အက်ရှင်ကားများ

စုန့်လျောင်ခေတ်မှာ လျှို့ဝှက်အဖွဲ့တစ်ခုဖြစ်တဲ့ ဖုန့်ဟော်တပ်က ထန်ကျီယန်းကို မြို့တော်ဟွမ်ချိန်စီးဆီ သူလျှိုအဖြစ် စေလွှတ်ထားပါတယ်။ ဒါပေမယ့် ထန်ကျီယန်းက ခင်ပွန်းကျိုးချန်အန်းနဲ့အတူ အေးအေးချမ်းချမ်း နေထိုင်ဖို့ ဆုံးဖြတ်လိုက်တဲ့အခါ ဖုန့်ဟော်တပ်က သူ့ခင်ပွန်းကို ဖမ်းဆီးလိုက်တယ်။ ခင်ပွန်းကို ဖမ်းထားပြီး ခြိမ်းခြောက်ကာ မြောက်ပိုင်းက သံတမန်တစ်ယောက်ကို သတ်ဖို့ တာဝန်အသစ် ပေးလာပါတယ်။ တာဝန်ထမ်းဆောင်နေစဉ်မှာပဲ ဖုန့်ဟော်တပ်က သူ့ရှေ့မှာ ခင်ပွန်းကို သတ်လိုက်တဲ့အတွက် ထန်ကျီယန်းဟာ အဲဒီအဖွဲ့ကို ချေမှုန်းဖို့ ဆုံးဖြတ်လိုက်တယ်။ တစ်ချိန်က ကိုယ်တာဝန်ထမ်းဆောင်ခဲ့တဲ့ လျှို့ဝှက်အဖွဲ့တစ်ခုလုံးကို ပြန်ရင်ဆိုင်ရတော့မယ့် သူ့ရှေ့မှာ ဘယ်လိုအန္တရာယ်တွေ စောင့်နေမလဲ၊ အဲဒါတွေကို ဘယ်လိုကျော်ဖြတ်မလဲဆိုတာ ဆက်ပြထားတဲ့ သိုင်းအက်ရှင်ဇာတ်ကားပါ။

ဒုတိယကမ္ဘာစစ် ပြီးခါနီးကာလမှာ ဇာတ်လမ်းစထားပါတယ်။ စစ်ရှုံးတော့မယ့်အခြေအနေကို မြင်လာတဲ့ ဟစ်တလာက နိုင်ငံထဲက လူငယ်တွေကို ပြည်သူ့စစ်အဖွဲ့တွေ ဖွဲ့ခိုင်းပြီး ကျူးကျော်လာသူတွေကို တတ်နိုင်သလောက် တိုက်ထုတ်ဖို့ အမိန့်ပေးထားတယ်။ နောက်ဆုံးမျှော်လင့်ချက်အဖြစ် နျူကလီးယားဗုံး တီထွင်ဖို့လည်း သိပ္ပံပညာရှင်တစ်ယောက်ကို ဖမ်းဆီးထားပါတယ်။ အဲဒီသိပ္ပံပညာရှင်ကို ကယ်ထုတ်ဖို့ စနိုက်ပါတစ်ယောက်၊ စစ်သူရဲကောင်းတစ်ယောက်၊ သိပ္ပံကျောင်းသားတစ်ယောက်နဲ့ ဗိုလ်ကြီးတစ်ယောက်တို့ ထွက်လာကြတယ်။ အသက်စွန့်ရနိုင်တဲ့ ကယ်ဆယ်ရေးတာဝန်ကို ထမ်းဆောင်ရမယ့်အထဲမှာ စစ်သူရဲကောင်းက အိမ်လွမ်းဝေဒနာ ခံစားနေရပြီး တွေ့သမျှ လူသေတွေကို သူ့သမီးအဖြစ် မြင်ယောင်နေပါတယ်။

ချန်ဒူးဟာ တက်တက်ကြွကြွနဲ့ ကြိုးစားနေတဲ့ လူငယ်တစ်ယောက်ပါ။ သူ့ကြိုးစားမှုကြောင့် ဘဝအခြေတည်နိုင်မယ့် အခွင့်အရေးတစ်ခု ရလာသလို အချစ်ရေးမှာလည်း ယောက္ခမလောင်းနဲ့ တွေ့ရတော့မှာမို့ ပျော်နေပါတယ်။ အဲဒီပျော်ရွှင်မှုနဲ့ အရက်သောက်ပြီး အိမ်ပြန်လာချိန်မှာ ရဲစစ်ဆေးခံရမှာစိုးလို့ အရှိန်တင်မောင်းရာက လမ်းဘေးပလက်ဖောင်းနဲ့ ခေါင်းထိမိသွားတယ်။ ဒဏ်ရာတော့ မရခဲ့ပေမယ့် သူ့ဘဝအတွက် အရေးကြီးတဲ့ နောက်တစ်နေ့မနက်မှာ ထူးဆန်းတဲ့ပြဿနာတစ်ခု ပေါ်လာပါတယ်။ သူများပြောသမျှကို ချန်ဒူး နားလည်နေသေးပေမယ့် သူပြောတဲ့စကားတွေကိုတော့ ဘယ်သူမှ နားမလည်တော့ဘူး။ အကြိမ်ကြိမ် ရှင်းပြဖို့ ကြိုးစားလေလေ၊ ပိုရှုပ်လေလေ ဖြစ်နေပြီး စာချရေးပြဖို့တောင် မရေးတတ်တော့ပါဘူး။ ဒီအဖြစ်ကြောင့် ရလာတဲ့အခွင့်အရေးကို ဆုံးရှုံးသွားပြီး ချစ်ရသူကိုပါ ဆုံးရှုံးရတော့မလို ဖြစ်လာပါတယ်။ ကိုယ့်မှာ ဘာဖြစ်နေတာလဲဆိုတာလည်း မသိ၊ တခြားသူကိုလည်း နားလည်အောင် မရှင်းပြနိုင်တဲ့ ချန်ဒူးရဲ့ပြဿနာကို သိပ္ပံပညာနဲ့ လူတွေရဲ့ယုံကြည်မှုတွေ ဘယ်လိုပေါင်းစည်းပြီး ဖြေရှင်းကြမှာလဲ။

