Animation

အင်ဒိုနီးရှားက သစ်တောတစ်ခုမှာ လူတွေဟာ တိရစ္ဆာန်တွေကို အမဲလိုက်တဲ့အပြင် သစ်တောကိုပါ မီးရှို့ဖျက်ဆီးကြပါတယ်။ ကြံ့ကလေးရီကီကတော့ အဲဒီဘေးကနေ ကံကောင်းစွာ အသက်ရှင်ကျန်ခဲ့တယ်။ နှစ်တွေကြာလာတဲ့အခါ ရီကီဟာ တစ်ကောင်တည်း နေထိုင်ရင်း တခြားတောရိုင်းတိရစ္ဆာန်တွေကို အားတက်သရော ကူညီပေးနေပါတယ်။ သူ့ခွန်အားနဲ့ ကူညီတတ်တဲ့စိတ်ကြောင့် တောတစ်ခွင်မှာလည်း လူသိများလာတယ်။ တစ်နေ့မှာတော့ မုဆိုးတစ်ယောက်က ရီကီကို ဖမ်းဖို့ ကြိုးစားလာပါတယ်။ ရီကီ ရုန်းကန်တိုက်ခိုက်ပြီး လွတ်လာပေမယ့် သူ့ကြံ့ချိုကတော့ မုဆိုးဆီမှာ ကျန်ခဲ့တယ်။ ချိုမရှိတော့လို့ ကိုယ့်ကိုယ်ကိုယ် စိတ်ပျက်အားငယ်နေတဲ့ ရီကီဟာ မိတ်ဆွေဘဲကလေး ဘန်နီနဲ့အတူ ချိုအသစ်ပြန်ပေါက်အောင် လုပ်ပေးနိုင်မယ့် မှော်ဆေးဆရာကို ရှာဖို့ ထွက်လာပါတယ်။ သစ်တောတစ်ခွင် လိုက်ရှာကြရင်း သူတို့ ဘယ်လိုအခက်အခဲတွေ ကြုံကြရမလဲ။

ဟွမ်ဂယောင်မင်းတို့ကျောင်းမှာ အားကြီးသူတွေက အားနည်းသူတွေကို အနိုင်ကျင့်နေကြပါတယ်။ အငိုသန်သူလို့ အခေါ်ခံရတဲ့ ဟွမ်ဂယောင်မင်းကတော့ အဲဒီအနိုင်ကျင့်မှုတွေကို အောင့်အီးသည်းခံနေရသူပါ။ သူနဲ့ မူလတန်းကတည်းက ကျောင်းနေဖက်ဖြစ်လာတဲ့ ဂျောင်ဂျုံဆော့ရှိသလို သူတို့ကြားကို လောကကြီးကို အရွဲ့တိုက်တတ်တဲ့ ဂင်ချောလ်ဆိုတဲ့ ကောင်လေးတစ်ယောက်လည်း ရောက်လာပါတယ်။ ဒီကောင်လေးသုံးယောက်ဟာ ကိုယ်တိုင်ခံနေရတဲ့ အနိုင်ကျင့်မှုတွေအပြင် တခြားသူတွေ ကြုံနေရတာတွေကိုပါ ဖြေရှင်းဖို့ ကြိုးစားကြတယ်။ သူတို့ ဘယ်လိုရင်ဆိုင်ကြမလဲ၊ အဲဒီကိစ္စတွေက သူတို့ဘဝကို ဘယ်လိုရိုက်ခတ်လာမလဲဆိုတာကို ဇာတ်လမ်းမှာ ဆက်ပြထားပါတယ်။ ၂၀၁၁ ခုနှစ်ထွက် ဒီကိုရီးယားအန်နီမေးရှင်းဟာ စိတ်ပိုင်းဆိုင်ရာဖိအားတွေကို အလေးထားတဲ့ ဒရာမာ၊ သည်းထိတ်ရင်ဖိုဇာတ်ကားပါ။ ရင့်သီးတဲ့စကားအသုံးအနှုန်းတွေ၊ ထိတ်လန့်စရာအကြောင်းအရာတွေနဲ့ ကိုယ့်ကိုယ်ကိုယ် သတ်သေမှုဆိုင်ရာ အကြောင်းအရာတွေ ပါဝင်ပါတယ်။ ဒီဇာတ်ကားကို အခြေခံပြီး ၂၀၂၂ ခုနှစ်မှာ စီးရီးအဖြစ်လည်း ပြန်လည်ဖန်တီးထားပါတယ်။

ဂါလီဗာဟာ သူအရင်က ရောက်ဖူးပြီး အကူအညီပေးခဲ့ဖူးတဲ့ နိုင်ငံတစ်ခုဆီ နှစ်ပေါင်းလေးဆယ်အကြာမှာ ပြန်ရောက်လာပါတယ်။ ရှေးလူကြီးတွေရဲ့ဟောကိန်းအတိုင်း အချိန်ကိုက်ပြန်လာတာဖြစ်ပေမယ့် နိုင်ငံသားတွေကတော့ သူ့ကိုမြင်ပြီး အံ့ဩနေကြတယ်။ သူတို့ရဲ့သမိုင်းမှတ်တမ်းထဲမှာ ဂါလီဗာက ဧရာမလူဘီလူးကြီးဖြစ်ပေမယ့် အခုရောက်လာသူက သူတို့နဲ့ အရွယ်အစားတူတဲ့ ကောင်လေးတစ်ယောက် ဖြစ်နေလို့ပါ။ ကိုယ့်ကိုယ်ကိုယ် ဂါလီဗာလို့ ဘယ်လောက်ပဲ ပြောနေပါစေ နိုင်ငံသားတွေက မယုံကြဘူး။ သူတို့တစ်သက်လုံး သိထားတဲ့ပုံနဲ့ မတူတာကြောင့် အယောင်ဆောင်သူလို့ သတ်မှတ်လိုက်ကြပြီး ဂါလီဗာလည်း ကွပ်မျက်ခံရမယ့် အခြေအနေထိ ရောက်သွားပါတယ်။ ကွပ်မျက်ခံရခါနီးမှာပဲ အဲဒီနိုင်ငံဟာ စစ်အင်အားနဲ့ ဝင်ရောက်သိမ်းပိုက်ခံရမယ့် အန္တရာယ်ကို ကြုံလာရတယ်။ ဒီအခါ အယောင်ဆောင်လို့ စွပ်စွဲခံထားရတဲ့ ဂါလီဗာနဲ့ နိုင်ငံသားတွေ ပူးပေါင်းပြီး တိုက်ပွဲဝင်ကြရပါတော့တယ်။ ဒီကာတွန်းရုပ်ရှင်မှာ ဂါလီဗာရဲ့ စွန့်စားခန်းတွေနဲ့ အက်ရှင်အပြင် ဟာသအဖြစ်အပျက်တွေလည်း တွဲပါလာပါတယ်။

