အချစ်ဇာတ်လမ်းများ

တောထဲမှာ အင်းဆက်တွေကို လေ့လာသုတေသနလုပ်တဲ့ ပညာရှင် မစ္စတာအမ်ဒမ်ဆမ်ဟာ သင်္ဘောနစ်မြုပ်မှုတစ်ခုနောက်မှာ ယူဂျီနီးယားတို့အိမ်ကို မှီခိုနေထိုင်ဖို့ ရောက်လာပါတယ်။ တစ်အိမ်တည်းမှာ အတူနေရင်း အချိန်ကြာလာတဲ့အခါ သူနဲ့ ယူဂျီနီးယားတို့ လက်ထပ်ဖြစ်သွားကြတယ်။ ဒါပေမဲ့ ယူဂျီနီးယားရဲ့အစ်ကို အက်ဂါကတော့ ဒီအိမ်ထောင်ရေးကို သဘောမတူတဲ့အပြင် အမ်ဒမ်ဆမ်ကိုလည်း အထင်သေးနှိမ်ချနေပါတယ်။ အက်ဂါရဲ့ နှိမ်ချမှုတွေကို ဆက်မခံနိုင်တော့တဲ့ အမ်ဒမ်ဆမ်ဟာ ကိုယ့်ဝမ်းစာကိုယ်ရှာနိုင်ဖို့ သုတေသနစာအုပ်တစ်အုပ် စရေးပါတော့တယ်။ သူ့စာအုပ်ကို ဘယ်လိုရေးသွားမလဲ၊ အဆုံးသတ်နိုင်ပါ့မလား၊ စာအုပ်ရေးပြီးချိန်မှာရော ယူဂျီနီးယားနဲ့ အင်္ဂလိပ်လူချမ်းသာတွေရဲ့ဘဝထဲက ဘယ်လိုလျှို့ဝှက်ချက်တွေကို သိလာရမလဲဆိုတာ ဆက်တွေ့ရမှာပါ။ Mark Rylance ဦးဆောင်သရုပ်ဆောင်ထားတဲ့ အချစ်ဒရာမာဖြစ်ပြီး လေးနက်တဲ့ စကားပြောခန်းတွေနဲ့အတူ အရွယ်ရောက်သူတွေအတွက်သာ သင့်တော်တဲ့ ပွင့်လင်းမြင်သာသော ပြကွက်တွေလည်း ပါဝင်ပါတယ်။

ဘူဆန်ဂျွန်အန်းအထက်တန်းကျောင်းရဲ့ ဘတ်စကတ်ဘောအသင်းဟာ အလားအလာမရှိတော့ဘူးလို့ သတ်မှတ်ခံထားရတဲ့ အသင်းပါ။ နည်းပြအသစ် Kang Yang-Hyeon ရောက်လာတဲ့အခါမှာတော့ အသင်းမှာ အပြောင်းအလဲတွေ စလာပါတယ်။ တစ်ချိန်က ထိပ်တန်းကစားသမားဖြစ်ခဲ့တဲ့ သူက ကစားသမားဘဝအတွေ့အကြုံတွေကို အသုံးချပြီး အသင်းကို ကိုင်တွယ်ရတော့မှာပါ။ အောက်ဆုံးရောက်နေတဲ့ အသင်းကို ဘယ်လိုဗျူဟာတွေနဲ့ ပြန်တည်ဆောက်မလဲ၊ National Championship ပွဲစဉ်အထိ ဘယ်လိုခေါ်ဆောင်သွားမလဲဆိုတာနဲ့အတူ ကစားသမားတွေရဲ့ ဘတ်စကတ်ဘောအပေါ် ခံယူချက်တွေနဲ့ အိပ်မက်တွေကိုပါ ပြထားပါတယ်။ Rebound ဟာ ၂၀၁၂ ခုနှစ်က ဖြစ်ရပ်မှန်ကို အခြေခံထားတဲ့ အားကစားရုပ်ရှင်ဖြစ်ပြီး Ahn Jae-Hong၊ Lee Shin-Young နဲ့ Jung Gun Joo တို့ ပါဝင်ထားတယ်။ သရုပ်ဆောင်တွေကလည်း ရိုက်ကူးဖို့အတွက် ဘတ်စကတ်ဘောကစားနည်းကို သင်ယူခဲ့ကြပါတယ်။

ဆန်းဟျွန်းနဲ့ ဒုံဟျွန်းတို့ဟာ ခန္ဓာကိုယ်တစ်ခုတည်းကို မျှဝေထားရတဲ့ ခေါင်းနှစ်လုံးဆက်အမြွှာတွေအဖြစ် မွေးဖွားလာကြပါတယ်။ လူတွေက သူတို့ကို မကောင်းဆိုးဝါးလို မြင်ကြမှာကို ကြောက်လို့ အနှစ်သုံးဆယ်လုံး အိမ်ထဲမှာပဲ နေခဲ့ကြရတယ်။ ဆန်းဟျွန်းက စိတ်ထားကောင်းပြီး နာခံတတ်ပေမယ့် ဒုံဟျွန်းကတော့ တစ်ကိုယ်ကောင်းဆန်သူပါ။ တစ်နေ့မှာ တက်ကြွပြီး စိတ်ရင်းကောင်းတဲ့ ဆွန်းအာဆိုတဲ့ မိန်းကလေး သူတို့အိမ်ကို ရောက်လာတဲ့အခါ ဒီသုံးယောက်ကြား ဘယ်လိုအကြောင်းတွေ ဆက်ဖြစ်လာမလဲဆိုတာ ဇာတ်လမ်းက ဆက်ပြထားပါတယ်။ မင်းသမီးလည်းဖြစ်၊ ဒါရိုက်တာလည်းဖြစ်တဲ့ Koo Hye Sun ရိုက်ကူးထားပြီး ဆန်းဟျွန်းအဖြစ် Cho Seung Woo၊ ဒုံဟျွန်းအဖြစ် Ryu Deok Hwan နဲ့ ဆွန်းအာအဖြစ် Nam Sang Mi တို့ ပါဝင်ထားပါတယ်။ Seo Hyun Jin လည်း ဧည့်သည်သရုပ်ဆောင်အဖြစ် ပါဝင်ထားတယ်။

