သည်းထိတ်ရင်ဖိုကားများ

အေမီက လူသတ်သမားတွေနဲ့ သွေးသံရဲရဲ သတ်ဖြတ်မှုတွေအကြောင်း ပုံပြင်၊ ဝတ္ထု၊ ရုပ်ရှင်တွေကို စိတ်ဝင်စားတဲ့ ဆယ်ကျော်သက်တစ်ယောက်ပါ။ အဲဒီအကြောင်းတွေကို ကြည့်ရဖတ်ရရုံနဲ့ မကျေနပ်ဘဲ ကိုယ်တိုင်စုံစမ်းပြီး လူသတ်သမားကို ရှာဖွေနိုင်တဲ့ စုံထောက်တစ်ယောက်လို ဖြစ်ချင်နေတယ်။ ဒါကြောင့် အိမ်ပြတင်းပေါက်ကနေ မှန်ဘီလူးတစ်လက်နဲ့ ပတ်ဝန်းကျင်ကို လိုက်ကြည့်စပ်စုနေတတ်ပါတယ်။ သူရောက်နေတဲ့ မြို့လေးမှာ Clockwork Killer လို့ ခေါ်တဲ့ ကွင်းဆက်လူသတ်သမားအကြောင်း တစ်ချိန်က ဟိုးလေးတကျော် ဖြစ်ခဲ့ဖူးတယ်။ အခုတော့ လူသတ်မှုတွေ ငြိမ်သက်နေပေမယ့် အေမီက ဒီလူသတ်သမားဟာ တစ်နေ့ ပြန်ပေါ်လာမယ်လို့ အမြဲတွေးနေပါတယ်။ တစ်ရက်မှာ သူထင်ထားသလို Clockwork Killer ပြန်ပေါ်လာတဲ့အခါ အေမီတစ်ယောက် ဒီအမှုကို ဘယ်လိုရင်ဆိုင်မလဲ၊ လူသတ်သမားနဲ့ ဘယ်လို ထိပ်တိုက်တွေ့ရမလဲဆိုတဲ့ မေးခွန်းတွေ ဖြစ်လာတယ်။ Clockwork Killer ဆိုတာ ဘယ်သူလဲ၊ ဒီအမှုမှာ ဘယ်လိုဖုံးကွယ်ထားတဲ့ အကြောင်းတွေ ရှိနေမလဲ။

သိပ်မဝေးတဲ့ အနာဂတ်မှာ မျိုးရိုးဗီဇကို ပြုပြင်မြှင့်တင်နိုင်လာပြီး အားနည်းချက်ကင်းတဲ့ လူတွေကို မွေးဖွားပေးနိုင်နေပါပြီ။ သဘာဝအတိုင်း ကိုယ်ဝန်ဆောင်မွေးဖွားမှုက ရှားပါးလာသလို အဲဒီလို မွေးလာသူတွေကိုလည်း «စံချိန်မမီသူ» လို့ သတ်မှတ်ကြတယ်။ မျိုးဗီဇမပြည့်စုံဘူးဆိုတဲ့ အကြောင်းပြချက်နဲ့ နေရာတကာမှာ ခွဲခြားဆက်ဆံခံကြရပါတယ်။ Vincent က အာကာသယာဉ်မှူးဖြစ်ပြီး အာကာသထဲ ခရီးသွားဖို့ အမြဲအိပ်မက်မက်ခဲ့သူပါ။ ဒါပေမဲ့ သူဟာ သဘာဝအတိုင်း မွေးဖွားလာသူဖြစ်လို့ အာကာသအစီအစဉ်တွေက အလုပ်မခန့်ကြဘူး။ သူ့အိပ်မက်ကို အကောင်အထည်ဖော်ဖို့ မျိုးဗီဇမြှင့်တင်ပြီး မွေးလာတဲ့ Jerome Morrow ရဲ့ မျိုးရိုးဗီဇအချက်အလက်တွေကို တရားမဝင် ဝယ်ယူလိုက်ပါတယ်။ အဲဒီနောက် အာကာသအစီအစဉ်က ဒါရိုက်တာတစ်ဦး အသတ်ခံရတဲ့အမှု ပေါ်လာတဲ့အခါ သူစီစဉ်ထားသမျှ ရှုပ်ထွေးကုန်တော့တယ်။ Vincent အဖြစ် Ethan Hawke၊ Jerome အဖြစ် Jude Law နဲ့ Vincent ရဲ့ အချစ်ရေးမှာ ပါဝင်လာတဲ့ Irene အဖြစ် Uma Thurman တို့ သရုပ်ဆောင်ထားပါတယ်။ ဒါရိုက်တာ Andrew Niccol ရဲ့ ပွဲဦးထွက်ရုပ်ရှင်ဖြစ်ပြီး မျိုးဗီဇအပေါ် မူတည်ကာ လူကို တန်ဖိုးဖြတ်တဲ့ လူ့အဖွဲ့အစည်းအကြောင်းကို သိပ္ပံစိတ်ကူးယဉ်ဇာတ်လမ်းနဲ့ တင်ပြထားတာပါ။

IBBC ဘဏ်က ဘဏ်လုပ်ငန်းနဲ့မဆိုင်တဲ့ လက်နက်ဝယ်ယူမှုတွေ သန်းရာချီဖိုး လုပ်နေတယ်လို့ သတင်းရပြီးနောက် အေးဂျင့်လူးဝစ်နဲ့ သူ့အဖွဲ့က လိုက်စုံစမ်းကြပါတယ်။ အချိန်အတော်ယူပြီး အချက်အလက်တွေ စုဆောင်းခဲ့ရာက အရေးပါတဲ့သူတစ်ယောက်နဲ့ ဆက်သွယ်မိလာတယ်။ ဒါပေမဲ့ အဲဒီလူနဲ့ သွားတွေ့ခဲ့တဲ့ အဖွဲ့ဝင်တစ်ယောက် မတော်တဆမှုနဲ့ သေဆုံးသွားပြီး တစ်ရက်တောင် မပြည့်ခင်မှာပဲ သူတို့ဆက်သွယ်ထားသူပါ မတော်တဆမှုနဲ့ ထပ်သေသွားပါတယ်။ အထက်လူကြီးတွေက မရေမရာဖြစ်နေတဲ့ ဒီကိစ္စကို ဆက်မပတ်သက်ချင်ကြတော့ဘူး။ လူးဝစ်ကတော့ လုပ်ဖော်ကိုင်ဖက်ကို ဆုံးရှုံးထားရတဲ့အပြင် အင်အားကြီးတဲ့ ရန်သူနဲ့ ရင်ဆိုင်နေရချိန်မှာ ဝိုင်းလက်ရှောင်နေကြတာကို ဒေါသထွက်နေတယ်။ ဒါကြောင့် သူတတ်နိုင်သမျှ ဆက်စုံစမ်းပြီး အမှန်တရားကို ဖော်ထုတ်ဖို့ ကြိုးစားပါတယ်။ Clive Owen နဲ့ Naomi Watts တို့ အဓိက ပါဝင်သရုပ်ဆောင်ထားတဲ့ မှုခင်းအက်ရှင်ကားပါ။