လိုးရစ်မျောက်မျိုးနွယ်တွေ နေထိုင်တဲ့ ရွာလေးက ချီချီဟာ ပြိုင်ကားမောင်းပြီး ဆုတွေယူဖို့ အရူးအမူး ကြိုးစားနေတဲ့ ကောင်လေးပါ။ ဒါပေမယ့် သူ့အဘွားကတော့ ခွင့်မပြုဘူး။ တစ်နေ့မှာ အာချီဗိန်းဂလိုးရီးရက်ဆိုတဲ့ ပြိုင်ကားချန်ပီယံ ဖားကြီးက သူတို့ရွာကို အပိုင်ဝယ်သိမ်းပြီး ဖျက်ဆီးဖို့ ကြိုးစားလာပါတယ်။ အိမ်ကို ပြန်ရွေးဖို့ ပိုက်ဆံမရှိတဲ့ ချီချီက ဗိန်းနဲ့ အပေးအယူတစ်ခု လုပ်လိုက်တယ်။ ပြိုင်ကားလောကရဲ့ အခက်ခဲဆုံး၊ အကြမ်းတမ်းဆုံး ပိုးသားလမ်းပြိုင်ပွဲမှာ သူအနိုင်ရရင် ရွာနဲ့အိမ်ကို ပြန်ပေးဖို့ပါ။ ဒီလိုနဲ့ အနိုင်ရဖို့ မလွယ်တဲ့ ပြိုင်ပွဲကြီးကို မိတ်ဆွေတွေနဲ့ သူ့ကိုချစ်တဲ့သူတွေရဲ့ အကူအညီယူပြီး ချီချီ ဝင်ပြိုင်ဖြစ်သွားပါတယ်။ ကားပြိုင်ပွဲကို အခြေခံထားတဲ့ ၂၀၂၃ ခုနှစ်ထွက် ကာတွန်းရုပ်ရှင်ဖြစ်ပြီး မိသားစုမေတ္တာ၊ ဟာသနဲ့ စွန့်စားခန်းတွေ ပါဝင်ပါတယ်။ Agents of SHIELD မှာ အေးဂျင့်ဒေစီအဖြစ် သရုပ်ဆောင်ခဲ့တဲ့ Chloe Bennet က အသံသရုပ်ဆောင်အဖြစ် ပါဝင်ထားပါတယ်။

အထက်တန်းကျောင်းသူနှစ်ယောက်ဖြစ်တဲ့ Aki နဲ့ Taki တို့ ကျောင်းဆင်းပြီး ကော်ဖီဆိုင်မှာ ထိုင်နေကြတုန်း Taki က ထူးဆန်းတဲ့အိပ်မက်တစ်ခုအကြောင်း ပြောပြပါတယ်။ အိပ်မက်ထဲမှာ မျက်လုံးတစ်လုံးတည်းပါတဲ့ မကောင်းဆိုးဝါးနဲ့ တွေ့ခဲ့ရတာပါ။ အဲဒီနောက် အအေးထပ်ဖြည့်ဖို့ ထသွားတဲ့ Taki ဟာ ပြန်ရောက်မလာတော့ဘူး။ အချစ်ဆုံးသူငယ်ချင်းကို Aki လိုက်ရှာရင်း တခြားလူတွေလည်း အဲဒီမျက်လုံးတစ်လုံးနဲ့ မကောင်းဆိုးဝါးကို အိပ်မက်မက်ကြတယ်ဆိုတာ သိလာရတယ်။ ဒီကနေ မကောင်းဆိုးဝါးဖန်တီးထားတဲ့ ထူးဆန်းတဲ့လောကအကြောင်းကိုပါ စူးစမ်းမိလာပါတယ်။ Taki ပြောခဲ့တာတွေကို ပြန်စဉ်းစားပြီး သဲလွန်စနောက်လိုက်ရာက Shibuya မြို့ဆီ ရောက်သွားတဲ့အခါ ဘယ်လိုပဟေဠိတွေနဲ့ ဆက်ကြုံရမလဲ။ ဒီဇာတ်ကားကို ဖန်တီးသူ Eve ဟာ ဂျပန်တေးရေးဆရာ၊ အဆိုတော်နဲ့ ပရိုဂျူဆာတစ်ယောက်ဖြစ်ပြီး Jujutsu Kaisen ရဲ့ အဖွင့်သီချင်းအပါအဝင် Anime အများအပြားမှာ သီချင်းတွေ သီဆိုထားသူပါ။ သူ့ရဲ့သီချင်းတွေ ပါဝင်တဲ့ ဒီလက်ရာမှာ လူသရုပ်ဆောင်တွေနဲ့ ရိုက်ကူးထားတဲ့အပိုင်း၊ Animation နဲ့ ဂီတတို့ကို ပေါင်းစပ်ထားပါတယ်။ ကြာချိန် ၅၈ မိနစ်ရှိပြီး Netflix က ၂၀၂၂ ခုနှစ် မတ်လ ၁၅ ရက်မှာ ထုတ်လွှင့်ခဲ့ပါတယ်။