ဂျပန်အန်နီမေးရှင်းစီးရီး Blood C ကို လူသရုပ်ဆောင်တွေနဲ့ ပြန်လည်ဖန်တီးထားတဲ့ အက်ရှင်ဇာတ်ကားပါ။ ဝန်ကြီးချုပ် Muto ရဲ့ ကျောထောက်နောက်ခံနဲ့ Souen ဖွင့်ထားတဲ့ တရားမဝင်တိုက်ခိုက်ရေးကလပ်မှာ ပြစ်မှုကျူးလွန်ဖူးတဲ့ လူမိုက်တွေဟာ အသက်ရှင်ခွင့်အတွက် အချင်းချင်း တိုက်ခိုက်ကြရပါတယ်။ အနိုင်ရသူက ဆုရပေမယ့် ရှုံးသူအတွက်တော့ သေခြင်းပဲ စောင့်နေတယ်။ တစ်နေ့မှာ လူ ၃၂ ယောက်ကို ပုဆိန်နဲ့ ခုတ်သတ်ခဲ့တယ်ဆိုတဲ့ Aiba ဒီကလပ်ကို ရောက်လာပြီး အသက်လုတိုက်ပွဲတွေထဲ ဝင်ရဖို့ ဖြစ်လာပါတယ်။ Souen နဲ့ Aiba တို့ကြားမှာလည်း အတိတ်က အကြောင်းတွေ ရှိခဲ့ဖူးတယ်။ အဲဒီနှစ်ယောက်ကြားကို လျှို့ဝှက်အစီအစဉ်တွေနဲ့ Arisugawa ဆိုတဲ့ မိန်းကလေး ဝင်လာတဲ့အခါ အခြေအနေက ပိုရှုပ်ထွေးလာပါတယ်။ တည်ထောင်သူ Lord Nanahara Fumito ရဲ့ ရက်စက်တဲ့လောကထဲမှာ ဘယ်သူတွေ အဆုံးအထိ အသက်ရှင်ကျန်နိုင်မလဲ။

အာဖရိကမှာ တာဝန်ထမ်းဆောင်နေတဲ့ အထူးတပ်သားတစ်ယောက်ရဲ့ညီဟာ လော့စ်အိန်ဂျလိစ်မှာ အရှင်လတ်လတ် မီးရှို့ခံလိုက်ရပါတယ်။ တပ်က ဒီအဖြစ်ကို သူ့အား အသိမပေးဘဲ ဖုံးထားခဲ့ပေမယ့် နောက်ဆုံး သူသိသွားတယ်။ ဒါနဲ့ တပ်ကနေ ထွက်ပြေးပြီး ညီရှိတဲ့ဆီ အမြန်သွားဖို့ လုပ်တော့တာပါ။ လမ်းမှာ ပိုက်ဆံမရှိတော့ လမ်းဘေးထိုးပွဲတွေ ဝင်ထိုးပြီး ငွေရှာရတယ်။ အဲဒီကနေ နာမည်ရလာပေမယ့် ထိုးပွဲလောကထဲက ပြန်ရုန်းထွက်ဖို့လည်း ခက်လာပါတယ်။ ညီနဲ့ မိသားစုအတွက် ကြေးမြင့်တဲ့ ထိုးပွဲတွေအထိ ဆက်ထိုးနေရသလို တပ်က လိုက်ဖမ်းနေတာကိုလည်း ရှောင်နေရတယ်။ ဒီထိုးပွဲတွေက သူ့ကို မိသားစုဆီ ပြန်ရောက်ဖို့ ပိုနီးစေမှာလား။ ဗန်ဒိန်း ပါဝင်ထားတဲ့ Lionheart မှာ ထိုးခိုက်ယှဉ်ပြိုင်တဲ့ အက်ရှင်ခန်းတွေ ဆက်တိုက်ပါဝင်ပြီး မိသားစုအတွက် ဘာမဆိုလုပ်ပေးချင်တဲ့ လူတစ်ယောက်ရဲ့အကြောင်းကို တွဲဖက်တင်ပြထားပါတယ်။

တစ်ချိန်က ဂျူဒိုလောကမှာ နာမည်ကြီးခဲ့တဲ့ Louis Koo ရဲ့ ဇာတ်ကောင်ဟာ အခုတော့ ဘာမှမလုပ်ချင်တော့ဘဲ လောင်းကစားနဲ့ပဲ အချိန်ကုန်နေပါတယ်။ ဆပ်စရာအကြွေးတွေကလည်း ပုံနေပြီ။ အဲဒီအချိန်မှာ သိုင်းပြိုင်ဖို့ စိတ်အားထက်သန်တဲ့ Aaron Kwok ရဲ့ ဂျူဒိုသမားက သူ့ကို လာစိန်ခေါ်တယ်။ ဒါပေမယ့် သူက ကောင်းကောင်းမယှဉ်ပြိုင်တာကြောင့် Aaron Kwok ရဲ့ ဇာတ်ကောင်က သူပြန်ပြီး ပုံမှန်ဖြစ်လာတဲ့အထိ အရက်ဆိုင်မှာ ဝင်ကူပေးရင်း ပြိုင်ဖို့ စောင့်နေပါတယ်။ သူတို့နှစ်ယောက်ကြား ရောက်လာသူက Cherrie Ying သရုပ်ဆောင်ထားတဲ့ မိုနာပါ။ အဆိုတော်ဖြစ်ချင်ပေမယ့် အသံက မကောင်းဘူး။ အေးဂျင့်က အပြာကားရိုက်ခိုင်းဖို့ လုပ်လာတာကြောင့်လည်း ပြဿနာတက်နေတယ်။ အိမ်လခမပေးနိုင်တာ ခြောက်လရှိပြီမို့ အိမ်ရှင်က နှင်ချတဲ့အခါမှာတောင် ခေါက်ဆွဲစားရင်း လမ်းပေါ်မှာ ခပ်အေးအေးရပ်နေတဲ့ မိန်းကလေးပါ။ သူတို့သုံးယောက်ရဲ့ အရှုပ်အထွေးတွေကို အဓိကထားပြီး ဇာတ်လမ်းကို ဆက်ထားပါတယ်။ Tony Leung Ka-fai ကလည်း ခပ်ကြမ်းကြမ်းဇာတ်ပို့နေရာက ပါဝင်ထားပါတယ်။ Johnnie To ရိုက်ကူးထားတဲ့ Throw Down ဟာ ဇာတ်လမ်းအဖြစ်အပျက်ထက် ဇာတ်ကောင်တွေကို ပိုအလေးပေးထားတဲ့ ရုပ်ရှင်ပါ။ ဂျပန်သိုင်းပညာဖြစ်တဲ့ ဂျူဒိုကို အခြေခံပြီး စိန်ခေါ်ယှဉ်ပြိုင်တဲ့ အခန်းတွေကို ရိုက်ကူးထားသလို ကူရိုဆာဝါရဲ့ ပွဲဦးထွက်ရုပ်ရှင် Sanshiro Sugata ကိုလည်း ထည့်သွင်းရည်ညွှန်းထားပါတယ်။ ကူရိုဆာဝါကို ဂုဏ်ပြုကြောင်းလည်း ဖော်ပြထားတဲ့ ရုပ်ရှင်ဖြစ်ပါ

