သည်းထိတ်ရင်ဖိုကားများ

ဘရက်ပစ် သရုပ်ဆောင်ထားတဲ့ ကြေးစားဟောင်းတစ်ယောက်ဟာ စိတ်ဒဏ်ရာတွေအတွက် ဆရာဝန်နဲ့ ပြသရင်း အလုပ်ကနေ အနားယူနေပါတယ်။ အလုပ်ပြန်လုပ်ဖို့ ဆုံးဖြတ်တဲ့အခါ လွယ်လွယ်ကူကူ အလုပ်လေးတစ်ခု ပေးဖို့ တောင်းဆိုလိုက်တယ်။ သူရလာတဲ့တာဝန်က ရထားပေါ်တက်ပြီး ပစ္စည်းတစ်ခုယူကာ ပြန်ဆင်းလာဖို့ပါပဲ။ ဒါပေမယ့် သူတက်လာတဲ့ ကျည်ဆံရထားပေါ်မှာ ဂျပန်ရဲ့အကြီးဆုံး ဂိုဏ်းခေါင်းဆောင်၊ လူသတ်သမားတွေနဲ့ ကြေးစားတွေက ကိုယ့်အကြောင်းနဲ့ကိုယ်၊ ကိုယ့်အကြံနဲ့ကိုယ် ရောက်နေကြတယ်။ လွယ်မယ်ထင်ထားတဲ့ အလုပ်ကနေ လူမျိုးစုံနဲ့ ရင်ဆိုင်ရတော့ပြီး အလွဲတွေကြားမှာ အသက်ရှင်ဖို့ ရုန်းကန်ရပါတော့တယ်။ အက်ရှင်နဲ့ ဟာသကို တွဲထားတဲ့ ရုပ်ရှင်ဖြစ်ပြီး Atomic Blond ကို ရိုက်ကူးခဲ့သလို John Wick မှာလည်း ထုတ်လုပ်သူအဖြစ် လုပ်ခဲ့တဲ့ David Leitch က ရိုက်ကူးထားပါတယ်။

ဒေ့ဗ်ဟာ တစ်ချိန်က ဘတ်စကတ်ဘောလက်ရွေးစင်တစ်ယောက် ဖြစ်ခဲ့ပြီး ချစ်သူမာရီကို လက်ထပ်ထားကာ ပျော်ရွှင်တဲ့ အိမ်ထောင်ရေးကို ပိုင်ဆိုင်ခဲ့ပါတယ်။ ဒါပေမယ့် ဒူးဒဏ်ရာကြောင့် အနားယူလိုက်ရတဲ့နောက် သူလုပ်တဲ့စီးပွားရေးတွေက ကိုဗစ်ကြောင့် တစ်ခုပြီးတစ်ခု အရှုံးပေါ်လာတယ်။ မာရီလည်း ကိုယ်ဝန်ပျက်ကျခဲ့ပြီး သူတို့ရဲ့အိမ်ထောင်ရေးမှာ အခက်အခဲတွေ စလာပါတယ်။ ဒေ့ဗ်ကိုယ်တိုင်က ဒူးဒဏ်ရာအတွက် သောက်နေရတဲ့ဆေးတွေကို စွဲလမ်းသလို ဖြစ်နေတယ်။ ဇနီးသည်နဲ့ကြားက မပြည့်ဝတဲ့ဆန္ဒတွေအတွက် သူ့ကို အရူးအမူးစွဲလမ်းတဲ့ ပရိသတ်ဟောင်း လီလာဆီမှာ ထွက်ပေါက်ရှာမိတဲ့နောက် ပြဿနာတွေ ပိုများလာပါတယ်။ ဒေ့ဗ်က လီလာကို ကိုယ်လိုသလို အသုံးချပြီး ပစ်ထားလိုက်ပေမယ့် လီလာက ငြိမ်မနေခဲ့ပါဘူး။ မာရီဆီကတစ်ဆင့် သူတို့အိမ်ထောင်ရေးထဲကို ပြန်ဝင်လာပြီး ဒီတစ်ကြိမ်မှာတော့ မာရီရဲ့ချစ်သူ ဖြစ်လာတာပါ။ ဒေ့ဗ်နဲ့ မာရီတို့က လီလာနဲ့အတူ သုံးယောက်သား ဆက်ဆံရေးတစ်ခုကို လက်ခံနိုင်မယ့် အခြေအနေရောက်လာပေမယ့် ဘယ်လိုပြဿနာတွေ ထပ်ကြုံရဦးမလဲ။ မာရီက ဒေ့ဗ်နဲ့ လီလာကြား ဘယ်သူ့ကို ရွေးမလဲ၊ လီလာကရော ဘယ်သူ့ကို ရွေးမှာလဲ။ ဒေ့ဗ်ကိုယ်တိုင်လည်း နှစ်ယောက်လုံးနဲ့ ဆက်ဆံရေးကို ထိန်းထားနိုင်ပါ့မလား။ Angeli Khang နဲ့ Hugas ထဲမှာ ပါဝင်ခဲ့တဲ့ Aj Raval တို့ သရုပ်ဆောင်ထားတဲ့ ဒရာမာရုပ်ရှင်ပါ။

Predator ရုပ်ရှင်စီးရီးထဲက ဒီဇာတ်ကားမှာတော့ လွန်ခဲ့တဲ့ နှစ် ၃၀၀ ကာလကို ပြန်ရောက်သွားပါတယ်။ အဲဒီခေတ်မှာ လူတွေကို အမဲလိုက်လာတဲ့ ပရက်ဒေတာဂြိုလ်သားနဲ့ ကိုမန်ချီလူမျိုးတွေ၊ ပြင်သစ်မုဆိုးတွေ ရင်ဆိုင်ကြရတာပါ။ သေနတ်တွေရှိတဲ့ခေတ်မှာတောင် အနိုင်နိုင်တိုက်ခိုက်ရတဲ့ ရန်သူကို အရင်ခေတ်က လူတွေ ဘယ်လိုရင်ဆိုင်ကြမလဲဆိုတာကို အက်ရှင်အသားပေးပြီး တင်ဆက်ထားပါတယ်။