မီအို၊ အာရာတာနဲ့ မာဒိုကာတို့ဟာ သူငယ်ချင်းသုံးယောက်ပါ။ မီအိုနဲ့ မာဒိုကာ နှစ်ယောက်စလုံးက အာရာတာကို တိတ်တိတ်လေး သဘောကျနေကြတယ်။ မီအိုကတော့ ဖြစ်သမျှနောက် လိုက်နေရင်း လွယ်လွယ်နဲ့ အရှုံးပေးတတ်သူပါ။ အာရာတာနဲ့ ငယ်သူငယ်ချင်းတွေဖြစ်လို့ ပိုရင်းနှီးပေမဲ့ မာဒိုကာက အာရာတာကို စိတ်ဝင်စားနေကြောင်း ဖွင့်ပြောလာတဲ့အခါ ကိုယ့်ခံစားချက်ကို မပြောဘဲ အားပေးလိုက်မိပါတယ်။ မာဒိုကာကလည်း သူတို့နှစ်ယောက်ရဲ့ ရင်းနှီးမှုကို မခံစားနိုင်ဖြစ်နေတာပါ။ တစ်နေ့ မီအိုနဲ့ အာရာတာတို့ လျှောက်လည်ကြရင်း စကားများပြီး စကားလွန်သွားကြတယ်။ ပြန်တောင်းပန်ဖို့ မီအို အပြေးသွားတဲ့လမ်းမှာ မတော်တဆမှုတစ်ခု ကြုံရပြီး ဝိညာဉ်လွင့်သွားပါတော့တယ်။ ကိုယ့်ခံစားချက်အစစ်အမှန်ကို မပြောလိုက်ရသေးတဲ့ မီအိုက ဘဝမကူးဘဲ ကြားကမ္ဘာထဲကနေ လူ့လောကဆီ ပြန်နိုင်ဖို့ အစွမ်းကုန် ကြိုးစားရပါတယ်။ ၂၀၂၀ ခုနှစ်က ထွက်ရှိတဲ့ ဒါရိုက်တာ Yoshinobu Sena ရဲ့ ဒီအန်နီမေးရှင်းဇာတ်ကားမှာ မီအို လူ့လောကကို ပြန်ရောက်နိုင်ပါ့မလား၊ လမ်းမှာ ဘယ်လိုအခက်အခဲတွေ ကြုံရမလဲဆိုတာကို လိုက်ကြည့်ရပါတယ်။ အာရာတာက မီအိုအပေါ် ဘယ်လိုသဘောထားလဲဆိုတာလည်း သိရဖို့ ကျန်နေပါသေးတယ်။

ပင်လယ်ဓားပြပုံပြင်တွေ ဖတ်ထားတဲ့ နိုဘီတဟာ ရတနာကျွန်းတစ်ကျွန်းကို ရှာတွေ့ချင်နေပါတယ်။ အမည်မသိကျွန်းတစ်ခု ပေါ်လာတဲ့အကြောင်း သတင်းမှာ ကြေညာလိုက်တော့ ရတနာသွားရှာချင်စိတ်က ပိုပြင်းလာတယ်။ သူငယ်ချင်းတွေက ဝိုင်းလှောင်ကြတဲ့အခါ စိတ်တိုပြီး အဲဒီကျွန်းကို တွေ့အောင်ရှာမယ်လို့ အလောင်းအစားလုပ်လိုက်ပါတယ်။ ပြောပြီးမှ နိုဘီတက ထုံးစံအတိုင်း ဒိုရေမွန်ဆီ အကူအညီတောင်းတော့တာပါပဲ။ ဒိုရေမွန်လည်း မနေနိုင်ဘဲ နိုဘီတရဲ့ဆန္ဒအတိုင်း ကျွန်းကိုသွားဖို့ ဆုံးဖြတ်လိုက်တယ်။ ရတနာကျွန်းကို ရှာဖို့ ထွက်လာတဲ့ ဒီခရီးမှာ ပင်လယ်ဓားပြတွေနဲ့ ဘယ်လိုရင်ဆိုင်ပြီး အခက်အခဲတွေကို ကျော်ဖြတ်ကြမလဲ။ ၂၀၁၈ ခုနှစ်မှာ ထွက်ရှိခဲ့တဲ့ ၃၈ ကားမြောက် ဒိုရေမွန်ဇာတ်ကားဖြစ်ပြီး ၁၈၈၃ ခုနှစ်ထုတ် Treasure Island ဝတ္ထုကို အခြေခံထားပါတယ်။

၂၀၀၆ ခုနှစ်ထွက် Ultimate Avengers: The Movie ရဲ့အဆက်မှာ ချီတာရီတွေကို အနိုင်ယူခဲ့ပြီးနောက် Avengers အဖွဲ့အတွင်း အဆင်မပြေမှုတွေ ဖြစ်လာပါတယ်။ ကပ္ပတိန်အမေရိကဟာ စိတ်ဒဏ်ရာနောက်ဆက်တွဲ စိတ်ဖိစီးမှုဖြစ်တဲ့ PTSD အနည်းငယ် ခံစားနေရပြီး မစ်ရှင်တွေကိုပဲ ဖိလုပ်နေတယ်။ သူဦးဆောင်ရတဲ့ အဖွဲ့နဲ့ အဆင်မပြေတော့ဘဲ တစ်ယောက်တည်း လှုပ်ရှားသူလို ဖြစ်လာသလို ဒေါက်တာဘန်နာကလည်း ဟော့ခ်ပုံစံကို မထိန်းချုပ်နိုင်တာကြောင့် ဖြူရီရဲ့ ချုပ်နှောင်မှုကို ခံနေရပါတယ်။ အဲဒီအချိန်မှာ ၁၉၄၅ ခုနှစ်က ကပ္ပတိန်အမေရိက လက်ချက်နဲ့ သေသွားပြီလို့ ထင်ထားကြတဲ့ နာဇီဗိုလ်ချုပ်ကလိုင်ဇာဟာ ဝါကန်ဒါမှာ ပြန်ပေါ်လာတယ်။ ချီတာရီတစ်ယောက်လည်းဖြစ်တဲ့ ကလိုင်ဇာက တီချာလာတို့ဆီက စွမ်းအင်အရင်းအမြစ်ကို လုယူပြီး ကမ္ဘာတစ်ခုလုံး ဖျက်ဆီးဖို့ ကြိုးစားလာပါတယ်။ စည်းလုံးမှုအားနည်းနေတဲ့ Avengers အဖွဲ့ဟာ Black Panther နဲ့ ပူးပေါင်းပြီး ကလိုင်ဇာရဲ့အန္တရာယ်ကို ရင်ဆိုင်ကြရပါတော့တယ်။