ဟောင်ကောင်မှာ တူးမြောင်းလုပ်ငန်း လုပ်နေတဲ့ စီးပွားရေးလုပ်ငန်းရှင်တစ်ယောက်ရဲ့ ပိုင်ဆိုင်မှုတွေကို သူ့လုပ်ဖော်ကိုင်ဖက်က လိုချင်နေပါတယ်။ ဒါကြောင့် ဟောင်ကောင်က လူဆိုးဂိုဏ်းတစ်ဂိုဏ်းကို အကူအညီတောင်းပြီး လုပ်ငန်းရှင်နဲ့ သူ့မိသားစုကို သတ်ဖို့ စီစဉ်ခဲ့တယ်။ ဒါပေမယ့် လုပ်ငန်းရှင်ရဲ့ အမြွှာသားလေးနှစ်ယောက်ကတော့ အသက်မသေဘဲ လွတ်မြောက်သွားခဲ့ပါတယ်။ နှစ်ဆယ့်ငါးနှစ်ကြာတဲ့အခါ အဲဒီညီအစ်ကိုနှစ်ယောက် ပြန်ဆုံကြပြီး ဖခင်အတွက် လက်စားချေဖို့ ကြိုးစားလာကြတယ်။ ညီအစ်ကိုဖြစ်ပေမယ့် တစ်ယောက်က အပျော့၊ တစ်ယောက်က အမာဆိုသလို စရိုက်ချင်း မတူကြပါဘူး။ ဒီဇာတ်ကောင်နှစ်ယောက်စလုံးကို ဗန်ဒိန်းက နှစ်ကိုယ်ခွဲသရုပ်ဆောင်ထားပြီး သူကိုယ်တိုင်တတ်ကျွမ်းတဲ့ ကိုယ်ခံပညာနဲ့ အက်ရှင်ခန်းတွေကို သရုပ်ဖော်ထားပါတယ်။

ဂရိနိုင်ငံကို လုပ်ငန်းကိစ္စနဲ့ အလည်အပတ် သွားခဲ့တဲ့ခရီးကအပြန် ထူးဆန်းတဲ့ ကျောက်စိမ်းတုံးတစ်ခု ရောပါလာရာကနေ ပြဿနာတွေ စလာပါတယ်။ အဲဒီကျောက်စိမ်းတုံးနောက်ကို တိုက်ခိုက်ရေးသိုင်းပညာရှင်တစ်ယောက်က အသည်းအသန် လိုက်လာနေတာပါ။ Andy Lau သရုပ်ဆောင်ထားတဲ့ ဇာတ်ကောင်နဲ့ တိုက်ခိုက်ရေးကျွမ်းကျင်တဲ့ ရဲမေတစ်ယောက်တို့ သူ့ရန်ကို ဘယ်လိုခုခံကြမလဲ။ ကျောက်စိမ်းတုံးက ဘယ်ကရောက်လာတာလဲ၊ ဘယ်နေရာကို ပြန်ထားရမှာလဲဆိုတာတွေလည်း ရှာဖွေရဦးမှာပါ။ ၁၉၈၆ ခုနှစ်ထွက် ဟောင်ကောင်အက်ရှင်စွန့်စားခန်းဇာတ်ကားဖြစ်ပြီး ဒါရိုက်တာက ဝေါင်ကျင်းပါ။ စတီဖင်ချောင်ရဲ့ God of Gamblers၊ Royal Tramp၊ Tricky Master နဲ့ Tricky Brain တို့ကို ရိုက်ကူးခဲ့သူလည်း ဖြစ်ပါတယ်။ ဒီကားမှာ Andy Lau နဲ့ Sharla Cheung တို့အပြင် ဝေါင်ကျင်းကိုယ်တိုင်လည်း ပါဝင်သရုပ်ဆောင်ထားတယ်။ Andy Lau ရဲ့ As Tears Go By မတိုင်မီ နှစ်နှစ်က ရိုက်ထားတဲ့ကားဖြစ်ပြီး ဟာသနဲ့ အက်ရှင်ကြားမှာ ရှေးဟောင်းသုတေသနသမားတွေ ပါဝင်တဲ့ စွန့်စားခန်းတွေကိုပါ တွေ့ရပါတယ်။

ဂျွန်ကတ်တာဟာ အတိတ်က အမှားတစ်ခုကြောင့် ရဲအလုပ်ကနေ အနားယူပြီး လေကြောင်းလုံခြုံရေး သရုပ်ပြနည်းပြအဖြစ် အလုပ်လုပ်နေသူပါ။ တစ်နေ့မှာ နိုင်ငံတကာလေကြောင်းလိုင်းကြီးတစ်ခုရဲ့ လုံခြုံရေးအရာရှိအဖြစ် ခန့်အပ်ခံရတာကြောင့် လော့စ်အန်ဂျလိစ်ကို ခရီးထွက်လာခဲ့ပါတယ်။ တိုက်တိုက်ဆိုင်ဆိုင်ပဲ သူစီးလာတဲ့လေယာဉ်ပေါ်မှာ ဗုံးဖောက်ခွဲမှုများစွာ ကျူးလွန်ထားတဲ့ အကြမ်းဖက်သမား ချားစ်ရိန်းလည်း ပါလာတယ်။ FBI ရဲ့ ဖမ်းဆီးမှုကို ခံထားရတဲ့ ချားစ်ရိန်းကို အေးဂျင့်နှစ်ယောက်က လော့စ်အန်ဂျလိစ်ဆီ ခေါ်ဆောင်လာတာပါ။ ဒါပေမယ့် ချားစ်ရိန်းက ကြိုတင်အချိန်းအချက်တွေနဲ့ အတူပါလာတဲ့ အေးဂျင့်နှစ်ယောက်ကို သတ်ပြီး လေယာဉ်ကို ပြန်ပေးဆွဲလိုက်ပါတယ်။ လုံခြုံရေးအရာရှိအဖြစ် အလုပ်စဝင်ခါစ ဂျွန်ကတ်တာလည်း လေယာဉ်ပေါ်မှာပဲ အကြမ်းဖက်သမားနဲ့ ရင်ဆိုင်ရပါတော့တယ်။ ၁၉၉၂ ခုနှစ်ထွက် အက်ရှင်မှုခင်းဇာတ်ကားဖြစ်ပြီး ဂျွန်ကတ်တာနေရာမှာ Wesley Snipes က သရုပ်ဆောင်ထားပါတယ်။