မီးလောင်ထားတဲ့ လူသေလောင်းတစ်လောင်း တွေ့ရှိမှုကို စုံစမ်းဖို့ ရဲအရာရှိ ပူဂေ့က ချန်နိုင်းရဲစခန်းကို တွဲဖက်အင်စပက်တာအဖြစ် ရောက်လာပါတယ်။ သူ့ထက် ရာထူးကြီးတဲ့ ရက်သနန်က အစပိုင်းမှာ သူနဲ့ပူးပေါင်းလုပ်ရတာကို မနှစ်သက်ပေမယ့် အမှုကိုင်တွယ်ပုံကို မြင်ရတဲ့နောက် ပူဂေ့ရဲ့ထက်မြက်မှုကို အသိအမှတ်ပြုလာတယ်။ နှလုံးခုန်စက်တပ်ထားတဲ့ လူနာတစ်ယောက်ကို စစ်ဆေးမေးမြန်းနေတုန်း အဲဒီလူ လွတ်သွားလို့ လိုက်ဖမ်းကြရပါတယ်။ အဲဒီအချိန်မှာ နှလုံးခုန်စက်တပ်ထားသူတစ်ယောက်ကို လိုက်ရှာနေတဲ့ အဘီရာမီဆိုတဲ့ မိန်းကလေးနဲ့ ဆုံမိကြတယ်။ ဒီနှလုံးခုန်စက်က အမှုနဲ့ ဘယ်လိုဆက်စပ်နေမလဲ။ မျက်နှာဖုံးစွပ်ပြီး နည်းလမ်းမျိုးစုံနဲ့ လိုက်သတ်နေသူက ဘယ်သူလဲ၊ ဘာကြောင့် သတ်နေတာလဲဆိုတာနဲ့အတူ သူ့ကို ဖမ်းမိနိုင်မလားဆိုတာပါ ဆက်စုံစမ်းရမှာပါ။ တမီးလ်ရုပ်ရှင်ဖြစ်ပြီး ပူဂေ့အဖြစ် Senguttuvan နဲ့ ရက်သနန်အဖြစ် Jaypee တို့ သရုပ်ဆောင်ထားပါတယ်။

လွန်ခဲ့တဲ့ ခုနစ်နှစ်က ဖြစ်ခဲ့တဲ့အမှုတစ်ခုကြောင့် သားတွေကို ဆုံးရှုံးခဲ့ရတဲ့ Samudharam မိသားစုနဲ့ အဲဒီသေဆုံးမှုမှာ တာဝန်ရှိနေတဲ့ PRV မိသားစုတို့ကြား ရန်ငြိုးရှိနေပါတယ်။ နှစ်ဖက်စလုံးက ငွေကြေးချမ်းသာပြီး နာမည်ရှိတဲ့ မိသားစုတွေဖြစ်တာကြောင့် သူတို့ရဲ့ပဋိပက္ခနဲ့အတူ ရွာလည်း နှစ်ခြမ်းကွဲနေခဲ့တယ်။ Arun Vijay သရုပ်ဆောင်ထားတဲ့ ရာဗီးက PRV မိသားစုရဲ့ အငယ်ဆုံးသားပါ။ ဖအေတူ မအေကွဲ အစ်ကိုတွေနဲ့ စရိုက်ချင်းကွာပြီး ကြင်နာတတ်တာကြောင့် လူချစ်လူခင်များတယ်။ တစ်ဖက်မိသားစုရဲ့ သားသေဆုံးမှုအတွက် တာဝန်ရှိတယ်လို့ ခံယူထားသူကလည်း သူတစ်ယောက်တည်းပါ။ အငယ်ဆုံးဖြစ်ပေမယ့် မိသားစုတစ်ခုလုံးကို ဆင်တစ်ကောင်လို ထမ်းပိုးကာကွယ်ပေးမယ်ဆိုတဲ့ ဇာတာကြောင့် ဖခင်က ရာဗီးကို အားကိုးထားပါတယ်။ နှစ်ဖက်မိသားစုကြားက ပဋိပက္ခတွေမှာ သူ့မိသားစုကို ဘယ်လိုကယ်တင်မလဲဆိုတာကို အက်ရှင်ခန်းတွေနဲ့အတူ ဆက်ပြထားပြီး အချစ်ဇာတ်လမ်းလည်း ပါဝင်ပါတယ်။ ဗီလိန်နေရာမှာတော့ KGF ထဲက ဗီလိန်သရုပ်ဆောင် ပါဝင်ထားပါတယ်။