လူငယ်တစ်စု အိမ်အိုကြီးတစ်လုံးထဲ ရောက်သွားပြီးနောက် သရဲစီးသလို၊ နတ်ပူးသလို ဖြစ်ကြကာ ထူးထူးဆန်းဆန်း ပျောက်ဆုံးသွားကြပါတယ်။ ရက်ပိုင်းအကြာမှာတော့ အဲဒီအုပ်စုထဲက ကောင်မလေးတစ်ယောက်ကို ပြန်တွေ့လို့ အိမ်ခေါ်လာခဲ့ကြတယ်။ ဒါပေမဲ့ သူနဲ့အတူ အမှောင့်ပယောဂတွေပါ ကပ်ပါလာသလို ဖြစ်နေပါတယ်။ ကောင်မလေး ပြန်ရောက်လာရာက စတဲ့ အဖြစ်အပျက်တွေကို ဇာတ်ကွက်အလှည့်အပြောင်းတွေနဲ့ ဆက်ပြထားတဲ့ ထိတ်လန့်သည်းဖိုကားပါ။

ကော်စတာရီကာက ဟိုတယ်တစ်ခုမှာ CIA အေးဂျင့်နှစ်ယောက် တည်းခိုနေကြပါတယ်။ သူတို့ရှိနေတဲ့သတင်းကို ဘယ်လိုရသွားမှန်းမသိတဲ့ အကြမ်းဖက်သမားတွေ ရောက်လာပြီး အမျိုးသားအေးဂျင့်ကို ပစ်သတ်ကာ အမျိုးသမီးအေးဂျင့်ကို ဖမ်းခေါ်သွားတယ်။ ဖမ်းဆီးခံရသူကို ပြန်ကယ်ထုတ်ဖို့ အမေရိကန်ဘက်က မရိန်းစစ်သားတွေကို စုစည်းလိုက်ပါတယ်။ အမျိုးသမီးအေးဂျင့်ကို ဖမ်းထားသူက ထိပ်တန်းဒုစရိုက်ခေါင်းဆောင်တစ်ယောက်ဖြစ်ပြီး ခေတ်မီလက်နက်တွေနဲ့ ကြေးစားလက်နက်ကိုင်တွေ အပြည့်ရှိနေသူပါ။ မူးယစ်ရာဇာတွေနဲ့ အကြမ်းဖက်သမားတွေပါ ပတ်သက်နေတဲ့အတွက် ကယ်ဆယ်ရေးစစ်ဆင်မှုက ထင်သလောက် မလွယ်ကူဘူး။ အဲဒီအပြင် နောက်ဆက်တွဲပြဿနာတွေကြောင့် အမေရိကန်နိုင်ငံမှာ စက်တင်ဘာ ၁၁ ရက် အရေးအခင်းထက်တောင် ဆိုးရွားတဲ့အဖြစ်မျိုး ကြုံလာနိုင်တယ်ဆိုတာ သိလာကြပါတယ်။ ကယ်ဆယ်ရေးအတွက် သူတို့ ဘယ်လိုအစီအစဉ်ဆွဲကြမလဲ၊ အေးဂျင့်အမျိုးသမီးကို ကယ်ထုတ်နိုင်ပါ့မလား။ တိုက်ပွဲတွေက ထင်ထားတာထက် ပိုကြမ်းလာမလား၊ စစ်ဆင်ရေးမှာ ပါဝင်သူအားလုံး အသက်ဆုံးရှုံးရတဲ့အထိ ဖြစ်သွားနိုင်မလားဆိုတဲ့ မေးခွန်းတွေ ရှိနေပါတယ်။

ဘာသာရေးကိုင်းရှိုင်းပြီး ရှေးရိုးစွဲတဲ့ ဘိုင်ဟာ ဖိနပ်ဆိုင်လေးတစ်ဆိုင်နဲ့ မိသားစုကို ထောက်ပံ့လာခဲ့သူပါ။ ဒီဆိုင်ကရတဲ့ ဝင်ငွေနဲ့ပဲ သမီးတွေကို မင်္ဂလာဆောင်ပေးနိုင်ခဲ့ပေမယ့် သမီးတွေ အိမ်ထောင်ကျပြီး မြေးတွေပါ ရလာချိန်မှာ စီးပွားရေးကျဆင်းလာလို့ မိသားစုအတွက် မလောက်ငတော့ပါဘူး။ ဘိုင်က ချေးငွေယူတာကိုလည်း မကောင်းတဲ့အရာလို့ သတ်မှတ်ထားတယ်။ သမီးဖြစ်သူ ဖာဟာနာမှာတော့ ကလေးသုံးယောက်ရဲ့ အနာဂတ်အတွက်ပါ စဉ်းစားရတာကြောင့် အပြင်ထွက်အလုပ်လုပ်ခွင့် တောင်းပါတော့တယ်။ ရှေးရိုးစွဲတဲ့ မိသားစုဆီက ခက်ခက်ခဲခဲ ခွင့်တောင်းပြီး အလုပ်ရလာတဲ့အခါ သူလည်း အစွမ်းကုန်ကြိုးစားတယ်။ တဖြည်းဖြည်း အဆင်ပြေလာပေမယ့် သမီးဖြစ်သူ အရေးပေါ်ခွဲစိတ်ဖို့ လိုလာတော့ ဝင်ငွေပိုရနိုင်တဲ့ အလုပ်တစ်ခုကို ရဖို့ ကြိုးစားရပြန်ပါတယ်။ အဲဒီအလုပ်ကနေ မမျှော်လင့်ထားတဲ့ ကိစ္စတွေ ကြုံလာတဲ့အခါ ဖာဟာနာ ဘယ်လိုဆက်လုပ်မလဲ။