လူဦးရေတိုးပွားမှုနဲ့ ရာသီဥတုဖောက်ပြန်မှုတွေကြားမှာ လူသားတွေက နေထိုင်လို့ရမယ့် တခြားဂြိုဟ်တစ်ခုကို ရှာဖွေနေကြဆဲပါ။ အဲလက်စ်ကတော့ မားစ်ကို သွားဖို့ အစီအစဉ်ချထားပြီးသား ဖြစ်နေတယ်။ ဒါပေမယ့် ဒီခရီးက ပြန်လမ်းမရှိတဲ့ခရီး ဖြစ်နေတာကြောင့် မိသားစုနဲ့ ညှိနှိုင်းတဲ့အခါ အဆင်မပြေမှုတွေ ပေါ်လာပါတယ်။ အဖေက သူ့ပန်းစိုက်ခင်းကို အဲလက်စ် လက်လွှဲယူစေချင်ပေမယ့် သားကလည်း ကိုယ်လုပ်ချင်တာကို ဖြစ်အောင်လုပ်တတ်သူပါ။ ကမ္ဘာပေါ်မှာ ရှာဖွေစရာ အသစ်အဆန်းတွေ မကုန်သေးဘဲ အဲလက်စ်က ဘာကြောင့် အပြီးထွက်သွားချင်နေတာလဲ။ မိသားစုရဲ့ ဆန္ဒနဲ့ သူရွေးထားတဲ့ခရီးကြားမှာ အဲလက်စ် ဘယ်လိုဆုံးဖြတ်မလဲဆိုတာ ဆက်တွေ့ရမှာပါ။

အေဒင်နဲ့ ဝုဒ်ရိုးတို့ သူငယ်ချင်းနှစ်ယောက်က ကမ္ဘာပျက်မယ့်အချိန်ကို စိတ်ကူးယဉ်ရင်း မီးသေနတ်တွေ ဖန်တီးလိုက်၊ ကားတွေ တည်ဆောက်လိုက်နဲ့ ဘဝကို ပေါ့ပေါ့ပါးပါး ဖြတ်သန်းနေကြသူတွေပါ။ တစ်ည ဘားမှာ မိုင်လီဆိုတဲ့ မိန်းကလေးနဲ့ ဆုံတော့ ဝုဒ်ရိုးက သဘောကျသွားပြီး ချိန်းတွေ့ဖို့ ပြောဖြစ်ရာကနေ ချစ်သူတွေ ဖြစ်သွားကြတယ်။ ဒါပေမယ့် နှစ်ယောက်စလုံးမှာ ကိုယ့်ဘဝနဲ့ကိုယ် ရှိနေကြတော့ သူတို့အချစ်ရေးက အဆင်ပြေပြေ ရှေ့ဆက်ဖို့ ခက်နေပါတယ်။ ဒီဆက်ဆံရေး ဘယ်လိုအဆုံးသတ်မလဲဆိုတာနဲ့အတူ ဘဝမှာ ဆက်ရှင်သန်ဖို့ ဘာတွေကို ရွေးချယ်ပြီး ဘာတွေကို ချန်ထားရမလဲဆိုတဲ့ အတွေးကိုပါ ထည့်ထားတဲ့ ၂၀၁၁ ခုနှစ်ထွက် အင်ဒီရုပ်ရှင်ပါ။

မြေးတစ်ယောက်က သူ့ဇာတိနဲ့ အဘိုးအဘွားတွေအကြောင်း ပြန်ပြောပြရာက Red Sorghum ရဲ့ဇာတ်လမ်းကို သိလာရပါတယ်။ သူပြောပြတဲ့အထဲမှာ အဖြစ်မှန်တွေနဲ့ ယုံတမ်းဟုတ်မဟုတ် မသေချာတဲ့ အကြောင်းတွေ ရောယှက်နေတယ်။ ဇာတ်လမ်းက ရိုးရှင်းပေမယ့် လူတွေရဲ့ဘဝနဲ့ ရက်စက်မှုတွေကို ယုံတမ်းတစ်ပုဒ်လို ခံစားရအောင် တင်ဆက်ထားပါတယ်။ ဒီဇာတ်ကားဟာ တရုတ်စာရေးဆရာ Mo Yan ရဲ့ Red Sorghum ထဲက ပထမဝတ္တုလတ်နှစ်ပုဒ်ဖြစ်တဲ့ “Red Sorghum” နဲ့ “Sorghum Wine” ကို ပေါင်းစပ်ရိုက်ကူးထားတာပါ။ မူရင်းမှာ ဆက်စပ်နေတဲ့ ဝတ္တုလတ်ငါးပုဒ် ပါဝင်ပြီး စာရေးဆရာက အစက မဂ္ဂဇင်းမှာ တစ်ပုဒ်ချင်းစီ ခွဲရေးခဲ့တာ ဖြစ်ပါတယ်။ ဒါရိုက်တာ ကျန်းရိမူနဲ့ သရုပ်ဆောင် ဂေါင်လီတို့ရဲ့ ပွဲဦးထွက်လက်ရာလည်း ဖြစ်ပါတယ်။ ကျန်းရိမူက ဒီကားမရိုက်ခင် ရုပ်ရှင်ဓာတ်ပုံဆရာအဖြစ် လုပ်ကိုင်ခဲ့ဖူးပြီး ဒီဇာတ်ကားရဲ့ ရုပ်ရှင်ဓာတ်ပုံကိုတော့ Gu Changwei က တာဝန်ယူထားပါတယ်။ အရောင်၊ အလင်းနဲ့ မြင်ကွင်းဖွဲ့စည်းပုံတွေကို အသားပေးထားတဲ့ ရိုက်ချက်တွေကလည်း ဒီဇာတ်ကားရဲ့ ထင်ရှားတဲ့အပိုင်းတစ်ခုပါ။