ဘွတ်ဖိနပ်စီးကြောင်ကြီးမှာ ကြောင်ပီပီ အသက်ကိုးချောင်းရှိခဲ့ပေမယ့် မဆင်မခြင်လုပ်ရင်း အသက်တွေ ဆုံးရှုံးခဲ့တာ နောက်ဆုံးတစ်ချောင်းပဲ ကျန်ပါတော့တယ်။ အရင်လို အသက်ကိုးချောင်း ပြန်ရဖို့ဆိုပြီး ဆုတောင်းတစ်ခု ဖြည့်ပေးနိုင်တဲ့ ကြယ်တစ်လုံးကို ရှာဖို့ ထွက်လာခဲ့တယ်။ အဲဒီကြယ်က မှော်ဝင်တောအုပ်ကြီးထဲမှာ ရှိနေပြီး လူဆိုးပေါင်းစုံကလည်း လိုက်ရှာနေကြတာပါ။ ဒီခရီးမှာ ရန်သူတွေ၊ မိတ်ဆွေတွေနဲ့ မိသားစုတွေကို ဘယ်လိုတွေ့ကြုံပြီး ရင်ဆိုင်သွားရမလဲဆိုတာကို ဆက်ပြထားပါတယ်။ ၂၀၁၁ ခုနှစ်က Puss in Boots ရဲ့ အဆက်ဖြစ်ပြီး ဒီတစ်ခါမှာ ဒါရိုက်တာ Joel Crawford က ရိုက်ကူးထားပါတယ်။ အဓိကအသံသရုပ်ဆောင်ကတော့ Antonio Banderas ပဲဖြစ်ပြီး ဂိုဒီ့အဖြစ် Florence Pugh၊ ဝက်ဝံအမေအဖြစ် Olivia Colman တို့လည်း ပါဝင်ထားတယ်။ ပုံဆွဲဟန်က အရင်ကားနဲ့ မတူတော့ဘဲ Spider-Man: Into the Spider-Verse နဲ့ The Bad Guys တို့ကို အမှတ်ရစေတဲ့ ဒီဇိုင်းမျိုး ပြောင်းထားတဲ့ ဟာသစွန့်စားခန်း ကာတွန်းရုပ်ရှင်ပါ။

L.O.R.D အပိုင်း ၂ မှာတော့ ရင်းချန်ရဲ့ဆရာ ကျီအယ်ကျားမေရှီကို ကယ်တင်ဖို့ ကြိုးစားကြတဲ့အကြောင်း ဆက်ပြထားပါတယ်။ ပထမပိုင်းက ဇာတ်လမ်းအဆက်ဖြစ်ပြီး မေတ္တာနဲ့ အချစ်အကြောင်းကိုလည်း ထည့်သွင်းဖော်ပြထားတယ်။ ကယ်တင်ရေးအတွက် တိုက်ခိုက်နေကြချိန်မှာ သူတို့ရင်ဆိုင်နေရသူတွေက တကယ့်ရန်သူတွေပဲလားဆိုတဲ့ မေးခွန်းရှိနေပါတယ်။ ဒီလိုလောကမျိုးမှာ မိတ်ဆွေလို့ ခေါ်နိုင်တဲ့သူတွေ ရှိသေးရဲ့လားဆိုတာလည်း စဉ်းစားစရာဖြစ်လာတယ်။

စိတ်ကူးယဉ်နယ်မြေ ယာစီးလန်မှာ အုပ်ချုပ်သူတွေကို အဆင့် ၁ ကနေ ၇ အထိ ခွဲထားပြီး တစ်ယောက်စီမှာ ကိုယ့်နေရာကို ဆက်ခံမယ့်တပည့်တစ်ယောက်စီ ရှိကြပါတယ်။ သူတို့အားလုံးကိုတော့ ပိုင်ရင်းဘုန်းတော်ကြီးသုံးပါးက ထိန်းချုပ်ထားတယ်။ Kris Wu သရုပ်ဆောင်ထားတဲ့ အဆင့် ၇ အုပ်ချုပ်သူက သူ့ရဲ့ဆက်ခံသူတပည့်ကို ရှာဖွေနေပါတယ်။ တစ်ဖက်မှာလည်း ယာစီးလန်ရဲ့ ပုန်ကန်သူတွေလို့ သတ်မှတ်ခံထားရတဲ့ အဆင့် ၅ အုပ်ချုပ်သူနဲ့ သူ့တပည့်ကို လိုက်လံသတ်ဖြတ်နေကြတယ်။ အဲဒီအဖြစ်အပျက်တွေကြားမှာ အဆင့် ၆ အုပ်ချုပ်သူရဲ့အကြောင်းနဲ့ လွန်ခဲ့တဲ့လေးနှစ်က အဖမ်းခံခဲ့ရတဲ့ အဆင့် ၁ အုပ်ချုပ်သူရဲ့အကြောင်းတွေပါ ဆက်နွယ်လာပါတယ်။ ၂၀၁၆ ခုနှစ်ထွက် ဒီဇာတ်ကားကို လူသရုပ်ဆောင်တွေနဲ့ အန်နီမေးရှင်း ရောစပ်ဖန်တီးထားပြီး Kris Wu၊ Fan BingBing၊ William Chan၊ Yang Mi နဲ့ TF boys အဖွဲ့တို့ ပါဝင်ထားပါတယ်။

အားကျွမ်းရဲ့မိဘတွေက အဝေးမှာ စီးပွားရှာနေရတာကြောင့် သူက နှစ်သစ်ကူးရောက်ရင် မိသားစုစုံစုံလင်လင်နဲ့ ဆုံချင်နေပါတယ်။ ရွာမှာတော့ သူဟာ အားနည်းပြီး လူတကာရဲ့ အနိုင်ကျင့်တာကို ခံနေရတဲ့ လူငယ်လေးတစ်ယောက်ပါ။ ရွာရဲ့နှစ်သစ်ကူးခြင်္သေ့အကပြိုင်ပွဲမှာ အနိုင်ကျင့်ခံရပြီးနောက် ခြင်္သေ့ခေါင်းအကက သူ့ဘဝထဲကို ဝင်လာခဲ့တယ်။ ဒီကာတွန်းဇာတ်ကားက အားကျွမ်းရဲ့ စိတ်ကူး၊ အိပ်မက်နဲ့ မျှော်လင့်ချက်တွေအပြင် တရုတ်နှစ်သစ်ကူးမှာ ခြင်္သေ့ခေါင်းအကကို ဘာကြောင့်ကကြသလဲ၊ ပြိုင်ပွဲတွေမှာ ဘယ်လိုစည်းကမ်းတွေရှိသလဲဆိုတာကိုပါ အသားပေးထားပါတယ်။ လောကဓံ ဘယ်လိုပဲကြုံရပါစေ ကိုယ့်ကိုယ်ကိုယ် အားကိုးရမယ်ဆိုတဲ့စိတ်နဲ့ ရှေ့ဆက်နေတဲ့ အားကျွမ်းတစ်ယောက် မိသားစုနဲ့ ပြန်ဆုံရပါ့မလား။ သူစိတ်ဝင်စားလာတဲ့ ရိုးရာခြင်္သေ့အကမှာရော ဘယ်အတိုင်းအတာအထိ ဖျော်ဖြေနိုင်မလဲ။