နည်းပညာတက္ကသိုလ်ကို စရောက်လာတဲ့ ကျောင်းသားတွေဟာ ကျောင်းသားဘဝအသစ်ကို ပျော်ပျော်ရွှင်ရွှင် ဖြတ်သန်းနေကြပါတယ်။ သူငယ်ချင်းသုံးယောက်ကလည်း ကျောင်းမှာ နှစ်ကြာကြာနေခဲ့တဲ့ စီနီယာတစ်ယောက်နဲ့ တစ်ခန်းတည်း ကျနေကြတယ်။ ဒီလိုနဲ့ ကျောင်းမှာ နေသားကျလာကြချိန်မှာပဲ ဂိတ်စောင့်ရဲ့သမီး ကျားသစ်ကိုက်ခံရတယ်ဆိုတဲ့ ဖြစ်ရပ် ပေါ်လာပါတယ်။ မိန်းကလေးကတော့ အသက်ဘေးကနေ လွတ်မြောက်ခဲ့တယ်။ ဒါပေမယ့် စူးစမ်းတတ်တဲ့ အဓိကဇာတ်ကောင် ကျောင်းသားက ဒီဖြစ်ရပ်ဟာ ကျားသစ်ကိုက်တာ မဟုတ်ကြောင်း ရိပ်မိသွားပါတယ်။ အဲဒီကနေ ဘယ်သူမှ အဖြေမရှာနိုင်သေးတဲ့ ကျောင်းရဲ့လျှို့ဝှက်ချက်ကို သူ လိုက်စုံစမ်းလာပြီး လူသေမှုတွေရဲ့ နောက်ကွယ်ကိုပါ ရှာဖွေမိလာတယ်။

တစ်ညမှာ စာရေးဆရာတစ်ယောက် ရဲစခန်းကို ရောက်လာပြီး သူ့ကို ရဲစောင့်ပေးဖို့ တောင်းဆိုပါတယ်။ သူပြောတာက သူ့ဇာတ်လမ်းထဲက ဇာတ်ကောင်တွေက ဖုန်းဆက်ပြီး ခြိမ်းခြောက်နေကြလို့တဲ့။ ဒါပေမယ့် သူက အရက်မူးနေတော့ ရဲတွေက မူးပြီး ရစ်နေတယ်လို့ပဲ ယူဆပြီး ပြန်လွှတ်လိုက်ကြတယ်။ အဲဒီညမှာပဲ မိန်းကလေးတစ်ယောက် ပျောက်ဆုံးသွားပါတယ်။ မပျောက်ခင် သူက ရဲထိန်းချုပ်ခန်းကို ဖုန်းဆက်ပြီး အဲဒီစာရေးဆရာရဲ့နာမည်ကို ပြောသွားခဲ့တယ်။ နောက်မနက် စာရေးဆရာအိမ်ကို သွားစုံစမ်းကြတဲ့အခါ သူရေးလက်စ ဇာတ်လမ်းဟာ အပြင်မှာ ဖြစ်ပျက်နေတဲ့အကြောင်းအရာနဲ့ တစ်ထပ်တည်း တူနေတာကို တွေ့လိုက်ရပါတယ်။

ဂျွန်နဲ့ ကိတ်တို့ ဇနီးမောင်နှံမှာ ကလေးနှစ်ယောက် ရှိပါတယ်။ ကိတ်က တတိယကလေးကို ကိုယ်ဝန်ဆောင်နေတုန်း ပျက်ကျသွားခဲ့လို့ နှစ်ယောက်စလုံး အကြီးအကျယ် ခံစားခဲ့ရတယ်။ ဒီဆုံးရှုံးမှုကို ဖြေသိမ့်နိုင်ဖို့ တိုင်ပင်ကြပြီး ကလေးတစ်ယောက် မွေးစားဖို့ ဆုံးဖြတ်လိုက်ကြပါတယ်။ မိဘမဲ့ဂေဟာမှာ အရွယ်နဲ့မလိုက်အောင် ရင့်ကျက်ပြီး ထူးဆန်းတဲ့စကားတွေ ပြောတတ်တဲ့ အက်စတာကို သဘောကျသွားကြလို့ အိမ်ကို ခေါ်လာခဲ့တယ်။ အက်စတာရောက်လာတာကို သမီးအငယ်က လက်ခံပေမယ့် သားဖြစ်သူကတော့ သိပ်သဘောမကျပါဘူး။ အစပိုင်းမှာ အဆင်ပြေနေခဲ့ပေမယ့် နောက်ပိုင်း ကိတ်နဲ့လည်း မပြေလည်တော့ဘူး။ ဂျွန်နဲ့တော့ အက်စတာက အမြဲ အဆင်ပြေနေတယ်။ တဖြည်းဖြည်းနဲ့ ကိတ်မှာ အက်စတာအပေါ် သံသယဝင်စရာတွေ များလာပြီး သူ့နောက်ကြောင်းကို စုံစမ်းလာပါတော့တယ်။

Decision to Leave ဟာ ပတ်ချန်းဝု ရိုက်ကူးပြီး ထျန်းဝေ အဓိကပါဝင်သရုပ်ဆောင်ထားတဲ့ ရုပ်ရှင်ပါ။ အချစ်ဇာတ်လမ်းနဲ့ သည်းထိတ်ရင်ဖိုအကြောင်းအရာကို စုံထောက်ဇာတ်လမ်းပုံစံနဲ့ တွဲဖက်တင်ဆက်ထားပါတယ်။ Old Boy နဲ့ လူသိများတဲ့ ပတ်ချန်းဝုဟာ ဒီရုပ်ရှင်နဲ့ ကိန်းရုပ်ရှင်ပွဲတော်မှာ အကောင်းဆုံးဒါရိုက်တာဆု ရရှိခဲ့ပါတယ်။