Chistosa နဲ့ သူ့အဖော်က အထက်တန်းကျောင်းသူလေးနှစ်ယောက် ဖြစ်ပေမယ့် လူသတ်တဲ့အလုပ်မှာတော့ ကျွမ်းကျင်သူတွေပါ။ သူတို့အလုပ်လုပ်နေတဲ့ အဖွဲ့အစည်းက လျှို့ဝှက်ပြီး နိုင်ငံရေးသမားတွေ၊ ယာကူဇာတွေကိုပါ ရှင်းပစ်ဖို့ အလုပ်အပ်နိုင်တဲ့ အဖွဲ့အစည်းတစ်ခု ဖြစ်ပါတယ်။ တစ်နေ့မှာ သူတို့နှစ်ယောက်က ယာကူဇာတစ်ယောက်ကို ရှင်းပစ်လိုက်ပါတယ်။ ဒါပေမဲ့ ဒီကိစ္စကို Chistosa တို့ လုပ်ခဲ့မှန်း ယာကူဇာတွေ သိသွားကြတယ်။ ကိုယ့်လက်ချက်ကို တစ်ဖက်က သိသွားပြီးနောက် ကျောင်းသူလူသတ်သမားနှစ်ယောက် ဘယ်လိုဆက်လုပ်ကြမလဲဆိုတာကို အက်ရှင်၊ ဒရာမာနဲ့ ဟာသတို့ ရောပြီး ပြထားပါတယ်။

ကာသစ်က သူ့ညီမလေးကို အရမ်းချစ်ပြီး ညီမအောင်မြင်ဖို့အတွက် ကိုယ့်အခွင့်အရေးကိုတောင် စွန့်လွှတ်ပေးခဲ့သူပါ။ မောင်နှမနှစ်ယောက်လုံး ဉာဏ်ကောင်းပေမယ့် မိသားစုက နှစ်ယောက်စာ ကျောင်းစရိတ် မတတ်နိုင်ဘူး။ အဖေက ကာသစ်ကို ကျောင်းကောင်းမှာထားပြီး အခွန်မှူးဖြစ်စေချင်ပေမယ့် ညီမလေးမှာလည်း အဲဒီရည်မှန်းချက် ရှိနေတာကြောင့် ကာသစ်က ကိုယ့်ကိုယ်ကိုယ် အရည်အချင်းမရှိသူလို ဟန်ဆောင်ပြီး ညီမကို အခွင့်အရေးပေးလိုက်ပါတယ်။ အရွယ်ရောက်လာတော့ ကာသစ်က မင်းသားတွေအစား အန္တရာယ်များတဲ့အခန်းတွေမှာ ဝင်သရုပ်ဆောင်ရတဲ့ စတန့်မင်းသား ဖြစ်လာတယ်။ အဖေရဲ့ အထင်သေးမှုကို အမြဲခံနေရပေမယ့် ညီမလေး အောင်မြင်ရင်ပဲ ကျေနပ်ပြီး ကိုယ့်ဘဝကို ပျော်ပျော်နေတတ်သူပါ။ တစ်နေ့ ရဲဝတ်စုံနဲ့ သရုပ်ဆောင်နေတုန်း ရဲတွေကို သဘောကျတဲ့ ကောင်မလေးတစ်ယောက်က သူ့ကို တွေ့သွားပါတယ်။ ကာသစ်ရဲ့ ရဲပုံစံကိုမြင်ပြီး တကယ့်ရဲလို့ အထင်မှားသွားတဲ့ ကောင်မလေးက သူ့နောက်ကို တကောက်ကောက် လိုက်လာတော့တယ်။ ကောင်မလေးက လူဆိုးတစ်စုနောက် လိုက်ရင်း ကာသစ်ကို ရဲအမှတ်နဲ့ အကူအညီတွေ တောင်းနေပါတယ်။ သူကလည်း ကူညီပေးရင်း လူဆိုးတွေရဲ့ ပစ်မှတ် ဖြစ်လာတော့တယ်။ ဒီဒုစရိုက်သမားတွေနဲ့ ကာသစ် ဘယ်လိုရင်ဆိုင်ဖြေရှင်းမလဲ၊ သူ့ညီမအတွက်လည်း အစ်ကိုကောင်းတစ်ယောက်အဖြစ် ဘယ်လောက်အထိ ရပ်တည်ပေးနိုင်မလဲ။

Payne က စစ်သားဘဝကနေ အနားယူပြီး နယူးယောက်မှာ အရက်ဆိုင်လေးဖွင့်ကာ အေးအေးချမ်းချမ်း နေဖို့ ကြိုးစားနေသူပါ။ ဒါပေမဲ့ ADS အဖွဲ့ဝင်ဖြစ်တဲ့ သူ့အစ်ကိုဟာ ရိုမေးနီးယားမှာ မူးယစ်ဆေးဂိုဏ်းတစ်ခုကို လိုက်ဖမ်းရင်း ကျဆုံးသွားပါတယ်။ အစ်ကိုရဲ့ သေဆုံးမှုကြောင့် Payne လည်း အထူးစစ်သားဘဝထဲ ပြန်ဝင်လာရတော့တယ်။ အရင်အဖွဲ့ဝင်ဟောင်းနှစ်ယောက်နဲ့ လက်တွဲပြီး အစ်ကိုကို သတ်သွားတဲ့ တကယ့်ဂိုဏ်းချုပ်ကို ဖော်ထုတ်ဖို့ ကြိုးစားပါတယ်။ လက်စားချေဖို့ ထွက်လာတဲ့ Payne ရဲ့ ခရီးမှာ လက်နက်မဲ့ ကိုယ်ချင်းယှဉ်တိုက်ခိုက်တဲ့ အက်ရှင်ခန်းတွေ ပါဝင်ပါတယ်။

