဲ့တဲ့အမှုကို စုံစမ်းနေပါတယ်။ အဲဒီပေါက်ကွဲမှုမှာ သူ့ခင်ပွန်းနဲ့ သမီးလည်း သေဆုံးခဲ့တာပါ။ အမှုကို လိုက်ရင်း ပုဆိန်လို့ နာမည်ဝှက်ပေးထားတဲ့ အကြမ်းဖက်သမားတစ်ယောက်နဲ့ ဆက်နွယ်နေကြောင်း အက်ဘီ သိလာရတယ်။ ဒီလူဟာ လူသတ်တာနဲ့ ခြေရာဖျောက်တာမှာ ကျွမ်းကျင်ပြီး ဓားကို ပိုင်ပိုင်နိုင်နိုင် သုံးတတ်သူပါ။ သားကောင်တွေကို ဘယ်သူဘယ်ဝါမှန်း မသိနိုင်အောင် မျက်နှာအရေခွံ ခွာပစ်တတ်တယ်လို့လည်း ဆိုကြပါတယ်။ ဒါပေမယ့် သူဘယ်သူလဲဆိုတာ မသိကြသလို သူ့ကို မြင်ဖူးသူလည်း မရှိပါဘူး။ တစ်နေ့မှာတော့ အထူးရဲတပ်ဖွဲ့က ပုဆိန်ကို ဖမ်းမိပြီး စစ်ဆေးမေးမြန်းဖို့ အက်ဘီရှိတဲ့ အကျဉ်းထောင်ဆီ လွှဲပေးလာပါတယ်။ ခြေရာဖျောက်နိုင်စွမ်းရှိတဲ့ ဒီလူ အဖမ်းခံလာရတဲ့နောက်မှာ ဘယ်လိုရည်ရွယ်ချက် ရှိနေသလဲ။ အကျဉ်းထောင်အရာရှိတွေနဲ့ သူ့ကြား အပြန်အလှန် တိုက်ခိုက်ရင်း စီအိုင်အေအေးဂျင့်တွေကြားက လှည့်ကွက်တွေကို ဆက်ဖော်ပြသွားတဲ့ အက်ရှင်သည်းဖိုကားပါ။

ဘန်နဲ့ သူ့ဇနီး ဂျူးလ်တို့ဟာ မမျှော်လင့်ဘဲ ကမ်းရိုးတန်းဒေသက အပန်းဖြေအိမ်ကြီးတစ်အိမ်ကို အမွေဆက်ခံဖို့ ဖြစ်လာပါတယ်။ နှစ်လေးဆယ်လောက် လူမနေခဲ့တဲ့အိမ်ကို မိသားစုလိုက် သွားကြည့်တဲ့အခါ အိမ်က အိုဟောင်းနေပေမယ့် ပတ်ဝန်းကျင်မှာတော့ လှပတဲ့ကမ်းခြေနဲ့ သဘာဝရှုခင်းတွေကို တွေ့ကြရတယ်။ ခြံဝန်းထဲမှာလည်း မြေအောက်စမ်းရေနဲ့ ဆက်ထားတဲ့ ရေလှောင်ကန်ကြီးတစ်ခု ရှိနေပါတယ်။ ဒါပေမယ့် ဘန်ရဲ့အမေက ဒီအိမ်ရှိတဲ့အကြောင်းကို ဆုံးပါးသွားတဲ့အထိ လျှို့ဝှက်ထားခဲ့တာပါ။ အမေက ဘာကြောင့် မပြောပြခဲ့တာလဲ၊ အိမ်ကြီးထဲမှာရော ဘယ်လိုလျှို့ဝှက်ချက်တွေ ရှိနေမလဲဆိုတဲ့ မေးခွန်းတွေနဲ့အတူ ဇာတ်လမ်းကို ဆက်ထားတဲ့ ထိတ်လန့်သည်းဖိုကားပါ။

အယ်လီနာဟာ သူငယ်ချင်းတွေနဲ့အတူ ပါတီတစ်ခုကို သွားခဲ့ရာက လူအစုလိုက်အပြုံလိုက် သတ်ဖြတ်ခံရတဲ့အဖြစ်နဲ့ ကြုံလိုက်ရပါတယ်။ အဲဒီနေရာကနေ ထွက်ပြေးဖို့ ကြိုးစားပေမယ့် The Collector ရဲ့ ဖမ်းဆီးတာကို ခံလိုက်ရတယ်။ အာကင်ကတော့ The Collector ဆီကနေ လွတ်မြောက်လာခဲ့သူပါ။ တစ်နေ့မှာ အယ်လီနာရဲ့အဖေက သူ့လက်ထောက်ကို အာကင်ဆီ လွှတ်ပြီး သမီးကို ကူရှာပေးဖို့ တောင်းဆိုလာပါတယ်။ လွတ်လာခဲ့တဲ့ အာကင်တစ်ယောက် အယ်လီနာကို ဘယ်လိုကယ်ထုတ်မလဲဆိုတာ ဆက်ပြထားတဲ့ ထိတ်လန့်သည်းဖိုဇာတ်ကားပါ။ ၂၀၁၂ ခုနှစ်ထွက် ဒီကားဟာ ၂၀၀၉ ခုနှစ်က The Collector ရဲ့ အဆက်လို့လည်း ဆိုနိုင်ပါတယ်။