အထက်အရာရှိတစ်ယောက်က လူကုန်ကူးသူနဲ့ ပူးပေါင်းပြီး အကျင့်ပျက်ခြစားနေတာကို ဖော်ထုတ်ဖို့ ကြိုးစားခဲ့တဲ့ အထူးအေးဂျင့်တွေဟာ တာဝန်ကနေ ဆိုင်းငံ့ခံလိုက်ရပါတယ်။ အထက်လူကြီးတွေရဲ့ ထောက်ခံမှုမရတော့ပေမယ့် သူတို့က ဒီကိစ္စကို လက်လျှော့ဖို့ စိတ်ကူးမရှိကြဘူး။ မှန်တာကို ဖော်ထုတ်ဖို့အတွက် သူတို့ရဲ့ တိုက်ခိုက်ရေးကျွမ်းကျင်တဲ့ မိတ်ဆွေတွေနဲ့ စုပေါင်းပြီး ဆက်လှုပ်ရှားကြပါတယ်။ အဓိကဇာတ်ကောင် စနိုက်ပါသမားကိုတော့ ရုပ်ရှင်ထဲက စကားအရ ကမ္ဘာပေါ်မှာ အတော်ဆုံးလို့ ညွှန်းထားတယ်။ ဂျပန်မင်းသမီးတစ်ယောက်ကလည်း လုပ်ကြံရေးသမားအဖြစ် ပါဝင်ထားပြီး သူတို့ရဲ့လှုပ်ရှားမှုတွေကြားမှာ အက်ရှင်ခန်းတွေနဲ့ ဇာတ်လမ်းအလှည့်အပြောင်းတွေ တွေ့ရမှာပါ။

အာဗီနက်ရှ်ဟာ နယ်မြို့လေးတစ်မြို့မှာ နေထိုင်ပြီး ဒေသခံတွေရဲ့ ချစ်ခင်လေးစားမှုကို ရထားသူပါ။ နိုင်ငံအတွက်လည်း အားထားရတဲ့ စစ်သားတစ်ယောက်ဖြစ်တယ်။ သူလက်ထပ်ပြီး မကြာသေးခင်မှာပဲ အိန္ဒိယနဲ့ ပါကစ္စတန် စစ်ဖြစ်လာတာကြောင့် စစ်မြေပြင်ကို ထွက်သွားရပြီး တိုက်ပွဲအတွင်း ကျဆုံးသွားခဲ့ပါတယ်။ ဒါပေမယ့် အာဗီနက်ရှ်ရဲ့အဖြစ်က အဲဒီမှာ ရပ်မသွားပါဘူး။ သဘာဝလွန်ဖြစ်ရပ်တွေကြောင့် သူ ပြန်ရှင်သန်လာခဲ့တယ်။ သိပ္ပံနဲ့ ဆေးပညာလို လက်တွေ့အထောက်အထားကို အခြေခံတဲ့ နယ်ပယ်တွေကနေ ရှင်းပြဖို့ခက်တဲ့ ဖြစ်ရပ်တစ်ခုကို သူ့ဘဝမှာ ကြုံလာရတာပါ။

ဗစ်ကရမ်ဟာ အမှုတွေကို အချိန်တိုအတွင်း ဖော်ထုတ်နိုင်တဲ့ ထက်မြက်သူ အရာရှိတစ်ယောက်ပါ။ ဒါပေမယ့် အတိတ်က ဖြစ်ရပ်တစ်ခုကြောင့် စိတ်ဒဏ်ရာကြီးကြီးမားမား ခံစားနေရတယ်။ တစ်နေ့မှာ ပရီတီးဆိုတဲ့ အသက် ၁၈ နှစ်အရွယ် မိန်းကလေးတစ်ယောက် အဝေးပြေးလမ်းမပေါ်ကနေ ပျောက်ဆုံးသွားခဲ့ပြီး အဲဒီအမှုကိုလည်း မဖော်ထုတ်နိုင်ခဲ့ပါဘူး။ အမှုက တဖြည်းဖြည်း ငြိမ်သက်သွားတဲ့နောက် ဗစ်ကရမ်ရဲ့ချစ်သူ နေဟားပါ ထပ်ပျောက်သွားပါတယ်။ ဗစ်ကရမ်လည်း အခက်အခဲတွေကြားကနေ စုံစမ်းရင်း နေဟားဟာ ပရီတီးပျောက်ဆုံးမှုကို လိုက်နေတုန်း ပျောက်သွားခဲ့တာဖြစ်ကြောင်း သိလာရတယ်။ ဒီပျောက်ဆုံးမှုနှစ်ခု ဆက်စပ်နေသလား၊ မိန်းကလေးတွေကို ပြန်ရှာတွေ့နိုင်မလား၊ နောက်ကွယ်က တရားခံက ဘယ်သူလဲဆိုတဲ့ မေးခွန်းတွေနဲ့အတူ ဗစ်ကရမ်ကို စိတ်ဒဏ်ရာပေးခဲ့တဲ့ အတိတ်မှာ ဘာတွေဖြစ်ခဲ့သလဲဆိုတာပါ သိရဖို့ ရှိနေပါတယ်။ ရာဂျ်ကူမားရောင်းနဲ့ ဆာနီယားမလိုသရားတို့ ပါဝင်သရုပ်ဆောင်ထားတဲ့ မှုခင်းဇာတ်ကားပါ။