အာရီယာနာအဲလ်ဗရက်စ်ဟာ မိဘတွေ ဆုံးသွားပြီးကတည်းက ဘယ်သူနဲ့မှ အဆင်မပြေဘဲ နေနေတဲ့ ဂျစ်ကန်ကန်မိန်းကလေးတစ်ယောက်ပါ။ သူငယ်ချင်းလည်း မရှိ၊ အလုပ်လည်း မရှိတဲ့သူက အိမ်မှာပဲ ကြောင်လေး ရိုမီယိုနဲ့ အတူနေပါတယ်။ ဒီလိုဆက်နေတာကို မကြည့်ရက်တဲ့ ဦးလေးက သူပိုင်တဲ့ အပန်းဖြေကလပ်ကို လာပြီး အဖွဲ့ဝင်တွေနဲ့ မိတ်ဆွေဖွဲ့မယ်ဆိုရင် အလုပ်ရှာပေးမယ်လို့ ကတိပေးလိုက်တယ်။ ဒီလိုနဲ့ အာရီယာနာဟာ စိတ်မပါလှဘဲ ကလပ်ကို ရောက်လာရပါတယ်။ စည်းကမ်းတွေ များလှတဲ့နေရာမှာ နေသားကျဖို့ ကြိုးစားရင်း သူငယ်ချင်းတွေ ဘယ်လိုရှာမလဲ၊ တခြားဘယ်သူတွေနဲ့ တွေ့ဆုံရဦးမလဲ။ ဉာဏ်ကောင်းပေမယ့် လူတွေရဲ့စိတ်ခံစားချက်ကို နားလည်ပြီး လိုက်လျောညီထွေ ဆက်ဆံဖို့ အားနည်းတဲ့ အာရီယာနာက အခက်အခဲတွေကို ဖြတ်သန်းရင်း ကိုယ်နဲ့အဆင်ပြေမယ့် နေရာကို ရှာဖွေသွားတဲ့ အချစ်ဟာသဇာတ်ကားပါ။

ဟာရိုးခရစ်ခ်ဟာ IRS က စာရင်းစစ်တစ်ယောက်ပါ။ သူ့ဘဝက နေ့တိုင်း ပုံသေစည်းချက်အတိုင်း လည်ပတ်နေပြီး ထူးခြားတာဆိုလို့ ဘာမှမရှိဘူး။ ဒါပေမဲ့ တစ်နေ့မှာ သူလုပ်သမျှကို ဇာတ်ကြောင်းပြန်ပြောနေတဲ့ အသံတစ်သံ ကြားလာရပါတယ်။ ပိုတုန်လှုပ်စရာက အဲဒီအသံဟာ သူ မကြာခင် သေတော့မယ်လို့ ပြောလိုက်တာပါပဲ။ ဟာရိုးက သူဟာ ဇာတ်လမ်းတစ်ပုဒ်ထဲ ရောက်နေပြီဆိုတာ သဘောပေါက်သွားတယ်။ ဒါက ဟာသဇာတ်လမ်းလား၊ အလွမ်းဇာတ်လမ်းလားဆိုတာတော့ မသိသေးဘူး။ ဘယ်လိုဇာတ်လမ်းပဲဖြစ်ဖြစ် သူ့ကို သေစေမယ့် ဇာတ်သိမ်းကို ပြောင်းနိုင်ဖို့ စာရေးဆရာကို ရှာရတော့မှာပါ။ ဒါပေမဲ့ သူ့အကြောင်း ရေးနေသူက အဓိကဇာတ်ကောင်တွေကို သေဆုံးခြင်းနဲ့ အဆုံးသတ်ပေးလေ့ရှိတဲ့ ကာရန်အိုက်ဖယ်လ် ဖြစ်နေပါတယ်။ သူ့ဘဝလည်း အလွမ်းဇာတ်ဖြစ်တော့မယ်လို့ ယူဆထားတဲ့ ဟာရိုးက ကျန်တဲ့အချိန်တွေမှာ ကိုယ်ရှင်သန်ချင်သလို အတတ်နိုင်ဆုံး နေထိုင်ဖို့ ဆုံးဖြတ်လိုက်တယ်။ သူ ဘယ်လောက်ကြိုးစားကြိုးစား ကြားထားရတဲ့ ဇာတ်သိမ်းအတိုင်းပဲ ဖြစ်လာမှာလား။ စာရေးဆရာက စိတ်ပြောင်းပြီး သူ့ကို အသက်ရှင်ခွင့်ပေးပါ့မလား။

၁၉၆၄ ခုနှစ်၊ Pennsylvania ပြည်နယ် Erie မြို့က လူငယ်လေးယောက်ပါ တီးဝိုင်းတစ်ဖွဲ့ဟာ ကိုယ်တိုင်ရေး၊ ကိုယ်တိုင်တီး၊ ကိုယ်တိုင်ဆိုထားတဲ့ သီချင်းတစ်ပုဒ်နဲ့ မမျှော်လင့်ဘဲ လူသိများလာပါတယ်။ တဖြည်းဖြည်း နာမည်ရလာတာနဲ့အမျှ အသံသွင်းကုမ္ပဏီကြီးတစ်ခုဆီက ကမ်းလှမ်းချက်လည်း ရောက်လာတယ်။ နိုင်ငံတစ်ဝန်း ဖျော်ဖြေပွဲတွေ သွားရ၊ ဓာတ်ပုံတွေ ရိုက်ရနဲ့ သူတို့လေးယောက် မအားမလပ် ဖြစ်လာကြပါတယ်။ လူမသိသူမသိဘဝကနေ ရုတ်တရက် တိုင်းသိပြည်သိ အနုပညာရှင်တွေ ဖြစ်လာတဲ့အခါ အောင်မြင်မှုနဲ့အတူ ပါလာတဲ့ဝန်ကို ဘယ်လိုထမ်းကြမလဲ။ ဘဝင်မမြင့်ဘဲ အောင်မြင်မှုကို ဆက်ထိန်းထားနိုင်ပါ့မလား။ ဇာတ်လမ်းက တီးဝိုင်းလေးရဲ့ နာမည်ရလာပုံကနေ အောင်မြင်ပြီးနောက် ကြုံရတဲ့အခြေအနေတွေဆီ ဆက်သွားပါတယ်။ ၁၉၉၆ ခုနှစ်ထွက် That Thing You Do! ကို Tom Hanks က ဒါရိုက်တာနဲ့ ဇာတ်ညွှန်းရေးသူအဖြစ် ပွဲဦးထွက်လုပ်ထားပြီး ဇာတ်ပို့သရုပ်ဆောင်အဖြစ်လည်း ပါဝင်ထားပါတယ်။ Tom Everett Scott၊ Johnathon Schaech၊ Steve Zahn နဲ့ Liv Tyler တို့ အဓိကသရုပ်ဆောင်ထားတဲ့ ဒီဂီတဟာသဒရာမာမှာ အမည်တူ မူရင်းဇာတ်ဝင်သီချင်းလည်း ပါဝင်တယ်။ ဦးသန့်ကို တလေးတစား ထည့်သွင်းဖော်ပြထားတဲ့ စာတစ်ကြောင်းနဲ့ ဇာတ်ဝင်ခန်းတစ်ခန်းလည်း ရှိပါတယ်။