၆၇၆ ခုနှစ်ခန့်မှာ သင်္ချိုင်းသူခိုးတစ်စုက လူသားစားတဲ့ အခေါင်းတလားတစ်လုံးကို တူးဖော်မိသွားပါတယ်။ အခေါင်းထဲကနေ ရွှေနဂါးကြီးတစ်ကောင် ပျံထွက်လာသလို ပြုစားခံထားရတဲ့ အလောင်းတစ်လောင်းလည်း ထွက်လာပြီး ဘုရင်ကြီးနဲ့ ဘုရင်မကြီးကို လုပ်ကြံဖို့ ကြိုးစားတော့တယ်။ ကိုယ်ရံတော်အရာရှိလီက တားဆီးကယ်တင်နိုင်ခဲ့ပြီးနောက် တရားရေးဌာနက Di Ren Jie ဟာ အမိန့်တော်အရ ဒီအမှုကို စုံစမ်းရပါတော့တယ်။ သူရင်ဆိုင်နေရတာက လူသားစားပြီး ဓားလှံတွေကိုလည်း မကြောက်တဲ့ အလောင်းကောင်တွေပါ။ မီးပုံးပွဲညမှာ လူတွေ စည်ကားနေတုန်း ထူးဆန်းတဲ့ ပုလွေသံနဲ့အတူ အလောင်းကောင်တွေ ချန်အန်းမြို့ထဲကို အလုံးအရင်းနဲ့ ဝင်လာကြတယ်။ သူတို့ကိုက်လိုက်သမျှ လူတွေကလည်း အလောင်းကောင်တွေ ဖြစ်လာကြတော့ အရေအတွက်က တိုးပြီးရင်း တိုးနေပါတယ်။ ဒီအလောင်းကောင်တွေကို ဆရာဒီးတို့ နှိမ်နင်းနိုင်ပါ့မလား၊ ဘယ်လောက်ကြာကြာ တောင့်ခံထားနိုင်မလဲ။

ရုရှားက ရာဇဝတ်ကောင်တစ်ယောက် အမေရိကန်ကို ထွက်ပြေးလာတဲ့အတွက် ဆိုဗီယက်ရဲတစ်ယောက်က နောက်ကနေ လိုက်ဖမ်းလာပါတယ်။ အဲဒီမှာ နယ်ခံချီကာဂိုရဲတစ်ယောက်နဲ့ တွဲပြီး အမှုလိုက်ဖို့ ဖြစ်လာတော့တယ်။ နိုင်ငံမတူ၊ အလုပ်လုပ်ပုံချင်းလည်း မတူတဲ့ ရဲနှစ်ယောက်က တွေ့တာနဲ့ အဆင်ပြေကြတာတော့ မဟုတ်ပါဘူး။ ဘုနဲ့ဘောက်ကျနေရင်း ရာဇဝတ်ကောင်ကို ဖမ်းမိဖို့ အတူကြိုးစားကြရတာပါ။ စစ်အေးကာလ အမေရိကန်နဲ့ ဆိုဗီယက်တို့ကြားက မတည့်မှုကို နောက်ခံထားတဲ့ အက်ရှင်မှုခင်းဟာသဖြစ်ပြီး အမေရိကန်ရဲလောကရဲ့ အားနည်းချက်တွေနဲ့ ရုရှားရဲတွေရဲ့ လုပ်ပုံကိုင်ပုံတွေကို သရော်ထားပါတယ်။ နိုင်ငံမတူတဲ့ ရဲနှစ်ယောက် အမှုအတူလိုက်ရင်း အလွဲတွေကြုံရတဲ့ပုံစံက Rush Hour ကိုလည်း သတိရစေနိုင်တယ်။ အဓိကရဲနှစ်ယောက်အဖြစ် Arnold Schwarzenegger နဲ့ James Belushi တို့ ပါဝင်ထားပြီး လူဆိုးနေရာမှာတော့ Ed O'Ross က သရုပ်ဆောင်ထားပါတယ်။

မြောက်ပိုင်းက ဇီဝလက်နက်အဖြစ် သုံးမယ့် ဗိုင်းရပ်စ်တစ်မျိုးကို ဖန်တီးထားပြီး ဖြေဆေးရဖို့ ပါမောက္ခတစ်ယောက်ကို ခြိမ်းခြောက်နေပါတယ်။ ဇနီးဆုံးပါးသွားပြီးနောက် ဒီစစ်ဆင်ရေးကို တားဆီးဖို့ ဆုံးဖြတ်ထားတဲ့ ပါမောက္ခအတွက် သမီးရဲ့အသက်အန္တရာယ်ကိုလည်း စိုးရိမ်နေရပြန်တယ်။ တောင်ပိုင်းမှာရှိတဲ့ သမီးနဲ့ တွေ့ခွင့်ရအောင် လုပ်ပေးရင် ပူးပေါင်းပေးမယ်လို့ သူက ပြောထားပါတယ်။ တစ်ဖက်မှာလည်း တောင်ပိုင်းအေးဂျင့်တစ်ယောက်က သူ့သမီးကြောင့် လျှို့ဝှက်မစ်ရှင်တစ်ခုကို လုပ်ရဖို့ ဖြစ်လာပါတယ်။ သူ့တာဝန်က ပါမောက္ခဆောင်းကို တောင်ပိုင်းအရောက် ပို့ပေးဖို့ပါ။ ဒီတာဝန်ကို ပြီးမြောက်မှ သမီးရှိတဲ့ တောင်ပိုင်းကို သူပြန်လာနိုင်မှာ ဖြစ်ပါတယ်။ တောင်နဲ့မြောက် နယ်နိမိတ်ကြားက စစ်ဆင်ရေးကို အောင်အောင်မြင်မြင် ဆောင်ရွက်နိုင်ပါ့မလား၊ ပါမောက္ခကရော သူ့သမီးကို ကယ်တင်နိုင်ပါ့မလားဆိုတဲ့ အခြေအနေတွေနဲ့ ရင်ဆိုင်နေရပါတယ်။