ဗိုင်ရှာလီဟာ ညှိနှိုင်းဆွေးနွေးရေးမှာ ကျွမ်းကျင်သူတစ်ယောက်ပါ။ ဒါပေမဲ့ နောက်လိုက်တစ်ယောက်ရဲ့အမှားကြောင့် ကိုယ်ဝန်ဆောင်ဓားစာခံတစ်ယောက် အသက်ဆုံးရှုံးသွားတဲ့အခါ သူ့ကိုယ်သူ အပြစ်ရှိတယ်လို့ ခံစားရပြီး အလုပ်ထွက်စာ တင်လိုက်ပါတယ်။ ဒုရဲအုပ်ကတော့ ချက်ချင်းထွက်ခွင့်မပေးဘဲ ဆယ်ရက်အချိန်ယူပြီး ပြန်စဉ်းစားဖို့ ပြောထားတယ်။ အဲဒီဆယ်ရက်အတွင်းမှာပဲ မမျှော်လင့်ထားတဲ့ အပြောင်းအလဲကြီးတစ်ခု ဖြစ်လာပါတယ်။ ဓားစာခံတစ်ယောက်ကို ဆုံးရှုံးခဲ့ရတဲ့ စိတ်ဒဏ်ရာ မပြေသေးတဲ့ ဗိုင်ရှာလီဟာ နောက်ထပ်ဓားစာခံတွေကို ကယ်တင်ပေးနိုင်ပါ့မလား။ ဗိုင်ရှာလီအဖြစ် Aiahwarya Lekshmi နဲ့ ဂိုစီအဖြစ် Satyadev Kancharana တို့ ပါဝင်သရုပ်ဆောင်ထားပါတယ်။

Jason Statham သရုပ်ဆောင်ထားတဲ့ ဘစ်ရှော့ဟာ အလုပ်တစ်ခုလုပ်တိုင်း စက်တစ်လုံးလို တိကျသေချာအောင် အကွက်ချတတ်တဲ့ ကြေးစားလူသတ်သမားပါ။ သူ့အလုပ်က ပစ်မှတ်ကို သတ်ပစ်ရုံနဲ့ မပြီးဘူး။ လူသတ်မှုလို့ မထင်ရအောင် မတော်တဆဖြစ်သွားသလို၊ အခန့်မသင့်လို့ သေဆုံးသွားသလိုမျိုး ဖန်တီးပေးရတာပါ။ နေရာတိုင်းမှာ သေချာစီစဉ်ပြီး လှုပ်ရှားတတ်တဲ့ ဘစ်ရှော့ကိုမှ လာရှုပ်ကြတဲ့သူတွေ ရှိလာပါတယ်။ ဒီလိုလူတစ်ယောက်နဲ့ ထိပ်တိုက်တွေ့တဲ့အခါ သူတို့ ဘယ်လိုဒုက္ခရောက်ကြမလဲဆိုတာကို အက်ရှင်၊ မှုခင်းနဲ့ သည်းထိတ်ရင်ဖိုပုံစံ ရိုက်ကူးထားပါတယ်။

နိတ်ဒန်နီယယ်ဟာ သမီးနှစ်ယောက်နဲ့အတူ တောင်အာဖရိကကို အလည်အပတ် ထွက်လာပါတယ်။ ဒီခရီးကို ဖိတ်ခေါ်သူက သူ့မိတ်ဆွေဟောင်း မာတင်ပါ။ မာတင်ဟာ နိတ်နဲ့ သူ့ဇနီးတို့ကို အောင်သွယ်ပေးခဲ့သူလည်း ဖြစ်တယ်။ သူတို့ဟာ နိတ်ရဲ့ဇနီး ကြီးပြင်းခဲ့တဲ့ ရွာလေးဆီ ခရီးဆက်ကြရင်း တားမြစ်နယ်မြေတစ်ခုကို ဖြတ်သန်းမိတဲ့အခါ ခြင်္သေ့ကြီးတစ်ကောင်နဲ့ ရင်ဆိုင်လိုက်ရပါတယ်။ ဒီခြင်္သေ့ဟာ တွေ့သမျှလူတွေကို သဲသဲမဲမဲ လိုက်သတ်နေတဲ့အကောင်ပါ။ သူ့အုပ်စုတစ်စုလုံးကို တရားမဝင်မုဆိုးတွေက သတ်ပစ်ခဲ့လို့ လူတွေကို ရန်ပြုနေတာ ဖြစ်ပါတယ်။ အလည်အပတ်ခရီးကနေ ခြင်္သေ့ရန်ကြား အသက်ရှင်ဖို့ ရုန်းကန်ရတဲ့ခရီး ဖြစ်သွားပုံကို အာဖရိကတောရိုင်းနောက်ခံနဲ့ ရိုက်ကူးထားပြီး Suicide Squad မှာ Bloodsport အဖြစ် သရုပ်ဆောင်ခဲ့တဲ့ Elba ပါဝင်ထားပါတယ်။

နိုင်ငံမတူ၊ စရိုက်မတူတဲ့ လူခုနစ်ယောက်ဟာ လေယာဉ်ပေါ်ကနေ လေထီးတွေနဲ့ ပစ်ချခံလိုက်ရပြီး တောနက်ကြီးတစ်ခုထဲ ရောက်သွားကြပါတယ်။ သူတို့ရောက်နေတဲ့နေရာက သာမန်တောတစ်တောတော့ မဟုတ်ဘူး။ ဂြိုလ်သားတွေ အမဲလိုက်တဲ့ ကစားကွင်းကြီး ဖြစ်နေပါတယ်။ သူရဲကောင်းဘွဲ့ရဖို့ လူတွေနဲ့ တခြားဂြိုလ်က သတ္တဝါတွေကို ဖမ်းခေါ်လာပြီး ဒီနေရာမှာ အမဲလိုက်ကြတာပါ။ ပထမ Predator ဇာတ်ကားမှာ အမဲလိုက်တဲ့ ဂြိုလ်သားတစ်ယောက်ပဲ ရှိခဲ့ပေမယ့် ဒီတစ်ခါတော့ အများကြီး ဖြစ်လာတယ်။ ထောင်ချောက်တွေကြားမှာ ဒီလူတွေ ဘယ်လိုရင်ဆိုင်ကြမလဲ၊ လူသားတွေနဲ့ ဂြိုလ်သားတွေကြားမှာ ဘယ်သူက မုဆိုးဖြစ်ပြီး ဘယ်သူက သားကောင်ဖြစ်သွားမလဲဆိုတာ ဆက်ကြည့်ရမှာပါ။