ဂရက်ဘာ၊ တစ်နည်းအားဖြင့် “ဖမ်းဆီးသူ” လို့ လူတွေသိကြတဲ့ စိတ္တဇလူသတ်သမားဟာ ကလေးငါးယောက်ကို ဖမ်းဆီးသတ်ဖြတ်ထားပေမယ့် တရားခံကိုလည်း မမိသေးသလို အလောင်းတွေကိုလည်း ရှာမတွေ့ကြပါဘူး။ ခြောက်ယောက်မြောက်အဖြစ် ဖင်း အဖမ်းခံရတဲ့အချိန်မှာတော့ ထူးခြားတဲ့အဖြစ်အပျက်တွေ စလာပါတယ်။ ဖင်းရဲ့ညီမဟာ လူသတ်သမားအကြောင်း အိပ်မက်တွေ မက်နေပြီး အဲဒီထဲက သဲလွန်စတွေကို အခြေခံကာ လိုက်ရှာဖို့ ကြိုးစားလာတယ်။ ဖင်းကလည်း အဖမ်းခံထားရတဲ့ အခန်းထဲက ဖုန်းအပျက်ဆီ ဖုန်းခေါ်ဆိုမှုတွေ ဝင်လာတာကို ကြုံရပါတယ်။ ဖုန်းဆက်လာသူတွေက သူ့အရင် ဖမ်းဆီးသတ်ဖြတ်ခံခဲ့ရတဲ့ ကလေးငါးယောက်ပါ။ ကလေးတွေဟာ တစ်ယောက်တစ်လှည့် ဖုန်းဆက်ပြီး သူတို့ လွတ်မြောက်ဖို့ ကြိုးစားခဲ့တဲ့နည်းတွေနဲ့ အသတ်ခံခဲ့ရစဉ်က အမှားတွေကို ပြောပြလာကြတယ်။ လူသတ်မှုနဲ့ ပရလောကအကြောင်း ရောစပ်ထားတဲ့ ဒီဇာတ်လမ်းမှာ ဖင်းဟာ ဝိညာဉ်တွေရဲ့အကူအညီနဲ့ ဂရက်ဘာလက်ကနေ လွတ်အောင် ရုန်းထွက်နိုင်ပါ့မလား။

ကတ်ဒူဗာ ကူရီရာချန်ဟာ မဟုတ်မခံစိတ်ရှိပြီး အမှန်တရားဘက်က ရပ်တည်ပေးတတ်သူပါ။ “ကျား” လို့ အဓိပ္ပာယ်ရတဲ့အမည်ကို ပိုင်ဆိုင်ထားတဲ့ သူ့ကို ပါလာမြို့မှာ ကလေးကအစ လူကြီးအဆုံး သူရဲကောင်းတစ်ယောက်လို သိကြပါတယ်။ တစ်နေ့မှာ အကျင့်ပျက်ဖာသာတစ်ဦးကို ပညာပေးဖို့ အကြောင်းဖန်လာရင်း မြို့မှာ တာဝန်ကျနေတဲ့ ရဲအရာရှိ ဂျိုးဆက်ချန်ဒီနဲ့ အချင်းများသွားတယ်။ အဲဒီကစလို့ နှစ်ယောက်ကြား အငြိုးအတေးတွေ ပေါ်လာပါတယ်။ အငြိုးကြီးတဲ့ ဂျိုးဆက်က ကူရီရာချန်ကို ဘယ်လိုလက်စားချေမလဲ၊ ဒီပဋိပက္ခမှာ ဘယ်သူက အနိုင်ရမလဲဆိုတာနဲ့အတူ မတရားမှုတွေအတွက် အမှုမှန်ပေါ်လာနိုင်မလားဆိုတဲ့ မေးခွန်းလည်း ရှိနေတယ်။ Prithviraj Sukumaran နဲ့ Vivek Oberoi တို့ ပါဝင်သရုပ်ဆောင်ထားတဲ့ အက်ရှင်ဇာတ်ကားပါ။

စိုင်းပလာဗီ သရုပ်ဆောင်ထားတဲ့ အဓိကဇာတ်ကောင်ဟာ သာမန်မိသားစုတစ်စုရဲ့ သမီးကြီးဖြစ်ပြီး ကျောင်းဆရာမတစ်ယောက်ပါ။ သူတို့နေထိုင်ရာမြို့မှာ ကလေးငယ်တစ်ဦးကို အုပ်စုဖွဲ့ လိင်အကြမ်းဖက်တဲ့အမှု ပေါ်ပေါက်လာရာက သူတို့မိသားစုရဲ့ဘဝ ပြောင်းလဲသွားပါတယ်။ အဲဒီအမှုမှာ သူ့အဖေက ငါးယောက်မြောက် တရားခံအဖြစ် စွပ်စွဲခံထားရတာပါ။ မိသားစုလိုက် အမှုရင်ဆိုင်ရတော့မယ့်အချိန်မှာ အဖေဟာ အပြစ်မရှိဘဲ စွပ်စွဲခံရသူလား၊ တကယ်ကျူးလွန်ခဲ့သူလားဆိုတဲ့ မေးခွန်းက ပေါ်လာပါတယ်။ အမှုကို ဖော်ထုတ်သွားပုံနဲ့အတူ အဲဒီမေးခွန်းတွေနောက် လိုက်သွားရတဲ့ ဒရာမာနဲ့ လျှို့ဝှက်သည်းထိတ်ရင်ဖိုဇာတ်ကားပါ။ လိင်အကြမ်းဖက်မှုအတွက် ခံရသူရဲ့ ဖြစ်တည်မှုနဲ့ ဝတ်စားဆင်ယင်မှုကို အပြစ်တင်လို့မရတဲ့အကြောင်းကိုလည်း မူရင်းမိတ်ဆက်စာက မေးခွန်းထုတ်ထားပါတယ်။