ဟင်ဒူနဲ့ မွတ်စလင်တို့ကြား ပဋိပက္ခတွေ ဖြစ်ပွားနေတဲ့ ကက်ရှမီးဒေသမှာ စစ်သွေးကြွအုပ်စုတစ်စုက ဒေသကို ဖျက်ဆီးပြီး အမုန်းတရားတွေ ပိုပြန့်လာအောင် လျှို့ဝှက်ကြံစည်နေကြပါတယ်။ ရဲအရာရှိတစ်ယောက်က ဒီအစီအစဉ်ကို စုံစမ်းဖော်ထုတ်ဖို့ ကြိုးစားနေချိန်မှာပဲ အဲဒီအုပ်စုထဲကို မတော်တဆ ရောက်သွားသူက သူ့ရဲ့မွေးစားသား ဖြစ်နေပါတယ်။ အမုန်းတရားတွေ နောက်ခံထားတဲ့ အခြေအနေကြားမှာ သားအဖနှစ်ယောက် ထိပ်တိုက်တွေ့လာကြရတာပါ။ ဇာတ်လမ်းက အိန္ဒိယနဲ့ ပါကစ္စတန်ကြားက ပဋိပက္ခကို နောက်ခံထားပြီး ရင်ထဲမှာ အမုန်းတွေရှိနေတဲ့ လူငယ်တွေကို အစွန်းရောက်အုပ်စုတွေက ဘယ်လိုသိမ်းသွင်းကြသလဲဆိုတာကိုလည်း ဖော်ပြထားပါတယ်။ ကိုယ်ကျိုးအတွက် ဘာသာရေးကို အမည်ခံ၊ လုပ်ကြံထားတဲ့အကြောင်းတွေ ဖြန့်ပြီး လူငယ်တွေကို အသုံးချကြတဲ့အကြောင်း ပါဝင်ပါတယ်။ ရီသစ်ရိုရှန်းနဲ့ ဆန်ဂျေးဒသ်တို့ ပါဝင်သရုပ်ဆောင်ထားပါတယ်။

အနောက်ပိုင်းဒေသမှာ နေထိုင်တဲ့ ဂျိန်းတို့လင်မယားနောက်ကို ဘစ်ရှော့ဆိုတဲ့ လူမိုက်တစ်ယောက် လိုက်ရှာနေပါတယ်။ ဘစ်ရှော့က ပြည့်တန်ဆာလုပ်ငန်းနဲ့ ကြီးပွားချင်သူဖြစ်ပြီး ဂျိန်းရဲ့ယောက်ျားကလည်း တစ်ချိန်က သူ့လူဟောင်းပါ။ ဂျိန်းကို ပြည့်တန်ဆာအဖြစ် အတင်းအကျပ်ခိုင်းစေဖို့ လုပ်နေတုန်း သူ့ယောက်ျားက ကယ်ထုတ်ပြီး နှစ်ယောက်သား ထွက်ပြေးလာခဲ့ကြတာ ဖြစ်ပါတယ်။ ဘစ်ရှော့တို့ရဲ့ သေနတ်နဲ့ပစ်ခတ်မှုကြောင့် ဂျိန်းရဲ့ယောက်ျား ဒဏ်ရာရသွားတဲ့အခါ သူ့ကို အားကိုးလို့မရတော့ပါဘူး။ ဂျိန်းက စစ်မှုထမ်းဘဝမှာ သူရသတ္တိဆုတွေ ရထားတဲ့ စစ်ပြန်တစ်ယောက်ဖြစ်သူ ရည်းစားဟောင်းဆီ သွားပြီး အကူအညီတောင်းရတယ်။ ဒီလိုနဲ့ ဂျိန်း၊ သူ့ရည်းစားဟောင်းနဲ့ သေနတ်ဒဏ်ရာရနေတဲ့ သူ့ယောက်ျားတို့ဟာ လူမိုက်ဂိုဏ်းတစ်ခုလုံးကို ရင်ဆိုင်ဖို့ ဖြစ်လာပါတယ်။ ဂျိန်းအဖြစ် Natalie Portman က သရုပ်ဆောင်ထားပြီး Joel Edgerton နဲ့ Ewan McGregor တို့လည်း ပါဝင်ထားပါတယ်။ ဒီကားမှာ Joel က လူကောင်းဘက်၊ Ewan က လူဆိုးဘက်က ပါဝင်ထားသလို Joel ဟာ ဇာတ်ညွှန်းရေးသားသူတွေထဲမှာလည်း ပါပါတယ်။ မတရားမှုတွေ၊ လက်စားချေမှုတွေနဲ့ သေနတ်ပစ်ခန်းတွေပါတဲ့ ကောင်းဘွိုင်ဒရာမာကားပါ။

ရော်ဘင်လောင်းစတွိုက်ဟာ ဘုရင်ရစ်ချတ်ရဲ့ ခရူးဆိတ်စစ်ပွဲမှာ ပါဝင်တိုက်ခိုက်နေတဲ့ လေးသည်တော်တစ်ယောက်ပါ။ အင်္ဂလန်ကို ပြန်ဖို့ကြိုးစားနေချိန် ပြင်သစ်နဲ့ အင်္ဂလန်ကြားက နိုင်ငံရေးအခြေအနေတွေကြောင့် နော့တင်ဟမ်က ဆာရောဘတ်လော့ဇ်စလေအဖြစ် အယောင်ဆောင်ပြီး ပြန်ရဖို့ အကြောင်းဖန်လာပါတယ်။ အင်္ဂလန်ရောက်လာတဲ့ ရော်ဘင်အတွက် တခြားလူတစ်ယောက်ရဲ့အမည်နဲ့ ဆက်နေရမယ့်အပြင် ရောဘတ်ရဲ့ဇနီးဖြစ်ခဲ့သူ မယ်ရီယွန်နဲ့လည်း ဘယ်လိုဆက်ဖြစ်လာမလဲဆိုတာ ရှိနေပါတယ်။ တစ်ဖက်မှာလည်း ပြင်သစ်ရဲ့ ကျူးကျော်စစ်က နီးကပ်လာပြီး အင်္ဂလန်က ပြည်တွင်းစစ်ဖြစ်လုနီးပါး အခြေအနေကို ရောက်နေတယ်။ ဒီလိုအချိန်မှာ သာမန်လေးသည်တော်တစ်ယောက်က နိုင်ငံကို ကယ်တင်နိုင်ပါ့မလား၊ သူ့ဘဝကနေ ဒဏ္ဍာရီတစ်ခု ဘယ်လိုဖြစ်လာမလဲဆိုတဲ့ အကြောင်းကို ဆက်ပြထားပါတယ်။ Russell Crowe နဲ့ Cate Blanchett တို့ ပါဝင်သရုပ်ဆောင်ထားတဲ့ အက်ရှင်၊ စွန့်စားခန်းနဲ့ ဒရာမာဇာတ်ကားပါ။