အာဂျန်ဟာ ကွင်းဆက်လူသတ်သမားတွေရဲ့ စိတ်ပညာကို စိတ်ဝင်စားတဲ့ ဘွဲ့ရလူငယ်တစ်ယောက်ပါ။ သူဖြစ်ချင်တာက သည်းထိတ်ရင်ဖိုဇာတ်ကားတစ်ကား ရိုက်ကူးဖို့ဖြစ်လို့ မှုခင်းစိတ်ပညာနဲ့ မှုခင်းဖြစ်စဉ်တွေကို ခုနစ်နှစ်ကြာ လေ့လာပြီး ဇာတ်ညွှန်းတစ်ပုဒ် ရေးထားခဲ့တယ်။ ဒါပေမယ့် အဲဒီဇာတ်ညွှန်းကို သဘောကျပြီး ရိုက်ကူးပေးမယ့်သူ မတွေ့ခဲ့ရပါဘူး။ ဒါနဲ့ သူလေ့လာထားသမျှ အလဟဿမဖြစ်အောင် ရဲတပ်ဖွဲ့ထဲဝင်ဖို့ ရွေးချယ်လိုက်ပါတယ်။ ရဲဖြစ်လာပြီး မကြာခင်မှာပဲ ဆယ်ကျော်သက်ကျောင်းသူလေးတွေ ပျောက်ဆုံးတဲ့အမှုတွေ ပေါ်လာတယ်။ လူပျောက်မှုကနေ ကွင်းဆက်လူသတ်မှုအထိ ကြီးထွားလာတဲ့အခါ အာဂျန်ဟာ စာတွေ့လေ့လာထားတဲ့ မှုခင်းပညာကို လက်တွေ့မှာ ဘယ်လိုအသုံးချမလဲ။ ရဲလုပ်သက်အတွေ့အကြုံ မရှိသေးတဲ့သူတစ်ယောက်အနေနဲ့ အထက်အရာရှိတွေနဲ့ရော အဆင်ပြေနိုင်ပါ့မလား။ ၂၀၁၈ ခုနှစ်က Ratsasan ကို Disney+ Hotstar က ၂၀၂၂ ခုနှစ်မှာ ပြန်လည်ရိုက်ကူးထားတဲ့ မှုခင်းသည်းထိတ်ရင်ဖိုဇာတ်ကားဖြစ်ပြီး အာရှေးကူးမား ပါဝင်သရုပ်ဆောင်ထားပါတယ်။

ကာနတကအတွင်းက ကမာရုတူးဆိုတဲ့ ရွာလေးဟာ တောအုပ်ကြီးအလယ်မှာ တည်ရှိပါတယ်။ ဆန်းကြယ်တဲ့ဖြစ်ရပ်တွေနဲ့ နတ်ဆိုးတွေ သောင်းကျန်းနေတယ်ဆိုတဲ့ သတင်းတွေကြောင့်လည်း နာမည်ထွက်နေတဲ့ ရွာပါ။ အဲဒီရွာက ဘိုးဘွားပိုင်အိမ်တစ်အိမ်မှာ မိသားစုတစ်စု မင်္ဂလာပွဲလာကျင်းပကြပေမယ့် ပွဲက အထမမြောက်ခဲ့ဘူး။ အိမ်ထဲမှာ အရာရှိတစ်ယောက်ရဲ့ ခေါင်းပြတ်နေတဲ့အလောင်းကို တွေ့လိုက်ကြရပါတယ်။ ရွာထဲမှာ ကလေးသူငယ်တွေလည်း အသတ်ခံနေရတာကြောင့် ဒီဖြစ်ရပ်တွေရဲ့နောက်ကွယ်မှာ ဘာရှိနေသလဲဆိုတာ မေးခွန်းဖြစ်လာတယ်။ ရွာက တကယ်ပဲ ကျိန်စာသင့်နေတာလား၊ နတ်ဆိုးတွေကြောင့်လား၊ အဖြစ်မှန်က ဘာလဲ။ Dabangg 3 မှာ ဗီလိန်အဖြစ် ပါဝင်ခဲ့တဲ့ ကန်နန်းဒါးမင်းသား ကစ်ချားဆူဒီပါးနဲ့ ဂျက်စီတို့ ပါဝင်သရုပ်ဆောင်ထားပါတယ်။

မယ်လ်ဒီဟာ အဝတ်လျှော်လုပ်ငန်းတစ်ခုမှာ အလုပ်လုပ်ရင်း မသန်စွမ်းတဲ့ ခင်ပွန်းကို ပြုစုလုပ်ကျွေးနေတဲ့ မိန်းမငယ်တစ်ယောက်ပါ။ အပြင်ကကြည့်ရင် သူ့ဘဝက ရိုးရိုးရှင်းရှင်းလို့ ထင်ရပေမယ့် ပတ်ဝန်းကျင်က မသိတဲ့ သူ့စိတ်ဆန္ဒတွေကို သိုသိုသိပ်သိပ် ဖုံးကွယ်ထားတယ်။ ဖောက်သည်တွေရဲ့ အဝတ်အစားတွေကို ခိုးဝတ်ပြီး ခင်ပွန်းနဲ့ ဝတ်စုံပြောင်း၊ ဇာတ်ရုပ်ပြောင်းကစားကာ သူ့ရဲ့ လိင်စိတ်ဆန္ဒကို ဖြည့်ဆည်းတတ်ပါတယ်။ မယ်လ်ဒီက လိုချင်တဲ့အရာရှိရင် ပစ္စည်းဖြစ်ဖြစ်၊ လူဖြစ်ဖြစ် ရအောင်ယူချင်ပြီး အဲဒီအတွက် ဘာမဆိုလုပ်ရဲသူပါ။ ဖောက်သည်အသစ်ဖြစ်တဲ့ ရဲအရာရှိနဲ့ သူ့ချစ်သူ မော်ဒယ်မလေးကို တွေ့ရတဲ့အခါ မော်ဒယ်မလေးရဲ့ ဘဝကို အားကျလာသလို ရဲအရာရှိကိုလည်း အလွန်အမင်း လိုချင်လာတယ်။ တစ်ချိန်တည်းမှာ သူတို့ပတ်ဝန်းကျင်မှာ ရက်စက်တဲ့ ကွင်းဆက်လူသတ်မှုတွေ ဖြစ်ပေါ်နေပြီး အဲဒီအမှုတွေကို ဒီရဲအရာရှိက စုံစမ်းရဖို့ ဖြစ်လာပါတယ်။ မယ်လ်ဒီရဲ့ ဆန္ဒတွေနဲ့ ရဲအရာရှိရဲ့ စုံစမ်းမှုတွေ တစ်ပြိုင်နက် ဖြစ်လာတဲ့အခါ သူတို့ချင်း ထိပ်တိုက်တွေ့ဖို့ အကြောင်းဖန်လာတယ်။ Ayanna Misola နဲ့ Rob Guinto တို့ ပါဝင်သရုပ်ဆောင်ထားပါတယ်။