အိန္ဒိယတောင်ပိုင်း တမီးလ်နန်ဒူးမှာ ကြက်တိုက်တဲ့ဓလေ့ဟာ ရှေးကတည်းက ရှိခဲ့ပါတယ်။ မာဒူရိုင်နယ်က တိုက်ကြက်တွေကို လေ့ကျင့်ပေးသူ ပက်တရာကာရန်နဲ့ စုံစမ်းရေးရဲအရာရှိ ရာသင်နာဆာမီတို့ကလည်း ကြက်တိုက်ပွဲတွေမှာ အပြင်းအထန် အပြိုင်အဆိုင်ဖြစ်နေကြသူတွေပါ။ ပက်တရာကာရန်ရဲ့ ကျွမ်းကျင်မှုကြောင့် ရာသင်နာဆာမီက တစ်ခါမှ အနိုင်မရခဲ့ဘူး။ သူ့အမေ မသေခင်မှာ ပက်တရာကာရန်ကို နိုင်ချင်တဲ့ ရာသင်နာဆာမီက နည်းမျိုးစုံနဲ့ ကြိုးစားနေပါတယ်။ ပက်တရာကာရန်ရဲ့အုပ်စုထဲမှာတော့ ကာရူပူနဲ့ ဒူရေယန်က သူအနှစ်သက်ဆုံးလူတွေပါ။ ကာရူပူဟာ တိုက်ကြက်တွေ မွေးမြူထိန်းကျောင်းရာမှာ ပါရမီရှိသူဖြစ်ပြီး အီရာနီဆိုတဲ့ မိန်းကလေးကို ချစ်မိနေတယ်။ အီရာနီကတော့ သူ့ကို တကယ်ချစ်လို့မဟုတ်ဘဲ တခြားတစ်ယောက်ကို ရှင်းထုတ်ချင်တာကြောင့် ချစ်တယ်လို့ လိမ်ပြောထားပါတယ်။ ဒီအချစ်ရေးကြောင့် ကာရူပူ ရင်ကွဲရမလား၊ အီရာနီကရော နောက်ပိုင်းမှာ သူ့ကို တကယ်ချစ်လာမလားဆိုတာ မသေချာသေးပါဘူး။ တစ်ဖက်မှာလည်း ပက်တရာကာရန်နဲ့ ရာသင်နာဆာမီတို့ရဲ့ ပြိုင်ဆိုင်မှုက ဘယ်လိုဆက်ဖြစ်လာမလဲဆိုတာ ရှိနေတယ်။ ရိုးရာကြက်တိုက်ပွဲတွေကနေ လူတွေရဲ့ ရှုပ်ထွေးတဲ့ဘဝနဲ့ ဆက်ဆံရေးတွေဆီ ဇာတ်လမ်းကို ချဲ့ပြထားပါတယ်။

ဂျွန်လူသာဟာ အိမ်ကိုတောင် မပြန်နိုင်လောက်အောင် အလုပ်များနေတဲ့ နယ်မြေခံရဲတစ်ယောက်ပါ။ ညီမဖြစ်သူရဲ့ မင်္ဂလာဆောင်ကို သွားဖို့တောင် အချိန်မနည်းလုရတဲ့အထိ တာဝန်တွေကြားမှာ နေ့စဉ်ဖြတ်သန်းနေရပါတယ်။ တစ်နေ့မှာတော့ သူတာဝန်ကျရာ နယ်မြေအတွင်း ဖြစ်ပွားတဲ့ မတော်တဆမှုတစ်ခုနဲ့ ပတ်သက်လာပြီး အဲဒီအမှုက နိုင်ငံရေးနဲ့ပါ ဆက်နွယ်နေတာကို ကြုံရတယ်။ ဒီအမှုကို ဂျွန်လူသာ ဘယ်လိုရင်ဆိုင်ဖြေရှင်းမလဲဆိုတာကို လိုက်ပြထားတဲ့ အိန္ဒိယစုံထောက်သည်းထိတ်ရင်ဖိုဇာတ်ကားပါ။ ဒါရိုက်တာ Abhijith Joseph က အမှုအကြောင်းကို တဖြည်းဖြည်း ဖော်ထုတ်သွားတဲ့ပုံစံနဲ့ ရိုက်ကူးထားပါတယ်။

Ben Affleck ပါဝင်သရုပ်ဆောင်ထားတဲ့ အက်ရှင်နဲ့ မှုခင်းဇာတ်ကားပါ။ အဓိကဇာတ်ကောင်ဟာ ငယ်စဉ်က အော်တစ်ဇင်ရှိလို့ အထူးကျွမ်းကျင်သူတစ်ဦးဆီမှာ ကုသမှုခံယူရင်း နေခဲ့ရပါတယ်။ အရွယ်ရောက်လာတဲ့အခါမှာတော့ သင်္ချာဉာဏ်ထူးချွန်တဲ့ စာရင်းကိုင်တစ်ယောက် ဖြစ်လာတယ်။ သာမန်စာရင်းကိုင်တွေ တစ်နှစ်လောက်လုပ်ရမယ့် စာရင်းကို သူက တစ်ညတည်းနဲ့ လုပ်နိုင်သူပါ။ သူလုပ်ပေးနေတဲ့အလုပ်တွေက လူဆိုးဂိုဏ်းတွေရဲ့ ရှုပ်ထွေးနေတဲ့ ငွေစာရင်းတွေကို စစ်ဆေးပေးတာနဲ့ ငွေကြေးခဝါချပေးတာတွေ ဖြစ်ပါတယ်။ ဖုန်းထဲက အသံကိုပဲ ကြားရတဲ့ လျှို့ဝှက်မိန်းကလေးတစ်ယောက်ကလည်း သူ့ကို ကူညီပေးနေတယ်။ လူဆိုးဂိုဏ်းတွေကြားမှာ အလုပ်လုပ်ပေမယ့် သူဘယ်သူလဲဆိုတာကို ဖုံးကွယ်ထားနိုင်သလို တိုက်ခိုက်ရေးနဲ့ လက်နက်မျိုးစုံ အသုံးပြုရာမှာလည်း ကျွမ်းကျင်ပါတယ်။ တစ်ခါမှာတော့ သူဖော်ထုတ်လိုက်တဲ့ ငွေကြေးမသမာမှုတစ်ခုထဲ အပြစ်မဲ့မိန်းကလေးတစ်ယောက် ပါဝင်ပတ်သက်နေပါတယ်။ အဲဒီမိန်းကလေးကို ကြေးစားတွေက နှုတ်ပိတ်ဖို့ လိုက်လာကြတဲ့အခါ သူက ကယ်တင်ပေးရင်း ကိုယ်ဖော်ထုတ်မိတဲ့ကိစ္စကို အဆုံးအထိ လိုက်ရှင်းဖို့ ကြိုးစားရပါတော့တယ်။