ဆပ်တရာနဲ့ မယ်ဂနာတို့ဟာ စီးပွားရေးတောင့်တင်းပြီး အချင်းချင်း စီးပွားဖက်လည်း ဖြစ်နိုင်တဲ့ မိသားစုနှစ်စုကပါ။ မယ်ဂနာက ဆပ်တရာကို တကယ်ချစ်ပြီး ဘဝကို အတူရှေ့ဆက်ချင်ပေမယ့် ဆပ်တရာနဲ့ နှစ်ဖက်မိဘတွေကတော့ စီးပွားရေးအကျိုးအတွက် ပေါင်းဖက်ဖို့ ဆုံးဖြတ်ထားကြတာ ဖြစ်ပါတယ်။ တစ်ဖက်မှာ ဗာရွန်နဲ့ အာနူရှာတို့က အချင်းချင်း မေတ္တာမျှခဲ့ကြတဲ့ ချစ်သူတွေပါ။ ဒါပေမယ့် နှစ်ယောက်တန်ဖိုးထားတဲ့အရာတွေ မတူညီတာကြောင့် အတူဘဝထူထောင်ဖို့ ကြန့်ကြာနေကြတယ်။ အဲဒီအချိန်မှာပဲ အာမခံဝန်ဆောင်မှုပေးနေတဲ့ ဗာရွန်ဟာ ဆပ်တရာနဲ့ မယ်ဂနာတို့ရဲ့ စုံတွဲအာမခံကိစ္စကို ဆောင်ရွက်ပေးရင်း သူတို့နဲ့ ဆုံလာပါတယ်။ အပြင်ပန်းမှာ အရာအားလုံး ပြည့်စုံနေတာနဲ့ပဲ အချစ်လို့ ယူဆပြီး ရှေ့ဆက်လို့ရမလား။ ချစ်ခြင်း၊ စီးပွားရေးနဲ့ ကိုယ်တန်ဖိုးထားရာတွေကြားမှာ ဒီလူတွေ ဘယ်လိုရွေးချယ်ကြမလဲဆိုတာကို ဆက်ပြထားပါတယ်။

အမန်ဒါဟာ ငယ်စဉ်က ရွေးချယ်မှုတွေကို ဖြတ်သန်းလာပြီး သမီးလေးတစ်ယောက်ကို တစ်ကိုယ်တည်း ရုန်းကန်ပြုစုလာရတဲ့ မိခင်ပါ။ မေတ္တာစစ်ကို ရှာဖွေခဲ့ပေမဲ့ အပေါ်ယံဆက်ဆံရေးတွေနဲ့ပဲ ကြုံခဲ့ရတယ်။ အဲဒီနောက် ဆိုရှယ်မီဒီယာကနေ သိကျွမ်းလာတဲ့ မိုက်ကယ့်အပေါ် မမျှော်လင့်ဘဲ တဖြည်းဖြည်း သံယောဇဉ်တွယ်လာခဲ့ပါတယ်။ တခြားနိုင်ငံမှာနေတဲ့ မိုက်ကယ့်ကို လူချင်းတွေ့နိုင်ဖို့ အခွင့်အရေးရလာတော့ နှစ်ယောက်သား တွေ့ဆုံဖြစ်ကြတယ်။ စတွေ့ချိန်မှာ အခက်အခဲ၊ အတားအဆီးတွေရှိပေမဲ့ နောက်တော့ အချင်းချင်း နားလည်မှုရလာကြပါတယ်။ အမန်ဒါကလည်း မိုက်ကယ့်ကို သူအကြာကြီးရှာနေခဲ့တဲ့ ဘဝလက်တွဲဖော်လို့ ယုံကြည်လာပြီး မျှော်မှန်းထားတဲ့ဘဝလေးကို ပိုင်ဆိုင်ရတော့မယ်လို့ စိတ်ကူးနေမိတယ်။ ဒါပေမဲ့ အဲဒီယုံကြည်မှုကြားမှာ မိုက်ကယ့်ရဲ့ စကားတွေနောက်ကွယ်က အမှန်တရားကို သူ မမြင်နိုင်တော့ပါဘူး။ အမန်ဒါ မျှော်လင့်ထားတဲ့ အချစ်နဲ့ဘဝက သူ့ဆီ တကယ်ရောက်လာမလား၊ တခြားအဖြစ်တစ်ခုကိုပဲ ရင်ဆိုင်ရမလား။