ဆွေမျိုးသားချင်းမရှိဘဲ တစ်ယောက်တည်းနေတဲ့ ကွေ့ယန်ဟာ ငွေရှာဖို့ စံအိမ်ကြီးတစ်ခုမှာ အိမ်ဖော်အလုပ် ဝင်လုပ်ပါတယ်။ အဲဒီမှာ အိမ်ပြေးမလေး ယန်နဲ့ တွေ့ဆုံခဲ့တယ်။ ယန်က ကွေ့ယန်ကို အလွန်တွယ်တာပြီး စောင့်ရှောက်ပေးချင်သူပါ။ စံအိမ်ပိုင်ရှင်ရဲ့ သားက ဆိုးသွမ်းသူဖြစ်ပြီး နောက်ဆုံးမှာ သူ့အဖေအရင်းကို သတ်ဖို့ ကြိုးစားလာတယ်။ ကွေ့ယန်နဲ့ ယန်တို့က ဝင်ကယ်ဖို့ လုပ်ကြပေမယ့် မမီတော့ဘဲ အိမ်ရှင်သေဆုံးသွားသလို စံအိမ်လည်း မီးလောင်သွားပါတယ်။ ရဲဖမ်းခံရနိုင်တဲ့ အခြေအနေထဲ ရောက်လာတဲ့အခါ သွေးသားမတော်စပ်ပေမယ့် ညီအစ်မလိုဖြစ်နေတဲ့ ဒီနှစ်ယောက်ဟာ ရှင်သန်နိုင်ဖို့ ကြိုးစားကြရတယ်။ စိတ်ရောဂါအကြောင်းကို အခြေခံထားတဲ့ ဒီဇာတ်လမ်းမှာ သူတို့ကိုယ်စီ ကြုံရတဲ့ဒုက္ခတွေကို ဘယ်လိုရင်ဆိုင်ဖြေရှင်းကြသလဲဆိုတာ ဆက်ပြထားပါတယ်။

Leo ထောင်ကနေ အိမ်ပြန်ရောက်လာတဲ့အချိန်မှာ သူလိုချင်တာက လူတွေကြား ပြန်ဝင်ဆံ့ပြီး အလုပ်တစ်ခုကို ဖြစ်ဖြစ်မြောက်မြောက် လုပ်နိုင်ဖို့ပါပဲ။ ဒါကြောင့် သူ့အဒေါ်ရဲ့ ခင်ပွန်းအသစ် Frank ဦးစီးနေတဲ့ မီးရထားအပိုပစ္စည်းထုတ်လုပ်ရေးကုမ္ပဏီမှာ အလုပ်ဝင်ဖို့ ကြိုးစားပါတယ်။ ဒါပေမဲ့ အဲဒီအလုပ်ကို လုပ်နိုင်ဖို့ သင်တန်းကျောင်းတက်ရဦးမှာဖြစ်ပြီး နှစ်အနည်းငယ် စောင့်ရနိုင်တယ်ဆိုတာ သိလိုက်ရတယ်။ မုဆိုးမဖြစ်နေတဲ့ အမေကို ပြန်ထောက်ပံ့ချင်တဲ့ Leo အတွက်တော့ ဝင်ငွေချက်ချင်းရဖို့ လိုနေပါတယ်။ အဲဒီအချိန်မှာ သူငယ်ချင်း Willie လုပ်နေတဲ့ အလုပ်ကို စိတ်ဝင်စားလာတယ်။ ကုမ္ပဏီရဲ့ ဝယ်သူတွေနဲ့ ဆက်ဆံရတဲ့အလုပ်လို့ အမည်တပ်ထားပေမယ့် အတွင်းမှာ မရှင်းမလင်းကိစ္စတွေ ရှိနေတယ်။ စောင့်ဆိုင်းသင်ယူရမယ့်အလုပ်ထက် ဒီအလုပ်ဘက်ကို စိတ်ယိုင်လာတဲ့ Leo က ဝင်လုပ်နိုင်ဖို့ ကြိုးစားပါတော့တယ်။ လူတစ်ယောက်ရဲ့ ရွေးချယ်မှုတွေအပေါ် အခြေအနေတွေက ဘယ်လိုသက်ရောက်သလဲဆိုတာနဲ့ နိုင်ငံရေး၊ စီးပွားရေးလောကထဲက လောဘအကြောင်းကို ဇာတ်လမ်းမှာ တင်ပြထားပါတယ်။ Leo အဖြစ် Mark Wahlberg၊ Willie အဖြစ် Joaquin Phoenix နဲ့ Frank အဖြစ် James Caan တို့ သရုပ်ဆောင်ထားပါတယ်။