ရာဇဝတ်မှုတွေ ထူပြောနေတဲ့ ဒက်ထရွိုက်မြို့ရဲ့ ရဲဌာနကို မာဖီဆိုတဲ့ ရဲတစ်ယောက် တာဝန်ပြောင်းလာပါတယ်။ သူက ရဲမေ လူးဝစ်နဲ့ တွဲဖက်တာဝန်ထမ်းဆောင်ရင်း လူဆိုးဂိုဏ်းတစ်ဂိုဏ်းကို လိုက်ဖမ်းခဲ့တယ်။ ဒါပေမယ့် မာဖီဟာ အဲဒီလူဆိုးတွေလက်ထဲမှာ ရက်ရက်စက်စက် အသတ်ခံလိုက်ရပါတယ်။ တစ်ဖက်မှာတော့ OCP ဆိုတဲ့ အဖွဲ့အစည်းက ဒယ်တာမြို့သစ် တည်ဆောက်ဖို့ ဒက်ထရွိုက်အစိုးရနဲ့ စာချုပ်ချုပ်ထားပါတယ်။ သူတို့က ရဲတွေနေရာမှာ အစားထိုးသုံးဖို့ စက်ပစ္စည်းတစ်ခု တီထွင်ခဲ့ပေမယ့် ပရိုဂရမ်အမှားကြောင့် အဆင်မပြေဖြစ်ခဲ့တယ်။ အဲဒီနောက် စမ်းသပ်မှုအသစ်အတွက် သေဆုံးသွားတဲ့ မာဖီရဲ့ ခန္ဓာကိုယ်ကို အသုံးချပြီး စက်ရုပ်ရဲအဖြစ် ပြန်အသက်သွင်းလိုက်ပါတယ်။ စက်ရုပ်ရဲဖြစ်လာတဲ့ မာဖီက ဒက်ထရွိုက်မြို့အတွက် အထောက်အကူ ဖြစ်လာနိုင်မလား။ သူ့ကို သတ်ခဲ့တဲ့ လူဆိုးတွေကို ပြန်လက်စားချေမလားဆိုတာအပြင် ဒီတီထွင်မှုကို ဖျက်ဆီးချင်တဲ့သူတွေ ရှိလာဦးမလားဆိုတဲ့ မေးခွန်းတွေလည်း ရှိနေပါတယ်။

တစ်နယ်တစ်ကျေးမှာ အလုပ်သွားလုပ်နေကြတဲ့ သူငယ်ချင်းနှစ်ယောက် ရှိပါတယ်။ တစ်နေ့ လုပ်ငန်းခွင်မတော်တဆမှုကြောင့် လူတစ်ယောက် ဆုံးပါးသွားတာကို တွေ့ရတဲ့အခါ ရာဂျူးက သူသေရင်တော့ မွေးရပ်မြေမှာပဲ ခေါင်းချချင်တယ်လို့ သူငယ်ချင်းကို ပြောဖြစ်ခဲ့တယ်။ နောက်တော့ ကိုဗစ်လူနာတွေ တိုးလာပြီး အစိုးရက လော့ဒေါင်းချတော့မယ့်အချိန် ရောက်လာပါတယ်။ သူတို့အလုပ်ခွင်လည်း ပိတ်သွားတာကြောင့် ဇာတိပြန်ဖို့ ဖြစ်လာပေမယ့် ရွာအပြန်ခရီး မစရသေးခင်မှာပဲ ရာဂျူးက ရုတ်တရက် ဆုံးပါးသွားခဲ့တယ်။ ကျန်ခဲ့တဲ့ သူငယ်ချင်းက ရာဂျူးပြောခဲ့တဲ့ ဆန္ဒအတိုင်း ဇာတိရွာမှာ သင်္ဂြိုဟ်ပေးဖို့ သူ့အလောင်းကို သယ်ပြီး တစ်ယောက်တည်း ခရီးဆက်လာပါတယ်။ လော့ဒေါင်းကန့်သတ်ချက်တွေ ရှိနေတဲ့အချိန်မှာ အလောင်းတစ်လောင်းကို သယ်ပြီး ရွာအရောက်ပြန်ဖို့က ဘယ်လောက်ခက်ခဲမလဲ။ လမ်းတစ်လျှောက် ဘာတွေကြုံရဦးမလဲ၊ ရာဂျူးရဲ့ နောက်ဆုံးဆန္ဒကိုရော ဖြည့်ဆည်းပေးနိုင်ပါ့မလား။

ဒယ်ရန်နဲ့ စတိဗ်က ငယ်သူငယ်ချင်းတွေဖြစ်ပေမယ့် နေထိုင်ပုံရော ဝါသနာပါရာပါ မတူကြပါဘူး။ ဒယ်ရန်က မိဘစကားနားထောင်ပြီး ကျောင်းစာမှာလည်း ထူးချွန်တဲ့ ကောင်လေးပါ။ စတိဗ်ကတော့ မိဘမေတ္တာငတ်နေပြီး ခပ်ဆိုးဆိုးနေတတ်သူတစ်ယောက် ဖြစ်ပါတယ်။ ဒယ်ရန်က ပင့်ကူတွေကို စွဲလမ်းသလောက် စတိဗ်က ဗန်ပိုင်းယားတွေအကြောင်း အလွန်စိတ်ဝင်စားပါတယ်။ တစ်နေ့ သူတို့မြို့ကို နှစ်ငါးရာသက်တမ်းရှိတဲ့ လူထူးဆန်းတွေရဲ့ ဆပ်ကပ်အဖွဲ့ ရောက်လာတော့ နှစ်ယောက်သား စိတ်ဝင်တစား သွားကြည့်ကြတယ်။ အဲဒီဆပ်ကပ်အဖွဲ့ထဲမှာ ဗန်ပိုင်းယားတစ်ယောက်လည်း ပါနေပါတယ်။ ပင့်ကူတွေကို သဘောကျတဲ့ ဒယ်ရန်က အဲဒီဗန်ပိုင်းယားရဲ့ ပင့်ကူလေးကို မျက်စိကျသွားတဲ့အခါ သူတို့ရဲ့ ဆပ်ကပ်ကြည့်ခရီးကနေ ဘာတွေ ဆက်ဖြစ်လာမလဲ။