ဂန်အင်းဆူဆိုတဲ့ ကောင်လေးက သရဲတွေကို မြင်နိုင်သူပါ။ သရဲတွေကလည်း သူ့ကိုတွေ့ရင် အကူအညီတောင်းချင်ကြတယ်။ မွေးရပ်မြေကို ပြန်လာပြီး ကျောင်းတက်တဲ့အခါမှာလည်း ထူးဆန်းတဲ့ အရိပ်အယောင်တွေ စတွေ့လာရပါတယ်။ နောက်တော့ ကျောင်းမှာ နာကြည်းချက်တွေရှိတဲ့ သရဲတစ်ကောင် ရှိနေပြီး အားလုံးကို သတ်ပစ်ချင်လောက်အောင် အငြိုးကြီးနေတာကို သိလာရတယ်။ နေ့ခင်းနဲ့မတူတဲ့ ညဘက်ကျောင်းထဲမှာ အဲဒီသရဲက လူတွေကို ရန်ရှာလာတော့ အင်းဆူအတွက်လည်း ရင်ဆိုင်စရာတွေ ဖြစ်လာပါတယ်။ သူနဲ့ သရဲကြားမှာ ဘယ်လိုပတ်သက်မှုရှိသလဲ၊ သရဲရဲ့အငြိုးတွေက ဒီထက် ပိုကြီးလာဦးမလားဆိုတဲ့ မေးခွန်းတွေနဲ့ ဆက်ထားတဲ့ ကျောင်းနောက်ခံ သရဲဇာတ်လမ်းပါ။ ၂၀၁၄ ခုနှစ်မှာ ထွက်ရှိခဲ့ပြီး Kang Ha Neul နဲ့ Kim So Eun တို့ အဓိကပါဝင်ထားပါတယ်။

သံရုံးမှာ အလုပ်လုပ်တဲ့ ခင်ပွန်းဖြစ်သူ ပဲရစ်မှာ တာဝန်ကျတော့ အမျိုးသမီးတစ်ယောက်လည်း သူနဲ့အတူ လိုက်လာပါတယ်။ ခင်ပွန်းကို ဖွယ်ဖွယ်ရာရာ ချက်ကျွေးချင်လို့ ဟင်းချက်နည်းစာအုပ်တွေ လိုက်ရှာရာက တွေ့သမျှ ပြင်သစ်ဟင်းလျာချက်နည်းတွေဟာ ပြင်သစ်ဘာသာနဲ့ပဲ ရေးထားတာ ဖြစ်နေတယ်။ အဲဒီကနေ လုပ်ဖော်ကိုင်ဖက်တချို့နဲ့အတူ ပြင်သစ်ဟင်းလျာချက်နည်းတွေကို အင်္ဂလိပ်လိုရေးပြီး စာအုပ်ထုတ်ဖို့ ကြိုးစားလာပါတယ်။ ဒါပေမယ့် ထုတ်ဝေသူရှာရတာ မလွယ်ဘဲ အခက်အခဲတွေနဲ့ ပယ်ချခံရတာတွေကို ကြုံရတယ်။ ပြင်သစ်ဟင်းလျာချက်နည်းတွေကို အမေရိကန်ဆီ ယူဆောင်လာပေးတဲ့ ဒီအမျိုးသမီးရဲ့အကြောင်းကို အခြေခံထားပြီး သူတို့ရေးထားတဲ့စာအုပ် ထုတ်ဝေနိုင်ဖို့ ဘယ်လိုဆက်ကြိုးစားကြမလဲဆိုတာ ပြထားပါတယ်။

Az က ကမာမွေးမြူရေးလုပ်ငန်းမှာ အလုပ်လုပ်တဲ့ လူငယ်တစ်ယောက်ပါ။ ကမာအကြောင်း ကောင်းကောင်းသိသလို အခွံခွာတဲ့နေရာမှာလည်း ကျွမ်းကျင်တယ်။ တစ်နေ့တော့ သူ့ချစ်သူ Jess ကို လက်ထပ်ခွင့်တောင်းဖို့ ကမာထဲမှာ လက်စွပ်ထည့်ပြီး ပြင်ဆင်လိုက်ပါတယ်။ ဒါပေမယ့် မျှော်လင့်ထားသလို အဖြေမရဘဲ Jess က သူ့ကို လမ်းခွဲသွားတော့တယ်။ အသည်းကွဲနေတဲ့ Az ကို ပြန်ပျော်လာအောင် လုပ်ပေးမယ်ဆိုပြီး သူငယ်ချင်းတွေက ဝိုင်းပါလာကြပါတယ်။ ကူညီဖို့ကြိုးစားကြပေမယ့် ဝင်ရှုပ်သလို ဖြစ်နေတာတွေလည်း ရှိတယ်။ Az ကတော့ အသည်းကွဲဒဏ်ရာ သက်သာဖို့ ကြိုးစားနေရင်း နောက်ထပ်အချစ်တစ်ခုကို တွေ့မလား၊ သူ့ကိုထားသွားတဲ့ ချစ်သူဟောင်းနဲ့ပဲ ပြန်တွဲဖြစ်မလားဆိုတာ ဟာသနှောပြီး ဆက်ပြထားပါတယ်။

နန္ဒနီနဲ့ ဗန်ရားဂ်ျတို့ဟာ မိဘတွေ ပေးစားလို့ လက်ထပ်ခဲ့ကြပါတယ်။ ဒါပေမယ့် နန္ဒနီမှာ လက်မထပ်ခင်က ဆမီးရ်ဆိုတဲ့ ချစ်သူရှိခဲ့ပြီး အိမ်ထောင်ကျသွားတဲ့နောက်မှာလည်း အချစ်ဟောင်းကို မမေ့နိုင်ဘဲ လွမ်းဆွေးနေခဲ့တယ်။ ဒီအကြောင်းကို ခင်ပွန်းဖြစ်သူ ဗန်ရားဂ်ျ သိသွားတဲ့အခါ နန္ဒနီကို ဆမီးရ်ရှိတဲ့ အီတလီဆီ လိုက်ပို့ပေးဖို့ ဆုံးဖြတ်လိုက်ပါတယ်။ ဒီခရီးကြောင့် သူတို့အိမ်ထောင်ရေး ပြိုကွဲသွားမှာလား၊ နန္ဒနီက လက်ရှိခင်ပွန်းနဲ့ မမေ့နိုင်သေးတဲ့ အချစ်ဟောင်းတို့ကြား ဘယ်သူ့ကို ရွေးမလဲဆိုတာ ဆက်ကြည့်ရမှာပါ။ ဆလ်မန်းခန်း၊ အာဂျေးဒေ့ဗ်ဂန်ဒ်နဲ့ အက်ရှ်ဝါးရွိုင်တို့ ပါဝင်ထားတဲ့ ဘောလိဝုဒ် အချစ်ဒရာမာဖြစ်ပြီး အချစ်၊ အလွမ်း၊ အဆွေးတို့ကြားမှာ ဟာသတွေလည်း ရောစပ်ထားပါတယ်။