လီမေလင်းဟာ တရုတ်မိသားစုက ပေါက်ဖွားလာတဲ့ အသက် ၁၃ နှစ်အရွယ် ကောင်မလေးပါ။ တရုတ်ရိုးရာတွေကို နားလည်ထားသလို ဘုံကျောင်းကိစ္စတွေမှာလည်း ကိုယ်တိုင်ဝင်ကူပေးနေသူဖြစ်ပါတယ်။ ဒါပေမယ့် ဆယ်ကျော်သက်အရွယ် ရောက်လာတော့ နှစ်သက်တဲ့အဆိုတော်တွေ၊ ရင်ခုန်မိတဲ့ကောင်လေးတွေလည်း ရှိလာတယ်။ သူ့ရဲ့ခေတ်ဆန်တဲ့အတွေးတွေနဲ့ ရှေးရိုးဆန်တဲ့အမေတို့ကြား ဘယ်လိုအတိုက်အခံတွေ ဖြစ်လာမလဲဆိုတာ တွေ့ရမှာပါ။ သူအကြိုက်ဆုံးအဆိုတော်အဖွဲ့ 4-town က ဖျော်ဖြေပွဲကျင်းပတော့မှာမို့ လီမေလင်းလည်း သွားခွင့်ရဖို့ ကြိုးစားနေပါတယ်။ သူ့မှာတော့ ထူးခြားတဲ့ပြဿနာတစ်ခု ရှိနေတယ်။ စိတ်အရမ်းလှုပ်ရှားလာတဲ့အခါ လူကနေ ပန်ဒါနီအဖြစ် ပြောင်းလဲသွားတတ်တာပါ။ ဖျော်ဖြေပွဲသွားချင်တဲ့ ကောင်မလေးတစ်ယောက် ဒီလိုပြောင်းလဲမှုတွေနဲ့အတူ ဘာတွေကြုံလာရမလဲဆိုတာ ဆက်ပြထားပါတယ်။ အပျိုဖော်ဝင်စအရွယ်ရဲ့ ရှက်စိတ်၊ ကြောက်စိတ်နဲ့ လူကြီးဖြစ်ချင်စိတ်တွေကို နောက်ခံထားပြီး ပထမဆုံးဓမ္မတာလာချိန်လို ဆယ်ကျော်သက်မိန်းကလေးတွေ ကြုံရတတ်တဲ့အတွေ့အကြုံတွေကိုလည်း ထည့်သွင်းထားပါတယ်။ ကိုယ့်ကိုယ်ကိုယ် လူကြီးလို့သတ်မှတ်ချင်ပေမယ့် မိဘတွေက ကလေးလို့ပဲ မြင်နေသေးတဲ့အခါ ဖြစ်ရတဲ့ ကတောက်ကဆတွေနဲ့ သူငယ်ချင်းအချင်းချင်းကြားက ချစ်ခင်မှုကိုလည်း ဖော်ပြထားပါတယ်။

ရောမဘုရင် ဂျူးလီယက်ဆီဇာဟာ တိုက်ပွဲတွေ အနိုင်ရပြီး နယ်မြေအများကြီး သိမ်းပိုက်ထားနိုင်ပေမယ့် အာမိုးရခ်ဒေသက ဂေါလ်လူမျိုးတွေ နေထိုင်တဲ့ ရွာလေးကိုတော့ မသိမ်းနိုင်သေးပါဘူး။ အဲဒီရွာကို ဂေါလ်သူရဲကောင်း အက်စတီးရစ်နဲ့ လူသန်ကြီး အော့ဘလိဇ်တို့က ကာကွယ်ပေးနေကြသလို ရွာကဆရာတော်ရဲ့ မှော်ဆေးရည်အစွမ်းကိုလည်း ဆီဇာ ကြောက်နေရပါတယ်။ ဒီတစ်ခေါက်မှာတော့ ဆီဇာက အာမိုးရခ်ဒေသရဲ့ တောအုပ်ထဲမှာ သူ့အိမ်တော်ကို လာဆောက်ချင်နေတယ်။ ဘုရင်အာဏာနဲ့ အတင်းအကြပ် ဆောက်ဖို့လုပ်လာတဲ့အခါ နယ်ခံအက်စတီးရစ်တို့က တောအုပ်ကို ကာကွယ်ဖို့ ကြိုးစားကြရပြန်ပါတယ်။ အဲဒီကနေ ရွာသားတွေနဲ့ ရောမသားတွေကြား အလွဲလွဲအချော်ချော်တွေ ဖြစ်လာပုံကို စွန့်စားခန်းဟာသ ကာတွန်းဇာတ်ကားအဖြစ် ပြထားပါတယ်။