မီးသတ်သမား ဂေါ်ဒီဘရူအာဟာ ဇနီးနဲ့ ကလေးကို တွေ့ဖို့ သွားနေတုန်း ဗုံးပေါက်ကွဲမှုတစ်ခုကြောင့် သူတို့နှစ်ယောက်စလုံးကို ဆုံးရှုံးလိုက်ရပါတယ်။ ဗုံးခွဲသူဟာ ကိုလံဘီယာနိုင်ငံက ပြောက်ကျားတပ်သားတစ်ယောက်ဖြစ်ပြီး လွတ်မြောက်သွားတယ်လို့ သိရတဲ့အခါ ဂေါ်ဒီက နာကျည်းစိတ်နဲ့ နိုင်ငံကူးပြီး လိုက်ရှာဖို့ ဆုံးဖြတ်လိုက်တယ်။ ဇနီးနဲ့ ကလေးအတွက် လက်စားချေချင်တဲ့စိတ်နဲ့ သွားခဲ့တဲ့ ကိုလံဘီယာမှာတော့ ပြောက်ကျားတပ်တွေနဲ့ အစိုးရစစ်တပ်တွေကြား အန္တရာယ်တွေက စောင့်နေပါတယ်။ ဗုံးခွဲသူက ဘာကြောင့် ဒီလုပ်ရပ်ကို ကျူးလွန်ခဲ့တာလဲ၊ အမေရိကန်အစိုးရက ကိုလံဘီယာမှာ ဘာတွေ လုပ်ခဲ့တာလဲဆိုတဲ့ မေးခွန်းတွေနဲ့အတူ ဂေါ်ဒီရဲ့ ခရီးကို ဆက်ပြထားတဲ့ အာနိုးရဲ့ အက်ရှင်ဇာတ်ကားပါ။

အန်ဒီလောင် သရုပ်ဆောင်ထားတဲ့ ဂိုဏ်းစတားလူငယ်တစ်ယောက်ရဲ့ ဘဝထဲမှာ ဆိုင်ကယ်ပြိုင်ပွဲတွေ၊ ကားပြိုင်ပွဲတွေနဲ့ လမ်းဘေးရန်ပွဲတွေ ရှိနေပါတယ်။ ဂိုဏ်းအရှုပ်အထွေးတွေကြားက ညီအစ်ကိုသံယောဇဉ်ကိုလည်း ပြထားတယ်။ တစ်နေ့မှာတော့ ဂိုဏ်းခေါင်းဆောင်ကြီးရဲ့ ဆေးရုံစရိတ်အတွက် ဓားပြသွားတိုက်ကြရာက အစီအစဉ်လွဲချော်ပြီး ကောင်မလေးတစ်ယောက်ကို ဓားစာခံအဖြစ် ဖမ်းခေါ်လာရပါတယ်။ အဲဒီဖြစ်ရပ်ကနေ ဂိုဏ်းစတားလူငယ်နဲ့ ဓားစာခံကောင်မလေးကြား ချစ်ခြင်းတစ်ခု ပေါ်ပေါက်လာတယ်။ အန်ဒီလောင်နဲ့အတူ Chien-Lien Wu နဲ့ အန်ကယ်တက်တို့ ပါဝင်သရုပ်ဆောင်ထားပြီး အန်ကယ်တက်ဟာ ဒီဇာတ်ကားနဲ့ အကောင်းဆုံးဇာတ်ပို့ဆု ရခဲ့ပါတယ်။ ဒါရိုက်တာကတော့ Johnnie To ရဲ့ လက်ထောက်ဖြစ်ခဲ့ဖူးတဲ့ Benny Chan ဖြစ်ပြီး ဒီကားဟာ သူ့ရဲ့ ပွဲဦးထွက်ရုပ်ရှင်ပါ။ နောက်ပိုင်းမှာ Who Am I?, Rob-B-Hood, New Police Story နဲ့ Shaolin တို့ကိုလည်း ရိုက်ကူးခဲ့ပါတယ်။ သူ့နောက်ဆုံးရုပ်ရှင်ဖြစ်တဲ့ Raging Fire ကလည်း ဟောင်ကောင်ရုပ်ရှင်ပွဲတော်မှာ ထိပ်တန်းဆုတွေ ရခဲ့ပါတယ်။

အန်နာလို့လည်း ခေါ်တဲ့ အန်ညာဟာ ခင်ပွန်းနဲ့အတူ ပြင်သစ်စားသောက်ဆိုင်တစ်ဆိုင် ပူးတွဲပိုင်ဆိုင်ထားတဲ့ စားဖိုမှူးတစ်ယောက်ပါ။ မီးဖိုချောင်ထဲမှာ တစ်ခါတလေ ဒေါသပေါက်ကွဲတတ်လို့ ခင်ပွန်းကတော့ သူ့ကို ယုတ္တိမတန်သူလို့ မြင်ထားတယ်။ ဒါပေမယ့် အန်ညာမှာ ခင်ပွန်းမသိတဲ့ အတိတ်တစ်ခု ရှိနေပါတယ်။ သူဟာ ရုရှားစပိုင်ဘဝကနေ ထွက်ပြေးလာပြီး ကိုယ်ယောင်ဖျောက်နေသူပါ။ ဆိုင်ဖွင့်ပွဲညမှာ ခင်ပွန်းက သူ့ကို ဂုဏ်ပြုချင်လို့ ဆိုင်အကြောင်းကို သတင်းစာထဲ ထည့်ပေးလိုက်တယ်။ အဲဒီကနေ အန်ညာ ဖုံးကွယ်ထားတဲ့ အတိတ်က ပြန်လိုက်လာသလို ခင်ပွန်းရဲ့ အကြွေးပြဿနာတွေလည်း တစ်ညတည်းမှာပဲ ပေါ်လာပါတော့တယ်။ အန်ညာတစ်ယောက် ဆိုင်ထဲမှာ တပ်စွဲပြီး စားသောက်ဆိုင်နဲ့ ကိုယ့်အသက်ကို ကာကွယ်ဖို့ ရင်ဆိုင်ရပုံကို အက်ရှင်နဲ့ ဟာသရောပြီး ရိုက်ထားပါတယ်။