အက်ဒရီယမ်ဟာ အကသမားတစ်ယောက်ဖြစ်ပေမယ့် ဆိုင်ကယ်တိုက်ခံရပြီးနောက် သူ့ဝါသနာ၊ အလုပ်နဲ့ ချစ်သူကိုပါ ဆုံးရှုံးလိုက်ရပါတယ်။ အဲဒီနောက်မှာတော့ မူးယစ်ဆေးသုံးလိုက်၊ အရက်သောက်လိုက်နဲ့ ဖြစ်သလို နေလာခဲ့တယ်။ ဒီလိုနေနိုင်ဖို့ ငွေလိုလာတဲ့အခါ အသက်ကြီးပြီး ချမ်းသာတဲ့ မိန်းမတွေဆီကနေ ငွေချူစားလာပါတော့တယ်။ တစ်နေ့မှာ သူ့လိုပဲ သူများဆီက ငွေချူစားနေတဲ့ မိန်းမချောလေး မာဂေါ့နဲ့တွေ့ပြီး နှစ်ယောက်သား ချစ်မိသွားကြတယ်။ ဒါပေမယ့် အချစ်ရှိရုံနဲ့ ဆင်းဆင်းရဲရဲ အတူနေဖို့တော့ နှစ်ယောက်လုံး စိတ်ကူးမရှိကြဘူး။ ငွေရဖို့ အလိမ်အညာတွေကို အတူကြံစည်ကြတဲ့အခါ သူတို့ရဲ့ဟန်ဆောင်မှုတွေနောက်မှာ ဘာတွေရှိနေမလဲ၊ သူများခံစားချက်ကို အသုံးချနေတဲ့ သူတို့နှစ်ယောက်ကိုရော ဘယ်သူတွေက ပြန်သစ္စာဖောက်လာမလဲဆိုတဲ့ မေးခွန်းတွေ ပေါ်လာပါတယ်။ Francois Cluzet ပါဝင်ထားတဲ့ ဒီရာဇဝတ်ဒရာမာမှာ အချစ်ကို အလွန်အမင်းယုံကြည်သူတွေ၊ ကိုယ်ကျင့်တရားဖောက်ဖျက်သူတွေနဲ့ ကိုယ့်အကျိုးကိုသာ ကြည့်သူတွေအကြောင်းကို ဟာသရောစပ်ပြီး တင်ပြထားပါတယ်။ လိင်ပိုင်းဆိုင်ရာအခန်းတွေ ပါဝင်တာကြောင့် မိသားစုအတူကြည့်ဖို့တော့ မသင့်တော်ပါဘူး။

စတက်ရှ်က ညီမနဲ့ အခန်းတစ်ခန်းတည်း အတူနေပြီး ကားပါကင်မှာ အစောင့်လုပ်နေရတဲ့ လူငယ်တစ်ယောက်ပါ။ ဘဝမှာ ဘာဆက်လုပ်ရမလဲ မသိသေးပေမယ့် ချို့ချို့တဲ့တဲ့ အခုလိုအခြေအနေကိုတော့ စိတ်ကုန်နေပြီ။ ကိုယ့်ဘဝ တိုးတက်ပြောင်းလဲဖို့ တစ်ခုခု လုပ်ချင်နေပါတယ်။ တစ်နေ့မှာ သူ့ဝမ်းကွဲအစ်ကို ရိုမန်က သူ့အဖွဲ့ထဲဝင်ဖို့ လာခေါ်တယ်။ ရိုမန်ဟာ နိုင်ငံရေးတက်ကြွလှုပ်ရှားသူဖြစ်သလို တတိယအင်ပါယာကို ထောက်ခံသူလည်း ဖြစ်ပါတယ်။ လက်ရှိဘဝကနေ ပြောင်းလဲနိုင်ဖို့ ဘာမဆိုလုပ်မယ်လို့ ဆုံးဖြတ်ထားတဲ့ စတက်ရှ်က အဲဒီအဖွဲ့ထဲ ဝင်လိုက်တယ်။ အဲဒီနောက် မမျှော်လင့်ထားတဲ့ ဖြစ်ရပ်တွေ ဆက်တိုက်ကြုံလာရပုံကို ရိုက်ကူးထားတဲ့ Netflix ရဲ့ ပိုလန်နိုင်ငံရေး ဟာသဒရမ်မာပါ။

Manny က အပင်တွေကို ချစ်လို့ အပင်နဲ့ပတ်သက်တဲ့ ဆိုင်လေးတစ်ဆိုင် ဖွင့်ထားတဲ့ ကောင်လေးပါ။ နေ့တိုင်း အပင်တွေကို ပြုစုရင်း ပန်းပွင့်လေးတွေနဲ့ အလုပ်ရှုပ်နေတဲ့ သူ့ဘဝမှာ တခြားဘာမှ လိုအပ်မနေသလိုပါပဲ။ အဲဒီလို နေထိုင်နေတဲ့ Manny ရဲ့ဘဝထဲကို Ayef ဆိုတဲ့ ကောင်မလေးတစ်ယောက် ဝင်ရောက်လာပါတယ်။ အပင်တွေကြားမှာပဲ ပျော်နေတဲ့ ကောင်လေးနဲ့ သူ့ဘဝထဲ ရောက်လာတဲ့ ကောင်မလေးတို့အကြောင်းကို ဟာသနဲ့ အချစ်ဇာတ်လမ်း တွဲဖက်ထားတဲ့ ဖိလစ်ပိုင်ရုပ်ရှင်ပါ။