Night at the Museum ဟာ ၂၀၀၆ ခုနှစ်မှာ စတင်ထွက်ရှိခဲ့ပြီး ၂၀၀၉ နဲ့ ၂၀၁၄ မှာ နောက်ဆက်တွဲရုပ်ရှင်တွေ ထွက်ခဲ့ပါတယ်။ ၂၀၂၂ မှာတော့ အန်နီမေးရှင်းပုံစံနဲ့ ဆက်လာပြီး လာရီဒေလီတစ်ယောက် သဘာဝသမိုင်းပြတိုက်ကနေ တိုကျိုပြတိုက်ကို ပြောင်းရွှေ့ရတော့မယ့်အချိန်မှာ ဇာတ်လမ်းစထားပါတယ်။ လာရီနဲ့ အတူတူ အခက်အခဲတွေ ဖြတ်သန်းခဲ့ကြတဲ့ ပြတိုက်ထဲက ရဲဘော်တွေက သူ့နေရာကို အစားဝင်လာသမျှ ညစောင့်တွေကို ခြောက်လှန့်လွှတ်နေကြတယ်။ သူတို့ကို ဖျောင်းဖျလို့လည်း မရ၊ ပြတိုက်ရဲ့တာဝန်ကို တခြားသူလက်ထဲ ထည့်ခဲ့ဖို့လည်း စိတ်မချတဲ့ လာရီဟာ တက်ဒီအကြံပေးသလို သားဖြစ်သူ နစ်ခ်ဒေလီကို အစားဝင်ခိုင်းဖို့ စဉ်းစားလာပါတယ်။ နစ်ခ်ကတော့ လုပ်သမျှ အလွဲလွဲအချော်ချော်ဖြစ်နေပြီး သဘောကျနေတဲ့ ကောင်မလေးကိုတောင် ဖွင့်မပြောရဲလောက်အောင် ကိုယ့်ကိုယ်ကိုယ် ယုံကြည်မှုနည်းနေတဲ့ ဆယ်ကျော်သက်တစ်ယောက်ပါ။ အဖေ့တိုက်တွန်းမှုနဲ့ ညစောင့်အလုပ်ကို စလုပ်တဲ့ ပထမညမှာပဲ မြေအောက်ခန်းက ကုန်တင်ကုန်ချတံခါးကို သော့ခတ်ဖို့ တာဝန်ရလာတယ်။ ဒါပေမဲ့ မြေအောက်ခန်းကို ကြောက်နေတဲ့ နစ်ခ်ရဲ့အလွဲကြောင့် အဖေ့ရန်သူဟောင်း ခါမူရာ လွတ်သွားပါတော့တယ်။ ကိုယ့်ကိုယ်ကိုယ်တောင် အားမကိုးရဲသေးတဲ့ နစ်ခ်ဟာ ပြတိုက်ထဲက ဗရုတ်တစ်သိုက်နဲ့အတူ ခါမူရာကို ရင်ဆိုင်ပြီး ကမ္ဘာကြီးကို ကယ်တင်နိုင်ပါ့မလား။

ဘော့ဘ်နဲ့ လင်ဒါတို့ လင်မယားက ဘာဂါဆိုင်ဖွင့်ထားပြီး တီနာ၊ ဂျင်း၊ လူးဝစ်ဆိုတဲ့ ကလေးသုံးယောက် ရှိပါတယ်။ သူတို့မိသားစုက နည်းနည်းတော့ အူကြောင်ကြောင်နိုင်တယ်။ ပြဿနာတစ်ခုခုဖြစ်ပြီဆိုရင် သူတို့လည်း ပါနေတတ်ပြီး မိသားစုလိုက် စွန့်စားခန်းတွေ ဖွင့်ကြသူတွေပါ။ ၂၀၁၁ ခုနှစ်ဝန်းကျင်က စတင်ထုတ်လွှင့်ခဲ့တဲ့ Bob's Burgers အန်နီမေးရှင်းစီးရီးထဲက ဒီမိသားစုရဲ့ စွန့်စားခန်းတစ်ခုကို တစ်ကားပြီးရုပ်ရှင်အဖြစ် ရိုက်ကူးထားတာ ဖြစ်ပါတယ်။ ဟာသနဲ့ စွန့်စားခန်းတွေ ပါဝင်ပြီး စီးရီးမကြည့်ဖူးသူတွေလည်း သီးခြားကြည့်လို့ရတဲ့ ပုံစံနဲ့ တင်ဆက်ထားပါတယ်။

အီတလီပုံပြင်ထဲက အသက်ဝင်လာတဲ့ သစ်သားရုပ်ကလေး Pinocchio ဟာ ဒီတစ်ခါမှာတော့ သူ့အဖော်မြင်းလေး Tibalt နဲ့အတူ ကမ္ဘာကြီးကို လှည့်လည်ကြည့်ဖို့ ထွက်လာပါတယ်။ ခရီးသွားရင်း မာဂျီရာဖိုကိုရဲ့ ဆပ်ကပ်အဖွဲ့ဆီ ရောက်သွားတဲ့အခါ နှစ်ယောက်သား စွန့်စားခန်းတွေကို ကြုံကြရတော့တယ်။ ဒီဇာတ်လမ်းက လိမ်ပြောရင် နှာခေါင်းရှည်လာတယ်ဆိုတဲ့ အကြောင်းထက် Pinocchio နဲ့ Tibalt တို့ရဲ့ စွန့်စားခရီးနဲ့ လူသားဆန်မှုကို အလေးပေးထားပါတယ်။ စိမ်းစိုတဲ့မြင်ကွင်းတွေ၊ အရောင်အသွေးစုံတဲ့ ကာတွန်းရုပ်ပုံတွေနဲ့ တင်ဆက်ထားတဲ့ မိသားစုကြည့် စိတ်ကူးယဉ်ကာတွန်းကားလေးပါ။

ပွန်မ်ပိုက ညလိဝုဒ်မှာ ဇာတ်ကားအသေးလေးတွေနဲ့ နာမည်ရနေတဲ့ ရုပ်ရှင်ထုတ်လုပ်သူ ကောင်မလေးတစ်ယောက်ပါ။ ရုပ်ရှင်ကြည့်ရတာကို အလွန်နှစ်သက်တဲ့ သူက တစ်နေ့မှာ လက်ထောက်ဖြစ်သူ ဂျင်းဖီနီကို ရုပ်ရှင်တွေအပေါ် သူဘယ်လောက်ချစ်ကြောင်း ပြောပြရင်း ကိုယ်တိုင်ရေးထားတဲ့ ဇာတ်ညွှန်းတစ်ခုကို ပေးလိုက်ပါတယ်။ အဲဒီဇာတ်ညွှန်းကို ရုပ်ရှင်အဖြစ် ရိုက်ကူးဖို့ ဒါရိုက်တာတာဝန်ကိုလည်း ဂျင်းဆီ အပ်လိုက်တာပါ။ ဂျင်းအတွက်တော့ ငယ်ငယ်ကတည်းက မက်ခဲ့တဲ့ ရုပ်ရှင်ဖန်တီးချင်တဲ့ အိပ်မက်ကို အကောင်အထည်ဖော်ခွင့် ရလာတာပေါ့။ ဒါပေမယ့် ကိုယ်တိုင်ဒါရိုက်တာလုပ်ပြီး စရိုက်ရမယ့်အချိန်မှာ ဘယ်လိုအခက်အခဲတွေ ကြုံလာရမလဲ၊ အဲဒါတွေကို ဘယ်လိုကျော်ဖြတ်မလဲဆိုတာကို ပြထားတဲ့ အန်နီမေးရှင်းဇာတ်ကားပါ။