ကယ်ရီ၊ မက်ဆင်း၊ အေဂျေ၊ စကွစ်ရှ်၊ ရုသ်၊ ဝေါလ်တာတို့အပါအဝင် လူရှစ်ယောက်ဟာ ဘာတွေကြုံရမယ်မှန်း မသိဘဲ OctoGames ဆိုတဲ့ ကစားပွဲထဲ ဝင်ပါမိကြပါတယ်။ ရေဘဝဲရဲ့ လက်တံရှစ်ခုကို ကိုယ်စားပြုထားတဲ့ ဒီပွဲမှာ လူရှစ်ယောက်က ဂိမ်းရှစ်မျိုး ကစားကြရမှာပါ။ ကစားနည်းတွေက ကလေးကစားနည်းတွေဖြစ်ပေမဲ့ ရှုံးသွားသူတွေ ပေးဆပ်ရမှာက ကိုယ့်အသက်နဲ့ ဘဝဖြစ်နေတယ်။ ဒီလူသတ်ကစားပွဲကို ဖန်တီးထားသူက follower သန်းရာချီရှိတဲ့ နာမည်ကျော် YouTuber ဂျက်စ်ပရိုပါ။ ပါဝင်သူတွေက ဂိမ်းရဲ့သရုပ်မှန်ကို သိသွားချိန်မှာ နောက်ပြန်ဆုတ်လို့ မရတော့ဘဲ အသက်ရှင်ကျန်ဖို့ ရုန်းကန်ကြရပါတော့တယ်။ ဘယ်သူတွေ ဆက်ရှင်သန်ပြီး ဘယ်သူတွေ ရှုံးနိမ့်သွားမလဲဆိုတဲ့ ပဟေဠိနဲ့အတူ အခက်အခဲကြားမှာ ပေါ်လာတဲ့ သံယောဇဉ်နဲ့ ကိုယ်ချင်းစာတရား၊ ကောက်ကျစ်မှုနဲ့ တစ်ကိုယ်ကောင်းဆန်မှု၊ လူတွေရဲ့ ရူးသွပ်မိုက်မဲမှုတွေကို ထိတ်လန့်စရာ ကစားပွဲတွေကြားမှာ တွေ့ရပါတယ်။

နာဂဂျွန်နာအခီနယ်နီနဲ့ ဆိုနလ်ချောင်ဟန်တို့ ပါဝင်ထားတဲ့ ဒီအက်ရှင်ဇာတ်ကားမှာ ဗစ်ကရမ်နဲ့ ပရီယားတို့ဟာ ဒူဘိုင်းမှာ တာဝန်ကျနေတဲ့ အင်တာပိုလ်အရာရှိတွေပါ။ အလုပ်တွဲလုပ်နေကြသလို ချစ်သူတွေလည်း ဖြစ်ကြပါတယ်။ ဗစ်ကရမ်ကတော့ အတိတ်က ဖြစ်ရပ်ဆိုးတစ်ခုကြောင့် ဒေါသကို မထိန်းနိုင်ဘဲ ခံစားချက်နောက်လိုက်ပြီး ပေါက်ကွဲလွယ်သူ ဖြစ်နေတယ်။ တာဝန်တစ်ခု ထမ်းဆောင်နေတုန်း လွဲချော်မှုတစ်ခု ဖြစ်ခဲ့ပြီး အဲဒီကနေ သူတို့နှစ်ယောက် လမ်းခွဲသွားကြပါတယ်။ ဗစ်ကရမ်ကလည်း ဒုစရိုက်လောကကို အမြစ်ပြတ်ရှင်းပစ်ဖို့ ဆုံးဖြတ်လိုက်တယ်။ အဲဒီဆုံးဖြတ်ချက်ကို အကောင်အထည်ဖော်နေချိန်မှာပဲ သူ့မိသားစု အန္တရာယ်နဲ့ကြုံလာပြီး အသက်အန္တရာယ် ခြိမ်းခြောက်ခံရတော့တာပါ။

ရစ်ဂ်စ်က အမြင်မတော်တာတွေ့ရင် ကိုယ့်ကိစ္စဟုတ်ဟုတ် မဟုတ်ဟုတ် ဝင်ပါတတ်သူပါ။ တတိယပိုင်းမှာလည်း ဘယ်သူ့စကားကိုမှ နားမထောင်ဘဲ စွန့်စားရင်း ပြဿနာတွေထဲ ဝင်မိနေတုန်းပဲ။ သူ့တွဲဖက် ဆာဂျင်မာတော့ဖ်ကတော့ ပင်စင်ယူဖို့ ရှစ်ရက်ပဲ ကျန်တော့ပေမယ့် ရစ်ဂ်စ်ကြောင့် အေးအေးဆေးဆေး မနေရဘဲ ပြေးလွှားပစ်ခတ်နေရဆဲ ဖြစ်ပါတယ်။ ရဲဘက်သုံး အမာခံသံချပ်ကာကားတစ်စီး အခိုးခံရတာကို သူတို့နှစ်ယောက် ဝင်တားကြရာက လက်နက်မှောင်ခိုလုပ်နေတဲ့ ဂိုဏ်းတစ်ခုနဲ့ ထိပ်တိုက်တွေ့သွားတယ်။ ပင်စင်ယူရက် နီးလာတဲ့ မာတော့ဖ်လည်း တွဲဖက်ဖြစ်သူနဲ့အတူ နောက်ထပ်အရှုပ်အရှင်းတွေထဲ ပါသွားတော့တာပါ။