ပတ်ထရစ်ရှာဟာ တစ်ချိန်က သာယာတဲ့အိမ်ထောင်ရေး ရှိခဲ့ပေမယ့် ကိုယ်ဝန်ပျက်ကျပြီးနောက်မှာ ခင်ပွန်းရဲ့ အေးစက်တဲ့ဆက်ဆံရေးနဲ့ လျစ်လျူရှုမှုတွေကို ရင်ဆိုင်နေရပါတယ်။ ကိုယ်ဝန်ပျက်ကျခဲ့တဲ့ဒဏ်အပြင် အိမ်ကနေ အချိန်ကြာကြာ အလုပ်လုပ်နေရတာကြောင့်လည်း ငြီးငွေ့လာတယ်။ ညဘက်မှာ မှန်ဘီလူးနဲ့ ဟိုကြည့်ဒီကြည့် လုပ်ရင်း သူ့မီးဖိုချောင်နဲ့ မျက်နှာချင်းဆိုင်တိုက်ခန်းက မိန်းမငယ်တစ်ယောက်ဆီ ညတိုင်း မတူတဲ့အမျိုးသားတွေ လာနေကြတာကို သတိထားမိသွားပါတယ်။ အဲဒီမြင်ကွင်းတွေကြောင့် ခင်ပွန်းရဲ့အယုအယနဲ့ ကင်းကွာနေတဲ့ သူ့မှာ လိင်ဆန္ဒတွေ ပြန်နိုးလာပေမယ့် ခင်ပွန်းနဲ့ ပြန်နီးစပ်ဖို့ ကြိုးစားသမျှ အရာမထင်ပါဘူး။ တစ်နေ့မှာတော့ သူချောင်းကြည့်နေကျ တိုက်ခန်းက မိန်းမငယ်ဆီ လာသူတွေထဲမှာ ကိုယ့်ခင်ပွန်းကိုပါ တွေ့လိုက်ရပါတယ်။ အဲဒီနောက် ပတ်ထရစ်ရှာဟာ ခင်ပွန်းကိုသာမက တခြားဖောက်ပြန်တဲ့ အမျိုးသားတွေကိုပါ ကလဲ့စားချေဖို့ အစီအစဉ်ချပါတော့တယ်။ ပထမခြေလှမ်းအနေနဲ့ သူကိုယ်တိုင် အခကြေးငွေယူ အဖော်လိုက်ဖို့ ဆုံးဖြတ်လိုက်ပါတယ်။ ပတ်ထရစ်ရှာအဖြစ် Miss Philippines Earth 2019 ဆုရ Janelle Tee က သရုပ်ဆောင်ထားပြီး မျက်နှာချင်းဆိုင်တိုက်ခန်းက မိန်းမငယ်အဖြစ် Ava Mendez ပါဝင်ထားပါတယ်။

အင်တာနက်ပေါ် ပျံ့နှံ့နေတဲ့ အကြမ်းဖက်ခြိမ်းခြောက်မှုတစ်ခုကို ကိုရီးယားအာဏာပိုင်တွေ စစ်ဆေးနေကြပါတယ်။ ဒါပေမယ့် သံသယရှိသူက အမေရိကကိုသွားတဲ့ လေယာဉ်ပေါ် လိုက်ပါသွားပြီဆိုတာကို နောက်ကျမှ သိလိုက်ရတယ်။ အဲဒီလေယာဉ်ပေါ်က ကျန်းကျန်းမာမာရှိနေတဲ့ ခရီးသည်တစ်ဦး အကြောင်းရင်းမသိဘဲ ကြောက်မက်ဖွယ် သေဆုံးသွားတဲ့အခါ လေယာဉ်ပေါ်မှာရော မြေပြင်မှာပါ ထိတ်လန့်ကုန်ကြပါတယ်။ လေယာဉ်ရဲ့လောင်စာဆီက တဖြည်းဖြည်း လျော့လာသလို နိုင်ငံတကာကလည်း အကူအညီပေးဖို့ ငြင်းပယ်နေကြပါတယ်။ ခရီးသည်တွေကို ကယ်တင်ဖို့ လေယာဉ်မှူးနဲ့ အဖွဲ့သားတွေဟာ သူတို့တစ်သက်မှာ တစ်ခါမှ မလုပ်ဖူးတဲ့ အရေးပေါ်လုပ်ဆောင်ချက်တစ်ခုကို လုပ်ရတော့မယ့် အခြေအနေ ရောက်လာပါတယ်။ Lee Byung Hun၊ Song Kang-ho၊ Im Si Wan နဲ့ Kim Nam Gil တို့ ပါဝင်ထားတဲ့ အက်ရှင်သဲထိတ်ရင်ဖိုဇာတ်ကားဖြစ်ပြီး ကိုဗစ်ကြောင့် ရုံတင်ရက်တွေ ရွှေ့ဆိုင်းခဲ့ရပါတယ်။

အမ်မလီရို့စ်ဟာ အသက် ၁၉ နှစ်အရွယ် အေးအေးဆေးဆေး နေတတ်တဲ့ ကောင်မလေးတစ်ယောက်ပါ။ အိမ်မှာ စာဖတ်တာ၊ ဂီတလေ့လာတာတွေနဲ့ အချိန်ကုန်လေ့ရှိပေမယ့် တက္ကသိုလ်တက်ဖို့ ပညာသင်ဆုရလာတဲ့အခါ ဆရာမဖြစ်ချင်တဲ့အိပ်မက်အတွက် မိသားစုနဲ့ခွဲပြီး ကျောင်းသွားတက်ဖို့ ဆုံးဖြတ်လိုက်ပါတယ်။ နောက်ပိုင်းမှာတော့ ညဘက် မီးလောင်တဲ့အနံ့ရလို့ နိုးလာတာ၊ အဆစ်တွေ လှုပ်မရတာ၊ မျက်လုံးတွေ မည်းနက်သွားတာ၊ နာရီပေါင်းများစွာ အော်ဟစ်နေတာနဲ့ အင်းဆက်တွေ စားတာလို ထူးခြားတဲ့လက္ခဏာတွေ ဖြစ်လာပါတယ်။ မကြာခင်မှာပဲ သူ သေဆုံးသွားတဲ့အခါ ကျန်းမာရေးအခြေအနေကြောင့်လား၊ မကောင်းဆိုးဝါးပူးကပ်တာကြောင့်လား၊ သူ့သေဆုံးမှုအတွက် ဘယ်သူ့မှာ တာဝန်ရှိသလဲဆိုတဲ့ မေးခွန်းတွေ ပေါ်လာပါတယ်။ ၂၀၀၅ ခုနှစ်ထွက် ဒီသဲထိတ်ရင်ဖိုဇာတ်ကားကို Scott Derrickson က ရိုက်ကူးပြီး Jennifer Carpenter ပါဝင်သရုပ်ဆောင်ထားပါတယ်။ ၁၉၇၆ ခုနှစ်က ဂျာမနီမှာ သေဆုံးခဲ့တဲ့ Anneliese Michel ရဲ့ဖြစ်ရပ်ကို အခြေခံထားတာပါ။