ဂျာဂွား Balam အုပ်ချုပ်တဲ့ မိုးသစ်တောထဲမှာ Nachi က တစ်ကောင်တည်းသော coati လေးပါ။ တစ်နေ့ မထင်မှတ်ထားတဲ့ ဘေးအန္တရာယ် ကျရောက်လာပြီး Balam လည်း အသက်ဆုံးရှုံးသွားပါတယ်။ တောထဲက တိရစ္ဆာန်တွေဟာ ဒီနေရာကို စွန့်ခွာသွားမလား၊ တောထဲမှာပဲ ဘေးကင်းတဲ့နေရာရှာပြီး ဆက်နေမလားဆိုတာ ဆုံးဖြတ်ရတော့တယ်။ Zaina ဆိုတဲ့ မြွေမရဲ့ စကားကို နားယောင်ပြီး တခြားအကောင်တွေက ပြောင်းရွှေ့ဖို့ ပြင်ဆင်ကြပေမယ့် Nachi ကတော့ တောထဲမှာပဲ ကျန်နေဖို့ ဆုံးဖြတ်လိုက်ပါတယ်။ သူ့ဆုံးဖြတ်ချက်နောက်ကွယ်မှာ အကြောင်းရင်းတစ်ခု ရှိနေပြီး အဲဒီကိစ္စကို အဖြေရှာဖို့ စွန့်စားခရီး ထွက်လာတယ်။ သူနဲ့အတူ စကားမပြတ်ပြောတတ်တဲ့ ဖားလေး Pako နဲ့ အကြောက်အလန့်မရှိတဲ့ လိပ်ပြာမလေး Xochi တို့လည်း ပါလာကြပါတယ်။ Nachi ဘာကြောင့် တောထဲမှာပဲ ကျန်နေချင်တာလဲ၊ သူတို့သုံးကောင် ခရီးတစ်လျှောက် ဘယ်လိုအန္တရာယ်တွေ ကြုံပြီး ဘယ်လိုကျော်ဖြတ်ကြမလဲဆိုတာကို ဆက်ပြထားတဲ့ ကာတွန်းဇာတ်ကားပါ။

စက်ရုပ်တွေ တီထွင်တတ်တဲ့ အင်ဂျင်နီယာဘုရင်ကြီးတစ်ပါးဟာ သမီးကို အလွန်ချစ်သလို အလွန်လည်း ချုပ်ချယ်ထားပါတယ်။ အချစ်ဝတ္ထုတောင် ပေးမဖတ်တဲ့အထိ ဖူးဖူးမှုတ်ထားပေမယ့် တစ်နေ့မှာတော့ ပြည်သူတွေအတွက် သမီးကို လူယုတ်မာတစ်ယောက်နဲ့ လက်ထပ်ပေးရမယ့်အခြေအနေ ရောက်လာတယ်။ မင်းသမီးလေးက ဒီလက်ထပ်ပွဲကို လက်မခံဘဲ ထွက်ပြေးသွားပါတယ်။ ထွက်ပြေးလာရင်း မွန်းစတားကောင်လေးရှိတဲ့ တောအုပ်ထဲ ရောက်သွားပြီး မင်းသမီး၊ မွန်းစတားနဲ့ ယုန်တို့ သုံးယောက် ခင်မင်သွားကြတယ်။ တစ်ဖက်မှာတော့ မင်းသမီးကို လက်ထပ်မယ့်သူက ဘုရင်ကြီးဆီက စက်ရုပ်တွေကို လွှတ်ပြီး သူ့ကို ပြန်ခေါ်ဖို့ လုပ်လာပါတယ်။ မင်းသမီးနဲ့ မွန်းစတားတို့အကြောင်းကို စက်ရုပ်တွေ၊ မှော်ဆန်တဲ့အဖြစ်အပျက်တွေနဲ့ ရောစပ်ထားတဲ့ ကာတွန်းစွန့်စားခန်းပါ။ ပေါ့ပေါ့ပါးပါး ဟာသတွေပါသလို သီချင်းဆိုတဲ့အခန်း ငါးခါလောက်လည်း ပါဝင်ပါတယ်။

ကမ္ဘာ့မြေပုံ၊ ဗုံးတစ်လုံးနဲ့ ခရီးဆောင်အိတ်တစ်ခုကို သယ်လာတဲ့ သတ္တဝါတစ်ကောင်က ကမ္ဘာမြေကို ဖျက်ဆီးဖို့ ရောက်လာပါတယ်။ ဒါပေမယ့် လမ်းတစ်လျှောက်မှာ အခက်အခဲတွေနဲ့ ကြောက်မက်ဖွယ် အဖြစ်အပျက်တွေကို ကြုံရတယ်။ လျှပ်စစ်နဲ့ ညှဉ်းပန်းနှိပ်စက်ခံနေရတဲ့ သားကောင်တွေကိုလည်း တွေ့ရပြီး ရန်သူတွေနဲ့အတူ သူ့အသက်ပါ ပျက်စီးသွားနိုင်တဲ့ အခြေအနေတွေကို ရင်ဆိုင်လာရပါတယ်။ ရက်စက်တဲ့ သတ္တဝါတွေနဲ့ မွန်းစတားတွေ ခွန်အားချင်း၊ ဉာဏ်ချင်း ပြိုင်နေကြတဲ့ကြားမှာ သူဘယ်လို ဆက်လက်ရှင်သန်မလဲ။ မူလရည်ရွယ်ချက်ကို အောင်မြင်အောင် လုပ်နိုင်မှာလား၊ ရန်သူတွေကြားမှာပဲ အသက်ဆုံးရမှာလားဆိုတာ ဆက်တွေ့ရမှာပါ။ Mad God က stop-motion နည်းပညာနဲ့ ဖန်တီးထားတဲ့ စိတ်ကူးယဉ်ဟော်ရာ အန်နီမေးရှင်းကားဖြစ်ပါတယ်။ ဖန်တီးသူ Phil Tippett က Jurassic Park၊ Starship Troopers၊ RoboCop နဲ့ Star Wars တို့လို ဇာတ်ကားတွေရဲ့ ရုပ်ထွက်အထူးပြုလုပ်ချက်တွေကို ဖန်တီးပေးခဲ့သူပါ။