Bruce Willis သရုပ်ဆောင်ထားတဲ့ အက်ဟာ အသွင်ယူပြီး လျှို့ဝှက်စုံစမ်းနေတုန်း ပြဿနာတက်ခဲ့လို့ ရာထူးချခံထားရတဲ့ FBI အေးဂျင့်တစ်ယောက်ပါ။ တစ်ဖက်မှာတော့ အော်တစ်ဇင်ရှိတဲ့ ဆိုင်မွန်ဆိုတဲ့ ကလေးတစ်ယောက်က မာကျူရီလို့ခေါ်တဲ့ လျှို့ဝှက်ကုဒ်ကို မတော်တဆ ဖော်ထုတ်မိသွားပါတယ်။ အဲဒီကစပြီး ဆိုင်မွန်ရဲ့အသက်ပါ အန္တရာယ်ရှိလာတော့တယ်။ ဆိုင်မွန်နဲ့ အက်တို့ တွေ့ဆုံကြတဲ့အခါ ဘာတွေဖြစ်လာမလဲ။ ကုဒ်ဖော်မိတဲ့ ကလေးတစ်ယောက်ကို ဘာကြောင့် ဒီလောက်အသည်းအသန် သတ်ချင်နေကြတာလဲ၊ ဆိုင်မွန်ကရော အန္တရာယ်တွေကြားကနေ အသက်ရှင်လွတ်မြောက်နိုင်ပါ့မလားဆိုတဲ့ မေးခွန်းတွေနဲ့ ဇာတ်လမ်းဆက်သွားပါတယ်။

ဆိုနီယားဟာ အလွန်ချမ်းသာတဲ့ ကာစီနိုပိုင်ရှင်တစ်ယောက်ဖြစ်ပြီး တစ်နှစ်ခွဲအရွယ် သားလေးနဲ့ နှစ်ယောက်တည်း နေထိုင်သူပါ။ အသက်နဲ့အမျှ ချစ်ရတဲ့ သားလေး ပျောက်သွားတာ ရက်အတော်ကြာနေပြီဖြစ်လို့ ပြန်ရှာတွေ့သူကို ဆုငွေ ၂၅ သိန်း ပေးမယ်ဆိုပြီး သတင်းစာထဲမှာ ကြေညာထားပါတယ်။ တစ်ရက်မှာတော့ ကလေးကို တွေ့ထားတဲ့ အတွဲတစ်တွဲက အဲဒီကြေညာချက်ကို သိပြီး ဆိုနီယားဆီ သားလေးကို ပြန်ပို့ပေးဖို့ လာကြတယ်။ ဒါပေမယ့် အဲဒီညမှာပဲ ဆိုနီယား အသတ်ခံလိုက်ရပါတယ်။ သူအသတ်ခံရတဲ့ညအတွင်း အိမ်ထဲကို ကိုယ့်အကြံအစည်နဲ့ကိုယ် ဝင်ထွက်သွားလာခဲ့သူတွေကလည်း အများကြီးရှိနေတော့ အဲဒီလူတွေထဲက ဘယ်သူဟာ လူသတ်တရားခံလဲဆိုတာ ရှာဖွေရတော့မှာပါ။ ရှာဟစ်ကပူး၊ အရှေးခန်နားနဲ့ ကရီနားကပူးတို့ အဓိက ပါဝင်ထားပြီး ဂျွန်နီလီဗာနဲ့ ပရေရှ်ရာဝလ်တို့လည်း သရုပ်ဆောင်ထားပါတယ်။ လူသတ်မှု ပဟေဠိကို ဖော်ထုတ်ရတဲ့ ဇာတ်လမ်းကြားမှာ ဟာသခန်းတွေလည်း ရောနှောပါဝင်တယ်။

Gotham မြို့ကို ကာကွယ်ပေးနေတဲ့ Batman က ဒီတစ်ခါမှာတော့ Joker နဲ့ ရင်ဆိုင်ရပါတယ်။ Joker က ငွေကြေးနဲ့ အာဏာရဖို့ ကြိုးစားနေတဲ့ ရန်သူမျိုး မဟုတ်ဘူး။ လူတွေကို ဒုက္ခပေးပြီး မြို့တစ်မြို့လုံး ပျက်စီးရှုပ်ထွေးသွားတာကိုပဲ လိုချင်နေသူပါ။ သူ့ကိုတားဖို့ဆိုတာ Batman အနေနဲ့ ပုံမှန်လုပ်နေကျနည်းတွေနဲ့ မလုံလောက်တော့ပါဘူး။ Joker ရဲ့ အကြံတွေကို ဖော်ထုတ်ဖို့ ကြိုးစားရင်း Batman ရဲ့ စုံထောက်ဉာဏ်နဲ့ တိုက်ခိုက်နိုင်စွမ်း နှစ်မျိုးစလုံးကို မြင်ရမှာပါ။ Heath Ledger သရုပ်ဆောင်ထားတဲ့ Joker က ဘာလိုချင်တာလဲဆိုပြီး ခန့်မှန်းရခက်နေတာက ဇာတ်လမ်းကို ပိုတင်းကျပ်စေတယ်။ Christian Bale ရဲ့ Batman နဲ့ သူတို့နှစ်ယောက် ရင်ဆိုင်ကြပုံကို Christopher Nolan က မှုခင်းနဲ့ အက်ရှင်ဇာတ်လမ်းအဖြစ် ချိတ်ဆက်ထားတာဖြစ်လို့ တိုက်ခိုက်ခန်းတွေကြည့်ရသလို ဘယ်သူက ဘယ်လိုအကွက်ရွှေ့မလဲဆိုတာကိုလည်း စောင့်ကြည့်ရပါတယ်။