အစိုးရအရာရှိတွေကို ပစ်မှတ်ထားပြီး ဆက်တိုက်သတ်ဖြတ်နေတဲ့ မျက်နှာဖုံးစွပ်အဖွဲ့တစ်ဖွဲ့ ရှိနေပါတယ်။ သူတို့က လူသတ်ပြီးတိုင်း ခြေရာလက်ရာနဲ့ သဲလွန်စ မကျန်အောင် လုပ်နိုင်တဲ့အပြင် သတ်ဖြတ်မှုကို ဗီဒီယိုရိုက်ပြီး ရဲဌာနဆီ ပို့တဲ့အထိ ရဲတင်းကြတယ်။ ရဲဌာနက ဒီအမှုကို မကိုင်တွယ်နိုင်တော့တဲ့အခါ ဘလက်စကွက်ဒ်ဆိုတဲ့အဖွဲ့ကို တာဝန်လွှဲပေးလိုက်ပါတယ်။ ဒီအဖွဲ့ကလည်း မဖြေရှင်းနိုင်တဲ့အမှု မရှိသလောက်ပဲလို့ နာမည်ကြီးပြီး ဉာဏ်ထက်တဲ့အဖွဲ့ပါ။ ခြေရာမချန်တဲ့ လူသတ်အဖွဲ့ကို သူတို့လိုက်စုံစမ်းရာက နှစ်ဖွဲ့ကြား အကွက်ချင်းပြိုင်ဆိုင်မှုတွေနဲ့ မမျှော်လင့်ထားတဲ့ လှည့်ကွက်တွေ ပေါ်လာပါတယ်။ ကမာလ်ဟာစန်း၊ ဗီဂျေးစည်သူပတီ၊ ဖဟဒ်ဖာဆစ်လ်နဲ့ ဆူရီးယားတို့ ပါဝင်သရုပ်ဆောင်ထားတဲ့ အက်ရှင်ဇာတ်ကားဖြစ်ပါတယ်။ ဇာတ်ကောင်တချို့ကတော့ Kaithi (2019) ထဲက ဇာတ်ကောင်တွေ ဖြစ်ကြပါတယ်။

ဖရန့်ခ်ဟာ သူ့အနားကနေ ထွက်ခွာသွားတဲ့ ချစ်ရသူ မာရီကို လိုက်ရှာနေပါတယ်။ သူမ ဘာကြောင့် ထွက်သွားသလဲ၊ ဘယ်ကို သွားသလဲဆိုတာ မသိရသလို ကိုယ်တိုင်လည်း ဘယ်ကစရှာရမှန်း မသိဖြစ်နေတယ်။ သူ့အတွက် မျှော်လင့်ချက်ဆိုလို့ စာအုပ်တစ်အုပ်ပဲ ရှိပါတယ်။ အဲဒီစာအုပ်ထဲက အကြောင်းတွေဟာ သူတို့နှစ်ယောက်ရဲ့ ဆက်ဆံရေးကို ရေးထားသလို ထင်ရလောက်အောင် တိုက်ဆိုင်နေတယ်။ ဒါကြောင့် မာရီကိုယ်တိုင် ရေးထားတဲ့စာအုပ်ပဲလို့ ဖရန့်ခ်က အခိုင်အမာ ယုံကြည်နေပါတယ်။ ဒီယုံကြည်ချက်နဲ့ စာအုပ်ထဲမှာပါတဲ့ နေရာတွေကို တစ်နေရာပြီးတစ်နေရာ လိုက်ရှာရင်း မာရီကို တကယ်ပြန်တွေ့နိုင်မလားဆိုတဲ့ မျှော်လင့်ချက်နောက် လိုက်နေတော့တယ်။ အချစ်နဲ့ သည်းထိတ်ရင်ဖိုအမျိုးအစားဖြစ်ပြီး အရွယ်ရောက်သူတွေအတွက် ပြင်းထန်တဲ့အခန်းတွေ ပါဝင်ပါတယ်။

ထူးခြားတဲ့ လူသားမျိုးစိတ်သစ်တစ်ခု ဖန်တီးဖို့ စမ်းသပ်ကြရာက ပြဿနာတွေ ဖြစ်လာပါတယ်။ စမ်းသပ်ခံလူသားတွေကို ရှင်းလင်းပစ်ပေမယ့် အဲဒီအထဲက မိန်းကလေးတစ်ယောက်တော့ လွတ်မြောက်သွားခဲ့တယ်။ သွေးသံရဲရဲနဲ့ လျှောက်သွားနေတဲ့ သူမကို KyungHee က အမှတ်မထင် တွေ့မိပြီးနောက် ကာကွယ်ပေးဖို့ ကြိုးစားရပါတော့တယ်။ လူသားမျိုးစိတ်အသစ်တစ်ခုလို ဖြစ်နေတဲ့ ဒီမိန်းကလေးမှာ ဘယ်လိုစွမ်းအားတွေ ရှိနေသလဲ။ ဒီစမ်းသပ်မှုကို ဘယ်သူတွေက ဘာရည်ရွယ်ချက်နဲ့ လုပ်ခဲ့ကြတာလဲ။ အဲဒီမေးခွန်းတွေနဲ့အတူ သဘာဝလွန်ဖြစ်ရပ်တွေ၊ သွေးထွက်သံယို ထိတ်လန့်စရာခန်းတွေနဲ့ အက်ရှင်ခန်းတွေကို ဆက်တွေ့ရမှာပါ။ Kim Dami နဲ့ Choi Woo-Shik တို့ ပါဝင်ခဲ့တဲ့ The Witch: The Subversion ရဲ့ အဆက်ဖြစ်ပါတယ်။ ဒီအပိုင်းမှာ Lee Jong-Suk နဲ့ Extraordinary Attorney Woo ထဲက Park Eun Bin တို့ ပါဝင်ထားပြီး Park Eun Bin က KyungHee အဖြစ် သရုပ်ဆောင်ထားပါတယ်။ ပထမပိုင်းက သရုပ်ဆောင်အတော်များများလည်း ပြန်ပါဝင်ထားကြပါတယ်။