မာဆယ်ဟာ မျက်လုံးတစ်လုံးနဲ့ ဖိနပ်စီးထားတဲ့ ခရုခွံလေးတစ်ကောင်ပါ။ သူ့မိသားစုတွေကို ဆုံးရှုံးထားရပြီး အဖွားနဲ့အတူ လူတွေကို ရှောင်ရင်း နေနေရပါတယ်။ တစ်နေ့မှာ ဒင်းန်ဆိုတဲ့သူနဲ့ ခင်မင်သွားပြီး ဒင်းန်က မာဆယ်အကြောင်း မှတ်တမ်းရုပ်ရှင်ရိုက်ကာ ယူကျူ့ပေါ် တင်လိုက်တယ်။ အဲဒီကနေ မာဆယ်ဟာ လူသိများလာပါတယ်။ နာမည်ကြီးလာပြီးနောက်မှာတော့ မာဆယ်ဟာ သူ့မိသားစုကို ပြန်ရှာဖို့ ကြိုးစားလာတယ်။ အဖွားကလည်း မြေးလေးကို ဘဝမှာ ကိုယ့်ဘာသာ ရှင်သန်တတ်အောင် သင်ပေးနေပါတယ်။ မာဆယ်ရဲ့ အပြုအမူတွေနဲ့ စကားပြောပုံတွေကြားမှာ ဟာသနဲ့ သရော်မှုတွေ ပါသလို အဖွားနဲ့မြေးကြားက ခံစားချက်တွေကိုလည်း တွေ့ရမှာပါ။ A24 ရဲ့ မှတ်တမ်းရုပ်ရှင်ဟန်နဲ့ တင်ဆက်ထားတဲ့ Mockumentary ဖြစ်ပြီး အန်နီမေးရှင်း၊ ဟာသနဲ့ ဒရာမာတို့ကို ပေါင်းစပ်ထားပါတယ်။

၁၉၈၂ ခုနှစ် ဇွန်လမှာ အစ္စရေးက လက်ဘနွန်နိုင်ငံကို ကျူးကျော်စစ်စတင်ခဲ့တဲ့အကြောင်းကို ပြန်လည်ဖော်ထုတ်ထားတဲ့ ဖြစ်ရပ်မှန်နောက်ခံ အန်နီမေးရှင်းဇာတ်ကားပါ။ အဲဒီစစ်ပွဲမှာ အစ္စရေးဘက်ကနေ တိုက်ခိုက်ခဲ့ဖူးတဲ့ Ari Floman ဟာ အခု ရုပ်ရှင်ဒါရိုက်တာတစ်ယောက် ဖြစ်နေပြီဖြစ်ပေမယ့် စစ်ပွဲနဲ့ပတ်သက်တဲ့ အဖြစ်အပျက်တွေကို မမှတ်မိနိုင်ဖြစ်နေတယ်။ တစ်နေ့ သူငယ်ချင်းဘော့ဇ်က သူမက်တဲ့အိပ်မက်အကြောင်း ပြောပြတဲ့အခါ လွန်ခဲ့တဲ့နှစ်နှစ်ဆယ်က စစ်ပွဲအကြောင်းတွေကို ရေးရေးပြန်မြင်လာပါတယ်။ အဲဒီတုန်းက သူဘာတွေလုပ်ခဲ့သလဲ၊ ဘယ်နေရာတွေရောက်ခဲ့သလဲဆိုတာ သိချင်လာတဲ့အတွက် မိတ်ဆွေတွေဆီ လိုက်မေးရင်း ပျောက်နေတဲ့မှတ်ဉာဏ်တွေကို ပြန်ရှာဖွေတယ်။ ဒီလိုပြန်လည်ရှာဖွေမှုကနေ စစ်ပွဲအတွင်း လက်ဘနွန်ဒုက္ခသည်စခန်းတွေမှာ ဖြစ်ပွားခဲ့ပြီး စီရင်ချက်မချမှတ်နိုင်ခဲ့တဲ့ အစုလိုက်အပြုံလိုက်သတ်ဖြတ်မှုတွေကိုလည်း ဖော်ထုတ်ထားပါတယ်။

Jujutsu Kaisen စီးရီးထဲက အဖြစ်အပျက်တွေ မတိုင်ခင်ကို ပြန်သွားထားတဲ့ ဒီရုပ်ရှင်က Yuta မှော်ဆရာတစ်ယောက် ဖြစ်လာခဲ့ပုံကို ပြောပြထားပါတယ်။ ငယ်ကျွမ်းဆွေ ကောင်လေးနဲ့ ကောင်မလေးနှစ်ယောက်ဟာ တစ်ယောက်ကိုတစ်ယောက် သိပ်ချစ်ကြတယ်။ အသက်ငယ်သေးပေမယ့် အရွယ်ရောက်လာရင် လက်ထပ်ကြမယ်လို့ စေ့စပ်လက်စွပ်လေး ဝတ်ပြီး ကတိပေးထားကြတာပါ။ ဒါပေမယ့် အဲဒီနောက်မှာ ကောင်မလေးက ဆိုးဆိုးရွားရွား ကားတိုက်ခံရပြီး ဆုံးသွားတယ်။ သေဆုံးသွားပေမယ့် သူတို့ကြားက အချစ်ကြောင့် ကောင်မလေးဟာ ကျိန်စာသင့်တစ္ဆေအဖြစ် ပြန်ပေါ်လာပါတော့တယ်။