ဗီယက်နမ်က သန်းကြွယ်သူဌေးတစ်ယောက်ရဲ့သမီး မေဟာ သူချစ်တဲ့အိုင်ဒေါလ် ပါ့ခ်နဲ့ တွေ့ဖို့ ထိုင်းနိုင်ငံကို ရောက်လာပါတယ်။ ပါ့ခ်နဲ့အတူ ညစာစားရင်း မွေးနေ့ကျင်းပနိုင်အောင် အဖေဖြစ်သူက မွေးနေ့လက်ဆောင်အဖြစ် စီစဉ်ပေးထားတာပါ။ အမြဲတမ်း အဖေ့အရိပ်အောက်မှာ အထိန်းတော်တွေ၊ ကိုယ်ရံတော်တွေနဲ့ နေလာရတဲ့ မေအတွက် ဒီခရီးက သူတွေ့ချင်နေတဲ့သူနဲ့ ရင်းရင်းနှီးနှီးတွေ့ရမယ့် အခွင့်အရေးဖြစ်နေတယ်။ ထိုင်းကိုရောက်တော့ မေဟာ ဆိုင်ကယ်သမားလေး ဘွိုင်းနဲ့ မထင်မှတ်ဘဲ ဆုံမိပါတယ်။ ဘွိုင်းရဲ့အကူအညီနဲ့ ကိုယ်ရံတော်တွေလက်ကနေ ထွက်ပြေးပြီး ပါ့ခ်ရဲ့အမြင်မှာ အထင်ကြီးစရာကောင်မလေးတစ်ယောက် ဖြစ်လာဖို့ ကြိုးစားတော့တယ်။ အဖေက ပိုးလိုဥထားတဲ့ မေနဲ့ ကိုယ့်ဝမ်းကိုယ်ကျောင်းနေရတဲ့ ဘွိုင်းတို့ အတူသွားလာကြရင်း အလွဲအချော်တွေနဲ့ ကြုံကြရပါတယ်။ Push နဲ့ August တို့ ပါဝင်ထားတဲ့ အချစ်ဟာသဇာတ်ကားပါ။

Koyomi ဟာ အလယ်တန်းကျောင်းသားဘဝမှာ အပြိုင်ကမ္ဘာတစ်ခုဆီ ကူးပြောင်းမိခဲ့ပါတယ်။ အထက်တန်းကျောင်းသား ဖြစ်လာချိန်မှာတော့ Kazune ဆိုတဲ့ မိန်းကလေးတစ်ယောက်က သူ့ကို လူမှားပြီး နှုတ်ဆက်လာတယ်။ အဲဒီတွေ့ဆုံမှုကနေ ရိုးရှင်းမယ့်ပုံပေါ်တဲ့ အချစ်ဇာတ်လမ်းတစ်ပုဒ် စတင်လာပါတယ်။ အပြိုင်ကမ္ဘာတွေအကြောင်းကို နောက်ခံထားပေမယ့် ဇာတ်လမ်းက Koyomi ရဲ့ အချစ်ရေးကို အဓိကထားပြီး ရယ်စရာနဲ့ ဝမ်းနည်းစရာတွေ ရောယှက်တင်ဆက်ထားတာပါ။ ဒီအချစ်ဇာတ်လမ်းကို သာယာတဲ့ဇာတ်လမ်းလို့ ခံစားရမလား၊ ဝမ်းနည်းစရာလို့ မြင်မလားဆိုတာကတော့ ကြည့်သူရဲ့အမြင်ပေါ် မူတည်နေပါတယ်။ ၂၀၁၆ ခုနှစ်မှာ ထွက်ရှိခဲ့တဲ့ Yomoji Otono ရဲ့ ဝတ္ထုနှစ်ပုဒ်ကို ပြန်ရိုက်ထားတဲ့ အန်နီမေးရှင်းရုပ်ရှင်နှစ်ကားထဲက တစ်ကားဖြစ်ပြီး နောက်တစ်ကားက To Me, the One Who Loved You ပါ။ ဇာတ်လမ်းနှစ်ခုကို အစကတည်းက ပြထားပေမယ့် ဆက်စပ်တင်ဆက်ပုံက ငြင်သာတာကြောင့် နောက်ပိုင်းမှ သတိထားမိနိုင်တဲ့ ဖွဲ့စည်းပုံကို သုံးထားပါတယ်။

ကိတ်ထ်စမစ်သ်ဟာ ရောင်းအားကောင်းခဲ့တဲ့ သူ့စာအုပ်ရဲ့ အဆက်ကို ရေးနေသူပါ။ စာရေးဖို့ ဈာန်ဝင်ချင်တဲ့အတွက် ကားပြင်ဆရာ မိုင်လ်ဟတ်ဆန် အလုပ်လုပ်တဲ့ တာယာဂိုထောင်ကို အကြောင်းအမျိုးမျိုးပြပြီး မကြာခဏ သွားနေတတ်ပါတယ်။ အဲဒီလို အဝင်အထွက်လုပ်ရင်း မိုင်လ်နဲ့ တဖြည်းဖြည်း ရင်းနှီးလာကြတယ်။ သူတို့နှစ်ယောက်ရဲ့ ရင်းနှီးမှုက အတိုင်းအတာတစ်ခုကို ကျော်လာချိန်မှာ ခံစားချက်တွေလည်း ပိုနက်ရှိုင်းလာပါတယ်။ ဒါပေမဲ့ ကိတ်ထ်မှာ ဖုံးကွယ်ထားတဲ့ အကြောင်းတစ်ခုရှိနေတယ်။ အဲဒီအကြောင်းကို မိုင်လ်သိသွားတဲ့အခါ သူတို့ဆက်ဆံရေး ဘယ်လိုဖြစ်လာမလဲ။ စာရေးဆရာမ အေမီဒေါ်စ်ရဲ့ Wait With Me စာအုပ်စီးရီးထဲက ပထမဆုံးစာအုပ်ကို Passionflix က ရုပ်ရှင်အဖြစ် ပြန်ရိုက်ထားတာပါ။ စာအုပ်မျက်နှာဖုံးမော်ဒယ်၊ ပရိုဂျူဆာနဲ့ သရုပ်ဆောင် အန်ဒရူးဘီရာနက်၊ ဓာတ်ပုံဆရာ၊ ဒါရိုက်တာနဲ့ သရုပ်ဆောင် မက်ဒီဆင်လော်လောတို့ ပါဝင်ထားတဲ့ အချစ်ဇာတ်ကားဖြစ်ပါတယ်။