ညတစ်ညမှာ မူးယစ်ဆေးနဲ့ လက်နက်ခဲယမ်းတွေ မှောင်ခိုသယ်လာတဲ့ ဗင်ကားတစ်စီးကို အင်စပက်တာဘီဂျွိုင်းနဲ့အဖွဲ့က ဖမ်းမိပြီး ပစ္စည်းတွေ သိမ်းဆည်းလိုက်ပါတယ်။ အဲဒီနောက် ရဲအရာရှိတစ်ယောက်ရဲ့အိမ်မှာ နယ်ထဲက အရာရှိအရာခံ အားလုံးနီးပါး စုဝေးသောက်စားကြတယ်။ သိပ်မကြာခင်မှာပဲ ဘီဂျွိုင်းကလွဲလို့ ကျန်သူအားလုံး အရက်ထဲက မူးယစ်ဆေးကြောင့် သတိလစ်ကုန်ကြပါတယ်။ ဒါဟာ သိမ်းဆည်းခံလိုက်ရတဲ့ မှောင်ခိုပစ္စည်းပိုင်ရှင်တွေ စီစဉ်ထားတဲ့အကွက်ဆိုတာ ဘီဂျွိုင်း နားလည်လိုက်တယ်။ အရာရှိတွေကို တခြားနေရာဆီ ချက်ချင်းရွှေ့ပေးရတော့မယ့်အချိန်မှာ ဘီဂျွိုင်းက ညနေခင်းကမှ သူ့လက်အောက်က ရဲတချို့ ဖမ်းခေါ်လာတဲ့ ဒီလီကို အကူအညီယူဖို့ စီစဉ်ပါတယ်။ ဒီလီကို ကုန်တင်ကားမောင်းခိုင်းပြီး သတိလစ်နေတဲ့ အရာရှိတွေကို သယ်သွားစေချင်တာပါ။ ဒီလီကတော့ ထောင်ဆယ်နှစ်ကျပြီး လွတ်ငြိမ်းချမ်းသာခွင့်နဲ့ ပြန်လွတ်လာသူပါ။ မွေးကတည်းက ဆယ်နှစ်ကြာအောင် တစ်ခါမှ မမြင်ဖူးသေးတဲ့ သမီးလေးကို တွေ့ဖို့ မိဘမဲ့ကျောင်းဆီ သွားမလို့ဖြစ်နေတယ်။ ဒီအချိန်မှာ ကြုံလာတဲ့ ဘီဂျွိုင်းခိုင်းတဲ့အလုပ်ကို သူလုပ်နိုင်ပါ့မလား၊ စောင့်မျှော်ခဲ့ရတဲ့ သမီးနဲ့ရော တွေ့ခွင့်ရပါ့မလား။ Karthi ပါဝင်သရုပ်ဆောင်ထားတဲ့ အက်ရှင်၊ သည်းထိတ်ရင်ဖိုဇာတ်ကားဖြစ်ပြီး အက၊ သီချင်းနဲ့ မင်းသမီးဇာတ်ဆောင် မပါဝင်ပါဘူး။ ဒီဇာတ်ကားထဲက ဇာတ်ကောင်တွေဟာ Vikram (2022) မှာလည်း ပြန်လည်ပါဝင်လာပါတယ်။

ဘစ်ရှော့ပ်ဟာ သူလုပ်ကြံခဲ့တဲ့သူတွေကို လူသတ်ခံရတာလို့တောင် မထင်ရဘဲ မတော်တဆသေဆုံးသွားသလို ဖြစ်အောင် ဖန်တီးနိုင်တဲ့ လုပ်ကြံရေးသမားပါ။ တည်ငြိမ်ပြီး သွေးအေးသလို အလုပ်လုပ်ရာမှာလည်း တိကျရက်စက်တဲ့သူဖြစ်ပါတယ်။ အခုတော့ အဲဒီဘဝကနေ အနားယူပြီး ဘရာဇီးမှာ ကိုယ့်အကြောင်းကို ဖုံးကွယ်နေထိုင်နေတယ်။ ဒါပေမဲ့ သူ့ဆီ မိန်းကလေးတစ်ယောက် ရောက်လာပြီး သူ့အကြောင်းကို ဖော်ထုတ်သွားတဲ့အခါ ပုန်းရှောင်နေတဲ့ဘဝက အဆုံးသတ်သွားပါတယ်။ သူ့ကို ပြန်အသုံးချချင်နေတာက ငယ်ငယ်ကတည်းက ရန်စရှိခဲ့တဲ့ ခရိန်းပါ။ ခရိန်းက ဘစ်ရှော့ပ်ရဲ့ လုပ်ကြံရေးအရည်အချင်းကို သုံးပြီး သူ့ရန်သူတွေကို ရှင်းပစ်ချင်သလို အရင်က ရန်ငြိုးအတွက်လည်း လက်စားချေချင်နေတယ်။ ဒီနှစ်ယောက်ကြား ဘာမှမဆိုင်တဲ့ ဂျီနာပါ ညပ်ပါလာရာက တစ်ယောက်အကွက်ကို တစ်ယောက်ကျော်ဖို့ ဉာဏ်ချင်းပြိုင်ကြရပါတယ်။ The Mechanic (2011) ရဲ့ အဆက်ဖြစ်ပြီး ဘစ်ရှော့ပ်အဖြစ် Jason Statham သရုပ်ဆောင်ထားပါတယ်။ Jessica Alba နဲ့ Michelle Yeoh တို့လည်း ပါဝင်ထားကြပါတယ်။

ဂျူအီးဝူနဲ့ ဂျူဝေါဝူတို့ဟာ အမြွှာညီအစ်ကိုတွေပါ။ ခရစ္စမတ်မနက်မှာ ညီဖြစ်သူ ဝေါဝူကို သေဆုံးလျက် တွေ့ရှိခဲ့ရပြီး သူ့အမှုကို မတော်တဆမှုအဖြစ် သတ်မှတ်ကာ ပိတ်လိုက်ကြတယ်။ ဒါပေမယ့် အစ်ကိုဖြစ်သူ အီးဝူကတော့ အဲဒီဆုံးဖြတ်ချက်ကို လက်မခံနိုင်ပါဘူး။ ညီရဲ့သေဆုံးမှုကို ကိုယ်တိုင်စုံစမ်းပြီး ပါဝင်ပတ်သက်သူတွေနဲ့ ဖုံးကွယ်ပေးသူအားလုံးကို လက်စားချေဖို့ အီးဝူ ဆုံးဖြတ်လိုက်တယ်။ သူ့လက်ထဲမှာရှိတဲ့ သဲလွန်စက ဝေါဝူနဲ့ နောက်ဆုံးဖုန်းပြောခဲ့တုန်းက ကြားလိုက်ရတဲ့ အသံတစ်ခုတည်းပါ။ အဲဒီအသံကို အားကိုးပြီး တရားခံကို ရှာဖွေနေရာကနေ လူငယ်ထိန်းသိမ်းရေးစခန်းထဲကို ရည်ရွယ်ချက်ရှိရှိ ဝင်သွားခဲ့ပါတယ်။ GOT7 အဖွဲ့ဝင် Park Jin-young က ဒီသည်းထိတ်ရင်ဖိုဇာတ်ကားမှာ စရိုက်မတူတဲ့ အမြွှာညီအစ်ကိုနှစ်ယောက်အဖြစ် နှစ်ကိုယ်ခွဲ သရုပ်ဆောင်ထားပါတယ်။