1942 ခုနှစ်မှစပြီး ပင်ဘောကိုရာဇဝတ်အဖွဲ့အစည်းတွေချုပ်ကိုင်ထားတယ်ဆိုတဲ့အကြောင်းပြချက်နဲ့ အမေရိကန်ကမြို့တော်တော်များများမှာ ပိတ်ပင်ပစ်ခဲ့ပါတယ် ။ 1970 ပြည့်နှစ်တွေမှာ Roger Sharpe ဆိုတဲ့နှုတ်ခမ်းမွှေးကားကားနဲ့လူတစ်ယောက် နယူးယော့မြို့ကြီးကိုစာရေးဆရာဖြစ်ချင်လို့ ရောက်လာရင်း မဂ္ဂဇင်းတိုက်တစ်ခုမှာအလုပ်လည်းရ Ellen ဆိုတဲ့ကောင်မလေးလည်းရပြီး သာယာနေတဲ့အချိန်မှာ သူရဲ့တစ်ခုတည်းသောထွက်ပေါက်ဖြစ်တဲ့ ပင်ဘောကိုပိတ်ပင်ထားကြောင်းသိရှိသွားတဲ့အချိန် Roger တစ်ယောက် စာရေးဆရာအနေနဲ့ရော Music and Amusement Association(MAA) နဲ့ပူးပေါင်းပြီးရော ပင်ဘောတရားဝင်ပြန်လည်ဖြစ်မြောက်ရေးအတွက် ဘယ်လိုတွေကြိုးစားမလဲဆိုတာကို ကြည့်ရှုခံစားကြရမှာပဲဖြစ်ပါတယ်။ ဒီဇာတ်ကားလေးဟာဆိုရင်တော့ ပင်ဘောရဲ့ကယ်တင်ရှင်ကြီးRoger Sharpe ရဲ့ဖြစ်ရပ်မှန်ဘဝကိုအခြေခံပြီး ရိုက်ကူးထားတာပဲဖြစ်ပါတယ်ခင်ဗျာ ။ ပင်ဘောကိုအကြောင်းပြချက်မျိုးစုံနဲ့ပိတ်ပင်ထားတဲ့ အမေရိကန်ကမြို့တွေရဲ့ဥပဒေတွေ၊ ပင်ဘောစတီထွင်တုန်းကနဲ့အခု ဘယ်လိုတွေပြောင်းလဲသွားလဲဆိုတာတွေနဲ့ Roger နဲ့ Ellen တို့အတူဖြတ်သန်းခဲ့ကြပုံကို လက်ရှိအချိန်မှာ Roger Sharpe ကပြန်ပြောပြနေပုံနဲ့တစ်မျိုး 1970 တုန်းက Roger Sharpe အနေနဲ့တစ်ဖုံ ဟာသလေးနှောပြီးတင်ဆက်ထားပါတယ် ။ ဒါရိုက်တာတွေကတော့ညီအကိုတွေဖြစ်တဲ့ Austin နဲ့ Meredith Bragg ကရိုက်ကူးထားတာဖြစ်ပြီး Roger အငယ်အနေနဲ့ West Side Story(2021) ထဲက Mike Faist နှင့် Roger

Birdie နဲ့ Alden တို့လင်မယားက တစ်ယောက်ကိုတစ်ယောက် ပွင့်ပွင့်လင်းလင်း မရှိကြဘဲ ကိုယ်စီလျှို့ဝှက်ချက်တွေနဲ့ နေကြသူတွေပါ။ Birdie က သူ့အလုပ်ရှင်လည်းဖြစ်တဲ့ အမေရဲ့ဖိအားအောက်မှာ အိမ်ခြံမြေဆိုင်ရာ ရှေ့နေအလုပ် လုပ်နေပါတယ်။ Alden ကတော့ အလွတ်စုံထောက်ဖြစ်ဖို့ သင်တန်းတက်နေတာကို မိန်းမမသိအောင် ဖုံးထားတယ်။ အဲဒီလို သင်တန်းခိုးတက်နေရာက Alden ဟာ လူသတ်မှုတစ်ခုမှာ ပါဝင်ပတ်သက်မိသွားပါတယ်။ Birdie ကိုယ်တိုင်လည်း အဲဒီအမှုနဲ့ မကင်းမရှင်း ဖြစ်နေတဲ့အခါ လျှို့ဝှက်ချက်ကိုယ်စီရှိတဲ့ ဒီလင်မယား ဘာတွေဆက်ကြုံရမလဲ။ ၂၀၂၃ အစောပိုင်းမှာ ထွက်ရှိခဲ့တဲ့ ရုပ်သံဇာတ်ကားဖြစ်ပြီး လူသတ်မှုနဲ့ စုံထောက်အကြောင်းကို ပေါ့ပေါ့ပါးပါး တင်ဆက်ထားပါတယ်။

ပဲရစ်မှာနေတဲ့ ဖိလစ်ပိုင်အနုပညာရှင် ဂျိုဂျိုမှာ ချစ်သူတွေ အများကြီးရှိခဲ့ဖူးပါတယ်။ ဒါပေမဲ့ သူ့ပန်းချီကားတွေကို ရေးဆွဲဖြစ်စေတဲ့ လျှို့ဝှက်ဆန်းကြယ်သော မိန်းမတစ်ယောက်ကြောင့် ဖြစ်နေတဲ့ ဘဝထဲက လစ်ဟာမှုကိုတော့ ဖြည့်ဆည်းမရသေးဘူး။ နာမည်မသိ၊ နောက်ကြောင်းမသိရတဲ့ အဲဒီမိန်းမကို သူ့စိတ်ထဲကနေ နှစ်ပေါင်းများစွာ ဖယ်မရခဲ့ပါဘူး။ တွေ့သမျှ မိန်းကလေးတိုင်းမှာ သူရှာနေသူရဲ့ အရိပ်အယောင်ကို လိုက်ရှာရင်း ဒီတစ်ယောက်တော့ ဖြစ်လေမလားလို့ မျှော်လင့်နေခဲ့တယ်။ တစ်နေ့မှာတော့ မာရီဆိုတဲ့ မိန်းမတစ်ယောက် ဂျိုဂျိုဆီ ရောက်လာပြီး သူ့ပန်းချီကားတွေထဲက မိန်းမဟာ သူမပဲလို့ ပြောလာပါတယ်။